📜

3. වස්සූපනායිකක්ඛන්ධකො

107. වස්සූපනායිකානුජානනා

184. තෙන සමයෙන බුද්ධො භගවා රාජගහෙ විහරති වෙළුවනෙ කලන්දකනිවාපෙ. තෙන ඛො පන සමයෙන භගවතා භික්ඛූනං වස්සාවාසො අපඤ්ඤත්තො හොති. තෙඉධ භික්ඛූ හෙමන්තම්පි ගිම්හම්පි වස්සම්පි චාරිකං චරන්ති. මනුස්සා උජ්ඣායන්ති ඛිය්යන්ති විපාචෙන්ති – ‘‘කථඤ්හි නාම සමණා සක්යපුත්තියා හෙමන්තම්පි ගිම්හම්පි වස්සම්පි චාරිකං චරිස්සන්ති, හරිතානි තිණානි සම්මද්දන්තා, එකින්ද්රියං ජීවං විහෙඨෙන්තා, බහූ ඛුද්දකෙ පාණෙ සඞ්ඝාතං ආපාදෙන්තා. ඉමෙ හි නාම අඤ්ඤතිත්ථියා දුරක්ඛාතධම්මා වස්සාවාසං අල්ලීයිස්සන්ති සඞ්කසායිස්සන්ති. ඉමෙ හි නාම සකුන්තකා රුක්ඛග්ගෙසු කුලාවකානි කරිත්වා වස්සාවාසං අල්ලීයිස්සන්ති සඞ්කසායිස්සන්ති [සඞ්කාසයිස්සන්ති (සී. ස්යා.)]. ඉමෙ පන සමණා සක්යපුත්තියා හෙමන්තම්පි ගිම්හම්පි වස්සම්පි චාරිකං චරන්ති, හරිතානි තිණානි සම්මද්දන්තා, එකින්ද්රියං ජීවං විහෙඨෙන්තා, බහූ ඛුද්දකෙ පාණෙ සඞ්ඝාතං ආපාදෙන්තා’’ති. අස්සොසුං ඛො භික්ඛූ තෙසං මනුස්සානං උජ්ඣායන්තානං ඛිය්යන්තානං විපාචෙන්තානං. අථ ඛො තෙ භික්ඛූ භගවතො එතමත්ථං ආරොචෙසුං. අථ ඛො භගවා එතස්මිං නිදානෙ එතස්මිං පකරණෙ ධම්මිං කථං කත්වා භික්ඛූ ආමන්තෙසි – ‘‘අනුජානාමි, භික්ඛවෙ, වස්සං උපගන්තු’’න්ති. අථ ඛො භික්ඛූනං එතදහොසි – ‘‘කදා නු ඛො වස්සං උපගන්තබ්බ’’න්ති? භගවතො එතමත්ථං ආරොචෙසුං. අනුජානාමි, භික්ඛවෙ, වස්සානෙ වස්සං උපගන්තුන්ති.

අථ ඛො භික්ඛූනං එතදහොසි – ‘‘කති නු ඛො වස්සූපනායිකා’’ති? භගවතො එතමත්ථං

ආරොචෙසුං. ද්වෙමා, භික්ඛවෙ, වස්සූපනායිකා – පුරිමිකා, පච්ඡිමිකා. අපරජ්ජුගතාය ආසාළ්හියා පුරිමිකා උපගන්තබ්බා, මාසගතාය ආසාළ්හියා පච්ඡිමිකා උපගන්තබ්බා – ඉමා ඛො, භික්ඛවෙ, ද්වෙ වස්සූපනායිකාති.

වස්සූපනායිකානුජානනා නිට්ඨිතා.

108. වස්සානෙ චාරිකාපටික්ඛෙපාදි

185. තෙන ඛො පන සමයෙන ඡබ්බග්ගියා භික්ඛූ වස්සං උපගන්ත්වා අන්තරාවස්සං චාරිකං චරන්ති. මනුස්සා තථෙව උජ්ඣායන්ති ඛිය්යන්ති විපාචෙන්ති – ‘‘කථඤ්හි නාම සමණා සක්යපුත්තියා හෙමන්තම්පි ගිම්හම්පි වස්සම්පි චාරිකං චරිස්සන්ති, හරිතානි තිණානි සම්මද්දන්තා, එකින්ද්රියං ජීවං විහෙඨෙන්තා, බහූ ඛුද්දකෙ පාණෙ සඞ්ඝාතං ආපාදෙන්තා. ඉමෙ හි නාම අඤ්ඤතිත්ථියා දුරක්ඛාතධම්මා වස්සාවාසං අල්ලීයිස්සන්ති සඞ්කසායිස්සන්ති. ඉමෙ හි නාම සකුන්තකා රුක්ඛග්ගෙසු කුලාවකානි කරිත්වා වස්සාවාසං අල්ලීයිස්සන්ති සඞ්කසායිස්සන්ති. ඉමෙ පන සමණා සක්යපුත්තියා හෙමන්තම්පි ගිම්හම්පි වස්සම්පි චාරිකං චරන්ති, හරිතානි තිණානි සම්මද්දන්තා, එකින්ද්රියං ජීවං විහෙඨෙන්තා, බහූ ඛුද්දකෙ පාණෙ සඞ්ඝාතං ආපාදෙන්තා’’ති. අස්සොසුං ඛො භික්ඛූ තෙසං මනුස්සානං උජ්ඣායන්තානං ඛිය්යන්තානං විපාචෙන්තානං. යෙ තෙ භික්ඛූ අප්පිච්ඡා…පෙ… තෙ උජ්ඣායන්ති ඛිය්යන්ති විපාචෙන්ති – ‘‘කථඤ්හි නාම ඡබ්බග්ගියා භික්ඛූ වස්සං උපගන්ත්වා අන්තරාවස්සං චාරිකං චරිස්සන්තී’’ති? අථ ඛො තෙ භික්ඛූ භගවතො එතමත්ථං ආරොචෙසුං. අථ ඛො භගවා එතස්මිං නිදානෙ එතස්මිං පකරණෙ ධම්මිං කථං කත්වා භික්ඛූ ආමන්තෙසි – ‘‘න, භික්ඛවෙ, වස්සං උපගන්ත්වා පුරිමං වා තෙමාසං පච්ඡිමං වා තෙමාසං අවසිත්වා චාරිකා පක්කමිතබ්බා. යො පක්කමෙය්ය, ආපත්ති දුක්කටස්සා’’ති.

186. තෙන ඛො පන සමයෙන ඡබ්බග්ගියා භික්ඛූ න ඉච්ඡන්ති වස්සං උපගන්තුං. භගවතො එතමත්ථං ආරොචෙසුං. න, භික්ඛවෙ, වස්සං න උපගන්තබ්බං. යො න උපගච්ඡෙය්ය, ආපත්ති දුක්කටස්සාති.

තෙන ඛො පන සමයෙන ඡබ්බග්ගියා භික්ඛූ තදහු වස්සූපනායිකාය වස්සං අනුපගන්තුකාමා සඤ්චිච්ච ආවාසං අතික්කමන්ති. භගවතො එතමත්ථං ආරොචෙසුං. න, භික්ඛවෙ, තදහු වස්සූපනායිකාය වස්සං අනුපගන්තුකාමෙන සඤ්චිච්ච ආවාසො අතික්කමිතබ්බො. යො අතික්කමෙය්ය, ආපත්ති දුක්කටස්සාති.

තෙන ඛො පන සමයෙන රාජා මාගධො සෙනියො බිම්බිසාරො වස්සං උක්කඩ්ඪිතුකාමො

භික්ඛූනං සන්තිකෙ දූතං පාහෙසි – යදි පනාය්යා ආගමෙ ජුණ්හෙ වස්සං උපගච්ඡෙය්යුන්ති. භගවතො එතමත්ථං ආරොචෙසුං. අනුජානාමි, භික්ඛවෙ, රාජූනං අනුවත්තිතුන්ති.

වස්සානෙ චාරිකාපටික්ඛෙපාදි නිට්ඨිතා.

109. සත්තාහකරණීයානුජානනා

187. අථ ඛො භගවා රාජගහෙ යථාභිරන්තං විහරිත්වා යෙන සාවත්ථි තෙන චාරිකං පක්කාමි. අනුපුබ්බෙන චාරිකං චරමානො යෙන සාවත්ථි තදවසරි. තත්ර සුදං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන කොසලෙසු ජනපදෙ උදෙනෙන උපාසකෙන සඞ්ඝං උද්දිස්ස විහාරො කාරාපිතො හොති. සො භික්ඛූනං සන්තිකෙ දූතං පාහෙසි – ‘‘ආගච්ඡන්තු භදන්තා, ඉච්ඡාමි දානඤ්ච දාතුං, ධම්මඤ්ච සොතුං, භික්ඛූ ච පස්සිතු’’න්ති. භික්ඛූ එවමාහංසු – ‘‘භගවතා, ආවුසො, පඤ්ඤත්තං ‘න වස්සං උපගන්ත්වා පුරිමං වා තෙමාසං පච්ඡිමං වා තෙමාසං අවසිත්වා චාරිකා පක්කමිතබ්බා’ති. ආගමෙතු උදෙනො උපාසකො, යාව භික්ඛූ වස්සං වසන්ති. වස්සංවුට්ඨා ආගමිස්සන්ති. සචෙ පනස්ස අච්චායිකං කරණීයං, තත්ථෙව ආවාසිකානං භික්ඛූනං සන්තිකෙ විහාරං පතිට්ඨාපෙතූ’’ති. උදෙනො උපාසකො උජ්ඣායති ඛිය්යති විපාචෙති – ‘‘කථඤ්හි නාම භදන්තා මයා පහිතෙ න ආගච්ඡිස්සන්ති. අහඤ්හි දායකො කාරකො සඞ්ඝුපට්ඨාකො’’ති. අස්සොසුං ඛො භික්ඛූ උදෙනස්ස උපාසකස්ස උජ්ඣායන්තස්ස ඛිය්යන්තස්ස විපාචෙන්තස්ස. අථ ඛො තෙ භික්ඛූ භගවතො එතමත්ථං ආරොචෙසුං. අථ ඛො භගවා එතස්මිං නිදානෙ එතස්මිං පකරණෙ ධම්මිං කථං කත්වා භික්ඛූ ආමන්තෙසි – ‘‘අනුජානාමි, භික්ඛවෙ, සත්තන්නං සත්තාහකරණීයෙන පහිතෙ ගන්තුං, න ත්වෙව අප්පහිතෙ. භික්ඛුස්ස, භික්ඛුනියා, සික්ඛමානාය, සාමණෙරස්ස, සාමණෙරියා, උපාසකස්ස, උපාසිකාය – අනුජානාමි, භික්ඛවෙ, ඉමෙසං සත්තන්නං සත්තාහකරණීයෙන පහිතෙ ගන්තුං, න ත්වෙව අප්පහිතෙ. සත්තාහං සන්නිවත්තො කාතබ්බො’’.

188. ඉධ පන, භික්ඛවෙ, උපාසකෙන සඞ්ඝං උද්දිස්ස විහාරො කාරාපිතො හොති. සො චෙ භික්ඛූනං සන්තිකෙ දූතං පහිණෙය්ය – ‘‘ආගච්ඡන්තු භදන්තා, ඉච්ඡාමි දානඤ්ච දාතුං, ධම්මඤ්ච සොතුං, භික්ඛූ ච පස්සිතු’’න්ති, ගන්තබ්බං, භික්ඛවෙ, සත්තාහකරණීයෙන, පහිතෙ, න ත්වෙව අප්පහිතෙ. සත්තාහං සන්නිවත්තො කාතබ්බො.

ඉධ පන, භික්ඛවෙ, උපාසකෙන සඞ්ඝං උද්දිස්ස අඩ්ඪයොගො කාරාපිතො හොති…පෙ… පාසාදො කාරාපිතො හොති… හම්මියං කාරාපිතං හොති… ගුහා කාරාපිතා හොති… පරිවෙණං කාරාපිතං හොති… කොට්ඨකො කාරාපිතො හොති… උපට්ඨානසාලා කාරාපිතා හොති… අග්ගිසාලා කාරාපිතා හොති… කප්පියකුටි කාරාපිතා හොති… වච්චකුටි කාරාපිතා හොති… චඞ්කමො කාරාපිතො හොති … චඞ්කමනසාලා කාරාපිතා හොති… උදපානො කාරාපිතො හොති … උදපානසාලා කාරාපිතා හොති… ජන්තාඝරං කාරාපිතං හොති… ජන්තාඝරසාලා කාරාපිතා හොති… පොක්ඛරණී කාරාපිතා හොති… මණ්ඩපො කාරාපිතො හොති… ආරාමො කාරාපිතො හොති… ආරාමවත්ථු කාරාපිතං හොති. සො චෙ භික්ඛූනං සන්තිකෙ දූතං පහිණෙය්ය – ‘‘ආගච්ඡන්තු භදන්තා, ඉච්ඡාමි දානඤ්ච දාතුං, ධම්මඤ්ච සොතුං, භික්ඛූ ච පස්සිතු’’න්ති, ගන්තබ්බං, භික්ඛවෙ, සත්තාහකරණීයෙන, පහිතෙ, න ත්වෙව අප්පහිතෙ. සත්තාහං සන්නිවත්තො කාතබ්බො.

ඉධ පන, භික්ඛවෙ, උපාසකෙන සම්බහුලෙ භික්ඛූ උද්දිස්ස…පෙ… එකං භික්ඛුං උද්දිස්ස විහාරො කාරාපිතො හොති… අඩ්ඪයොගො කාරාපිතො හොති… පාසාදො කාරාපිතො හොති … හම්මියං කාරාපිතං හොති… ගුහා කාරාපිතා හොති… පරිවෙණං කාරාපිතං හොති… කොට්ඨකො කාරාපිතො හොති… උපට්ඨානසාලා කාරාපිතා හොති… අග්ගිසාලා කාරාපිතා හොති… කප්පියකුටි කාරාපිතා හොති… වච්චකුටි කාරාපිතා හොති… චඞ්කමො කාරාපිතො හොති… චඞ්කමනසාලා කාරාපිතා හොති… උදපානො කාරාපිතො හොති… උදපානසාලා කාරාපිතා හොති… ජන්තාඝරං කාරාපිතං හොති… ජන්තාඝරසාලා කාරාපිතා හොති… පොක්ඛරණී කාරාපිතා හොති… මණ්ඩපො කාරාපිතො හොති… ආරාමො කාරාපිතො හොති… ආරාමවත්ථු කාරාපිතං හොති. සො චෙ භික්ඛූනං සන්තිකෙ දූතං පහිණෙය්ය – ‘‘ආගච්ඡන්තු භදන්තා, ඉච්ඡාමි දානඤ්ච දාතුං, ධම්මඤ්ච සොතුං, භික්ඛූ ච පස්සිතු’’න්ති, ගන්තබ්බං, භික්ඛවෙ, සත්තාහකරණීයෙන, පහිතෙ, න ත්වෙව අප්පහිතෙ. සත්තාහං සන්නිවත්තො කාතබ්බො.

ඉධ පන, භික්ඛවෙ, උපාසකෙන භික්ඛුනිසඞ්ඝං උද්දිස්ස…පෙ… සම්බහුලා භික්ඛුනියො උද්දිස්ස…පෙ… එකං භික්ඛුනිං උද්දිස්ස…පෙ… සම්බහුලා සික්ඛමානායො උද්දිස්ස…පෙ… එකං සික්ඛමානං උද්දිස්ස…පෙ… සම්බහුලෙ සාමණෙරෙ උද්දිස්ස…පෙ… එකං සාමණෙරං උද්දිස්ස…පෙ… සම්බහුලා සාමණෙරියො උද්දිස්ස…පෙ… එකං සාමණෙරිං උද්දිස්ස විහාරො කාරාපිතො හොති…පෙ… අඩ්ඪයොගො කාරාපිතො හොති… පාසාදො කාරාපිතො හොති… හම්මියං කාරාපිතං හොති… ගුහා කාරාපිතා හොති… පරිවෙණං කාරාපිතං හොති… කොට්ඨකො කාරාපිතො හොති… උපට්ඨානසාලා කාරාපිතා හොති… අග්ගිසාලා කාරාපිතා හොති … කප්පියකුටි කාරාපිතා හොති… චඞ්කමො කාරාපිතො හොති… චඞ්කමනසාලා කාරාපිතා හොති… උදපානො කාරාපිතො හොති… උදපානසාලා කාරාපිතා හොති… පොක්ඛරණී කාරාපිතා හොති… මණ්ඩපො කාරාපිතො හොති… ආරාමො කාරාපිතො හොති… ආරාමවත්ථු කාරාපිතං හොති. සො චෙ භික්ඛූනං සන්තිකෙ දූතං පහිණෙය්ය – ‘‘ආගච්ඡන්තු භදන්තා, ඉච්ඡාමි දානඤ්ච දාතුං , ධම්මඤ්ච සොතුං, භික්ඛූ ච පස්සිතු’’න්ති, ගන්තබ්බං, භික්ඛවෙ, සත්තාහකරණීයෙන, පහිතෙ, න ත්වෙව අප්පහිතෙ. සත්තාහං සන්නිවත්තො කාතබ්බො.

189. ඉධ පන, භික්ඛවෙ, උපාසකෙන අත්තනො අත්ථාය නිවෙසනං කාරාපිතං හොති…පෙ… සයනිඝරං කාරාපිතං හොති… උදොසිතො කාරාපිතො හොති… අට්ටො කාරාපිතො හොති… මාළො කාරාපිතො හොති… ආපණො කාරාපිතො හොති… ආපණසාලා කාරාපිතා හොති… පාසාදො කාරාපිතො හොති… හම්මියං කාරාපිතං හොති… ගුහා කාරාපිතා හොති… පරිවෙණං කාරාපිතං හොති… කොට්ඨකො කාරාපිතො හොති… උපට්ඨානසාලා කාරාපිතා හොති… අග්ගිසාලා කාරාපිතා හොති… රසවතී කාරාපිතා හොති… චඞ්කමො කාරාපිතො හොති… චඞ්කමනසාලා කාරාපිතා හොති… උදපානො කාරාපිතො හොති… උදපානසාලා කාරාපිතා හොති… පොක්ඛරණී කාරාපිතා හොති… මණ්ඩපො කාරාපිතො හොති… ආරාමො කාරාපිතො හොති … ආරාමවත්ථු කාරාපිතං හොති… පුත්තස්ස වා වාරෙය්යං හොති… ධීතුයා වා වාරෙය්යං හොති… ගිලානො වා හොති… අභිඤ්ඤාතං වා සුත්තන්තං භණති. සො චෙ භික්ඛූනං සන්තිකෙ දූතං පහිණෙය්ය – ‘ආගච්ඡන්තු භදන්තා, ඉමං සුත්තන්තං පරියාපුණිස්සන්ති, පුරායං සුත්තන්තො න පලුජ්ජතී’ති. අඤ්ඤතරං වා පනස්ස කිච්චං හොති – කරණීයං වා, සො චෙ භික්ඛූනං සන්තිකෙ දූතං පහිණෙය්ය – ‘‘ආගච්ඡන්තු භදන්තා, ඉච්ඡාමි දානඤ්ච දාතුං, ධම්මඤ්ච සොතුං, භික්ඛූ ච පස්සිතු’’න්ති, ගන්තබ්බං, භික්ඛවෙ, සත්තාහකරණීයෙන, පහිතෙ, න ත්වෙව අප්පහිතෙ. සත්තාහං සන්නිවත්තො කාතබ්බො.

190. ඉධ පන, භික්ඛවෙ, උපාසිකාය සඞ්ඝං උද්දිස්ස විහාරො කාරාපිතො හොති. සා චෙ භික්ඛූනං සන්තිකෙ දූතං පහිණෙය්ය – ‘‘ආගච්ඡන්තු අය්යා, ඉච්ඡාමි දානඤ්ච දාතුං, ධම්මඤ්ච සොතුං, භික්ඛූ ච පස්සිතු’’න්ති, ගන්තබ්බං, භික්ඛවෙ, සත්තාහකරණීයෙන, පහිතෙ, න ත්වෙව අප්පහිතෙ. සත්තාහං සන්නිවත්තො කාතබ්බො.

ඉධ පන, භික්ඛවෙ, උපාසිකාය සඞ්ඝං උද්දිස්ස අඩ්ඪයොගො කාරාපිතො හොති…පෙ… පාසාදො කාරාපිතො හොති… හම්මියං කාරාපිතං හොති… ගුහා කාරාපිතා හොති… පරිවෙණං කාරාපිතං හොති… කොට්ඨකො කාරාපිතො හොති… උපට්ඨානසාලා කාරාපිතා හොති… අග්ගිසාලා කාරාපිතා හොති… කප්පියකුටි කාරාපිතා හොති… වච්චකුටි කාරාපිතා හොති… චඞ්කමො කාරාපිතො හොති… චඞ්කමනසාලා කාරාපිතා හොති… උදපානො කාරාපිතො හොති… උදපානසාලා කාරාපිතා හොති… ජන්තාඝරං කාරාපිතං හොති… ජන්තාඝරසාලා කාරාපිතා හොති… පොක්ඛරණී කාරාපිතා හොති… මණ්ඩපො කාරාපිතො හොති… ආරාමො කාරාපිතො හොති… ආරාමවත්ථු කාරාපිතං හොති. සා චෙ භික්ඛූනං සන්තිකෙ දූතං පහිණෙය්ය – ‘‘ආගච්ඡන්තු අය්යා, ඉච්ඡාමි දානඤ්ච දාතුං, ධම්මඤ්ච සොතුං, භික්ඛූ ච පස්සිතු’’න්ති, ගන්තබ්බං, භික්ඛවෙ, සත්තාහකරණීයෙන, පහිතෙ, න ත්වෙව අප්පහිතෙ. සත්තාහං සන්නිවත්තො කාතබ්බො.

ඉධ පන, භික්ඛවෙ, උපාසිකාය සම්බහුලෙ භික්ඛූ උද්දිස්ස…පෙ… එකං භික්ඛුං උද්දිස්ස…පෙ… භික්ඛුනිසඞ්ඝං උද්දිස්ස…පෙ… සම්බහුලා භික්ඛුනියො උද්දිස්ස…පෙ… එකං භික්ඛුනිං උද්දිස්ස…පෙ… සම්බහුලා සික්ඛමානායො උද්දිස්ස…පෙ… එකං සික්ඛමානං උද්දිස්ස…පෙ… සම්බහුලෙ සාමණෙරෙ උද්දිස්ස…පෙ… එකං සාමණෙරං උද්දිස්ස…පෙ… සම්බහුලා සාමණෙරියො උද්දිස්ස…පෙ… එකං සාමණෙරිං උද්දිස්ස…පෙ….

191. ඉධ පන, භික්ඛවෙ, උපාසිකාය අත්තනො අත්ථාය නිවෙසනං කාරාපිතං හොති…පෙ… සයනිඝරං කාරාපිතං හොති… උදොසිතො කාරාපිතො හොති… අට්ටො කාරාපිතො හොති… මාළො කාරාපිතො හොති… ආපණො කාරාපිතො හොති… ආපණසාලා කාරාපිතා හොති… පාසාදො කාරාපිතො හොති… හම්මියං කාරාපිතං හොති… ගුහා කාරාපිතා හොති… පරිවෙණං කාරාපිතං හොති… කොට්ඨකො කාරාපිතො හොති… උපට්ඨානසාලා කාරාපිතා හොති… අග්ගිසාලා කාරාපිතා හොති… රසවතී කාරාපිතා හොති… චඞ්කමො කාරාපිතො හොති… චඞ්කමනසාලා කාරාපිතා හොති… උදපානො කාරාපිතො හොති … උදපානසාලා කාරාපිතා හොති… පොක්ඛරණී කාරාපිතා හොති… මණ්ඩපො කාරාපිතො හොති… ආරාමො කාරාපිතො හොති… ආරාමවත්ථු කාරාපිතං හොති… පුත්තස්ස වා වාරෙය්යං හොති… ධීතුයා වා වාරෙය්යං හොති… ගිලානා වා හොති… අභිඤ්ඤාතං වා සුත්තන්තං භණති. සා චෙ භික්ඛූනං සන්තිකෙ දූතං පහිණෙය්ය – ‘‘ආගච්ඡන්තු අය්යා, ඉමං සුත්තන්තං පරියාපුණිස්සන්ති, පුරායං සුත්තන්තො පලුජ්ජතී’’ති. අඤ්ඤතරං වා පනස්සා කිච්චං හොති කරණීයං වා, සා චෙ භික්ඛූනං සන්තිකෙ දූතං පහිණෙය්ය – ‘‘ආගච්ඡන්තු අය්යා, ඉච්ඡාමි දානඤ්ච දාතුං, ධම්මඤ්ච සොතුං, භික්ඛූ ච පස්සිතු’’න්ති, ගන්තබ්බං, භික්ඛවෙ, සත්තාහකරණීයෙන, පහිතෙ, න ත්වෙව අප්පහිතෙ. සත්තාහං සන්නිවත්තො කාතබ්බො.

192. ඉධ පන, භික්ඛවෙ, භික්ඛුනා සඞ්ඝං උද්දිස්ස…පෙ… භික්ඛුනියා සඞ්ඝං උද්දිස්ස… සික්ඛමානාය සඞ්ඝං උද්දිස්ස… සාමණෙරෙන සඞ්ඝං උද්දිස්ස… සාමණෙරියා සඞ්ඝං උද්දිස්ස … සම්බහුලෙ භික්ඛූ උද්දිස්ස… එකං භික්ඛුං උද්දිස්ස… භික්ඛුනිසඞ්ඝං උද්දිස්ස… සම්බහුලා භික්ඛුනියො උද්දිස්ස… එකං භික්ඛුනිං උද්දිස්ස… සම්බහුලා සික්ඛමානායො උද්දිස්ස… එකං සික්ඛමානං උද්දිස්ස… සම්බහුලෙ සාමණෙරෙ උද්දිස්ස… එකං සාමණෙරං උද්දිස්ස… සම්බහුලා සාමණෙරියො උද්දිස්ස… එකං සාමණෙරිං උද්දිස්ස… අත්තනො අත්ථාය විහාරො කාරාපිතො හොති…පෙ… අඩ්ඪයොගො කාරාපිතො හොති… පාසාදො කාරාපිතො හොති… හම්මියං කාරාපිතං හොති… ගුහා කාරාපිතා හොති… පරිවෙණං කාරාපිතං හොති … කොට්ඨකො කාරාපිතො හොති… උපට්ඨානසාලා කාරාපිතා හොති… අග්ගිසාලා කාරාපිතා හොති… කප්පියකුටි කාරාපිතා හොති… චඞ්කමො කාරාපිතො හොති… චඞ්කමනසාලා කාරාපිතා හොති… උදපානො කාරාපිතො හොති… උදපානසාලා කාරාපිතා හොති… පොක්ඛරණී කාරාපිතා හොති… මණ්ඩපො කාරාපිතො හොති… ආරාමො කාරාපිතො හොති… ආරාමවත්ථු කාරාපිතං හොති. සා චෙ භික්ඛූනං සන්තිකෙ දූතං පහිණෙය්ය… ‘‘ආගච්ඡන්තු අය්යා, ඉච්ඡාමි දානඤ්ච දාතුං, ධම්මඤ්ච සොතුං, භික්ඛූ ච පස්සිතු’’න්ති, ගන්තබ්බං, භික්ඛවෙ, සත්තාහකරණීයෙන, පහිතෙ, න ත්වෙව අප්පහිතෙ. සත්තාහං සන්නිවත්තො කාතබ්බොති.

සත්තාහකරණීයානුජානතා නිට්ඨිතා.

110. පඤ්චන්නං අප්පහිතෙපි අනුජානනා

193. තෙන ඛො පන සමයෙන අඤ්ඤතරො භික්ඛු ගිලානො හොති. සො භික්ඛූනං සන්තිකෙ දූතං පාහෙසි – ‘‘අහඤ්හි ගිලානො, ආගච්ඡන්තු භික්ඛූ, ඉච්ඡාමි භික්ඛූනං ආගත’’න්ති. භගවතො එතමත්ථං ආරොචෙසුං. අනුජානාමි, භික්ඛවෙ, පඤ්චන්නං සත්තාහකරණීයෙන අප්පහිතෙපි ගන්තුං, පගෙව පහිතෙ. භික්ඛුස්ස, භික්ඛුනියා, සික්ඛමානාය, සාමණෙරස්ස, සාමණෙරියා – අනුජානාමි, භික්ඛවෙ, ඉමෙසං පඤ්චන්නං සත්තාහකරණීයෙන අප්පහිතෙපි ගන්තුං, පගෙව පහිතෙ. සත්තාහං සන්නිවත්තො කාතබ්බො.

ඉධ පන, භික්ඛවෙ, භික්ඛු ගිලානො හොති. සො චෙ භික්ඛූනං සන්තිකෙ දූතං පහිණෙය්ය – ‘‘අහඤ්හි ගිලානො, ආගච්ඡන්තු භික්ඛූ, ඉච්ඡාමි භික්ඛූනං ආගත’’න්ති, ගන්තබ්බං, භික්ඛවෙ, සත්තාහකරණීයෙන, අප්පහිතෙපි, පගෙව පහිතෙ – ‘‘ගිලානභත්තං වා පරියෙසිස්සාමි, ගිලානුපට්ඨාකභත්තං වා පරියෙසිස්සාමි, ගිලානභෙසජ්ජං වා පරියෙසිස්සාමි, පුච්ඡිස්සාමි වා, උපට්ඨහිස්සාමි වා’’ති. සත්තාහං සන්නිවත්තො කාතබ්බො.

ඉධ පන, භික්ඛවෙ, භික්ඛුස්ස අනභිරති උප්පන්නා හොති. සො චෙ භික්ඛූනං සන්තිකෙ දූතං පහිණෙය්ය – ‘‘අනභිරති මෙ උප්පන්නා, ආගච්ඡන්තු භික්ඛූ, ඉච්ඡාමි භික්ඛූනං ආගත’’න්ති, ගන්තබ්බං, භික්ඛවෙ, සත්තාහකරණීයෙන, අප්පහිතෙපි, පගෙව පහිතෙ – ‘‘අනභිරතං වූපකාසෙස්සාමි වා, වූපකාසාපෙස්සාමි වා, ධම්මකථං වාස්ස කරිස්සාමී’’ති. සත්තාහං සන්නිවත්තො කාතබ්බො.

ඉධ පන, භික්ඛවෙ, භික්ඛුස්ස කුක්කුච්චං උප්පන්නං හොති. සො චෙ භික්ඛූනං සන්තිකෙ දූතං පහිණෙය්ය – ‘‘කුක්කුච්චං මෙ උප්පන්නං, ආගච්ඡන්තු භික්ඛූ, ඉච්ඡාමි භික්ඛූනං ආගත’’න්ති, ගන්තබ්බං, භික්ඛවෙ, සත්තාහකරණීයෙන, අප්පහිතෙපි, පගෙව පහිතෙ – ‘‘කුක්කුච්චං විනොදෙස්සාමි වා, විනොදාපෙස්සාමි වා, ධම්මකථං වාස්ස කරිස්සාමී’’ති. සත්තාහං සන්නිවත්තො කාතබ්බො.

ඉධ පන, භික්ඛවෙ, භික්ඛුස්ස දිට්ඨිගතං උප්පන්නං හොති. සො චෙ භික්ඛූනං සන්තිකෙ දූතං පහිණෙය්ය – ‘‘දිට්ඨිගතං මෙ උප්පන්නං, ආගච්ඡන්තු භික්ඛූ, ඉච්ඡාමි භික්ඛූනං ආගත’’න්ති, ගන්තබ්බං, භික්ඛවෙ, සත්තාහකරණීයෙන, අප්පහිතෙපි, පගෙව පහිතෙ – ‘‘දිට්ඨිගතං විවෙචෙස්සාමි වා, විවෙචාපෙස්සාමි වා, ධම්මකථං වාස්ස කරිස්සාමී’’ති. සත්තාහං සන්නිවත්තො කාතබ්බො.

ඉධ පන, භික්ඛවෙ, භික්ඛු ගරුධම්මං අජ්ඣාපන්නො හොති පරිවාසාරහො. සො චෙ භික්ඛූනං සන්තිකෙ දූතං පහිණෙය්ය – ‘‘අහඤ්හි ගරුධම්මං අජ්ඣාපන්නො පරිවාසාරහො, ආගච්ඡන්තු භික්ඛූ, ඉච්ඡාමි භික්ඛූනං ආගත’’න්ති, ගන්තබ්බං, භික්ඛවෙ, සත්තාහකරණීයෙන, අප්පහිතෙපි, පගෙව පහිතෙ – ‘‘පරිවාසදානං උස්සුක්කං කරිස්සාමි වා, අනුස්සාවෙස්සාමි වා, ගණපූරකො වා භවිස්සාමී’’ති. සත්තාහං සන්නිවත්තො කාතබ්බො.

ඉධ පන, භික්ඛවෙ, භික්ඛු මූලාය පටිකස්සනාරහො හොති. සො චෙ භික්ඛූනං සන්තිකෙ දූතං පහිණෙය්ය – ‘‘අහඤ්හි මූලාය පටිකස්සනාරහො, ආගච්ඡන්තු භික්ඛූ, ඉච්ඡාමි භික්ඛූනං ආගත’’න්ති, ගන්තබ්බං, භික්ඛවෙ, සත්තාහකරණීයෙන, අප්පහිතෙපි, පගෙව පහිතෙ – ‘‘මූලාය පටිකස්සනං උස්සුක්කං කරිස්සාමි වා, අනුස්සාවෙස්සාමි වා, ගණපූරකො වා භවිස්සාමී’’ති. සත්තාහං සන්නිවත්තො කාතබ්බො.

ඉධ පන, භික්ඛවෙ, භික්ඛු මානත්තාරහො හොති. සො චෙ භික්ඛූනං සන්තිකෙ දූතං පහිණෙය්ය – ‘‘අහඤ්හි මානත්තාරහො, ආගච්ඡන්තු භික්ඛූ, ඉච්ඡාමි භික්ඛූනං ආගත’’න්ති, ගන්තබ්බං, භික්ඛවෙ, සත්තාහකරණීයෙන, අප්පහිතෙපි, පගෙව පහිතෙ – ‘‘මානත්තදානං උස්සුක්කං කරිස්සාමි වා, අනුස්සාවෙස්සාමි වා, ගණපූරකො වා භවිස්සාමී’’ති. සත්තාහං සන්නිවත්තො කාතබ්බො.

ඉධ පන, භික්ඛවෙ, භික්ඛු අබ්භානාරහො හොති. සො චෙ භික්ඛූනං සන්තිකෙ දූතං පහිණෙය්ය – ‘‘අහඤ්හි අබ්භානාරහො, ආගච්ඡන්තු භික්ඛූ, ඉච්ඡාමි භික්ඛූනං ආගත’’න්ති, ගන්තබ්බං, භික්ඛවෙ, සත්තාහකරණීයෙන, අප්පහිතෙපි, පගෙව පහිතෙ – ‘‘අබ්භානං උස්සුක්කං කරිස්සාමි වා, අනුස්සාවෙස්සාමි වා, ගණපූරකො වා භවිස්සාමී’’ති. සත්තාහං සන්නිවත්තො කාතබ්බො.

ඉධ පන, භික්ඛවෙ, භික්ඛුස්ස සඞ්ඝො කම්මං කත්තුකාමො හොති තජ්ජනීයං වා, නියස්සං වා, පබ්බාජනීයං වා, පටිසාරණීයං වා, උක්ඛෙපනීයං වා. සො චෙ භික්ඛූනං සන්තිකෙ දූතං පහිණෙය්ය – ‘‘සඞ්ඝො මෙ කම්මං කත්තුකාමො, ආගච්ඡන්තු භික්ඛූ, ඉච්ඡාමි භික්ඛූනං ආගත’’න්ති, ගන්තබ්බං, භික්ඛවෙ, සත්තාහකරණීයෙන, අප්පහිතෙපි, පගෙව පහිතෙ – ‘‘කින්ති නු ඛො සඞ්ඝො කම්මං න කරෙය්ය, ලහුකාය වා පරිණාමෙය්යා’’ති. සත්තාහං සන්නිවත්තො කාතබ්බො.

කතං වා පනස්ස හොති සඞ්ඝෙන කම්මං තජ්ජනීයං වා නියස්සං වා පබ්බාජනීයං වා පටිසාරණීයං වා උක්ඛෙපනීයං වා. සො චෙ භික්ඛූනං සන්තිකෙ දූතං පහිණෙය්ය ‘‘සඞ්ඝො මෙ කම්මං අකාසි, ආගච්ඡන්තු භික්ඛූ, ඉච්ඡාමි භික්ඛූනං ආගත’’න්ති, ගන්තබ්බං, භික්ඛවෙ, සත්තාහකරණීයෙන, අප්පහිතෙපි, පගෙව පහිතෙ – ‘‘කින්ති නු ඛො සම්මා වත්තෙය්ය, ලොමං පාතෙය්ය, නෙත්ථාරං වත්තෙය්ය, සඞ්ඝො තං කම්මං පටිප්පස්සම්භෙය්යා’’ති. සත්තාහං සන්නිවත්තො කාතබ්බො.

194. ඉධ පන, භික්ඛවෙ, භික්ඛුනී ගිලානා හොති. සා චෙ භික්ඛූනං සන්තිකෙ දූතං පහිණෙය්ය – ‘‘අහඤ්හි ගිලානා, ආගච්ඡන්තු අය්යා, ඉච්ඡාමි අය්යානං ආගත’’න්ති, ගන්තබ්බං, භික්ඛවෙ, සත්තාහකරණීයෙන, අප්පහිතෙපි, පගෙව පහිතෙ – ‘‘ගිලානභත්තං වා පරියෙසිස්සාමි, ගිලානුපට්ඨාකභත්තං වා පරියෙසිස්සාමි, ගිලානභෙසජ්ජං වා පරියෙසිස්සාමි, පුච්ඡිස්සාමි වා, උපට්ඨහිස්සාමි වා’’ති. සත්තාහං සන්නිවත්තො කාතබ්බො.

ඉධ පන, භික්ඛවෙ, භික්ඛුනියා අනභිරති උප්පන්නා හොති. සා චෙ භික්ඛූනං සන්තිකෙ දූතං පහිණෙය්ය – ‘‘අනභිරති මෙ උප්පන්නා, ආගච්ඡන්තු අය්යා, ඉච්ඡාමි අය්යානං ආගත’’න්ති, ගන්තබ්බං, භික්ඛවෙ, සත්තාහකරණීයෙන, අප්පහිතෙපි, පගෙව පහිතෙ – ‘‘අනභිරතං වූපකාසෙස්සාමි වා, වූපකාසාපෙස්සාමි වා, ධම්මකථං වාස්සා කරිස්සාමී’’ති. සත්තාහං සන්නිවත්තො කාතබ්බො.

ඉධ පන, භික්ඛවෙ, භික්ඛුනියා කුක්කුච්චං උප්පන්නං හොති. සා චෙ භික්ඛූනං සන්තිකෙ දූතං පහිණෙය්ය – ‘‘කුක්කුච්චං මෙ උප්පන්නං, ආගච්ඡන්තු අය්යා, ඉච්ඡාමි අය්යානං ආගත’’න්ති, ගන්තබ්බං, භික්ඛවෙ, සත්තාහකරණීයෙන, අප්පහිතෙපි, පගෙව පහිතෙ – ‘‘කුක්කුච්චං විනොදෙස්සාමි වා, විනොදාපෙස්සාමි වා, ධම්මකථං වාස්සා කරිස්සාමී’’ති. සත්තාහං සන්නිවත්තො කාතබ්බො.

ඉධ පන, භික්ඛවෙ, භික්ඛුනියා දිට්ඨිගතං උප්පන්නං හොති. සා චෙ භික්ඛූනං සන්තිකෙ දූතං පහිණෙය්ය – ‘‘දිට්ඨිගතං මෙ උප්පන්නං, ආගච්ඡන්තු අය්යා, ඉච්ඡාමි අය්යානං ආගත’’න්ති, ගන්තබ්බං, භික්ඛවෙ, සත්තාහකරණීයෙන, අප්පහිතෙපි, පගෙව පහිතෙ – ‘‘දිට්ඨිගතං විවෙචෙස්සාමි වා, විවෙචාපෙස්සාමි වා, ධම්මකථං වාස්සා කරිස්සාමී’’ති. සත්තාහං සන්නිවත්තො කාතබ්බො.

ඉධ පන, භික්ඛවෙ, භික්ඛුනී ගරුධම්මං අජ්ඣාපන්නා හොති මානත්තාරහා. සා චෙ භික්ඛූනං සන්තිකෙ දූතං පහිණෙය්ය – ‘‘අහඤ්හි ගරුධම්මං අජ්ඣාපන්නා මානත්තාරහා , ආගච්ඡන්තු අය්යා, ඉච්ඡාමි අය්යානං ආගත’’න්ති, ගන්තබ්බං, භික්ඛවෙ, සත්තාහකරණීයෙන, අප්පහිතෙපි, පගෙව පහිතෙ – ‘‘මානත්තදානං උස්සුක්කං කරිස්සාමී’’ති. සත්තාහං සන්නිවත්තො කාතබ්බො.

ඉධ පන, භික්ඛවෙ, භික්ඛුනී මූලාය පටිකස්සනාරහා හොති. සා චෙ භික්ඛූනං සන්තිකෙ දූතං පහිණෙය්ය – ‘‘අහඤ්හි මූලාය පටිකස්සනාරහා, ආගච්ඡන්තු අය්යා, ඉච්ඡාමි අය්යානං ආගත’’න්ති, ගන්තබ්බං, භික්ඛවෙ, සත්තාහකරණීයෙන, අප්පහිතෙපි, පගෙව පහිතෙ – ‘‘මූලාය පටිකස්සනං උස්සුක්කං කරිස්සාමී’’ති. සත්තාහං සන්නිවත්තො කාතබ්බො.

ඉධ පන, භික්ඛවෙ, භික්ඛුනී අබ්භානාරහා හොති. සා චෙ භික්ඛූනං සන්තිකෙ දූතං පහිණෙය්ය – ‘‘අහඤ්හි අබ්භානාරහා, ආගච්ඡන්තු අය්යා, ඉච්ඡාමි අය්යානං ආගත’’න්ති, ගන්තබ්බං , භික්ඛවෙ, සත්තාහකරණීයෙන, අප්පහිතෙපි, පගෙව පහිතෙ – ‘‘අබ්භානං උස්සුක්කං කරිස්සාමී’’ති. සත්තාහං සන්නිවත්තො කාතබ්බො.

ඉධ පන, භික්ඛවෙ, භික්ඛුනියා සඞ්ඝො කම්මං කත්තුකාමො හොති – තජ්ජනීයං වා, නියස්සං වා, පබ්බාජනීයං වා, පටිසාරණීයං වා, උක්ඛෙපනීයං වා. සා චෙ භික්ඛූනං සන්තිකෙ දූතං පහිණෙය්ය – ‘‘සඞ්ඝො මෙ කම්මං කත්තුකාමො, ආගච්ඡන්තු අය්යා, ඉච්ඡාමි අය්යානං ආගත’’න්ති, ගන්තබ්බං, භික්ඛවෙ, සත්තාහකරණීයෙන, අප්පහිතෙපි, පගෙව පහිතෙ – ‘‘කින්ති නු ඛො සඞ්ඝො කම්මං න කරෙය්ය, ලහුකාය වා පරිණාමෙය්යා’’ති. සත්තාහං සන්නිවත්තො කාතබ්බො.

කතං වා පනස්සා හොති සඞ්ඝෙන කම්මං – තජ්ජනීයං වා , නියස්සං වා, පබ්බාජනීයං වා, පටිසාරණීයං වා, උක්ඛෙපනීයං වා. සා චෙ භික්ඛූනං සන්තිකෙ දූතං පහිණෙය්ය – ‘‘සඞ්ඝො මෙ කම්මං අකාසි, ආගච්ඡන්තු අය්යා, ඉච්ඡාමි අය්යානං ආගත’’න්ති, ගන්තබ්බං, භික්ඛවෙ, සත්තාහකරණීයෙන, අප්පහිතෙපි, පගෙව පහිතෙ – ‘‘කින්ති නු ඛො සම්මා වත්තෙය්ය, ලොමං පාතෙය්ය, නෙත්ථාරං වත්තෙය්ය, සඞ්ඝො තං කම්මං පටිප්පස්සම්භෙය්යා’’ති. සත්තාහං සන්නිවත්තො කාතබ්බො.

195. ඉධ පන, භික්ඛවෙ, සික්ඛමානා ගිලානා හොති. සා චෙ භික්ඛූනං සන්තිකෙ දූතං පහිණෙය්ය – ‘‘අහඤ්හි ගිලානා, ආගච්ඡන්තු අය්යා, ඉච්ඡාමි අය්යානං ආගත’’න්ති – ගන්තබ්බං, භික්ඛවෙ, සත්තාහකරණීයෙන, අප්පහිතෙපි, පගෙව පහිතෙ – ‘‘ගිලානභත්තං වා පරියෙසිස්සාමි, ගිලානුපට්ඨාකභත්තං වා පරියෙසිස්සාමි, ගිලානභෙසජ්ජං වා පරියෙසිස්සාමි, පුච්ඡිස්සාමි වා, උපට්ඨහිස්සාමි වා’’ති. සත්තාහං සන්නිවත්තො කාතබ්බො.

ඉධ පන, භික්ඛවෙ, සික්ඛමානාය අනභිරති උප්පන්නා හොති…පෙ… සික්ඛමානාය කුක්කුච්චං උප්පන්නං හොති… සික්ඛමානාය දිට්ඨිගතං උප්පන්නං හොති… සික්ඛමානාය සික්ඛා කුපිතා හොති. සා චෙ භික්ඛූනං සන්තිකෙ දූතං පහිණෙය්ය – ‘‘සික්ඛා මෙ කුපිතා, ආගච්ඡන්තු අය්යා, ඉච්ඡාමි අය්යානං ආගත’’න්ති, ගන්තබ්බං, භික්ඛවෙ, සත්තාහකරණීයෙන, අප්පහිතෙපි, පගෙව පහිතෙ – ‘‘සික්ඛාසමාදානං උස්සුක්කං කරිස්සාමී’’ති. සත්තාහං සන්නිවත්තො කාතබ්බො.

ඉධ පන, භික්ඛවෙ, සික්ඛමානා උපසම්පජ්ජිතුකාමා හොති. සා චෙ භික්ඛූනං සන්තිකෙ දූතං පහිණෙය්ය – ‘‘අහඤ්හි උපසම්පජ්ජිතුකාමා, ආගච්ඡන්තු අය්යා , ඉච්ඡාමි අය්යානං ආගත’’න්ති ගන්තබ්බං, භික්ඛවෙ, සත්තාහකරණීයෙන, අප්පහිතෙපි, පගෙව පහිතෙ – උපසම්පදං උස්සුක්කං කරිස්සාමි වා, අනුස්සාවෙස්සාමි වා, ගණපූරකො වා භවිස්සාමීති. සත්තාහං සන්නිවත්තො කාතබ්බො.

196. ඉධ පන, භික්ඛවෙ, සාමණෙරො ගිලානො හොති. සො චෙ භික්ඛූනං සන්තිකෙ දූතං පහිණෙය්ය – ‘‘අහඤ්හි ගිලානො, ආගච්ඡන්තු භික්ඛූ , ඉච්ඡාමි භික්ඛූනං ආගත’’න්ති, ගන්තබ්බං, භික්ඛවෙ, සත්තාහකරණීයෙන, අප්පහිතෙපි, පගෙව පහිතෙ – ‘‘ගිලානභත්තං වා පරියෙසිස්සාමි, ගිලානුපට්ඨාකභත්තං වා පරියෙසිස්සාමි, ගිලානභෙසජ්ජං වා පරියෙසිස්සාමි, පුච්ඡිස්සාමි වා, උපට්ඨහිස්සාමි වා’’ති. සත්තාහං සන්නිවත්තො කාතබ්බො.

ඉධ පන, භික්ඛවෙ, සාමණෙරස්ස අනභිරති උප්පන්නා හොති…පෙ… සාමණෙරස්ස කුක්කුච්චං උප්පන්නං හොති… සාමණෙරස්ස දිට්ඨිගතං උප්පන්නං හොති… සාමණෙරො වස්සං පුච්ඡිතුකාමො හොති. සො චෙ භික්ඛූනං සන්තිකෙ දූතං පහිණෙය්ය – ‘‘අහඤ්හි වස්සං පුච්ඡිතුකාමො, ආගච්ඡන්තු භික්ඛූ, ඉච්ඡාමි භික්ඛූනං ආගත’’න්ති, ගන්තබ්බං, භික්ඛවෙ, සත්තාහකරණීයෙන, අප්පහිතෙපි, පගෙව පහිතෙ – ‘‘පුච්ඡිස්සාමි වා, ආචික්ඛිස්සාමි වා’’ති. සත්තාහං සන්නිවත්තො කාතබ්බො.

ඉධ පන, භික්ඛවෙ, සාමණෙරො උපසම්පජ්ජිතුකාමො හොති. සො චෙ භික්ඛූනං සන්තිකෙ දූතං පහිණෙය්ය – ‘‘අහඤ්හි උපසම්පජ්ජිතුකාමො, ආගච්ඡන්තු භික්ඛූ, ඉච්ඡාමි භික්ඛූනං ආගත’’න්ති, ගන්තබ්බං, භික්ඛවෙ, සත්තාහකරණීයෙන, අප්පහිතෙපි, පගෙව පහිතෙ – ‘‘උපසම්පදං උස්සුක්කං කරිස්සාමි වා, අනුස්සාවෙස්සාමි වා, ගණපූරකො වා භවිස්සාමී’’ති. සත්තාහං සන්නිවත්තො කාතබ්බො.

197. ඉධ පන, භික්ඛවෙ, සාමණෙරී ගිලානා හොති. සා චෙ භික්ඛූනං සන්තිකෙ දූතං පහිණෙය්ය – ‘‘අහඤ්හි ගිලානා, ආගච්ඡන්තු අය්යා, ඉච්ඡාමි අය්යානං ආගත’’න්ති , ගන්තබ්බං, භික්ඛවෙ, සත්තාහකරණීයෙන, අප්පහිතෙපි, පගෙව පහිතෙ – ‘‘ගිලානභත්තං වා පරියෙසිස්සාමි, ගිලානුපට්ඨාකභත්තං වා පරියෙසිස්සාමි, ගිලානභෙසජ්ජං වා පරියෙසිස්සාමි, පුච්ඡිස්සාමි වා, උපට්ඨහිස්සාමි වා’’ති. සත්තාහං සන්නිවත්තො කාතබ්බො.

ඉධ පන, භික්ඛවෙ, සාමණෙරියා අනභිරති උප්පන්නා හොති…පෙ… සාමණෙරියා කුක්කුච්චං උප්පන්නං හොති… සාමණෙරියා දිට්ඨිගතං උප්පන්නං හොති… සාමණෙරී වස්සං පුච්ඡිතුකාමා හොති. සා චෙ භික්ඛූනං සන්තිකෙ දූතං පහිණෙය්ය – ‘‘අහඤ්හි වස්සං පුච්ඡිතුකාමා, ආගච්ඡන්තු අය්යා, ඉච්ඡාමි අය්යානං ආගත’’න්ති, ගන්තබ්බං, භික්ඛවෙ, සත්තාහකරණීයෙන, අප්පහිතෙපි, පගෙව පහිතෙ – ‘‘පුච්ඡිස්සාමි වා, ආචික්ඛිස්සාමි වා’’ති. සත්තාහං සන්නිවත්තො කාතබ්බො.

ඉධ පන, භික්ඛවෙ, සාමණෙරී සික්ඛං සමාදියිතුකාමා හොති. සා චෙ භික්ඛූනං සන්තිකෙ දූතං පහිණෙය්ය – ‘‘අහඤ්හි සික්ඛං සමාදියිතුකාමා, ආගච්ඡන්තු අය්යා, ඉච්ඡාමි අය්යානං ආගත’’න්ති, ගන්තබ්බං, භික්ඛවෙ, සත්තාහකරණීයෙන, අප්පහිතෙපි, පගෙව පහිතෙ – ‘‘සික්ඛාසමාදානං උස්සුක්කං කරිස්සාමී’’ති. සත්තාහං සන්නිවත්තො කාතබ්බොති.

පඤ්චන්නං අප්පහිතෙපි අනුජානනා නිට්ඨිතා.

111. සත්තන්නං අප්පහිතෙපි අනුජානනා

198. තෙන ඛො පන සමයෙන අඤ්ඤතරස්ස භික්ඛුනො මාතා ගිලානා හොති. සා පුත්තස්ස සන්තිකෙ දූතං පාහෙසි – ‘‘අහඤ්හි ගිලානා, ආගච්ඡතු මෙ පුත්තො, ඉච්ඡාමි පුත්තස්ස ආගත’’න්ති. අථ ඛො තස්ස භික්ඛුනො එතදහොසි – ‘‘භගවතා පඤ්ඤත්තං සත්තන්නං සත්තාහකරණීයෙන පහිතෙ ගන්තුං, න ත්වෙව අප්පහිතෙ; පඤ්චන්නං සත්තාහකරණීයෙන අප්පහිතෙපි ගන්තුං, පගෙව පහිතෙති. අයඤ්ච මෙ මාතා ගිලානා, සා ච අනුපාසිකා, කථං නු ඛො මයා පටිපජ්ජිතබ්බ’’න්ති? භගවතො එතමත්ථං ආරොචෙසුං. අනුජානාමි, භික්ඛවෙ, සත්තන්නං සත්තාහකරණීයෙන අප්පහිතෙපි ගන්තුං, පගෙව පහිතෙ. භික්ඛුස්ස, භික්ඛුනියා, සික්ඛමානාය, සාමණෙරස්ස, සාමණෙරියා, මාතුයා ච පිතුස්ස ච – අනුජානාමි, භික්ඛවෙ, ඉමෙසං සත්තන්නං සත්තාහකරණීයෙන අප්පහිතෙපි ගන්තුං, පගෙව පහිතෙ. සත්තාහං සන්නිවත්තො කාතබ්බො.

ඉධ පන, භික්ඛවෙ, භික්ඛුස්ස මාතා ගිලානා හොති. සා චෙ පුත්තස්ස සන්තිකෙ දූතං පහිණෙය්ය – ‘‘අහඤ්හි ගිලානා, ආගච්ඡතු මෙ පුත්තො, ඉච්ඡාමි පුත්තස්ස ආගත’’න්ති, ගන්තබ්බං, භික්ඛවෙ, සත්තාහකරණීයෙන, අප්පහිතෙපි, පගෙව පහිතෙ – ‘‘ගිලානභත්තං වා පරියෙසිස්සාමි, ගිලානුපට්ඨාකභත්තං වා පරියෙසිස්සාමි, ගිලානභෙසජ්ජං වා පරියෙසිස්සාමි, පුච්ඡිස්සාමි වා, උපට්ඨහිස්සාමි වා’’ති. සත්තාහං සන්නිවත්තො කාතබ්බො.

ඉධ පන, භික්ඛවෙ, භික්ඛුස්ස පිතා ගිලානො හොති. සො චෙ පුත්තස්ස සන්තිකෙ දූතං පහිණෙය්ය – ‘‘අහඤ්හි ගිලානො, ආගච්ඡතු මෙ පුත්තො, ඉච්ඡාමි පුත්තස්ස ආගත’’න්ති, ගන්තබ්බං, භික්ඛවෙ, සත්තාහකරණීයෙන, අප්පහිතෙපි, පගෙව පහිතෙ – ‘‘ගිලානභත්තං වා පරියෙසිස්සාමි, ගිලානුපට්ඨාකභත්තං වා පරියෙසිස්සාමි, ගිලානභෙසජ්ජං වා පරියෙසිස්සාමි, පුච්ඡිස්සාමි වා, උපට්ඨහිස්සාමි වා’’ති. සත්තාහං සන්නිවත්තො කාතබ්බො.

සත්තන්නං අප්පහිතෙපි අනුජානනා නිට්ඨිතා.

112. පහිතෙයෙව අනුජානනා

199. ඉධ පන, භික්ඛවෙ, භික්ඛුස්ස භාතා ගිලානො හොති. සො චෙ භාතුනො සන්තිකෙ දූතං පහිණෙය්ය – ‘‘අහඤ්හි ගිලානො, ආගච්ඡතු මෙ භාතා, ඉච්ඡාමි භාතුනො ආගත’’න්ති, ගන්තබ්බං, භික්ඛවෙ , සත්තාහකරණීයෙන, පහිතෙ, න ත්වෙව අප්පහිතෙ. සත්තාහං සන්නිවත්තො කාතබ්බො.

ඉධ පන, භික්ඛවෙ, භික්ඛුස්ස භගිනී ගිලානා හොති. සා චෙ භාතුනො සන්තිකෙ දූතං පහිණෙය්ය – ‘‘අහඤ්හි ගිලානා, ආගච්ඡතු මෙ භාතා, ඉච්ඡාමි භාතුනො ආගත’’න්ති, ගන්තබ්බං, භික්ඛවෙ, සත්තාහකරණීයෙන, පහිතෙ, න ත්වෙව අප්පහිතෙ. සත්තාහං සන්නිවත්තො කාතබ්බො.

ඉධ පන, භික්ඛවෙ, භික්ඛුස්ස ඤාතකො ගිලානො හොති. සො චෙ භික්ඛුස්ස සන්තිකෙ දූතං පහිණෙය්ය – ‘‘අහඤ්හි ගිලානො, ආගච්ඡතු භදන්තො, ඉච්ඡාමි භදන්තස්ස ආගත’’න්ති, ගන්තබ්බං, භික්ඛවෙ, සත්තාහකරණීයෙන, පහිතෙ, න ත්වෙව අප්පහිතෙ. සත්තාහං සන්නිවත්තො කාතබ්බො.

ඉධ පන, භික්ඛවෙ, භික්ඛුගතිකො ගිලානො හොති. සො චෙ භික්ඛූනං සන්තිකෙ දූතං පහිණෙය්ය – ‘‘අහඤ්හි ගිලානො, ආගච්ඡන්තු භදන්තා, ඉච්ඡාමි භදන්තානං ආගත’’න්ති, ගන්තබ්බං, භික්ඛවෙ, සත්තාහකරණීයෙන, පහිතෙ, න ත්වෙව අප්පහිතෙ. සත්තාහං සන්නිවත්තො කාතබ්බො.

තෙන ඛො පන සමයෙන සඞ්ඝස්ස විහාරො උන්ද්රියති. අඤ්ඤතරෙන උපාසකෙන අරඤ්ඤෙ භණ්ඩං ඡෙදාපිතං හොති. සො භික්ඛූනං සන්තිකෙ දූතං පාහෙසි – ‘‘සචෙ භදන්තා තං භණ්ඩං ආවහාපෙය්යුං, දජ්ජාහං තං භණ්ඩ’’න්ති. භගවතො එතමත්ථං ආරොචෙසුං. අනුජානාමි, භික්ඛවෙ, සඞ්ඝකරණීයෙන ගන්තුං. සත්තාහං සන්නිවත්තො කාතබ්බොති.

පහිතෙයෙව අනුජානනා නිට්ඨිතා.

වස්සාවාසභාණවාරො නිට්ඨිතො.

113. අන්තරායෙ අනාපත්තිවස්සච්ඡෙදවාරො

200. තෙන ඛො පන සමයෙන කොසලෙසු ජනපදෙ අඤ්ඤතරස්මිං ආවාසෙ වස්සූපගතා භික්ඛූ වාළෙහි උබ්බාළ්හා හොන්ති. ගණ්හිංසුපි පරිපාතිංසුපි. භගවතො එතමත්ථං ආරොචෙසුං.

ඉධ පන, භික්ඛවෙ, වස්සූපගතා භික්ඛූ වාළෙහි උබ්බාළ්හා හොන්ති. ගණ්හන්තිපි පරිපාතෙන්තිපි. එසෙව අන්තරායොති පක්කමිතබ්බං. අනාපත්ති වස්සච්ඡෙදස්ස.

ඉධ පන, භික්ඛවෙ, වස්සූපගතා භික්ඛූ සරීසපෙහි උබ්බාළ්හා හොන්ති. ඩංසන්තිපි පරිපාතෙන්තිපි. එසෙව අන්තරායොති පක්කමිතබ්බං. අනාපත්ති වස්සච්ඡෙදස්ස .

ඉධ පන, භික්ඛවෙ, වස්සූපගතා භික්ඛූ චොරෙහි උබ්බාළ්හා හොන්ති. විලුම්පන්තිපි ආකොටෙන්තිපි. එසෙව අන්තරායොති පක්කමිතබ්බං. අනාපත්ති වස්සච්ඡෙදස්ස.

ඉධ පන, භික්ඛවෙ, වස්සූපගතා භික්ඛූ පිසාචෙහි උබ්බාළ්හා හොන්ති. ආවිසන්තිපි හනන්තිපි [ඔජම්පි හරන්ති (සී.), හරන්තිපි (ස්යා.)]. එසෙව අන්තරායොති පක්කමිතබ්බං. අනාපත්ති වස්සච්ඡෙදස්ස.

ඉධ පන, භික්ඛවෙ, වස්සූපගතානං භික්ඛූනං ගාමො අග්ගිනා දඩ්ඪො හොති. භික්ඛූ පිණ්ඩකෙන කිලමන්ති. එසෙව අන්තරායොති පක්කමිතබ්බං. අනාපත්ති වස්සච්ඡෙදස්ස.

ඉධ පන, භික්ඛවෙ, වස්සූපගතානං භික්ඛූනං සෙනාසනං අග්ගිනා දඩ්ඪං හොති. භික්ඛූ සෙනාසනෙන කිලමන්ති. එසෙව අන්තරායොති පක්කමිතබ්බං. අනාපත්ති වස්සච්ඡෙදස්ස.

ඉධ පන, භික්ඛවෙ, වස්සූපගතානං භික්ඛූනං ගාමො උදකෙන වූළ්හො හොති. භික්ඛූ පිණ්ඩකෙන කිලමන්ති. එසෙව අන්තරායොති පක්කමිතබ්බං. අනාපත්ති වස්සච්ඡෙදස්ස.

ඉධ පන, භික්ඛවෙ, වස්සූපගතානං භික්ඛූනං සෙනාසනං උදකෙන වූළ්හං හොති. භික්ඛූ සෙනාසනෙන කිලමන්ති. එසෙව අන්තරායොති පක්කමිතබ්බං. අනාපත්ති වස්සච්ඡෙදස්සාති.

201. තෙන ඛො පන සමයෙන අඤ්ඤතරස්මිං ආවාසෙ වස්සූපගතානං භික්ඛූනං ගාමො චොරෙහි වුට්ඨාසි. භගවතො එතමත්ථං ආරොචෙසුං. අනුජානාමි, භික්ඛවෙ, යෙන ගාමො තෙන ගන්තුන්ති.

ගාමො ද්වෙධා භිජ්ජිත්ථ. භගවතො එතමත්ථං ආරොචෙසුං. අනුජානාමි, භික්ඛවෙ, යෙන බහුතරා තෙන ගන්තුන්ති.

බහුතරා අස්සද්ධා හොන්ති අප්පසන්නා. භගවතො එතමත්ථං ආරොචෙසුං. අනුජානාමි, භික්ඛවෙ, යෙන සද්ධා පසන්නා තෙන ගන්තුන්ති.

තෙන ඛො පන සමයෙන කොසලෙසු ජනපදෙ අඤ්ඤතරස්මිං ආවාසෙ වස්සූපගතා භික්ඛූ න ලභිංසු ලූඛස්ස වා පණීතස්ස වා භොජනස්ස යාවදත්ථං පාරිපූරිං. භගවතො එතමත්ථං ආරොචෙසුං.

ඉධ පන, භික්ඛවෙ, වස්සූපගතා භික්ඛූ න ලභන්ති ලූඛස්ස වා පණීතස්ස වා භොජනස්ස යාවදත්ථං පාරිපූරිං. එසෙව අන්තරායොති පක්කමිතබ්බං. අනාපත්ති වස්සච්ඡෙදස්ස.

ඉධ පන, භික්ඛවෙ, වස්සූපගතා භික්ඛූ ලභන්ති ලූඛස්ස වා පණීතස්ස වා භොජනස්ස යාවදත්ථං පාරිපූරිං, න ලභන්ති සප්පායානි භොජනානි. එසෙව අන්තරායොති පක්කමිතබ්බං. අනාපත්ති වස්සච්ඡෙදස්ස.

ඉධ පන, භික්ඛවෙ, වස්සූපගතා භික්ඛූ ලභන්ති ලූඛස්ස වා පණීතස්ස වා භොජනස්ස යාවදත්ථං පාරිපූරිං, ලභන්ති සප්පායානි භොජනානි , න ලභන්ති සප්පායානි භෙසජ්ජානි. එසෙව අන්තරායොති පක්කමිතබ්බං. අනාපත්ති වස්සච්ඡෙදස්ස.

ඉධ පන, භික්ඛවෙ, වස්සූපගතා භික්ඛූ ලභන්ති ලූඛස්ස වා පණීතස්ස වා භොජනස්ස යාවදත්ථං පාරිපූරිං, ලභන්ති සප්පායානි භොජනානි, ලභන්ති සප්පායානි භෙසජ්ජානි, න ලභන්ති පතිරූපං උපට්ඨාකං. එසෙව අන්තරායොති පක්කමිතබ්බං. අනාපත්ති වස්සච්ඡෙදස්ස.

ඉධ පන, භික්ඛවෙ, වස්සූපගතං භික්ඛුං ඉත්ථී නිමන්තෙති – ‘‘එහි, භන්තෙ, හිරඤ්ඤං වා තෙ දෙමි, සුවණ්ණං වා තෙ දෙමි, ඛෙත්තං වා තෙ දෙමි, වත්ථුං වා තෙ දෙමි, ගාවුං වා තෙ දෙමි, ගාවිං වා තෙ දෙමි, දාසං වා තෙ දෙමි, දාසිං වා තෙ දෙමි, ධීතරං වා තෙ දෙමි භරියත්ථාය, අහං වා තෙ භරියා හොමි, අඤ්ඤං වා තෙ භරියං ආනෙමී’’ති. තත්ර චෙ භික්ඛුනො එවං හොති, ‘ලහුපරිවත්තං ඛො චිත්තං වුත්තං භගවතා, සියාපි මෙ බ්රහ්මචරියස්ස අන්තරායො’ති, පක්කමිතබ්බං. අනාපත්ති වස්සච්ඡෙදස්ස.

ඉධ පන, භික්ඛවෙ, වස්සූපගතං භික්ඛුං වෙසී නිමන්තෙති…පෙ… ථුල්ලකුමාරී නිමන්තෙති… පණ්ඩකො නිමන්තෙති… ඤාතකා නිමන්තෙන්ති… රාජානො නිමන්තෙන්ති… චොරා නිමන්තෙන්ති… ධුත්තා නිමන්තෙන්ති – ‘‘එහි, භන්තෙ, හිරඤ්ඤං වා තෙ දෙම, සුවණ්ණං වා තෙ දෙම, ඛෙත්තං වා තෙ දෙම, වත්ථුං වා තෙ දෙම , ගාවුං වා තෙ දෙම, ගාවිං වා තෙ දෙම, දාසං වා තෙ දෙම, දාසිං වා තෙ දෙම, ධීතරං වා තෙ දෙම භරියත්ථාය, අඤ්ඤං වා තෙ භරියං ආනෙමා’’ති. තත්ර චෙ භික්ඛුනො එවං හොති, ‘ලහුපරිවත්තං ඛො චිත්තං වුත්තං භගවතා, සියාපි මෙ බ්රහ්මචරියස්ස අන්තරායො’ති, පක්කමිතබ්බං. අනාපත්ති වස්සච්ඡෙදස්ස.

ඉධ පන, භික්ඛවෙ, වස්සූපගතො භික්ඛු අස්සාමිකං නිධිං පස්සති. තත්ර චෙ භික්ඛුනො එවං හොති, ‘ලහුපරිවත්තං ඛො චිත්තං වුත්තං භගවතා, සියාපි මෙ බ්රහ්මචරියස්ස අන්තරායො’ති, පක්කමිතබ්බං. අනාපත්ති වස්සච්ඡෙදස්ස.

අන්තරායෙ අනාපත්තිවස්සච්ඡෙදවාරො නිට්ඨිතො.

114. සඞ්ඝභෙදෙ අනාපත්තිවස්සච්ඡෙදවාරො

202. ඉධ පන, භික්ඛවෙ, වස්සූපගතො භික්ඛු පස්සති සම්බහුලෙ භික්ඛූ සඞ්ඝභෙදාය පරක්කමන්තෙ. තත්ර චෙ භික්ඛුනො එවං හොති, ‘ගරුකො ඛො සඞ්ඝභෙදො වුත්තො භගවතා; මා මයි සම්මුඛීභූතෙ සඞ්ඝො භිජ්ජී’ති, පක්කමිතබ්බං. අනාපත්ති වස්සච්ඡෙදස්ස.

ඉධ පන, භික්ඛවෙ, වස්සූපගතො භික්ඛු සුණාති – ‘‘අසුකස්මිං කිර ආවාසෙ සම්බහුලා භික්ඛූ සඞ්ඝභෙදාය පරක්කමන්තී’’ති. තත්ර චෙ භික්ඛුනො එවං හොති, ‘ගරුකො ඛො සඞ්ඝභෙදො වුත්තො භගවතා; මා මයි සම්මුඛීභූතෙ සඞ්ඝො භිජ්ජී’ති, පක්කමිතබ්බං. අනාපත්ති වස්සච්ඡෙදස්ස.

ඉධ පන, භික්ඛවෙ, වස්සූපගතො භික්ඛු සුණාති – ‘‘අසුකස්මිං කිර ආවාසෙ සම්බහුලා භික්ඛූ සඞ්ඝභෙදාය පරක්කමන්තී’’ති. තත්ර චෙ භික්ඛුනො එවං හොති – ‘‘තෙ ඛො මෙ භික්ඛූ මිත්තා. ත්යාහං වක්ඛාමි ‘ගරුකො ඛො, ආවුසො, සඞ්ඝභෙදො වුත්තො භගවතා; මායස්මන්තානං සඞ්ඝභෙදො රුච්චිත්ථා’ති. කරිස්සන්ති මෙ වචනං, සුස්සූසිස්සන්ති, සොතං ඔදහිස්සන්තී’’ති, පක්කමිතබ්බං. අනාපත්ති වස්සච්ඡෙදස්ස.

ඉධ පන, භික්ඛවෙ, වස්සූපගතො භික්ඛු සුණාති – ‘‘අසුකස්මිං කිර ආවාසෙ සම්බහුලා භික්ඛූ සඞ්ඝභෙදාය පරක්කමන්තී’’ති. තත්ර චෙ භික්ඛුනො එවං හොති – ‘‘තෙ ඛො මෙ භික්ඛූ න මිත්තා; අපි ච යෙ තෙසං මිත්තා, තෙ මෙ මිත්තා. ත්යාහං වක්ඛාමි. තෙ වුත්තා තෙ වක්ඛන්ති ‘ගරුකො ඛො, ආවුසො, සඞ්ඝභෙදො වුත්තො භගවතා; මායස්මන්තානං සඞ්ඝභෙදො රුච්චිත්ථා’ති. කරිස්සන්ති තෙසං වචනං, සුස්සූසිස්සන්ති, සොතං ඔදහිස්සන්තී’’ති, පක්කමිතබ්බං. අනාපත්ති වස්සච්ඡෙදස්ස.

ඉධ පන, භික්ඛවෙ, වස්සූපගතො භික්ඛු සුණාති – ‘‘අසුකස්මිං කිර ආවාසෙ සම්බහුලෙහි භික්ඛූහි සඞ්ඝො භින්නො’’ති. තත්ර චෙ භික්ඛුනො එවං හොති – ‘‘තෙ ඛො මෙ භික්ඛූ මිත්තා. ත්යාහං වක්ඛාමි ‘ගරුකො ඛො, ආවුසො, සඞ්ඝභෙදො වුත්තො භගවතා; මායස්මන්තානං සඞ්ඝභෙදො රුච්චිත්ථා’ති. කරිස්සන්ති මෙ වචනං, සුස්සූසිස්සන්ති, සොතං ඔදහිස්සන්තී’’ති, පක්කමිතබ්බං. අනාපත්ති වස්සච්ඡෙදස්ස.

ඉධ පන, භික්ඛවෙ, වස්සූපගතො භික්ඛු සුණාති – ‘‘අසුකස්මිං කිර ආවාසෙ සම්බහුලෙහි භික්ඛූහි සඞ්ඝො භින්නො’’ති. තත්ර චෙ භික්ඛුනො එවං හොති – ‘‘තෙ ඛො මෙ භික්ඛූ න මිත්තා; අපි ච, යෙ තෙසං මිත්තා තෙ මෙ මිත්තා. ත්යාහං වක්ඛාමි. තෙ වුත්තා තෙ වක්ඛන්ති ‘ගරුකො ඛො, ආවුසො, සඞ්ඝභෙදො වුත්තො භගවතා; මායස්මන්තානං සඞ්ඝභෙදො රුච්චිත්ථා’ති. කරිස්සන්ති තෙසං වචනං, සුස්සූසිස්සන්ති , සොතං ඔදහිස්සන්තී’’ති, පක්කමිතබ්බං. අනාපත්ති වස්සච්ඡෙදස්ස.

ඉධ පන, භික්ඛවෙ, වස්සූපගතො භික්ඛු සුණාති – ‘‘අමුකස්මිං කිර ආවාසෙ සම්බහුලා භික්ඛුනියො සඞ්ඝභෙදාය පරක්කමන්තී’’ති. තත්ර චෙ භික්ඛුනො එවං හොති – ‘‘තා ඛො මෙ භික්ඛුනියො මිත්තා. තාහං වක්ඛාමි ‘ගරුකො ඛො, භගිනියො, සඞ්ඝභෙදො වුත්තො භගවතා; මා භගිනීනං සඞ්ඝභෙදො රුච්චිත්ථා’ති. කරිස්සන්ති මෙ වචනං, සුස්සූසිස්සන්ති, සොතං ඔදහිස්සන්තී’’ති, පක්කමිතබ්බං. අනාපත්ති වස්සච්ඡෙදස්ස.

ඉධ පන, භික්ඛවෙ, වස්සූපගතො භික්ඛු සුණාති – ‘‘අමුකස්මිං කිර ආවාසෙ සම්බහුලා භික්ඛුනියො සඞ්ඝභෙදාය පරක්කමන්තී’’ති. තත්ර චෙ භික්ඛුනො එවං හොති – ‘‘තා ඛො මෙ භික්ඛුනියො න මිත්තා. අපි ච, යා තාසං මිත්තා, තා මෙ මිත්තා. තාහං වක්ඛාමි. තා වුත්තා තා වක්ඛන්ති ‘ගරුකො ඛො, භගිනියො, සඞ්ඝභෙදො වුත්තො භගවතා. මා භගිනීනං සඞ්ඝභෙදො රුච්චිත්ථා’ති. කරිස්සන්ති තාසං වචනං, සුස්සූසිස්සන්ති, සොතං ඔදහිස්සන්තී’’ති, පක්කමිතබ්බං. අනාපත්ති වස්සච්ඡෙදස්සති.

ඉධ පන, භික්ඛවෙ, වස්සූපගතො භික්ඛු සුණාති – ‘‘අමුකස්මිං කිර ආවාසෙ සම්බහුලාහි භික්ඛුනීහි සඞ්ඝො භින්නො’’ති. තත්ර චෙ භික්ඛුනො එවං හොති – ‘‘තා ඛො මෙ භික්ඛුනියො මිත්තා. තාහං වක්ඛාමි ‘ගරුකො ඛො, භගිනියො, සඞ්ඝභෙදො වුත්තො භගවතා. මා භගිනීනං සඞ්ඝභෙදො රුච්චිත්ථා’ති. කරිස්සන්ති මෙ වචනං, සුස්සූසිස්සන්ති, සොතං ඔදහිස්සන්තී’’ති, පක්කමිතබ්බං. අනාපත්ති වස්සච්ඡෙදස්සති.

ඉධ පන, භික්ඛවෙ, වස්සූපගතො භික්ඛු සුණාති – ‘‘අමුකස්මිං කිර ආවාසෙ සම්බහුලාහි භික්ඛුනීහි සඞ්ඝො භින්නො’’ති. තත්ර චෙ භික්ඛුනො එවං හොති – ‘‘තා ඛො මෙ භික්ඛුනියො න මිත්තා. අපි ච, යා තාසං මිත්තා තා මෙ මිත්තා. තාහං වක්ඛාමි. තා වුත්තා තා වක්ඛන්ති ‘ගරුකො ඛො, භගිනියො [අය්යායො (සී.)], සඞ්ඝභෙදො වුත්තො භගවතා; මා භගිනීනං [අය්යානං (සී.)] සඞ්ඝභෙදො රුච්චිත්ථා’ති. කරිස්සන්ති තාසං වචනං, සුස්සූසිස්සන්ති, සොතං ඔදහිස්සන්තී’’ති, පක්කමිතබ්බං. අනාපත්ති වස්සච්ඡෙදස්සාති.

සඞ්ඝභෙදෙ අනාපත්තිවස්සච්ඡෙදවාරො නිට්ඨිතො.

115. වජාදීසු වස්සූපගමනං

203. තෙන ඛො පන සමයෙන අඤ්ඤතරො භික්ඛු වජෙ වස්සං උපගන්තුකාමො හොති. භගවතො එතමත්ථං ආරොචෙසුං. අනුජානාමි, භික්ඛවෙ, වජෙ වස්සං උපගන්තුන්ති. වජො වුට්ඨාසි. භගවතො එතමත්ථං ආරොචෙසුං. අනුජානාමි, භික්ඛවෙ, යෙන වජො තෙන ගන්තුන්ති.

තෙන ඛො පන සමයෙන අඤ්ඤතරො භික්ඛු උපකට්ඨාය වස්සූපනායිකාය සත්ථෙන ගන්තුකාමො හොති. භගවතො එතමත්ථං ආරොචෙසුං. අනුජානාමි, භික්ඛවෙ, සත්ථෙ වස්සං උපගන්තුන්ති.

තෙන ඛො පන සමයෙන අඤ්ඤතරො භික්ඛු උපකට්ඨාය වස්සූපනායිකාය නාවාය ගන්තුකාමො හොති. භගවතො එතමත්ථං ආරොචෙසුං. අනුජානාමි, භික්ඛවෙ, නාවාය වස්සං උපගන්තුන්ති.

වජාදීසු වස්සූපගමනං නිට්ඨිතං.

116. වස්සං අනුපගන්තබ්බට්ඨානානි

204. තෙන ඛො පන සමයෙන භික්ඛූ රුක්ඛසුසිරෙ වස්සං උපගච්ඡන්ති. මනුස්සා උජ්ඣායන්ති ඛිය්යන්ති විපාචෙන්ති – ‘‘සෙය්යථාපි පිසාචිල්ලිකා’’ති. භගවතො එතමත්ථං ආරොචෙසුං. න, භික්ඛවෙ, රුක්ඛසුසිරෙ වස්සං උපගන්තබ්බං. යො උපගච්ඡෙය්ය, ආපත්ති දුක්කටස්සාති.

තෙන ඛො පන සමයෙන භික්ඛූ රුක්ඛවිටභියා වස්සං උපගච්ඡන්ති. මනුස්සා උජ්ඣායන්ති ඛිය්යන්ති විපාචෙන්ති – ‘‘සෙය්යථාපි මිගලුද්දකා’’ති. භගවතො එතමත්ථං ආරොචෙසුං. න, භික්ඛවෙ, රුක්ඛවිටභියා වස්සං උපගන්තබ්බං. යො උපගච්ඡෙය්ය, ආපත්ති දුක්කටස්සාති.

තෙන ඛො පන සමයෙන භික්ඛූ අජ්ඣොකාසෙ වස්සං උපගච්ඡන්ති. දෙවෙ වස්සන්තෙ රුක්ඛමූලම්පි නිබ්බකොසම්පි උපධාවන්ති. භගවතො එතමත්ථං ආරොචෙසුං. න, භික්ඛවෙ, අජ්ඣොකාසෙ වස්සං උපගන්තබ්බං. යො උපගච්ඡෙය්ය, ආපත්ති දුක්කටස්සාති.

තෙන ඛො පන සමයෙන භික්ඛූ අසෙනාසනිකා වස්සං උපගච්ඡන්ති. සීතෙනපි කිලමන්ති, උණ්හෙනපි කිලමන්ති. භගවතො එතමත්ථං ආරොචෙසුං. න, භික්ඛවෙ, අසෙනාසනිකෙන වස්සං උපගන්තබ්බං. යො උපගච්ඡෙය්ය, ආපත්ති දුක්කටස්සාති.

තෙන ඛො පන සමයෙන භික්ඛූ ඡවකුටිකාය වස්සං උපගච්ඡන්ති. මනුස්සා උජ්ඣායන්ති ඛිය්යන්ති විපාචෙන්ති – ‘‘සෙය්යථාපි ඡවඩාහකා’’ති. භගවතො එතමත්ථං ආරොචෙසුං. න, භික්ඛවෙ, ඡවකුටිකාය වස්සං උපගන්තබ්බං. යො උපගච්ඡෙය්ය, ආපත්ති දුක්කටස්සාති.

තෙන ඛො පන සමයෙන භික්ඛූ ඡත්තෙ වස්සං උපගච්ඡන්ති. මනුස්සා උජ්ඣායන්ති ඛිය්යන්ති විපාචෙන්ති – ‘‘සෙය්යථාපි ගොපාලකා’’ති. භගවතො එතමත්ථං ආරොචෙසුං. න, භික්ඛවෙ, ඡත්තෙ වස්සං උපගන්තබ්බං. යො උපගච්ඡෙය්ය, ආපත්ති දුක්කටස්සාති.

තෙන ඛො පන සමයෙන භික්ඛූ චාටියා වස්සං උපගච්ඡන්ති. මනුස්සා උජ්ඣායන්ති ඛිය්යන්ති විපාචෙන්ති – ‘‘සෙය්යථාපි තිත්ථියා’’ති. භගවතො එතමත්ථං ආරොචෙසුං. න, භික්ඛවෙ, චාටියා වස්සං උපගන්තබ්බං. යො උපගච්ඡෙය්ය, ආපත්ති දුක්කටස්සාති.

වස්සං අනුපගන්තබ්බට්ඨානානි නිට්ඨිතා.

117. අධම්මිකකතිකා

205. තෙන ඛො පන සමයෙන සාවත්ථියා සඞ්ඝෙන එවරූපා කතිකා කතා හොති – අන්තරාවස්සං න පබ්බාජෙතබ්බන්ති. විසාඛාය මිගාරමාතුයා නත්තා භික්ඛූ උපසඞ්කමිත්වා පබ්බජ්ජං යාචි. භික්ඛූ එවමාහංසු – ‘‘සඞ්ඝෙන ඛො, ආවුසො, එවරූපා කතිකා කතා ‘අන්තරාවස්සං න පබ්බාජෙතබ්බ’න්ති. ආගමෙහි, ආවුසො, යාව භික්ඛූ වස්සං වසන්ති. වස්සංවුට්ඨා පබ්බාජෙස්සන්තී’’ති. අථ ඛො තෙ භික්ඛූ වස්සංවුට්ඨා විසාඛාය මිගාරමාතුයා නත්තාරං එතදවොචුං – ‘‘එහි, දානි, ආවුසො, පබ්බජාහී’’ති. සො එවමාහ – ‘‘සචාහං, භන්තෙ, පබ්බජිතො අස්සං, අභිරමෙය්යාමහං [අභිරමෙය්යං චාහං (සී.)]. න දානාහං, භන්තෙ, පබ්බජිස්සාමී’’ති. විසාඛා මිගාරමාතා උජ්ඣායති ඛිය්යති විපාචෙති – ‘‘කථඤ්හි නාම අය්යා එවරූපං කතිකං කරිස්සන්ති ‘න අන්තරාවස්සං පබ්බාජෙතබ්බ’න්ති. කං කාලං ධම්මො න චරිතබ්බො’’ති? අස්සොසුං ඛො භික්ඛූ විසාඛාය මිගාරමාතුයා උජ්ඣායන්තියා ඛිය්යන්තියා විපාචෙන්තියා. අථ ඛො තෙ භික්ඛූ භගවතො එතමත්ථං ආරොචෙසුං. න, භික්ඛවෙ, එවරූපා කතිකා කාතබ්බා – ‘න අන්තරාවස්සං පබ්බාජෙතබ්බ’න්ති. යො කරෙය්ය, ආපත්ති දුක්කටස්සාති.

අධම්මිකකතිකා නිට්ඨිතා.

118. පටිස්සවදුක්කටාපත්ති

206. තෙන ඛො පන සමයෙන ආයස්මතා උපනන්දෙන සක්යපුත්තෙන රඤ්ඤො පසෙනදිස්ස කොසලස්ස වස්සාවාසො පටිස්සුතො හොති පුරිමිකාය. සො තං ආවාසං ගච්ඡන්තො අද්දස අන්තරාමග්ගෙ ද්වෙ ආවාසෙ බහුචීවරකෙ. තස්ස එතදහොසි – ‘‘යංනූනාහං ඉමෙසු ද්වීසු ආවාසෙසු වස්සං වසෙය්යං. එවං මෙ බහුං චීවරං [බහුචීවරං (ක.)] උප්පජ්ජිස්සතී’’ති. සො තෙසු ද්වීසු ආවාසෙසු වස්සං වසි. රාජා පසෙනදි කොසලො උජ්ඣායති ඛිය්යති විපාචෙති – ‘‘කථඤ්හි නාම අය්යො උපනන්දො සක්යපුත්තො අම්හාකං වස්සාවාසං පටිස්සුණිත්වා විසංවාදෙස්සති. නනු භගවතා අනෙකපරියායෙන මුසාවාදො ගරහිතො, මුසාවාදා වෙරමණී පසත්ථා’’ති. අස්සොසුං ඛො භික්ඛූ රඤ්ඤො පසෙනදිස්ස කොසලස්ස උජ්ඣායන්තස්ස ඛිය්යන්තස්ස විපාචෙන්තස්ස. යෙ තෙ භික්ඛූ අප්පිච්ඡා…පෙ… තෙ උජ්ඣායන්ති ඛිය්යන්ති විපාචෙන්ති – ‘‘කථඤ්හි නාම ආයස්මා උපනන්දො සක්යපුත්තො රඤ්ඤො පසෙනදිස්ස කොසලස්ස වස්සාවාසං පටිස්සුණිත්වා විසංවාදෙස්සති. නනු භගවතා අනෙකපරියායෙන මුසාවාදො ගරහිතො, මුසාවාදා වෙරමණී පසත්ථා’’ති. අථ ඛො තෙ භික්ඛූ භගවතො එතමත්ථං ආරොචෙසුං…පෙ… අථ ඛො භගවා එතස්මිං නිදානෙ එතස්මිං පකරණෙ භික්ඛුසඞ්ඝං සන්නිපාතාපෙත්වා ආයස්මන්තං උපනන්දං සක්යපුත්තං පටිපුච්ඡි – ‘‘සච්චං කිර ත්වං, උපනන්ද, රඤ්ඤො පසෙනදිස්ස කොසලස්ස වස්සාවාසං පටිස්සුණිත්වා විසංවාදෙසී’’ති? ‘‘සච්චං, භගවා’’ති. විගරහි බුද්ධො භගවා…පෙ… කථඤ්හි නාම ත්වං, මොඝපුරිස, රඤ්ඤො පසෙනදිස්ස කොසලස්ස වස්සාවාසං පටිස්සුණිත්වා විසංවාදෙස්සසි. නනු මයා, මොඝපුරිස, අනෙකපරියායෙන මුසාවාදො ගරහිතො, මුසාවාදා වෙරමණී පසත්ථා. නෙතං, මොඝපුරිස, අප්පසන්නානං වා පසාදාය…පෙ… විගරහිත්වා…පෙ… ධම්මිං කථං කත්වා භික්ඛූ ආමන්තෙසි –

207. ඉධ පන, භික්ඛවෙ, භික්ඛුනා වස්සාවාසො පටිස්සුතො හොති පුරිමිකාය. සො තං ආවාසං ගච්ඡන්තො පස්සති අන්තරාමග්ගෙ ද්වෙ ආවාසෙ බහුචීවරකෙ. තස්ස එවං හොති – ‘‘යංනූනාහං ඉමෙසු ද්වීසු ආවාසෙසු වස්සං වසෙය්යං. එවං මෙ බහුං චීවරං උප්පජ්ජිස්සතී’’ති. සො තෙසු ද්වීසු ආවාසෙසු වස්සං වසති. තස්ස, භික්ඛවෙ, භික්ඛුනො පුරිමිකා ච න පඤ්ඤායති, පටිස්සවෙ ච ආපත්ති දුක්කටස්ස.

ඉධ පන, භික්ඛවෙ, භික්ඛුනා වස්සාවාසො පටිස්සුතො හොති පුරිමිකාය. සො තං ආවාසං ගච්ඡන්තො බහිද්ධා උපොසථං කරොති, පාටිපදෙ [පාටිපදෙන (ක.)] විහාරං උපෙති, සෙනාසනං පඤ්ඤපෙති, පානීයං පරිභොජනීයං උපට්ඨාපෙති, පරිවෙණං සම්මජ්ජති. සො තදහෙව අකරණීයො පක්කමති. තස්ස, භික්ඛවෙ, භික්ඛුනො පුරිමිකා ච න පඤ්ඤායති, පටිස්සවෙ ච ආපත්ති දුක්කටස්ස.

ඉධ පන, භික්ඛවෙ, භික්ඛුනා වස්සාවාසො පටිස්සුතො හොති පුරිමිකාය. සො තං ආවාසං ගච්ඡන්තො බහිද්ධා උපොසථං කරොති, පාටිපදෙ විහාරං උපෙති, සෙනාසනං පඤ්ඤපෙති, පානීයං පරිභොජනීයං උපට්ඨාපෙති, පරිවෙණං සම්මජ්ජති. සො තදහෙව සකරණීයො පක්කමති. තස්ස , භික්ඛවෙ, භික්ඛුනො පුරිමිකා ච න පඤ්ඤායති, පටිස්සවෙ ච ආපත්ති දුක්කටස්ස.

ඉධ පන, භික්ඛවෙ, භික්ඛුනා වස්සාවාසො පටිස්සුතො හොති පුරිමිකාය. සො තං ආවාසං ගච්ඡන්තො බහිද්ධා උපොසථං කරොති, පාටිපදෙ විහාරං උපෙති, සෙනාසනං පඤ්ඤපෙති, පානීයං පරිභොජනීයං උපට්ඨාපෙති, පරිවෙණං සම්මජ්ජති. සො ද්වීහතීහං වසිත්වා අකරණීයො පක්කමති. තස්ස, භික්ඛවෙ, භික්ඛුනො පුරිමිකා ච න පඤ්ඤායති, පටිස්සවෙ ච ආපත්ති දුක්කටස්ස.

ඉධ පන, භික්ඛවෙ, භික්ඛුනා වස්සාවාසො පටිස්සුතො හොති පුරිමිකාය. සො තං ආවාසං ගච්ඡන්තො බහිද්ධා උපොසථං කරොති, පාටිපදෙ විහාරං උපෙති, සෙනාසනං පඤ්ඤපෙති, පානීයං පරිභොජනීයං උපට්ඨාපෙති, පරිවෙණං සම්මජ්ජති. සො ද්වීහතීහං වසිත්වා සකරණීයො පක්කමති. තස්ස, භික්ඛවෙ, භික්ඛුනො පුරිමිකා ච න පඤ්ඤායති, පටිස්සවෙ ච ආපත්ති දුක්කටස්ස.

ඉධ පන, භික්ඛවෙ, භික්ඛුනා වස්සාවාසො පටිස්සුතො හොති පුරිමිකාය. සො තං ආවාසං ගච්ඡන්තො බහිද්ධා උපොසථං කරොති, පාටිපදෙ විහාරං උපෙති, සෙනාසනං පඤ්ඤපෙති, පානීයං පරිභොජනීයං උපට්ඨාපෙති, පරිවෙණං සම්මජ්ජති. සො ද්වීහතීහං වසිත්වා සත්තාහකරණීයෙන පක්කමති. සො තං සත්තාහං බහිද්ධා වීතිනාමෙති. තස්ස, භික්ඛවෙ, භික්ඛුනො පුරිමිකා ච න පඤ්ඤායති, පටිස්සවෙ ච ආපත්ති දුක්කටස්ස.

ඉධ පන, භික්ඛවෙ, භික්ඛුනා වස්සාවාසො පටිස්සුතො හොති පුරිමිකාය. සො තං ආවාසං ගච්ඡන්තො බහිද්ධා උපොසථං කරොති, පාටිපදෙ විහාරං උපෙති, සෙනාසනං පඤ්ඤපෙති, පානීයං පරිභොජනීයං උපට්ඨාපෙති, පරිවෙණං සම්මජ්ජති. සො ද්වීහතීහං වසිත්වා සත්තාහකරණීයෙන පක්කමති . සො තං සත්තාහං අන්තො සන්නිවත්තං කරොති. තස්ස, භික්ඛවෙ, භික්ඛුනො පුරිමිකා ච පඤ්ඤායති, පටිස්සවෙ ච අනාපත්ති.

ඉධ පන, භික්ඛවෙ , භික්ඛුනා වස්සාවාසො පටිස්සුතො හොති පුරිමිකාය. සො තං ආවාසං ගච්ඡන්තො බහිද්ධා උපොසථං කරොති, පාටිපදෙ විහාරං උපෙති, සෙනාසනං පඤ්ඤපෙති, පානීයං පරිභොජනීයං උපට්ඨාපෙති , පරිවෙණං සම්මජ්ජති. සො සත්තාහං අනාගතාය පවාරණාය සකරණීයො පක්කමති. ආගච්ඡෙය්ය වා සො, භික්ඛවෙ, භික්ඛු තං ආවාසං න වා ආගච්ඡෙය්ය, තස්ස, භික්ඛවෙ, භික්ඛුනො පුරිමිකා ච පඤ්ඤායති, පටිස්සවෙ ච අනාපත්ති.

ඉධ පන, භික්ඛවෙ, භික්ඛුනා වස්සාවාසො පටිස්සුතො හොති පුරිමිකාය. සො තං ආවාසං ගන්ත්වා උපොසථං කරොති, පාටිපදෙ විහාරං උපෙති, සෙනාසනං පඤ්ඤපෙති, පානීයං පරිභොජනීයං උපට්ඨාපෙති, පරිවෙණං සම්මජ්ජති. සො තදහෙව අකරණීයො පක්කමති. තස්ස, භික්ඛවෙ, භික්ඛුනො පුරිමිකා ච න පඤ්ඤායති, පටිස්සවෙ ච ආපත්ති දුක්කටස්ස.

ඉධ පන, භික්ඛවෙ, භික්ඛුනා වස්සාවාසො පටිස්සුතො හොති පුරිමිකාය. සො තං ආවාසං ගන්ත්වා උපොසථං කරොති, පාටිපදෙ විහාරං උපෙති, සෙනාසනං පඤ්ඤපෙති, පානීයං පරිභොජනීයං උපට්ඨාපෙති, පරිවෙණං සම්මජ්ජති. සො තදහෙව සකරණීයො පක්කමති…පෙ… සො ද්වීහතීහං වසිත්වා අකරණීයො පක්කමති…පෙ… සො ද්වීහතීහං වසිත්වා සකරණීයො පක්කමති…පෙ… සො ද්වීහතීහං වසිත්වා සත්තාහකරණීයෙන පක්කමති. සො තං සත්තාහං බහිද්ධා වීතිනාමෙති. තස්ස, භික්ඛවෙ, භික්ඛුනො පුරිමිකා ච න පඤ්ඤායති, පටිස්සවෙ ච ආපත්ති දුක්කටස්ස…පෙ… සො ද්වීහතීහං වසිත්වා සත්තාහකරණීයෙන පක්කමති. සො තං සත්තාහං අන්තො සන්නිවත්තං කරොති. තස්ස, භික්ඛවෙ, භික්ඛුනො පුරිමිකා ච පඤ්ඤායති, පටිස්සවෙ ච අනාපත්ති…පෙ… සො සත්තාහං අනාගතාය පවාරණාය සකරණීයො පක්කමති. ආගච්ඡෙය්ය වා සො, භික්ඛවෙ, භික්ඛු තං ආවාසං න වා ආගච්ඡෙය්ය, තස්ස, භික්ඛවෙ, භික්ඛුනො පුරිමිකා ච පඤ්ඤායති, පටිස්සවෙ ච අනාපත්ති.

208. ඉධ පන, භික්ඛවෙ, භික්ඛුනා වස්සාවාසො පටිස්සුතො හොති පච්ඡිමිකාය. සො තං ආවාසං ගච්ඡන්තො බහිද්ධා උපොසථං කරොති, පාටිපදෙ විහාරං උපෙති, සෙනාසනං පඤ්ඤපෙති, පානීයං පරිභොජනීයං උපට්ඨාපෙති, පරිවෙණං සම්මජ්ජති. සො තදහෙව අකරණීයො පක්කමති. තස්ස, භික්ඛවෙ, භික්ඛුනො පච්ඡිමිකා ච න පඤ්ඤායති, පටිස්සවෙ ච ආපත්ති දුක්කටස්ස.

ඉධ පන, භික්ඛවෙ, භික්ඛුනා වස්සාවාසො පටිස්සුතො හොති පච්ඡිමිකාය. සො තං ආවාසං ගච්ඡන්තො බහිද්ධා උපොසථං කරොති, පාටිපදෙ විහාරං උපෙති, සෙනාසනං පඤ්ඤපෙති, පානීයං පරිභොජනීයං උපට්ඨාපෙති, පරිවෙණං සම්මජ්ජති. සො තදහෙව සකරණීයො පක්කමති. තස්ස, භික්ඛවෙ, භික්ඛුනො පච්ඡිමිකා ච න පඤ්ඤායති, පටිස්සවෙ ච ආපත්ති දුක්කටස්ස.

ඉධ පන, භික්ඛවෙ, භික්ඛුනා වස්සාවාසො පටිස්සුතො හොති පච්ඡිමිකාය. සො තං ආවාසං ගච්ඡන්තො බහිද්ධා උපොසථං කරොති, පාටිපදෙ විහාරං උපෙති, සෙනාසනං පඤ්ඤපෙති, පානීයං පරිභොජනීයං උපට්ඨාපෙති, පරිවෙණං සම්මජ්ජති. සො ද්වීහතීහං වසිත්වා අකරණීයො පක්කමති . තස්ස, භික්ඛවෙ, භික්ඛුනො පච්ඡිමිකා ච න පඤ්ඤායති, පටිස්සවෙ ච ආපත්ති දුක්කටස්ස.

ඉධ පන, භික්ඛවෙ, භික්ඛුනා වස්සාවාසො පටිස්සුතො හොති පච්ඡිමිකාය. සො තං ආවාසං ගච්ඡන්තො බහිද්ධා උපොසථං කරොති, පාටිපදෙ විහාරං උපෙති, සෙනාසනං පඤ්ඤපෙති, පානීයං පරිභොජනීයං උපට්ඨාපෙති, පරිවෙණං සම්මජ්ජති. සො ද්වීහතීහං වසිත්වා සකරණීයො පක්කමති. තස්ස, භික්ඛවෙ, භික්ඛුනො පච්ඡිමිකා ච න පඤ්ඤායති, පටිස්සවෙ ච ආපත්ති දුක්කටස්ස.

ඉධ පන, භික්ඛවෙ, භික්ඛුනා වස්සාවාසො පටිස්සුතො හොති පච්ඡිමිකාය. සො තං ආවාසං ගච්ඡන්තො බහිද්ධා උපොසථං කරොති, පාටිපදෙ විහාරං උපෙති, සෙනාසනං පඤ්ඤපෙති, පානීයං පරිභොජනීයං උපට්ඨාපෙති, පරිවෙණං සම්මජ්ජති. සො ද්වීහතීහං වසිත්වා සත්තාහකරණීයෙන පක්කමති. සො තං සත්තාහං බහිද්ධා වීතිනාමෙති. තස්ස, භික්ඛවෙ, භික්ඛුනො පච්ඡිමිකා ච න පඤ්ඤායති, පටිස්සවෙ ච ආපත්ති දුක්කටස්ස.

ඉධ පන, භික්ඛවෙ, භික්ඛුනා වස්සාවාසො පටිස්සුතො හොති පච්ඡිමිකාය. සො තං ආවාසං ගච්ඡන්තො බහිද්ධා උපොසථං කරොති, පාටිපදෙ විහාරං උපෙති, සෙනාසනං පඤ්ඤපෙති, පානීයං පරිභොජනීයං උපට්ඨාපෙති, පරිවෙණං සම්මජ්ජති. සො ද්වීහතීහං වසිත්වා සත්තාහකරණීයෙන පක්කමති. සො තං සත්තාහං අන්තො සන්නිවත්තං කරොති. තස්ස, භික්ඛවෙ, භික්ඛුනො පච්ඡිමිකා ච පඤ්ඤායති, පටිස්සවෙ ච අනාපත්ති.

ඉධ පන, භික්ඛවෙ, භික්ඛුනා වස්සාවාසො පටිස්සුතො හොති පච්ඡිමිකාය. සො තං ආවාසං ගච්ඡන්තො බහිද්ධා උපොසථං කරොති, පාටිපදෙ විහාරං උපෙති, සෙනාසනං පඤ්ඤපෙති, පානීයං පරිභොජනීයං උපට්ඨාපෙති, පරිවෙණං සම්මජ්ජති. සො සත්තාහං අනාගතාය කොමුදියා චාතුමාසිනියා සකරණීයො පක්කමති. ආගච්ඡෙය්ය වා සො, භික්ඛවෙ, භික්ඛු තං ආවාසං න වා ආගච්ඡෙය්ය, තස්ස, භික්ඛවෙ, භික්ඛුනො පච්ඡිමිකා ච පඤ්ඤායති, පටිස්සවෙ ච අනාපත්ති.

ඉධ පන, භික්ඛවෙ, භික්ඛුනා වස්සාවාසො පටිස්සුතො හොති පච්ඡිමිකාය. සො තං ආවාසං ගන්ත්වා උපොසථං කරොති, පාටිපදෙ විහාරං උපෙති, සෙනාසනං පඤ්ඤපෙති, පානීයං පරිභොජනීයං උපට්ඨාපෙති, පරිවෙණං සම්මජ්ජති. සො තදහෙව අකරණීයො පක්කමති. තස්ස, භික්ඛවෙ, භික්ඛුනො පච්ඡිමිකා ච න පඤ්ඤායති, පටිස්සවෙ ච ආපත්ති දුක්කටස්ස.

ඉධ පන, භික්ඛවෙ, භික්ඛුනා වස්සාවාසො පටිස්සුතො හොති පච්ඡිමිකාය. සො තං ආවාසං ගන්ත්වා උපොසථං කරොති, පාටිපදෙ විහාරං උපෙති, සෙනාසනං පඤ්ඤපෙති, පානීයං පරිභොජනීයං උපට්ඨාපෙති, පරිවෙණං සම්මජ්ජති. සො තදහෙව සකරණීයො පක්කමති…පෙ… සො ද්වීහතීහං වසිත්වා අකරණීයො පක්කමති …පෙ… සො ද්වීහතීහං වසිත්වා සකරණීයො පක්කමති…පෙ… සො ද්වීහතීහං වසිත්වා සත්තාහකරණීයෙන පක්කමති. සො තං සත්තාහං බහිද්ධා වීතිනාමෙති. තස්ස, භික්ඛවෙ, භික්ඛුනො පච්ඡිමිකා ච න පඤ්ඤායති, පටිස්සවෙ ච ආපත්ති දුක්කටස්ස…පෙ… සො ද්වීහතීහං වසිත්වා සත්තාහකරණීයෙන පක්කමති. සො තං සත්තාහං අන්තො සන්නිවත්තං කරොති. තස්ස භික්ඛවෙ, භික්ඛුනො පච්ඡිමිකා ච පඤ්ඤායති, පටිස්සවෙ ච අනාපත්ති.

ඉධ පන, භික්ඛවෙ, භික්ඛුනා වස්සාවාසො පටිස්සුතො හොති පච්ඡිමිකාය. සො තං ආවාසං ගන්ත්වා උපොසථං කරොති, පාටිපදෙ විහාරං උපෙති, සෙනාසනං පඤ්ඤපෙති, පානීයං පරිභොජනීයං උපට්ඨාපෙති, පරිවෙණං සම්මජ්ජති. සො සත්තාහං අනාගතාය කොමුදියා චාතුමාසිනියා සකරණීයො පක්කමති. ආගච්ඡෙය්ය වා සො, භික්ඛවෙ, භික්ඛු තං ආවාසං න වා ආගච්ඡෙය්ය, තස්ස, භික්ඛවෙ, භික්ඛුනො පච්ඡිමිකා ච පඤ්ඤායති, පටිස්සවෙ ච අනාපත්තීති.

පටිස්සවදුක්කටාපත්ති නිට්ඨිතා.

වස්සූපනායිකක්ඛන්ධකො තතියො.

119. තස්සුද්දානං

උපගන්තුං කදා චෙව, කති අන්තරාවස්ස ච;

න ඉච්ඡන්ති ච සඤ්චිච්ච, උක්කඩ්ඪිතුං උපාසකො.

ගිලානො මාතා ච පිතා, භාතා ච අථ ඤාතකො;

භික්ඛුගතිකො විහාරො, වාළා චාපි සරීසපා.

චොරො චෙව පිසාචා ච, දඩ්ඪා තදුභයෙන ච;

වූළ්හොදකෙන වුට්ඨාසි, බහුතරා ච දායකා.

ලූඛප්පණීතසප්පාය, භෙසජ්ජුපට්ඨකෙන ච;

ඉත්ථී වෙසී කුමාරී ච, පණ්ඩකො ඤාතකෙන ච.

රාජා චොරා ධුත්තා නිධි, භෙදඅට්ඨවිධෙන [භෙදා අට්ඨවිධෙන (සී. ස්යා.)] ච;

වජසත්ථා ච නාවා ච, සුසිරෙ විටභියා ච.

අජ්ඣොකාසෙ වස්සාවාසො, අසෙනාසනිකෙන ච;

ඡවකුටිකා ඡත්තෙ ච, චාටියා ච උපෙන්ති තෙ.

කතිකා පටිස්සුණිත්වා, බහිද්ධා ච උපොසථා;

පුරිමිකා පච්ඡිමිකා, යථාඤායෙන යොජයෙ.

අකරණී පක්කමති, සකරණී තථෙව ච;

ද්වීහතීහා ච පුන ච [ද්වීහතීහං වසිත්වාන (සී.)], සත්තාහකරණීයෙන ච.

සත්තාහනාගතා චෙව, ආගච්ඡෙය්ය න එය්ය වා;

වත්ථුද්දානෙ අන්තරිකා, තන්තිමග්ගං නිසාමයෙති.

ඉමම්හි ඛන්ධකෙ වත්ථූනි ද්වෙපණ්ණාස.

වස්සූපනායිකක්ඛන්ධකො නිට්ඨිතො.