📜

පඨමගාථාසඞ්ගණිකං

සත්තනගරෙසු පඤ්ඤත්තසික්ඛාපදවණ්ණනා

335. අඩ්ඪුඩ්ඪසතානීති තීණි සතානි පඤ්ඤාසඤ්ච සික්ඛාපදානි. විග්ගහන්ති මනුස්සවිග්ගහං. අතිරෙකන්ති දසාහපරමං අතිරෙකචීවරං. කාළකන්ති ‘‘සුද්ධකාළකාන’’න්ති වුත්තකාළකං. භූතන්ති භූතාරොචනං. පරම්පරභත්තන්ති පරම්පරභොජනං. භික්ඛුනීසු ච අක්කොසොති ‘‘යා පන භික්ඛුනී භික්ඛුං අක්කොසෙය්ය වා පරිභාසෙය්ය වා’’ති (පාචි. 1029) වුත්තසික්ඛාපදං. අන්තරවාසකන්ති අඤ්ඤාතිකාය භික්ඛුනියා චීවරපටිග්ගණ්හනං. රූපියන්ති රූපියසංවොහාරං. සුත්තන්ති ‘‘සාමං සුත්තං විඤ්ඤාපෙත්වා තන්තවායෙහී’’ති (පාරා. 637) වුත්තසික්ඛාපදං. උජ්ඣාපනකෙති උජ්ඣාපනකෙ ඛිය්යනකෙ පාචිත්තියං. පාචිතපිණ්ඩන්ති භික්ඛුනීපරිපාචිතං. චීවරං දත්වාති ‘‘සමග්ගෙන සඞ්ඝෙන චීවරං දත්වා’’ති (පාචි. 485) වුත්තසික්ඛාපදං. වොසාසන්තීති ‘‘භික්ඛූ පනෙව කුලෙසු නිමන්තිතා භුඤ්ජන්ති, තත්ර චෙසා භික්ඛුනී’’ති (පාචි. 558) වුත්තපාටිදෙසනීයං. ගිරග්ගන්ති ‘‘යා පන භික්ඛුනී නච්චං වා ගීතං වා’’ති (පාචි. 834) වුත්තසික්ඛාපදං. චරියාති ‘‘අන්තොවස්සං චාරිකං චරෙය්යා’’ති (පාචි. 970) ච, ‘‘වස්සංවුත්ථා චාරිකං න පක්කමෙය්යා’’ති (පාචි. 974) ච වුත්තසික්ඛාපදද්වයං. ඡන්දදානෙනාති පාරිවාසිකෙන ඡන්දදානෙන.

පාරාජිකානි චත්තාරීති භික්ඛුනීනං චත්තාරි පාරාජිකානි. කුටීති කුටිකාරසික්ඛාපදං. කොසියන්ති කොසියමිස්සකසික්ඛාපදං. සෙය්යාති අනුපසම්පන්නෙන සහසෙය්යසික්ඛාපදං. ඛණනෙති පථවීඛණනං. ගච්ඡ දෙවතෙති භූතගාමසික්ඛාපදං. සිඤ්චන්ති සප්පාණකඋදකසිඤ්චනං. මහාවිහාරොති මහල්ලකවිහාරො. අඤ්ඤන්ති අඤ්ඤවාදකං. ද්වාරන්ති යාව ද්වාරකොසා. සහධම්මොති සහධම්මිකං වුච්චමානො. පයොපානන්ති සුරුසුරුකාරකං. එළකලොමානීති එළකලොමධොවාපනං. පත්තොති ඌනපඤ්චබන්ධනපත්තො. ඔවාදොති භික්ඛුනුපස්සයං උපසඞ්කමිත්වා ඔවාදො. භෙසජ්ජන්ති තදුත්තරිභෙසජ්ජවිඤ්ඤාපනං. සූචීති අට්ඨිමයාදිසූචිඝරං. ආරඤ්ඤිකොති ‘‘යානි ඛො පන තානි ආරඤ්ඤකානි සෙනාසනානී’’තිආදිනා (පාචි. 570) වුත්තපාටිදෙසනීයං . ඔවාදොති ‘‘යා පන භික්ඛුනී ඔවාදාය වා සංවාසාය වා න ගච්ඡෙය්යා’’ති (පාචි. 1055) වුත්තසික්ඛාපදං.

පාරාජිකානි චත්තාරීතිආදිනා ඡසු නගරෙසු පඤ්ඤත්තං එකතො සම්පිණ්ඩිත්වා සාවත්ථියා පඤ්ඤත්තං විසුං ගණෙත්වා සබ්බානෙව සික්ඛාපදානි ද්වීහි රාසීහි සඞ්ගණ්හාති.

සත්තනගරෙසු පඤ්ඤත්තසික්ඛාපදවණ්ණනා නිට්ඨිතා.

චතුවිපත්තිවණ්ණනා

336. එකතිංස ගරුකා නාම උභතො අට්ඨ පාරාජිකා, භික්ඛූනං තෙරස, භික්ඛුනීනං දස සඞ්ඝාදිසෙසා. අට්ඨෙත්ථ අනවසෙසාති එතෙසු යථාවුත්තගරුකෙසු සාධාරණාසාධාරණවසෙන අට්ඨ පාරාජිකා අනවසෙසා නාම.

අසාධාරණාදිවණ්ණනා

338. ‘‘ධොවනඤ්ච පටිග්ගහො’’ති ගාථා අට්ඨකථාචරියානං. තත්ථ ධොවනඤ්ච පටිග්ගහොති අඤ්ඤාතිකාය භික්ඛුනියා චීවරධොවාපනං චීවරපටිග්ගහණඤ්ච. කොසෙය්ය…පෙ… ද්වෙ ලොමාති එළකලොමවග්ගෙ ආදිතො සත්ත සික්ඛාපදානි වුත්තානි. වස්සිකාති වස්සිකසාටිකසික්ඛාපදං. ආරඤ්ඤකෙන චාති සාසඞ්කසික්ඛාපදං වුත්තං. පණීතන්ති පණීතභොජනවිඤ්ඤත්ති. ඌනන්ති ඌනවීසතිවස්සසික්ඛාපදං. නිසීදනෙ ච යා සික්ඛා, වස්සිකා යා ච සාටිකාති නිසීදනවස්සිකසාටිකානං පමාණාතික්කමො.

ආපත්තික්ඛන්ධා චෙව උපොසථාදීනි ච ‘‘පාරාජිකසඞ්ඝාදිසෙසා’’තිආදිනා විභත්තත්තා ‘‘විභත්තියො’’ති වුත්තානි. තෙවීසති සඞ්ඝාදිසෙසාති භික්ඛුනීනං ආගතානි දස, භික්ඛූනං තෙරසාති තෙවීසති. ද්වෙචත්තාලීස නිස්සග්ගියාතිආදීසුපි එසෙව නයො. ද්වීහි…පෙ… කිච්චං එකෙන සම්මතීති ද්වීහි විවාදාධිකරණං, චතූහි අනුවාදාධිකරණං, තීහි ආපත්තාධිකරණං, එකෙන කිච්චාධිකරණං සම්මතීති අත්ථො.

339. නිරඞ්කතොති සඞ්ඝම්හා අපසාරිතො.