📜

7. කථිනක්ඛන්ධකො

187. කථිනානුජානනා

306. තෙන සමයෙන බුද්ධො භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන තිංසමත්තා පාවෙය්යකා [පාඨෙය්යකා (සී. ස්යා.)] භික්ඛූ, සබ්බෙ ආරඤ්ඤිකා සබ්බෙ පිණ්ඩපාතිකා සබ්බෙ පංසුකූලිකා සබ්බෙ තෙචීවරිකා සාවත්ථිං ආගච්ඡන්තා භගවන්තං දස්සනාය උපකට්ඨාය වස්සූපනායිකාය නාසක්ඛිංසු සාවත්ථියං වස්සූපනායිකං සම්භාවෙතුං; අන්තරාමග්ගෙ සාකෙතෙ වස්සං උපගච්ඡිංසු. තෙ උක්කණ්ඨිතරූපා වස්සං වසිංසු – ආසන්නෙව නො භගවා විහරති ඉතො ඡසු යොජනෙසු, න ච මයං ලභාම භගවන්තං දස්සනායාති. අථ ඛො තෙ භික්ඛූ වස්සංවුට්ඨා, තෙමාසච්චයෙන කතාය පවාරණාය, දෙවෙ වස්සන්තෙ, උදකසඞ්ගහෙ උදකචික්ඛල්ලෙ ඔකපුණ්ණෙහි චීවරෙහි කිලන්තරූපා යෙන සාවත්ථි ජෙතවනං අනාථපිණ්ඩිකස්ස ආරාමො, යෙන භගවා තෙනුපසඞ්කමිංසු; උපසඞ්කමිත්වා භගවන්තං අභිවාදෙත්වා එකමන්තං නිසීදිංසු. ආචිණ්ණං ඛො පනෙතං බුද්ධානං භගවන්තානං ආගන්තුකෙහි භික්ඛූහි සද්ධිං පටිසම්මොදිතුං. අථ ඛො භගවා තෙ භික්ඛූ එතදවොච – ‘‘කච්චි, භික්ඛවෙ, ඛමනීයං, කච්චි යාපනීයං, කච්චි සමග්ගා සම්මොදමානා අවිවදමානා ඵාසුකං වස්සං වසිත්ථ, න ච පිණ්ඩකෙන කිලමිත්ථා’’ති? ‘‘ඛමනීයං, භගවා; යාපනීයං, භගවා; සමග්ගා ච මයං, භන්තෙ, සම්මොදමානා අවිවදමානා වස්සං වසිම්හා, න ච පිණ්ඩකෙන කිලමිම්හා . ඉධ මයං, භන්තෙ, තිංසමත්තා පාවෙය්යකා භික්ඛූ සාවත්ථිං ආගච්ඡන්තා භගවන්තං දස්සනාය උපකට්ඨාය වස්සූපනායිකාය නාසක්ඛිම්හා සාවත්ථියං වස්සූපනායිකං සම්භාවෙතුං, අන්තරාමග්ගෙ සාකෙතෙ වස්සං උපගච්ඡිම්හා. තෙ මයං, භන්තෙ, උක්කණ්ඨිතරූපා වස්සං වසිම්හා – ‘ආසන්නෙව නො භගවා විහරති ඉතො ඡසු යොජනෙසු, න ච මයං ලභාම භගවන්තං දස්සනායා’ති. අථ ඛො මයං, භන්තෙ, වස්සංවුට්ඨා, තෙමාසච්චයෙන කතාය පවාරණාය, දෙවෙ වස්සන්තෙ, උදකසඞ්ගහෙ උදකචික්ඛල්ලෙ ඔකපුණ්ණෙහි චීවරෙහි කිලන්තරූපා අද්ධානං ආගතාති. අථ ඛො භගවා එතස්මිං නිදානෙ එතස්මිං පකරණෙ ධම්මිං කථං කත්වා භික්ඛූ ආමන්තෙසි – ‘‘අනුජානාමි, භික්ඛවෙ, වස්සංවුට්ඨානං භික්ඛූනං කථිනං [කඨිනං (සී. ස්යා.)] අත්ථරිතුං. අත්ථතකථිනානං වො, භික්ඛවෙ, පඤ්ච කප්පිස්සන්ති – අනාමන්තචාරො, අසමාදානචාරො, ගණභොජනං, යාවදත්ථචීවරං, යො ච තත්ථ චීවරුප්පාදො සො නෙසං භවිස්සතීති. අත්ථතකථිනානං වො, භික්ඛවෙ, ඉමානි පඤ්ච කප්පිස්සන්ති. එවඤ්ච පන, භික්ඛවෙ, කථිනං අත්ථරිතබ්බං. බ්යත්තෙන භික්ඛුනා පටිබලෙන සඞ්ඝො ඤාපෙතබ්බො –

307. ‘‘සුණාතු මෙ, භන්තෙ, සඞ්ඝො. ඉදං සඞ්ඝස්ස කථිනදුස්සං උප්පන්නං. යදි සඞ්ඝස්ස පත්තකල්ලං, සඞ්ඝො ඉමං කථිනදුස්සං ඉත්ථන්නාමස්ස භික්ඛුනො දදෙය්ය කථිනං අත්ථරිතුං. එසා ඤත්ති.

‘‘සුණාතු මෙ, භන්තෙ, සඞ්ඝො. ඉදං සඞ්ඝස්ස කථිනදුස්සං උප්පන්නං. සඞ්ඝො ඉමං කථිනදුස්සං ඉත්ථන්නාමස්ස භික්ඛුනො දෙති කථිනං අත්ථරිතුං. යස්සායස්මතො ඛමති ඉමස්ස කථිනදුස්සස්ස ඉත්ථන්නාමස්ස භික්ඛුනො දානං කථිනං අත්ථරිතුං, සො තුණ්හස්ස; යස්ස නක්ඛමති, සො භාසෙය්ය.

‘‘දින්නං ඉදං සඞ්ඝෙන කථිනදුස්සං ඉත්ථන්නාමස්ස භික්ඛුනො කථිනං අත්ථරිතුං. ඛමති සඞ්ඝස්ස, තස්මා තුණ්හී, එවමෙතං ධාරයාමී’’ති.

308. ‘‘එවං ඛො, භික්ඛවෙ, අත්ථතං හොති කථිනං, එවං අනත්ථතං. කථඤ්ච පන, භික්ඛවෙ, අනත්ථතං හොති කථිනං? න උල්ලිඛිතමත්තෙන අත්ථතං හොති කථිනං, න ධොවනමත්තෙන අත්ථතං හොති කථිනං, න චීවරවිචාරණමත්තෙන [න ගණ්ටුසකරණමත්තෙන (ක.)] අත්ථතං හොති කථිනං, න ඡෙදනමත්තෙන අත්ථතං හොති කථිනං, න බන්ධනමත්තෙන අත්ථතං හොති කථිනං, න ඔවට්ටියකරණමත්තෙන [න ඔවට්ටෙය්යකරණමත්තෙන (සී. ස්යා.), න ඔවදෙය්යකරණමත්තෙන (ක.)] අත්ථතං හොති කථිනං, න කණ්ඩුසකරණමත්තෙන අත්ථතං හොති කථිනං, න දළ්හීකම්මකරණමත්තෙන අත්ථතං හොති කථිනං, න අනුවාතකරණමත්තෙන අත්ථතං හොති කථිනං, න පරිභණ්ඩකරණමත්තෙන අත්ථතං හොති කථිනං, න ඔවද්ධෙය්යකරණමත්තෙන අත්ථතං හොති කථිනං, න කම්බලමද්දනමත්තෙන අත්ථතං හොති කථිනං, න නිමිත්තකතෙන අත්ථතං හොති කථිනං, න පරිකථාකතෙන අත්ථතං හොති කථිනං, න කුක්කුකතෙන අත්ථතං හොති කථිනං, න සන්නිධිකතෙන අත්ථතං හොති කථිනං, න නිස්සග්ගියෙන අත්ථතං හොති කථිනං, න අකප්පකතෙන අත්ථතං හොති කථිනං , න අඤ්ඤත්ර සඞ්ඝාටියා අත්ථතං හොති කථිනං, න අඤ්ඤත්ර උත්තරාසඞ්ගෙන අත්ථතං හොති කථිනං, න අඤ්ඤත්ර අන්තරවාසකෙන අත්ථතං හොති කථිනං, න අඤ්ඤත්ර පඤ්චකෙන වා අතිරෙකපඤ්චකෙන වා තදහෙව සඤ්ඡින්නෙන සමණ්ඩලීකතෙන අත්ථතං හොති කථිනං, න අඤ්ඤත්ර පුග්ගලස්ස අත්ථාරා අත්ථතං හොති කථිනං; සම්මා චෙව අත්ථතං හොති කථිනං, තඤ්චෙ නිස්සීමට්ඨො අනුමොදති, එවම්පි අනත්ථතං හොති කථිනං. එවං ඛො, භික්ඛවෙ, අනත්ථතං හොති කථිනං.

309. ‘‘කථඤ්ච, භික්ඛවෙ, අත්ථතං හොති කථිනං? අහතෙන අත්ථතං හොති කථිනං, අහතකප්පෙන අත්ථතං හොති කථිනං, පිලොතිකාය අත්ථතං හොති කථිනං, පංසුකූලෙන අත්ථතං හොති කථිනං, පාපණිකෙන අත්ථතං හොති කථිනං, අනිමිත්තකතෙන අත්ථතං හොති කථිනං, අපරිකථාකතෙන අත්ථතං හොති කථිනං, අකුක්කුකතෙන අත්ථතං හොති කථිනං, අසන්නිධිකතෙන අත්ථතං හොති කථිනං, අනිස්සග්ගියෙන අත්ථතං හොති කථිනං, කප්පකතෙන අත්ථතං හොති කථිනං, සඞ්ඝාටියා අත්ථතං හොති කථිනං, උත්තරාසඞ්ගෙන අත්ථතං හොති කථිනං, අන්තරවාසකෙන අත්ථතං හොති කථිනං, පඤ්චකෙන වා අතිරෙකපඤ්චකෙන වා තදහෙව සඤ්ඡින්නෙන සමණ්ඩලීකතෙන අත්ථතං හොති කථිනං, පුග්ගලස්ස අත්ථාරා අත්ථතං හොති කථිනං; සම්මා චෙ අත්ථතං හොති කථිනං, තඤ්චෙ සීමට්ඨො අනුමොදති, එවම්පි අත්ථතං හොති කථිනං . එවං ඛො, භික්ඛවෙ, අත්ථතං හොති කථිනං.

310. ‘‘කථඤ්ච, භික්ඛවෙ, උබ්භතං හොති කථිනං? අට්ඨිමා, භික්ඛවෙ, මාතිකා කථිනස්ස උබ්භාරාය – පක්කමනන්තිකා, නිට්ඨානන්තිකා, සන්නිට්ඨානන්තිකා, නාසනන්තිකා, සවනන්තිකා, ආසාවච්ඡෙදිකා, සීමාතික්කන්තිකා, සහුබ්භාරා’’ති [සඋබ්භාරාති (ක.)].

කථිනානුජානනා නිට්ඨිතා.

188. ආදායසත්තකං

311. භික්ඛු අත්ථතකථිනො කතචීවරං ආදාය පක්කමති – ‘‘න පච්චෙස්ස’’න්ති. තස්ස භික්ඛුනො පක්කමනන්තිකො කථිනුද්ධාරො.

භික්ඛු අත්ථතකථිනො චීවරං ආදාය පක්කමති. තස්ස බහිසීමගතස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස භික්ඛුනො නිට්ඨානන්තිකො කථිනුද්ධාරො.

භික්ඛු අත්ථතකථිනො චීවරං ආදාය පක්කමති. තස්ස බහිසීමගතස්ස එවං හොති – ‘‘නෙවිමං චීවරං කාරෙස්සං, න පච්චෙස්ස’’න්ති. තස්ස භික්ඛුනො සන්නිට්ඨානන්තිකො කථිනුද්ධාරො.

භික්ඛු අත්ථතකථිනො චීවරං ආදාය පක්කමති. තස්ස බහිසීමගතස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස තං චීවරං කයිරමානං නස්සති. තස්ස භික්ඛුනො නාසනන්තිකො කථිනුද්ධාරො.

භික්ඛු අත්ථතකථිනො චීවරං ආදාය පක්කමති – ‘‘පච්චෙස්ස’’න්ති. සො බහිසීමගතො තං චීවරං කාරෙති. සො කතචීවරො සුණාති ‘‘උබ්භතං කිර තස්මිං ආවාසෙ කථින’’න්ති. තස්ස භික්ඛුනො සවනන්තිකො කථිනුද්ධාරො.

භික්ඛු අත්ථතකථිනො චීවරං ආදාය පක්කමති – ‘‘පච්චෙස්ස’’න්ති . සො බහිසීමගතො තං චීවරං කාරෙති. සො කතචීවරො – ‘‘පච්චෙස්සං පච්චෙස්ස’’න්ති – බහිද්ධා කථිනුද්ධාරං වීතිනාමෙති. තස්ස භික්ඛුනො සීමාතික්කන්තිකො කථිනුද්ධාරො.

භික්ඛු අත්ථතකථිනො චීවරං ආදාය පක්කමති – ‘‘පච්චෙස්ස’’න්ති. සො බහිසීමගතො තං චීවරං කාරෙති. සො කතචීවරො – ‘‘පච්චෙස්සං පච්චෙස්ස’’න්ති – සම්භුණාති කථිනුද්ධාරං. තස්ස භික්ඛුනො සහ භික්ඛූහි කථිනුද්ධාරො.

ආදායසත්තකං නිට්ඨිතං […දුතියං නිට්ඨිතං (ක.)].

189. සමාදායසත්තකං

312. භික්ඛු අත්ථතකථිනො කතචීවරං සමාදාය පක්කමති ‘‘න පච්චෙස්ස’’න්ති. තස්ස භික්ඛුනො පක්කමනන්තිකො කථිනුද්ධාරො.

භික්ඛු අත්ථතකථිනො චීවරං සමාදාය පක්කමති. තස්ස බහිසීමගතස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස භික්ඛුනො නිට්ඨානන්තිකො කථිනුද්ධාරො.

භික්ඛු අත්ථතකථිනො චීවරං සමාදාය පක්කමති. තස්ස බහිසීමගතස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. තස්ස භික්ඛුනො සන්නිට්ඨානන්තිකො කථිනුද්ධාරො.

භික්ඛු අත්ථතකථිනො චීවරං සමාදාය පක්කමති. තස්ස බහිසීමගතස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස තං චීවරං කයිරමානං නස්සති. තස්ස භික්ඛුනො නාසනන්තිකො කථිනුද්ධාරො.

භික්ඛු අත්ථතකථිනො චීවරං සමාදාය පක්කමති – ‘‘පච්චෙස්ස’’න්ති. සො බහිසීමගතො තං චීවරං කාරෙති. සො කතචීවරො සුණාති – ‘‘උබ්භතං කිර තස්මිං ආවාසෙ කථින’’න්ති. තස්ස භික්ඛුනො සවනන්තිකො කථිනුද්ධාරො.

භික්ඛු අත්ථතකථිනො චීවරං සමාදාය පක්කමති – ‘‘පච්චෙස්ස’’න්ති. සො බහිසීමගතො තං චීවරං කාරෙති. සො කතචීවරො – ‘‘පච්චෙස්සං පච්චෙස්ස’’න්ති – බහිද්ධා කථිනුද්ධාරං වීතිනාමෙති. තස්ස භික්ඛුනො සීමාතික්කන්තිකො කථිනුද්ධාරො.

භික්ඛු අත්ථතකථිනො චීවරං සමාදාය පක්කමති – ‘‘පච්චෙස්ස’’න්ති. සො බහිසීමගතො තං චීවරං කාරෙති. සො කතචීවරො – ‘‘පච්චෙස්සං පච්චෙස්ස’’න්ති – සම්භුණාති කථිනුද්ධාරං. තස්ස භික්ඛුනො සහ භික්ඛූහි කථිනුද්ධාරො.

සමාදායසත්තකං නිට්ඨිතං.

190. ආදායඡක්කං

313. භික්ඛු අත්ථතකථිනො විප්පකතචීවරං ආදාය පක්කමති. තස්ස බහිසීමගතස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස භික්ඛුනො නිට්ඨානන්තිකො කථිනුද්ධාරො.

භික්ඛු අත්ථතකථිනො විප්පකතචීවරං ආදාය පක්කමති. තස්ස බහිසීමගතස්ස එවං හොති – ‘‘නෙවිමං චීවරං කාරෙස්සං, න පච්චෙස්ස’’න්ති. තස්ස භික්ඛුනො සන්නිට්ඨානන්තිකො කථිනුද්ධාරො.

භික්ඛු අත්ථතකථිනො විප්පකතචීවරං ආදාය පක්කමති. තස්ස බහිසීමගතස්ස එවං හොති – ‘‘ඉධෙවිමං චීවරං කාරෙස්සං න පච්චෙස්ස’’න්ති. සො තං චීවරං කාරෙති. තස්සං තං චීවරං කයිරමානං නස්සති. තස්ස භික්ඛුනො නාසනන්තිකො කථිනුද්ධාරො.

භික්ඛු අත්ථතකථිනො විප්පකතචීවරං ආදාය පක්කමති ‘‘පච්චෙස්ස’’න්ති. සො බහිසීමගතො තං චීවරං කාරෙති. සො කතචීවරො සුණාති – ‘‘උබ්භතං කිර තස්මිං ආවාසෙ කථින’’න්ති. තස්ස භික්ඛුනො සවනන්තිකො කථිනුද්ධාරො.

භික්ඛු අත්ථතකථිනො විප්පකතචීවරං ආදාය පක්කමති ‘‘පච්චෙස්ස’’න්ති. සො බහිසීමගතො තං චීවරං කාරෙති. සො කතචීවරො ‘‘පච්චෙස්සං පච්චෙස්ස’’න්ති බහිද්ධා කථිනුද්ධාරං වීතිනාමෙති. තස්ස භික්ඛුනො සීමාතික්කන්තිකො කථිනුද්ධාරො.

භික්ඛු අත්ථතකථිනො විප්පකතචීවරං ආදාය පක්කමති ‘‘පච්චෙස්ස’’න්ති. සො බහිසීමගතො තං චීවරං කාරෙති. සො කතචීවරො ‘‘පච්චෙස්සං පච්චෙස්ස’’න්ති සම්භුණාති කථිනුද්ධාරං. තස්ස භික්ඛුනො සහ භික්ඛූහි කථිනුද්ධාරො.

ආදායඡක්කං නිට්ඨිතං.

191. සමාදායඡක්කං

314. භික්ඛු අත්ථතකථිනො විප්පකතචීවරං සමාදාය පක්කමති. තස්ස බහිසීමගතස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස භික්ඛුනො නිට්ඨානන්තිකො කථිනුද්ධාරො.

භික්ඛු අත්ථතකථිනො විප්පකතචීවරං සමාදාය පක්කමති. තස්ස බහිසීමගතස්ස එවං හොති – ‘‘නෙවිමං චීවරං කාරෙස්සං, න පච්චෙස්ස’’න්ති. තස්ස භික්ඛුනො සන්නිට්ඨානන්තිකො කථිනුද්ධාරො.

භික්ඛු අත්ථතකථිනො විප්පකතචීවරං සමාදාය පක්කමති. තස්ස බහිසීමගතස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස තං චීවරං කයිරමානං නස්සති. තස්ස භික්ඛුනො නාසනන්තිකො කථිනුද්ධාරො.

භික්ඛු අත්ථතකථිනො විප්පකතචීවරං සමාදාය පක්කමති ‘‘පච්චෙස්ස’’න්ති. සො බහිසීමගතො තං චීවරං කාරෙති. සො කතචීවරො සුණාති – ‘‘උබ්භතං කිර තස්මිං ආවාසෙ කථින’’න්ති. තස්ස භික්ඛුනො සවනන්තිකො කථිනුද්ධාරො.

භික්ඛු අත්ථතකථිනො විප්පකතචීවරං සමාදාය පක්කමති ‘‘පච්චෙස්ස’’න්ති. සො බහිසීමගතො තං චීවරං කාරෙති. සො කතචීවරො ‘‘පච්චෙස්සං පච්චෙස්ස’’න්ති බහිද්ධා කථිනුද්ධාරං වීතිනාමෙති. තස්ස භික්ඛුනො සීමාතික්කන්තිකො කථිනුද්ධාරො.

භික්ඛු අත්ථතකථිනො විප්පකතචීවරං සමාදාය පක්කමති ‘‘පච්චෙස්ස’’න්ති. සො බහිසීමගතො තං චීවරං කාරෙති. සො කතචීවරො ‘‘පච්චෙස්සං පච්චෙස්ස’’න්ති සම්භුණාති කථිනුද්ධාරං. තස්ස භික්ඛුනො සහ භික්ඛූහි කථිනුද්ධාරො.

සමාදායඡක්කං නිට්ඨිතං.

192. ආදායපන්නරසකං

315. භික්ඛු අත්ථතකථිනො චීවරං ආදාය පක්කමති. තස්ස බහිසීමගතස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස භික්ඛුනො නිට්ඨානන්තිකො කථිනුද්ධාරො.

භික්ඛු අත්ථතකථිනො චීවරං ආදාය පක්කමති. තස්ස බහිසීමගතස්ස එවං හොති – ‘‘නෙවිමං චීවරං කාරෙස්සං, න පච්චෙස්ස’’න්ති. තස්ස භික්ඛුනො සන්නිට්ඨානන්තිකො කථිනුද්ධාරො.

භික්ඛු අත්ථතකථිනො චීවරං ආදාය පක්කමති. තස්ස බහිසීමගතස්ස එවං හොති –

‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස තං චීවරං කයිරමානං නස්සති. තස්ස භික්ඛුනො නාසනන්තිකො කථිනුද්ධාරො.

තිකං.

භික්ඛු අත්ථතකථිනො චීවරං ආදාය පක්කමති ‘‘න පච්චෙස්ස’’න්ති. තස්ස බහිසීමගතස්ස එවං හොති – ‘‘ඉධෙවිමං චීවරං කාරෙස්ස’’න්ති. සො තං චීවරං කාරෙති. තස්ස භික්ඛුනො නිට්ඨානන්තිකො කථිනුද්ධාරො.

භික්ඛු අත්ථතකථිනො චීවරං ආදාය පක්කමති ‘‘න පච්චෙස්ස’’න්ති. තස්ස බහිසීමගතස්ස එවං හොති – ‘‘නෙවිමං චීවරං කාරෙස්ස’’න්ති. තස්ස භික්ඛුනො සන්නිට්ඨානන්තිකො කථිනුද්ධාරො.

භික්ඛු අත්ථතකථිනො චීවරං ආදාය පක්කමති ‘‘න පච්චෙස්ස’’න්ති. තස්ස බහිසීමගතස්ස එවං හොති – ‘‘ඉධෙවිමං චීවරං කාරෙස්ස’’න්ති . සො තං චීවරං කාරෙති. තස්ස තං චීවරං කයිරමානං නස්සති. තස්ස භික්ඛුනො නාසනන්තිකො කථිනුද්ධාරො.

තිකං.

භික්ඛු අත්ථතකථිනො චීවරං ආදාය පක්කමති අනධිට්ඨිතෙන; නෙවස්ස හොති ‘‘පච්චෙස්ස’’න්ති, න පනස්ස හොති ‘‘න පච්චෙස්ස’’න්ති. තස්ස බහිසීමගතස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස භික්ඛුනො නිට්ඨානන්තිකො කථිනුද්ධාරො.

භික්ඛු අත්ථතකථිනො චීවරං ආදාය පක්කමති අනධිට්ඨිතෙන; නෙවස්ස හොති ‘‘පච්චෙස්ස’’න්ති, න පනස්ස හොති ‘‘න පච්චෙස්ස’’න්ති. තස්ස බහිසීමගතස්ස එවං හොති – ‘‘නෙවිමං චීවරං කාරෙස්සං, න පච්චෙස්ස’’න්ති. තස්ස භික්ඛුනො සන්නිට්ඨානන්තිකො කථිනුද්ධාරො.

භික්ඛු අත්ථතකථිනො චීවරං ආදාය පක්කමති අනධිට්ඨිතෙන; නෙවස්ස හොති ‘‘පච්චෙස්ස’’න්ති, න පනස්ස හොති ‘‘න පච්චෙස්ස’’න්ති . තස්ස බහිසීමගතස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස තං චීවරං කයිරමානං නස්සති. තස්ස භික්ඛුනො නාසනන්තිකො කථිනුද්ධාරො.

තිකං.

භික්ඛු අත්ථතකථිනො චීවරං ආදාය පක්කමති ‘‘පච්චෙස්ස’’න්ති. තස්ස බහිසීමගතස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස භික්ඛුනො නිට්ඨානන්තිකො කථිනුද්ධාරො.

භික්ඛු අත්ථතකථිනො චීවරං ආදාය පක්කමති ‘‘පච්චෙස්ස’’න්ති. තස්ස බහිසීමගතස්ස එවං හොති – ‘‘නෙවිමං චීවරං කාරෙස්සං, න පච්චෙස්ස’’න්ති. තස්ස භික්ඛුනො සන්නිට්ඨානන්තිකො කථිනුද්ධාරො.

භික්ඛු අත්ථතකථිනො චීවරං ආදාය පක්කමති ‘‘පච්චෙස්ස’’න්ති. තස්ස බහිසීමගතස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස තං චීවරං කයිරමානං නස්සති. තස්ස භික්ඛුනො නාසනන්තිකො කථිනුද්ධාරො.

භික්ඛු අත්ථතකථිනො චීවරං ආදාය පක්කමති ‘‘පච්චෙස්ස’’න්ති. සො බහිසීමගතො තං චීවරං කාරෙති. සො කතචීවරො සුණාති – ‘‘උබ්භතං කිර තස්මිං ආවාසෙ කථින’’න්ති. තස්ස භික්ඛුනො සවනන්තිකො කථිනුද්ධාරො.

භික්ඛු අත්ථතකථිනො චීවරං ආදාය පක්කමති ‘‘පච්චෙස්ස’’න්ති. සො බහිසීමගතො තං චීවරං කාරෙති. සො කතචීවරො ‘‘පච්චෙස්සං පච්චෙස්ස’’න්ති – බහිද්ධා කථිනුද්ධාරං වීතිනාමෙති. තස්ස භික්ඛුනො සීමාතික්කන්තිකො කථිනුද්ධාරො.

භික්ඛු අත්ථතකථිනො චීවරං ආදාය පක්කමති ‘‘පච්චෙස්ස’’න්ති. සො බහිසීමගතො තං චීවරං කාරෙති. සො කතචීවරො – ‘‘පච්චෙස්සං පච්චෙස්ස’’න්ති සම්භුණාති කථිනුද්ධාරං. තස්ස භික්ඛුනො සහ භික්ඛූහි කථිනුද්ධාරො.

ඡක්කං.

ආදායපන්නරසකං නිට්ඨිතං.

193. සමාදායපන්නරසකාදි

316. භික්ඛු අත්ථතකථිනො චීවරං සමාදාය පක්කමති…පෙ….

(ආදායවාරසදිසං එවං විත්ථාරෙතබ්බං.)

භික්ඛු අත්ථතකථිනො විප්පකතචීවරං ආදාය පක්කමති. තස්ස බහිසීමගතස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස භික්ඛුනො නිට්ඨානන්තිකො කථිනුද්ධාරො…පෙ….

(සමාදායවාරසදිසං එවං විත්ථාරෙතබ්බං.)

සමාදායපන්නරසකාදි නිට්ඨිතා.

194. විප්පකතසමාදායපන්නරසකං

317. භික්ඛු අත්ථතකථිනො විප්පකතචීවරං සමාදාය පක්කමති. තස්ස බහිසීමගතස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස භික්ඛුනො නිට්ඨානන්තිකො කථිනුද්ධාරො.

භික්ඛු අත්ථතකථිනො විප්පකතචීවරං සමාදාය පක්කමති. තස්ස බහිසීමගතස්ස එවං හොති – ‘‘නෙවිමං චීවරං කාරෙස්සං, න පච්චෙස්ස’’න්ති. තස්ස භික්ඛුනො සන්නිට්ඨානන්තිකො කථිනුද්ධාරො.

භික්ඛු අත්ථතකථිනො විප්පකතචීවරං සමාදාය පක්කමති. තස්ස බහිසීමගතස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස තං චීවරං කයිරමානං නස්සති. තස්ස භික්ඛුනො නාසනන්තිකො කථිනුද්ධාරො.

තිකං.

භික්ඛු අත්ථතකථිනො විප්පකතචීවරං සමාදාය පක්කමති ‘‘න පච්චෙස්ස’’න්ති. තස්ස බහිසීමගතස්ස එවං හොති – ‘‘ඉධෙවිමං චීවරං කාරෙස්ස’’න්ති. සො තං චීවරං කාරෙති. තස්ස භික්ඛුනො නිට්ඨානන්තිකො කථිනුද්ධාරො.

භික්ඛු අත්ථතකථිනො විප්පකතචීවරං සමාදාය පක්කමති ‘‘න පච්චෙස්ස’’න්ති. තස්ස බහිසීමගතස්ස එවං හොති – ‘‘නෙවිමං චීවරං කාරෙස්ස’’න්ති. තස්ස භික්ඛුනො සන්නිට්ඨානන්තිකො කථිනුද්ධාරො.

භික්ඛු අත්ථතකථිනො විප්පකතචීවරං සමාදාය පක්කමති ‘‘න පච්චෙස්ස’’න්ති. තස්ස බහිසීමගතස්ස එවං හොති – ‘‘ඉධෙවිමං චීවරං කාරෙස්ස’’න්ති. සො තං චීවරං කාරෙති. තස්ස තං චීවරං කයිරමානං නස්සති. තස්ස භික්ඛුනො නාසනන්තිකො කථිනුද්ධාරො.

තිකං.

භික්ඛු අත්ථතකථිනො විප්පකතචීවරං සමාදාය පක්කමති අනධිට්ඨිතෙන; නෙවස්ස හොති – ‘‘පච්චෙස්ස’’න්ති, න පනස්ස හොති – ‘‘න පච්චෙස්ස’’න්ති. තස්ස බහිසීමගතස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස භික්ඛුනො නිට්ඨානන්තිකො කථිනුද්ධාරො.

භික්ඛු අත්ථතකථිනො විප්පකතචීවරං සමාදාය පක්කමති අනධිට්ඨිතෙන; නෙවස්ස හොති – ‘‘පච්චෙස්ස’’න්ති, න පනස්ස හොති – ‘‘න පච්චෙස්ස’’න්ති. තස්ස බහිසීමගතස්ස එවං හොති – ‘‘නෙවිමං චීවරං කාරෙස්සං, න පච්චෙස්ස’’න්ති. තස්ස භික්ඛුනො සන්නිට්ඨානන්තිකො කථිනුද්ධාරො.

භික්ඛු අත්ථතකථිනො විප්පකතචීවරං සමාදාය පක්කමති අනධිට්ඨිතෙන; නෙවස්ස හොති – ‘‘පච්චෙස්ස’’න්ති, න පනස්ස හොති – ‘‘න පච්චෙස්ස’’න්ති. තස්ස බහිසීමගතස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස තං චීවරං කයිරමානං නස්සති. තස්ස භික්ඛුනො නාසනන්තිකො කථිනුද්ධාරො.

තිකං.

භික්ඛු අත්ථතකථිනො විප්පකතචීවරං සමාදාය පක්කමති ‘‘පච්චෙස්ස’’න්ති. තස්ස බහිසීමගතස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස භික්ඛුනො නිට්ඨානන්තිකො කථිනුද්ධාරො.

භික්ඛු අත්ථතකථිනො විප්පකතචීවරං සමාදාය පක්කමති ‘‘පච්චෙස්ස’’න්ති. තස්ස බහිසීමගතස්ස එවං හොති – ‘‘නෙවිමං චීවරං කාරෙස්සං, න පච්චෙස්ස’’න්ති. තස්ස භික්ඛුනො සන්නිට්ඨානන්තිකො කථිනුද්ධාරො.

භික්ඛු අත්ථතකථිනො විප්පකතචීවරං සමාදාය පක්කමති ‘‘පච්චෙස්ස’’න්ති. තස්ස බහිසීමගතස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති . සො තං චීවරං කාරෙති. තස්ස තං චීවරං කයිරමානං නස්සති. තස්ස භික්ඛුනො නාසනන්තිකො කථිනුද්ධාරො.

භික්ඛු අත්ථතකථිනො විප්පකතචීවරං සමාදාය පක්කමති ‘‘පච්චෙස්ස’’න්ති. සො බහිසීමගතො තං චීවරං කාරෙති. සො කතචීවරො සුණාති – ‘‘උබ්භතං කිර තස්මිං ආවාසෙ කථින’’න්ති. තස්ස භික්ඛුනො සවනන්තිකො කථිනුද්ධාරො.

භික්ඛු අත්ථතකථිනො විප්පකතචීවරං සමාදාය පක්කමති ‘‘පච්චෙස්ස’’න්ති. සො බහිසීමගතො තං චීවරං කාරෙති. සො කතචීවරො – ‘‘පච්චෙස්සං පච්චෙස්ස’’න්ති බහිද්ධා කථිනුද්ධාරං වීතිනාමෙති. තස්ස භික්ඛුනො සීමාතික්කන්තිකො කථිනුද්ධාරො.

භික්ඛු අත්ථතකථිනො විප්පකතචීවරං සමාදාය පක්කමති ‘‘පච්චෙස්ස’’න්ති. සො බහිසීමගතො තං චීවරං කාරෙති. සො කතචීවරො ‘‘පච්චෙස්සං පච්චෙස්ස’’න්ති සම්භුණාති කථිනුද්ධාරං. තස්ස භික්ඛුනො සහ භික්ඛූහි කථිනුද්ධාරො.

ඡක්කං.

විප්පකතසමාදායපන්නරසකං නිට්ඨිතං.

ආදායභාණවාරො.

195. අනාසාදොළසකං

318. භික්ඛු අත්ථතකථිනො චීවරාසාය පක්කමති. සො බහිසීමගතො තං චීවරාසං පයිරුපාසති. අනාසාය ලභති, ආසාය න ලභති. තස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස භික්ඛුනො නිට්ඨානන්තිකො කථිනුද්ධාරො.

භික්ඛු අත්ථතකථිනො චීවරාසාය පක්කමති. සො බහිසීමගතො තං චීවරාසං පයිරුපාසති. අනාසාය ලභති, ආසාය න ලභති. තස්ස එවං හොති – ‘‘නෙවිමං චීවරං කාරෙස්සං, න පච්චෙස්ස’’න්ති. තස්ස භික්ඛුනො සන්නිට්ඨානන්තිකො කථිනුද්ධාරො.

භික්ඛු අත්ථතකථිනො චීවරාසාය පක්කමති. සො බහිසීමගතො තං චීවරාසං පයිරුපාසති. අනාසාය ලභති, ආසාය න ලභති. තස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස තං චීවරං කයිරමානං නස්සති. තස්ස භික්ඛුනො නාසනන්තිකො කථිනුද්ධාරො.

භික්ඛු අත්ථතකථිනො චීවරාසාය පක්කමති. තස්ස බහිසීමගතස්ස එවං හොති – ‘‘ඉධෙවිමං චීවරාසං පයිරුපාසිස්සං, න පච්චෙස්ස’’න්ති. සො තං චීවරාසං පයිරුපාසති. තස්ස සා චීවරාසා උපච්ඡිජ්ජති . තස්ස භික්ඛුනො ආසාවච්ඡෙදිකො කථිනුද්ධාරො.

භික්ඛු අත්ථතකථිනො චීවරාසාය පක්කමති ‘‘න පච්චෙස්ස’’න්ති. සො බහිසීමගතො තං චීවරාසං පයිරුපාසති. අනාසාය ලභති, ආසාය න ලභති. තස්ස එවං හොති – ‘‘ඉධෙවිමං චීවරං කාරෙස්ස’’න්ති. සො තං චීවරං කාරෙති. තස්ස භික්ඛුනො නිට්ඨානන්තිකො කථිනුද්ධාරො.

භික්ඛු අත්ථතකථිනො චීවරාසාය පක්කමති ‘‘න පච්චෙස්ස’’න්ති. සො බහිසීමගතො තං චීවරාසං පයිරුපාසති. අනාසාය ලභති, ආසාය න ලභති. තස්ස එවං හොති – ‘‘නෙවිමං චීවරං කාරෙස්ස’’න්ති. තස්ස භික්ඛුනො සන්නිට්ඨානන්තිකො කථිනුද්ධාරො.

භික්ඛු අත්ථතකථිනො චීවරාසාය පක්කමති ‘‘න පච්චෙස්ස’’න්ති. සො බහිසීමගතො තං චීවරාසං පයිරුපාසති. අනාසාය ලභති, ආසාය න ලභති. තස්ස එවං හොති – ‘‘ඉධෙවිමං චීවරං කාරෙස්ස’’න්ති. සො තං චීවරං කාරෙති. තස්ස තං චීවරං කයිරමානං නස්සති. තස්ස භික්ඛුනො නාසනන්තිකො කථිනුද්ධාරො.

භික්ඛු අත්ථතකථිනො චීවරාසාය පක්කමති ‘‘න පච්චෙස්ස’’න්ති. තස්ස බහිසීමගතස්ස එවං හොති – ‘‘ඉධෙවිමං චීවරාසං පයිරුපාසිස්ස’’න්ති. සො තං චීවරාසං පයිරුපාසති . තස්ස සා චීවරාසා උපච්ඡිජ්ජති. තස්ස භික්ඛුනො ආසාවච්ඡෙදිකො කථිනුද්ධාරො.

භික්ඛු අත්ථතකථිනො චීවරාසාය පක්කමති අනධිට්ඨිතෙන; නෙවස්ස හොති – ‘‘පච්චෙස්සන්ති, න පනස්ස හොති – ‘‘න පච්චෙස්ස’’න්ති. සො බහිසීමගතො තං චීවරාසං පයිරුපාසති. අනාසාය ලභති, ආසාය න ලභති. තස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස භික්ඛුනො නිට්ඨානන්තිකො කථිනුද්ධාරො.

භික්ඛු අත්ථතකථිනො චීවරාසාය පක්කමති අනධිට්ඨිතෙන; නෙවස්ස හොති – ‘‘පච්චෙස්ස’’න්ති, න පනස්ස හොති – ‘‘න පච්චෙස්ස’’න්ති. සො බහිසීමගතො තං චීවරාසං පයිරුපාසති. අනාසාය ලභති, ආසාය න ලභති. තස්ස එවං හොති – ‘‘නෙවිමං චීවරං කාරෙස්සං, න පච්චෙස්ස’’න්ති. තස්ස භික්ඛුනො සන්නිට්ඨානන්තිකො කථිනුද්ධාරො.

භික්ඛු අත්ථතකථිනො චීවරාසාය පක්කමති අනධිට්ඨිතෙන; නෙවස්ස හොති – ‘‘පච්චෙස්ස’’න්ති, න පනස්ස හොති – ‘‘න පච්චෙස්ස’’න්ති. සො බහිසීමගතො තං චීවරාසං පයිරුපාසති. අනාසාය ලභති, ආසාය න ලභති. තස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස තං චීවරං කයිරමානං නස්සති. තස්ස භික්ඛුනො නාසනන්තිකො කථිනුද්ධාරො.

භික්ඛු අත්ථතකථිනො චීවරාසාය පක්කමති අනධිට්ඨිතෙන; නෙවස්ස හොති – ‘‘පච්චෙස්ස’’න්ති, න පනස්ස හොති – ‘‘න පච්චෙස්ස’’න්ති. තස්ස බහිසීමගතස්ස එවං හොති – ‘‘ඉධෙවිමං චීවරාසං පයිරුපාසිස්සං, න පච්චෙස්ස’’න්ති. සො තං චීවරාසං පයිරුපාසති. තස්ස සා චීවරාසා උපච්ඡිජ්ජති. තස්ස භික්ඛුනො ආසාවච්ඡෙදිකො කථිනුද්ධාරො.

අනාසාදොළසකං [අනාසාද්වාදසකං (සී.)] නිට්ඨිතං.

196. ආසාදොළසකං

319. භික්ඛු අත්ථතකථිනො චීවරාසාය පක්කමති ‘‘පච්චෙස්ස’’න්ති. සො බහිසීමගතො තං චීවරාසං පයිරුපාසති. ආසාය ලභති, අනාසාය න ලභති. තස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස භික්ඛුනො නිට්ඨානන්තිකො කථිනුද්ධාරො.

භික්ඛු අත්ථතකථිනො චීවරාසාය පක්කමති ‘‘පච්චෙස්ස’’න්ති. සො බහිසීමගතො තං චීවරාසං පයිරුපාසති. ආසාය ලභති, අනාසාය න ලභති. තස්ස එවං හොති – ‘‘නෙවිමං චීවරං කාරෙස්සං, න පච්චෙස්ස’’න්ති. තස්ස භික්ඛුනො සන්නිට්ඨානන්තිකො කථිනුද්ධාරො.

භික්ඛු අත්ථතකථිනො චීවරාසාය පක්කමති ‘‘පච්චෙස්ස’’න්ති. සො බහිසීමගතො තං චීවරාසං පයිරුපාසති. ආසාය ලභති, අනාසාය න ලභති. තස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස තං චීවරං කයිරමානං නස්සති. තස්ස භික්ඛුනො නාසනන්තිකො කථිනුද්ධාරො.

භික්ඛු අත්ථතකථිනො චීවරාසාය පක්කමති ‘‘පච්චෙස්ස’’න්ති. තස්ස බහිසීමගතස්ස එවං හොති – ‘‘ඉධෙවිමං චීවරාසං පයිරුපාසිස්සං, න පච්චෙස්ස’’න්ති. සො තං චීවරාසං පයිරුපාසති. තස්ස සා චීවරාසා උපච්ඡිජ්ජති. තස්ස භික්ඛුනො ආසාවච්ඡෙදිකො කථිනුද්ධාරො.

භික්ඛු අත්ථතකථිනො චීවරාසාය පක්කමති ‘‘පච්චෙස්ස’’න්ති. සො බහිසීමගතො සුණාති – ‘‘උබ්භතං කිර තස්මිං ආවාසෙ කථින’’න්ති. තස්ස එවං හොති – ‘‘යතො තස්මිං ආවාසෙ උබ්භතං කථිනං, ඉධෙවිමං චීවරාසං පයිරුපාසිස්ස’’න්ති. සො තං චීවරාසං පයිරුපාසති. ආසාය ලභති , අනාසාය න ලභති. තස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස භික්ඛුනො නිට්ඨානන්තිකො කථිනුද්ධාරො.

භික්ඛු අත්ථතකථිනො චීවරාසාය පක්කමති ‘‘පච්චෙස්ස’’න්ති. සො බහිසීමගතො සුණාති – ‘‘උබ්භතං කිර තස්මිං ආවාසෙ කථින’’න්ති. තස්ස එවං හොති – ‘‘යතො තස්මිං ආවාසෙ උබ්භතං කථිනං, ඉධෙවිමං චීවරාසං පයිරුපාසිස්ස’’න්ති. සො තං චීවරාසං පයිරුපාසති. ආසාය ලභති, අනාසාය න ලභති. තස්ස එවං හොති – ‘‘නෙවිමං චීවරං කාරෙස්සං, න පච්චෙස්ස’’න්ති. තස්ස භික්ඛුනො සන්නිට්ඨානන්තිකො කථිනුද්ධාරො.

භික්ඛු අත්ථතකථිනො චීවරාසාය පක්කමති ‘‘පච්චෙස්ස’’න්ති. සො බහිසීමගතො සුණාති – ‘‘උබ්භතං කිර තස්මිං ආවාසෙ කථින’’න්ති. තස්ස එවං හොති – ‘‘යතො තස්මිං ආවාසෙ උබ්භතං කථිනං, ඉධෙවිමං චීවරාසං පයිරුපාසිස්ස’’න්ති. සො තං චීවරාසං පයිරුපාසති. ආසාය ලභති, අනාසාය න ලභති. තස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස තං චීවරං කයිරමානං නස්සති. තස්ස භික්ඛුනො නාසනන්තිකො කථිනුද්ධාරො.

භික්ඛු අත්ථතකථිනො චීවරාසාය පක්කමති ‘‘පච්චෙස්ස’’න්ති. සො බහිසීමගතො සුණාති – ‘‘උබ්භතං කිර තස්මිං ආවාසෙ කථින’’න්ති. තස්ස එවං හොති – ‘‘යතො තස්මිං ආවාසෙ උබ්භතං කථිනං, ඉධෙවිමං චීවරාසං පයිරුපාසිස්සං, න පච්චෙස්ස’’න්ති. සො තං චීවරාසං පයිරුපාසති. තස්ස සා චීවරාසා උපච්ඡිජ්ජති. තස්ස භික්ඛුනො ආසාවච්ඡෙදිකො කථිනුද්ධාරො.

භික්ඛු අත්ථතකථිනො චීවරාසාය පක්කමති ‘‘පච්චෙස්ස’’න්ති. සො බහිසීමගතො තං චීවරාසං පයිරුපාසති. ආසාය ලභති, අනාසාය න ලභති. සො තං චීවරං කාරෙති. සො කතචීවරො සුණාති – ‘‘උබ්භතං කිර තස්මිං ආවාසෙ කථින’’න්ති. තස්ස භික්ඛුනො සවනන්තිකො කථිනුද්ධාරො.

භික්ඛු අත්ථතකථිනො චීවරාසාය පක්කමති ‘‘පච්චෙස්ස’’න්ති. තස්ස බහිසීමගතස්ස එවං හොති – ‘‘ඉධෙවිමං චීවරාසං පයිරුපාසිස්සං, න පච්චෙස්ස’’න්ති. සො තං චීවරාසං පයිරුපාසති. තස්ස සා චීවරාසා උපච්ඡිජ්ජති. තස්ස භික්ඛුනො ආසාවච්ඡෙදිකො කථිනුද්ධාරො.

භික්ඛු අත්ථතකථිනො චීවරාසාය පක්කමති ‘‘පච්චෙස්ස’’න්ති. සො බහිසීමගතො තං චීවරාසං පයිරුපාසති. ආසාය ලභති, අනාසාය න ලභති. සො තං චීවරං කාරෙති. සො කතචීවරො ‘‘පච්චෙස්සං පච්චෙස්ස’’න්ති – බහිද්ධා කථිනුද්ධාරං වීතිනාමෙති. තස්ස භික්ඛුනො සීමාතික්කන්තිකො කථිනුද්ධාරො.

භික්ඛු අත්ථතකථිනො චීවරාසාය පක්කමති ‘‘පච්චෙස්ස’’න්ති. සො බහිසීමගතො තං චීවරාසං පයිරුපාසති. ආසාය ලභති, අනාසාය න ලභති. සො තං චීවරං කාරෙති. සො කතචීවරො ‘‘පච්චෙස්සං පච්චෙස්ස’’න්ති – සම්භුණාති කථිනුද්ධාරං. තස්ස භික්ඛුනො සහ භික්ඛූහි කථිනුද්ධාරො.

ආසාදොළසකං නිට්ඨිතං.

197. කරණීයදොළසකං

320. භික්ඛු අත්ථතකථිනො කෙනචිදෙව කරණීයෙන පක්කමති. තස්ස බහිසීමගතස්ස චීවරාසා උප්පජ්ජති. සො තං චීවරාසං පයිරුපාසති. අනාසාය ලභති, ආසාය න ලභති. තස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස භික්ඛුනො නිට්ඨානන්තිකො කථිනුද්ධාරො.

භික්ඛු අත්ථතකථිනො කෙනචිදෙව කරණීයෙන පක්කමති. තස්ස බහිසීමගතස්ස චීවරාසා උප්පජ්ජති. සො තං චීවරාසං පයිරුපාසති. අනාසාය ලභති, ආසාය න ලභති. තස්ස එවං හොති – ‘‘නෙවිමං චීවරං කාරෙස්සං, න පච්චෙස්ස’’න්ති. තස්ස භික්ඛුනො සන්නිට්ඨානන්තිකො කථිනුද්ධාරො.

භික්ඛු අත්ථතකථිනො කෙනචිදෙව කරණීයෙන පක්කමති. තස්ස බහිසීමගතස්ස චීවරාසා උප්පජ්ජති. සො තං චීවරාසං පයිරුපාසති. අනාසාය ලභති, ආසාය න ලභති. තස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස තං චීවරං කයිරමානං නස්සති. තස්ස භික්ඛුනො නාසනන්තිකො කථිනුද්ධාරො.

භික්ඛු අත්ථතකථිනො කෙනචිදෙව කරණීයෙන පක්කමති. තස්ස බහිසීමගතස්ස චීවරාසා උප්පජ්ජති. තස්ස එවං හොති – ‘‘ඉධෙවිමං චීවරාසං පයිරුපාසිස්සං, න පච්චෙස්ස’’න්ති. සො තං චීවරාසං පයිරුපාසති. තස්ස සා චීවරාසා උපච්ඡිජ්ජති. තස්ස භික්ඛුනො ආසාවච්ඡෙදිකො කථිනුද්ධාරො.

භික්ඛු අත්ථතකථිනො කෙනචිදෙව කරණීයෙන පක්කමති ‘‘න පච්චෙස්ස’’න්ති. තස්ස බහිසීමගතස්ස චීවරාසා උප්පජ්ජති. සො තං චීවරාසං පයිරුපාසති. අනාසාය ලභති, ආසාය න ලභති. තස්ස එවං හොති – ‘‘ඉධෙවිමං චීවරං කාරෙස්ස’’න්ති. සො තං චීවරං කාරෙති. තස්ස භික්ඛුනො නිට්ඨානන්තිකො කථිනුද්ධාරො.

භික්ඛු අත්ථතකථිනො කෙනචිදෙව කරණීයෙන පක්කමති ‘‘න පච්චෙස්ස’’න්ති. තස්ස බහිසීමගතස්ස චීවරාසා උප්පජ්ජති. සො තං චීවරාසං පයිරුපාසති. අනාසාය ලභති, ආසාය න ලභති. තස්ස එවං හොති – ‘‘නෙවිමං චීවරං කාරෙස්ස’’න්ති. තස්ස භික්ඛුනො සන්නිට්ඨානන්තිකො කථිනුද්ධාරො.

භික්ඛු අත්ථතකථිනො කෙනචිදෙව කරණීයෙන පක්කමති ‘‘න පච්චෙස්ස’’න්ති. තස්ස බහිසීමගතස්ස චීවරාසා උප්පජ්ජති. සො තං චීවරාසං පයිරුපාසති. අනාසාය ලභති, ආසාය න ලභති. තස්ස එවං හොති – ‘‘ඉධෙවිමං චීවරං කාරෙස්ස’’න්ති. සො තං චීවරං කාරෙති. තස්ස තං චීවරං කයිරමානං නස්සති. තස්ස භික්ඛුනො නාසනන්තිකො කථිනුද්ධාරො.

භික්ඛු අත්ථතකථිනො කෙනචිදෙව කරණීයෙන පක්කමති ‘‘න පච්චෙස්ස’’න්ති. තස්ස බහිසීමගතස්ස චීවරාසා උප්පජ්ජති. තස්ස එවං හොති – ‘‘ඉධෙවිමං චීවරාසං පයිරුපාසිස්ස’’න්ති. සො තං චීවරාසං පයිරුපාසති. තස්ස සා චීවරාසා උපච්ඡිජ්ජති. තස්ස භික්ඛුනො ආසාවච්ඡෙදිකො කථිනුද්ධාරො.

භික්ඛු අත්ථතකථිනො කෙනචිදෙව කරණීයෙන පක්කමති අනධිට්ඨිතෙන; නෙවස්ස හොති – ‘‘පච්චෙස්ස’’න්ති, න පනස්ස හොති – ‘‘න පච්චෙස්ස’’න්ති. තස්ස බහිසීමගතස්ස චීවරාසා උප්පජ්ජති. සො තං චීවරාසං පයිරුපාසති. අනාසාය ලභති, ආසාය න ලභති. තස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස භික්ඛුනො නිට්ඨානන්තිකො කථිනුද්ධාරො.

භික්ඛු අත්ථතකථිනො කෙනචිදෙව කරණීයෙන පක්කමති අනධිට්ඨිතෙන; නෙවස්ස හොති – ‘‘පච්චෙස්ස’’න්ති, න පනස්ස හොති – ‘‘න පච්චෙස්ස’’න්ති. තස්ස බහිසීමගතස්ස චීවරාසා උප්පජ්ජති. සො තං චීවරාසං පයිරුපාසති. අනාසාය ලභති, ආසාය න ලභති. තස්ස එවං හොති – ‘‘නෙවිමං චීවරං කාරෙස්සං, න පච්චෙස්ස’’න්ති. තස්ස භික්ඛුනො සන්නිට්ඨානන්තිකො කථිනුද්ධාරො.

භික්ඛු අත්ථතකථිනො කෙනචිදෙව කරණීයෙන පක්කමති අනධිට්ඨිතෙන; නෙවස්ස හොති – ‘‘පච්චෙස්ස’’න්ති, න පනස්ස හොති – ‘‘න පච්චෙස්ස’’න්ති. තස්ස බහිසීමගතස්ස චීවරාසා උප්පජ්ජති. සො තං චීවරාසං පයිරුපාසති. අනාසාය ලභති, ආසාය න ලභති. තස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස තං චීවරං කයිරමානං නස්සති. තස්ස භික්ඛුනො නාසනන්තිකො කථිනුද්ධාරො.

භික්ඛු අත්ථතකථිනො කෙනචිදෙව කරණීයෙන පක්කමති අනධිට්ඨිතෙන; නෙවස්ස හොති – ‘‘පච්චෙස්ස’’න්ති, න පනස්ස හොති – ‘‘න පච්චෙස්ස’’න්ති. තස්ස බහිසීමගතස්ස චීවරාසා උප්පජ්ජති. තස්ස එවං හොති – ‘‘ඉධෙවිමං චීවරාසං පයිරුපාසිස්සං, න පච්චෙස්ස’’න්ති. සො තං චීවරාසං පයිරුපාසති. තස්ස සා චීවරාසා උපච්ඡිජ්ජති. තස්ස භික්ඛුනො ආසාවච්ඡෙදිකො කථිනුද්ධාරො.

කරණීයදොළසකං නිට්ඨිතං.

198. අපවිලායනනවකං

321. භික්ඛු අත්ථතකථිනො දිසංගමිකො පක්කමති චීවරපටිවීසං අපවිලායමානො [අපවිනයමානො (සී.), අපචිනයමානො (ක.)]. තමෙනං දිසඞ්ගතං භික්ඛූ පුච්ඡන්ති – ‘‘කහං ත්වං, ආවුසො, වස්සංවුට්ඨො, කත්ථ ච තෙ චීවරපටිවීසො’’ති? සො එවං වදෙති – ‘‘අමුකස්මිං ආවාසෙ වස්සංවුට්ඨොම්හි. තත්ථ ච මෙ චීවරපටිවීසො’’ති. තෙ එවං වදන්ති – ‘‘ගච්ඡාවුසො, තං චීවරං ආහර, මයං තෙ ඉධ චීවරං කරිස්සාමා’’ති. සො තං ආවාසං ගන්ත්වා භික්ඛූ පුච්ඡති – ‘‘කහං මෙ, ආවුසො, චීවරපටිවීසො’’ති? තෙ එවං වදන්ති – ‘‘අයං තෙ, ආවුසො, චීවරපටිවීසො; කහං ගමිස්සසී’’ති? සො එවං වදෙති – ‘‘අමුකං නාම [අමුකඤ්ච (ක.)] ආවාසං ගමිස්සාමි, තත්ථ මෙ භික්ඛූ චීවරං කරිස්සන්තී’’ති. තෙ එවං වදන්ති – ‘‘අලං, ආවුසො, මා අගමාසි. මයං තෙ ඉධ චීවරං කරිස්සාමා’’ති. තස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස භික්ඛුනො නිට්ඨානන්තිකො කථිනුද්ධාරො.

භික්ඛු අත්ථතකථිනො දිසංගමිකො පක්කමති…පෙ… ‘‘නෙවිමං චීවරං කාරෙස්සං, න පච්චෙස්ස’’න්ති. තස්ස භික්ඛුනො සන්නිට්ඨානන්තිකො කථිනුද්ධාරො.

භික්ඛු අත්ථතකථිනො දිසංගමිකො පක්කමති…පෙ… ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස තං චීවරං කයිරමානං නස්සති. තස්ස භික්ඛුනො නාසනන්තිකො කථිනුද්ධාරො.

322. භික්ඛු අත්ථතකථිනො දිසංගමිකො පක්කමති චීවරපටිවීසං අපවිලායමානො. තමෙනං දිසංගතං භික්ඛූ පුච්ඡන්ති – ‘‘කහං ත්වං, ආවුසො, වස්සංවුට්ඨො , කත්ථ ච තෙ චීවරපටිවීසො’’ති? සො එවං වදෙති – ‘‘අමුකස්මිං ආවාසෙ වස්සංවුට්ඨොම්හි, තත්ථ ච මෙ චීවරපටිවීසො’’ති. තෙ එවං වදන්ති – ‘‘ගච්ඡාවුසො, තං චීවරං ආහර, මයං තෙ ඉධ චීවරං කරිස්සාමා’’ති. සො තං ආවාසං ගන්ත්වා භික්ඛූ පුච්ඡති – ‘‘කහං මෙ, ආවුසො, චීවරපටිවීසො’’ති? තෙ එවං වදන්ති – ‘‘අයං තෙ, ආවුසො, චීවරපටිවීසො’’ති. සො තං චීවරං ආදාය තං ආවාසං ගච්ඡති. තමෙනං අන්තරාමග්ගෙ භික්ඛූ පුච්ඡන්ති – ‘‘ආවුසො, කහං ගමිස්සසී’’ති? සො එවං වදෙති – ‘‘අමුකං නාම ආවාසං ගමිස්සාමි, තත්ථ මෙ භික්ඛූ චීවරං කරිස්සන්තී’’ති. තෙ එවං වදන්ති – ‘‘අලං, ආවුසො, මා අගමාසි, මයං තෙ ඉධ චීවරං කරිස්සාමා’’ති. තස්ස එවං හොති – ‘‘ඉධෙවිමං චීවරං කාරෙස්සං න පච්චෙස්ස’’න්ති. සො තං චීවරං කාරෙති. තස්ස භික්ඛුනො නිට්ඨානන්තිකො කථිනුද්ධාරො.

භික්ඛු අත්ථතකථිනො දිසංගමිකො පක්කමති චීවරපටිවීසං අපවිලායමානො. තමෙනං දිසංගතං භික්ඛූ පුච්ඡන්ති – ‘‘කහං ත්වං, ආවුසො, වස්සංවුට්ඨො, කත්ථ ච තෙ චීවරපටිවීසො’’ති? සො එවං වදෙති – ‘‘අමුකස්මිං ආවාසෙ වස්සංවුට්ඨොම්හි, තත්ථ ච මෙ චීවරපටිවීසො’’ති. තෙ එවං වදන්ති – ‘‘ගච්ඡාවුසො, තං චීවරං ආහර, මයං තෙ ඉධ චීවරං කරිස්සාමා’’ති. සො තං ආවාසං ගන්ත්වා භික්ඛූ පුච්ඡති – ‘‘කහං මෙ, ආවුසො, චීවරපටිවීසො’’ති? තෙ එවං වදන්ති – ‘‘අයං තෙ, ආවුසො, චීවරපටිවීසො’’ති. සො තං චීවරං ආදාය තං ආවාසං ගච්ඡති. තමෙනං අන්තරාමග්ගෙ භික්ඛූ පුච්ඡන්ති – ‘‘ආවුසො, කහං ගමිස්සසී’’ති? සො එවං වදෙති – ‘‘අමුකං නාම ආවාසං ගමිස්සාමි, තත්ථ මෙ භික්ඛූ චීවරං කරිස්සන්තී’’ති. තෙ එවං වදන්ති – ‘‘අලං, ආවුසො, මා අගමාසි, මයං තෙ ඉධ චීවරං කරිස්සාමා’’ති. තස්ස එවං හොති – ‘‘නෙවිමං චීවරං කාරෙස්සං, න පච්චෙස්ස’’න්ති. තස්ස භික්ඛුනො සන්නිට්ඨානන්තිකො කථිනුද්ධාරො.

භික්ඛු අත්ථතකථිනො දිසංගමිකො පක්කමති…පෙ… ‘‘ඉධෙවිමං චීවරං කාරෙස්සං, න පච්චෙස්ස’’න්ති . සො තං චීවරං කාරෙති. තස්ස තං චීවරං කයිරමානං නස්සති. තස්ස භික්ඛුනො නාසනන්තිකො කථිනුද්ධාරො.

323. භික්ඛු අත්ථතකථිනො දිසංගමිකො පක්කමති චීවරපටිවීසං අපවිලායමානො. තමෙනං දිසංගතං භික්ඛූ පුච්ඡන්ති – ‘‘කහං ත්වං, ආවුසො, වස්සංවුට්ඨො, කත්ථ ච තෙ චීවරපටිවීසො’’ති? සො එවං වදෙති – ‘‘අමුකස්මිං ආවාසෙ වස්සංවුට්ඨොම්හි, තත්ථ ච මෙ චීවරපටිවීසො’’ති. තෙ එවං වදන්ති – ‘‘ගච්ඡාවුසො, තං චීවරං ආහර, මයං තෙ ඉධ චීවරං කරිස්සාමා’’ති. සො තං ආවාසං ගන්ත්වා භික්ඛූ පුච්ඡති – ‘‘කහං මෙ, ආවුසො, චීවරපටිවීසො’’ති? තෙ එවං වදන්ති – ‘‘අයං තෙ, ආවුසො, චීවරපටිවීසො’’ති. සො තං චීවරං ආදාය තං ආවාසං ගච්ඡති. තස්ස තං ආවාසං ගතස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස භික්ඛුනො නිට්ඨානන්තිකො කථිනුද්ධාරො.

භික්ඛු අත්ථතකථිනො දිසංගමිකො පක්කමති…පෙ… ‘‘නෙවිමං චීවරං කාරෙස්සං, න පච්චෙස්ස’’න්ති. තස්ස භික්ඛුනො සන්නිට්ඨානන්තිකො කථිනුද්ධාරො.

භික්ඛු අත්ථතකථිනො දිසංගමිකො පක්කමති…පෙ… ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස තං චීවරං කයිරමානං නස්සති. තස්ස භික්ඛුනො නාසනන්තිකො කථිනුද්ධාරො.

අපවිලායනනවකං නිට්ඨිතං.

199. ඵාසුවිහාරපඤ්චකං

324. භික්ඛු අත්ථතකථිනො ඵාසුවිහාරිකො චීවරං ආදාය පක්කමති – ‘‘අමුකං නාම ආවාසං ගමිස්සාමි; තත්ථ මෙ ඵාසු භවිස්සති වසිස්සාමි, නො චෙ මෙ ඵාසු භවිස්සති, අමුකං නාම ආවාසං ගමිස්සාමි; තත්ථ මෙ ඵාසු භවිස්සති වසිස්සාමි , නො චෙ මෙ ඵාසු භවිස්සති, අමුකං නාම ආවාසං ගමිස්සාමි; තත්ථ මෙ ඵාසු භවිස්සති වසිස්සාමි, නො චෙ මෙ ඵාසු භවිස්සති, පච්චෙස්ස’’න්ති. තස්ස බහිසීමගතස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස භික්ඛුනො නිට්ඨානන්තිකො කථිනුද්ධාරො.

භික්ඛු අත්ථතකථිනො ඵාසුවිහාරිකො චීවරං ආදාය පක්කමති – ‘‘අමුකං නාම ආවාසං ගමිස්සාමි; තත්ථ මෙ ඵාසු භවිස්සති වසිස්සාමි, නො චෙ මෙ ඵාසු භවිස්සති, අමුකං නාම ආවාසං ගමිස්සාමි; තත්ථ මෙ ඵාසු භවිස්සති වසිස්සාමි, නො චෙ මෙ ඵාසු භවිස්සති, අමුකං නාම ආවාසං ගමිස්සාමි; තත්ථ මෙ ඵාසු භවිස්සති වසිස්සාමි, නො චෙ මෙ ඵාසු භවිස්සති, පච්චෙස්ස’’න්ති. තස්ස බහිසීමගතස්ස එවං හොති – ‘‘නෙවිමං චීවරං කාරෙස්සං, න පච්චෙස්ස’’න්ති. තස්ස භික්ඛුනො සන්නිට්ඨානන්තිකො කථිනුද්ධාරො.

භික්ඛු අත්ථතකථිනො ඵාසුවිහාරිකො චීවරං ආදාය පක්කමති – ‘‘අමුකං නාම ආවාසං ගමිස්සාමි; තත්ථ මෙ ඵාසු භවිස්සති වසිස්සාමි, නො චෙ මෙ ඵාසු භවිස්සති, අමුකං නාම ආවාසං ගමිස්සාමි; තත්ථ මෙ ඵාසු භවිස්සති වසිස්සාමි, නො චෙ මෙ ඵාසු භවිස්සති, අමුකං නාම ආවාසං ගමිස්සාමි; තත්ථ මෙ ඵාසු භවිස්සති වසිස්සාමි, නො චෙ මෙ ඵාසු භවිස්සති, පච්චෙස්ස’’න්ති. තස්ස බහිසීමගතස්ස එවං හොති – ‘‘ඉධෙවිමං චීවරං කාරෙස්සං, න පච්චෙස්ස’’න්ති. සො තං චීවරං කාරෙති. තස්ස තං චීවරං කයිරමානං නස්සති. තස්ස භික්ඛුනො නාසනන්තිකො කථිනුද්ධාරො.

භික්ඛු අත්ථතකථිනො ඵාසුවිහාරිකො චීවරං ආදාය පක්කමති – ‘‘අමුකං නාම ආවාසං ගමිස්සාමි; තත්ථ මෙ ඵාසු භවිස්සති වසිස්සාමි, නො චෙ මෙ ඵාසු භවිස්සති, අමුකං නාම ආවාසං ගමිස්සාමි; තත්ථ මෙ ඵාසු භවිස්සති වසිස්සාමි, නො චෙ මෙ ඵාසු භවිස්සති, අමුකං නාම ආවාසං ගමිස්සාමි; තත්ථ මෙ ඵාසු භවිස්සති වසිස්සාමි, නො චෙ මෙ ඵාසු භවිස්සති, පච්චෙස්ස’’න්ති. සො බහිසීමගතො තං චීවරං කාරෙති. සො කතචීවරො – ‘‘පච්චෙස්සං පච්චෙස්ස’’න්ති බහිද්ධා කථිනුද්ධාරං වීතිනාමෙති. තස්ස භික්ඛුනො සීමාතික්කන්තිකො කථිනුද්ධාරො.

භික්ඛු අත්ථතකථිනො ඵාසුවිහාරිකො චීවරං ආදාය පක්කමති – ‘‘අමුකං නාම ආවාසං ගමිස්සාමි; තත්ථ මෙ ඵාසු භවිස්සති වසිස්සාමි, නො චෙ මෙ ඵාසු භවිස්සති, අමුකං නාම ආවාසං ගමිස්සාමි; තත්ථ මෙ ඵාසු භවිස්සති වසිස්සාමි, නො චෙ මෙ ඵාසු භවිස්සති, අමුකං නාම ආවාසං ගමිස්සාමි; තත්ථ මෙ ඵාසු භවිස්සති වසිස්සාමි, නො චෙ මෙ ඵාසු භවිස්සති, පච්චෙස්ස’’න්ති. සො බහිසීමගතො තං චීවරං කාරෙති. සො කතචීවරො ‘‘පච්චෙස්සං පච්චෙස්ස’’න්ති සම්භුණාති කථිනුද්ධාරං. තස්ස භික්ඛුනො සහ භික්ඛූහි කථිනුද්ධාරො.

ඵාසුවිහාරපඤ්චකං නිට්ඨිතං.

200. පලිබොධාපලිබොධකථා

325. ද්වෙමෙ , භික්ඛවෙ, කථිනස්ස පලිබොධා, ද්වෙ අපලිබොධා. කතමෙ ච, භික්ඛවෙ, ද්වෙ කථිනස්ස පලිබොධා? ආවාසපලිබොධො ච චීවරපලිබොධො ච. කථඤ්ච, භික්ඛවෙ, ආවාසපලිබොධො හොති? ඉධ, භික්ඛවෙ, භික්ඛු වසති වා තස්මිං ආවාසෙ, සාපෙක්ඛො වා පක්කමති ‘‘පච්චෙස්ස’’න්ති. එවං ඛො, භික්ඛවෙ, ආවාසපලිබොධො හොති. කථඤ්ච, භික්ඛවෙ, චීවරපලිබොධො හොති? ඉධ, භික්ඛවෙ, භික්ඛුනො චීවරං අකතං වා හොති විප්පකතං වා, චීවරාසා වා අනුපච්ඡින්නා. එවං ඛො, භික්ඛවෙ, චීවරපලිබොධො හොති. ඉමෙ ඛො, භික්ඛවෙ, ද්වෙ කථිනස්ස පලිබොධා.

කතමෙ ච, භික්ඛවෙ, ද්වෙ කථිනස්ස අපලිබොධා? ආවාසඅපලිබොධො ච චීවරඅපලිබොධො ච. කථඤ්ච, භික්ඛවෙ, ආවාසඅපලිබොධො හොති? ඉධ, භික්ඛවෙ, භික්ඛු පක්කමති තම්හා ආවාසා චත්තෙන වන්තෙන මුත්තෙන අනපෙක්ඛො [අනපෙක්ඛෙන (ක.)] ‘‘න පච්චෙස්ස’’න්ති. එවං ඛො, භික්ඛවෙ, ආවාසඅපලිබොධො හොති. කථඤ්ච, භික්ඛවෙ, චීවරඅපලිබොධො හොති? ඉධ, භික්ඛවෙ, භික්ඛුනො චීවරං කතං වා හොති, නට්ඨං වා විනට්ඨං වා දඩ්ඪං වා, චීවරාසා වා උපච්ඡින්නා. එවං ඛො, භික්ඛවෙ, චීවරඅපලිබොධො හොති. ඉමෙ ඛො, භික්ඛවෙ, ද්වෙ කථිනස්ස අපලිබොධාති.

පලිබොධාපලිබොධකථා නිට්ඨිතා.

කථිනක්ඛන්ධකො නිට්ඨිතො සත්තමො.

201. තස්සුද්දානං

තිංස පාවෙය්යකා භික්ඛූ, සාකෙතුක්කණ්ඨිතා වසුං;

වස්සංවුට්ඨොකපුණ්ණෙහි, අගමුං ජිනදස්සනං.

ඉදං වත්ථු කථිනස්ස, කප්පිස්සන්ති ච පඤ්චකා;

අනාමන්තා අසමාචාරා, තථෙව ගණභොජනං.

යාවදත්ථඤ්ච උප්පාදො, අත්ථතානං භවිස්සති;

ඤත්ති එවත්ථතඤ්චෙව, එවඤ්චෙව අනත්ථතං.

උල්ලිඛි ධොවනා චෙව, විචාරණඤ්ච ඡෙදනං;

බන්ධනො වට්ටි කණ්ඩුස, දළ්හීකම්මානුවාතිකා.

පරිභණ්ඩං ඔවද්ධෙය්යං, මද්දනා නිමිත්තං කථා;

කුක්කු සන්නිධි නිස්සග්ගි, න කප්පඤ්ඤත්ර තෙ තයො.

අඤ්ඤත්ර පඤ්චාතිරෙකෙ, සඤ්ඡින්නෙන සමණ්ඩලී;

නාඤ්ඤත්ර පුග්ගලා සම්මා, නිස්සීමට්ඨොනුමොදති.

කථිනානත්ථතං හොති, එවං බුද්ධෙන දෙසිතං;

අහතාකප්පපිලොති, පංසු පාපණිකාය ච.

අනිමිත්තාපරිකථා, අකුක්කු ච අසන්නිධි;

අනිස්සග්ගි කප්පකතෙ, තථා තිචීවරෙන ච.

පඤ්චකෙ වාතිරෙකෙ වා, ඡින්නෙ සමණ්ඩලීකතෙ;

පුග්ගලස්සත්ථාරා සම්මා, සීමට්ඨො අනුමොදති.

එවං කථිනත්ථරණං, උබ්භාරස්සට්ඨමාතිකා;

පක්කමනන්ති නිට්ඨානං, සන්නිට්ඨානඤ්ච නාසනං.

සවනං ආසාවච්ඡෙදි, සීමා සහුබ්භාරට්ඨමී;

කතචීවරමාදාය, ‘‘න පච්චෙස්ස’’න්ති ගච්ඡති.

තස්ස තං කථිනුද්ධාරා,එ හොති පක්කමනන්තිකො;

ආදාය චීවරං යාති, නිස්සීමෙ ඉදං චින්තයි.

‘‘කාරෙස්සං න පච්චෙස්ස’’න්ති, නිට්ඨානෙ කථිනුද්ධාරො;

ආදාය නිස්සීමං නෙව, ‘‘න පච්චෙස්ස’’න්ති මානසො.

තස්ස තං කථිනුද්ධාරො, සන්නිට්ඨානන්තිකො භවෙ;

ආදාය චීවරං යාති, නිස්සීමෙ ඉදං චින්තයි.

‘‘කාරෙස්සං න පච්චෙස්ස’’න්ති, කයිරං තස්ස නස්සති;

තස්ස තං කථිනුද්ධාරො, භවති නාසනන්තිකො.

ආදාය යාති ‘‘පච්චෙස්සං’’, බහි කාරෙති චීවරං;

කතචීවරො සුණාති, උබ්භතං කථිනං තහිං.

තස්ස තං කථිනුද්ධාරො, භවති සවනන්තිකො;

ආදාය යාති ‘‘පච්චෙස්සං’’, බහි කාරෙති චීවරං.

කතචීවරො බහිද්ධා, නාමෙති කථිනුද්ධාරං;

තස්ස තං කථිනුද්ධාරො, සීමාතික්කන්තිකො භවෙ.

ආදාය යාති ‘‘පච්චෙස්සං’’, බහි කාරෙති චීවරං;

කතචීවරො පච්චෙස්සං, සම්භොති කථිනුද්ධාරං.

තස්ස තං කථිනුද්ධාරො, සහ භික්ඛූහි ජායති;

ආදාය ච සමාදාය, සත්ත-සත්තවිධා ගති.

පක්කමනන්තිකා නත්ථි, ඡක්කෙ විප්පකතෙ [ඡට්ඨෙ විප්පකතා (සී.), ඡච්චා විප්පකථා (ක.)] ගති;

ආදාය නිස්සීමගතං, කාරෙස්සං ඉති ජායති.

නිට්ඨානං සන්නිට්ඨානඤ්ච, නාසනඤ්ච ඉමෙ තයො;

ආදාය ‘‘න පච්චෙස්ස’’න්ති, බහිසීමෙ කරොමිති.

නිට්ඨානං සන්නිට්ඨානම්පි, නාසනම්පි ඉදං තයො;

අනධිට්ඨිතෙන නෙවස්ස, හෙට්ඨා තීණි නයාවිධි.

ආදාය යාති පච්චෙස්සං, බහිසීමෙ කරොමිති;

‘‘න පච්චෙස්ස’’න්ති කාරෙති, නිට්ඨානෙ කථිනුද්ධාරො.

සන්නිට්ඨානං නාසනඤ්ච, සවනසීමාතික්කමා;

සහ භික්ඛූහි ජායෙථ, එවං පන්නරසං ගති.

සමාදාය විප්පකතා, සමාදාය පුනා තථා;

ඉමෙ තෙ චතුරො වාරා, සබ්බෙ පන්නරසවිධි.

අනාසාය ච ආසාය, කරණීයො ච තෙ තයො;

නයතො තං විජානෙය්ය, තයො ද්වාදස ද්වාදස.

අපවිලානා නවෙත්ථ [අපවිලායමානෙව (ස්යා.), අපවිනා නව චෙත්ථ (සී.)], ඵාසු පඤ්චවිධා තහිං;

පලිබොධාපලිබොධා, උද්දානං නයතො කතන්ති.

ඉමම්හි ඛන්ධකෙ වත්ථූ දොළසකපෙය්යාලමුඛානි එකසතං අට්ඨාරස.

කථිනක්ඛන්ධකො නිට්ඨිතො.