📜

2. පාරිවාසිකක්ඛන්ධකං

පාරිවාසිකවත්තකථාවණ්ණනා

75. පාරිවාසිකක්ඛන්ධකෙ නවකතරං පාරිවාසිකන්ති අත්තනො නවකතරං පාරිවාසිකං. පාරිවාසිකස්ස හි අත්තනො නවකතරං පාරිවාසිකං ඨපෙත්වා අඤ්ඤෙ මූලායපටිකස්සනාරහමානත්තාරහමානත්තචාරිකඅබ්භානාරහාපි පකතත්තට්ඨානෙයෙව තිට්ඨන්ති. තෙනාහ ‘‘අන්තමසො මූලායපඅකස්සනාරහාදීනම්පී’’ති. පාදෙ ඝංසෙන්ති එතෙනාති පාදඝංසනං, සක්ඛරකථලාදි. ‘‘අනුජානාමි, භික්ඛවෙ, තිස්සො පාදඝංසනියො සක්ඛරං කථලං සමුද්දඵෙණක’’න්ති (චූළව. 269) හි වුත්තං. සද්ධිවිහාරිකාදීනම්පි සාදියන්තස්සාති සද්ධිවිහාරිකානම්පි අභිවාදනාදිං සාදියන්තස්ස. ‘‘මා මං ගාමප්පවෙසනං ආපුච්ඡථා’’ති වුත්තෙ අනාපුච්ඡාපි ගාමං පවිසිතුං වට්ටති. යො යො වුඩ්ඪොති පාරිවාසිකෙසු භික්ඛූසු යො යො වුඩ්ඪො. නවකතරස්ස සාදිතුන්ති පාරිවාසිකනවකතරස්ස අභිවාදනාදිං සාදිතුං.

තත්ථෙවාති සඞ්ඝනවකට්ඨානෙයෙව. අත්තනො පාළියා පවාරෙතබ්බන්ති අත්තනො වස්සග්ගෙන පත්තපාළියා පවාරෙතබ්බං, න පන සබ්බෙසු පවාරිතෙසූති අත්ථො. යදි පන න ගණ්හාති න විස්සජ්ජෙතීති යදි පුරිමදිවසෙ අත්තනො න ගණ්හාති ගහෙත්වා ච න විස්සජ්ජෙති. චතුස්සාලභත්තන්ති භොජනසාලායං පටිපාටියා දිය්යමානභත්තං. හත්ථපාසෙ ඨිතෙනාති දායකස්ස හත්ථපාසෙ ඨිතෙන.

76. අඤ්ඤො සාමණෙරො න ගහෙතබ්බොති උපජ්ඣායෙන හුත්වා අඤ්ඤො සාමණෙරො න ගහෙතබ්බො. උපජ්ඣං දත්වා ගහිතසාමණෙරාපීති පකතත්තකාලෙ උපජ්ඣං දත්වා ගහිතසාමණෙරාපි. ලද්ධසම්මුතිකෙන ආණත්තොපි ගරුධම්මෙහි අඤ්ඤෙහි වා ඔවදිතුං ලභතීති ආහ ‘‘පටිබලස්ස වා භික්ඛුස්ස භාරො කාතබ්බො’’ති. ආගතා භික්ඛුනියො වත්තබ්බාති සම්බන්ධො. සවචනීයන්ති සදොසං . ජෙට්ඨකට්ඨානං න කාතබ්බන්ති පධානට්ඨානං න කාතබ්බං. කිං තන්ති ආහ ‘‘පාතිමොක්ඛුද්දෙසකෙන වා’’තිආදි.

රජෙහි හතා උපහතා භූමි එතිස්සාති රජොහතභූමි, රජොකිණ්ණභූමීති අත්ථො. පච්චයන්ති වස්සාවාසිකලාභං සන්ධාය වුත්තං. එකපස්සෙ ඨත්වාති පාළිං විහාය භික්ඛූනං පච්ඡතො ඨත්වා. සෙනාසනං න ලභතීති සෙය්යාපරියන්තභාගිතාය වස්සග්ගෙන ගණ්හිතුං න ලභති. අස්සාති භවෙය්ය. ‘‘ආගන්තුකෙන ආරොචෙතබ්බං, ආගන්තුකස්ස ආරොචෙතබ්බ’’න්ති අවිසෙසෙන වුත්තත්තා සචෙ ද්වෙ පාරිවාසිකා ගතට්ඨානෙ අඤ්ඤමඤ්ඤං පස්සන්ති, උභොහිපි අඤ්ඤමඤ්ඤස්ස ආරොචෙතබ්බං. යථා බහි දිස්වා ආරොචිතස්ස භික්ඛුනො විහාරං ආගතෙ පුන ආරොචනකිච්චං නත්ථි, එවං අඤ්ඤං විහාරං ගතෙනපි තත්ථ පුබ්බෙ ආරොචිතස්ස පුන ආරොචනකිච්චං නත්ථීති වදන්ති.

81. අවිසෙසෙනාති පාරිවාසිකස්ස උක්ඛිත්තකස්ස ච අවිසෙසෙන. ඔබද්ධන්ති පලිබුද්ධං.

83. සහවාසොති වුත්තප්පකාරෙ ඡන්නෙ පකතත්තෙන භික්ඛුනා සද්ධිං සයනමෙව අධිප්පෙතං, න සෙසඉරියාපථකප්පනං. සෙසමෙත්ථ සුවිඤ්ඤෙය්යමෙව.

පාරිවාසිකක්ඛන්ධකවණ්ණනා නිට්ඨිතා.