📜

නමො තස්ස භගවතො අරහතො සම්මාසම්බුද්ධස්ස

ඛුද්දකනිකායෙ

නෙත්තිප්පකරණපාළි

1. සඞ්ගහවාරො

යං ¶ ¶ ¶ ලොකො පූජයතෙ, සලොකපාලො සදා නමස්සති ච;

තස්සෙත සාසනවරං, විදූහි ඤෙය්යං නරවරස්ස.

ද්වාදස පදානි සුත්තං, තං සබ්බං බ්යඤ්ජනඤ්ච අත්ථො ච;

තං විඤ්ඤෙය්යං උභයං, කො අත්ථො බ්යඤ්ජනං කතමං.

සොළසහාරා නෙත්ති [නෙත්තී (ක.)], පඤ්චනයා සාසනස්ස පරියෙට්ඨි;

අට්ඨාරසමූලපදා, මහකච්චානෙන [මහාකච්චානෙන (සී.)] නිද්දිට්ඨා.

හාරා ¶ බ්යඤ්ජනවිචයො, සුත්තස්ස නයා තයො ච සුත්තත්ථො;

උභයං පරිග්ගහීතං, වුච්චති සුත්තං යථාසුත්තං.

යා චෙව දෙසනා යඤ්ච, දෙසිතං උභයමෙව විඤ්ඤෙය්යං;

තත්රායමානුපුබ්බී, නවවිධසුත්තන්තපරියෙට්ඨීති.

සඞ්ගහවාරො.