📜

උපොසථාදිපුච්ඡාවිස්සජ්ජනා

ආදිමජ්ඣන්තපුච්ඡනං

332. උපොසථකම්මස්ස කො ආදි, කිං මජ්ඣෙ, කිං පරියොසානං? පවාරණාකම්මස්ස කො ආදි, කිං මජ්ඣෙ, කිං පරියොසානං? තජ්ජනීයකම්මස්ස කො ආදි, කිං මජ්ඣෙ, කිං පරියොසානං? නියස්සකම්මස්ස…පෙ… පබ්බාජනීයකම්මස්ස…පෙ… පටිසාරණීයකම්මස්ස…පෙ… උක්ඛෙපනීයකම්මස්ස…පෙ… පරිවාසදානස්ස…පෙ… මූලායපටිකස්සනාය…පෙ… මානත්තදානස්ස…පෙ… අබ්භානස්ස…පෙ… උපසම්පදාකම්මස්ස කො ආදි, කිං මජ්ඣෙ, කිං පරියොසානං? තජ්ජනීයකම්මස්ස පටිප්පස්සද්ධියා කො ආදි, කිං මජ්ඣෙ, කිං පරියොසානං? නියස්සකම්මස්ස පටිප්පස්සද්ධියා කො ආදි, කිං මජ්ඣෙ, කිං පරියොසානං? පබ්බාජනීයකම්මස්ස පටිප්පස්සද්ධියා කො ආදි, කිං මජ්ඣෙ, කිං පරියොසානං? පටිසාරණීයකම්මස්ස පටිප්පස්සද්ධියා කො ආදි, කිං මජ්ඣෙ, කිං පරියොසානං? උක්ඛෙපනීයකම්මස්ස පටිප්පස්සද්ධියා කො ආදි, කිං මජ්ඣෙ, කිං පරියොසානං? සතිවිනයස්ස කො ආදි, කිං මජ්ජෙ, කිං පරියොසානං? අමූළ්හවිනයස්ස කො ආදි, කිං මජ්ඣෙ, කිං පරියොසානං? තස්සපාපියසිකාය කො ආදි, කිං මජ්ඣෙ, කිං පරියොසානං? තිණවත්ථාරකස්ස කො ආදි, කිං මජ්ඣෙ, කිං පරියොසානං? භික්ඛුනොවාදකසම්මුතියා කො ආදි, කිං මජ්ඣෙ, කිං පරියොසානං? තිචීවරෙන අවිප්පවාසසම්මුතියා කො ආදි, කිං මජ්ඣෙ, කිං පරියොසානං? සන්ථතසම්මුතියා කො ආදි, කිං මජ්ඣෙ, කිං පරියොසානං? රූපියඡඩ්ඩකසම්මුතියා කො ආදි, කිං මජ්ඣෙ, කිං පරියොසානං? සාටියග්ගාහාපකසම්මුතියො කො ආදි, කිං මජ්ඣෙ, කිං පරියොසානං? පත්තග්ගාහාපකසම්මුතියා කො ආදි, කිං මජ්ඣෙ, කිං පරියොසානං? දණ්ඩසම්මුතියා කො ආදි, කිං මජ්ඣෙ, කිං පරියොසානං? සික්කාසම්මුතියා කො ආදි, කිං මජ්ඣෙ, කිං පරියොසානං? දණ්ඩසික්කාසම්මුතියා කො ආදි, කිං මජ්ඣෙ, කිං පරියොසානං?

ආදිමජ්ඣන්තවිස්සජ්ජනා

333. උපොසථකම්මස්ස කො ආදි, කිං මජ්ඣෙ, කිං පරියොසානන්ති? උපොසථකම්මස්ස සාමග්ගී ආදි, කිරියා මජ්ඣෙ, නිට්ඨානං පරියොසානං.

පවාරණාකම්මස්ස කො ආදි, කිං මජ්ඣෙ, කිං පරියොසානන්ති? පවාරණාකම්මස්ස සාමග්ගී ආදි, කිරියා මජ්ඣෙ, නිට්ඨානං පරියොසානං.

තජ්ජනීයකම්මස්ස කො ආදි, කිං මජ්ඣෙ, කිං පරියොසානන්ති? තජ්ජනීයකම්මස්ස වත්ථු ච පුග්ගලො ච ආදි, ඤත්ති මජ්ඣෙ, කම්මවාචා පරියොසානං.

නියස්සකම්මස්ස…පෙ… පබ්බාජනීයකම්මස්ස…පෙ… පටිසාරණීයකම්මස්ස…පෙ… උක්ඛෙපනීයකම්මස්ස…පෙ… පරිවාසදානස්ස…පෙ… මූලායපටිකස්සනාය…පෙ… මානත්තදානස්ස…පෙ… අබ්භානස්ස කො ආදි, කිං මජ්ඣෙ, කිං පරියොසානන්ති? අබ්භානස්ස වත්ථු ච පුග්ගලො ච ආදි, ඤත්ති මජ්ඣෙ, කම්මවාචා පරියොසානං.

උපසම්පදාකම්මස්ස කො ආදි, කිං මජ්ඣෙ, කිං පරියොසානන්ති? උපසම්පදාකම්මස්ස පුග්ගලො ආදි, ඤත්ති මජ්ඣෙ, කම්මවාචා පරියොසානං.

තජ්ජනීයකම්මස්ස පටිප්පස්සද්ධියා කො ආදි, කිං මජ්ඣෙ, කිං පරියොසානන්ති? තජ්ජනීයකම්මස්ස පටිප්පස්සද්ධියා සම්මාවත්තනා ආදි, ඤත්ති මජ්ඣෙ, කම්මවාචා පරියොසානං.

නියස්සකම්මස්ස…පෙ… පබ්බාජනීයකම්මස්ස…පෙ… පටිසාරණීයකම්මස්ස…පෙ… උක්ඛෙපනීයකම්මස්ස පටිප්පස්සද්ධියා කො ආදි, කිං මජ්ඣෙ, කිං පරියොසානන්ති? උක්ඛෙපනීයකම්මස්ස පටිප්පස්සද්ධියා සම්මාවත්තනා ආදි, ඤත්ති මජ්ඣෙ, කම්මවාචා පරියොසානං.

සතිවිනයස්ස කො ආදි , කිං මජ්ඣෙ, කිං පරියොසානන්ති? සතිවිනයස්ස වත්ථු ච පුග්ගලො ච ආදි, ඤත්ති මජ්ඣෙ, කම්මවාචා පරියොසානං.

අමූළ්හවිනයස්ස …පෙ… තස්සපාපියසිකාය…පෙ… තිණවත්ථාරකස්ස…පෙ… භික්ඛුනොවාදකසම්මුතියා…පෙ… තිචීවරෙන අවිප්පවාසසම්මුතියා…පෙ… සන්ථතසම්මුතියා…පෙ… රූපියඡඩ්ඩකසම්මුතියා…පෙ… සාටියග්ගාහාපකසම්මුතියා…පෙ… පත්තග්ගාහාපකසම්මුතියා…පෙ… දණ්ඩසම්මුතියා…පෙ… සික්කාසම්මුතියා…පෙ… දණ්ඩසික්කාසම්මුතියා කො ආදි, කිං මජ්ඣෙ, කිං පරියොසානන්ති? දණ්ඩසික්කාසම්මුතියා වත්ථු ච පුග්ගලො ච ආදි, ඤත්ති මජ්ඣෙ, කම්මවාචා පරියොසානං.

උපොසථාදිපුච්ඡාවිස්සජ්ජනා නිට්ඨිතා.

අත්ථවසපකරණං

334. [අ. නි. 10.334; පරි. 22] දස අත්ථවසෙ පටිච්ච තථාගතෙන සාවකානං සික්ඛාපදං පඤ්ඤත්තං – සඞ්ඝසුට්ඨුතාය, සඞ්ඝඵාසුතාය, දුම්මඞ්කූනං පුග්ගලානං නිග්ගහාය, පෙසලානං භික්ඛූනං ඵාසුවිහාරාය, දිට්ඨධම්මිකානං ආසවානං සංවරාය, සම්පරායිකානං ආසවානං පටිඝාතාය, අප්පසන්නානං පසාදාය, පසන්නානං භිය්යොභාවාය, සද්ධම්මට්ඨිතියා විනයානුග්ගහාය.

යං සඞ්ඝසුට්ඨු තං සඞ්ඝඵාසු. යං සඞ්ඝඵාසු තං දුම්මඞ්කූනං පුග්ගලානං නිග්ගහාය. යං දුම්මඞ්කූනං පුග්ගලානං නිග්ගහාය තං පෙසලානං භික්ඛූනං ඵාසුවිහාරාය. යං පෙසලානං භික්ඛූනං ඵාසුවිහාරාය තං දිට්ඨධම්මිකානං ආසවානං සංවරාය. යං දිට්ඨධම්මිකානං ආසවානං සංවරාය තං සම්පරායිකානං ආසවානං පටිඝාතාය. යං සම්පරායිකානං ආසවානං පටිඝාතාය තං අප්පසන්නානං පසාදාය. යං අප්පසන්නානං පසාදාය තං පසන්නානං භිය්යොභාවාය. යං පසන්නානං භිය්යොභාවාය තං සද්ධම්මට්ඨිතියා. යං සද්ධම්මට්ඨිතියා තං විනයානුග්ගහාය.

යං සඞ්ඝසුට්ඨු තං සඞ්ඝඵාසු. යං සඞ්ඝසුට්ඨු තං දුම්මඞ්කූනං පුග්ගලානං නිග්ගහාය. යං සඞ්ඝසුට්ඨු තං පෙසලානං භික්ඛූනං ඵාසුවිහාරාය. යං සඞ්ඝසුට්ඨු තං දිට්ඨධම්මිකානං ආසවානං සංවරාය. යං සඞ්ඝසුට්ඨු තං සම්පරායිකානං ආසවානං පටිඝාතාය. යං සඞ්ඝසුට්ඨු තං අප්පසන්නානං පසාදාය. යං සඞ්ඝසුට්ඨු තං පසන්නානං භිය්යොභාවාය. යං සඞ්ඝසුට්ඨු තං සද්ධම්මට්ඨිතියා. යං සඞ්ඝසුට්ඨු තං විනයානුග්ගහාය.

යං සඞ්ඝඵාසු තං දුම්මඞ්කූනං පුග්ගලානං නිග්ගහාය. යං සඞ්ඝඵාසු තං පෙසලානං භික්ඛූනං ඵාසුවිහාරාය . යං සඞ්ඝඵාසු තං දිට්ඨධම්මිකානං ආසවානං සංවරාය. යං සඞ්ඝඵාසු තං සම්පරායිකානං ආසවානං පටිඝාතාය. යං සඞ්ඝඵාසු තං අප්පසන්නානං පසාදාය. යං සඞ්ඝඵාසු තං පසන්නානං භිය්යොභාවාය. යං සඞ්ඝඵාසු තං සද්ධම්මට්ඨිතියා. යං සඞ්ඝඵාසු තං විනයානුග්ගහාය. යං සඞ්ඝඵාසු තං සඞ්ඝසුට්ඨු.

යං දුම්මඞ්කූනං පුග්ගලානං නිග්ගහාය…පෙ… යං පෙසලානං භික්ඛූනං ඵාසුවිහාරාය… යං දිට්ඨධම්මිකානං ආසවානං සංවරාය… යං සම්පරායිකානං ආසවානං පටිඝාතාය… යං අප්පසන්නානං පසාදාය… යං පසන්නානං භිය්යොභාවාය… යං සද්ධම්මට්ඨිතියා… යං විනයානුග්ගහාය තං සඞ්ඝසුට්ඨු. යං විනයානුග්ගහාය තං සඞ්ඝඵාසු. යං විනයානුග්ගහාය තං දුම්මඞ්කූනං පුග්ගලානං නිග්ගහාය. යං විනයානුග්ගහාය තං පෙසලානං භික්ඛූනං ඵාසුවිහාරාය. යං විනයානුග්ගහාය තං දිට්ඨධම්මිකානං ආසවානං සංවරාය. යං විනයානුග්ගහාය තං සම්පරායිකානං ආසවානං පටිඝාතාය. යං විනයානුග්ගහාය තං අප්පසන්නානං පසාදාය. යං විනයානුග්ගහාය තං පසන්නානං භිය්යොභාවාය. යං විනයානුග්ගහාය තං සද්ධම්මට්ඨිතියාති.

අත්ථසතං ධම්මසතං, ද්වෙ ච නිරුත්තිසතානි;

චත්තාරි ඤාණසතානි, අත්ථවසෙ පකරණෙති.

අත්ථවසපකරණං නිට්ඨිතං.

මහාවග්ගො නිට්ඨිතො.

තස්සුද්දානං –

පඨමං අට්ඨපුච්ඡායං, පච්චයෙසු පුනට්ඨ ච;

භික්ඛූනං සොළස එතෙ, භික්ඛුනීනඤ්ච සොළස.

පෙය්යාලඅන්තරා භෙදා, එකුත්තරිකමෙව ච;

පවාරණත්ථවසිකා, මහාවග්ගස්ස සඞ්ගහොති.

අත්ථවසපකරණං නිට්ඨිතං.