📜
අධිකරණභෙදවණ්ණනා
340. යස්මා ¶ අධිකරණං උක්කොටෙන්තො සමථප්පත්තමෙව උක්කොටෙති, තස්මා ‘‘විවාදාධිකරණං උක්කොටෙන්තො කති සමථෙ උක්කොටෙතී’’තිආදි වුත්තං.
341. පාළිමුත්තකවිනිච්ඡයෙනෙවාති විනයලක්ඛණං විනා කෙවලං ධම්මදෙසනාමත්තවසෙනෙවාති අත්ථො. යෙනාපි විනිච්ඡයෙනාති පාළිමුත්තකවිනිච්ඡයමෙව සන්ධාය වුත්තං. ඛන්ධකතො ච පරිවාරතො ච සුත්තෙනාති ඛන්ධකපරිවාරතො ආනීතසුත්තෙන. නිජ්ඣාපෙන්තීති පඤ්ඤාපෙන්ති.
342. කිච්චං නිස්සාය උප්පජ්ජනකකිච්චානන්ති පුබ්බෙ කතඋක්ඛෙපනීයාදිකිච්චං නිස්සාය උප්පජ්ජනකකිච්චානං. කීදිසානං? යාවතතියසමනුභාසනාදීනං.
344. අධිකරණෙසු යෙන අධිකරණෙන සම්මන්ති, තං දස්සෙතුං වුත්තන්ති යදා අධිකරණෙහි සම්මන්ති, තදා කිච්චාධිකරණෙනෙව සම්මන්ති, න අඤ්ඤෙහි අධිකරණෙහීති දස්සනත්ථං වුත්තන්ති අධිප්පායො.
353. ‘‘සත්තන්නං සමථානං කතමෙ ඡත්තිංස සමුට්ඨානා’’ති පුච්ඡිත්වාපි ‘‘කම්මස්ස කිරියා කරණ’’න්තිආදිනා සම්මුඛාවිනයස්ස සමුට්ඨානානි අවිභජිත්වාව සතිවිනයාදීනං ඡන්නඤ්ඤෙව ඡ සමුට්ඨානානි විභත්තානි, තං කස්මාති ආහ ‘‘කිඤ්චාපි සත්තන්නං සමථාන’’න්තිආදි. සතිවිනයාදීනං විය සඞ්ඝසම්මුඛතාදීනං කිච්චයතා නාම නත්ථීති ආහ ‘‘කම්මසඞ්ගහාභාවෙනා’’ති.