📜
14. පකිණ්ණකනිපාතො
484. සාලිකෙදාරජාතකං (1)
සම්පන්නං ¶ ¶ ¶ සාලිකෙදාරං, සුවා භුඤ්ජන්ති කොසිය;
පටිවෙදෙමි තෙ බ්රහ්මෙ, න නෙ [තෙ (සී. ස්යා.), නං (සී. ස්යා. පී. අට්ඨ.), තං (ක. අට්ඨ.)] වාරෙතුමුස්සහෙ.
එකො ච තත්ථ සකුණො, යො නෙසං [තෙසං (සී. අට්ඨ.)] සබ්බසුන්දරො;
භුත්වා සාලිං යථාකාමං, තුණ්ඩෙනාදාය ගච්ඡති.
ඔඩ්ඩෙන්තු [උජ්ඣුන්තු (ස්යා. ක.) අඞ්ගුත්තරනිකායෙ පස්සිතබ්බං] වාළපාසානි, යථා වජ්ඣෙථ සො දිජො;
ජීවඤ්ච නං ගහෙත්වාන, ආනයෙහි [ආනයෙථ (සී. පී.)] මමන්තිකෙ.
එතෙ භුත්වා පිවිත්වා ච [භුත්වා ච පිත්වා ච (පී.)], පක්කමන්ති විහඞ්ගමා;
එකො බද්ධොස්මි පාසෙන, කිං පාපං පකතං මයා.
උදරං නූන අඤ්ඤෙසං, සුව අච්චොදරං තව;
භුත්වා සාලිං යථාකාමං, තුණ්ඩෙනාදාය ගච්ඡසි.
කොට්ඨං නු තත්ථ පූරෙසි, සුව වෙරං නු තෙ මයා;
පුට්ඨො මෙ සම්ම අක්ඛාහි, කුහිං සාලිං නිදාහසි [නිධීයසි (පී.)].
න මෙ වෙරං තයා සද්ධිං, කොට්ඨො මය්හං න විජ්ජති;
ඉණං මුඤ්චාමිණං දම්මි, සම්පත්තො කොටසිම්බලිං;
නිධිම්පි තත්ථ නිදහාමි, එවං ජානාහි කොසිය.
කීදිසං තෙ ඉණදානං, ඉණමොක්ඛො ච කීදිසො;
නිධිනිධානමක්ඛාහි ¶ , අථ පාසා පමොක්ඛසි.
අජාතපක්ඛා තරුණා, පුත්තකා මය්හ කොසිය;
තෙ මං භතා භරිස්සන්ති, තස්මා තෙසං ඉණං දදෙ.
මාතා පිතා ච මෙ වුද්ධා, ජිණ්ණකා ගතයොබ්බනා;
තෙසං තුණ්ඩෙන හාතූන, මුඤ්චෙ පුබ්බකතං [පුබ්බෙ කතං (සී.)] ඉණං.
අඤ්ඤෙපි ¶ තත්ථ සකුණා, ඛීණපක්ඛා සුදුබ්බලා;
තෙසං පුඤ්ඤත්ථිකො දම්මි, තං නිධිං ආහු පණ්ඩිතා.
ඊදිසං ¶ [එදිසං (සී. පී.)] මෙ ඉණදානං, ඉණමොක්ඛො ච ඊදිසො;
නිධිනිධානමක්ඛාමි [නිධිං නිධානං අක්ඛාතං (සී. පී.)], එවං ජානාහි කොසිය.
භද්දකො වතයං පක්ඛී, දිජො පරමධම්මිකො;
එකච්චෙසු මනුස්සෙසු, අයං ධම්මො න විජ්ජති.
භුඤ්ජ සාලිං යථාකාමං, සහ සබ්බෙහි ඤාතිභි;
පුනාපි සුව පස්සෙමු, පියං මෙ තව දස්සනං.
භුත්තඤ්ච පීතඤ්ච තවස්සමම්හි [තවස්සබ්යම්හි (ක.)], රත්තිඤ්ච [රතී ච (සී. පී.)] නො කොසිය තෙ සකාසෙ;
නික්ඛිත්තදණ්ඩෙසු දදාහි දානං, ජිණ්ණෙ ච මාතාපිතරො භරස්සු.
ලක්ඛී වත මෙ උදපාදි අජ්ජ, යො අද්දසාසිං පවරං [යොහං අදස්සං පරමං (ස්යා. ක.)] දිජානං;
සුවස්ස සුත්වාන සුභාසිතානි, කාහාමි ¶ පුඤ්ඤානි අනප්පකානි.
සො කොසියො අත්තමනො උදග්ගො, අන්නඤ්ච පානඤ්චභිසඞ්ඛරිත්වා [අන්නඤ්ච පානං අභිසංහරිත්වා (ක.)];
අන්නෙන පානෙන පසන්නචිත්තො, සන්තප්පයි සමණබ්රාහ්මණෙ චාති.
සාලිකෙදාරජාතකං [කෙදාරජාතකං (ක.)] පඨමං.
485. චන්දකින්නරීජාතකං (2)
උපනීයතිදං මඤ්ඤෙ, චන්දෙ [ලොහිතමදෙන මජ්ජාමි; විජහාමි ජීවිතං පාණා, (සී. පී. අට්ඨ.)] ලොහිතමද්දනෙ;
අජ්ජ ජහාමි ජීවිතං, පාණා [ලොහිතමදෙන මජ්ජාමි; විජහාමි ජීවිතං පාණා, (සී. පී. අට්ඨ.)] මෙ චන්දෙ නිරුජ්ඣන්ති.
ඔසීදි ¶ [ඔසධි (සී. ස්යා. පී.), ඔසට්ඨි (ක.), ඔසති (අභිනවටීකා), ඔසීදති (?)] මෙ දුක්ඛං [දුක්ඛං මෙ (සී. පී.)] හදයං, මෙ ඩය්හතෙ නිතම්මාමි;
තව චන්දියා සොචන්තියා, න නං අඤ්ඤෙහි සොකෙහි.
තිණමිව වනමිව මිලායාමි [මිලයාමි (සී.), මිය්යාමි (සී. පී. අට්ඨ.)], නදී අපරිපුණ්ණාව [අපරිපුණ්ණියාව (සී. පී.)] සුස්සාමි;
තව චන්දියා සොචන්තියා, න නං අඤ්ඤෙහි සොකෙහි.
වස්සමිව සරෙ පාදෙ [වස්සංව සරෙ පාදෙ (සී.), වස්සංව සරෙ පබ්බතපාදෙ (පී.)], ඉමානි අස්සූනි වත්තරෙ මය්හං;
තව චන්දියා සොචන්තියා, න නං අඤ්ඤෙහි සොකෙහි.
පාපො ඛොසි [පාපොසි ඛො (සී.), පාපො ඛො (ස්යා. පී.)] රාජපුත්ත, යො මෙ ඉච්ඡිතං [ඉච්ඡිත (සී. ස්යා. පී.)] පතිං වරාකියා;
විජ්ඣසි වනමූලස්මිං, සොයං විද්ධො ඡමා සෙති.
ඉමං මය්හං හදයසොකං, පටිමුඤ්චතු රාජපුත්ත තව මාතා;
යො මය්හං හදයසොකො, කිම්පුරිසං අවෙක්ඛමානාය.
ඉමං මය්හං හදයසොකං, පටිමුඤ්චතු රාජපුත්ත තව ජායා;
යො ¶ මය්හං හදයසොකො, කිම්පුරිසං අවෙක්ඛමානාය.
මා ¶ ච පුත්තං [පුත්තෙ (සී. පී.)] මා ච පතිං, අද්දක්ඛි රාජපුත්ත තව මාතා;
යො කිම්පුරිසං අවධි, අදූසකං මය්හ කාමා හි [මය්හං කාමා (ක.)].
මා ච පුත්තං මා ච පතිං, අද්දක්ඛි රාජපුත්ත තව ජායා;
යො කිම්පුරිසං අවධි, අදූසකං මය්හ කාමා හි.
මා ත්වං චන්දෙ රොදි, මා සොචි වනතිමිරමත්තක්ඛි;
මම ත්වං හෙහිසි භරියා, රාජකුලෙ පූජිතා නාරීභි [නාරී (සී. පී.)].
අපි නූනහං මරිස්සං, නාහං [න ච පනාහං (සී. පී.)] රාජපුත්ත තව හෙස්සං;
යො කිම්පුරිසං අවධි, අදූසකං මය්හ කාමා හි.
අපි භීරුකෙ අපි ජීවිතුකාමිකෙ, කිම්පුරිසි ගච්ඡ හිමවන්තං;
තාලීසතගරභොජනා, අඤ්ඤෙ [තාලිස්සතගරභොජනෙ, අරඤ්ඤෙ (සී. පී.)] තං මිගා රමිස්සන්ති.
තෙ ¶ පබ්බතා තා ච කන්දරා, [තා ච ගිරිගුහායො (සී. ස්යා. පී.)] තා ච ගිරිගුහායො තථෙව තිට්ඨන්ති [තා ච ගිරිගුහායො (සී. ස්යා. පී.)];
තත්ථෙව [තත්ථ (සී. ස්යා. පී.)] තං අපස්සන්තී, කිම්පුරිස කථං අහං කස්සං.
තෙ පණ්ණසන්ථතා රමණීයා, වාළමිගෙහි අනුචිණ්ණා;
තත්ථෙව තං අපස්සන්තී, කිම්පුරිස කථං අහං කස්සං [කාසං (සී. ස්යා. පී.)].
තෙ ¶ පුප්ඵසන්ථතා රමණීයා, වාළමිගෙහි අනුචිණ්ණා;
තත්ථෙව තං අපස්සන්තී, කිම්පුරිස කථං අහං කස්සං.
අච්ඡා සවන්ති ගිරිවන [ගිරිවර (සී. පී.)] නදියො, කුසුමාභිකිණ්ණසොතායො;
තත්ථෙව තං අපස්සන්තී, කිම්පුරිස කථං අහං කස්සං.
නීලානි හිමවතො පබ්බතස්ස, කූටානි දස්සනීයානි [දස්සනෙය්යානි (සී. පී.)];
තත්ථෙව තං අපස්සන්තී, කිම්පුරිස කථං අහං කස්සං.
පීතානි හිමවතො පබ්බතස්ස, කූටානි දස්සනීයානි;
තත්ථෙව තං අපස්සන්තී, කිම්පුරිස කථං අහං කස්සං.
තම්බානි හිමවතො පබ්බතස්ස, කූටානි දස්සනීයානි;
තත්ථෙව තං අපස්සන්තී, කිම්පුරිස කථං අහං කස්සං.
තුඞ්ගානි හිමවතො පබ්බතස්ස, කූටානි දස්සනීයානි;
තත්ථෙව තං අපස්සන්තී, කිම්පුරිස කථං අහං කස්සං.
සෙතානි හිමවතො පබ්බතස්ස, කූටානි දස්සනීයානි;
තත්ථෙව තං අපස්සන්තී, කිම්පුරිස කථං අහං කස්සං.
චිත්රානි හිමවතො පබ්බතස්ස, කූටානි දස්සනීයානි;
තත්ථෙව තං අපස්සන්තී, කිම්පුරිස කථං අහං කස්සං.
යක්ඛගණසෙවිතෙ ¶ ගන්ධමාදනෙ, ඔසධෙභි සඤ්ඡන්නෙ;
තත්ථෙව තං අපස්සන්තී, කිම්පුරිස කථං අහං කස්සං.
කිම්පුරිසසෙවිතෙ ගන්ධමාදනෙ, ඔසධෙභි සඤ්ඡන්නෙ;
තත්ථෙව ¶ තං අපස්සන්තී, කිම්පුරිස කථං අහං කස්සං.
වන්දෙ ¶ තෙ අයිරබ්රහ්මෙ [අය්යිරෙ බ්රහ්මෙ (ක.)], යො මෙ ඉච්ඡිතං පතිං වරාකියා;
අමතෙන අභිසිඤ්චි, සමාගතාස්මි පියතමෙන.
විචරාම දානි ගිරිවන [ගිරිවර (සී. පී.)] නදියො, කුසුමාභිකිණ්ණසොතායො;
නානාදුමවසනායො [සෙවනායො (පී.)], පියංවදා අඤ්ඤමඤ්ඤස්සාති.
චන්දකින්නරීජාතකං [චන්දකින්නරජාතකං (සී. ස්යා. පී.)] දුතියං.
486. මහාඋක්කුසජාතකං (3)
උක්කා චිලාචා [මිලාචා (සී. ස්යා. පී.)] බන්ධන්ති දීපෙ [බන්ධන්ති ලුද්දා, දීපෙ (ක.)], පජා මමං ඛාදිතුං පත්ථයන්ති;
මිත්තං සහායඤ්ච වදෙහි සෙනක, ආචික්ඛ ඤාතිබ්යසනං දිජානං.
දිජො දිජානං පවරොසි පක්ඛිම [පක්ඛි (සී. පී.), පක්ඛි ච (ස්යා.)], උක්කුසරාජ සරණං තං උපෙම [උපෙමි (සී. ස්යා. පී.)];
පජා මමං ඛාදිතුං පත්ථයන්ති, ලුද්දා චිලාචා [මිලාචා (සී. ස්යා. පී.)] භව මෙ සුඛාය.
මිත්තං සහායඤ්ච කරොන්ති පණ්ඩිතා, කාලෙ අකාලෙ සුඛමෙසමානා [මාසයානා (පී.)];
කරොමි තෙ සෙනක එතමත්ථං, අරියො ¶ හි අරියස්ස කරොති කිච්චං.
යං හොති කිච්චං අනුකම්පකෙන, අරියස්ස අරියෙන කතං තයීදං [තව යිදං (සී. පී.)];
අත්තානුරක්ඛී භව මා අදය්හි [අඩය්හ (සී. පී.)], ලච්ඡාම පුත්තෙ තයි ජීවමානෙ.
තවෙව ¶ [තමෙව (ස්යා. ක.)] රක්ඛාවරණං කරොන්තො, සරීරභෙදාපි න සන්තසාමි;
කරොන්ති හෙකෙ [හෙතෙ (ක. සී. ස්යා. පී.)] සඛීනං සඛාරො, පාණං චජන්තා [චජන්ති (සී. පී.)] සතමෙස [සතානෙස (පී.)] ධම්මො.
සුදුක්කරං කම්මමකාසි [මකා (සී. පී.)], අණ්ඩජායං විහඞ්ගමො;
අත්ථාය කුරරො පුත්තෙ, අඩ්ඪරත්තෙ අනාගතෙ.
චුතාපි හෙකෙ [එකෙ (සී. පී.)] ඛලිතා සකම්මුනා, මිත්තානුකම්පාය පතිට්ඨහන්ති;
පුත්තා මමට්ටා ගතිමාගතොස්මි, අත්ථං චරෙථො [චරෙථ (සී. ස්යා. පී.)] මම වාරිචර [වාරිඡන්න (සී. පී.)].
ධනෙන ධඤ්ඤෙන ච අත්තනා ච, මිත්තං සහායඤ්ච කරොන්ති පණ්ඩිතා;
කරොමි තෙ සෙනක එතමත්ථං, අරියො හි අරියස්ස කරොති කිච්චං.
අප්පොස්සුක්කො තාත තුවං නිසීද, පුත්තො ¶ පිතු චරති අත්ථචරියං;
අහං චරිස්සාමි තවෙතමත්ථං, සෙනස්ස පුත්තෙ පරිතායමානො.
අද්ධා ¶ හි තාත සතමෙස ධම්මො, පුත්තො පිතු යං චරෙ [පිතුනං චරෙ (ක.), පිතු යඤ්චරෙථ (සී. පී.)] අත්ථචරියං;
අප්පෙව මං දිස්වාන පවඩ්ඪකායං, සෙනස්ස පුත්තා න විහෙඨයෙය්යුං.
පසූ මනුස්සා මිගවීරසෙට්ඨ [මිගවිරියසෙට්ඨ (සී. පී.)], භයට්ටිතා [භයද්දිතා (සී. පී.)] සෙට්ඨමුපබ්බජන්ති;
පුත්තා මමට්ටා ගතිමාගතොස්මි, ත්වං නොසි රාජා භව මෙ සුඛාය.
කරොමි ¶ තෙ සෙනක එතමත්ථං, ආයාමි තෙ තං දිසතං වධාය;
කථඤ්හි විඤ්ඤූ පහු සම්පජානො, න වායමෙ අත්තජනස්ස ගුත්තියා.
මිත්තඤ්ච කයිරාථ සුහදයඤ්ච [සුහද්දයඤ්ච (සී.), සඛාඝරඤ්ච (පී.)], අයිරඤ්ච කයිරාථ සුඛාගමාය;
නිවත්ථකොචොව [කොජොව (සී. පී.)] සරෙභිහන්ත්වා, මොදාම පුත්තෙහි සමඞ්ගිභූතා.
සකමිත්තස්ස කම්මෙන, සහායස්සාපලායිනො;
කූජන්තමුපකූජන්ති ¶ , ලොමසා හදයඞ්ගමං.
මිත්තං සහායං අධිගම්ම පණ්ඩිතො, සො භුඤ්ජතී පුත්ත පසුං ධනං වා;
අහඤ්ච පුත්තා ච පතී ච මය්හං, මිත්තානුකම්පාය සමඞ්ගිභූතා.
රාජවතා සූරවතා ච අත්ථො, සම්පන්නසඛිස්ස භවන්ති හෙතෙ;
සො මිත්තවා යසවා උග්ගතත්තො, අස්මිංධලොකෙ [අස්මිඤ්ච ලොකෙ (සී. ස්යා. පී.)] මොදති කාමකාමී.
කරණීයානි මිත්තානි, දලිද්දෙනාපි සෙනක;
පස්ස මිත්තානුකම්පාය, සමග්ගම්හා සඤාතකෙ [සඤාතකා (?)].
සූරෙන බලවන්තෙන, යො මිත්තෙ [මෙත්තෙ (සී.), මිත්තං (ස්යා.)] කුරුතෙ දිජො;
එවං සො සුඛිතො හොති, යථාහං ත්වඤ්ච සෙනකාති.
මහාඋක්කුසජාතකං තතියං.
487. උද්දාලකජාතකං (4)
ඛරාජිනා ¶ ජටිලා පඞ්කදන්තා, දුම්මක්ඛරූපා [දුම්මුධරූපා (සී. පී. ක.)] යෙ මන්තං ජප්පන්ති [යෙමෙ ජපන්ති (සී. පී.), යෙ’මෙ ජප්පන්ති මන්තෙ (ජා. 1.6.10)];
කච්චින්නු තෙ මානුසකෙ පයොගෙ, ඉදං විදූ පරිමුත්තා අපායා.
පාපානි ¶ කම්මානි කරෙථ [කරෙය්ය (ස්යා.), කත්වාන (ජා. 1.6.11)] රාජ, බහුස්සුතො චෙ න චරෙය්ය ධම්මං;
සහස්සවෙදොපි න තං පටිච්ච, දුක්ඛා පමුච්චෙ [පමුඤ්චෙ (ස්යා.)] චරණං අපත්වා.
සහස්සවෙදොපි න තං පටිච්ච, දුක්ඛා පමුච්චෙ චරණං අපත්වා;
මඤ්ඤාමි වෙදා අඵලා භවන්ති, සසංයමං චරණඤ්ඤෙව සච්චං.
න හෙව වෙදා අඵලා භවන්ති, සසංයමං චරණඤ්ඤෙව සච්චං;
කිත්තිඤ්හි [කිත්තිඤ්ච (ස්යා.)] පප්පොති අධිච්ච වෙදෙ, සන්තිං පුණාති [පුනොති (සී. අට්ඨ.), පුණෙති (ස්යා. ජා. 1.6.13), පුනෙති (පී.)] චරණෙන දන්තො.
භච්චා ¶ මාතා පිතා බන්ධූ, යෙන ජාතො සයෙව සො;
උද්දාලකො අහං භොතො [භොති (ක.)], සොත්තියාකුලවංසකො [වංසතො (ක.)].
කථං භො බ්රාහ්මණො හොති, කථං භවති කෙවලී;
කථඤ්ච පරිනිබ්බානං, ධම්මට්ඨො කින්ති වුච්චති.
නිරංකත්වා ¶ අග්ගිමාදාය බ්රාහ්මණො, ආපො සිඤ්චං යජං උස්සෙති යූපං;
එවංකරො බ්රාහ්මණො හොති ඛෙමී, ධම්මෙ ඨිතං තෙන අමාපයිංසු.
න ¶ සුද්ධි සෙචනෙනත්ථි, නාපි කෙවලී බ්රාහ්මණො;
න ඛන්තී නාපි සොරච්චං, නාපි සො පරිනිබ්බුතො.
කථං සො [භො (ස්යා. ක.)] බ්රාහ්මණො හොති, කථං භවති කෙවලී;
කථඤ්ච පරිනිබ්බානං, ධම්මට්ඨො කින්ති වුච්චති.
අඛෙත්තබන්ධූ අමමො නිරාසො, නිල්ලොභපාපො භවලොභඛීණො;
එවංකරො බ්රාහ්මණො හොති ඛෙමී, ධම්මෙ ඨිතං තෙන අමාපයිංසු.
ඛත්තියා බ්රාහ්මණා වෙස්සා, සුද්දා චණ්ඩාලපුක්කුසා;
සබ්බෙව සොරතා දන්තා, සබ්බෙව පරිනිබ්බුතා;
සබ්බෙසං සීතිභූතානං, අත්ථි සෙය්යොථ [සෙය්යොව (සී. පී.)] පාපියො.
ඛත්තියා බ්රාහ්මණා වෙස්සා, සුද්දා චණ්ඩාලපුක්කුසා;
සබ්බෙව සොරතා දන්තා, සබ්බෙව පරිනිබ්බුතා;
සබ්බෙසං සීතිභූතානං, නත්ථි සෙය්යොථ පාපියො.
ඛත්තියා බ්රාහ්මණා වෙස්සා, සුද්දා චණ්ඩාලපුක්කුසා;
සබ්බෙව සොරතා දන්තා, සබ්බෙව පරිනිබ්බුතා.
සබ්බෙසං සීතිභූතානං, නත්ථි සෙය්යොථ පාපියො;
පනත්ථං [පසත්ථං (ස්යා.), පසට්ඨං (ක.)] චරසි බ්රහ්මඤ්ඤං, සොත්තියාකුලවංසතං.
නානාරත්තෙහි වත්ථෙහි, විමානං භවති ඡාදිතං;
න තෙසං ඡායා වත්ථානං, සො රාගො අනුපජ්ජථ.
එවමෙව ¶ ¶ [එවමෙවං (පී.)] මනුස්සෙසු, යදා සුජ්ඣන්ති මාණවා;
තෙ සජාතිං පමුඤ්චන්ති [න තෙසං ජාතිං පුච්ඡන්ති (සී. ස්යා. පී.), න තෙසං ජාති සුජ්ඣති (ක.)], ධම්මමඤ්ඤාය සුබ්බතාති.
උද්දාලකජාතකං චතුත්ථං.
488. භිසජාතකං (5)
අස්සං ¶ ගවං රජතං ජාතරූපං, භරියඤ්ච සො ඉධ ලභතං මනාපං;
පුත්තෙහි දාරෙහි සමඞ්ගි හොතු, භිසානි තෙ බ්රාහ්මණ යො අහාසි.
මාලඤ්ච සො කාසිකචන්දනඤ්ච, ධාරෙතු පුත්තස්ස බහූ භවන්තු;
කාමෙසු තිබ්බං කුරුතං අපෙක්ඛං, භිසානි තෙ බ්රාහ්මණ යො අහාසි.
පහූතධඤ්ඤො කසිමා යසස්සී, පුත්තෙ ගිහී ධනිමා සබ්බකාමෙ;
වයං අපස්සං ඝරමාවසාතු, භිසානි තෙ බ්රාහ්මණ යො අහාසි.
සො ඛත්තියො හොතු පසය්හකාරී, රාජාභිරාජා [රාජාධිරාජා (ස්යා. ක.)] බලවා යසස්සී;
ස ¶ චාතුරන්තං මහිමාවසාතු, භිසානි තෙ බ්රාහ්මණ යො අහාසි.
සො බ්රාහ්මණො හොතු අවීතරාගො, මුහුත්තනක්ඛත්තපථෙසු යුත්තො;
පූජෙතු නං රට්ඨපතී යසස්සී, භිසානි තෙ බ්රාහ්මණ යො අහාසි.
අජ්ඣායකං ¶ සබ්බසමන්තවෙදං [සබ්බසමත්තවෙදං (සී.), සබ්බසමත්තවෙදනං (පී.)], තපස්සීනං මඤ්ඤතු සබ්බලොකො;
පූජෙන්තු නං ජානපදා සමෙච්ච, භිසානි තෙ බ්රාහ්මණ යො අහාසි.
චතුස්සදං ගාමවරං සමිද්ධං, දින්නඤ්හි සො භුඤ්ජතු වාසවෙන;
අවීතරාගො මරණං උපෙතු, භිසානි තෙ බ්රාහ්මණ යො අහාසි.
සො ගාමණී හොතු සහායමජ්ඣෙ, නච්චෙහි ගීතෙහි පමොදමානො;
සො රාජතො බ්යසන මාලත්ථ [මා රාජතො ව්යසන’මලත්ථ (සී. ස්යා. පී.)] කිඤ්චි, භිසානි තෙ බ්රාහ්මණ යො අහාසි.
යං එකරාජා පථවිං විජෙත්වා, ඉත්ථීසහස්සාන [ඉත්ථීසහස්සස්ස (සී. පී.)] ඨපෙතු අග්ගං;
සීමන්තිනීනං ¶ පවරා භවාතු, භිසානි තෙ බ්රාහ්මණ යා අහාසි.
ඉසීනඤ්හි සා සබ්බසමාගතානං, භුඤ්ජෙය්ය සාදුං අවිකම්පමානා;
චරාතු ලාභෙන විකත්ථමානා, භිසානි තෙ බ්රාහ්මණ යා අහාසි.
ආවාසිකො හොතු මහාවිහාරෙ, නවකම්මිකො හොතු ගජඞ්ගලායං [කජඞ්ගලායං (සී. ස්යා. පී.)];
ආලොකසන්ධිං දිවසං [දිවසා (සී. ස්යා. පී.)] කරොතු, භිසානි තෙ බ්රාහ්මණ යො අහාසි.
සො ¶ බජ්ඣතූ පාසසතෙහි ඡබ්භි [ඡම්හි (සී. පී.), ඡස්සු (?)], රම්මා වනා නිය්යතු රාජධානිං [රාජඨානිං (ක.)];
තුත්තෙහි සො හඤ්ඤතු පාචනෙහි, භිසානි තෙ බ්රාහ්මණ යො අහාසි.
අලක්කමාලී තිපුකණ්ණවිද්ධො, ලට්ඨීහතො සප්පමුඛං උපෙතු;
සකච්ඡබන්ධො [සක්කච්චබද්ධො (සී. පී.), සංකච්චබන්ධො (නිය්ය)] විසිඛං චරාතු, භිසානි තෙ බ්රාහ්මණ යො අහාසි.
යො වෙ අනට්ඨංව [අනට්ඨං (සී. ස්යා. පී.)] නට්ඨන්ති චාහ, කාමෙව ¶ සො ලභතං භුඤ්ජතඤ්ච [ලභතු භුඤ්ජතු ච (ස්යා.)];
අගාරමජ්ඣෙ මරණං උපෙතු, යො වා භොන්තො සඞ්කති කඤ්චිදෙව [කිඤ්චිදෙව (ක.)].
යදෙසමානා ¶ විචරන්ති ලොකෙ, ඉට්ඨඤ්ච කන්තඤ්ච බහූනමෙතං;
පියං මනුඤ්ඤං චිධ ජීවලොකෙ, කස්මා ඉසයො නප්පසංසන්ති කාමෙ.
කාමෙසු වෙ හඤ්ඤරෙ බජ්ඣරෙ ච, කාමෙසු දුක්ඛඤ්ච භයඤ්ච ජාතං;
කාමෙසු භූතාධිපතී පමත්තා, පාපානි කම්මානි කරොන්ති මොහා.
තෙ පාපධම්මා පසවෙත්ව පාපං, කායස්ස භෙදා නිරයං වජන්ති;
ආදීනවං කාමගුණෙසු දිස්වා, තස්මා ඉසයො නප්පසංසන්ති කාමෙ.
වීමංසමානො ඉසිනො භිසානි, තීරෙ ගහෙත්වාන ථලෙ නිධෙසිං;
සුද්ධා අපාපා ඉසයො වසන්ති, එතානි තෙ බ්රහ්මචාරී භිසානි.
න ¶ තෙ නටා නො පන කීළනෙය්යා, න ¶ බන්ධවා නො පන තෙ සහායා;
කිස්මිං වුපත්ථම්භ සහස්සනෙත්ත, ඉසීහි ත්වං කීළසි දෙවරාජ.
ආචරියො මෙසි පිතා ච මය්හං, එසා පතිට්ඨා ඛලිතස්ස බ්රහ්මෙ;
එකාපරාධං ඛම භූරිපඤ්ඤ, න පණ්ඩිතා කොධබලා භවන්ති.
සුවාසිතං ඉසිනං එකරත්තං, යං වාසවං භූතපතිද්දසාම;
සබ්බෙව භොන්තො සුමනා භවන්තු, යං බ්රාහ්මණො පච්චුපාදී භිසානි.
අහඤ්ච සාරිපුත්තො ච, මොග්ගල්ලානො ච කස්සපො;
අනුරුද්ධො පුණ්ණො ආනන්දො, තදාසුං සත්ත භාතරො.
භගිනී උප්පලවණ්ණා ච, දාසී ඛුජ්ජුත්තරා තදා;
චිත්තො ගහපති දාසො, යක්ඛො සාතාගිරො තදා.
පාලිලෙය්යො [පාරිලෙය්යො (සී. පී.)] තදා නාගො, මධුදො [මධුවා (සී. පී.)] සෙට්ඨවානරො;
කාළුදායී තදා සක්කො, එවං ධාරෙථ ජාතකන්ති.
භිසජාතකං පඤ්චමං.
489. සුරුචිජාතකං (6)
මහෙසී ¶ සුරුචිනො [රුචිනො (සී. ස්යා. පී.)] භරියා, ආනීතා පඨමං අහං;
දස වස්සසහස්සානි, යං මං සුරුචිමානයි.
සාහං බ්රාහ්මණ රාජානං, වෙදෙහං මිථිලග්ගහං;
නාභිජානාමි කායෙන, වාචාය උද චෙතසා;
සුරුචිං අතිමඤ්ඤිත්ථ [අතිමඤ්ඤිත්ථො (සී. පී.), අතිමඤ්ඤිතා (?)], ආවි [ආවිං (සී. පී.)] වා යදි වා රහො.
එතෙන ¶ සච්චවජ්ජෙන, පුත්තො උප්පජ්ජතං ඉසෙ;
මුසා මෙ භණමානාය, මුද්ධා ඵලතු සත්තධා.
භත්තු ¶ මම සස්සු මාතා, පිතා චාපි ච සස්සුරො;
තෙ මං බ්රහ්මෙ විනෙතාරො, යාව අට්ඨංසු ජීවිතං.
සාහං අහිංසාරතිනී, කාමසා [කාමසො (සී.)] ධම්මචාරිනී [ධම්මචාරිණී (සී.)];
සක්කච්චං තෙ උපට්ඨාසිං, රත්තින්දිවමතන්දිතා.
එතෙන සච්චවජ්ජෙන, පුත්තො උප්පජ්ජතං ඉසෙ;
මුසා මෙ භණමානාය, මුද්ධා ඵලතු සත්තධා.
සොළසිත්ථිසහස්සානි, සහභරියානි බ්රාහ්මණ;
තාසු ඉස්සා වා කොධො වා, නාහු මය්හං කුදාචනං.
හිතෙන තාසං නන්දාමි, න ච මෙ කාචි අප්පියා;
අත්තානංවානුකම්පාමි, සදා සබ්බා සපත්තියො.
එතෙන සච්චවජ්ජෙන, පුත්තො උප්පජ්ජතං ඉසෙ;
මුසා මෙ භණමානාය, මුද්ධා ඵලතු සත්තධා.
දාසෙ ¶ කම්මකරෙ පෙස්සෙ [පොසෙ (ස්යා. ක.)], යෙ චඤ්ඤෙ අනුජීවිනො;
පෙසෙමි [පොසෙමි (සී. ස්යා. පී.)] සහධම්මෙන, සදා පමුදිතින්ද්රියා.
එතෙන සච්චවජ්ජෙන, පුත්තො උප්පජ්ජතං ඉසෙ;
මුසා මෙ භණමානාය, මුද්ධා ඵලතු සත්තධා.
සමණෙ බ්රාහ්මණෙ චාපි, අඤ්ඤෙ චාපි වනිබ්බකෙ;
තප්පෙමි අන්නපානෙන, සදා පයතපාණිනී.
එතෙන සච්චවජ්ජෙන, පුත්තො උප්පජ්ජතං ඉසෙ;
මුසා මෙ භණමානාය, මුද්ධා ඵලතු සත්තධා.
චාතුද්දසිං පඤ්චද්දසිං [පන්නරසිං (සී. පී.)], යා ච පක්ඛස්ස අට්ඨමී [අට්ඨමිං (සී. පී.)];
පාටිහාරියපක්ඛඤ්ච, අට්ඨඞ්ගසුසමාගතං [අට්ඨඞ්ගසුසමාහිතං (සබ්බත්ථ) වි. ව. 129 පාළියා අට්ඨකථා පස්සිතබ්බා];
උපොසථං උපවසාමි [උපවසිං (ක.)], සදා සීලෙසු සංවුතා.
එතෙන ¶ සච්චවජ්ජෙන, පුත්තො උප්පජ්ජතං ඉසෙ;
මුසා මෙ භණමානාය, මුද්ධා ඵලතු සත්තධා.
සබ්බෙව තෙ ධම්මගුණා, රාජපුත්ති යසස්සිනි;
සංවිජ්ජන්ති තයි භද්දෙ, යෙ ත්වං කිත්තෙසි අත්තනි.
ඛත්තියො ජාතිසම්පන්නො, අභිජාතො යසස්සිමා;
ධම්මරාජා විදෙහානං, පුත්තො උප්පජ්ජතෙ තව [තවං (සී. පී.)].
දුම්මී ¶ [රුම්මී (සී. පී.)] රජොජල්ලධරො, අඝෙ වෙහායසං ඨිතො;
මනුඤ්ඤං භාසසෙ වාචං, යං මය්හං හදයඞ්ගමං.
දෙවතානුසි ¶ සග්ගම්හා, ඉසි වාසි [චාපි (ක.)] මහිද්ධිකො;
කො වාසි ත්වං අනුප්පත්තො, අත්තානං මෙ පවෙදය.
යං දෙවසඞ්ඝා වන්දන්ති, සුධම්මායං සමාගතා;
සොහං සක්කො සහස්සක්ඛො, ආගතොස්මි තවන්තිකෙ.
ඉත්ථියො [ඉත්ථියා (පී.)] ජීවලොකස්මිං, යා හොති [හොන්ති (සී. ස්යා.)] සමචාරිනී [සමචාරිණී (සී.)];
මෙධාවිනී සීලවතී, සස්සුදෙවා පතිබ්බතා.
තාදිසාය සුමෙධාය, සුචිකම්මාය නාරියා;
දෙවා දස්සනමායන්ති, මානුසියා අමානුසා.
ත්වඤ්ච භද්දෙ සුචිණ්ණෙන, පුබ්බෙ සුචරිතෙන ච;
ඉධ රාජකුලෙ ජාතා, සබ්බකාමසමිද්ධිනී.
අයඤ්ච තෙ රාජපුත්ති, උභයත්ථ කටග්ගහො;
දෙවලොකූපපත්තී ච, කිත්තී ච ඉධ ජීවිතෙ.
චිරං සුමෙධෙ සුඛිනී, ධම්මමත්තනි පාලය;
එසාහං තිදිවං යාමි, පියං මෙ තව දස්සනන්ති.
සුරුචිජාතකං ඡට්ඨං.
490. පඤ්චුපොසථිකජාතකං (7)
අප්පොස්සුක්කො ¶ දානි තුවං කපොත, විහඞ්ගම න තව භොජනත්ථො;
ඛුදං [ඛුද්දං (ස්යා. ක.), ඛුධං (සක්කත-පාකතානුරූපං)] පිපාසං අධිවාසයන්තො, කස්මා භවංපොසථිකො කපොත [කපොතො (සී. පී.)].
අහං පුරෙ ගිද්ධිගතො කපොතියා, අස්මිං පදෙසස්මිමුභො රමාම;
අථග්ගහී සාකුණිකො කපොතිං, අකාමකො තාය විනා අහොසිං.
නානාභවා විප්පයොගෙන තස්සා, මනොමයං වෙදන වෙදයාමි [වෙදනං වෙදියාමි (සී. පී.)];
තස්මා අහංපොසථං පාලයාමි, රාගො මමං මා පුනරාගමාසි.
අනුජ්ජුගාමී උරගා දුජිව්හ [උරග ද්විජිව්හ (සී.)], දාඨාවුධො ඝොරවිසොසි සප්ප;
ඛුදං පිපාසං අධිවාසයන්තො, කස්මා ¶ භවංපොසථිකො නු දීඝ [දීඝො (සී. පී.)].
උසභො අහූ බලවා ගාමිකස්ස, චලක්කකූ වණ්ණබලූපපන්නො;
සො මං අක්කමි තං කුපිතො අඩංසි, දුක්ඛාභිතුණ්ණො මරණං උපාගා [උපාගමි (සී. පී.)].
තතො ¶ ජනා නික්ඛමිත්වාන ගාමා, කන්දිත්වා රොදිත්වා [කන්දිත්ව රොදිත්ව (සී.)] අපක්කමිංසු;
තස්මා අහංපොසථං පාලයාමි, කොධො ¶ මමං මා පුනරාගමාසි.
මතාන ¶ මංසානි බහූ සුසානෙ, මනුඤ්ඤරූපං තව භොජනෙ තං;
ඛුදං පිපාසං අධිවාසයන්තො, කස්මා භවංපොසථිකො සිඞ්ගාල [සිගාලො (සී. පී.)].
පවිසි [පවිස්සං (සී. පී.), පවිස්ස (ස්යා.)] කුච්ඡිං මහතො ගජස්ස, කුණපෙ රතො හත්ථිමංසෙසු ගිද්ධො [හත්ථිමංසෙ පගිද්ධො (සී. පී.)];
උණ්හො ච වාතො තිඛිණා ච රස්මියො, තෙ සොසයුං තස්ස කරීසමග්ගං.
කිසො ච පණ්ඩූ ච අහං භදන්තෙ, න මෙ අහූ නික්ඛමනාය මග්ගො;
මහා ච මෙඝො සහසා පවස්සි, සො තෙමයී තස්ස කරීසමග්ගං.
තතො අහං නික්ඛමිසං භදන්තෙ, චන්දො යථා රාහුමුඛා පමුත්තො;
තස්මා අහංපොසථං පාලයාමි, ලොභො මමං මා පුනරාගමාසි.
වම්මීකථූපස්මිං කිපිල්ලිකානි, නිප්පොථයන්තො තුවං පුරෙ චරාසි;
ඛුදං පිපාසං අධිවාසයන්තො, කස්මා ¶ භවංපොසථිකො නු අච්ඡ [අච්ඡො (සී. පී.)].
සකං නිකෙතං අතිහීළයානො [අතිහෙළයානො (ස්යා. ක.)], අත්රිච්ඡතා [අත්රිච්ඡතාය (සී. ස්යා. පී.)] මල්ලගාමං [මලතං (සී. පී.), මල්ලයතං (ක.)] අගච්ඡිං;
තතො ජනා නික්ඛමිත්වාන ගාමා, කොදණ්ඩකෙන පරිපොථයිංසු මං.
සො ¶ භින්නසීසො රුහිරමක්ඛිතඞ්ගො, පච්චාගමාසිං සකං [ස සකං (ස්යා. ක.),’ථ සකං (?)] නිකෙතං;
තස්මා අහංපොසථං පාලයාමි, අත්රිච්ඡතා මා පුනරාගමාසි.
යං නො අපුච්ඡිත්ථ තුවං භදන්තෙ, සබ්බෙව බ්යාකරිම්හ යථා පජානං;
මයම්පි පුච්ඡාම තුවං භදන්තෙ, කස්මා භවංපොසථිකො නු බ්රහ්මෙ.
අනූපලිත්තො මම අස්සමම්හි, පච්චෙකබුද්ධො මුහුත්තං නිසීදි;
සො මං අවෙදී ගතිමාගතිඤ්ච, නාමඤ්ච ගොත්තං චරණඤ්ච සබ්බං.
එවම්පහං වන්දි න [එවම්පහං නග්ගහෙ (සී. පී.)] තස්ස පාදෙ, න චාපි නං මානගතෙන පුච්ඡිං;
තස්මා අහංපොසථං පාලයාමි, මානො ¶ මමං මා පුනරාගමාසීති.
පඤ්චුපොසථිකජාතකං සත්තමං.
491. මහාමොරජාතකං (8)
සචෙ හි ත්යාහං ධනහෙතු ගාහිතො, මා මං වධී ජීවගාහං ගහෙත්වා;
රඤ්ඤො ච [රඤ්ඤොව (සී. පී.)] මං සම්ම උපන්තිකං [උපන්ති (සී. ස්යා. පී.)] නෙහි, මඤ්ඤෙ ධනං ලච්ඡසිනප්පරූපං.
න මෙ අයං තුය්හ වධාය අජ්ජ, සමාහිතො චාපධුරෙ [චාපවරෙ (සී. පී.), චාපවරො (ස්යා.)] ඛුරප්පො;
පාසඤ්ච ත්යාහං අධිපාතයිස්සං, යථාසුඛං ගච්ඡතු මොරරාජා.
යං ¶ ¶ සත්ත වස්සානි මමානුබන්ධි, රත්තින්දිවං ඛුප්පිපාසං සහන්තො;
අථ කිස්ස මං පාසවසූපනීතං, පමුත්තවෙ ¶ ඉච්ඡසි බන්ධනස්මා.
පාණාතිපාතා විරතො නුසජ්ජ, අභයං නු තෙ සබ්බභූතෙසු දින්නං;
යං මං තුවං පාසවසූපනීතං, පමුත්තවෙ ඉච්ඡසි බන්ධනස්මා.
පාණාතිපාතා විරතස්ස බ්රූහි, අභයඤ්ච යො සබ්බභූතෙසු දෙති;
පුච්ඡාමි තං මොරරාජෙතමත්ථං, ඉතො චුතො කිං ලභතෙ සුඛං සො.
පාණාතිපාතා විරතස්ස බ්රූමි, අභයඤ්ච යො සබ්බභූතෙසු දෙති;
දිට්ඨෙව ධම්මෙ ලභතෙ පසංසං, සග්ගඤ්ච සො යාති සරීරභෙදා.
න සන්ති දෙවා ඉති ආහු [ඉච්චාහු (සී. පී.)] එකෙ, ඉධෙව ජීවො විභවං උපෙති;
තථා ඵලං සුකතදුක්කටානං, දත්තුපඤ්ඤත්තඤ්ච වදන්ති දානං;
තෙසං වචො අරහතං සද්දහානො, තස්මා අහං සකුණෙ බාධයාමි.
චන්දො ච සුරියො ච උභො සුදස්සනා, ගච්ඡන්ති ඔභාසයමන්තලික්ඛෙ;
ඉමස්ස ලොකස්ස පරස්ස වා තෙ, කථං නු තෙ ආහු මනුස්සලොකෙ.
චන්දො ¶ ච සුරියො ච උභො සුදස්සනා, ගච්ඡන්ති ¶ ඔභාසයමන්තලික්ඛෙ;
පරස්ස ලොකස්ස න තෙ ඉමස්ස, දෙවාති තෙ ආහු මනුස්සලොකෙ.
එත්ථෙව තෙ නීහතා හීනවාදා, අහෙතුකා යෙ න වදන්ති කම්මං;
තථා ඵලං සුකතදුක්කටානං, දත්තුපඤ්ඤත්තං යෙ ච වදන්ති දානං.
අද්ධා හි සච්චං වචනං තවෙදං [තවෙතං (සී. ස්යා. පී.)], කථඤ්හි දානං අඵලං භවෙය්ය [වදෙය්ය (සී. පී.)];
තථා ඵලං සුකතදුක්කටානං, දත්තුපඤ්ඤත්තඤ්ච කථං භවෙය්ය.
කථංකරො කින්තිකරො කිමාචරං, කිං සෙවමානො කෙන තපොගුණෙන;
අක්ඛාහි [අක්ඛාහි තං දානි (ක.)] මෙ මොරරාජෙතමත්ථං, යථා අහං නො නිරයං පතෙය්යං.
යෙ කෙචි අත්ථි සමණා පථබ්යා, කාසායවත්ථා අනගාරියා තෙ;
පාතොව පිණ්ඩාය චරන්ති කාලෙ, විකාලචරියා විරතා හි සන්තො.
තෙ තත්ථ කාලෙනුපසඞ්කමිත්වා, පුච්ඡාහි ¶ යං තෙ මනසො පියං සියා;
තෙ තෙ පවක්ඛන්ති යථාපජානං, ඉමස්ස ලොකස්ස පරස්ස චත්ථං.
තචංව ජිණ්ණං උරගො පුරාණං, පණ්ඩූපලාසං හරිතො දුමොව;
එසප්පහීනො මම ලුද්දභාවො, ජහාමහං ලුද්දකභාවමජ්ජ.
යෙ ¶ චාපි මෙ සකුණා අත්ථි බද්ධා, සතානිනෙකානි නිවෙසනස්මිං;
තෙසම්පහං [තෙසං අහං (ස්යා. ක.)] ජීවිතමජ්ජ දම්මි, මොක්ඛඤ්ච තෙ පත්තා [පත්තො (සී.), අච්ඡ (ස්යා.)] සකං නිකෙතං.
ලුද්දො ¶ චරී පාසහත්ථො අරඤ්ඤෙ, බාධෙතු මොරාධිපතිං යසස්සිං;
බන්ධිත්වා [බන්ධිත්ව (සී. පී.)] මොරාධිපතිං යසස්සිං, දුක්ඛා ස පමුච්චි [දුක්ඛා පමුච්චි (සී.), දුක්ඛා පමුඤ්චි (ස්යා. පී.)] යථාහං පමුත්තොති.
මහාමොරජාතකං අට්ඨමං.
492. තච්ඡසූකරජාතකං (9)
යදෙසමානා විචරිම්හ, පබ්බතානි වනානි ච;
අන්වෙසං ¶ විචරිං [විපුලෙ (ස්යා. ක.)] ඤාතී, තෙමෙ අධිගතා මයා.
බහුඤ්චිදං මූලඵලං, භක්ඛො චායං අනප්පකො;
රම්මා චිමා ගිරීනජ්ජො [ගිරිනදියො (සී. පී.)], ඵාසුවාසො භවිස්සති.
ඉධෙවාහං වසිස්සාමි, සහ සබ්බෙහි ඤාතිභි;
අප්පොස්සුක්කො නිරාසඞ්කී, අසොකො අකුතොභයො.
අඤ්ඤම්පි [අඤ්ඤං හි (සී. පී.)] ලෙණං පරියෙස, සත්තු නො ඉධ විජ්ජති;
සො තච්ඡ සූකරෙ හන්ති, ඉධාගන්ත්වා වරං වරං.
කො නුම්හාකං [කො නම්හාකං (සී. පී.)] ඉධ සත්තු, කො ඤාතී සුසමාගතෙ;
දුප්පධංසෙ [අප්පධංසෙ (සී. පී.)] පධංසෙති, තං මෙ අක්ඛාථ පුච්ඡිතා.
උද්ධග්ගරාජී මිගරාජා, බලී දාඨාවුධො මිගො;
සො තච්ඡ සූකරෙ හන්ති, ඉධාගන්ත්වා වරං වරං.
න නො දාඨා න විජ්ජන්ති [නු විජ්ජන්ති (ක.)], බලං කායෙ සමොහිතං;
සබ්බෙ සමග්ගා හුත්වාන, වසං කාහාම එකකං.
හදයඞ්ගමං ¶ කණ්ණසුඛං, වාචං භාසසි තච්ඡක;
යොපි යුද්ධෙ පලායෙය්ය, තම්පි පච්ඡා හනාමසෙ.
පාණාතිපාතා විරතො නු අජ්ජ, අභයං නු තෙ සබ්බභූතෙසු දින්නං;
දාඨා නු තෙ මිගවධාය [මිග විරියං (සී. ස්යා. පී.)] න සන්ති, යො සඞ්ඝපත්තො කපණොව ඣායසි.
න ¶ මෙ දාඨා න විජ්ජන්ති, බලං කායෙ සමොහිතං;
ඤාතී ච දිස්වාන සාමග්ගී එකතො, තස්මා ච ඣායාමි වනම්හි එකකො.
ඉමස්සුදං යන්ති දිසොදිසං පුරෙ, භයට්ටිතා ලෙණගවෙසිනො පුථු;
තෙ දානි සඞ්ගම්ම වසන්ති එකතො, යත්ථට්ඨිතා දුප්පසහජ්ජ තෙ මයා.
පරිණායකසම්පන්නා, සහිතා එකවාදිනො;
තෙ මං සමග්ගා හිංසෙය්යුං, තස්මා නෙසං න පත්ථයෙ [අපත්ථවෙ (පී.)].
එකොව ¶ ඉන්දො අසුරෙ ජිනාති, එකොව සෙනො හන්ති දිජෙ පසය්හ;
එකොව බ්යග්ඝො මිගසඞ්ඝපත්තො, වරං වරං හන්ති බලඤ්හි තාදිසං.
න හෙව ඉන්දො න සෙනො, නපි බ්යග්ඝො මිගාධිපො;
සමග්ගෙ සහිතෙ ඤාතී, න බ්යග්ඝෙ [බ්යග්ඝෙ ච (සී. පී.), බ්යග්ඝො න (ස්යා.)] කුරුතෙ වසෙ.
කුම්භීලකා සකුණකා, සඞ්ඝිනො ගණචාරිනො;
සම්මොදමානා එකජ්ඣං, උප්පතන්ති ඩයන්ති ච.
තෙසඤ්ච ඩයමානානං, එකෙත්ථ අපසක්කති [අපවත්තති (සී. පී.)];
තඤ්ච සෙනො නිතාළෙති, වෙය්යග්ඝියෙව සා ගති.
උස්සාහිතො ¶ ¶ ජටිලෙන, ලුද්දෙනාමිසචක්ඛුනා;
දාඨී දාඨීසු පක්ඛන්දි, මඤ්ඤමානො යථා පුරෙ.
සාධු සම්බහුලා ඤාතී, අපි රුක්ඛා අරඤ්ඤජා;
සූකරෙහි සමග්ගෙහි, බ්යග්ඝො එකායනෙ හතො.
බ්රාහ්මණඤ්චෙව බ්යග්ඝඤ්ච, උභො හන්ත්වාන සූකරා.
ආනන්දිනො පමුදිතා, මහානාදං පනාදිසුං.
තෙ සු උදුම්බරමූලස්මිං, සූකරා සුසමාගතා;
තච්ඡකං අභිසිඤ්චිංසු, ‘‘ත්වං නො රාජාසි ඉස්සරො’’ති.
තච්ඡසූකරජාතකං නවමං.
493. මහාවාණිජජාතකං (10)
වාණිජා සමිතිං කත්වා, නානාරට්ඨතො ආගතා;
ධනාහරා පක්කමිංසු, එකං කත්වාන ගාමණිං.
තෙ තං කන්තාරමාගම්ම, අප්පභක්ඛං අනොදකං;
මහානිග්රොධමද්දක්ඛුං, සීතච්ඡායං මනොරමං.
තෙ ච තත්ථ නිසීදිත්වා, තස්ස රුක්ඛස්ස ඡායයා [ඡාදියා (සී. ස්යා. පී.)];
වාණිජා සමචින්තෙසුං, බාලා මොහෙන පාරුතා.
අල්ලායතෙ [අද්දායතෙ (සී. පී.)] අයං රුක්ඛො, අපි වාරීව [වාරි ච (සී. පී.)] සන්දති;
ඉඞ්ඝස්ස පුරිමං සාඛං, මයං ඡින්දාම වාණිජා.
සා ච ඡින්නාව පග්ඝරි, අච්ඡං වාරිං අනාවිලං;
තෙ ¶ තත්ථ න්හත්වා පිවිත්වා, යාවතිච්ඡිංසු වාණිජා.
දුතියං ¶ සමචින්තෙසුං, බාලා මොහෙන පාරුතා;
ඉඞ්ඝස්ස දක්ඛිණං සාඛං, මයං ඡින්දාම වාණිජා.
සා ච ඡින්නාව පග්ඝරි, සාලිමංසොදනං බහුං;
අප්පොදවණ්ණෙ කුම්මාසෙ, සිඞ්ගිං විදලසූපියො [සිඞ්ගිං බිදලසූපියො (සී. පී.), සිඞ්ගීවෙරං ලසූපියො (ක.) සිඞ්ගීන්ති සිඞ්ගීවෙරාදිකං උත්තරිභඞ්ගං; විදලසූපියොති මුග්ගසූපාදයො (අට්ඨ.) විදලං කලායාදිම්හි වත්තතීති සක්කතාභිධානෙ].
තෙ ¶ තත්ථ භුත්වා ඛාදිත්වා [භුත්වා ච පිවිත්වා ච (පී.)], යාවතිච්ඡිංසු වාණිජා;
තතියං සමචින්තෙසුං, බාලා මොහෙන පාරුතා;
ඉඞ්ඝස්ස පච්ඡිමං සාඛං, මයං ඡින්දාම වාණිජා.
සා ච ඡින්නාව පග්ඝරි, නාරියො සමලඞ්කතා;
විචිත්රවත්ථාභරණා, ආමුත්තමණිකුණ්ඩලා.
අපි සු වාණිජා එකා, නාරියො පණ්ණවීසති;
සමන්තා පරිවාරිංසු [පරිකරිංසු (සී. ස්යා. පී.)], තස්ස රුක්ඛස්ස ඡායයා [ඡාදියා (සී. ස්යා. පී.)].
තෙ තාහි පරිචාරෙත්වා [පරිවාරෙත්වා (සී. ස්යා. පී.)], යාවතිච්ඡිංසු වාණිජා;
චතුත්ථං සමචින්තෙසුං, බාලා මොහෙන පාරුතා;
ඉඞ්ඝස්ස උත්තරං සාඛං, මයං ඡින්දාම වාණිජා.
සා ච ඡින්නාව පග්ඝරි, මුත්තා වෙළුරියා බහූ;
රජතං ජාතරූපඤ්ච, කුත්තියො පටියානි ච.
කාසිකානි ච වත්ථානි, උද්දියානි ච කම්බලා [උද්දියානෙ ච කම්බලෙ (සී. පී.)];
තෙ තත්ථ භාරෙ බන්ධිත්වා, යාවතිච්ඡිංසු වාණිජා.
පඤ්චමං සමචින්තෙසුං, බාලා මොහෙන පාරුතා;
ඉඞ්ඝස්ස ¶ මූලෙ [මූලං (සී. පී. ක.)] ඡින්දාම, අපි භිය්යො ලභාමසෙ.
අථුට්ඨහි සත්ථවාහො, යාචමානො කතඤ්ජලී;
නිග්රොධො කිං පරජ්ඣති [අපරජ්ඣථ (සී.), අපරජ්ඣති (ස්යා. පී.)], වාණිජා භද්දමත්ථු තෙ.
වාරිදා පුරිමා සාඛා, අන්නපානඤ්ච දක්ඛිණා;
නාරිදා පච්ඡිමා සාඛා, සබ්බකාමෙ ච උත්තරා;
නිග්රොධො කිං පරජ්ඣති, වාණිජා භද්දමත්ථු තෙ.
යස්ස රුක්ඛස්ස ඡායාය, නිසීදෙය්ය සයෙය්ය වා;
න තස්ස සාඛං භඤ්ජෙය්ය, මිත්තදුබ්භො හි පාපකො.
තෙ ච තස්සානාදියිත්වා [තස්ස අනාදිත්වා (සී. ස්යා.)], එකස්ස වචනං බහූ;
නිසිතාහි කුඨාරීහි [කුධාරීහි (ක.)], මූලතො නං උපක්කමුං.
තතො ¶ ¶ නාගා නික්ඛමිංසු, සන්නද්ධා පණ්ණවීසති;
ධනුග්ගහානං තිසතා, ඡසහස්සා ච වම්මිනො.
එතෙ හනථ බන්ධථ, මා වො මුඤ්චිත්ථ [මුච්චිත්ථ (පී.)] ජීවිතං;
ඨපෙත්වා සත්ථවාහංව, සබ්බෙ භස්මං [භස්මී (සී.)] කරොථ නෙ.
තස්මා හි පණ්ඩිතො පොසො, සම්පස්සං අත්ථමත්තනො;
ලොභස්ස න වසං ගච්ඡෙ, හනෙය්යාරිසකං [හනෙය්ය දිසතං (සී.), හනෙය්ය දිසකං (ස්යා.)] මනං.
එව [එත (සී. පී.)] මාදීනවං ඤත්වා, තණ්හා දුක්ඛස්ස සම්භවං;
වීතතණ්හො අනාදානො, සතො භික්ඛු පරිබ්බජෙති.
මහාවාණිජජාතකං දසමං.
494. සාධිනජාතකං (11)
අබ්භුතො ¶ වත ලොකස්මිං, උප්පජ්ජි ලොමහංසනො;
දිබ්බො රථො පාතුරහු, වෙදෙහස්ස යසස්සිනො.
දෙවපුත්තො මහිද්ධිකො, මාතලි [මාතලී (සී.)] දෙවසාරථි;
නිමන්තයිත්ථ රාජානං, වෙදෙහං මිථිලග්ගහං.
එහිමං රථමාරුය්හ, රාජසෙට්ඨ දිසම්පති;
දෙවා දස්සනකාමා තෙ, තාවතිංසා සඉන්දකා;
සරමානා හි තෙ දෙවා, සුධම්මායං සමච්ඡරෙ.
තතො ච රාජා සාධිනො [සාධීනො (සී. පී.)], වෙදෙහො මිථිලග්ගහො [පමුඛො රථමාරුහි (සී. පී.)];
සහස්සයුත්තමාරුය්හ [යුත්තං අභිරුය්හ (සී.)], අගා දෙවාන සන්තිකෙ;
තං දෙවා පටිනන්දිංසු, දිස්වා රාජානමාගතං.
ස්වාගතං තෙ මහාරාජ, අථො තෙ අදුරාගතං;
නිසීද දානි රාජීසි [රාජිසි (සී. ස්යා. පී.)], දෙවරාජස්ස සන්තිකෙ.
සක්කොපි පටිනන්දිත්ථ, වෙදෙහං මිථිලග්ගහං;
නිමන්තයිත්ථ [නිමන්තයී ච (සී. පී.)] කාමෙහි, ආසනෙන ච වාසවො.
සාධු ¶ ඛොසි අනුප්පත්තො, ආවාසං වසවත්තිනං;
වස ¶ දෙවෙසු රාජීසි, සබ්බකාමසමිද්ධිසු;
තාවතිංසෙසු දෙවෙසු, භුඤ්ජ කාමෙ අමානුසෙ.
අහං ¶ පුරෙ සග්ගගතො රමාමි, නච්චෙහි ගීතෙහි ච වාදිතෙහි;
සො දානි අජ්ජ න රමාමි සග්ගෙ, ආයුං නු ඛීණො [ඛීණං (ස්යා.)] මරණං නු සන්තිකෙ;
උදාහු මූළ්හොස්මි ජනින්දසෙට්ඨ.
න තායු [න චායු (සී. පී. ක.)] ඛීණං මරණඤ්ච [මරණං තෙ (සී. පී.)] දූරෙ, න චාපි මූළ්හො නරවීරසෙට්ඨ;
තුය්හඤ්ච [තවඤ්ච (සී. පී.), තව ච (ක.)] පුඤ්ඤානි පරිත්තකානි, යෙසං විපාකං ඉධ වෙදයිත්ථො [වෙදයතො (පී. ක.)].
වස දෙවානුභාවෙන, රාජසෙට්ඨ දිසම්පති;
තාවතිංසෙසු දෙවෙසු, භුඤ්ජ කාමෙ අමානුසෙ.
යථා යාචිතකං යානං, යථා යාචිතකං ධනං;
එවං සම්පදමෙවෙතං, යං පරතො දානපච්චයා.
න චාහමෙතමිච්ඡාමි, යං පරතො දානපච්චයා;
සයංකතානි පුඤ්ඤානි, තං මෙ ආවෙණිකං [ආවෙණියං (සී. ස්යා. පී.), ආවෙනිකං (ක.)] ධනං.
සොහං ගන්ත්වා මනුස්සෙසු, කාහාමි කුසලං බහුං;
දානෙන සමචරියාය, සංයමෙන දමෙන ච;
යං කත්වා සුඛිතො හොති, න ච පච්ඡානුතප්පති.
ඉමානි ¶ තානි ඛෙත්තානි, ඉමං නික්ඛං සුකුණ්ඩලං;
ඉමා තා හරිතානූපා, ඉමා නජ්ජො සවන්තියො.
ඉමා තා පොක්ඛරණී රම්මා, චක්කවාකපකූජිතා [චක්කවාකූපකූජිතා (සී. පී.)];
මන්දාලකෙහි සඤ්ඡන්නා, පදුමුප්පලකෙහි ච;
යස්සිමානි මමායිංසු, කිං නු තෙ දිසතං ගතා.
තානීධ ¶ ඛෙත්තානි සො භූමිභාගො, තෙයෙව ආරාමවනුපචාරා [තෙ ආරාමා තෙ වන’මෙ පචාරා (සී. පී.), තෙ යෙව ආරාමවනානි සඤ්චරා (ක.)];
තමෙව මය්හං ජනතං අපස්සතො, සුඤ්ඤංව මෙ නාරද ඛායතෙ දිසා.
දිට්ඨා මයා විමානානි, ඔභාසෙන්තා චතුද්දිසා;
සම්මුඛා දෙවරාජස්ස, තිදසානඤ්ච සම්මුඛා.
වුත්ථං මෙ භවනං දිබ්යං [දිබ්බං (සී. පී.)], භුත්තා කාමා අමානුසා;
තාවතිංසෙසු දෙවෙසු, සබ්බකාමසමිද්ධිසු.
සොහං එතාදිසං හිත්වා, පුඤ්ඤායම්හි ඉධාගතො;
ධම්මමෙව චරිස්සාමි, නාහං රජ්ජෙන අත්ථිකො.
අදණ්ඩාවචරං මග්ගං, සම්මාසම්බුද්ධදෙසිතං;
තං මග්ගං පටිපජ්ජිස්සං, යෙන ගච්ඡන්ති සුබ්බතාති.
සාධිනජාතකං [සාධිනරාජජාතකං (ස්යා.)] එකාදසමං.
495. දසබ්රාහ්මණජාතකං (12)
රාජා ¶ ¶ අවොච විධුරං, ධම්මකාමො යුධිට්ඨිලො;
බ්රාහ්මණෙ විධුර පරියෙස, සීලවන්තෙ බහුස්සුතෙ.
විරතෙ මෙථුනා ධම්මා, යෙ මෙ භුඤ්ජෙය්යු [භුඤ්ජෙය්යුං (සී.)] භොජනං;
දක්ඛිණං සම්ම දස්සාම, යත්ථ දින්නං මහප්ඵලං.
දුල්ලභා බ්රාහ්මණා දෙව, සීලවන්තො බහුස්සුතා;
විරතා මෙථුනා ධම්මා, යෙ තෙ භුඤ්ජෙය්යු භොජනං.
දස ඛලු මහාරාජ, යා තා බ්රාහ්මණජාතියො;
තෙසං විභඞ්ගං විචයං [විචිය (ක.)], විත්ථාරෙන සුණොහි මෙ.
පසිබ්බකෙ ගහෙත්වාන, පුණ්ණෙ මූලස්ස සංවුතෙ;
ඔසධිකායො [ඔසධිකායෙ (ස්යා. ක.)] ගන්ථෙන්ති, න්හාපයන්ති [නහායන්ති (සී. පී.)] ජපන්ති ච.
තිකිච්ඡකසමා ¶ රාජ, තෙපි වුච්චන්ති බ්රාහ්මණා;
අක්ඛාතා තෙ මහාරාජ, තාදිසෙ නිපතාමසෙ.
අපෙතා තෙ ච [තෙ (සී. පී.)] බ්රහ්මඤ්ඤා,
(ඉති රාජා [රාජා ච (ස්යා. ක.)] කොරබ්යො)
න තෙ වුච්චන්ති බ්රාහ්මණා;
අඤ්ඤෙ විධුර පරියෙස, සීලවන්තෙ බහුස්සුතෙ.
විරතෙ මෙථුනා ධම්මා, යෙ මෙ භුඤ්ජෙය්යු භොජනං;
දක්ඛිණං සම්ම දස්සාම, යත්ථ දින්නං මහප්ඵලං.
කිඞ්කිණිකායො [කිඞ්කණිකායො (ක.), කිඞ්කිණියො (ස්යා.)] ගහෙත්වා [ගහෙත්වාන (සී. ස්යා. පී.)], ඝොසෙන්ති පුරතොපි තෙ;
පෙසනානිපි ගච්ඡන්ති, රථචරියාසු සික්ඛරෙ.
පරිචාරකසමා ¶ රාජ, තෙපි වුච්චන්ති බ්රාහ්මණා;
අක්ඛාතා තෙ මහාරාජ, තාදිසෙ නිපතාමසෙ.
අපෙතා තෙ ච බ්රහ්මඤ්ඤා,
(ඉති රාජා කොරබ්යො)
න තෙ වුච්චන්ති බ්රාහ්මණා;
අඤ්ඤෙ විධුර පරියෙස, සීලවන්තෙ බහුස්සුතෙ.
විරතෙ මෙථුනා ධම්මා, යෙ මෙ භුඤ්ජෙය්යු භොජනං;
දක්ඛිණං සම්ම දස්සාම, යත්ථ දින්නං මහප්ඵලං.
කමණ්ඩලුං ¶ ගහෙත්වාන, වඞ්කදණ්ඩඤ්ච බ්රාහ්මණා;
පච්චුපෙස්සන්ති රාජානො, ගාමෙසු නිගමෙසු ච;
නාදින්නෙ වුට්ඨහිස්සාම, ගාමම්හි වා වනම්හි වා [වාමම්හි ච වනම්හි ච (සී. පී.), ගාමම්හි නිගමම්හි වා (ස්යා.)].
නිග්ගාහකසමා රාජ, තෙපි වුච්චන්ති බ්රාහ්මණා;
අක්ඛාතා තෙ මහාරාජ, තාදිසෙ නිපතාමසෙ.
අපෙතා තෙ ච බ්රහ්මඤ්ඤා,
(ඉති රාජා කොරබ්යො)
න තෙ වුච්චන්ති බ්රාහ්මණා;
අඤ්ඤෙ විධුර පරියෙස, සීලවන්තෙ බහුස්සුතෙ.
විරතෙ මෙථුනා ධම්මා, යෙ මෙ භුඤ්ජෙය්යු භොජනං;
දක්ඛිණං සම්ම දස්සාම, යත්ථ දින්නං මහප්ඵලං.
පරූළ්හකච්ඡනඛලොමා ¶ , පඞ්කදන්තා රජස්සිරා;
ඔකිණ්ණා රජරෙණූහි, යාචකා විචරන්ති තෙ.
ඛාණුඝාතසමා ¶ රාජ, තෙපි වුච්චන්ති බ්රාහ්මණා;
අක්ඛාතා තෙ මහාරාජ, තාදිසෙ නිපතාමසෙ.
අපෙතා තෙ ච බ්රහ්මඤ්ඤා,
(ඉති රාජා කොරබ්යො)
න තෙ වුච්චන්ති බ්රාහ්මණා;
අඤ්ඤෙ විධුර පරියෙස, සීලවන්තෙ බහුස්සුතෙ.
විරතෙ මෙථුනා ධම්මා, යෙ මෙ භුඤ්ජෙය්යු භොජනං;
දක්ඛිණං සම්ම දස්සාම, යත්ථ දින්නං මහප්ඵලං.
හරීතකං [හරීටකං (බහූසු)] ආමලකං, අම්බං ජම්බුං විභීතකං [අම්බජම්බුවිභීටකං (සී. පී.)];
ලබුජං දන්තපොණානි, බෙලුවා බදරානි ච.
රාජායතනං උච්ඡු-පුටං, ධූමනෙත්තං මධු-අඤ්ජනං;
උච්චාවචානි පණියානි, විපණෙන්ති ජනාධිප.
වාණිජකසමා රාජ, තෙපි වුච්චන්ති බ්රාහ්මණා;
අක්ඛාතා තෙ මහාරාජ, තාදිසෙ නිපතාමසෙ.
අපෙතා ¶ තෙ ච බ්රහ්මඤ්ඤා,
(ඉති රාජා කොරබ්යො)
න තෙ වුච්චන්ති බ්රාහ්මණා;
අඤ්ඤෙ විධුර පරියෙස, සීලවන්තෙ බහුස්සුතෙ.
විරතෙ මෙථුනා ධම්මා, යෙ මෙ භුඤ්ජෙය්යු භොජනං;
දක්ඛිණං සම්ම දස්සාම, යත්ථ දින්නං මහප්ඵලං.
කසි-වාණිජ්ජං [කසිං වණිජ්ජං (සී. පී.)] කාරෙන්ති, පොසයන්ති අජෙළකෙ;
කුමාරියො ¶ පවෙච්ඡන්ති, විවාහන්තාවහන්ති ච.
සමා අම්බට්ඨවෙස්සෙහි, තෙපි වුච්චන්ති බ්රාහ්මණා;
අක්ඛාතා තෙ මහාරාජ, තාදිසෙ නිපතාමසෙ.
අපෙතා තෙ ච බ්රහ්මඤ්ඤා,
(ඉති රාජා කොරබ්යො)
න තෙ වුච්චන්ති බ්රාහ්මණා;
අඤ්ඤෙ විධුර පරියෙස, සීලවන්තෙ බහුස්සුතෙ.
විරතෙ ¶ මෙථුනා ධම්මා, යෙ මෙ භුඤ්ජෙය්යු භොජනං;
දක්ඛිණං සම්ම දස්සාම, යත්ථ දින්නං මහප්ඵලං.
නික්ඛිත්තභික්ඛං භුඤ්ජන්ති, ගාමෙස්වෙකෙ පුරොහිතා;
බහූ තෙ [නෙ (ස්යා. ක.)] පරිපුච්ඡන්ති, අණ්ඩච්ඡෙදා නිලඤ්ඡකා [තිලඤ්ඡකා (පී.)].
පසූපි තත්ථ හඤ්ඤන්ති, මහිංසා සූකරා අජා;
ගොඝාතකසමා රාජ, තෙපි වුච්චන්ති බ්රාහ්මණා;
අක්ඛාතා තෙ මහාරාජ, තාදිසෙ නිපතාමසෙ.
අපෙතා තෙ බ්රහ්මඤ්ඤා,
(ඉති රාජා කොරබ්යො)
න තෙ වුච්චන්ති බ්රාහ්මණා;
අඤ්ඤෙ විධුර පරියෙස, සීලවන්තෙ බහුස්සුතෙ.
විරතෙ මෙථුනා ධම්මා, යෙ මෙ භුඤ්ජෙය්යු භොජනං;
දක්ඛිණං සම්ම දස්සාම, යත්ථ දින්නං මහප්ඵලං.
අසිචම්මං ගහෙත්වාන, ඛග්ගං පග්ගය්හ බ්රාහ්මණා;
වෙස්සපථෙසු තිට්ඨන්ති, සත්ථං අබ්බාහයන්තිපි.
සමා ¶ ¶ ගොපනිසාදෙහි, තෙපි වුච්චන්ති බ්රාහ්මණා;
අක්ඛාතා තෙ මහාරාජ, තාදිසෙ නිපතාමසෙ.
අපෙතා තෙ බ්රහ්මඤ්ඤා,
(ඉති රාජා කොරබ්යො)
න තෙ වුච්චන්ති බ්රාහ්මණා;
අඤ්ඤෙ විධුර පරියෙස, සීලවන්තෙ බහුස්සුතෙ.
විරතෙ මෙථුනා ධම්මා, යෙ මෙ භුඤ්ජෙය්යු භොජනං;
දක්ඛිණං සම්ම දස්සාම, යත්ථ දින්නං මහප්ඵලං.
අරඤ්ඤෙ කුටිකං කත්වා, කූටානි කාරයන්ති තෙ;
සසබිළාරෙ බාධෙන්ති, ආගොධා මච්ඡකච්ඡපං.
තෙ ලුද්දකසමා රාජ [ලුද්දකා තෙ මහාරාජ (සී. පී.)], තෙපි වුච්චන්ති බ්රාහ්මණා;
අක්ඛාතා තෙ මහාරාජ, තාදිසෙ නිපතාමසෙ.
අපෙතා ¶ තෙ බ්රහ්මඤ්ඤා,
(ඉති රාජා කොරබ්යො)
න තෙ වුච්චන්ති බ්රාහ්මණා;
අඤ්ඤෙ විධුර පරියෙස, සීලවන්තෙ බහුස්සුතෙ.
විරතෙ මෙථුනා ධම්මා, යෙ මෙ භුඤ්ජෙය්යු භොජනං;
දක්ඛිණං සම්ම දස්සාම, යත්ථ දින්නං මහප්ඵලං.
අඤ්ඤෙ ධනස්ස කාමා හි, හෙට්ඨාමඤ්චෙ පසක්කිතා [පසක්ඛිතා (සී. ස්යා. පී.)];
රාජානො උපරි න්හායන්ති, සොමයාගෙ උපට්ඨිතෙ.
මලමජ්ජකසමා රාජ, තෙපි වුච්චන්ති බ්රාහ්මණා;
අක්ඛාතා තෙ මහාරාජ, තාදිසෙ නිපතාමසෙ.
අපෙතා ¶ තෙ බ්රහ්මඤ්ඤා,
(ඉති රාජා කොරබ්යො)
න තෙ වුච්චන්ති බ්රාහ්මණා;
අඤ්ඤෙ විධුර පරියෙස, සීලවන්තෙ බහුස්සුතෙ.
විරතෙ මෙථුනා ධම්මා, යෙ මෙ භුඤ්ජෙය්යු භොජනං;
දක්ඛිණං සම්ම දස්සාම, යත්ථ දින්නං මහප්ඵලං.
අත්ථි ඛො බ්රාහ්මණා දෙව, සීලවන්තො බහුස්සුතා;
විරතා මෙථුනා ධම්මා, යෙ තෙ භුඤ්ජෙය්යු භොජනං.
එකඤ්ච ¶ භත්තං භුඤ්ජන්ති, න ච මජ්ජං පිවන්ති තෙ;
අක්ඛාතා තෙ මහාරාජ, තාදිසෙ නිපතාමසෙ.
එතෙ ඛො බ්රාහ්මණා විධුර, සීලවන්තො බහුස්සුතා;
එතෙ විධුර පරියෙස, ඛිප්පඤ්ච නෙ [ඛිප්පංව නෙ (ක.)] නිමන්තයාති.
දසබ්රාහ්මණජාතකං ද්වාදසමං.
496. භික්ඛාපරම්පරජාතකං (13)
සුඛුමාලරූපං දිස්වා [දිස්වාන (ක. සී. අට්ඨ.)], රට්ඨා විවනමාගතං;
කූටාගාරවරූපෙතං, මහාසයනමුපාසිතං [මුපොචිතං (බහූසු)].
තස්ස ¶ තෙ පෙමකෙනාහං, අදාසිං වඩ්ඪමොදනං [බද්ධමොදනං (සී. පී.)];
සාලීනං විචිතං භත්තං, සුචිං මංසූපසෙචනං.
තං ත්වං භත්තං පටිග්ගය්හ, බ්රාහ්මණස්ස අදාසයි [අදාපයි (සී. ස්යා. පී.)];
අත්තානං ¶ [අත්තනා (පී. අට්ඨ. පාඨන්තරං)] අනසිත්වාන, කොයං ධම්මො නමත්ථු තෙ.
ආචරියො බ්රාහ්මණො මය්හං, කිච්චාකිච්චෙසු බ්යාවටො [වාවටො (ක.)];
ගරු ච ආමන්තනීයො [ආමන්තණීයො (සී. පී.)] ච, දාතුමරහාමි භොජනං.
බ්රාහ්මණං දානි පුච්ඡාමි, ගොතමං රාජපූජිතං;
රාජා තෙ භත්තං පාදාසි, සුචිං මංසූපසෙචනං.
තං ත්වං භත්තං පටිග්ගය්හ, ඉසිස්ස භොජනං අදා;
අඛෙත්තඤ්ඤූසි දානස්ස, කොයං ධම්මො නමත්ථු තෙ.
භරාමි පුත්ත [පුත්තෙ (සී. පී.)] දාරෙ ච, ඝරෙසු ගධිතො [ගථිතො (සී. පී.)] අහං;
භුඤ්ජෙ මානුසකෙ කාමෙ, අනුසාසාමි රාජිනො.
ආරඤ්ඤිකස්ස [ආරඤ්ඤකස්ස (සී. පී.)] ඉසිනො, චිරරත්තං තපස්සිනො;
වුඩ්ඪස්ස භාවිතත්තස්ස, දාතුමරහාමි භොජනං.
ඉසිඤ්ච දානි පුච්ඡාමි, කිසං ධමනිසන්ථතං;
පරූළ්හකච්ඡනඛලොමං, පඞ්කදන්තං රජස්සිරං.
එකො අරඤ්ඤෙ විහරසි [විහාසි (ක.)], නාවකඞ්ඛසි ජීවිතං;
භික්ඛු කෙන තයා සෙය්යො, යස්ස ත්වං භොජනං අදා.
ඛණන්තාලුකලම්බානි [ඛණමාලුකලම්බානි (ස්යා. ක.)], බිලාලිතක්කලානි ච [බිළාලිතක්කළානි ච (සී. පී.)];
ධුනං සාමාකනීවාරං, සඞ්ඝාරියං පසාරියං [සංහාරියං පහාරියං (ස්යා.), සංසාරියං පසාරියං (ක.)].
සාකං ¶ භිසං මධුං මංසං, බදරාමලකානි ච;
තානි ආහරිත්වා [ආහත්ව (සී. ස්යා.)] භුඤ්ජාමි, අත්ථි මෙ සො පරිග්ගහො.
පචන්තො ¶ ¶ අපචන්තස්ස, අමමස්ස සකිඤ්චනො [අකිඤ්චනො (ක.)];
අනාදානස්ස සාදානො, දාතුමරහාමි භොජනං.
භික්ඛුඤ්ච දානි පුච්ඡාමි, තුණ්හීමාසීන සුබ්බතං;
ඉසි තෙ භත්තං පාදාසි, සුචිං මංසූපසෙචනං.
තං ත්වං භත්තං පටිග්ගය්හ, තුණ්හී භුඤ්ජසි එකකො;
නාඤ්ඤං කඤ්චි [කිඤ්චි (ක.)] නිමන්තෙසි, කොයං ධම්මො නමත්ථු තෙ.
න පචාමි න පාචෙමි, න ඡින්දාමි න ඡෙදයෙ;
තං මං අකිඤ්චනං ඤත්වා, සබ්බපාපෙහි ආරතං.
වාමෙන භික්ඛමාදාය, දක්ඛිණෙන කමණ්ඩලුං;
ඉසි මෙ භත්තං පාදාසි, සුචිං මංසූපසෙචනං.
එතෙ හි දාතුමරහන්ති, සමමා සපරිග්ගහා;
පච්චනීකමහං මඤ්ඤෙ, යො දාතාරං නිමන්තයෙ.
අත්ථාය වත මෙ අජ්ජ, ඉධාගච්ඡි රථෙසභො;
සොහං අජ්ජ පජානාමි [ඉතො පුබ්බෙ න ජානාමි (සී. පී.)], යත්ථ දින්නං මහප්ඵලං.
රට්ඨෙසු ගිද්ධා රාජානො, කිච්චාකිච්චෙසු බ්රාහ්මණා;
ඉසී මූලඵලෙ ගිද්ධා, විප්පමුත්තා ච භික්ඛවොති.
භික්ඛාපරම්පරජාතකං තෙරසමං.
තස්සුද්දානං –
සුව ¶ කින්නර මුක්ක ඛරාජිනසො, භිසජාත මහෙසි කපොතවරො;
අථ මොර සතච්ඡක වාණිජකො, අථ රාජ සබ්රාහ්මණ භික්ඛපරන්ති.
පකිණ්ණකනිපාතං නිට්ඨිතං.