📜

11. පඤ්චසතිකක්ඛන්ධකං

ඛුද්දානුඛුද්දකසික්ඛාපදකථා

441. පඤ්චසතිකක්ඛන්ධකෙ ¶ ¶ – චත්තාරි පාරාජිකානි ඨපෙත්වා අවසෙසානි ඛුද්දානුඛුද්දකානීති එවමාදි එකසික්ඛාපදම්පි අපරිච්චජිත්වා සබ්බෙසං සඞ්ගහෙතබ්බභාවදස්සනත්ථං පරියායෙන වුත්තං. ඉදං වො සමණානන්ති ඉදං සමණානං. පදපූරණමත්තෙ වොකාරො.

443. ඉදම්පි තෙ ආවුසො ආනන්ද දුක්කටන්ති ‘‘ඉදං තයා දුට්ඨු කත’’න්ති කෙවලං ගරහන්තෙහි ථෙරෙහි වුත්තං ¶ , න ආපත්තිං සන්ධාය වුත්තං. න හි තෙ ආපත්තානාපත්තිං න ජානන්ති. ඉදානෙව චෙතං අනුස්සාවිතං – ‘‘සඞ්ඝො අපඤ්ඤත්තං න පඤ්ඤපෙති, පඤ්ඤත්තං න සමුච්ඡින්දතී’’ති. දෙසෙහි තං දුක්කටන්ති ඉදම්පි ච ‘‘ආම, භන්තෙ, දුට්ඨු මයා කත’’න්ති එවං පටිජානාහි, තං දුක්කටන්ති ඉදං සන්ධාය වුත්තං, න ආපත්තිදෙසනං. ථෙරො පන යස්මා අසතියා න පුච්ඡි න අනාදරෙන, තස්මා තත්ථ දුට්ඨුකතභාවම්පි අසල්ලක්ඛෙන්තො ‘‘නාහං තං දුක්කටං පස්සාමී’’ති වත්වා ථෙරෙසු ගාරවං දස්සෙන්තො ‘‘අපිචායස්මන්තානං සන්ධාය දෙසෙමි තං දුක්කට’’න්ති ආහ. යථා තුම්හෙ වදථ, තථා පටිජානාමීති වුත්තං හොති. එසෙව නයො අවසෙසෙසු චතූසු ඨානෙසු. සෙසමෙත්ථ යං වත්තබ්බං සියා, තං නිදානවණ්ණනායමෙව වුත්තං.

ඛුද්දානුඛුද්දකසික්ඛාපදකථා නිට්ඨිතා.

පඤ්චසතිකක්ඛන්ධකවණ්ණනා නිට්ඨිතා.