📜
මූලසික්ඛා
ගන්ථාරම්භකථා
නත්වා ¶ ¶ නාථං පවක්ඛාමි, මූලසික්ඛං සමාසතො;
භික්ඛුනා නවකෙනාදො, මූලභාසාය සික්ඛිතුං.
1. පාරාජිකනිද්දෙසො
සං නිමිත්තං පවෙසන්තො, භික්ඛු මග්ගත්තයෙ චුතො;
පවෙසනට්ඨිතුද්ධාර-පවිට්ඨෙ චෙපි සාදියං.
අදින්නං මානුසං භණ්ඩං, ථෙය්යායෙකෙන ආදියං;
පඤ්චවීසාවහාරෙසු, ගරුකං චෙ චුතො භවෙ.
ආදියන්තො ¶ හරන්තොව-හරන්තොපිරියාපථං;
විකොපෙන්තො තථා ඨානා, චාවෙන්තොපි පරාජිකො.
තත්ථ නානෙකභණ්ඩානං, පඤ්චකානං වසා පන;
අවහාරා දසඤ්චෙති, විඤ්ඤාතබ්බා විභාවිනා.
සාහත්ථාණත්තිකො චෙව, නිස්සග්ගො චාත්ථසාධකො;
ධුරනික්ඛෙපනඤ්චෙව, ඉදං සාහත්ථපඤ්චකං.
පුබ්බසහප්පයොගො ¶ ච, සංවිධාහරණම්පි ච;
සඞ්කෙතකම්මං නිමිත්තං, පුබ්බප්පයොගපඤ්චකං.
ථෙය්යාපසය්හපරිකප්ප-ප්පටිච්ඡන්නකුසාදිකා;
අවහාරා ඉමෙ පඤ්ච, විඤ්ඤාතබ්බා විභාවිනා.
මනුස්සපාණං පාණොති, ජානං වධකචෙතසා;
ජීවිතා යො වියොජෙති, සාසනා සො පරාජිතො.
ඣානාදිභෙදං හදයෙ අසන්තං,
අඤ්ඤපදෙසඤ්ච විනාධිමානං;
මනුස්සජාතිස්ස වදෙය්ය භික්ඛු,
ඤාතක්ඛණෙ තෙන පරාජිකො භවෙති.
2. ගරුකාපත්තිනිද්දෙසො
මොචෙතුකාමචිත්තෙන, උපක්කම්ම විමොචයං;
සුක්කමඤ්ඤත්ර සුපිනා, සමණො ගරුකං ඵුසෙ.
කායසංසග්ගරාගෙන ¶ , මනුස්සිත්ථිං පරාමසං;
ඉත්ථිසඤ්ඤී උපක්කම්ම, සමණො ගරුකං ඵුසෙ.
දුට්ඨුල්ලවාචස්සාදෙන, මග්ගං වාරබ්භ මෙථුනං;
ඔභාසන්තො මනුස්සිත්ථිං, සුණමානං ගරුං ඵුසෙ.
වණ්ණං වත්වාත්තනොකාම-පාරිචරියාය මෙථුනං;
ඉත්ථිං මෙථුනරාගෙන, යාචමානො ගරුං ඵුසෙ.
සන්දෙසං පටිග්ගණ්හිත්වා, පුරිසස්සිත්ථියාපි වා;
වීමංසිත්වා හරංපච්චා, සමණො ගරුකං ඵුසෙ.
චාවෙතුකාමො චොදෙන්තො, අමූලන්තිමවත්ථුනා;
චොදාපයං වා සමණො, සුණමානං ගරුං ඵුසෙ.
ලෙසමත්තං උපාදාය, අමූලන්තිමවත්ථුනා;
චාවෙතුකාමො චොදෙන්තො, සුණමානං ගරුං ඵුසෙති.
3. නිස්සග්ගියනිද්දෙසො
විකප්පනමධිට්ඨාන-මකත්වා ¶ කාලචීවරං;
දසාහමතිමාපෙති, තස්ස නිස්සග්ගියං සියා.
භික්ඛුසම්මුතියාඤ්ඤත්ර, තිචීවරමධිට්ඨිතං;
එකාහමතිමාපෙති, නිස්සග්ගි සමයං විනා.
අඤ්ඤාතිකා භික්ඛුනියා, පුරාණචීවරං පන;
ධොවාපෙති රජාපෙති, ආකොටාපෙති තං සියා.
අඤ්ඤාතිකා ¶ භික්ඛුනියා, හත්ථතො කිඤ්චි මූලකං;
අදත්වා චීවරාදානෙ, නිස්සග්ගියමුදීරිතං.
අප්පවාරිතමඤ්ඤාතිං, විඤ්ඤාපෙන්තස්ස චීවරං;
අඤ්ඤත්ර සමයා තස්ස, නිස්සග්ගියමුදීරිතං.
රජතං ජාතරූපං වා, මාසකං වා කහාපණං;
ගණ්හෙය්ය වා ගණ්හාපෙය්ය, නිස්සග්ගි සාදියෙය්ය වා.
පරිවත්තෙය්ය නිස්සග්ගි, රජතාදි චතුබ්බිධං;
කප්පියං කප්පියෙනාපි, ඨපෙත්වා සහධම්මිකෙ.
විකප්පනමධිට්ඨාන-මකත්වාන පමාණිකං;
දසාහමතිමාපෙති, පත්තං නිස්සග්ගියං සියා.
පඤ්චබන්ධනතො ඌන-පත්තෙ සති පරං පන;
විඤ්ඤාපෙති නවං පත්තං, තස්ස නිස්සග්ගියං සියා.
පටිග්ගහෙත්වා භුඤ්ජන්තො, සප්පිතෙලාදිකං පන;
සත්තාහමතිමාපෙති, තස්ස නිස්සග්ගියං සියා.
භික්ඛුස්ස චීවරං දත්වා, අච්ඡින්දන්තස්ස තං පුන;
සකසඤ්ඤාය නිස්සග්ගි, අච්ඡින්දාපයතොපි වා.
අප්පවාරිතමඤ්ඤාතිං ¶ , සුත්තං යාචිය චීවරං;
වායාපෙන්තස්ස නිස්සග්ගි, විනා ඤාතිප්පවාරිතෙ.
ජානන්තො ¶ භික්ඛු සඞ්ඝස්ස, ලාභං පරිණතං පන;
අත්තනො පරිණාමෙති, තස්ස නිස්සග්ගියං සියාති.
4. පාචිත්තියනිද්දෙසො
සම්පජානමුසාවාදෙ, පාචිත්තියමුදීරිතං;
භික්ඛුඤ්ච ඔමසන්තස්ස, පෙසුඤ්ඤහරණෙපි ච.
ඨපෙත්වා භික්ඛුනිං භික්ඛුං, අඤ්ඤෙන පිටකත්තයං;
පදසොධම්මං භණන්තස්ස, පාචිත්තියමුදීරිතං.
අනුපසම්පන්නෙනෙව, සයිත්වාන තිරත්තියං;
පාචිත්ති සහසෙය්යාය, චතුත්ථත්ථඞ්ගතෙ පුන.
ඉත්ථියා එකරත්තම්පි, සෙය්යං කප්පයතොපි වා;
දෙසෙන්තස්ස විනා විඤ්ඤුං, ධම්මඤ්ච ඡප්පදුත්තරිං.
දුට්ඨුල්ලං භික්ඛුනො වජ්ජං, භික්ඛුසම්මුතියා විනා;
අභික්ඛුනො වදන්තස්ස, පාචිත්තියමුදීරිතං.
ඛණෙය්ය වා ඛණාපෙය්ය, පථවිඤ්ච අකප්පියං;
භූතගාමං විකොපෙය්ය, තස්ස පාචිත්තියං සියා.
අජ්ඣොකාසෙ තු මඤ්චාදිං, කත්වා සන්ථරණාදිකං;
සඞ්ඝිකං යාති පාචිත්ති, අකත්වාපුච්ඡනාදිකං.
සඞ්ඝිකාවසථෙ සෙය්යං, කත්වා සන්ථරණාදිකං;
අකත්වාපුච්ඡනාදිං යො, යාති පාචිත්ති තස්සපි.
ජානං සප්පාණකං තොයං, පාචිත්ති පරිභුඤ්ජතො;
අඤ්ඤාතිකා භික්ඛුනියා, ඨපෙත්වා පාරිවත්තකං.
චීවරං ¶ ¶ දෙති පාචිත්ති, චීවරං සිබ්බතොපි ච;
අතිරිත්තං අකාරෙත්වා, පවාරෙත්වාන භුඤ්ජතො.
භික්ඛුං ආසාදනාපෙක්ඛො, පවාරෙති පවාරිතං;
අනතිරිත්තෙන භුත්තෙ තු, පාචිත්තියමුදීරිතං.
සන්නිධිභොජනං භුඤ්ජෙ, විකාලෙ යාවකාලිකං;
භුඤ්ජතො වාපි පාචිත්ති, අගිලානො පණීතකං.
විඤ්ඤාපෙත්වාන භුඤ්ජෙය්ය, සප්පිභත්තාදිකම්පි ච;
අප්පටිග්ගහිතං භුඤ්ජෙ, දන්තකට්ඨොදකං විනා.
තිත්ථියස්ස දදෙ කිඤ්චි, භුඤ්ජිතබ්බං සහත්ථතො;
නිසජ්ජං වාරහො කප්පෙ, මාතුගාමෙන චෙකතො.
සුරාමෙරයපානෙපි, පාචිත්තියමුදීරිතං;
අඞ්ගුලිපතොදකෙ චාපි, හසධම්මෙපි චොදකෙ.
අනාදරෙපි පාචිත්ති, භික්ඛුං භීසයතොපි වා;
භයානකං කථං කත්වා, දස්සෙත්වා වා භයානකං.
ඨපෙත්වා පච්චයං කිඤ්චි, අගිලානො ජලෙය්ය වා;
ජොතිං ජලාපයෙය්යාපි, තස්ස පාචිත්තියං සියා.
කප්පබින්දුමනාදාය, නවචීවරභොගිනො;
හසාපෙක්ඛස්ස පාචිත්ති, භික්ඛුනො චීවරාදිකං.
අපනෙත්වා ¶ නිධෙන්තස්ස, නිධාපෙන්තස්ස වා පන;
ජානං පාණං මාරෙන්තස්ස, තිරච්ඡානගතම්පි ච.
ඡාදෙතුකාමො ඡාදෙති, දුට්ඨුල්ලං භික්ඛුනොපි ච;
ගාමන්තරගතස්සාපි, සංවිධායිත්ථියා සහ.
භික්ඛුං ¶ පහරතො වාපි, තලසත්තිකමුග්ගිරෙ;
චොදෙති වා චොදාපෙති, ගරුකාමූලකෙනපි.
කුක්කුච්චුප්පාදනෙ චාපි, භණ්ඩනත්ථායුපස්සුතිං;
සොතුං භණ්ඩනජාතානං, යාති පාචිත්තියං සියා.
සඞ්ඝස්ස ලාභං පරිණාමිතං තු,
නාමෙති යො තං පරපුග්ගලස්ස;
පුච්ඡං අකත්වාපි ච සන්තභික්ඛුං,
පාචිත්ති ගාමස්ස ගතෙ විකාලෙති.
5. පකිණ්ණකනිද්දෙසො
සඞ්ඝිකං ගරුභණ්ඩං යො, දෙති අඤ්ඤස්ස ඉස්සරො;
ථුල්ලච්චයං යථාවත්ථුං, ථෙය්යා පාරාජිකාදිපි.
කුසාදිමයචීරානි, කම්බලං කෙසවාලජං;
සමයං විනා ධාරයතො, ලූකපක්ඛාජිනක්ඛිපං.
සත්ථකම්මෙ වත්ථිකම්මෙ, සං නිමිත්තඤ්ච ඡින්දතො;
ථුල්ලච්චයං මනුස්සානං, මංසාදිභොජනෙපි වා.
කදලෙරකක්කදුස්සානි ¶ , පොත්ථකං සබ්බනීලකං;
සබ්බපීතාදිකඤ්චාපි, ධාරයන්තස්ස දුක්කටං.
හත්ථිස්සුරගසොණානං, සීහබ්යග්ඝච්ඡදීපිනං;
තරච්ඡස්ස ච මංසාදිං, උද්දිස්සකතකම්පි ච.
අනාපුච්ඡිතමංසඤ්ච, භුඤ්ජතො දුක්කටං සියා;
යාතානුපුබ්බං හිත්වාන, දකතිත්ථාදිකං වජෙ.
සහසා ¶ වුබ්භජිත්වාන, පවිසෙ නික්ඛමෙය්ය වා;
වච්චපස්සාවකුටිකං, විනා උක්කාසිකං විසෙ.
නිත්ථුනන්තො කරෙ වච්චං, දන්තකට්ඨඤ්ච ඛාදයං;
වච්චපස්සාවදොණීනං, බහි වච්චාදිකං කරෙ.
ඛරෙන චාවලෙඛෙය්ය, කට්ඨං පාතෙය්ය කූපකෙ;
ඌහතඤ්ච න ධොවෙය්ය, උක්ලාපඤ්ච න සොධයෙ.
දකකිච්චං කරොන්තස්ස, කත්වා ‘‘චපුචපූ’’ති ච;
අනජ්ඣිට්ඨොව ථෙරෙන, පාතිමොක්ඛම්පි උද්දිසෙ.
අනාපුච්ඡාය පඤ්හස්ස, කථනෙ විස්සජ්ජනෙපි ච;
සජ්ඣායකරණෙ දීප-ජාලනෙ විජ්ඣාපනෙපි ච.
වාතපානකවාටානි, විවරෙය්ය ථකෙය්ය වා;
වන්දනාදිං කරෙ නග්ගො, ගමනං භොජනාදිකං.
පරිකම්මං ¶ කරෙ කාරෙ, තිපටිච්ඡන්නකං විනා;
කායං නහායං ඝංසෙය්ය, කුට්ටෙ ථම්භෙ තරුම්හි වා.
කුරුවින්දකසුත්තෙන, අඤ්ඤමඤ්ඤස්ස කායතො;
අගිලානො බහාරාමෙ, චරෙය්ය සඋපාහනො.
උපාහනං යො ධාරෙති, සබ්බනීලාදිකම්පි ච;
නිමිත්තං ඉත්ථියා රත්තො, මුඛං වා භික්ඛදායියා.
උජ්ඣානසඤ්ඤී අඤ්ඤස්ස, පත්තං වා අත්තනො මුඛං;
ආදාසාදිම්හි පස්සෙය්ය, උච්චාසනමහාසනෙ.
නිසජ්ජාදිං කරොන්තස්ස, දුක්කටං වන්දනෙපි ච;
උක්ඛිත්තානුපසම්පන්න-නානාසංවාසකාදිනං.
එකතො පණ්ඩකිත්ථීහි, උභතොබ්යඤ්ජනෙන වා;
දීඝාසනෙ නිසීදෙය්ය, අදීඝෙ ආසනෙ පන.
අසමානාසනිකෙන, මඤ්චපීඨෙ සයෙය්ය වා;
කුලසඞ්ගහත්ථං දදතො, ඵලපුප්ඵාදිකම්පි ච.
ගන්ථිමාදිං ¶ කරෙ කාරෙ, ජිනවාරිතපච්චයෙ;
පරිභුඤ්ජෙය්ය අබ්යත්තො, අනිස්සාය වසෙය්ය වා.
අනුඤ්ඤාතෙහි අඤ්ඤස්ස, භෙසජ්ජං වා කරෙ වදෙ;
කරෙ සාපත්තිකො භික්ඛු, උපොසථප්පවාරණං.
ද්වාරබන්ධාදිකෙ ¶ ඨානෙ, පරිවත්තකවාටකං;
අපිධාය විනාභොගං, නියොගං වා සයෙ දිවා.
ධඤ්ඤිත්ථිරූපරතනං, ආවුධිත්ථිපසාධනං;
තූරියභණ්ඩං ඵලං රුක්ඛෙ, පුබ්බණ්ණාදිඤ්ච ආමසෙ.
සසිත්ථොදකතෙලෙහි, ඵණහත්ථඵණෙහි වා;
කෙසමොසණ්ඨනෙකස්මිං, භාජනෙ භොජනෙපි ච.
එකත්ථරණපාවුරණා, සයෙය්යුං ද්වෙකමඤ්චකෙ;
දන්තකට්ඨඤ්ච ඛාදෙය්ය, අධිකූනං පමාණතො.
යොජෙති වා යොජාපෙති, නච්චං ගීතඤ්ච වාදිතං;
දස්සනං සවනං තෙසං, කරොන්තස්ස ච දුක්කටං.
වීහාදිරොපිමෙ චාපි, බහිපාකාරකුට්ටකෙ;
වච්චාදිඡඩ්ඩනාදිම්හි, දීඝකෙසාදිධාරණෙ.
නඛමට්ඨකරණාදිම්හි, සම්බාධෙ ලොමහාරණෙ;
පරිකම්මකතං භූමිං, අක්කමෙ සඋපාහනො.
අධොතඅල්ලපාදෙහි, සඞ්ඝිකං මඤ්චපීඨකං;
පරිකම්මකතං භිත්තිං, ආමසන්තස්ස දුක්කටං.
සඞ්ඝාටියාපි පල්ලත්ථෙ, දුප්පරිභුඤ්ජෙය්ය චීවරං;
අකායබන්ධනො ගාමං, වජෙ කත්වාන වච්චකං.
නාචමෙය්ය ¶ දකෙ සන්තෙ, සමාදෙය්ය අකප්පියෙ;
දෙසනාරොචනාදිම්හි, සභාගාපත්තියාපි ච.
න ¶ වසෙ වස්සං විසංවාදෙ, සුද්ධචිත්තෙ පටිස්සවං;
වස්සං වසිත්වා ගමනෙ, අනනුඤ්ඤාතකිච්චතො.
විනාපදං තරුස්සුද්ධං, පොරිසම්හාභිරූහණෙ;
අපරිස්සාවනොද්ධානං, වජෙ තං යාචතො න දෙ.
අත්තනො ඝාතනෙ ඉත්ථි-රූපාදිං කාරයෙය්ය වා;
හිත්වා මාලාදිකං චිත්තං, ජාතකාදිං සයං කරෙ.
භුඤ්ජන්තමුට්ඨපෙ තස්ස, සාලාදීසු නිසීදතො;
වුඩ්ඪානං පන ඔකාසං, අදත්වා වාපි දුක්කටං.
යානාදිමභිරූහෙය්ය, කල්ලකො රතනත්තයං;
ආරබ්භ වදෙ දවඤ්ඤ-පරිසායොපලාලනෙ.
කායාදිං විවරිත්වාන, භික්ඛුනීනං න දස්සයෙ;
වාචෙ ලොකායතං පලිතං, ගණ්හෙය්ය ගණ්හාපෙය්ය වා.
යත්ථ කත්ථචි පෙළායං, භුඤ්ජතො පත්තහත්ථකො;
වාතපානකවාටං වා, පණාමෙ සොදකම්පි ච.
උණ්හෙය්ය පටිසාමෙය්ය, අතිඋණ්හෙය්ය වොදකං;
ඨපෙය්ය භූමියං පත්තං, අඞ්කෙ වා මඤ්චපීඨකෙ.
මිඩ්ඪන්තෙ ¶ පරිභණ්ඩන්තෙ, පාදෙ ඡත්තෙ ඨපෙති වා;
චලකාදිං ඨපෙ පත්තං, පත්තෙ වා හත්ථධොවනෙ.
පත්තෙන නීහරන්තස්ස, උච්ඡිට්ඨමුදකම්පි ච;
අකප්පියම්පි පත්තං වා, පරිභුඤ්ජෙය්ය දුක්කටං.
වදෙ ‘‘ජීවා’’ති ඛිපිතෙ, න සික්ඛති අනාදරො;
පරිමණ්ඩලකාදිම්හි, සෙඛියෙ දුක්කටං සියා.
යො ¶ භණ්ඩගාරෙ පයුතොව භණ්ඩකං,
මාතූන පාචිත්තියමස්ස ගොපයෙ;
දවාය හීනෙනපි ජාතිආදිනා,
වදෙය්ය දුබ්භාසිතමුත්තමම්පි යොති.
6. වත්තාදිකණ්ඩනිද්දෙසො
උපජ්ඣාචරියවත්තඤ්ච, ගමිකාගන්තුකම්පි ච;
සෙනාසනාදිවත්තඤ්ච, කාතබ්බං පියසීලිනා.
හත්ථපාසෙ ඨිතො කිඤ්චි, ගහිතබ්බං දදෙ තිධා;
ගහෙතුකාමො ගණ්හෙය්ය, ද්විධායං සම්පටිග්ගහො.
සඞ්ඝාටිමුත්තරාසඞ්ගං, තථා අන්තරවාසකං;
‘‘එතං ඉමං අධිට්ඨාමි’’, තථා ‘‘පච්චුද්ධරාමි’’ති.
‘‘ඉමං ඉමානි එතානි, එතම්පි චීවර’’න්ති වා;
‘‘පරික්ඛාරචොළානී’’ති, තථා ‘‘පච්චුද්ධරාමි’’ති.
‘‘එතං ¶ ඉමං අධිට්ඨාමි, පත්තං පච්චුද්ධරාමි’’ති;
එවං පච්චුද්ධරෙධිට්ඨෙ, චීවරාදිං යථාවිධි.
සඤ්චරිත්තං විනා සෙසා, සචිත්තා ගරුකන්තිමා;
අච්ඡින්නං පරිණතං හිත්වා, නිස්සග්ගියමචිත්තකං.
පදසොධම්මං දුවෙ සෙය්යා, ඉත්ථියා ධම්මදෙසනා;
දුවෙ සෙනාසනානීපි, සිබ්බනං චීවරස්සපි.
පවාරිතං සුරාපානං, පඤ්චසන්නිධිආදිකං;
ජොතිනුජ්ජාලනඤ්චෙව, කප්පබින්දුමනාදිකං;
ගාමප්පවෙසනන්තෙතෙ, පාචිත්තීසු අචිත්තකා.
පකිණ්ණකෙසු උද්දිස්ස-කතං හිත්වාඤ්ඤමංසකං;
එකත්ථරණපාවුරණං, එකමඤ්චෙ තුවට්ටනං;
එකතො භුඤ්ජනඤ්චාපි, නච්චගීතාදිසත්තපි.
අකායබන්ධනඤ්චාපි ¶ , පත්තහත්ථකවාටකං;
අචිත්තකමිදං සබ්බං, සෙසමෙත්ථ සචිත්තකං.
වීතික්කමනචිත්තෙන, සචිත්තකමචිත්තකං;
පඤ්ඤත්තිජානනෙනාපි, වදන්තාචරියා තථා.
පුබ්බකරණාදිකං කත්වා, උපොසථප්පවාරණං;
නවධා දීපිතං සබ්බං, කාතබ්බං පියසීලිනා.
සම්මජ්ජනී පදීපො ච, උදකං ආසනෙන ච;
උපොසථස්ස එතානි, පුබ්බකරණන්ති වුච්චති.
ඡන්දපාරිසුද්ධිඋතුක්ඛානං ¶ , භික්ඛුගණනා ච ඔවාදො;
උපොසථස්ස එතානි, පුබ්බකිච්චන්ති වුච්චති.
උපොසථො යාවතිකා ච භික්ඛූ කම්මප්පත්තා,
සභාගාපත්තියො ච න විජ්ජන්ති;
වජ්ජනීයා ච පුග්ගලා තස්මිං න හොන්ති,
පත්තකල්ලන්ති වුච්චති.
111. පුබ්බකරණපුබ්බකිච්චානි සමාපෙත්වා දෙසිතාපත්තිකස්ස සමග්ගස්ස භික්ඛුසඞ්ඝස්ස අනුමතියා පාතිමොක්ඛං උද්දිසිතුං ආරාධනං කරොම.
පාරිසුද්ධිඅධිට්ඨාන-සුත්තුද්දෙසවසා තිධා;
ගණපුග්ගලසඞ්ඝා ච, තං කරෙය්යුං යථාක්කමං.
චාතුද්දසො පන්නරසො, සාමග්ගී දිනතො තිධා;
දිනපුග්ගලකත්තබ්බා-කාරතො තෙ නවෙරිතා.
තයො තයොති කත්වාන, දිනපුග්ගලභෙදතො;
තෙවාචීද්වෙකවාචීති, නව වුත්තා පවාරණා.
කත්තිකන්තිමපක්ඛම්හා, හෙමං ඵග්ගුනපුණ්ණමා;
තස්ස අන්තිමපක්ඛම්හා, ගිම්හං ආසාළ්හිපුණ්ණමා;
වස්සකාලං තතො සෙසං, චතුවීසතුපොසථා.
චාතුද්දසා ¶ ඡ එතෙසු, පක්ඛා තතියසත්තමා;
ඤෙය්යා පන්නරසා සෙසා, අට්ඨාරස උපොසථා.
117. ‘‘ඡන්දං දම්මි, ඡන්දං මෙ හර, ඡන්දං මෙ ආරොචෙහී’’ති ඡන්දං දාතබ්බං.
118. ‘‘පාරිසුද්ධිං ¶ දම්මි, පාරිසුද්ධිං මෙ හර, පාරිසුද්ධිං මෙ ආරොචෙහී’’ති පාරිසුද්ධි දාතබ්බා.
119. ‘‘පවාරණං දම්මි, පවාරණං මෙ හර, පවාරණං මෙ ආරොචෙහි, මමත්ථාය පවාරෙහී’’ති පවාරණා දාතබ්බා.
120. ආපත්තිදෙසකෙන ‘‘අහං, භන්තෙ, සම්බහුලා නානාවත්ථුකා ආපත්තියො ආපජ්ජිං, තා තුම්හමූලෙ පටිදෙසෙමී’’ති වත්වා පටිග්ගණ්හන්තෙන ‘‘පස්සසි, ආවුසො, තා ආපත්තියො’’ති වුත්තෙ ‘‘ආම, භන්තෙ, පස්සාමී’’ති වත්වා පුන පටිග්ගණ්හන්තෙන ‘‘ආයතිං, ආවුසො, සංවරෙය්යාසී’’ති වුත්තෙ ‘‘සාධු, සුට්ඨු, භන්තෙ සංවරිස්සාමී’’ති තික්ඛත්තුං වත්වා දෙසෙතබ්බං.
121. වෙමතිං ආරොචෙන්තෙන ‘‘අහං, භන්තෙ, සම්බහුලාසු නානාවත්ථුකාසු ආපත්තීසු වෙමතිකො, යදා නිබ්බෙමතිකො භවිස්සාමි, තදා තා ආපත්තියො පටිකරිස්සාමී’’ති තික්ඛත්තුං වත්වා ආරොචෙතබ්බං.
122. ‘‘අජ්ජ මෙ උපොසථො ‘පන්නරසො, චාතුද්දසො’ති වා අධිට්ඨාමී’’ති තික්ඛත්තුං වත්වා පුග්ගලෙන අධිට්ඨානුපොසථො කාතබ්බො.
123. ද්වීසු පන ථෙරෙන ‘‘පරිසුද්ධො අහං ආවුසො, ‘පරිසුද්ධො’ති මං ධාරෙහී’’ති තික්ඛත්තුං වත්තබ්බං. නවකෙනපි තථෙව වත්තබ්බං. ‘‘භන්තෙ, ධාරෙථා’’ති වචනං විසෙසො.
124. තීසු ¶ පන ‘‘සුණන්තු මෙ ආයස්මන්තා, අජ්ජුපොසථො පන්නරසො, යදායස්මන්තානං පත්තකල්ලං, මයං අඤ්ඤමඤ්ඤං පාරිසුද්ධිඋපොසථං කරෙය්යාමා’’ති ඤත්තිං ඨපෙත්වා පටිපාටියා වුත්තනයෙන පාරිසුද්ධිඋපොසථො කාතබ්බො.
125. ‘‘අජ්ජ මෙ පවාරණා ‘චාතුද්දසී, පන්නරසී’ති වා අධිට්ඨාමී’’ති තික්ඛත්තුං වත්වා එකෙන පවාරෙතබ්බං.
126. ද්වීසු ¶ පන ථෙරෙන ‘‘අහං, ආවුසො, ආයස්මන්තං පවාරෙමි දිට්ඨෙන වා සුතෙන වා පරිසඞ්කාය වා, වදතු මං ආයස්මා අනුකම්පං උපාදාය, පස්සන්තො පටිකරිස්සාමී’’ති තික්ඛත්තුං වත්වා පවාරෙතබ්බං. නවකෙනාපි තථෙව වත්තබ්බං. ‘‘භන්තෙ’’ති වචනං විසෙසො.
127. තීසු වා චතූසු වා පන ‘‘සුණන්තු මෙ ආයස්මන්තා, අජ්ජ පවාරණා පන්නරසී, යදායස්මන්තානං පත්තකල්ලං, මයං අඤ්ඤමඤ්ඤං පවාරෙය්යාමා’’ති ඤත්තිං ඨපෙත්වා ථෙරෙන ‘‘අහං, ආවුසො, ආයස්මන්තෙ පවාරෙමි දිට්ඨෙන වා සුතෙන වා පරිසඞ්කාය වා, වදන්තු මං ආයස්මන්තා අනුකම්පං උපාදාය, පස්සන්තො පටිකරිස්සාමී’’ති තික්ඛත්තුං වත්වා පවාරෙතබ්බං. නවකෙහිපි තථෙව පටිපාටියා පවාරෙතබ්බං. ‘‘භන්තෙ’’තිවචනං විසෙසො.
128. චතූහි අධිකෙසු පන ‘‘සුණාතු මෙ ආවුසො සඞ්ඝො, අජ්ජ පවාරණා පන්නරසී, යදි සඞ්ඝස්ස පත්තකල්ලං, සඞ්ඝො පවාරෙය්යා’’ති ඤත්තිං ඨපෙත්වා වුඩ්ඪතරෙන ‘‘සඞ්ඝං, ආවුසො, පවාරෙමි දිට්ඨෙන වා සුතෙන වා පරිසඞ්කාය වා, වදන්තු මං ආයස්මන්තො අනුකම්පං උපාදාය, පස්සන්තො පටිකරිස්සාමී’’ති තික්ඛත්තුං වත්වා පවාරෙතබ්බං. නවකෙහිපි තථෙව පටිපාටියා ‘‘සඞ්ඝං, භන්තෙ, පවාරෙමි දිට්ඨෙන වා සුතෙන ¶ වා පරිසඞ්කාය වා, වදන්තු මං ආයස්මන්තො අනුකම්පං උපාදාය, පස්සන්තො පටිකරිස්සාමී’’ති තික්ඛත්තුං වත්වා පවාරෙතබ්බං.
මූලසික්ඛා නිට්ඨිතා.
නමො තස්ස භගවතො අරහතො සම්මාසම්බුද්ධස්ස