📜
නමො තස්ස භගවතො අරහතො සම්මාසම්බුද්ධස්ස
ඛුද්දකනිකායෙ
ථෙරාපදානපාළි
(දුතියො භාගො)
43. සකිංසම්මජ්ජකවග්ගො
1. සකිංසම්මජ්ජකත්ථෙරඅපදානං
‘‘විපස්සිනො ¶ ¶ ¶ භගවතො, පාටලිං බොධිමුත්තමං;
දිස්වාව තං පාදපග්ගං, තත්ථ චිත්තං පසාදයිං.
‘‘සම්මජ්ජනිං ගහෙත්වාන, බොධිං සම්මජ්ජි තාවදෙ;
සම්මජ්ජිත්වාන තං බොධිං, අවන්දිං පාටලිං අහං.
‘‘තත්ථ චිත්තං පසාදෙත්වා, සිරෙ කත්වාන අඤ්ජලිං;
නමස්සමානො තං බොධිං, ගඤ්ඡිං පටිකුටිං අහං.
‘‘තාදිමග්ගෙන ¶ ගච්ඡාමි, සරන්තො බොධිමුත්තමං;
අජගරො මං පීළෙසි, ඝොරරූපො මහබ්බලො.
‘‘ආසන්නෙ ¶ මෙ කතං කම්මං, ඵලෙන තොසයී මමං;
කළෙවරං මෙ ගිලති, දෙවලොකෙ රමාමහං.
‘‘අනාවිලං මම චිත්තං, විසුද්ධං පණ්ඩරං සදා;
සොකසල්ලං න ජානාමි, චිත්තසන්තාපනං මම.
‘‘කුට්ඨං ගණ්ඩො කිලාසො ච, අපමාරො විතච්ඡිකා;
දද්දු කණ්ඩු ච මෙ නත්ථි, ඵලං සම්මජ්ජනායිදං [සම්මජ්ජනෙ ඉදං (සී.)].
‘‘සොකො ¶ ච පරිදෙවො ච, හදයෙ මෙ න විජ්ජති;
අභන්තං උජුකං චිත්තං, ඵලං සම්මජ්ජනායිදං.
‘‘සමාධීසු ¶ න මජ්ජාමි [සමාධීසු න සජ්ජාමි (සී.), සමාධිං පුන පජ්ජාමි (ස්යා)], විසදං හොති මානසං;
යං යං සමාධිමිච්ඡාමි, සො සො සම්පජ්ජතෙ මමං.
‘‘රජනීයෙ න රජ්ජාමි, අථො දුස්සනියෙසු [දොසනියෙසු (සී. ස්යා. ක.)] ච;
මොහනීයෙ න මුය්හාමි, ඵලං සම්මජ්ජනායිදං.
‘‘එකනවුතිතො [එකනවුතෙ ඉතො (සී. ස්යා.)] කප්පෙ, යං කම්මමකරිං තදා;
දුග්ගතිං නාභිජානාමි, ඵලං සම්මජ්ජනායිදං.
‘‘කිලෙසා ඣාපිතා මය්හං, භවා සබ්බෙ සමූහතා;
නාගොව බන්ධනං ඡෙත්වා, විහරාමි අනාසවො.
‘‘ස්වාගතං වත මෙ ආසි, මම බුද්ධස්ස සන්තිකෙ;
තිස්සො විජ්ජා අනුප්පත්තා, කතං බුද්ධස්ස සාසනං.
‘‘පටිසම්භිදා චතස්සො, විමොක්ඛාපි ච අට්ඨිමෙ;
ඡළභිඤ්ඤා සච්ඡිකතා, කතං බුද්ධස්ස සාසනං’’.
ඉත්ථං සුදං ආයස්මා සකිංසම්මජ්ජකො ථෙරො ඉමා ගාථායො
අභාසිත්ථාති.
සකිංසම්මජ්ජකත්ථෙරස්සාපදානං පඨමං.
2. එකදුස්සදායකත්ථෙරඅපදානං
‘‘නගරෙ ¶ හංසවතියා, අහොසිං තිණහාරකො;
තිණහාරෙන ජීවාමි, තෙන පොසෙමි දාරකෙ.
‘‘පදුමුත්තරො නාම ජිනො, සබ්බධම්මාන පාරගූ;
තමන්ධකාරං නාසෙත්වා, උප්පජ්ජි ලොකනායකො.
‘‘සකෙ ¶ ඝරෙ නිසීදිත්වා, එවං චින්තෙසි තාවදෙ;
‘බුද්ධො ලොකෙ සමුප්පන්නො, දෙය්යධම්මො න විජ්ජති.
‘‘‘ඉදං ¶ මෙ සාටකං එකං, නත්ථි මෙ කොචි දායකො;
දුක්ඛො නිරයසම්ඵස්සො, රොපයිස්සාමි දක්ඛිණං’.
‘‘එවාහං චින්තයිත්වාන, සකං චිත්තං පසාදයිං;
එකං දුස්සං ගහෙත්වාන, බුද්ධසෙට්ඨස්සදාසහං.
‘‘එකං ¶ දුස්සං දදිත්වාන, උක්කුට්ඨිං සම්පවත්තයිං;
‘යදි බුද්ධො තුවං වීර, තාරෙහි මං මහාමුනි’.
‘‘පදුමුත්තරො ලොකවිදූ, ආහුතීනං පටිග්ගහො;
මම දානං පකිත්තෙන්තො, අකා මෙ අනුමොදනං.
‘‘‘ඉමිනා එකදුස්සෙන, චෙතනාපණිධීහි ච;
කප්පසතසහස්සානි, විනිපාතං න ගච්ඡසි.
‘‘‘ඡත්තිංසක්ඛත්තුං දෙවින්දො, දෙවරජ්ජං කරිස්සසි;
තෙත්තිංසක්ඛත්තුං රාජා ච, චක්කවත්තී [චක්කවත්ති (ස්යා.)] භවිස්සසි.
‘‘‘පදෙසරජ්ජං විපුලං, ගණනාතො අසඞ්ඛියං [අසඞ්කයං (ස්යා. ක.) එවමුපරිපි];
දෙවලොකෙ මනුස්සෙ වා, සංසරන්තො තුවං භවෙ.
‘‘‘රූපවා ගුණසම්පන්නො, අනවක්කන්තදෙහවා [අනුවත්තන්ත… (ස්යා)];
අක්ඛොභං අමිතං දුස්සං, ලභිස්සසි යදිච්ඡකං’.
‘‘ඉදං වත්වාන සම්බුද්ධො, ජලජුත්තමනාමකො;
නභං අබ්භුග්ගමී වීරො [ධීරො (සී. ස්යා.)], හංසරාජාව අම්බරෙ.
‘‘යං ¶ යං යොනුපපජ්ජාමි, දෙවත්තං අථ මානුසං;
භොගෙ මෙ ඌනතා නත්ථි, එකදුස්සස්සිදං ඵලං.
‘‘පදුද්ධාරෙ ¶ පදුද්ධාරෙ, දුස්සං නිබ්බත්තතෙ මමං;
හෙට්ඨා දුස්සම්හි තිට්ඨාමි, උපරිච්ඡදනං මම.
‘‘චක්කවාළං උපාදාය, සකානනං සපබ්බතං;
ඉච්ඡමානො චහං අජ්ජ, දුස්සෙහච්ඡාදයෙය්ය තං.
‘‘තෙනෙව එකදුස්සෙන, සංසරන්තො භවාභවෙ;
සුවණ්ණවණ්ණො හුත්වාන, සංසරාමි භවාභවෙ.
‘‘විපාකං ¶ විඑකදුස්සස්ස, නාජ්ඣගං කත්ථචික්ඛයං;
අයං මෙ අන්තිමා ජාති, විපච්චති ඉධාපි මෙ.
‘‘සතසහස්සිතො කප්පෙ, යං දුස්සමදදිං තදා;
දුග්ගතිං නාභිජානාමි, එකදුස්සස්සිදං ඵලං.
‘‘කිලෙසා ඣාපිතා මය්හං…පෙ… විහරාමි අනාසවො.
‘‘ස්වාගතං වත මෙ ආසි…පෙ… කතං බුද්ධස්ස සාසනං.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා එකදුස්සදායකො ථෙරො ඉමා ගාථායො අභාසිත්ථාති;
එකදුස්සදායකත්ථෙරස්සාපදානං දුතියං.
3. එකාසනදායකත්ථෙරඅපදානං
‘‘හිමවන්තස්සාවිදූරෙ ¶ ¶ , ගොසිතො නාම පබ්බතො;
අස්සමො සුකතො මය්හං, පණ්ණසාලා සුමාපිතා.
‘‘නාරදො නාම නාමෙන, කස්සපො ඉති මං විදූ;
සුද්ධිමග්ගං ගවෙසන්තො, වසාමි ගොසිතෙ තදා.
‘‘පදුමුත්තරො නාම ජිනො, සබ්බධම්මාන පාරගූ;
විවෙකකාමො සම්බුද්ධො, අගඤ්ඡි අනිලඤ්ජසා.
‘‘වනග්ගෙ ගච්ඡමානස්ස, දිස්වා රංසිං මහෙසිනො;
කට්ඨමඤ්චං පඤ්ඤාපෙත්වා, අජිනඤ්ච අපත්ථරිං.
‘‘ආසනං ¶ පඤ්ඤාපෙත්වාන, සිරෙ කත්වාන අඤ්ජලිං;
සොමනස්සං පවෙදිත්වා, ඉදං වචනමබ්රවිං.
‘‘‘සල්ලකත්තො මහාවීර, ආතුරානං තිකිච්ඡකො;
මමං රොගපරෙතස්ස [රාග… (ස්යා.)], තිකිච්ඡං දෙහි නායක.
‘‘‘කල්ලත්ථිකා යෙ පස්සන්ති, බුද්ධසෙට්ඨ තුවං මුනෙ;
ධුවත්ථසිද්ධිං පප්පොන්ති, එතෙසං අජරො [ජජ්ජරො (සී. පී. ක.)] භවෙ.
‘‘‘න ¶ මෙ දෙය්යධම්මො අත්ථි, පවත්තඵලභොජිහං;
ඉදං මෙ ආසනං අත්ථි [න මෙ දෙය්යං තව අත්ථි (සී. ස්යා.)], නිසීද කට්ඨමඤ්චකෙ’.
‘‘නිසීදි තත්ථ භගවා, අසම්භීතොව [අච්ඡම්භිතොව (ස්යා. ක.)] කෙසරී;
මුහුත්තං වීතිනාමෙත්වා, ඉදං වචනමබ්රවි.
‘‘‘විසට්ඨො ¶ [විස්සත්ථො (සී. පී), විස්සට්ඨො (ස්යා. ක.)] හොහි මා භායි, ලද්ධො ජොතිරසො තයා;
යං තුය්හං පත්ථිතං සබ්බං, පරිපූරිස්සතිනාගතෙ [පරිපූරිස්සතාසනං (ස්යා. ක.)].
‘‘‘න මොඝං තං කතං තුය්හං, පුඤ්ඤක්ඛෙත්තෙ අනුත්තරෙ;
සක්කා උද්ධරිතුං අත්තා, යස්ස චිත්තං පණීහිතං [සුනීහිතං (ස්යා.)].
‘‘‘ඉමිනාසනදානෙන, චෙතනාපණිධීහි ච;
කප්පසතසහස්සානි, විනිපාතං න ගච්ඡසි.
‘‘‘පඤ්ඤාසක්ඛත්තුං දෙවින්දො, දෙවරජ්ජං කරිස්සසි;
අසීතික්ඛත්තුං රාජා ච, චක්කවත්තී භවිස්සසි.
‘‘‘පදෙසරජ්ජං ¶ විපුලං, ගණනාතො අසඞ්ඛියං;
සබ්බත්ථ සුඛිතො හුත්වා, සංසාරෙ සංසරිස්සසි’.
‘‘ඉදං වත්වාන සම්බුද්ධො, ජලජුත්තමනාමකො;
නභං අබ්භුග්ගමී වීරො, හංසරාජාව අම්බරෙ.
‘‘හත්ථියානං අස්සයානං, සරථං සන්දමානිකං;
ලභාමි සබ්බමෙවෙතං, එකාසනස්සිදං ඵලං.
‘‘කානනං පවිසිත්වාපි, යදා ඉච්ඡාමි ආසනං;
මම සඞ්කප්පමඤ්ඤාය, පල්ලඞ්කො උපතිට්ඨති.
‘‘වාරිමජ්ඣගතො සන්තො, යදා ඉච්ඡාමි ආසනං;
මම සඞ්කප්පමඤ්ඤාය, පල්ලඞ්කො උපතිට්ඨති.
‘‘යං ¶ යං යොනුපපජ්ජාමි, දෙවත්තං අථ මානුසං;
පල්ලඞ්කසතසහස්සානි, පරිවාරෙන්ති මං සදා.
‘‘දුවෙ ¶ ¶ භවෙ සංසරාමි, දෙවත්තෙ අථ මානුසෙ;
දුවෙ කුලෙ පජායාමි, ඛත්තියෙ අථ බ්රාහ්මණෙ.
‘‘එකාසනං දදිත්වාන, පුඤ්ඤක්ඛෙත්තෙ අනුත්තරෙ;
ධම්මපල්ලඞ්කමාදාය [ධම්මපල්ලඞ්කමඤ්ඤාය (ස්යා. ක.)], විහරාමි අනාසවො.
‘‘සතසහස්සිතො කප්පෙ, යං දානමදදිං තදා;
දුග්ගතිං නාභිජානාමි, එකාසනස්සිදං ඵලං.
‘‘කිලෙසා ඣාපිතා මය්හං…පෙ… විහරාමි අනාසවො.
‘‘ස්වාගතං වත මෙ ආසි…පෙ… කතං බුද්ධස්ස සාසනං.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා එකාසනදායකො ථෙරො ඉමා ගාථායො
අභාසිත්ථාති.
එකාසනදායකත්ථෙරස්සාපදානං තතියං.
4. සත්තකදම්බපුප්ඵියත්ථෙරඅපදානං
‘‘හිමවන්තස්සාවිදූරෙ, කුක්කුටො [කදම්බො (සී. ස්යා. පී.)] නාම පබ්බතො;
තම්හි පබ්බතපාදම්හි, සත්ත බුද්ධා වසිංසු තෙ.
‘‘කදම්බං පුප්ඵිතං දිස්වා, පග්ගහෙත්වාන අඤ්ජලිං;
සත්ත මාලා ගහෙත්වාන, පුඤ්ඤචිත්තෙන [පුණ්ණචිත්තෙන (ක.)] ඔකිරිං.
‘‘තෙන ¶ කම්මෙන සුකතෙන, චෙතනාපණිධීහි ච;
ජහිත්වා මානුසං දෙහං, තාවතිංසමගච්ඡහං.
‘‘චතුන්නවුතිතො ¶ කප්පෙ, යං කම්මමකරිං තදා;
දුග්ගතිං නාභිජානාමි, බුද්ධපූජායිදං ඵලං.
‘‘කිලෙසා ¶ ඣාපිතා මය්හං…පෙ… විහරාමි අනාසවො.
‘‘ස්වාගතං වත මෙ ආසි…පෙ… කතං බුද්ධස්ස සාසනං.
‘‘පටිසම්භිදා ¶ චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා සත්තකදම්බපුප්ඵියො ථෙරො ඉමා
ගාථායො අභාසිත්ථාති.
සත්තකදම්බපුප්ඵියත්ථෙරස්සාපදානං චතුත්ථං.
5. කොරණ්ඩපුප්ඵියත්ථෙරඅපදානං
‘‘වනකම්මිකො පුරෙ ආසිං, පිතුමාතුමතෙනහං [පිතුපිතාමහෙනහං (සී. ස්යා. පී.)];
පසුමාරෙන ජීවාමි, කුසලං මෙ න විජ්ජති.
‘‘මම ආසයසාමන්තා, තිස්සො ලොකග්ගනායකො;
පදානි තීණි දස්සෙසි, අනුකම්පාය චක්ඛුමා.
‘‘අක්කන්තෙ ච පදෙ දිස්වා, තිස්සනාමස්ස සත්ථුනො;
හට්ඨො හට්ඨෙන චිත්තෙන, පදෙ චිත්තං පසාදයිං.
‘‘කොරණ්ඩං ¶ පුප්ඵිතං දිස්වා, පාදපං ධරණීරුහං;
සකොසකං ගහෙත්වාන, පදසෙට්ඨමපූජයිං.
‘‘තෙන කම්මෙන සුකතෙන, චෙතනාපණිධීහි ච;
ජහිත්වා මානුසං දෙහං, තාවතිංසමගච්ඡහං.
‘‘යං යං යොනුපපජ්ජාමි, දෙවත්තං අථ මානුසං;
කොරණ්ඩවණ්ණකොයෙව, සුප්පභාසො භවාමහං.
‘‘ද්වෙනවුතෙ ඉතො කප්පෙ, යං කම්මමකරිං තදා;
දුග්ගතිං නාභිජානාමි, පදපූජායිදං ඵලං.
‘‘කිලෙසා ඣාපිතා මය්හං…පෙ… විහරාමි අනාසවො.
‘‘ස්වාගතං වත මෙ ආසි…පෙ… කතං බුද්ධස්ස සාසනං.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා කොරණ්ඩපුප්ඵියො ථෙරො ඉමා ගාථායො අභාසිත්ථාති;
කොරණ්ඩපුප්ඵියත්ථෙරස්සාපදානං පඤ්චමං.
6. ඝතමණ්ඩදායකත්ථෙරඅපදානං
‘‘සුචින්තිතං ¶ ¶ භගවන්තං, ලොකජෙට්ඨං නරාසභං;
උපවිට්ඨං මහාරඤ්ඤං, වාතාබාධෙන පීළිතං.
‘‘දිස්වා ¶ චිත්තං පසාදෙත්වා, ඝතමණ්ඩමුපානයිං;
කතත්තා ¶ ආචිතත්තා ච, ගඞ්ගා භාගීරථී අයං.
‘‘මහාසමුද්දා චත්තාරො, ඝතං සම්පජ්ජරෙ මම;
අයඤ්ච පථවී ඝොරා, අප්පමාණා අසඞ්ඛියා.
‘‘මම සඞ්කප්පමඤ්ඤාය, භවතෙ මධුසක්කරා;
චාතුද්දීපා [චතුද්දිසා (ස්යා.)] ඉමෙ රුක්ඛා, පාදපා ධරණීරුහා.
‘‘මම සඞ්කප්පමඤ්ඤාය, කප්පරුක්ඛා භවන්ති තෙ;
පඤ්ඤාසක්ඛත්තුං දෙවින්දො, දෙවරජ්ජමකාරයිං.
‘‘එකපඤ්ඤාසක්ඛත්තුඤ්ච, චක්කවත්තී අහොසහං;
පදෙසරජ්ජං විපුලං, ගණනාතො අසඞ්ඛියං.
‘‘චතුන්නවුතිතො කප්පෙ, යං දානමදදිං තදා;
දුග්ගතිං නාභිජානාමි, ඝතමණ්ඩස්සිදං ඵලං.
‘‘කිලෙසා ඣාපිතා මය්හං…පෙ… විහරාමි අනාසවො.
‘‘ස්වාගතං වත මෙ ආසි…පෙ… කතං බුද්ධස්ස සාසනං.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා ඝතමණ්ඩදායකො ථෙරො ඉමා ගාථායො
අභාසිත්ථාති.
ඝතමණ්ඩදායකත්ථෙරස්සාපදානං ඡට්ඨං.
7. එකධම්මස්සවනියත්ථෙරඅපදානං
‘‘පදුමුත්තරො ¶ නාම ජිනො, සබ්බධම්මාන පාරගූ;
චතුසච්චං පකාසෙන්තො, සන්තාරෙසි බහුං ජනං.
‘‘අහං ¶ ¶ තෙන සමයෙන, ජටිලො උග්ගතාපනො;
ධුනන්තො වාකචීරානි, ගච්ඡාමි අම්බරෙ තදා.
‘‘බුද්ධසෙට්ඨස්ස උපරි, ගන්තුං න විසහාමහං;
පක්ඛීව සෙලමාසජ්ජ, ගමනං න ලභාමහං.
‘‘උදකෙ වොක්කමිත්වාන, එවං ගච්ඡාමි අම්බරෙ;
න මෙ ඉදං භූතපුබ්බං, ඉරියාපථවිකොපනං.
‘‘හන්ද මෙතං ගවෙසිස්සං, අප්පෙවත්ථං ලභෙය්යහං;
ඔරොහන්තො අන්තලික්ඛා, සද්දමස්සොසි සත්ථුනො.
‘‘සරෙන රජනීයෙන, සවනීයෙන වග්ගුනා;
අනිච්චතං කථෙන්තස්ස, තඤ්ඤෙව උග්ගහිං තදා;
අනිච්චසඤ්ඤමුග්ගය්හ ¶ , අගමාසිං මමස්සමං.
‘‘යාවතායුං වසිත්වාන, තත්ථ කාලඞ්කතො අහං;
චරිමෙ වත්තමානම්හි, සද්ධම්මස්සවනං සරිං.
‘‘තෙන කම්මෙන සුකතෙන, චෙතනාපණිධීහි ච;
ජහිත්වා මානුසං දෙහං, තාවතිංසමගච්ඡහං.
‘‘තිංසකප්පසහස්සානි, දෙවලොකෙ රමිං අහං;
එකපඤ්ඤාසක්ඛත්තුඤ්ච ¶ , දෙවරජ්ජමකාරයිං.
‘‘එකවීසතික්ඛත්තුඤ්ච [එකතිංසති… (ස්යා.)], චක්කවත්තී අහොසහං;
පදෙසරජ්ජං විපුලං, ගණනාතො අසඞ්ඛියං.
‘‘අනුභොමි සකං පුඤ්ඤං, සුඛිතොහං භවාභවෙ;
අනුස්සරාමි තං සඤ්ඤං, සංසරන්තො භවාභවෙ;
න කොටිං පටිවිජ්ඣාමි, නිබ්බානං අච්චුතං පදං.
‘‘පිතුගෙහෙ නිසීදිත්වා, සමණො භාවිතින්ද්රියො;
කථංස [කථයං (සී. පී. ක.)] පරිදීපෙන්තො, අනිච්චතමුදාහරි.
‘‘‘අනිච්චා වත සඞ්ඛාරා, උප්පාදවයධම්මිනො;
උප්පජ්ජිත්වා නිරුජ්ඣන්ති, තෙසං වූපසමො සුඛො’.
‘‘සහ ¶ ගාථං සුණිත්වාන, පුබ්බසඤ්ඤමනුස්සරිං;
එකාසනෙ නිසීදිත්වා, අරහත්තමපාපුණිං.
‘‘ජාතියා ¶ සත්තවස්සෙන, අරහත්තමපාපුණිං;
උපසම්පාදයී බුද්ධො, ධම්මස්සවනස්සිදං ඵලං.
‘‘සතසහස්සිතො කප්පෙ, යං ධම්මමසුණිං තදා;
දුග්ගතිං නාභිජානාමි, ධම්මස්සවනස්සිදං ඵලං.
‘‘කිලෙසා ඣාපිතා මය්හං…පෙ… විහරාමි අනාසවො.
‘‘ස්වාගතං වත මෙ ආසි…පෙ… කතං බුද්ධස්ස සාසනං.
‘‘පටිසම්භිදා ¶ චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා එකධම්මස්සවනියො ථෙරො ඉමා
ගාථායො අභාසිත්ථාති.
එකධම්මස්සවනියත්ථෙරස්සාපදානං සත්තමං.
8. සුචින්තිතත්ථෙරඅපදානං
‘‘නගරෙ හංසවතියා, අහොසිං කස්සකො තදා;
කසිකම්මෙන ජීවාමි, තෙන පොසෙමි දාරකෙ.
‘‘සුසම්පන්නං ¶ තදා ඛෙත්තං, ධඤ්ඤං මෙ ඵලිනං [ඵලිතං (සී. පී.)] අහු;
පාකකාලෙ ච සම්පත්තෙ, එවං චින්තෙසහං තදා.
‘‘නච්ඡන්නං නප්පතිරූපං, ජානන්තස්ස ගුණාගුණං;
යොහං සඞ්ඝෙ අදත්වාන, අග්ගං භුඤ්ජෙය්ය චෙ තදා [මත්තනා (ස්යා.)].
‘‘අයං බුද්ධො අසමසමො, ද්වත්තිංසවරලක්ඛණො;
තතො පභාවිතො සඞ්ඝො, පුඤ්ඤක්ඛෙත්තො අනුත්තරො.
‘‘තත්ථ දස්සාමහං දානං, නවසස්සං පුරෙ පුරෙ;
එවාහං චින්තයිත්වාන, හට්ඨො පීණිතමානසො [පීතික… (ස්යා.)].
‘‘ඛෙත්තතො ¶ ධඤ්ඤමාහත්වා, සම්බුද්ධං උපසඞ්කමිං;
උපසඞ්කම්ම සම්බුද්ධං, ලොකජෙට්ඨං නරාසභං;
වන්දිත්වා සත්ථුනො පාදෙ, ඉදං වචනමබ්රවිං.
‘‘‘නවසස්සඤ්ච සම්පන්නං, ආයාගොසි [ඉධ හොසි (ස්යා.)] ච ත්වං මුනෙ;
අනුකම්පමුපාදාය ¶ , අධිවාසෙහි චක්ඛුම’.
‘‘පදුමුත්තරො ¶ ලොකවිදූ, ආහුතීනං පටිග්ගහො;
මම සඞ්කප්පමඤ්ඤාය, ඉදං වචනමබ්රවි.
‘‘‘චත්තාරො ච පටිපන්නා, චත්තාරො ච ඵලෙ ඨිතා;
එස සඞ්ඝො උජුභූතො, පඤ්ඤාසීලසමාහිතො;
යජන්තානං මනුස්සානං, පුඤ්ඤපෙක්ඛාන පාණිනං.
‘‘‘කරොතොපධිකං පුඤ්ඤං, සඞ්ඝෙ දින්නං මහප්ඵලං;
තස්මිං සඞ්ඝෙව [සංඝෙ ච (ස්යා. පී.)] දාතබ්බං, තව සස්සං තථෙතරං.
‘‘‘සඞ්ඝතො උද්දිසිත්වාන, භික්ඛූ නෙත්වාන සංඝරං;
පටියත්තං ඝරෙ සන්තං, භික්ඛුසඞ්ඝස්ස දෙහි ත්වං’.
‘‘සඞ්ඝතො උද්දිසිත්වාන, භික්ඛූ නෙත්වාන සංඝරං;
යං ඝරෙ පටියත්තං මෙ, භික්ඛුසඞ්ඝස්සදාසහං.
‘‘තෙන කම්මෙන සුකතෙන, චෙතනාපණිධීහි ච;
ජහිත්වා මානුසං දෙහං, තාවතිංසමගච්ඡහං.
‘‘තත්ථ මෙ සුකතං බ්යම්හං, සොවණ්ණං සප්පභස්සරං;
සට්ඨියොජනමුබ්බෙධං, තිංසයොජනවිත්ථතං.
එකූනවීසතිමං භාණවාරං.
‘‘ආකිණ්ණං භවනං මය්හං, නාරීගණසමාකුලං;
තත්ථ භුත්වා පිවිත්වා ච, වසාමි තිදසෙ අහං.
‘‘සතානං ¶ තීණික්ඛත්තුඤ්ච, දෙවරජ්ජමකාරයිං;
සතානං පඤ්චක්ඛත්තුඤ්ච, චක්කවත්තී අහොසහං;
පදෙසරජ්ජං විපුලං, ගණනාතො අසඞ්ඛියං.
‘‘භවාභවෙ ¶ ¶ සංසරන්තො, ලභාමි අමිතං ධනං;
භොගෙ මෙ ඌනතා නත්ථි, නවසස්සස්සිදං ඵලං.
‘‘හත්ථියානං අස්සයානං, සිවිකං සන්දමානිකං;
ලභාමි සබ්බමෙවෙතං [සබ්බමෙතම්පි (ක.)], නවසස්සස්සිදං ඵලං.
‘‘නවවත්ථං නවඵලං, නවග්ගරසභොජනං;
ලභාමි සබ්බමෙවෙතං, නවසස්සස්සිදං ඵලං.
‘‘කොසෙය්යකම්බලියානි ¶ , ඛොමකප්පාසිකානි ච;
ලභාමි සබ්බමෙවෙතං, නවසස්සස්සිදං ඵලං.
‘‘දාසීගණං දාසගණං, නාරියො ච අලඞ්කතා;
ලභාමි සබ්බමෙවෙතං, නවසස්සස්සිදං ඵලං.
‘‘න මං සීතං වා උණ්හං වා, පරිළාහො න විජ්ජති;
අථො චෙතසිකං දුක්ඛං, හදයෙ මෙ න විජ්ජති.
‘‘ඉදං ඛාද ඉදං භුඤ්ජ, ඉමම්හි සයනෙ සය;
ලභාමි සබ්බමෙවෙතං, නවසස්සස්සිදං ඵලං.
‘‘අයං පච්ඡිමකො දානි, චරිමො වත්තතෙ භවො;
අජ්ජාපි දෙය්යධම්මො මෙ, ඵලං තොසෙසි සබ්බදා.
‘‘නවසස්සං ¶ දදිත්වාන, සඞ්ඝෙ ගණවරුත්තමෙ;
අට්ඨානිසංසෙ අනුභොමි, කම්මානුච්ඡවිකෙ මම.
‘‘වණ්ණවා යසවා හොමි, මහාභොගො අනීතිකො;
මහාපක්ඛො [මහාභක්ඛො (ස්යා. ක.)] සදා හොමි, අභෙජ්ජපරිසො සදා.
‘‘සබ්බෙ මං අපචායන්ති, යෙ කෙචි පථවිස්සිතා;
දෙය්යධම්මා ච යෙ කෙචි, පුරෙ පුරෙ ලභාමහං.
‘‘භික්ඛුසඞ්ඝස්ස වා මජ්ඣෙ, බුද්ධසෙට්ඨස්ස සම්මුඛා;
සබ්බෙපි සමතික්කම්ම, දෙන්ති මමෙව දායකා.
‘‘පඨමං නවසස්සඤ්හි, දත්වා සඞ්ඝෙ ගණුත්තමෙ;
ඉමානිසංසෙ අනුභොමි, නවසස්සස්සිදං ඵලං.
‘‘සතසහස්සිතො ¶ කප්පෙ, යං දානමදදිං තදා;
දුග්ගතිං නාභිජානාමි, නවසස්සස්සිදං ඵලං.
‘‘කිලෙසා ඣාපිතා මය්හං…පෙ… විහරාමි අනාසවො;
‘‘ස්වාගතං වත මෙ ආසි…පෙ… කතං බුද්ධස්ස සාසනං.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා සුචින්තිතො ථෙරො ඉමා ගාථායො
අභාසිත්ථාති.
සුචින්තිතත්ථෙරස්සාපදානං අට්ඨමං.
9. සොවණ්ණකිඞ්කණියත්ථෙරඅපදානං
‘‘සද්ධාය ¶ ¶ ¶ අභිනික්ඛම්ම, පබ්බජිං අනගාරියං;
වාකචීරධරො ආසිං, තපොකම්මමපස්සිතො.
‘‘අත්ථදස්සී තු භගවා, ලොකජෙට්ඨො නරාසභො;
උප්පජ්ජි තම්හි සමයෙ, තාරයන්තො මහාජනං.
‘‘බලඤ්ච වත මෙ ඛීණං, බ්යාධිනා පරමෙන තං;
බුද්ධසෙට්ඨං සරිත්වාන, පුලිනෙ ථූපමුත්තමං.
‘‘කරිත්වා හට්ඨචිත්තොහං, සහත්ථෙන [පසාදෙන (ක.)] සමොකිරිං;
සොණ්ණකිඞ්කණිපුප්ඵානි, උදග්ගමනසො අහං.
‘‘සම්මුඛා විය සම්බුද්ධං, ථූපං පරිචරිං අහං;
තෙන චෙතොපසාදෙන, අත්ථදස්සිස්ස තාදිනො.
‘‘දෙවලොකං ගතො සන්තො, ලභාමි විපුලං සුඛං;
සුවණ්ණවණ්ණො තත්ථාසිං, බුද්ධපූජායිදං ඵලං.
‘‘අසීතිකොටියො මය්හං, නාරියො සමලඞ්කතා;
සදා මය්හං උපට්ඨන්ති, බුද්ධපූජායිදං ඵලං.
‘‘සට්ඨිතුරියසහස්සානි [සට්ඨිතූරිය… (ක.)], භෙරියො පණවානි ච;
සඞ්ඛා ච ඩිණ්ඩිමා තත්ථ, වග්ගූ වජ්ජන්ති [නදන්ති (සී.), වදන්ති (පී.)] දුන්දුභී.
‘‘චුල්ලාසීතිසහස්සානි ¶ , හත්ථිනො සමලඞ්කතා;
තිධාපභින්නමාතඞ්ගා, කුඤ්ජරා සට්ඨිහායනා.
‘‘හෙමජාලාභිසඤ්ඡන්නා ¶ , උපට්ඨානං කරොන්ති මෙ;
බලකායෙ ගජෙ චෙව, ඌනතා මෙ න විජ්ජති.
‘‘සොණ්ණකිඞ්කණිපුප්ඵානං, විපාකං අනුභොමහං;
අට්ඨපඤ්ඤාසක්ඛත්තුඤ්ච, දෙවරජ්ජමකාරයිං.
‘‘එකසත්තතික්ඛත්තුඤ්ච, චක්කවත්තී අහොසහං;
පථබ්යා රජ්ජං එකසතං, මහියා කාරයිං අහං.
‘‘සො දානි අමතං පත්තො, අසඞ්ඛතං සුදුද්දසං [ගම්භීරං දුද්දසං පදං (ස්යා.)];
සංයොජනපරික්ඛීණො, නත්ථි දානි පුනබ්භවො.
‘‘අට්ඨාරසෙ ¶ කප්පසතෙ, යං පුප්ඵමභිරොපයිං;
දුග්ගතිං නාභිජානාමි, බුද්ධපූජායිදං ඵලං.
‘‘කිලෙසා ¶ ඣාපිතා මය්හං…පෙ… විහරාමි අනාසවො.
‘‘ස්වාගතං වත මෙ ආසි…පෙ… කතං බුද්ධස්ස සාසනං.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා සොවණ්ණකිඞ්කණියො ථෙරො ඉමා
ගාථායො අභාසිත්ථාති.
සොවණ්ණකිඞ්කණියත්ථෙරස්සාපදානං නවමං.
10. සොණ්ණකොන්තරිකත්ථෙරඅපදානං
‘‘මනොභාවනියං ¶ බුද්ධං, අත්තදන්තං සමාහිතං;
ඉරියමානං බ්රහ්මපථෙ, චිත්තවූපසමෙ රතං.
‘‘නිත්තිණ්ණඔඝං සම්බුද්ධං, ඣායිං ඣානරතං මුනිං;
උපතිත්ථං සමාපන්නං, ඉන්දිවරදලප්පභං.
‘‘අලාබුනොදකං ගය්හ, බුද්ධසෙට්ඨං උපාගමිං;
බුද්ධස්ස පාදෙ ධොවිත්වා, අලාබුකමදාසහං.
‘‘ආණාපෙසි ¶ ච සම්බුද්ධො, පදුමුත්තරනාමකො;
‘ඉමිනා දකමාහත්වා, පාදමූලෙ ඨපෙහි මෙ’.
‘‘සාධූතිහං පටිස්සුත්වා, සත්ථුගාරවතාය ච;
දකං අලාබුනාහත්වා, බුද්ධසෙට්ඨං උපාගමිං.
‘‘අනුමොදි මහාවීරො, චිත්තං නිබ්බාපයං මම;
‘ඉමිනාලාබුදානෙන, සඞ්කප්පො තෙ සමිජ්ඣතු’.
‘‘පන්නරසෙසු කප්පෙසු, දෙවලොකෙ රමිං අහං;
තිංසතික්ඛත්තුං රාජා ච, චක්කවත්තී අහොසහං.
‘‘දිවා වා යදි වා රත්තිං, චඞ්කමන්තස්ස තිට්ඨතො;
සොවණ්ණං කොන්තරං ගය්හ, තිට්ඨතෙ පුරතො මම.
‘‘බුද්ධස්ස ¶ දත්වානලාබුං, ලභාමි සොණ්ණකොන්තරං;
අප්පකම්පි කතං කාරං, විපුලං හොති තාදිසු.
‘‘සතසහස්සිතො ¶ කප්පෙ, යංලාබුමදදිං තදා;
දුග්ගතිං නාභිජානාමි, අලාබුස්ස ඉදං ඵලං.
‘‘කිලෙසා ඣාපිතා මය්හං…පෙ… විහරාමි අනාසවො.
‘‘ස්වාගතං වත මෙ ආසි…පෙ… කතං බුද්ධස්ස සාසනං.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා සොණ්ණකොන්තරිකො ථෙරො ඉමා
ගාථායො අභාසිත්ථාති.
සොණ්ණකොන්තරිකත්ථෙරස්සාපදානං දසමං.
සකිංසම්මජ්ජකවග්ගො තෙචත්තාලීසමො.
තස්සුද්දානං –
සකිංසම්මජ්ජකො ¶ ථෙරො, එකදුස්සී එකාසනී;
කදම්බකොරණ්ඩකදො, ඝතස්සවනිකොපි ච.
සුචින්තිකො කිඞ්කණිකො, සොණ්ණකොන්තරිකොපි ච;
එකගාථාසතඤ්චෙත්ථ, එකසත්තතිමෙව ච.