📜
3. නිස්සග්ගියකණ්ඩං (භික්ඛුනීවිභඞ්ගවණ්ණනා)
733. නිස්සග්ගියෙසු ¶ ¶ පඨමං උත්තානමෙව.
740. දුතියෙ ‘‘අය්යාය දම්මීති එවං පටිලද්ධන්ති නිස්සට්ඨපටිලද්ධං. තෙනෙව මාතිකාට්ඨකථායම්පි ‘‘නිස්සට්ඨං පටිලභිත්වාපි යථාදානෙයෙව උපනෙතබ්බ’’න්ති වුත්තං. යථාදානෙයෙව උපනෙතබ්බන්ති යථා දායකෙන දින්නං, තථා උපනෙතබ්බං, අකාලචීවරපක්ඛෙයෙව ඨපෙතබ්බන්ති වුත්තං හොති. එත්ථ ච භාජාපිතාය ලද්ධචීවරමෙව නිස්සග්ගියං හොති, තං විනයකම්මං කත්වාපි අත්තනා න ලභති. සෙසමෙත්ථ උත්තානමෙව. අකාලචීවරතා, තථාසඤ්ඤිතා, කාලචීවරන්ති අධිට්ඨාය ලෙසෙන භාජාපනං, පටිලාභොති ඉමානි පනෙත්ථ චත්තාරි අඞ්ගානි.
743. තතියෙ මෙතන්ති මෙ එතං. සකසඤ්ඤාය ගහිතත්තා පාචිත්තියං දුක්කටඤ්ච වුත්තං. ඉතරථා භණ්ඩග්ඝෙන කාරෙතබ්බං. උපසම්පන්නතා, පරිවත්තිතචීවරස්ස විකප්පනුපගතා, සකසඤ්ඤාය අච්ඡින්දනං වා අච්ඡින්දාපනං වාති ඉමානි පනෙත්ථ තීණි අඞ්ගානි.
748-752. චතුත්ථෙ ආහටසප්පිං දත්වාති අත්තනො දත්වා. යමකං පචිතබ්බන්ති සප්පිඤ්ච තෙලඤ්ච එකතො කත්වා පචිතබ්බං. ලෙසෙන ගහෙතුකාමතා, අඤ්ඤස්ස විඤ්ඤාපනං, පටිලාභොති ඉමානි පනෙත්ථ තීණි අඞ්ගානි.
753. පඤ්චමෙ සාති ථුල්ලනන්දා. අයන්ති අයං සික්ඛමානා. චෙතාපෙත්වාති ජානාපෙත්වා ඉච්චෙව අත්ථොති ඉධ වුත්තං, මාතිකාට්ඨකථායං (කඞ්ඛා. අට්ඨ. අඤ්ඤචෙතාපනසික්ඛාපදවණ්ණනා) පන ‘‘අඤ්ඤං චෙතාපෙත්වාති අත්තනො කප්පියභණ්ඩෙන ඉදං නාම ආහරාති අඤ්ඤං පරිවත්තාපෙත්වා’’ති වුත්තං, තස්මා ‘‘චෙතාපෙත්වා’’ති ඉමස්ස පරිවත්තාපෙත්වාතිපි අත්ථො දට්ඨබ්බො. අඤ්ඤං චෙතාපෙය්යාති ‘‘එවං මෙ ඉදං දත්වා අඤ්ඤම්පි ආහරිස්සතී’’ති මඤ්ඤමානා ‘‘න මෙ ඉමිනා අත්ථො, ඉදං නාම මෙ ආහරා’’ති තතො අඤ්ඤං චෙතාපෙය්ය.
758. ඡට්ඨෙ ¶ ¶ ධම්මකිච්චන්ති පුඤ්ඤකම්මං. පාවාරිකස්සාති දුස්සවාණිජකස්ස. යාය චෙතාපිතං, තස්සායෙව නිස්සග්ගියං නිස්සට්ඨපටිලාභො ච, තස්මා තාය භික්ඛුනියා නිස්සට්ඨං පටිලභිත්වා යථාදානෙ උපනෙතබ්බං, න අත්තනා ගහෙතබ්බං. අඤ්ඤස්සත්ථායාති චීවරාදීසු අඤ්ඤතරස්සත්ථාය. අඤ්ඤුද්දිසිකෙනාති පුරිමස්සෙවත්ථදීපනං. පරික්ඛාරෙනාති කප්පියභණ්ඩෙන.
764. සත්තමෙ සයං යාචිතකෙනාති සයං යාචිතකෙනාපීති අත්ථො. තෙනෙව පාළියං ‘‘තෙන ච පරික්ඛාරෙන සයම්පි යාචිත්වා’’ති වුත්තං, තතොයෙව මාතිකාට්ඨකථායං ‘‘සඤ්ඤාචිකෙනාති සයං යාචිතකෙනාපී’’ති අත්ථො වුත්තො.
768-773. අට්ඨමනවමදසමානි උත්තානත්ථානෙව.
784. එකාදසමෙ යස්මා පවාරිතට්ඨානෙ විඤ්ඤත්ති නාම න පටිසෙධෙතබ්බා, තස්මා භගවා ධම්මනිමන්තනවසෙන පවාරිතට්ඨානෙ ‘‘වදෙය්යාසි යෙනත්ථො’’ති වුත්තාය ‘‘චතුක්කංසපරමං විඤ්ඤාපෙතබ්බ’’න්ති පරිච්ඡෙදං දස්සෙතීති වෙදිතබ්බං. තෙනෙව මාතිකාට්ඨකථායං (කඞ්ඛා. අට්ඨ. ගරුපාවුරණසික්ඛාපදවණ්ණනා) ‘‘චෙතාපෙතබ්බන්ති ඨපෙත්වා සහධම්මිකෙ ච ඤාතකපවාරිතෙ ච අඤ්ඤෙන කිස්මිඤ්චිදෙව ගුණෙ පරිතුට්ඨෙන වදෙය්යාසි යෙනත්ථොති වුත්තාය විඤ්ඤාපෙතබ්බ’’න්ති වුත්තං.
භික්ඛුනීවිභඞ්ගෙ නිස්සග්ගියපාචිත්තියසික්ඛාපදවණ්ණනා නිට්ඨිතා.
නිස්සග්ගියකණ්ඩං නිට්ඨිතං.