📜

අපරගාථාසඞ්ගණිකං

1. චොදනාදිපුච්ඡාවිස්සජ්ජනා

359.

චොදනා ¶ ¶ ¶ ¶ කිමත්ථාය, සාරණා කිස්ස කාරණා;

සඞ්ඝො කිමත්ථාය, මතිකම්මං පන කිස්ස කාරණා.

චොදනා සාරණත්ථාය, නිග්ගහත්ථාය සාරණා;

සඞ්ඝො පරිග්ගහත්ථාය, මතිකම්මං පන පාටියෙක්කං.

මා ඛො තුරිතො අභණි, මා ඛො චණ්ඩිකතො භණි;

මා ඛො පටිඝං ජනයි, සචෙ අනුවිජ්ජකො තුවං.

මා ඛො සහසා අභණි, කථං විග්ගාහිකං අනත්ථසංහිතං;

සුත්තෙ විනයෙ අනුලොමෙ, පඤ්ඤත්තෙ අනුලොමිකෙ.

අනුයොගවත්තං නිසාමය, කුසලෙන බුද්ධිමතා කතං;

සුවුත්තං සික්ඛාපදානුලොමිකං, ගතිං න නාසෙන්තො සම්පරායිකං;

හිතෙසී අනුයුඤ්ජස්සු, කාලෙනත්ථූපසංහිතං.

චුදිතස්ස ච චොදකස්ස ච;

සහසා වොහාරං මා පධාරෙසි;

චොදකො ආහ ආපන්නොති;

චුදිතකො ආහ අනාපන්නොති.

උභො ¶ අනුක්ඛිපන්තො, පටිඤ්ඤානුසන්ධිතෙන ¶ කාරයෙ;

පටිඤ්ඤා ලජ්ජීසු කතා, අලජ්ජීසු එවං න විජ්ජති;

බහුම්පි අලජ්ජී භාසෙය්ය, වත්තානුසන්ධිතෙන [වුත්තානුසන්ධිතෙන (සී. ස්යා. ක.)] කාරයෙ.

අලජ්ජී කීදිසො හොති, පටිඤ්ඤා යස්ස න රූහති;

එතඤ්ච [එවඤ්ච (ක.)] තාහං පුච්ඡාමි, කීදිසො වුච්චති අලජ්ජී පුග්ගලො.

සඤ්චිච්ච ආපත්තිං ආපජ්ජති, ආපත්තිං පරිගූහති;

අගතිගමනඤ්ච ගච්ඡති, එදිසො වුච්චති අලජ්ජීපුග්ගලො.

සච්චං අහම්පි ජානාමි, එදිසො වුච්චති අලජ්ජීපුග්ගලො;

අඤ්ඤඤ්ච තාහං පුච්ඡාමි, කීදිසො වුච්චති ලජ්ජීපුග්ගලො.

සඤ්චිච්ච ආපත්තිං නාපජ්ජති, ආපත්තිං න පරිගූහති;

අගතිගමනං ¶ න ගච්ඡති, එදිසො වුච්චති ලජ්ජීපුග්ගලො.

සච්චං ¶ අහම්පි ජානාමි, එදිසො වුච්චති ලජ්ජීපුග්ගලො;

අඤ්ඤඤ්ච තාහං පුච්ඡාමි, කීදිසො වුච්චති අධම්මචොදකො.

අකාලෙ ¶ චොදෙති අභූතෙන;

ඵරුසෙන අනත්ථසංහිතෙන;

දොසන්තරො චොදෙති නො මෙත්තාචිත්තො;

එදිසො වුච්චති අධම්මචොදකො.

සච්චං අහම්පි ජානාමි, එදිසො වුච්චති අධම්මචොදකො;

අඤ්ඤඤ්ච තාහං පුච්ඡාමි, කීදිසො වුච්චති ධම්මචොදකො.

කාලෙන චොදෙති භූතෙන, සණ්හෙන අත්ථසංහිතෙන;

මෙත්තාචිත්තො චොදෙති නො දොසන්තරො;

එදිසො වුච්චති ධම්මචොදකො.

සච්චං ¶ අහම්පි ජානාමි, එදිසො වුච්චති ධම්මචොදකො;

අඤ්ඤඤ්ච තාහං පුච්ඡාමි, කීදිසො වුච්චති බාලචොදකො.

පුබ්බාපරං න ජානාති, පුබ්බාපරස්ස අකොවිදො;

අනුසන්ධිවචනපථං න ජානාති;

අනුසන්ධිවචනපථස්ස අකොවිදො;

එදිසො වුච්චති බාලචොදකො.

සච්චං අහම්පි ජානාමි, එදිසො වුච්චති බාලචොදකො;

අඤ්ඤඤ්ච ¶ තාහං පුච්ඡාමි, කීදිසො වුච්චති පණ්ඩිතචොදකො.

පුබ්බාපරම්පි ජානාති, පුබ්බාපරස්ස කොවිදො;

අනුසන්ධිවචනපථං ජානාති, අනුසන්ධිවචනපථස්ස කොවිදො;

එදිසො වුච්චති පණ්ඩිතචොදකො.

සච්චං අහම්පි ජානාමි, එදිසො වුච්චති පණ්ඩිතචොදකො;

අඤ්ඤඤ්ච තාහං පුච්ඡාමි, චොදනා කින්ති වුච්චති.

සීලවිපත්තියා චොදෙති, අථො ආචාරදිට්ඨියා;

ආජීවෙනපි චොදෙති, චොදනා තෙන වුච්චතීති.

අපරං ගාථාසඞ්ගණිකං නිට්ඨිතං.