📜
7. අධිකරණසමථා (භික්ඛුනීවිභඞ්ගො)
ඉමෙ ඛො පනාය්යායො සත්ත අධිකරණසමථා
ධම්මා උද්දෙසං ආගච්ඡන්ති.
1242. උප්පන්නුප්පන්නානං ¶ ¶ ¶ අධිකරණානං සමථාය වූපසමාය සම්මුඛාවිනයො දාතබ්බො, සතිවිනයො දාතබ්බො, අමූළ්හවිනයො දාතබ්බො, පටිඤ්ඤාය කාරෙතබ්බං, යෙභුය්යසිකා, තස්සපාපියසිකා, තිණවත්ථාරකොති.
උද්දිට්ඨා ඛො, අය්යායො, සත්ත අධිකරණසමථා ධම්මා. තත්ථාය්යායො පුච්ඡාමි – ‘‘කච්චිත්ථ පරිසුද්ධා’’? දුතියම්පි පුච්ඡාමි – ‘‘කච්චිත්ථ පරිසුද්ධා’’? තතියම්පි පුච්ඡාමි – ‘‘කච්චිත්ථ පරිසුද්ධා’’? පරිසුද්ධෙත්ථාය්යායො, තස්මා තුණ්හී, එවමෙතං ධාරයාමීති.
අධිකරණසමථා නිට්ඨිතා.
උද්දිට්ඨං ඛො, අය්යායො, නිදානං. උද්දිට්ඨා අට්ඨ පාරාජිකා ධම්මා. උද්දිට්ඨා සත්තරස සඞ්ඝාදිසෙසා ධම්මා. උද්දිට්ඨා තිංස නිස්සග්ගියා පාචිත්තියා ධම්මා. උද්දිට්ඨා ඡසට්ඨිසතා පාචිත්තියා ධම්මා. උද්දිට්ඨා අට්ඨ පාටිදෙසනීයා ධම්මා. උද්දිට්ඨා සෙඛියා ධම්මා. උද්දිට්ඨා සත්ත අධිකරණසමථා ධම්මා. එත්තකං තස්ස භගවතො සුත්තාගතං සුත්තපරියාපන්නං අන්වද්ධමාසං උද්දෙසං ආගච්ඡති. තත්ථ සබ්බාහෙව සමග්ගාහි සම්මොදමානාහි අවිවදමානාහි සික්ඛිතබ්බන්ති.
භික්ඛුනිවිභඞ්ගො නිට්ඨිතො.
පාචිත්තියපාළි නිට්ඨිතා.