📜

5. පාටිදෙසනීයකණ්ඩං (භික්ඛුනීවිභඞ්ගවණ්ණනා)

පාටිදෙසනීයසික්ඛාපදවණ්ණනා

පාටිදෙසනීයා නාම, ඛුද්දකානං අනන්තරා;

යෙ ධම්මා අට්ඨ ආරුළ්හා, සඞ්ඛෙපෙනෙව සඞ්ගහං;

තෙසං පවත්තතෙ එසා, සඞ්ඛෙපෙනෙව වණ්ණනා.

1228. යානි හි එත්ථ පාළියං සප්පිතෙලාදීනි නිද්දිට්ඨානි, තානියෙව විඤ්ඤාපෙත්වා භුඤ්ජන්තියා පාටිදෙසනීයා. පාළිවිනිමුත්තකෙසු පන සබ්බෙසු දුක්කටං. සෙසමෙත්ථ උත්තානමෙව. අට්ඨවිධම්පි පනෙතං පාටිදෙසනීයං චතුසමුට්ඨානං – කායතො කායවාචතො කායචිත්තතො කායවාචාචිත්තතො ච සමුට්ඨාති, කිරියං නොසඤ්ඤාවිමොක්ඛං, අචිත්තකං, පණ්ණත්තිවජ්ජං, කායකම්මං, වචීකම්මං, තිචිත්තං, තිවෙදනන්ති.

පාටිදෙසනීයවණ්ණනා නිට්ඨිතා.

පාටිදෙසනීයකණ්ඩං නිට්ඨිතං.

සෙඛියා පන උද්දිට්ඨා, යෙ ධම්මා පඤ්චසත්තති;

තෙසං අනන්තරායෙව, සත්තාධිකරණව්හයා.

මහාවිභඞ්ගෙ යො වුත්තො, තෙසං අත්ථවිනිච්ඡයො;

භික්ඛුනීනං විභඞ්ගෙපි, තාදිසංයෙව තං විදූ.

යස්මා තස්මා විසුං තෙසං, ධම්මානං අත්ථවණ්ණනා;

න වුත්තා තත්ථ යා වුත්තා, වුත්තායෙව හි සා ඉධාති.

සමන්තපාසාදිකාය විනයසංවණ්ණනාය

භික්ඛුනීවිභඞ්ගවණ්ණනා නිට්ඨිතා.

සබ්බාසවපහං එසා, නිට්ඨිතා වණ්ණනා යථා;

සබ්බාසවපහං මග්ගං, පත්වා පස්සන්තු නිබ්බුතින්ති.

උභතොවිභඞ්ගට්ඨකථා නිට්ඨිතා.