📜

නමො තස්ස භගවතො අරහතො සම්මාසම්බුද්ධස්ස

විනයවිනිච්ඡයො

ගන්ථාරම්භකථා

1.

වන්දිත්වා ¶ ¶ සිරසා සෙට්ඨං, බුද්ධමප්පටිපුග්ගලං;

භවාභාවකරං ධම්මං, ගණඤ්චෙව නිරඞ්ගණං.

2.

භික්ඛූනං භික්ඛුනීනඤ්ච, හිතත්ථාය සමාහිතො;

පවක්ඛාමි සමාසෙන, විනයස්සවිනිච්ඡයං.

3.

අනාකුලමසංකිණ්ණං, මධුරත්ථපදක්කමං;

පටුභාවකරං එතං, පරමං විනයක්කමෙ.

4.

අපාරං ඔතරන්තානං, සාරං විනයසාගරං;

භික්ඛූනං භික්ඛුනීනඤ්ච, නාවාභූතං මනොරමං.

5.

තස්මා විනයනූපායං, විනයස්සවිනිච්ඡයං;

අවික්ඛිත්තෙන චිත්තෙන, වදතො මෙ නිබොධථ.