📜

සෙදමොචනගාථා

අවිප්පවාසපඤ්හාවණ්ණනා

479. සෙදමොචනගාථාසු අකප්පියසම්භොගොති අනුපසම්පන්නෙහි සද්ධිං කාතුං පටික්ඛිත්තො උපොසථාදිසංවාසො එව වුත්තො. පඤ්හා මෙසාති එත්ථ ම-කාරො පදසන්ධිකරො. එසාති ච ලිඞ්ගවිපල්ලාසවසෙන වුත්තං, පඤ්හො එසොති අත්ථො. පඤ්හ-සද්දො වා ද්විලිඞ්ගො දට්ඨබ්බො. තෙනාහ ‘‘එසා පඤ්හා’’තිආදි.

ගරුභණ්ඩං සන්ධායාති ගරුභණ්ඩෙන ගරුභණ්ඩපරිවත්තනං සන්ධාය. දසාති දස අවන්දියපුග්ගලෙ. එකාදසෙති අභබ්බපුග්ගලෙ. සික්ඛාය අසාධාරණොති ඛුරභණ්ඩං ධාරෙතුං අනුඤ්ඤාතසික්ඛාපදෙන භික්ඛූහි අසාධාරණසික්ඛාපදොති අත්ථො.

උබ්භක්ඛකෙ න වදාමීති අක්ඛතො උද්ධං සීසෙ ඨිතමුඛමග්ගෙපි පාරාජිකං සන්ධාය න වදාමි. අධොනාභින්ති නාභිතො හෙට්ඨා ඨිතවච්චපස්සාවමග්ගෙපි විවජ්ජිය අඤ්ඤස්මිං සරීරප්පදෙසෙ මෙථුනධම්මපච්චයා කථං පාරාජිකො සියාති අත්ථො.

ඡෙජ්ජවත්ථුන්ති පාරාජිකං.

අවිප්පවාසපඤ්හාවණ්ණනා නිට්ඨිතා.

පාරාජිකාදිපඤ්හාවණ්ණනා

480. දුස්සකුටිආදීනීති ආදි-සද්දෙන අච්ඡතරතිපුපට්ටාදීහි, තිණපණ්ණාදීහි ච පටිච්ඡන්නකුටියො සඞ්ගණ්හාති. තාදිසාය හි කුටියා බහි ඨත්වා අන්තො ඨිතාය ඉත්ථියා මග්ගෙ දුස්සාදිනා සන්ථතං කත්වා පවෙසෙන්තොපි පාරාජිකො සියා. ලිඞ්ගපරිවත්තං සන්ධාය වුත්තාති ලිඞ්ගෙ පරිවත්තෙ පටිග්ගහණස්ස විජහනතො පුන අප්පටිග්ගහෙත්වා පරිභුඤ්ජනාපත්තිං සන්ධාය වුත්තං.

පාළියං භික්ඛූ සියා වීසතියා සමාගතාති වීසතියා සඞ්ඛාතාය භික්ඛූ සමාගතා, එතෙන සබ්බකම්මාරහතං සඞ්ඝස්ස දස්සෙති.

නිවත්ථොති ගාථාය අන්තරවාසකෙන නිවත්ථො උත්තරාසඞ්ගෙන දිගුණං කත්වා පාරුතසඞ්ඝාටියො. ඉති තානි තීණිපි චීවරානි කායෙ ගතානෙව භික්ඛුනියා බින්දුමත්තං කාළකං උදකෙන ධොවිතමත්තෙ නිස්සග්ගියානි හොන්තීති අත්ථො.

ඉත්ථිං හනෙති ගාථාය න මාතුභූතං ඉත්ථිං හනෙය්ය, න පිතුභූතං පුරිසං හනෙය්ය. අනරියන්ති තඤ්ච අනරහන්තමෙව හනෙය්ය, එතෙන අරහන්තඝාතකොපි න හොතීති දස්සෙති. අනන්තරං ඵුසෙති ආනන්තරියං ඵුසතීති අත්ථො.

481. සුප්පතිට්ඨිත-නිග්රොධසදිසන්ති යොජනවිත්ථතං රුක්ඛං සන්ධාය වුත්තං.

සත්තරසකෙසූති භික්ඛුනීනං පඤ්ඤත්තසත්තරසසඞ්ඝාදිසෙසෙසු.

පාරාජිකාදිපඤ්හාවණ්ණනා නිට්ඨිතා.