📜

නිදානවණ්ණනා

තත්ථ ¶ පාතිමොක්ඛන්ති පඅතිමොක්ඛං අතිපමොක්ඛං අතිසෙට්ඨං අතිඋත්තමන්ති අත්ථො. ඉති ඉමිනා වචනත්ථෙන එකවිධම්පි සීලගන්ථභෙදතො දුවිධං හොති. තථා හි ‘‘පාතිමොක්ඛසංවරසංවුතො විහරතී’’ති (ම. නි. 1.69; 3.75; විභ. 508) ච ‘‘ආදිමෙතං මුඛමෙතං පමුඛමෙතං කුසලානං ධම්මානං, තෙන වුච්චති පාතිමොක්ඛ’’න්ති (මහාව. 135) ච ආදීසු සීලං පාතිමොක්ඛන්ති වුච්චති, ‘‘උභයානි ඛො පනස්ස පාතිමොක්ඛානි විත්ථාරෙන ස්වාගතානි හොන්තී’’තිආදීසු (පාචි. 147; අ. නි. 8.52; 10.33) ගන්ථො පාතිමොක්ඛන්ති වුච්චති. තත්ථ සීලං යො නං පාති රක්ඛති, තං මොක්ඛෙති මොචයති ආපායිකාදීහි දුක්ඛෙහි, අත්තානුවාදාදීහි වා භයෙහීති පාතිමොක්ඛං. ගන්ථො පන තස්ස පාතිමොක්ඛස්ස ජොතකත්තා පාතිමොක්ඛන්ති වුච්චති. ආදිම්හි පන වුත්තො වචනත්ථො උභින්නම්පි සාධාරණො හොති.

තත්ථායං වණ්ණනා සීලපාතිමොක්ඛස්සාපි යුජ්ජති ගන්ථපාතිමොක්ඛස්සාපි, ගන්ථෙ හි වණ්ණිතෙ තස්ස අත්ථො වණ්ණිතොව හොති. තං පනෙතං ගන්ථපාතිමොක්ඛං භික්ඛුපාතිමොක්ඛං භික්ඛුනිපාතිමොක්ඛන්ති දුවිධං හොති ¶ . තත්ථ ‘‘සුණාතු මෙ, භන්තෙ, සඞ්ඝො’’තිආදිකං (මහාව. 134) පඤ්චහි උද්දෙසපරිච්ඡෙදෙහි වවත්ථිතං භික්ඛුපාතිමොක්ඛං, ‘‘සුණාතු මෙ, අය්යෙ, සඞ්ඝො’’තිආදිකං චතූහි උද්දෙසපරිච්ඡෙදෙහි වවත්ථිතං භික්ඛුනිපාතිමොක්ඛං. තත්ථ භික්ඛුපාතිමොක්ඛෙ පඤ්ච උද්දෙසා නාම නිදානුද්දෙසො, පාරාජිකුද්දෙසො, සඞ්ඝාදිසෙසුද්දෙසො, අනියතුද්දෙසො ¶ , විත්ථාරුද්දෙසොති. තත්ථ නිදානුද්දෙසො තාව ‘‘සුණාතු මෙ, භන්තෙ, සඞ්ඝො…පෙ… ආවිකතා හිස්ස ඵාසු හොති, තත්ථායස්මන්තෙ පුච්ඡාමි, කච්චිත්ථ පරිසුද්ධා, දුතියම්පි පුච්ඡාමි, කච්චිත්ථ පරිසුද්ධා, තතියම්පි පුච්ඡාමි, කච්චිත්ථ පරිසුද්ධා, පරිසුද්ධෙත්ථායස්මන්තො, තස්මා තුණ්හී, එවමෙතං ධාරයාමී’’ති වත්වා ‘‘උද්දිට්ඨං ඛො ආයස්මන්තො නිදාන’’න්තිආදිනා නයෙන අවසෙසෙ සුතෙන සාවිතෙ උද්දිට්ඨො හොති. පාරාජිකුද්දෙසාදීනං පරිච්ඡෙදා නිදානස්ස ආදිතො පට්ඨාය පාරාජිකාදීනි ඔසාපෙත්වා යොජෙතබ්බා. විත්ථාරො විත්ථාරොයෙව ¶ . ‘‘අවසෙසං සුතෙන සාවෙතබ්බ’’න්ති (මහාව. 150; පරි. 325) වචනතො පන පාරාජිකුද්දෙසාදීසු යස්මිං විප්පකතෙ අන්තරායො උප්පජ්ජති, තෙන සද්ධිං අවසෙසං සුතෙන සාවෙතබ්බං. නිදානුද්දෙසෙ පන අනිට්ඨිතෙ සුතෙන සාවෙතබ්බං නාම නත්ථි. භික්ඛුනිපාතිමොක්ඛෙ පන අනියතුද්දෙසො පරිහායති, සෙසං වුත්තනයමෙව. එවමෙතෙසං පඤ්චහි චෙව චතූහි ච උද්දෙසපරිච්ඡෙදෙහි වවත්ථිතානං ද්වින්නම්පි පාතිමොක්ඛානං අයං වණ්ණනා භවිස්සති. යස්මා පනෙත්ථ භික්ඛුපාතිමොක්ඛං පඨමං, තස්මා තස්ස තාව වණ්ණනත්ථමිදං වුච්චති.

‘‘සුණාතු මෙ’’තිආදීනං, පදානං අත්ථනිච්ඡයං;

භික්ඛවො සීලසම්පන්නා, සික්ඛාකාමා සුණන්තු මෙති.

එත්ථ හි සුණාතූතිඉදං සවනාණත්තිවචනං. මෙති යො සාවෙති, තස්ස අත්තනිද්දෙසවචනං. භන්තෙති සගාරවසප්පතිස්සවචනං. සඞ්ඝොති පුග්ගලසමූහවචනං. සබ්බමෙව චෙතං පාතිමොක්ඛුද්දෙසකෙන පඨමං වත්තබ්බවචනං. භගවතා හි පාතිමොක්ඛුද්දෙසං අනුජානන්තෙන රාජගහෙ වුත්තං, තස්මා යො පාතිමොක්ඛං උද්දිසති, තෙන සචෙ සඞ්ඝත්ථෙරො හොති, ‘‘ආවුසො’’ති වත්තබ්බං. සචෙ නවකතරො හොති, පාළියං (මහාව. 134) ආගතනයෙනෙව ‘‘භන්තෙ’’ති වත්තබ්බං. සඞ්ඝත්ථෙරො වා හි පාතිමොක්ඛං උද්දිසෙය්ය ‘‘ථෙරාධිකං පාතිමොක්ඛ’’න්තිවචනතො (මහාව. 154), නවකතරො වා ‘‘අනුජානාමි, භික්ඛවෙ, යො තත්ථ භික්ඛු බ්යත්තො පටිබලො, තස්සාධෙය්යං පාතිමොක්ඛ’’න්තිවචනතො (මහාව. 155).

‘‘සඞ්ඝො’’තිඉමිනා පන පදෙන කිඤ්චාපි අවිසෙසතො පුග්ගලසමූහො වුත්තො, අථ ඛො සො දක්ඛිණෙය්යසඞ්ඝො, සම්මුතිසඞ්ඝො චාති දුවිධො හොති. තත්ථ දක්ඛිණෙය්යසඞ්ඝොති අට්ඨ අරියපුග්ගලසමූහො වුච්චති. සම්මුතිසඞ්ඝොති අවිසෙසෙන භික්ඛුසමූහො, සො ඉධ අධිප්පෙතො. සො ¶ පනෙස කම්මවසෙන පඤ්චවිධො (මහාව. 388) හොති – චතුවග්ගො පඤ්චවග්ගො දසවග්ගො වීසතිවග්ගො අතිරෙකවීසතිවග්ගොති. තත්ථ චතුවග්ගෙන ඨපෙත්වා උපසම්පදපවාරණඅබ්භානානි සබ්බං ¶ සඞ්ඝකම්මං කාතුං වට්ටති. පඤ්චවග්ගෙන ඨපෙත්වා මජ්ඣිමෙසු ජනපදෙසු උපසම්පදඤ්ච අබ්භානකම්මඤ්ච සබ්බං සඞ්ඝකම්මං කාතුං ¶ වට්ටති. දසවග්ගෙන අබ්භානකම්මමත්තං ඨපෙත්වා සබ්බං සඞ්ඝකම්මං කාතුං වට්ටති. වීසතිවග්ගෙන න කිඤ්චි සඞ්ඝකම්මං කාතුං න වට්ටති, තථා අතිරෙකවීසතිවග්ගෙන.සො පන චතුවග්ගාදිනා සඞ්ඝෙන කත්තබ්බං කම්මං ඌනකතරෙන කාතුං න වට්ටති, අතිරෙකෙන පන වට්ටතීති දස්සනත්ථං වුත්තො. ඉමස්මිං පනත්ථෙ චතුවග්ගං උපාදාය සබ්බොපි සම්මුතිසඞ්ඝො අධිප්පෙතො.

අජ්ජුපොසථොති අජ්ජ උපොසථදිවසො, එතෙන අනුපොසථදිවසං පටික්ඛිපති. පන්නරසොති ඉමිනා අඤ්ඤං උපොසථදිවසං පටික්ඛිපති. දිවසවසෙන හි තයො උපොසථා චාතුද්දසිකො පන්නරසිකො සාමග්ගිඋපොසථොති, එවං තයො උපොසථා වුත්තා. තත්ථ හෙමන්තගිම්හවස්සානානං තිණ්ණං උතූනං තතියසත්තමපක්ඛෙසු ද්වෙ ද්වෙ කත්වා ඡ චාතුද්දසිකා, අවසෙසා අට්ඨාරස පන්නරසිකාති එවං එකසංවච්ඡරෙ චතුවීසති උපොසථා, ඉදං තාව පකතිචාරිත්තං. ‘‘අනුජානාමි, භික්ඛවෙ, සකිං පක්ඛස්ස චාතුද්දසෙ වා පන්නරසෙ වා පාතිමොක්ඛං උද්දිසිතු’’න්ති (මහාව. 136) වචනතො පන ‘‘ආගන්තුකෙහි ආවාසිකානං අනුවත්තිතබ්බ’’න්තිආදිවචනතො (මහාව. 178) ච තථාරූපපච්චයෙ සති අඤ්ඤස්මිම්පි චාතුද්දසෙ උපොසථං කාතුං වට්ටති. පුරිමවස්සංවුට්ඨානං පන පුබ්බකත්තිකපුණ්ණමා වා, තෙසංයෙව සචෙ භණ්ඩනකාරකෙහි උපද්දුතා පවාරණං පච්චුක්කඩ්ඪන්ති, අථ පුබ්බකත්තිකමාසස්ස කාළපක්ඛචාතුද්දසො වා, පච්ඡිමකත්තිකපුණ්ණමා වා, පච්ඡිමවස්සංවුට්ඨානඤ්ච පච්ඡිමකත්තිකපුණ්ණමා එවාති ඉමෙ තයො පවාරණාදිවසාපි හොන්ති, ඉදම්පි පකතිචාරිත්තමෙව. තථාරූපපච්චයෙ පන සති ද්වින්නං කත්තිකපුණ්ණමානං පුරිමෙසු චාතුද්දසෙසුපි පවාරණං කාතුං වට්ටති. යදා පන කොසම්බකක්ඛන්ධකෙ (මහාව. 451) ආගතනයෙන භින්නෙ සඞ්ඝෙ ඔසාරිතෙ තස්මිං භික්ඛුස්මිං සඞ්ඝො තස්ස වත්ථුස්ස වූපසමාය සඞ්ඝස්ස සාමග්ගිං කරොති, තදා ‘‘තාවදෙව උපොසථො කාතබ්බො, පාතිමොක්ඛං උද්දිසිතබ්බ’’න්ති (මහාව. 475) වචනතො ඨපෙත්වා චාතුද්දසපන්නරසෙ, අඤ්ඤොපි යො කොචි දිවසො සාමග්ගිඋපොසථදිවසො නාම හොති, පුරිමවස්සංවුට්ඨානං පන කත්තිකමාසබ්භන්තරෙ අයමෙව සාමග්ගිපවාරණාදිවසො නාම හොති. ඉති ඉමෙසු තීසු දිවසෙසු ‘‘පන්නරසො’’තිඉමිනා අඤ්ඤං උපොසථදිවසං පටික්ඛිපති. තස්මා ය්වායං ‘‘අජ්ජුපොසථො’’තිවචනෙන ¶ අනුපොසථදිවසො ¶ පටික්ඛිත්තො, තස්මිං උපොසථො න කාතබ්බොයෙව. යො පනායං අඤ්ඤො උපොසථදිවසො, තස්මිං උපොසථො කාතබ්බො. කරොන්තෙන පන සචෙ චාතුද්දසිකො හොති, ‘‘අජ්ජුපොසථො චාතුද්දසො’’ති වත්තබ්බං. සචෙ පන්නරසිකො හොති, ‘‘අජ්ජුපොසථො පන්නරසො’’ති වත්තබ්බං. සචෙ සාමග්ගිඋපොසථො හොති, ‘‘අජ්ජුපොසථො සාමග්ගී’’ති වත්තබ්බං.

යදි ¶ සඞ්ඝස්ස පත්තකල්ලන්ති එත්ථ පත්තො කාලො ඉමස්ස කම්මස්සාති පත්තකාලං, පත්තකාලමෙව පත්තකල්ලං. තදෙතං ඉධ චතූහි අඞ්ගෙහි සඞ්ගහිතං. යථාහු අට්ඨකථාචරියා –

‘‘උපොසථො යාවතිකා ච භික්ඛූ කම්මප්පත්තා,

සභාගාපත්තියො ච න විජ්ජන්ති;

වජ්ජනීයා ච පුග්ගලා තස්මිං න හොන්ති,

‘පත්තකල්ල’න්ති වුච්චතී’’ති. (මහාව. අට්ඨ. 168);

තත්ථ උපොසථොති තීසු උපොසථදිවසෙසු අඤ්ඤතරඋපොසථදිවසො. තස්මිඤ්හි සති ඉදං සඞ්ඝස්ස උපොසථකම්මං පත්තකල්ලං නාම හොති, නාසති. යථාහ ‘‘න ච, භික්ඛවෙ, අනුපොසථෙ උපොසථො කාතබ්බො, යො කරෙය්ය, ආපත්ති දුක්කටස්සා’’ති (මහාව. 183).

යාවතිකා ච භික්ඛූ කම්මප්පත්තාති යත්තකා භික්ඛූ තස්ස උපොසථකම්මස්ස පත්තා යුත්තා අනුරූපා, සබ්බන්තිමෙන පරිච්ඡෙදෙන චත්තාරො පකතත්තා, තෙ ච ඛො හත්ථපාසං අවිජහිත්වා එකසීමායං ඨිතා.

සීමා ච නාමෙසා බද්ධසීමා අබද්ධසීමාති දුවිධා හොති. තත්ථ එකාදස විපත්තිසීමායො අතික්කමිත්වා තිවිධසම්පත්තියුත්තා නිමිත්තෙන නිමිත්තං සම්බන්ධිත්වා සම්මතා සීමා බද්ධසීමා නාම, ‘‘අතිඛුද්දකා, අතිමහතී, ඛණ්ඩනිමිත්තා, ඡායානිමිත්තා, අනිමිත්තා, බහිසීමෙ ඨිතා සම්මතා, නදියා සම්මතා, සමුද්දෙ සම්මතා, ජාතස්සරෙ සම්මතා, සීමාය සීමං සම්භින්දන්තෙන සම්මතා, සීමාය සීමං අජ්ඣොත්ථරන්තෙන සම්මතා’’ති ඉමා හි ‘‘එකාදසහි ආකාරෙහි සීමතො කම්මානි විපජ්ජන්තී’’ති (පරි. 486) වචනතො එකාදස විපත්තිසීමායො නාම. තත්ථ අතිඛුද්දකා නාම යත්ථ එකවීසති භික්ඛූ නිසීදිතුං න සක්කොන්ති ¶ . අතිමහතී නාම යා අන්තමසො කෙසග්ගමත්තෙනාපි තියොජනං අතික්කමිත්වා සම්මතා. ඛණ්ඩනිමිත්තා නාම අඝටිතනිමිත්තා වුච්චති, පුරත්ථිමාය දිසාය නිමිත්තං කිත්තෙත්වා අනුක්කමෙනෙව දක්ඛිණාය පච්ඡිමාය උත්තරාය දිසාය කිත්තෙත්වා පුන පුරත්ථිමාය දිසාය පුබ්බකිත්තිතං ¶ පටිකිත්තෙත්වා ඨපෙතුං වට්ටති, එවං අක්ඛණ්ඩනිමිත්තා හොති. සචෙ පන අනුක්කමෙන ආහරිත්වා උත්තරාය දිසාය නිමිත්තං කිත්තෙත්වා තත්ථෙව ඨපෙති, ඛණ්ඩනිමිත්තා නාම හොති. අපරාපි ඛණ්ඩනිමිත්තා නාම යා අනිමිත්තුපගං තචසාරරුක්ඛං වා ඛාණුකං වා පංසුපුඤ්ජවාලුකපුඤ්ජානං වා අඤ්ඤතරං අන්තරා එකං නිමිත්තං කත්වා සම්මතා. ඡායානිමිත්තා නාම ¶ පබ්බතච්ඡායාදීනං යං කිඤ්චි ඡායං නිමිත්තං කත්වා සම්මතා. අනිමිත්තා නාම සබ්බෙන සබ්බං නිමිත්තානි අකිත්තෙත්වා සම්මතා. බහිසීමෙ ඨිතසම්මතා නාම නිමිත්තානි කිත්තෙත්වා නිමිත්තානං බහිඨිතෙන සම්මතා. නදියා සමුද්දෙ ජාතස්සරෙ සම්මතා නාම එතෙසු නදිආදීසු සම්මතා. සා හි එවං සම්මතාපි ‘‘සබ්බා, භික්ඛවෙ, නදී අසීමා, සබ්බො සමුද්දො අසීමො, සබ්බො ජාතස්සරො අසීමො’’ති (මහාව. 147) වචනතො අසම්මතාව හොති. සීමාය සීමං සම්භින්දන්තෙන සම්මතා නාම අත්තනො සීමාය පරෙසං සීමං සම්භින්දන්තෙන සම්මතා. සචෙ හි පොරාණකස්ස විහාරස්ස පුරත්ථිමාය දිසාය අම්බො චෙව ජම්බූ චාති ද්වෙ රුක්ඛා අඤ්ඤමඤ්ඤං සංසට්ඨවිටපා හොන්ති, තෙසු අම්බස්ස පච්ඡිමදිසාභාගෙ ජම්බූ, විහාරසීමා ච ජම්බුං අන්තො කත්වා අම්බං කිත්තෙත්වා බද්ධා හොති, අථ පච්ඡා තස්ස විහාරස්ස පුරත්ථිමාය දිසාය විහාරෙ කතෙ සීමං බන්ධන්තා භික්ඛූ තං අම්බං අන්තො කත්වා ජම්බුං කිත්තෙත්වා බන්ධන්ති, සීමාය සීමං සම්භින්නා හොති. සීමාය සීමං අජ්ඣොත්ථරන්තෙන සම්මතා නාම අත්තනො සීමාය පරෙසං සීමං අජ්ඣොත්ථරන්තෙන සම්මතා. සචෙ හි පරෙසං බද්ධසීමං සකලං වා තස්සා පදෙසං වා අන්තො කත්වා අත්තනො සීමං සම්මන්නති, සීමාය සීමං අජ්ඣොත්ථරිතා නාම හොති. ඉති ඉමා එකාදස විපත්තිසීමායො අතික්කමිත්වා සම්මතා.

තිවිධසම්පත්තියුත්තාති නිමිත්තසම්පත්තියා පරිසාසම්පත්තියා කම්මවාචාසම්පත්තියා ච යුත්තා. තත්ථ නිමිත්තසම්පත්තියා යුත්තා නාම පබ්බතනිමිත්තං, පාසාණනිමිත්තං, වනනිමිත්තං, රුක්ඛනිමිත්තං, මග්ගනිමිත්තං, වම්මිකනිමිත්තං, නදිනිමිත්තං, උදකනිමිත්තන්ති එවං වුත්තෙසු අට්ඨසු නිමිත්තෙසු තස්මිං තස්මිං දිසාභාගෙ යථාලද්ධානි ¶ නිමිත්තුපගානි නිමිත්තානි ‘‘පුරත්ථිමාය දිසාය කිං නිමිත්තං, පබ්බතො, භන්තෙ, එසො පබ්බතො නිමිත්ත’’න්තිආදිනා නයෙන සම්මා කිත්තෙත්වා සම්මතා. තත්රෙවං සඞ්ඛෙපතො නිමිත්තුපගතා වෙදිතබ්බා – සුද්ධපංසුසුද්ධපාසාණඋභයමිස්සකවසෙන හි තිවිධොපි පබ්බතො හත්ථිප්පමාණතො පට්ඨාය උද්ධං නිමිත්තුපගො, තතො ඔමකතරො න වට්ටති. පාසාණනිමිත්තෙ අයොගුළම්පි පාසාණසඞ්ඛමෙව ගච්ඡති, තස්මා යො කොචි පාසාණො උක්කංසවසෙන හත්ථිප්පමාණතො ඔමකතරං ආදිං කත්වා හෙට්ඨිමපරිච්ඡෙදෙන ¶ ද්වත්තිංසපලගුළපිණ්ඩපරිමාණො නිමිත්තුපගො, න තතො ඛුද්දකතරො. පිට්ඨිපාසාණො පන අතිමහන්තොපි වට්ටති. වනනිමිත්තෙ අන්තොසාරෙහි වා අන්තොසාරමිස්සකෙහි වා රුක්ඛෙහි චතුපඤ්චරුක්ඛමත්තම්පි වනං නිමිත්තුපගං, තතො ඌනකතරං න වට්ටති. රුක්ඛො ජීවන්තොයෙව අන්තොසාරො භූමියං පතිට්ඨිතො, අන්තමසො උබ්බෙධතො අට්ඨඞ්ගුලො, පරිණාහතො සූචිදණ්ඩකප්පමාණොපි නිමිත්තුපගො, තතො ඔමකතරො න වට්ටති. මග්ගො ජඞ්ඝමග්ගො වා හොතු සකටමග්ගො වා, යො විනිවිජ්ඣිත්වා ද්වෙ තීණි ගාමඛෙත්තානි ගච්ඡති, තාදිසො ජඞ්ඝසත්ථසකටසත්ථෙහි වලඤ්ජියමානොයෙව නිමිත්තුපගො, අවලඤ්ජිතො ¶ න වට්ටති. වම්මිකො පන හෙට්ඨිමපරිච්ඡෙදෙන තංදිවසංජාතො අට්ඨඞ්ගුලුබ්බෙධො ගොවිසාණමත්තොපි වම්මිකො නිමිත්තුපගො, තතො ඔමකතරො න වට්ටති. යං පන අබද්ධසීමාලක්ඛණෙ නදිං වක්ඛාම, සා නිමිත්තුපගා, අඤ්ඤා න වට්ටති. උදකං යං අසන්දමානං ආවාටපොක්ඛරණීතළාකජාතස්සරලොණිසමුද්දාදීසු ඨිතං, තං ආදිං කත්වා අන්තමසො තඞ්ඛණෙයෙව පථවියං ඛණිතෙ ආවාටකෙ ඝටෙහි ආහරිත්වා පූරිතම්පි යාව කම්මවාචාපරියොසානා සණ්ඨමානකං නිමිත්තුපගං, ඉතරං සන්දමානං වා වුත්තපරිච්ඡෙදකාලං අතිට්ඨන්තං වා භාජනගතං වා න වට්ටතීති.

පරිසාසම්පත්තියා යුත්තා නාම සබ්බන්තිමෙන පරිච්ඡෙදෙන චතූහි භික්ඛූහි සන්නිපතිත්වා යාවතිකා තස්මිං ගාමඛෙත්තෙ බද්ධසීමං වා නදිසමුද්දජාතස්සරෙ වා අනොක්කමිත්වා ඨිතා භික්ඛූ, තෙ සබ්බෙ හත්ථපාසෙ වා කත්වා ඡන්දං වා ආහරිත්වා සම්මතා.

කම්මවාචාසම්පත්තියා ¶ යුත්තා නාම ‘‘සුණාතු මෙ, භන්තෙ, සඞ්ඝො, යාවතා සමන්තා නිමිත්තා කිත්තිතා’’තිආදිනා (මහාව. 139) නයෙන වුත්තාය පරිසුද්ධාය ඤත්තිදුතියකම්මවාචාය සම්මතා. එවං එකාදස විපත්තිසීමායො අතික්කමිත්වා තිවිධසම්පත්තියුත්තා නිමිත්තෙන නිමිත්තං සම්බන්ධිත්වා සම්මතා සීමා ‘‘බද්ධසීමා’’ති වෙදිතබ්බා. ඛණ්ඩසීමා සමානසංවාසසීමා අවිප්පවාසසීමාති තස්සායෙව පභෙදො.

අබද්ධසීමා පන ගාමසීමා, සත්තබ්භන්තරසීමා, උදකුක්ඛෙපසීමාති තිවිධා. තත්ථ යාවතා එකං ගාමක්ඛෙත්තං, අයං ගාමසීමා නාම. අගාමකෙ අරඤ්ඤෙ සමන්තා සත්තබ්භන්තරා සත්තබ්භන්තරසීමා නාම. තත්ථ අගාමකං නාම අරඤ්ඤං විඤ්ඣාටවිආදීසු වා සමුද්දමජ්ඣෙ වා මච්ඡබන්ධානං අගමනපථෙසු දීපකෙසු ලබ්භති. සමන්තා සත්තබ්භන්තරාති මජ්ඣෙ ඨිතානං සබ්බදිසාසු ¶ සත්තබ්භන්තරා විනිබ්බෙධෙන චුද්දස හොන්ති. තත්ථ එකං අබ්භන්තරං අට්ඨවීසතිහත්ථප්පමාණං හොති, අයඤ්ච සීමා පරිසාවසෙන වඩ්ඪති, තස්මා සමන්තා පරිසාපරියන්තතො පට්ඨාය අබ්භන්තරපරිච්ඡෙදො කාතබ්බො. සචෙ පන ද්වෙ සඞ්ඝා විසුං උපොසථං කරොන්ති, ද්වින්නං සත්තබ්භන්තරානං අන්තරෙ අඤ්ඤමෙකං සත්තබ්භන්තරං උපචාරත්ථාය ඨපෙතබ්බං. යා පනෙසා ‘‘සබ්බා, භික්ඛවෙ, නදී අසීමා’’තිආදිනා (මහාව. 147) නයෙන නදිආදීනං සීමභාවං පටික්ඛිපිත්වා පුන ‘‘නදියා වා, භික්ඛවෙ, සමුද්දෙ වා ජාතස්සරෙ වා යං මජ්ඣිමස්ස පුරිසස්ස සමන්තා උදකුක්ඛෙපා, අයං තත්ථ සමානසංවාසා එකූපොසථා’’ති වුත්තා අයං උදකුක්ඛෙපසීමා නාම. තත්ථ යස්සා ධම්මිකානං රාජූනං කාලෙ අන්වඩ්ඪමාසං අනුදසාහං අනුපඤ්චාහං ¶ අනතික්කමිත්වා දෙවෙ වස්සන්තෙ වලාහකෙසු විගතමත්තෙසු සොතං පච්ඡිජ්ජති, අයං නදිසඞ්ඛ්යං න ගච්ඡති. යස්සා පන ඊදිසෙ සුවුට්ඨිකාලෙ වස්සානස්ස චතුමාසෙ සොතං න පච්ඡිජ්ජති, යත්ථ තිත්ථෙන වා අතිත්ථෙන වා සික්ඛාකරණීයෙ ආගතලක්ඛණෙන තිමණ්ඩලං පටිච්ඡාදෙත්වා අන්තරවාසකං අනුක්ඛිපිත්වා උත්තරන්තියා භික්ඛුනියා එකද්වඞ්ගුලමත්තම්පි අන්තරවාසකො තෙමියති, අයං සමුද්දං වා පවිසතු තළාකං වා, පභවතො පට්ඨාය නදී නාම. සමුද්දො පාකටොයෙව. යො පන කෙනචි ඛණිත්වා අකතො සයංජාතො සොබ්භො සමන්තතො ආගතෙන උදකෙන ¶ පූරිතො තිට්ඨති, යත්ථ නදියං වුත්තප්පකාරෙ වස්සකාලෙ උදකං සන්තිට්ඨති, අයං ජාතස්සරො නාම. යොපි නදිං වා සමුද්දං වා භින්දිත්වා නික්ඛන්තඋදකෙන ඛතො සොබ්භො එතං ලක්ඛණං පාපුණාති, අයම්පි ජාතස්සරොයෙව.

යං මජ්ඣිමස්ස පුරිසස්ස සමන්තා උදකුක්ඛෙපාති යං ඨානං ථාමමජ්ඣිමස්ස පුරිසස්ස සමන්තතො උදකුක්ඛෙපෙන පරිච්ඡින්නං, තත්ථ යථා අක්ඛධුත්තා දාරුගුළං ඛිපන්ති, එවං උදකං වා වාලුකං වා හත්ථෙන ගහෙත්වා මජ්ඣිමෙන පුරිසෙන සබ්බථාමෙන ඛිපිතබ්බං, තත්ථ යත්ථ එවං ඛිත්තං උදකං වා වාලුකං වා පතති, අයං උදකුක්ඛෙපො නාම.

අයං තත්ථ සමානසංවාසා එකූපොසථාති අයං තෙසු නදිආදීසු උදකුක්ඛෙපපරිච්ඡින්නා සීමා සමානසංවාසා චෙව එකූපොසථා ච, අයං පන එතෙසං නදිආදීනං අන්තොයෙව ලබ්භති, න බහි. තස්මා නදියා වා ජාතස්සරෙ වා යත්තකං පදෙසං පකතිවස්සකාලෙ චතූසු මාසෙසු උදකං ඔත්ථරති, සමුද්දෙ යස්මිං පදෙසෙ පකතිවීචියො ඔත්ථරිත්වා සණ්ඨහන්ති, තතො පට්ඨාය කප්පියභූමි, තත්ථ ඨත්වා උපොසථාදිකම්මං කාතුං වට්ටති ¶ . දුබ්බුට්ඨිකාලෙ වා ගිම්හෙ වා නදිජාතස්සරෙසු සුක්ඛෙසුපි සා එව කප්පියභූමි, සචෙ පන සුක්ඛෙ ජාතස්සරෙ වාපිං වා ඛණන්ති, වප්පං වා කරොන්ති, තං ඨානං ගාමක්ඛෙත්තං හොති. යා පනෙසා ‘‘කප්පියභූමී’’ති වුත්තා, තතො බහි උදකුක්ඛෙපසීමා න ගච්ඡති, අන්තොයෙව ගච්ඡති, තස්මා තෙසං අන්තො පරිසාපරියන්තතො පට්ඨාය සමන්තා උදකුක්ඛෙපපරිච්ඡෙදො කාතබ්බො. සචෙ පන ද්වෙ සඞ්ඝා විසුං විසුං උපොසථාදිකම්මං කරොන්ති, ද්වින්නං උදකුක්ඛෙපානං අන්තරෙ අඤ්ඤො එකො උදකුක්ඛෙපො උපචාරත්ථාය ඨපෙතබ්බො. අයඤ්හි සත්තබ්භන්තරසීමා ච උදකුක්ඛෙපසීමා ච භික්ඛූනං ඨිතොකාසතො පට්ඨාය ලබ්භති. පරිච්ඡෙදබ්භන්තරෙ හත්ථපාසං විජහිත්වා ඨිතොපි පරිච්ඡෙදතො බහි අඤ්ඤං තත්තකංයෙව පරිච්ඡෙදං අනතික්කමිත්වා ඨිතොපි කම්මං කොපෙති, ඉදං සබ්බඅට්ඨකථාසු (මහාව. අට්ඨ. 147) සන්නිට්ඨානං. එවං අබද්ධසීමා වෙදිතබ්බා. ඉති ඉමං බද්ධසීමාබද්ධසීමාවසෙන දුවිධං සීමං සන්ධායෙතං වුත්තං ‘‘තෙ ච ඛො හත්ථපාසං අවිජහිත්වා එකසීමායං ¶ ඨිතා’’ති. තෙසු හි චතූසු භික්ඛූසු එකසීමායං හත්ථපාසං අවිජහිත්වා ඨිතෙස්වෙවෙතං ¶ සඞ්ඝස්ස උපොසථකම්මං පත්තකල්ලං නාම හොති, න ඉතරථා. යථාහ ‘‘අනුජානාමි, භික්ඛවෙ, චතුන්නං පාතිමොක්ඛං උද්දිසිතු’’න්ති (මහාව. 168).

සභාගාපත්තියො ච න විජ්ජන්තීති එත්ථ යං සබ්බො සඞ්ඝො විකාලභොජනාදිනා සභාගවත්ථුනා ලහුකාපත්තිං ආපජ්ජති, එවරූපා වත්ථුසභාගා ‘‘සභාගා’’ති වුච්චති, විකාලභොජනපච්චයා ආපන්නං පන ආපත්තිසභාගං අනතිරිත්තභොජනපච්චයා ආපන්නස්ස සන්තිකෙ දෙසෙතුං වට්ටති. සභාගාපත්තියා පන සති තෙහි භික්ඛූහි එකො භික්ඛු සාමන්තා ආවාසා සජ්ජුකං පාහෙතබ්බො ‘‘ගච්ඡාවුසො, තං ආපත්තිං පටිකරිත්වා ආගච්ඡ, මයං තෙ සන්තිකෙ ආපත්තිං පටිකරිස්සාමා’’ති, එවඤ්චෙතං ලභෙථ, ඉච්චෙතං කුසලං, නො චෙ ලභෙථ, බ්යත්තෙන භික්ඛුනා පටිබලෙන සඞ්ඝො ඤාපෙතබ්බො ‘‘සුණාතු මෙ, භන්තෙ, සඞ්ඝො, අයං සබ්බො සඞ්ඝො සභාගං ආපත්තිං ආපන්නො, යදා අඤ්ඤං භික්ඛුං සුද්ධං අනාපත්තිකං පස්සිස්සති, තදා තස්ස සන්තිකෙ තං ආපත්තිං පටිකරිස්සතී’’ති (මහාව. 171) වත්වා උපොසථො කාතබ්බො. සචෙ පන වෙමතිකො හොති, ‘‘සුණාතු මෙ, භන්තෙ, සඞ්ඝො, අයං සබ්බො සඞ්ඝො සභාගාය ආපත්තියා වෙමතිකො, යදා නිබ්බෙමතිකො භවිස්සති, තදා තං ආපත්තිං පටිකරිස්සතී’’ති වත්වා උපොසථො කාතබ්බො. සචෙ පනෙත්ථ කොචි තං සභාගං ආපත්තිං දෙසෙතුං වට්ටතීති මඤ්ඤමානො එකස්ස සන්තිකෙ දෙසෙති, දෙසිතා සුදෙසිතාව. අඤ්ඤං පන දෙසනාපච්චයා දෙසකො, පටිග්ගහණපච්චයා පටිග්ගාහකො චාති උභොපි දුක්කටං ආපජ්ජන්ති, තං නානාවත්ථුකං හොති, තස්මා අඤ්ඤමඤ්ඤං දෙසෙතබ්බං ¶ . එත්තාවතා තෙ ද්වෙ නිරාපත්තිකා හොන්ති, තෙසං සන්තිකෙ සෙසෙහි සභාගාපත්තියො දෙසෙතබ්බා වා ආරොචෙතබ්බා වා. සචෙ තෙ එවං අකත්වා උපොසථං කරොන්ති, ‘‘පාරිසුද්ධිං ආයස්මන්තො ආරොචෙථා’’තිආදිනා (මහාව. 134) නයෙන සාපත්තිකස්ස උපොසථකරණෙ පඤ්ඤත්තං දුක්කටං ආපජ්ජන්ති. සචෙ සබ්බො සඞ්ඝො සභාගාපත්තියා සති වුත්තවිධිං අකත්වා උපොසථං කරොති, වුත්තනයෙනෙව සබ්බො සඞ්ඝො ආපත්තිං ආපජ්ජති, තස්මා සභාගාපත්තියා සති සඞ්ඝස්ස පත්තකල්ලං ¶ නාම න හොති, තෙන වුත්තං ‘‘සභාගාපත්තියො ච න විජ්ජන්තී’’ති. එතාසු හි සභාගාපත්තීසු අවිජ්ජමානාසු විසභාගාපත්තීසු විජ්ජමානාසුපි පත්තකල්ලං හොතියෙව.

වජ්ජනීයා ච පුග්ගලා තස්මිං න හොන්තීති ‘‘න, භික්ඛවෙ, සගහට්ඨාය පරිසාය පාතිමොක්ඛං උද්දිසිතබ්බං, යො උද්දිසෙය්ය ආපත්ති දුක්කටස්සා’’ති ¶ (මහාව. 154) වචනතො ගහට්ඨො, ‘‘න, භික්ඛවෙ, භික්ඛුනියා නිසින්නපරිසාය පාතිමොක්ඛං උද්දිසිතබ්බ’’න්තිආදිනා (මහාව. 183) නයෙන වුත්තා භික්ඛුනී, සික්ඛමානා, සාමණෙරො, සාමණෙරී, සික්ඛාපච්චක්ඛාතකො, අන්තිමවත්ථුඅජ්ඣාපන්නකො, ආපත්තියා අදස්සනෙ උක්ඛිත්තකො, ආපත්තියා අප්පටිකම්මෙ උක්ඛිත්තකො, පාපිකාය දිට්ඨියා අප්පටිනිස්සග්ගෙ උක්ඛිත්තකො, පණ්ඩකො, ථෙය්යසංවාසකො, තිත්ථියපක්කන්තකො, තිරච්ඡානගතො, මාතුඝාතකො, පිතුඝාතකො අරහන්තඝාතකො, භික්ඛුනිදූසකො, සඞ්ඝභෙදකො, ලොහිතුප්පාදකො, උභතොබ්යඤ්ජනකොති ඉමෙ වීසති චාති එකවීසති පුග්ගලා වජ්ජනීයා නාම, තෙ හත්ථපාසතො බහිකරණවසෙන වජ්ජෙතබ්බා. එතෙසු හි තිවිධෙ උක්ඛිත්තකෙ සති උපොසථං කරොන්තො සඞ්ඝො පාචිත්තියං ආපජ්ජති, සෙසෙසු දුක්කටං. එත්ථ ච තිරච්ඡානගතොති යස්ස උපසම්පදා පටික්ඛිත්තා, තිත්ථියා ගහට්ඨෙනෙව සඞ්ගහිතා. එතෙපි හි වජ්ජනීයා නාම. එවං පත්තකල්ලං ඉමෙහි චතූහි අඞ්ගෙහි සඞ්ගහිතන්ති වෙදිතබ්බං.

සඞ්ඝො උපොසථං කරෙය්යාතිඉමිනා යෙ තෙ අපරෙපි තයො උපොසථා සඞ්ඝෙ උපොසථො, ගණෙ උපොසථො, පුග්ගලෙ උපොසථොති, එවං කාරකවසෙන තයො උපොසථා වුත්තා, තෙසු ඉතරෙ ද්වෙ පටික්ඛිපිත්වා සඞ්ඝෙ උපොසථමෙව දීපෙති. පාතිමොක්ඛං උද්දිසෙය්යාතිඉමිනා යෙ තෙ අපරෙපි තයො උපොසථා සුත්තුද්දෙසො, පාරිසුද්ධිඋපොසථො, අධිට්ඨානඋපොසථොති, එවං කත්තබ්බාකාරවසෙන තයො උපොසථා වුත්තා, තෙසු ඉතරෙ ද්වෙ පටික්ඛිපිත්වා සුත්තුද්දෙසමෙව දීපෙති. සුත්තුද්දෙසො නාම පාතිමොක්ඛුද්දෙසො වුච්චති, සො දුවිධො ඔවාදපාතිමොක්ඛුද්දෙසො ච ආණාපාතිමොක්ඛුද්දෙසො ච. තත්ථ

‘‘ඛන්තී ¶ පරමං තපො තිතික්ඛා…පෙ….

‘‘සබ්බපාපස්ස අකරණං…පෙ….

‘‘අනූපවාදො අනූපඝාතො’’ති. (දී. නි. 2.90; ධ. ප. 184, 183, 185)

ආදිනා නයෙන වුත්තා තිස්සො ගාථායො ඔවාදපාතිමොක්ඛං නාම, තං බුද්ධා එව උද්දිසන්ති, න සාවකා. ‘‘සුණාතු ¶ මෙ, භන්තෙ, සඞ්ඝො’’තිආදිනා (මහාව. 134) නයෙන වුත්තං ආණාපාතිමොක්ඛං නාම, තං සාවකා එව උද්දිසන්ති, න බුද්ධා. ඉදමෙව ච ඉමස්මිං අත්ථෙ ‘‘පාතිමොක්ඛ’’න්ති අධිප්පෙතං.

යෙ ¶ පන ඉතරෙ ද්වෙ උපොසථා, තෙසු පාරිසුද්ධිඋපොසථො තාව අඤ්ඤෙසඤ්ච සන්තිකෙ, අඤ්ඤමඤ්ඤඤ්ච ආරොචනවසෙන දුවිධො. තත්ථ ය්වායං අඤ්ඤෙසං සන්තිකෙ කරීයති, සොපි පවාරිතානඤ්ච අප්පවාරිතානඤ්ච සන්තිකෙ කරණවසෙන දුවිධො. තත්ථ මහාපවාරණාය පවාරිතානං සන්තිකෙ පච්ඡිමිකාය උපගතෙන වා අනුපගතෙන වා ඡින්නවස්සෙන වා චාතුමාසිනියං පන පවාරිතානං සන්තිකෙ පුරිමිකාය උපගතෙන වා අනුපගතෙන වා ඡින්නවස්සෙන වා කායසාමග්ගිං දත්වා ‘‘පරිසුද්ධො අහං, භන්තෙ, ‘පරිසුද්ධො’ති මං ධාරෙථා’’ති තික්ඛත්තුං වත්වා කාතබ්බො, ඨපෙත්වා ච පන පවාරණාදිවසං අඤ්ඤස්මිං කාලෙ ආවාසිකෙහි උද්දිට්ඨමත්තෙ පාතිමොක්ඛෙ අවුට්ඨිතාය වා එකච්චාය වුට්ඨිතාය වා සබ්බාය වා වුට්ඨිතාය පරිසාය යෙ අඤ්ඤෙ සමසමා වා ථොකතරා වා ආගච්ඡන්ති, තෙහි තෙසං සන්තිකෙ වුත්තනයෙනෙව පාරිසුද්ධි ආරොචෙතබ්බා. යො පනායං අඤ්ඤමඤ්ඤං ආරොචනවසෙන කරීයති, සො ඤත්තිං ඨපෙත්වා ච අට්ඨපෙත්වා ච කරණවසෙන දුවිධො. තත්ථ යස්මිං ආවාසෙ තයො භික්ඛූ විහරන්ති, තෙසු උපොසථදිවසෙ සන්නිපතිතෙසු එකෙන භික්ඛුනා ‘‘සුණන්තු මෙ ආයස්මන්තා අජ්ජුපොසථො චාතුද්දසො’’ති වා ‘‘පන්නරසො’’ති වා වත්වා ‘‘යදායස්මන්තානං පත්තකල්ලං මයං අඤ්ඤමඤ්ඤං පාරිසුද්ධිඋපොසථං කරෙය්යාමා’’ති ඤත්තියා ඨපිතාය ථෙරෙන භික්ඛුනා එකංසං උත්තරාසඞ්ගං කරිත්වා උක්කුටිකං නිසීදිත්වා අඤ්ජලිං පග්ගහෙත්වා ‘‘පරිසුද්ධො අහං, ආවුසො, ‘පරිසුද්ධො’ති මං ධාරෙථා’’ති (මහාව. 168) තික්ඛත්තුං වත්තබ්බං. ඉතරෙහි ‘‘භන්තෙ’’ති වත්වා එවමෙව වත්තබ්බං. එවං ඤත්තිං ඨපෙත්වා කාතබ්බො. යත්ථ පන ද්වෙ භික්ඛූ විහරන්ති, තත්ර ¶ ඤත්තිං අට්ඨපෙත්වා වුත්තනයෙනෙව පාරිසුද්ධි ආරොචෙතබ්බාති අයං පාරිසුද්ධිඋපොසථො.

සචෙ පන එකොව භික්ඛු හොති, සබ්බං පුබ්බකරණීයං කත්වා අඤ්ඤෙසං අනාගමනං ඤත්වා ‘‘අජ්ජ මෙ උපොසථො චාතුද්දසො’’ති වා ‘‘පන්නරසො’’ති වා වත්වා ‘‘අධිට්ඨාමී’’ති වත්තබ්බං. අයං අධිට්ඨානුපොසථොති එවං කත්තබ්බාකාරවසෙන තයො උපොසථාති වෙදිතබ්බා. එත්තාවතා නව උපොසථා දීපිතා හොන්ති. තෙසු දිවසවසෙන පන්නරසිකො, කාරකවසෙන සඞ්ඝුපොසථො, කත්තබ්බාකාරවසෙන සුත්තුද්දෙසොති එවං තිලක්ඛණසම්පන්නො උපොසථො ඉධ නිද්දිට්ඨොති වෙදිතබ්බො. තස්මිං පවත්තමානෙ උපොසථං අකත්වා තදහුපොසථෙ අඤ්ඤං අභික්ඛුකං නානාසංවාසකෙහි වා සභික්ඛුකං ආවාසං වා අනාවාසං වා වාසත්ථාය අඤ්ඤත්ර සඞ්ඝෙන, අඤ්ඤත්ර අන්තරායා ගච්ඡන්තස්ස දුක්කටං හොති.

කිං සඞ්ඝස්ස පුබ්බකිච්චන්ති ‘‘සඞ්ඝො උපොසථං කරෙය්යා’’ති එවං ¶ උපොසථකරණසම්බන්ධෙනෙව වුත්තස්ස ¶ සඞ්ඝස්ස උපොසථෙ කත්තබ්බෙ යං තං ‘‘අනුජානාමි, භික්ඛවෙ, උපොසථාගාරං සම්මජ්ජිතු’’න්තිආදිනා (මහාව. 159) නයෙන පාළියං ආගතං, අට්ඨකථාසු ච –

‘‘සම්මජ්ජනී පදීපො ච, උදකං ආසනෙන ච;

උපොසථස්ස එතානි, ‘පුබ්බකරණ’න්ති වුච්චති.

‘‘ඡන්දපාරිසුද්ධිඋතුක්ඛානං, භික්ඛුගණනා ච ඔවාදො;

උපොසථස්ස එතානි, ‘පුබ්බකිච්ච’න්ති වුච්චතී’’ති. (මහාව. අට්ඨ. 168);

එවං ද්වීහි නාමෙහි නවවිධං පුබ්බකිච්චං දස්සිතං, කිං තං කතන්ති පුච්ඡති. න හි තං අකත්වා උපොසථං කාතුං වට්ටති, තස්මා ථෙරෙන ආණත්තෙන අගිලානෙන භික්ඛුනා උපොසථාගාරං සම්මජ්ජිතබ්බං, පානීයං පරිභොජනීයං උපට්ඨාපෙතබ්බං, ආසනං පඤ්ඤාපෙතබ්බං, පදීපො කාතබ්බො, අකරොන්තො දුක්කටං ආපජ්ජති, ථෙරෙනාපි පතිරූපං ඤත්වා ආණාපෙතබ්බං.

ඡන්දපාරිසුද්ධීති එත්ථ උපොසථකරණත්ථං සන්නිපතිතෙ සඞ්ඝෙ බහි උපොසථං කත්වා ආගතෙන සන්නිපතිතට්ඨානං ගන්ත්වා කායසාමග්ගිං අදෙන්තෙන ¶ ඡන්දො දාතබ්බො. යොපි ගිලානො වා හොති කිච්චප්පසුතො වා, තෙනාපි පාරිසුද්ධිං දෙන්තෙන ඡන්දොපි දාතබ්බො. කථං දාතබ්බො? එකස්ස භික්ඛුනො සන්තිකෙ ‘‘ඡන්දං දම්මි, ඡන්දං මෙ හර, ඡන්දං මෙ ආරොචෙහී’’ති (මහාව. 165) අයං අත්ථො කායෙන වා වාචාය වා උභයෙන වා විඤ්ඤාපෙතබ්බො, එවං දින්නො හොති ඡන්දො. අකතූපොසථෙන පන ගිලානෙන වා කිච්චප්පසුතෙන වා පාරිසුද්ධි දාතබ්බා. කථං දාතබ්බා? එකස්ස භික්ඛුනො සන්තිකෙ ‘‘පාරිසුද්ධිං දම්මි, පාරිසුද්ධිං මෙ හර, පාරිසුද්ධිං මෙ ආරොචෙහී’’ති (මහාව. 164) අයං අත්ථො කායෙන වා වාචාය වා උභයෙන වා විඤ්ඤාපෙතබ්බො, එවං දින්නා හොති පාරිසුද්ධි, තං පන දෙන්තෙන ඡන්දොපි දාතබ්බො. වුත්තඤ්හෙතං භගවතා ‘‘අනුජානාමි, භික්ඛවෙ, තදහුපොසථෙ පාරිසුද්ධිං දෙන්තෙන ඡන්දම්පි දාතුං, සන්ති සඞ්ඝස්ස කරණීය’’න්ති (මහාව. 165). තත්ථ පාරිසුද්ධිදානං සඞ්ඝස්සපි අත්තනොපි උපොසථකරණං සම්පාදෙති, න අවසෙසං සඞ්ඝකිච්චං. ඡන්දදානං සඞ්ඝස්සෙව උපොසථකරණඤ්ච සෙසකිච්චඤ්ච සම්පාදෙති, අත්තනො පන උපොසථො අකතොයෙව හොති. තස්මා පාරිසුද්ධිං දෙන්තෙන ඡන්දොපි දාතබ්බො. පුබ්බෙ වුත්තං පන සුද්ධිකච්ඡන්දං වා ඉමං වා ඡන්දපාරිසුද්ධිං එකෙන බහූනම්පි ආහරිතුං වට්ටති. සචෙ පන සො අන්තරාමග්ගෙ අඤ්ඤං භික්ඛුං පස්සිත්වා යෙසං තෙන ඡන්දො වා පාරිසුද්ධි ¶ වා ගහිතා, තෙසඤ්ච අත්තනො ච ඡන්දපාරිසුද්ධිං දෙති, තස්සෙව සා ආගච්ඡති, ඉතරා පන බිළාලසඞ්ඛලිකා ඡන්දපාරිසුද්ධි නාම හොති, සා නාගච්ඡති, තස්මා සයමෙව සන්නිපතිතට්ඨානං ගන්ත්වා ආරොචෙතබ්බං. සචෙ පන සඤ්චිච්ච නාරොචෙති, දුක්කටං ආපජ්ජති. ඡන්දපාරිසුද්ධි පන තස්මිං හත්ථපාසං උපගතමත්තෙයෙව ආගතා හොති.

උතුක්ඛානන්ති ¶ ‘‘හෙමන්තාදීනං උතූනං එත්තකං අතික්කන්තං, එත්තකං අවසිට්ඨ’’න්ති එවං උතූනං ආචික්ඛනං. භික්ඛුගණනාති ‘‘එත්තකා භික්ඛූ උපොසථග්ගෙ සන්නිපතිතා’’ති භික්ඛූනං ගණනා. ඉදම්පි හි උභයං කත්වාව උපොසථො කාතබ්බො. ඔවාදොති භික්ඛුනොවාදො. න හි භික්ඛුනීහි යාචිතං ඔවාදං අනාරොචෙත්වා උපොසථං කාතුං වට්ටති. භික්ඛුනියො හි ‘‘ස්වෙ උපොසථො’’ති ආගන්ත්වා ‘‘අයං උපොසථො චාතුද්දසො පන්නරසො’’ති පුච්ඡිත්වා පුන උපොසථදිවසෙ ආගන්ත්වා ‘‘භික්ඛුනිසඞ්ඝො, අය්ය, භික්ඛුසඞ්ඝස්ස ¶ පාදෙ වන්දති, ඔවාදූපසඞ්කමනඤ්ච යාචති, ලභතු කිර, අය්ය, භික්ඛුනිසඞ්ඝො ඔවාදූපසඞ්කමන’’න්ති (චූළව. 413) එවං ඔවාදං යාචන්ති. තං ඨපෙත්වා බාලගිලානගමියෙ අඤ්ඤො සචෙපි ආරඤ්ඤිකො හොති, අපටිග්ගහෙතුං න ලභති, තස්මා යෙන සො පටිග්ගහිතො, තෙන භික්ඛුනා උපොසථග්ගෙ පාතිමොක්ඛුද්දෙසකො භික්ඛු එවං වත්තබ්බො ‘‘භික්ඛුනිසඞ්ඝො, භන්තෙ, භික්ඛුසඞ්ඝස්ස පාදෙ වන්දති, ඔවාදූපසඞ්කමනඤ්ච යාචති, ලභතු කිර, භන්තෙ, භික්ඛුනිසඞ්ඝො ඔවාදූපසඞ්කමන’’න්ති. පාතිමොක්ඛුද්දෙසකෙන වත්තබ්බං ‘‘අත්ථි කොචි භික්ඛු භික්ඛුනොවාදකො සම්මතො’’ති. සචෙ හොති කොචි භික්ඛු භික්ඛුනොවාදකො සම්මතො, තතො තෙන සො වත්තබ්බො ‘‘ඉත්ථන්නාමො භික්ඛු භික්ඛුනොවාදකො සම්මතො, තං භික්ඛුනිසඞ්ඝො උපසඞ්කමතූ’’ති (චූළව. 413). සචෙ නත්ථි, තතො තෙන පුච්ඡිතබ්බං ‘‘කො ආයස්මා උස්සහති භික්ඛුනියො ඔවදිතු’’න්ති. සචෙ කොචි උස්සහති, සොපි ච අට්ඨහි අඞ්ගෙහි සමන්නාගතො, තං තත්ථෙව සම්මන්නිත්වා ඔවාදපටිග්ගාහකො වත්තබ්බො ‘‘ඉත්ථන්නාමො භික්ඛු භික්ඛුනොවාදකො සම්මතො, තං භික්ඛුනිසඞ්ඝො උපසඞ්කමතූ’’ති (චුළව. 413). සචෙ පන කොචි න උස්සහති, පාතිමොක්ඛුද්දෙසකෙන වත්තබ්බං ‘‘නත්ථි කොචි භික්ඛු භික්ඛුනොවාදකො සම්මතො, පාසාදිකෙන භික්ඛුනිසඞ්ඝො සම්පාදෙතූ’’ති. එත්තාවතා හි සික්ඛත්තයසඞ්ගහිතං සකලං සාසනං ආරොචිතං හොති. තෙන භික්ඛුනා ‘‘සාධූ’’ති සම්පටිච්ඡිත්වා පාටිපදදිවසෙ භික්ඛුනීනං ආරොචෙතබ්බං.

භික්ඛුනිසඞ්ඝෙනාපි තා භික්ඛුනියො පෙසෙතබ්බා, ගච්ඡථ, අය්යා, පුච්ඡථ ‘‘කිං, අය්ය, ලභති භික්ඛුනිසඞ්ඝො ඔවාදූපසඞ්කමන’’න්ති, තාහි ‘‘සාධු, අය්යෙ’’ති සම්පටිච්ඡිත්වා තං භික්ඛුං උපසඞ්කමිත්වා එවං වත්තබ්බං ‘‘කිං, අය්ය, ලභති භික්ඛුනිසඞ්ඝො ඔවාදූපසඞ්කමන’’න්ති. තෙන වත්තබ්බං ¶ ‘‘නත්ථි කොචි භික්ඛු භික්ඛුනොවාදකො සම්මතො, පාසාදිකෙන භික්ඛුනිසඞ්ඝො සම්පාදෙතූ’’ති, තාහි ‘‘සාධු අය්යා’’ති සම්පටිච්ඡිතබ්බං. ඉදඤ්ච එකතො ආගතානං ද්වින්නං තිණ්ණං වා වසෙන වුත්තං. තාසු පන එකාය භික්ඛුනියා වත්තබ්බඤ්චෙව සම්පටිච්ඡිතබ්බඤ්ච, ඉතරා තස්සා සහායිකා. සචෙ පන භික්ඛුසඞ්ඝො වා භික්ඛුනිසඞ්ඝො වා න පූරති ¶ , උභයතොපි වා ගණමත්තමෙව පුග්ගලමත්තං වා හොති.

තත්රායං ¶ වචනක්කමො – ‘‘භික්ඛුනියො, අය්ය, භික්ඛුසඞ්ඝස්ස පාදෙවන්දන්ති, ඔවාදූපසඞ්කමනඤ්ච යාචන්ති, ලභන්තු කිර, අය්ය, භික්ඛුනියො ඔවාදූපසඞ්කමන’’න්ති, ‘‘අහං, අය්ය, භික්ඛුසඞ්ඝස්ස පාදෙ වන්දාමි, ඔවාදූපසඞ්කමනඤ්ච යාචාමි, ලභාමහං, අය්ය, ඔවාදූපසඞ්කමන’’න්ති, ‘‘භික්ඛුනිසඞ්ඝො, අය්යා, අය්යානං පාදෙ වන්දති, ඔවාදූපසඞ්කමනඤ්ච යාචති, ලභතු කිර, අය්යා, භික්ඛුනිසඞ්ඝො ඔවාදූපසඞ්කමන’’න්ති. ‘‘භික්ඛුනියො, අය්යා, අය්යානං පාදෙ වන්දන්ති, ඔවාදූපසඞ්කමනඤ්ච යාචන්ති, ලභන්තු කිර, අය්යා, භික්ඛුනියො ඔවාදූපසඞ්කමන’’න්ති, ‘‘අහං, අය්යා, අය්යානං පාදෙ වන්දාමි, ඔවාදූපසඞ්කමනඤ්ච යාචාමි, ලභාමහං, අය්යා, ඔවාදූපසඞ්කමන’’න්ති, ‘‘භික්ඛුනිසඞ්ඝො, අය්ය, අය්යස්ස පාදෙ වන්දති, ඔවාදූපසඞ්කමනඤ්ච යාචති, ලභතු කිර, අය්ය, භික්ඛුනිසඞ්ඝො ඔවාදූපසඞ්කමන’’න්ති. ‘‘භික්ඛුනියො, අය්ය, අය්යස්ස පාදෙ වන්දන්ති, ඔවාදූපසඞ්කමනඤ්ච යාචන්ති, ලභන්තු කිර, අය්ය, භික්ඛුනියො ඔවාදූපසඞ්කමන’’න්ති, ‘‘අහං, අය්ය, අය්යස්ස පාදෙ වන්දාමි, ඔවාදූපසඞ්කමනඤ්ච යාචාමි, ලභාමහං, අය්ය, ඔවාදූපසඞ්කමන’’න්ති. තෙනාපි භික්ඛුනා උපොසථකාලෙ එවං වත්තබ්බං ‘‘භික්ඛුනියො, භන්තෙ, භික්ඛුසඞ්ඝස්ස පාදෙ වන්දන්ති, ඔවාදූපසඞ්කමනඤ්ච යාචන්ති, ලභන්තු කිර, භන්තෙ, භික්ඛුනියො ඔවාදූපසඞ්කමන’’න්ති, ‘‘භික්ඛුනී, භන්තෙ, භික්ඛුසඞ්ඝස්ස පාදෙ වන්දති, ඔවාදූපසඞ්කමනඤ්ච යාචති, ලභතු කිර, භන්තෙ, භික්ඛුනී ඔවාදූපසඞ්කමන’’න්ති. ‘‘භික්ඛුනිසඞ්ඝො, භන්තෙ, භික්ඛුනියො, භන්තෙ, භික්ඛුනී භන්තෙ ආයස්මන්තානං පාදෙ වන්දති, වන්දන්ති, වන්දති, ඔවාදූපසඞ්කමනඤ්ච යාචති, යාචන්ති, යාචති, ලභතු කිර, භන්තෙ, භික්ඛුනිසඞ්ඝො, ලභන්තු කිර, භන්තෙ, භික්ඛුනියො, ලභතු කිර, භන්තෙ, භික්ඛුනී ඔවාදූපසඞ්කමන’’න්ති. උපොසථග්ගෙපි පාතිමොක්ඛුද්දෙසකෙන වා ඤත්තිට්ඨපකෙන වා ඉතරෙන වා භික්ඛුනා සචෙ සම්මතො භික්ඛු අත්ථි, පුරිමනයෙනෙව ‘‘තං භික්ඛුනිසඞ්ඝො, තං භික්ඛුනියො, තං භික්ඛුනී උපසඞ්කමතු, උපසඞ්කමන්තු, උපසඞ්කමතූ’’ති වත්තබ්බං. සචෙ නත්ථි, ‘‘පාසාදිකෙන භික්ඛුනිසඞ්ඝො, භික්ඛුනියො, භික්ඛුනී සම්පාදෙතු, සම්පාදෙන්තු, සම්පාදෙතූ’’ති වත්තබ්බං. ඔවාදප්පටිග්ගාහකෙන පාටිපදෙ තං පච්චාහරිත්වා තථෙව වත්තබ්බං, අයමෙත්ථ සඞ්ඛෙපවිනිච්ඡයො. එවං භික්ඛුනීහි යාචිතං ඔවාදං ආරොචෙත්වාව උපොසථො කාතබ්බො. තෙන වුත්තං –

‘‘ඡන්දපාරිසුද්ධිඋතුක්ඛානං ¶ ¶ ¶ , භික්ඛුගණනා ච ඔවාදො;

උපොසථස්ස එතානි, ‘පුබ්බකිච්ච’න්ති වුච්චතී’’ති.

පාරිසුද්ධිං ආයස්මන්තො ආරොචෙථාති අත්තනො පරිසුද්ධභාවං ආරොචෙථ, ‘‘පාතිමොක්ඛං උද්දිසිස්සාමී’’තිඉදං පාරිසුද්ධිආරොචනස්ස කාරණවචනං. ‘‘න ච, භික්ඛවෙ, සාපත්තිකෙන පාතිමොක්ඛං සොතබ්බං, යො සුණෙය්ය ආපත්ති දුක්කටස්සා’’ති (චූළව. 386) හි වචනතො අපරිසුද්ධෙහි පාතිමොක්ඛං සොතුං න වට්ටති. තෙන වුත්තං – පාරිසුද්ධිං ආයස්මන්තො ආරොචෙථ, පාතිමොක්ඛං උද්දිසිස්සාමීති. එත්ථ සියා ‘‘සඞ්ඝො උපොසථං කරෙය්ය, පාතිමොක්ඛං උද්දිසෙය්යා’’ති (මහාව. 134) වුත්තත්තා ඉධාපි ‘‘පාතිමොක්ඛං උද්දිසිස්සතී’’ති වත්තබ්බං, එවඤ්හි සති පුබ්බෙනාපරං සන්ධියතීති. වුච්චතෙ, වචනමත්තමෙවෙතං න සන්ධියති, ලක්ඛණතො පන සමෙති, සඞ්ඝස්ස සාමග්ගියා, ගණස්ස සාමග්ගියා, පුග්ගලස්ස උද්දෙසා සඞ්ඝස්ස උද්දිට්ඨං හොති පාතිමොක්ඛන්ති ඉදඤ්හෙත්ථ ලක්ඛණං, තස්මා ‘‘පාතිමොක්ඛං උද්දිසිස්සාමී’’ති ඉදමෙවෙත්ථ වත්තබ්බං.

තං සබ්බෙව සන්තා සාධුකං සුණොම මනසි කරොමාති න්ති පාතිමොක්ඛං. සබ්බෙව සන්තාති යාවතිකා තස්සා පරිසාය ථෙරා ච නවා ච මජ්ඣිමා ච. සාධුකං සුණොමාති අට්ඨිං කත්වා මනසි කරිත්වා සොතද්වාරවසෙන සබ්බචෙතසා සමන්නාහරාම. මනසි කරොමාති එකග්ගචිත්තා හුත්වා චිත්තෙ ඨපෙය්යාම. එත්ථ ච කිඤ්චාපි ‘‘පාතිමොක්ඛං උද්දිසිස්සාමී’’ති වුත්තත්තා ‘‘සුණොථ මනසි කරොථා’’ති වත්තුං යුත්තං විය දිස්සති, ‘‘සඞ්ඝො උපොසථං කරෙය්යා’’තිඉමිනා පන න සමෙති. සමග්ගස්ස හි සඞ්ඝස්සෙතං උපොසථකරණං, පාතිමොක්ඛුද්දෙසකො ච සඞ්ඝපරියාපන්නොව, ඉච්චස්ස සඞ්ඝපරියාපන්නත්තා ‘‘සුණොම මනසි කරොමා’’ති ඉදමෙව වත්තුං යුත්තං.

ඉදානි යං වුත්තං ‘‘පාරිසුද්ධිං ආයස්මන්තො ආරොචෙථා’’ති, තත්ථ යථා පාරිසුද්ධිආරොචනං හොති, තං දස්සෙතුං යස්ස සියා ආපත්ති, සො ආවිකරෙය්යාති ආහ. තත්ථ යස්ස සියාති යස්ස ඡන්නං ආකාරානං අඤ්ඤතරෙන ආපන්නාපත්ති භවෙය්ය. ආපත්තිඤ්හි ¶ ආපජ්ජන්තො අලජ්ජිතා, අඤ්ඤාණතා, කුක්කුච්චප්පකතතා, අකප්පියෙ කප්පියසඤ්ඤිතා, කප්පියෙ අකප්පියසඤ්ඤිතා, සතිසම්මොසාති ඉමෙහි ඡහාකාරෙහි (පරි. 295) ආපජ්ජති.

කථං අලජ්ජිතාය ආපජ්ජති? අකප්පියභාවං ජානන්තොයෙව මද්දිත්වා වීතික්කමං කරොති.

වුත්තම්පි ¶ චෙතං –

‘‘සඤ්චිච්ච ආපත්තිං ආපජ්ජති, ආපත්තිං පරිගූහති;

අගතිගමනඤ්ච ගච්ඡති, එදිසො වුච්චති අලජ්ජිපුග්ගලො’’ති. (පරි. 359);

කථං අඤ්ඤාණතාය ආපජ්ජති? අඤ්ඤාණපුග්ගලො හි මන්දො මොමූහො කත්තබ්බාකත්තබ්බං අජානන්තො අකත්තබ්බං කරොති, කත්තබ්බං විරාධෙති, එවං අඤ්ඤාණතාය ආපජ්ජති.

කථං කුක්කුච්චප්පකතතාය ආපජ්ජති? කප්පියාකප්පියං ¶ නිස්සාය කුක්කුච්චෙ උප්පන්නෙ විනයධරං පුච්ඡිත්වා කප්පියං චෙ, කත්තබ්බං සියා, අකප්පියං චෙ, න කත්තබ්බං, අයං පන ‘‘වට්ටතී’’ති මද්දිත්වා වීතික්කමතියෙව, එවං කුක්කුච්චප්පකතතාය ආපජ්ජති.

කථං අකප්පියෙ කප්පියසඤ්ඤිතාය ආපජ්ජති? අච්ඡමංසං ‘‘සූකරමංස’’න්ති ඛාදති, විකාලෙ කාලසඤ්ඤාය භුඤ්ජති, එවං අකප්පියෙ කප්පියසඤ්ඤිතාය ආපජ්ජති.

කථං කප්පියෙ අකප්පියසඤ්ඤිතාය ආපජ්ජති? සූකරමංසං ‘‘අච්ඡමංස’’න්ති ඛාදති, කාලෙ විකාලසඤ්ඤාය භුඤ්ජති, එවං කප්පියෙ අකප්පියසඤ්ඤිතාය ආපජ්ජති.

කථං සතිසම්මොසා ආපජ්ජති? සහසෙය්යචීවරවිප්පවාසාදීනි සතිසම්මොසා ආපජ්ජති, ඉති ඉමෙසං ඡන්නං ආකාරානං අඤ්ඤතරෙන ආකාරෙන ආපන්නා යස්ස සියා සත්තන්නං ආපත්තික්ඛන්ධානං අඤ්ඤතරා ආපත්ති ථෙරස්ස වා නවස්ස වා මජ්ඣිමස්ස වාති අත්ථො.

සො ආවිකරෙය්යාති සො තං ආපත්තිං දෙසෙතු වා පකාසෙතු වාති වුත්තං හොති. අසන්තියා ආපත්තියාති යස්ස පන එවං අනාපන්නා වා ආපත්තිං ¶ ආපජ්ජිත්වා ච පන වුට්ඨිතා වා දෙසිතා වා ආරොචිතා වා ආපත්ති, තස්ස සා ආපත්ති අසන්තී නාම හොති, එවං අසන්තියා ආපත්තියා තුණ්හී භවිතබ්බං. තුණ්හීභාවෙන ඛො පනායස්මන්තෙ ‘‘පරිසුද්ධා’’ති වෙදිස්සාමීති තුණ්හීභාවෙනාපි හි කාරණෙන අහං ආයස්මන්තෙ ‘‘පරිසුද්ධා’’ඉච්චෙව ජානිස්සාමීති. යථා ඛො පන පච්චෙකපුට්ඨස්ස වෙය්යාකරණං හොතීති යථා එකෙනෙකො පුට්ඨො බ්යාකරෙය්ය, යථා එකෙනෙකො පච්චෙකපුට්ඨො ‘‘මං එස පුච්ඡතී’’ති ඤත්වා බ්යාකරෙය්යාති වුත්තං හොති.

එවමෙවං ¶ එවරූපාය පරිසාය යාවතතියං අනුසාවිතං හොතීති එත්ථ එකච්චෙ තාව ආචරියා එවං වදන්ති ‘‘එවමෙවං ඉමිස්සාය භික්ඛුපරිසාය යදෙතං ‘යස්ස සියා ආපත්ති, සො ආවිකරෙය්ය, අසන්තියා ආපත්තියා තුණ්හී භවිතබ්බං, තුණ්හීභාවෙන ඛො පනායස්මන්තෙ පරිසුද්ධාති වෙදිස්සාමී’ති තික්ඛත්තුං අනුසාවිතං, තං එකමෙකෙන ‘මං එස පුච්ඡතී’ති එවං ජානිතබ්බං හොතීති අත්ථො’’ති. තං න යුජ්ජති, කස්මා? අත්ථබ්යඤ්ජනභෙදතො. අනුස්සාවනඤ්හි නාම අත්ථතො ච බ්යඤ්ජනතො ච අභින්නං හොති ‘‘දුතියම්පි එතමත්ථං වදාමී’’තිආදීසු (මහාව. 72; චූළව. 3) විය, ‘‘යස්ස සියා’’තිආදිවචනත්තයං පන අත්ථතොපි බ්යඤ්ජනතොපි භින්නං, තෙනස්ස අනුස්සාවනත්තයං න යුජ්ජති. යදි චෙතං යාවතතියානුස්සාවනං සියා, නිදානුද්දෙසෙ අනිට්ඨිතෙපි ආපත්ති සියා. න ච යුත්තං අනාපත්තික්ඛෙත්තෙ ආපත්තිං ආපජ්ජිතුං.

අපරෙ ‘‘අනුසාවිත’’න්තිපදස්ස අනුසාවෙතබ්බන්ති අත්ථං විකප්පෙත්වා ‘‘යාවතතිය’’න්තිඉදං උපරි උද්දෙසාවසානෙ ‘‘කච්චිත්ථ පරිසුද්ධා…පෙ… තතියම්පි පුච්ඡාමී’’ති එතං සන්ධාය වුත්තන්ති ආහු. තම්පි න යුජ්ජති, කස්මා? අත්ථයුත්තීනං අභාවතො. ඉදඤ්හි පදං කෙචි ‘‘අනුසාවෙත’’න්ති සජ්ඣායන්ති, කෙචි ‘‘අනුසාවෙත’’න්ති, තං උභයං වාපි අතීතකාලමෙව දීපෙති, න අනාගතං. යදි චස්ස අයං අත්ථො සියා, ‘‘අනුසාවිතං හෙස්සතී’’ති වදෙය්ය ¶ , එවං තාව අත්ථාභාවතො න යුජ්ජති. යදි චෙතං උද්දෙසාවසානෙ වචනං සන්ධාය වුත්තං සියා, ‘‘න ආවිකරිස්සාමී’’ති චිත්තං උප්පාදෙන්තස්ස නිදානෙ සමත්තෙපි වුත්තමුසාවාදො න සියා, කස්මා? ‘‘යාවතතියං අනුස්සාවියමානෙ’’තිවචනතො (මහාව. 134) ‘‘යාවතතිය’’න්ති ඉදං වචනමෙව ¶ නිරත්ථකං සියා, කස්මා? නිදානුද්දෙසෙ යාවතතියානුස්සාවනස්ස අභාවතොති එවං යුත්තිඅභාවතො තම්පි න යුජ්ජති. ‘‘යාවතතියං අනුසාවිතං හොතී’’ති ඉදං පන ලක්ඛණවචනමත්තං, තෙන ඉමමත්ථං දස්සෙති – ඉදං පාතිමොක්ඛං නාම යාවතතියං අනුස්සාවියති, තස්මිං යාවතතියං අනුස්සාවියමානෙ යො සරමානො සන්තිං ආපත්තිං නාවිකරොති, තස්ස යාවතතියානුස්සාවනාවසානෙ සම්පජානමුසාවාදො හොතීති.

තදෙතං යථා අනුසාවිතං යාවතතියං අනුසාවිතං නාම හොති, තං දස්සෙතුං තත්ථායස්මන්තෙ පුච්ඡාමීතිආදි වුත්තං. තං පනෙතං පාරාජිකාදීනං අවසානෙ දිස්සති, න නිදානාවසානෙ. කිඤ්චාපි න දිස්සති, අථ ඛො උද්දෙසකාලෙ ‘‘ආවිකතා හිස්ස ඵාසු හොතී’’ති වත්වා ‘‘උද්දිට්ඨං ඛො ආයස්මන්තො නිදානං, තත්ථායස්මන්තෙ පුච්ඡාමී’’තිආදිනා නයෙන වත්තබ්බමෙව. එවඤ්හි නිදානං සුඋද්දිට්ඨං හොති, අඤ්ඤථා දුඋද්දිට්ඨං. ඉමමෙව ච අත්ථං සන්ධාය උපොසථක්ඛන්ධකෙ වුත්තං ‘‘යාවතතියං අනුසාවිතං ¶ හොතීති සකිම්පි අනුසාවිතං හොති, දුතියම්පි අනුසාවිතං හොති, තතියම්පි අනුසාවිතං හොතී’’ති (මහාව. 134). අයමෙත්ථ ආචරියපරම්පරාභතො විනිච්ඡයො.

යො පන භික්ඛු…පෙ… සම්පජානමුසාවාදස්ස හොතීති සම්පජානමුසාවාදො අස්ස හොති, තෙනස්ස දුක්කටාපත්ති හොති, සා ච ඛො පන න මුසාවාදලක්ඛණෙන, ‘‘සම්පජානමුසාවාදෙ කිං හොති, දුක්කටං හොතී’’ති (මහාව. 135) ඉමිනා පන භගවතො වචනෙන වචීද්වාරෙ අකිරියසමුට්ඨානාපත්ති හොතීති වෙදිතබ්බා.

වුත්තම්පි චෙතං –

‘‘අනාලපන්තො මනුජෙන කෙනචි,

වාචාගිරං නො ච පරෙ භණෙය්ය;

ආපජ්ජෙය්ය වාචසිකං, න කායිකං,

පඤ්හාමෙසා කුසලෙහි චින්තිතා’’ති. (පරි. 479);

අන්තරායිකොති ¶ විප්පටිසාරවත්ථුතාය පාමොජ්ජාදිසම්භවං නිවාරෙත්වා පඨමජ්ඣානාදීනං අධිගමාය අන්තරායං කරොති. තස්මාති යස්මා අයං අනාවිකරණසඞ්ඛාතො සම්පජානමුසාවාදො අන්තරායිකො හොති, තස්මා. සරමානෙනාති අත්තනි සන්තිං ආපත්තිං ජානන්තෙන. විසුද්ධාපෙක්ඛෙනාති වුට්ඨාතුකාමෙන විසුජ්ඣිතුකාමෙන. සන්තී ආපත්තීති ආපජ්ජිත්වා අවුට්ඨිතා ආපත්ති. ආවිකාතබ්බාති සඞ්ඝමජ්ඣෙ වා ගණමජ්ඣෙ වා එකපුග්ගලෙ වා පකාසෙතබ්බා, අන්තමසො අනන්තරස්සාපි භික්ඛුනො ‘‘අහං, ආවුසො, ඉත්ථන්නාමං ආපත්තිං ආපන්නො, ඉතො වුට්ඨහිත්වා ¶ තං ආපත්තිං පටිකරිස්සාමී’’ති (මහාව. 170) වත්තබ්බං. සචෙපි වෙමතිකො හොති, ‘‘අහං, ආවුසො, ඉත්ථන්නාමාය ආපත්තියා වෙමතිකො, යදා නිබ්බෙමතිකො භවිස්සාමි, තදා තං ආපත්තිං පටිකරිස්සාමී’’ති (මහාව. 169) වත්තබ්බං. ආවිකතා හිස්ස ඵාසු හොතීතිඑත්ථ ආවිකතාති ආවිකතාය, පකාසිතායාති අත්ථො. අලජ්ජිතාතිආදීසු (පරි. 295) විය හි ඉදම්පි කරණත්ථෙ පච්චත්තවචනං. හීති නිපාතමත්තං. අස්සාති එතස්ස භික්ඛුනො. ඵාසු හොතීති පඨමජ්ඣානාදීනං අධිගමාය ඵාසු හොති, අවිප්පටිසාරමූලකානං පාමොජ්ජාදීනං වසෙන සුඛප්පටිපදා සම්පජ්ජතීති අත්ථො.

ඉති කඞ්ඛාවිතරණියා පාතිමොක්ඛවණ්ණනාය

නිදානවණ්ණනා නිට්ඨිතා.