📜

සෙඛියකණ්ඩං

සෙඛියෙසු සතිපි වීතික්කමෙ අනාදරියාපෙක්ඛස්සෙව ආපත්තීති දස්සනත්ථං කාරකො න වුත්තො. අයඤ්හි විනයධම්මතා, යදිදං සාපෙක්ඛෙ කාරකනිද්දෙසො, සො වුත්තනියමෙ විධි, භුම්මකරණඤ්ච. අට්ඨඞ්ගුලාධිකම්පි ඔතාරෙත්වා නිවාසෙතුං වට්ටති. තතො පරං ඔතාරෙන්තස්ස දුක්කටන්ති මහාඅට්ඨකථායං වුත්තං. ආරාමෙ වාති බුද්ධුපට්ඨානාදිකාලෙ. පාරුපිතබ්බන්ති උත්තරාසඞ්ගකිච්චවසෙන වුත්තං.

ඨත්වාති එත්ථ ගච්ඡන්තොපි පරිස්සයාභාවං ඔලොකෙතුං ලභතියෙවාති (වජිර. ටී. පාචිත්තිය 582) ලිඛිතං. යථා වාසූපගතස්ස අන්තරඝරෙ කායං විවරිත්වා නිසීදිතුං වට්ටති, තථා තස්ස සන්තිකෙ ගන්තුකාමස්සපි කායබන්ධනං අබන්ධිත්වා සඞ්ඝාටිං අපාරුපිත්වා ගාමප්පවෙසනමනාරොචෙත්වා යථාකාමං ගන්තුං වට්ටති. තස්මා අද්ධානමග්ගගමනකාලෙ එකො භික්ඛු ගාමප්පවෙසනවත්තං පූරෙත්වා ගාමං පවිසිත්වා එකං ආවසථං පුරතොව ඨිතං පත්වා පරික්ඛාරං ඨපෙත්වා වාසූපගතො චෙ හොති, ඉතරෙහි තස්ස සන්තිකං යථාසුඛං ගන්තුං වට්ටති. කො පන වාදො චතූහපඤ්චාහං වාසමධිට්ඨාය වසිතභික්ඛූනං සන්තිකං ගන්තුඤ්ච වාසූපගතානං සන්තිකං ගන්තුඤ්ච වට්ටතීති. බුද්ධපූජම්පි යථාසුඛං ගන්තුං වට්ටති. වුත්තම්පි චෙතං අට්ඨකථායං ‘‘අනාපත්ති කාරණං පටිච්ච තහං තහං ඔලොකෙතී’’ති. තත්ථ කාරණං නාම ආමිසපූජාති වෙදිතබ්බාති ලිඛිතං.

ඡබ්බීසතිසාරුප්පවණ්ණනා නිට්ඨිතා.

යස්මා ‘‘සමතිත්තිකො පිණ්ඩපාතො පටිග්ගහෙතබ්බො’’ති (පාචි. 602-603) වචනං පිණ්ඩපාතො සමපුණ්ණො පටිග්ගහෙතබ්බොති දීපෙති, තස්මා අත්තනො හත්ථගතෙ පත්තෙ පිණ්ඩපාතො දිය්යමානො ථූපීකතොපි චෙ හොති, වට්ටතීති දීපිතො හොති. සූපොදනවිඤ්ඤත්තියං මුඛෙ පක්ඛිපිත්වා විප්පටිසාරෙ උප්පන්නෙ පුන උග්ගිරිතුකාමස්සාපි සහසා චෙ පවිසති, එත්ථ අසඤ්චිච්චභුඤ්ජති නාම. විඤ්ඤත්තිකතඤ්ච අකතඤ්ච එකස්මිං ඨානෙ ඨිතං සහසා අනුපධාරෙත්වා ගහෙත්වා භුඤ්ජති, අස්සතියා භුඤ්ජති නාම.

සයං යානගතො හුත්වා, යථා යානගතස්ස චෙ;

අලං වත්ථුං තථා නාලං, සඡත්තො ඡත්තපාණිනො.

‘‘සූපොදනවිඤ්ඤත්තිසික්ඛාපදං ථෙය්යසත්ථසමුට්ඨානං, කිරියං, සඤ්ඤාවිමොක්ඛං, සචිත්තකං, ලොකවජ්ජං, කායකම්මං, වචීකම්මං, අකුසලචිත්තං, දුක්ඛවෙදන’’න්ති පාඨො.

සෙඛියවණ්ණනා නිට්ඨිතා.

භික්ඛුපාතිමොක්ඛවණ්ණනා නිට්ඨිතා.

නමො තස්ස භගවතො අරහතො සම්මාසම්බුද්ධස්ස