📜

සෙදමොචනගාථා

අවිප්පවාසාදිපඤ්හවණ්ණනා

479. සෙදමොචනගාථාසු ¶ තහින්ති තස්මිං පුග්ගලෙ. ‘‘අකප්පියසම්භොගො නාම මෙථුනධම්මාදී’’ති ගණ්ඨිපදෙසු වුත්තං. එසා පඤ්හා කුසලෙහි චින්තිතාති ලිඞ්ගවිපල්ලාසවසෙනෙතං වුත්තං, එසො පඤ්හො කුසලෙහි චින්තිතොති අත්ථො.

දසාති අවන්දියෙ දස. එකාදසාති පණ්ඩකාදයො එකාදස. උබ්භක්ඛකෙ න වදාමීති ඉමිනා මුඛෙ මෙථුනධම්මාභාවං දීපෙති. අධොනාභිං විවජ්ජියාති ඉමිනා වච්චමග්ගපස්සාවමග්ගෙසු.

ගාමන්තරපරියාපන්නං නදීපාරං ඔක්කන්තභික්ඛුනිං සන්ධායාති එත්ථ නදී භික්ඛුනියා ගාමපරියාපන්නා, පරතීරං ගාමන්තරපරියාපන්නං. තත්ථ පරතීරෙ පඨමලෙඩ්ඩුපාතප්පමාණො ගාමූපචාරො නදීපරියන්තෙන පරිච්ඡින්නො, තස්මා පරතීරෙ රතනමත්තම්පි අරඤ්ඤං නත්ථි, පරතීරඤ්ච තිණාදීහි පටිච්ඡන්නත්තා දස්සනූපචාරවිරහිතං කරොති. තත්ථ අත්තනො ගාමෙ ආපත්ති නත්ථි, පරතීරෙ පන පඨමලෙඩ්ඩුපාතසඞ්ඛාතෙ ගාමූපචාරෙයෙව පාදං ඨපෙති. අන්තරෙ අභිධම්මෙ වුත්තනයෙන අරඤ්ඤභූතං සකගාමං අතික්කමති නාම, තස්මා ගණම්හා ඔහීයනා නාම හොතීති වෙදිතබ්බං.

භික්ඛූනං සන්තිකෙ එකතොඋපසම්පන්නා නාම මහාපජාපතිපමුඛා පඤ්චසතසාකිනියො භික්ඛුනියො. මහාපජාපතිපි හි ආනන්දත්ථෙරෙන දින්නඔවාදස්ස පටිග්ගහිතත්තා භික්ඛූනං සන්තිකෙ උපසම්පන්නා නාම.

පාරාජිකාදිපඤ්හවණ්ණනා

480. සහ ¶ දුස්සෙන මෙථුනවීතික්කමස්ස සක්කුණෙය්යතාය ‘‘දුස්සකුටිආදීනි සන්ධායා’’ති වුත්තං. ලිඞ්ගපරිවත්තං සන්ධාය වුත්තාති ‘‘ලිඞ්ගපරිවත්තෙ සති පටිග්ගහණස්ස විජහනතො සාමං ගහෙත්වා භුඤ්ජිතුං න වට්ටතී’’ති ලිඞ්ගපරිවත්තනං සන්ධාය වුත්තා.

481. සුප්පතිට්ඨිතනිග්රොධසදිසන්ති යොජනද්වියොජනාදිපරමං මහානිග්රොධං සන්ධාය වුත්තං.

සෙදමොචනගාථාවණ්ණනා නිට්ඨිතා.