📜
9. නවකනිපාතො
427. ගිජ්ඣජාතකං (1)
පරිසඞ්කුපථො ¶ ¶ ¶ නාම, ගිජ්ඣපන්ථො සනන්තනො;
තත්රාසි මාතාපිතරො, ගිජ්ඣො පොසෙසි ජිණ්ණකෙ;
තෙසං අජගරමෙදං, අච්චහාසි බහුත්තසො [පහුත්තතො (ක. සී.), පහූතසො (ස්යා. පී.), බහුධසො (ක.)].
පිතා ච පුත්තං අවච, ජානං උච්චං පපාතිනං;
සුපත්තං ථාමසම්පන්නං [පක්ඛසම්පන්නං (සී. ස්යා. පී.)], තෙජස්සිං දූරගාමිනං.
පරිප්ලවන්තං පථවිං, යදා තාත විජානහි;
සාගරෙන පරික්ඛිත්තං, චක්කංව පරිමණ්ඩලං;
තතො තාත නිවත්තස්සු, මාස්සු එත්තො පරං ගමි.
උදපත්තොසි [උද්ධං පත්තොසි (ක. සී.)] වෙගෙන, බලී පක්ඛී දිජුත්තමො;
ඔලොකයන්තො වක්කඞ්ගො, පබ්බතානි වනානි ච.
අද්දස්ස පථවිං ගිජ්ඣො, යථාසාසි [යථාස්සාසි (ස්යා. අට්ඨ. පාඨන්තරං)] පිතුස්සුතං;
සාගරෙන පරික්ඛිත්තං, චක්කංව පරිමණ්ඩලං.
තඤ්ච සො සමතික්කම්ම, පරමෙවච්චවත්තථ [පරමෙව පවත්තථ (සී. ස්යා.)];
තඤ්ච වාතසිඛා තික්ඛා, අච්චහාසි බලිං දිජං.
නාසක්ඛාතිගතො පොසො, පුනදෙව නිවත්තිතුං;
දිජො බ්යසනමාපාදි, වෙරම්භානං [වෙරම්බානං (සී. පී.)] වසං ගතො.
තස්ස ¶ පුත්තා ච දාරා ච, යෙ චඤ්ඤෙ අනුජීවිනො;
සබ්බෙ බ්යසනමාපාදුං, අනොවාදකරෙ දිජෙ.
එවම්පි ඉධ වුඩ්ඪානං, යො වාක්යං නාවබුජ්ඣති;
අතිසීමචරො දිත්තො, ගිජ්ඣොවාතීතසාසනො;
ස වෙ බ්යසනං පප්පොති, අකත්වා වුඩ්ඪසාසනන්ති.
ගිජ්ඣජාතකං පඨමං.
428. කොසම්බියජාතකං (2)
පුථුසද්දො ¶ ¶ සමජනො, න බාලො කොචි මඤ්ඤථ;
සඞ්ඝස්මිං භිජ්ජමානස්මිං, නාඤ්ඤං භිය්යො අමඤ්ඤරුං.
පරිමුට්ඨා පණ්ඩිතාභාසා, වාචාගොචරභාණිනො;
යාවිච්ඡන්ති මුඛායාමං, යෙන නීතා න තං විදූ.
අක්කොච්ඡි මං අවධි මං, අජිනි මං අහාසි මෙ;
යෙ ච තං උපනය්හන්ති, වෙරං තෙසං න සම්මති.
අක්කොච්ඡි මං අවධි මං, අජිනි මං අහාසි මෙ;
යෙ ච තං නුපනය්හන්ති, වෙරං තෙසූපසම්මති.
න හි වෙරෙන වෙරානි, සම්මන්තීධ කුදාචනං;
අවෙරෙන ච සම්මන්ති, එස ධම්මො සනන්තනො.
පරෙ ච න විජානන්ති, මයමෙත්ථ යමාමසෙ;
යෙ ච තත්ථ විජානන්ති, තතො සම්මන්ති මෙධගා.
අට්ඨිච්ඡින්නා ¶ පාණහරා, ගවස්ස [ගවාස්ස (සී. ස්යා. පී.)] ධනහාරිනො;
රට්ඨං විලුම්පමානානං, තෙසම්පි හොති සඞ්ගති;
කස්මා තුම්හාක නො සියා.
සචෙ ලභෙථ නිපකං සහායං, සද්ධිංචරං සාධුවිහාරිධීරං;
අභිභුය්ය සබ්බානි පරිස්සයානි, චරෙය්ය තෙනත්තමනො සතීමා.
නො චෙ ලභෙථ නිපකං සහායං, සද්ධිංචරං සාධුවිහාරිධීරං;
රාජාව රට්ඨං විජිතං පහාය, එකො චරෙ මාතඞ්ගරඤ්ඤෙව නාගො.
එකස්ස ¶ චරිතං සෙය්යො, නත්ථි බාලෙ සහායතා;
එකො චරෙ න පාපානි කයිරා, අප්පොස්සුක්කො මාතඞ්ගරඤ්ඤෙව නාගොති.
කොසම්බියජාතකං දුතියං.
429. මහාසුවජාතකං (3)
දුමො යදා හොති ඵලූපපන්නො, භුඤ්ජන්ති නං විහඞ්ගමා [විහගා (සී. පී.)] සම්පතන්තා;
ඛීණන්ති ඤත්වාන දුමං ඵලච්චයෙ [ඤත්වා දුමප්ඵලච්චයෙන (ක.)], දිසොදිසං ¶ යන්ති තතො විහඞ්ගමා.
චර චාරිකං ලොහිතතුණ්ඩ මාමරි, කිං ත්වං සුව සුක්ඛදුමම්හි ඣායසි;
තදිඞ්ඝ මං බ්රූහි වසන්තසන්නිභ, කස්මා සුව සුක්ඛදුමං න රිඤ්චසි.
යෙ ¶ වෙ සඛීනං සඛාරො භවන්ති, පාණච්චයෙ [පාණං චජෙ (ක.), පාණච්චයෙ මරණකාලෙ ච සුඛදුක්ඛෙසු ච න ජහන්තීති සම්බන්ධො] දුක්ඛසුඛෙසු හංස;
ඛීණං අඛීණන්ති න තං ජහන්ති, සන්තො සතං ධම්මමනුස්සරන්තා.
සොහං සතං අඤ්ඤතරොස්මි හංස, ඤාතී ච මෙ හොති සඛා ච රුක්ඛො;
තං නුස්සහෙ ජීවිකත්ථො පහාතුං, ඛීණන්ති ඤත්වාන න හෙස ධම්මො [න සොස (ක.), න එස (ස්යා.)].
සාධු සක්ඛි කතං හොති, මෙත්ති සංසති සන්ථවො [මිත්තං සඞ්ගති සන්ධවො (ක.)];
සචෙතං ධම්මං රොචෙසි, පාසංසොසි විජානතං.
සො තෙ සුව වරං දම්මි, පත්තයාන විහඞ්ගම;
වරං වරස්සු වක්කඞ්ග, යං කිඤ්චි මනසිච්ඡසි.
වරඤ්ච ¶ මෙ හංස භවං දදෙය්ය, අයඤ්ච රුක්ඛො පුනරායුං ලභෙථ;
සො ¶ සාඛවා ඵලිමා සංවිරූළ්හො, මධුත්ථිකො තිට්ඨතු සොභමානො.
තං පස්ස සම්ම ඵලිමං උළාරං, සහාව තෙ හොතු උදුම්බරෙන;
සො සාඛවා ඵලිමා සංවිරූළ්හො, මධුත්ථිකො තිට්ඨතු සොභමානො.
එවං සක්ක සුඛී හොහි, සහ සබ්බෙහි ඤාතිභි;
යථාහමජ්ජ සුඛිතො, දිස්වාන සඵලං දුමං.
සුවස්ස ච වරං දත්වා, කත්වාන සඵලං දුමං;
පක්කාමි සහ භරියාය, දෙවානං නන්දනං වනන්ති.
මහාසුවජාතකං තතියං.
430. චූළසුවජාතකං (4)
සන්ති රුක්ඛා හරිපත්තා [හරිතපත්තා (සී. ස්යා. පී.)], දුමා නෙකඵලා බහූ;
කස්මා නු සුක්ඛෙ [සුක්ඛ (ක.)] කොළාපෙ, සුවස්ස නිරතො මනො.
ඵලස්ස උපභුඤ්ජිම්හා, නෙකවස්සගණෙ බහූ;
අඵලම්පි විදිත්වාන, සාව මෙත්ති යථා පුරෙ.
සුඛඤ්ච රුක්ඛං කොළාපං, ඔපත්තමඵලං දුමං;
ඔහාය සකුණා යන්ති, කිං දොසං පස්සසෙ දිජ.
යෙ ¶ ඵලත්ථා සම්භජන්ති, අඵලොති ජහන්ති නං;
අත්තත්ථපඤ්ඤා දුම්මෙධා, තෙ හොන්ති පක්ඛපාතිනො.
සාධු සක්ඛි කතං හොති, මෙත්ති සංසති සන්ථවො;
සචෙතං ධම්මං රොචෙසි, පාසංසොසි විජානතං.
සො ¶ තෙ සුව වරං දම්මි, පත්තයාන විහඞ්ගම;
වරං වරස්සු වක්කඞ්ග, යං කිඤ්චි මනසිච්ඡසි.
අපි ¶ නාම නං පස්සෙය්යං [අපි නාම නං පුන පස්සෙ (සී. ස්යා.)], සපත්තං සඵලං දුමං;
දලිද්දොව නිධි ලද්ධා, නන්දෙය්යාහං පුනප්පුනං.
තතො අමතමාදාය, අභිසිඤ්චි මහීරුහං;
තස්ස සාඛා විරූහිංසු [විරූළ්හස්ස (ක.)], සීතච්ඡායා මනොරමා.
එවං සක්ක සුඛී හොහි, සහ සබ්බෙහි ඤාතිභි;
යථාහමජ්ජ සුඛිතො, දිස්වාන සඵලං දුමං.
සුවස්ස ච වරං දත්වා, කත්වාන සඵලං දුමං;
පක්කාමි සහ භරියාය, දෙවානං නන්දනං වනන්ති.
චූළසුවජාතකං චතුත්ථං.
431. හරිතචජාතකං (5)
සුතං මෙතං මහාබ්රහ්මෙ, කාමෙ භුඤ්ජති හාරිතො;
කච්චෙතං වචනං තුච්ඡං, කච්චි සුද්ධො ඉරිය්යසි.
එවමෙතං මහාරාජ, යථා තෙ වචනං සුතං;
කුම්මග්ගං ¶ පටිපන්නොස්මි, මොහනෙය්යෙසු මුච්ඡිතො.
අදු [ආදු (සී. පී.)] පඤ්ඤා කිමත්ථියා, නිපුණා සාධුචින්තිනී [චින්තනී (සී. පී.)];
යාය උප්පතිතං රාගං, කිං මනො න විනොදයෙ.
චත්තාරොමෙ මහාරාජ, ලොකෙ අතිබලා භුසා;
රාගො දොසො මදො මොහො, යත්ථ පඤ්ඤා න ගාධති.
අරහා සීලසම්පන්නො, සුද්ධො චරති හාරිතො;
මෙධාවී පණ්ඩිතො චෙව, ඉති නො සම්මතො භවං.
මෙධාවීනම්පි හිංසන්ති, ඉසිං ධම්මගුණෙ රතං;
විතක්කා පාපකා රාජ, සුභා රාගූපසංහිතා.
උප්පන්නායං ¶ සරීරජො, රාගො වණ්ණවිදූසනො තව;
තං පජහ භද්දමත්ථු තෙ, බහුන්නාසි මෙධාවිසම්මතො.
තෙ අන්ධකාරකෙ [කරණෙ (සී. ස්යා. පී.)] කාමෙ, බහුදුක්ඛෙ මහාවිසෙ;
තෙසං මූලං ගවෙසිස්සං, ඡෙච්ඡං රාගං සබන්ධනං.
ඉදං ¶ වත්වාන හාරිතො, ඉසි සච්චපරක්කමො;
කාමරාගං විරාජෙත්වා, බ්රහ්මලොකූපගො අහූති.
හරිතචජාතකං [හාරිතජාතකං (සී. පී.)] පඤ්චමං.
432. පදකුසලමාණවජාතකං (6)
බහුස්සුතං චිත්තකථිං [චිත්තකථං (ස්යා. ක.)], ගඞ්ගා වහති පාටලිං [පාටලං (සී. පී.)];
වුය්හමානක ¶ භද්දන්තෙ, එකං මෙ දෙහි ගාථකං [ගීතකං (ක. අට්ඨ.)].
යෙන සිඤ්චන්ති දුක්ඛිතං, යෙන සිඤ්චන්ති ආතුරං;
තස්ස මජ්ඣෙ මරිස්සාමි, ජාතං සරණතො භයං.
යත්ථ බීජානි රූහන්ති, සත්තා යත්ථ පතිට්ඨිතා;
සා මෙ සීසං නිපීළෙති, ජාතං සරණතො භයං.
යෙන භත්තානි පච්චන්ති, සීතං යෙන විහඤ්ඤති;
සො මං ඩහති [දය්හති (ක.)] ගත්තානි, ජාතං සරණතො භයං.
යෙන භුත්තෙන [භත්තෙන (ස්යා. ක.)] යාපෙන්ති, පුථූ බ්රාහ්මණඛත්තියා;
සො මං භුත්තො බ්යාපාදෙති, ජාතං සරණතො භයං.
ගිම්හානං පච්ඡිමෙ මාසෙ, වාතමිච්ඡන්ති පණ්ඩිතා;
සො මං [සො මෙ (සී. පී.)] භඤ්ජති ගත්තානි, ජාතං සරණතො භයං.
යං නිස්සිතා ජගතිරුහං, ස්වායං අග්ගිං පමුඤ්චති;
දිසා භජථ වක්කඞ්ගා, ජාතං සරණතො භයං.
යමානයිං ¶ සොමනස්සං, මාලිනිං චන්දනුස්සදං;
සා මං ඝරා නිච්ඡුභති [නීහරති (සී. ස්යා.)], ජාතං සරණතො භයං.
යෙන ජාතෙන නන්දිස්සං, යස්ස ච භවමිච්ඡිසං;
සො මං ඝරා නිච්ඡුභති [නීහරති (සී. ස්යා.)], ජාතං සරණතො භයං.
සුණන්තු මෙ ජානපදා, නෙගමා ච සමාගතා;
යතොදකං තදාදිත්තං, යතො ඛෙමං තතො භයං.
රාජා ¶ විලුම්පතෙ රට්ඨං, බ්රාහ්මණො ච පුරොහිතො;
අත්තගුත්තා විහරථ, ජාතං සරණතො භයන්ති.
පදකුසලමාණවජාතකං ඡට්ඨං.
433. ලොමසකස්සපජාතකං (7)
අස්ස ¶ ඉන්දසමො රාජ, අච්චන්තං අජරාමරො;
සචෙ ත්වං යඤ්ඤං යාජෙය්ය, ඉසිං ලොමසකස්සපං.
සසමුද්දපරියායං, මහිං සාගරකුණ්ඩලං;
න ඉච්ඡෙ සහ නින්දාය, එවං සෙය්ය [සය්හ (සී. ස්යා. පී.)] විජානහි.
ධිරත්ථු තං යසලාභං, ධනලාභඤ්ච බ්රාහ්මණ;
යා වුත්ති විනිපාතෙන, අධම්මචරණෙන වා.
අපි චෙ පත්තමාදාය, අනගාරො පරිබ්බජෙ;
සායෙව ජීවිකා සෙය්යො, යා චාධම්මෙන එසනා.
අපි චෙ පත්තමාදාය, අනගාරො පරිබ්බජෙ;
අඤ්ඤං අහිංසයං ලොකෙ, අපි රජ්ජෙන තං වරං.
බලං චන්දො බලං සුරියො, බලං සමණබ්රාහ්මණා;
බලං වෙලා සමුද්දස්ස, බලාතිබලමිත්ථියො.
යථා උග්ගතපං සන්තං, ඉසිං ලොමසකස්සපං;
පිතු අත්ථා චන්දවතී, වාජපෙය්යං [වාචපෙය්යං (පී. ක.)] අයාජයි.
තං ලොභපකතං කම්මං, කටුකං කාමහෙතුකං;
තස්ස ¶ මූලං ගවෙසිස්සං, ඡෙච්ඡං රාගං සබන්ධනං.
ධිරත්ථු ¶ කාමෙ සුබහූපි ලොකෙ, තපොව සෙය්යො කාමගුණෙහි රාජ;
තපො කරිස්සාමි පහාය කාමෙ, තවෙව රට්ඨං චන්දවතී ච හොතූති.
ලොමසකස්සපජාතකං සත්තමං.
434. චක්කවාකජාතකං (8)
කාසායවත්ථෙ සකුණෙ වදාමි, දුවෙ දුවෙ නන්දමනෙ [නන්දිමනෙ (සී. පී.)] චරන්තෙ;
කං අණ්ඩජං අණ්ඩජා මානුසෙසු, ජාතිං පසංසන්ති තදිඞ්ඝ බ්රූථ.
අම්හෙ මනුස්සෙසු මනුස්සහිංස, අනුබ්බතෙ [අනුපුබ්බකෙ (ක.)] චක්කවාකෙ වදන්ති;
කල්යාණභාවම්හෙ [භාව’ම්හ (සී. පී.)] දිජෙසු සම්මතා, අභිරූපා [අභීතරූපා (සී. ස්යා. පී.)] විචරාම අණ්ණවෙ. ( ) [(න ඝාසහෙතූපි කරොම පාපං) (ක.)]
කිං අණ්ණවෙ කානි ඵලානි භුඤ්ජෙ, මංසං කුතො ඛාදථ චක්කවාකා;
කිං භොජනං භුඤ්ජථ වො අනොමා [අභිණ්හං (ක.)], බලඤ්ච ¶ වණ්ණො ච අනප්පරූපා [අනප්පරූපො (සී. ස්යා. පී.)].
න ¶ අණ්ණවෙ සන්ති ඵලානි ධඞ්ක, මංසං කුතො ඛාදිතුං චක්කවාකෙ;
සෙවාලභක්ඛම්හ [භක්ඛිම්හ (ක.)] අපාණභොජනා [අවාකභොජනා (සී. පී.)], න ඝාසහෙතූපි කරොම පාපං.
න මෙ ඉදං රුච්චති චක්කවාක, අස්මිං භවෙ භොජනසන්නිකාසො;
අහොසි පුබ්බෙ තතො මෙ අඤ්ඤථා, ඉච්චෙව මෙ විමති එත්ථ ජාතා.
අහම්පි ¶ මංසානි ඵලානි භුඤ්ජෙ, අන්නානි ච ලොණියතෙලියානි;
රසං මනුස්සෙසු ලභාමි භොත්තුං, සූරොව සඞ්ගාමමුඛං විජෙත්වා;
න ච මෙ තාදිසො වණ්ණො, චක්කවාක යථා තව.
අසුද්ධභක්ඛොසි ඛණානුපාතී, කිච්ඡෙන තෙ ලබ්භති අන්නපානං;
න තුස්සසී රුක්ඛඵලෙහි ධඞ්ක, මංසානි වා යානි සුසානමජ්ඣෙ.
යො සාහසෙන අධිගම්ම භොගෙ, පරිභුඤ්ජති ¶ ධඞ්ක ඛණානුපාතී;
තතො උපක්කොසති නං සභාවො, උපක්කුට්ඨො වණ්ණබලං ජහාති.
අප්පම්පි චෙ නිබ්බුතිං භුඤ්ජතී යදි, අසාහසෙන අපරූපඝාතී [අසාහසෙනානුපඝාතිනො (ක.)];
බලඤ්ච වණ්ණො ච තදස්ස හොති, න හි සබ්බො ආහාරමයෙන වණ්ණොති.
චක්කවාකජාතකං අට්ඨමං.
435. හලිද්දිරාගජාතකං (9)
සුතිතික්ඛං අරඤ්ඤම්හි, පන්තම්හි සයනාසනෙ;
යෙ ච ගාමෙ තිතික්ඛන්ති, තෙ උළාරතරා තයා.
අරඤ්ඤා ගාමමාගම්ම, කිංසීලං කිංවතං අහං;
පුරිසං තාත සෙවෙය්යං, තං මෙ අක්ඛාහි පුච්ඡිතො.
යො තෙ [යො තං (ස්යා. ජා. 1.4.190 අරඤ්ඤජාතකෙපි)] විස්සාසයෙ තාත, විස්සාසඤ්ච ඛමෙය්ය තෙ;
සුස්සූසී ච තිතික්ඛී ච, තං භජෙහි ඉතො ගතො.
යස්ස ¶ කායෙන වාචාය, මනසා නත්ථි දුක්කටං;
උරසීව පතිට්ඨාය, තං භජෙහි ඉතො ගතො.
යො ච ධම්මෙන චරති, චරන්තොපි න මඤ්ඤති;
විසුද්ධකාරිං සප්පඤ්ඤං, තං භජෙහි ඉතො ගතො.
හලිද්දිරාගං ¶ කපිචිත්තං, පුරිසං රාගවිරාගිනං;
තාදිසං තාත මා සෙවි, නිම්මනුස්සම්පි චෙ සියා.
ආසීවිසංව කුපිතං, මීළ්හලිත්තං මහාපථං;
ආරකා පරිවජ්ජෙහි, යානීව විසමං පථං.
අනත්ථා ¶ තාත වඩ්ඪන්ති, බාලං අච්චුපසෙවතො;
මාස්සු බාලෙන සංගච්ඡි, අමිත්තෙනෙව සබ්බදා.
තං තාහං තාත යාචාමි, කරස්සු වචනං මම;
මාස්සු බාලෙන සංගච්ඡි [සංගඤ්ඡි (සී. පී.)], දුක්ඛො බාලෙහි සඞ්ගමොති.
හලිද්දිරාගජාතකං නවමං.
436. සමුග්ගජාතකං (10)
කුතො නු ආගච්ඡථ භො තයො ජනා, ස්වාගතා එථ [ස්වාගතං එත්ථ (සී. පී.)] නිසීදථාසනෙ;
කච්චිත්ථ භොන්තො කුසලං අනාමයං, චිරස්සමබ්භාගමනං හි වො ඉධ.
අහමෙව එකො ඉධ මජ්ජ පත්තො, න චාපි මෙ දුතියො කොචි විජ්ජති;
කිමෙව සන්ධාය තෙ භාසිතං ඉසෙ, ‘‘කුතො නු ආගච්ඡථ භො තයො ජනා’’.
තුවඤ්ච එකො භරියා ච තෙ පියා, සමුග්ගපක්ඛිත්තනිකිණ්ණමන්තරෙ ¶ ;
සා රක්ඛිතා කුච්ඡිගතාව [කුච්ඡිගතා ච (ක.)] තෙ සදා, වායුස්ස [හරිස්ස (ක.)] පුත්තෙන සහා තහිං රතා.
සංවිග්ගරූපො ¶ ඉසිනා වියාකතො [පබ්යාකතො (ක.), බ්යාකතො (ස්යා. පී.)], සො දානවො තත්ථ සමුග්ගමුග්ගිලි;
අද්දක්ඛි භරියං සුචි මාලධාරිනිං, වායුස්ස පුත්තෙන සහා තහිං රතං.
සුදිට්ඨරූපමුග්ගතපානුවත්තිනා [සුදිට්ඨරූපුග්ගතපානුවත්තිනා (සී. ස්යා. පී.)], හීනා නරා යෙ පමදාවසං ගතා;
යථා හවෙ පාණරිවෙත්ථ රක්ඛිතා, දුට්ඨා මයී අඤ්ඤමභිප්පමොදයි.
දිවා ච රත්තො ච මයා උපට්ඨිතා, තපස්සිනා ජොතිරිවා වනෙ වසං;
සා ධම්මමුක්කම්ම අධම්මමාචරි, අකිරියරූපො පමදාහි සන්ථවො.
සරීරමජ්ඣම්හි ඨිතාතිමඤ්ඤහං, මය්හං අයන්ති අසතිං අසඤ්ඤතං;
සා ධම්මමුක්කම්ම අධම්මමාචරි, අකිරියරූපො පමදාහි සන්ථවො.
සුරක්ඛිතං ¶ මෙති කථං නු විස්සසෙ, අනෙකචිත්තාසු න හත්ථි [අනෙකචිත්තා පුන හෙත්ථ (ක.)] රක්ඛණා;
එතා හි පාතාලපපාතසන්නිභා, එත්ථප්පමත්තො බ්යසනං නිගච්ඡති.
තස්මා හි තෙ සුඛිනො වීතසොකා, යෙ මාතුගාමෙහි චරන්ති නිස්සටා;
එතං සිවං උත්තමමාභිපත්ථයං, න මාතුගාමෙහි කරෙය්ය සන්ථවන්ති.
සමුග්ගජාතකං දසමං.
437. පූතිමංසජාතකං (11)
න ¶ ඛො මෙ රුච්චති ආළි, පූතිමංසස්ස පෙක්ඛනා;
එතාදිසා සඛාරස්මා, ආරකා පරිවජ්ජයෙ.
උම්මත්තිකා ¶ අයං වෙණී, වණ්ණෙති පතිනො සඛිං;
පජ්ඣායි [පජ්ඣාති (සී. පී.), පජ්ඣායති (සී. නිය්ය)] පටිගච්ඡන්තිං, ආගතං මෙණ්ඩ [මෙළ (සී. පී.)] මාතරං.
ත්වං ඛොසි සම්ම උම්මත්තො, දුම්මෙධො අවිචක්ඛණො;
යො ත්වං [සො ත්වං (ස්යා.)] මතාලයං කත්වා, අකාලෙන විපෙක්ඛසි.
න අකාලෙ විපෙක්ඛෙය්ය, කාලෙ පෙක්ඛෙය්ය පණ්ඩිතො;
පූතිමංසොව පජ්ඣායි [පජ්ඣාති (සී. පී.), පජ්ඣායති (සී. නිය්ය)], යො අකාලෙ විපෙක්ඛති.
පියං ඛො ආළි මෙ හොතු, පුණ්ණපත්තං දදාහි මෙ;
පති ¶ සඤ්ජීවිතො මය්හං, එය්යාසි පියපුච්ඡිකා [පුච්ඡිතා (ස්යා. ක.)].
පියං ඛො ආළි තෙ හොතු, පුණ්ණපත්තං දදාමි තෙ;
මහතා පරිවාරෙන [පරිහාරෙන (ස්යා.)], එස්සං [එසං (සී. පී.)] කයිරාහි [කයිරාසි (පී.)] භොජනං.
කීදිසො තුය්හං පරිවාරො, යෙසං කාහාමි භොජනං;
කිංනාමකා ච තෙ සබ්බෙ, තං [තෙ (සී. ස්යා. පී.)] මෙ අක්ඛාහි පුච්ඡිතා.
මාලියො චතුරක්ඛො ච, පිඞ්ගියො අථ ජම්බුකො;
එදිසො මය්හං පරිවාරො, තෙසං කයිරාහි [කයිරාසි (පී.)] භොජනං.
නික්ඛන්තාය අගාරස්මා, භණ්ඩකම්පි විනස්සති;
ආරොග්යං ආළිනො වජ්ජං [වච්ඡං (?)], ඉධෙව වස මාගමාති.
පූතිමංසජාතකං එකාදසමං.
438. දද්දරජාතකං (12)
යො තෙ පුත්තකෙ අඛාදි, දින්නභත්තො අදූසකෙ;
තස්මිං දාඨං නිපාතෙහි, මා තෙ මුච්චිත්ථ ජීවතො.
ආකිණ්ණලුද්දො ¶ පුරිසො, ධාතිචෙලංව මක්ඛිතො;
පදෙසං තං න පස්සාමි, යත්ථ දාඨං නිපාතයෙ.
අකතඤ්ඤුස්ස පොසස්ස, නිච්චං විවරදස්සිනො;
සබ්බං චෙ පථවිං දජ්ජා, නෙව නං අභිරාධයෙ.
කින්නු සුබාහු තරමානරූපො, පච්චාගතොසි සහ මාණවෙන;
කිං ¶ කිච්චමත්ථං ඉධමත්ථි තුය්හං, අක්ඛාහි මෙ පුච්ඡිතො එතමත්ථං.
යො තෙ සඛා දද්දරො සාධුරූපො, තස්ස වධං පරිසඞ්කාමි අජ්ජ;
පුරිසස්ස කම්මායතනානි සුත්වා, නාහං සුඛිං දද්දරං අජ්ජ මඤ්ඤෙ.
කානිස්ස ¶ කම්මායතනානි අස්සු, පුරිසස්ස වුත්තිසමොධානතාය;
කං වා පටිඤ්ඤං පුරිසස්ස සුත්වා, පරිසඞ්කසි දද්දරං මාණවෙන.
චිණ්ණා කලිඞ්ගා චරිතා වණිජ්ජා, වෙත්තාචරො සඞ්කුපථොපි චිණ්ණො;
නටෙහි චිණ්ණං සහ වාකුරෙහි [වාකරෙහි (පී. සී. නිය්ය), වාගුරෙහි (?)], දණ්ඩෙන යුද්ධම්පි සමජ්ජමජ්ඣෙ.
බද්ධා කුලීකා [කුලිඞ්කා (සී. පී.)] මිතමාළ්හකෙන, අක්ඛා ජිතා [අක්ඛාචිතා (සී. අට්ඨ.)] සංයමො අබ්භතීතො;
අබ්බාහිතං [අප්පහිතං (සී. ස්යා.), අබ්බූහිතං (පී. සී. නිය්ය)] පුබ්බකං [පුප්ඵකං (සී. ස්යා.)] අඩ්ඪරත්තං, හත්ථා දඩ්ඪා පිණ්ඩපටිග්ගහෙන.
තානිස්ස ¶ කම්මායතනානි අස්සු, පුරිසස්ස ¶ වුත්තිසමොධානතාය;
යථා අයං දිස්සති ලොමපිණ්ඩො, ගාවො හතා කිං පන දද්දරස්සාති.
දද්දරජාතකං ද්වාදසමං.
නවකනිපාතං නිට්ඨිතං.
තස්සුද්දානං –
වරගිජ්ඣ සමජ්ජන හංසවරො, නිධිසව්හය හාරිත පාටලිකො;
අජරාමර ධඞ්ක තිතික්ඛ කුතො, අථ ද්වාදස පෙක්ඛන දද්දරිභීති.