📜

උපාලිපඤ්චකවණ්ණනා

420-421. ඔමද්දකාරකොති ඔමද්දිත්වා අභිභවිත්වා කාරකො. උපත්ථම්භො න දාතබ්බොති සාමග්ගිවිනාසාය අනුබලං න දාතබ්බං. දිට්ඨාවිකම්මම්පි කත්වාති ‘‘න මෙතං ඛමතී’’ති දිට්ඨිං ආවි කත්වාපි.

වොහාරවග්ගවණ්ණනා

424. කායප්පයොගෙන ආපජ්ජිතබ්බා කායප්පයොගා. වචීපයොගෙන ආපජ්ජිතබ්බා වචීපයොගා. නවසු ඨානෙසූති ඔසාරණාදීසු නවසු ඨානෙසු. ද්වීසු ඨානෙසූති ඤත්තිදුතියඤත්තිචතුත්ථකම්මෙසු. තස්මාති යස්මා මහාඅට්ඨකථායං වුත්තනයෙන උභතොවිභඞ්ගා අසඞ්ගහිතා, තස්මා. යං කුරුන්දියං වුත්තං, තං ගහෙතබ්බන්ති සම්බන්ධො.

දිට්ඨාවිකම්මවග්ගවණ්ණනා

425. ‘‘චතූහි පඤ්චහී’’ති වචනතො ද්වීහි වා තීහි වා එකතො දෙසෙතුං වට්ටති, තතො පරං න වට්ටති. මාළකසීමායාති ඛණ්ඩසීමාය. අවිප්පවාසසීමායාති මහාසීමාය.

මුසාවාදවග්ගවණ්ණනා

444. පරියායෙන ජානන්තස්ස වුත්තමුසාවාදොති යස්ස කස්සචි ජානන්තස්ස පරියායෙන වුත්තමුසාවාදොති අත්ථො.

446. අනුයොගො න දාතබ්බොති තෙන වුත්තං අනාදියිත්වා තුණ්හී භවිතබ්බන්ති අත්ථො.

භික්ඛුනොවාදවග්ගවණ්ණනා

454. එකූනවීසතිභෙදායාති මග්ගපච්චවෙක්ඛණාදිවසෙන එකූනවීසතිභෙදාය.

අධිකරණවූපසමවග්ගවණ්ණනා

458. පඤ්චහි කාරණෙහීති ඉදං අත්ථනිප්ඵාදනකානි තෙසං පුබ්බභාගානි ච කාරණභාවසාමඤ්ඤෙන එකජ්ඣං ගහෙත්වා වුත්තං, න පන සබ්බෙසං පඤ්චන්නං සමානයොගක්ඛෙමත්තා. අනුස්සාවනෙනාති භෙදස්ස අනුරූපසාවනෙන. යථා භෙදො හොති, එවං භින්දිතබ්බානං භික්ඛූනං අත්තනො වචනස්ස සාවනෙන විඤ්ඤාපනෙනාති අත්ථො. තෙනාහ ‘‘නනු තුම්හෙ’’තිආදි. කණ්ණමූලෙ වචීභෙදං කත්වාති එතෙන පාකටං කත්වා භෙදකරවත්ථුදීපනං වොහරණං. තත්ථ අත්තනා විනිච්ඡිතමත්තං රහස්සවසෙන විඤ්ඤාපනං අනුස්සාවනන්ති දස්සෙති. කම්මමෙව උද්දෙසො වා පමාණන්ති තෙහි සඞ්ඝභෙදසිද්ධිතො පමාණං, ඉතරෙ පන තෙසං සම්භාරභූතා. තෙනාහ ‘‘වොහාරා’’තිආදි. තත්ථාති වොහරණෙ.

කථිනත්ථාරවග්ගවණ්ණනා

467. අන්තරා වුත්තකාරණෙනාති ‘‘තඤ්හි වන්දන්තස්ස මඤ්චපාදාදීසුපි නලාටං පටිහඤ්ඤෙය්යා’’තිආදිනා වුත්තකාරණෙන.