📜

දුතියගාථාසඞ්ගණිකං

1. කායිකාදිආපත්ති

474. කති ¶ ¶ ¶ ¶ ආපත්තියො කායිකා, කති වාචසිකා කතා.

ඡාදෙන්තස්ස කති ආපත්තියො, කති සංසග්ගපච්චයා.

ඡාපත්තියො කායිකා, ඡ වාචසිකා කතා;

ඡාදෙන්තස්ස තිස්සො ආපත්තියො, පඤ්ච සංසග්ගපච්චයා.

අරුණුග්ගෙ කති ආපත්තියො, කති යාවතතියකා;

කතෙත්ථ අට්ඨ වත්ථුකා, කතිහි සබ්බසඞ්ගහො.

අරුණුග්ගෙ තිස්සො ආපත්තියො, ද්වෙ යාවතතියකා;

එකෙත්ථ අට්ඨ වත්ථුකා, එකෙන සබ්බසඞ්ගහො.

විනයස්ස කති මූලානි, යානි බුද්ධෙන පඤ්ඤත්තා;

විනයගරුකා කති වුත්තා, දුට්ඨුල්ලච්ඡාදනා කති.

විනයස්ස ද්වෙ මූලානි, යානි බුද්ධෙන පඤ්ඤත්තා;

විනයගරුකා ද්වෙ වුත්තා, ද්වෙ දුට්ඨුල්ලච්ඡාදනා.

ගාමන්තරෙ කති ආපත්තියො, කති නදිපාරපච්චයා;

කතිමංසෙසු ථුල්ලච්චයං, කතිමංසෙසු දුක්කටං.

ගාමන්තරෙ ¶ චතස්සො ආපත්තියො, චතස්සො නදිපාරපච්චයා;

එකමංසෙ ථුල්ලච්චයං, නවමංසෙසු දුක්කටං.

කති වාචසිකා රත්තිං, කති වාචසිකා දිවා;

දදමානස්ස කති ආපත්තියො, පටිග්ගණ්හන්තස්ස කිත්තකා.

ද්වෙ ¶ වාචසිකා රත්තිං, ද්වෙ වාචසිකා දිවා;

දදමානස්ස තිස්සො ආපත්තියො, චත්තාරො ච පටිග්ගහෙ.

2. දෙසනාගාමිනියාදිආපත්ති

475.

කති දෙසනාගාමිනියො, කති සප්පටිකම්මා කතා;

කතෙත්ථ අප්පටිකම්මා වුත්තා, බුද්ධෙනාදිච්චබන්ධුනා.

පඤ්ච ¶ දෙසනාගාමිනියො, ඡ සප්පටිකම්මා කතා;

එකෙත්ථ අප්පටිකම්මා වුත්තා, බුද්ධෙනාදිච්චබන්ධුනා.

විනයගරුකා කති වුත්තා, කායවාචසිකානි ච;

කති විකාලෙ ධඤ්ඤරසො, කති ඤත්තිචතුත්ථෙන සම්මුති.

විනයගරුකා ද්වෙ වුත්තා, කායවාචසිකානි ච;

එකො විකාලෙ ධඤ්ඤරසො, එකා ඤත්තිචතුත්ථෙන සම්මුති.

පාරාජිකා කායිකා කති, කති සංවාසකභූමියො;

කතිනං ¶ රත්තිච්ඡෙදො, පඤ්ඤත්තා ද්වඞ්ගුලා කති.

පාරාජිකා කායිකා ද්වෙ, ද්වෙ සංවාසකභූමියො;

ද්වින්නං රත්තිච්ඡෙදො, පඤ්ඤත්තා ද්වඞ්ගුලා දුවෙ.

කතත්තානං ¶ වධිත්වාන, කතිහි සඞ්ඝො භිජ්ජති;

කතෙත්ථ පඨමාපත්තිකා, ඤත්තියා කරණා කති.

ද්වෙ අත්තානං වධිත්වාන, ද්වීහි සඞ්ඝො භිජ්ජති;

ද්වෙත්ථ පඨමාපත්තිකා, ඤත්තියා කරණා දුවෙ.

පාණාතිපාතෙ කති ආපත්තියො, වාචා පාරාජිකා කති;

ඔභාසනා ¶ කති වුත්තා, සඤ්චරිත්තෙන වා කති.

පාණාතිපාතෙ තිස්සො ආපත්තියො;

වාචා පාරාජිකා තයො;

ඔභාසනා තයො වුත්තා;

සඤ්චරිත්තෙන වා තයො.

කති පුග්ගලා න උපසම්පාදෙතබ්බා, කති කම්මානං සඞ්ගහා;

නාසිතකා කති වුත්තා, කතිනං එකවාචිකා.

තයො පුග්ගලා න උපසම්පාදෙතබ්බා, තයො කම්මානං සඞ්ගහා;

නාසිතකා තයො වුත්තා, තිණ්ණන්නං එකවාචිකා.

අදින්නාදානෙ කති ආපත්තියො, කති මෙථුනපච්චයා;

ඡින්දන්තස්ස කති ආපත්තියො, කති ඡඩ්ඩිතපච්චයා.

අදින්නාදානෙ තිස්සො ආපත්තියො, චතස්සො මෙථුනපච්චයා;

ඡින්දන්තස්ස තිස්සො ආපත්තියො, පඤ්ච ඡඩ්ඩිතපච්චයා.

භික්ඛුනොවාදකවග්ගස්මිං ¶ , පාචිත්තියෙන දුක්කටා;

කතෙත්ථ නවකා වුත්තා, කතිනං චීවරෙන ච.

භික්ඛුනොවාදකවග්ගස්මිං ¶ , පාචිත්තියෙන දුක්කටා කතා;

චතුරෙත්ථ නවකා වුත්තා, ද්වින්නං චීවරෙන ච.

භික්ඛුනීනඤ්ච අක්ඛාතා, පාටිදෙසනියා කති;

භුඤ්ජන්තාමකධඤ්ඤෙන, පාචිත්තියෙන දුක්කටා කති.

භික්ඛුනීනඤ්ච අක්ඛාතා, අට්ඨ පාටිදෙසනීයා කතා;

භුඤ්ජන්තාමකධඤ්ඤෙන, පාචිත්තියෙන දුක්කටා කතා.

ගච්ඡන්තස්ස කති ආපත්තියො, ඨිතස්ස චාපි කිත්තකා;

නිසින්නස්ස ¶ කති ආපත්තියො, නිපන්නස්සාපි කිත්තකා.

ගච්ඡන්තස්ස චතස්සො ආපත්තියො, ඨිතස්ස චාපි තත්තකා;

නිසින්නස්ස චතස්සො ආපත්තියො, නිපන්නස්සාපි තත්තකා.

3. පාචිත්තියං

476.

කති පාචිත්තියානි, සබ්බානි නානාවත්ථුකානි;

අපුබ්බං අචරිමං, ආපජ්ජෙය්ය එකතො.

පඤ්ච පාචිත්තියානි, සබ්බානි නානාවත්ථුකානි;

අපුබ්බං අචරිමං, ආපජ්ජෙය්ය එකතො.

කති පාචිත්තියානි, සබ්බානි නානාවත්ථුකානි;

අපුබ්බං අචරිමං, ආපජ්ජෙය්ය එකතො.

න ¶ පාචිත්තියානි, සබ්බානි නානාවත්ථුකානි;

අපුබ්බං අචරිමං, ආපජ්ජෙය්ය එකතො.

කති ¶ පාචිත්තියානි, සබ්බානි නානාවත්ථුකානි;

කති වාචාය දෙසෙය්ය, වුත්තා ආදිච්චබන්ධුනා.

පඤ්ච පාචිත්තියානි, සබ්බානි නානාවත්ථුකානි;

එකවාචාය දෙසෙය්ය, වුත්තා ආදිච්චබන්ධුනා.

කති පාචිත්තියානි, සබ්බානි නානාවත්ථුකානි;

කති වාචාය දෙසෙය්ය, වුත්තා ආදිච්චබන්ධුනා.

නව ¶ පාචිත්තියානි, සබ්බානි නානාවත්ථුකානි;

එකවාචාය දෙසෙය්ය, වුත්තා ආදිච්චබන්ධුනා.

කති පාචිත්තියානි, සබ්බානි නානාවත්ථුකානි;

කිඤ්ච ¶ කිත්තෙත්වා දෙසෙය්ය, වුත්තා ආදිච්චබන්ධුනා.

පඤ්ච පාචිත්තියානි, සබ්බානි නානාවත්ථුකානි;

වත්ථුං කිත්තෙත්වා දෙසෙය්ය, වුත්තා ආදිච්චබන්ධුනා.

කති පාචිත්තියානි, සබ්බානි නානාවත්ථුකානි;

කිඤ්ච කිත්තෙත්වා දෙසෙය්ය, වුත්තා ආදිච්චබන්ධුනා.

නව පාචිත්තියානි, සබ්බානි නානාවත්ථුකානි;

වත්ථුං කිත්තෙත්වා දෙසෙය්ය, වුත්තා ආදිච්චබන්ධුනා.

යාවතතියකෙ කති ආපත්තියො, කති වොහාරපච්චයා;

ඛාදන්තස්ස කති ආපත්තියො, කති භොජනපච්චයා.

යාවතතියකෙ තිස්සො ආපත්තියො, ඡ වොහාරපච්චයා;

ඛාදන්තස්ස තිස්සො ආපත්තියො, පඤ්ච භොජනපච්චයා.

සබ්බා ¶ යාවතතියකා, කති ඨානානි ගච්ඡන්ති;

කතිනඤ්චෙව ආපත්ති, කතිනං අධිකරණෙන ච.

සබ්බා යාවතතියකා, පඤ්ච ඨානානි ගච්ඡන්ති;

පඤ්චන්නඤ්චෙව ආපත්ති, පඤ්චන්නං අධිකරණෙන ච.

කතිනං විනිච්ඡයො හොති, කතිනං වූපසමෙන ච;

කතිනඤ්චෙව අනාපත්ති, කතිහි ඨානෙහි සොභති.

පඤ්චන්නං විනිච්ඡයො හොති, පඤ්චන්නං වූපසමෙන ච;

පඤ්චන්නඤ්චෙව අනාපත්ති, තීහි ඨානෙහි සොභති.

කති ¶ කායිකා රත්තිං, කති කායිකා දිවා;

නිජ්ඣායන්තස්ස කති ආපත්ති, කති පිණ්ඩපාතපච්චයා.

ද්වෙ කායිකා රත්තිං, ද්වෙ කායිකා දිවා;

නිජ්ඣායන්තස්ස එකා ආපත්ති, එකා පිණ්ඩපාතපච්චයා.

කතානිසංසෙ ¶ සම්පස්සං, පරෙසං සද්ධාය දෙසයෙ;

උක්ඛිත්තකා කති වුත්තා, කති සම්මාවත්තනා.

අට්ඨානිසංසෙ සම්පස්සං, පරෙසං සද්ධාය දෙසයෙ;

උක්ඛිත්තකා තයො වුත්තා, තෙචත්තාලීස සම්මාවත්තනා.

කති ඨානෙ මුසාවාදො, කති පරමන්ති වුච්චති;

කති ¶ පාටිදෙසනීයා, කතිනං දෙසනාය ච.

පඤ්ච ඨානෙ මුසාවාදො, චුද්දස පරමන්ති වුච්චති;

ද්වාදස පාටිදෙසනීයා, චතුන්නං දෙසනාය ච.

කතඞ්ගිකො ¶ මුසාවාදො, කති උපොසථඞ්ගානි;

කති දූතෙය්යඞ්ගානි, කති තිත්ථියවත්තනා.

අට්ඨඞ්ගිකො මුසාවාදො, අට්ඨ උපොසථඞ්ගානි;

අට්ඨ දූතෙය්යඞ්ගානි, අට්ඨ තිත්ථියවත්තනා.

කතිවාචිකා උපසම්පදා, කතිනං පච්චුට්ඨාතබ්බං;

කතිනං ආසනං දාතබ්බං, භික්ඛුනොවාදකො කතිහි.

අට්ඨවාචිකා උපසම්පදා, අට්ඨන්නං පච්චුට්ඨාතබ්බං;

අට්ඨන්නං ¶ ආසනං දාතබ්බං, භික්ඛුනොවාදකො අට්ඨහි.

කතිනං ඡෙජ්ජං හොති, කතිනං ථුල්ලච්චයං;

කතිනඤ්චෙව අනාපත්ති, සබ්බෙසං එකවත්ථුකා.

එකස්ස ඡෙජ්ජං හොති, චතුන්නං ථුල්ලච්චයං;

චතුන්නඤ්චෙව අනාපත්ති, සබ්බෙසං එකවත්ථුකා.

කති ආඝාතවත්ථූනි, කතිහි සඞ්ඝො භිජ්ජති;

කතෙත්ථ පඨමාපත්තිකා, ඤත්තියා කරණා කති.

නව ආඝාතවත්ථූනි, නවහි සඞ්ඝො භිජ්ජති;

නවෙත්ථ පඨමාපත්තිකා, ඤත්තියා කරණා නව.

4. අවන්දනීයපුග්ගලාදි

477.

කති පුග්ගලා නාභිවාදෙතබ්බා, අඤ්ජලිසාමිචෙන ච;

කතිනං දුක්කටං හොති, කති චීවරධාරණා.

දස ¶ ¶ පුග්ගලා නාභිවාදෙතබ්බා, අඤ්ජලිසාමිචෙන ච;

දසන්නං දුක්කටං හොති, දස චීවරධාරණා.

කතිනං වස්සංවුට්ඨානං, දාතබ්බං ඉධ චීවරං;

කතිනං භන්තෙ දාතබ්බං, කතිනඤ්චෙව න දාතබ්බං.

පඤ්චන්නං වස්සංවුට්ඨානං, දාතබ්බං ඉධ චීවරං;

සත්තන්නං සන්තෙ දාතබ්බං, සොළසන්නං න දාතබ්බං.

කතිසතං රත්තිසතං, ආපත්තියො ඡාදයිත්වාන;

කති රත්තියො වසිත්වාන, මුච්චෙය්ය පාරිවාසිකො.

දසසතං රත්තිසතං, ආපත්තියො ඡාදයිත්වාන;

දස ¶ රත්තියො වසිත්වාන, මුච්චෙය්ය පාරිවාසිකො.

කති කම්මදොසා වුත්තා, බුද්ධෙනාදිච්චබන්ධුනා;

චම්පායං විනයවත්ථුස්මිං, සබ්බෙව අධම්මිකා [සබ්බෙ අධම්මිකා (සී. ස්යා.)] කති.

ද්වාදස කම්මදොසා වුත්තා, බුද්ධෙනාදිච්චබන්ධුනා;

චම්පායං විනයවත්ථුස්මිං, සබ්බෙව අධම්මිකා [සබ්බෙවාධම්මිකා (සී.), සබ්බෙ අධම්මිකා (ස්යා.)] කතා.

කති කම්මසම්පත්තියො වුත්තා, බුද්ධෙනාදිච්චබන්ධුනා;

චම්පායං විනයවත්ථුස්මිං, සබ්බෙව ධම්මිකා කති.

චතස්සො කම්මසම්පත්තියො වුත්තා, බුද්ධෙනාදිච්චබන්ධුනා;

චම්පායං ¶ විනයවත්ථුස්මිං, සබ්බෙව ධම්මිකා කතා.

කති කම්මානි වුත්තානි, බුද්ධෙනාදිච්චබන්ධුනා;

චම්පායං විනයවත්ථුස්මිං, ධම්මිකා අධම්මිකා කති.

ඡ ¶ කම්මානි වුත්තානි, බුද්ධෙනාදිච්චබන්ධුනා;

චම්පායං විනයවත්ථුස්මිං, එකෙත්ථ ධම්මිකා කතා;

පඤ්ච අධම්මිකා වුත්තා, බුද්ධෙනාදිච්චබන්ධුනා.

කති කම්මානි වුත්තානි, බුද්ධෙනාදිච්චබන්ධුනා;

චම්පායං විනයවත්ථුස්මිං, ධම්මිකා අධම්මිකා කති.

චත්තාරි ¶ කම්මානි වුත්තානි, බුද්ධෙනාදිච්චබන්ධුනා;

චම්පායං විනයවත්ථුස්මිං, එකෙත්ථ ධම්මිකා කතා;

තයො අධම්මිකා වුත්තා, බුද්ධෙනාදිච්චබන්ධුනා.

යං දෙසිතංනන්තජිනෙන තාදිනා;

ආපත්තික්ඛන්ධානි ¶ විවෙකදස්සිනා;

කතෙත්ථ සම්මන්ති විනා සමථෙහි;

පුච්ඡාමි තං බ්රූහි විභඞ්ගකොවිද.

යං දෙසිතංනන්තජිනෙන තාදිනා;

ආපත්තික්ඛන්ධානි විවෙකදස්සිනා;

එකෙත්ථ සම්මති විනා සමථෙහි;

එතං තෙ අක්ඛාමි විභඞ්ගකොවිද.

කති ආපායිකා වුත්තා, බුද්ධෙනාදිච්චබන්ධුනා;

විනයං පටිජානන්තස්ස, විනයානි [විසයානි (සී. ස්යා. එවමුපරිපි)] සුණොම තෙ.

ඡඌනදියඩ්ඪසතා වුත්තා, බුද්ධෙනාදිච්චබන්ධුනා;

ආපායිකා නෙරයිකා, කප්පට්ඨා සඞ්ඝභෙදකා;

විනයං පටිජානන්තස්ස, විනයානි සුණොහි මෙ.

කති නාපායිකා වුත්තා, බුද්ධෙනාදිච්චබන්ධුනා;

විනයං පටිජානන්තස්ස, විනයානි සුණොම තෙ.

අට්ඨාරස ¶ නාපායිකා වුත්තා, බුද්ධෙනාදිච්චබන්ධුනා;

විනයං පටිජානන්තස්ස, විනයානි සුණොහි මෙ.

කති අට්ඨකා වුත්තා, බුද්ධෙනාදිච්චබන්ධුනා;

විනයං පටිජානන්තස්ස, විනයානි සුණොම තෙ.

අට්ඨාරස අට්ඨකා වුත්තා, බුද්ධෙනාදිච්චබන්ධුනා;

විනයං පටිජානන්තස්ස, විනයානි සුණොහි මෙ.

5. සොළසකම්මාදි

478.

කති ¶ කම්මානි වුත්තානි, බුද්ධෙනාදිච්චබන්ධුනා;

විනයං පටිජානන්තස්ස, විනයානි සුණොම තෙ.

සොළස ¶ කම්මානි වුත්තානි, බුද්ධෙනාදිච්චබන්ධුනා;

විනයං පටිජානන්තස්ස, විනයානි සුණොහි මෙ.

කති කම්මදොසා වුත්තා, බුද්ධෙනාදිච්චබන්ධුනා;

විනයං ¶ පටිජානන්තස්ස, විනයානි සුණොම තෙ.

ද්වාදස කම්මදොසා වුත්තා, බුද්ධෙනාදිච්චබන්ධුනා;

විනයං පටිජානන්තස්ස, විනයානි සුණොහි මෙ.

කති කම්මසම්පත්තියො වුත්තා, බුද්ධෙනාදිච්චබන්ධුනා;

විනයං පටිජානන්තස්ස, විනයානි සුණොම තෙ.

චතස්සො කම්මසම්පත්තියො වුත්තා, බුද්ධෙනාදිච්චබන්ධුනා;

විනයං පටිජානන්තස්ස, විනයානි සුණොහි මෙ.

කති ¶ කම්මානි වුත්තානි, බුද්ධෙනාදිච්චබන්ධුනා;

විනයං පටිජානන්තස්ස, විනයානි සුණොම තෙ.

ඡ කම්මානි වුත්තානි, බුද්ධෙනාදිච්චබන්ධුනා;

විනයං පටිජානන්තස්ස, විනයානි සුණොහි මෙ.

කති කම්මානි වුත්තානි, බුද්ධෙනාදිච්චබන්ධුනා;

විනයං පටිජානන්තස්ස, විනයානි සුණොම තෙ.

චත්තාරි කම්මානි වුත්තානි, බුද්ධෙනාදිච්චබන්ධුනා;

විනයං පටිජානන්තස්ස, විනයානි සුණොහි මෙ.

කති ¶ පාරාජිකා වුත්තා, බුද්ධෙනාදිච්චබන්ධුනා;

විනයං පටිජානන්තස්ස, විනයානි සුණොම තෙ.

අට්ඨ පාරාජිකා වුත්තා, බුද්ධෙනාදිච්චබන්ධුනා;

විනයං පටිජානන්තස්ස, විනයානි සුණොහි මෙ.

කති සඞ්ඝාදිසෙසා වුත්තා, බුද්ධෙනාදිච්චබන්ධුනා;

විනයං පටිජානන්තස්ස, විනයානි සුණොම තෙ.

තෙවීස සඞ්ඝාදිසෙසා වුත්තා, බුද්ධෙනාදිච්චබන්ධුනා;

විනයං පටිජානන්තස්ස, විනයානි සුණොහි මෙ.

කති ¶ අනියතා වුත්තා, බුද්ධෙනාදිච්චබන්ධුනා;

විනයං පටිජානන්තස්ස, විනයානි සුණොම තෙ.

ද්වෙ අනියතා වුත්තා, බුද්ධෙනාදිච්චබන්ධුනා;

විනයං පටිජානන්තස්ස, විනයානි සුණොහි මෙ.

කති ¶ නිස්සග්ගියා වුත්තා, බුද්ධෙනාදිච්චබන්ධුනා;

විනයං පටිජානන්තස්ස, විනයානි සුණොම තෙ.

ද්වෙචත්තාලීස නිස්සග්ගියා වුත්තා, බුද්ධෙනාදිච්චබන්ධුනා;

විනයං පටිජානන්තස්ස, විනයානි සුණොහි මෙ.

කති පාචිත්තියා වුත්තා, බුද්ධෙනාදිච්චබන්ධුනා;

විනයං පටිජානන්තස්ස, විනයානි සුණොම තෙ.

අට්ඨාසීතිසතං පාචිත්තියා වුත්තා, බුද්ධෙනාදිච්චබන්ධුනා;

විනයං පටිජානන්තස්ස, විනයානි සුණොහි මෙ.

කති ¶ පාටිදෙසනීයා වුත්තා, බුද්ධෙනාදිච්චබන්ධුනා;

විනයං පටිජානන්තස්ස, විනයානි සුණොම තෙ.

ද්වාදස පාටිදෙසනීයා වුත්තා, බුද්ධෙනාදිච්චබන්ධුනා;

විනයං පටිජානන්තස්ස, විනයානි සුණොහි මෙ.

කති සෙඛියා වුත්තා, බුද්ධෙනාදිච්චබන්ධුනා;

විනයං පටිජානන්තස්ස, විනයානි සුණොම තෙ.

පඤ්චසත්තති සෙඛියා වුත්තා, බුද්ධෙනාදිච්චබන්ධුනා;

විනයං පටිජානන්තස්ස, විනයානි සුණොහි මෙ.

යාව සුපුච්ඡිතං තයා, යාව සුවිස්සජ්ජිතං මයා;

පුච්ඡාවිස්සජ්ජනාය වා, නත්ථි කිඤ්චි අසුත්තකන්ති.

දුතියගාථාසඞ්ගණිකං නිට්ඨිතං.