📜
18. සිද්ධත්ථබුද්ධවංසො
ධම්මදස්සිස්ස ¶ අපරෙන, සිද්ධත්ථො නාම නායකො;
නිහනිත්වා තමං සබ්බං, සූරියො අබ්භුග්ගතො යථා.
සොපි පත්වාන සම්බොධිං, සන්තාරෙන්තො සදෙවකං;
අභිවස්සි ධම්මමෙඝෙන, නිබ්බාපෙන්තො සදෙවකං.
තස්සාපි අතුලතෙජස්ස, අහෙසුං අභිසමයා තයො;
කොටිසතසහස්සානං, පඨමාභිසමයො අහු.
පුනාපරං භීමරථෙ [හිමරට්ඨෙ (ක.)], යදා ආහනි දුන්දුභිං;
තදා නවුතිකොටීනං, දුතියාභිසමයො අහු.
යදා බුද්ධො ධම්මං දෙසෙසි, වෙභාරෙ සො පුරුත්තමෙ;
තදා නවුතිකොටීනං, තතියාභිසමයො අහු.
සන්නිපාතා තයො ආසුං, තස්මිම්පි ද්විපදුත්තමෙ;
ඛීණාසවානං විමලානං, සන්තචිත්තාන තාදිනං.
කොටිසතානං ¶ ¶ නවුතීනං [නවුතියා (ස්යා. කං.)], අසීතියාපි ච කොටිනං;
එතෙ ආසුං තයො ඨානා, විමලානං සමාගමෙ.
අහං ¶ තෙන සමයෙන, මඞ්ගලො නාම තාපසො;
උග්ගතෙජො දුප්පසහො, අභිඤ්ඤාබලසමාහිතො.
ජම්බුතො ඵලමානෙත්වා [ඵලමාහත්වා (සී. ස්යා.)] සිද්ධත්ථස්ස අදාසහං;
පටිග්ගහෙත්වා සම්බුද්ධො, ඉදං වචනමබ්රවි.
‘‘පස්සථ ඉමං තාපසං, ජටිලං උග්ගතාපනං;
චතුන්නවුතිතො කප්පෙ, අයං බුද්ධො භවිස්සති.
‘‘පධානං පදහිත්වාන…පෙ… ¶ හෙස්සාම සම්මුඛා ඉමං’’.
තස්සාපි වචනං සුත්වා, භිය්යො චිත්තං පසාදයිං;
උත්තරිං වතමධිට්ඨාසිං, දසපාරමිපූරියා.
වෙභාරං නාම නගරං, උදෙනො නාම ඛත්තියො;
සුඵස්සා නාම ජනිකා, සිද්ධත්ථස්ස මහෙසිනො.
දසවස්සසහස්සානි ¶ , අගාරං අජ්ඣ සො වසි;
කොකාසුප්පලකොකනදා, තයො පාසාදමුත්තමා.
තිසොළසසහස්සානි, නාරියො සමලඞ්කතා;
සොමනස්සා නාම සා නාරී, අනුපමො නාම අත්රජො.
නිමිත්තෙ චතුරො දිස්වා, සිවිකායාභිනික්ඛමි;
අනූනදසමාසානි, පධානං පදහී ජිනො.
බ්රහ්මුනා යාචිතො සන්තො, සිද්ධත්ථො ලොකනායකො;
වත්ති ¶ චක්කං මහාවීරො, මිගදායෙ නරුත්තමො.
සම්බලො ච සුමිත්තො ච, අහෙසුං අග්ගසාවකා;
රෙවතො නාමුපට්ඨාකො, සිද්ධත්ථස්ස මහෙසිනො.
සීවලා ච සුරාමා ච, අහෙසුං අග්ගසාවිකා;
බොධි තස්ස භගවතො, කණිකාරොති වුච්චති.
සුප්පියො ච සමුද්දො ච, අහෙසුං අග්ගුපට්ඨකා;
රම්මා චෙව සුරම්මා ච, අහෙසුං අග්ගුපට්ඨිකා.
සො ¶ බුද්ධො සට්ඨිරතනං, අහොසි නභමුග්ගතො;
කඤ්චනග්ඝියසඞ්කාසො, දසසහස්සී විරොචති.
සොපි බුද්ධො අසමසමො, අතුලො අප්පටිපුග්ගලො;
වස්සසතසහස්සානි, ලොකෙ අට්ඨාසි චක්ඛුමා.
විපුලං ¶ පභං දස්සයිත්වා, පුප්ඵාපෙත්වාන සාවකෙ;
විලාසෙත්වා සමාපත්යා, නිබ්බුතො සො සසාවකො.
සිද්ධත්ථො ¶ මුනිවරො බුද්ධො, අනොමාරාමම්හි නිබ්බුතො;
තත්ථෙවස්ස ථූපවරො, චතුයොජනමුග්ගතොති.
සිද්ධත්ථස්ස භගවතො වංසො සොළසමො.