📜

4. පවාරණාක්ඛන්ධකො

අඵාසුවිහාරකථාදිවණ්ණනා

209. පවාරණාක්ඛන්ධකෙ පාළියං පිණ්ඩාය පටික්කමෙය්යාති පිණ්ඩාය චරිත්වා පටික්කමෙය්ය. අවක්කාරපාතින්ති අතිරෙකපිණ්ඩපාතඨපනකං එකං භාජනං. අවිසය්හන්ති උක්ඛිපිතුං අසක්කුණෙය්යං. විලඞ්ඝනං උක්ඛිපනං විලඞ්ඝො, සො එව විලඞ්ඝකො, හත්ථෙහි විලඞ්ඝකො හත්ථවිලඞ්ඝකොති ආහ ‘‘හත්ථුක්ඛෙපකෙනා’’ති. අථ වා විලඞ්ඝකෙන උක්ඛෙපකෙන හත්ථෙනාතිපි අත්ථො, අඤ්ඤමඤ්ඤං සංසිබ්බිතහත්ථෙහීති වුත්තං හොති.

213. සචෙ පන වුඩ්ඪතරො හොතීති පවාරණාදායකො භික්ඛු වුඩ්ඪතරො හොති. එවඤ්හි තෙන තස්සත්ථාය පවාරිතං හොතීති එත්ථ එවං තෙන අප්පවාරිතොපි තස්ස සඞ්ඝප්පත්තිමත්තෙන සඞ්ඝපවාරණාකම්මං සමග්ගකම්මමෙව හොතීති දට්ඨබ්බං. තෙන ච භික්ඛුනාති පවාරණාදායකෙන භික්ඛුනා.

234. බහූපි සමානවස්සා එකතො පවාරෙතුං ලභන්තීති එකස්මිං සංවච්ඡරෙ ලද්ධූපසම්පදතාය සමානුපසම්පන්නවස්සා සබ්බෙ එකතො පවාරෙතුං ලභන්තීති අත්ථො.

237. පාළියං මිච්ඡාදිට්ඨීති ‘‘නත්ථි දින්න’’න්තිආදි (දී. නි. 1.171; ම. නි. 1.445; 2.94, 95, 225; 3.91, 116, 136; සං. නි. 3.210; ධ. ස. 1221) නයප්පවත්තා. අන්තග්ගාහිකාති සස්සතුච්ඡෙදසඞ්ඛාතස්ස අන්තස්ස ගාහිකා. යං ඛො ත්වන්තිආදීසු යං පවාරණං ඨපෙසි, තං දිට්ඨෙන ඨපෙසීති තං-සද්දං අජ්ඣාහරිත්වා යොජෙතබ්බං.

239. වත්ථුං පකාසෙන්තොති පුග්ගලෙ පරිසඞ්කුප්පත්තියා නිමිත්තභූතං වත්ථුමත්තංයෙව සන්ධාය වුත්තං . යං පන වත්ථුං සන්ධාය ‘‘පුග්ගලො පඤ්ඤායති, න වත්ථූ’’ති ආහ, න තං සන්ධායෙතං වුත්තං. යදි පන තස්ස භික්ඛුනො වසනට්ඨානෙ පොක්ඛරණිතො මච්ඡග්ගහණාදි දිස්සෙය්ය, තදා ‘‘වත්ථු ච පුග්ගලො ච පඤ්ඤායතී’’ති වත්තබ්බං භවෙය්ය. තෙනාහ ‘‘පුරිමනයෙනෙව චොරෙහී’’තිආදි. භික්ඛුනො සරීරෙ මාලාගන්ධඤ්ච අරිට්ඨගන්ධඤ්ච දිස්වා එවං ‘‘වත්ථු ච පුග්ගලො ච පඤ්ඤායතී’’ති වුත්තන්ති වෙදිතබ්බං.

අඵාසුවිහාරකථාදිවණ්ණනා නිට්ඨිතා.

භණ්ඩනකාරකවත්ථුකථාවණ්ණනා

240. ද්වෙචාතුද්දසිකා හොන්තීති තතියපක්ඛෙ චාතුද්දසියා සද්ධිං ද්වෙ චාතුද්දසිකා හොන්ති. ‘‘භණ්ඩනකාරකානං තෙරසෙ වා චාතුද්දසෙ වා ඉමෙ පන්නරසීපවාරණං පවාරෙස්සන්තී’’ති ඉමිනා යථාසකං උපොසථකරණදිවසතො පට්ඨාය භික්ඛූනං චාතුද්දසීපන්නරසීවොහාරො, න චන්දගතිසිද්ධියා තිථියා වසෙනාති දස්සෙති. කිඤ්චාපි එවං ‘‘අනුජානාමි, භික්ඛවෙ, රාජූනං අනුවත්තිතු’’න්ති (මහාව. 186) වචනතො පනෙත්ථ ලොකියානං තිථිං අනුවත්තන්තෙහිපි අත්තනො උපොසථක්කමෙන චාතුද්දසිං පන්නරසිං වා, පන්නරසිං චාතුද්දසිං වා කරොන්තෙහෙව අනුවත්තිතබ්බං, න පන සොළසමදිවසං වා තෙරසමදිවසං වා උපොසථදිවසං කරොන්තෙහි. තෙනෙව පාළියම්පි ‘‘ද්වෙ තයො උපොසථෙ චාතුද්දසිකෙ කාතු’’න්ති වුත්තං. අඤ්ඤථා ද්වාදසියං, තෙරසියං වා උපොසථො කාතබ්බොති වත්තබ්බතො. ‘‘සකිං පක්ඛස්ස චාතුද්දසෙ, පන්නරසෙ වා’’තිආදිවචනම්පි උපවුත්ථක්කමෙනෙව වුත්තං, න තිථික්කමෙනාති ගහෙතබ්බං.

භණ්ඩනකාරකවත්ථුකථාවණ්ණනා නිට්ඨිතා.

පවාරණාසඞ්ගහකථාවණ්ණනා

241. ‘‘පවාරෙත්වා පන අන්තරාපි චාරිකං පක්කමිතුං ලභන්තී’’ති ඉමිනා පවාරණාසඞ්ගහෙ කතෙ අන්තරා පක්කමිතුකාමා සඞ්ඝං සන්නිපාතාපෙත්වා පවාරෙතුං ලභන්තීති දස්සෙති.

පවාරණාසඞ්ගහකථාවණ්ණනා නිට්ඨිතා.

පවාරණාක්ඛන්ධකවණ්ණනානයො නිට්ඨිතො.