📜

කඞ්ඛාවිතරණී-අට්ඨකථා

ගන්ථාරම්භකථා

බුද්ධං ධම්මඤ්ච සඞ්ඝඤ්ච, විප්පසන්නෙන චෙතසා;

වන්දිත්වා වන්දනාමාන, පූජාසක්කාරභාජනං.

ථෙරවංසප්පදීපානං, ථිරානං විනයක්කමෙ;

පුබ්බාචරියසීහානං, නමො කත්වා කතඤ්ජලී.

පාමොක්ඛං අනවජ්ජානං, ධම්මානං යං මහෙසිනා;

මුඛං මොක්ඛප්පවෙසාය, පාතිමොක්ඛං පකාසිතං.

සූරතෙන නිවාතෙන, සුචිසල්ලෙඛවුත්තිනා;

විනයාචාරයුත්තෙන, සොණත්ථෙරෙන යාචිතො.

තත්ථ සඤ්ජාතකඞ්ඛානං, භික්ඛූනං තස්ස වණ්ණනං;

කඞ්ඛාවිතරණත්ථාය, පරිපුණ්ණවිනිච්ඡයං.

මහාවිහාරවාසීනං, වාචනාමග්ගනිස්සිතං;

වත්තයිස්සාමි නාමෙන, කඞ්ඛාවිතරණිං සුභන්ති.