📜

4. පවාරණක්ඛන්ධකං

අඵාසුකවිහාරකථාවණ්ණනා

209. පවාරණක්ඛන්ධකෙ ආදිතො ලාපො ආලාපො, වචනපටිවචනවසෙන සමං ලාපො සල්ලාපො. පිණ්ඩාය පටික්කමෙය්යාති ගාමෙ පිණ්ඩාය චරිත්වා පච්චාගච්ඡෙය්ය. අවක්කාරපාතිං ධොවිත්වා උපට්ඨාපෙය්යාති අතිරෙකපිණ්ඩපාතං අපනෙත්වා ඨපනත්ථාය එකං සමුග්ගපාතිං ධොවිත්වා ඨපෙය්ය. සමුග්ගපාති නාම සමුග්ගපුටසදිසා පාති. අප්පහරිතෙති අපරූළ්හහරිතෙ, යස්මිං ඨානෙ පිණ්ඩපාතජ්ඣොත්ථරණෙන විනස්සනධම්මානි තිණානි නත්ථි, තස්මින්ති අත්ථො. තෙන නිත්තිණඤ්ච මහාතිණගහනඤ්ච යත්ථ සකටෙනපි ඡඩ්ඩිතෙ පිණ්ඩපාතෙ තිණානි න විනස්සන්ති, තඤ්ච ඨානං පරිග්ගහිතං හොති. භූතගාමසික්ඛාපදස්ස හි අවිකොපනත්ථමෙතං වුත්තං. අප්පාණකෙති නිප්පාණකෙ, පිණ්ඩපාතජ්ඣොත්ථරණෙන මරිතබ්බපාණකරහිතෙ වා මහාඋදකක්ඛන්ධෙ. පරිත්තොදකෙ එව හි භත්තපක්ඛෙපෙන ආලුළිතෙ සුඛුමපාණකා මරන්ති, න මහාතළාකාදීසූති. පාණකානුරක්ඛණත්ථඤ්හි එතං වුත්තං. ඔපිලාපෙය්යාති නිමුජ්ජාපෙය්ය.

වච්චඝටන්ති ආචමනකුම්භී. රිත්තන්ති රිත්තකං. තුච්ඡන්ති තස්සෙව වෙවචනං. අවිසය්හන්ති උක්ඛිපිතුං අසක්කුණෙය්යං අතිභාරිකං. හත්ථවිකාරෙනාති හත්ථසඤ්ඤාය. හත්ථෙහි උක්ඛිපනං හත්ථවිලඞ්ඝනං. තෙනාහ ‘‘හත්ථුක්ඛෙපකෙනා’’ති. අථ වා විලඞ්ඝෙති දෙසන්තරං පාපෙති එතෙනාති විලඞ්ඝකො, හත්ථො එව විලඞ්ඝකො හත්ථවිලඞ්ඝකො, තෙන හත්ථවිලඞ්ඝකෙන, අඤ්ඤමඤ්ඤං සංසිබ්බිතහත්ථෙනාති වුත්තං හොති. ද්වෙ හි ජනා හත්ථෙන හත්ථං සංසිබ්බෙත්වා ද්වීසු හත්ථෙසු ඨපෙත්වා උට්ඨපෙන්තා හත්ථවිලඞ්ඝකෙන උට්ඨපෙන්ති නාම. තිත්ථියසමාදානන්ති තිත්ථියෙහි සමාදාතබ්බං.

අඵාසුකවිහාරකථාවණ්ණනා නිට්ඨිතා.

පවාරණාභෙදකථාවණ්ණනා

212. ද්වෙමා, භික්ඛවෙ, පවාරණා චාතුද්දසිකා ච පන්නරසිකා චාති එත්ථ පුරිමවස්සංවුත්ථානං පුබ්බකත්තිකපුණ්ණමා, තෙසංයෙව සචෙ භණ්ඩනකාරකෙහි උපද්දුතා පවාරණං පච්චුක්කඩ්ඪන්ති, අථ කත්තිකමාසස්ස කාළපක්ඛචාතුද්දසො වා පච්ඡිමකත්තිකපුණ්ණමා වා, පච්ඡිමවස්සංවුත්ථානඤ්ච පච්ඡිමකත්තිකපුණ්ණමා එව වාති ඉමෙ තයො පවාරණදිවසාති වෙදිතබ්බා. ඉදඤ්ච පකතිචාරිත්තවසෙන වුත්තං, තථාරූපපච්චයෙ පන සති ද්වින්නං කත්තිකපුණ්ණමානං පුරිමෙසු චාතුද්දසෙසුපි පවාරණං කාතුං වට්ටති, තෙනෙව මහාවිහාරෙ භික්ඛූ චාතුද්දසියා පවාරෙත්වා පන්නරසියා කායසාමග්ගිං දෙන්ති, චෙතියගිරිමහදස්සනත්ථම්පි අට්ඨමියා ගච්ඡන්ති, තම්පි චාතුද්දසියං පවාරෙතුකාමානඤ්ඤෙව හොති.

පවාරණාදානානුජානනකථාවණ්ණනා

213. සචෙ පන වුඩ්ඪතරො හොතීති සචෙ පවාරණදායකො භික්ඛු වුඩ්ඪතරො හොති. තෙන ච භික්ඛුනාති පවාරණදායකෙන භික්ඛුනා.

අනාපත්තිපන්නරසකකථාවණ්ණනා

222. පන්නරසකෙසු පවාරිතමත්තෙති පවාරිතසමනන්තරං. අවුට්ඨිතාය පරිසායාති පවාරෙත්වා පච්ඡා අඤ්ඤමඤ්ඤං කථෙන්තියා. එකච්චාය වුට්ඨිතායාති එකච්චෙසු යථානිසින්නෙසු එකච්චෙසු සකසකට්ඨානං ගතෙසු. පුන පවාරිතබ්බන්ති පුනපි සබ්බෙහි සමාගන්ත්වා පවාරෙතබ්බං. ආගච්ඡන්ති සමසමා, තෙසං සන්තිකෙ පවාරෙතබ්බන්ති ගතෙ අනානෙත්වා නිසින්නානඤ්ඤෙව සන්තිකෙ පවාරෙතබ්බං. සබ්බාය වුට්ඨිතාය පරිසාය ආගච්ඡන්ති සමසමා, තෙසං සන්තිකෙ පවාරෙතබ්බන්ති යදි සබ්බෙ වුට්ඨහිත්වා ගතා සන්නිපාතෙතුඤ්ච න සක්කා, එකච්චෙ සන්නිපාතෙත්වා පවාරෙතුං වට්ටති, ඤත්තිං ඨපෙත්වා කත්තබ්බසඞ්ඝකම්මාභාවා වග්ගං න හොති. උපොසථෙපි එසෙව නයො.

පවාරණාඨපනකථාවණ්ණනා

237. ‘‘නත්ථි දින්න’’න්තිආදිනයප්පවත්තා දසවත්ථුකා මිච්ඡාදිට්ඨි. ‘‘හොති තථාගතො පරං මරණා , න හොති තථාගතො පරං මරණා’’තිආදිනා සස්සතුච්ඡෙදසඞ්ඛාතං අන්තං ගණ්හාතීති අන්තග්ගාහිකා.

භණ්ඩනකාරකවත්ථුකථාවණ්ණනා

240. චතුත්ථෙකතෙ සුණන්තීති චතුත්ථෙ පන්නරසිකුපොසථෙ කතෙ අම්හාකං පවාරණං ඨපෙස්සන්තීති සුණන්ති. එවම්පි ද්වෙ චාතුද්දසිකා හොන්තීති තතියෙන සද්ධිං ද්වෙ චාතුද්දසිකා හොන්ති.

පවාරණාසඞ්ගහකථාවණ්ණනා

241. අයං පවාරණාසඞ්ගහො එකස්ස දින්නොපි සබ්බෙසං දින්නොව හොතීති ආහ ‘‘එකස්සපි වසෙන දාතබ්බො’’ති. ආගන්තුකා තෙසං සෙනාසනං ගහෙතුං න ලභන්තීති සචෙපි සට්ඨිවස්සභික්ඛූ ආගච්ඡන්ති, තෙසං සෙනාසනං ගහෙතුං න ලභන්ති. පවාරෙත්වා පන අන්තරාපි චාරිකං පක්කමිතුං ලභන්තීති පවාරණාසඞ්ගහෙ කතෙ අන්තරා පක්කමිතුකාමා සඞ්ඝං සන්නිපාතාපෙත්වා පවාරෙතුං ලභන්ති. සෙසමෙත්ථ පාළිතො අට්ඨකථාතො ච සුවිඤ්ඤෙය්යමෙව.

පවාරණක්ඛන්ධකවණ්ණනා නිට්ඨිතා.