📜
53. තිණදායකවග්ගො
1. තිණමුට්ඨිදායකත්ථෙරඅපදානං
‘‘හිමවන්තස්සාවිදූරෙ ¶ ¶ , ලම්බකො නාම පබ්බතො;
තත්ථෙව තිස්සො [තත්ථොපතිස්සො (සී. පී. ක.)] සම්බුද්ධො, අබ්භොකාසම්හි චඞ්කමි.
‘‘මිගලුද්දො පුරෙ ආසිං, අරඤ්ඤෙ කානනෙ අහං;
දිස්වාන තං දෙවදෙවං, තිණමුට්ඨිමදාසහං.
‘‘නිසීදනත්ථං බුද්ධස්ස, දත්වා චිත්තං පසාදයිං;
සම්බුද්ධං අභිවාදෙත්වා, පක්කාමිං [පක්කමිං (ක.)] උත්තරාමුඛො.
‘‘අචිරං ගතමත්තස්ස [ගතමත්තං මං (සී. ස්යා.)], මිගරාජා අපොථයි [අහෙඨයි (සී. ස්යා. පී.)];
සීහෙන පොථිතො [පාතිතො (සී. පී.), ඝාටිතො (ස්යා.)] සන්තො, තත්ථ කාලඞ්කතො අහං.
‘‘ආසන්නෙ මෙ කතං කම්මං, බුද්ධසෙට්ඨෙ අනාසවෙ;
සුමුත්තො සරවෙගොව, දෙවලොකමගච්ඡහං.
‘‘යූපො තත්ථ සුභො ආසි, පුඤ්ඤකම්මාභිනිම්මිතො;
සහස්සකණ්ඩො සතභෙණ්ඩු, ධජාලු හරිතාමයො.
‘‘පභා ¶ නිද්ධාවතෙ තස්ස, සතරංසීව උග්ගතො;
ආකිණ්ණො දෙවකඤ්ඤාහි, ආමොදිං කාමකාමිහං.
‘‘දෙවලොකා ¶ චවිත්වාන, සුක්කමූලෙන චොදිතො;
ආගන්ත්වාන මනුස්සත්තං, පත්තොම්හි ආසවක්ඛයං.
‘‘චතුන්නවුතිතො කප්පෙ, නිසීදනමදාසහං;
දුග්ගතිං නාභිජානාමි, තිණමුට්ඨෙ ඉදං ඵලං.
‘‘කිලෙසා ඣාපිතා මය්හං, භවා සබ්බෙ සමූහතා;
නාගොව බන්ධනං ඡෙත්වා, විහරාමි අනාසවො.
‘‘ස්වාගතං වත මෙ ආසි, මම බුද්ධස්ස සන්තිකෙ;
තිස්සො විජ්ජා අනුප්පත්තා, කතං බුද්ධස්ස සාසනං.
‘‘පටිසම්භිදා ¶ ¶ චතස්සො, විමොක්ඛාපි ච අට්ඨිමෙ;
ඡළභිඤ්ඤා සච්ඡිකතා, කතං බුද්ධස්ස සාසනං’’.
ඉත්ථං සුදං ආයස්මා තිණමුට්ඨිදායකො ථෙරො ඉමා ගාථායො
අභාසිත්ථාති.
තිණමුට්ඨිදායකත්ථෙරස්සාපදානං පඨමං.
2. මඤ්චදායකත්ථෙරඅපදානං
‘‘විපස්සිනො භගවතො, ලොකජෙට්ඨස්ස තාදිනො;
එකමඤ්චං [එකං වෙච්චං (ස්යා.), එකපච්ඡං (පී.)] මයා දින්නං, පසන්නෙන සපාණිනා.
‘‘හත්ථියානං අස්සයානං, දිබ්බයානං සමජ්ඣගං;
තෙන මඤ්චකදානෙන, පත්තොම්හි ආසවක්ඛයං.
‘‘එකනවුතිතො ¶ කප්පෙ, යං මඤ්චමදදිං තදා;
දුග්ගතිං නාභිජානාමි, මඤ්චදානස්සිදං ඵලං.
‘‘කිලෙසා ඣාපිතා මය්හං…පෙ… විහරාමි අනාසවො.
‘‘ස්වාගතං වත මෙ ආසි…පෙ… කතං බුද්ධස්ස සාසනං.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා මඤ්චදායකො [වෙච්චකදායකො (ස්යා.), සද්දසඤ්ඤිකවග්ගෙපි ඉදං§අපදානං දිස්සති] ථෙරො ඉමා ගාථායො අභාසිත්ථාති.
මඤ්චදායකත්ථෙරස්සාපදානං දුතියං.
3. සරණගමනියත්ථෙරඅපදානං
‘‘ආරුහිම්හ තදා නාවං, භික්ඛු චාජීවිකො චහං;
නාවාය භිජ්ජමානාය, භික්ඛු මෙ සරණං අදා.
‘‘එකතිංසෙ ¶ ඉතො කප්පෙ, යං සො මෙ සරණං අදා;
දුග්ගතිං නාභිජානාමි, සරණගමනෙ ඵලං.
‘‘කිලෙසා ¶ ඣාපිතා මය්හං…පෙ… විහරාමි අනාසවො.
‘‘ස්වාගතං වත මෙ ආසි…පෙ… කතං බුද්ධස්ස සාසනං.
‘‘පටිසම්භිදා ¶ චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා සරණගමනියො ථෙරො ඉමා ගාථායො
අභාසිත්ථාති.
සරණගමනියත්ථෙරස්සාපදානං තතියං.
4. අබ්භඤ්ජනදායකත්ථෙරඅපදානං
‘‘නගරෙ ¶ බන්ධුමතියා, රාජුය්යානෙ වසාමහං;
චම්මවාසී තදා ආසිං, කමණ්ඩලුධරො අහං.
‘‘අද්දසං විමලං බුද්ධං, සයම්භුං අපරාජිතං;
පධානං පහිතත්තං තං, ඣායිං ඣානරතං වසිං [ඉසිං (ස්යා.)].
‘‘සබ්බකාමසමිද්ධිඤ්ච, ඔඝතිණ්ණමනාසවං;
දිස්වා පසන්නො සුමනො, අබ්භඤ්ජනමදාසහං.
‘‘එකනවුතිතො කප්පෙ, යං දානමදදිං තදා;
දුග්ගතිං නාභිජානාමි, අබ්භඤ්ජනස්සිදං ඵලං.
‘‘කිලෙසා ඣාපිතා මය්හං…පෙ… විහරාමි අනාසවො.
‘‘ස්වාගතං වත මෙ ආසි…පෙ… කතං බුද්ධස්ස සාසනං.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං ¶ සුදං ආයස්මා අබ්භඤ්ජනදායකො ථෙරො ඉමා ගාථායො
අභාසිත්ථාති.
අබ්භඤ්ජනදායකත්ථෙරස්සාපදානං චතුත්ථං.
5. සුපටදායකත්ථෙරඅපදානං
‘‘දිවාවිහාරා ¶ ¶ නික්ඛන්තො, විපස්සී ලොකනායකො;
ලහුං සුපටකං [සුපටිකං (ස්යා.), පූපපවං (පී.)] දත්වා, කප්පං සග්ගම්හි මොදහං.
‘‘එකනවුතිතො කප්පෙ, සුපටකමදාසහං;
දුග්ගතිං නාභිජානාමි, සුපටස්ස ඉදං ඵලං.
‘‘කිලෙසා ඣාපිතා මය්හං…පෙ… විහරාමි අනාසවො.
‘‘ස්වාගතං වත මෙ ආසි…පෙ… කතං බුද්ධස්ස සාසනං.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා සුපටදායකො ථෙරො ඉමා ගාථායො
අභාසිත්ථාති.
සුපටදායකත්ථෙරස්සාපදානං පඤ්චමං.
6. දණ්ඩදායකත්ථෙරඅපදානං
‘‘කානනං වනමොගය්හ, වෙළුං ඡෙත්වානහං තදා;
ආලම්බණං කරිත්වාන, සඞ්ඝස්ස අදදිං බහුං [අහං (සී. ස්යා. පී.)].
‘‘තෙන ¶ චිත්තප්පසාදෙන, සුබ්බතෙ අභිවාදිය;
ආලම්බදණ්ඩං දත්වාන, පක්කාමිං උත්තරාමුඛො.
‘‘චතුන්නවුතිතො ¶ කප්පෙ, යං දණ්ඩමදදිං තදා;
දුග්ගතිං නාභිජානාමි, දණ්ඩදානස්සිදං ඵලං.
‘‘කිලෙසා ඣාපිතා මය්හං…පෙ… විහරාමි අනාසවො.
‘‘ස්වාගතං වත මෙ ආසි…පෙ… කතං බුද්ධස්ස සාසනං.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං ¶ සුදං ආයස්මා දණ්ඩදායකො ථෙරො ඉමා ගාථායො
අභාසිත්ථාති.
දණ්ඩදායකත්ථෙරස්සාපදානං ඡට්ඨං.
තෙවීසතිමං භාණවාරං.
7. ගිරිනෙලපූජකත්ථෙරඅපදානං
‘‘මිගලුද්දො ¶ පුරෙ ආසිං, විපිනෙ විචරං අහං;
අද්දසං විරජං බුද්ධං, සබ්බධම්මාන පාරගුං.
‘‘තස්මිං මහාකාරුණිකෙ, සබ්බසත්තහිතෙ රතෙ;
පසන්නචිත්තො සුමනො, නෙලපුප්ඵමපූජයිං.
‘‘එකතිංසෙ ¶ ඉතො කප්පෙ, යං පුප්ඵමභිපූජයිං;
දුග්ගතිං නාභිජානාමි, බුද්ධපූජායිදං ඵලං.
‘‘කිලෙසා ඣාපිතා මය්හං…පෙ… විහරාමි අනාසවො.
‘‘ස්වාගතං වත මෙ ආසි…පෙ… කතං බුද්ධස්ස සාසනං.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා ගිරිනෙලපූජකො ථෙරො ඉමා ගාථායො
අභාසිත්ථාති.
ගිරිනෙලපූජකත්ථෙරස්සාපදානං සත්තමං.
8. බොධිසම්මජ්ජකත්ථෙරඅපදානං
‘‘අහං පුරෙ බොධිපත්තං, උජ්ඣිතං චෙතියඞ්ගණෙ;
තං ගහෙත්වාන ඡඩ්ඩෙසිං, අලභිං වීසතීගුණෙ.
‘‘තස්ස කම්මස්ස තෙජෙන, සංසරන්තො භවාභවෙ;
දුවෙ භවෙ සංසරාමි, දෙවත්තෙ චාපි මානුසෙ.
‘‘දෙවලොකා චවිත්වාන, ආගන්ත්වා මානුසං භවං;
දුවෙ කුලෙ පජායාමි, ඛත්තියෙ චාපි බ්රාහ්මණෙ.
‘‘අඞ්ගපච්චඞ්ගසම්පන්නො, ආරොහපරිණාහවා;
අභිරූපො සුචි හොමි, සම්පුණ්ණඞ්ගො අනූනකො.
‘‘දෙවලොකෙ ¶ ¶ මනුස්සෙ වා, ජාතො වා යත්ථ කත්ථචි;
භවෙ සුවණ්ණවණ්ණො ච, උත්තත්තකනකූපමො.
‘‘මුදුකා ¶ ¶ මද්දවා ස්නිද්ධා [මුදු මද්දවා සිනිද්ධා (ස්යා.)], සුඛුමා සුකුමාරිකා;
ඡවි මෙ සබ්බදා හොති, බොධිපත්තෙ සුඡඩ්ඩිතෙ [සුඡඩ්ඩිනෙ (සී.)].
‘‘යතො කුතොචි ගතීසු, සරීරෙ සමුදාගතෙ;
න ලිම්පති රජොජල්ලං, විපාකො පත්තඡඩ්ඩිතෙ.
‘‘උණ්හෙ වාතාතපෙ තස්ස, අග්ගිතාපෙන වා පන;
ගත්තෙ සෙදා න මුච්චන්ති, විපාකො පත්තඡඩ්ඩිතෙ.
‘‘කුට්ඨං ගණ්ඩො කිලාසො ච, තිලකා පිළකා තථා;
න හොන්ති කායෙ දද්දු ච, විපාකො පත්තඡඩ්ඩිතෙ.
‘‘අපරම්පි ගුණං තස්ස, නිබ්බත්තති භවාභවෙ;
රොගා න හොන්ති කායස්මිං, විපාකො පත්තඡඩ්ඩිතෙ.
‘‘අපරම්පි ගුණං තස්ස, නිබ්බත්තති භවාභවෙ;
න හොති චිත්තජා පීළා, විපාකො පත්තඡඩ්ඩිතෙ.
‘‘අපරම්පි ගුණං තස්ස, නිබ්බත්තති භවාභවෙ;
අමිත්තා න භවන්තස්ස, විපාකො පත්තඡඩ්ඩිතෙ.
‘‘අපරම්පි ගුණං තස්ස, නිබ්බත්තති භවාභවෙ;
අනූනභොගො භවති, විපාකො පත්තඡඩ්ඩිතෙ.
‘‘අපරම්පි ගුණං තස්ස, නිබ්බත්තති භවාභවෙ;
අග්ගිරාජූහි චොරෙහි, න හොති උදකෙ භයං.
‘‘අපරම්පි ¶ ගුණං තස්ස, නිබ්බත්තති භවාභවෙ;
දාසිදාසා අනුචරා, හොන්ති චිත්තානුවත්තකා.
‘‘යම්හි ආයුප්පමාණම්හි, ජායතෙ මානුසෙ භවෙ;
තතො න හායතෙ ආයු, තිට්ඨතෙ යාවතායුකං.
‘‘අබ්භන්තරා ච බාහිරා [බහිචරා (සී. පී. ක.)], නෙගමා ච සරට්ඨකා;
නුයුත්තා හොන්ති සබ්බෙපි, වුද්ධිකාමා සුඛිච්ඡකා.
‘‘භොගවා යසවා හොමි, සිරිමා ඤාතිපක්ඛවා;
අපෙතභයසන්තාසො, භවෙහං සබ්බතො භවෙ.
‘‘දෙවා ¶ ¶ මනුස්සා අසුරා, ගන්ධබ්බා යක්ඛරක්ඛසා;
සබ්බෙ තෙ පරිරක්ඛන්ති, භවෙ සංසරතො සදා.
‘‘දෙවලොකෙ මනුස්සෙ ච, අනුභොත්වා උභො යසෙ;
අවසානෙ ච නිබ්බානං, සිවං පත්තො අනුත්තරං.
‘‘සම්බුද්ධමුද්දිසිත්වාන, බොධිං වා තස්ස සත්ථුනො;
යො පුඤ්ඤං පසවෙ පොසො, තස්ස කිං නාම දුල්ලභං.
‘‘මග්ගෙ ¶ ඵලෙ ආගමෙ ච, ඣානාභිඤ්ඤාගුණෙසු ච;
අඤ්ඤෙසං අධිකො හුත්වා, නිබ්බායාමි අනාසවො.
‘‘පුරෙහං බොධියා පත්තං, ඡඩ්ඩෙත්වා හට්ඨමානසො;
ඉමෙහි වීසතඞ්ගෙහි, සමඞ්ගී හොමි සබ්බදා.
‘‘කිලෙසා ඣාපිතා මය්හං…පෙ… විහරාමි අනාසවො.
‘‘ස්වාගතං ¶ වත මෙ ආසි…පෙ… කතං බුද්ධස්ස සාසනං.
‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා බොධිසම්මජ්ජකො ථෙරො ඉමා ගාථායො
අභාසිත්ථාති.
බොධිසම්මජ්ජකත්ථෙරස්සාපදානං අට්ඨමං.
9. ආමණ්ඩඵලදායකත්ථෙරඅපදානං
‘‘පදුමුත්තරො නාම ජිනො, සබ්බධම්මාන පාරගූ;
වුට්ඨහිත්වා සමාධිම්හා, චඞ්කමී ලොකනායකො.
‘‘ඛාරිභාරං ගහෙත්වාන, ආහරන්තො ඵලං තදා;
අද්දසං විරජං බුද්ධං, චඞ්කමන්තං මහාමුනිං.
‘‘පසන්නචිත්තො සුමනො, සිරෙ කත්වාන අඤ්ජලිං;
සම්බුද්ධං අභිවාදෙත්වා, ආමණ්ඩමදදිං ඵලං.
‘‘සතසහස්සිතො කප්පෙ, යං ඵලං අදදිං තදා;
දුග්ගතිං නාභිජානාමි, ආමණ්ඩස්ස ඉදං ඵලං.
‘‘කිලෙසා ¶ ¶ ඣාපිතා මය්හං…පෙ… විහරාමි අනාසවො.
‘‘ස්වාගතං වත මෙ ආසි…පෙ… කතං බුද්ධස්ස සාසනං.
‘‘පටිසම්භිදා ¶ චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා ආමණ්ඩඵලදායකො ථෙරො ඉමා
ගාථායො අභාසිත්ථාති.
ආමණ්ඩඵලදායකත්ථෙරස්සාපදානං නවමං.
10. සුගන්ධත්ථෙරඅපදානං
‘‘ඉමම්හි භද්දකෙ කප්පෙ, බ්රහ්මබන්ධු මහායසො;
කස්සපො නාම ගොත්තෙන [නාමෙන (සබ්බත්ථ)], උප්පජ්ජි වදතං වරො.
‘‘අනුබ්යඤ්ජනසම්පන්නො, බාත්තිංසවරලක්ඛණො;
බ්යාමප්පභාපරිවුතො, රංසිජාලසමොත්ථටො [රංසිජාලසමොසටො (සී. පී.)].
‘‘අස්සාසෙතා යථා චන්දො, සූරියොව පභඞ්කරො;
නිබ්බාපෙතා යථා මෙඝො, සාගරොව ගුණාකරො.
‘‘ධරණීරිව ¶ සීලෙන, හිමවාව සමාධිනා;
ආකාසො විය පඤ්ඤාය, අසඞ්ගො අනිලො යථා.
‘‘ස කදාචි මහාවීරො, පරිසාසු විසාරදො;
සච්චානි සම්පකාසෙති, උද්ධරන්තො මහාජනං.
‘‘තදා හි බාරාණසියං, සෙට්ඨිපුත්තො මහායසො;
ආසහං ධනධඤ්ඤස්ස [අනන්තධනධඤ්ඤස්ස (ක.)], පහූතස්ස බහූ තදා.
‘‘ජඞ්ඝාවිහාරං විචරං, මිගදායමුපෙච්චහං [මුපෙසහං (ක.)];
අද්දසං විරජං බුද්ධං, දෙසෙන්තං අමතං පදං.
‘‘විසට්ඨකන්තවචනං ¶ , කරවීකසමස්සරං;
හංසරුතෙහි [හංසදුන්දුභි (ස්යා. පී.)] නිග්ඝොසං, විඤ්ඤාපෙන්තං මහාජනං.
‘‘දිස්වා ¶ දෙවාතිදෙවං තං, සුත්වාව මධුරං ගිරං;
පහායනප්පකෙ භොගෙ, පබ්බජිං අනගාරියං.
‘‘එවං ¶ පබ්බජිතො චාහං, න චිරෙන බහුස්සුතො;
අහොසිං ධම්මකථිකො, විචිත්තපටිභාණවා.
‘‘මහාපරිසමජ්ඣෙහං, හට්ඨචිත්තො පුනප්පුනං;
වණ්ණයිං හෙමවණ්ණස්ස, වණ්ණං වණ්ණවිසාරදො.
‘‘එස ඛීණාසවො බුද්ධො, අනීඝො ඡින්නසංසයො;
සබ්බකම්මක්ඛයං පත්තො, විමුත්තොපධිසඞ්ඛයෙ.
‘‘එස සො භගවා බුද්ධො, එස සීහො අනුත්තරො;
සදෙවකස්ස ලොකස්ස, බ්රහ්මචක්කප්පවත්තකො.
‘‘දන්තො දමෙතා සන්තො ච, සමෙතා නිබ්බුතො ඉසි;
නිබ්බාපෙතා ච අස්සත්ථො, අස්සාසෙතා මහාජනං.
‘‘වීරො සූරො ච වික්කන්තො [ධීරො ච (සී. පී.)], පඤ්ඤො කාරුණිකො වසී;
විජිතාවී ච ස ජිනො, අප්පගබ්බො අනාලයො.
‘‘අනෙඤ්ජො අචලො ධීමා, අමොහො අසමො මුනි;
ධොරය්හො උසභො නාගො, සීහො සක්කො ගරූසුපි.
‘‘විරාගො විමලො බ්රහ්මා, වාදී සූරො රණඤ්ජහො;
අඛිලො ච විසල්ලො ච, අසමො සංයතො [වුසභො (ස්යා.), පයතො (පී.)] සුචි.
‘‘බ්රාහ්මණො ¶ ¶ සමණො නාථො, භිසක්කො සල්ලකත්තකො;
යොධො බුද්ධො සුතාසුතො [සුතො සුතො (සී. පී.)], අචලො මුදිතො සිතො [දිතො (සී.)].
‘‘ධාතා ධතා ච සන්ති ච, කත්තා නෙතා පකාසිතා;
සම්පහංසිතා භෙත්තා ච, ඡෙත්තා සොතා පසංසිතා.
‘‘අඛිලො ච විසල්ලො ච, අනීඝො අකථංකථී;
අනෙජො විරජො කත්තා, ගන්ධා වත්තා පසංසිතා.
‘‘තාරෙතා අත්ථකාරෙතා, කාරෙතා සම්පදාරිතා;
පාපෙතා සහිතා කන්තා, හන්තා ආතාපී තාපසො [හන්තා, තාපිතා ච විසොසිතා (ස්යා.)].
‘‘සමචිත්තො ¶ [සච්චට්ඨිතො (ස්යා.)] සමසමො, අසහායො දයාලයො [දයාසයො (සී.)];
අච්ඡෙරසත්තො [අච්ඡෙරමන්තො (ස්යා.)] අකුහො, කතාවී ඉසිසත්තමො.
‘‘නිත්තිණ්ණකඞ්ඛො නිම්මානො, අප්පමෙය්යො අනූපමො;
සබ්බවාක්යපථාතීතො, සච්ච නෙය්යන්තගූ [සබ්බනෙය්යන්තිකො (ස්යා.)] ජිනො.
‘‘සත්තසාරවරෙ ¶ [සතරංසීවරෙ (ස්යා.)] තස්මිං, පසාදො අමතාවහො;
තස්මා බුද්ධෙ ච ධම්මෙ ච, සඞ්ඝෙ සද්ධා මහත්ථිකා [මහිද්ධිකා (සී. ක.)].
‘‘ගුණෙහි එවමාදීහි, තිලොකසරණුත්තමං;
වණ්ණෙන්තො පරිසාමජ්ඣෙ, අකං [කථිං (ස්යා.)] ධම්මකථං අහං.
‘‘තතො චුතාහං තුසිතෙ, අනුභොත්වා මහාසුඛං;
තතො චුතො මනුස්සෙසු, ජාතො හොමි සුගන්ධිකො.
‘‘නිස්සාසො මුඛගන්ධො ච, දෙහගන්ධො තථෙව මෙ;
සෙදගන්ධො ච සතතං, සබ්බගන්ධොව හොති මෙ [සබ්බගන්ධොතිසෙති මෙ (සී. පී.)].
‘‘මුඛගන්ධො ¶ සදා මය්හං, පදුමුප්පලචම්පකො;
පරිසන්තො [ආදිසන්තො (සී.), අතිකන්තො (ස්යා.), අතිසන්තො (පී.)] සදා වාති, සරීරො ච තථෙව මෙ.
‘‘ගුණත්ථවස්ස සබ්බන්තං, ඵලං තු [ඵලන්තං (ස්යා.)] පරමබ්භුතං;
එකග්ගමනසා සබ්බෙ, වණ්ණයිස්සං [භාසිතස්ස (ස්යා.)] සුණාථ මෙ.
‘‘ගුණං ¶ බුද්ධස්ස වත්වාන, හිතාය ච න සදිසං [හිතාය ජනසන්ධිසු (සී. පී.), හිතාය නං සුඛාවහං (ස්යා.)];
සුඛිතො [සුචිත්තො (ස්යා.)] හොමි සබ්බත්ථ, සඞ්ඝො වීරසමායුතො [සරද්ධනිසමායුතො (සී.)].
‘‘යසස්සී සුඛිතො කන්තො, ජුතිමා පියදස්සනො;
වත්තා අපරිභූතො ච, නිද්දොසො පඤ්ඤවා තථා.
‘‘ඛීණෙ ආයුසි [පාසුසි (ස්යා.)] නිබ්බානං, සුලභං බුද්ධභත්තිනො;
තෙසං හෙතුං පවක්ඛාමි, තං සුණාථ යථාතථං.
‘‘සන්තං ¶ යසං භගවතො, විධිනා අභිවාදයං;
තත්ථ තත්ථූපපන්නොපි [යත්ථ තත්ථූපපන්නොපි (සී. පී.)], යසස්සී තෙන හොමහං.
‘‘දුක්ඛස්සන්තකරං බුද්ධං, ධම්මං සන්තමසඞ්ඛතං;
වණ්ණයං සුඛදො ආසිං, සත්තානං සුඛිතො තතො.
‘‘ගුණං වදන්තො බුද්ධස්ස, බුද්ධපීතිසමායුතො;
සකන්තිං පරකන්තිඤ්ච, ජනයිං තෙන කන්තිමා.
‘‘ජිනො තෙ තිත්ථිකාකිණ්ණෙ [ජනොඝෙ තිත්ථකාකිණ්ණෙ (සී. පී.), ජිනො යො තිත්ථිකාතිණ්ණො (ස්යා.)], අභිභුය්ය කුතිත්ථියෙ;
ගුණං වදන්තො ජොතෙසිං [ථොමෙසිං (ස්යා.)], නායකං ජුතිමා තතො.
‘‘පියකාරී ජනස්සාපි, සම්බුද්ධස්ස ගුණං වදං;
සරදොව සසඞ්කොහං, තෙනාසිං පියදස්සනො.
‘‘යථාසත්තිවසෙනාහං ¶ ¶ , සබ්බවාචාහි සන්ථවිං;
සුගතං තෙන වාගිසො, විචිත්තපටිභානවා.
‘‘යෙ බාලා විමතිං පත්තා, පරිභොන්ති මහාමුනිං;
නිග්ගහිං තෙ සද්ධම්මෙන, පරිභූතො න තෙනහං [පරිභූතෙන තෙනහං (ස්යා.)].
‘‘බුද්ධවණ්ණෙන සත්තානං, කිලෙසෙ අපනෙසහං;
නික්කිලෙසමනො හොමි, තස්ස කම්මස්ස වාහසා.
‘‘සොතූනං ¶ වුද්ධිමජනිං [බුද්ධිමජනිං (සී. පී.)], බුද්ධානුස්සතිදෙසකො;
තෙනාහමාසිං [තෙනාපි චාසිං (ස්යා.)] සප්පඤ්ඤො, නිපුණත්ථවිපස්සකො.
‘‘සබ්බාසවපරික්ඛීණො, තිණ්ණසංසාරසාගරො;
සිඛීව අනුපාදානො, පාපුණිස්සාමි නිබ්බුතිං.
‘‘ඉමස්මිංයෙව කප්පස්මිං, යමහං සන්ථවිං ජිනං;
දුග්ගතිං නාභිජානාමි, බුද්ධවණ්ණස්සිදං ඵලං.
‘‘කිලෙසා ඣාපිතා මය්හං…පෙ… විහරාමි අනාසවො.
‘‘ස්වාගතං වත මෙ ආසි…පෙ… කතං බුද්ධස්ස සාසනං.
‘‘පටිසම්භිදා ¶ චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා සුගන්ධො ථෙරො ඉමා ගාථායො
අභාසිත්ථාති.
සුගන්ධත්ථෙරස්සාපදානං දසමං.
තිණදායකවග්ගො තෙපඤ්ඤාසමො.
තස්සුද්දානං –
තිණදො ¶ මඤ්චදො චෙව, සරණබ්භඤ්ජනප්පදො;
සුපටො දණ්ඩදායී ච, නෙලපූජී තථෙව ච.
බොධිසම්මජ්ජකො මණ්ඩො, සුගන්ධො දසමොති ච;
ගාථාසතං සතෙවීසං, ගණිතඤ්චෙත්ථ සබ්බසො.