📜
අපරදුතියගාථාසඞ්ගණිකං
කායිකාදිආපත්තිවණ්ණනා
474. විනයෙ ගරුකා විනයගරුකා. කිඤ්චාපි ඉදං ද්වීසු ගාථාසු ආගතං, අඤ්ඤෙහි පන මිස්සෙත්වා වුත්තභාවතො නානාකරණං පච්චෙතබ්බං.
දෙසනාගාමිනියාදිවණ්ණනා
475. ද්වෙ සංවාසකභූමියොති එත්ථ භූමීති අවත්ථා. අඞ්ගහීනතා කාරණවෙකල්ලවසෙනපි වෙදිතබ්බාති ආහ ‘‘අපිචෙත්ථා’’තිආදි. එස නයොති ‘‘අපිචෙත්ථා’’තිආදිනා වුත්තනයො. වනප්පතිං ඡින්දන්තස්ස පාරාජිකන්ති අදින්නාදානෙ වනප්පතිකථාය ආගතං පරසන්තකං සන්ධාය වුත්තං. විස්සට්ඨිඡඩ්ඩනෙති සුක්කවිස්සට්ඨියා මොචනෙ. දුක්කටා කතාති දුක්කටං වුත්තං. පඨමසික්ඛාපදම්හියෙවාති භික්ඛුනොවාදකවග්ගස්ස පඨමසික්ඛාපදෙයෙව. ආමකධඤ්ඤං විඤ්ඤාපෙත්වා භුඤ්ජන්තියා පුබ්බපයොගෙ දුක්කටං, අජ්ඣොහාරෙ පාචිත්තියං.
පාචිත්තියවණ්ණනා
476. අබ්භුණ්හසීලොති ¶ අභිනවසීලො.
478. අසුත්තකන්ති සුත්තවිරහිතං, සුත්තතො අපනීතං නත්ථීති අත්ථො.