📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀅𑀪𑀺𑀥𑀫𑁆𑀫𑀧𑀺𑀝𑀓𑁂

𑀯𑀺𑀪𑀗𑁆𑀕-𑀫𑀽𑀮𑀝𑀻𑀓𑀸

𑁧. 𑀔𑀦𑁆𑀥𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑀘𑀢𑀼𑀲𑀘𑁆𑀘𑀤𑀲𑁄𑀢𑀺 ¶ ¶ 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀲𑀫𑀸𑀳𑀝𑀸𑀦𑀺 𑀘𑀢𑀼𑀲𑀘𑁆𑀘𑀁, 𑀘𑀢𑀼𑀲𑀘𑁆𑀘𑀁 𑀧𑀲𑁆𑀲𑀻𑀢𑀺 𑀘𑀢𑀼𑀲𑀘𑁆𑀘𑀤𑀲𑁄. 𑀲𑀢𑀺𑀧𑀺 𑀲𑀸𑀯𑀓𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀜𑁆𑀘 𑀘𑀢𑀼𑀲𑀘𑁆𑀘𑀤𑀲𑁆𑀲𑀦𑀪𑀸𑀯𑁂 𑀅𑀦𑀜𑁆𑀜𑀧𑀼𑀩𑁆𑀩𑀓𑀢𑁆𑀢𑀸 𑀪𑀕𑀯𑀢𑁄 𑀘𑀢𑀼𑀲𑀘𑁆𑀘𑀤𑀲𑁆𑀲𑀦𑀲𑁆𑀲 𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀸𑀬 𑀤𑀲𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯𑀲𑁆𑀲 𑀧𑀢𑁆𑀢𑀺𑀢𑁄 𑀧𑀭𑀲𑀦𑁆𑀢𑀸𑀦𑁂𑀲𑀼 𑀘 𑀧𑀲𑀸𑀭𑀺𑀢𑀪𑀸𑀯𑁂𑀦 𑀲𑀼𑀧𑀸𑀓𑀝𑀢𑁆𑀢𑀸 𑀪𑀕𑀯𑀸𑀯 𑀯𑀺𑀲𑁂𑀲𑁂𑀦 ‘‘𑀘𑀢𑀼𑀲𑀘𑁆𑀘𑀤𑀲𑁄’’𑀢𑀺 𑀣𑁄𑀫𑀦𑀁 𑀅𑀭𑀳𑀢𑀻𑀢𑀺 ¶ . 𑀦𑀸𑀣𑀢𑀻𑀢𑀺 𑀦𑀸𑀣𑁄, 𑀯𑁂𑀦𑁂𑀬𑁆𑀬𑀸𑀦𑀁 𑀳𑀺𑀢𑀲𑀼𑀔𑀁 𑀆𑀲𑀻𑀲𑀢𑀺 𑀧𑀢𑁆𑀣𑁂𑀢𑀺, 𑀧𑀭𑀲𑀦𑁆𑀢𑀸𑀦𑀕𑀢𑀁 𑀯𑀸 𑀓𑀺𑀮𑁂𑀲𑀩𑁆𑀬𑀲𑀦𑀁 𑀉𑀧𑀢𑀸𑀧𑁂𑀢𑀺, ‘‘𑀲𑀸𑀥𑀼, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀮𑁂𑀦 𑀓𑀸𑀮𑀁 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀸’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁮.𑁭) 𑀯𑀸 𑀢𑀁 𑀢𑀁 𑀳𑀺𑀢𑀧𑀝𑀺𑀧𑀢𑁆𑀢𑀺𑀁 𑀬𑀸𑀘𑀢𑀻𑀢𑀺 𑀅𑀢𑁆𑀣𑁄. 𑀧𑀭𑀫𑁂𑀦 𑀘𑀺𑀢𑁆𑀢𑀺𑀲𑁆𑀲𑀭𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀲𑀩𑁆𑀩𑀲𑀢𑁆𑀢𑁂 𑀯𑀸 𑀕𑀼𑀡𑁂𑀳𑀺 𑀈𑀲𑀢𑀺 𑀅𑀪𑀺𑀪𑀯𑀢𑀻𑀢𑀺 𑀧𑀭𑀫𑀺𑀲𑁆𑀲𑀭𑁄 𑀪𑀕𑀯𑀸 ‘‘𑀦𑀸𑀣𑁄’’𑀢𑀺 𑀯𑀼𑀘𑁆𑀘𑀢𑀺. ‘‘𑀲𑀤𑁆𑀥𑀫𑁆𑀫𑁂 𑀕𑀸𑀭𑀯𑀁 𑀓𑀢𑁆𑀯𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑁄𑀢𑀩𑁆𑀩𑀪𑀸𑀯𑁂 𑀓𑀸𑀭𑀡𑀁 𑀯𑀢𑁆𑀯𑀸 𑀧𑀼𑀦 𑀲𑀯𑀦𑁂 𑀦𑀺𑀬𑁄𑀚𑁂𑀦𑁆𑀢𑁄 𑀆𑀳 ‘‘𑀢𑀁 𑀲𑀼𑀡𑀸𑀣 𑀲𑀫𑀸𑀳𑀺𑀢𑀸’’𑀢𑀺. ‘‘𑀧𑁄𑀭𑀸𑀡𑀝𑁆𑀞𑀓𑀣𑀸𑀦𑀬𑀁 𑀯𑀺𑀕𑀸𑀳𑀺𑀢𑁆𑀯𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀸 𑀏𑀢𑁂𑀦 𑀲𑀓𑁆𑀓𑀘𑁆𑀘𑀲𑀯𑀦𑁂 𑀘 𑀓𑀸𑀭𑀡𑀁 𑀯𑀢𑁆𑀯𑀸 𑀢𑀢𑁆𑀣 𑀦𑀺𑀬𑁄𑀚𑁂𑀦𑁆𑀢𑁄 𑀆𑀳 ‘‘𑀲𑀤𑁆𑀥𑀫𑁆𑀫𑁂 𑀕𑀸𑀭𑀯𑀁 𑀓𑀢𑁆𑀯𑀸 𑀢𑀁 𑀲𑀼𑀡𑀸𑀣𑀸’’𑀢𑀺.

𑀏𑀢𑁆𑀣 ¶ 𑀘 ‘‘𑀘𑀢𑀼𑀲𑀘𑁆𑀘𑀤𑀲𑁄’’𑀢𑀺 𑀯𑀘𑀦𑀁 𑀣𑁄𑀫𑀦𑀫𑁂𑀯 𑀘𑀢𑀼𑀧𑁆𑀧𑀪𑁂𑀤𑀸𑀬 𑀤𑁂𑀲𑀦𑀸𑀬 𑀲𑀫𑀸𑀦𑀕𑀡𑀦𑀤𑀲𑁆𑀲𑀦𑀕𑀼𑀡𑁂𑀦, ‘‘𑀅𑀝𑁆𑀞𑀸𑀭𑀲𑀳𑀺 𑀩𑀼𑀤𑁆𑀥𑀥𑀫𑁆𑀫𑁂𑀳𑀺 𑀉𑀧𑁂𑀢𑁄’’𑀢𑀺 𑀘 𑀅𑀝𑁆𑀞𑀸𑀭𑀲𑀧𑁆𑀧𑀪𑁂𑀤𑀸𑀬 𑀤𑁂𑀲𑀦𑀸𑀬 𑀲𑀫𑀸𑀦𑀕𑀡𑀦𑀕𑀼𑀡𑁂𑀳𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀣𑀸𑀯𑀼𑀢𑁆𑀢𑁂𑀦 𑀯𑀸 𑀦𑀺𑀭𑀢𑀺𑀲𑀬𑁂𑀦 𑀘𑀢𑀼𑀲𑀘𑁆𑀘𑀤𑀲𑁆𑀲𑀦𑁂𑀦 𑀪𑀕𑀯𑀸 𑀘𑀢𑀼𑀥𑀸 𑀥𑀫𑁆𑀫𑀲𑀗𑁆𑀕𑀡𑀺𑀁 𑀤𑁂𑀲𑁂𑀢𑀼𑀁 𑀲𑀫𑀢𑁆𑀣𑁄 𑀅𑀳𑁄𑀲𑀺, 𑀅𑀝𑁆𑀞𑀸𑀭𑀲𑀩𑀼𑀤𑁆𑀥𑀥𑀫𑁆𑀫𑀲𑀫𑀦𑁆𑀦𑀸𑀕𑀫𑁂𑀦 𑀅𑀝𑁆𑀞𑀸𑀭𑀲𑀥𑀸 𑀯𑀺𑀪𑀗𑁆𑀕𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀤𑁂𑀲𑀦𑀸𑀲𑀫𑀢𑁆𑀣𑀢𑀸𑀲𑀫𑁆𑀧𑀸𑀤𑀓𑀕𑀼𑀡𑀦𑀺𑀤𑀲𑁆𑀲𑀦𑀫𑁂𑀢𑀁 ‘‘𑀘𑀢𑀼𑀲𑀘𑁆𑀘𑀤𑀲𑁄 𑀉𑀧𑁂𑀢𑁄 𑀩𑀼𑀤𑁆𑀥𑀥𑀫𑁆𑀫𑁂𑀳𑀺 𑀅𑀝𑁆𑀞𑀸𑀭𑀲𑀳𑀻’’𑀢𑀺. 𑀢𑁂𑀦 𑀬𑀣𑀸𑀯𑀼𑀢𑁆𑀢𑀸𑀬 𑀤𑁂𑀲𑀦𑀸𑀬 𑀲𑀩𑁆𑀩𑀜𑁆𑀜𑀼𑀪𑀸𑀲𑀺𑀢𑀢𑁆𑀢𑀸 𑀅𑀯𑀺𑀧𑀭𑀻𑀢𑀢𑀁 𑀤𑀲𑁆𑀲𑁂𑀦𑁆𑀢𑁄 𑀢𑀢𑁆𑀣 𑀲𑀢𑁆𑀢𑁂 𑀉𑀕𑁆𑀕𑀳𑀸𑀤𑀻𑀲𑀼 𑀦𑀺𑀬𑁄𑀚𑁂𑀢𑀺, 𑀦𑀺𑀝𑁆𑀞𑀸𑀦𑀕𑀫𑀦𑀜𑁆𑀘 𑀅𑀢𑁆𑀢𑀦𑁄 𑀯𑀸𑀬𑀸𑀫𑀁 𑀤𑀲𑁆𑀲𑁂𑀦𑁆𑀢𑁄 𑀅𑀝𑁆𑀞𑀓𑀣𑀸𑀲𑀯𑀦𑁂 𑀘 𑀆𑀤𑀭𑀁 𑀉𑀧𑁆𑀧𑀸𑀤𑀬𑀢𑀺, 𑀬𑀣𑀸𑀯𑀼𑀢𑁆𑀢𑀕𑀼𑀡𑀭𑀳𑀺𑀢𑁂𑀦 𑀅𑀲𑀩𑁆𑀩𑀜𑁆𑀜𑀼𑀦𑀸 𑀤𑁂𑀲𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀁 𑀥𑀫𑁆𑀫𑀲𑀗𑁆𑀕𑀡𑀻𑀯𑀺𑀪𑀗𑁆𑀕𑀧𑁆𑀧𑀓𑀭𑀡𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀢𑀢𑁆𑀣 𑀢𑀤𑀝𑁆𑀞𑀓𑀣𑀸𑀬 𑀘 𑀲𑀸𑀢𑀺𑀲𑀬𑀁 𑀕𑀸𑀭𑀯𑀁 𑀚𑀦𑀬𑀢𑀺, 𑀩𑀼𑀤𑁆𑀥𑀸𑀤𑀻𑀦𑀜𑁆𑀘 𑀭𑀢𑀦𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑀸𑀤𑀺𑀕𑀼𑀡𑁂 𑀯𑀺𑀪𑀸𑀯𑁂𑀢𑀺.

𑀢𑀢𑁆𑀣 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀧𑀸𑀓𑀝𑀸𑀦𑁂𑀯, 𑀅𑀝𑁆𑀞𑀸𑀭𑀲 𑀧𑀦 𑀩𑀼𑀤𑁆𑀥𑀥𑀫𑁆𑀫𑀸 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 ‘‘𑀅𑀢𑀻𑀢𑀁𑀲𑁂 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀧𑁆𑀧𑀝𑀺𑀳𑀢𑀁 𑀜𑀸𑀡𑀁, 𑀅𑀦𑀸𑀕𑀢𑀁𑀲𑁂…𑀧𑁂… 𑀧𑀘𑁆𑀘𑀼𑀧𑁆𑀧𑀦𑁆𑀦𑀁𑀲𑁂…𑀧𑁂… 𑀇𑀫𑁂𑀳𑀺 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀩𑁆𑀩𑀁 𑀓𑀸𑀬𑀓𑀫𑁆𑀫𑀁 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀁, 𑀲𑀩𑁆𑀩𑀁 𑀯𑀘𑀻𑀓𑀫𑁆𑀫𑀁…𑀧𑁂. … 𑀲𑀩𑁆𑀩𑀁 𑀫𑀦𑁄𑀓𑀫𑁆𑀫𑀁…𑀧𑁂… 𑀇𑀫𑁂𑀳𑀺 𑀙𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀦𑀢𑁆𑀣𑀺 𑀙𑀦𑁆𑀤𑀲𑁆𑀲 𑀳𑀸𑀦𑀺, 𑀦𑀢𑁆𑀣𑀺 𑀥𑀫𑁆𑀫𑀤𑁂𑀲𑀦𑀸𑀬, 𑀦𑀢𑁆𑀣𑀺 𑀯𑀻𑀭𑀺𑀬𑀲𑁆𑀲, 𑀦𑀢𑁆𑀣𑀺 𑀲𑀫𑀸𑀥𑀺𑀲𑁆𑀲, 𑀦𑀢𑁆𑀣𑀺 𑀧𑀜𑁆𑀜𑀸𑀬, 𑀦𑀢𑁆𑀣𑀺 𑀯𑀺𑀫𑀼𑀢𑁆𑀢𑀺𑀬𑀸 𑀳𑀸𑀦𑀺. 𑀇𑀫𑁂𑀳𑀺 𑀤𑁆𑀯𑀸𑀤𑀲𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀦𑀢𑁆𑀣𑀺 𑀤𑀯𑀸, 𑀦𑀢𑁆𑀣𑀺 𑀭𑀯𑀸, 𑀦𑀢𑁆𑀣𑀺 𑀅𑀨𑀼𑀝𑀁, 𑀦𑀢𑁆𑀣𑀺 𑀯𑁂𑀕𑀸𑀬𑀺𑀢𑀢𑁆𑀢𑀁, 𑀦𑀢𑁆𑀣𑀺 𑀅𑀩𑁆𑀬𑀸𑀯𑀝𑀫𑀦𑁄, 𑀦𑀢𑁆𑀣𑀺 𑀅𑀧𑁆𑀧𑀝𑀺𑀲𑀗𑁆𑀔𑀸𑀦𑀼𑀧𑁂𑀓𑁆𑀔𑀸’’𑀢𑀺.

𑀢𑀢𑁆𑀣 ¶ 𑀦𑀢𑁆𑀣𑀺 𑀤𑀯𑀸𑀢𑀺 𑀔𑀺𑀟𑁆𑀟𑀸𑀥𑀺𑀧𑁆𑀧𑀸𑀬𑁂𑀦 𑀓𑀺𑀭𑀺𑀬𑀸 𑀦𑀢𑁆𑀣𑀺. 𑀦𑀢𑁆𑀣𑀺 𑀭𑀯𑀸𑀢𑀺 𑀲𑀳𑀲𑀸 𑀓𑀺𑀭𑀺𑀬𑀸 𑀦𑀢𑁆𑀣𑀺. 𑀦𑀢𑁆𑀣𑀺 𑀅𑀨𑀼𑀝𑀦𑁆𑀢𑀺 𑀜𑀸𑀡𑁂𑀦 𑀅𑀨𑀼𑀲𑀺𑀢𑀁 𑀦𑀢𑁆𑀣𑀺. 𑀦𑀢𑁆𑀣𑀺 𑀯𑁂𑀕𑀸𑀬𑀺𑀢𑀢𑁆𑀢𑀦𑁆𑀢𑀺 𑀢𑀼𑀭𑀺𑀢𑀓𑀺𑀭𑀺𑀬𑀸 𑀦𑀢𑁆𑀣𑀺. 𑀦𑀢𑁆𑀣𑀺 𑀅𑀩𑁆𑀬𑀸𑀯𑀝𑀫𑀦𑁄𑀢𑀺 𑀦𑀺𑀭𑀢𑁆𑀣𑀓𑁄 𑀘𑀺𑀢𑁆𑀢𑀲𑀫𑀼𑀤𑀸𑀘𑀸𑀭𑁄 𑀦𑀢𑁆𑀣𑀺. 𑀦𑀢𑁆𑀣𑀺 𑀅𑀧𑁆𑀧𑀝𑀺𑀲𑀗𑁆𑀔𑀸𑀦𑀼𑀧𑁂𑀓𑁆𑀔𑀸𑀢𑀺 𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀸 𑀦𑀢𑁆𑀣𑀺. 𑀓𑀢𑁆𑀣𑀘𑀺 𑀧𑀦 ‘‘𑀦𑀢𑁆𑀣𑀺 𑀥𑀫𑁆𑀫𑀤𑁂𑀲𑀦𑀸𑀬 𑀳𑀸𑀦𑀻’’𑀢𑀺 𑀅𑀮𑀺𑀔𑀺𑀢𑁆𑀯𑀸 ‘‘𑀦𑀢𑁆𑀣𑀺 𑀙𑀦𑁆𑀤𑀲𑁆𑀲 𑀳𑀸𑀦𑀺, 𑀦𑀢𑁆𑀣𑀺 𑀯𑀻𑀭𑀺𑀬𑀲𑁆𑀲, 𑀦𑀢𑁆𑀣𑀺 𑀲𑀢𑁆𑀢𑀺𑀬𑀸’’𑀢𑀺 𑀮𑀺𑀔𑀦𑁆𑀢𑀺.

𑁧. 𑀥𑀫𑁆𑀫𑀲𑀗𑁆𑀕𑀳𑁂 𑀥𑀫𑁆𑀫𑁂 𑀓𑀼𑀲𑀮𑀸𑀤𑀺𑀓𑁂 𑀢𑀺𑀓𑀤𑀼𑀓𑁂𑀳𑀺 𑀲𑀗𑁆𑀕𑀳𑁂𑀢𑁆𑀯𑀸 𑀢𑁂 𑀏𑀯 𑀥𑀫𑁆𑀫𑁂 𑀲𑀼𑀢𑁆𑀢𑀦𑁆𑀢𑁂 𑀔𑀦𑁆𑀥𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑁂 𑀯𑀺𑀪𑀚𑀺𑀢𑀼𑀁 𑀯𑀺𑀪𑀗𑁆𑀕𑀧𑁆𑀧𑀓𑀭𑀡𑀁 𑀯𑀼𑀢𑁆𑀢𑀁. 𑀢𑀢𑁆𑀣 ¶ 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀸𑀦𑀁 𑀔𑀦𑁆𑀥𑀸𑀤𑀻𑀦𑀁 𑀯𑀺𑀪𑀚𑀦𑀁 𑀯𑀺𑀪𑀗𑁆𑀕𑁄. 𑀲𑁄 𑀲𑁄 𑀯𑀺𑀪𑀗𑁆𑀕𑁄 𑀧𑀓𑀢𑁄 𑀅𑀥𑀺𑀓𑀢𑁄 𑀬𑀲𑁆𑀲𑀸 𑀧𑀸𑀴𑀺𑀬𑀸, 𑀲𑀸 ‘‘𑀯𑀺𑀪𑀗𑁆𑀕𑀧𑁆𑀧𑀓𑀭𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀥𑀺𑀓𑀢𑁄𑀢𑀺 𑀘 𑀯𑀢𑁆𑀢𑀩𑁆𑀩𑀪𑀸𑀯𑁂𑀦 𑀧𑀭𑀺𑀕𑁆𑀕𑀳𑀺𑀢𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀯𑀺𑀪𑀗𑁆𑀕𑀧𑁆𑀧𑀓𑀭𑀡𑀲𑁆𑀲 𑀆𑀤𑀺𑀪𑀽𑀢𑁂 𑀔𑀦𑁆𑀥𑀯𑀺𑀪𑀗𑁆𑀕𑁂 ‘‘𑀧𑀜𑁆𑀘𑀓𑁆𑀔𑀦𑁆𑀥𑀸 𑀭𑀽𑀧𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺 𑀇𑀤𑀁 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁 𑀦𑀸𑀫. 𑀦𑀦𑀼 𑀦 𑀏𑀢𑁆𑀢𑀓𑀫𑁂𑀯 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀦𑁆𑀢𑀺? 𑀲𑀘𑁆𑀘𑀁, 𑀇𑀢𑀺-𑀲𑀤𑁆𑀤𑁂𑀦 𑀧𑀦 𑀆𑀤𑀺-𑀲𑀤𑁆𑀤𑀢𑁆𑀣𑀚𑁄𑀢𑀓𑁂𑀦 𑀧𑀓𑀸𑀭𑀢𑁆𑀣𑀚𑁄𑀢𑀓𑁂𑀦 𑀯𑀸 𑀲𑀩𑁆𑀩𑀁 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁 𑀲𑀗𑁆𑀕𑀳𑁂𑀢𑁆𑀯𑀸 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄𑀢𑀺 𑀏𑀯𑀫𑀸𑀤𑀺 𑀏𑀯𑀁𑀧𑀓𑀸𑀭𑀁 𑀯𑀸 𑀇𑀤𑀁 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀏𑀓𑀤𑁂𑀲𑁂𑀦 𑀲𑀫𑀼𑀤𑀸𑀬𑀁 𑀦𑀺𑀤𑀲𑁆𑀲𑁂𑀢𑀺 𑀧𑀩𑁆𑀩𑀢𑀲𑀫𑀼𑀤𑁆𑀤𑀸𑀤𑀺𑀦𑀺𑀤𑀲𑁆𑀲𑀓𑁄 𑀯𑀺𑀬. 𑀢𑀢𑁆𑀣 𑀦𑀺𑀩𑁆𑀩𑀸𑀦𑀯𑀚𑁆𑀚𑀸𑀦𑀁 𑀲𑀩𑁆𑀩𑀥𑀫𑁆𑀫𑀸𑀦𑀁 𑀲𑀗𑁆𑀕𑀸𑀳𑀓𑀢𑁆𑀢𑀸 𑀲𑀩𑁆𑀩𑀲𑀗𑁆𑀕𑀸𑀳𑀓𑁂𑀳𑀺 𑀘 𑀆𑀬𑀢𑀦𑀸𑀤𑀻𑀳𑀺 𑀅𑀧𑁆𑀧𑀓𑀢𑀭𑀧𑀤𑀢𑁆𑀢𑀸 𑀔𑀦𑁆𑀥𑀸𑀦𑀁 𑀔𑀦𑁆𑀥𑀯𑀺𑀪𑀗𑁆𑀕𑁄 𑀆𑀤𑀺𑀫𑁆𑀳𑀺 𑀯𑀼𑀢𑁆𑀢𑁄.

𑀦 𑀢𑀢𑁄 𑀳𑁂𑀝𑁆𑀞𑀸𑀢𑀺 𑀭𑀽𑀧𑀸𑀤𑀻𑀦𑀁 𑀯𑁂𑀤𑀬𑀺𑀢𑀸𑀤𑀺𑀲𑀪𑀸𑀯𑀢𑁆𑀢𑀸𑀪𑀸𑀯𑀸 𑀬𑀲𑁆𑀫𑀺𑀁 𑀲𑀪𑀸𑀯𑁂 𑀅𑀢𑀻𑀢𑀸𑀤𑀬𑁄 𑀭𑀸𑀲𑀻 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀸, 𑀢𑀲𑁆𑀲 𑀭𑀼𑀧𑁆𑀧𑀦𑀸𑀤𑀺𑀢𑁄 𑀅𑀜𑁆𑀜𑀲𑁆𑀲𑀸𑀪𑀸𑀯𑀸 𑀘 𑀳𑁂𑀝𑁆𑀞𑀸 𑀕𑀡𑀦𑁂𑀲𑀼 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀅𑀦𑀺𑀝𑁆𑀞𑀸𑀦𑀁 𑀲𑀸𑀯𑀲𑁂𑀲𑀪𑀸𑀯𑀁, 𑀦 𑀳𑁂𑀝𑁆𑀞𑀸 𑀕𑀡𑀦𑀫𑀢𑁆𑀢𑀸𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀙𑀝𑁆𑀞𑀲𑁆𑀲 𑀧𑀦 𑀔𑀦𑁆𑀥𑀲𑁆𑀲 𑀅𑀪𑀸𑀯𑀸 ‘‘𑀦 𑀉𑀤𑁆𑀥’’𑀦𑁆𑀢𑀺 𑀆𑀳. 𑀦 𑀳𑀺 𑀲𑀯𑀺𑀪𑀸𑀕𑀥𑀫𑁆𑀫𑁂𑀳𑀺 𑀦𑀺𑀲𑁆𑀲𑀝𑀲𑁆𑀲 𑀅𑀢𑀻𑀢𑀸𑀤𑀺𑀪𑀸𑀯𑀭𑀳𑀺𑀢𑀲𑁆𑀲 𑀏𑀓𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀭𑀸𑀲𑀝𑁆𑀞𑁄 𑀅𑀢𑁆𑀣𑀻𑀢𑀺. ‘‘𑀭𑀸𑀲𑀺𑀫𑁆𑀳𑀻’’𑀢𑀺 𑀲𑀤𑁆𑀤𑀢𑁆𑀣𑀲𑀳𑀺𑀢𑀁 𑀔𑀦𑁆𑀥-𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀢𑀺. ‘‘𑀕𑀼𑀡𑁂 𑀧𑀡𑁆𑀡𑀢𑁆𑀢𑀺𑀬𑀁 𑀭𑀼𑀴𑁆𑀳𑀺𑀬’’𑀦𑁆𑀢𑀺 𑀯𑀺𑀲𑀬𑀫𑁂𑀯 𑀔𑀦𑁆𑀥-𑀲𑀤𑁆𑀤𑀲𑁆𑀲 𑀤𑀲𑁆𑀲𑁂𑀢𑀺, 𑀦 𑀲𑀤𑁆𑀤𑀢𑁆𑀣𑀁. 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀪𑁂𑀤𑀜𑁆𑀳𑀺 𑀲𑀻𑀮𑀸𑀤𑀺𑀕𑀼𑀡𑀁 𑀦𑀺𑀧𑁆𑀧𑀤𑁂𑀲𑁂𑀦 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑁄 𑀔𑀦𑁆𑀥-𑀲𑀤𑁆𑀤𑁄 𑀲𑀻𑀮𑀸𑀤𑀺𑀕𑀼𑀡𑀯𑀺𑀲𑀺𑀝𑁆𑀞𑀁 𑀭𑀸𑀲𑀝𑁆𑀞𑀁 𑀤𑀻𑀧𑁂𑀢𑀻𑀢𑀺. 𑀓𑁂𑀘𑀺 𑀧𑀦 ‘‘𑀕𑀼𑀡𑀝𑁆𑀞𑁄 𑀏𑀢𑁆𑀣 𑀔𑀦𑁆𑀥𑀝𑁆𑀞𑁄’’𑀢𑀺 𑀯𑀤𑀦𑁆𑀢𑀺. 𑀤𑀸𑀭𑀼𑀓𑁆𑀔𑀦𑁆𑀥𑁄𑀢𑀺 𑀏𑀢𑁆𑀣 𑀧𑀦 𑀦 𑀔𑀦𑁆𑀥-𑀲𑀤𑁆𑀤𑁄 𑀧𑀜𑁆𑀜𑀢𑁆𑀢𑀺-𑀲𑀤𑁆𑀤𑀲𑁆𑀲 𑀅𑀢𑁆𑀣𑁂 𑀯𑀢𑁆𑀢𑀢𑀺, 𑀢𑀸𑀤𑀺𑀲𑁂 𑀧𑀦 𑀧𑀼𑀣𑀼𑀮𑀸𑀬𑀢𑁂 𑀤𑀸𑀭𑀼𑀫𑁆𑀳𑀺 𑀤𑀸𑀭𑀼𑀓𑁆𑀔𑀦𑁆𑀥𑁄𑀢𑀺 𑀧𑀜𑁆𑀜𑀢𑁆𑀢𑀺 𑀳𑁄𑀢𑀻𑀢𑀺 𑀧𑀜𑁆𑀜𑀢𑁆𑀢𑀺𑀬𑀁 𑀦𑀺𑀧𑀢𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀏𑀓𑀲𑁆𑀫𑀺𑀫𑁆𑀧𑀺 𑀯𑀺𑀜𑁆𑀜𑀸𑀡𑁂 ¶ 𑀧𑀯𑀢𑁆𑀢𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄𑀢𑀺 𑀔𑀦𑁆𑀥-𑀲𑀤𑁆𑀤𑁄 𑀦 𑀭𑀼𑀴𑁆𑀳𑀻-𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀯𑀤𑀢𑀺, 𑀲𑀫𑀼𑀤𑀸𑀬𑁂 𑀧𑀦 𑀦𑀺𑀭𑀼𑀴𑁆𑀳𑁄 𑀔𑀦𑁆𑀥-𑀲𑀤𑁆𑀤𑁄 𑀢𑀤𑁂𑀓𑀤𑁂𑀲𑁂 𑀧𑀯𑀢𑁆𑀢𑀫𑀸𑀦𑁄 𑀢𑀸𑀬 𑀏𑀯 𑀭𑀼𑀴𑁆𑀳𑀺𑀬𑀸 𑀧𑀯𑀢𑁆𑀢𑀢𑀻𑀢𑀺 𑀔𑀦𑁆𑀥-𑀲𑀤𑁆𑀤𑁄 𑀭𑀼𑀴𑁆𑀳𑀺𑀬𑀁 𑀦𑀺𑀧𑀢𑀢𑀻𑀢𑀺 𑀯𑀼𑀢𑁆𑀢𑀁.

𑀭𑀸𑀲𑀺𑀢𑁄 𑀕𑀼𑀡𑀢𑁄𑀢𑀺 𑀲𑀩𑁆𑀩𑀢𑁆𑀣 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀯𑀺𑀲𑀬𑀲𑁆𑀲𑁂𑀯 𑀔𑀦𑁆𑀥-𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀬𑀸 𑀓𑀸𑀭𑀡𑀪𑀸𑀯𑀁 𑀲𑀦𑁆𑀥𑀸𑀬 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀭𑀸𑀲𑀺𑀢𑁄’’𑀢𑀺 𑀇𑀫𑀫𑀢𑁆𑀣𑀁 𑀲𑀤𑁆𑀤𑀢𑁆𑀣𑀯𑀲𑁂𑀦𑀧𑀺 ¶ 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀜𑁆𑀳𑀺 𑀔𑀦𑁆𑀥𑀝𑁆𑀞𑁄 𑀦𑀸𑀫 𑀧𑀺𑀡𑁆𑀟𑀝𑁆𑀞𑁄’’𑀢𑀺𑀆𑀤𑀺𑀫𑀸𑀳. 𑀓𑁄𑀝𑁆𑀞𑀸𑀲𑀝𑁆𑀞𑁂 𑀔𑀦𑁆𑀥𑀝𑁆𑀞𑁂 𑀙𑀝𑁆𑀞𑁂𑀦𑀧𑀺 𑀔𑀦𑁆𑀥𑁂𑀦 𑀪𑀯𑀺𑀢𑀩𑁆𑀩𑀁. 𑀦𑀺𑀩𑁆𑀩𑀸𑀦𑀫𑁆𑀧𑀺 𑀳𑀺 𑀙𑀝𑁆𑀞𑁄 𑀓𑁄𑀝𑁆𑀞𑀸𑀲𑁄𑀢𑀺. 𑀢𑀲𑁆𑀫𑀸 ‘‘𑀔𑀦𑁆𑀥𑀝𑁆𑀞𑁄 𑀦𑀸𑀫 𑀭𑀸𑀲𑀝𑁆𑀞𑁄’’𑀢𑀺 𑀬𑀼𑀢𑁆𑀢𑀁. 𑀬𑁂𑀲𑀁 𑀯𑀸 𑀅𑀢𑀻𑀢𑀸𑀤𑀺𑀯𑀲𑁂𑀦 𑀪𑁂𑀤𑁄 𑀅𑀢𑁆𑀣𑀺, 𑀢𑁂𑀲𑀁 𑀭𑀼𑀧𑁆𑀧𑀦𑀸𑀤𑀺𑀮𑀓𑁆𑀔𑀡𑀯𑀲𑁂𑀦 𑀢𑀁𑀢𑀁𑀓𑁄𑀝𑁆𑀞𑀸𑀲𑀢𑀸 𑀯𑀼𑀘𑁆𑀘𑀢𑀻𑀢𑀺 𑀪𑁂𑀤𑀭𑀳𑀺𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀓𑁄𑀝𑁆𑀞𑀸𑀲𑀝𑁆𑀞𑁂𑀦 𑀘 𑀔𑀦𑁆𑀥𑀪𑀸𑀯𑁄 𑀦 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀢𑀸𑀯𑀢𑀸𑀢𑀺 𑀉𑀤𑁆𑀤𑁂𑀲𑀫𑀢𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀽𑀢𑀸…𑀧𑁂… 𑀭𑀽𑀧𑀦𑁆𑀢𑀺 𑀏𑀯𑀁 𑀯𑀺𑀪𑀢𑁆𑀢𑁄. 𑀓𑀢𑁆𑀣𑀸𑀢𑀺 𑀘𑁂? 𑀏𑀓𑀸𑀤𑀲𑀲𑀼 𑀑𑀓𑀸𑀲𑁂𑀲𑀼. 𑀇𑀢𑀺-𑀲𑀤𑁆𑀤𑁂𑀦 𑀦𑀺𑀤𑀲𑁆𑀲𑀦𑀢𑁆𑀣𑁂𑀦 𑀲𑀩𑁆𑀩𑁄 𑀯𑀺𑀪𑀚𑀦𑀦𑀬𑁄 𑀤𑀲𑁆𑀲𑀺𑀢𑁄. 𑀇𑀤𑀜𑁆𑀘 𑀯𑀺𑀪𑀚𑀦𑀁 𑀑𑀴𑀸𑀭𑀺𑀓𑀸𑀤𑀻𑀲𑀼 𑀘𑀓𑁆𑀔𑀸𑀬𑀢𑀦𑀦𑁆𑀢𑀺𑀆𑀤𑀺𑀯𑀺𑀪𑀚𑀦𑀜𑁆𑀘 𑀬𑀣𑀸𑀲𑀫𑁆𑀪𑀯𑀁 𑀏𑀓𑀸𑀤𑀲𑀲𑀼 𑀑𑀓𑀸𑀲𑁂𑀲𑀼 𑀬𑁄𑀚𑁂𑀢𑀩𑁆𑀩𑀁, 𑀏𑀯𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀲𑀼𑀧𑀺. 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀧𑀦 𑀏𑀓𑀸𑀤𑀲𑁄𑀓𑀸𑀲𑁂𑀲𑀼 𑀧𑀼𑀭𑀺𑀫𑁂 𑀑𑀓𑀸𑀲𑀧𑀜𑁆𑀘𑀓𑁂 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁…𑀧𑁂… 𑀫𑀦𑁄𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀙𑀯𑀺𑀜𑁆𑀜𑀸𑀡𑀓𑀸𑀬𑀯𑀺𑀲𑁂𑀲𑁂𑀦 𑀯𑀺𑀪𑀢𑁆𑀢𑁄, 𑀦 𑀢𑀢𑁆𑀣 𑀫𑀦𑁄𑀥𑀸𑀢𑀼 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀯𑀺𑀪𑀚𑀦𑀁 𑀅𑀢𑁆𑀣𑀺. 𑀢𑀁 𑀧𑀦 𑀤𑁆𑀯𑀬𑀁 𑀫𑀦𑁄𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀫𑀦𑁄𑀥𑀸𑀢𑀼 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀯𑀁 𑀧𑀸𑀴𑀺𑀦𑀬𑁂𑀦 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀥𑀫𑁆𑀫𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀅𑀜𑁆𑀜𑁂𑀦 𑀧𑀓𑀸𑀭𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀔𑀦𑁆𑀥𑀦𑀺𑀤𑁆𑀤𑁂𑀲𑁂.

𑁧. 𑀭𑀽𑀧𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨. 𑀬𑀁 𑀓𑀺𑀜𑁆𑀘𑀻𑀢𑀺 𑀏𑀢𑁆𑀣 𑀬𑀦𑁆𑀢𑀺 𑀲𑀸𑀫𑀜𑁆𑀜𑁂𑀦 𑀅𑀦𑀺𑀬𑀫𑀦𑀺𑀤𑀲𑁆𑀲𑀦𑀁, 𑀓𑀺𑀜𑁆𑀘𑀻𑀢𑀺 𑀧𑀓𑀸𑀭𑀦𑁆𑀢𑀭𑀪𑁂𑀤𑀁 𑀆𑀫𑀲𑀺𑀢𑁆𑀯𑀸 𑀅𑀦𑀺𑀬𑀫𑀦𑀺𑀤𑀲𑁆𑀲𑀦𑀁. 𑀉𑀪𑀬𑁂𑀦𑀧𑀺 𑀅𑀢𑀻𑀢𑀁 𑀯𑀸…𑀧𑁂… 𑀲𑀦𑁆𑀢𑀺𑀓𑁂 𑀯𑀸 𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸 𑀬𑀸𑀤𑀺𑀲𑀁 𑀯𑀸 𑀢𑀸𑀤𑀺𑀲𑀁 𑀯𑀸 𑀬𑀁 𑀓𑀺𑀜𑁆𑀘𑀻𑀢𑀺 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑀸𑀭𑀳𑀁 𑀲𑀩𑁆𑀩𑀁 𑀩𑁆𑀬𑀸𑀧𑁂𑀢𑁆𑀯𑀸 𑀲𑀗𑁆𑀕𑀡𑁆𑀳𑀸𑀢𑀻𑀢𑀺 𑀅𑀜𑁆𑀜𑁂𑀲𑀼𑀧𑀺 ¶ 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑀸𑀭𑀳𑁂𑀲𑀼 𑀧𑀲𑀗𑁆𑀕𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀣𑀁 𑀅𑀢𑀺𑀘𑁆𑀘 𑀧𑀯𑀢𑁆𑀢𑀺𑀢𑁄 𑀅𑀢𑀺𑀧𑁆𑀧𑀲𑀗𑁆𑀕𑀲𑁆𑀲 𑀦𑀺𑀬𑀫𑀦𑀢𑁆𑀣𑀁 ‘‘𑀭𑀽𑀧’’𑀦𑁆𑀢𑀺 𑀆𑀳. 𑀬𑀁𑀓𑀺𑀜𑁆𑀘𑀻𑀢𑀺 𑀲𑀦𑀺𑀧𑀸𑀢𑀁 𑀬𑀁-𑀲𑀤𑁆𑀤𑀁 𑀓𑀺𑀁-𑀲𑀤𑁆𑀤𑀜𑁆𑀘 𑀅𑀦𑀺𑀬𑀫𑁂𑀓𑀢𑁆𑀣𑀤𑀻𑀧𑀦𑀯𑀲𑁂𑀦 𑀏𑀓𑀁 𑀧𑀤𑀦𑁆𑀢𑀺 𑀕𑀳𑁂𑀢𑁆𑀯𑀸 ‘‘𑀧𑀤𑀤𑁆𑀯𑀬𑁂𑀦𑀧𑀻’’𑀢𑀺 𑀯𑀼𑀢𑁆𑀢𑀁.

𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀯𑀤𑁂𑀣𑀸𑀢𑀺 𑀢𑀼𑀫𑁆𑀳𑁂𑀧𑀺 𑀭𑀽𑀧𑀁 𑀭𑀽𑀧𑀦𑁆𑀢𑀺 𑀯𑀤𑁂𑀣, 𑀢𑀁 𑀓𑁂𑀦 𑀓𑀸𑀭𑀡𑁂𑀦 𑀯𑀤𑁂𑀣𑀸𑀢𑀺 𑀅𑀢𑁆𑀣𑁄, 𑀅𑀣 𑀯𑀸 𑀓𑁂𑀦 𑀓𑀸𑀭𑀡𑁂𑀦 𑀭𑀽𑀧𑀁, 𑀢𑀁 𑀓𑀸𑀭𑀡𑀁 ¶ 𑀯𑀤𑁂𑀣𑀸𑀢𑀺 𑀅𑀢𑁆𑀣𑁄. 𑀅𑀣𑁂𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀢𑀼𑀡𑁆𑀳𑀻𑀪𑀽𑀢𑁂𑀲𑀼 𑀪𑀕𑀯𑀸 𑀆𑀳 ‘‘𑀭𑀼𑀧𑁆𑀧𑀢𑀻𑀢𑀺 𑀔𑁄’’𑀢𑀺𑀆𑀤𑀺.

𑀪𑀺𑀚𑁆𑀚𑀢𑀻𑀢𑀺 𑀲𑀻𑀢𑀸𑀤𑀺𑀲𑀦𑁆𑀦𑀺𑀧𑀸𑀢𑁂 𑀯𑀺𑀲𑀤𑀺𑀲𑀲𑀦𑁆𑀢𑀸𑀦𑀼𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁄 𑀧𑀼𑀭𑀺𑀫𑀲𑀦𑁆𑀢𑀸𑀦𑀲𑁆𑀲 𑀪𑁂𑀤𑀁 𑀲𑀦𑁆𑀥𑀸𑀬𑀸𑀳. 𑀪𑁂𑀤𑁄 𑀘 𑀯𑀺𑀲𑀤𑀺𑀲𑀢𑀸𑀯𑀺𑀓𑀸𑀭𑀸𑀧𑀢𑁆𑀢𑀻𑀢𑀺 𑀪𑀺𑀚𑁆𑀚𑀢𑀻𑀢𑀺 𑀯𑀺𑀓𑀸𑀭𑀁 𑀆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀓𑀸𑀭𑀸𑀧𑀢𑁆𑀢𑀺 𑀘 𑀲𑀻𑀢𑀸𑀤𑀺𑀲𑀦𑁆𑀦𑀺𑀧𑀸𑀢𑁂 𑀯𑀺𑀲𑀤𑀺𑀲𑀭𑀽𑀧𑀼𑀧𑁆𑀧𑀢𑁆𑀢𑀺𑀬𑁂𑀯. 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀧𑀦 𑀅𑀢𑀺𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑁄 𑀬𑀣𑀸 𑀭𑀽𑀧𑀥𑀫𑁆𑀫𑀸𑀦𑀁 𑀞𑀺𑀢𑀺𑀓𑁆𑀔𑀡𑁂 𑀲𑀻𑀢𑀸𑀤𑀻𑀳𑀺 𑀲𑀫𑀸𑀕𑀫𑁄 𑀳𑁄𑀢𑀺, 𑀬𑁂𑀦 𑀢𑀢𑁆𑀣 𑀉𑀢𑀼𑀦𑁄 𑀞𑀺𑀢𑀺𑀧𑁆𑀧𑀢𑁆𑀢𑀲𑁆𑀲 𑀧𑀼𑀭𑀺𑀫𑀲𑀤𑀺𑀲𑀲𑀦𑁆𑀢𑀸𑀦𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸 𑀦 𑀳𑁄𑀢𑀺 𑀆𑀳𑀸𑀭𑀸𑀤𑀺𑀓𑀲𑁆𑀲 𑀯𑀸, 𑀏𑀯𑀁 𑀅𑀜𑁆𑀜𑁂𑀳𑀺 𑀲𑀫𑀸𑀕𑀫𑁄 𑀦𑀢𑁆𑀣𑀺. 𑀲𑀗𑁆𑀖𑀝𑁆𑀝𑀦𑁂𑀦 𑀘 𑀯𑀺𑀓𑀸𑀭𑀸𑀧𑀢𑁆𑀢𑀺𑀬𑀁 𑀭𑀼𑀧𑁆𑀧𑀦-𑀲𑀤𑁆𑀤𑁄 𑀦𑀺𑀭𑀼𑀴𑁆𑀳𑁄, 𑀢𑀲𑁆𑀫𑀸 𑀅𑀭𑀽𑀧𑀥𑀫𑁆𑀫𑀸𑀦𑀁 𑀲𑀗𑁆𑀖𑀝𑁆𑀝𑀦𑀯𑀺𑀭𑀳𑀺𑀢𑀢𑁆𑀢𑀸 𑀭𑀽𑀧𑀥𑀫𑁆𑀫𑀸𑀦𑀁 𑀯𑀺𑀬 𑀧𑀸𑀓𑀝𑀲𑁆𑀲 𑀯𑀺𑀓𑀸𑀭𑀲𑁆𑀲 𑀅𑀪𑀸𑀯𑀢𑁄 𑀘 ‘‘𑀭𑀼𑀧𑁆𑀧𑀦𑁆𑀢𑀻’’𑀢𑀺 ‘‘𑀭𑀼𑀧𑁆𑀧𑀦𑀮𑀓𑁆𑀔𑀡𑀸’’𑀢𑀺 𑀘 𑀦 𑀯𑀼𑀘𑁆𑀘𑀦𑁆𑀢𑀺. 𑀚𑀺𑀖𑀘𑁆𑀙𑀸𑀧𑀺𑀧𑀸𑀲𑀸𑀳𑀺 𑀭𑀼𑀧𑁆𑀧𑀦𑀜𑁆𑀘 𑀉𑀤𑀭𑀕𑁆𑀕𑀺𑀲𑀦𑁆𑀦𑀺𑀧𑀸𑀢𑁂𑀦 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣 𑀘 𑀓𑀼𑀧𑁆𑀧𑀢𑀻𑀢𑀺 𑀏𑀢𑁂𑀦 𑀓𑀢𑁆𑀢𑀼𑀅𑀢𑁆𑀣𑁂 𑀭𑀽𑀧𑀧𑀤𑀲𑀺𑀤𑁆𑀥𑀺𑀁 𑀤𑀲𑁆𑀲𑁂𑀢𑀺, 𑀖𑀝𑁆𑀝𑀻𑀬𑀢𑀺 𑀧𑀻𑀴𑀻𑀬𑀢𑀻𑀢𑀺 𑀏𑀢𑁂𑀳𑀺 𑀓𑀫𑁆𑀫𑀢𑁆𑀣𑁂. 𑀓𑁄𑀧𑀸𑀤𑀺𑀓𑀺𑀭𑀺𑀬𑀸𑀬𑁂𑀯 𑀳𑀺 𑀭𑀼𑀧𑁆𑀧𑀦𑀓𑀺𑀭𑀺𑀬𑀸𑀢𑀺. 𑀲𑁄 𑀧𑀦 𑀓𑀢𑁆𑀢𑀼𑀪𑀽𑀢𑁄 𑀓𑀫𑁆𑀫𑀪𑀽𑀢𑁄 𑀘 𑀅𑀢𑁆𑀣𑁄 𑀪𑀺𑀚𑁆𑀚𑀫𑀸𑀦𑁄 𑀳𑁄𑀢𑀻𑀢𑀺 𑀇𑀫𑀲𑁆𑀲𑀢𑁆𑀣𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 ‘‘𑀪𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀭𑀼𑀧𑁆𑀧𑀢𑀻𑀢𑀺 𑀭𑀽𑀧𑀦𑁆𑀢𑀺 𑀓𑀫𑁆𑀫𑀓𑀢𑁆𑀢𑀼𑀢𑁆𑀣𑁂 𑀭𑀽𑀧𑀧𑀤𑀲𑀺𑀤𑁆𑀥𑀺 𑀯𑀼𑀢𑁆𑀢𑀸. 𑀯𑀺𑀓𑀸𑀭𑁄 𑀳𑀺 𑀭𑀼𑀧𑁆𑀧𑀦𑀦𑁆𑀢𑀺. 𑀢𑁂𑀦𑁂𑀯 ‘‘𑀪𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄’’𑀢𑀺 𑀓𑀫𑁆𑀫𑀓𑀢𑁆𑀢𑀼𑀢𑁆𑀣𑁂𑀦 𑀪𑀺𑀚𑁆𑀚𑀢𑀺-𑀲𑀤𑁆𑀤𑁂𑀦 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀬𑀁 𑀧𑀦 𑀭𑀼𑀧𑁆𑀧𑀢𑀺 𑀪𑀺𑀚𑁆𑀚𑀢𑀺, 𑀢𑀁 𑀬𑀲𑁆𑀫𑀸 𑀓𑀼𑀧𑁆𑀧𑀢𑀺 𑀖𑀝𑁆𑀝𑀻𑀬𑀢𑀺 𑀧𑀻𑀴𑀻𑀬𑀢𑀺, 𑀢𑀲𑁆𑀫𑀸 𑀏𑀢𑁂𑀳𑀺 𑀘 𑀧𑀤𑁂𑀳𑀺 𑀧𑀤𑀢𑁆𑀣𑁄 𑀧𑀸𑀓𑀝𑁄 𑀓𑀢𑁄𑀢𑀺. ‘‘𑀓𑁂𑀦𑀝𑁆𑀞𑁂𑀦𑀸’’𑀢𑀺 𑀧𑀼𑀘𑁆𑀙𑀸𑀲𑀪𑀸𑀕𑀯𑀲𑁂𑀦 ‘‘𑀭𑀼𑀧𑁆𑀧𑀦𑀝𑁆𑀞𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀦 𑀓𑁂𑀯𑀮𑀁 𑀲𑀤𑁆𑀤𑀢𑁆𑀣𑁄𑀬𑁂𑀯 𑀭𑀼𑀧𑁆𑀧𑀦𑀁, 𑀢𑀲𑁆𑀲 𑀧𑀦𑀢𑁆𑀣𑀲𑁆𑀲 𑀮𑀓𑁆𑀔𑀡𑀜𑁆𑀘 𑀳𑁄𑀢𑀻𑀢𑀺 𑀅𑀢𑁆𑀣𑀮𑀓𑁆𑀔𑀡𑀯𑀲𑁂𑀦 ‘‘𑀭𑀼𑀧𑁆𑀧𑀦𑀮𑀓𑁆𑀔𑀡𑁂𑀦 𑀭𑀽𑀧𑀦𑁆𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀳.

𑀙𑀺𑀚𑁆𑀚𑀺𑀢𑁆𑀯𑀸𑀢𑀺 𑀫𑀼𑀘𑁆𑀙𑀸𑀧𑀢𑁆𑀢𑀺𑀬𑀸 𑀫𑀼𑀘𑁆𑀘𑀺𑀢𑁆𑀯𑀸 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀙𑁂𑀤𑀦𑀯𑀲𑁂𑀦 𑀯𑀸 𑀙𑀺𑀚𑁆𑀚𑀺𑀢𑁆𑀯𑀸. 𑀅𑀘𑁆𑀘𑀦𑁆𑀢𑀔𑀸𑀭𑁂𑀦 𑀲𑀻𑀢𑁄𑀤𑀓𑁂𑀦𑀸𑀢𑀺 𑀅𑀢𑀺𑀲𑀻𑀢𑀪𑀸𑀯𑀫𑁂𑀯 𑀲𑀦𑁆𑀥𑀸𑀬 𑀅𑀘𑁆𑀘𑀦𑁆𑀢𑀔𑀸𑀭𑀢𑀸 𑀯𑀼𑀢𑁆𑀢𑀸 𑀲𑀺𑀬𑀸. 𑀦 𑀳𑀺 𑀢𑀁 ¶ 𑀓𑀧𑁆𑀧𑀲𑀡𑁆𑀞𑀸𑀦𑀁 𑀉𑀤𑀓𑀁 𑀲𑀫𑁆𑀧𑀢𑁆𑀢𑀺𑀓𑀭𑀁 𑀧𑀣𑀯𑀻𑀲𑀦𑁆𑀥𑀸𑀭𑀓𑀁 𑀓𑀧𑁆𑀧𑀯𑀺𑀦𑀸𑀲𑀉𑀤𑀓𑀁 𑀯𑀺𑀬 𑀔𑀸𑀭𑀁 𑀪𑀯𑀺𑀢𑀼𑀁 𑀅𑀭𑀳𑀢𑀺. 𑀢𑀣𑀸 𑀳𑀺 𑀲𑀢𑀺 𑀧𑀣𑀯𑀻 𑀯𑀺𑀮𑀻𑀬𑁂𑀬𑁆𑀬𑀸𑀢𑀺. 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑁂𑀢𑀺 𑀲𑀉𑀲𑁆𑀲𑀤𑀁 𑀅𑀯𑀻𑀘𑀺𑀦𑀺𑀭𑀬𑀁 𑀯𑀼𑀢𑁆𑀢𑀁. 𑀢𑁂𑀦𑁂𑀯 ‘‘𑀢𑀢𑁆𑀣 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑁂𑀢𑁆𑀢𑀺…𑀧𑁂… 𑀦 𑀳𑁄𑀦𑁆𑀢𑀻𑀢𑀺 𑀏𑀯𑀁𑀯𑀺𑀥𑀸𑀧𑀺 𑀲𑀢𑁆𑀢𑀸 𑀅𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄 𑀏𑀯𑀁𑀯𑀺𑀥𑀸𑀬𑁂𑀯 𑀳𑁄𑀦𑁆𑀢𑀻𑀢𑀺 𑀦𑀺𑀬𑀫𑀸𑀪𑀸𑀯𑀢𑁄. 𑀏𑀯𑀁 𑀓𑀸𑀮𑀓𑀜𑁆𑀚𑀺𑀓𑀸𑀤𑀻𑀲𑀼𑀧𑀻𑀢𑀺. 𑀲𑀭𑀦𑁆𑀢𑀸 𑀕𑀘𑁆𑀙𑀦𑁆𑀢𑀻𑀢𑀺 𑀲𑀭𑀻𑀲𑀧-𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀯𑀤𑀢𑀺.

𑀅𑀪𑀺𑀲𑀜𑁆𑀜𑀽𑀳𑀺𑀢𑁆𑀯𑀸𑀢𑀺 ¶ 𑀏𑀢𑁆𑀣 𑀲𑀫𑀽𑀳𑀁 𑀓𑀢𑁆𑀯𑀸𑀢𑀺𑀧𑀺 𑀅𑀢𑁆𑀣𑁄. 𑀏𑀢𑁂𑀦 𑀲𑀩𑁆𑀩𑀁 𑀭𑀽𑀧𑀁…𑀧𑁂… 𑀤𑀲𑁆𑀲𑀺𑀢𑀁 𑀳𑁄𑀢𑀻𑀢𑀺 𑀏𑀢𑁂𑀦 𑀭𑀽𑀧𑀓𑁆𑀔𑀦𑁆𑀥-𑀲𑀤𑁆𑀤𑀲𑁆𑀲 𑀲𑀫𑀸𑀦𑀸𑀥𑀺𑀓𑀭𑀡𑀲𑀫𑀸𑀲𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯𑀸𑀳 ‘‘𑀦 𑀳𑀺 𑀭𑀽𑀧𑀢𑁄…𑀧𑁂… 𑀅𑀢𑁆𑀣𑀻’’𑀢𑀺.

𑁩. 𑀧𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀏𑀢𑁆𑀣 𑀏𑀓𑀸𑀤𑀲𑁄𑀓𑀸𑀲𑁂𑀲𑀼 𑀭𑀽𑀧𑀁 𑀧𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀦 𑀳𑀺 𑀢𑀢𑁆𑀣 𑀫𑀸𑀢𑀺𑀓𑀁𑀬𑁂𑀯 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀸𑀢𑀺𑀓𑀸 𑀞𑀧𑀺𑀢𑀸, 𑀅𑀣 𑀔𑁄 𑀧𑀓𑀭𑀡𑀧𑁆𑀧𑀢𑁆𑀢𑀁 𑀭𑀽𑀧𑀦𑁆𑀢𑀺.

𑀅𑀧𑀭𑁄 𑀦𑀬𑁄…𑀧𑁂… 𑀏𑀢𑁆𑀣𑁂𑀯 𑀕𑀡𑀦𑀁 𑀕𑀢𑀦𑁆𑀢𑀺 𑀏𑀢𑁂𑀦 𑀅𑀢𑀻𑀢𑀁𑀲𑁂𑀦𑀸𑀢𑀺 𑀪𑀼𑀫𑁆𑀫𑀢𑁆𑀣𑁂 𑀓𑀭𑀡𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀬𑁂𑀦 𑀧𑀓𑀸𑀭𑁂𑀦 𑀕𑀡𑀦𑀁 𑀕𑀢𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀽𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀲𑀢𑀺 𑀫𑀳𑀸𑀪𑀽𑀢𑀼𑀧𑀸𑀤𑀸𑀬𑀭𑀽𑀧𑀪𑀸𑀯𑁄 𑀅𑀢𑀻𑀢𑀓𑁄𑀝𑁆𑀞𑀸𑀲𑁂 𑀕𑀡𑀦𑀲𑁆𑀲 𑀓𑀸𑀭𑀡𑀦𑁆𑀢𑀺 𑀆𑀧𑀚𑁆𑀚𑀢𑀺. 𑀦 𑀳𑀺 𑀅𑀢𑀻𑀢𑀁𑀲𑀸𑀦𑀁 𑀯𑁂𑀤𑀦𑀸𑀤𑀻𑀦𑀁 𑀦𑀺𑀯𑀢𑁆𑀢𑀦𑀢𑁆𑀣𑀁 𑀇𑀤𑀁 𑀯𑀘𑀦𑀁 ‘‘𑀬𑀁 𑀭𑀽𑀧’’𑀦𑁆𑀢𑀺 𑀏𑀢𑁂𑀦𑁂𑀯 𑀢𑁂𑀲𑀁 𑀦𑀺𑀯𑀢𑁆𑀢𑀺𑀢𑀢𑁆𑀢𑀸, 𑀦𑀸𑀧𑀺 𑀭𑀽𑀧𑀲𑁆𑀲 𑀅𑀜𑁆𑀜𑀧𑁆𑀧𑀓𑀸𑀭𑀦𑀺𑀯𑀢𑁆𑀢𑀦𑀢𑁆𑀣𑀁 𑀲𑀩𑁆𑀩𑀧𑁆𑀧𑀓𑀸𑀭𑀲𑁆𑀲 𑀢𑀢𑁆𑀣 𑀕𑀡𑀺𑀢𑀢𑁆𑀢𑀸, 𑀦 𑀘 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀓𑀸𑀭𑀦𑀺𑀯𑀢𑁆𑀢𑀦𑀢𑁆𑀣𑀁 𑀅𑀢𑀻𑀢𑀁𑀲𑀯𑀘𑀦𑁂𑀦 𑀢𑀁𑀦𑀺𑀯𑀢𑁆𑀢𑀦𑀢𑁄𑀢𑀺. 𑀅𑀣 𑀧𑀦 𑀬𑀁 𑀅𑀢𑀻𑀢𑀁𑀲𑁂𑀦 𑀕𑀡𑀺𑀢𑀁, 𑀢𑀁 𑀘𑀢𑁆𑀢𑀸𑀭𑁄 𑀘…𑀧𑁂… 𑀭𑀽𑀧𑀦𑁆𑀢𑀺 𑀏𑀯𑀁 𑀕𑀡𑀺𑀢𑀦𑁆𑀢𑀺 𑀅𑀬𑀫𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄, 𑀏𑀯𑀁 𑀲𑀢𑀺 𑀕𑀡𑀦𑀦𑁆𑀢𑀭𑀤𑀲𑁆𑀲𑀦𑀁 𑀇𑀤𑀁 𑀲𑀺𑀬𑀸, 𑀦 𑀅𑀢𑀻𑀢𑀁𑀲𑁂𑀦 𑀕𑀡𑀺𑀢𑀧𑁆𑀧𑀓𑀸𑀭𑀤𑀲𑁆𑀲𑀦𑀁, 𑀢𑀁𑀤𑀲𑁆𑀲𑀦𑁂 𑀧𑀦 𑀲𑀢𑀺 𑀪𑀽𑀢𑀼𑀧𑀸𑀤𑀸𑀬𑀭𑀽𑀧𑀧𑁆𑀧𑀓𑀸𑀭𑁂𑀦 𑀅𑀢𑀻𑀢𑀁𑀲𑁂 𑀕𑀡𑀺𑀢𑀁 𑀢𑀁𑀲𑀪𑀸𑀯𑀢𑁆𑀢𑀸𑀢𑀺 𑀆𑀧𑀦𑁆𑀦𑀫𑁂𑀯 𑀳𑁄𑀢𑀺, 𑀦 𑀘 𑀏𑀯𑀁𑀲𑀪𑀸𑀯𑀢𑀸 𑀅𑀢𑀻𑀢𑀁𑀲𑁂 𑀕𑀡𑀺𑀢𑀢𑀸𑀬 𑀓𑀸𑀭𑀡𑀁 𑀪𑀯𑀺𑀢𑀼𑀁 𑀅𑀭𑀳𑀢𑀺 𑀏𑀯𑀁𑀲𑀪𑀸𑀯𑀲𑁆𑀲𑁂𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑁂𑀲𑀼 𑀕𑀡𑀺𑀢𑀢𑁆𑀢𑀸 𑀲𑀼𑀔𑀸𑀤𑀺𑀲𑀪𑀸𑀯𑀲𑁆𑀲 𑀘 𑀅𑀢𑀻𑀢𑀁𑀲𑁂 𑀕𑀡𑀺𑀢𑀢𑁆𑀢𑀸, 𑀢𑀲𑁆𑀫𑀸 𑀧𑀼𑀭𑀺𑀫𑀦𑀬𑁄 𑀏𑀯 𑀬𑀼𑀢𑁆𑀢𑁄. 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀦𑀺𑀤𑁆𑀤𑁂𑀲𑁂𑀲𑀼𑀧𑀺 𑀢𑀸𑀤𑀺𑀲𑁄 𑀏𑀯𑀢𑁆𑀣𑁄 𑀮𑀩𑁆𑀪𑀢𑀻𑀢𑀺.

𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑀢𑁄𑀢𑀺 𑀧𑀭𑀺𑀬𑀸𑀬𑀤𑁂𑀲𑀦𑀢𑁆𑀢𑀸 𑀲𑀼𑀢𑁆𑀢𑀲𑁆𑀲 𑀯𑀼𑀢𑁆𑀢𑀁. 𑀅𑀪𑀺𑀥𑀫𑁆𑀫𑀦𑀺𑀤𑁆𑀤𑁂𑀲𑀢𑁄𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑀤𑁂𑀲𑀦𑀢𑁆𑀢𑀸 𑀅𑀪𑀺𑀥𑀫𑁆𑀫𑀲𑁆𑀲 𑀦𑀺𑀘𑁆𑀙𑀬𑁂𑀦 𑀤𑁂𑀲𑁄 𑀦𑀺𑀤𑁆𑀤𑁂𑀲𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀻𑀢𑀺𑀆𑀤𑀻𑀲𑀼 𑀅𑀬𑀫𑀥𑀺𑀧𑁆𑀧𑀸𑀬𑁄 ¶ 𑁋 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀢𑁆𑀢𑀸 𑀬𑀣𑀸 ‘‘𑀅𑀢𑀻𑀢𑀁 𑀦𑀦𑁆𑀯𑀸𑀕𑀫𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼 𑀅𑀤𑁆𑀥𑀸𑀦𑀯𑀲𑁂𑀦 𑀅𑀢𑀻𑀢𑀸𑀤𑀺𑀪𑀸𑀯𑁄𑀯 𑀯𑀼𑀢𑁆𑀢𑁄, 𑀢𑀣𑀸 𑀇𑀥𑀸𑀧𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄 (𑀫. 𑀦𑀺. 𑁩.𑁨𑁭𑁨, 𑁨𑁭𑁫; 𑀅𑀧. 𑀣𑁂𑀭 𑁨.𑁫𑁫.𑁨𑁪𑁪) 𑀲𑀺𑀬𑀸. 𑀏𑀯𑀁 𑀲𑀦𑁆𑀢𑁂𑀧𑀺 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀫𑁆𑀧𑀺 𑀅𑀪𑀺𑀥𑀫𑁆𑀫𑀤𑁂𑀲𑀦𑀸𑀬𑁂𑀯 𑀲𑀼𑀢𑁆𑀢𑀦𑁆𑀢𑁂 𑀯𑀼𑀢𑁆𑀢𑀥𑀫𑁆𑀫𑁂 𑀯𑀺𑀘𑀺𑀦𑀺𑀢𑁆𑀯𑀸 𑀯𑀺𑀪𑀚𑀦𑀯𑀲𑁂𑀦 𑀧𑀯𑀢𑁆𑀢𑀸𑀢𑀺 𑀅𑀪𑀺𑀥𑀫𑁆𑀫𑀦𑀺𑀤𑁆𑀤𑁂𑀲𑁂𑀦𑁂𑀯 𑀅𑀢𑀻𑀢𑀸𑀤𑀺𑀪𑀸𑀯𑁄 𑀦𑀺𑀤𑁆𑀤𑀺𑀝𑁆𑀞𑁄𑀢𑀺.

𑀅𑀤𑁆𑀥𑀸𑀲𑀦𑁆𑀢𑀢𑀺𑀲𑀫𑀬𑀔𑀡𑀯𑀲𑁂𑀦𑀸𑀢𑀺 ¶ 𑀏𑀢𑁆𑀣 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀧𑀭𑀺𑀘𑁆𑀙𑀺𑀦𑁆𑀦𑁂 𑀓𑀸𑀮𑁂 𑀅𑀤𑁆𑀥𑀸-𑀲𑀤𑁆𑀤𑁄 𑀯𑀢𑁆𑀢𑀢𑀻𑀢𑀺 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀫𑀢𑀻𑀢𑀫𑀤𑁆𑀥𑀸𑀦’’𑀦𑁆𑀢𑀺𑀆𑀤𑀺𑀲𑀼𑀢𑁆𑀢𑀯𑀲𑁂𑀦 (𑀫. 𑀦𑀺. 𑁧.𑁧𑁮; 𑀲𑀁. 𑀦𑀺. 𑁨.𑁨𑁦) 𑀯𑀺𑀜𑁆𑀜𑀸𑀬𑀢𑀺. ‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀅𑀤𑁆𑀥𑀸. 𑀓𑀢𑀫𑁂 𑀢𑀬𑁄? 𑀅𑀢𑀻𑀢𑁄 𑀅𑀤𑁆𑀥𑀸, 𑀅𑀦𑀸𑀕𑀢𑁄 𑀅𑀤𑁆𑀥𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀅𑀤𑁆𑀥𑀸’’𑀢𑀺 (𑀇𑀢𑀺𑀯𑀼. 𑁬𑁩; 𑀤𑀻. 𑀦𑀺. 𑁩.𑁩𑁦𑁫) 𑀏𑀢𑁆𑀣 𑀧𑀦 𑀧𑀭𑀫𑀢𑁆𑀣𑀢𑁄 𑀧𑀭𑀺𑀘𑁆𑀙𑀺𑀚𑁆𑀚𑀫𑀸𑀦𑁄 𑀅𑀤𑁆𑀥𑀸 𑀦𑀺𑀭𑀼𑀢𑁆𑀢𑀺𑀧𑀣𑀲𑀼𑀢𑁆𑀢𑀯𑀲𑁂𑀦 (𑀲𑀁. 𑀦𑀺. 𑁩.𑁬𑁨) 𑀔𑀡𑀧𑀭𑀺𑀘𑁆𑀙𑀺𑀦𑁆𑀦𑁄 𑀬𑀼𑀢𑁆𑀢𑁄. 𑀢𑀢𑁆𑀣 𑀳𑀺 ‘‘𑀬𑀁, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀚𑀸𑀢𑀁 𑀧𑀸𑀢𑀼𑀪𑀽𑀢𑀁, ‘𑀅𑀢𑁆𑀣𑀻’𑀢𑀺 𑀢𑀲𑁆𑀲 𑀲𑀗𑁆𑀔𑀸’’𑀢𑀺 (𑀲𑀁. 𑀦𑀺. 𑁩.𑁬𑁨) 𑀯𑀺𑀚𑁆𑀚𑀫𑀸𑀦𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑀸 𑀢𑀢𑁄 𑀧𑀼𑀩𑁆𑀩𑁂 𑀧𑀘𑁆𑀙𑀸 𑀘 𑀅𑀢𑀻𑀢𑀸𑀦𑀸𑀕𑀢𑀢𑀸 𑀯𑀼𑀢𑁆𑀢𑀸𑀢𑀺. 𑀬𑁂𑀪𑀼𑀬𑁆𑀬𑁂𑀦 𑀧𑀦 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀧𑀭𑀺𑀘𑁆𑀙𑀺𑀦𑁆𑀦𑁄 (𑀤𑀻. 𑀦𑀺. 𑁩.𑁩𑁦𑁫; 𑀇𑀢𑀺𑀯𑀼. 𑁬𑁩) 𑀲𑀼𑀢𑁆𑀢𑁂𑀲𑀼 𑀅𑀢𑀻𑀢𑀸𑀤𑀺𑀓𑁄 𑀅𑀤𑁆𑀥𑀸 𑀯𑀼𑀢𑁆𑀢𑁄𑀢𑀺 𑀲𑁄 𑀏𑀯 𑀇𑀥𑀸𑀧𑀺 ‘‘𑀅𑀤𑁆𑀥𑀸𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑁄. 𑀲𑀻𑀢𑀁 𑀲𑀻𑀢𑀲𑁆𑀲 𑀲𑀪𑀸𑀕𑁄, 𑀢𑀣𑀸 𑀉𑀡𑁆𑀳𑀁 𑀉𑀡𑁆𑀳𑀲𑁆𑀲. 𑀬𑀁 𑀧𑀦 𑀲𑀻𑀢𑀁 𑀉𑀡𑁆𑀳𑀁 𑀯𑀸 𑀲𑀭𑀻𑀭𑁂 𑀲𑀦𑁆𑀦𑀺𑀧𑀢𑀺𑀢𑀁 𑀲𑀦𑁆𑀢𑀸𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀅𑀦𑀽𑀦𑀁 𑀅𑀦𑀥𑀺𑀓𑀁 𑀏𑀓𑀸𑀓𑀸𑀭𑀁, 𑀢𑀁 𑀏𑀓𑁄 𑀉𑀢𑀽𑀢𑀺 𑀯𑀼𑀘𑁆𑀘𑀢𑀺. 𑀲𑀪𑀸𑀕𑀉𑀢𑀼𑀦𑁄 𑀅𑀦𑁂𑀓𑀦𑁆𑀢𑀲𑀪𑀸𑀯𑀢𑁄 𑀏𑀓𑀕𑀳𑀡𑀁 𑀓𑀢𑀁, 𑀏𑀯𑀁 𑀆𑀳𑀸𑀭𑁂𑀧𑀺. 𑀏𑀓𑀯𑀻𑀣𑀺𑀏𑀓𑀚𑀯𑀦𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀧𑀜𑁆𑀘𑀙𑀝𑁆𑀞𑀤𑁆𑀯𑀸𑀭𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀦𑁆𑀢𑀢𑀺𑀲𑀫𑀬𑀓𑀣𑀸 𑀯𑀺𑀧𑀲𑁆𑀲𑀓𑀸𑀦𑀁 𑀉𑀧𑀓𑀸𑀭𑀢𑁆𑀣𑀸𑀬 𑀅𑀝𑁆𑀞𑀓𑀣𑀸𑀲𑀼 𑀓𑀣𑀺𑀢𑀸.

𑀦𑀺𑀝𑁆𑀞𑀺𑀢𑀳𑁂𑀢𑀼𑀧𑀘𑁆𑀘𑀬𑀓𑀺𑀘𑁆𑀘𑀁, 𑀦𑀺𑀝𑁆𑀞𑀺𑀢𑀳𑁂𑀢𑀼𑀓𑀺𑀘𑁆𑀘𑀫𑀦𑀺𑀝𑁆𑀞𑀺𑀢𑀧𑀘𑁆𑀘𑀬𑀓𑀺𑀘𑁆𑀘𑀁, 𑀉𑀪𑀬𑀓𑀺𑀘𑁆𑀘𑀫𑀲𑀫𑁆𑀧𑀢𑁆𑀢𑀁, 𑀲𑀓𑀺𑀘𑁆𑀘𑀓𑁆𑀔𑀡𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀁. 𑀚𑀦𑀓𑁄 𑀳𑁂𑀢𑀼, 𑀉𑀧𑀢𑁆𑀣𑀫𑁆𑀪𑀓𑁄 𑀧𑀘𑁆𑀘𑀬𑁄, 𑀢𑁂𑀲𑀁 𑀉𑀧𑁆𑀧𑀸𑀤𑀦𑀁 𑀉𑀧𑀢𑁆𑀣𑀫𑁆𑀪𑀦𑀜𑁆𑀘 𑀓𑀺𑀘𑁆𑀘𑀁. 𑀬𑀣𑀸 𑀩𑀻𑀚𑀲𑁆𑀲 𑀅𑀗𑁆𑀓𑀼𑀭𑀼𑀧𑁆𑀧𑀸𑀤𑀦𑀁 𑀧𑀣𑀯𑀻𑀆𑀤𑀻𑀦𑀜𑁆𑀘 𑀢𑀤𑀼𑀧𑀢𑁆𑀣𑀫𑁆𑀪𑀦𑀁 𑀓𑀫𑁆𑀫𑀲𑁆𑀲 𑀓𑀝𑀢𑁆𑀢𑀸𑀭𑀽𑀧𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀁 𑀆𑀳𑀸𑀭𑀸𑀤𑀻𑀦𑀁 𑀢𑀤𑀼𑀧𑀢𑁆𑀣𑀫𑁆𑀪𑀦𑀁, 𑀏𑀯𑀁 𑀏𑀓𑁂𑀓𑀲𑁆𑀲 𑀓𑀮𑀸𑀧𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀘 𑀚𑀦𑀓𑀸𑀦𑀁 𑀓𑀫𑁆𑀫𑀸𑀦𑀦𑁆𑀢𑀭𑀸𑀤𑀺𑀧𑀘𑁆𑀘𑀬𑀪𑀽𑀢𑀸𑀦𑀁 𑀉𑀧𑀢𑁆𑀣𑀫𑁆𑀪𑀓𑀸𑀦𑀜𑁆𑀘 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀸𑀦𑀁 𑀓𑀺𑀘𑁆𑀘𑀁 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣 𑀉𑀧𑁆𑀧𑀸𑀤𑀓𑁆𑀔𑀡𑁂 𑀳𑁂𑀢𑀼𑀓𑀺𑀘𑁆𑀘𑀁 𑀤𑀝𑁆𑀞𑀩𑁆𑀩𑀁, 𑀢𑀻𑀲𑀼𑀧𑀺 𑀔𑀡𑁂𑀲𑀼 𑀧𑀘𑁆𑀘𑀬𑀓𑀺𑀘𑁆𑀘𑀁. 𑀧𑀣𑀯𑀻𑀆𑀤𑀻𑀦𑀁 𑀲𑀦𑁆𑀥𑀸𑀭𑀡𑀸𑀤𑀺𑀓𑀁 𑀨𑀲𑁆𑀲𑀸𑀤𑀻𑀦𑀁 𑀨𑀼𑀲𑀦𑀸𑀤𑀺𑀓𑀜𑁆𑀘 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀺𑀘𑁆𑀘𑀁 𑀲𑀓𑀺𑀘𑁆𑀘𑀁, 𑀢𑀲𑁆𑀲 𑀓𑀭𑀡𑀓𑁆𑀔𑀡𑁄 𑀲𑀓𑀺𑀘𑁆𑀘𑀓𑁆𑀔𑀡𑁄. 𑀲𑀳 𑀯𑀸 𑀓𑀺𑀘𑁆𑀘𑁂𑀦 𑀲𑀓𑀺𑀘𑁆𑀘𑀁, 𑀬𑀲𑁆𑀫𑀺𑀁 𑀔𑀡𑁂 𑀲𑀓𑀺𑀘𑁆𑀘𑀁 𑀭𑀽𑀧𑀁 𑀯𑀸 𑀅𑀭𑀽𑀧𑀁 𑀯𑀸 𑀳𑁄𑀢𑀺, 𑀲𑁄 𑀲𑀓𑀺𑀘𑁆𑀘𑀓𑁆𑀔𑀡𑁄, 𑀢𑀲𑁆𑀫𑀺𑀁 𑀔𑀡𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀁.

𑁬. 𑀏𑀢𑁆𑀢𑀓𑀫𑁂𑀯𑀸𑀢𑀺 ¶ ‘‘𑀢𑁂𑀲𑀁 𑀢𑁂𑀲’’𑀦𑁆𑀢𑀺 𑀇𑀫𑀺𑀦𑀸 𑀆𑀫𑁂𑀟𑀺𑀢𑀯𑀘𑀦𑁂𑀦 𑀅𑀪𑀺𑀩𑁆𑀬𑀸𑀧𑀦𑀢𑁆𑀣𑁂𑀦 𑀯𑀼𑀢𑁆𑀢𑀢𑁆𑀣𑀫𑁂𑀯. ‘‘𑀅𑀧𑀭𑀲𑁆𑀲 𑀅𑀧𑀭𑀲𑁆𑀲𑀸’’𑀢𑀺 𑀤𑀻𑀧𑀦𑀁 𑀅𑀧𑀭𑀤𑀻𑀧𑀦𑀁. 𑀧𑀭𑀺𑀬𑁂𑀲𑀢𑀽𑀢𑀺 ¶ 𑀏𑀢𑁂𑀦 𑀧𑀭𑀺𑀬𑁂𑀲𑀦𑀸𑀬 𑀅𑀦𑀺𑀝𑁆𑀞𑀦𑀸𑀫𑀦𑀺𑀯𑀢𑁆𑀢𑀦𑀲𑁆𑀲 𑀅𑀓𑀸𑀭𑀡𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀓𑀫𑁆𑀫𑀤𑁄𑀲𑁂𑀦 𑀳𑀺 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑀤𑁄𑀲𑁂𑀦 𑀘 𑀕𑀽𑀣𑀪𑀓𑁆𑀔𑀧𑀸𑀡𑀸𑀤𑀬𑁄 𑀉𑀫𑁆𑀫𑀢𑁆𑀢𑀓𑀸𑀤𑀬𑁄 𑀘 𑀧𑀭𑀺𑀬𑁂𑀲𑁂𑀬𑁆𑀬𑀼𑀁 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁂𑀦 𑀘 𑀬𑁄𑀦𑀓𑀸𑀤𑀬𑁄 𑀦 𑀆𑀭𑀫𑁆𑀫𑀡𑀲𑁆𑀲 𑀧𑀭𑀺𑀬𑁂𑀲𑀺𑀢𑀩𑁆𑀩𑀲𑀪𑀸𑀯𑀢𑁆𑀢𑀸, 𑀅𑀧𑀭𑀺𑀬𑁂𑀲𑀺𑀢𑀩𑁆𑀩𑀲𑀪𑀸𑀯𑀢𑁆𑀢𑀸 𑀧𑀦 𑀏𑀢𑀲𑁆𑀲 𑀅𑀦𑀺𑀝𑁆𑀞𑀫𑀺𑀘𑁆𑀘𑁂𑀯 𑀦𑀸𑀫𑀦𑁆𑀢𑀺 𑀅𑀢𑁆𑀣𑁄.

𑀲𑀫𑁆𑀧𑀢𑁆𑀢𑀺𑀯𑀺𑀭𑀳𑀢𑁄𑀢𑀺 𑀭𑀽𑀧𑀸𑀤𑀻𑀦𑀁 𑀤𑁂𑀯𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀪𑀯𑁂 𑀓𑀼𑀲𑀮𑀓𑀫𑁆𑀫𑀨𑀮𑀢𑀸 𑀲𑀫𑀺𑀤𑁆𑀥𑀲𑁄𑀪𑀦𑀢𑀸 𑀘 𑀲𑀫𑁆𑀧𑀢𑁆𑀢𑀺, 𑀢𑀩𑁆𑀩𑀺𑀭𑀳𑀢𑁄𑀢𑀺 𑀅𑀢𑁆𑀣𑁄. 𑀢𑀢𑁄 𑀏𑀯 𑀢𑀁 𑀦 𑀧𑀭𑀺𑀬𑁂𑀲𑀺𑀢𑀩𑁆𑀩𑀦𑁆𑀢𑀺. 𑀲𑁄𑀪𑀦𑀸𑀦𑀺 𑀘 𑀓𑀸𑀦𑀺𑀘𑀺 𑀳𑀢𑁆𑀣𑀺𑀭𑀽𑀧𑀸𑀤𑀻𑀦𑀺 𑀅𑀓𑀼𑀲𑀮𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸𑀦𑀺 𑀦 𑀢𑁂𑀲𑀁𑀬𑁂𑀯 𑀳𑀢𑁆𑀣𑀺𑀆𑀤𑀻𑀦𑀁 𑀲𑀼𑀔𑀲𑁆𑀲 𑀳𑁂𑀢𑀼𑀪𑀸𑀯𑀁 𑀕𑀘𑁆𑀙𑀦𑁆𑀢𑀻𑀢𑀺 𑀢𑁂𑀲𑀁 𑀲𑀗𑁆𑀕𑀡𑁆𑀳𑀦𑀢𑁆𑀣𑀁 ‘‘𑀅𑀓𑀦𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲 𑀢𑀲𑁆𑀲𑁂𑀯 𑀳𑀺 𑀲𑀢𑁆𑀢𑀲𑁆𑀲 𑀅𑀢𑁆𑀢𑀦𑀸 𑀓𑀢𑁂𑀦 𑀓𑀼𑀲𑀮𑁂𑀦 𑀦𑀺𑀩𑁆𑀩𑀢𑁆𑀢𑀁 𑀲𑀼𑀔𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀓𑀼𑀲𑀮𑁂𑀦 𑀦𑀺𑀩𑁆𑀩𑀢𑁆𑀢𑀁 𑀤𑀼𑀓𑁆𑀔𑀲𑁆𑀲. 𑀢𑀲𑁆𑀫𑀸 𑀓𑀫𑁆𑀫𑀚𑀸𑀦𑀁 𑀇𑀝𑁆𑀞𑀸𑀦𑀺𑀝𑁆𑀞𑀢𑀸 𑀓𑀫𑁆𑀫𑀓𑀸𑀭𑀓𑀲𑀢𑁆𑀢𑀲𑁆𑀲 𑀯𑀲𑁂𑀦 𑀬𑁄𑀚𑀦𑀸𑀭𑀳𑀸 𑀲𑀺𑀬𑀸. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀓𑀼𑀲𑀮𑀓𑀫𑁆𑀫𑀚𑀁 𑀅𑀦𑀺𑀝𑁆𑀞𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀇𑀤𑀫𑁂𑀯 𑀯𑀼𑀢𑁆𑀢𑀁, 𑀦 𑀯𑀼𑀢𑁆𑀢𑀁 ‘‘𑀅𑀓𑀼𑀲𑀮𑀓𑀫𑁆𑀫𑀚𑀁 𑀇𑀝𑁆𑀞𑀁 𑀦𑀸𑀫 𑀦𑀢𑁆𑀣𑀻’’𑀢𑀺. 𑀢𑁂𑀦 𑀅𑀓𑀼𑀲𑀮𑀓𑀫𑁆𑀫𑀚𑀫𑁆𑀧𑀺 𑀲𑁄𑀪𑀦𑀁 𑀧𑀭𑀲𑀢𑁆𑀢𑀸𑀦𑀁 𑀇𑀝𑁆𑀞𑀦𑁆𑀢𑀺 𑀅𑀦𑀼𑀜𑁆𑀜𑀸𑀢𑀁 𑀪𑀯𑀺𑀲𑁆𑀲𑀢𑀺. 𑀓𑀼𑀲𑀮𑀓𑀫𑁆𑀫𑀚𑀁 𑀧𑀦 𑀲𑀩𑁆𑀩𑁂𑀲𑀁 𑀇𑀝𑁆𑀞𑀫𑁂𑀯𑀸𑀢𑀺 𑀯𑀤𑀦𑁆𑀢𑀺. 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀧𑀦 𑀓𑁂𑀲𑀜𑁆𑀘𑀺 𑀫𑀦𑀼𑀲𑁆𑀲𑀭𑀽𑀧𑀁 𑀅𑀫𑀦𑀸𑀧𑀁, 𑀬𑀢𑁄 𑀢𑁂 𑀤𑀺𑀲𑁆𑀯𑀸𑀯 𑀧𑀮𑀸𑀬𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀘 𑀤𑁂𑀯𑀢𑀸𑀭𑀽𑀧𑀁 𑀤𑀺𑀲𑁆𑀯𑀸 𑀪𑀸𑀬𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀁 𑀢𑀁 𑀭𑀽𑀧𑀁 𑀆𑀭𑀩𑁆𑀪 𑀓𑀼𑀲𑀮𑀯𑀺𑀧𑀸𑀓𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀸𑀤𑀺𑀲𑀲𑁆𑀲 𑀧𑀦 𑀧𑀼𑀜𑁆𑀜𑀲𑁆𑀲 𑀅𑀪𑀸𑀯𑀸 𑀦 𑀢𑁂𑀲𑀁 𑀢𑀢𑁆𑀣 𑀅𑀪𑀺𑀭𑀢𑀺 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀼𑀲𑀮𑀓𑀫𑁆𑀫𑀚𑀲𑁆𑀲 𑀧𑀦 𑀅𑀦𑀺𑀝𑁆𑀞𑀲𑁆𑀲𑀸𑀪𑀸𑀯𑁄 𑀯𑀺𑀬 𑀅𑀓𑀼𑀲𑀮𑀓𑀫𑁆𑀫𑀚𑀲𑁆𑀲 𑀲𑁄𑀪𑀦𑀲𑁆𑀲 𑀇𑀝𑁆𑀞𑀲𑁆𑀲 𑀅𑀪𑀸𑀯𑁄 𑀯𑀢𑁆𑀢𑀩𑁆𑀩𑁄. 𑀳𑀢𑁆𑀣𑀺𑀆𑀤𑀻𑀦𑀫𑁆𑀧𑀺 𑀳𑀺 𑀅𑀓𑀼𑀲𑀮𑀓𑀫𑁆𑀫𑀚𑀁 𑀫𑀦𑀼𑀲𑁆𑀲𑀸𑀦𑀁 𑀅𑀓𑀼𑀲𑀮𑀯𑀺𑀧𑀸𑀓𑀲𑁆𑀲𑁂𑀯 𑀆𑀭𑀫𑁆𑀫𑀡𑀁, 𑀓𑀼𑀲𑀮𑀓𑀫𑁆𑀫𑀚𑀁 𑀧𑀦 𑀧𑀯𑀢𑁆𑀢𑁂 𑀲𑀫𑀼𑀝𑁆𑀞𑀺𑀢𑀁 𑀓𑀼𑀲𑀮𑀯𑀺𑀧𑀸𑀓𑀲𑁆𑀲. 𑀇𑀝𑁆𑀞𑀸𑀭𑀫𑁆𑀫𑀡𑁂𑀦 𑀧𑀦 𑀯𑁄𑀫𑀺𑀲𑁆𑀲𑀓𑀢𑁆𑀢𑀸 𑀅𑀧𑁆𑀧𑀓𑀁 𑀅𑀓𑀼𑀲𑀮𑀓𑀫𑁆𑀫𑀚𑀁 𑀩𑀳𑀼𑀮𑀁 𑀅𑀓𑀼𑀲𑀮𑀯𑀺𑀧𑀸𑀓𑀼𑀧𑁆𑀧𑀢𑁆𑀢𑀺𑀬𑀸 𑀓𑀸𑀭𑀡𑀁 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺. 𑀯𑀺𑀧𑀸𑀓𑀁 𑀧𑀦 𑀓𑀢𑁆𑀣𑀘𑀺 𑀦 𑀲𑀓𑁆𑀓𑀸 𑀯𑀜𑁆𑀘𑁂𑀢𑀼𑀦𑁆𑀢𑀺 𑀯𑀺𑀧𑀸𑀓𑀯𑀲𑁂𑀦 𑀇𑀝𑁆𑀞𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑀯𑀯𑀢𑁆𑀣𑀸𑀦𑀁 𑀲𑀼𑀝𑁆𑀞𑀼 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀢𑀁 𑀅𑀦𑀼𑀕𑀦𑁆𑀢𑁆𑀯𑀸 𑀲𑀩𑁆𑀩𑀢𑁆𑀣 𑀇𑀝𑁆𑀞𑀸𑀦𑀺𑀝𑁆𑀞𑀢𑀸 𑀬𑁄𑀚𑁂𑀢𑀩𑁆𑀩𑀸.

𑀅𑀦𑀺𑀝𑁆𑀞𑀸 𑀧𑀜𑁆𑀘 𑀓𑀸𑀫𑀕𑀼𑀡𑀸𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 ‘‘𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀺 𑀭𑀽𑀧𑀸𑀦𑀺 𑀇𑀝𑁆𑀞𑀸𑀦𑀻’’𑀢𑀺 (𑀫. 𑀦𑀺. 𑁧.𑁧𑁬𑁬; 𑁨.𑁧𑁫𑁫; 𑁩.𑁧𑁯𑁦; 𑀲𑀁. 𑀦𑀺. 𑁫.𑁩𑁦) 𑀏𑀯𑀫𑀸𑀤𑀺𑀦𑀸 𑀇𑀝𑁆𑀞𑀸𑀦𑁂𑀯 𑀭𑀽𑀧𑀸𑀤𑀻𑀦𑀺 ‘‘𑀓𑀸𑀫𑀕𑀼𑀡𑀸’’𑀢𑀺 𑀯𑀼𑀢𑁆𑀢𑀸𑀦𑀻𑀢𑀺? 𑀓𑀸𑀫𑀕𑀼𑀡𑀲𑀤𑀺𑀲𑁂𑀲𑀼 ¶ 𑀓𑀸𑀫𑀕𑀼𑀡𑀯𑁄𑀳𑀸𑀭𑀢𑁄, 𑀲𑀤𑀺𑀲𑀢𑀸 𑀘 𑀭𑀽𑀧𑀸𑀤𑀺𑀪𑀸𑀯𑁄𑀬𑁂𑀯 ¶ , 𑀦 𑀇𑀝𑁆𑀞𑀢𑀸. ‘‘𑀅𑀦𑀺𑀝𑁆𑀞𑀸’’𑀢𑀺 𑀯𑀸 𑀯𑀘𑀦𑁂𑀦 𑀅𑀓𑀸𑀫𑀕𑀼𑀡𑀢𑀸 𑀤𑀲𑁆𑀲𑀺𑀢𑀸𑀢𑀺 𑀓𑀸𑀫𑀕𑀼𑀡𑀯𑀺𑀲𑀪𑀸𑀕𑀸 𑀭𑀽𑀧𑀸𑀤𑀬𑁄 ‘‘𑀓𑀸𑀫𑀕𑀼𑀡𑀸’’𑀢𑀺 𑀯𑀼𑀢𑁆𑀢𑀸 𑀅𑀲𑀺𑀯𑁂 ‘‘𑀲𑀺𑀯𑀸’’𑀢𑀺 𑀯𑁄𑀳𑀸𑀭𑁄 𑀯𑀺𑀬. 𑀲𑀩𑁆𑀩𑀸𑀦𑀺 𑀯𑀸 𑀇𑀝𑁆𑀞𑀸𑀦𑀺𑀝𑁆𑀞𑀸𑀦𑀺 𑀭𑀽𑀧𑀸𑀤𑀻𑀦𑀺 𑀢𑀡𑁆𑀳𑀸𑀯𑀢𑁆𑀣𑀼𑀪𑀸𑀯𑀢𑁄 𑀓𑀸𑀫𑀕𑀼𑀡𑀸𑀬𑁂𑀯. 𑀯𑀼𑀢𑁆𑀢𑀜𑁆𑀳𑀺 ‘‘𑀭𑀽𑀧𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧’’𑀦𑁆𑀢𑀺𑀆𑀤𑀺 (𑀤𑀻. 𑀦𑀺. 𑁨.𑁪𑁦𑁦; 𑀫. 𑀦𑀺. 𑁧.𑁧𑁩𑁩; 𑀯𑀺𑀪. 𑁨𑁦𑁩). 𑀅𑀢𑀺𑀲𑀬𑁂𑀦 𑀧𑀦 𑀓𑀸𑀫𑀦𑀻𑀬𑀢𑁆𑀢𑀸 𑀲𑀼𑀢𑁆𑀢𑁂𑀲𑀼 ‘‘𑀓𑀸𑀫𑀕𑀼𑀡𑀸’’𑀢𑀺 𑀇𑀝𑁆𑀞𑀸𑀦𑀺 𑀭𑀽𑀧𑀸𑀤𑀻𑀦𑀺 𑀯𑀼𑀢𑁆𑀢𑀸𑀦𑀻𑀢𑀺.

𑀤𑁆𑀯𑀻𑀲𑀼𑀧𑀺 𑀳𑀻𑀦𑀧𑀡𑀻𑀢𑀧𑀤𑁂𑀲𑀼 ‘‘𑀅𑀓𑀼𑀲𑀮𑀓𑀫𑁆𑀫𑀚𑀯𑀲𑁂𑀦 𑀓𑀼𑀲𑀮𑀓𑀫𑁆𑀫𑀚𑀯𑀲𑁂𑀦𑀸’’𑀢𑀺 𑀯𑀘𑀦𑀁 ‘‘𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦’’𑀦𑁆𑀢𑀺 𑀲𑀢𑁆𑀢𑀯𑀲𑁂𑀦 𑀦𑀺𑀬𑀫𑁂𑀢𑁆𑀯𑀸 𑀯𑀺𑀪𑀚𑀺𑀢𑀢𑁆𑀢𑀸, 𑀅𑀬𑀜𑁆𑀘𑀢𑁆𑀣𑁄 ‘‘𑀢𑁂𑀲𑀁 𑀢𑁂𑀲’’𑀦𑁆𑀢𑀺 𑀅𑀯𑀬𑀯𑀬𑁄𑀕𑁂 𑀲𑀸𑀫𑀺𑀯𑀘𑀦𑀁 𑀓𑀢𑁆𑀯𑀸 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀢𑁆𑀢𑀲𑀦𑁆𑀢𑀸𑀦𑀧𑀭𑀺𑀬𑀸𑀧𑀦𑁆𑀦𑁂𑀲𑀼 𑀓𑀫𑁆𑀫𑀚𑀁 𑀯𑀺𑀲𑀺𑀝𑁆𑀞𑀦𑁆𑀢𑀺 ‘‘𑀓𑀫𑁆𑀫𑀚𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀧𑀦 𑀢𑁂𑀳𑀺 𑀢𑁂𑀳𑀻𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀢𑁂𑀲𑀁 𑀢𑁂𑀲𑀦𑁆𑀢𑀺 𑀲𑀸𑀫𑀺𑀯𑀘𑀦𑀁, 𑀯𑀺𑀲𑀬𑀯𑀺𑀲𑀬𑀻𑀲𑀫𑁆𑀩𑀦𑁆𑀥𑁂 𑀯𑀸, 𑀦 𑀓𑀫𑁆𑀫𑀚𑀯𑀲𑁂𑀦𑁂𑀯 𑀭𑀽𑀧𑀸𑀤𑀻𑀦𑀺 𑀯𑀺𑀪𑀢𑁆𑀢𑀸𑀦𑀺, 𑀲𑀩𑁆𑀩𑁂𑀲𑀁 𑀧𑀦 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀸𑀦𑀁 𑀯𑀲𑁂𑀦 𑀯𑀺𑀪𑀢𑁆𑀢𑀸𑀦𑀻𑀢𑀺 𑀯𑀺𑀜𑁆𑀜𑀸𑀬𑀦𑁆𑀢𑀺. 𑀏𑀢𑁆𑀣 𑀘 𑀧𑀸𑀓𑀝𑁂𑀳𑀺 𑀭𑀽𑀧𑀸𑀤𑀻𑀳𑀺 𑀦𑀬𑁄 𑀤𑀲𑁆𑀲𑀺𑀢𑁄𑀢𑀺 𑀘𑀓𑁆𑀔𑀸𑀤𑀻𑀲𑀼𑀧𑀺 𑀳𑀻𑀦𑀧𑀡𑀻𑀢𑀢𑀸 𑀬𑁄𑀚𑁂𑀢𑀩𑁆𑀩𑀸.

𑀫𑀦𑀸𑀧𑀧𑀭𑀺𑀬𑀦𑁆𑀢𑀦𑁆𑀢𑀺 𑀫𑀦𑀸𑀧𑀁 𑀧𑀭𑀺𑀬𑀦𑁆𑀢𑀁 𑀫𑀭𑀺𑀬𑀸𑀤𑀸𑀪𑀽𑀢𑀁 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄. 𑀓𑀺𑀁 𑀓𑀸𑀭𑀡𑀦𑁆𑀢𑀺? 𑀬𑀲𑁆𑀫𑀸 𑀢𑁂 𑀏𑀓𑀘𑁆𑀘𑀲𑁆𑀲 𑀫𑀦𑀸𑀧𑀸 𑀳𑁄𑀦𑁆𑀢𑀺, 𑀏𑀓𑀘𑁆𑀘𑀲𑁆𑀲 𑀅𑀫𑀦𑀸𑀧𑀸, 𑀬𑀲𑁆𑀲 𑀬𑁂𑀯 𑀫𑀦𑀸𑀧𑀸, 𑀢𑀲𑁆𑀲 𑀢𑁂𑀯 𑀧𑀭𑀫𑀸, 𑀢𑀲𑁆𑀫𑀸 𑀢𑀲𑁆𑀲 𑀢𑀲𑁆𑀲 𑀅𑀚𑁆𑀛𑀸𑀲𑀬𑀯𑀲𑁂𑀦 𑀓𑀸𑀫𑀕𑀼𑀡𑀸𑀦𑀁 𑀧𑀭𑀫𑀢𑀸 𑀳𑁄𑀢𑀺, 𑀦 𑀢𑁂𑀲𑀁𑀬𑁂𑀯 𑀲𑀪𑀸𑀯𑀢𑁄.

𑀏𑀯𑀦𑁆𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦. 𑀏𑀓𑀲𑁆𑀫𑀺𑀁𑀬𑁂𑀯 𑀅𑀲𑁆𑀲𑀸𑀤𑀦𑀓𑀼𑀚𑁆𑀛𑀦𑀢𑁄 𑀆𑀭𑀫𑁆𑀫𑀡𑀲𑀪𑀸𑀯𑀲𑁆𑀲𑁂𑀯 𑀇𑀝𑁆𑀞𑀸𑀦𑀺𑀝𑁆𑀞𑀸𑀪𑀸𑀯𑀢𑁄 𑀅𑀦𑀺𑀝𑁆𑀞𑀁 ‘‘𑀇𑀝𑁆𑀞’’𑀦𑁆𑀢𑀺 𑀕𑀳𑀡𑀢𑁄 𑀘, 𑀇𑀝𑁆𑀞𑀁 ‘‘𑀅𑀦𑀺𑀝𑁆𑀞’’𑀦𑁆𑀢𑀺 𑀕𑀳𑀡𑀢𑁄 𑀘 𑀇𑀝𑁆𑀞𑀸𑀦𑀺𑀝𑁆𑀞𑀁 𑀦𑀸𑀫 𑀧𑀸𑀝𑀺𑀬𑁂𑀓𑁆𑀓𑀁 𑀧𑀝𑀺𑀯𑀺𑀪𑀢𑁆𑀢𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁂𑀦 𑀘𑀸𑀢𑀺𑀆𑀤𑀺𑀦𑀸 𑀦𑀺𑀩𑁆𑀩𑀸𑀦𑁂 𑀯𑀺𑀬 𑀅𑀜𑁆𑀜𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁂𑀦 𑀇𑀝𑁆𑀞𑀸𑀦𑀺𑀝𑁆𑀞𑀕𑁆𑀕𑀳𑀡𑀁 𑀳𑁄𑀢𑀺. 𑀧𑀺𑀢𑁆𑀢𑀼𑀫𑁆𑀫𑀢𑁆𑀢𑀸𑀤𑀻𑀦𑀁 𑀔𑀻𑀭𑀲𑀓𑁆𑀓𑀭𑀸𑀤𑀻𑀲𑀼 𑀤𑁄𑀲𑀼𑀲𑁆𑀲𑀤𑀲𑀫𑀼𑀝𑁆𑀞𑀺𑀢𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀢𑀺𑀢𑁆𑀢𑀕𑁆𑀕𑀳𑀡𑀁 𑀯𑀺𑀬𑀸𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀫𑀦𑀸𑀧𑀧𑀭𑀺𑀬𑀦𑁆𑀢𑀢𑀸 𑀯𑀼𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺.

𑀯𑀺𑀪𑀢𑁆𑀢𑀁 ¶ 𑀅𑀢𑁆𑀣𑀻𑀢𑀺 𑀘 𑀯𑀯𑀢𑁆𑀣𑀺𑀢𑀁 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄, 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀯𑀺𑀪𑀢𑁆𑀢𑀁 𑀧𑀓𑀸𑀲𑀺𑀢𑀦𑁆𑀢𑀺 𑀯𑀸. 𑀢𑀜𑁆𑀘 𑀫𑀚𑁆𑀛𑀺𑀫𑀓𑀲𑀢𑁆𑀢𑀲𑁆𑀲 𑀯𑀲𑁂𑀦 𑀯𑀯𑀢𑁆𑀣𑀺𑀢𑀁 𑀧𑀓𑀸𑀲𑀺𑀢𑀜𑁆𑀘, 𑀅𑀜𑁆𑀜𑁂𑀲𑀜𑁆𑀘 𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀇𑀤𑀁 𑀇𑀝𑁆𑀞𑀁 ¶ 𑀅𑀦𑀺𑀝𑁆𑀞𑀜𑁆𑀘 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀁 𑀯𑀯𑀢𑁆𑀣𑀺𑀢𑀲𑁆𑀲 𑀧𑀦𑀺𑀝𑁆𑀞𑀸𑀦𑀺𑀝𑁆𑀞𑀲𑁆𑀲 𑀅𑀦𑀺𑀝𑁆𑀞𑀁 𑀇𑀝𑁆𑀞𑀦𑁆𑀢𑀺 𑀘 𑀕𑀳𑀡𑁂 𑀦 𑀓𑁂𑀯𑀮𑀁 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄𑀯 𑀓𑀸𑀭𑀡𑀁, 𑀥𑀸𑀢𑀼𑀓𑁆𑀔𑁄𑀪𑀯𑀲𑁂𑀦 𑀇𑀦𑁆𑀤𑁆𑀭𑀺𑀬𑀯𑀺𑀓𑀸𑀭𑀸𑀧𑀢𑁆𑀢𑀺𑀆𑀤𑀺𑀦𑀸 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑁄𑀧𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀢𑀣𑀸 𑀳𑀺 𑀲𑀻𑀢𑀼𑀤𑀓𑀁 𑀖𑀫𑁆𑀫𑀸𑀪𑀺𑀢𑀢𑁆𑀢𑀸𑀦𑀁 𑀓𑀼𑀲𑀮𑀯𑀺𑀧𑀸𑀓𑀲𑁆𑀲 𑀓𑀸𑀬𑀯𑀺𑀜𑁆𑀜𑀸𑀡𑀲𑁆𑀲 𑀳𑁂𑀢𑀼 𑀳𑁄𑀢𑀺, 𑀲𑀻𑀢𑀸𑀪𑀺𑀪𑀽𑀢𑀸𑀦𑀁 𑀅𑀓𑀼𑀲𑀮𑀯𑀺𑀧𑀸𑀓𑀲𑁆𑀲. 𑀢𑀽𑀮𑀧𑀺𑀘𑀼𑀲𑀫𑁆𑀨𑀲𑁆𑀲𑁄 𑀯𑀡𑁂 𑀤𑀼𑀓𑁆𑀔𑁄 𑀦𑀺𑀯𑀡𑁂 𑀲𑀼𑀔𑁄, 𑀫𑀼𑀤𑀼𑀢𑀭𑀼𑀡𑀳𑀢𑁆𑀣𑀲𑀫𑁆𑀩𑀸𑀳𑀦𑀜𑁆𑀘 𑀲𑀼𑀔𑀁 𑀉𑀧𑁆𑀧𑀸𑀤𑁂𑀢𑀺, 𑀢𑁂𑀦𑁂𑀯 𑀳𑀢𑁆𑀣𑁂𑀦 𑀧𑀳𑀭𑀡𑀁 𑀤𑀼𑀓𑁆𑀔𑀁, 𑀢𑀲𑁆𑀫𑀸 𑀯𑀺𑀧𑀸𑀓𑀯𑀲𑁂𑀦 𑀆𑀭𑀫𑁆𑀫𑀡𑀯𑀯𑀢𑁆𑀣𑀸𑀦𑀁 𑀬𑀼𑀢𑁆𑀢𑀁.

𑀓𑀺𑀜𑁆𑀘𑀸𑀧𑀻𑀢𑀺𑀆𑀤𑀺𑀦𑀸 𑀲𑀢𑀺𑀧𑀺 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁂 𑀩𑀼𑀤𑁆𑀥𑀭𑀽𑀧𑀤𑀲𑁆𑀲𑀦𑀸𑀤𑀻𑀲𑀼 𑀓𑀼𑀲𑀮𑀯𑀺𑀧𑀸𑀓𑀲𑁆𑀲𑁂𑀯 𑀕𑀽𑀣𑀤𑀲𑁆𑀲𑀦𑀸𑀤𑀻𑀲𑀼 𑀘 𑀅𑀓𑀼𑀲𑀮𑀯𑀺𑀧𑀸𑀓𑀲𑁆𑀲 𑀉𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀢𑁂𑀦 𑀯𑀺𑀧𑀸𑀓𑁂𑀦 𑀆𑀭𑀫𑁆𑀫𑀡𑀲𑁆𑀲 𑀇𑀝𑁆𑀞𑀸𑀦𑀺𑀝𑁆𑀞𑀢𑀁 𑀤𑀲𑁆𑀲𑁂𑀢𑀺. 𑀯𑀺𑀚𑁆𑀚𑀫𑀸𑀦𑁂𑀧𑀺 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁂 𑀆𑀭𑀫𑁆𑀫𑀡𑁂𑀦 𑀯𑀺𑀧𑀸𑀓𑀦𑀺𑀬𑀫𑀤𑀲𑁆𑀲𑀦𑀁 𑀆𑀭𑀫𑁆𑀫𑀡𑀦𑀺𑀬𑀫𑀤𑀲𑁆𑀲𑀦𑀢𑁆𑀣𑀫𑁂𑀯 𑀓𑀢𑀦𑁆𑀢𑀺.

𑀅𑀧𑀺𑀘 𑀤𑁆𑀯𑀸𑀭𑀯𑀲𑁂𑀦𑀧𑀻𑀢𑀺𑀆𑀤𑀺𑀦𑀸 𑀤𑁆𑀯𑀸𑀭𑀦𑁆𑀢𑀭𑁂 𑀤𑀼𑀓𑁆𑀔𑀲𑁆𑀲 𑀲𑀼𑀔𑀲𑁆𑀲 𑀘 𑀧𑀘𑁆𑀘𑀬𑀪𑀽𑀢𑀲𑁆𑀲 𑀤𑁆𑀯𑀸𑀭𑀦𑁆𑀢𑀭𑁂 𑀲𑀼𑀔𑀤𑀼𑀓𑁆𑀔𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀢𑁄 𑀯𑀺𑀧𑀸𑀓𑁂𑀦 𑀆𑀭𑀫𑁆𑀫𑀡𑀦𑀺𑀬𑀫𑀤𑀲𑁆𑀲𑀦𑁂𑀦 𑀏𑀓𑀲𑁆𑀫𑀺𑀁𑀬𑁂𑀯 𑀘 𑀤𑁆𑀯𑀸𑀭𑁂 𑀲𑀫𑀸𑀦𑀲𑁆𑀲𑁂𑀯 𑀫𑀡𑀺𑀭𑀢𑀦𑀸𑀤𑀺𑀨𑁄𑀝𑁆𑀞𑀩𑁆𑀩𑀲𑁆𑀲 𑀲𑀡𑀺𑀓𑀁 𑀨𑀼𑀲𑀦𑁂 𑀧𑁄𑀣𑀦𑁂 𑀘 𑀲𑀼𑀔𑀤𑀼𑀓𑁆𑀔𑀼𑀧𑁆𑀧𑀸𑀤𑀦𑀢𑁄 𑀯𑀺𑀧𑀸𑀓𑀯𑀲𑁂𑀦 𑀇𑀝𑁆𑀞𑀸𑀦𑀺𑀝𑁆𑀞𑀢𑀸 𑀤𑀲𑁆𑀲𑀺𑀢𑀸𑀢𑀺 𑀯𑀺𑀜𑁆𑀜𑀸𑀬𑀢𑀺.

𑀳𑁂𑀝𑁆𑀞𑀺𑀫𑀦𑀬𑁄𑀢𑀺 𑀫𑀚𑁆𑀛𑀺𑀫𑀓𑀲𑀢𑁆𑀢𑀲𑁆𑀲 𑀯𑀺𑀧𑀸𑀓𑀲𑁆𑀲 𑀘 𑀯𑀲𑁂𑀦 𑀯𑀯𑀢𑁆𑀣𑀺𑀢𑀁 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 ‘‘𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀉𑀜𑁆𑀜𑀸𑀢’’𑀦𑁆𑀢𑀺 (𑀯𑀺𑀪. 𑁬) 𑀘 𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁄. 𑀲𑀫𑁆𑀫𑀼𑀢𑀺𑀫𑀦𑀸𑀧𑀦𑁆𑀢𑀺 𑀫𑀚𑁆𑀛𑀺𑀫𑀓𑀲𑀢𑁆𑀢𑀲𑁆𑀲 𑀯𑀺𑀧𑀸𑀓𑀲𑁆𑀲 𑀘 𑀯𑀲𑁂𑀦 𑀲𑀫𑁆𑀫𑀢𑀁 𑀯𑀯𑀢𑁆𑀣𑀺𑀢𑀁 𑀫𑀦𑀸𑀧𑀁, 𑀢𑀁 𑀧𑀦 𑀲𑀪𑀸𑀯𑁂𑀦𑁂𑀯 𑀯𑀯𑀢𑁆𑀣𑀺𑀢𑀦𑁆𑀢𑀺 𑀅𑀪𑀺𑀦𑁆𑀤𑀺𑀢𑀩𑁆𑀩𑀢𑁄𑀯 𑀦 𑀪𑀺𑀦𑁆𑀤𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁂𑀦 𑀦𑁂𑀭𑀬𑀺𑀓𑀸𑀤𑀻𑀳𑀺𑀧𑀺 𑀧𑀼𑀕𑁆𑀕𑀮𑁂𑀳𑀺 𑀫𑀦𑀸𑀧𑀦𑁆𑀢𑀺 𑀕𑀳𑀺𑀢𑀁 𑀧𑀼𑀕𑁆𑀕𑀮𑀫𑀦𑀸𑀧𑀁 ‘‘𑀢𑀁 𑀢𑀁 𑀯𑀸 𑀧𑀦𑀸’’𑀢𑀺𑀆𑀤𑀺𑀦𑀸 𑀪𑀺𑀦𑁆𑀤𑀢𑀺. 𑀯𑁂𑀫𑀸𑀦𑀺𑀓𑀧𑁂𑀢𑀭𑀽𑀧𑀫𑁆𑀧𑀺 𑀅𑀓𑀼𑀲𑀮𑀓𑀫𑁆𑀫𑀚𑀢𑁆𑀢𑀸 𑀓𑀫𑁆𑀫𑀓𑀸𑀭𑀡𑀸𑀤𑀺𑀤𑀼𑀓𑁆𑀔𑀯𑀢𑁆𑀣𑀼𑀪𑀸𑀯𑀢𑁄 𑀘 ‘‘𑀫𑀦𑀼𑀲𑁆𑀲𑀭𑀽𑀧𑀢𑁄 𑀳𑀻𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑁭. 𑀑𑀴𑀸𑀭𑀺𑀓𑀭𑀽𑀧𑀸𑀦𑀁 ¶ 𑀯𑀢𑁆𑀣𑀸𑀭𑀫𑁆𑀫𑀡𑀧𑀝𑀺𑀖𑀸𑀢𑀯𑀲𑁂𑀦 𑀲𑀼𑀧𑀭𑀺𑀕𑁆𑀕𑀳𑀺𑀢𑀢𑀸, 𑀲𑀼𑀔𑀼𑀫𑀸𑀦𑀁 𑀢𑀣𑀸 𑀅𑀪𑀸𑀯𑀢𑁄 𑀤𑀼𑀧𑁆𑀧𑀭𑀺𑀕𑁆𑀕𑀳𑀺𑀢𑀢𑀸 𑀘 𑀬𑁄𑀚𑁂𑀢𑀩𑁆𑀩𑀸. 𑀤𑀼𑀧𑁆𑀧𑀭𑀺𑀕𑁆𑀕𑀳𑀝𑁆𑀞𑁂𑀦𑁂𑀯 𑀮𑀓𑁆𑀔𑀡𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀦𑀢𑀸 𑀤𑀝𑁆𑀞𑀩𑁆𑀩𑀸. 𑀤𑀲𑀯𑀺𑀥𑀦𑁆𑀢𑀺 ‘‘𑀤𑀽𑀭𑁂’’𑀢𑀺 𑀅𑀯𑀼𑀢𑁆𑀢𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀫𑁆𑀧𑀺 𑀧𑀦 𑀑𑀓𑀸𑀲𑀢𑁄 𑀤𑀽𑀭𑁂 𑀳𑁄𑀢𑀺𑀬𑁂𑀯.

𑀳𑁂𑀝𑁆𑀞𑀺𑀫𑀦𑀬𑁄𑀢𑀺 ¶ ‘‘𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁…𑀧𑁂… 𑀇𑀤𑀁 𑀯𑀼𑀘𑁆𑀘𑀢𑀺 𑀭𑀽𑀧𑀁 𑀲𑀦𑁆𑀢𑀺𑀓𑁂’’𑀢𑀺 (𑀯𑀺𑀪. 𑁭) 𑀏𑀯𑀁 𑀮𑀓𑁆𑀔𑀡𑀢𑁄 𑀤𑁆𑀯𑀸𑀤𑀲𑀳𑀢𑁆𑀣𑀯𑀲𑁂𑀦 𑀯𑀯𑀢𑁆𑀣𑀺𑀢𑀑𑀓𑀸𑀲𑀢𑁄 𑀘 𑀤𑀲𑁆𑀲𑁂𑀢𑁆𑀯𑀸 𑀦𑀺𑀬𑁆𑀬𑀸𑀢𑀺𑀢𑀦𑀬𑁄. 𑀲𑁄 𑀮𑀓𑁆𑀔𑀡𑁄𑀓𑀸𑀲𑀯𑀲𑁂𑀦 𑀤𑀽𑀭𑀲𑀦𑁆𑀢𑀺𑀓𑁂𑀦 𑀲𑀳 𑀕𑀳𑁂𑀢𑁆𑀯𑀸 𑀦𑀺𑀬𑁆𑀬𑀸𑀢𑀺𑀢𑀢𑁆𑀢𑀸 𑀪𑀺𑀦𑁆𑀤𑀫𑀸𑀦𑁄 𑀫𑀺𑀲𑁆𑀲𑀓𑀁 𑀓𑀭𑁄𑀦𑁆𑀢𑁄 𑀕𑀢𑁄. 𑀅𑀣 𑀯𑀸 𑀪𑀺𑀦𑁆𑀤𑀫𑀸𑀦𑁄𑀢𑀺 𑀲𑀭𑀽𑀧𑀤𑀲𑁆𑀲𑀦𑁂𑀦 𑀮𑀓𑁆𑀔𑀡𑀢𑁄 𑀬𑁂𑀯𑀸𑀧𑀦𑀓𑁂𑀦 𑀑𑀓𑀸𑀲𑀢𑁄𑀢𑀺 𑀏𑀯𑀁 𑀮𑀓𑁆𑀔𑀡𑀢𑁄 𑀑𑀓𑀸𑀲𑀢𑁄 𑀘 𑀯𑀺𑀲𑀼𑀁 𑀓𑀭𑁄𑀦𑁆𑀢𑁄 𑀕𑀢𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀮𑀓𑁆𑀔𑀡𑀢𑁄 𑀲𑀦𑁆𑀢𑀺𑀓𑀤𑀽𑀭𑀸𑀦𑀁 𑀑𑀓𑀸𑀲𑀢𑁄 𑀤𑀽𑀭𑀲𑀦𑁆𑀢𑀺𑀓𑀪𑀸𑀯𑀓𑀭𑀡𑁂𑀦 𑀲𑀦𑁆𑀢𑀺𑀓𑀪𑀸𑀯𑀁 𑀪𑀺𑀦𑁆𑀤𑀺𑀢𑁆𑀯𑀸 𑀤𑀽𑀭𑀪𑀸𑀯𑀁, 𑀤𑀽𑀭𑀪𑀸𑀯𑀜𑁆𑀘 𑀪𑀺𑀦𑁆𑀤𑀺𑀢𑁆𑀯𑀸 𑀲𑀦𑁆𑀢𑀺𑀓𑀪𑀸𑀯𑀁 𑀓𑀭𑁄𑀦𑁆𑀢𑁄 𑀧𑀯𑀢𑁆𑀢𑁄𑀢𑀺 ‘‘𑀪𑀺𑀦𑁆𑀤𑀫𑀸𑀦𑁄 𑀕𑀢𑁄’’𑀢𑀺 𑀯𑀼𑀢𑁆𑀢𑀁. 𑀇𑀥 𑀧𑀦𑀸𑀢𑀺 ‘‘𑀢𑀁 𑀢𑀁 𑀯𑀸 𑀧𑀦 𑀭𑀽𑀧𑀁 𑀉𑀧𑀸𑀤𑀸𑀬 𑀉𑀧𑀸𑀤𑀸𑀬𑀸’’𑀢𑀺 𑀇𑀥 𑀧𑀼𑀭𑀺𑀫𑀦𑀬𑁂𑀦 𑀮𑀓𑁆𑀔𑀡𑀢𑁄 𑀤𑀽𑀭𑀁 𑀑𑀓𑀸𑀲𑀢𑁄 𑀲𑀦𑁆𑀢𑀺𑀓𑀪𑀸𑀯𑀓𑀭𑀡𑁂𑀦 𑀦 𑀪𑀺𑀦𑁆𑀤𑀢𑀺 𑀪𑀕𑀯𑀸, 𑀦 𑀘 𑀑𑀓𑀸𑀲𑀤𑀽𑀭𑀢𑁄 𑀯𑀺𑀲𑀼𑀁 𑀓𑀭𑀡𑁂𑀦, 𑀦𑀸𑀧𑀺 𑀑𑀓𑀸𑀲𑀤𑀽𑀭𑁂𑀦 𑀯𑁄𑀫𑀺𑀲𑁆𑀲𑀓𑀓𑀭𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀓𑀺𑀁 𑀧𑀦 𑀓𑀭𑁄𑀢𑀻𑀢𑀺? 𑀑𑀓𑀸𑀲𑀢𑁄 𑀤𑀽𑀭𑀫𑁂𑀯 𑀪𑀺𑀦𑁆𑀤𑀢𑀺. 𑀏𑀢𑁆𑀣 𑀧𑀦 𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀢𑀺𑀥𑀸 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀦 𑀳𑀺 𑀑𑀓𑀸𑀲𑀢𑁄 𑀤𑀽𑀭𑀁 𑀮𑀓𑁆𑀔𑀡𑀢𑁄 𑀲𑀦𑁆𑀢𑀺𑀓𑀁 𑀓𑀭𑁄𑀢𑀺, 𑀮𑀓𑁆𑀔𑀡𑀢𑁄 𑀯𑀸 𑀯𑀺𑀲𑀼𑀁 𑀢𑁂𑀦 𑀯𑀸 𑀯𑁄𑀫𑀺𑀲𑁆𑀲𑀓𑀦𑁆𑀢𑀺. 𑀑𑀓𑀸𑀲𑀢𑁄 𑀤𑀽𑀭𑀲𑁆𑀲 𑀧𑀦 𑀑𑀓𑀸𑀲𑀢𑁄𑀯 𑀲𑀦𑁆𑀢𑀺𑀓𑀪𑀸𑀯𑀓𑀭𑀡𑀁 𑀇𑀥 ‘‘𑀪𑁂𑀤𑀦’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀥 𑀧𑀦 𑀦 𑀮𑀓𑁆𑀔𑀡𑀢𑁄 𑀤𑀽𑀭𑀁 𑀪𑀺𑀦𑁆𑀤𑀢𑀻𑀢𑀺 𑀏𑀢𑁆𑀣𑀸𑀧𑀺 𑀯𑀸 𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀢𑀺𑀥𑀸 𑀪𑁂𑀤𑀲𑁆𑀲 𑀅𑀓𑀭𑀡𑀁 𑀯𑀼𑀢𑁆𑀢𑀁, 𑀮𑀓𑁆𑀔𑀡𑀢𑁄 𑀲𑀦𑁆𑀢𑀺𑀓𑀤𑀽𑀭𑀸𑀦𑀁 𑀧𑀦 𑀮𑀓𑁆𑀔𑀡𑀢𑁄 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀤𑀽𑀭𑀲𑀦𑁆𑀢𑀺𑀓𑀪𑀸𑀯𑁄 𑀦𑀢𑁆𑀣𑀻𑀢𑀺 𑀮𑀓𑁆𑀔𑀡𑀢𑁄 𑀤𑀽𑀭𑀲𑁆𑀲 𑀮𑀓𑁆𑀔𑀡𑀢𑁄𑀯 𑀲𑀦𑁆𑀢𑀺𑀓𑀪𑀸𑀯𑀸𑀓𑀭𑀡𑀁 𑀮𑀓𑁆𑀔𑀡𑀢𑁄 𑀤𑀽𑀭𑀲𑁆𑀲 𑀅𑀪𑁂𑀤𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀼𑀭𑀺𑀫𑀦𑀬𑁄 𑀯𑀺𑀬 𑀅𑀬𑀁 𑀦𑀬𑁄 𑀦 𑀳𑁄𑀢𑀻𑀢𑀺 𑀏𑀢𑁆𑀢𑀓𑀫𑁂𑀯 𑀳𑀺 𑀏𑀢𑁆𑀣 𑀤𑀲𑁆𑀲𑁂𑀢𑀻𑀢𑀺 𑀪𑀺𑀦𑁆𑀤𑀫𑀸𑀦𑁄𑀢𑀺 𑀏𑀢𑁆𑀣 𑀘 𑀅𑀜𑁆𑀜𑀣𑀸 𑀪𑁂𑀤𑀦𑀁 𑀯𑀼𑀢𑁆𑀢𑀁, 𑀪𑁂𑀤𑀦𑀁 𑀇𑀥 𑀘 𑀅𑀜𑁆𑀜𑀣𑀸 𑀯𑀼𑀢𑁆𑀢𑀦𑁆𑀢𑀺.

𑀭𑀽𑀧𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀯𑁂𑀤𑀦𑀸𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮. 𑀘𑀓𑁆𑀔𑀸𑀤𑀬𑁄 ¶ 𑀧𑀲𑀸𑀤𑀸 𑀑𑀴𑀸𑀭𑀺𑀓𑀫𑀦𑁄𑀫𑀬𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑀸 𑀓𑀸𑀬𑀯𑁄𑀳𑀸𑀭𑀁 𑀅𑀭𑀳𑀦𑁆𑀢𑀻𑀢𑀺 𑀢𑀩𑁆𑀩𑀢𑁆𑀣𑀼𑀓𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 ‘‘𑀓𑀸𑀬𑀺𑀓𑀸’’𑀢𑀺 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀸, 𑀦 𑀓𑀸𑀬𑀧𑀲𑀸𑀤𑀯𑀢𑁆𑀣𑀼𑀓𑀢𑁆𑀢𑀸. 𑀦 𑀳𑀺 𑀘𑀓𑁆𑀔𑀸𑀤𑀬𑁄 𑀓𑀸𑀬𑀧𑀲𑀸𑀤𑀸 𑀳𑁄𑀦𑁆𑀢𑀻𑀢𑀺. 𑀲𑀦𑁆𑀢𑀢𑀺𑀯𑀲𑁂𑀦 𑀔𑀡𑀸𑀤𑀺𑀯𑀲𑁂𑀦 𑀘𑀸𑀢𑀺 𑀏𑀢𑁆𑀣 𑀅𑀤𑁆𑀥𑀸𑀲𑀫𑀬𑀯𑀲𑁂𑀦 𑀅𑀢𑀻𑀢𑀸𑀤𑀺𑀪𑀸𑀯𑀲𑁆𑀲 ¶ 𑀅𑀯𑀘𑀦𑀁 𑀲𑀼𑀔𑀸𑀤𑀺𑀯𑀲𑁂𑀦 𑀪𑀺𑀦𑁆𑀦𑀸𑀬 𑀅𑀢𑀻𑀢𑀸𑀤𑀺𑀪𑀸𑀯𑀯𑀘𑀦𑀢𑁄. 𑀦 𑀳𑀺 𑀲𑀼𑀔𑀸𑀬𑁂𑀯 𑀅𑀤𑁆𑀥𑀸𑀯𑀲𑁂𑀦 𑀲𑀫𑀬𑀯𑀲𑁂𑀦 𑀘 𑀅𑀢𑀻𑀢𑀸𑀤𑀺𑀓𑀸 𑀳𑁄𑀢𑀺, 𑀢𑀣𑀸 𑀤𑀼𑀓𑁆𑀔𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀘 𑀓𑀸𑀬𑀺𑀓𑀘𑁂𑀢𑀲𑀺𑀓𑀸𑀤𑀺𑀪𑀸𑀯𑁂𑀦 𑀪𑀺𑀦𑁆𑀦𑀸. 𑀢𑁂𑀦 𑀯𑁂𑀤𑀦𑀸𑀲𑀫𑀼𑀤𑀬𑁄 𑀅𑀤𑁆𑀥𑀸𑀲𑀫𑀬𑀯𑀲𑁂𑀦 𑀅𑀢𑀻𑀢𑀸𑀤𑀺𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺 𑀲𑀫𑀼𑀤𑀸𑀬𑀲𑁆𑀲 𑀢𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀢𑁆𑀢𑀸, 𑀯𑁂𑀤𑀦𑁂𑀓𑀤𑁂𑀲𑀸 𑀧𑀦 𑀏𑀢𑁆𑀣 𑀕𑀳𑀺𑀢𑀸𑀢𑀺 𑀢𑁂 𑀲𑀦𑁆𑀢𑀢𑀺𑀔𑀡𑁂𑀳𑀺 𑀧𑀭𑀺𑀘𑁆𑀙𑁂𑀤𑀁 𑀅𑀭𑀳𑀦𑁆𑀢𑀺 𑀢𑀢𑁆𑀣 𑀢𑀣𑀸𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀸𑀦𑀁 𑀕𑀳𑀺𑀢𑀢𑁆𑀢𑀸𑀢𑀺. 𑀏𑀓𑀲𑀦𑁆𑀢𑀢𑀺𑀬𑀁 𑀧𑀦 𑀲𑀼𑀔𑀸𑀤𑀺𑀅𑀦𑁂𑀓𑀪𑁂𑀤𑀲𑀩𑁆𑀪𑀸𑀯𑁂𑀦 𑀢𑁂𑀲𑀼 𑀬𑁄 𑀪𑁂𑀤𑁄 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀪𑀸𑀯𑁂𑀦 𑀕𑀳𑀺𑀢𑁄, 𑀢𑀲𑁆𑀲 𑀏𑀓𑀧𑁆𑀧𑀓𑀸𑀭𑀲𑁆𑀲 𑀧𑀸𑀓𑀝𑀲𑁆𑀲 𑀧𑀭𑀺𑀘𑁆𑀙𑁂𑀤𑀺𑀓𑀸 𑀢𑀁𑀲𑀳𑀺𑀢𑀤𑁆𑀯𑀸𑀭𑀸𑀮𑀫𑁆𑀩𑀦𑀧𑁆𑀧𑀯𑀢𑁆𑀢𑀸, 𑀅𑀯𑀺𑀘𑁆𑀙𑁂𑀤𑁂𑀦 𑀢𑀤𑀼𑀧𑁆𑀧𑀸𑀤𑀓𑁂𑀓𑀯𑀺𑀥𑀯𑀺𑀲𑀬𑀲𑀫𑀸𑀬𑁄𑀕𑀧𑁆𑀧𑀯𑀢𑁆𑀢𑀸 𑀘 𑀲𑀦𑁆𑀢𑀢𑀺 𑀪𑀯𑀺𑀢𑀼𑀁 𑀅𑀭𑀳𑀢𑀻𑀢𑀺 𑀢𑀲𑁆𑀲 𑀪𑁂𑀤𑀦𑁆𑀢𑀭𑀁 𑀅𑀦𑀸𑀫𑀲𑀺𑀢𑁆𑀯𑀸 𑀧𑀭𑀺𑀘𑁆𑀙𑁂𑀤𑀓𑀪𑀸𑀯𑁂𑀦 𑀕𑀳𑀡𑀁 𑀓𑀢𑀁. 𑀮𑀳𑀼𑀧𑀭𑀺𑀯𑀢𑁆𑀢𑀺𑀦𑁄 𑀯𑀸 𑀥𑀫𑁆𑀫𑀸 𑀧𑀭𑀺𑀯𑀢𑁆𑀢𑀦𑁂𑀦𑁂𑀯 𑀧𑀭𑀺𑀘𑁆𑀙𑁂𑀤𑀁 𑀅𑀭𑀳𑀦𑁆𑀢𑀻𑀢𑀺 𑀲𑀦𑁆𑀢𑀢𑀺𑀔𑀡𑀯𑀲𑁂𑀦 𑀧𑀭𑀺𑀘𑁆𑀙𑁂𑀤𑁄 𑀯𑀼𑀢𑁆𑀢𑁄. 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀫𑀚𑁆𑀛𑀕𑀢𑀸𑀢𑀺 𑀏𑀢𑁂𑀦 𑀳𑁂𑀢𑀼𑀧𑀘𑁆𑀘𑀬𑀓𑀺𑀘𑁆𑀘𑀯𑀲𑁂𑀦 𑀯𑀼𑀢𑁆𑀢𑀦𑀬𑀁 𑀤𑀲𑁆𑀲𑁂𑀢𑀺.

𑁧𑁧. 𑀓𑀺𑀮𑁂𑀲𑀕𑁆𑀕𑀺𑀲𑀫𑁆𑀧𑀬𑁄𑀕𑀢𑁄 𑀲𑀤𑀭𑀣𑀸. 𑀏𑀢𑁂𑀦 𑀲𑀪𑀸𑀯𑀢𑁄 𑀑𑀴𑀸𑀭𑀺𑀓𑀢𑀁 𑀤𑀲𑁆𑀲𑁂𑀢𑀺, 𑀤𑀼𑀓𑁆𑀔𑀯𑀺𑀧𑀸𑀓𑀝𑁆𑀞𑁂𑀦𑀸𑀢𑀺 𑀏𑀢𑁂𑀦 𑀑𑀴𑀸𑀭𑀺𑀓𑀯𑀺𑀧𑀸𑀓𑀦𑀺𑀧𑁆𑀨𑀸𑀤𑀦𑁂𑀦 𑀓𑀺𑀘𑁆𑀘𑀢𑁄. 𑀓𑀫𑁆𑀫𑀯𑁂𑀕𑀓𑁆𑀔𑀺𑀢𑁆𑀢𑀸 𑀓𑀫𑁆𑀫𑀧𑀝𑀺𑀩𑀤𑁆𑀥𑀪𑀽𑀢𑀸 𑀘 𑀓𑀸𑀬𑀓𑀫𑁆𑀫𑀸𑀤𑀺𑀩𑁆𑀬𑀸𑀧𑀸𑀭𑀯𑀺𑀭𑀳𑀢𑁄 𑀦𑀺𑀭𑀼𑀲𑁆𑀲𑀸𑀳𑀸 𑀯𑀺𑀧𑀸𑀓𑀸, 𑀲𑀉𑀲𑁆𑀲𑀸𑀳𑀸 𑀘 𑀓𑀺𑀭𑀺𑀬𑀸 𑀅𑀯𑀺𑀧𑀸𑀓𑀸. 𑀲𑀯𑀺𑀧𑀸𑀓𑀸 𑀘 𑀲𑀕𑀩𑁆𑀪𑀸 𑀯𑀺𑀬 𑀑𑀴𑀸𑀭𑀺𑀓𑀸𑀢𑀺 𑀢𑀩𑁆𑀩𑀺𑀧𑀓𑁆𑀔𑀢𑁄 𑀅𑀯𑀺𑀧𑀸𑀓𑀸 𑀲𑀼𑀔𑀼𑀫𑀸𑀢𑀺 𑀯𑀼𑀢𑁆𑀢𑀸.

𑀅𑀲𑀸𑀢𑀝𑁆𑀞𑁂𑀦𑀸𑀢𑀺 𑀅𑀫𑀥𑀼𑀭𑀝𑁆𑀞𑁂𑀦. 𑀢𑁂𑀦 𑀲𑀸𑀢𑀧𑀝𑀺𑀧𑀓𑁆𑀔𑀁 𑀅𑀦𑀺𑀝𑁆𑀞𑀲𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀤𑀼𑀓𑁆𑀔𑀝𑁆𑀞𑁂𑀦𑀸𑀢𑀺 𑀤𑀼𑀓𑁆𑀔𑀫𑀝𑁆𑀞𑁂𑀦. 𑀢𑁂𑀦 𑀤𑀼𑀓𑁆𑀔𑀸𑀦𑀁 𑀲𑀦𑁆𑀢𑀸𑀧𑀦𑀓𑀺𑀘𑁆𑀘𑀁 𑀤𑀲𑁆𑀲𑁂𑀢𑀺. ‘‘𑀬𑀸𑀬𑀁, 𑀪𑀦𑁆𑀢𑁂, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸, 𑀲𑀦𑁆𑀢𑀲𑁆𑀫𑀺𑀁 𑀏𑀲𑀸 𑀧𑀡𑀻𑀢𑁂 𑀲𑀼𑀔𑁂 𑀯𑀼𑀢𑁆𑀢𑀸 𑀪𑀕𑀯𑀢𑀸’’𑀢𑀺 (𑀫. 𑀦𑀺. 𑁨.𑁮𑁮; 𑀲𑀁. 𑀦𑀺. 𑁪.𑁨𑁬𑁭) 𑀯𑀘𑀦𑀢𑁄 𑀅𑀤𑀼𑀓𑁆𑀔𑀫𑀲𑀼𑀔𑀸 𑀨𑀭𑀡𑀲𑀪𑀸𑀯𑀯𑀺𑀭𑀳𑀢𑁄 𑀅𑀲𑀦𑁆𑀢𑀸𑀦𑀁 𑀓𑀸𑀫𑀭𑀸𑀕𑀧𑀝𑀺𑀖𑀸𑀦𑀼𑀲𑀬𑀸𑀦𑀁 ¶ 𑀅𑀦𑀼𑀲𑀬𑀦𑀲𑁆𑀲 𑀅𑀝𑁆𑀞𑀸𑀦𑀢𑁆𑀢𑀸 𑀲𑀦𑁆𑀢𑀸, 𑀲𑀼𑀔𑁂 𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀸𑀬 𑀅𑀥𑀺𑀕𑀦𑁆𑀢𑀩𑁆𑀩𑀢𑁆𑀢𑀸 𑀧𑀥𑀸𑀦𑀪𑀸𑀯𑀁 𑀦𑀻𑀢𑀸𑀢𑀺 𑀧𑀡𑀻𑀢𑀸𑀢𑀺. 𑀢𑀣𑀸 𑀅𑀦𑀥𑀺𑀕𑀦𑁆𑀢𑀩𑁆𑀩𑀸 𑀘 𑀓𑀸𑀫𑀸𑀯𑀘𑀭𑀚𑀸𑀢𑀺𑀆𑀤𑀺𑀲𑀗𑁆𑀓𑀭𑀁 𑀅𑀓𑀢𑁆𑀯𑀸 𑀲𑀫𑀸𑀦𑀚𑀸𑀢𑀺𑀬𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀸𑀤𑀺𑀓𑁂 𑀲𑀫𑀸𑀦𑀪𑁂𑀤𑁂 𑀲𑀼𑀔𑀢𑁄 𑀧𑀡𑀻𑀢𑀸𑀢𑀺 𑀬𑁄𑀚𑁂𑀢𑀩𑁆𑀩𑀸. 𑀉𑀧𑀩𑁆𑀭𑀽𑀳𑀺𑀢𑀸𑀦𑀁 𑀥𑀸𑀢𑀽𑀦𑀁 𑀧𑀘𑁆𑀘𑀬𑀪𑀸𑀯𑁂𑀦 𑀲𑀼𑀔𑀸 𑀔𑁄𑀪𑁂𑀢𑀺 𑀯𑀺𑀩𑀸𑀥𑀺𑀢𑀸𑀦𑀁 𑀧𑀘𑁆𑀘𑀬𑀪𑀸𑀯𑁂𑀦 𑀤𑀼𑀓𑁆𑀔𑀸 𑀘. 𑀉𑀪𑀬𑀫𑁆𑀧𑀺 𑀓𑀸𑀬𑀁 𑀩𑁆𑀬𑀸𑀧𑁂𑀦𑁆𑀢𑀁 𑀯𑀺𑀬 𑀉𑀧𑁆𑀧𑀚𑁆𑀚𑀢𑀻𑀢𑀺 𑀨𑀭𑀢𑀺. 𑀫𑀤𑀬𑀫𑀸𑀦𑀦𑁆𑀢𑀺 𑀫𑀤𑀁 𑀓𑀭𑁄𑀦𑁆𑀢𑀁. 𑀙𑀸𑀤𑀬𑀫𑀸𑀦𑀦𑁆𑀢𑀺 𑀇𑀘𑁆𑀙𑀁 𑀉𑀧𑁆𑀧𑀸𑀤𑁂𑀦𑁆𑀢𑀁, 𑀅𑀯𑀢𑁆𑀣𑀭𑀫𑀸𑀦𑀁 𑀯𑀸. 𑀖𑀫𑁆𑀫𑀸𑀪𑀺𑀢𑀢𑁆𑀢𑀲𑁆𑀲 𑀲𑀻𑀢𑁄𑀤𑀓𑀖𑀝𑁂𑀦 𑀆𑀲𑀺𑀢𑁆𑀢𑀲𑁆𑀲 𑀬𑀣𑀸 𑀓𑀸𑀬𑁄 𑀉𑀧𑀩𑁆𑀭𑀽𑀳𑀺𑀢𑁄 𑀳𑁄𑀢𑀺, 𑀏𑀯𑀁 𑀲𑀼𑀔𑀲𑀫𑀗𑁆𑀕𑀺𑀦𑁄𑀧𑀻𑀢𑀺 𑀓𑀢𑁆𑀯𑀸 ‘‘𑀆𑀲𑀺𑀜𑁆𑀘𑀫𑀸𑀦𑀁 𑀯𑀺𑀬𑀸’’𑀢𑀺 𑀯𑀼𑀢𑁆𑀢𑀁. 𑀏𑀓𑀢𑁆𑀢𑀦𑀺𑀫𑀺𑀢𑁆𑀢𑁂𑀬𑁂𑀯𑀸𑀢𑀺 𑀧𑀣𑀯𑀻𑀓𑀲𑀺𑀡𑀸𑀤𑀺𑀓𑁂 ¶ 𑀏𑀓𑀲𑀪𑀸𑀯𑁂 𑀏𑀯 𑀦𑀺𑀫𑀺𑀢𑁆𑀢𑁂. 𑀘𑀭𑀢𑀻𑀢𑀺 𑀦𑀸𑀦𑀸𑀯𑀚𑁆𑀚𑀦𑁂 𑀚𑀯𑀦𑁂 𑀯𑁂𑀤𑀦𑀸 𑀯𑀺𑀬 𑀯𑀺𑀧𑁆𑀨𑀦𑁆𑀤𑀦𑀭𑀳𑀺𑀢𑀢𑁆𑀢𑀸 𑀲𑀼𑀔𑀼𑀫𑀸.

𑀅𑀥𑀺𑀧𑁆𑀧𑀸𑀬𑁂 𑀅𑀓𑀼𑀲𑀮𑀢𑀸𑀬 𑀅𑀓𑁄𑀯𑀺𑀤𑁄. 𑀓𑀼𑀲𑀮𑀢𑁆𑀢𑀺𑀓𑁂…𑀧𑁂… 𑀆𑀕𑀢𑀢𑁆𑀢𑀸𑀢𑀺 ‘‘𑀓𑀼𑀲𑀮𑀸𑀓𑀼𑀲𑀮𑀸 𑀯𑁂𑀤𑀦𑀸 𑀑𑀴𑀸𑀭𑀺𑀓𑀸, 𑀅𑀩𑁆𑀬𑀸𑀓𑀢𑀸 𑀯𑁂𑀤𑀦𑀸 𑀲𑀼𑀔𑀼𑀫𑀸’’𑀢𑀺 𑀏𑀯𑀁 𑀆𑀕𑀢𑀢𑁆𑀢𑀸. 𑀪𑀽𑀫𑀦𑁆𑀢𑀭𑀪𑁂𑀤𑁂 𑀤𑀲𑁆𑀲𑁂𑀢𑀼𑀁 ‘‘𑀬𑀫𑁆𑀧𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀇𑀫𑀺𑀦𑀸 𑀦𑀻𑀳𑀸𑀭𑁂𑀦𑀸𑀢𑀺 𑀏𑀢𑁂𑀦 ‘‘𑀓𑀸𑀫𑀸𑀯𑀘𑀭𑀲𑀼𑀔𑀢𑁄 𑀓𑀸𑀫𑀸𑀯𑀘𑀭𑀼𑀧𑁂𑀓𑁆𑀔𑀸 𑀲𑀼𑀔𑀼𑀫𑀸’’𑀢𑀺𑀆𑀤𑀺𑀦𑀸 𑀲𑀪𑀸𑀯𑀸𑀤𑀺𑀪𑁂𑀤𑁂𑀦 𑀘 𑀑𑀴𑀸𑀭𑀺𑀓𑀲𑀼𑀔𑀼𑀫𑀪𑀸𑀯𑀁 𑀢𑀢𑁆𑀭 𑀢𑀢𑁆𑀭𑁂𑀯 𑀓𑀣𑁂𑀦𑁆𑀢𑁄 𑀦 𑀪𑀺𑀦𑁆𑀤𑀢𑀻𑀢𑀺 𑀦𑀬𑀁 𑀤𑀲𑁆𑀲𑁂𑀢𑀺.

𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀓𑀣𑀺𑀢𑀸, 𑀢𑀲𑁆𑀫𑀸 𑀏𑀓𑀦𑁆𑀢𑀧𑀡𑀻𑀢𑁂 𑀳𑀻𑀦𑀧𑀡𑀻𑀢𑀸𑀦𑀁 𑀉𑀤𑁆𑀥𑀝𑀢𑁆𑀢𑀸 𑀏𑀯𑀫𑁂𑀯 𑀏𑀓𑀦𑁆𑀢𑀳𑀻𑀦𑁂 𑀘 𑀬𑀣𑀸𑀲𑀫𑁆𑀪𑀯𑀁 𑀳𑀻𑀦𑀧𑀡𑀻𑀢𑀢𑀸 𑀉𑀤𑁆𑀥𑀭𑀺𑀢𑀩𑁆𑀩𑀸𑀢𑀺 𑀅𑀦𑀼𑀜𑁆𑀜𑀸𑀢𑀁 𑀳𑁄𑀢𑀻𑀢𑀺 𑀉𑀪𑀬𑀢𑁆𑀣 𑀢𑀤𑀼𑀤𑁆𑀥𑀭𑀡𑁂 𑀦 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀅𑀓𑀼𑀲𑀮𑀸𑀦𑀁 𑀓𑀼𑀲𑀮𑀸𑀤𑀻𑀳𑀺 𑀲𑀼𑀔𑀼𑀫𑀢𑁆𑀢𑀸𑀪𑀸𑀯𑀢𑁄 𑀧𑀸𑀴𑀺𑀬𑀸 𑀆𑀕𑀢𑀲𑁆𑀲 𑀅𑀧𑀭𑀺𑀯𑀢𑁆𑀢𑀦𑀻𑀬𑀪𑀸𑀯𑁂𑀦 ‘‘𑀳𑁂𑀝𑁆𑀞𑀺𑀫𑀦𑀬𑁄 𑀦 𑀑𑀮𑁄𑀓𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁𑀢𑀁𑀯𑀸𑀧𑀦𑀯𑀲𑁂𑀦 𑀓𑀣𑀦𑁂𑀧𑀺 𑀧𑀭𑀺𑀯𑀢𑁆𑀢𑀦𑀁 𑀦𑀢𑁆𑀣𑀻𑀢𑀺 𑀦 𑀧𑀭𑀺𑀯𑀢𑁆𑀢𑀦𑀁 𑀲𑀦𑁆𑀥𑀸𑀬 ‘‘𑀳𑁂𑀝𑁆𑀞𑀺𑀫𑀦𑀬𑁄 𑀦 𑀑𑀮𑁄𑀓𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁, 𑀳𑁂𑀝𑁆𑀞𑀺𑀫𑀦𑀬𑀲𑁆𑀲 𑀧𑀦 𑀯𑀼𑀢𑁆𑀢𑀢𑁆𑀢𑀸 𑀅𑀯𑀼𑀢𑁆𑀢𑀦𑀬𑀁 𑀕𑀳𑁂𑀢𑁆𑀯𑀸 ‘‘𑀢𑀁 𑀢𑀁 𑀯𑀸 𑀧𑀦𑀸’’𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 ‘‘𑀳𑁂𑀝𑁆𑀞𑀺𑀫𑀦𑀬𑁄 𑀦 𑀑𑀮𑁄𑀓𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀩𑀳𑀼𑀯𑀺𑀧𑀸𑀓𑀸 𑀅𑀓𑀼𑀲𑀮𑀸 𑀤𑁄𑀲𑀼𑀲𑁆𑀲𑀦𑁆𑀦𑀢𑀸𑀬 𑀑𑀴𑀸𑀭𑀺𑀓𑀸, 𑀢𑀣𑀸 𑀅𑀧𑁆𑀧𑀯𑀺𑀧𑀸𑀓𑀸 𑀓𑀼𑀲𑀮𑀸. 𑀫𑀦𑁆𑀤𑀤𑁄𑀲𑀢𑁆𑀢𑀸 𑀅𑀧𑁆𑀧𑀯𑀺𑀧𑀸𑀓𑀸 𑀅𑀓𑀼𑀲𑀮𑀸 𑀲𑀼𑀔𑀼𑀫𑀸, 𑀢𑀣𑀸 𑀩𑀳𑀼𑀯𑀺𑀧𑀸𑀓𑀸 𑀓𑀼𑀲𑀮𑀸 𑀘. 𑀑𑀴𑀸𑀭𑀺𑀓𑀲𑀼𑀔𑀼𑀫𑀦𑀺𑀓𑀦𑁆𑀢𑀺𑀯𑀢𑁆𑀣𑀼𑀪𑀸𑀯𑀢𑁄 𑀓𑀸𑀫𑀸𑀯𑀘𑀭𑀸𑀤𑀻𑀦𑀁 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸 ¶ . 𑀲𑀸𑀧𑀻𑀢𑀺 𑀪𑀸𑀯𑀦𑀸𑀫𑀬𑀸𑀬 𑀪𑁂𑀤𑀦𑁂𑀦 𑀤𑀸𑀦𑀫𑀬𑀲𑀻𑀮𑀫𑀬𑀸𑀦𑀜𑁆𑀘 𑀧𑀘𑁆𑀘𑁂𑀓𑀁 𑀪𑁂𑀤𑀦𑀁 𑀦𑀬𑀢𑁄 𑀤𑀲𑁆𑀲𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀸𑀧𑀻𑀢𑀺 𑀯𑀸 𑀢𑀺𑀯𑀺𑀥𑀸𑀧𑀻𑀢𑀺 𑀬𑁄𑀚𑁂𑀢𑀩𑁆𑀩𑀁.

𑁧𑁩. 𑀚𑀸𑀢𑀺𑀆𑀤𑀺𑀯𑀲𑁂𑀦 𑀅𑀲𑀫𑀸𑀦𑀓𑁄𑀝𑁆𑀞𑀸𑀲𑀢𑀸 𑀯𑀺𑀲𑀪𑀸𑀕𑀝𑁆𑀞𑁄. 𑀤𑀼𑀓𑁆𑀔𑀯𑀺𑀧𑀸𑀓𑀢𑀸𑀤𑀺𑀯𑀲𑁂𑀦 𑀅𑀲𑀤𑀺𑀲𑀓𑀺𑀘𑁆𑀘𑀢𑀸, 𑀅𑀲𑀤𑀺𑀲𑀲𑀪𑀸𑀯𑀢𑀸 𑀯𑀸 𑀯𑀺𑀲𑀁𑀲𑀝𑁆𑀞𑁄, 𑀦 𑀅𑀲𑀫𑁆𑀧𑀬𑁄𑀕𑁄. 𑀬𑀤𑀺 𑀲𑀺𑀬𑀸, 𑀤𑀽𑀭𑀯𑀺𑀧𑀭𑀺𑀬𑀸𑀬𑁂𑀦 𑀲𑀦𑁆𑀢𑀺𑀓𑀁 𑀳𑁄𑀢𑀻𑀢𑀺 𑀲𑀁𑀲𑀝𑁆𑀞𑀝𑁆𑀞𑁂𑀦 𑀲𑀦𑁆𑀢𑀺𑀓𑀢𑀸 𑀆𑀧𑀚𑁆𑀚𑀢𑀺, 𑀦 𑀘 𑀯𑁂𑀤𑀦𑀸𑀬 𑀯𑁂𑀤𑀦𑀸𑀲𑀫𑁆𑀧𑀬𑁄𑀕𑁄 𑀅𑀢𑁆𑀣𑀺. 𑀲𑀦𑁆𑀢𑀺𑀓𑀧𑀤𑀯𑀡𑁆𑀡𑀦𑀸𑀬 𑀘 ‘‘𑀲𑀪𑀸𑀕𑀝𑁆𑀞𑁂𑀦 𑀲𑀭𑀺𑀓𑁆𑀔𑀝𑁆𑀞𑁂𑀦 𑀘𑀸’’𑀢𑀺 𑀯𑀓𑁆𑀔𑀢𑀻𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀦 ¶ 𑀤𑀽𑀭𑀢𑁄 𑀲𑀦𑁆𑀢𑀺𑀓𑀁 𑀉𑀤𑁆𑀥𑀭𑀺𑀢𑀩𑁆𑀩𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀓𑀺𑀁 𑀬𑀣𑀸 𑀲𑀦𑁆𑀢𑀺𑀓𑀢𑁄 𑀅𑀓𑀼𑀲𑀮𑀢𑁄 𑀅𑀓𑀼𑀲𑀮𑀸 𑀤𑀽𑀭𑁂𑀢𑀺 𑀉𑀤𑁆𑀥𑀭𑀻𑀬𑀢𑀺, 𑀢𑀣𑀸 𑀢𑀢𑁄 𑀤𑀽𑀭𑀢𑁄 𑀓𑀼𑀲𑀮𑀢𑁄 𑀓𑀼𑀲𑀮𑀸 𑀲𑀦𑁆𑀢𑀺𑀓𑁂𑀢𑀺 𑀉𑀤𑁆𑀥𑀭𑀺𑀢𑀼𑀁 𑀦 𑀲𑀓𑁆𑀓𑀸𑀢𑀺? 𑀦 𑀲𑀓𑁆𑀓𑀸. 𑀢𑀣𑀸 𑀳𑀺 𑀲𑀢𑀺 𑀓𑀼𑀲𑀮𑀸 𑀓𑀼𑀲𑀮𑀸𑀬 𑀲𑀦𑁆𑀢𑀺𑀓𑁂𑀢𑀺 𑀓𑀢𑁆𑀯𑀸 𑀲𑀦𑁆𑀢𑀺𑀓𑀢𑁄 𑀲𑀦𑁆𑀢𑀺𑀓𑀢𑀸 𑀏𑀯 𑀉𑀤𑁆𑀥𑀭𑀺𑀢𑀸 𑀲𑀺𑀬𑀸, 𑀢𑀣𑀸 𑀘 𑀲𑀢𑀺 𑀲𑀦𑁆𑀢𑀺𑀓𑀲𑀦𑁆𑀢𑀺𑀓𑀢𑀭𑀢𑀸𑀯𑀘𑀦𑀫𑁂𑀯 𑀆𑀧𑀚𑁆𑀚𑀢𑀺, 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀤𑀽𑀭𑀲𑀦𑁆𑀢𑀺𑀓𑀢𑀸𑀯 𑀇𑀥 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀤𑀽𑀭𑀢𑁄 𑀤𑀽𑀭𑀼𑀤𑁆𑀥𑀭𑀡𑀁 𑀯𑀺𑀬 𑀲𑀦𑁆𑀢𑀺𑀓𑀢𑁄 𑀲𑀦𑁆𑀢𑀺𑀓𑀼𑀤𑁆𑀥𑀭𑀡𑀜𑁆𑀘 𑀦 𑀲𑀓𑁆𑀓𑀸 𑀓𑀸𑀢𑀼𑀁 𑀤𑀽𑀭𑀤𑀽𑀭𑀢𑀭𑀢𑀸𑀬 𑀯𑀺𑀬 𑀲𑀦𑁆𑀢𑀺𑀓𑀲𑀦𑁆𑀢𑀺𑀓𑀢𑀭𑀢𑀸𑀬 𑀘 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸. 𑀅𑀣 𑀧𑀦 𑀯𑀤𑁂𑀬𑁆𑀬 ‘‘𑀦 𑀓𑀼𑀲𑀮𑀸 𑀓𑀼𑀲𑀮𑀸𑀬 𑀏𑀯 𑀲𑀦𑁆𑀢𑀺𑀓𑁂𑀢𑀺 𑀉𑀤𑁆𑀥𑀭𑀺𑀢𑀩𑁆𑀩𑀸, 𑀅𑀣 𑀔𑁄 𑀬𑀢𑁄 𑀲𑀸 𑀤𑀽𑀭𑁂, 𑀢𑀲𑁆𑀲𑀸 𑀅𑀓𑀼𑀲𑀮𑀸𑀬𑀸’’𑀢𑀺, 𑀢𑀜𑁆𑀘 𑀦𑀢𑁆𑀣𑀺. 𑀦 𑀳𑀺 𑀅𑀓𑀼𑀲𑀮𑀸𑀬 𑀓𑀼𑀲𑀮𑀸 𑀓𑀤𑀸𑀘𑀺 𑀲𑀦𑁆𑀢𑀺𑀓𑁂 𑀅𑀢𑁆𑀣𑀻𑀢𑀺. 𑀅𑀣𑀸𑀧𑀺 𑀯𑀤𑁂𑀬𑁆𑀬 ‘‘𑀬𑀸 𑀅𑀓𑀼𑀲𑀮𑀸 𑀓𑀼𑀲𑀮𑀸𑀬 𑀲𑀦𑁆𑀢𑀺𑀓𑁂, 𑀲𑀸 𑀢𑀢𑁄 𑀤𑀽𑀭𑀢𑁄 𑀓𑀼𑀲𑀮𑀢𑁄 𑀉𑀤𑁆𑀥𑀭𑀺𑀢𑀩𑁆𑀩𑀸’’𑀢𑀺, 𑀢𑀤𑀧𑀺 𑀦𑀢𑁆𑀣𑀺. 𑀦 𑀳𑀺 𑀓𑀼𑀲𑀮𑁂 𑀅𑀓𑀼𑀲𑀮𑀸 𑀅𑀢𑁆𑀣𑀺, 𑀬𑀸 𑀢𑀢𑁄 𑀲𑀦𑁆𑀢𑀺𑀓𑁂𑀢𑀺 𑀉𑀤𑁆𑀥𑀭𑀺𑀬𑁂𑀬𑁆𑀬, 𑀢𑀲𑁆𑀫𑀸 𑀇𑀥 𑀯𑀼𑀢𑁆𑀢𑀲𑁆𑀲 𑀤𑀽𑀭𑀲𑁆𑀲 𑀤𑀽𑀭𑀢𑁄 𑀅𑀘𑁆𑀘𑀦𑁆𑀢𑀯𑀺𑀲𑀪𑀸𑀕𑀢𑁆𑀢𑀸 𑀤𑀽𑀭𑁂 𑀲𑀦𑁆𑀢𑀺𑀓𑀁 𑀦𑀢𑁆𑀣𑀻𑀢𑀺 𑀦 𑀲𑀓𑁆𑀓𑀸 𑀤𑀽𑀭𑀢𑁄 𑀲𑀦𑁆𑀢𑀺𑀓𑀁 𑀉𑀤𑁆𑀥𑀭𑀺𑀢𑀼𑀁, 𑀲𑀦𑁆𑀢𑀺𑀓𑁂 𑀧𑀦𑀺𑀥 𑀯𑀼𑀢𑁆𑀢𑁂 𑀪𑀺𑀦𑁆𑀦𑁂 𑀢𑀢𑁆𑀣𑁂𑀯 𑀤𑀽𑀭𑀁 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀲𑀦𑁆𑀢𑀺𑀓𑀢𑁄 𑀧𑀦 𑀤𑀽𑀭𑀁 𑀉𑀤𑁆𑀥𑀭𑀺𑀢𑀩𑁆𑀩’’𑀦𑁆𑀢𑀺.

𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀤𑀽𑀭𑀢𑁄 𑀘 𑀲𑀦𑁆𑀢𑀺𑀓𑀁 𑀦 𑀲𑀓𑁆𑀓𑀸 𑀉𑀤𑁆𑀥𑀭𑀺𑀢𑀼𑀁. 𑀮𑁄𑀪𑀲𑀳𑀕𑀢𑀸𑀬 𑀤𑁄𑀲𑀲𑀳𑀕𑀢𑀸 𑀤𑀽𑀭𑁂 𑀮𑁄𑀪𑀲𑀳𑀕𑀢𑀸 𑀲𑀦𑁆𑀢𑀺𑀓𑁂𑀢𑀺 𑀳𑀺 𑀯𑀼𑀘𑁆𑀘𑀫𑀸𑀦𑁂 𑀲𑀦𑁆𑀢𑀺𑀓𑀢𑁄𑀯 𑀲𑀦𑁆𑀢𑀺𑀓𑀁 𑀉𑀤𑁆𑀥𑀭𑀺𑀢𑀁 𑀳𑁄𑀢𑀺. 𑀢𑀣𑀸 𑀤𑁄𑀲𑀲𑀳𑀕𑀢𑀸𑀬 𑀮𑁄𑀪𑀲𑀳𑀕𑀢𑀸 𑀤𑀽𑀭𑁂 𑀤𑁄𑀲𑀲𑀳𑀕𑀢𑀸 𑀲𑀦𑁆𑀢𑀺𑀓𑁂𑀢𑀺 𑀏𑀢𑁆𑀣𑀸𑀧𑀺 ¶ 𑀲𑀪𑀸𑀕𑀢𑁄 𑀲𑀪𑀸𑀕𑀦𑁆𑀢𑀭𑀲𑁆𑀲 𑀉𑀤𑁆𑀥𑀝𑀢𑁆𑀢𑀸, 𑀦 𑀘 𑀲𑀓𑁆𑀓𑀸 ‘‘𑀮𑁄𑀪𑀲𑀳𑀕𑀢𑀸𑀬 𑀤𑁄𑀲𑀲𑀳𑀕𑀢𑀸 𑀤𑀽𑀭𑁂 𑀲𑀸 𑀏𑀯 𑀘 𑀲𑀦𑁆𑀢𑀺𑀓𑁂’’𑀢𑀺 𑀯𑀢𑁆𑀢𑀼𑀁 𑀤𑁄𑀲𑀲𑀳𑀕𑀢𑀸𑀬 𑀲𑀦𑁆𑀢𑀺𑀓𑀪𑀸𑀯𑀲𑁆𑀲 𑀅𑀓𑀸𑀭𑀡𑀢𑁆𑀢𑀸, 𑀢𑀲𑁆𑀫𑀸 𑀯𑀺𑀲𑀪𑀸𑀕𑀢𑀸 𑀪𑁂𑀤𑀁 𑀅𑀕𑁆𑀕𑀳𑁂𑀢𑁆𑀯𑀸 𑀦 𑀧𑀯𑀢𑁆𑀢𑀢𑀻𑀢𑀺 𑀲𑀪𑀸𑀕𑀸𑀩𑁆𑀬𑀸𑀧𑀓𑀢𑁆𑀢𑀸 𑀤𑀽𑀭𑀢𑀸𑀬 𑀤𑀽𑀭𑀢𑁄 𑀲𑀦𑁆𑀢𑀺𑀓𑀼𑀤𑁆𑀥𑀭𑀡𑀁 𑀦 𑀲𑀓𑁆𑀓𑀸 𑀓𑀸𑀢𑀼𑀁. 𑀦 𑀳𑀺 𑀤𑁄𑀲𑀲𑀳𑀕𑀢𑀸 𑀅𑀓𑀼𑀲𑀮𑀲𑀪𑀸𑀕𑀁 𑀲𑀩𑁆𑀩𑀁 𑀩𑁆𑀬𑀸𑀧𑁂𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺. 𑀲𑀪𑀸𑀕𑀢𑀸 𑀧𑀦 𑀪𑁂𑀤𑀁 𑀅𑀦𑁆𑀢𑁄𑀕𑀥𑀁 𑀓𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀯𑀺𑀲𑀪𑀸𑀕𑀩𑁆𑀬𑀸𑀧𑀓𑀢𑁆𑀢𑀸 𑀲𑀦𑁆𑀢𑀺𑀓𑀢𑀸𑀬 𑀲𑀦𑁆𑀢𑀺𑀓𑀢𑁄 𑀤𑀽𑀭𑀼𑀤𑁆𑀥𑀭𑀡𑀁 𑀲𑀓𑁆𑀓𑀸 𑀓𑀸𑀢𑀼𑀁. 𑀅𑀓𑀼𑀲𑀮𑀢𑀸 𑀳𑀺 𑀮𑁄𑀪𑀲𑀳𑀕𑀢𑀸𑀤𑀺𑀲𑀩𑁆𑀩𑀯𑀺𑀲𑀪𑀸𑀕𑀩𑁆𑀬𑀸𑀧𑀺𑀓𑀸𑀢𑀺. 𑀢𑁂𑀦𑀸𑀳 ‘‘𑀦 𑀤𑀽𑀭𑀢𑁄 𑀲𑀦𑁆𑀢𑀺𑀓𑀁 𑀉𑀤𑁆𑀥𑀭𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺.

𑀯𑁂𑀤𑀦𑀸𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀜𑁆𑀜𑀸𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁭. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 ¶ 𑀲𑀜𑁆𑀜𑀸𑀢𑀺 𑀏𑀢𑁆𑀣 𑀬𑀤𑀺𑀧𑀺 𑀯𑀢𑁆𑀣𑀼𑀢𑁄 𑀨𑀲𑁆𑀲𑀲𑁆𑀲 𑀦𑀸𑀫𑀁 𑀨𑀲𑁆𑀲𑀢𑁄 𑀘 𑀲𑀜𑁆𑀜𑀸𑀬, 𑀯𑀢𑁆𑀣𑀼𑀯𑀺𑀲𑀺𑀝𑁆𑀞𑀨𑀲𑁆𑀲𑁂𑀦 𑀧𑀦 𑀯𑀺𑀲𑀺𑀝𑁆𑀞𑀲𑀜𑁆𑀜𑀸 𑀯𑀢𑁆𑀣𑀼𑀦𑀸 𑀘 𑀯𑀺𑀲𑀺𑀝𑁆𑀞𑀸 𑀳𑁄𑀢𑀺 𑀨𑀲𑁆𑀲𑀲𑁆𑀲 𑀯𑀺𑀬 𑀢𑀲𑁆𑀲𑀸𑀧𑀺 𑀢𑀩𑁆𑀩𑀢𑁆𑀣𑀼𑀓𑀢𑁆𑀢𑀸𑀢𑀺 ‘‘𑀯𑀢𑁆𑀣𑀼𑀢𑁄 𑀦𑀸𑀫’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀝𑀺𑀖𑀲𑀫𑁆𑀨𑀲𑁆𑀲𑀚𑀸 𑀲𑀜𑁆𑀜𑀸𑀢𑀺 𑀏𑀢𑁆𑀣𑀸𑀧𑀺 𑀬𑀣𑀸 𑀨𑀲𑁆𑀲𑁄 𑀯𑀢𑁆𑀣𑀸𑀭𑀫𑁆𑀫𑀡𑀧𑀝𑀺𑀖𑀝𑁆𑀝𑀦𑁂𑀦 𑀉𑀧𑁆𑀧𑀦𑁆𑀦𑁄, 𑀢𑀣𑀸 𑀢𑀢𑁄 𑀚𑀸𑀢𑀲𑀜𑁆𑀜𑀸𑀧𑀻𑀢𑀺 ‘‘𑀯𑀢𑁆𑀣𑀸𑀭𑀫𑁆𑀫𑀡𑀢𑁄 𑀦𑀸𑀫’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀧𑀝𑀺𑀖𑀚𑁄 𑀲𑀫𑁆𑀨𑀲𑁆𑀲𑁄, 𑀧𑀝𑀺𑀖𑀯𑀺𑀜𑁆𑀜𑁂𑀬𑁆𑀬𑁄 𑀯𑀸 𑀲𑀫𑁆𑀨𑀲𑁆𑀲𑁄 𑀧𑀝𑀺𑀖𑀲𑀫𑁆𑀨𑀲𑁆𑀲𑁄𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑀁 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀯𑀺𑀜𑁆𑀜𑁂𑀬𑁆𑀬𑀪𑀸𑀯𑁂 𑀯𑀘𑀦𑀁 𑀅𑀥𑀺𑀓𑀺𑀘𑁆𑀘 𑀧𑀯𑀢𑁆𑀢𑀸, 𑀯𑀘𑀦𑀸𑀥𑀻𑀦𑀸 𑀯𑀸 𑀅𑀭𑀽𑀧𑀓𑁆𑀔𑀦𑁆𑀥𑀸, 𑀅𑀥𑀺𑀯𑀘𑀦𑀁 𑀯𑀸 𑀏𑀢𑁂𑀲𑀁 𑀧𑀓𑀸𑀲𑀦𑀁 𑀅𑀢𑁆𑀣𑀻𑀢𑀺 ‘‘𑀅𑀥𑀺𑀯𑀘𑀦𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀢𑁄𑀚𑁄 𑀲𑀫𑁆𑀨𑀲𑁆𑀲𑁄 𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑁄, 𑀲𑀫𑁆𑀨𑀲𑁆𑀲𑁄𑀬𑁂𑀯 𑀯𑀸 𑀬𑀣𑀸𑀯𑀼𑀢𑁆𑀢𑁂𑀳𑀺 𑀅𑀢𑁆𑀣𑁂𑀳𑀺 𑀅𑀥𑀺𑀯𑀘𑀦𑁄 𑀘 𑀲𑀫𑁆𑀨𑀲𑁆𑀲𑁄 𑀘𑀸𑀢𑀺 𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑁄, 𑀅𑀥𑀺𑀯𑀘𑀦𑀯𑀺𑀜𑁆𑀜𑁂𑀬𑁆𑀬𑁄 𑀯𑀸 𑀲𑀫𑁆𑀨𑀲𑁆𑀲𑁄 𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑁄, 𑀢𑀢𑁄 𑀢𑀲𑁆𑀫𑀺𑀁 𑀯𑀸 𑀚𑀸𑀢𑀸 𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑀚𑀸. 𑀧𑀜𑁆𑀘𑀤𑁆𑀯𑀸𑀭𑀺𑀓𑀲𑀫𑁆𑀨𑀲𑁆𑀲𑁂𑀧𑀺 𑀬𑀣𑀸𑀯𑀼𑀢𑁆𑀢𑁄 𑀅𑀢𑁆𑀣𑁄 𑀲𑀫𑁆𑀪𑀯𑀢𑀻𑀢𑀺 𑀢𑁂𑀦 𑀧𑀭𑀺𑀬𑀸𑀬𑁂𑀦 𑀢𑀢𑁄𑀚𑀸𑀧𑀺 𑀲𑀜𑁆𑀜𑀸 ‘‘𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑀚𑀸’’𑀢𑀺 𑀯𑀼𑀢𑁆𑀢𑀸. 𑀬𑀣𑀸 𑀧𑀦 𑀅𑀜𑁆𑀜𑀧𑁆𑀧𑀓𑀸𑀭𑀸𑀲𑀫𑁆𑀪𑀯𑀢𑁄 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 ‘‘𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑀚𑀸’’𑀢𑀺 𑀯𑀼𑀘𑁆𑀘𑀢𑀺, 𑀦 𑀏𑀯𑀁 𑀅𑀬𑀁 𑀧𑀝𑀺𑀖𑀲𑀫𑁆𑀨𑀲𑁆𑀲𑀚𑀸 𑀆𑀯𑁂𑀡𑀺𑀓𑀧𑁆𑀧𑀓𑀸𑀭𑀦𑁆𑀢𑀭𑀲𑀫𑁆𑀪𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀬𑀤𑀺 ¶ 𑀏𑀯𑀁 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸𑀧𑀺 𑀬𑀣𑀸𑀯𑀼𑀢𑁆𑀢𑀲𑀫𑁆𑀨𑀲𑁆𑀲𑀢𑁄 𑀚𑀸𑀢𑀢𑁆𑀢𑀸 ‘‘𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑀚𑀸’’𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀸, 𑀲𑀜𑁆𑀜𑀸𑀯 𑀓𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀸𑀢𑀺? 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁 𑀅𑀢𑁆𑀣𑀯𑀲𑁂𑀦 𑀅𑀢𑁆𑀢𑀦𑁄 𑀧𑀢𑁆𑀢𑀫𑁆𑀧𑀺 𑀦𑀸𑀫𑀁 𑀬𑀢𑁆𑀣 𑀧𑀯𑀢𑁆𑀢𑀫𑀸𑀦𑁄 𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑀚-𑀲𑀤𑁆𑀤𑁄 𑀦𑀺𑀭𑀼𑀴𑁆𑀳𑀢𑀸𑀬 𑀥𑀫𑁆𑀫𑀸𑀪𑀺𑀮𑀸𑀧𑁄 𑀳𑁄𑀢𑀺, 𑀢𑀲𑁆𑀲𑀸 𑀲𑀜𑁆𑀜𑀸𑀬 𑀏𑀯 𑀆𑀭𑁄𑀧𑁂𑀢𑁆𑀯𑀸 𑀲𑀬𑀁 𑀦𑀺𑀯𑀢𑁆𑀢𑀦𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀢𑀬𑁄 𑀳𑀺 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸’’𑀢𑀺𑀆𑀤𑀺. 𑀅𑀣 𑀯𑀸 𑀲𑀜𑁆𑀜𑀸𑀬 𑀧𑀝𑀺𑀖𑀲𑀫𑁆𑀨𑀲𑁆𑀲𑀚𑀸𑀢𑀺 𑀅𑀜𑁆𑀜𑀫𑁆𑀧𑀺 𑀯𑀺𑀲𑀺𑀝𑁆𑀞𑀁 𑀦𑀸𑀫𑀁 𑀅𑀢𑁆𑀣𑀻𑀢𑀺 𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑀚𑀸𑀦𑀸𑀫𑀁 𑀢𑀺𑀡𑁆𑀡𑀁𑀬𑁂𑀯 𑀔𑀦𑁆𑀥𑀸𑀦𑀁 𑀪𑀯𑀺𑀢𑀼𑀁 𑀅𑀭𑀳𑀢𑀺. 𑀢𑁂 𑀧𑀦 𑀅𑀢𑁆𑀢𑀦𑁄 𑀦𑀸𑀫𑀁 𑀲𑀜𑁆𑀜𑀸𑀬 𑀤𑀢𑁆𑀯𑀸 𑀦𑀺𑀯𑀢𑁆𑀢𑀸𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀬𑁄 𑀳𑀺 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸’’𑀢𑀺𑀆𑀤𑀺. 𑀧𑀜𑁆𑀘𑀤𑁆𑀯𑀸𑀭𑀺𑀓𑀲𑀜𑁆𑀜𑀸 𑀑𑀮𑁄𑀓𑁂𑀢𑁆𑀯𑀸𑀧𑀺 𑀚𑀸𑀦𑀺𑀢𑀼𑀁 𑀲𑀓𑁆𑀓𑀸𑀢𑀺 𑀇𑀤𑀁 𑀢𑁂𑀦 𑀢𑁂𑀦𑀸𑀥𑀺𑀧𑁆𑀧𑀸𑀬𑁂𑀦 𑀳𑀢𑁆𑀣𑀯𑀺𑀓𑀸𑀭𑀸𑀤𑀺𑀓𑀭𑀡𑁂 𑀢𑀤𑀥𑀺𑀧𑁆𑀧𑀸𑀬𑀯𑀺𑀚𑀸𑀦𑀦𑀦𑀺𑀫𑀺𑀢𑁆𑀢𑀪𑀽𑀢𑀸 𑀯𑀺𑀜𑁆𑀜𑀢𑁆𑀢𑀺 𑀯𑀺𑀬 𑀭𑀚𑁆𑀚𑀺𑀢𑁆𑀯𑀸 𑀑𑀮𑁄𑀓𑀦𑀸𑀤𑀻𑀲𑀼 𑀭𑀢𑁆𑀢𑀢𑀸𑀤𑀺𑀯𑀺𑀚𑀸𑀦𑀦𑀦𑀺𑀫𑀺𑀢𑁆𑀢𑀁 𑀑𑀮𑁄𑀓𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀺𑀲𑀬𑀲𑀫𑀸𑀕𑀫𑁂 𑀧𑀸𑀓𑀝𑀁 𑀳𑁄𑀢𑀻𑀢𑀺 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀬 𑀲𑀜𑁆𑀜𑀸𑀬𑀧𑀺 𑀢𑀣𑀸𑀧𑀸𑀓𑀝𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀭𑀚𑁆𑀚𑀺𑀢𑁆𑀯𑀸 ¶ 𑀑𑀮𑁄𑀓𑀦𑀸𑀤𑀺𑀯𑀲𑁂𑀦 𑀧𑀸𑀓𑀝𑀸 𑀚𑀯𑀦𑀧𑁆𑀧𑀯𑀢𑁆𑀢𑀸 𑀪𑀯𑀺𑀢𑀼𑀁 𑀅𑀭𑀳𑀢𑀻𑀢𑀺 𑀏𑀢𑀺𑀲𑁆𑀲𑀸 𑀆𑀲𑀗𑁆𑀓𑀸𑀬 𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀧𑀲𑀸𑀤𑀯𑀢𑁆𑀣𑀼𑀓𑀸 𑀏𑀯𑀸’’𑀢𑀺 𑀆𑀳. 𑀅𑀜𑁆𑀜𑀁 𑀘𑀺𑀦𑁆𑀢𑁂𑀦𑁆𑀢𑀦𑁆𑀢𑀺 𑀬𑀁 𑀧𑀼𑀩𑁆𑀩𑁂 𑀢𑁂𑀦 𑀘𑀺𑀦𑁆𑀢𑀺𑀢𑀁 𑀜𑀸𑀢𑀁, 𑀢𑀢𑁄 𑀅𑀜𑁆𑀜𑀁 𑀘𑀺𑀦𑁆𑀢𑁂𑀦𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀲𑀜𑁆𑀜𑀸𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁦. 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸𑀢𑀺 𑀏𑀢𑁆𑀣 𑀪𑀼𑀫𑁆𑀫𑀦𑀺𑀤𑁆𑀤𑁂𑀲𑁄𑀯. 𑀢𑀢𑁆𑀣 𑀳𑀺 𑀧𑀥𑀸𑀦𑀁 𑀤𑀲𑁆𑀲𑀺𑀢𑀦𑁆𑀢𑀺. 𑀬𑀤𑀺 𑀏𑀯𑀁 𑀉𑀧𑀭𑀺𑀫𑀓𑁄𑀝𑀺𑀬𑀸 𑀢𑀁 𑀦 𑀤𑀲𑁆𑀲𑀺𑀢𑀦𑁆𑀢𑀺 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺, 𑀉𑀧𑀭𑀺𑀫𑀓𑁄𑀝𑀺𑀕𑀢𑀪𑀸𑀯𑁂𑀦 𑀯𑀺𑀦𑀸 𑀳𑁂𑀝𑁆𑀞𑀺𑀫𑀓𑁄𑀝𑀺𑀕𑀢𑀪𑀸𑀯𑀸𑀪𑀸𑀯𑀢𑁄. 𑀳𑁂𑀝𑁆𑀞𑀺𑀫𑀓𑁄𑀝𑀺 𑀳𑀺 𑀲𑀩𑁆𑀩𑀩𑁆𑀬𑀸𑀧𑀺𑀓𑀸𑀢𑀺. 𑀤𑀼𑀢𑀺𑀬𑁂 𑀓𑀭𑀡𑀦𑀺𑀤𑁆𑀤𑁂𑀲𑁄, 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀆𑀕𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀭𑀺𑀫𑁂𑀧𑀺 𑀯𑀸 ‘‘𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸’’𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀜𑁆𑀘 𑀧𑀥𑀸𑀦𑀲𑀗𑁆𑀔𑀸𑀭𑀤𑀲𑁆𑀲𑀦𑀯𑀲𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑀓𑀭𑀡𑁂𑀦 𑀓𑀭𑀡𑀦𑀺𑀤𑁆𑀤𑁂𑀲𑁄𑀯. 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀲𑀗𑁆𑀔𑀸𑀭𑀸𑀢𑀺 𑀏𑀓𑀽𑀦𑀧𑀜𑁆𑀜𑀸𑀲𑀧𑁆𑀧𑀪𑁂𑀤𑁂 𑀲𑀗𑁆𑀔𑀸𑀭𑁂 𑀆𑀳. 𑀕𑀳𑀺𑀢𑀸𑀯 𑀳𑁄𑀦𑁆𑀢𑀺 𑀢𑀧𑁆𑀧𑀝𑀺𑀩𑀤𑁆𑀥𑀢𑁆𑀢𑀸.

𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸

𑀲𑀫𑀼𑀕𑁆𑀕𑀫-𑀲𑀤𑁆𑀤𑁄 ¶ 𑀲𑀜𑁆𑀚𑀸𑀢𑀺𑀬𑀁 𑀆𑀤𑀺𑀉𑀧𑁆𑀧𑀢𑁆𑀢𑀺𑀬𑀁 𑀦𑀺𑀭𑀼𑀴𑁆𑀳𑁄. 𑀢𑀁𑀢𑀁𑀧𑀘𑁆𑀘𑀬𑀲𑀫𑀸𑀬𑁄𑀕𑁂 𑀳𑀺 𑀧𑀼𑀭𑀺𑀫𑀪𑀯𑀲𑀗𑁆𑀔𑀸𑀢𑀸 𑀧𑀼𑀭𑀺𑀫𑀦𑁆𑀢𑀢𑁄 𑀉𑀤𑁆𑀥𑀗𑁆𑀕𑀫𑀦𑀁 𑀲𑀫𑀼𑀕𑁆𑀕𑀫𑁄, 𑀲𑀦𑁆𑀥𑀺𑀬𑀁 𑀯𑀸 𑀧𑀝𑀺𑀲𑀦𑁆𑀥𑀺𑀬𑀁 𑀉𑀕𑁆𑀕𑀫𑁄 𑀲𑀫𑀼𑀕𑁆𑀕𑀫𑁄. 𑀲𑁄 𑀧𑀦 𑀬𑀢𑁆𑀣 𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀭𑀺𑀧𑀼𑀡𑁆𑀡𑀸 𑀲𑀫𑀼𑀕𑁆𑀕𑀘𑁆𑀙𑀦𑁆𑀢𑀺, 𑀢𑀢𑁆𑀣𑁂𑀯 𑀤𑀲𑁆𑀲𑀺𑀢𑁄. 𑀏𑀢𑁂𑀦 𑀦𑀬𑁂𑀦 𑀅𑀧𑀭𑀺𑀧𑀼𑀡𑁆𑀡𑀔𑀦𑁆𑀥𑀲𑀫𑀼𑀕𑁆𑀕𑀫𑁄 𑀏𑀓𑀯𑁄𑀓𑀸𑀭𑀘𑀢𑀼𑀯𑁄𑀓𑀸𑀭𑁂𑀲𑀼 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺. 𑀅𑀣 𑀯𑀸 𑀬𑀣𑀸𑀥𑀺𑀕𑀢𑀸𑀦𑀁 𑀧𑀜𑁆𑀘𑀦𑁆𑀦𑀫𑁆𑀧𑀺 𑀔𑀦𑁆𑀥𑀸𑀦𑀁 𑀲𑀳 𑀉𑀕𑁆𑀕𑀫𑁄 𑀉𑀧𑁆𑀧𑀢𑁆𑀢𑀺 𑀲𑀫𑀼𑀕𑁆𑀕𑀫𑁄. 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀯𑀺𑀓𑀮𑀼𑀧𑁆𑀧𑀢𑁆𑀢𑀺 𑀅𑀲𑀗𑁆𑀕𑀳𑀺𑀢𑀸 𑀳𑁄𑀢𑀺. 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑁂 𑀚𑀸𑀢𑀺𑀫𑀦𑁆𑀢𑀏𑀴𑀓𑀮𑁄𑀫𑀁 𑀚𑀸𑀢𑀺𑀉𑀡𑁆𑀡𑀸. 𑀲𑀧𑁆𑀧𑀺𑀫𑀡𑁆𑀟𑀩𑀺𑀦𑁆𑀤𑀽𑀢𑀺 𑀏𑀯𑀁 𑀏𑀢𑁆𑀣𑀸𑀧𑀺 𑀩𑀺𑀦𑁆𑀤𑀼-𑀲𑀤𑁆𑀤𑁄 ¶ 𑀬𑁄𑀚𑁂𑀢𑀩𑁆𑀩𑁄. 𑀏𑀯𑀁𑀯𑀡𑁆𑀡𑀧𑁆𑀧𑀝𑀺𑀪𑀸𑀕𑀦𑁆𑀢𑀺 𑀏𑀯𑀁𑀯𑀡𑁆𑀡𑀁 𑀏𑀯𑀁𑀲𑀡𑁆𑀞𑀸𑀦𑀜𑁆𑀘. 𑀧𑀝𑀺𑀪𑀚𑀦𑀁 𑀯𑀸 𑀧𑀝𑀺𑀪𑀸𑀕𑁄, 𑀲𑀤𑀺𑀲𑀢𑀸𑀪𑀚𑀦𑀁 𑀲𑀤𑀺𑀲𑀢𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁𑀯𑀺𑀥𑁄 𑀯𑀡𑁆𑀡𑀧𑁆𑀧𑀝𑀺𑀪𑀸𑀕𑁄 𑀏𑀢𑀲𑁆𑀲𑀸𑀢𑀺 𑀏𑀯𑀁𑀯𑀡𑁆𑀡𑀧𑁆𑀧𑀝𑀺𑀪𑀸𑀕𑀁.

𑀲𑀦𑁆𑀢𑀢𑀺𑀲𑀻𑀲𑀸𑀦𑀻𑀢𑀺 𑀲𑀦𑁆𑀢𑀢𑀺𑀫𑀽𑀮𑀸𑀦𑀺, 𑀲𑀦𑁆𑀢𑀢𑀺𑀓𑁄𑀝𑁆𑀞𑀸𑀲𑀸 𑀯𑀸. 𑀅𑀦𑁂𑀓𑀺𑀦𑁆𑀤𑁆𑀭𑀺𑀬𑀲𑀫𑀸𑀳𑀸𑀭𑀪𑀸𑀯𑀢𑁄 𑀳𑀺 𑀧𑀥𑀸𑀦𑀗𑁆𑀕𑀁 ‘‘𑀲𑀻𑀲’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀯𑀢𑁆𑀣𑀼𑀤𑀲𑀓𑀸𑀤𑀺𑀓𑁄𑀝𑁆𑀞𑀸𑀲𑀸 𑀅𑀦𑁂𑀓𑀭𑀽𑀧𑀲𑀫𑀼𑀤𑀸𑀬𑀪𑀽𑀢𑀸 ‘‘𑀲𑀻𑀲𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀻𑀢𑀺.

𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀭𑀺𑀧𑀼𑀡𑁆𑀡𑀸 𑀳𑁄𑀦𑁆𑀢𑀻𑀢𑀺 𑀕𑀡𑀦𑀸𑀧𑀸𑀭𑀺𑀧𑀽𑀭𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀢𑀲𑁆𑀲 𑀢𑀲𑁆𑀲 𑀔𑀦𑁆𑀥𑀲𑁆𑀲 𑀧𑀭𑀺𑀧𑀼𑀡𑁆𑀡𑀢𑀁. 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀧𑀯𑁂𑀡𑀺𑀬𑀸 𑀯𑀼𑀢𑁆𑀢𑀢𑁆𑀢𑀸 ‘‘𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑀚𑀧𑀯𑁂𑀡𑀻 𑀘 𑀏𑀢𑁆𑀢𑀓𑀁 𑀓𑀸𑀮𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸, 𑀢𑀁 𑀧𑀦 ‘‘𑀧𑀼𑀩𑁆𑀩𑀸𑀧𑀭𑀢𑁄’’𑀢𑀺 𑀏𑀢𑁆𑀣 𑀯𑀓𑁆𑀔𑀢𑀻𑀢𑀺 𑀅𑀓𑀣𑁂𑀢𑁆𑀯𑀸 𑀓𑀫𑁆𑀫𑀚𑀧𑀯𑁂𑀡𑀻 𑀘 𑀦 𑀲𑀩𑁆𑀩𑀸 𑀯𑀼𑀢𑁆𑀢𑀸𑀢𑀺 𑀅𑀯𑀼𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 𑀑𑀧𑀧𑀸𑀢𑀺𑀓𑀲𑀫𑀼𑀕𑁆𑀕𑀫𑁄 𑀦𑀸𑀫 𑀤𑀲𑁆𑀲𑀺𑀢𑁄. 𑀏𑀯𑀁…𑀧𑁂… 𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀭𑀺𑀧𑀼𑀡𑁆𑀡𑀸 𑀳𑁄𑀦𑁆𑀢𑀻𑀢𑀺 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀸𑀦𑀁 𑀯𑀲𑁂𑀦 𑀦𑀬𑁄 𑀤𑀲𑁆𑀲𑀺𑀢𑁄, 𑀅𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀸𑀦𑀁 𑀧𑀦 𑀓𑀸𑀫𑀸𑀯𑀘𑀭𑀸𑀦𑀁 𑀭𑀽𑀧𑀸𑀯𑀘𑀭𑀸𑀦𑀁 𑀧𑀭𑀺𑀳𑀻𑀦𑀸𑀬𑀢𑀦𑀲𑁆𑀲 𑀯𑀲𑁂𑀦 𑀲𑀦𑁆𑀢𑀢𑀺𑀲𑀻𑀲𑀳𑀸𑀦𑀺 𑀯𑁂𑀤𑀺𑀢𑀩𑁆𑀩𑀸.

𑀧𑀼𑀩𑁆𑀩𑀸𑀧𑀭𑀢𑁄𑀢𑀺 𑀅𑀬𑀁 𑀯𑀺𑀘𑀸𑀭𑀡𑀸 𑀦 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀁, 𑀅𑀣 𑀔𑁄 𑀢𑁂𑀲𑀁 𑀭𑀽𑀧𑀲𑀫𑀼𑀝𑁆𑀞𑀸𑀧𑀦𑁂𑀢𑀺 𑀤𑀝𑁆𑀞𑀩𑁆𑀩𑀸. 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀯𑀁 𑀧𑀦𑀸’’𑀢𑀺𑀆𑀤𑀺. 𑀅𑀧𑀘𑁆𑀙𑀸𑀅𑀧𑀼𑀭𑁂 𑀉𑀧𑁆𑀧𑀦𑁆𑀦𑁂𑀲𑀽𑀢𑀺 𑀏𑀢𑁂𑀦 𑀲𑀁𑀲𑀬𑀓𑀸𑀭𑀡𑀁 𑀤𑀲𑁆𑀲𑁂𑀢𑀺. 𑀲𑀳𑀼𑀧𑁆𑀧𑀦𑁆𑀦𑁂𑀲𑀼 𑀳𑀺 𑀇𑀤𑀫𑁂𑀯 𑀧𑀞𑀫𑀁 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀇𑀤𑀁 𑀧𑀘𑁆𑀙𑀸𑀢𑀺 𑀅𑀤𑀲𑁆𑀲𑀺𑀢𑀁 𑀦 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀏𑀢𑁆𑀣 𑀘 ‘‘𑀧𑀼𑀩𑁆𑀩𑀸𑀧𑀭𑀢𑁄’’𑀢𑀺 𑀏𑀢𑀺𑀲𑁆𑀲𑀸 𑀯𑀺𑀘𑀸𑀭𑀡𑀸𑀬 𑀯𑀢𑁆𑀣𑀼𑀪𑀸𑀯𑁂𑀦 𑀧𑀝𑀺𑀲𑀦𑁆𑀥𑀺𑀬𑀁 𑀉𑀧𑁆𑀧𑀦𑁆𑀦𑀸 𑀧𑀯𑀢𑁆𑀢𑀸 𑀧𑀜𑁆𑀘𑀓𑁆𑀔𑀦𑁆𑀥𑀸 𑀕𑀳𑀺𑀢𑀸. 𑀢𑀢𑁆𑀣 𑀘 𑀦𑀺𑀤𑁆𑀥𑀸𑀭𑀡𑁂 ¶ 𑀪𑀼𑀫𑁆𑀫𑀦𑀺𑀤𑁆𑀤𑁂𑀲𑁄𑀢𑀺 ‘‘𑀭𑀽𑀧𑀁 𑀧𑀞𑀫𑀁 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀻’’𑀢𑀺 𑀆𑀳. 𑀅𑀜𑁆𑀜𑀣𑀸 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀢𑁆𑀣𑁂 𑀪𑀼𑀫𑁆𑀫𑀦𑀺𑀤𑁆𑀤𑁂𑀲𑁂 𑀲𑀢𑀺 𑀭𑀽𑀧𑀲𑁆𑀲 𑀭𑀽𑀧𑀲𑀫𑀼𑀝𑁆𑀞𑀸𑀧𑀦𑀓𑁆𑀔𑀡𑁂 𑀓𑀫𑁆𑀫𑀲𑁆𑀲𑀧𑀺 𑀭𑀽𑀧𑀲𑀫𑀼𑀝𑁆𑀞𑀸𑀦𑀁 𑀯𑀤𑀦𑁆𑀢𑀻𑀢𑀺 𑀉𑀪𑀬𑀦𑁆𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺. 𑀭𑀽𑀧𑀸𑀭𑀽𑀧𑀲𑀦𑁆𑀢𑀢𑀺𑀜𑁆𑀘 𑀕𑀳𑁂𑀢𑁆𑀯𑀸 𑀅𑀬𑀁 𑀯𑀺𑀘𑀸𑀭𑀡𑀸 𑀧𑀯𑀢𑁆𑀢𑀸𑀢𑀺 ‘‘𑀭𑀽𑀧𑀁 𑀧𑀞𑀫𑀁 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀣𑀸 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀏𑀯 𑀯𑀺𑀚𑁆𑀚𑀫𑀸𑀦𑁂 𑀕𑀳𑁂𑀢𑁆𑀯𑀸 𑀯𑀺𑀘𑀸𑀭𑀡𑀸𑀬 𑀓𑀭𑀺𑀬𑀫𑀸𑀦𑀸𑀬 𑀅𑀭𑀽𑀧𑀲𑁆𑀲 𑀭𑀽𑀧𑀲𑀫𑀼𑀝𑁆𑀞𑀸𑀧𑀦𑀫𑁂𑀯 𑀦𑀢𑁆𑀣𑀻𑀢𑀺 𑀧𑀼𑀩𑁆𑀩𑀸𑀧𑀭𑀲𑀫𑀼𑀝𑁆𑀞𑀸𑀧𑀦𑀯𑀺𑀘𑀸𑀭𑀡𑀸𑀯 𑀇𑀥 𑀦 𑀉𑀧𑀧𑀚𑁆𑀚𑀢𑀻𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺. 𑀯𑀢𑁆𑀣𑀼 𑀉𑀧𑁆𑀧𑀸𑀤𑀓𑁆𑀔𑀡𑁂 𑀤𑀼𑀩𑁆𑀩𑀮𑀁 𑀳𑁄𑀢𑀻𑀢𑀺 𑀲𑀩𑁆𑀩𑀭𑀽𑀧𑀸𑀦𑀁 𑀉𑀧𑁆𑀧𑀸𑀤𑀓𑁆𑀔𑀡𑁂 𑀤𑀼𑀩𑁆𑀩𑀮𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀤𑀸 𑀳𑀺 𑀢𑀁 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀭𑀳𑀺𑀢𑀁 𑀆𑀳𑀸𑀭𑀸𑀤𑀻𑀳𑀺 𑀘 𑀅𑀦𑀼𑀧𑀢𑁆𑀣𑀤𑁆𑀥𑀦𑁆𑀢𑀺 ‘‘𑀤𑀼𑀩𑁆𑀩𑀮’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀫𑁆𑀫𑀯𑁂𑀕𑀓𑁆𑀔𑀺𑀢𑁆𑀢𑀢𑁆𑀢𑀸𑀢𑀺 ¶ 𑀇𑀤𑀁 𑀲𑀢𑀺𑀧𑀺 𑀪𑀯𑀗𑁆𑀕𑀲𑁆𑀲 𑀓𑀫𑁆𑀫𑀚𑀪𑀸𑀯𑁂 𑀲𑀸𑀬𑀁 𑀯𑀺𑀧𑀸𑀓𑀲𑀦𑁆𑀢𑀢𑀺 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀧𑀼𑀭𑀺𑀫𑀪𑀯𑀗𑁆𑀕𑀲𑀫𑀼𑀝𑁆𑀞𑀸𑀧𑀓𑀢𑁄 𑀅𑀜𑁆𑀜𑁂𑀦 𑀓𑀫𑁆𑀫𑀼𑀦𑀸 𑀔𑀺𑀢𑁆𑀢𑀸 𑀯𑀺𑀬 𑀅𑀧𑁆𑀧𑀢𑀺𑀝𑁆𑀞𑀺𑀢𑀸, 𑀢𑀢𑁄 𑀧𑀭𑀜𑁆𑀘 𑀲𑀫𑀸𑀦𑀲𑀦𑁆𑀢𑀢𑀺𑀬𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀜𑁆𑀘 𑀮𑀪𑀺𑀢𑁆𑀯𑀸 𑀧𑀢𑀺𑀝𑁆𑀞𑀺𑀢𑀸𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀧𑀯𑁂𑀡𑀻 𑀖𑀝𑀺𑀬𑀢𑀻𑀢𑀺 𑀘𑀓𑁆𑀔𑀸𑀤𑀺𑀯𑀢𑁆𑀣𑀼𑀲𑀦𑁆𑀢𑀢𑀺 𑀏𑀓𑀲𑁆𑀫𑀺𑀁 𑀯𑀺𑀚𑁆𑀚𑀫𑀸𑀦𑁂 𑀏𑀯 𑀅𑀜𑁆𑀜𑀲𑁆𑀲 𑀦𑀺𑀭𑁄𑀥𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀖𑀝𑀺𑀬𑀢𑀺, 𑀦 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀦𑀺𑀲𑁆𑀲𑀬𑀯𑀢𑁆𑀣𑀽𑀦𑀁 𑀯𑀺𑀬 𑀯𑀺𑀘𑁆𑀙𑁂𑀤𑀧𑁆𑀧𑀯𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀗𑁆𑀕𑀢𑁄𑀢𑀺 𑀛𑀸𑀦𑀗𑁆𑀕𑀢𑁄. 𑀛𑀸𑀦𑀗𑁆𑀕𑀸𑀦𑀺 𑀳𑀺 𑀘𑀺𑀢𑁆𑀢𑁂𑀦 𑀲𑀳 𑀭𑀽𑀧𑀲𑀫𑀼𑀝𑁆𑀞𑀸𑀧𑀓𑀸𑀦𑀺, 𑀢𑁂𑀲𑀁 𑀅𑀦𑀼𑀩𑀮𑀤𑀸𑀬𑀓𑀸𑀦𑀺 𑀫𑀕𑁆𑀕𑀗𑁆𑀕𑀸𑀤𑀻𑀦𑀺 𑀢𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀯𑀺𑀲𑁂𑀲𑀭𑀽𑀧𑀧𑁆𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁄. 𑀅𑀣 𑀯𑀸 𑀬𑀸𑀦𑀺 𑀘𑀺𑀢𑁆𑀢𑀗𑁆𑀕𑀸𑀦𑀺 𑀘𑁂𑀢𑀦𑀸𑀤𑀻𑀦𑀺 𑀘𑀺𑀢𑁆𑀢𑀲𑁆𑀲 𑀭𑀽𑀧𑀲𑀫𑀼𑀝𑁆𑀞𑀸𑀧𑀦𑁂 𑀅𑀗𑁆𑀕𑀪𑀸𑀯𑀁 𑀲𑀳𑀸𑀬𑀪𑀸𑀯𑀁 𑀕𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀩𑀮𑀤𑀸𑀬𑀓𑁂𑀳𑀺 𑀛𑀸𑀦𑀗𑁆𑀕𑀸𑀤𑀻𑀳𑀺 𑀅𑀧𑀭𑀺𑀳𑀻𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁄 𑀧𑀭𑀺𑀳𑀻𑀦𑀢𑁆𑀢𑀸 𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀻𑀢𑀺. 𑀬𑁄 𑀧𑀦 𑀯𑀤𑁂𑀬𑁆𑀬 ‘‘𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀲𑀳𑀚𑀸𑀢𑀯𑀢𑁆𑀣𑀼 𑀢𑀲𑁆𑀲 𑀞𑀺𑀢𑀺𑀓𑁆𑀔𑀡𑁂 𑀘 𑀪𑀗𑁆𑀕𑀓𑁆𑀔𑀡𑁂 𑀘 𑀧𑀼𑀭𑁂𑀚𑀸𑀢𑀦𑁆𑀢𑀺 𑀓𑀢𑁆𑀯𑀸 𑀧𑀘𑁆𑀘𑀬𑀯𑁂𑀓𑀮𑁆𑀮𑀸𑀪𑀸𑀯𑀢𑁄 𑀢𑀲𑁆𑀫𑀺𑀁 𑀔𑀡𑀤𑁆𑀯𑀬𑁂 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀽’’𑀢𑀺, 𑀢𑀁 𑀦𑀺𑀯𑀸𑀭𑁂𑀦𑁆𑀢𑁄 𑀆𑀳 ‘‘𑀬𑀤𑀺 𑀳𑀺 𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀞𑀺𑀢𑀺𑀪𑀗𑁆𑀕𑀓𑁆𑀔𑀡𑁂𑀲𑀼𑀧𑀺 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀯𑀢𑁆𑀣𑀼 𑀧𑀼𑀭𑁂𑀚𑀸𑀢𑀁 𑀦 𑀳𑁄𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀫𑁂𑀯𑁂𑀢𑀦𑁆𑀢𑀺 𑀅𑀦𑀼𑀚𑀸𑀦𑀺, 𑀢𑀢𑁆𑀣𑀸𑀧𑀺 𑀤𑁄𑀲𑀁 𑀤𑀲𑁆𑀲𑁂𑀢𑀺. 𑀬𑀤𑀺 𑀢𑀤𑀸 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀬𑁆𑀬, 𑀢𑀯 𑀫𑀢𑁂𑀦 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀫𑁆𑀧𑀺 𑀲𑀫𑀼𑀝𑁆𑀞𑀸𑀧𑁂𑀬𑁆𑀬, 𑀢𑀤𑀸 𑀧𑀦 𑀭𑀽𑀧𑀼𑀧𑁆𑀧𑀸𑀤𑀦𑀫𑁂𑀯 𑀦𑀢𑁆𑀣𑀺. 𑀬𑀤𑀸 𑀘 𑀭𑀽𑀧𑀼𑀧𑁆𑀧𑀸𑀤𑀦𑀁, 𑀢𑀤𑀸 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑀯 𑀫𑀢𑁂𑀦𑀧𑀺 𑀧𑀘𑁆𑀘𑀬𑀯𑁂𑀓𑀮𑁆𑀮𑀫𑁂𑀯 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑀸𑀪𑀸𑀯𑀢𑁄, 𑀢𑀲𑁆𑀫𑀸 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀉𑀧𑁆𑀧𑀸𑀤𑀓𑁆𑀔𑀡𑁂 𑀅𑀝𑁆𑀞 𑀭𑀽𑀧𑀸𑀦𑀺 𑀕𑀳𑁂𑀢𑁆𑀯𑀸 ¶ 𑀉𑀝𑁆𑀞𑀳𑀢𑀺. 𑀓𑀲𑁆𑀫𑀸? 𑀅𑀭𑀽𑀧𑀥𑀫𑁆𑀫𑀸𑀦𑀁 𑀅𑀦𑀦𑁆𑀢𑀭𑀸𑀤𑀺𑀧𑀘𑁆𑀘𑀬𑀯𑀲𑁂𑀦 𑀲𑀯𑁂𑀕𑀸𑀦𑀁 𑀧𑀭𑀺𑀧𑀼𑀡𑁆𑀡𑀩𑀮𑀸𑀦𑀫𑁂𑀯 𑀉𑀧𑁆𑀧𑀢𑁆𑀢𑀺𑀢𑁄.

𑀅𑀯𑀺𑀲𑀬𑀢𑀸𑀬𑀸𑀢𑀺 𑀅𑀕𑀢𑀧𑀼𑀩𑁆𑀩𑀲𑁆𑀲 𑀕𑀸𑀫𑀲𑁆𑀲 𑀆𑀕𑀦𑁆𑀢𑀼𑀓𑀲𑁆𑀲 𑀅𑀯𑀺𑀲𑀬𑀪𑀸𑀯𑀢𑁄. 𑀅𑀧𑁆𑀧𑀳𑀼𑀢𑀢𑀸𑀬𑀸𑀢𑀺 𑀢𑀢𑁆𑀣 𑀢𑀲𑁆𑀲 𑀅𑀦𑀺𑀲𑁆𑀲𑀭𑀪𑀸𑀯𑀢𑁄. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦…𑀧𑁂… 𑀞𑀺𑀢𑀸𑀦𑀻𑀢𑀺 𑀇𑀤𑀁 𑀬𑁂𑀳𑀸𑀓𑀸𑀭𑁂𑀳𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑁂𑀳𑀺 𑀲𑀩𑁆𑀩𑁂𑀳𑀺 𑀧𑀝𑀺𑀲𑀦𑁆𑀥𑀺𑀬𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀲𑀫𑀢𑀺𑀁𑀲𑀓𑀫𑁆𑀫𑀚𑀭𑀽𑀧𑀸𑀦𑀁 𑀬𑀣𑀸𑀲𑀫𑁆𑀪𑀯𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑀯𑀝𑁆𑀝𑀫𑀽𑀮𑀦𑁆𑀢𑀺 𑀢𑀡𑁆𑀳𑀸 𑀅𑀯𑀺𑀚𑁆𑀚𑀸 𑀯𑀼𑀘𑁆𑀘𑀢𑀺. 𑀘𑀼𑀢𑀺𑀘𑀺𑀢𑁆𑀢𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀁 𑀭𑀽𑀧𑀁 𑀢𑀢𑁄 𑀧𑀼𑀭𑀺𑀫𑀢𑀭𑁂𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀁 𑀯𑀺𑀬 𑀦 𑀪𑀯𑀦𑁆𑀢𑀭𑁂 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀝𑁆𑀝𑀫𑀽𑀮𑀲𑁆𑀲 𑀯𑀽𑀧𑀲𑀦𑁆𑀢𑀢𑁆𑀢𑀸 𑀅𑀦𑀼𑀧𑁆𑀧𑀢𑁆𑀢𑀺 𑀯𑀺𑀘𑀸𑀭𑁂𑀢𑀩𑁆𑀩𑀸.

𑀭𑀽𑀧𑀲𑁆𑀲 ¶ 𑀦𑀢𑁆𑀣𑀺𑀢𑀸𑀬𑀸𑀢𑀺 𑀭𑀽𑀧𑀸𑀦𑀁 𑀦𑀺𑀲𑁆𑀲𑀭𑀡𑀢𑁆𑀢𑀸 𑀅𑀭𑀽𑀧𑀲𑁆𑀲, 𑀯𑀺𑀭𑀸𑀕𑀯𑀲𑁂𑀦 𑀧𑀳𑀻𑀦𑀢𑁆𑀢𑀸 𑀉𑀧𑁆𑀧𑀸𑀤𑁂𑀢𑀩𑁆𑀩𑀲𑁆𑀲 𑀅𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀭𑀽𑀧𑁄𑀓𑀸𑀲𑁂 𑀯𑀸 𑀭𑀽𑀧𑀁 𑀅𑀢𑁆𑀣𑀻𑀢𑀺 𑀓𑀢𑁆𑀯𑀸 𑀭𑀽𑀧𑀧𑀘𑁆𑀘𑀬𑀸𑀦𑀁 𑀭𑀽𑀧𑀼𑀧𑁆𑀧𑀸𑀤𑀦𑀁 𑀳𑁄𑀢𑀺, 𑀅𑀭𑀽𑀧𑀁 𑀧𑀦 𑀭𑀽𑀧𑀲𑁆𑀲 𑀑𑀓𑀸𑀲𑁄 𑀦 𑀳𑁄𑀢𑀻𑀢𑀺 𑀬𑀲𑁆𑀫𑀺𑀁 𑀭𑀽𑀧𑁂 𑀲𑀢𑀺 𑀘𑀺𑀢𑁆𑀢𑀁 𑀅𑀜𑁆𑀜𑀁 𑀭𑀽𑀧𑀁 𑀉𑀧𑁆𑀧𑀸𑀤𑁂𑀬𑁆𑀬, 𑀢𑀤𑁂𑀯 𑀢𑀢𑁆𑀣 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀧𑀼𑀭𑀺𑀫𑀭𑀽𑀧𑀲𑁆𑀲𑀧𑀺 𑀳𑀺 𑀧𑀘𑁆𑀘𑀬𑀪𑀸𑀯𑁄 𑀅𑀢𑁆𑀣𑀺 𑀧𑀼𑀢𑁆𑀢𑀲𑁆𑀲 𑀧𑀺𑀢𑀺𑀲𑀤𑀺𑀲𑀢𑀸𑀤𑀲𑁆𑀲𑀦𑀢𑁄𑀢𑀺.

𑀉𑀢𑀼 𑀧𑀦 𑀧𑀞𑀫𑀁 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀓𑁆𑀔𑀡𑁂 𑀲𑀫𑀼𑀝𑁆𑀞𑀸𑀧𑀦𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀢𑀼 𑀦𑀸𑀫 𑀘𑁂𑀲 𑀤𑀦𑁆𑀥𑀦𑀺𑀭𑁄𑀥𑁄𑀢𑀺𑀆𑀤𑀺 𑀉𑀢𑀼𑀲𑁆𑀲 𑀞𑀸𑀦𑀓𑁆𑀔𑀡𑁂 𑀉𑀧𑁆𑀧𑀸𑀤𑀦𑁂 𑀓𑀸𑀭𑀡𑀤𑀲𑁆𑀲𑀦𑀢𑁆𑀣𑀁 𑀅𑀭𑀽𑀧𑀸𑀦𑀁 𑀉𑀧𑁆𑀧𑀸𑀤𑀓𑀸𑀮𑀤𑀲𑁆𑀲𑀦𑀢𑁆𑀣𑀜𑁆𑀘 𑀯𑀼𑀢𑁆𑀢𑀁. 𑀤𑀦𑁆𑀥𑀦𑀺𑀭𑁄𑀥𑀢𑁆𑀢𑀸 𑀳𑀺 𑀲𑁄 𑀞𑀺𑀢𑀺𑀓𑁆𑀔𑀡𑁂 𑀩𑀮𑀯𑀸𑀢𑀺 𑀢𑀤𑀸 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀢𑀲𑁆𑀫𑀺𑀁 𑀥𑀭𑀦𑁆𑀢𑁂 𑀏𑀯 𑀔𑀺𑀧𑁆𑀧𑀦𑀺𑀭𑁄𑀥𑀢𑁆𑀢𑀸 𑀲𑁄𑀴𑀲𑀲𑀼 𑀘𑀺𑀢𑁆𑀢𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀧𑀝𑀺𑀲𑀦𑁆𑀥𑀺𑀅𑀦𑀦𑁆𑀢𑀭𑀁 𑀘𑀺𑀢𑁆𑀢𑀁 𑀉𑀢𑀼𑀦𑀸 𑀲𑀫𑀼𑀝𑁆𑀞𑀺𑀢𑁂 𑀭𑀽𑀧𑁂 𑀧𑀼𑀦 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀲𑁆𑀫𑀺𑀁 𑀥𑀭𑀦𑁆𑀢𑁂 𑀏𑀯 𑀲𑁄𑀴𑀲 𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀏𑀢𑁂𑀦 𑀧𑀦 𑀯𑀘𑀦𑁂𑀦 𑀬𑀤𑀺 𑀉𑀧𑁆𑀧𑀸𑀤𑀦𑀺𑀭𑁄𑀥𑀓𑁆𑀔𑀡𑀸 𑀥𑀭𑀫𑀸𑀦𑀓𑁆𑀔𑀡𑁂 𑀏𑀯 𑀕𑀳𑀺𑀢𑀸, ‘‘𑀲𑁄𑀴𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀁 𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀅𑀣𑀼𑀧𑁆𑀧𑀸𑀤𑀓𑁆𑀔𑀡𑀁 𑀅𑀕𑁆𑀕𑀳𑁂𑀢𑁆𑀯𑀸 𑀦𑀺𑀭𑁄𑀥𑀓𑁆𑀔𑀡𑁄𑀯 𑀕𑀳𑀺𑀢𑁄, ‘‘𑀲𑀢𑁆𑀢𑀭𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓’’𑀦𑁆𑀢𑀺, 𑀲𑀘𑁂 𑀦𑀺𑀭𑁄𑀥𑀓𑁆𑀔𑀡𑀁 𑀅𑀕𑁆𑀕𑀳𑁂𑀢𑁆𑀯𑀸 𑀉𑀧𑁆𑀧𑀸𑀤𑀓𑁆𑀔𑀡𑁄 𑀕𑀳𑀺𑀢𑁄, ‘‘𑀅𑀥𑀺𑀓𑀲𑁄𑀴𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓’’𑀦𑁆𑀢𑀺, 𑀬𑀤𑀺 𑀧𑀦 𑀉𑀧𑁆𑀧𑀸𑀤𑀦𑀺𑀭𑁄𑀥𑀓𑁆𑀔𑀡𑀸 𑀥𑀭𑀫𑀸𑀦𑀓𑁆𑀔𑀡𑁂 𑀦 𑀕𑀳𑀺𑀢𑀸, ‘‘𑀅𑀥𑀺𑀓𑀲𑀢𑁆𑀢𑀭𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓’’𑀦𑁆𑀢𑀺. 𑀬𑀲𑁆𑀫𑀸 𑀧𑀦 ‘‘𑀢𑁂𑀲𑀼 𑀧𑀝𑀺𑀲𑀦𑁆𑀥𑀺𑀅𑀦𑀦𑁆𑀢𑀭’’𑀦𑁆𑀢𑀺 ¶ 𑀧𑀝𑀺𑀲𑀦𑁆𑀥𑀺𑀧𑀺 𑀢𑀲𑁆𑀲 𑀥𑀭𑀫𑀸𑀦𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑁂𑀲𑀼 𑀕𑀳𑀺𑀢𑀸, 𑀢𑀲𑁆𑀫𑀸 𑀉𑀧𑁆𑀧𑀸𑀤𑀓𑁆𑀔𑀡𑁄 𑀥𑀭𑀫𑀸𑀦𑀓𑁆𑀔𑀡𑁂 𑀕𑀳𑀺𑀢𑁄𑀢𑀺 𑀦𑀺𑀭𑁄𑀥𑀓𑁆𑀔𑀡𑁂 𑀅𑀕𑁆𑀕𑀳𑀺𑀢𑁂 𑀅𑀥𑀺𑀓𑀲𑁄𑀴𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀢𑀸 𑀯𑀓𑁆𑀔𑀫𑀸𑀦𑀸, 𑀕𑀳𑀺𑀢𑁂 𑀯𑀸 𑀲𑁄𑀴𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀢𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀑𑀚𑀸 𑀔𑀭𑀸𑀢𑀺 𑀲𑀯𑀢𑁆𑀣𑀼𑀓𑀁 𑀑𑀚𑀁 𑀲𑀦𑁆𑀥𑀸𑀬𑀸𑀳. 𑀲𑀪𑀸𑀯𑀢𑁄 𑀲𑀼𑀔𑀼𑀫𑀸𑀬 𑀳𑀺 𑀑𑀚𑀸𑀬 𑀯𑀢𑁆𑀣𑀼𑀯𑀲𑁂𑀦 𑀅𑀢𑁆𑀣𑀺 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸𑀢𑀺.

𑀘𑀺𑀢𑁆𑀢𑀜𑁆𑀘𑁂𑀯𑀸𑀢𑀺 𑀘𑀺𑀢𑁆𑀢𑀲𑁆𑀲 𑀧𑀼𑀩𑁆𑀩𑀗𑁆𑀕𑀫𑀢𑀸𑀬 𑀯𑀼𑀢𑁆𑀢𑀁, 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀧𑀺 𑀧𑀦 𑀭𑀽𑀧𑀲𑀫𑀼𑀝𑁆𑀞𑀸𑀧𑀓𑀸 𑀳𑁄𑀦𑁆𑀢𑀻𑀢𑀺. 𑀬𑀣𑀸𑀳 ‘‘𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺 (𑀧𑀝𑁆𑀞𑀸. 𑁧.𑁧.𑁧). 𑀘𑀺𑀢𑁆𑀢𑀦𑁆𑀢𑀺 𑀯𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀁 𑀕𑀡𑁆𑀳𑀸𑀢𑀺, 𑀦 𑀓𑀫𑁆𑀫𑀘𑁂𑀢𑀦𑀁 𑀯𑀺𑀬 𑀏𑀓𑀥𑀫𑁆𑀫𑀫𑁂𑀯 𑀅𑀯𑀺𑀚𑁆𑀚𑀫𑀸𑀦𑀁. 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀜𑁆𑀘 𑀢𑀁𑀲𑀫𑁆𑀧𑀬𑀼𑀢𑁆𑀢𑁂𑀳𑀺𑀧𑀺 𑀲𑀫𑀼𑀝𑁆𑀞𑀺𑀢𑀁 𑀳𑁄𑀢𑀽𑀢𑀺 𑀘𑁂? 𑀦, 𑀢𑁂𑀳𑀺 𑀲𑀫𑀼𑀝𑁆𑀞𑀺𑀢𑀪𑀸𑀯𑀲𑁆𑀲 𑀅𑀯𑀼𑀢𑁆𑀢𑀢𑁆𑀢𑀸, 𑀅𑀯𑀘𑀦𑀜𑁆𑀘 𑀢𑁂𑀲𑀁 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑀪𑀸𑀯𑀸𑀪𑀸𑀯𑀢𑁄.

𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀢𑁄𑀢𑀺 ¶ 𑀓𑀸𑀮𑀧𑀭𑀺𑀘𑁆𑀙𑁂𑀤𑀢𑁄. 𑀢𑀢𑁆𑀣 ‘‘𑀲𑀢𑁆𑀢𑀭𑀲 𑀘𑀺𑀢𑁆𑀢𑀓𑁆𑀔𑀡𑀸 𑀭𑀽𑀧𑀲𑁆𑀲 𑀅𑀤𑁆𑀥𑀸, 𑀭𑀽𑀧𑀲𑁆𑀲 𑀲𑀢𑁆𑀢𑀭𑀲𑀫𑁄 𑀪𑀸𑀕𑁄 𑀅𑀭𑀽𑀧𑀲𑁆𑀲𑀸’’𑀢𑀺 𑀏𑀲𑁄 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑁄 𑀅𑀥𑀺𑀧𑁆𑀧𑁂𑀢𑁄. 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂𑀢𑀺 𑀇𑀤𑀁 𑀦𑀬𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁 𑀢𑀢𑁄 𑀧𑀭𑀫𑁆𑀧𑀺 𑀭𑀽𑀧𑀸𑀭𑀽𑀧𑀸𑀦𑀁 𑀲𑀳𑀼𑀧𑁆𑀧𑀢𑁆𑀢𑀺𑀲𑀩𑁆𑀪𑀸𑀯𑀢𑁄, 𑀦 𑀧𑀦𑁂𑀢𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀅𑀲𑀳𑀼𑀧𑁆𑀧𑀢𑁆𑀢𑀺𑀅𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀪𑀗𑁆𑀕𑀓𑁆𑀔𑀡𑁂𑀲𑀼𑀧𑀺 𑀭𑀽𑀧𑀼𑀧𑁆𑀧𑀢𑁆𑀢𑀺𑀁 𑀲𑀬𑀫𑁂𑀯 𑀯𑀓𑁆𑀔𑀢𑀻𑀢𑀺. 𑀨𑀮𑀧𑁆𑀧𑀢𑁆𑀢𑀦𑀺𑀤𑀲𑁆𑀲𑀦𑁂𑀦 𑀘 𑀭𑀽𑀧𑀸𑀭𑀽𑀧𑀸𑀦𑀁 𑀅𑀲𑀫𑀸𑀦𑀓𑀸𑀮𑀢𑀁 𑀦𑀺𑀤𑀲𑁆𑀲𑁂𑀢𑀺, 𑀦 𑀲𑀳𑀼𑀧𑁆𑀧𑀸𑀤𑀁 𑀢𑀤𑀢𑁆𑀣𑀁 𑀅𑀦𑀸𑀭𑀤𑁆𑀥𑀢𑁆𑀢𑀸. 𑀲𑀳𑀼𑀧𑁆𑀧𑀸𑀤𑁂𑀦 𑀧𑀦 𑀅𑀲𑀫𑀸𑀦𑀓𑀸𑀮𑀢𑀸 𑀲𑀼𑀔𑀤𑀻𑀧𑀦𑀸 𑀳𑁄𑀢𑀻𑀢𑀺 𑀢𑀁𑀤𑀻𑀧𑀦𑀢𑁆𑀣𑀫𑁂𑀯 𑀲𑀳𑀼𑀧𑁆𑀧𑀸𑀤𑀕𑁆𑀕𑀳𑀡𑀁.

𑀬𑀤𑀺 𑀏𑀯𑀁 𑀭𑀽𑀧𑀸𑀭𑀽𑀧𑀸𑀦𑀁 𑀅𑀲𑀫𑀸𑀦𑀤𑁆𑀥𑀢𑁆𑀢𑀸 𑀅𑀭𑀽𑀧𑀁 𑀑𑀳𑀸𑀬 𑀭𑀽𑀧𑀲𑁆𑀲 𑀧𑀯𑀢𑁆𑀢𑀺 𑀆𑀧𑀚𑁆𑀚𑀢𑀻𑀢𑀺 𑀏𑀢𑀲𑁆𑀲𑀸 𑀦𑀺𑀯𑀸𑀭𑀡𑀢𑁆𑀣𑀫𑀸𑀳 ‘‘𑀢𑀢𑁆𑀣 𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺. 𑀏𑀓𑀧𑁆𑀧𑀫𑀸𑀡𑀸𑀯𑀸𑀢𑀺 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑀫𑀸𑀦𑁂𑀲𑀼 𑀭𑀽𑀧𑀸𑀭𑀽𑀧𑀥𑀫𑁆𑀫𑁂𑀲𑀼 𑀦𑀺𑀘𑁆𑀙𑀺𑀤𑁆𑀤𑁂𑀲𑀼 𑀅𑀭𑀽𑀧𑀭𑀳𑀺𑀢𑀁 𑀭𑀽𑀧𑀁, 𑀭𑀽𑀧𑀭𑀳𑀺𑀢𑀁 𑀯𑀸 𑀅𑀭𑀽𑀧𑀁 𑀦𑀢𑁆𑀣𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀬𑀜𑁆𑀘 𑀓𑀣𑀸 𑀧𑀜𑁆𑀘𑀯𑁄𑀓𑀸𑀭𑁂 𑀓𑀫𑁆𑀫𑀚𑀭𑀽𑀧𑀧𑁆𑀧𑀯𑀢𑁆𑀢𑀺𑀁 𑀦𑀺𑀩𑁆𑀩𑀸𑀦𑀧𑀝𑀺𑀪𑀸𑀕𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀭𑀳𑀺𑀢𑀁 𑀲𑀦𑁆𑀥𑀸𑀬 𑀓𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀧𑀤𑁂 𑀧𑀤𑀦𑁆𑀢𑀺 𑀅𑀢𑁆𑀢𑀦𑁄 𑀧𑀤𑁂 𑀏𑀯 𑀧𑀤𑀁 𑀦𑀺𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀮𑀳𑀼𑀁 𑀮𑀳𑀼𑀁 𑀅𑀓𑁆𑀓𑀫𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀦𑁄𑀳𑀸𑀬𑀸𑀢𑀺 𑀬𑀸𑀯 𑀘𑀼𑀢𑀺, 𑀢𑀸𑀯 ¶ 𑀅𑀯𑀺𑀚𑀳𑀺𑀢𑁆𑀯𑀸, 𑀘𑀼𑀢𑀺𑀓𑁆𑀔𑀡𑁂 𑀧𑀦 𑀲𑀳𑁂𑀯 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺. 𑀬𑀲𑁆𑀫𑀺𑀜𑁆𑀘𑀤𑁆𑀥𑀸𑀦𑁂 𑀅𑀜𑁆𑀜𑀫𑀜𑁆𑀜𑀁 𑀅𑀦𑁄𑀳𑀸𑀬 𑀧𑀯𑀢𑁆𑀢𑀺, 𑀲𑁄 𑀘 𑀧𑀝𑀺𑀲𑀦𑁆𑀥𑀺𑀘𑀼𑀢𑀺𑀧𑀭𑀺𑀘𑁆𑀙𑀺𑀦𑁆𑀦𑁄 𑀉𑀓𑁆𑀓𑀁𑀲𑀢𑁄 𑀏𑀢𑁂𑀲𑀁 𑀅𑀤𑁆𑀥𑀸𑀢𑀺. 𑀏𑀯𑀦𑁆𑀢𑀺 𑀏𑀢𑁂𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁 𑀅𑀯𑀓𑀁𑀲𑀢𑁄 𑀅𑀤𑁆𑀥𑀸𑀧𑀓𑀸𑀭𑀁 𑀇𑀫𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀓𑀼𑀧𑁆𑀧𑀸𑀤𑀦𑀸𑀦𑀸𑀦𑀺𑀭𑁄𑀥𑀢𑁄𑀢𑀺 𑀏𑀢𑀁 𑀤𑁆𑀯𑀬𑀫𑀧𑀺 𑀲𑀳 𑀕𑀳𑁂𑀢𑁆𑀯𑀸 𑀭𑀽𑀧𑀸𑀭𑀽𑀧𑀸𑀦𑀁 ‘‘𑀏𑀓𑀼𑀧𑁆𑀧𑀸𑀤𑀦𑀸𑀦𑀸𑀦𑀺𑀭𑁄𑀥𑀢𑁄’’𑀢𑀺 𑀏𑀓𑁄 𑀤𑀝𑁆𑀞𑀩𑁆𑀩𑀸𑀓𑀸𑀭𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀏𑀯𑀁 𑀇𑀢𑁄 𑀧𑀭𑁂𑀲𑀼𑀧𑀺. 𑀧𑀘𑁆𑀙𑀺𑀫𑀓𑀫𑁆𑀫𑀚𑀁 𑀞𑀧𑁂𑀢𑁆𑀯𑀸𑀢𑀺 𑀢𑀲𑁆𑀲 𑀘𑀼𑀢𑀺𑀘𑀺𑀢𑁆𑀢𑁂𑀦 𑀲𑀳 𑀦𑀺𑀭𑀼𑀚𑁆𑀛𑀦𑀢𑁄 𑀦𑀸𑀦𑀸𑀦𑀺𑀭𑁄𑀥𑁄 𑀦𑀢𑁆𑀣𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀲𑁆𑀲 𑀧𑀦 𑀏𑀓𑀼𑀧𑁆𑀧𑀸𑀤𑁄𑀧𑀺 𑀦𑀢𑁆𑀣𑀺 𑀳𑁂𑀝𑁆𑀞𑀸 𑀲𑁄𑀴𑀲𑀓𑁂 𑀧𑀘𑁆𑀙𑀺𑀫𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀉𑀧𑁆𑀧𑀢𑁆𑀢𑀺𑀯𑀘𑀦𑀢𑁄. 𑀬𑀤𑀺 𑀧𑀦 𑀬𑀲𑁆𑀲 𑀏𑀓𑀼𑀧𑁆𑀧𑀸𑀤𑀦𑀸𑀦𑀸𑀦𑀺𑀭𑁄𑀥𑀸 𑀤𑁆𑀯𑁂𑀧𑀺 𑀦 𑀲𑀦𑁆𑀢𑀺, 𑀢𑀁 𑀞𑀧𑁂𑀢𑀩𑁆𑀩𑀁. 𑀲𑀩𑁆𑀩𑀫𑁆𑀧𑀺 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀞𑀧𑁂𑀢𑀩𑁆𑀩𑀁 𑀲𑀺𑀬𑀸, 𑀧𑀘𑁆𑀙𑀺𑀫𑀓𑀫𑁆𑀫𑀚𑀲𑁆𑀲 𑀧𑀦 𑀉𑀧𑁆𑀧𑀢𑁆𑀢𑀺𑀢𑁄 𑀧𑀭𑀢𑁄 𑀘𑀺𑀢𑁆𑀢𑁂𑀲𑀼 𑀧𑀯𑀢𑁆𑀢𑀫𑀸𑀦𑁂𑀲𑀼 𑀓𑀫𑁆𑀫𑀚𑀭𑀽𑀧𑀲𑁆𑀲 𑀅𑀦𑀼𑀧𑁆𑀧𑀢𑁆𑀢𑀺𑀢𑁄 𑀯𑀚𑁆𑀚𑁂𑀢𑀩𑁆𑀩𑀁 𑀕𑀳𑁂𑀢𑀩𑁆𑀩𑀜𑁆𑀘 𑀢𑀤𑀸 𑀦𑀢𑁆𑀣𑀻𑀢𑀺 ‘‘𑀧𑀘𑁆𑀙𑀺𑀫𑀓𑀫𑁆𑀫𑀚𑀁 𑀞𑀧𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁄 𑀧𑀼𑀩𑁆𑀩𑁂 𑀧𑀦 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀓𑀫𑁆𑀫𑀚𑀭𑀽𑀧𑀧𑀯𑁂𑀡𑀻 𑀅𑀢𑁆𑀣𑀻𑀢𑀺 𑀢𑀢𑁆𑀣 𑀬𑀁 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁, 𑀢𑀁 𑀅𑀜𑁆𑀜𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀦𑀺𑀭𑀼𑀚𑁆𑀛𑀢𑀻𑀢𑀺 ‘‘𑀏𑀓𑀼𑀧𑁆𑀧𑀸𑀤𑀦𑀸𑀦𑀸𑀦𑀺𑀭𑁄𑀥’’𑀦𑁆𑀢𑀺 𑀕𑀳𑁂𑀢𑁆𑀯𑀸 𑀞𑀺𑀢𑀺𑀪𑀗𑁆𑀕𑀓𑁆𑀔𑀡𑁂𑀲𑀼 𑀉𑀧𑁆𑀧𑀦𑁆𑀦𑀭𑀽𑀧𑀸𑀦𑀺 𑀯𑀚𑁆𑀚𑁂𑀢𑁆𑀯𑀸 𑀏𑀯𑀁 𑀏𑀓𑀼𑀧𑁆𑀧𑀸𑀤𑀦𑀸𑀦𑀸𑀦𑀺𑀭𑁄𑀥𑀢𑁄 𑀯𑁂𑀤𑀺𑀢𑀩𑁆𑀩𑀸𑀢𑀺 𑀬𑁄𑀚𑀦𑀸 ¶ 𑀓𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀢𑀜𑁆𑀳𑀺 𑀭𑀽𑀧𑀁 𑀅𑀭𑀽𑀧𑁂𑀦, 𑀅𑀭𑀽𑀧𑀜𑁆𑀘 𑀢𑁂𑀦 𑀏𑀓𑀼𑀧𑁆𑀧𑀸𑀤𑀦𑀸𑀦𑀸𑀦𑀺𑀭𑁄𑀥𑀦𑁆𑀢𑀺. 𑀢𑀢𑁆𑀣 𑀲𑀗𑁆𑀔𑀮𑀺𑀓𑀲𑁆𑀲 𑀯𑀺𑀬 𑀲𑀫𑁆𑀩𑀦𑁆𑀥𑁄 𑀧𑀯𑁂𑀡𑀻𑀢𑀺 𑀓𑀢𑁆𑀯𑀸 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀓𑀫𑁆𑀫𑀚𑀺𑀬𑀯𑀘𑀦𑀁 𑀓𑀢𑀁, 𑀅𑀜𑁆𑀜𑀣𑀸 𑀏𑀓𑀽𑀦𑀧𑀜𑁆𑀜𑀸𑀲𑀓𑀫𑁆𑀫𑀚𑀺𑀬𑀯𑀘𑀦𑀁 𑀓𑀢𑁆𑀢𑀩𑁆𑀩𑀁 𑀲𑀺𑀬𑀸.

𑀦𑀸𑀦𑀼𑀧𑁆𑀧𑀸𑀤…𑀧𑁂… 𑀧𑀘𑁆𑀙𑀺𑀫𑀓𑀫𑁆𑀫𑀚𑁂𑀦 𑀤𑀻𑀧𑁂𑀢𑀩𑁆𑀩𑀸𑀢𑀺 𑀢𑁂𑀦 𑀲𑀼𑀤𑀻𑀧𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀏𑀢𑁂𑀦 𑀳𑀺 𑀦𑀬𑁂𑀦 𑀲𑀓𑁆𑀓𑀸 𑀢𑀢𑁄 𑀧𑀼𑀩𑁆𑀩𑁂𑀧𑀺 𑀏𑀓𑀲𑁆𑀲 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀭𑀽𑀧𑀁 𑀅𑀜𑁆𑀜𑀲𑁆𑀲𑀧𑀺 𑀪𑀗𑁆𑀕𑀓𑁆𑀔𑀡𑁂 𑀏𑀯 𑀦𑀺𑀭𑀼𑀚𑁆𑀛𑀢𑀻𑀢𑀺 𑀢𑀁 𑀅𑀭𑀽𑀧𑁂𑀦, 𑀅𑀭𑀽𑀧𑀜𑁆𑀘 𑀢𑁂𑀦 𑀦𑀸𑀦𑀼𑀧𑁆𑀧𑀸𑀤𑀁 𑀏𑀓𑀦𑀺𑀭𑁄𑀥𑀦𑁆𑀢𑀺 𑀯𑀺𑀜𑁆𑀜𑀸𑀢𑀼𑀦𑁆𑀢𑀺. 𑀉𑀪𑀬𑀢𑁆𑀣𑀸𑀧𑀺 𑀧𑀦 𑀅𑀜𑁆𑀜𑀲𑁆𑀲 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀭𑀽𑀧𑀁 𑀅𑀜𑁆𑀜𑀲𑁆𑀲 𑀞𑀺𑀢𑀺𑀓𑁆𑀔𑀡𑁂, 𑀢𑀲𑁆𑀲 𑀞𑀺𑀢𑀺𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀞𑀺𑀢𑀺𑀓𑁆𑀔𑀡𑁂 𑀏𑀯 𑀦𑀺𑀭𑀼𑀚𑁆𑀛𑀦𑀓𑀁 𑀅𑀭𑀽𑀧𑀜𑁆𑀘 𑀦 𑀲𑀗𑁆𑀕𑀳𑀺𑀢𑀁, 𑀢𑀁 ‘‘𑀦𑀸𑀦𑀼𑀧𑁆𑀧𑀸𑀤𑀢𑁄 𑀦𑀸𑀦𑀸𑀦𑀺𑀭𑁄𑀥𑀢𑁄’’𑀢𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀘𑀢𑀼𑀲𑀦𑁆𑀢𑀢𑀺𑀓𑀭𑀽𑀧𑁂𑀦 𑀳𑀺 𑀦𑀸𑀦𑀼𑀧𑁆𑀧𑀸𑀤𑀦𑀸𑀦𑀸𑀦𑀺𑀭𑁄𑀥𑀢𑀸𑀤𑀻𑀧𑀦𑀸 𑀏𑀢𑁆𑀣 𑀞𑀺𑀢𑀺𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸 𑀅𑀤𑀲𑁆𑀲𑀺𑀢𑀲𑁆𑀲 𑀯𑀲𑁂𑀦 𑀦𑀬𑀤𑀲𑁆𑀲𑀦𑀁 𑀳𑁄𑀢𑀻𑀢𑀺. 𑀲𑀫𑀢𑀺𑀁𑀲𑀓𑀫𑁆𑀫𑀚𑀭𑀽𑀧𑁂𑀲𑀼 𑀏𑀯 𑀞𑀺𑀢𑀲𑁆𑀲𑀧𑀺 𑀕𑀩𑁆𑀪𑁂 𑀕𑀢𑀲𑁆𑀲 𑀫𑀭𑀡𑀁 𑀅𑀢𑁆𑀣𑀻𑀢𑀺 𑀢𑁂𑀲𑀁 𑀏𑀯 𑀯𑀲𑁂𑀦 𑀧𑀘𑁆𑀙𑀺𑀫𑀓𑀫𑁆𑀧𑀺 𑀬𑁄𑀚𑀺𑀢𑀁. 𑀅𑀫𑀭𑀸 𑀦𑀸𑀫 𑀪𑀯𑁂𑀬𑁆𑀬𑀼𑀁, 𑀓𑀲𑁆𑀫𑀸? 𑀬𑀣𑀸 𑀙𑀦𑁆𑀦𑀁 𑀯𑀢𑁆𑀣𑀽𑀦𑀁 𑀧𑀯𑀢𑁆𑀢𑀺 ¶ , 𑀏𑀯𑀁 𑀢𑀤𑀼𑀧𑁆𑀧𑀸𑀤𑀓𑀓𑀫𑁆𑀫𑁂𑀦𑁂𑀯 𑀪𑀯𑀗𑁆𑀕𑀸𑀤𑀻𑀦𑀜𑁆𑀘 𑀢𑀩𑁆𑀩𑀢𑁆𑀣𑀼𑀓𑀸𑀦𑀁 𑀧𑀯𑀢𑁆𑀢𑀺𑀬𑀸 𑀪𑀯𑀺𑀢𑀩𑁆𑀩𑀦𑁆𑀢𑀺. 𑀦 𑀳𑀺 𑀢𑀁 𑀓𑀸𑀭𑀡𑀁 𑀅𑀢𑁆𑀣𑀺, 𑀬𑁂𑀦 𑀢𑀁 𑀓𑀫𑁆𑀫𑀚𑁂𑀲𑀼 𑀏𑀓𑀘𑁆𑀘𑀁 𑀧𑀯𑀢𑁆𑀢𑁂𑀬𑁆𑀬, 𑀏𑀓𑀘𑁆𑀘𑀁 𑀦 𑀧𑀯𑀢𑁆𑀢𑁂𑀬𑁆𑀬𑀸𑀢𑀺. 𑀢𑀲𑁆𑀫𑀸 𑀆𑀬𑀼𑀉𑀲𑁆𑀫𑀸𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀚𑀻𑀯𑀺𑀢𑀲𑀗𑁆𑀔𑀸𑀭𑀸𑀦𑀁 𑀅𑀦𑀽𑀦𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀫𑀭𑀸 𑀦𑀸𑀫 𑀪𑀯𑁂𑀬𑁆𑀬𑀼’’𑀦𑁆𑀢𑀺.

‘‘𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀅𑀜𑁆𑀜𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀦𑀺𑀭𑀼𑀚𑁆𑀛𑀢𑀺, 𑀞𑀺𑀢𑀺𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀅𑀜𑁆𑀜𑀲𑁆𑀲 𑀞𑀺𑀢𑀺𑀓𑁆𑀔𑀡𑁂, 𑀪𑀗𑁆𑀕𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀅𑀜𑁆𑀜𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀇𑀤𑀁 𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀢𑁆𑀢𑀸 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀢𑁆𑀢𑀦𑁄 𑀧𑀦𑀸𑀥𑀺𑀧𑁆𑀧𑀸𑀬𑀁 𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀦𑀺𑀭𑁄𑀥𑀓𑁆𑀔𑀡𑁂, 𑀞𑀺𑀢𑀺𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀜𑁆𑀘 𑀉𑀧𑁆𑀧𑀸𑀤𑀓𑁆𑀔𑀡𑁂, 𑀪𑀗𑁆𑀕𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀞𑀺𑀢𑀺𑀓𑁆𑀔𑀡𑁂 𑀦𑀺𑀭𑀼𑀚𑁆𑀛𑀢𑀻𑀢𑀺 𑀤𑀻𑀧𑁂𑀢𑀺𑀬𑁂𑀯. 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑁂 ‘‘𑀢𑀁 𑀧𑀦 𑀲𑀢𑁆𑀢𑀭𑀲𑀫𑁂𑀦 𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀦𑀺𑀭𑀼𑀚𑁆𑀛𑀢𑀻’’𑀢𑀺 (𑀯𑀺𑀪. 𑀅𑀝𑁆𑀞. 𑁨𑁬 𑀧𑀓𑀺𑀡𑁆𑀡𑀓𑀓𑀣𑀸) 𑀯𑀼𑀢𑁆𑀢𑀁. 𑀇𑀫𑀸𑀬 𑀧𑀸𑀴𑀺𑀬𑀸 𑀯𑀺𑀭𑀼𑀚𑁆𑀛𑀢𑀺, 𑀓𑀲𑁆𑀫𑀸? 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀲𑁆𑀲𑀧𑀺 𑀲𑀫𑀸𑀦𑀸𑀬𑀼𑀓𑀢𑀸𑀬 𑀪𑀯𑀺𑀢𑀩𑁆𑀩𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸 𑀧𑀦 𑀏𑀢𑁂𑀳𑀺 𑀬𑁄𑀚𑀺𑀢𑀁, 𑀢𑀣𑀸 𑀭𑀽𑀧𑀲𑁆𑀲 𑀏𑀓𑀼𑀧𑁆𑀧𑀸𑀤𑀦𑀸𑀦𑀸𑀦𑀺𑀭𑁄𑀥𑀢𑀸 𑀦𑀸𑀦𑀼𑀧𑁆𑀧𑀸𑀤𑁂𑀓𑀦𑀺𑀭𑁄𑀥𑀢𑀸 𑀘 𑀦𑀢𑁆𑀣𑀺𑀬𑁂𑀯.

𑀬𑀸 𑀧𑀦 𑀏𑀢𑁂𑀳𑀺 𑀭𑀽𑀧𑀲𑁆𑀲 𑀲𑀢𑁆𑀢𑀭𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀢𑀸 𑀯𑀼𑀢𑁆𑀢𑀸, 𑀬𑀸 𑀘 𑀅𑀝𑁆𑀞𑀓𑀣𑀸𑀬𑀁 𑀢𑀢𑀺𑀬𑀪𑀸𑀕𑀸𑀥𑀺𑀓𑀲𑁄𑀴𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀢𑀸, 𑀲𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬𑀁 (𑀯𑀺𑀪. 𑀅𑀝𑁆𑀞. 𑁨𑁨𑁭) 𑀅𑀢𑀻𑀢𑀸𑀭𑀫𑁆𑀫𑀡𑀸𑀬 ¶ 𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁 𑀧𑀝𑀺𑀲𑀦𑁆𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁆𑀢𑀸𑀯𑀢𑀸 𑀏𑀓𑀸𑀤𑀲 𑀘𑀺𑀢𑁆𑀢𑀓𑁆𑀔𑀡𑀸 𑀅𑀢𑀻𑀢𑀸 𑀳𑁄𑀦𑁆𑀢𑀺, 𑀢𑀣𑀸 𑀧𑀜𑁆𑀘𑀤𑀲 𑀘𑀺𑀢𑁆𑀢𑀓𑁆𑀔𑀡𑀸 𑀅𑀢𑀻𑀢𑀸 𑀳𑁄𑀦𑁆𑀢𑀺, 𑀅𑀣𑀸𑀯𑀲𑁂𑀲𑀧𑀜𑁆𑀘𑀘𑀺𑀢𑁆𑀢𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑁂 𑀢𑀲𑁆𑀫𑀺𑀁 𑀬𑁂𑀯𑀸𑀭𑀫𑁆𑀫𑀡𑁂 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀤𑀲𑁆𑀲𑀺𑀢𑁂𑀦 𑀲𑁄𑀴𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀪𑀸𑀯𑁂𑀦 𑀯𑀺𑀭𑀼𑀚𑁆𑀛𑀢𑀺. 𑀦 𑀳𑀺 𑀲𑀓𑁆𑀓𑀸 ‘‘𑀞𑀺𑀢𑀺𑀓𑁆𑀔𑀡𑁂 𑀏𑀯 𑀭𑀽𑀧𑀁 𑀆𑀧𑀸𑀣𑀫𑀸𑀕𑀘𑁆𑀙𑀢𑀻’’𑀢𑀺 𑀯𑀢𑁆𑀢𑀼𑀁. 𑀢𑀣𑀸 𑀳𑀺 𑀲𑀢𑀺 𑀦 𑀭𑀽𑀧𑀲𑁆𑀲 𑀏𑀓𑀸𑀤𑀲 𑀯𑀸 𑀧𑀜𑁆𑀘𑀤𑀲𑁂𑀯 𑀯𑀸 𑀘𑀺𑀢𑁆𑀢𑀓𑁆𑀔𑀡𑀸 𑀅𑀢𑀻𑀢𑀸, 𑀅𑀣 𑀔𑁄 𑀅𑀢𑀺𑀭𑁂𑀓𑀏𑀓𑀸𑀤𑀲𑀧𑀜𑁆𑀘𑀤𑀲𑀘𑀺𑀢𑁆𑀢𑀓𑁆𑀔𑀡𑀸. 𑀢𑀲𑁆𑀫𑀸 𑀬𑀤𑀺𑀧𑀺 𑀧𑀜𑁆𑀘𑀤𑁆𑀯𑀸𑀭𑁂 𑀞𑀺𑀢𑀺𑀧𑁆𑀧𑀢𑁆𑀢𑀫𑁂𑀯 𑀭𑀽𑀧𑀁 𑀧𑀲𑀸𑀤𑀁 𑀖𑀝𑁆𑀝𑁂𑀢𑀻𑀢𑀺 𑀬𑀼𑀚𑁆𑀚𑁂𑀬𑁆𑀬, 𑀫𑀦𑁄𑀤𑁆𑀯𑀸𑀭𑁂 𑀧𑀦 𑀉𑀧𑁆𑀧𑀸𑀤𑀓𑁆𑀔𑀡𑁂𑀧𑀺 𑀆𑀧𑀸𑀣𑀫𑀸𑀕𑀘𑁆𑀙𑀢𑀻𑀢𑀺 𑀇𑀘𑁆𑀙𑀺𑀢𑀩𑁆𑀩𑀫𑁂𑀢𑀁. 𑀦 𑀳𑀺 𑀫𑀦𑁄𑀤𑁆𑀯𑀸𑀭𑁂 𑀅𑀢𑀻𑀢𑀸𑀤𑀻𑀲𑀼 𑀓𑀺𑀜𑁆𑀘𑀺 𑀆𑀧𑀸𑀣𑀁 𑀦𑀸𑀕𑀘𑁆𑀙𑀢𑀻𑀢𑀺. 𑀫𑀦𑁄𑀤𑁆𑀯𑀸𑀭𑁂 𑀘 𑀏𑀯𑀁 𑀯𑀼𑀢𑁆𑀢𑀁 ‘‘𑀏𑀓𑀸𑀤𑀲 𑀘𑀺𑀢𑁆𑀢𑀓𑁆𑀔𑀡𑀸 𑀅𑀢𑀻𑀢𑀸, 𑀅𑀣𑀸𑀯𑀲𑁂𑀲𑀧𑀜𑁆𑀘𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑁂’’𑀢𑀺 (𑀯𑀺𑀪. 𑀅𑀝𑁆𑀞. 𑁨𑁨𑁭).

𑀬𑁄 𑀘𑁂𑀢𑁆𑀣 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀓𑁆𑀔𑀡𑁄 𑀯𑀼𑀢𑁆𑀢𑁄, 𑀲𑁄 𑀘 𑀅𑀢𑁆𑀣𑀺 𑀦𑀢𑁆𑀣𑀻𑀢𑀺 𑀯𑀺𑀘𑀸𑀭𑁂𑀢𑀩𑁆𑀩𑁄. 𑀘𑀺𑀢𑁆𑀢𑀬𑀫𑀓𑁂 (𑀬𑀫. 𑁨.𑀘𑀺𑀢𑁆𑀢𑀬𑀫𑀓.𑁧𑁦𑁨) 𑀳𑀺 ‘‘𑀉𑀧𑁆𑀧𑀦𑁆𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑀦𑁆𑀢𑀺? 𑀪𑀗𑁆𑀕𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁, 𑀦𑁄 ¶ 𑀘 𑀉𑀧𑁆𑀧𑀚𑁆𑀚𑀫𑀸𑀦’’𑀦𑁆𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁, 𑀦 𑀯𑀼𑀢𑁆𑀢𑀁 ‘‘𑀞𑀺𑀢𑀺𑀓𑁆𑀔𑀡𑁂 𑀪𑀗𑁆𑀕𑀓𑁆𑀔𑀡𑁂 𑀘𑀸’’𑀢𑀺. 𑀢𑀣𑀸 ‘‘𑀦𑀼𑀧𑁆𑀧𑀚𑁆𑀚𑀫𑀸𑀦𑀁 𑀦𑀼𑀧𑁆𑀧𑀦𑁆𑀦𑀦𑁆𑀢𑀺? 𑀪𑀗𑁆𑀕𑀓𑁆𑀔𑀡𑁂 𑀦𑀼𑀧𑁆𑀧𑀚𑁆𑀚𑀫𑀸𑀦𑀁, 𑀦𑁄 𑀘 𑀦𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁, 𑀦 𑀯𑀼𑀢𑁆𑀢𑀁 ‘‘𑀞𑀺𑀢𑀺𑀓𑁆𑀔𑀡𑁂 𑀪𑀗𑁆𑀕𑀓𑁆𑀔𑀡𑁂 𑀘𑀸’’𑀢𑀺. 𑀏𑀯𑀁 ‘‘𑀦 𑀦𑀺𑀭𑀼𑀤𑁆𑀥𑀁 𑀦 𑀦𑀺𑀭𑀼𑀚𑁆𑀛𑀫𑀸𑀦𑀁, 𑀦 𑀦𑀺𑀭𑀼𑀚𑁆𑀛𑀫𑀸𑀦𑀁 𑀦 𑀦𑀺𑀭𑀼𑀤𑁆𑀥’’𑀦𑁆𑀢𑀺 𑀏𑀢𑁂𑀲𑀁 𑀧𑀭𑀺𑀧𑀼𑀡𑁆𑀡𑀯𑀺𑀲𑁆𑀲𑀚𑁆𑀚𑀦𑁂 ‘‘𑀉𑀧𑁆𑀧𑀸𑀤𑀓𑁆𑀔𑀡𑁂 𑀅𑀦𑀸𑀕𑀢𑀜𑁆𑀘𑀸’’𑀢𑀺 𑀯𑀢𑁆𑀯𑀸 ‘‘𑀞𑀺𑀢𑀺𑀓𑁆𑀔𑀡𑁂’’𑀢𑀺 𑀅𑀯𑀘𑀦𑀁, 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀯𑀸𑀭𑁂 𑀘 ‘‘𑀪𑀗𑁆𑀕𑀓𑁆𑀔𑀡𑁂 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑀓𑁆𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢’’𑀦𑁆𑀢𑀺 𑀯𑀢𑁆𑀯𑀸 ‘‘𑀞𑀺𑀢𑀺𑀓𑁆𑀔𑀡𑁂’’𑀢𑀺 𑀅𑀯𑀘𑀦𑀁 𑀞𑀺𑀢𑀺𑀓𑁆𑀔𑀡𑀸𑀪𑀸𑀯𑀁 𑀘𑀺𑀢𑁆𑀢𑀲𑁆𑀲 𑀤𑀻𑀧𑁂𑀢𑀺. 𑀲𑀼𑀢𑁆𑀢𑁂𑀲𑀼𑀧𑀺 𑀳𑀺 ‘‘𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀧𑀜𑁆𑀜𑀸𑀬𑀢𑀻’’𑀢𑀺 𑀢𑀲𑁆𑀲𑁂𑀯 (𑀲𑀁. 𑀦𑀺. 𑁩.𑁩𑁮; 𑀅. 𑀦𑀺. 𑁩.𑁪𑁭) 𑀏𑀓𑀲𑁆𑀲 𑀅𑀜𑁆𑀜𑀣𑀢𑁆𑀢𑀸𑀪𑀸𑀯𑀢𑁄 ‘‘𑀬𑀲𑁆𑀲𑀸 𑀅𑀜𑁆𑀜𑀣𑀢𑁆𑀢𑀁 𑀧𑀜𑁆𑀜𑀸𑀬𑀢𑀺, 𑀲𑀸 𑀲𑀦𑁆𑀢𑀢𑀺𑀞𑀺𑀢𑀻’’𑀢𑀺 𑀦 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺, 𑀯𑀺𑀚𑁆𑀚𑀫𑀸𑀦𑀁 𑀯𑀸 𑀔𑀡𑀤𑁆𑀯𑀬𑀲𑀫𑀗𑁆𑀕𑀺𑀁 𑀞𑀺𑀢𑀦𑁆𑀢𑀺.

𑀬𑁄 𑀘𑁂𑀢𑁆𑀣 𑀘𑀺𑀢𑁆𑀢𑀦𑀺𑀭𑁄𑀥𑀓𑁆𑀔𑀡𑁂 𑀭𑀽𑀧𑀼𑀧𑁆𑀧𑀸𑀤𑁄 𑀯𑀼𑀢𑁆𑀢𑁄, 𑀲𑁄 𑀘 𑀯𑀺𑀘𑀸𑀭𑁂𑀢𑀩𑁆𑀩𑁄 ‘‘𑀬𑀲𑁆𑀲 𑀯𑀸 𑀧𑀦 𑀲𑀫𑀼𑀤𑀬𑀲𑀘𑁆𑀘𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀤𑀼𑀓𑁆𑀔𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀦𑁄𑀢𑀺 𑀯𑀼𑀢𑁆𑀢’’𑀦𑁆𑀢𑀺 (𑀬𑀫. 𑁧.𑀲𑀘𑁆𑀘𑀬𑀫𑀓.𑁧𑁩𑁬). 𑀬𑁄 𑀘 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀭𑀽𑀧𑀦𑀺𑀭𑁄𑀥𑁄 𑀯𑀼𑀢𑁆𑀢𑁄, 𑀲𑁄 𑀘 𑀯𑀺𑀘𑀸𑀭𑁂𑀢𑀩𑁆𑀩𑁄 ‘‘𑀬𑀲𑁆𑀲 𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀲 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺? 𑀦𑁄𑀢𑀺𑀆𑀤𑀺 (𑀬𑀫. 𑁩.𑀥𑀫𑁆𑀫𑀬𑀫𑀓.𑁧𑁬𑁩) 𑀯𑀼𑀢𑁆𑀢’’𑀦𑁆𑀢𑀺. 𑀦 𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀫𑁂𑀯 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁 ¶ 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀥𑀺𑀓𑀸𑀭𑀲𑁆𑀲 𑀅𑀪𑀸𑀯𑀸, 𑀅𑀩𑁆𑀬𑀸𑀓𑀢𑀲𑀤𑁆𑀤𑀲𑁆𑀲 𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑁂𑀲𑁆𑀯𑁂𑀯 𑀅𑀧𑁆𑀧𑀯𑀢𑁆𑀢𑀺𑀢𑁄. 𑀬𑀤𑀺 𑀲𑀗𑁆𑀔𑀸𑀭𑀬𑀫𑀓𑁂 𑀓𑀸𑀬𑀲𑀗𑁆𑀔𑀸𑀭𑀲𑁆𑀲 𑀘𑀺𑀢𑁆𑀢𑀲𑀗𑁆𑀔𑀸𑀭𑁂𑀦 𑀲𑀳𑀼𑀧𑁆𑀧𑀸𑀤𑁂𑀓𑀦𑀺𑀭𑁄𑀥𑀯𑀘𑀦𑀢𑁄 𑀅𑀩𑁆𑀬𑀸𑀓𑀢-𑀲𑀤𑁆𑀤𑁂𑀦 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀫𑁂𑀯𑁂𑀢𑁆𑀣 𑀕𑀳𑀺𑀢𑀦𑁆𑀢𑀺 𑀓𑀸𑀭𑀡𑀁 𑀯𑀤𑁂𑀬𑁆𑀬, 𑀢𑀫𑁆𑀧𑀺 𑀅𑀓𑀸𑀭𑀡𑀁. 𑀦 𑀳𑀺 𑀢𑁂𑀦 𑀯𑀘𑀦𑁂𑀦 𑀅𑀜𑁆𑀜𑀭𑀽𑀧𑀸𑀦𑀁 𑀘𑀺𑀢𑁆𑀢𑁂𑀦 𑀲𑀳𑀼𑀧𑁆𑀧𑀸𑀤𑀲𑀳𑀦𑀺𑀭𑁄𑀥𑀧𑀝𑀺𑀓𑁆𑀔𑁂𑀧𑁄 𑀓𑀢𑁄, 𑀦𑀸𑀧𑀺 𑀦𑀸𑀦𑀼𑀧𑁆𑀧𑀸𑀤𑀦𑀸𑀦𑀸𑀦𑀺𑀭𑁄𑀥𑀸𑀦𑀼𑀚𑀸𑀦𑀦𑀁, 𑀦𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀢𑁄 𑀅𑀜𑁆𑀜𑀲𑁆𑀲 𑀅𑀩𑁆𑀬𑀸𑀓𑀢𑀪𑀸𑀯𑀦𑀺𑀯𑀸𑀭𑀡𑀜𑁆𑀘 𑀓𑀢𑀁, 𑀢𑀲𑁆𑀫𑀸 𑀢𑀣𑀸 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀸𑀦𑀼𑀜𑁆𑀜𑀸𑀢𑀸𑀦𑀺𑀯𑀸𑀭𑀺𑀢𑀸𑀩𑁆𑀬𑀸𑀓𑀢𑀪𑀸𑀯𑀸𑀦𑀁 𑀲𑀳𑀼𑀧𑁆𑀧𑀸𑀤𑀲𑀳𑀦𑀺𑀭𑁄𑀥𑀸𑀤𑀺𑀓𑀸𑀦𑀁 𑀓𑀫𑁆𑀫𑀚𑀸𑀤𑀻𑀦𑀁 𑀏𑀢𑁂𑀦 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀦𑀺𑀭𑁄𑀥𑁄 𑀧𑀝𑀺𑀓𑁆𑀔𑀺𑀢𑁆𑀢𑁄𑀢𑀺 𑀦 𑀲𑀓𑁆𑀓𑀸 𑀓𑀫𑁆𑀫𑀚𑀸𑀤𑀻𑀦𑀁 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀦𑀺𑀭𑁄𑀥𑀁 𑀯𑀢𑁆𑀢𑀼𑀁. 𑀬𑀫𑀓𑀧𑀸𑀴𑀺𑀅𑀦𑀼𑀲𑁆𑀲𑀭𑀡𑁂 𑀘 𑀲𑀢𑀺 𑀉𑀧𑁆𑀧𑀸𑀤𑀸𑀦𑀦𑁆𑀢𑀭𑀁 𑀘𑀺𑀢𑁆𑀢𑀲𑁆𑀲 𑀪𑀺𑀚𑁆𑀚𑀫𑀸𑀦𑀢𑀸𑀢𑀺 𑀢𑀲𑁆𑀫𑀺𑀁 𑀔𑀡𑁂 𑀘𑀺𑀢𑁆𑀢𑀁 𑀦 𑀘 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺 𑀯𑀺𑀦𑀲𑁆𑀲𑀫𑀸𑀦𑀢𑁆𑀢𑀸, 𑀦𑀸𑀧𑀺 𑀘 𑀅𑀜𑁆𑀜𑀲𑁆𑀲 𑀭𑀽𑀧𑀲𑀫𑀼𑀝𑁆𑀞𑀸𑀧𑀓𑀲𑁆𑀲 𑀲𑀳𑀸𑀬𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀲𑀳𑀼𑀧𑁆𑀧𑀦𑁆𑀦𑁄 𑀉𑀢𑀼 𑀢𑀤𑀦𑀦𑁆𑀢𑀭𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀬𑁆𑀬. 𑀏𑀯𑀜𑁆𑀘 𑀲𑀢𑀺 𑀭𑀽𑀧𑀸𑀭𑀽𑀧𑀸𑀦𑀁 𑀆𑀤𑀺𑀫𑁆𑀳𑀺 𑀲𑀳 𑀭𑀽𑀧𑀲𑀫𑀼𑀝𑁆𑀞𑀸𑀧𑀦𑀢𑁄 𑀧𑀼𑀩𑁆𑀩𑀸𑀧𑀭𑀢𑁄𑀢𑀺 𑀇𑀤𑀫𑁆𑀧𑀺 𑀦𑀢𑁆𑀣𑀺, 𑀅𑀢𑀺𑀮𑀳𑀼𑀧𑀭𑀺𑀯𑀢𑁆𑀢𑀜𑁆𑀘 ¶ 𑀘𑀺𑀢𑁆𑀢𑀦𑁆𑀢𑀺 𑀬𑁂𑀦 𑀲𑀳𑀼𑀧𑁆𑀧𑀚𑁆𑀚𑀢𑀺, 𑀢𑀁 𑀘𑀺𑀢𑁆𑀢𑀓𑁆𑀔𑀡𑁂 𑀭𑀽𑀧𑀁 𑀉𑀧𑁆𑀧𑀚𑁆𑀚𑀫𑀸𑀦𑀫𑁂𑀯𑀸𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀢𑁂𑀦𑁂𑀯 𑀳𑀺 𑀢𑀁 𑀧𑀝𑀺𑀲𑀦𑁆𑀥𑀺𑀢𑁄 𑀉𑀤𑁆𑀥𑀁 𑀅𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀅𑀢𑁆𑀢𑀦𑀸 𑀲𑀳 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀦 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀤𑀦𑀦𑁆𑀢𑀭𑀜𑁆𑀘 𑀢𑀁 𑀞𑀺𑀢𑀺𑀧𑁆𑀧𑀢𑁆𑀢𑀦𑁆𑀢𑀺 𑀢𑀤𑀦𑀦𑁆𑀢𑀭𑀁 𑀘𑀺𑀢𑁆𑀢𑀁 𑀢𑀲𑁆𑀲 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀲𑀳𑀚𑀸𑀢𑀧𑀘𑁆𑀘𑀬𑁄𑀢𑀺. 𑀬𑀤𑀺 𑀏𑀯𑀁 ‘‘𑀬𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀯𑀘𑀻𑀲𑀗𑁆𑀔𑀸𑀭𑁄 𑀦𑀺𑀭𑀼𑀚𑁆𑀛𑀢𑀻𑀢𑀺? 𑀦𑁄’’𑀢𑀺 (𑀬𑀫. 𑁨.𑀲𑀗𑁆𑀔𑀸𑀭𑀬𑀫𑀓.𑁧𑁨𑁮), 𑀯𑀢𑁆𑀢𑀩𑁆𑀩𑀦𑁆𑀢𑀺 𑀘𑁂? 𑀦, 𑀘𑀺𑀢𑁆𑀢𑀦𑀺𑀭𑁄𑀥𑀓𑁆𑀔𑀡𑁂 𑀭𑀽𑀧𑀼𑀧𑁆𑀧𑀸𑀤𑀸𑀭𑀫𑁆𑀪𑀸𑀪𑀸𑀯𑀢𑁄𑀢𑀺. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀳𑀺 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀏𑀯 𑀭𑀽𑀧𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀳𑁄𑀢𑀺, 𑀘𑀺𑀢𑁆𑀢𑀓𑁆𑀔𑀡𑁂 𑀧𑀦 𑀅𑀯𑀻𑀢𑀺𑀯𑀢𑁆𑀢𑁂 𑀢𑀁 𑀅𑀢𑁆𑀢𑀦𑁄 𑀭𑀽𑀧𑀲𑀫𑀼𑀝𑁆𑀞𑀸𑀧𑀦𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀓𑀺𑀘𑁆𑀘𑀁 𑀦 𑀓𑀭𑁄𑀢𑀺, 𑀅𑀭𑀽𑀧𑀜𑁆𑀘 𑀢𑀲𑁆𑀲 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺 𑀞𑀺𑀢𑀺𑀧𑁆𑀧𑀢𑁆𑀢𑀺𑀯𑀺𑀲𑁂𑀲𑀸𑀮𑀸𑀪𑀁 𑀲𑀦𑁆𑀥𑀸𑀬 𑀧𑀭𑀺𑀬𑀸𑀬𑁂𑀦 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺.

𑀢𑀢𑁄 𑀧𑀭𑀁 𑀧𑀦𑀸𑀢𑀺 𑀏𑀢𑀲𑁆𑀲 ‘‘𑀏𑀢𑁆𑀣 𑀧𑀦 𑀬𑀤𑁂𑀢’’𑀦𑁆𑀢𑀺𑀆𑀤𑀺𑀓𑀸𑀬𑀧𑀺 𑀲𑀗𑁆𑀕𑀳𑀓𑀣𑀸𑀬 𑀦𑀺𑀝𑁆𑀞𑀺𑀢𑀸𑀬 𑀧𑀼𑀭𑀺𑀫𑀓𑀣𑀸𑀬 𑀲𑀦𑁆𑀦𑀺𑀝𑁆𑀞𑀸𑀦𑀢𑁄 ‘‘𑀢𑀢𑁄 𑀧𑀝𑁆𑀞𑀸𑀬 𑀓𑀫𑁆𑀫𑀚𑀭𑀽𑀧𑀧𑀯𑁂𑀡𑀻 𑀦 𑀧𑀯𑀢𑁆𑀢𑀢𑀻’’𑀢𑀺 𑀏𑀢𑁂𑀦 𑀲𑀳 𑀲𑀫𑁆𑀩𑀦𑁆𑀥𑁄𑀢𑀺 𑀘𑀼𑀢𑀺𑀢𑁄 𑀧𑀭𑀦𑁆𑀢𑀺 𑀅𑀢𑁆𑀣𑁄.

𑀭𑀽𑀧𑀁 𑀧𑀦 𑀭𑀽𑀧𑁂𑀦 𑀲𑀳𑀸𑀢𑀺𑀆𑀤𑀺𑀦𑀸 𑀬𑀣𑀸 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁, 𑀢𑀣𑀸 𑀏𑀓𑀼𑀧𑁆𑀧𑀸𑀤𑁂𑀓𑀦𑀺𑀭𑁄𑀥𑀢𑀸 𑀭𑀽𑀧𑀸𑀦𑀁 𑀅𑀭𑀽𑀧𑁂𑀳𑀺, 𑀅𑀭𑀽𑀧𑀸𑀦𑀁 𑀭𑀽𑀧𑁂𑀳𑀺 𑀘 𑀦𑀢𑁆𑀣𑀻𑀢𑀺 𑀓𑀢𑁆𑀯𑀸 𑀭𑀽𑀧𑀸𑀦𑀁 𑀭𑀽𑀧𑁂𑀳𑁂𑀯, 𑀅𑀭𑀽𑀧𑀸𑀦𑀜𑁆𑀘 𑀅𑀭𑀽𑀧𑁂𑀳𑀺 𑀬𑁄𑀚𑀺𑀢𑀸.

𑀲𑀭𑀻𑀭𑀲𑁆𑀲 ¶ 𑀭𑀽𑀧𑀁 𑀅𑀯𑀬𑀯𑀪𑀽𑀢𑀦𑁆𑀢𑀺 𑀅𑀢𑁆𑀣𑁄, 𑀖𑀦𑀪𑀽𑀢𑁄 𑀧𑀼𑀜𑁆𑀚𑀪𑀸𑀯𑁄 𑀖𑀦𑀧𑀼𑀜𑁆𑀚𑀪𑀸𑀯𑁄, 𑀦 𑀢𑀺𑀮𑀫𑀼𑀕𑁆𑀕𑀸𑀤𑀺𑀧𑀼𑀜𑁆𑀚𑀸 𑀯𑀺𑀬 𑀲𑀺𑀣𑀺𑀮𑀲𑀫𑁆𑀩𑀦𑁆𑀥𑀦𑀸𑀦𑀁 𑀧𑀼𑀜𑁆𑀚𑁄𑀢𑀺 𑀅𑀢𑁆𑀣𑁄. 𑀏𑀓𑀼𑀧𑁆𑀧𑀸𑀤𑀸𑀤𑀺𑀢𑀸𑀢𑀺 𑀬𑀣𑀸𑀯𑀼𑀢𑁆𑀢𑁂 𑀢𑀬𑁄 𑀧𑀓𑀸𑀭𑁂 𑀆𑀳.

𑀳𑁂𑀝𑁆𑀞𑀸𑀢𑀺 𑀭𑀽𑀧𑀓𑀡𑁆𑀟𑀯𑀡𑁆𑀡𑀦𑀸𑀬𑀁. 𑀧𑀭𑀺𑀦𑀺𑀧𑁆𑀨𑀦𑁆𑀦𑀸𑀯 𑀳𑁄𑀦𑁆𑀢𑀻𑀢𑀺 𑀯𑀺𑀓𑀸𑀭𑀭𑀽𑀧𑀸𑀤𑀻𑀦𑀜𑁆𑀘 𑀭𑀽𑀧𑀓𑀡𑁆𑀟𑀯𑀡𑁆𑀡𑀦𑀸𑀬𑀁 𑀧𑀭𑀺𑀦𑀺𑀧𑁆𑀨𑀦𑁆𑀦𑀢𑀸𑀧𑀭𑀺𑀬𑀸𑀬𑁄 𑀯𑀼𑀢𑁆𑀢𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀧𑀭𑀺𑀦𑀺𑀧𑁆𑀨𑀦𑁆𑀦𑀦𑀺𑀧𑁆𑀨𑀦𑁆𑀦𑀸𑀦𑀁 𑀓𑁄 𑀯𑀺𑀲𑁂𑀲𑁄𑀢𑀺? 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀧𑀭𑀺𑀘𑁆𑀙𑀺𑀦𑁆𑀦𑁄 𑀧𑀘𑁆𑀘𑀬𑁂𑀳𑀺 𑀦𑀺𑀧𑁆𑀨𑀸𑀤𑀺𑀢𑁄 𑀢𑀺𑀮𑀓𑁆𑀔𑀡𑀸𑀳𑀢𑁄 𑀲𑀪𑀸𑀯𑀥𑀫𑁆𑀫𑁄 𑀧𑀭𑀺𑀦𑀺𑀧𑁆𑀨𑀦𑁆𑀦𑁄, 𑀦𑀺𑀧𑁆𑀨𑀦𑁆𑀦𑁄 𑀧𑀦 𑀅𑀲𑀪𑀸𑀯𑀥𑀫𑁆𑀫𑁄𑀧𑀺 𑀳𑁄𑀢𑀺 𑀦𑀸𑀫𑀕𑁆𑀕𑀳𑀡𑀲𑀫𑀸𑀧𑀚𑁆𑀚𑀦𑀸𑀤𑀺𑀯𑀲𑁂𑀦 𑀦𑀺𑀧𑁆𑀨𑀸𑀤𑀺𑀬𑀫𑀸𑀦𑁄𑀢𑀺. 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀧𑀦𑀸𑀢𑀺 𑀏𑀢𑁂𑀦 𑀲𑀩𑁆𑀩𑀫𑁆𑀧𑀺 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺𑀁 𑀢𑀤𑁂𑀓𑀤𑁂𑀲𑁂𑀦 𑀤𑀲𑁆𑀲𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀫𑀸𑀤𑀺𑀯𑀺𑀦𑀺𑀘𑁆𑀙𑀬𑀓𑀣𑀸𑀯𑀡𑁆𑀡𑀦𑀸

𑀤𑀲𑁆𑀲𑀦𑁂𑀦 ¶ 𑀧𑀳𑀸𑀢𑀩𑁆𑀩𑀸𑀢𑀺𑀆𑀤𑀺𑀦𑀸 𑀧𑀞𑀫𑀁 𑀧𑀳𑀸𑀢𑀩𑁆𑀩𑀸 𑀧𑀞𑀫𑀁 𑀯𑀼𑀢𑁆𑀢𑀸, 𑀤𑀼𑀢𑀺𑀬𑀁 𑀧𑀳𑀸𑀢𑀩𑁆𑀩𑀸 𑀤𑀼𑀢𑀺𑀬𑀦𑁆𑀢𑀺 𑀅𑀬𑀁 𑀧𑀳𑀸𑀦𑀓𑁆𑀓𑀫𑁄. 𑀅𑀦𑀼𑀧𑀼𑀩𑁆𑀩𑀧𑀡𑀻𑀢𑀸 𑀪𑀽𑀫𑀺𑀬𑁄 𑀅𑀦𑀼𑀧𑀼𑀩𑁆𑀩𑁂𑀦 𑀯𑀯𑀢𑁆𑀣𑀺𑀢𑀸𑀢𑀺 𑀢𑀸𑀲𑀁 𑀯𑀲𑁂𑀦 𑀤𑁂𑀲𑀦𑀸𑀬 𑀪𑀽𑀫𑀺𑀓𑁆𑀓𑀫𑁄. ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺𑀆𑀤𑀺𑀓𑁄 (𑀲𑀁. 𑀦𑀺. 𑁫.𑁩𑁭𑁨, 𑁩𑁮𑁨, 𑁩𑁮𑁩; 𑀯𑀺𑀪. 𑁩𑁫𑁫) 𑀏𑀓𑀓𑁆𑀔𑀡𑁂𑀧𑀺 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀲𑀫𑁆𑀪𑀯𑀢𑁄 𑀤𑁂𑀲𑀦𑀸𑀓𑁆𑀓𑀫𑁄𑀯. 𑀤𑀸𑀦𑀓𑀣𑀸𑀤𑀬𑁄 𑀅𑀦𑀼𑀧𑀼𑀩𑁆𑀩𑀼𑀓𑁆𑀓𑀁𑀲𑀢𑁄 𑀓𑀣𑀺𑀢𑀸, 𑀉𑀧𑁆𑀧𑀢𑁆𑀢𑀺𑀆𑀤𑀺𑀯𑀯𑀢𑁆𑀣𑀸𑀦𑀸𑀪𑀸𑀯𑀢𑁄 𑀧𑀦 𑀤𑀸𑀦𑀸𑀤𑀻𑀦𑀁 𑀇𑀥 𑀤𑁂𑀲𑀦𑀸𑀓𑁆𑀓𑀫𑀯𑀘𑀦𑀁. 𑀤𑁂𑀲𑀦𑀸𑀓𑁆𑀓𑀫𑁄𑀢𑀺 𑀘 𑀬𑀣𑀸𑀯𑀼𑀢𑁆𑀢𑀯𑀯𑀢𑁆𑀣𑀸𑀦𑀸𑀪𑀸𑀯𑀢𑁄 𑀅𑀦𑁂𑀓𑁂𑀲𑀁 𑀯𑀘𑀦𑀸𑀦𑀁 𑀲𑀳 𑀧𑀯𑀢𑁆𑀢𑀺𑀬𑀸 𑀅𑀲𑀫𑁆𑀪𑀯𑀢𑁄 𑀬𑁂𑀦 𑀓𑁂𑀦𑀘𑀺 𑀧𑀼𑀩𑁆𑀩𑀸𑀧𑀭𑀺𑀬𑁂𑀦 𑀤𑁂𑀲𑁂𑀢𑀩𑁆𑀩𑀢𑁆𑀢𑀸 𑀢𑁂𑀦 𑀢𑁂𑀦𑀸𑀥𑀺𑀧𑁆𑀧𑀸𑀬𑁂𑀦 𑀤𑁂𑀲𑀦𑀸𑀫𑀢𑁆𑀢𑀲𑁆𑀲𑁂𑀯 𑀓𑀫𑁄 𑀯𑀼𑀘𑁆𑀘𑀢𑀺. 𑀅𑀪𑁂𑀤𑁂𑀦 𑀳𑀻𑀢𑀺 𑀭𑀽𑀧𑀸𑀤𑀻𑀦𑀁 𑀪𑁂𑀤𑀁 𑀅𑀓𑀢𑁆𑀯𑀸 𑀧𑀺𑀡𑁆𑀟𑀕𑁆𑀕𑀳𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀘𑀓𑁆𑀔𑀼𑀆𑀤𑀻𑀦𑀫𑁆𑀧𑀺 𑀯𑀺𑀲𑀬𑀪𑀽𑀢𑀦𑁆𑀢𑀺 𑀏𑀓𑀤𑁂𑀲𑁂𑀦 𑀭𑀽𑀧𑀓𑁆𑀔𑀦𑁆𑀥𑀁 𑀲𑀫𑀼𑀤𑀸𑀬𑀪𑀽𑀢𑀁 𑀯𑀤𑀢𑀺. 𑀏𑀯𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀙𑀤𑁆𑀯𑀸𑀭𑀸𑀥𑀺𑀧𑀢𑀺 𑀭𑀸𑀚𑀸’’𑀢𑀺 (𑀥. 𑀧. 𑀅𑀝𑁆𑀞. 𑁨.𑀏𑀭𑀓𑀧𑀢𑁆𑀢𑀦𑀸𑀕𑀭𑀸𑀚𑀯𑀢𑁆𑀣𑀼) ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸’’𑀢𑀺 (𑀥. 𑀧. 𑁧-𑁨) 𑀘 𑀯𑀘𑀦𑀢𑁄 𑀯𑀺𑀜𑁆𑀜𑀸𑀡𑀁 𑀅𑀥𑀺𑀧𑀢𑀺.

𑀭𑀽𑀧𑀓𑁆𑀔𑀦𑁆𑀥𑁂 ¶ ‘‘𑀲𑀸𑀲𑀯𑀁 𑀉𑀧𑀸𑀤𑀸𑀦𑀺𑀬’’𑀦𑁆𑀢𑀺 𑀯𑀘𑀦𑀁 𑀅𑀦𑀸𑀲𑀯𑀸𑀦𑀁 𑀥𑀫𑁆𑀫𑀸𑀦𑀁 𑀲𑀩𑁆𑀪𑀸𑀯𑀢𑁄 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀢𑀁𑀲𑀪𑀸𑀯𑀢𑀸𑀦𑀺𑀯𑀢𑁆𑀢𑀦𑀢𑁆𑀣𑀁, 𑀦 𑀅𑀦𑀸𑀲𑀯𑀭𑀽𑀧𑀦𑀺𑀯𑀢𑁆𑀢𑀦𑀢𑁆𑀣𑀦𑁆𑀢𑀺. 𑀅𑀦𑀸𑀲𑀯𑀸𑀯 𑀔𑀦𑁆𑀥𑁂𑀲𑀼 𑀯𑀼𑀢𑁆𑀢𑀸𑀢𑀺 𑀏𑀢𑁆𑀣 𑀅𑀝𑁆𑀞𑀸𑀦𑀧𑁆𑀧𑀬𑀼𑀢𑁆𑀢𑁄 𑀏𑀯-𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄, 𑀅𑀦𑀸𑀲𑀯𑀸 𑀔𑀦𑁆𑀥𑁂𑀲𑁆𑀯𑁂𑀯 𑀯𑀼𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀲𑀩𑁆𑀩𑀲𑀗𑁆𑀔𑀢𑀸𑀦𑀁 𑀲𑀪𑀸𑀕𑁂𑀦 𑀏𑀓𑀚𑁆𑀛𑀁 𑀲𑀗𑁆𑀕𑀳𑁄 𑀲𑀩𑁆𑀩𑀲𑀗𑁆𑀔𑀢𑀲𑀪𑀸𑀕𑁂𑀓𑀲𑀗𑁆𑀕𑀳𑁄. 𑀲𑀪𑀸𑀕𑀲𑀪𑀸𑀕𑁂𑀦 𑀳𑀺 𑀲𑀗𑁆𑀕𑀬𑁆𑀳𑀫𑀸𑀦𑀸 𑀲𑀩𑁆𑀩𑀲𑀗𑁆𑀔𑀢𑀸 𑀨𑀲𑁆𑀲𑀸𑀤𑀬𑁄 𑀧𑀜𑁆𑀘𑀓𑁆𑀔𑀦𑁆𑀥𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀭𑀼𑀧𑁆𑀧𑀦𑀸𑀤𑀺𑀲𑀸𑀫𑀜𑁆𑀜𑁂𑀦 𑀲𑀫𑀸𑀦𑀓𑁄𑀝𑁆𑀞𑀸𑀲𑀸 ‘‘𑀲𑀪𑀸𑀕𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀲𑀼 𑀲𑀗𑁆𑀔𑀢𑀸𑀪𑀺𑀲𑀗𑁆𑀔𑀭𑀡𑀓𑀺𑀘𑁆𑀘𑀁 𑀆𑀬𑀽𑀳𑀦𑀭𑀲𑀸𑀬 𑀘𑁂𑀢𑀦𑀸𑀬 𑀩𑀮𑀯𑀦𑁆𑀢𑀺 𑀲𑀸 ‘‘𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄’’𑀢𑀺 𑀯𑀼𑀢𑁆𑀢𑀸, 𑀅𑀜𑁆𑀜𑁂 𑀘 𑀭𑀼𑀧𑁆𑀧𑀦𑀸𑀤𑀺𑀯𑀺𑀲𑁂𑀲𑀮𑀓𑁆𑀔𑀡𑀭𑀳𑀺𑀢𑀸 𑀨𑀲𑁆𑀲𑀸𑀤𑀬𑁄 𑀲𑀗𑁆𑀔𑀢𑀸𑀪𑀺𑀲𑀗𑁆𑀔𑀭𑀡𑀲𑀸𑀫𑀜𑁆𑀜𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀨𑀼𑀲𑀦𑀸𑀤𑀬𑁄 𑀧𑀦 𑀲𑀪𑀸𑀯𑀸 𑀯𑀺𑀲𑀼𑀁 𑀔𑀦𑁆𑀥-𑀲𑀤𑁆𑀤𑀯𑀘𑀦𑀻𑀬𑀸 𑀦 𑀳𑁄𑀦𑁆𑀢𑀻𑀢𑀺 𑀥𑀫𑁆𑀫𑀲𑀪𑀸𑀯𑀯𑀺𑀜𑁆𑀜𑀼𑀦𑀸 𑀢𑀣𑀸𑀕𑀢𑁂𑀦 𑀨𑀲𑁆𑀲𑀔𑀦𑁆𑀥𑀸𑀤𑀬𑁄 𑀦 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸𑀢𑀺. ‘‘𑀬𑁂 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀲𑀲𑁆𑀲𑀢𑀯𑀸𑀤𑀸 𑀲𑀲𑁆𑀲𑀢𑀁 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺 𑀅𑀢𑁆𑀢𑀸𑀦𑀜𑁆𑀘, 𑀲𑀩𑁆𑀩𑁂 𑀢𑁂 𑀇𑀫𑁂𑀬𑁂𑀯 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀦𑀺𑀲𑁆𑀲𑀸𑀬 𑀧𑀝𑀺𑀘𑁆𑀘, 𑀏𑀢𑁂𑀲𑀁 𑀯𑀸 𑀅𑀜𑁆𑀜𑀢𑀭’’𑀦𑁆𑀢𑀺𑀆𑀤𑀻𑀦𑀜𑁆𑀘 𑀲𑀼𑀢𑁆𑀢𑀸𑀦𑀁 𑀯𑀲𑁂𑀦 𑀅𑀢𑁆𑀢𑀢𑁆𑀢𑀦𑀺𑀬𑀕𑀸𑀳𑀯𑀢𑁆𑀣𑀼𑀲𑁆𑀲 𑀏𑀢𑀧𑀭𑀫𑀢𑀸 𑀤𑀝𑁆𑀞𑀩𑁆𑀩𑀸, 𑀏𑀢𑁂𑀦 𑀘 𑀯𑀓𑁆𑀔𑀫𑀸𑀦𑀲𑀼𑀢𑁆𑀢𑀯𑀲𑁂𑀦 𑀘 𑀔𑀦𑁆𑀥𑁂 𑀏𑀯 𑀦𑀺𑀲𑁆𑀲𑀸𑀬 ¶ 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀤𑀺𑀯𑀲𑁂𑀦 𑀦 𑀯𑀢𑁆𑀢𑀩𑁆𑀩𑀸 𑀘 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺, 𑀔𑀦𑁆𑀥𑀦𑀺𑀩𑁆𑀩𑀸𑀦𑀯𑀚𑁆𑀚𑀲𑁆𑀲 𑀲𑀪𑀸𑀯𑀥𑀫𑁆𑀫𑀲𑁆𑀲 𑀅𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀜𑁆𑀜𑁂𑀲𑀜𑁆𑀘 𑀔𑀦𑁆𑀥-𑀲𑀤𑁆𑀤𑀯𑀘𑀦𑀻𑀬𑀸𑀦𑀁 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀦𑀁 𑀲𑀩𑁆𑀪𑀸𑀯𑀢𑁄 𑀦 𑀧𑀜𑁆𑀘𑁂𑀯𑀸𑀢𑀺 𑀏𑀢𑀁 𑀘𑁄𑀤𑀦𑀁 𑀦𑀺𑀯𑀢𑁆𑀢𑁂𑀢𑀼𑀫𑀸𑀳 ‘‘𑀅𑀜𑁆𑀜𑁂𑀲𑀜𑁆𑀘 𑀢𑀤𑀯𑀭𑁄𑀥𑀢𑁄’’𑀢𑀺.

𑀤𑀼𑀓𑁆𑀔𑀤𑀼𑀓𑁆𑀔𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀯𑀲𑁂𑀦 𑀯𑁂𑀤𑀦𑀸𑀬 𑀆𑀩𑀸𑀥𑀓𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀭𑀸𑀕𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀯𑀺𑀧𑀭𑀺𑀡𑀸𑀫𑀸𑀤𑀺𑀤𑀼𑀓𑁆𑀔𑀲𑁆𑀲 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀆𑀓𑀸𑀭𑀕𑁆𑀕𑀸𑀳𑀺𑀓𑀸 𑀢𑀁𑀢𑀁𑀲𑀗𑁆𑀓𑀧𑁆𑀧𑀫𑀽𑀮𑀪𑀽𑀢𑀸 𑀲𑀜𑁆𑀜𑀸 𑀲𑀫𑀼𑀝𑁆𑀞𑀸𑀦𑀁. 𑀭𑁄𑀕𑀲𑁆𑀲 𑀧𑀺𑀢𑁆𑀢𑀸𑀤𑀻𑀦𑀺 𑀯𑀺𑀬 𑀆𑀲𑀦𑁆𑀦𑀓𑀸𑀭𑀡𑀁 𑀲𑀫𑀼𑀝𑁆𑀞𑀸𑀦𑀁, 𑀉𑀢𑀼𑀪𑁄𑀚𑀦𑀯𑁂𑀲𑀫𑀸𑀤𑀻𑀦𑀺 𑀯𑀺𑀬 𑀫𑀽𑀮𑀓𑀸𑀭𑀡𑀁 𑀦𑀺𑀤𑀸𑀦𑀁. ‘‘𑀘𑀺𑀢𑁆𑀢𑀲𑁆𑀲𑀗𑁆𑀕𑀪𑀽𑀢𑀸 𑀘𑁂𑀢𑀲𑀺𑀓𑀸’’𑀢𑀺 𑀘𑀺𑀢𑁆𑀢𑀁 𑀕𑀺𑀮𑀸𑀦𑀽𑀧𑀫𑀁 𑀯𑀼𑀢𑁆𑀢𑀁, 𑀲𑀼𑀔𑀲𑀜𑁆𑀜𑀸𑀤𑀺𑀯𑀲𑁂𑀦 𑀯𑁂𑀤𑀦𑀸𑀓𑀸𑀭𑀡𑀸𑀬 𑀳𑁂𑀢𑀼𑀪𑀸𑀯𑀢𑁄 𑀯𑁂𑀤𑀦𑀸𑀪𑁄𑀚𑀦𑀲𑁆𑀲 𑀙𑀸𑀤𑀸𑀧𑀦𑀢𑁄 𑀘 𑀲𑀜𑁆𑀜𑀸 𑀅𑀧𑀭𑀸𑀥𑀽𑀧𑀫𑀸 𑀩𑁆𑀬𑀜𑁆𑀚𑀦𑀽𑀧𑀫𑀸 𑀘, ‘‘𑀧𑀜𑁆𑀘 𑀯𑀥𑀓𑀸 𑀧𑀘𑁆𑀘𑀢𑁆𑀣𑀺𑀓𑀸𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀦𑁆𑀦𑁂𑀢𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀆𑀲𑀺𑀯𑀺𑀲𑀽𑀧𑀫𑁂 (𑀲𑀁. 𑀦𑀺. 𑁪.𑁨𑁩𑁮) 𑀯𑀥𑀓𑀸𑀢𑀺 𑀯𑀼𑀢𑁆𑀢𑀸, ‘‘𑀪𑀸𑀭𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀦𑁆𑀦𑁂𑀢𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀪𑀸𑀭𑀲𑀼𑀢𑁆𑀢𑁂 (𑀲𑀁. 𑀦𑀺. 𑁩.𑁨𑁨) 𑀪𑀸𑀭𑀸𑀢𑀺, ‘‘𑀅𑀢𑀻𑀢𑀁𑀧𑀸𑀳𑀁 𑀅𑀤𑁆𑀥𑀸𑀦𑀁 𑀭𑀽𑀧𑁂𑀦 𑀔𑀚𑁆𑀚𑀺𑀁, 𑀲𑁂𑀬𑁆𑀬𑀣𑀸𑀧𑀸𑀳𑀁 𑀏𑀢𑀭𑀳𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀭𑀽𑀧𑁂𑀦 𑀔𑀚𑁆𑀚𑀸𑀫𑀺, 𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀅𑀦𑀸𑀕𑀢𑀁 𑀭𑀽𑀧𑀁 𑀅𑀪𑀺𑀦𑀦𑁆𑀤𑁂𑀬𑁆𑀬𑀁, 𑀅𑀦𑀸𑀕𑀢𑁂𑀦𑀧𑀸𑀳𑀁 𑀭𑀽𑀧𑁂𑀦 𑀔𑀚𑁆𑀚𑁂𑀬𑁆𑀬𑀁. 𑀲𑁂𑀬𑁆𑀬𑀣𑀸𑀧𑁂𑀢𑀭𑀳𑀺 𑀔𑀚𑁆𑀚𑀸𑀫𑀻’’𑀢𑀺𑀆𑀤𑀺𑀦𑀸 𑀔𑀚𑁆𑀚𑀦𑀻𑀬𑀧𑀭𑀺𑀬𑀸𑀬𑁂𑀦 (𑀲𑀁. 𑀦𑀺. 𑁩.𑁭𑁯) 𑀔𑀸𑀤𑀓𑀸𑀢𑀺 ¶ , ‘‘𑀲𑁄 𑀅𑀦𑀺𑀘𑁆𑀘𑀁 𑀭𑀽𑀧𑀁 ‘𑀅𑀦𑀺𑀘𑁆𑀘𑀁 𑀭𑀽𑀧’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 𑀬𑀫𑀓𑀲𑀼𑀢𑁆𑀢𑁂 (𑀲𑀁. 𑀦𑀺. 𑁩.𑁮𑁫) 𑀅𑀦𑀺𑀘𑁆𑀘𑀸𑀤𑀺𑀓𑀸𑀢𑀺. 𑀬𑀤𑀺𑀧𑀺 𑀇𑀫𑀲𑁆𑀫𑀺𑀁 𑀯𑀺𑀪𑀗𑁆𑀕𑁂 𑀅𑀯𑀺𑀲𑁂𑀲𑁂𑀦 𑀔𑀦𑁆𑀥𑀸 𑀯𑀼𑀢𑁆𑀢𑀸, 𑀩𑀸𑀳𑀼𑀮𑁆𑀮𑁂𑀦 𑀧𑀦 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀢𑀤𑀦𑁆𑀢𑁄𑀕𑀥𑀸𑀦𑀁 𑀤𑀝𑁆𑀞𑀩𑁆𑀩𑀢𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀤𑁂𑀲𑀺𑀢𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸𑀢𑀺 𑀤𑁂𑀲𑀺𑀢𑀁 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸, 𑀤𑁂𑀲𑀺𑀢𑀸𑀦𑀺 𑀯𑀸. 𑀕𑀸𑀣𑀸𑀲𑀼𑀔𑀢𑁆𑀣𑀁 𑀅𑀦𑀼𑀦𑀸𑀲𑀺𑀓𑀮𑁄𑀧𑁄, 𑀦𑀺𑀓𑀸𑀭𑀮𑁄𑀧𑁄 𑀯𑀸 𑀓𑀢𑁄.

𑀕𑀳𑁂𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀕𑀳𑁂𑀢𑀼𑀁 𑀦 𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀭𑀽𑀧𑁂𑀦 𑀲𑀡𑁆𑀞𑀸𑀦𑁂𑀦 𑀨𑀮𑀓𑀲𑀤𑀺𑀲𑁄 𑀤𑀺𑀲𑁆𑀲𑀫𑀸𑀦𑁄 𑀔𑀭𑀪𑀸𑀯𑀸𑀪𑀸𑀯𑀸 𑀨𑀮𑀓𑀓𑀺𑀘𑁆𑀘𑀁 𑀦 𑀓𑀭𑁄𑀢𑀻𑀢𑀺 ‘‘𑀦 𑀲𑀓𑁆𑀓𑀸 𑀢𑀁 𑀕𑀳𑁂𑀢𑁆𑀯𑀸 𑀨𑀮𑀓𑀁 𑀯𑀸 𑀆𑀲𑀦𑀁 𑀯𑀸 𑀓𑀸𑀢𑀼’’𑀦𑁆𑀢𑀺 𑀆𑀳. 𑀦 𑀢𑀣𑀸 𑀢𑀺𑀝𑁆𑀞𑀢𑀻𑀢𑀺 𑀦𑀺𑀘𑁆𑀘𑀸𑀤𑀺𑀓𑀸 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄, 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀯𑀸 𑀦𑀺𑀘𑁆𑀘𑀸𑀤𑀺𑀕𑁆𑀕𑀳𑀡𑀯𑀲𑁂𑀦 𑀉𑀧𑁆𑀧𑀸𑀤𑀸𑀤𑀺𑀅𑀦𑀦𑁆𑀢𑀭𑀁 𑀪𑀺𑀚𑁆𑀚𑀦𑀢𑁄 𑀕𑀳𑀺𑀢𑀸𑀓𑀸𑀭𑀸 𑀳𑀼𑀢𑁆𑀯𑀸 𑀦 𑀢𑀺𑀝𑁆𑀞𑀢𑀻𑀢𑀺 𑀅𑀢𑁆𑀣𑁄. 𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑁆𑀬𑀸𑀢𑀺 𑀇𑀤𑀁 ¶ 𑀦 𑀕𑀡𑀦𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀁, 𑀩𑀳𑀼𑀪𑀸𑀯𑀤𑀲𑁆𑀲𑀦𑀫𑁂𑀯 𑀧𑀦𑁂𑀢𑀁 𑀤𑀝𑁆𑀞𑀩𑁆𑀩𑀁. 𑀉𑀤𑀓𑀚𑀮𑁆𑀮𑀓𑀦𑁆𑀢𑀺 𑀉𑀤𑀓𑀮𑀲𑀺𑀓𑀁. 𑀬𑀣𑀸 𑀉𑀤𑀓𑀢𑀮𑁂 𑀩𑀺𑀦𑁆𑀤𑀼𑀦𑀺𑀧𑀸𑀢𑀚𑀦𑀺𑀢𑁄 𑀯𑀸𑀢𑁄 𑀉𑀤𑀓𑀚𑀮𑁆𑀮𑀓𑀁 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀧𑀼𑀝𑀁 𑀓𑀢𑁆𑀯𑀸 𑀧𑀼𑀧𑁆𑀨𑀼𑀴𑀁 𑀦𑀸𑀫 𑀓𑀭𑁄𑀢𑀺, 𑀏𑀯𑀁 𑀯𑀢𑁆𑀣𑀼𑀫𑁆𑀳𑀺 𑀆𑀭𑀫𑁆𑀫𑀡𑀸𑀧𑀸𑀣𑀕𑀫𑀦𑀚𑀦𑀺𑀢𑁄 𑀨𑀲𑁆𑀲𑁄 𑀅𑀦𑀼𑀧𑀘𑁆𑀙𑀺𑀦𑁆𑀦𑀁 𑀓𑀺𑀮𑁂𑀲𑀚𑀮𑁆𑀮𑀁 𑀲𑀳𑀓𑀸𑀭𑀻𑀧𑀘𑁆𑀘𑀬𑀦𑁆𑀢𑀭𑀪𑀸𑀯𑁂𑀦 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀯𑁂𑀤𑀦𑀁 𑀦𑀸𑀫 𑀓𑀭𑁄𑀢𑀺. 𑀇𑀤𑀜𑁆𑀘 𑀓𑀺𑀮𑁂𑀲𑁂𑀳𑀺 𑀫𑀽𑀮𑀓𑀸𑀭𑀡𑀪𑀽𑀢𑁂𑀳𑀺 𑀆𑀭𑀫𑁆𑀫𑀡𑀲𑁆𑀲𑀸𑀤𑀦𑀪𑀽𑀢𑁂𑀳𑀺 𑀘 𑀦𑀺𑀩𑁆𑀩𑀢𑁆𑀢𑀁 𑀯𑀝𑁆𑀝𑀕𑀢𑀯𑁂𑀤𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀯𑀸 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀯𑀼𑀢𑁆𑀢𑀸, 𑀊𑀦𑁂𑀳𑀺𑀧𑀺 𑀧𑀦 𑀉𑀧𑁆𑀧𑀚𑁆𑀚𑀢𑁂𑀯.

𑀦𑀸𑀦𑀸𑀮𑀓𑁆𑀔𑀡𑁄𑀢𑀺 𑀯𑀡𑁆𑀡𑀕𑀦𑁆𑀥𑀭𑀲𑀨𑀲𑁆𑀲𑀸𑀤𑀻𑀳𑀺 𑀦𑀸𑀦𑀸𑀲𑀪𑀸𑀯𑁄. 𑀫𑀸𑀬𑀸𑀬 𑀤𑀲𑁆𑀲𑀺𑀢𑀁 𑀭𑀽𑀧𑀁 ‘‘𑀫𑀸𑀬𑀸’’𑀢𑀺 𑀆𑀳. 𑀧𑀜𑁆𑀘𑀧𑀺 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀅𑀲𑀼𑀪𑀸𑀤𑀺𑀲𑀪𑀸𑀯𑀸 𑀏𑀯 𑀓𑀺𑀮𑁂𑀲𑀸𑀲𑀼𑀘𑀺𑀯𑀢𑁆𑀣𑀼𑀪𑀸𑀯𑀸𑀤𑀺𑀢𑁄𑀢𑀺 𑀅𑀲𑀼𑀪𑀸𑀤𑀺𑀢𑁄 𑀤𑀝𑁆𑀞𑀩𑁆𑀩𑀸 𑀏𑀯. 𑀢𑀣𑀸𑀧𑀺 𑀓𑀢𑁆𑀣𑀘𑀺 𑀓𑁄𑀘𑀺 𑀯𑀺𑀲𑁂𑀲𑁄 𑀲𑀼𑀔𑀕𑁆𑀕𑀳𑀡𑀻𑀬𑁄 𑀳𑁄𑀢𑀻𑀢𑀺 𑀆𑀳 ‘‘𑀯𑀺𑀲𑁂𑀲𑀢𑁄 𑀘𑀸’’𑀢𑀺𑀆𑀤𑀺. 𑀢𑀢𑁆𑀣 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀘𑀢𑀼𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑀓𑀭𑀸𑀢𑀺 𑀢𑁂𑀲𑀁 𑀕𑁄𑀘𑀭𑀪𑀸𑀯𑁂𑀦 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀲𑀼 𑀅𑀲𑀼𑀪𑀸𑀤𑀺𑀯𑀲𑁂𑀦 𑀤𑀝𑁆𑀞𑀩𑁆𑀩𑀢𑀸 𑀯𑀼𑀢𑁆𑀢𑀸.

𑀔𑀦𑁆𑀥𑁂𑀳𑀺 𑀦 𑀯𑀺𑀳𑀜𑁆𑀜𑀢𑀺 𑀧𑀭𑀺𑀯𑀺𑀤𑀺𑀢𑀲𑀪𑀸𑀯𑀢𑁆𑀢𑀸. 𑀯𑀺𑀧𑀲𑁆𑀲𑀓𑁄𑀧𑀺 𑀳𑀺 𑀢𑁂𑀲𑀁 𑀯𑀺𑀧𑀢𑁆𑀢𑀺𑀬𑀁 𑀦 𑀤𑀼𑀓𑁆𑀔𑀫𑀸𑀧𑀚𑁆𑀚𑀢𑀺, 𑀔𑀻𑀡𑀸𑀲𑀯𑁂𑀲𑀼 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀢𑁂 𑀳𑀺 𑀆𑀬𑀢𑀺𑀫𑁆𑀧𑀺 𑀔𑀦𑁆𑀥𑁂𑀳𑀺 𑀦 𑀩𑀸𑀥𑀻𑀬𑀦𑁆𑀢𑀻𑀢𑀺 ¶ . 𑀓𑀩𑀴𑀻𑀓𑀸𑀭𑀸𑀳𑀸𑀭𑀁 𑀧𑀭𑀺𑀚𑀸𑀦𑀸𑀢𑀻𑀢𑀺 ‘‘𑀆𑀳𑀸𑀭𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄’’𑀢𑀺 (𑀲𑀁. 𑀦𑀺. 𑁩.𑁫𑁬-𑁫𑁭) 𑀯𑀼𑀢𑁆𑀢𑀢𑁆𑀢𑀸 𑀅𑀚𑁆𑀛𑀢𑁆𑀢𑀺𑀓𑀭𑀽𑀧𑁂 𑀙𑀦𑁆𑀤𑀭𑀸𑀕𑀁 𑀧𑀚𑀳𑀦𑁆𑀢𑁄 𑀢𑀲𑁆𑀲 𑀲𑀫𑀼𑀤𑀬𑀪𑀽𑀢𑁂 𑀓𑀩𑀴𑀻𑀓𑀸𑀭𑀸𑀳𑀸𑀭𑁂𑀧𑀺 𑀙𑀦𑁆𑀤𑀭𑀸𑀕𑀁 𑀧𑀚𑀳𑀢𑀻𑀢𑀺 𑀅𑀢𑁆𑀣𑁄, 𑀅𑀬𑀁 𑀧𑀳𑀸𑀦𑀧𑀭𑀺𑀜𑁆𑀜𑀸. 𑀅𑀚𑁆𑀛𑀢𑁆𑀢𑀺𑀓𑀭𑀽𑀧𑀁 𑀧𑀦 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀢𑀲𑁆𑀲 𑀧𑀘𑁆𑀘𑀬𑀪𑀽𑀢𑀁 𑀓𑀩𑀴𑀻𑀓𑀸𑀭𑀸𑀳𑀸𑀭𑀫𑁆𑀧𑀺 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀜𑀸𑀢𑀧𑀭𑀺𑀜𑁆𑀜𑀸. 𑀢𑀲𑁆𑀲 𑀘 𑀉𑀤𑀬𑀯𑀬𑀸𑀦𑀼𑀧𑀲𑁆𑀲𑀻 𑀳𑁄𑀢𑀻𑀢𑀺 𑀢𑀻𑀭𑀡𑀧𑀭𑀺𑀜𑁆𑀜𑀸 𑀘 𑀬𑁄𑀚𑁂𑀢𑀩𑁆𑀩𑀸. 𑀓𑀸𑀫𑀭𑀸𑀕𑀪𑀽𑀢𑀁 𑀅𑀪𑀺𑀚𑁆𑀛𑀁 𑀲𑀦𑁆𑀥𑀸𑀬 ‘‘𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣’’𑀦𑁆𑀢𑀺 𑀆𑀳. 𑀅𑀲𑀼𑀪𑀸𑀦𑀼𑀧𑀲𑁆𑀲𑀦𑀸𑀬 𑀳𑀺 𑀓𑀸𑀫𑀭𑀸𑀕𑀧𑁆𑀧𑀳𑀸𑀦𑀁 𑀳𑁄𑀢𑀻𑀢𑀺. 𑀓𑀸𑀫𑀭𑀸𑀕𑀫𑀼𑀔𑁂𑀦 𑀯𑀸 𑀲𑀩𑁆𑀩𑀮𑁄𑀪𑀧𑁆𑀧𑀳𑀸𑀦𑀁 𑀯𑀤𑀢𑀺. ‘‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀆𑀳𑀸𑀭𑀧𑀭𑀺𑀚𑀸𑀦𑀦𑁂 𑀯𑀼𑀢𑁆𑀢𑀦𑀬𑁂𑀦 𑀨𑀲𑁆𑀲𑀧𑀭𑀺𑀚𑀸𑀦𑀦𑀜𑁆𑀘 𑀬𑁄𑀚𑁂𑀢𑀩𑁆𑀩𑀁.

𑀲𑀼𑀔𑀢𑁆𑀣𑀫𑁂𑀯 𑀪𑀯𑀧𑀢𑁆𑀣𑀦𑀸 𑀳𑁄𑀢𑀻𑀢𑀺 𑀯𑁂𑀤𑀦𑀸𑀬 𑀢𑀡𑁆𑀳𑀁 𑀧𑀚𑀳𑀦𑁆𑀢𑁄 𑀪𑀯𑁄𑀖𑀁 𑀉𑀢𑁆𑀢𑀭𑀢𑀺. 𑀲𑀩𑁆𑀩𑀁 𑀯𑁂𑀤𑀦𑀁 𑀤𑀼𑀓𑁆𑀔𑀢𑁄 𑀧𑀲𑁆𑀲𑀦𑁆𑀢𑁄 𑀅𑀢𑁆𑀢𑀦𑁄 𑀧𑀭𑁂𑀦 𑀅𑀧𑀼𑀩𑁆𑀩𑀁 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑀺𑀢𑀁, 𑀲𑀼𑀔𑀁 ¶ 𑀯𑀸 𑀯𑀺𑀦𑀸𑀲𑀺𑀢𑀁 𑀦 𑀧𑀲𑁆𑀲𑀢𑀺, 𑀢𑀢𑁄 ‘‘𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻’’𑀢𑀺𑀆𑀤𑀺𑀆𑀖𑀸𑀢𑀯𑀢𑁆𑀣𑀼𑀧𑁆𑀧𑀳𑀸𑀦𑀢𑁄 𑀩𑁆𑀬𑀸𑀧𑀸𑀤𑀓𑀸𑀬𑀕𑀦𑁆𑀣𑀁 𑀪𑀺𑀦𑁆𑀤𑀢𑀺. ‘‘𑀲𑀼𑀔𑀩𑀳𑀼𑀮𑁂 𑀲𑀼𑀕𑀢𑀺𑀪𑀯𑁂 𑀲𑀼𑀤𑁆𑀥𑀻’’𑀢𑀺 𑀕𑀳𑁂𑀢𑁆𑀯𑀸 𑀕𑁄𑀲𑀻𑀮𑀕𑁄𑀯𑀢𑀸𑀤𑀻𑀳𑀺 𑀲𑀼𑀤𑁆𑀥𑀺𑀁 𑀧𑀭𑀸𑀫𑀲𑀦𑁆𑀢𑁄 𑀲𑀼𑀔𑀧𑀢𑁆𑀣𑀦𑀸𑀯𑀲𑁂𑀦𑁂𑀯 𑀧𑀭𑀸𑀫𑀲𑀢𑀻𑀢𑀺 𑀯𑁂𑀤𑀦𑀸𑀬 𑀢𑀡𑁆𑀳𑀁 𑀧𑀚𑀳𑀦𑁆𑀢𑁄 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁 𑀦 𑀉𑀧𑀸𑀤𑀺𑀬𑀢𑀺. 𑀫𑀦𑁄𑀲𑀜𑁆𑀘𑁂𑀢𑀦𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀯, 𑀲𑀜𑁆𑀜𑀸 𑀧𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀲𑀜𑁆𑀜𑀸𑀲𑀗𑁆𑀔𑀸𑀭𑁂 𑀅𑀦𑀢𑁆𑀢𑀢𑁄 𑀧𑀲𑁆𑀲𑀦𑁆𑀢𑁄 𑀫𑀦𑁄𑀲𑀜𑁆𑀘𑁂𑀢𑀦𑀸𑀬 𑀙𑀦𑁆𑀤𑀭𑀸𑀕𑀁 𑀧𑀚𑀳𑀢𑀺 𑀏𑀯, 𑀢𑀜𑁆𑀘 𑀧𑀭𑀺𑀕𑁆𑀕𑀡𑁆𑀳𑀸𑀢𑀺 𑀢𑀻𑀭𑁂𑀢𑀺 𑀘𑀸𑀢𑀺 ‘‘𑀲𑀜𑁆𑀜𑀁 𑀲𑀗𑁆𑀔𑀸𑀭𑁂…𑀧𑁂… 𑀧𑀭𑀺𑀚𑀸𑀦𑀸𑀢𑀻’’𑀢𑀺 𑀯𑀼𑀢𑁆𑀢𑀁.

𑀅𑀯𑀺𑀚𑁆𑀚𑀸𑀬 𑀯𑀺𑀜𑁆𑀜𑀸𑀡𑁂 𑀖𑀦𑀕𑁆𑀕𑀳𑀡𑀁 𑀳𑁄𑀢𑀻𑀢𑀺 𑀖𑀦𑀯𑀺𑀦𑀺𑀩𑁆𑀪𑁄𑀕𑀁 𑀓𑀢𑁆𑀯𑀸 𑀢𑀁 𑀅𑀦𑀺𑀘𑁆𑀘𑀢𑁄 𑀧𑀲𑁆𑀲𑀦𑁆𑀢𑁄 𑀅𑀯𑀺𑀚𑁆𑀚𑁄𑀖𑀁 𑀉𑀢𑁆𑀢𑀭𑀢𑀺. 𑀫𑁄𑀳𑀩𑀮𑁂𑀦𑁂𑀯 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀁 𑀳𑁄𑀢𑀻𑀢𑀺 𑀢𑀁 𑀧𑀚𑀳𑀦𑁆𑀢𑁄 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀓𑀸𑀬𑀕𑀦𑁆𑀣𑀁 𑀪𑀺𑀦𑁆𑀤𑀢𑀺.

‘‘𑀬𑀜𑁆𑀘 𑀔𑁄 𑀏𑀢𑀁, 𑀪𑀺𑀓𑁆𑀔𑀯𑁂, 𑀯𑀼𑀘𑁆𑀘𑀢𑀺 𑀘𑀺𑀢𑁆𑀢𑀁 𑀇𑀢𑀺𑀧𑀺 𑀫𑀦𑁄 𑀇𑀢𑀺𑀧𑀺 𑀯𑀺𑀜𑁆𑀜𑀸𑀡𑀁 𑀇𑀢𑀺𑀧𑀺, 𑀢𑀢𑁆𑀭𑀸𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀦𑀸𑀮𑀁 𑀦𑀺𑀩𑁆𑀩𑀺𑀦𑁆𑀤𑀺𑀢𑀼𑀁, 𑀦𑀸𑀮𑀁 𑀯𑀺𑀭𑀚𑁆𑀚𑀺𑀢𑀼𑀁, 𑀦𑀸𑀮𑀁 𑀯𑀺𑀫𑀼𑀘𑁆𑀘𑀺𑀢𑀼𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀻𑀖𑀭𑀢𑁆𑀢𑀁𑀳𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀚𑁆𑀛𑁄𑀲𑀺𑀢𑀁 𑀫𑀫𑀸𑀬𑀺𑀢𑀁 𑀧𑀭𑀸𑀫𑀝𑁆𑀞𑀁 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺 (𑀲𑀁. 𑀦𑀺. 𑁨.𑁬𑁧) 𑁋

𑀯𑀘𑀦𑀢𑁄 ¶ 𑀯𑀺𑀜𑁆𑀜𑀸𑀡𑀁 𑀦𑀺𑀘𑁆𑀘𑀢𑁄 𑀧𑀲𑁆𑀲𑀦𑁆𑀢𑁄 𑀤𑀺𑀝𑁆𑀞𑀼𑀧𑀸𑀤𑀸𑀦𑀁 𑀉𑀧𑀸𑀤𑀺𑀬𑀢𑀻𑀢𑀺 𑀅𑀦𑀺𑀘𑁆𑀘𑀢𑁄 𑀧𑀲𑁆𑀲𑀦𑁆𑀢𑁄 𑀢𑀁 𑀦 𑀉𑀧𑀸𑀤𑀺𑀬𑀢𑀻𑀢𑀺.

𑀓𑀫𑀸𑀤𑀺𑀯𑀺𑀦𑀺𑀘𑁆𑀙𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁩𑁪. 𑀏𑀯𑀁 𑀬𑀸 𑀏𑀓𑀯𑀺𑀥𑀸𑀤𑀺𑀦𑀸 𑀯𑀼𑀢𑁆𑀢𑀯𑁂𑀤𑀦𑀸𑀦𑀁 𑀪𑀽𑀫𑀺𑀯𑀲𑁂𑀦 𑀚𑀸𑀦𑀺𑀢𑀩𑁆𑀩𑀢𑀸, 𑀢𑀁 𑀯𑀢𑁆𑀯𑀸 𑀧𑀼𑀦 𑀲𑀫𑁆𑀧𑀬𑀼𑀢𑁆𑀢𑀢𑁄 𑀤𑀲𑁆𑀲𑀺𑀢𑀢𑀸𑀤𑀺𑀚𑀸𑀦𑀺𑀢𑀩𑁆𑀩𑀧𑁆𑀧𑀓𑀸𑀭𑀁 𑀯𑀢𑁆𑀢𑀼𑀫𑀸𑀳 ‘‘𑀅𑀧𑀺𑀘𑀸’’𑀢𑀺𑀆𑀤𑀺. 𑀅𑀝𑁆𑀞𑀯𑀺𑀥𑁂𑀦 𑀢𑀢𑁆𑀣𑀸𑀢𑀺 𑀢𑀢𑁆𑀣-𑀲𑀤𑁆𑀤𑀲𑁆𑀲 𑀲𑀢𑁆𑀢𑀯𑀺𑀥𑀪𑁂𑀤𑁂𑀦𑁂𑀯 𑀬𑁄𑀚𑀦𑀸 𑀙𑀩𑁆𑀩𑀺𑀥𑀪𑁂𑀤𑁂𑀦 𑀬𑁄𑀚𑀦𑀸𑀬 𑀲𑀢𑀺 𑀅𑀝𑁆𑀞𑀯𑀺𑀥𑀢𑁆𑀢𑀸𑀪𑀸𑀯𑀢𑁄.

𑀧𑀽𑀭𑀡𑀢𑁆𑀣𑀫𑁂𑀯 𑀯𑀼𑀢𑁆𑀢𑁄𑀢𑀺 𑀤𑀲𑀯𑀺𑀥𑀢𑀸𑀧𑀽𑀭𑀡𑀢𑁆𑀣𑀫𑁂𑀯 𑀯𑀼𑀢𑁆𑀢𑁄, 𑀦 𑀦𑀯𑀯𑀺𑀥𑀪𑁂𑀤𑁂 𑀯𑀺𑀬 𑀦𑀬𑀤𑀸𑀦𑀢𑁆𑀣𑀁. 𑀓𑀲𑁆𑀫𑀸? 𑀢𑀢𑁆𑀣 𑀦𑀬𑀲𑁆𑀲 𑀤𑀺𑀦𑁆𑀦𑀢𑁆𑀢𑀸. 𑀪𑀺𑀦𑁆𑀤𑀺𑀢𑀩𑁆𑀩𑀲𑁆𑀲 𑀳𑀺 𑀪𑁂𑀤𑀦𑀁 𑀦𑀬𑀤𑀸𑀦𑀁, 𑀢𑀜𑁆𑀘 𑀢𑀢𑁆𑀣 𑀓𑀢𑀦𑁆𑀢𑀺. 𑀬𑀣𑀸 𑀘 𑀓𑀼𑀲𑀮𑀢𑁆𑀢𑀺𑀓𑁄, 𑀏𑀯𑀁 ‘‘𑀓𑀸𑀬𑀲𑀫𑁆𑀨𑀲𑁆𑀲𑀚𑀸 ¶ 𑀯𑁂𑀤𑀦𑀸 𑀅𑀢𑁆𑀣𑀺 𑀲𑀼𑀔𑀸, 𑀅𑀢𑁆𑀣𑀺 𑀤𑀼𑀓𑁆𑀔𑀸’’𑀢𑀺 𑀇𑀤𑀫𑁆𑀧𑀺 𑀧𑀽𑀭𑀡𑀢𑁆𑀣𑀫𑁂𑀯𑀸𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺 𑀅𑀝𑁆𑀞𑀯𑀺𑀥𑀪𑁂𑀤𑁂 𑀦𑀬𑀲𑁆𑀲 𑀤𑀺𑀦𑁆𑀦𑀢𑁆𑀢𑀸.

𑀧𑀼𑀩𑁆𑀩𑁂 𑀕𑀳𑀺𑀢𑀢𑁄 𑀅𑀜𑁆𑀜𑀲𑁆𑀲 𑀕𑀳𑀡𑀁 𑀯𑀟𑁆𑀠𑀦𑀁 𑀕𑀳𑀡𑀯𑀟𑁆𑀠𑀦𑀯𑀲𑁂𑀦, 𑀦 𑀧𑀼𑀭𑀺𑀫𑀕𑀳𑀺𑀢𑁂 𑀞𑀺𑀢𑁂 𑀅𑀜𑁆𑀜𑀼𑀧𑀘𑀬𑀯𑀲𑁂𑀦. 𑀯𑀟𑁆𑀠𑀦-𑀲𑀤𑁆𑀤𑁄 𑀯𑀸 𑀙𑁂𑀤𑀦𑀢𑁆𑀣𑁄 𑀓𑁂𑀲𑀯𑀟𑁆𑀠𑀦𑀸𑀤𑀻𑀲𑀼 𑀯𑀺𑀬𑀸𑀢𑀺 𑀧𑀼𑀩𑁆𑀩𑁂 𑀕𑀳𑀺𑀢𑀲𑁆𑀲 𑀅𑀕𑁆𑀕𑀳𑀡𑀁 𑀙𑀺𑀦𑁆𑀤𑀦𑀁 𑀯𑀟𑁆𑀠𑀦𑀁, 𑀤𑀼𑀓𑀢𑀺𑀓𑀸𑀦𑀁 𑀉𑀪𑀬𑁂𑀲𑀁 𑀯𑀟𑁆𑀠𑀦𑀁 𑀉𑀪𑀬𑀯𑀟𑁆𑀠𑀦𑀁, 𑀉𑀪𑀬𑀢𑁄 𑀯𑀸 𑀧𑀯𑀢𑁆𑀢𑀁 𑀯𑀟𑁆𑀠𑀦𑀁 𑀉𑀪𑀬𑀯𑀟𑁆𑀠𑀦𑀁, 𑀢𑀤𑁂𑀯 𑀉𑀪𑀢𑁄𑀯𑀟𑁆𑀠𑀦𑀓𑀁, 𑀢𑁂𑀦 𑀦𑀬𑀦𑀻𑀳𑀭𑀡𑀁 𑀉𑀪𑀢𑁄𑀯𑀟𑁆𑀠𑀦𑀓𑀦𑀻𑀳𑀸𑀭𑁄. 𑀯𑀟𑁆𑀠𑀦𑀓𑀦𑀬𑁄 𑀯𑀸 𑀯𑀟𑁆𑀠𑀦𑀓𑀦𑀻𑀳𑀸𑀭𑁄, 𑀉𑀪𑀬𑀢𑁄 𑀧𑀯𑀢𑁆𑀢𑁄 𑀯𑀟𑁆𑀠𑀦𑀓𑀦𑀻𑀳𑀸𑀭𑁄 𑀉𑀪𑀢𑁄𑀯𑀟𑁆𑀠𑀦𑀓𑀦𑀻𑀳𑀸𑀭𑁄. 𑀢𑀢𑁆𑀣 𑀤𑀼𑀓𑀫𑀽𑀮𑀓𑀢𑀺𑀓𑀫𑀽𑀮𑀓𑀉𑀪𑀢𑁄𑀯𑀟𑁆𑀠𑀦𑀓𑁂𑀲𑀼 𑀤𑀼𑀯𑀺𑀥𑀢𑀺𑀯𑀺𑀥𑀪𑁂𑀤𑀸𑀦𑀁𑀬𑁂𑀯 𑀳𑀺 𑀯𑀺𑀲𑁂𑀲𑁄. 𑀅𑀜𑁆𑀜𑁂 𑀪𑁂𑀤𑀸 𑀅𑀯𑀺𑀲𑀺𑀝𑁆𑀞𑀸, 𑀢𑀣𑀸𑀧𑀺 𑀧𑀜𑁆𑀜𑀸𑀧𑁆𑀧𑀪𑁂𑀤𑀚𑀦𑀦𑀢𑁆𑀣𑀁 𑀥𑀫𑁆𑀫𑀯𑀺𑀢𑀓𑁆𑀓𑁂𑀦 𑀜𑀸𑀢𑀺𑀯𑀺𑀢𑀓𑁆𑀓𑀸𑀤𑀺𑀦𑀺𑀭𑀢𑁆𑀣𑀓𑀯𑀺𑀢𑀓𑁆𑀓𑀦𑀺𑀯𑀸𑀭𑀡𑀢𑁆𑀣𑀁 𑀇𑀫𑀜𑁆𑀘 𑀧𑀸𑀴𑀺𑀁 𑀯𑀺𑀢𑀓𑁆𑀓𑁂𑀦𑁆𑀢𑀲𑁆𑀲 𑀥𑀫𑁆𑀫𑀼𑀧𑀲𑀁𑀳𑀺𑀢𑀧𑀸𑀫𑁄𑀚𑁆𑀚𑀚𑀦𑀦𑀢𑁆𑀣𑀁 𑀏𑀓𑁂𑀓𑀲𑁆𑀲 𑀯𑀸𑀭𑀲𑁆𑀲 𑀕𑀳𑀺𑀢𑀲𑁆𑀲 𑀦𑀺𑀬𑁆𑀬𑀸𑀦𑀫𑀼𑀔𑀪𑀸𑀯𑀢𑁄 𑀘 𑀤𑀼𑀯𑀺𑀥𑀢𑀺𑀯𑀺𑀥𑀪𑁂𑀤𑀦𑀸𑀦𑀢𑁆𑀢𑀯𑀲𑁂𑀦 𑀇𑀢𑀭𑁂𑀧𑀺 𑀪𑁂𑀤𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸 𑀅𑀜𑁆𑀜𑀫𑀜𑁆𑀜𑀸𑀧𑁂𑀓𑁆𑀔𑁂𑀲𑀼 ¶ 𑀏𑀓𑀲𑁆𑀲 𑀯𑀺𑀲𑁂𑀲𑁂𑀦 𑀇𑀢𑀭𑁂𑀲𑀫𑁆𑀧𑀺 𑀯𑀺𑀲𑀺𑀝𑁆𑀞𑀪𑀸𑀯𑀢𑁄. 𑀦 𑀓𑁂𑀯𑀮𑀁 𑀏𑀓𑀯𑀺𑀥𑁄𑀯, 𑀅𑀣 𑀔𑁄 𑀤𑀼𑀯𑀺𑀥𑁄 𑀘. 𑀦 𑀘 𑀏𑀓𑀤𑀼𑀯𑀺𑀥𑁄𑀯, 𑀅𑀣 𑀔𑁄 𑀢𑀺𑀯𑀺𑀥𑁄𑀧𑀺. 𑀦𑀸𑀧𑀺 𑀏𑀓…𑀧𑁂… 𑀦𑀯𑀯𑀺𑀥𑁄𑀯, 𑀅𑀣 𑀔𑁄 𑀤𑀲𑀯𑀺𑀥𑁄𑀧𑀻𑀢𑀺 𑀳𑀺 𑀏𑀯𑀜𑁆𑀘 𑀢𑁂 𑀪𑁂𑀤𑀸 𑀅𑀜𑁆𑀜𑀫𑀜𑁆𑀜𑀸𑀧𑁂𑀓𑁆𑀔𑀸, 𑀢𑀲𑁆𑀫𑀸 𑀏𑀓𑁄 𑀪𑁂𑀤𑁄 𑀯𑀺𑀲𑀺𑀝𑁆𑀞𑁄 𑀅𑀢𑁆𑀢𑀦𑀸 𑀅𑀧𑁂𑀓𑁆𑀔𑀺𑀬𑀫𑀸𑀦𑁂, 𑀅𑀢𑁆𑀢𑀸𑀦𑀜𑁆𑀘 𑀅𑀧𑁂𑀓𑁆𑀔𑀫𑀸𑀦𑁂 𑀅𑀜𑁆𑀜𑀪𑁂𑀤𑁂 𑀯𑀺𑀲𑁂𑀲𑁂𑀢𑀻𑀢𑀺 𑀢𑀲𑁆𑀲 𑀯𑀲𑁂𑀦 𑀢𑁂𑀧𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀦𑁆𑀢𑀻𑀢𑀺 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀲𑀢𑁆𑀢𑀯𑀺𑀥𑁂𑀦𑀸𑀢𑀺𑀆𑀤𑀬𑁄 𑀅𑀜𑁆𑀜𑀧𑁆𑀧𑀪𑁂𑀤𑀦𑀺𑀭𑀧𑁂𑀓𑁆𑀔𑀸 𑀓𑁂𑀯𑀮𑀁 𑀩𑀳𑀼𑀧𑁆𑀧𑀓𑀸𑀭𑀢𑀸𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸𑀢𑀺 𑀲𑀩𑁆𑀩𑁂𑀳𑀺 𑀢𑁂𑀳𑀺 𑀧𑀓𑀸𑀭𑁂𑀳𑀺 ‘‘𑀩𑀳𑀼𑀯𑀺𑀥𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀤𑀲𑁆𑀲𑁂𑀲𑀻’’𑀢𑀺 𑀯𑀼𑀢𑁆𑀢𑀁. 𑀫𑀳𑀸𑀯𑀺𑀲𑀬𑁄 𑀭𑀸𑀚𑀸 𑀯𑀺𑀬 𑀲𑀯𑀺𑀲𑀬𑁂 𑀪𑀕𑀯𑀸𑀧𑀺 𑀫𑀳𑀸𑀯𑀺𑀲𑀬𑀢𑀸𑀬 𑀅𑀧𑁆𑀧𑀝𑀺𑀳𑀢𑁄 𑀬𑀣𑀸 𑀬𑀣𑀸 𑀇𑀘𑁆𑀙𑀢𑀺, 𑀢𑀣𑀸 𑀢𑀣𑀸 𑀤𑁂𑀲𑁂𑀢𑀼𑀁 𑀲𑀓𑁆𑀓𑁄𑀢𑀺 𑀲𑀩𑁆𑀩𑀜𑁆𑀜𑀼𑀢𑀸𑀦𑀸𑀯𑀭𑀡𑀜𑀸𑀡𑀬𑁄𑀕𑀢𑁄𑀢𑀺 𑀅𑀢𑁆𑀣𑁄. 𑀤𑀼𑀓𑁂 𑀯𑀢𑁆𑀯𑀸 𑀢𑀺𑀓𑀸 𑀯𑀼𑀢𑁆𑀢𑀸𑀢𑀺 𑀢𑀺𑀓𑀸 𑀤𑀼𑀓𑁂𑀲𑀼 𑀧𑀓𑁆𑀔𑀺𑀢𑁆𑀢𑀸𑀢𑀺 𑀬𑀼𑀢𑁆𑀢𑀁, 𑀤𑀼𑀓𑀸 𑀧𑀦 𑀓𑀣𑀁 𑀢𑀺𑀓𑁂𑀲𑀼 𑀧𑀓𑁆𑀔𑀺𑀢𑁆𑀢𑀸𑀢𑀺? 𑀧𑀭𑀢𑁄 𑀯𑀼𑀢𑁆𑀢𑁂𑀧𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀢𑀺𑀓𑁂 𑀅𑀧𑁂𑀓𑁆𑀔𑀓𑀸𑀧𑁂𑀓𑁆𑀔𑀺𑀢𑀩𑁆𑀩𑀯𑀲𑁂𑀦 𑀤𑀼𑀓𑀸𑀦𑀁 𑀬𑁄𑀚𑀺𑀢𑀢𑁆𑀢𑀸.

𑀓𑀺𑀭𑀺𑀬𑀫𑀦𑁄𑀥𑀸𑀢𑀼 𑀆𑀯𑀚𑁆𑀚𑀦𑀯𑀲𑁂𑀦 𑀮𑀩𑁆𑀪𑀢𑀻𑀢𑀺 𑀯𑀼𑀢𑁆𑀢𑀁, 𑀆𑀯𑀚𑁆𑀚𑀦𑀸 𑀧𑀦 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀦 𑀳𑁄𑀢𑀺. 𑀦 𑀳𑀺 𑀲𑀫𑀸𑀦𑀯𑀻𑀣𑀺𑀬𑀁 𑀧𑀘𑁆𑀙𑀺𑀫𑁄 𑀥𑀫𑁆𑀫𑁄 𑀧𑀼𑀭𑀺𑀫𑀲𑁆𑀲 ¶ 𑀓𑁄𑀘𑀺 𑀧𑀘𑁆𑀘𑀬𑁄 𑀳𑁄𑀢𑀺. 𑀬𑁂 𑀘 𑀯𑀤𑀦𑁆𑀢𑀺 ‘‘𑀆𑀯𑀚𑁆𑀚𑀦𑀯𑁂𑀤𑀦𑀸𑀯 𑀘𑀓𑁆𑀔𑀼𑀲𑀗𑁆𑀖𑀝𑁆𑀝𑀦𑀸𑀬 𑀉𑀧𑁆𑀧𑀦𑁆𑀦𑀢𑁆𑀢𑀸 𑀏𑀯𑀁 𑀯𑀼𑀢𑁆𑀢𑀸’’𑀢𑀺, 𑀢𑀜𑁆𑀘 𑀦 𑀬𑀼𑀢𑁆𑀢𑀁. 𑀦 𑀳𑀺 ‘‘𑀘𑀓𑁆𑀔𑀼𑀭𑀽𑀧𑀧𑀝𑀺𑀖𑀸𑀢𑁄 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄’’𑀢𑀺 𑀓𑀢𑁆𑀣𑀘𑀺 𑀲𑀼𑀢𑁆𑀢𑁂 𑀯𑀸 𑀅𑀝𑁆𑀞𑀓𑀣𑀸𑀬𑀁 𑀯𑀸 𑀯𑀼𑀢𑁆𑀢𑀁. 𑀬𑀤𑀺 𑀲𑁄 𑀘 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀲𑀺𑀬𑀸, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀳𑀚𑀸𑀢𑀸𑀧𑀺 𑀯𑁂𑀤𑀦𑀸 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸𑀢𑀺 𑀲𑀸 𑀇𑀥 𑀅𑀝𑁆𑀞𑀓𑀣𑀸𑀬𑀁 𑀦 𑀯𑀚𑁆𑀚𑁂𑀢𑀩𑁆𑀩𑀸 𑀲𑀺𑀬𑀸. 𑀧𑀸𑀴𑀺𑀬𑀜𑁆𑀘 ‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸 𑀅𑀢𑁆𑀣𑀺 𑀅𑀩𑁆𑀬𑀸𑀓𑀢𑀸’’𑀢𑀺 𑀏𑀢𑁆𑀣 𑀲𑀗𑁆𑀕𑀳𑀺𑀢𑀢𑁆𑀢𑀸 𑀧𑀼𑀦 ‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺. 𑀅𑀬𑀁 𑀧𑀦𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄 𑁋 𑀆𑀯𑀚𑁆𑀚𑀦𑀯𑁂𑀤𑀦𑀁 𑀯𑀺𑀦𑀸 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀲𑁆𑀲 𑀉𑀧𑁆𑀧𑀢𑁆𑀢𑀺 𑀦𑀢𑁆𑀣𑀻𑀢𑀺 𑀢𑀤𑀼𑀧𑁆𑀧𑀸𑀤𑀺𑀓𑀸 𑀲𑀸 𑀢𑀧𑁆𑀧𑀬𑁄𑀚𑀦𑀢𑁆𑀢𑀸 𑀧𑀭𑀺𑀬𑀸𑀬𑁂𑀦 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀸𑀢𑀺, 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀦 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀲𑁆𑀲 𑀧𑀭𑀢𑁄𑀯 𑀯𑁂𑀤𑀦𑀸 𑀮𑀩𑁆𑀪𑀦𑁆𑀢𑀺.

𑀘𑀢𑀼𑀢𑁆𑀢𑀺𑀁𑀲𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦𑀸𑀢𑀺 𑀏𑀢𑁆𑀣 𑀭𑀽𑀧𑀸𑀭𑀽𑀧𑀸𑀯𑀘𑀭𑀸𑀦𑀁 𑀅𑀕𑁆𑀕𑀳𑀡𑀁 𑀢𑁂𑀲𑀁 𑀲𑀬𑀫𑁂𑀯 𑀫𑀦𑁄𑀤𑁆𑀯𑀸𑀭𑀪𑀽𑀢𑀢𑁆𑀢𑀸. 𑀲𑀩𑁆𑀩𑀪𑀯𑀗𑁆𑀕𑀫𑀦𑁄 𑀳𑀺 𑀫𑀦𑁄𑀤𑁆𑀯𑀸𑀭𑀁, 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀬𑁄 𑀘 𑀢𑀢𑁄 𑀅𑀦𑀜𑁆𑀜𑀸𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀘𑀢𑀼𑀯𑀻𑀲𑀢𑀺𑀯𑀺𑀥𑀪𑁂𑀤𑁂 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸𑀤𑀺𑀓𑀼𑀲𑀮𑀸𑀤𑀻𑀦𑀁 𑀲𑀫𑀸𑀦𑀯𑀻𑀣𑀺𑀬𑀁 𑀮𑀩𑁆𑀪𑀫𑀸𑀦𑀢𑀸 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀸, 𑀧𑀸𑀴𑀺𑀬𑀁 𑀧𑀦 𑀏𑀓𑀽𑀦𑀯𑀻𑀲𑀢𑀺𑀘𑀢𑀼𑀯𑀻𑀲𑀢𑀺𑀓𑀸 𑀲𑀗𑁆𑀔𑀺𑀧𑀺𑀢𑁆𑀯𑀸 𑀆𑀕𑀢𑀸𑀢𑀺 ‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 ¶ 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀅𑀢𑁆𑀣𑀺 𑀅𑀦𑀼𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀸𑀦𑀺𑀬𑁄 𑀅𑀲𑀁𑀓𑀺𑀮𑀺𑀝𑁆𑀞𑀅𑀲𑀁𑀓𑀺𑀮𑁂𑀲𑀺𑀓𑁄 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑁄’’𑀢𑀺𑀆𑀤𑀺𑀦𑀸 𑀦𑀸𑀦𑀸𑀯𑀻𑀣𑀺𑀕𑀢𑀸𑀦𑀁 𑀮𑀩𑁆𑀪𑀫𑀸𑀦𑀢𑀸𑀬 𑀯𑀼𑀢𑁆𑀢𑀢𑁆𑀢𑀸 𑀓𑀼𑀲𑀮𑀢𑁆𑀢𑀺𑀓𑀲𑁆𑀲𑀧𑀺 𑀦𑀸𑀦𑀸𑀯𑀻𑀣𑀺𑀬𑀁 𑀮𑀩𑁆𑀪𑀫𑀸𑀦𑀢𑀸 𑀬𑁄𑀚𑁂𑀢𑀩𑁆𑀩𑀸. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀲𑀫𑀸𑀦𑀯𑀻𑀣𑀺𑀬𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸𑀤𑀺𑀓𑀢𑀸 𑀏𑀓𑀦𑁆𑀢𑀺𑀓𑀸𑀢𑀺 𑀓𑀢𑁆𑀯𑀸 𑀏𑀢𑁆𑀣 𑀮𑀩𑁆𑀪𑀫𑀸𑀦𑀢𑀸 𑀤𑀲𑁆𑀲𑀺𑀢𑀸, 𑀦 𑀧𑀦 𑀅𑀲𑀫𑀸𑀦𑀯𑀻𑀣𑀺𑀬𑀁 𑀮𑀩𑁆𑀪𑀫𑀸𑀦𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀸. 𑀢𑁂𑀦𑁂𑀯 ‘‘𑀢𑀸𑀦𑀺 𑀲𑀢𑁆𑀢𑀯𑀺𑀥𑀸𑀤𑀻𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀞𑀢𑁆𑀯𑀸 𑀓𑀣𑁂𑀢𑀼𑀁 𑀯𑀝𑁆𑀝𑀦𑁆𑀢𑀻’’𑀢𑀺 𑀆𑀳. 𑀦 𑀳𑀺 𑀲𑀫𑀸𑀦𑀯𑀻𑀣𑀺𑀬𑀁𑀬𑁂𑀯 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀲𑀫𑀢𑀺𑀓𑁆𑀓𑀫𑀪𑀸𑀯𑀦𑀸𑀳𑀺 𑀮𑀩𑁆𑀪𑀫𑀸𑀦𑀢𑀸 𑀳𑁄𑀢𑀺. 𑀢𑀺𑀥𑀸𑀧𑀺 𑀘 𑀮𑀩𑁆𑀪𑀫𑀸𑀦𑀢𑀁 𑀲𑀦𑁆𑀥𑀸𑀬 ‘‘𑀬𑀢𑁆𑀣 𑀓𑀢𑁆𑀣𑀘𑀺 𑀞𑀢𑁆𑀯𑀸 𑀓𑀣𑁂𑀢𑀼𑀁 𑀯𑀝𑁆𑀝𑀦𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺.

𑀏𑀢𑀸𑀦𑀻𑀢𑀺 𑀬𑀣𑀸𑀤𑀲𑁆𑀲𑀺𑀢𑀸𑀦𑀺 𑀓𑀼𑀲𑀮𑀸𑀤𑀻𑀦𑀺 𑀘𑀺𑀢𑁆𑀢𑀸𑀦𑀺 𑀯𑀤𑀢𑀺, 𑀯𑁂𑀤𑀦𑀸𑀦𑀺𑀤𑁆𑀤𑁂𑀲𑁂𑀧𑀺 𑀘 𑀏𑀢𑀲𑁆𑀫𑀺𑀁 𑀧𑀼𑀩𑁆𑀩𑀗𑁆𑀕𑀫𑀲𑁆𑀲 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀓𑀣𑁂𑀢𑀼𑀁 𑀲𑀼𑀔𑀦𑁆𑀢𑀺 𑀘𑀺𑀢𑁆𑀢𑀲𑀫𑁆𑀩𑀦𑁆𑀥𑁄 𑀓𑀢𑁄. 𑀢𑁂𑀦𑁂𑀯 𑀧𑀦 𑀘𑀺𑀢𑁆𑀢𑀸𑀦𑀺 𑀲𑀢𑁆𑀢𑀯𑀺𑀥𑀪𑁂𑀤𑁂 𑀢𑀺𑀓𑀪𑀽𑀫𑀺𑀯𑀲𑁂𑀦, 𑀘𑀢𑀼𑀯𑀻𑀲𑀢𑀺𑀯𑀺𑀥𑀪𑁂𑀤𑁂 𑀤𑁆𑀯𑀸𑀭𑀢𑀺𑀓𑀯𑀲𑁂𑀦, 𑀢𑀺𑀁𑀲𑀯𑀺𑀥𑀪𑁂𑀤𑁂 𑀤𑁆𑀯𑀸𑀭𑀪𑀽𑀫𑀺𑀯𑀲𑁂𑀦, 𑀩𑀳𑀼𑀯𑀺𑀥𑀪𑁂𑀤𑁂 𑀤𑁆𑀯𑀸𑀭𑀢𑀺𑀓𑀪𑀽𑀫𑀺𑀯𑀲𑁂𑀦 𑀤𑀻𑀧𑀺𑀢𑀸𑀦𑀻𑀢𑀺 ‘‘𑀢𑁂𑀲𑀼 𑀬𑀢𑁆𑀣 ¶ 𑀓𑀢𑁆𑀣𑀘𑀺 𑀞𑀢𑁆𑀯𑀸 𑀓𑀣𑁂𑀢𑀼𑀁 𑀯𑀝𑁆𑀝𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑀼𑀲𑀮𑀸𑀤𑀻𑀦𑀁 𑀤𑀻𑀧𑀦𑀸 𑀓𑀸𑀫𑀸𑀯𑀘𑀭𑀸𑀤𑀺𑀪𑀽𑀫𑀺𑀯𑀲𑁂𑀦 𑀓𑀸𑀢𑀩𑁆𑀩𑀸, 𑀢𑀸 𑀘 𑀪𑀽𑀫𑀺𑀬𑁄 𑀢𑀺𑀁𑀲𑀯𑀺𑀥𑀪𑁂𑀤𑁂 𑀲𑀬𑀫𑁂𑀯𑀸𑀕𑀢𑀸, 𑀦 𑀘 𑀲𑀢𑁆𑀢𑀯𑀺𑀥𑀪𑁂𑀤𑁂 𑀯𑀺𑀬 𑀤𑁆𑀯𑀸𑀭𑀁 𑀅𑀦𑀸𑀫𑀝𑁆𑀞𑀁, 𑀅𑀢𑀺𑀩𑁆𑀬𑀢𑁆𑀢𑀸 𑀘 𑀏𑀢𑁆𑀣 𑀲𑀫𑀸𑀦𑀸𑀲𑀫𑀸𑀦𑀯𑀻𑀣𑀻𑀲𑀼 𑀮𑀩𑁆𑀪𑀫𑀸𑀦𑀢𑀸𑀢𑀺 𑀢𑀺𑀁𑀲𑀯𑀺𑀥𑁂…𑀧𑁂… 𑀲𑀼𑀔𑀤𑀻𑀧𑀦𑀸𑀦𑀺 𑀳𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑀲𑁆𑀫𑀸 𑀧𑀦 𑀢𑀺𑀁𑀲𑀯𑀺𑀥𑀲𑁆𑀫𑀺𑀁𑀬𑁂𑀯 𑀞𑀢𑁆𑀯𑀸 𑀤𑀻𑀧𑀬𑀺𑀁𑀲𑀼, 𑀦𑀦𑀼 𑀤𑁆𑀯𑀸𑀭𑀢𑀺𑀓𑀪𑀽𑀫𑀻𑀦𑀁 𑀆𑀫𑀝𑁆𑀞𑀢𑁆𑀢𑀸 𑀩𑀳𑀼𑀯𑀺𑀥𑀪𑁂𑀤𑁂 𑀞𑀢𑁆𑀯𑀸 𑀤𑀻𑀧𑁂𑀢𑀩𑁆𑀩𑀸𑀦𑀻𑀢𑀺? 𑀦, 𑀤𑀻𑀧𑁂𑀢𑀩𑁆𑀩𑀝𑁆𑀞𑀸𑀦𑀸𑀢𑀺𑀓𑁆𑀓𑀫𑀢𑁄. 𑀲𑀢𑁆𑀢𑀯𑀺𑀥𑀪𑁂𑀤𑁄 𑀳𑀺 𑀤𑁆𑀯𑀸𑀭𑀲𑁆𑀲 𑀅𑀦𑀸𑀫𑀝𑁆𑀞𑀢𑁆𑀢𑀸 𑀤𑀻𑀧𑀦𑀸𑀬 𑀅𑀝𑁆𑀞𑀸𑀦𑀁, 𑀘𑀢𑀼𑀯𑀻𑀲𑀢𑀺𑀯𑀺𑀥𑀪𑁂𑀤𑁂 𑀆𑀫𑀝𑁆𑀞𑀤𑁆𑀯𑀸𑀭𑀢𑀺𑀓𑀸 𑀦 𑀪𑀽𑀫𑀺𑀬𑁄 𑀅𑀧𑁂𑀓𑁆𑀔𑀺𑀢𑁆𑀯𑀸 𑀞𑀧𑀺𑀢𑀸, 𑀢𑀺𑀁𑀲𑀯𑀺𑀥𑀪𑁂𑀤𑁂 𑀆𑀫𑀝𑁆𑀞𑀤𑁆𑀯𑀸𑀭𑀪𑀽𑀫𑀺𑀬𑁄 𑀯𑀼𑀢𑁆𑀢𑀸. 𑀬𑁂 𑀘 𑀞𑀧𑀺𑀢𑀸, 𑀢𑁂 𑀘𑁂𑀢𑁆𑀣 𑀢𑀺𑀓𑀸 𑀅𑀧𑁂𑀓𑁆𑀔𑀺𑀢𑀩𑁆𑀩𑀭𑀳𑀺𑀢𑀸 𑀓𑁂𑀯𑀮𑀁 𑀪𑀽𑀫𑀻𑀳𑀺 𑀲𑀳 𑀤𑀻𑀧𑁂𑀢𑀩𑁆𑀩𑀸𑀯. 𑀢𑁂𑀦𑁂𑀤𑀁 𑀤𑀻𑀧𑀦𑀸𑀬 𑀞𑀸𑀦𑀁, 𑀢𑀤𑀢𑀺𑀓𑁆𑀓𑀫𑁂 𑀧𑀦 𑀞𑀸𑀦𑀸𑀢𑀺𑀓𑁆𑀓𑀫𑁄 𑀳𑁄𑀢𑀻𑀢𑀺.

𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸𑀢𑀺 𑀏𑀢𑁆𑀣 ‘‘𑀲𑀤𑁆𑀥𑀁 𑀉𑀧𑀦𑀺𑀲𑁆𑀲𑀸𑀬 𑀤𑀸𑀦𑀁 𑀤𑁂𑀢𑀻’’𑀢𑀺𑀆𑀤𑀺𑀦𑀸 (𑀧𑀝𑁆𑀞𑀸. 𑁧.𑁧.𑁪𑁨𑁩) 𑀦𑀸𑀦𑀸𑀯𑀻𑀣𑀺𑀬𑀁 𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑀯𑀼𑀢𑁆𑀢𑁄𑀢𑀺 𑀏𑀓𑀯𑀻𑀣𑀺𑀬𑀁 𑀓𑀼𑀲𑀮𑀸𑀤𑀻𑀦𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀬𑁄 𑀢𑀤𑀪𑀸𑀯𑁂 𑀅𑀪𑀸𑀯𑀢𑁄 𑀚𑀸𑀢𑀺 𑀯𑀺𑀬 𑀚𑀭𑀸𑀫𑀭𑀡𑀲𑁆𑀲 𑀉𑀧𑀦𑀺𑀲𑁆𑀲𑀬𑀮𑁂𑀲𑁂𑀦 𑀧𑀘𑁆𑀘𑀬𑁄𑀢𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑁂𑀬𑁆𑀬, 𑀇𑀥 𑀧𑀦 ‘‘𑀓𑀲𑀺𑀡𑀭𑀽𑀧𑀤𑀲𑁆𑀲𑀦𑀳𑁂𑀢𑀼𑀉𑀧𑁆𑀧𑀦𑁆𑀦𑀸 𑀧𑀭𑀺𑀓𑀫𑁆𑀫𑀸𑀤𑀺𑀯𑁂𑀤𑀦𑀸 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸’’𑀢𑀺 𑀯𑀓𑁆𑀔𑀢𑀺, 𑀢𑀲𑁆𑀫𑀸 𑀦𑀸𑀦𑀸𑀯𑀻𑀣𑀺𑀬𑀁 𑀕𑀢𑀸𑀦𑀺 𑀏𑀢𑀸𑀦𑀺 𑀘𑀺𑀢𑁆𑀢𑀸𑀦𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀮𑀩𑁆𑀪𑀫𑀸𑀦𑀸𑀦𑀻𑀢𑀺 𑀦 𑀉𑀧𑀦𑀺𑀲𑁆𑀲𑀬𑀮𑁂𑀲𑁄 𑀉𑀧𑀦𑀺𑀲𑁆𑀲𑀬𑀓𑁄𑀝𑀺, 𑀩𑀮𑀯𑀩𑀮𑀯𑀸𑀦𑀁 𑀧𑀦 𑀧𑀭𑀺𑀓𑀫𑁆𑀫𑀸𑀤𑀻𑀦𑀁 𑀉𑀧𑀦𑀺𑀲𑁆𑀲𑀬𑀸𑀦𑀁 𑀲𑀩𑁆𑀩𑁂𑀲𑀁 𑀆𑀤𑀺𑀪𑀽𑀢𑁄 ¶ 𑀉𑀧𑀦𑀺𑀲𑁆𑀲𑀬𑁄 𑀉𑀧𑀦𑀺𑀲𑁆𑀲𑀬𑀓𑁄𑀝𑀺. ‘‘𑀯𑀸𑀮𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀳𑀺 𑀆𑀤𑀺, 𑀅𑀯𑀬𑀯𑁄 𑀯𑀸 𑀓𑁄𑀝𑀺. 𑀓𑀲𑀺𑀡𑀭𑀽𑀧𑀤𑀲𑁆𑀲𑀦𑀢𑁄 𑀧𑀪𑀼𑀢𑀺 𑀘 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀤𑀻𑀦𑀁 𑀯𑁂𑀤𑀦𑀸𑀦𑀁 𑀉𑀧𑀦𑀺𑀲𑁆𑀲𑀬𑁄 𑀧𑀯𑀢𑁆𑀢𑁄𑀢𑀺 𑀢𑀁 𑀤𑀲𑁆𑀲𑀦𑀁 𑀉𑀧𑀦𑀺𑀲𑁆𑀲𑀬𑀓𑁄𑀝𑀺. 𑀧𑀭𑀺𑀓𑀫𑁆𑀫𑀸𑀤𑀻𑀦𑀺 𑀯𑀺𑀬 𑀯𑀸 𑀦 𑀩𑀮𑀯𑀉𑀧𑀦𑀺𑀲𑁆𑀲𑀬𑁄 𑀤𑀲𑁆𑀲𑀦𑀦𑁆𑀢𑀺 𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀦𑁆𑀢𑀪𑀸𑀯𑁂𑀦 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀢𑀸 𑀯𑀼𑀢𑁆𑀢𑀸. 𑀖𑀸𑀦𑀸𑀤𑀺𑀤𑁆𑀯𑀸𑀭𑁂𑀲𑀼 𑀢𑀻𑀲𑀼 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸 𑀮𑀩𑁆𑀪𑀫𑀸𑀦𑀢𑁆𑀢𑀸𑀪𑀸𑀯𑀁 𑀯𑀤𑀦𑁆𑀢𑁄 𑀇𑀥 𑀲𑀫𑀸𑀦𑀯𑀻𑀣𑀺 𑀦 𑀕𑀳𑀺𑀢𑀸𑀢𑀺 𑀤𑀻𑀧𑁂𑀢𑀺. 𑀤𑀲𑁆𑀲𑀦𑀲𑀯𑀦𑀸𑀦𑀺 𑀯𑀺𑀬 𑀳𑀺 𑀓𑀲𑀺𑀡𑀧𑀭𑀺𑀓𑀫𑁆𑀫𑀸𑀤𑀻𑀦𑀁 𑀖𑀸𑀬𑀦𑀸𑀤𑀻𑀦𑀺 𑀉𑀧𑀦𑀺𑀲𑁆𑀲𑀬𑀸 𑀦 𑀳𑁄𑀦𑁆𑀢𑀻𑀢𑀺 𑀢𑀤𑀮𑀸𑀪𑁄 𑀤𑀻𑀧𑀺𑀢𑁄𑀢𑀺. 𑀬𑀤𑀺𑀧𑀺 𑀯𑀸𑀬𑁄𑀓𑀲𑀺𑀡𑀁 𑀨𑀼𑀲𑀺𑀢𑁆𑀯𑀸𑀧𑀺 𑀕𑀳𑁂𑀢𑀩𑁆𑀩𑀁, 𑀧𑀼𑀭𑀺𑀫𑁂𑀦 𑀧𑀦 𑀲𑀯𑀦𑁂𑀦 𑀯𑀺𑀦𑀸 𑀢𑀁 𑀨𑀼𑀲𑀦𑀁 𑀲𑀬𑀫𑁂𑀯 𑀫𑀽𑀮𑀼𑀧𑀦𑀺𑀲𑁆𑀲𑀬𑁄 𑀬𑁂𑀪𑀼𑀬𑁆𑀬𑁂𑀦 𑀦 𑀳𑁄𑀢𑀻𑀢𑀺 𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀢𑀸 𑀦 𑀯𑀼𑀢𑁆𑀢𑀸.

𑀅𑀚𑁆𑀛𑀸𑀲𑀬𑁂𑀦 ¶ 𑀲𑀫𑁆𑀧𑀢𑁆𑀢𑀺𑀕𑀢𑁄 𑀅𑀚𑁆𑀛𑀸𑀲𑀬𑀲𑀫𑁆𑀧𑀦𑁆𑀦𑁄, 𑀲𑀫𑁆𑀧𑀦𑁆𑀦𑀚𑁆𑀛𑀸𑀲𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀢𑁆𑀢𑀧𑁆𑀧𑀝𑀺𑀯𑀢𑁆𑀢𑀦𑁆𑀢𑀺 𑀔𑀼𑀤𑁆𑀤𑀓𑀜𑁆𑀘𑁂𑀯 𑀫𑀳𑀦𑁆𑀢𑀜𑁆𑀘 𑀯𑀢𑁆𑀢𑀁, 𑀧𑀼𑀩𑁆𑀩𑁂 𑀯𑀸 𑀓𑀢𑀁 𑀯𑀢𑁆𑀢𑀁, 𑀧𑀘𑁆𑀙𑀸 𑀓𑀢𑀁 𑀧𑀝𑀺𑀯𑀢𑁆𑀢𑀁. 𑀏𑀯𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀦𑁆𑀢𑀺 𑀆𑀤𑀺𑀫𑁆𑀳𑀺 𑀉𑀧𑁆𑀧𑀦𑁆𑀦𑀁 𑀆𑀳, 𑀢𑀢𑁄 𑀧𑀭𑀁 𑀉𑀧𑁆𑀧𑀦𑁆𑀦𑀸𑀦𑀺𑀧𑀺 𑀧𑀦 𑀓𑀲𑀺𑀡𑀭𑀽𑀧𑀤𑀲𑁆𑀲𑀦𑀓𑀮𑁆𑀬𑀸𑀡𑀫𑀺𑀢𑁆𑀢𑀤𑀲𑁆𑀲𑀦𑀲𑀁𑀯𑁂𑀕𑀯𑀢𑁆𑀣𑀼𑀤𑀲𑁆𑀲𑀦𑀸𑀤𑀻𑀦𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺𑀬𑁂𑀯𑀸𑀢𑀺. 𑀢𑁂𑀦 𑀢𑀤𑀼𑀧𑀦𑀺𑀲𑁆𑀲𑀬𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀤𑀲𑁆𑀲𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀬𑀣𑀸𑀪𑀽𑀢𑀲𑀪𑀸𑀯𑀸𑀤𑀲𑁆𑀲𑀦𑀁 𑀅𑀲𑀫𑀧𑁂𑀓𑁆𑀔𑀦𑀸. ‘‘𑀅𑀲𑁆𑀫𑀻’’𑀢𑀺 𑀭𑀽𑀧𑀸𑀤𑀻𑀲𑀼 𑀯𑀺𑀦𑀺𑀩𑀦𑁆𑀥𑀲𑁆𑀲. 𑀲𑀪𑀸𑀯𑀦𑁆𑀢𑀭𑀸𑀫𑀲𑀦𑀯𑀲𑁂𑀦 𑀧𑀭𑀸𑀫𑀝𑁆𑀞𑀲𑁆𑀲, 𑀧𑀭𑀸𑀫𑀝𑁆𑀞𑀯𑀢𑁄𑀢𑀺 𑀅𑀢𑁆𑀣𑁄. 𑀆𑀭𑀫𑁆𑀫𑀡𑀸𑀥𑀺𑀕𑀳𑀡𑀯𑀲𑁂𑀦 𑀅𑀦𑀼 𑀅𑀦𑀼 𑀉𑀧𑁆𑀧𑀚𑁆𑀚𑀦𑀥𑀫𑁆𑀫𑀢𑀸𑀬 𑀣𑀺𑀭𑀪𑀸𑀯𑀓𑀺𑀮𑁂𑀲𑀲𑁆𑀲 𑀣𑀸𑀫𑀕𑀢𑀲𑁆𑀲, 𑀅𑀧𑁆𑀧𑀳𑀻𑀦𑀓𑀸𑀫𑀭𑀸𑀕𑀸𑀤𑀺𑀓𑀲𑁆𑀲 𑀯𑀸. 𑀧𑀭𑀺𑀕𑁆𑀕𑀳𑁂 𑀞𑀺𑀢𑁄𑀢𑀺 𑀯𑀻𑀫𑀁𑀲𑀸𑀬 𑀞𑀺𑀢𑁄. 𑀏𑀢𑁆𑀣 𑀘 𑀅𑀲𑀫𑀧𑁂𑀓𑁆𑀔𑀦𑀸𑀬𑀸𑀢𑀺𑀆𑀤𑀺𑀦𑀸 𑀫𑁄𑀳𑀸𑀤𑀻𑀦𑀁 𑀓𑀺𑀘𑁆𑀘𑁂𑀦 𑀧𑀸𑀓𑀝𑁂𑀦 𑀢𑁂𑀲𑀁 𑀉𑀧𑁆𑀧𑀢𑁆𑀢𑀺𑀯𑀲𑁂𑀦 𑀯𑀺𑀘𑀸𑀭𑀡𑀸 𑀤𑀝𑁆𑀞𑀩𑁆𑀩𑀸. 𑀭𑀽𑀧𑀤𑀲𑁆𑀲𑀦𑁂𑀦 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀲𑀫𑀢𑀺𑀓𑁆𑀓𑀫𑀯𑀲𑁂𑀦 𑀧𑀯𑀢𑁆𑀢𑀸 𑀭𑀽𑀧𑀤𑀲𑁆𑀲𑀦𑀳𑁂𑀢𑀼𑀓𑀸 𑀳𑁄𑀢𑀻𑀢𑀺 ‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀦𑀸𑀫 𑀚𑀸𑀢𑀸’’𑀢𑀺 𑀆𑀳. 𑀏𑀢𑁆𑀣 𑀘 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀲𑁆𑀲 𑀘𑀢𑀼𑀪𑀽𑀫𑀺𑀓𑀯𑁂𑀤𑀦𑀸𑀬 𑀉𑀧𑀦𑀺𑀲𑁆𑀲𑀬𑀪𑀸𑀯𑁄 𑀏𑀯 𑀧𑀓𑀸𑀭𑀦𑁆𑀢𑀭𑁂𑀦 𑀓𑀣𑀺𑀢𑁄, 𑀢𑀣𑀸 ‘‘𑀪𑀸𑀯𑀦𑀸𑀯𑀲𑁂𑀦𑀸’’𑀢𑀺 𑀏𑀢𑁆𑀣 𑀘.

𑀓𑀮𑀸𑀧𑀲𑀫𑁆𑀫𑀲𑀦𑁂𑀦 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀆𑀭𑁄𑀧𑁂𑀢𑁆𑀯𑀸 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀓𑀸𑀬 𑀯𑀺𑀧𑀲𑁆𑀲𑀦𑀸𑀧𑀝𑀺𑀧𑀸𑀝𑀺𑀬𑀸 𑀆𑀤𑀺𑀫𑁆𑀳𑀺 𑀭𑀽𑀧𑀸𑀭𑀫𑁆𑀫𑀡𑀧𑀭𑀺𑀕𑁆𑀕𑀳𑁂𑀦 𑀭𑀽𑀧𑀸𑀭𑀫𑁆𑀫𑀡𑀁 𑀲𑀫𑁆𑀫𑀲𑀺𑀢𑁆𑀯𑀸, 𑀢𑀁𑀫𑀽𑀮𑀓𑀁 𑀯𑀸 𑀲𑀩𑁆𑀩𑀁 𑀲𑀫𑁆𑀫𑀲𑀦𑀁 𑀆𑀤𑀺𑀪𑀽𑀢𑁂 𑀭𑀽𑀧𑀸𑀭𑀫𑁆𑀫𑀡𑁂 𑀧𑀯𑀢𑁆𑀢𑀢𑀻𑀢𑀺 𑀓𑀢𑁆𑀯𑀸 𑀆𑀳 ‘‘𑀭𑀽𑀧𑀸𑀭𑀫𑁆𑀫𑀡𑀁 𑀲𑀫𑁆𑀫𑀲𑀺𑀢𑁆𑀯𑀸’’𑀢𑀺. 𑀏𑀢𑁆𑀣 𑀘 ¶ 𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑀸𑀤𑀺 𑀲𑀩𑁆𑀩𑀁 𑀲𑀫𑁆𑀫𑀲𑀦𑀁 𑀪𑀸𑀯𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀭𑀽𑀧𑀸𑀭𑀫𑁆𑀫𑀡𑀁 𑀲𑀫𑁆𑀫𑀲𑀺𑀢𑁆𑀯𑀸𑀢𑀺 𑀘 𑀬𑀣𑀸𑀯𑀼𑀢𑁆𑀢𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀪𑀽𑀢𑀁 𑀭𑀽𑀧𑀸𑀭𑀫𑁆𑀫𑀡𑀁 𑀯𑀼𑀢𑁆𑀢𑀁, 𑀦 𑀬𑀁 𑀓𑀺𑀜𑁆𑀘𑀺. 𑀆𑀭𑀫𑁆𑀫𑀡𑁂𑀦 𑀳𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀁 𑀤𑀲𑁆𑀲𑁂𑀢𑀻𑀢𑀺. 𑀏𑀯𑀁 ‘‘𑀭𑀽𑀧𑀸𑀭𑀫𑁆𑀫𑀡𑁂 𑀉𑀧𑁆𑀧𑀦𑁆𑀦𑀁 𑀓𑀺𑀮𑁂𑀲’’𑀦𑁆𑀢𑀺 𑀏𑀢𑁆𑀣𑀸𑀧𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀤𑀁 𑀨𑁄𑀝𑁆𑀞𑀩𑁆𑀩𑀁 𑀓𑀺𑀁𑀦𑀺𑀲𑁆𑀲𑀺𑀢𑀦𑁆𑀢𑀺 𑀘𑀓𑁆𑀔𑀼𑀤𑁆𑀯𑀸𑀭𑁂 𑀯𑀺𑀬 𑀬𑁄𑀚𑀦𑀸𑀬 𑀬𑀣𑀸𑀲𑀫𑁆𑀪𑀯𑀁 𑀆𑀧𑁄𑀥𑀸𑀢𑀼𑀬𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀘 𑀯𑀲𑁂𑀦 𑀫𑀳𑀸𑀪𑀽𑀢𑀦𑀺𑀲𑁆𑀲𑀺𑀢𑀢𑀸 𑀬𑁄𑀚𑁂𑀢𑀩𑁆𑀩𑀸.

𑀚𑀸𑀢𑀺…𑀧𑁂… 𑀩𑀮𑀯𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀪𑀬𑀢𑁄 𑀤𑀺𑀲𑁆𑀲𑀫𑀸𑀦𑀸𑀦𑀁 𑀚𑀸𑀢𑀺𑀆𑀤𑀻𑀦𑀁 𑀩𑀮𑀯𑀧𑀘𑁆𑀘𑀬𑀪𑀸𑀯𑁂𑀦 𑀢𑁂𑀲𑀁 𑀪𑀬𑀢𑁄 𑀤𑀲𑁆𑀲𑀦𑁂𑀦 𑀲𑀳𑀚𑀸𑀢𑀲𑁆𑀲 𑀫𑀦𑁄𑀲𑀫𑁆𑀨𑀲𑁆𑀲𑀲𑁆𑀲, 𑀢𑀲𑁆𑀲 𑀯𑀸 𑀤𑀲𑁆𑀲𑀦𑀲𑁆𑀲 𑀤𑁆𑀯𑀸𑀭𑀪𑀽𑀢𑀲𑁆𑀲 𑀪𑀯𑀗𑁆𑀕𑀫𑀦𑁄𑀲𑀫𑁆𑀨𑀲𑁆𑀲𑀲𑁆𑀲 𑀩𑀮𑀯𑀧𑀘𑁆𑀘𑀬𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀥𑀫𑁆𑀫𑀸𑀭𑀫𑁆𑀫𑀡𑁂𑀢𑀺 ¶ 𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂 𑀚𑀸𑀢𑀺𑀆𑀤𑀺𑀆𑀭𑀫𑁆𑀫𑀡𑁂𑀯, 𑀅𑀣 𑀔𑁄 𑀲𑀩𑁆𑀩𑀲𑁆𑀫𑀺𑀁 𑀭𑀸𑀕𑀸𑀤𑀺𑀯𑀢𑁆𑀣𑀼𑀪𑀽𑀢𑁂 𑀥𑀫𑁆𑀫𑀸𑀭𑀫𑁆𑀫𑀡𑁂. 𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀦𑁆𑀢𑀺 𑀏𑀢𑁆𑀣 𑀯𑁂𑀤𑀦𑀸𑀤𑀺𑀲𑀗𑁆𑀔𑀸𑀢𑀲𑁆𑀲 𑀥𑀫𑁆𑀫𑀸𑀭𑀫𑁆𑀫𑀡𑁂𑀓𑀤𑁂𑀲𑀲𑁆𑀲 𑀧𑀭𑀺𑀕𑁆𑀕𑀳𑀫𑀼𑀔𑁂𑀦 𑀥𑀫𑁆𑀫𑀸𑀭𑀫𑁆𑀫𑀡𑀧𑀭𑀺𑀕𑁆𑀕𑀳𑀁 𑀤𑀲𑁆𑀲𑁂𑀢𑀺.

𑀫𑀦𑁄𑀲𑀫𑁆𑀨𑀲𑁆𑀲𑁄𑀢𑀺 𑀯𑀺𑀜𑁆𑀜𑀸𑀡𑀁 𑀲𑀫𑁆𑀨𑀲𑁆𑀲𑀲𑁆𑀲 𑀓𑀸𑀭𑀡𑀪𑀸𑀯𑁂𑀦 𑀕𑀳𑀺𑀢𑀁, 𑀢𑀤𑁂𑀯 𑀅𑀢𑁆𑀢𑀦𑁄 𑀨𑀮𑀲𑁆𑀲𑁂𑀯 𑀨𑀮𑀪𑀸𑀯𑁂𑀦 𑀯𑀢𑁆𑀢𑀼𑀁 𑀦 𑀬𑀼𑀢𑁆𑀢𑀁 𑀓𑀸𑀭𑀡𑀨𑀮𑀲𑀗𑁆𑀓𑀭𑀪𑀸𑀯𑁂𑀦 𑀲𑁄𑀢𑀽𑀦𑀁 𑀲𑀫𑁆𑀫𑁄𑀳𑀚𑀦𑀓𑀢𑁆𑀢𑀸𑀢𑀺 𑀆𑀳 ‘‘𑀦 𑀳𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀡𑀁 𑀫𑀦𑁄𑀲𑀫𑁆𑀨𑀲𑁆𑀲𑀚𑀦𑁆𑀢𑀺 𑀦𑀺𑀤𑁆𑀤𑀺𑀲𑀺𑀢𑀼’’𑀦𑁆𑀢𑀺, 𑀦 𑀧𑀦 𑀯𑀺𑀜𑁆𑀜𑀸𑀡𑀲𑁆𑀲 𑀫𑀦𑁄𑀲𑀫𑁆𑀨𑀲𑁆𑀲𑁂𑀦 𑀲𑀳𑀚𑀸𑀢𑀪𑀸𑀯𑀲𑁆𑀲 𑀅𑀪𑀸𑀯𑀸. 𑀬𑀲𑁆𑀫𑀸 𑀯𑀸 𑀬𑀣𑀸 ‘‘𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄’’𑀢𑀺 (𑀫. 𑀦𑀺. 𑁧.𑁨𑁦𑁪; 𑁩.𑁪𑁨𑁦, 𑁪𑁨𑁫-𑁪𑁨𑁬; 𑀲𑀁. 𑀦𑀺. 𑁪.𑁬𑁦) 𑀯𑀘𑀦𑀢𑁄 𑀇𑀦𑁆𑀤𑁆𑀭𑀺𑀬𑀯𑀺𑀲𑀬𑀸 𑀯𑀺𑀬 𑀯𑀺𑀜𑁆𑀜𑀸𑀡𑀫𑁆𑀧𑀺 𑀨𑀲𑁆𑀲𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑁄, 𑀦 𑀢𑀣𑀸 𑀨𑀲𑁆𑀲𑁄 𑀯𑀺𑀜𑁆𑀜𑀸𑀡𑀲𑁆𑀲, 𑀢𑀲𑁆𑀫𑀸 𑀇𑀦𑁆𑀤𑁆𑀭𑀺𑀬𑀯𑀺𑀲𑀬𑀸 𑀯𑀺𑀬 𑀯𑀺𑀜𑁆𑀜𑀸𑀡𑀫𑁆𑀧𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸𑀤𑀺𑀯𑀘𑀦𑀁 𑀦 𑀅𑀭𑀳𑀢𑀻𑀢𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸𑀤𑀺𑀪𑀸𑀯𑁄 𑀦 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸

𑁧𑁫𑁦. 𑀘𑀺𑀢𑁆𑀢𑀼𑀧𑁆𑀧𑀸𑀤𑀭𑀽𑀧𑀯𑀲𑁂𑀦 ¶ 𑀢𑀁 𑀢𑀁 𑀲𑀫𑀼𑀤𑀸𑀬𑀁 𑀏𑀓𑁂𑀓𑀁 𑀥𑀫𑁆𑀫𑀁 𑀓𑀢𑁆𑀯𑀸 ‘‘𑀧𑀜𑁆𑀘𑀧𑀡𑁆𑀡𑀸𑀲 𑀓𑀸𑀫𑀸𑀯𑀘𑀭𑀥𑀫𑁆𑀫𑁂’’𑀢𑀺 𑀆𑀳. 𑀭𑀚𑁆𑀚𑀦𑁆𑀢𑀲𑁆𑀲𑀸𑀢𑀺𑀆𑀤𑀻𑀲𑀼 𑀭𑀸𑀕𑀸𑀤𑀬𑁄 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀲𑀻𑀮𑀸𑀤𑀬𑁄 𑀘 𑀧𑀜𑁆𑀘 𑀲𑀁𑀯𑀭𑀸 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑀸, 𑀲𑀫𑁆𑀫𑀲𑀦𑀁 𑀧𑀦 𑀫𑀦𑁄𑀤𑁆𑀯𑀸𑀭𑁂 𑀏𑀯. 𑀭𑀽𑀧𑀸𑀭𑀽𑀧𑀸𑀯𑀘𑀭𑀥𑀫𑁆𑀫𑁂𑀲𑀼 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸𑀤𑀺𑀉𑀧𑁆𑀧𑀢𑁆𑀢𑀺 𑀅𑀢𑁆𑀣𑀻𑀢𑀺 𑀢𑀢𑁄 𑀲𑀢𑀺𑀲𑀁𑀯𑀭𑁄 𑀜𑀸𑀡𑀯𑀻𑀭𑀺𑀬𑀲𑀁𑀯𑀭𑀸 𑀘 𑀬𑀣𑀸𑀬𑁄𑀕𑀁 𑀬𑁄𑀚𑁂𑀢𑀩𑁆𑀩𑀸. 𑀧𑀭𑀺𑀕𑁆𑀕𑀳𑀯𑀘𑀦𑁂𑀦 𑀲𑀫𑁆𑀫𑀲𑀦𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀢𑁂𑀬𑁂𑀯𑀸𑀢𑀺 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀯𑀼𑀢𑁆𑀢𑀸.

𑀲𑀫𑀸𑀦𑁂 𑀤𑁂𑀲𑀺𑀢𑀩𑁆𑀩𑁂 𑀤𑁂𑀲𑀦𑀸𑀫𑀢𑁆𑀢𑀲𑁆𑀲 𑀧𑀭𑀺𑀯𑀝𑁆𑀝𑀦𑀁 𑀧𑀭𑀺𑀯𑀝𑁆𑀝𑁄. 𑀢𑀻𑀲𑀼𑀧𑀺 𑀧𑀭𑀺𑀯𑀝𑁆𑀝𑁂𑀲𑀼 𑀓𑀢𑁆𑀣𑀘𑀺 𑀓𑀺𑀜𑁆𑀘𑀺 𑀊𑀦𑀁 𑀅𑀥𑀺𑀓𑀁 𑀯𑀸 𑀦𑀢𑁆𑀣𑀻𑀢𑀺 𑀓𑀢𑁆𑀯𑀸 𑀆𑀳 ‘‘𑀏𑀓𑁄𑀯 𑀧𑀭𑀺𑀘𑁆𑀙𑁂𑀤𑁄’’𑀢𑀺.

𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀔𑀦𑁆𑀥𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀆𑀬𑀢𑀦𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁧𑁫𑁨. 𑀯𑀺𑀲𑁂𑀲𑀢𑁄𑀢𑀺 ¶ ¶ 𑀆𑀬𑀢𑀦-𑀲𑀤𑁆𑀤𑀢𑁆𑀣𑁄 𑀯𑀺𑀬 𑀅𑀲𑀸𑀥𑀸𑀭𑀡𑀢𑁄 𑀘𑀓𑁆𑀔𑀸𑀤𑀺𑀲𑀤𑁆𑀤𑀢𑁆𑀣𑀢𑁄𑀢𑀺 𑀅𑀢𑁆𑀣𑁄. 𑀅𑀲𑁆𑀲𑀸𑀤𑁂𑀢𑀻𑀢𑀺 𑀘𑀓𑁆𑀔𑀢𑀺-𑀲𑀤𑁆𑀤𑁄 ‘‘𑀫𑀥𑀼𑀁 𑀘𑀓𑁆𑀔𑀢𑀺 𑀩𑁆𑀬𑀜𑁆𑀚𑀦𑀁 𑀘𑀓𑁆𑀔𑀢𑀻’’𑀢𑀺 𑀭𑀲𑀲𑀸𑀬𑀦𑀢𑁆𑀣𑁄 𑀅𑀢𑁆𑀣𑀻𑀢𑀺 𑀢𑀲𑁆𑀲 𑀯𑀲𑁂𑀦 𑀅𑀢𑁆𑀣𑀁 𑀯𑀤𑀢𑀺. ‘‘𑀘𑀓𑁆𑀔𑀼𑀁 𑀔𑁄, 𑀫𑀸𑀕𑀡𑁆𑀟𑀺𑀬, 𑀭𑀽𑀧𑀸𑀭𑀸𑀫𑀁 𑀭𑀽𑀧𑀭𑀢𑀁 𑀭𑀽𑀧𑀲𑀫𑁆𑀫𑀼𑀤𑀺𑀢’’𑀦𑁆𑀢𑀺 (𑀫. 𑀦𑀺. 𑁨.𑁨𑁦𑁯) 𑀯𑀘𑀦𑀢𑁄 𑀘𑀓𑁆𑀔𑀼 𑀭𑀽𑀧𑀁 𑀅𑀲𑁆𑀲𑀸𑀤𑁂𑀢𑀺. 𑀲𑀢𑀺𑀧𑀺 𑀲𑁄𑀢𑀸𑀤𑀻𑀦𑀁 𑀲𑀤𑁆𑀤𑀸𑀭𑀫𑁆𑀫𑀡𑀸𑀤𑀺𑀭𑀢𑀺𑀪𑀸𑀯𑁂 𑀦𑀺𑀭𑀼𑀴𑁆𑀳𑀢𑁆𑀢𑀸 𑀘𑀓𑁆𑀔𑀼𑀫𑁆𑀳𑀺𑀬𑁂𑀯 𑀘𑀓𑁆𑀔𑀼-𑀲𑀤𑁆𑀤𑁄 𑀧𑀯𑀢𑁆𑀢𑀢𑀺 𑀧𑀤𑀼𑀫𑀸𑀤𑀻𑀲𑀼 𑀧𑀗𑁆𑀓𑀚𑀸𑀤𑀺𑀲𑀤𑁆𑀤𑀸 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀪𑀸𑀯𑁂𑀢𑀺 𑀘𑀸𑀢𑀺 𑀲𑀤𑁆𑀤𑀮𑀓𑁆𑀔𑀡𑀲𑀺𑀤𑁆𑀥𑀲𑁆𑀲 𑀘𑀓𑁆𑀔𑀢𑀺-𑀲𑀤𑁆𑀤𑀲𑁆𑀲 𑀯𑀲𑁂𑀦 𑀅𑀢𑁆𑀣𑀁 𑀯𑀤𑀢𑀺. 𑀘𑀓𑁆𑀔𑀢𑀻𑀢𑀺 𑀳𑀺 𑀆𑀘𑀺𑀓𑁆𑀔𑀢𑀺, 𑀅𑀪𑀺𑀩𑁆𑀬𑀢𑁆𑀢𑀁 𑀯𑀤𑀢𑀻𑀢𑀺 𑀅𑀢𑁆𑀣𑁄. 𑀦𑀬𑀦𑀲𑁆𑀲 𑀘 𑀯𑀤𑀦𑁆𑀢𑀲𑁆𑀲 𑀯𑀺𑀬 𑀲𑀫𑀯𑀺𑀲𑀫𑀯𑀺𑀪𑀸𑀯𑀦𑀫𑁂𑀯 𑀆𑀘𑀺𑀓𑁆𑀔𑀦𑀦𑁆𑀢𑀺 𑀓𑀢𑁆𑀯𑀸 𑀆𑀳 ‘‘𑀯𑀺𑀪𑀸𑀯𑁂𑀢𑀺 𑀘𑀸𑀢𑀺 𑀅𑀢𑁆𑀣𑁄’’𑀢𑀺. 𑀅𑀦𑁂𑀓𑀢𑁆𑀣𑀢𑁆𑀢𑀸 𑀯𑀸 𑀥𑀸𑀢𑀽𑀦𑀁 𑀯𑀺𑀪𑀸𑀯𑀦𑀢𑁆𑀣𑀢𑀸 𑀘𑀓𑁆𑀔𑀼-𑀲𑀤𑁆𑀤𑀲𑁆𑀲 𑀤𑀝𑁆𑀞𑀩𑁆𑀩𑀸. 𑀭𑀢𑁆𑀢𑀤𑀼𑀝𑁆𑀞𑀸𑀤𑀺𑀓𑀸𑀮𑁂𑀲𑀼 𑀓𑀓𑀡𑁆𑀝𑀓𑀭𑀽𑀧𑀁 𑀯𑀺𑀬 𑀉𑀤𑁆𑀤𑀭𑀽𑀧𑀁 𑀯𑀺𑀬 𑀘 𑀯𑀡𑁆𑀡𑀯𑀺𑀓𑀸𑀭𑀁 𑀆𑀧𑀚𑁆𑀚𑀫𑀸𑀦𑀁 𑀭𑀽𑀧𑀁 𑀳𑀤𑀬𑀗𑁆𑀕𑀢𑀪𑀸𑀯𑀁 𑀭𑀽𑀧𑀬𑀢𑀺 𑀭𑀽𑀧𑀫𑀺𑀯 𑀧𑀓𑀸𑀲𑀁 𑀓𑀭𑁄𑀢𑀺, 𑀲𑀯𑀺𑀕𑁆𑀕𑀳𑀫𑀺𑀯 𑀓𑀢𑁆𑀯𑀸 𑀤𑀲𑁆𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀢𑁆𑀣𑀸𑀭𑀡𑀁 𑀯𑀸 𑀭𑀽𑀧-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄, 𑀯𑀺𑀢𑁆𑀣𑀸𑀭𑀡𑀜𑁆𑀘 𑀧𑀓𑀸𑀲𑀦𑀫𑁂𑀯𑀸𑀢𑀺 𑀆𑀳 ‘‘𑀧𑀓𑀸𑀲𑁂𑀢𑀻’’𑀢𑀺. 𑀅𑀦𑁂𑀓𑀢𑁆𑀣𑀢𑁆𑀢𑀸 𑀯𑀸 𑀥𑀸𑀢𑀽𑀦𑀁 𑀧𑀓𑀸𑀲𑀦𑀢𑁆𑀣𑁄𑀬𑁂𑀯 𑀭𑀽𑀧-𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄, 𑀯𑀡𑁆𑀡𑀯𑀸𑀘𑀓𑀲𑁆𑀲 𑀭𑀽𑀧-𑀲𑀤𑁆𑀤𑀲𑁆𑀲 𑀭𑀽𑀧𑀬𑀢𑀻𑀢𑀺 𑀦𑀺𑀩𑁆𑀩𑀘𑀦𑀁, 𑀭𑀽𑀧𑀯𑀸𑀘𑀓𑀲𑁆𑀲 𑀭𑀼𑀧𑁆𑀧𑀢𑀻𑀢𑀺 𑀅𑀬𑀁 𑀯𑀺𑀲𑁂𑀲𑁄.

𑀉𑀤𑀸𑀳𑀭𑀻𑀬𑀢𑀻𑀢𑀺 𑀯𑀼𑀘𑁆𑀘𑀢𑀻𑀢𑀺-𑀅𑀢𑁆𑀣𑁂 𑀯𑀘𑀦𑀫𑁂𑀯 𑀕𑀳𑀺𑀢𑀁 𑀲𑀺𑀬𑀸, 𑀦 𑀘 𑀯𑀘𑀦-𑀲𑀤𑁆𑀤𑁄𑀬𑁂𑀯 𑀏𑀢𑁆𑀣 𑀲𑀤𑁆𑀤𑁄, 𑀅𑀣 𑀔𑁄 𑀲𑀩𑁆𑀩𑁄𑀧𑀺 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀲𑀧𑁆𑀧𑀢𑀻𑀢𑀺 𑀲𑀓𑁂𑀳𑀺 𑀧𑀘𑁆𑀘𑀬𑁂𑀳𑀺 𑀲𑀧𑁆𑀧𑀻𑀬𑀢𑀺 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀪𑀸𑀯𑀁 𑀕𑀫𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀲𑀽𑀘𑀬𑀢𑀻𑀢𑀺 𑀅𑀢𑁆𑀢𑀦𑁄 𑀯𑀢𑁆𑀣𑀼𑀁 𑀕𑀦𑁆𑀥𑀯𑀲𑁂𑀦 𑀅𑀧𑀸𑀓𑀝𑀁 ‘‘𑀇𑀤𑀁 𑀲𑀼𑀕𑀦𑁆𑀥𑀁 ¶ 𑀤𑀼𑀕𑁆𑀕𑀦𑁆𑀥’’𑀦𑁆𑀢𑀺 𑀧𑀓𑀸𑀲𑁂𑀢𑀺, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀧𑀼𑀧𑁆𑀨𑀸𑀤𑀺𑀯𑀢𑁆𑀣𑀼𑀁 ‘‘𑀏𑀢𑁆𑀣 𑀧𑀼𑀧𑁆𑀨𑀁 𑀅𑀢𑁆𑀣𑀺 𑀘𑀫𑁆𑀧𑀓𑀸𑀤𑀺, 𑀨𑀮𑀫𑀢𑁆𑀣𑀺 𑀅𑀫𑁆𑀩𑀸𑀤𑀻’’𑀢𑀺 𑀧𑁂𑀲𑀼𑀜𑁆𑀜𑀁 𑀓𑀭𑁄𑀦𑁆𑀢𑀁 𑀯𑀺𑀬 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀭𑀲𑀕𑁆𑀕𑀳𑀡𑀫𑀽𑀮𑀓𑀢𑁆𑀢𑀸 𑀆𑀳𑀸𑀭𑀚𑁆𑀛𑁄𑀳𑀭𑀡𑀲𑁆𑀲 𑀚𑀻𑀯𑀺𑀢𑀳𑁂𑀢𑀼𑀫𑁆𑀳𑀺 𑀆𑀳𑀸𑀭𑀭𑀲𑁂 𑀦𑀺𑀦𑁆𑀦𑀢𑀸𑀬 𑀚𑀻𑀯𑀺𑀢𑀁 𑀅𑀯𑁆𑀳𑀸𑀬𑀢𑀻𑀢𑀺 𑀚𑀺𑀯𑁆𑀳𑀸 𑀯𑀼𑀢𑁆𑀢𑀸 𑀦𑀺𑀭𑀼𑀢𑁆𑀢𑀺𑀮𑀓𑁆𑀔𑀡𑁂𑀦. 𑀓𑀼𑀘𑁆𑀙𑀺𑀢𑀸𑀦𑀁 𑀲𑀸𑀲𑀯𑀥𑀫𑁆𑀫𑀸𑀦𑀁 𑀆𑀬𑁄𑀢𑀺 𑀯𑀺𑀲𑁂𑀲𑁂𑀦 𑀓𑀸𑀬𑁄 𑀯𑀼𑀢𑁆𑀢𑁄 𑀅𑀦𑀼𑀢𑁆𑀢𑀭𑀺𑀬𑀳𑁂𑀢𑀼𑀪𑀸𑀯𑀁 𑀅𑀦𑀸𑀕𑀘𑁆𑀙𑀦𑁆𑀢𑁂𑀲𑀼 𑀓𑀸𑀫𑀭𑀸𑀕𑀦𑀺𑀤𑀸𑀦𑀓𑀫𑁆𑀫𑀚𑀦𑀺𑀢𑁂𑀲𑀼 𑀓𑀸𑀫𑀭𑀸𑀕𑀲𑁆𑀲 𑀘 𑀯𑀺𑀲𑁂𑀲𑀧𑀘𑁆𑀘𑀬𑁂𑀲𑀼 ¶ 𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑁂𑀲𑀼 𑀓𑀸𑀬𑀲𑁆𑀲 𑀯𑀺𑀲𑁂𑀲𑀢𑀭𑀲𑀸𑀲𑀯𑀧𑀘𑁆𑀘𑀬𑀢𑁆𑀢𑀸. 𑀢𑁂𑀦 𑀳𑀺 𑀨𑁄𑀝𑁆𑀞𑀩𑁆𑀩𑀁 𑀅𑀲𑁆𑀲𑀸𑀤𑁂𑀦𑁆𑀢𑀸 𑀲𑀢𑁆𑀢𑀸 𑀫𑁂𑀣𑀼𑀦𑀫𑁆𑀧𑀺 𑀲𑁂𑀯𑀦𑁆𑀢𑀺. 𑀉𑀧𑁆𑀧𑀢𑁆𑀢𑀺𑀤𑁂𑀲𑁄𑀢𑀺 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀓𑀸𑀬𑀺𑀦𑁆𑀤𑁆𑀭𑀺𑀬𑀯𑀢𑁆𑀣𑀼𑀓𑀸 𑀯𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀩𑀮𑀯𑀓𑀸𑀫𑀸𑀲𑀯𑀸𑀤𑀺𑀳𑁂𑀢𑀼𑀪𑀸𑀯𑀢𑁄 𑀯𑀺𑀲𑁂𑀲𑁂𑀦 ‘‘𑀲𑀸𑀲𑀯𑀸’’𑀢𑀺 𑀯𑀼𑀢𑁆𑀢𑀸, 𑀢𑁂𑀲𑀁 𑀉𑀧𑁆𑀧𑀚𑁆𑀚𑀦𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀦𑁄 𑀮𑀓𑁆𑀔𑀡𑀁 𑀥𑀸𑀭𑀬𑀦𑁆𑀢𑀻𑀢𑀺 𑀬𑁂 𑀯𑀺𑀲𑁂𑀲𑀮𑀓𑁆𑀔𑀡𑁂𑀦 𑀆𑀬𑀢𑀦𑀲𑀤𑁆𑀤𑀧𑀭𑀸 𑀯𑀢𑁆𑀢𑀩𑁆𑀩𑀸, 𑀢𑁂 𑀘𑀓𑁆𑀔𑀸𑀤𑀬𑁄 𑀢𑀣𑀸 𑀯𑀼𑀢𑁆𑀢𑀸𑀢𑀺 𑀅𑀜𑁆𑀜𑁂 𑀫𑀦𑁄𑀕𑁄𑀘𑀭𑀪𑀽𑀢𑀸 𑀥𑀫𑁆𑀫𑀸 𑀲𑀸𑀫𑀜𑁆𑀜𑀮𑀓𑁆𑀔𑀡𑁂𑀦𑁂𑀯 𑀏𑀓𑀸𑀬𑀢𑀦𑀢𑁆𑀢𑀁 𑀉𑀧𑀦𑁂𑀢𑁆𑀯𑀸 𑀯𑀼𑀢𑁆𑀢𑀸. 𑀑𑀴𑀸𑀭𑀺𑀓𑀯𑀢𑁆𑀣𑀸𑀭𑀫𑁆𑀫𑀡𑀫𑀦𑀦𑀲𑀗𑁆𑀔𑀸𑀢𑁂𑀳𑀺 𑀯𑀺𑀲𑀬𑀯𑀺𑀲𑀬𑀺𑀪𑀸𑀯𑁂𑀳𑀺 𑀧𑀼𑀭𑀺𑀫𑀸𑀦𑀺 𑀧𑀸𑀓𑀝𑀸𑀦𑀻𑀢𑀺 𑀢𑀣𑀸 𑀅𑀧𑀸𑀓𑀝𑀸 𑀘 𑀅𑀜𑁆𑀜𑁂 𑀫𑀦𑁄𑀕𑁄𑀘𑀭𑀸 𑀦 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀦 𑀥𑀸𑀭𑁂𑀦𑁆𑀢𑀻𑀢𑀺 𑀇𑀫𑀲𑁆𑀲𑀢𑁆𑀣𑀲𑁆𑀲 𑀤𑀻𑀧𑀦𑀢𑁆𑀣𑁄 𑀥𑀫𑁆𑀫-𑀲𑀤𑁆𑀤𑁄𑀢𑀺.

𑀯𑀸𑀬𑀫𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀺𑀘𑁆𑀘𑁂𑀯 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀜𑁆𑀘 𑀅𑀢𑁆𑀣𑁂 𑀆𑀬𑀢𑀦𑁆𑀢𑀺 𑀏𑀢𑁆𑀣𑀸𑀢𑀺 𑀆𑀬𑀢𑀦𑀦𑁆𑀢𑀺 𑀅𑀥𑀺𑀓𑀭𑀡𑀢𑁆𑀣𑁄 𑀆𑀬𑀢𑀦-𑀲𑀤𑁆𑀤𑁄, 𑀤𑀼𑀢𑀺𑀬𑀢𑀢𑀺𑀬𑁂𑀲𑀼 𑀓𑀢𑁆𑀢𑀼𑀅𑀢𑁆𑀣𑁄. 𑀢𑁂 𑀘𑀸𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀥𑀫𑁆𑀫𑁂. 𑀢𑁂 𑀳𑀺 𑀢𑀁𑀢𑀁𑀤𑁆𑀯𑀸𑀭𑀸𑀭𑀫𑁆𑀫𑀡𑁂𑀲𑀼 𑀆𑀬𑀦𑁆𑀢𑀺 𑀆𑀕𑀘𑁆𑀙𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀆𑀬𑀸𑀢𑀺. 𑀯𑀺𑀢𑁆𑀣𑀸𑀭𑁂𑀦𑁆𑀢𑀻𑀢𑀺 𑀧𑀼𑀩𑁆𑀩𑁂 𑀅𑀦𑀼𑀧𑁆𑀧𑀦𑁆𑀦𑀢𑁆𑀢𑀸 𑀮𑀻𑀦𑀸𑀦𑀺 𑀅𑀧𑀸𑀓𑀝𑀸𑀦𑀺 𑀧𑀼𑀩𑁆𑀩𑀦𑁆𑀢𑀢𑁄 𑀉𑀤𑁆𑀥𑀁 𑀧𑀲𑀸𑀭𑁂𑀦𑁆𑀢𑀺 𑀧𑀸𑀓𑀝𑀸𑀦𑀺 𑀓𑀭𑁄𑀦𑁆𑀢𑀺 𑀉𑀧𑁆𑀧𑀸𑀤𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀭𑀼𑀴𑁆𑀳𑀻𑀯𑀲𑁂𑀦 𑀆𑀬𑀢𑀦-𑀲𑀤𑁆𑀤𑀲𑁆𑀲𑀢𑁆𑀣𑀁 𑀯𑀢𑁆𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀁 𑀦𑀺𑀲𑁆𑀲𑀺𑀢𑀢𑁆𑀢𑀸𑀢𑀺 𑀏𑀢𑁆𑀣 𑀫𑀦𑁄 𑀫𑀦𑁄𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺 𑀢𑀲𑁆𑀲 𑀦𑁂𑀲𑀁 𑀤𑁆𑀯𑀸𑀭𑀪𑀸𑀯𑁄 𑀦𑀺𑀲𑁆𑀲𑀬𑀪𑀸𑀯𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀅𑀢𑁆𑀣𑀢𑁄𑀢𑀺 𑀯𑀘𑀦𑀢𑁆𑀣𑀢𑁄, 𑀦 𑀯𑀘𑀦𑀻𑀬𑀢𑁆𑀣𑀢𑁄. 𑀯𑀘𑀦𑀢𑁆𑀣𑁄 𑀳𑁂𑀢𑁆𑀣 𑀯𑀼𑀢𑁆𑀢𑁄 ‘‘𑀘𑀓𑁆𑀔𑀢𑀻’’𑀢𑀺𑀆𑀤𑀺𑀦𑀸, 𑀦 𑀯𑀘𑀦𑀻𑀬𑀢𑁆𑀣𑁄 ‘‘𑀬𑀁 𑀘𑀓𑁆𑀔𑀼 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄’’𑀢𑀺𑀆𑀤𑀺𑀦𑀸 (𑀥. 𑀲. 𑁫𑁯𑁭) 𑀯𑀺𑀬𑀸𑀢𑀺.

𑀢𑀸𑀯𑀢𑁆𑀯𑀢𑁄𑀢𑀺 𑀅𑀦𑀽𑀦𑀸𑀥𑀺𑀓𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀤𑁆𑀯𑀸𑀤𑀲𑀸𑀬𑀢𑀦𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀓𑀲𑁆𑀲𑀘𑀺 𑀥𑀫𑁆𑀫𑀲𑁆𑀲 𑀅𑀪𑀸𑀯𑀸 𑀅𑀥𑀺𑀓𑀪𑀸𑀯𑀢𑁄 𑀘𑁄𑀤𑀦𑀸 𑀦𑀢𑁆𑀣𑀺, 𑀲𑀮𑀓𑁆𑀔𑀡𑀥𑀸𑀭𑀡𑀁 𑀧𑀦 𑀲𑀩𑁆𑀩𑁂𑀲𑀁 𑀲𑀸𑀫𑀜𑁆𑀜𑀮𑀓𑁆𑀔𑀡𑀦𑁆𑀢𑀺 𑀊𑀦𑀘𑁄𑀤𑀦𑀸 ¶ 𑀲𑀫𑁆𑀪𑀯𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀘𑀓𑁆𑀔𑀸𑀤𑀬𑁄𑀧𑀺 𑀳𑀻’’𑀢𑀺𑀆𑀤𑀺. 𑀅𑀲𑀸𑀥𑀸𑀭𑀡𑀦𑁆𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀅𑀲𑀸𑀥𑀸𑀭𑀡𑀁. 𑀲𑀢𑀺𑀧𑀺 𑀅𑀲𑀸𑀥𑀸𑀭𑀡𑀸𑀭𑀫𑁆𑀫𑀡𑀪𑀸𑀯𑁂 𑀘𑀓𑁆𑀔𑀸𑀤𑀻𑀦𑀁 𑀤𑁆𑀯𑀸𑀭𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸 𑀥𑀫𑁆𑀫𑀸𑀬𑀢𑀦𑁂 𑀅𑀕𑁆𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀤𑁆𑀯𑀸𑀭𑀸𑀭𑀫𑁆𑀫𑀡𑀪𑀸𑀯𑁂𑀳𑀺 𑀯𑀸 𑀅𑀲𑀸𑀥𑀸𑀭𑀡𑀢𑀁 𑀲𑀦𑁆𑀥𑀸𑀬 ‘‘𑀅𑀲𑀸𑀥𑀸𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀁.

𑀬𑁂𑀪𑀼𑀬𑁆𑀬𑀲𑀳𑀼𑀧𑁆𑀧𑀢𑁆𑀢𑀺𑀆𑀤𑀻𑀳𑀺 ¶ 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑀸𑀤𑀺𑀅𑀬𑀼𑀢𑁆𑀢𑀺 𑀬𑁄𑀚𑁂𑀢𑀩𑁆𑀩𑀸. 𑀅𑀚𑁆𑀛𑀢𑁆𑀢𑀺𑀓𑁂𑀲𑀼 𑀳𑀻𑀢𑀺 𑀏𑀢𑁂𑀦 𑀅𑀚𑁆𑀛𑀢𑁆𑀢𑀺𑀓𑀪𑀸𑀯𑁂𑀦 𑀯𑀺𑀲𑀬𑀺𑀪𑀸𑀯𑁂𑀦 𑀘 𑀅𑀚𑁆𑀛𑀢𑁆𑀢𑀺𑀓𑀸𑀦𑀁 𑀧𑀞𑀫𑀁 𑀤𑁂𑀲𑁂𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑀺. 𑀢𑁂𑀲𑀼 𑀳𑀺 𑀧𑀞𑀫𑀁 𑀤𑁂𑀲𑁂𑀢𑀩𑁆𑀩𑁂𑀲𑀼 𑀧𑀸𑀓𑀝𑀢𑁆𑀢𑀸 𑀧𑀞𑀫𑀢𑀭𑀁 𑀘𑀓𑁆𑀔𑀸𑀬𑀢𑀦𑀁 𑀤𑁂𑀲𑀺𑀢𑀦𑁆𑀢𑀺. 𑀢𑀢𑁄 𑀖𑀸𑀦𑀸𑀬𑀢𑀦𑀸𑀤𑀻𑀦𑀻𑀢𑀺 𑀏𑀢𑁆𑀣 𑀩𑀳𑀽𑀧𑀓𑀸𑀭𑀢𑁆𑀢𑀸𑀪𑀸𑀯𑁂𑀦 𑀘𑀓𑁆𑀔𑀼𑀲𑁄𑀢𑁂𑀳𑀺 𑀧𑀼𑀭𑀺𑀫𑀢𑀭𑀁 𑀅𑀤𑁂𑀲𑁂𑀢𑀩𑁆𑀩𑀸𑀦𑀺 𑀲𑀳 𑀯𑀢𑁆𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀏𑀓𑁂𑀦 𑀓𑀫𑁂𑀦 𑀤𑁂𑀲𑁂𑀢𑀩𑁆𑀩𑀸𑀦𑀻𑀢𑀺 𑀖𑀸𑀦𑀸𑀤𑀺𑀓𑁆𑀓𑀫𑁂𑀦 𑀤𑁂𑀲𑀺𑀢𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀜𑁆𑀜𑀣𑀸𑀧𑀺 𑀳𑀺 𑀤𑁂𑀲𑀺𑀢𑁂𑀲𑀼 𑀦 𑀦 𑀲𑀓𑁆𑀓𑀸 𑀘𑁄𑀤𑁂𑀢𑀼𑀁, 𑀦 𑀘 𑀲𑀓𑁆𑀓𑀸 𑀲𑁄𑀥𑁂𑀢𑀩𑁆𑀩𑀸𑀦𑀺 𑀦 𑀤𑁂𑀲𑁂𑀢𑀼𑀦𑁆𑀢𑀺. 𑀕𑁄𑀘𑀭𑁄 𑀯𑀺𑀲𑀬𑁄 𑀏𑀢𑀲𑁆𑀲𑀸𑀢𑀺 𑀕𑁄𑀘𑀭𑀯𑀺𑀲𑀬𑁄, 𑀫𑀦𑁄. 𑀓𑀲𑁆𑀲 𑀧𑀦 𑀕𑁄𑀘𑀭𑁄 𑀏𑀢𑀲𑁆𑀲 𑀯𑀺𑀲𑀬𑁄𑀢𑀺? 𑀘𑀓𑁆𑀔𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀫𑁆𑀧𑀺. 𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀯𑀯𑀢𑁆𑀣𑀸𑀦𑀢𑁄𑀢𑀺 𑀏𑀢𑁂𑀦 𑀘 𑀘𑀓𑁆𑀔𑀸𑀤𑀺𑀅𑀦𑀦𑁆𑀢𑀭𑀁 𑀭𑀽𑀧𑀸𑀤𑀺𑀯𑀘𑀦𑀲𑁆𑀲 𑀓𑀸𑀭𑀡𑀫𑀸𑀳.

𑀧𑀘𑁆𑀘𑀬𑀪𑁂𑀤𑁄 𑀓𑀫𑁆𑀫𑀸𑀤𑀺𑀪𑁂𑀤𑁄. 𑀦𑀺𑀭𑀬𑀸𑀤𑀺𑀓𑁄 𑀅𑀧𑀤𑀸𑀤𑀺𑀕𑀢𑀺𑀦𑀸𑀦𑀸𑀓𑀭𑀡𑀜𑁆𑀘 𑀕𑀢𑀺𑀪𑁂𑀤𑁄. 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀓𑁄 𑀔𑀢𑁆𑀢𑀺𑀬𑀸𑀤𑀺𑀓𑁄 𑀘 𑀦𑀺𑀓𑀸𑀬𑀪𑁂𑀤𑁄. 𑀢𑀁𑀢𑀁𑀲𑀢𑁆𑀢𑀲𑀦𑁆𑀢𑀸𑀦𑀪𑁂𑀤𑁄 𑀧𑀼𑀕𑁆𑀕𑀮𑀪𑁂𑀤𑁄. 𑀬𑀸 𑀘 𑀘𑀓𑁆𑀔𑀸𑀤𑀻𑀦𑀁 𑀯𑀢𑁆𑀣𑀽𑀦𑀁 𑀅𑀦𑀦𑁆𑀢𑀪𑁂𑀤𑀢𑀸 𑀯𑀼𑀢𑁆𑀢𑀸, 𑀲𑁄𑀬𑁂𑀯 𑀳𑀤𑀬𑀯𑀢𑁆𑀣𑀼𑀲𑁆𑀲 𑀘 𑀪𑁂𑀤𑁄 𑀳𑁄𑀢𑀺. 𑀢𑀢𑁄 𑀫𑀦𑀸𑀬𑀢𑀦𑀲𑁆𑀲 𑀅𑀦𑀦𑁆𑀢𑀧𑁆𑀧𑀪𑁂𑀤𑀢𑀸 𑀬𑁄𑀚𑁂𑀢𑀩𑁆𑀩𑀸 𑀤𑀼𑀓𑁆𑀔𑀸𑀧𑀝𑀺𑀧𑀤𑀸𑀤𑀺𑀢𑁄 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀆𑀤𑀺𑀪𑁂𑀤𑀢𑁄 𑀘. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀯𑀺𑀧𑀲𑁆𑀲𑀦𑀸 𑀯𑀼𑀢𑁆𑀢𑀸𑀢𑀺 𑀯𑀺𑀧𑀲𑁆𑀲𑀦𑀼𑀧𑀕𑀫𑀦𑀜𑁆𑀘 𑀯𑀺𑀜𑁆𑀜𑀸𑀡𑀁 𑀕𑀳𑁂𑀢𑁆𑀯𑀸 𑀏𑀓𑀸𑀲𑀻𑀢𑀺𑀪𑁂𑀤𑀢𑀸 𑀫𑀦𑀸𑀬𑀢𑀦𑀲𑁆𑀲 𑀯𑀼𑀢𑁆𑀢𑀸 𑀦𑀺𑀤𑁆𑀤𑁂𑀲𑀯𑀲𑁂𑀦. 𑀦𑀻𑀮𑀁 𑀦𑀻𑀮𑀲𑁆𑀲𑁂𑀯 𑀲𑀪𑀸𑀕𑀁, 𑀅𑀜𑁆𑀜𑀁 𑀯𑀺𑀲𑀪𑀸𑀕𑀁, 𑀏𑀯𑀁 𑀓𑀼𑀲𑀮𑀲𑀫𑀼𑀝𑁆𑀞𑀸𑀦𑀸𑀤𑀺𑀪𑁂𑀤𑁂𑀲𑀼 𑀬𑁄𑀚𑁂𑀢𑀩𑁆𑀩𑀁. 𑀢𑁂𑀪𑀽𑀫𑀓𑀥𑀫𑁆𑀫𑀸𑀭𑀫𑁆𑀫𑀡𑀯𑀲𑁂𑀦𑀸𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁 𑀘𑀓𑁆𑀔𑀸𑀤𑀺𑀯𑀚𑁆𑀚𑀁 𑀥𑀫𑁆𑀫𑀸𑀭𑀫𑁆𑀫𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀲𑀧𑀭𑀺𑀧𑁆𑀨𑀦𑁆𑀤𑀓𑀺𑀭𑀺𑀬𑀸𑀯𑀲𑁂𑀦 𑀈𑀳𑀦𑀁 𑀈𑀳𑀸. 𑀘𑀺𑀦𑁆𑀢𑀦𑀯𑀲𑁂𑀦 𑀩𑁆𑀬𑀸𑀧𑀸𑀭𑀓𑀭𑀡𑀁 𑀩𑁆𑀬𑀸𑀧𑀸𑀭𑁄. 𑀢𑀢𑁆𑀣 𑀩𑁆𑀬𑀸𑀧𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦 𑀳𑀺 𑀘𑀓𑁆𑀔𑀼 𑀭𑀽𑀧𑀸𑀤𑀻𑀦𑀁 𑀏𑀯𑀁 𑀳𑁄𑀢𑀻’’𑀢𑀺. 𑀈𑀳𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦 𑀘 𑀢𑀸𑀦𑀻’’𑀢𑀺𑀆𑀤𑀺. 𑀉𑀪𑀬𑀫𑁆𑀧𑀺 𑀧𑀦 𑀈𑀳𑀸 𑀘 𑀳𑁄𑀢𑀺 𑀩𑁆𑀬𑀸𑀧𑀸𑀭𑁄 𑀘𑀸𑀢𑀺 𑀉𑀧𑁆𑀧𑀝𑀺𑀧𑀸𑀝𑀺𑀯𑀘𑀦𑀁. 𑀥𑀫𑁆𑀫𑀢𑀸𑀯𑀸𑀢𑀺 𑀲𑀪𑀸𑀯𑁄𑀯, 𑀓𑀸𑀭𑀡𑀲𑀫𑀢𑁆𑀣𑀢𑀸 𑀯𑀸. 𑀈𑀳𑀸𑀩𑁆𑀬𑀸𑀧𑀸𑀭𑀭𑀳𑀺𑀢𑀸𑀦𑀁 𑀤𑁆𑀯𑀸𑀭𑀸𑀤𑀺𑀪𑀸𑀯𑁄 𑀥𑀫𑁆𑀫𑀢𑀸. 𑀇𑀫𑀲𑁆𑀫𑀺𑀜𑁆𑀘 𑀅𑀢𑁆𑀣𑁂 𑀬𑀦𑁆𑀢𑀺 𑀏𑀢𑀲𑁆𑀲 𑀬𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀧𑀼𑀭𑀺𑀫𑀲𑁆𑀫𑀺𑀁 𑀲𑀫𑁆𑀪𑀯𑀦𑀯𑀺𑀲𑁂𑀲𑀦𑀁 𑀬𑀁-𑀲𑀤𑁆𑀤𑁄. ‘‘𑀲𑀼𑀜𑁆𑀜𑁄 ¶ 𑀕𑀸𑀫𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀦𑁆𑀦𑁂𑀢𑀁 𑀅𑀚𑁆𑀛𑀢𑁆𑀢𑀺𑀓𑀸𑀦𑀁 𑀆𑀬𑀢𑀦𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀲𑀁. 𑀦𑀺. 𑁪.𑁨𑁩𑁮) 𑀯𑀘𑀦𑀢𑁄 𑀲𑀼𑀜𑁆𑀜𑀕𑀸𑀫𑁄 𑀯𑀺𑀬 𑀤𑀝𑁆𑀞𑀩𑁆𑀩𑀸𑀦𑀺. 𑀅𑀦𑁆𑀦𑀧𑀸𑀦𑀲𑀫𑁄𑀳𑀺𑀢𑀦𑁆𑀢𑀺 ¶ 𑀕𑀳𑀺𑀢𑁂 𑀲𑀼𑀜𑁆𑀜𑀕𑀸𑀫𑁂 𑀬𑀜𑁆𑀜𑀤𑁂𑀯 𑀪𑀸𑀚𑀦𑀁 𑀧𑀭𑀸𑀫𑀲𑀻𑀬𑀢𑀺, 𑀢𑀁 𑀢𑀁 𑀭𑀺𑀢𑁆𑀢𑀓𑀁𑀬𑁂𑀯 𑀧𑀭𑀸𑀫𑀲𑀻𑀬𑀢𑀺, 𑀏𑀯𑀁 𑀥𑀼𑀯𑀸𑀤𑀺𑀪𑀸𑀯𑁂𑀦 𑀕𑀳𑀺𑀢𑀸𑀦𑀺 𑀉𑀧𑀧𑀭𑀺𑀓𑁆𑀔𑀺𑀬𑀫𑀸𑀦𑀸𑀦𑀺 𑀭𑀺𑀢𑁆𑀢𑀓𑀸𑀦𑁂𑀯 𑀏𑀢𑀸𑀦𑀺 𑀤𑀺𑀲𑁆𑀲𑀦𑁆𑀢𑀻𑀢𑀺. 𑀘𑀓𑁆𑀔𑀸𑀤𑀺𑀤𑁆𑀯𑀸𑀭𑁂𑀲𑀼 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀼𑀧𑁆𑀧𑀸𑀤𑀓𑀪𑀸𑀯𑁂𑀦 𑀭𑀽𑀧𑀸𑀤𑀻𑀦𑀺 𑀘𑀓𑁆𑀔𑀸𑀤𑀻𑀦𑀁 𑀅𑀪𑀺𑀖𑀸𑀢𑀓𑀸𑀦𑀻𑀢𑀺 𑀯𑀼𑀢𑁆𑀢𑀸𑀦𑀺. 𑀅𑀳𑀺𑀲𑀼𑀲𑀼𑀫𑀸𑀭𑀧𑀓𑁆𑀔𑀺𑀓𑀼𑀓𑁆𑀓𑀼𑀭𑀲𑀺𑀗𑁆𑀕𑀸𑀮𑀫𑀓𑁆𑀓𑀝𑀸 𑀙 𑀧𑀸𑀡𑀓𑀸. 𑀯𑀺𑀲𑀫𑀩𑀺𑀮𑀸𑀓𑀸𑀲𑀕𑀸𑀫𑀲𑀼𑀲𑀸𑀦𑀯𑀦𑀸𑀦𑀺 𑀢𑁂𑀲𑀁 𑀕𑁄𑀘𑀭𑀸. 𑀢𑀢𑁆𑀣 𑀯𑀺𑀲𑀫𑀸𑀤𑀺𑀅𑀚𑁆𑀛𑀸𑀲𑀬𑁂𑀳𑀺 𑀘𑀓𑁆𑀔𑀸𑀤𑀻𑀳𑀺 𑀯𑀺𑀲𑀫𑀪𑀸𑀯𑀩𑀺𑀮𑀸𑀓𑀸𑀲𑀕𑀸𑀫𑀲𑀼𑀲𑀸𑀦𑀲𑀦𑁆𑀦𑀺𑀲𑁆𑀲𑀺𑀢𑀲𑀤𑀺𑀲𑀼𑀧𑀸𑀤𑀺𑀦𑁆𑀦𑀥𑀫𑁆𑀫𑀯𑀦𑀪𑀸𑀯𑁂𑀳𑀺 𑀅𑀪𑀺𑀭𑀫𑀺𑀢𑀢𑁆𑀢𑀸 𑀭𑀽𑀧𑀸𑀤𑀻𑀦𑀫𑁆𑀧𑀺 𑀯𑀺𑀲𑀫𑀸𑀤𑀺𑀲𑀤𑀺𑀲𑀢𑀸 𑀬𑁄𑀚𑁂𑀢𑀩𑁆𑀩𑀸.

𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦𑀸𑀢𑀺 𑀇𑀤𑀁 𑀇𑀢𑀭𑁂𑀲𑀁 𑀘𑀢𑀼𑀦𑁆𑀦𑀁 𑀆𑀓𑀸𑀭𑀸𑀦𑀁 𑀲𑀗𑁆𑀕𑀳𑀓𑀢𑁆𑀢𑀸 𑀯𑀺𑀲𑀼𑀁 𑀯𑀼𑀢𑁆𑀢𑀁. 𑀳𑀼𑀢𑁆𑀯𑀸 𑀅𑀪𑀸𑀯𑀸𑀓𑀸𑀭𑁄 𑀏𑀯 𑀳𑀺 𑀉𑀧𑁆𑀧𑀸𑀤𑀯𑀬𑀢𑁆𑀢𑀸𑀓𑀸𑀭𑀸𑀤𑀬𑁄𑀢𑀺. 𑀢𑀢𑁆𑀣 𑀳𑀼𑀢𑁆𑀯𑀸𑀢𑀺 𑀏𑀢𑁂𑀦 𑀧𑀼𑀭𑀺𑀫𑀦𑁆𑀢𑀯𑀺𑀯𑀺𑀢𑁆𑀢𑀢𑀸𑀧𑀼𑀩𑁆𑀩𑀓𑀁 𑀫𑀚𑁆𑀛𑁂 𑀯𑀺𑀚𑁆𑀚𑀫𑀸𑀦𑀢𑀁 𑀤𑀲𑁆𑀲𑁂𑀢𑀺, 𑀢𑀁 𑀯𑀢𑁆𑀯𑀸 𑀅𑀪𑀸𑀯𑀯𑀘𑀦𑁂𑀦 𑀫𑀚𑁆𑀛𑁂 𑀯𑀺𑀚𑁆𑀚𑀫𑀸𑀦𑀢𑀸𑀧𑀼𑀩𑁆𑀩𑀓𑀁, 𑀅𑀧𑀭𑀦𑁆𑀢𑁂 𑀅𑀯𑀺𑀚𑁆𑀚𑀫𑀸𑀦𑀢𑀁, 𑀉𑀪𑀬𑁂𑀦𑀧𑀺 𑀲𑀤𑀸 𑀅𑀪𑀸𑀯𑁄 𑀅𑀦𑀺𑀘𑁆𑀘𑀮𑀓𑁆𑀔𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑀪𑀸𑀯𑀯𑀺𑀚𑀳𑀦𑀁 𑀯𑀺𑀧𑀭𑀺𑀡𑀸𑀫𑁄, 𑀚𑀭𑀸𑀪𑀗𑁆𑀕𑁂𑀳𑀺 𑀯𑀸 𑀧𑀭𑀺𑀯𑀢𑁆𑀢𑀦𑀁, 𑀲𑀦𑁆𑀢𑀸𑀦𑀯𑀺𑀓𑀸𑀭𑀸𑀧𑀢𑁆𑀢𑀺 𑀯𑀸. 𑀲𑀤𑀸 𑀅𑀪𑀸𑀯𑁂𑀧𑀺 𑀘𑀺𑀭𑀝𑁆𑀞𑀸𑀦𑀁 𑀲𑀺𑀬𑀸𑀢𑀺 𑀢𑀁𑀦𑀺𑀯𑀸𑀭𑀡𑀢𑁆𑀣𑀁 ‘‘𑀢𑀸𑀯𑀓𑀸𑀮𑀺𑀓𑀢𑁄’’𑀢𑀺 𑀆𑀳. 𑀉𑀧𑁆𑀧𑀸𑀤𑀯𑀬𑀜𑁆𑀜𑀣𑀢𑁆𑀢𑀭𑀳𑀺𑀢𑀁 𑀦𑀺𑀘𑁆𑀘𑀁, 𑀦 𑀇𑀢𑀭𑀣𑀸𑀢𑀺 𑀦𑀺𑀘𑁆𑀘𑀧𑀝𑀺𑀓𑁆𑀔𑁂𑀧𑀢𑁄 𑀅𑀦𑀺𑀘𑁆𑀘𑀁, 𑀦𑀺𑀘𑁆𑀘𑀧𑀝𑀺𑀧𑀓𑁆𑀔𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀚𑀸𑀢𑀺𑀥𑀫𑁆𑀫𑀢𑀸𑀤𑀻𑀳𑀺 𑀅𑀦𑀺𑀝𑁆𑀞𑀢𑀸 𑀧𑀝𑀺𑀧𑀻𑀴𑀦𑀁. 𑀧𑀝𑀺𑀧𑀻𑀴𑀦𑀝𑁆𑀞𑁂𑀦𑀸𑀢𑀺 𑀘 𑀬𑀲𑁆𑀲 𑀢𑀁 𑀧𑀯𑀢𑁆𑀢𑀢𑀺, 𑀢𑀁 𑀧𑀼𑀕𑁆𑀕𑀮𑀁 𑀧𑀝𑀺𑀧𑀻𑀴𑀦𑀢𑁄, 𑀲𑀬𑀁 𑀯𑀸 𑀚𑀭𑀸𑀤𑀻𑀳𑀺 𑀧𑀝𑀺𑀧𑀻𑀴𑀦𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀢𑁆𑀢𑀝𑁆𑀞𑀺𑀢𑀺𑀓𑀲𑁆𑀲𑀧𑀺 𑀅𑀢𑁆𑀢𑀦𑁄 𑀯𑀺𑀚𑁆𑀚𑀫𑀸𑀦𑀓𑁆𑀔𑀡𑁂 𑀉𑀧𑁆𑀧𑀸𑀤𑀸𑀤𑀻𑀳𑀺 𑀅𑀪𑀺𑀡𑁆𑀳𑀁 𑀲𑀫𑁆𑀧𑀝𑀺𑀧𑀻𑀴𑀦𑀢𑁆𑀢𑀸 ‘‘𑀅𑀪𑀺𑀡𑁆𑀳𑀲𑀫𑁆𑀧𑀝𑀺𑀧𑀻𑀴𑀦𑀢𑁄’’𑀢𑀺 𑀧𑀼𑀭𑀺𑀫𑀁 𑀲𑀸𑀫𑀜𑁆𑀜𑀮𑀓𑁆𑀔𑀡𑀁 𑀯𑀺𑀲𑁂𑀲𑁂𑀢𑁆𑀯𑀸 𑀯𑀤𑀢𑀺, 𑀧𑀼𑀕𑁆𑀕𑀮𑀲𑁆𑀲 𑀧𑀻𑀴𑀦𑀢𑁄 𑀤𑀼𑀓𑁆𑀔𑀫𑀁. 𑀲𑀼𑀔𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀤𑀼𑀓𑁆𑀔𑀁 𑀲𑀼𑀔𑀁 𑀧𑀝𑀺𑀓𑁆𑀔𑀺𑀧𑀢𑀺 𑀦𑀺𑀯𑀸𑀭𑁂𑀢𑀺, 𑀤𑀼𑀓𑁆𑀔𑀯𑀘𑀦𑀁 𑀯𑀸 𑀅𑀢𑁆𑀣𑀢𑁄 𑀲𑀼𑀔𑀁 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀆𑀳 ‘‘𑀲𑀼𑀔𑀧𑀝𑀺𑀓𑁆𑀔𑁂𑀧𑀢𑁄’’𑀢𑀺.

𑀦𑀢𑁆𑀣𑀺 𑀏𑀢𑀲𑁆𑀲 𑀯𑀲𑀯𑀢𑁆𑀢𑀦𑀓𑁄, 𑀦𑀸𑀧𑀺 𑀇𑀤𑀁 𑀯𑀲𑀯𑀢𑁆𑀢𑀦𑀓𑀦𑁆𑀢𑀺 𑀅𑀯𑀲𑀯𑀢𑁆𑀢𑀦𑀓𑀁, 𑀅𑀢𑁆𑀢𑀦𑁄 𑀧𑀭𑀲𑁆𑀫𑀺𑀁 𑀧𑀭𑀲𑁆𑀲 𑀘 𑀅𑀢𑁆𑀢𑀦𑀺 𑀯𑀲𑀯𑀢𑁆𑀢𑀦𑀪𑀸𑀯𑁄 𑀯𑀸 𑀯𑀲𑀯𑀢𑁆𑀢𑀦𑀓𑀁, 𑀢𑀁 𑀏𑀢𑀲𑁆𑀲 𑀦𑀢𑁆𑀣𑀻𑀢𑀺 𑀅𑀯𑀲𑀯𑀢𑁆𑀢𑀦𑀓𑀁, 𑀅𑀯𑀲𑀯𑀢𑁆𑀢𑀦𑀓𑀲𑁆𑀲 𑀅𑀯𑀲𑀯𑀢𑁆𑀢𑀦𑀓𑁄 𑀯𑀸 𑀅𑀢𑁆𑀣𑁄 𑀲𑀪𑀸𑀯𑁄 𑀅𑀯𑀲𑀯𑀢𑁆𑀢𑀦𑀓𑀝𑁆𑀞𑁄, 𑀇𑀤𑀜𑁆𑀘 𑀲𑀸𑀫𑀜𑁆𑀜𑀮𑀓𑁆𑀔𑀡𑀁. 𑀢𑁂𑀦𑀸𑀢𑀺 𑀧𑀭𑀲𑁆𑀲 𑀅𑀢𑁆𑀢𑀦𑀺 𑀯𑀲𑀯𑀢𑁆𑀢𑀦𑀸𑀓𑀸𑀭𑁂𑀦 𑀲𑀼𑀜𑁆𑀜𑀁. 𑀇𑀫𑀲𑁆𑀫𑀺𑀜𑁆𑀘 𑀅𑀢𑁆𑀣𑁂 𑀲𑀼𑀜𑁆𑀜𑀢𑁄𑀢𑀺 𑀏𑀢𑀲𑁆𑀲𑁂𑀯 ¶ 𑀯𑀺𑀲𑁂𑀲𑀦𑀁 ‘‘𑀅𑀲𑁆𑀲𑀸𑀫𑀺𑀓𑀢𑁄’’𑀢𑀺. 𑀅𑀣 𑀯𑀸 ‘‘𑀬𑀲𑁆𑀫𑀸 ¶ 𑀯𑀸 𑀏𑀢𑀁…𑀧𑁂… 𑀫𑀸 𑀧𑀸𑀧𑀼𑀡𑀸𑀢𑀽’’𑀢𑀺 𑀏𑀯𑀁 𑀘𑀺𑀦𑁆𑀢𑀬𑀫𑀸𑀦𑀲𑁆𑀲 𑀓𑀲𑁆𑀲𑀘𑀺 𑀢𑀻𑀲𑀼 𑀞𑀸𑀦𑁂𑀲𑀼 𑀯𑀲𑀯𑀢𑁆𑀢𑀦𑀪𑀸𑀯𑁄 𑀦𑀢𑁆𑀣𑀺, 𑀲𑀼𑀜𑁆𑀜𑀁 𑀢𑀁 𑀢𑁂𑀦 𑀅𑀢𑁆𑀢𑀦𑁄𑀬𑁂𑀯 𑀯𑀲𑀯𑀢𑁆𑀢𑀦𑀸𑀓𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀦 𑀇𑀤𑀁 𑀓𑀲𑁆𑀲𑀘𑀺 𑀓𑀸𑀫𑀓𑀸𑀭𑀺𑀬𑀁, 𑀦𑀸𑀧𑀺 𑀏𑀢𑀲𑁆𑀲 𑀓𑀺𑀜𑁆𑀘𑀺 𑀓𑀸𑀫𑀓𑀸𑀭𑀺𑀬𑀁 𑀅𑀢𑁆𑀣𑀻𑀢𑀺 𑀅𑀓𑀸𑀫𑀓𑀸𑀭𑀺𑀬𑀁. 𑀏𑀢𑁂𑀦 𑀅𑀯𑀲𑀯𑀢𑁆𑀢𑀦𑀢𑁆𑀣𑀁 𑀯𑀺𑀲𑁂𑀲𑁂𑀢𑁆𑀯𑀸 𑀤𑀲𑁆𑀲𑁂𑀢𑀺.

𑀯𑀺𑀪𑀯𑀕𑀢𑀺 𑀯𑀺𑀦𑀸𑀲𑀕𑀫𑀦𑀁. 𑀲𑀦𑁆𑀢𑀢𑀺𑀬𑀁 𑀪𑀯𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀬𑁂𑀯 𑀪𑀯𑀲𑀗𑁆𑀓𑀦𑁆𑀢𑀺𑀕𑀫𑀦𑀁. 𑀲𑀦𑁆𑀢𑀢𑀺𑀬𑀸 𑀬𑀣𑀸𑀧𑀯𑀢𑁆𑀢𑀸𑀓𑀸𑀭𑀯𑀺𑀚𑀳𑀦𑀁 𑀧𑀓𑀢𑀺𑀪𑀸𑀯𑀯𑀺𑀚𑀳𑀦𑀁. ‘‘𑀘𑀓𑁆𑀔𑀼 𑀅𑀦𑀺𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑁂 𑀘𑀓𑁆𑀔𑀼𑀅𑀦𑀺𑀘𑁆𑀘-𑀲𑀤𑁆𑀤𑀸𑀦𑀁 𑀏𑀓𑀢𑁆𑀣𑀢𑁆𑀢𑀸 𑀅𑀦𑀺𑀘𑁆𑀘𑀸𑀦𑀁 𑀲𑁂𑀲𑀥𑀫𑁆𑀫𑀸𑀦𑀫𑁆𑀧𑀺 𑀘𑀓𑁆𑀔𑀼𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺 𑀏𑀢𑀺𑀲𑁆𑀲𑀸 𑀘𑁄𑀤𑀦𑀸𑀬 𑀦𑀺𑀯𑀸𑀭𑀡𑀢𑁆𑀣𑀁 𑀯𑀺𑀲𑁂𑀲𑀲𑀸𑀫𑀜𑁆𑀜𑀮𑀓𑁆𑀔𑀡𑀯𑀸𑀘𑀓𑀸𑀦𑀜𑁆𑀘 𑀲𑀤𑁆𑀤𑀸𑀦𑀁 𑀏𑀓𑀤𑁂𑀲𑀲𑀫𑀼𑀤𑀸𑀬𑀩𑁄𑀥𑀦𑀯𑀺𑀲𑁂𑀲𑀁 𑀤𑀻𑀧𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳.

𑀓𑀺𑀁 𑀤𑀲𑁆𑀲𑀺𑀢𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀘𑀸𑀭𑀁 𑀓𑀣𑁂𑀦𑁆𑀢𑁂𑀦 𑀓𑀺𑀁 𑀮𑀓𑁆𑀔𑀡𑀁 𑀤𑀲𑁆𑀲𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀓𑀢𑀫𑀸 𑀘𑀸𑀦𑀦𑁆𑀤, 𑀅𑀦𑀢𑁆𑀢𑀲𑀜𑁆𑀜𑀸? 𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀅𑀭𑀜𑁆𑀜𑀕𑀢𑁄 𑀯𑀸 𑀭𑀼𑀓𑁆𑀔𑀫𑀽𑀮𑀕𑀢𑁄 𑀯𑀸 𑀲𑀼𑀜𑁆𑀜𑀸𑀕𑀸𑀭𑀕𑀢𑁄 𑀯𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 ‘𑀘𑀓𑁆𑀔𑀼 𑀅𑀦𑀢𑁆𑀢𑀸’𑀢𑀺…𑀧𑁂… ‘𑀥𑀫𑁆𑀫𑀸 𑀅𑀦𑀢𑁆𑀢𑀸’𑀢𑀺. 𑀇𑀢𑀺 𑀇𑀫𑁂𑀲𑀼 𑀙𑀲𑀼 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂𑀲𑀼 𑀆𑀬𑀢𑀦𑁂𑀲𑀼 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀻’’𑀢𑀺 (𑀅. 𑀦𑀺. 𑁧𑁦.𑁬𑁦) 𑀅𑀯𑀺𑀲𑁂𑀲𑁂𑀲𑀼 𑀆𑀬𑀢𑀦𑁂𑀲𑀼 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀯𑀼𑀢𑁆𑀢𑀸𑀢𑀺 𑀓𑀸𑀭𑀡𑀪𑀽𑀢𑀸𑀦𑀁 𑀘𑀓𑁆𑀔𑀸𑀤𑀻𑀦𑀁, 𑀨𑀮𑀪𑀽𑀢𑀸𑀦𑀜𑁆𑀘 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀓𑀸𑀭𑀡𑀨𑀮𑀫𑀢𑁆𑀢𑀢𑀸𑀬 𑀅𑀦𑀢𑁆𑀢𑀢𑀸𑀬 𑀅𑀦𑀢𑁆𑀢𑀮𑀓𑁆𑀔𑀡𑀯𑀺𑀪𑀸𑀯𑀦𑀢𑁆𑀣𑀸𑀬 𑀆𑀬𑀢𑀦𑀤𑁂𑀲𑀦𑀸𑀢𑀺 𑀆𑀳 ‘‘𑀤𑁆𑀯𑀸𑀤𑀲𑀦𑁆𑀦𑀁…𑀧𑁂… 𑀅𑀦𑀢𑁆𑀢𑀮𑀓𑁆𑀔𑀡’’𑀦𑁆𑀢𑀺. 𑀬𑀤𑀺𑀧𑀺 𑀅𑀦𑀺𑀘𑁆𑀘𑀤𑀼𑀓𑁆𑀔𑀮𑀓𑁆𑀔𑀡𑀸𑀦𑀺 𑀏𑀢𑁆𑀣 𑀤𑀲𑁆𑀲𑀺𑀢𑀸𑀦𑀺, 𑀢𑁂𑀳𑀺 𑀘 𑀅𑀦𑀢𑁆𑀢𑀮𑀓𑁆𑀔𑀡𑀫𑁂𑀯 𑀯𑀺𑀲𑁂𑀲𑁂𑀦 𑀤𑀲𑁆𑀲𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑁂𑀢𑀺 𑀘𑀸𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀲𑀫𑀸𑀧𑀦𑀢𑁆𑀣𑁄. 𑀇𑀘𑁆𑀘𑀲𑁆𑀲𑀸𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀬𑀣𑀸𑀲𑀫𑀸𑀧𑀺𑀢𑀲𑁆𑀲 𑀆𑀭𑁄𑀧𑁂𑀢𑀩𑁆𑀩𑀤𑁄𑀲𑀲𑁆𑀲 𑀦𑀺𑀤𑀲𑁆𑀲𑀦𑀢𑁆𑀣𑁄. 𑀏𑀯𑀦𑁆𑀢𑀺 ‘‘𑀘𑀓𑁆𑀔𑀼 𑀅𑀢𑁆𑀢𑀸’’𑀢𑀺 𑀏𑀯𑀁 𑀯𑀸𑀤𑁂 𑀲𑀢𑀻𑀢𑀺 𑀅𑀢𑁆𑀣𑁄. 𑀇𑀘𑁆𑀘𑀲𑁆𑀲𑀸𑀢𑀺 𑀯𑀸 𑀇𑀢𑀺-𑀲𑀤𑁆𑀤𑁄 ‘‘𑀇𑀢𑀺 𑀯𑀤𑀦𑁆𑀢𑀲𑁆𑀲𑀸’’𑀢𑀺 𑀧𑀭𑀯𑀸𑀤𑀺𑀲𑁆𑀲 𑀤𑁄𑀲𑀮𑀓𑁆𑀔𑀡𑀸𑀓𑀸𑀭𑀦𑀺𑀤𑀲𑁆𑀲𑀦𑀢𑁆𑀣𑁄. 𑀏𑀯𑀦𑁆𑀢𑀺 𑀤𑁄𑀲𑀕𑀫𑀦𑀧𑁆𑀧𑀓𑀸𑀭𑀦𑀺𑀤𑀲𑁆𑀲𑀦𑀢𑁆𑀣𑁄. 𑀭𑀽𑀧𑁂 𑀅𑀢𑁆𑀢𑀦𑀺 ‘‘𑀏𑀯𑀁 𑀫𑁂 𑀭𑀽𑀧𑀁 𑀳𑁄𑀢𑀽’’𑀢𑀺 𑀅𑀢𑁆𑀢𑀦𑀺𑀬𑁂 𑀯𑀺𑀬 𑀲𑀸𑀫𑀺𑀦𑀺𑀤𑁆𑀤𑁂𑀲𑀸𑀧𑀢𑁆𑀢𑀻𑀢𑀺 𑀘𑁂? 𑀦, ‘‘𑀫𑀫 𑀅𑀢𑁆𑀢𑀸’’𑀢𑀺 𑀕𑀳𑀺𑀢𑀢𑁆𑀢𑀸. ‘‘𑀫𑀫 𑀅𑀢𑁆𑀢𑀸’’𑀢𑀺 𑀳𑀺 𑀕𑀳𑀺𑀢𑀁 𑀭𑀽𑀧𑀁 𑀯𑀲𑀯𑀢𑁆𑀢𑀺𑀢𑀸𑀬 ‘‘𑀏𑀯𑀁 𑀫𑁂 𑀳𑁄𑀢𑀽’’𑀢𑀺 𑀇𑀘𑁆𑀙𑀺𑀬𑀫𑀸𑀦𑀜𑁆𑀘 𑀢𑀣𑁂𑀯 𑀪𑀯𑁂𑀬𑁆𑀬, 𑀇𑀘𑁆𑀙𑀢𑁄𑀧𑀺 𑀳𑀺 𑀢𑀲𑁆𑀲 𑀭𑀽𑀧𑀲𑀗𑁆𑀔𑀸𑀢𑁄 𑀅𑀢𑁆𑀢𑀸 𑀅𑀯𑀲𑀯𑀢𑁆𑀢𑀺 𑀘𑀸𑀢𑀺. 𑀆𑀩𑀸𑀥𑀸𑀬𑀸𑀢𑀺 𑀏𑀯𑀁 𑀤𑀼𑀓𑁆𑀔𑁂𑀦. 𑀧𑀜𑁆𑀜𑀸𑀧𑀦𑀦𑁆𑀢𑀺 ¶ 𑀧𑀭𑁂𑀲𑀁 𑀜𑀸𑀧𑀦𑀁. 𑀅𑀦𑀢𑁆𑀢𑀮𑀓𑁆𑀔𑀡𑀧𑀜𑁆𑀜𑀸𑀧𑀦𑀲𑁆𑀲 𑀅𑀜𑁆𑀜𑁂𑀲𑀁 𑀅𑀯𑀺𑀲𑀬𑀢𑁆𑀢𑀸 𑀅𑀦𑀢𑁆𑀢𑀮𑀓𑁆𑀔𑀡𑀤𑀻𑀧𑀓𑀸𑀦𑀁 𑀅𑀦𑀺𑀘𑁆𑀘𑀤𑀼𑀓𑁆𑀔𑀮𑀓𑁆𑀔𑀡𑀸𑀦𑀜𑁆𑀘 𑀧𑀜𑁆𑀜𑀸𑀧𑀦𑀲𑁆𑀲 𑀅𑀯𑀺𑀲𑀬𑀢𑀸 𑀤𑀲𑁆𑀲𑀺𑀢𑀸 𑀳𑁄𑀢𑀺.

𑀏𑀯𑀁 ¶ 𑀧𑀦 𑀤𑀼𑀧𑁆𑀧𑀜𑁆𑀜𑀸𑀧𑀦𑀢𑀸 𑀏𑀢𑁂𑀲𑀁 𑀤𑀼𑀭𑀽𑀧𑀝𑁆𑀞𑀸𑀦𑀢𑀸𑀬 𑀳𑁄𑀢𑀻𑀢𑀺 𑀢𑁂𑀲𑀁 𑀅𑀦𑀼𑀧𑀝𑁆𑀞𑀳𑀦𑀓𑀸𑀭𑀡𑀁 𑀧𑀼𑀘𑁆𑀙𑀦𑁆𑀢𑁄 𑀆𑀳 ‘‘𑀇𑀫𑀸𑀦𑀺 𑀧𑀦𑀸’’𑀢𑀺𑀆𑀤𑀺. 𑀞𑀸𑀦𑀸𑀤𑀻𑀲𑀼 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑀫𑀸𑀦𑀲𑁆𑀲 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑁆𑀲 𑀅𑀪𑀺𑀡𑁆𑀳𑀲𑀫𑁆𑀧𑀝𑀺𑀧𑀻𑀴𑀦𑀲𑁆𑀲. 𑀥𑀸𑀢𑀼𑀫𑀢𑁆𑀢𑀢𑀸𑀬 𑀘𑀓𑁆𑀔𑀸𑀤𑀻𑀦𑀁 𑀲𑀫𑀽𑀳𑀢𑁄 𑀯𑀺𑀦𑀺𑀩𑁆𑀪𑀼𑀚𑁆𑀚𑀦𑀁 𑀦𑀸𑀦𑀸𑀥𑀸𑀢𑀼𑀯𑀺𑀦𑀺𑀩𑁆𑀪𑁄𑀕𑁄. 𑀖𑀦𑁂𑀦𑀸𑀢𑀺 𑀘𑀢𑁆𑀢𑀸𑀭𑀺𑀧𑀺 𑀖𑀦𑀸𑀦𑀺 𑀖𑀦𑀪𑀸𑀯𑁂𑀦 𑀏𑀓𑀢𑁆𑀢𑀁 𑀉𑀧𑀦𑁂𑀢𑁆𑀯𑀸 𑀯𑀤𑀢𑀺. 𑀧𑀜𑁆𑀜𑀸𑀬𑁂𑀯 𑀲𑀦𑁆𑀢𑀢𑀺𑀯𑀺𑀓𑁄𑀧𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀸𑀣𑀸𑀯𑀲𑀭𑀲𑀢𑁄𑀢𑀺 𑀅𑀯𑀺𑀧𑀭𑀻𑀢𑀲𑀪𑀸𑀯𑀢𑁄. 𑀲𑀪𑀸𑀯𑁄 𑀳𑀺 𑀭𑀲𑀺𑀬𑀫𑀸𑀦𑁄 𑀅𑀯𑀺𑀭𑀤𑁆𑀥𑀧𑀝𑀺𑀯𑁂𑀥𑁂𑀦 𑀅𑀲𑁆𑀲𑀸𑀤𑀺𑀬𑀫𑀸𑀦𑁄 ‘‘𑀭𑀲𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀦𑀺𑀘𑁆𑀘𑀸𑀤𑀻𑀳𑀺 𑀅𑀦𑀺𑀘𑁆𑀘𑀮𑀓𑁆𑀔𑀡𑀸𑀤𑀻𑀦𑀁 𑀅𑀜𑁆𑀜𑀢𑁆𑀣 𑀯𑀘𑀦𑀁 𑀭𑀼𑀧𑁆𑀧𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀭𑀽𑀧𑀸𑀤𑀺𑀕𑁆𑀕𑀳𑀡𑀢𑁄 𑀯𑀺𑀲𑀺𑀝𑁆𑀞𑀲𑁆𑀲 𑀅𑀦𑀺𑀘𑁆𑀘𑀸𑀤𑀺𑀕𑁆𑀕𑀳𑀡𑀲𑁆𑀲 𑀲𑀩𑁆𑀪𑀸𑀯𑀸. 𑀦 𑀳𑀺 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀫𑀢𑁆𑀢𑁂𑀦 𑀓𑀺𑀘𑁆𑀘𑀲𑀺𑀤𑁆𑀥𑀺 𑀳𑁄𑀢𑀺, 𑀅𑀦𑀺𑀘𑁆𑀘𑀸𑀤𑀬𑁄 𑀘 𑀭𑀽𑀧𑀸𑀤𑀻𑀦𑀁 𑀆𑀓𑀸𑀭𑀸 𑀤𑀝𑁆𑀞𑀩𑁆𑀩𑀸. 𑀢𑁂 𑀧𑀦𑀸𑀓𑀸𑀭𑀸 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑀸 𑀭𑀽𑀧𑀸𑀤𑀻𑀦𑀁 𑀆𑀓𑀸𑀭𑀫𑀢𑁆𑀢𑀸𑀬𑁂𑀯𑀸𑀢𑀺 𑀓𑀢𑁆𑀯𑀸 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 (𑀥. 𑀲. 𑀅𑀝𑁆𑀞. 𑁩𑁫𑁦) 𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀯𑀺𑀧𑀲𑁆𑀲𑀦𑀸𑀬 𑀔𑀦𑁆𑀥𑀸𑀭𑀫𑁆𑀫𑀡𑀢𑀸 𑀯𑀼𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑀫𑀢𑁆𑀢𑁂 𑀞𑀸𑀢𑀼𑀁 𑀬𑀼𑀢𑁆𑀢𑀁, 𑀦𑀸𑀢𑀺𑀥𑀸𑀯𑀺𑀢𑀼𑀁. ‘‘𑀅𑀦𑀺𑀘𑁆𑀘’’𑀦𑁆𑀢𑀺 𑀘 𑀕𑀡𑁆𑀳𑀦𑁆𑀢𑁄 ‘‘𑀤𑀼𑀓𑁆𑀔𑀁 𑀅𑀦𑀢𑁆𑀢𑀸’’𑀢𑀺 𑀦 𑀕𑀡𑁆𑀳𑀸𑀢𑀺, 𑀢𑀣𑀸 𑀤𑀼𑀓𑁆𑀔𑀸𑀤𑀺𑀕𑁆𑀕𑀳𑀡𑁂 𑀇𑀢𑀭𑀲𑁆𑀲𑀸𑀕𑀳𑀡𑀁. 𑀅𑀦𑀺𑀘𑁆𑀘𑀸𑀤𑀺𑀕𑁆𑀕𑀳𑀡𑀸𑀦𑀺 𑀘 𑀦𑀺𑀘𑁆𑀘𑀲𑀜𑁆𑀜𑀸𑀤𑀺𑀦𑀺𑀯𑀢𑁆𑀢𑀦𑀓𑀸𑀦𑀺 𑀲𑀤𑁆𑀥𑀸𑀲𑀫𑀸𑀥𑀺𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀸𑀥𑀺𑀓𑀸𑀦𑀺 𑀢𑀺𑀯𑀺𑀥𑀯𑀺𑀫𑁄𑀓𑁆𑀔𑀫𑀼𑀔𑀪𑀽𑀢𑀸𑀦𑀺. 𑀢𑀲𑁆𑀫𑀸 𑀏𑀢𑁂𑀲𑀁 𑀆𑀓𑀸𑀭𑀸𑀦𑀁 𑀧𑀭𑀺𑀕𑁆𑀕𑀬𑁆𑀳𑀫𑀸𑀦𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑁂𑀲𑁄 𑀘 𑀅𑀢𑁆𑀣𑀻𑀢𑀺 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀯𑀼𑀢𑁆𑀢𑀸𑀦𑀺.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁧𑁬𑁭. 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀓𑀣𑀸 𑀅𑀪𑀺𑀥𑀫𑁆𑀫𑀓𑀣𑀸𑀢𑀺 𑀲𑀼𑀢𑁆𑀢𑀦𑁆𑀢𑁂 𑀯𑀺𑀬 𑀧𑀘𑁆𑀘𑀬𑀬𑀼𑀕𑀴𑀯𑀲𑁂𑀦 𑀅𑀓𑀣𑁂𑀢𑁆𑀯𑀸 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀯𑀲𑁂𑀦 𑀅𑀪𑀺𑀜𑁆𑀜𑁂𑀬𑁆𑀬𑀸𑀦𑀺 𑀆𑀬𑀢𑀦𑀸𑀦𑀺 𑀅𑀩𑁆𑀩𑁄𑀓𑀸𑀭𑀢𑁄 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀓𑀣𑀺𑀢𑀸𑀦𑀺. 𑀆𑀕𑀫𑁆𑀫𑀸𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑁂𑀳𑀺 𑀦𑀺𑀩𑁆𑀩𑀺𑀦𑁆𑀤𑀲𑁆𑀲 𑀯𑀺𑀲𑀗𑁆𑀔𑀸𑀭𑀦𑀺𑀦𑁆𑀦𑀲𑁆𑀲 𑀕𑁄𑀢𑁆𑀭𑀪𑀼𑀦𑀸 𑀯𑀺𑀯𑀝𑁆𑀝𑀺𑀢𑀫𑀸𑀦𑀲𑀲𑁆𑀲 𑀫𑀕𑁆𑀕𑁂𑀦 𑀲𑀘𑁆𑀙𑀺𑀓𑀭𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀘𑁆𑀙𑀺𑀓𑀺𑀭𑀺𑀬𑀫𑀸𑀦𑀜𑁆𑀳𑀺 𑀢𑀁 𑀅𑀥𑀺𑀕𑀦𑁆𑀢𑁆𑀯𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀽𑀢𑀜𑁆𑀘 ¶ 𑀧𑀝𑀺𑀘𑁆𑀘 𑀅𑀥𑀺𑀧𑀢𑀺𑀧𑀘𑁆𑀘𑀬𑀪𑀽𑀢𑁂 𑀘 𑀢𑀫𑁆𑀳𑀺 𑀧𑀭𑀫𑀲𑁆𑀲𑀸𑀲𑀪𑀸𑀯𑁂𑀦 𑀯𑀺𑀦𑀺𑀫𑀼𑀢𑁆𑀢𑀲𑀗𑁆𑀔𑀸𑀭𑀲𑁆𑀲 𑀘 𑀕𑀢𑀺𑀪𑀸𑀯𑁂𑀦 𑀧𑀢𑀺𑀝𑁆𑀞𑀸𑀦𑀪𑀽𑀢𑁂 𑀧𑀢𑀺𑀝𑁆𑀞𑀸𑀬 𑀔𑀬𑀲𑀗𑁆𑀔𑀸𑀢𑁄 𑀫𑀕𑁆𑀕𑁄 𑀭𑀸𑀕𑀸𑀤𑀬𑁄 𑀔𑁂𑀧𑁂𑀢𑀻𑀢𑀺 𑀢𑀁𑀲𑀘𑁆𑀙𑀺𑀓𑀭𑀡𑀸𑀪𑀸𑀯𑁂 𑀭𑀸𑀕𑀸𑀤𑀻𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀦𑀺𑀭𑁄𑀥𑀕𑀫𑀦𑀸𑀪𑀸𑀯𑀸 ‘‘𑀢𑀁 𑀆𑀕𑀫𑁆𑀫 𑀭𑀸𑀕𑀸𑀤𑀬𑁄 𑀔𑀻𑀬𑀦𑁆𑀢𑀻’’𑀢𑀺 ¶ 𑀯𑀼𑀢𑁆𑀢𑀁. 𑀲𑀼𑀢𑁆𑀢𑀢𑁄 𑀫𑀼𑀜𑁆𑀘𑀺𑀢𑁆𑀯𑀸𑀢𑀺 𑀲𑀼𑀢𑁆𑀢𑀧𑀤𑀸𑀦𑀺 𑀫𑀼𑀜𑁆𑀘𑀺𑀢𑁆𑀯𑀸. 𑀅𑀜𑁆𑀜𑁄 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑁄 ‘‘𑀫𑀸𑀢𑀭𑀁 𑀧𑀺𑀢𑀭𑀁 𑀳𑀦𑁆𑀢𑁆𑀯𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁨𑁯𑁪-𑁨𑁯𑁫) 𑀯𑀺𑀬 𑀆𑀳𑀭𑀺𑀢𑀩𑁆𑀩𑁄, 𑀦𑀢𑁆𑀣𑀺 𑀲𑀼𑀢𑁆𑀢𑀧𑀤𑁂𑀳𑁂𑀯 𑀦𑀻𑀢𑁄 𑀅𑀢𑁆𑀣𑁄𑀢𑀺 𑀅𑀢𑁆𑀣𑁄.

𑀏𑀓𑀁 𑀦𑀸𑀦𑀦𑁆𑀢𑀺 𑀘𑀼𑀡𑁆𑀡𑀺𑀢𑀁 𑀔𑀼𑀤𑁆𑀤𑀓𑀁 𑀯𑀸 𑀓𑀭𑀡𑀁, 𑀘𑀼𑀡𑁆𑀡𑀻𑀓𑀭𑀡𑀦𑁆𑀢𑀺 𑀅𑀩𑀳𑀼𑀫𑀸𑀦𑁂𑀦 𑀯𑀤𑀢𑀺. 𑀦 𑀢𑁆𑀯𑀁 𑀏𑀓𑀁 𑀦𑀸𑀦𑀁 𑀚𑀸𑀦𑀸𑀲𑀻𑀢𑀺 𑀓𑀺𑀁 𑀏𑀢𑁆𑀢𑀓𑀁 𑀢𑁆𑀯𑀫𑁂𑀯 𑀦 𑀚𑀸𑀦𑀸𑀲𑀻𑀢𑀺 𑀅𑀢𑁆𑀣𑁄. 𑀦𑀦𑀼 𑀜𑀸𑀢𑁂𑀢𑀺 ‘‘𑀬𑀤𑀺𑀧𑀺 𑀧𑀼𑀩𑁆𑀩𑁂 𑀦 𑀜𑀸𑀢𑀁, 𑀅𑀥𑀼𑀦𑀸𑀧𑀺 𑀜𑀸𑀢𑁂 𑀦𑀦𑀼 𑀲𑀸𑀥𑀼 𑀳𑁄𑀢𑀻’’𑀢𑀺 𑀅𑀢𑁆𑀢𑀦𑁄 𑀚𑀸𑀦𑀦𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀯𑀺𑀓𑁆𑀔𑁂𑀧𑀁 𑀓𑀭𑁄𑀦𑁆𑀢𑀁 𑀦𑀺𑀩𑀦𑁆𑀥𑀢𑀺. 𑀯𑀺𑀪𑀚𑀺𑀢𑁆𑀯𑀸𑀢𑀺 𑀅𑀓𑁆𑀔𑀭𑀢𑁆𑀣𑀫𑀢𑁆𑀢𑁂 𑀅𑀝𑁆𑀞𑀢𑁆𑀯𑀸 𑀮𑀻𑀦𑀁 𑀅𑀢𑁆𑀣𑀁 𑀯𑀺𑀪𑀚𑀺𑀢𑁆𑀯𑀸 𑀉𑀤𑁆𑀥𑀭𑀺𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀓𑀣𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀭𑀸𑀕𑀸𑀤𑀻𑀦𑀁 𑀔𑀬𑁄 𑀦𑀸𑀫 𑀅𑀪𑀸𑀯𑀫𑀢𑁆𑀢𑁄, 𑀦 𑀘 𑀅𑀪𑀸𑀯𑀲𑁆𑀲 𑀩𑀳𑀼𑀪𑀸𑀯𑁄 𑀅𑀢𑁆𑀣𑀺 𑀅𑀢𑁆𑀢𑀦𑁄 𑀅𑀪𑀸𑀯𑀢𑁆𑀢𑀸𑀢𑀺 𑀯𑀤𑀦𑁆𑀢𑀲𑁆𑀲 𑀯𑀘𑀦𑀧𑀘𑁆𑀙𑀺𑀦𑁆𑀤𑀦𑀢𑁆𑀣𑀁 𑀧𑀼𑀘𑁆𑀙𑀢𑀺 ‘‘𑀭𑀸𑀕𑀓𑁆𑀔𑀬𑁄 𑀦𑀸𑀫 𑀭𑀸𑀕𑀲𑁆𑀲𑁂𑀯 𑀔𑀬𑁄’’𑀢𑀺𑀆𑀤𑀺. 𑀬𑀤𑀺 𑀳𑀺 𑀭𑀸𑀕𑀓𑁆𑀔𑀬𑁄 𑀤𑁄𑀲𑀸𑀤𑀻𑀦𑀁 𑀔𑀬𑁄 𑀦 𑀳𑁄𑀢𑀺, 𑀤𑁄𑀲𑀓𑁆𑀔𑀬𑀸𑀤𑀬𑁄 𑀘 𑀭𑀸𑀕𑀸𑀤𑀻𑀦𑀁 𑀔𑀬𑀸, 𑀅𑀜𑁆𑀜𑀫𑀜𑁆𑀜𑀯𑀺𑀲𑀺𑀝𑁆𑀞𑀸 𑀪𑀺𑀦𑁆𑀦𑀸 𑀆𑀧𑀦𑁆𑀦𑀸 𑀳𑁄𑀦𑁆𑀢𑀻𑀢𑀺 𑀩𑀳𑀼𑀦𑀺𑀩𑁆𑀩𑀸𑀦𑀢𑀸 𑀆𑀧𑀦𑁆𑀦𑀸 𑀏𑀯 𑀳𑁄𑀢𑀺, 𑀅𑀜𑁆𑀜𑀫𑀜𑁆𑀜𑀯𑀺𑀲𑁂𑀲𑁄 𑀘 𑀦𑀸𑀫 𑀦𑀺𑀲𑁆𑀲𑀪𑀸𑀯𑀲𑁆𑀲 𑀦𑀢𑁆𑀣𑀻𑀢𑀺 𑀲𑀲𑀪𑀸𑀯𑀢𑀸 𑀘 𑀦𑀺𑀩𑁆𑀩𑀸𑀦𑀲𑁆𑀲. 𑀦𑀯 𑀢𑀡𑁆𑀳𑀸𑀫𑀽𑀮𑀓𑀸 ‘‘𑀢𑀡𑁆𑀳𑀁 𑀧𑀝𑀺𑀘𑁆𑀘 𑀧𑀭𑀺𑀬𑁂𑀲𑀦𑀸’’𑀢𑀺 (𑀤𑀻. 𑀦𑀺. 𑁨.𑁧𑁦𑁩; 𑁩.𑁩𑁫𑁯; 𑀅. 𑀦𑀺. 𑁯.𑁨𑁩; 𑀯𑀺𑀪. 𑁯𑁬𑁩) 𑀆𑀤𑀬𑁄, 𑀢𑁂𑀲𑀼 𑀧𑀭𑀺𑀬𑁂𑀲𑀦𑀸𑀤𑀬𑁄 𑀘 𑀧𑀭𑀺𑀬𑁂𑀲𑀦𑀸𑀤𑀺𑀓𑀭𑀓𑀺𑀮𑁂𑀲𑀸 𑀤𑀝𑁆𑀞𑀩𑁆𑀩𑀸. 𑀤𑀺𑀬𑀟𑁆𑀠𑀓𑀺𑀮𑁂𑀲𑀲𑀳𑀲𑁆𑀲𑀁 𑀦𑀺𑀤𑀸𑀦𑀓𑀣𑀸𑀬𑀁 𑀯𑀼𑀢𑁆𑀢𑀁.

𑀑𑀴𑀸𑀭𑀺𑀓𑀢𑀸𑀬 𑀓𑀸𑀭𑁂𑀢𑀩𑁆𑀩𑁄𑀢𑀺 𑀅𑀢𑀺𑀲𑀼𑀔𑀼𑀫𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀑𑀴𑀸𑀭𑀺𑀓𑀪𑀸𑀯𑀤𑁄𑀲𑀸𑀧𑀢𑁆𑀢𑀺𑀬𑀸 𑀩𑁄𑀥𑁂𑀢𑀩𑁆𑀩𑁄, 𑀦𑀺𑀕𑁆𑀕𑀳𑁂𑀢𑀩𑁆𑀩𑁄 𑀯𑀸. 𑀯𑀢𑁆𑀣𑀼𑀦𑁆𑀢𑀺 𑀉𑀧𑀸𑀤𑀺𑀦𑁆𑀦𑀓𑀨𑁄𑀝𑁆𑀞𑀩𑁆𑀩𑀁 𑀫𑁂𑀣𑀼𑀦𑀁. 𑀅𑀘𑁆𑀙𑀸𑀤𑀻𑀦𑀫𑁆𑀧𑀺 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀸, 𑀦𑀦𑀼 ‘‘𑀓𑀺𑀮𑁂𑀲𑀸𑀦𑀁 𑀅𑀘𑁆𑀘𑀦𑁆𑀢𑀁 𑀅𑀦𑀼𑀧𑁆𑀧𑀢𑁆𑀢𑀺𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀇𑀘𑁆𑀙𑀦𑁆𑀢𑀲𑁆𑀲 𑀓𑀺𑀮𑁂𑀲𑀸𑀦𑀁 𑀯𑀺𑀦𑀸𑀲𑁄 𑀓𑀜𑁆𑀘𑀺 𑀓𑀸𑀮𑀁 𑀅𑀧𑁆𑀧𑀯𑀢𑁆𑀢𑀺 𑀦𑀺𑀩𑁆𑀩𑀸𑀦𑀁 𑀦 𑀳𑁄𑀢𑀻𑀢𑀺? 𑀦, 𑀅𑀪𑀸𑀯𑀲𑀸𑀫𑀜𑁆𑀜𑀢𑁄. 𑀅𑀘𑁆𑀘𑀦𑁆𑀢𑀸𑀧𑀯𑀢𑁆𑀢𑀺 𑀳𑀺 𑀓𑀜𑁆𑀘𑀺 𑀓𑀸𑀮𑀜𑁆𑀘 𑀅𑀧𑁆𑀧𑀯𑀢𑁆𑀢𑀺 𑀅𑀪𑀸𑀯𑁄𑀬𑁂𑀯𑀸𑀢𑀺 𑀦𑀢𑁆𑀣𑀺 𑀯𑀺𑀲𑁂𑀲𑁄. 𑀲𑀯𑀺𑀲𑁂𑀲𑀁 𑀯𑀸 𑀯𑀤𑀦𑁆𑀢𑀲𑁆𑀲 𑀅𑀪𑀸𑀯𑀢𑀸 𑀆𑀧𑀚𑁆𑀚𑀢𑀻𑀢𑀺. 𑀢𑀺𑀭𑀘𑁆𑀙𑀸𑀦𑀕𑀢𑁂𑀳𑀺𑀧𑀺 𑀧𑀸𑀧𑀼𑀡𑀺𑀢𑀩𑁆𑀩𑀢𑁆𑀢𑀸 𑀢𑁂𑀲𑀫𑁆𑀧𑀺 𑀧𑀸𑀓𑀝𑀁 𑀧𑀺𑀴𑀦𑁆𑀥𑀦𑀁 𑀯𑀺𑀬 𑀑𑀴𑀸𑀭𑀺𑀓𑀁 𑀣𑀽𑀮𑀁. 𑀓𑁂𑀯𑀮𑀁 𑀧𑀦 𑀓𑀡𑁆𑀡𑁂 𑀧𑀺𑀴𑀦𑁆𑀥𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀧𑀺𑀴𑀦𑁆𑀥𑀦𑀢𑁄𑀧𑀺 𑀯𑀸 𑀣𑀽𑀮𑀢𑁆𑀢𑀸 𑀦 𑀲𑀓𑁆𑀓𑀸𑀢𑀺 𑀉𑀧𑁆𑀧𑀡𑁆𑀟𑁂𑀦𑁆𑀢𑁄 𑀯𑀺𑀬 𑀦𑀺𑀕𑁆𑀕𑀡𑁆𑀳𑀸𑀢𑀺.

𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀓𑀭𑀡𑁂𑀦 ¶ 𑀕𑁄𑀢𑁆𑀭𑀪𑀼𑀓𑁆𑀔𑀡𑁂 𑀓𑀺𑀮𑁂𑀲𑀓𑁆𑀔𑀬𑀧𑁆𑀧𑀢𑁆𑀢𑀺 𑀧𑀦𑀲𑁆𑀲 𑀆𑀧𑀦𑁆𑀦𑀸𑀢𑀺 𑀫𑀜𑁆𑀜𑀫𑀸𑀦𑁄 𑀆𑀳 ‘‘𑀢𑁆𑀯𑀁 𑀅𑀔𑀻𑀡𑁂𑀲𑀼𑀬𑁂𑀯𑀸’’𑀢𑀺𑀆𑀤𑀺. 𑀦𑀦𑀼 𑀆𑀭𑀫𑁆𑀫𑀡𑀓𑀭𑀡𑀫𑀢𑁆𑀢𑁂𑀦 𑀓𑀺𑀮𑁂𑀲𑀓𑁆𑀔𑀬𑁄 𑀅𑀦𑀼𑀧𑁆𑀧𑀢𑁆𑀢𑁄𑀢𑀺 𑀦 𑀲𑀓𑁆𑀓𑀸 ¶ 𑀯𑀢𑁆𑀢𑀼𑀁. 𑀘𑀺𑀢𑁆𑀢𑀜𑁆𑀳𑀺 𑀅𑀢𑀻𑀢𑀸𑀦𑀸𑀕𑀢𑀸𑀤𑀺𑀲𑀩𑁆𑀩𑀁 𑀆𑀮𑀫𑁆𑀩𑁂𑀢𑀺, 𑀦 𑀦𑀺𑀧𑁆𑀨𑀦𑁆𑀦𑀫𑁂𑀯𑀸𑀢𑀺 𑀕𑁄𑀢𑁆𑀭𑀪𑀼𑀧𑀺 𑀫𑀕𑁆𑀕𑁂𑀦 𑀓𑀺𑀮𑁂𑀲𑀸𑀦𑀁 𑀬𑀸 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸 𑀓𑀸𑀢𑀩𑁆𑀩𑀸, 𑀢𑀁 𑀆𑀭𑀩𑁆𑀪 𑀧𑀯𑀢𑁆𑀢𑀺𑀲𑁆𑀲𑀢𑀻𑀢𑀺? 𑀦, 𑀅𑀧𑁆𑀧𑀢𑁆𑀢𑀦𑀺𑀩𑁆𑀩𑀸𑀦𑀲𑁆𑀲 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀜𑀸𑀡𑀸𑀪𑀸𑀯𑀢𑁄. 𑀦 𑀳𑀺 𑀅𑀜𑁆𑀜𑀥𑀫𑁆𑀫𑀸 𑀯𑀺𑀬 𑀦𑀺𑀩𑁆𑀩𑀸𑀦𑀁, 𑀢𑀁 𑀧𑀦 𑀅𑀢𑀺𑀕𑀫𑁆𑀪𑀻𑀭𑀢𑁆𑀢𑀸 𑀅𑀧𑁆𑀧𑀢𑁆𑀢𑁂𑀦 𑀆𑀮𑀫𑁆𑀩𑀺𑀢𑀼𑀁 𑀦 𑀲𑀓𑁆𑀓𑀸. 𑀢𑀲𑁆𑀫𑀸 𑀢𑁂𑀦 𑀕𑁄𑀢𑁆𑀭𑀪𑀼𑀦𑀸 𑀧𑀢𑁆𑀢𑀩𑁆𑀩𑁂𑀦 𑀢𑀺𑀓𑀸𑀮𑀺𑀓𑀲𑀪𑀸𑀯𑀸𑀢𑀺𑀓𑁆𑀓𑀦𑁆𑀢𑀕𑀫𑁆𑀪𑀻𑀭𑀪𑀸𑀯𑁂𑀦 𑀪𑀯𑀺𑀢𑀩𑁆𑀩𑀁, 𑀓𑀺𑀮𑁂𑀲𑀓𑁆𑀔𑀬𑀫𑀢𑁆𑀢𑀢𑀁 𑀯𑀸 𑀇𑀘𑁆𑀙𑀢𑁄 𑀕𑁄𑀢𑁆𑀭𑀪𑀼𑀢𑁄 𑀧𑀼𑀭𑁂𑀢𑀭𑀁 𑀦𑀺𑀧𑁆𑀨𑀦𑁆𑀦𑁂𑀦 𑀓𑀺𑀮𑁂𑀲𑀓𑁆𑀔𑀬𑁂𑀦. 𑀢𑁂𑀦𑀸𑀳 ‘‘𑀢𑁆𑀯𑀁 𑀅𑀔𑀻𑀡𑁂𑀲𑀼𑀬𑁂𑀯 𑀓𑀺𑀮𑁂𑀲𑁂𑀲𑀼 𑀓𑀺𑀮𑁂𑀲𑀓𑁆𑀔𑀬𑀁 𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀧𑁂𑀲𑀻’’𑀢𑀺. 𑀅𑀧𑁆𑀧𑀢𑁆𑀢𑀓𑀺𑀮𑁂𑀲𑀓𑁆𑀔𑀬𑀸𑀭𑀫𑁆𑀫𑀡𑀓𑀭𑀡𑁂 𑀳𑀺 𑀲𑀢𑀺 𑀕𑁄𑀢𑁆𑀭𑀪𑀼𑀢𑁄 𑀧𑀼𑀭𑁂𑀢𑀭𑀘𑀺𑀢𑁆𑀢𑀸𑀦𑀺𑀧𑀺 𑀆𑀮𑀫𑁆𑀩𑁂𑀬𑁆𑀬𑀼𑀦𑁆𑀢𑀺.

𑀫𑀕𑁆𑀕𑀲𑁆𑀲 𑀓𑀺𑀮𑁂𑀲𑀓𑁆𑀔𑀬𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀫𑀕𑁆𑀕𑀲𑁆𑀲 𑀆𑀭𑀫𑁆𑀫𑀡𑀪𑀽𑀢𑀁 𑀦𑀺𑀩𑁆𑀩𑀸𑀦𑀁 𑀓𑀢𑀫𑀦𑁆𑀢𑀺 𑀅𑀢𑁆𑀣𑁄. 𑀫𑀕𑁆𑀕𑁄𑀢𑀺𑀆𑀤𑀺𑀦𑀸 𑀧𑀼𑀭𑀺𑀫𑀧𑀼𑀘𑁆𑀙𑀸𑀤𑁆𑀯𑀬𑀫𑁂𑀯 𑀯𑀺𑀯𑀭𑀢𑀺.

𑀦 𑀘 𑀓𑀺𑀜𑁆𑀘𑀻𑀢𑀺 𑀭𑀽𑀧𑀸𑀤𑀻𑀲𑀼 𑀦𑀺𑀩𑁆𑀩𑀸𑀦𑀁 𑀓𑀺𑀜𑁆𑀘𑀺 𑀦 𑀳𑁄𑀢𑀺, 𑀦 𑀘 𑀓𑀤𑀸𑀘𑀺 𑀳𑁄𑀢𑀺, 𑀅𑀢𑀻𑀢𑀸𑀤𑀺𑀪𑀸𑀯𑁂𑀦 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀆𑀕𑀫𑁆𑀫 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀦𑀁 𑀓𑀺𑀜𑁆𑀘𑀺 𑀏𑀓𑀤𑁂𑀲𑀫𑀢𑁆𑀢𑀫𑁆𑀧𑀺 𑀦 𑀳𑁄𑀢𑀺, 𑀢𑀤𑁂𑀯 𑀢𑀁 𑀆𑀕𑀫𑁆𑀫 𑀓𑀤𑀸𑀘𑀺 𑀦 𑀘 𑀳𑁄𑀢𑀻𑀢𑀺 𑀅𑀢𑁆𑀣𑁄 𑀬𑀼𑀢𑁆𑀢𑁄.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸

𑁧𑁬𑁮. 𑀦…𑀧𑁂… 𑀦𑀯𑀢𑁆𑀢𑀩𑁆𑀩𑀥𑀫𑁆𑀫𑀸𑀭𑀫𑁆𑀫𑀡𑀢𑁆𑀢𑀸𑀢𑀺 𑀬𑀣𑀸 𑀲𑀸𑀭𑀫𑁆𑀫𑀡𑀸 𑀧𑀭𑀺𑀢𑁆𑀢𑀸𑀤𑀺𑀪𑀸𑀯𑁂𑀦 𑀦𑀯𑀢𑁆𑀢𑀩𑁆𑀩𑀁 𑀓𑀺𑀜𑁆𑀘𑀺 𑀆𑀭𑀫𑁆𑀫𑀡𑀁 𑀓𑀭𑁄𑀦𑁆𑀢𑀺, 𑀏𑀯𑀁 𑀓𑀺𑀜𑁆𑀘𑀺 𑀆𑀮𑀫𑁆𑀩𑀦𑀢𑁄 𑀦 𑀦𑀯𑀢𑁆𑀢𑀩𑁆𑀩𑀓𑁄𑀝𑁆𑀞𑀸𑀲𑀁 𑀪𑀚𑀢𑀻𑀢𑀺 𑀅𑀢𑁆𑀣𑁄.

𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀬𑀢𑀦𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀥𑀸𑀢𑀼𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁧𑁭𑁨. 𑀬𑀤𑀺𑀧𑀺 ¶ ¶ 𑀥𑀸𑀢𑀼𑀲𑀁𑀬𑀼𑀢𑁆𑀢𑀸𑀤𑀻𑀲𑀼 ‘‘𑀥𑀸𑀢𑀼𑀦𑀸𑀦𑀢𑁆𑀢𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺, 𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀥𑀸𑀢𑀼𑀦𑀸𑀦𑀢𑁆𑀢𑀁? 𑀘𑀓𑁆𑀔𑀼𑀥𑀸𑀢𑀼…𑀧𑁂… 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁨.𑁮𑁫) 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑀆𑀕𑀢𑀸, 𑀢𑀸 𑀧𑀦 𑀅𑀪𑀺𑀥𑀫𑁆𑀫𑁂 𑀘 𑀆𑀕𑀢𑀸𑀢𑀺 𑀲𑀸𑀥𑀸𑀭𑀡𑀢𑁆𑀢𑀸 𑀅𑀕𑁆𑀕𑀳𑁂𑀢𑁆𑀯𑀸 𑀲𑀼𑀢𑁆𑀢𑀦𑁆𑀢𑁂𑀲𑁆𑀯𑁂𑀯 𑀆𑀕𑀢𑁂 𑀢𑀬𑁄 𑀥𑀸𑀢𑀼𑀙𑀓𑁆𑀓𑁂 𑀕𑀳𑁂𑀢𑁆𑀯𑀸 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁 𑀯𑀺𑀪𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀩𑁆𑀩𑀸 𑀥𑀸𑀢𑀼𑀬𑁄𑀢𑀺 𑀅𑀝𑁆𑀞𑀸𑀭𑀲𑀧𑀺. 𑀲𑀼𑀜𑁆𑀜𑁂 𑀲𑀪𑀸𑀯𑀫𑀢𑁆𑀢𑁂 𑀦𑀺𑀭𑀼𑀴𑁆𑀳𑁄 𑀥𑀸𑀢𑀼-𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄. 𑀅𑀲𑀫𑁆𑀨𑀼𑀝𑁆𑀞𑀥𑀸𑀢𑀽𑀢𑀺 𑀘𑀢𑀽𑀳𑀺 𑀫𑀳𑀸𑀪𑀽𑀢𑁂𑀳𑀺 𑀅𑀩𑁆𑀬𑀸𑀧𑀺𑀢𑀪𑀸𑀯𑁄𑀢𑀺 𑀅𑀢𑁆𑀣𑁄.

𑁧𑁭𑁩. 𑀧𑀣𑀯𑀻𑀥𑀸𑀢𑀼𑀤𑁆𑀯𑀬𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀧𑀤𑀼𑀤𑁆𑀥𑀸𑀭𑁄 𑀓𑀢𑁄, 𑀧𑀸𑀴𑀺𑀬𑀁 𑀧𑀦 ‘‘𑀤𑁆𑀯𑁂𑀬’’𑀦𑁆𑀢𑀺 𑀆𑀕𑀘𑁆𑀙𑀢𑀺, 𑀅𑀢𑁆𑀣𑁄 𑀧𑀦 𑀬𑀣𑀸𑀯𑀼𑀢𑁆𑀢𑁄𑀯. 𑀤𑁆𑀯𑀬𑀦𑁆𑀢𑀺 𑀧𑀦 𑀧𑀸𑀞𑁂 𑀲𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀲𑀫𑁆𑀪𑀯𑀢𑀺. 𑀤𑁆𑀯𑁂 𑀅𑀯𑀬𑀯𑀸 𑀏𑀢𑀲𑁆𑀲𑀸𑀢𑀺 𑀤𑁆𑀯𑀬𑀁, 𑀧𑀣𑀯𑀻𑀥𑀸𑀢𑀽𑀦𑀁 𑀤𑁆𑀯𑀬𑀁 𑀧𑀣𑀯𑀻𑀥𑀸𑀢𑀼𑀤𑁆𑀯𑀬𑀁, 𑀤𑁆𑀯𑀺𑀦𑁆𑀦𑀁 𑀧𑀣𑀯𑀻𑀥𑀸𑀢𑀽𑀦𑀁 𑀲𑀫𑀼𑀤𑀸𑀬𑁄𑀢𑀺 𑀅𑀢𑁆𑀣𑁄. 𑀤𑁆𑀯𑁂 𑀏𑀯 𑀯𑀸 𑀅𑀯𑀬𑀯𑀸 𑀲𑀫𑀼𑀤𑀺𑀢𑀸 𑀤𑁆𑀯𑀬𑀁, 𑀧𑀣𑀯𑀻𑀥𑀸𑀢𑀼𑀤𑁆𑀯𑀬𑀦𑁆𑀢𑀺. ‘‘𑀢𑀢𑁆𑀣 𑀓𑀢𑀫𑀸 𑀧𑀣𑀯𑀻𑀥𑀸𑀢𑀼? 𑀧𑀣𑀯𑀻𑀥𑀸𑀢𑀼𑀤𑁆𑀯𑀬𑀁, 𑀏𑀲𑀸 𑀧𑀣𑀯𑀻𑀥𑀸𑀢𑀽’’𑀢𑀺 𑀲𑀗𑁆𑀔𑁂𑀧𑁂𑀦 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀅𑀢𑁆𑀣𑀺 𑀅𑀚𑁆𑀛𑀢𑁆𑀢𑀺𑀓𑀸 𑀅𑀢𑁆𑀣𑀺 𑀩𑀸𑀳𑀺𑀭𑀸𑀢𑀺 𑀏𑀢𑁆𑀣 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭-𑀲𑀤𑁆𑀤𑀸 𑀦 𑀅𑀚𑁆𑀛𑀢𑁆𑀢𑀺𑀓𑀤𑀼𑀓𑁂 𑀯𑀺𑀬 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀬𑀢𑀦𑀯𑀸𑀘𑀓𑀸, 𑀦𑀸𑀧𑀺 𑀅𑀚𑁆𑀛𑀢𑁆𑀢𑀢𑁆𑀢𑀺𑀓𑁂 𑀯𑀼𑀢𑁆𑀢𑁂𑀳𑀺 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸-𑀲𑀤𑁆𑀤𑁂𑀳𑀺 𑀲𑀫𑀸𑀦𑀢𑁆𑀣𑀸, 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀸𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀯𑀸𑀘𑀓𑀸 𑀧𑀦 𑀏𑀢𑁂. 𑀢𑁂𑀦 ‘‘𑀲𑀢𑁆𑀢𑀲𑀦𑁆𑀢𑀸𑀦𑀧𑀭𑀺𑀬𑀸𑀧𑀦𑁆𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀺𑀬𑀓𑀚𑁆𑀛𑀢𑁆𑀢𑀸𑀢𑀺 𑀘 𑀦 𑀧𑀘𑁆𑀘𑀢𑁆𑀢𑀁 𑀅𑀢𑁆𑀢𑀦𑀺 𑀚𑀸𑀢𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀣 𑀔𑁄 𑀲𑀩𑁆𑀩𑀲𑀢𑁆𑀢𑀲𑀦𑁆𑀢𑀸𑀦𑁂𑀲𑀼 𑀚𑀸𑀢𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀢𑁆𑀢𑀦𑁆𑀢𑀺 𑀯𑀘𑀦𑁂𑀦 𑀳𑀺 𑀲𑀢𑁆𑀢𑀲𑀦𑁆𑀢𑀸𑀦𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀅𑀚𑁆𑀛𑀢𑁆𑀢𑀺𑀓𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀦 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀢𑀸𑀬. 𑀲𑀪𑀸𑀯𑀸𑀓𑀸𑀭𑀢𑁄𑀢𑀺 𑀆𑀧𑀸𑀤𑀻𑀳𑀺 𑀯𑀺𑀲𑀺𑀝𑁆𑀞𑁂𑀦 𑀅𑀢𑁆𑀢𑀦𑁄 𑀏𑀯 𑀲𑀪𑀸𑀯𑀪𑀽𑀢𑁂𑀦 𑀕𑀳𑁂𑀢𑀩𑁆𑀩𑀸𑀓𑀸𑀭𑁂𑀦.

𑀓𑁂𑀲𑀸 ¶ 𑀓𑀓𑁆𑀔𑀴𑀢𑁆𑀢𑀮𑀓𑁆𑀔𑀡𑀸𑀢𑀺 𑀓𑀓𑁆𑀔𑀴𑀢𑀸𑀥𑀺𑀓𑀢𑀸𑀬 𑀯𑀼𑀢𑁆𑀢𑀸. 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄𑀢𑀺 𑀧𑀣𑀯𑀻𑀓𑁄𑀝𑁆𑀞𑀸𑀲𑀫𑀢𑁆𑀢𑁄 𑀲𑀼𑀜𑁆𑀜𑁄𑀢𑀺 𑀅𑀢𑁆𑀣𑁄. 𑀫𑀢𑁆𑀣𑀮𑀼𑀗𑁆𑀕𑀁 𑀅𑀝𑁆𑀞𑀺𑀫𑀺𑀜𑁆𑀚𑀕𑁆𑀕𑀳𑀡𑁂𑀦 𑀕𑀳𑀺𑀢𑀦𑁆𑀢𑀺 𑀇𑀥 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀫𑀺𑀦𑀸𑀢𑀺 ¶ ‘‘𑀲𑁂𑀬𑁆𑀬𑀣𑀺𑀤𑀁 𑀓𑁂𑀲𑀸’’𑀢𑀺𑀆𑀤𑀺𑀦𑀸. 𑀓𑀫𑁆𑀫𑀁 𑀓𑀢𑁆𑀯𑀸𑀢𑀺 𑀧𑀬𑁄𑀕𑀁 𑀯𑀻𑀭𑀺𑀬𑀁 𑀆𑀬𑀽𑀳𑀦𑀁 𑀯𑀸 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀪𑁄𑀕𑀓𑀸𑀫𑁂𑀦 𑀓𑀲𑀺𑀬𑀸𑀤𑀻𑀲𑀼 𑀯𑀺𑀬 𑀅𑀭𑀳𑀢𑁆𑀢𑀓𑀸𑀫𑁂𑀦 𑀘 𑀇𑀫𑀲𑁆𑀫𑀺𑀁 𑀫𑀦𑀲𑀺𑀓𑀸𑀭𑁂 𑀓𑀫𑁆𑀫𑀁 𑀓𑀢𑁆𑀢𑀩𑁆𑀩𑀦𑁆𑀢𑀺. 𑀧𑀼𑀩𑁆𑀩𑀧𑀮𑀺𑀩𑁄𑀥𑀸𑀢𑀺 𑀆𑀯𑀸𑀲𑀸𑀤𑀬𑁄 𑀤𑀻𑀖𑀓𑁂𑀲𑀸𑀤𑀺𑀓𑁂 𑀔𑀼𑀤𑁆𑀤𑀓𑀧𑀮𑀺𑀩𑁄𑀥𑁂 𑀅𑀧𑀭𑀧𑀮𑀺𑀩𑁄𑀥𑀸𑀢𑀺 𑀅𑀧𑁂𑀓𑁆𑀔𑀺𑀢𑁆𑀯𑀸 𑀯𑀼𑀢𑁆𑀢𑀸.

𑀯𑀡𑁆𑀡𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀯𑀲𑁂𑀦 𑀫𑀦𑀲𑀺𑀓𑀸𑀭𑁄 𑀥𑀸𑀢𑀼𑀧𑀝𑀺𑀓𑀽𑀮𑀯𑀡𑁆𑀡𑀫𑀦𑀲𑀺𑀓𑀸𑀭𑀸𑀦𑀁 𑀲𑀸𑀥𑀸𑀭𑀡𑁄 𑀧𑀼𑀩𑁆𑀩𑀪𑀸𑀕𑁄𑀢𑀺 𑀦𑀺𑀩𑁆𑀩𑀢𑁆𑀢𑀺𑀢𑀥𑀸𑀢𑀼𑀫𑀦𑀲𑀺𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀯𑀲𑀸𑀦𑁂 𑀏𑀯𑀁 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄’’𑀢𑀺 𑀆𑀳. 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸𑀢𑀺 𑀓𑀸𑀭𑀡𑀲𑁆𑀲 𑀘 𑀨𑀮𑀲𑁆𑀲 𑀘 𑀅𑀩𑁆𑀬𑀸𑀧𑀸𑀭𑀢𑀸𑀬 𑀥𑀸𑀢𑀼𑀫𑀢𑁆𑀢𑀢𑀁 𑀤𑀲𑁆𑀲𑁂𑀢𑀺. 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀻𑀦𑀫𑁆𑀧𑀺 𑀏𑀯𑀫𑁂𑀯 𑀅𑀩𑁆𑀬𑀸𑀧𑀸𑀭𑀢𑀸 𑀤𑀝𑁆𑀞𑀩𑁆𑀩𑀸. 𑀦 𑀳𑀺 𑀢𑀸𑀦𑀺, 𑀢𑁂𑀲𑀜𑁆𑀘 𑀓𑀸𑀭𑀡𑀸𑀦𑀺 𑀆𑀪𑀼𑀚𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀘 𑀉𑀧𑁆𑀧𑀚𑁆𑀚𑀦𑁆𑀢𑀺 𑀓𑀭𑁄𑀦𑁆𑀢𑀺 𑀘𑀸𑀢𑀺. 𑀮𑀓𑁆𑀔𑀡𑀯𑀲𑁂𑀦𑀸𑀢𑀺 ‘‘𑀓𑀓𑁆𑀔𑀴𑀁 𑀔𑀭𑀺𑀕𑀢’’𑀦𑁆𑀢𑀺𑀆𑀤𑀺𑀯𑀘𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀯𑁂𑀓𑀦𑁆𑀢𑀓𑀁 𑀏𑀓𑀸 𑀮𑁄𑀳𑀚𑀸𑀢𑀺. 𑀦𑀸𑀕𑀦𑀸𑀲𑀺𑀓𑀮𑁄𑀳𑀁 𑀮𑁄𑀳𑀲𑀤𑀺𑀲𑀁 𑀮𑁄𑀳𑀯𑀺𑀚𑀸𑀢𑀺 𑀳𑀮𑀺𑀤𑁆𑀤𑀺𑀯𑀺𑀚𑀸𑀢𑀺 𑀯𑀺𑀬. 𑀢𑀺𑀧𑀼𑀢𑀫𑁆𑀩𑀸𑀤𑀻𑀳𑀺 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀁 𑀓𑀭𑀡𑁂𑀦 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀓𑀺𑀢𑁆𑀢𑀺𑀫𑀮𑁄𑀳𑀁. 𑀫𑁄𑀭𑀓𑁆𑀔𑀸𑀤𑀻𑀦𑀺 𑀏𑀯𑀁𑀦𑀸𑀫𑀸𑀦𑁂𑀯𑁂𑀢𑀸𑀦𑀺. 𑀲𑀸𑀫𑀼𑀤𑁆𑀤𑀺𑀓𑀫𑀼𑀢𑁆𑀢𑀸𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁, 𑀲𑀩𑁆𑀩𑀸𑀧𑀺 𑀧𑀦 𑀫𑀼𑀢𑁆𑀢𑀸 𑀫𑀼𑀢𑁆𑀢𑀸 𑀏𑀯.

𑁧𑁭𑁪. 𑀅𑀧𑁆𑀧𑁂𑀢𑀻𑀢𑀺 𑀆𑀧𑁄, 𑀆𑀩𑀦𑁆𑀥𑀦𑀯𑀲𑁂𑀦 𑀲𑁂𑀲𑀪𑀽𑀢𑀢𑁆𑀢𑀬𑀁 𑀧𑀸𑀧𑀼𑀡𑀸𑀢𑀺 𑀲𑀺𑀮𑁂𑀲𑀢𑀻𑀢𑀺 𑀅𑀢𑁆𑀣𑁄. 𑀬𑀽𑀲𑀪𑀽𑀢𑁄𑀢𑀺 𑀭𑀲𑀪𑀽𑀢𑁄. 𑀯𑀓𑁆𑀓𑀳𑀤𑀬𑀬𑀓𑀦𑀧𑀧𑁆𑀨𑀸𑀲𑀸𑀦𑀺 𑀢𑁂𑀫𑁂𑀦𑁆𑀢𑀦𑁆𑀢𑀺 𑀏𑀢𑁆𑀣 𑀬𑀓𑀦𑀁 𑀳𑁂𑀝𑁆𑀞𑀸𑀪𑀸𑀕𑀧𑀽𑀭𑀡𑁂𑀦, 𑀇𑀢𑀭𑀸𑀦𑀺 𑀢𑁂𑀲𑀁 𑀉𑀧𑀭𑀺 𑀣𑁄𑀓𑀁 𑀣𑁄𑀓𑀁 𑀧𑀕𑁆𑀖𑀭𑀡𑁂𑀦 𑀢𑁂𑀫𑁂𑀢𑀺. 𑀳𑁂𑀝𑁆𑀞𑀸 𑀮𑁂𑀟𑁆𑀟𑀼𑀔𑀡𑁆𑀟𑀸𑀦𑀺 𑀢𑁂𑀫𑀬𑀫𑀸𑀦𑁂𑀢𑀺 𑀢𑁂𑀫𑀓𑀢𑁂𑀫𑀺𑀢𑀩𑁆𑀩𑀸𑀦𑀁 𑀅𑀩𑁆𑀬𑀸𑀧𑀸𑀭𑀲𑀸𑀫𑀜𑁆𑀜𑀦𑀺𑀤𑀲𑁆𑀲𑀦𑀢𑁆𑀣𑀸𑀬𑁂𑀯 𑀉𑀧𑀫𑀸 𑀤𑀝𑁆𑀞𑀩𑁆𑀩𑀸, 𑀦 𑀞𑀸𑀦𑀲𑀸𑀫𑀜𑁆𑀜𑀦𑀺𑀤𑀲𑁆𑀲𑀦𑀢𑁆𑀣𑀸𑀬. 𑀲𑀦𑁆𑀦𑀺𑀘𑀺𑀢𑀮𑁄𑀳𑀺𑀢𑁂𑀦 𑀢𑁂𑀫𑁂𑀢𑀩𑁆𑀩𑀸𑀦𑀁 𑀓𑁂𑀲𑀜𑁆𑀘𑀺 𑀳𑁂𑀝𑁆𑀞𑀸, 𑀓𑀲𑁆𑀲𑀘𑀺 𑀉𑀧𑀭𑀺 𑀞𑀺𑀢𑀢𑀜𑁆𑀳𑀺 𑀲𑀢𑀺𑀧𑀝𑁆𑀞𑀸𑀦𑀯𑀺𑀪𑀗𑁆𑀕𑁂 𑀯𑀓𑁆𑀔𑀢𑀻𑀢𑀺, 𑀬𑀓𑀦𑀲𑁆𑀲 𑀳𑁂𑀝𑁆𑀞𑀸𑀪𑀸𑀕𑁄 ‘‘𑀞𑀺𑀢𑀁 𑀫𑀬𑀺 𑀮𑁄𑀳𑀺𑀢’’𑀦𑁆𑀢𑀺 𑀦 𑀚𑀸𑀦𑀸𑀢𑀺, 𑀯𑀓𑁆𑀓𑀸𑀤𑀻𑀦𑀺 ‘‘𑀅𑀫𑁆𑀳𑁂 𑀢𑁂𑀫𑀬𑀫𑀸𑀦𑀁 𑀮𑁄𑀳𑀺𑀢𑀁 𑀞𑀺𑀢’’𑀦𑁆𑀢𑀺 𑀦 𑀚𑀸𑀦𑀦𑁆𑀢𑀻𑀢𑀺 𑀏𑀯𑀁 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀬𑀣𑀸 ¶ 𑀧𑀦 𑀪𑁂𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑁂 𑀦𑀺𑀬𑀫𑁄 𑀅𑀢𑁆𑀣𑀺 ‘‘𑀬𑁂𑀲𑀁 𑀫𑀁𑀲𑀁 𑀓𑀧𑁆𑀧𑀢𑀺, 𑀢𑁂𑀲𑀁 𑀔𑀻𑀭’’𑀦𑁆𑀢𑀺, 𑀏𑀯𑀫𑀺𑀥 𑀦𑀢𑁆𑀣𑀺.

𑁧𑁭𑁫. 𑀢𑁂𑀚𑀦𑀯𑀲𑁂𑀦𑀸𑀢𑀺 𑀦𑀺𑀲𑀺𑀢𑀪𑀸𑀯𑁂𑀦 𑀢𑀺𑀓𑁆𑀔𑀪𑀸𑀯𑁂𑀦. 𑀲𑀭𑀻𑀭𑀲𑁆𑀲 𑀧𑀓𑀢𑀺𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀉𑀡𑁆𑀳𑀪𑀸𑀯𑁄 𑀲𑀦𑁆𑀢𑀸𑀧𑁄, 𑀲𑀭𑀻𑀭𑀤𑀳𑀦𑀯𑀲𑁂𑀦 𑀧𑀯𑀢𑁆𑀢𑁄 ¶ 𑀫𑀳𑀸𑀤𑀸𑀳𑁄 𑀧𑀭𑀺𑀤𑀸𑀳𑁄. 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀬𑁂𑀦 𑀚𑀻𑀭𑀻𑀬𑀢𑀻𑀢𑀺 𑀏𑀓𑀸𑀳𑀺𑀓𑀸𑀤𑀺𑀚𑀭𑀭𑁄𑀕𑁂𑀦 𑀚𑀻𑀭𑀻𑀬𑀢𑀻𑀢𑀺𑀧𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺. 𑀲𑀢𑀯𑀸𑀭𑀁 𑀢𑀸𑀧𑁂𑀢𑁆𑀯𑀸 𑀉𑀤𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀉𑀤𑁆𑀥𑀝𑀲𑀧𑁆𑀧𑀺 𑀲𑀢𑀥𑁄𑀢𑀲𑀧𑁆𑀧𑀻𑀢𑀺 𑀯𑀤𑀦𑁆𑀢𑀺. 𑀭𑀲𑀲𑁄𑀡𑀺𑀢𑀫𑁂𑀤𑀫𑀁𑀲𑀦𑁆𑀳𑀸𑀭𑀼𑀅𑀝𑁆𑀞𑀺𑀅𑀝𑁆𑀞𑀺𑀫𑀺𑀜𑁆𑀚𑀸 𑀭𑀲𑀸𑀤𑀬𑁄. 𑀓𑁂𑀘𑀺 𑀦𑁆𑀳𑀸𑀭𑀼𑀁 𑀅𑀧𑀦𑁂𑀢𑁆𑀯𑀸 𑀲𑀼𑀓𑁆𑀓𑀁 𑀲𑀢𑁆𑀢𑀫𑀥𑀸𑀢𑀼𑀁 𑀅𑀯𑁄𑀘𑀼𑀦𑁆𑀢𑀺. 𑀧𑀸𑀓𑀢𑀺𑀓𑁄𑀢𑀺 𑀔𑁄𑀪𑀁 𑀅𑀧𑁆𑀧𑀢𑁆𑀢𑁄 𑀲𑀤𑀸 𑀯𑀺𑀚𑁆𑀚𑀫𑀸𑀦𑁄. 𑀧𑁂𑀢𑀕𑁆𑀕𑀺 𑀫𑀼𑀔𑀢𑁄 𑀩𑀳𑀺 𑀦𑀺𑀕𑁆𑀕𑀢𑁄𑀯 𑀇𑀥 𑀕𑀳𑀺𑀢𑁄.

𑁧𑁭𑁬. 𑀯𑀸𑀬𑀦𑀯𑀲𑁂𑀦𑀸𑀢𑀺 𑀲𑀯𑁂𑀕𑀕𑀫𑀦𑀯𑀲𑁂𑀦, 𑀲𑀫𑀼𑀤𑀻𑀭𑀡𑀯𑀲𑁂𑀦 𑀯𑀸.

𑁧𑁭𑁭. 𑀇𑀫𑀺𑀦𑀸 𑀬𑀲𑁆𑀫𑀺𑀁 𑀆𑀓𑀸𑀲𑁂…𑀧𑁂… 𑀢𑀁 𑀓𑀣𑀺𑀢𑀦𑁆𑀢𑀺 𑀇𑀤𑀁 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀲𑁆𑀲 𑀅𑀓𑀣𑀺𑀢𑀢𑀁, 𑀅𑀚𑀝𑀸𑀓𑀸𑀲𑀲𑁆𑀲 𑀘 𑀓𑀣𑀺𑀢𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁.

𑁧𑁭𑁯. 𑀲𑀼𑀔𑀤𑀼𑀓𑁆𑀔𑀸𑀦𑀁 𑀨𑀭𑀡𑀪𑀸𑀯𑁄 𑀲𑀭𑀻𑀭𑀝𑁆𑀞𑀓𑀉𑀢𑀼𑀲𑁆𑀲 𑀲𑀼𑀔𑀤𑀼𑀓𑁆𑀔𑀨𑁄𑀝𑁆𑀞𑀩𑁆𑀩𑀲𑀫𑀼𑀝𑁆𑀞𑀸𑀦𑀧𑀘𑁆𑀘𑀬𑀪𑀸𑀯𑁂𑀦 𑀬𑀣𑀸𑀩𑀮𑀁 𑀲𑀭𑀻𑀭𑁂𑀓𑀤𑁂𑀲𑀲𑀓𑀮𑀲𑀭𑀻𑀭𑀨𑀭𑀡𑀲𑀫𑀢𑁆𑀣𑀢𑀸𑀬 𑀯𑀼𑀢𑁆𑀢𑁄, 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀇𑀝𑁆𑀞𑀸𑀦𑀺𑀝𑁆𑀞𑀘𑀺𑀢𑁆𑀢𑀚𑀲𑀫𑀼𑀝𑁆𑀞𑀸𑀧𑀦𑁂𑀦 𑀢𑀣𑁂𑀯 𑀨𑀭𑀡𑀲𑀫𑀢𑁆𑀣𑀢𑀸𑀬. 𑀏𑀯𑀁 𑀏𑀢𑁂𑀲𑀁 𑀲𑀭𑀻𑀭𑀨𑀭𑀡𑀢𑀸𑀬 𑀏𑀓𑀲𑁆𑀲 𑀞𑀸𑀦𑀁 𑀇𑀢𑀭𑀁 𑀧𑀳𑀭𑀢𑀺, 𑀇𑀢𑀭𑀲𑁆𑀲 𑀘 𑀅𑀜𑁆𑀜𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑁂𑀦 𑀲𑀧𑁆𑀧𑀝𑀺𑀧𑀓𑁆𑀔𑀢𑀁 𑀤𑀲𑁆𑀲𑁂𑀢𑀺, 𑀅𑀜𑁆𑀜𑀫𑀜𑁆𑀜𑀧𑀝𑀺𑀧𑀓𑁆𑀔𑀑𑀴𑀸𑀭𑀺𑀓𑀧𑁆𑀧𑀯𑀢𑁆𑀢𑀺 𑀏𑀯 𑀯𑀸 𑀏𑀢𑁂𑀲𑀁 𑀨𑀭𑀡𑀁. 𑀯𑀢𑁆𑀣𑀸𑀭𑀫𑁆𑀫𑀡𑀸𑀦𑀺 𑀘 𑀧𑀩𑀦𑁆𑀥𑁂𑀦 𑀧𑀯𑀢𑁆𑀢𑀺𑀳𑁂𑀢𑀼𑀪𑀽𑀢𑀸𑀦𑀺 𑀨𑀭𑀡𑀝𑁆𑀞𑀸𑀦𑀁 𑀤𑀝𑁆𑀞𑀩𑁆𑀩𑀁, 𑀉𑀪𑀬𑀯𑀢𑁄 𑀘 𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦 𑀅𑀬𑀁 𑀲𑀧𑁆𑀧𑀝𑀺𑀧𑀓𑁆𑀔𑀢𑀸 𑀤𑀲𑁆𑀲𑀺𑀢𑀸 𑀲𑀼𑀔𑀤𑀲𑁆𑀲𑀦𑀻𑀬𑀢𑁆𑀢𑀸.

𑁧𑁮𑁧. 𑀓𑀺𑀮𑁂𑀲𑀓𑀸𑀫𑀁 𑀲𑀦𑁆𑀥𑀸𑀬𑀸𑀢𑀺 ‘‘𑀲𑀗𑁆𑀓𑀧𑁆𑀧𑁄 𑀓𑀸𑀫𑁄 𑀭𑀸𑀕𑁄 𑀓𑀸𑀫𑁄’’𑀢𑀺 (𑀫𑀳𑀸𑀦𑀺. 𑁧; 𑀘𑀽𑀴𑀦𑀺. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮) 𑀏𑀢𑁆𑀣 𑀯𑀼𑀢𑁆𑀢𑀁 𑀲𑀗𑁆𑀓𑀧𑁆𑀧𑀁 𑀲𑀦𑁆𑀥𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁄𑀧𑀺 𑀳𑀺 𑀯𑀺𑀩𑀸𑀥𑀢𑀺 𑀉𑀧𑀢𑀸𑀧𑁂𑀢𑀺 𑀘𑀸𑀢𑀺 𑀓𑀺𑀮𑁂𑀲𑀲𑀦𑁆𑀣𑀯𑀲𑀫𑁆𑀪𑀯𑀢𑁄 𑀓𑀺𑀮𑁂𑀲𑀓𑀸𑀫𑁄 𑀯𑀺𑀪𑀢𑁆𑀢𑁄 𑀓𑀺𑀮𑁂𑀲𑀯𑀢𑁆𑀣𑀼𑀲𑀫𑁆𑀪𑀯𑀢𑁄 𑀯𑀸. 𑀓𑀸𑀫𑀧𑀝𑀺𑀲𑀁𑀬𑀼𑀢𑁆𑀢𑀸𑀢𑀺 𑀓𑀸𑀫𑀭𑀸𑀕𑀲𑀗𑁆𑀔𑀸𑀢𑁂𑀦 𑀓𑀸𑀫𑁂𑀦 𑀲𑀫𑁆𑀧𑀬𑀼𑀢𑁆𑀢𑀸, 𑀓𑀸𑀫𑀧𑀝𑀺𑀩𑀤𑁆𑀥𑀸 𑀯𑀸. 𑀅𑀜𑁆𑀜𑁂𑀲𑀼 𑀘 𑀓𑀸𑀫𑀧𑀝𑀺𑀲𑀁𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀯𑀺𑀢𑀓𑁆𑀓𑁂𑀬𑁂𑀯 𑀓𑀸𑀫𑁄𑀧𑀧𑀤𑁄 𑀥𑀸𑀢𑀼𑀲𑀤𑁆𑀤𑁄 𑀦𑀺𑀭𑀼𑀴𑁆𑀳𑁄 𑀯𑁂𑀤𑀺𑀢𑀩𑁆𑀩𑁄 𑀯𑀺𑀢𑀓𑁆𑀓𑀲𑁆𑀲 ¶ 𑀓𑀸𑀫𑀧𑁆𑀧𑀲𑀗𑁆𑀕𑀧𑁆𑀧𑀯𑀢𑁆𑀢𑀺𑀬𑀸 𑀲𑀸𑀢𑀺𑀲𑀬𑀢𑁆𑀢𑀸. 𑀏𑀲 𑀦𑀬𑁄 𑀩𑁆𑀬𑀸𑀧𑀸𑀤𑀥𑀸𑀢𑀼𑀆𑀤𑀻𑀲𑀼. 𑀧𑀭𑀲𑁆𑀲 𑀅𑀢𑁆𑀢𑀦𑁄 𑀘 𑀤𑀼𑀓𑁆𑀔𑀸𑀬𑀦𑀁 𑀯𑀺𑀳𑀺𑀁𑀲𑀸. 𑀯𑀺𑀳𑀺𑀁𑀲𑀦𑁆𑀢𑀻𑀢𑀺 𑀳𑀦𑁆𑀢𑀼𑀁 𑀇𑀘𑁆𑀙𑀦𑁆𑀢𑀺.

𑁧𑁮𑁨. 𑀉𑀪𑀬𑀢𑁆𑀣 𑀉𑀧𑁆𑀧𑀦𑁆𑀦𑁄𑀧𑀺 𑀅𑀪𑀺𑀚𑁆𑀛𑀸𑀲𑀁𑀬𑁄𑀕𑁂𑀦 𑀓𑀫𑁆𑀫𑀧𑀣𑀚𑀦𑀦𑀢𑁄 𑀅𑀦𑀪𑀺𑀚𑁆𑀛𑀸𑀓𑀫𑁆𑀫𑀧𑀣𑀪𑀺𑀦𑁆𑀤𑀦𑀢𑁄 𑀘 𑀓𑀸𑀫𑀯𑀺𑀢𑀓𑁆𑀓𑁄 ‘‘𑀓𑀫𑁆𑀫𑀧𑀣𑀪𑁂𑀤𑁄’’𑀢𑀺 𑀯𑀼𑀢𑁆𑀢𑁄 ¶ . 𑀩𑁆𑀬𑀸𑀧𑀸𑀤𑁄 𑀧𑀦𑀸𑀢𑀺 𑀩𑁆𑀬𑀸𑀧𑀸𑀤𑀯𑀘𑀦𑁂𑀦 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁 𑀤𑀲𑁆𑀲𑁂𑀢𑀺. 𑀲𑁄 𑀳𑀺 𑀩𑁆𑀬𑀸𑀧𑀸𑀤𑀥𑀸𑀢𑀽𑀢𑀺. 𑀢𑀣𑀸 𑀯𑀺𑀳𑀺𑀁𑀲𑀸𑀬 𑀯𑀺𑀳𑀺𑀁𑀲𑀸𑀥𑀸𑀢𑀼𑀬𑀸 𑀘 𑀩𑁆𑀬𑀸𑀧𑀸𑀤𑀯𑀲𑁂𑀦 𑀬𑀣𑀸𑀲𑀫𑁆𑀪𑀯𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑀲𑁂𑀦 𑀘 𑀓𑀫𑁆𑀫𑀧𑀣𑀪𑁂𑀤𑁄 𑀬𑁄𑀚𑁂𑀢𑀩𑁆𑀩𑁄. 𑀏𑀢𑁆𑀣𑀸𑀢𑀺 𑀤𑁆𑀯𑀻𑀲𑀼 𑀢𑀺𑀓𑁂𑀲𑀼. 𑀲𑀩𑁆𑀩𑀓𑀸𑀫𑀸𑀯𑀘𑀭𑀲𑀩𑁆𑀩𑀓𑀼𑀲𑀮𑀲𑀗𑁆𑀕𑀸𑀳𑀓𑁂𑀳𑀺 𑀇𑀢𑀭𑁂 𑀤𑁆𑀯𑁂 𑀤𑁆𑀯𑁂 𑀲𑀗𑁆𑀕𑀳𑁂𑀢𑁆𑀯𑀸 𑀓𑀣𑀦𑀁 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀓𑀣𑀸. 𑀏𑀢𑁆𑀣𑀸𑀢𑀺 𑀧𑀦 𑀏𑀢𑀲𑁆𑀫𑀺𑀁 𑀙𑀓𑁆𑀓𑁂𑀢𑀺 𑀯𑀼𑀘𑁆𑀘𑀫𑀸𑀦𑁂 𑀓𑀸𑀫𑀥𑀸𑀢𑀼𑀯𑀘𑀦𑁂𑀦 𑀓𑀸𑀫𑀸𑀯𑀘𑀭𑀸𑀦𑀁 𑀦𑁂𑀓𑁆𑀔𑀫𑁆𑀫𑀥𑀸𑀢𑀼𑀆𑀤𑀻𑀦𑀜𑁆𑀘 𑀕𑀳𑀡𑀁 𑀆𑀧𑀚𑁆𑀚𑀢𑀺.

𑀮𑀪𑀸𑀧𑁂𑀢𑀩𑁆𑀩𑀸𑀢𑀺 𑀘𑀓𑁆𑀔𑀼𑀥𑀸𑀢𑀸𑀤𑀺𑀪𑀸𑀯𑀁 𑀮𑀪𑀫𑀸𑀦𑀸 𑀥𑀫𑁆𑀫𑀸 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑀦𑁂𑀦 𑀮𑀪𑀸𑀧𑁂𑀢𑀩𑁆𑀩𑀸. 𑀘𑀭𑀢𑀺 𑀏𑀢𑁆𑀣𑀸𑀢𑀺 𑀘𑀸𑀭𑁄, 𑀓𑀺𑀁 𑀘𑀭𑀢𑀺? 𑀲𑀫𑁆𑀫𑀲𑀦𑀁, 𑀲𑀫𑁆𑀫𑀲𑀦𑀲𑁆𑀲 𑀘𑀸𑀭𑁄 𑀲𑀫𑁆𑀫𑀲𑀦𑀘𑀸𑀭𑁄, 𑀢𑁂𑀪𑀽𑀫𑀓𑀥𑀫𑁆𑀫𑀸𑀦𑀁 𑀅𑀥𑀺𑀯𑀘𑀦𑀁.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁧𑁮𑁩. 𑀘𑀓𑁆𑀔𑀼𑀲𑁆𑀲𑀸𑀢𑀺 𑀯𑀺𑀲𑁂𑀲𑀓𑀸𑀭𑀡𑀁 𑀅𑀲𑀸𑀥𑀸𑀭𑀡𑀲𑀸𑀫𑀺𑀪𑀸𑀯𑁂𑀦 𑀦𑀺𑀤𑁆𑀤𑀺𑀝𑁆𑀞𑀁. 𑀢𑀜𑁆𑀳𑀺 𑀧𑀼𑀕𑁆𑀕𑀮𑀦𑁆𑀢𑀭𑀸𑀲𑀸𑀥𑀸𑀭𑀡𑀁 𑀦𑀻𑀮𑀸𑀤𑀺𑀲𑀩𑁆𑀩𑀭𑀽𑀧𑀲𑀸𑀥𑀸𑀭𑀡𑀜𑁆𑀘. 𑀯𑀺𑀤𑀳𑀢𑀻𑀢𑀺 𑀏𑀯𑀁 𑀏𑀯𑀜𑁆𑀘 𑀢𑀬𑀸 𑀧𑀯𑀢𑁆𑀢𑀺𑀢𑀩𑁆𑀩𑀦𑁆𑀢𑀺 𑀯𑀺𑀦𑀺𑀬𑀼𑀚𑁆𑀚𑀫𑀸𑀦𑀁 𑀯𑀺𑀬 𑀉𑀧𑁆𑀧𑀸𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀤𑀳𑀢𑀻𑀢𑀺 𑀘 𑀥𑀸𑀢𑀼𑀅𑀢𑁆𑀣𑁄 𑀏𑀯 𑀯𑀺𑀲𑀺𑀝𑁆𑀞𑁄 𑀉𑀧𑀲𑀕𑁆𑀕𑁂𑀦 𑀤𑀻𑀧𑀺𑀢𑁄𑀢𑀺 𑀯𑀺𑀦𑀸𑀧𑀺 𑀉𑀧𑀲𑀕𑁆𑀕𑁂𑀦 𑀥𑀸𑀢𑀽𑀢𑀺 𑀏𑀲𑁄 𑀲𑀤𑁆𑀤𑁄 𑀢𑀫𑀢𑁆𑀣𑀁 𑀯𑀤𑀢𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀓𑀢𑁆𑀢𑀼𑀓𑀫𑁆𑀫𑀪𑀸𑀯𑀓𑀭𑀡𑀅𑀥𑀺𑀓𑀭𑀡𑁂𑀲𑀼 𑀥𑀸𑀢𑀼𑀧𑀤𑀲𑀺𑀤𑁆𑀥𑀺 𑀳𑁄𑀢𑀻𑀢𑀺 𑀧𑀜𑁆𑀘𑀧𑀺 𑀏𑀢𑁂 𑀅𑀢𑁆𑀣𑀸 𑀯𑀼𑀢𑁆𑀢𑀸. 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀥𑀸𑀢𑀼𑀬𑁄 𑀲𑀼𑀯𑀡𑁆𑀡𑀸𑀤𑀻𑀦𑀁 𑀩𑀻𑀚𑀪𑀽𑀢𑀸 𑀲𑁂𑀮𑀸𑀤𑀬𑁄.

𑀅𑀢𑁆𑀢𑀦𑁄 𑀲𑀪𑀸𑀯𑀁 𑀥𑀸𑀭𑁂𑀦𑁆𑀢𑀻𑀢𑀺 𑀥𑀸𑀢𑀼𑀬𑁄𑀢𑀺 𑀏𑀢𑁆𑀣𑀸𑀧𑀺 𑀥𑀸𑀢𑀻𑀢𑀺 𑀥𑀸𑀢𑀽𑀢𑀺 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀥𑀸𑀢𑀼-𑀲𑀤𑁆𑀤𑁄 ¶ 𑀏𑀯 𑀳𑀺 𑀥𑀸𑀭𑀡𑀢𑁆𑀣𑁄𑀧𑀺 𑀳𑁄𑀢𑀻𑀢𑀺. 𑀓𑀢𑁆𑀢𑀼𑀅𑀢𑁆𑀣𑁄𑀧𑀺 𑀘𑀸𑀬𑀁 𑀧𑀼𑀭𑀺𑀫𑁂𑀦 𑀅𑀲𑀤𑀺𑀲𑁄𑀢𑀺 𑀦𑀺𑀲𑁆𑀲𑀢𑁆𑀢𑀲𑀪𑀸𑀯𑀫𑀢𑁆𑀢𑀥𑀸𑀭𑀡𑀜𑁆𑀘 𑀥𑀸𑀢𑀼-𑀲𑀤𑁆𑀤𑀲𑁆𑀲 𑀧𑀥𑀸𑀦𑁄 𑀅𑀢𑁆𑀣𑁄𑀢𑀺 𑀯𑀺𑀲𑀼𑀁 𑀯𑀼𑀢𑁆𑀢𑁄. 𑀥𑀸𑀢𑀼𑀬𑁄 𑀯𑀺𑀬 𑀥𑀸𑀢𑀼𑀬𑁄𑀢𑀺 𑀏𑀢𑁆𑀣 𑀲𑀻𑀳-𑀲𑀤𑁆𑀤𑁄 𑀯𑀺𑀬 𑀓𑁂𑀲𑀭𑀺𑀫𑁆𑀳𑀺 𑀦𑀺𑀭𑀼𑀴𑁆𑀳𑁄 𑀧𑀼𑀭𑀺𑀲𑁂𑀲𑀼, 𑀲𑁂𑀮𑀸𑀯𑀬𑀯𑁂𑀲𑀼 𑀦𑀺𑀭𑀼𑀴𑁆𑀳𑁄 𑀥𑀸𑀢𑀼-𑀲𑀤𑁆𑀤𑁄 𑀘 𑀘𑀓𑁆𑀔𑀸𑀤𑀻𑀲𑀼 𑀉𑀧𑀘𑀭𑀺𑀢𑁄 𑀤𑀝𑁆𑀞𑀩𑁆𑀩𑁄. 𑀜𑀸𑀡𑀜𑁆𑀘 𑀜𑁂𑀬𑁆𑀬𑀜𑁆𑀘 𑀜𑀸𑀡𑀜𑁂𑀬𑁆𑀬𑀸𑀦𑀺, 𑀢𑁂𑀲𑀁 𑀅𑀯𑀬𑀯𑀸 𑀢𑀧𑁆𑀧𑀪𑁂𑀤𑀪𑀽𑀢𑀸 𑀥𑀸𑀢𑀼𑀬𑁄 𑀜𑀸𑀡𑀜𑁂𑀬𑁆𑀬𑀸𑀯𑀬𑀯𑀸. 𑀢𑀢𑁆𑀣 𑀜𑀸𑀡𑀧𑁆𑀧𑀪𑁂𑀤𑀸 𑀥𑀫𑁆𑀫𑀥𑀸𑀢𑀼𑀏𑀓𑀤𑁂𑀲𑁄, 𑀜𑁂𑀬𑁆𑀬𑀧𑁆𑀧𑀪𑁂𑀤𑀸 𑀅𑀝𑁆𑀞𑀸𑀭𑀲𑀸𑀧𑀻𑀢𑀺 𑀜𑀸𑀡𑀜𑁂𑀬𑁆𑀬𑀸𑀯𑀬𑀯𑀫𑀢𑁆𑀢𑀸 𑀥𑀸𑀢𑀼𑀬𑁄 ¶ 𑀳𑁄𑀦𑁆𑀢𑀺. 𑀅𑀣 𑀯𑀸 𑀜𑀸𑀡𑁂𑀦 𑀜𑀸𑀢𑀩𑁆𑀩𑁄 𑀲𑀪𑀸𑀯𑁄 𑀥𑀸𑀢𑀼𑀲𑀤𑁆𑀤𑁂𑀦 𑀯𑀼𑀘𑁆𑀘𑀫𑀸𑀦𑁄 𑀅𑀯𑀺𑀧𑀭𑀻𑀢𑀢𑁄 𑀜𑀸𑀡𑀜𑁂𑀬𑁆𑀬𑁄, 𑀦 𑀤𑀺𑀝𑁆𑀞𑀺𑀆𑀤𑀻𑀳𑀺 𑀯𑀺𑀧𑀭𑀻𑀢𑀕𑁆𑀕𑀸𑀳𑀓𑁂𑀳𑀺 𑀜𑁂𑀬𑁆𑀬𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀜𑀸𑀡𑀜𑁂𑀬𑁆𑀬𑀲𑁆𑀲 𑀅𑀯𑀬𑀯𑀸 𑀘𑀓𑁆𑀔𑀸𑀤𑀬𑁄. 𑀯𑀺𑀲𑀪𑀸𑀕𑀮𑀓𑁆𑀔𑀡𑀸𑀯𑀬𑀯𑁂𑀲𑀼 𑀭𑀲𑀸𑀤𑀻𑀲𑀼 𑀦𑀺𑀭𑀼𑀴𑁆𑀳𑁄 𑀥𑀸𑀢𑀼-𑀲𑀤𑁆𑀤𑁄 𑀢𑀸𑀤𑀺𑀲𑁂𑀲𑀼 𑀅𑀜𑁆𑀜𑀸𑀯𑀬𑀯𑁂𑀲𑀼 𑀘𑀓𑁆𑀔𑀸𑀤𑀻𑀲𑀼 𑀉𑀧𑀘𑀭𑀺𑀢𑁄 𑀤𑀝𑁆𑀞𑀩𑁆𑀩𑁄, 𑀭𑀲𑀸𑀤𑀻𑀲𑀼 𑀯𑀺𑀬 𑀯𑀸 𑀘𑀓𑁆𑀔𑀸𑀤𑀻𑀲𑀼 𑀦𑀺𑀭𑀼𑀴𑁆𑀳𑁄𑀯. 𑀦𑀺𑀚𑁆𑀚𑀻𑀯𑀫𑀢𑁆𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀏𑀢𑁂𑀦 𑀦𑀺𑀚𑁆𑀚𑀻𑀯𑀫𑀢𑁆𑀢𑀧𑀤𑀢𑁆𑀣𑁂 𑀥𑀸𑀢𑀼-𑀲𑀤𑁆𑀤𑀲𑁆𑀲 𑀦𑀺𑀭𑀼𑀴𑁆𑀳𑀢𑀁 𑀤𑀲𑁆𑀲𑁂𑀢𑀺. 𑀙 𑀥𑀸𑀢𑀼𑀬𑁄 𑀏𑀢𑀲𑁆𑀲𑀸𑀢𑀺 𑀙𑀥𑀸𑀢𑀼𑀬𑁄, 𑀬𑁄 𑀮𑁄𑀓𑁂 ‘‘𑀧𑀼𑀭𑀺𑀲𑁄’’𑀢𑀺 𑀥𑀫𑁆𑀫𑀲𑀫𑀼𑀤𑀸𑀬𑁄 𑀯𑀼𑀘𑁆𑀘𑀢𑀺, 𑀲𑁄 𑀙𑀥𑀸𑀢𑀼𑀭𑁄 𑀙𑀦𑁆𑀦𑀁 𑀧𑀣𑀯𑀻𑀆𑀤𑀻𑀦𑀁 𑀦𑀺𑀚𑁆𑀚𑀻𑀯𑀫𑀢𑁆𑀢𑀲𑀪𑀸𑀯𑀸𑀦𑀁 𑀲𑀫𑀼𑀤𑀸𑀬𑀫𑀢𑁆𑀢𑁄, 𑀦 𑀏𑀢𑁆𑀣 𑀚𑀻𑀯𑁄 𑀧𑀼𑀭𑀺𑀲𑁄 𑀯𑀸 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀘𑀓𑁆𑀔𑀸𑀤𑀻𑀦𑀁 𑀓𑀫𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑁄𑀢𑀺 𑀇𑀥 𑀏𑀓𑁂𑀓𑀲𑁆𑀫𑀺𑀁 𑀢𑀺𑀓𑁂 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀥𑀸𑀢𑀽𑀦𑀁 𑀓𑀫𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀳𑁂𑀢𑀼𑀨𑀮𑀸𑀦𑀼𑀧𑀼𑀩𑁆𑀩𑀯𑀯𑀢𑁆𑀣𑀸𑀦𑀯𑀲𑁂𑀦𑀸’’𑀢𑀺. 𑀳𑁂𑀢𑀼𑀨𑀮𑀸𑀦𑀁 𑀅𑀦𑀼𑀧𑀼𑀩𑁆𑀩𑀯𑀯𑀢𑁆𑀣𑀸𑀦𑀁 𑀳𑁂𑀢𑀼𑀨𑀮𑀪𑀸𑀯𑁄𑀯. 𑀢𑀢𑁆𑀣 𑀳𑁂𑀢𑀽𑀢𑀺 𑀧𑀘𑁆𑀘𑀬𑁄 𑀅𑀥𑀺𑀧𑁆𑀧𑁂𑀢𑁄. 𑀨𑀮𑀦𑁆𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀦𑁆𑀢𑀺 𑀆𑀳 ‘‘𑀘𑀓𑁆𑀔𑀼𑀥𑀸𑀢𑀽’’𑀢𑀺𑀆𑀤𑀺. 𑀫𑀦𑁄𑀥𑀸𑀢𑀼𑀥𑀫𑁆𑀫𑀥𑀸𑀢𑀽𑀦𑀜𑁆𑀘 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀳𑁂𑀢𑀼𑀪𑀸𑀯𑁄 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑁄, 𑀤𑁆𑀯𑀸𑀭𑀪𑀽𑀢𑀫𑀦𑁄𑀯𑀲𑁂𑀦 𑀯𑀸 𑀢𑀲𑁆𑀲𑀸 𑀫𑀦𑁄𑀥𑀸𑀢𑀼𑀬𑀸.

𑀲𑀩𑁆𑀩𑀸𑀲𑀁 𑀯𑀲𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀆𑀪𑀸𑀥𑀸𑀢𑀼𑀆𑀤𑀻𑀦𑀁 𑀧𑀜𑁆𑀘𑀢𑀺𑀁𑀲𑀸𑀬 𑀥𑀸𑀢𑀽𑀦𑀁 𑀯𑀲𑁂𑀦. 𑀅𑀧𑀭𑀫𑀢𑁆𑀣𑀲𑀪𑀸𑀯𑀲𑁆𑀲 𑀧𑀭𑀫𑀢𑁆𑀣𑀲𑀪𑀸𑀯𑁂𑀲𑀼 𑀦 𑀓𑀤𑀸𑀘𑀺 𑀅𑀦𑁆𑀢𑁄𑀕𑀥𑀢𑀸 𑀅𑀢𑁆𑀣𑀻𑀢𑀺 𑀆𑀳 ‘‘𑀲𑀪𑀸𑀯𑀢𑁄 𑀯𑀺𑀚𑁆𑀚𑀫𑀸𑀦𑀸𑀦’’𑀦𑁆𑀢𑀺. 𑀘𑀦𑁆𑀤𑀸𑀪𑀸𑀲𑀽𑀭𑀺𑀬𑀸𑀪𑀸𑀤𑀺𑀓𑀸 𑀯𑀡𑁆𑀡𑀦𑀺𑀪𑀸 𑀏𑀯𑀸𑀢𑀺 𑀆𑀳 ‘‘𑀭𑀽𑀧𑀥𑀸𑀢𑀼𑀬𑁂𑀯 𑀳𑀺 𑀆𑀪𑀸𑀥𑀸𑀢𑀽’’𑀢𑀺. 𑀭𑀽𑀧𑀸𑀤𑀺𑀧𑀝𑀺𑀩𑀤𑁆𑀥𑀸𑀢𑀺 𑀭𑀸𑀕𑀯𑀢𑁆𑀣𑀼𑀪𑀸𑀯𑁂𑀦 𑀕𑀳𑁂𑀢𑀩𑁆𑀩𑀸𑀓𑀸𑀭𑁄 𑀲𑀼𑀪𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀦𑁆𑀥𑀸𑀬 ‘‘𑀭𑀽𑀧𑀸𑀤𑀬𑁄𑀯𑀸’’𑀢𑀺 𑀅𑀯𑀢𑁆𑀯𑀸 𑀧𑀝𑀺𑀩𑀤𑁆𑀥𑀯𑀘𑀦𑀁 𑀆𑀳. 𑀅𑀲𑀢𑀺𑀧𑀺 𑀭𑀸𑀕𑀯𑀢𑁆𑀣𑀼𑀪𑀸𑀯𑁂 ‘‘𑀓𑀼𑀲𑀮𑀯𑀺𑀧𑀸𑀓𑀸𑀭𑀫𑁆𑀫𑀡𑀸 𑀲𑀼𑀪𑀸 𑀥𑀸𑀢𑀽’’𑀢𑀺 𑀤𑀼𑀢𑀺𑀬𑁄 𑀯𑀺𑀓𑀧𑁆𑀧𑁄 𑀯𑀼𑀢𑁆𑀢𑁄. 𑀯𑀺𑀳𑀺𑀁𑀲𑀸𑀥𑀸𑀢𑀼 𑀘𑁂𑀢𑀦𑀸, 𑀧𑀭𑀯𑀺𑀳𑁂𑀞𑀦𑀙𑀦𑁆𑀤𑁄 𑀯𑀸. 𑀅𑀯𑀺𑀳𑀺𑀁𑀲𑀸 𑀓𑀭𑀼𑀡𑀸.

𑀉𑀪𑁄𑀧𑀻𑀢𑀺 ¶ 𑀥𑀫𑁆𑀫𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄. 𑀳𑀻𑀦𑀸𑀤𑀻𑀲𑀼 𑀧𑀼𑀭𑀺𑀫𑀦𑀬𑁂𑀦 𑀳𑀻𑀴𑀺𑀢𑀸 𑀘𑀓𑁆𑀔𑀸𑀤𑀬𑁄 𑀳𑀻𑀦𑀸, 𑀲𑀫𑁆𑀪𑀸𑀯𑀺𑀢𑀸 𑀧𑀡𑀻𑀢𑀸, 𑀦𑀸𑀢𑀺𑀳𑀻𑀴𑀺𑀢𑀸 𑀦𑀸𑀢𑀺𑀲𑀫𑁆𑀪𑀸𑀯𑀺𑀢𑀸 𑀫𑀚𑁆𑀛𑀺𑀫𑀸𑀢𑀺 𑀔𑀦𑁆𑀥𑀯𑀺𑀪𑀗𑁆𑀕𑁂 𑀆𑀕𑀢𑀳𑀻𑀦𑀤𑀼𑀓𑀢𑁄𑀬𑁂𑀯 𑀦𑀻𑀳𑀭𑀺𑀢𑁆𑀯𑀸 𑀫𑀚𑁆𑀛𑀺𑀫𑀸 𑀥𑀸𑀢𑀼 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀜𑁆𑀜𑀸𑀡𑀥𑀸𑀢𑀼 𑀬𑀤𑀺𑀧𑀺 𑀙𑀯𑀺𑀜𑁆𑀜𑀸𑀡𑀥𑀸𑀢𑀼𑀯𑀲𑁂𑀦 𑀯𑀺𑀪𑀢𑁆𑀢𑀸, 𑀢𑀣𑀸𑀧𑀺 ‘‘𑀯𑀺𑀜𑁆𑀜𑀸𑀡𑀥𑀸𑀢𑀼𑀕𑁆𑀕𑀳𑀡𑁂𑀦 𑀢𑀲𑁆𑀲𑀸 𑀧𑀼𑀭𑁂𑀘𑀸𑀭𑀺𑀓𑀧𑀘𑁆𑀙𑀸𑀘𑀸𑀭𑀺𑀓𑀢𑁆𑀢𑀸 𑀫𑀦𑁄𑀥𑀸𑀢𑀼 𑀕𑀳𑀺𑀢𑀸𑀯 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀆𑀳 ¶ ‘‘𑀯𑀺𑀜𑁆𑀜𑀸𑀡𑀥𑀸𑀢𑀼…𑀧𑁂… 𑀲𑀢𑁆𑀢𑀯𑀺𑀜𑁆𑀜𑀸𑀡𑀲𑀗𑁆𑀔𑁂𑀧𑁄𑀬𑁂𑀯𑀸’’𑀢𑀺. 𑀅𑀦𑁂𑀓𑁂𑀲𑀁 𑀘𑀓𑁆𑀔𑀼𑀥𑀸𑀢𑀼𑀆𑀤𑀻𑀦𑀁, 𑀢𑀸𑀲𑀼 𑀘 𑀏𑀓𑁂𑀓𑀺𑀲𑁆𑀲𑀸 𑀦𑀸𑀦𑀧𑁆𑀧𑀓𑀸𑀭𑀢𑀸𑀬 𑀦𑀸𑀦𑀸𑀥𑀸𑀢𑀽𑀦𑀁 𑀯𑀲𑁂𑀦 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀮𑁄𑀓𑁄 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀅𑀝𑁆𑀞𑀸𑀭𑀲𑀥𑀸𑀢𑀼𑀧𑁆𑀧𑀪𑁂𑀤𑀫𑀢𑁆𑀢𑀫𑁂𑀯𑀸’’𑀢𑀺.

‘‘𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀫𑀦𑁄𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀪𑁂𑀤𑁂𑀦𑀸’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀮𑀺𑀔𑀺𑀢𑀁. 𑀢𑀢𑁆𑀣 𑀦 𑀘𑀓𑁆𑀔𑀸𑀤𑀻𑀦𑀁 𑀓𑁂𑀯𑀮𑁂𑀦 𑀥𑀸𑀢𑀼-𑀲𑀤𑁆𑀤𑁂𑀦 𑀲𑀫𑁆𑀩𑀦𑁆𑀥𑁄 𑀅𑀥𑀺𑀧𑁆𑀧𑁂𑀢𑁄 𑀯𑀺𑀚𑀸𑀦𑀦𑀲𑀪𑀸𑀯𑀲𑁆𑀲 𑀧𑀪𑁂𑀤𑀯𑀘𑀦𑀢𑁄. 𑀯𑀺𑀜𑁆𑀜𑀸𑀡𑀥𑀸𑀢𑀼-𑀲𑀤𑁆𑀤𑁂𑀦 𑀲𑀫𑁆𑀩𑀦𑁆𑀥𑁂 𑀓𑀭𑀺𑀬𑀫𑀸𑀦𑁂 𑀤𑁆𑀯𑁂 𑀫𑀦𑁄𑀕𑀳𑀡𑀸𑀦𑀺 𑀦 𑀓𑀢𑁆𑀢𑀩𑁆𑀩𑀸𑀦𑀺. 𑀦 𑀳𑀺 𑀤𑁆𑀯𑁂 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀅𑀢𑁆𑀣𑀻𑀢𑀺. ‘‘𑀘𑀓𑁆𑀔𑀼…𑀧𑁂… 𑀓𑀸𑀬𑀫𑀦𑁄𑀯𑀺𑀜𑁆𑀜𑀸𑀡𑀫𑀦𑁄𑀥𑀸𑀢𑀽’’𑀢𑀺 𑀯𑀸 𑀯𑀢𑁆𑀢𑀩𑁆𑀩𑀁 𑀅𑀢𑀼𑀮𑁆𑀬𑀬𑁄𑀕𑁂 𑀤𑁆𑀯𑀦𑁆𑀤𑀲𑀫𑀸𑀲𑀸𑀪𑀸𑀯𑀢𑁄. 𑀅𑀬𑀁 𑀧𑀦𑁂𑀢𑁆𑀣 𑀧𑀸𑀞𑁄 𑀲𑀺𑀬𑀸 ‘‘𑀘𑀓𑁆𑀔𑀼…𑀧𑁂… 𑀓𑀸𑀬𑀯𑀺𑀜𑁆𑀜𑀸𑀡𑀫𑀦𑁄𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀪𑁂𑀤𑁂𑀦𑀸’’𑀢𑀺.

𑀔𑀦𑁆𑀥𑀸𑀬𑀢𑀦𑀤𑁂𑀲𑀦𑀸 𑀲𑀗𑁆𑀔𑁂𑀧𑀤𑁂𑀲𑀦𑀸, 𑀇𑀦𑁆𑀤𑁆𑀭𑀺𑀬𑀤𑁂𑀲𑀦𑀸 𑀯𑀺𑀢𑁆𑀣𑀸𑀭𑀤𑁂𑀲𑀦𑀸𑀢𑀺 𑀢𑀤𑀼𑀪𑀬𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀦𑀸𑀢𑀺𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀸 𑀥𑀸𑀢𑀼𑀤𑁂𑀲𑀦𑀸. 𑀅𑀣 𑀯𑀸 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀯𑀼𑀢𑁆𑀢𑀥𑀸𑀢𑀼𑀤𑁂𑀲𑀦𑀸 𑀅𑀢𑀺𑀲𑀗𑁆𑀔𑁂𑀧𑀤𑁂𑀲𑀦𑀸, 𑀆𑀪𑀸𑀥𑀸𑀢𑀼𑀆𑀤𑀻𑀦𑀁 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀅𑀦𑁆𑀢𑀸𑀦𑀁 𑀯𑀲𑁂𑀦 𑀤𑁂𑀲𑁂𑀢𑀩𑁆𑀩𑀸 𑀅𑀢𑀺𑀯𑀺𑀢𑁆𑀣𑀸𑀭𑀤𑁂𑀲𑀦𑀸𑀢𑀺 𑀢𑀤𑀼𑀪𑀬𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀅𑀬𑀁 ‘‘𑀦𑀸𑀢𑀺𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀸’’𑀢𑀺.

𑀪𑁂𑀭𑀻𑀢𑀮𑀁 𑀯𑀺𑀬 𑀘𑀓𑁆𑀔𑀼𑀥𑀸𑀢𑀼 𑀲𑀤𑁆𑀤𑀲𑁆𑀲 𑀯𑀺𑀬 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀬𑀪𑀸𑀯𑀢𑁄. 𑀏𑀢𑀸𑀳𑀺 𑀘 𑀉𑀧𑀫𑀸𑀳𑀺 𑀦𑀺𑀚𑁆𑀚𑀻𑀯𑀸𑀦𑀁 𑀪𑁂𑀭𑀻𑀢𑀮𑀤𑀡𑁆𑀟𑀸𑀤𑀻𑀦𑀁 𑀲𑀫𑀸𑀬𑁄𑀕𑁂 𑀦𑀺𑀚𑁆𑀚𑀻𑀯𑀸𑀦𑀁 𑀲𑀤𑁆𑀤𑀸𑀤𑀻𑀦𑀁 𑀯𑀺𑀬 𑀦𑀺𑀚𑁆𑀚𑀻𑀯𑀸𑀦𑀁 𑀘𑀓𑁆𑀔𑀼𑀭𑀽𑀧𑀸𑀤𑀻𑀦𑀁 𑀲𑀫𑀸𑀬𑁄𑀕𑁂 𑀦𑀺𑀚𑁆𑀚𑀻𑀯𑀸𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀧𑀯𑀢𑁆𑀢𑀻𑀢𑀺 𑀓𑀸𑀭𑀡𑀨𑀮𑀸𑀦𑀁 𑀥𑀸𑀢𑀼𑀫𑀢𑁆𑀢𑀢𑁆𑀢𑀸 𑀓𑀸𑀭𑀓𑀯𑁂𑀤𑀓𑀪𑀸𑀯𑀯𑀺𑀭𑀳𑀁 𑀤𑀲𑁆𑀲𑁂𑀢𑀺.

𑀧𑀼𑀭𑁂𑀘𑀭𑀸𑀦𑀼𑀘𑀭𑀸 𑀯𑀺𑀬𑀸𑀢𑀺 𑀦𑀺𑀚𑁆𑀚𑀻𑀯𑀲𑁆𑀲 𑀓𑀲𑁆𑀲𑀘𑀺 𑀓𑁂𑀘𑀺 𑀦𑀺𑀚𑁆𑀚𑀻𑀯𑀸 𑀧𑀼𑀭𑁂𑀘𑀭𑀸𑀦𑀼𑀘𑀭𑀸 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀫𑀦𑁄𑀥𑀸𑀢𑀼𑀬𑁂𑀯 𑀯𑀸 𑀅𑀢𑁆𑀢𑀦𑁄 𑀔𑀡𑀁 𑀅𑀦𑀢𑀺𑀯𑀢𑁆𑀢𑀦𑁆𑀢𑀻 𑀅𑀢𑁆𑀢𑀦𑁄 𑀔𑀡𑀁 𑀅𑀦𑀢𑀺𑀯𑀢𑁆𑀢𑀦𑁆𑀢𑀸𑀦𑀁𑀬𑁂𑀯 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀅𑀯𑀺𑀚𑁆𑀚𑀫𑀸𑀦𑁂𑀧𑀺 𑀧𑀼𑀭𑁂𑀘𑀭𑀸𑀦𑀼𑀘𑀭𑀪𑀸𑀯𑁂 𑀧𑀼𑀩𑁆𑀩𑀓𑀸𑀮𑀸𑀧𑀭𑀓𑀸𑀮𑀢𑀸𑀬 𑀧𑀼𑀭𑁂𑀘𑀭𑀸𑀦𑀼𑀘𑀭𑀸 𑀯𑀺𑀬 𑀤𑀝𑁆𑀞𑀩𑁆𑀩𑀸𑀢𑀺 ¶ 𑀅𑀢𑁆𑀣𑁄. 𑀲𑀮𑁆𑀮𑀫𑀺𑀯 𑀲𑀽𑀮𑀫𑀺𑀯 𑀢𑀺𑀯𑀺𑀥𑀤𑀼𑀓𑁆𑀔𑀢𑀸𑀲𑀫𑀸𑀬𑁄𑀕𑀢𑁄 𑀤𑀝𑁆𑀞𑀩𑁆𑀩𑁄. 𑀆𑀲𑀸𑀬𑁂𑀯 𑀤𑀼𑀓𑁆𑀔𑀁 𑀆𑀲𑀸𑀤𑀼𑀓𑁆𑀔𑀁, 𑀆𑀲𑀸𑀯𑀺𑀖𑀸𑀢𑀁 𑀤𑀼𑀓𑁆𑀔𑀁 𑀯𑀸. 𑀲𑀜𑁆𑀜𑀸 𑀳𑀺 𑀅𑀪𑀽𑀢𑀁 𑀤𑀼𑀓𑁆𑀔𑀤𑀼𑀓𑁆𑀔𑀫𑁆𑀧𑀺 𑀲𑀼𑀪𑀸𑀤𑀺𑀢𑁄 𑀲𑀜𑁆𑀚𑀸𑀦𑀦𑁆𑀢𑀻 𑀢𑀁 𑀆𑀲𑀁 𑀢𑀲𑁆𑀲𑀸 𑀘 𑀯𑀺𑀖𑀸𑀢𑀁 ¶ 𑀆𑀲𑀻𑀲𑀺𑀢𑀲𑀼𑀪𑀸𑀤𑀺𑀅𑀲𑀺𑀤𑁆𑀥𑀺𑀬𑀸 𑀚𑀦𑁂𑀢𑀻𑀢𑀺. 𑀓𑀫𑁆𑀫𑀧𑁆𑀧𑀥𑀸𑀦𑀸 𑀲𑀗𑁆𑀔𑀸𑀭𑀸𑀢𑀺 ‘‘𑀧𑀝𑀺𑀲𑀦𑁆𑀥𑀺𑀬𑀁 𑀧𑀓𑁆𑀔𑀺𑀧𑀦𑀢𑁄’’𑀢𑀺𑀆𑀤𑀺𑀫𑀸𑀳. 𑀚𑀸𑀢𑀺𑀤𑀼𑀓𑁆𑀔𑀸𑀦𑀼𑀩𑀦𑁆𑀥𑀦𑀢𑁄𑀢𑀺 𑀅𑀢𑁆𑀢𑀦𑀸 𑀦𑀺𑀩𑁆𑀩𑀢𑁆𑀢𑀺𑀬𑀫𑀸𑀦𑁂𑀦 𑀚𑀸𑀢𑀺𑀤𑀼𑀓𑁆𑀔𑁂𑀦 𑀅𑀦𑀼𑀩𑀦𑁆𑀥𑀢𑁆𑀢𑀸. 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺 𑀳𑀺 𑀚𑀸𑀢𑀺𑀤𑀼𑀓𑁆𑀔𑀦𑁆𑀢𑀺. 𑀧𑀤𑀼𑀫𑀁 𑀯𑀺𑀬 𑀤𑀺𑀲𑁆𑀲𑀫𑀸𑀦𑀁 𑀔𑀼𑀭𑀘𑀓𑁆𑀓𑀁 𑀯𑀺𑀬 𑀭𑀽𑀧𑀫𑁆𑀧𑀺 𑀇𑀢𑁆𑀣𑀺𑀬𑀸𑀤𑀺𑀪𑀸𑀯𑁂𑀦 𑀤𑀺𑀲𑁆𑀲𑀫𑀸𑀦𑀁 𑀦𑀸𑀦𑀸𑀯𑀺𑀥𑀼𑀧𑀤𑁆𑀤𑀯𑀁 𑀚𑀦𑁂𑀢𑀺. 𑀲𑀩𑁆𑀩𑁂 𑀅𑀦𑀢𑁆𑀣𑀸 𑀭𑀸𑀕𑀸𑀤𑀬𑁄 𑀚𑀸𑀢𑀺𑀆𑀤𑀬𑁄 𑀘 𑀯𑀺𑀲𑀪𑀽𑀢𑀸 𑀅𑀲𑀦𑁆𑀢𑀸 𑀲𑀧𑁆𑀧𑀝𑀺𑀪𑀬𑀸 𑀘𑀸𑀢𑀺 𑀢𑀧𑁆𑀧𑀝𑀺𑀧𑀓𑁆𑀔𑀪𑀽𑀢𑀢𑁆𑀢𑀸 𑀅𑀫𑀢𑀸𑀤𑀺𑀢𑁄 𑀤𑀝𑁆𑀞𑀩𑁆𑀩𑀸.

𑀫𑀼𑀜𑁆𑀘𑀺𑀢𑁆𑀯𑀸𑀧𑀺 𑀅𑀜𑁆𑀜𑀁 𑀕𑀳𑁂𑀢𑁆𑀯𑀸𑀯𑀸𑀢𑀺 𑀏𑀢𑁂𑀦 𑀫𑀓𑁆𑀓𑀝𑀲𑁆𑀲 𑀕𑀳𑀺𑀢𑀁 𑀲𑀸𑀔𑀁 𑀫𑀼𑀜𑁆𑀘𑀺𑀢𑁆𑀯𑀸𑀧𑀺 𑀆𑀓𑀸𑀲𑁂 𑀞𑀸𑀢𑀼𑀁 𑀅𑀲𑀫𑀢𑁆𑀣𑀢𑀸 𑀯𑀺𑀬 𑀕𑀳𑀺𑀢𑀸𑀭𑀫𑁆𑀫𑀡𑀁 𑀫𑀼𑀜𑁆𑀘𑀺𑀢𑁆𑀯𑀸𑀧𑀺 𑀅𑀜𑁆𑀜𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀺𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀫𑀓𑁆𑀓𑀝𑀲𑀫𑀸𑀦𑀢𑀁 𑀤𑀲𑁆𑀲𑁂𑀢𑀺. 𑀅𑀝𑁆𑀞𑀺𑀯𑁂𑀥𑀯𑀺𑀤𑁆𑀥𑁄𑀧𑀺 𑀤𑀫𑀣𑀁 𑀅𑀦𑀼𑀧𑀕𑀘𑁆𑀙𑀦𑁆𑀢𑁄 𑀤𑀼𑀝𑁆𑀞𑀲𑁆𑀲𑁄 𑀅𑀲𑁆𑀲𑀔𑀴𑀼𑀗𑁆𑀓𑁄. 𑀭𑀗𑁆𑀕𑀕𑀢𑁄 𑀦𑀝𑁄 𑀭𑀗𑁆𑀕𑀦𑀝𑁄.

𑁧𑁮𑁪. 𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘𑀸𑀢𑀺𑀆𑀤𑀺𑀦𑀸 𑀤𑁆𑀯𑀸𑀭𑀸𑀭𑀫𑁆𑀫𑀡𑁂𑀲𑀼 𑀏𑀓𑀯𑀘𑀦𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑀸 𑀏𑀓𑀦𑀸𑀦𑀸𑀲𑀦𑁆𑀢𑀸𑀦𑀕𑀢𑀸𑀦𑀁 𑀏𑀓𑀲𑀦𑁆𑀢𑀸𑀦𑀕𑀢𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀪𑀸𑀯𑀢𑁄 𑀏𑀓𑀦𑀸𑀦𑀸𑀚𑀸𑀢𑀺𑀓𑀢𑁆𑀢𑀸 𑀘.

𑀲𑀩𑁆𑀩𑀥𑀫𑁆𑀫𑁂𑀲𑀽𑀢𑀺 𑀏𑀢𑁆𑀣 𑀲𑀩𑁆𑀩-𑀲𑀤𑁆𑀤𑁄 𑀅𑀥𑀺𑀓𑀸𑀭𑀯𑀲𑁂𑀦 𑀬𑀣𑀸𑀯𑀼𑀢𑁆𑀢𑀯𑀺𑀜𑁆𑀜𑀸𑀡𑀲𑀗𑁆𑀔𑀸𑀢𑁂 𑀆𑀭𑀫𑁆𑀫𑀡𑀲𑀗𑁆𑀔𑀸𑀢𑁂 𑀯𑀸 𑀧𑀤𑁂𑀲𑀲𑀩𑁆𑀩𑀲𑁆𑀫𑀺𑀁 𑀢𑀺𑀝𑁆𑀞𑀢𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀦𑀺𑀤𑁆𑀤𑁂𑀲𑁂 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀲𑀫𑀦𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑀢𑀺 𑀫𑀦𑁄𑀥𑀸𑀢𑀼, 𑀫𑀦𑁄𑀥𑀸𑀢𑀼𑀬𑀸𑀧𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀲𑀫𑀦𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑀢𑀺 𑀘𑀺𑀢𑁆𑀢’’𑀦𑁆𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀸𑀦𑀦𑁆𑀢𑀭𑀁 𑀫𑀦𑁄𑀥𑀸𑀢𑀼 𑀯𑀺𑀬 𑀫𑀦𑁄𑀥𑀸𑀢𑀸𑀦𑀦𑁆𑀢𑀭𑀫𑁆𑀧𑀺 𑀉𑀧𑁆𑀧𑀚𑁆𑀚𑀢𑀺 𑀘𑀺𑀢𑁆𑀢𑀦𑁆𑀢𑀺 𑀬𑀸𑀯 𑀅𑀜𑁆𑀜𑀸 𑀫𑀦𑁄𑀥𑀸𑀢𑀼 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀸𑀯 𑀧𑀯𑀢𑁆𑀢𑀁 𑀲𑀩𑁆𑀩𑀁 𑀘𑀺𑀢𑁆𑀢𑀁 𑀏𑀓𑀢𑁆𑀢𑁂𑀦 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀏𑀯𑀫𑁆𑀧𑀺 𑀅𑀢𑁆𑀣𑁄 𑀮𑀩𑁆𑀪𑀢𑀺. 𑀏𑀯𑀜𑁆𑀳𑀺 𑀲𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀸𑀦𑀦𑁆𑀢𑀭𑀁 𑀉𑀧𑁆𑀧𑀦𑁆𑀦𑀸𑀬 𑀫𑀦𑁄𑀥𑀸𑀢𑀼𑀬𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀪𑀸𑀯𑀧𑁆𑀧𑀲𑀗𑁆𑀕𑁄 𑀦 𑀳𑁄𑀢𑀺𑀬𑁂𑀯. 𑀧𑀜𑁆𑀘𑀯𑀺𑀜𑁆𑀜𑀸𑀡𑀥𑀸𑀢𑀼𑀫𑀦𑁄𑀥𑀸𑀢𑀼𑀓𑁆𑀓𑀫𑀦𑀺𑀤𑀲𑁆𑀲𑀦𑀜𑁆𑀳𑀺 𑀢𑀩𑁆𑀩𑀺𑀥𑀼𑀭𑀲𑀪𑀸𑀯𑁂𑀦 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑁂𑀦 𑀘 𑀧𑀭𑀺𑀘𑁆𑀙𑀺𑀦𑁆𑀦𑀲𑁆𑀲 𑀘𑀺𑀢𑁆𑀢𑀲𑁆𑀲 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀪𑀸𑀯𑀤𑀲𑁆𑀲𑀦𑀢𑁆𑀣𑀁, 𑀦 𑀅𑀦𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀫𑀢𑁆𑀢𑁂𑀦𑀸𑀢𑀺 𑀢𑀩𑁆𑀩𑀺𑀥𑀼𑀭𑀲𑀪𑀸𑀯𑁂 𑀏𑀓𑀢𑁆𑀢𑀁 𑀉𑀧𑀦𑁂𑀢𑁆𑀯𑀸 𑀤𑀲𑁆𑀲𑀦𑀁 𑀬𑀼𑀚𑁆𑀚𑀢𑀺. 𑀅𑀦𑀼𑀧𑀦𑀻𑀢𑁂𑀧𑀺 𑀏𑀓𑀢𑁆𑀢𑁂 𑀢𑀩𑁆𑀩𑀺𑀥𑀼𑀭𑀲𑀪𑀸𑀯𑁂 𑀏𑀓𑀲𑁆𑀫𑀺𑀁 𑀤𑀲𑁆𑀲𑀺𑀢𑁂 𑀲𑀸𑀫𑀜𑁆𑀜𑀯𑀲𑁂𑀦 𑀅𑀜𑁆𑀜𑀫𑁆𑀧𑀺 𑀲𑀩𑁆𑀩𑀁 𑀢𑀁 𑀲𑀪𑀸𑀯𑀁 𑀤𑀲𑁆𑀲𑀺𑀢𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀺-𑀲𑀤𑁆𑀤𑁂𑀦 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀧𑀺𑀡𑁆𑀟𑀦𑁂 ¶ 𑀘 𑀲𑀢𑀺 ‘‘𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸𑀧𑀺 𑀲𑀫𑀦𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑀢𑀺 𑀘𑀺𑀢𑁆𑀢𑀁…𑀧𑁂… 𑀢𑀚𑁆𑀚𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽’’𑀢𑀺 ¶ 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀕𑁆𑀕𑀳𑀡𑁂𑀦 𑀪𑀯𑀗𑁆𑀕𑀸𑀦𑀦𑁆𑀢𑀭𑀁 𑀉𑀧𑁆𑀧𑀦𑁆𑀦𑀁 𑀫𑀦𑁄𑀥𑀸𑀢𑀼𑀘𑀺𑀢𑁆𑀢𑀁 𑀦𑀺𑀯𑀢𑁆𑀢𑀺𑀢𑀁 𑀳𑁄𑀢𑀻𑀢𑀺 𑀘𑁂? 𑀦, 𑀢𑀲𑁆𑀲𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀪𑀸𑀯𑀸𑀲𑀺𑀤𑁆𑀥𑀺𑀢𑁄. 𑀦 𑀳𑀺 𑀬𑀁 𑀘𑁄𑀤𑀻𑀬𑀢𑀺, 𑀢𑀤𑁂𑀯 𑀧𑀭𑀺𑀳𑀸𑀭𑀸𑀬 𑀳𑁄𑀢𑀻𑀢𑀺.

𑀫𑀦𑁄𑀥𑀸𑀢𑀼𑀬𑀸𑀧𑀺 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸𑀧𑀻𑀢𑀺 𑀫𑀦𑀤𑁆𑀯𑀬𑀯𑀘𑀦𑁂𑀦 𑀤𑁆𑀯𑀺𑀦𑁆𑀦𑀁 𑀅𑀜𑁆𑀜𑀫𑀜𑁆𑀜𑀯𑀺𑀥𑀼𑀭𑀲𑀪𑀸𑀯𑀢𑀸 𑀤𑀲𑁆𑀲𑀺𑀢𑀸𑀢𑀺 𑀢𑁂𑀦𑁂𑀯 𑀫𑀦𑁄𑀥𑀸𑀢𑀸𑀯𑀚𑁆𑀚𑀦𑀲𑁆𑀲 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀪𑀸𑀯𑁄 𑀦𑀺𑀯𑀢𑁆𑀢𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀯𑀼𑀢𑁆𑀢𑁄 𑀳𑀺 𑀢𑀲𑁆𑀲 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀯𑀺𑀥𑀼𑀭𑁄 𑀫𑀦𑁄𑀥𑀸𑀢𑀼𑀲𑀪𑀸𑀯𑁄 ‘‘𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀸 𑀧𑀦 𑀧𑀞𑀫𑀲𑀫𑀦𑁆𑀦𑀸𑀳𑀸𑀭𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸. 𑀲𑀸 𑀲𑀩𑁆𑀩𑀸𑀧𑀻𑀢𑀺 𑀏𑀢𑀁 𑀫𑀼𑀔𑀫𑀢𑁆𑀢𑀦𑀺𑀤𑀲𑁆𑀲𑀦𑀁. 𑀦 𑀳𑀺 𑀚𑀯𑀦𑀧𑀭𑀺𑀬𑁄𑀲𑀸𑀦𑀸 𑀏𑀯 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼, 𑀢𑀤𑀸𑀭𑀫𑁆𑀫𑀡𑀸𑀤𑀻𑀦𑀺𑀧𑀺 𑀧𑀦 𑀳𑁄𑀦𑁆𑀢𑀺𑀬𑁂𑀯𑀸𑀢𑀺. 𑀏𑀯𑀁 𑀧𑀜𑁆𑀘𑀯𑀺𑀜𑁆𑀜𑀸𑀡𑀥𑀸𑀢𑀼𑀫𑀦𑁄𑀥𑀸𑀢𑀼𑀯𑀺𑀲𑀺𑀝𑁆𑀞𑀲𑀪𑀸𑀯𑀯𑀲𑁂𑀦 𑀲𑀩𑁆𑀩𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀫𑀦𑁄𑀤𑁆𑀯𑀸𑀭𑀯𑀲𑁂𑀦 𑀲𑀸𑀢𑀺𑀲𑀬𑀁 𑀚𑀯𑀦𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀦𑀜𑁆𑀘 𑀧𑀝𑀺𑀘𑁆𑀘𑀸’’𑀢𑀺𑀆𑀤𑀺𑀫𑀸𑀳. 𑀬𑀤𑀺 𑀧𑀦 𑀙𑀦𑁆𑀦𑀁 𑀤𑁆𑀯𑀸𑀭𑀸𑀦𑀁 𑀯𑀲𑁂𑀦 𑀚𑀯𑀦𑀸𑀯𑀲𑀸𑀦𑀸𑀦𑁂𑀯 𑀘𑀺𑀢𑁆𑀢𑀸𑀦𑀺 𑀇𑀥 ‘‘𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽’’𑀢𑀺 𑀤𑀲𑁆𑀲𑀺𑀢𑀸𑀦𑀻𑀢𑀺 𑀅𑀬𑀫𑀢𑁆𑀣𑁄 𑀕𑀬𑁆𑀳𑁂𑀬𑁆𑀬, 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀸𑀦𑀁 𑀅𑀕𑁆𑀕𑀳𑀺𑀢𑀢𑁆𑀢𑀸 𑀲𑀸𑀯𑀲𑁂𑀲𑀸 𑀤𑁂𑀲𑀦𑀸 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑁂𑀦 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀙𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑁂𑀳𑀺 𑀯𑀸 𑀲𑀫𑀸𑀦𑀮𑀓𑁆𑀔𑀡𑀸𑀦𑀺 𑀅𑀜𑁆𑀜𑀸𑀦𑀺𑀧𑀺 ‘‘𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽’’𑀢𑀺 𑀤𑀲𑁆𑀲𑀺𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀧𑀝𑀺𑀘𑁆𑀘𑀸𑀢𑀺 𑀆𑀕𑀢𑀝𑁆𑀞𑀸𑀦𑁂𑀢𑀺 𑀏𑀢𑁆𑀣 ‘‘𑀫𑀦𑁄 𑀘 𑀦𑁂𑀲𑀁 𑀕𑁄𑀘𑀭𑀯𑀺𑀲𑀬𑀁 𑀧𑀘𑁆𑀘𑀦𑀼𑀪𑁄𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁪𑁫𑁫) 𑀯𑀺𑀲𑀼𑀁 𑀓𑀸𑀢𑀼𑀁 𑀬𑀼𑀢𑁆𑀢𑀁, 𑀇𑀥 𑀧𑀦 ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘𑀸’’𑀢𑀺𑀆𑀤𑀻𑀲𑀼 𑀘-𑀲𑀤𑁆𑀤𑁂𑀦 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀆𑀯𑀚𑁆𑀚𑀦𑀲𑁆𑀲𑀧𑀺 𑀘𑀓𑁆𑀔𑀸𑀤𑀺𑀲𑀦𑁆𑀦𑀺𑀲𑁆𑀲𑀺𑀢𑀢𑀸𑀓𑀭𑀡𑀁 𑀯𑀺𑀬 𑀫𑀦𑀜𑁆𑀘 𑀧𑀝𑀺𑀘𑁆𑀘𑀸𑀢𑀺 𑀆𑀕𑀢𑀝𑁆𑀞𑀸𑀦𑁂 𑀫𑀦𑁄𑀤𑁆𑀯𑀸𑀭𑀲𑀗𑁆𑀔𑀸𑀢𑀪𑀯𑀗𑁆𑀕𑀲𑀦𑁆𑀦𑀺𑀲𑁆𑀲𑀺𑀢𑀫𑁂𑀯 𑀆𑀯𑀚𑁆𑀚𑀦𑀁 𑀓𑀸𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸

𑀧𑀜𑁆𑀳𑀧𑀼𑀘𑁆𑀙𑀓𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀥𑀸𑀢𑀼𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀘𑁆𑀘𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁

𑀉𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁮𑁯. 𑀲𑀸𑀲𑀦𑀓𑁆𑀓𑀫𑁄𑀢𑀺 ¶ ¶ 𑀅𑀭𑀺𑀬𑀲𑀘𑁆𑀘𑀸𑀦𑀺 𑀯𑀼𑀘𑁆𑀘𑀦𑁆𑀢𑀺 𑀅𑀭𑀺𑀬𑀲𑀘𑁆𑀘𑀤𑁂𑀲𑀦𑀸 𑀯𑀸. 𑀲𑀓𑀮𑀜𑁆𑀳𑀺 𑀲𑀸𑀲𑀦𑀁 𑀪𑀕𑀯𑀢𑁄 𑀯𑀘𑀦𑀁 𑀲𑀘𑁆𑀘𑀯𑀺𑀦𑀺𑀫𑀼𑀢𑁆𑀢𑀁 𑀦𑀢𑁆𑀣𑀻𑀢𑀺 𑀲𑀘𑁆𑀘𑁂𑀲𑀼 𑀓𑀫𑀢𑀺, 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀲𑀗𑁆𑀔𑀸𑀢𑀁 𑀯𑀸 𑀲𑀸𑀲𑀦𑀁 𑀏𑀢𑁂𑀲𑀼 𑀓𑀫𑀢𑀺, 𑀢𑀲𑁆𑀫𑀸 𑀓𑀫𑀢𑀺 𑀏𑀢𑁆𑀣𑀸𑀢𑀺 𑀓𑀫𑁄, 𑀓𑀺𑀁 𑀓𑀫𑀢𑀺? 𑀲𑀸𑀲𑀦𑀁, 𑀲𑀸𑀲𑀦𑀲𑁆𑀲 𑀓𑀫𑁄 𑀲𑀸𑀲𑀦𑀓𑁆𑀓𑀫𑁄𑀢𑀺 𑀲𑀘𑁆𑀘𑀸𑀦𑀺 𑀲𑀸𑀲𑀦𑀧𑀯𑀢𑁆𑀢𑀺𑀝𑁆𑀞𑀸𑀦𑀸𑀦𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀁𑀤𑁂𑀲𑀦𑀸 𑀘 𑀢𑀩𑁆𑀩𑁄𑀳𑀸𑀭𑁂𑀦𑀸𑀢𑀺.

𑀢𑀣𑀸𑀢𑀺 𑀢𑀁𑀲𑀪𑀸𑀯𑀸𑀯. 𑀅𑀯𑀺𑀢𑀣𑀸𑀢𑀺 𑀅𑀫𑀼𑀲𑀸𑀲𑀪𑀸𑀯𑀸. 𑀅𑀦𑀜𑁆𑀜𑀣𑀸𑀢𑀺 𑀅𑀜𑁆𑀜𑀸𑀓𑀸𑀭𑀭𑀳𑀺𑀢𑀸. 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀢𑀁𑀦𑀺𑀫𑀺𑀢𑁆𑀢𑀢𑀸𑀳𑀺 𑀅𑀦𑀺𑀝𑁆𑀞𑀢𑀸 𑀧𑀻𑀴𑀦𑀝𑁆𑀞𑁄, 𑀤𑁆𑀯𑀺𑀥𑀸𑀧𑀺 𑀧𑀭𑀺𑀤𑀳𑀦𑀁, 𑀓𑀺𑀮𑁂𑀲𑀤𑀸𑀳𑀲𑀫𑀸𑀬𑁄𑀕𑁄 𑀯𑀸 𑀲𑀦𑁆𑀢𑀸𑀧𑀝𑁆𑀞𑁄𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀧𑀼𑀕𑁆𑀕𑀮𑀳𑀺𑀁𑀲𑀦𑀁 𑀯𑀸 𑀧𑀻𑀴𑀦𑀁, 𑀅𑀢𑁆𑀢𑀦𑁄 𑀏𑀯 𑀢𑀺𑀔𑀺𑀡𑀪𑀸𑀯𑁄 𑀲𑀦𑁆𑀢𑀸𑀧𑀦𑀁 𑀲𑀦𑁆𑀢𑀸𑀧𑁄𑀢𑀺. 𑀏𑀢𑁆𑀣 𑀘 𑀧𑀻𑀴𑀦𑀝𑁆𑀞𑁄 𑀤𑀼𑀓𑁆𑀔𑀲𑁆𑀲 𑀲𑀭𑀲𑁂𑀦𑁂𑀯 𑀆𑀯𑀺𑀪𑀯𑀦𑀸𑀓𑀸𑀭𑁄, 𑀇𑀢𑀭𑁂 𑀬𑀣𑀸𑀓𑁆𑀓𑀫𑀁 𑀲𑀫𑀼𑀤𑀬𑀫𑀕𑁆𑀕𑀦𑀺𑀭𑁄𑀥𑀤𑀲𑁆𑀲𑀦𑁂𑀳𑀺 𑀆𑀯𑀺𑀪𑀯𑀦𑀸𑀓𑀸𑀭𑀸𑀢𑀺 𑀅𑀬𑀁 𑀘𑀢𑀼𑀦𑁆𑀦𑀫𑁆𑀧𑀺 𑀯𑀺𑀲𑁂𑀲𑁄. 𑀢𑀢𑁆𑀭𑀢𑀢𑁆𑀭𑀸𑀪𑀺𑀦𑀦𑁆𑀤𑀦𑀯𑀲𑁂𑀦 𑀩𑁆𑀬𑀸𑀧𑁂𑀢𑁆𑀯𑀸 𑀊𑀳𑀦𑀁 𑀭𑀸𑀲𑀺𑀓𑀭𑀡𑀁 𑀤𑀼𑀓𑁆𑀔𑀦𑀺𑀩𑁆𑀩𑀢𑁆𑀢𑀦𑀁 𑀆𑀬𑀽𑀳𑀦𑀁, 𑀲𑀫𑀼𑀤𑀬𑀢𑁄 𑀆𑀕𑀘𑁆𑀙𑀢𑀻𑀢𑀺 𑀯𑀸 𑀆𑀬𑀁, 𑀤𑀼𑀓𑁆𑀔𑀁. 𑀢𑀲𑁆𑀲 𑀊𑀳𑀦𑀁 𑀧𑀯𑀢𑁆𑀢𑀦𑀁 𑀆𑀬𑀽𑀳𑀦𑀁, 𑀲𑀭𑀲𑀸𑀯𑀺𑀪𑀸𑀯𑀦𑀸𑀓𑀸𑀭𑁄 𑀏𑀲𑁄. 𑀦𑀺𑀤𑀤𑀸𑀢𑀺 𑀤𑀼𑀓𑁆𑀔𑀦𑁆𑀢𑀺 𑀦𑀺𑀤𑀸𑀦𑀁, ‘‘𑀇𑀤𑀁 𑀢𑀁 𑀤𑀼𑀓𑁆𑀔’’𑀦𑁆𑀢𑀺 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀦𑁆𑀢𑀁 𑀯𑀺𑀬 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀤𑀲𑁆𑀲𑀦𑁂𑀦 𑀘𑀸𑀬𑀁 𑀦𑀺𑀤𑀸𑀦𑀝𑁆𑀞𑁄 𑀆𑀯𑀺 𑀪𑀯𑀢𑀺. 𑀲𑀁𑀬𑁄𑀕𑀧𑀮𑀺𑀩𑁄𑀥𑀝𑁆𑀞𑀸 𑀦𑀺𑀭𑁄𑀥𑀫𑀕𑁆𑀕𑀤𑀲𑁆𑀲𑀦𑁂𑀳𑀺, 𑀢𑁂 𑀘 𑀲𑀁𑀲𑀸𑀭𑀲𑀁𑀬𑁄𑀚𑀦𑀫𑀕𑁆𑀕𑀦𑀺𑀯𑀸𑀭𑀡𑀸𑀓𑀸𑀭𑀸 𑀤𑀝𑁆𑀞𑀩𑁆𑀩𑀸.

𑀦𑀺𑀲𑁆𑀲𑀭𑀦𑁆𑀢𑀺 ¶ 𑀏𑀢𑁆𑀣 𑀲𑀢𑁆𑀢𑀸, 𑀲𑀬𑀫𑁂𑀯 𑀯𑀸 𑀦𑀺𑀲𑁆𑀲𑀝𑀁 𑀯𑀺𑀲𑀁𑀬𑀼𑀢𑁆𑀢𑀁 𑀲𑀩𑁆𑀩𑀲𑀗𑁆𑀔𑀢𑁂𑀳𑀺 𑀲𑀩𑁆𑀩𑀼𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑀪𑀸𑀯𑀢𑁄𑀢𑀺 𑀦𑀺𑀲𑁆𑀲𑀭𑀡𑀁. 𑀅𑀬𑀫𑀲𑁆𑀲 𑀲𑀪𑀸𑀯𑁂𑀦 𑀆𑀯𑀺𑀪𑀯𑀦𑀸𑀓𑀸𑀭𑁄. 𑀯𑀺𑀯𑁂𑀓𑀸𑀲𑀗𑁆𑀔𑀢𑀸𑀫𑀢𑀝𑁆𑀞𑀸 𑀲𑀫𑀼𑀤𑀬𑀫𑀕𑁆𑀕𑀤𑀼𑀓𑁆𑀔𑀤𑀲𑁆𑀲𑀦𑀸𑀯𑀺𑀪𑀯𑀦𑀸𑀓𑀸𑀭𑀸, 𑀲𑀫𑀼𑀤𑀬𑀓𑁆𑀔𑀬𑀅𑀧𑁆𑀧𑀘𑁆𑀘𑀬𑀅𑀯𑀺𑀦𑀸𑀲𑀺𑀢𑀸 𑀯𑀸. 𑀲𑀁𑀲𑀸𑀭𑀢𑁄 𑀦𑀺𑀕𑁆𑀕𑀫𑀦𑀁 𑀦𑀺𑀬𑁆𑀬𑀸𑀦𑀁. 𑀅𑀬𑀫𑀲𑁆𑀲 𑀲𑀭𑀲𑁂𑀦 𑀧𑀓𑀸𑀲𑀦𑀸𑀓𑀸𑀭𑁄, 𑀇𑀢𑀭𑁂 𑀲𑀫𑀼𑀤𑀬𑀦𑀺𑀭𑁄𑀥𑀤𑀼𑀓𑁆𑀔𑀤𑀲𑁆𑀲𑀦𑁂𑀳𑀺. 𑀢𑀢𑁆𑀣 𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑀯𑀲𑁂𑀦 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑁄𑀯 𑀦𑀺𑀩𑁆𑀩𑀸𑀦𑀦𑀺𑀫𑀺𑀢𑁆𑀢𑀢𑀸 ¶ 𑀳𑁂𑀢𑁆𑀯𑀝𑁆𑀞𑁄. 𑀧𑀜𑁆𑀜𑀸𑀧𑀥𑀸𑀦𑀢𑁆𑀢𑀸 𑀫𑀕𑁆𑀕𑀲𑁆𑀲 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀁, 𑀘𑀢𑀼𑀲𑀘𑁆𑀘𑀤𑀲𑁆𑀲𑀦𑀁 𑀯𑀸 𑀤𑀲𑁆𑀲𑀦𑀝𑁆𑀞𑁄. 𑀘𑀢𑀼𑀲𑀘𑁆𑀘𑀤𑀲𑁆𑀲𑀦𑁂 𑀓𑀺𑀮𑁂𑀲𑀤𑀼𑀓𑁆𑀔𑀲𑀦𑁆𑀢𑀸𑀧𑀯𑀽𑀧𑀲𑀫𑀦𑁂 𑀘 𑀆𑀥𑀺𑀧𑀘𑁆𑀘𑀁 𑀓𑀭𑁄𑀦𑁆𑀢𑀺 𑀫𑀕𑁆𑀕𑀗𑁆𑀕𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀽𑀢𑀺 𑀲𑁄 𑀫𑀕𑁆𑀕𑀲𑁆𑀲 𑀅𑀥𑀺𑀧𑀢𑁂𑀬𑁆𑀬𑀝𑁆𑀞𑁄𑀢𑀺. 𑀯𑀺𑀲𑁂𑀲𑀢𑁄 𑀯𑀸 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀪𑀽𑀢𑀸 𑀫𑀕𑁆𑀕𑀗𑁆𑀕𑀥𑀫𑁆𑀫𑀸 𑀳𑁄𑀦𑁆𑀢𑀺 ‘‘𑀫𑀕𑁆𑀕𑀸𑀥𑀺𑀧𑀢𑀺𑀦𑁄 𑀥𑀫𑁆𑀫𑀸’’𑀢𑀺 𑀯𑀘𑀦𑀢𑁄𑀢𑀺 𑀲𑁄 𑀢𑁂𑀲𑀁 𑀆𑀓𑀸𑀭𑁄 𑀅𑀥𑀺𑀧𑀢𑁂𑀬𑁆𑀬𑀝𑁆𑀞𑁄. 𑀏𑀯𑀫𑀸𑀤𑀺 𑀆𑀳𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀅𑀪𑀺𑀲𑀫𑀬𑀝𑁆𑀞𑁄𑀢𑀺 𑀅𑀪𑀺𑀲𑀫𑁂𑀢𑀩𑁆𑀩𑀝𑁆𑀞𑁄, 𑀅𑀪𑀺𑀲𑀫𑀬𑀲𑁆𑀲 𑀯𑀸 𑀯𑀺𑀲𑀬𑀪𑀽𑀢𑁄 𑀅𑀢𑁆𑀣𑁄 𑀅𑀪𑀺𑀲𑀫𑀬𑀝𑁆𑀞𑁄, 𑀅𑀪𑀺𑀲𑀫𑀬𑀲𑁆𑀲𑁂𑀯 𑀯𑀸 𑀧𑀯𑀢𑁆𑀢𑀺𑀆𑀓𑀸𑀭𑁄 𑀅𑀪𑀺𑀲𑀫𑀬𑀝𑁆𑀞𑁄, 𑀲𑁄 𑀘𑁂𑀢𑁆𑀣 𑀅𑀪𑀺𑀲𑀫𑁂𑀢𑀩𑁆𑀩𑁂𑀦 𑀧𑀻𑀴𑀦𑀸𑀤𑀺𑀦𑀸 𑀤𑀲𑁆𑀲𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀓𑀼𑀘𑁆𑀙𑀺𑀢𑀁 𑀔𑀁 𑀤𑀼𑀓𑁆𑀔𑀁. ‘‘𑀲𑀫𑀸𑀕𑀫𑁄 𑀲𑀫𑁂𑀢’’𑀦𑁆𑀢𑀺𑀆𑀤𑀻𑀲𑀼 𑀓𑁂𑀯𑀮𑀲𑁆𑀲 𑀆𑀕𑀫-𑀲𑀤𑁆𑀤𑀲𑁆𑀲 𑀏𑀢-𑀲𑀤𑁆𑀤𑀲𑁆𑀲 𑀘 𑀧𑀬𑁄𑀕𑁂 𑀲𑀁𑀬𑁄𑀕𑀢𑁆𑀣𑀲𑁆𑀲 𑀅𑀦𑀼𑀧𑀮𑀩𑁆𑀪𑀦𑀢𑁄 𑀲𑀁-𑀲𑀤𑁆𑀤𑀲𑁆𑀲 𑀘 𑀧𑀬𑁄𑀕𑁂 𑀉𑀧𑀮𑀩𑁆𑀪𑀦𑀢𑁄 ‘‘𑀲𑀁𑀬𑁄𑀕𑀁 𑀤𑀻𑀧𑁂𑀢𑀻’’𑀢𑀺 𑀆𑀳, 𑀏𑀯𑀁 ‘‘𑀉𑀧𑁆𑀧𑀦𑁆𑀦𑀁 𑀉𑀤𑀺𑀢’’𑀦𑁆𑀢𑀺 𑀏𑀢𑁆𑀣𑀸𑀧𑀺. 𑀅𑀬-𑀲𑀤𑁆𑀤𑁄 𑀕𑀢𑀺𑀅𑀢𑁆𑀣𑀲𑀺𑀤𑁆𑀥𑁄 𑀳𑁂𑀢𑀼-𑀲𑀤𑁆𑀤𑁄 𑀯𑀺𑀬 𑀓𑀸𑀭𑀡𑀁 𑀤𑀻𑀧𑁂𑀢𑀺 𑀅𑀢𑁆𑀢𑀦𑁄 𑀨𑀮𑀦𑀺𑀧𑁆𑀨𑀸𑀤𑀦𑁂𑀦 𑀅𑀬𑀢𑀺 𑀧𑀯𑀢𑁆𑀢𑀢𑀺, 𑀏𑀢𑀺 𑀯𑀸 𑀏𑀢𑀲𑁆𑀫𑀸 𑀨𑀮𑀦𑁆𑀢𑀺 𑀅𑀬𑁄𑀢𑀺, 𑀲𑀁𑀬𑁄𑀕𑁂 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀁 𑀲𑀫𑀼𑀤𑀬𑁄𑀢𑀺 𑀏𑀢𑁆𑀣 𑀯𑀺𑀲𑀼𑀁 𑀧𑀬𑀼𑀚𑁆𑀚𑀫𑀸𑀦𑀸𑀧𑀺 𑀉𑀧𑀲𑀕𑁆𑀕-𑀲𑀤𑁆𑀤𑀸 𑀲𑀥𑀸𑀢𑀼𑀓𑀁 𑀲𑀁𑀬𑁄𑀕𑀢𑁆𑀣𑀁 𑀉𑀧𑁆𑀧𑀸𑀤𑀢𑁆𑀣𑀜𑁆𑀘 𑀤𑀻𑀧𑁂𑀦𑁆𑀢𑀺 𑀓𑀺𑀭𑀺𑀬𑀸𑀯𑀺𑀲𑁂𑀲𑀓𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀪𑀸𑀯𑁄 𑀏𑀢𑁆𑀣 𑀭𑁄𑀥𑀲𑁆𑀲𑀸𑀢𑀺 𑀦𑀺𑀭𑁄𑀥𑁄𑀢𑀺 𑀏𑀢𑁂𑀦 𑀦𑀺𑀩𑁆𑀩𑀸𑀦𑀲𑁆𑀲 𑀤𑀼𑀓𑁆𑀔𑀯𑀺𑀯𑁂𑀓𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀲𑀫𑀥𑀺𑀕𑀢𑁂 𑀢𑀲𑁆𑀫𑀺𑀁 𑀢𑀤𑀥𑀺𑀕𑀫𑀯𑀢𑁄 𑀧𑀼𑀕𑁆𑀕𑀮𑀲𑁆𑀲 𑀭𑁄𑀥𑀸𑀪𑀸𑀯𑁄 𑀧𑀯𑀢𑁆𑀢𑀺𑀲𑀗𑁆𑀔𑀸𑀢𑀲𑁆𑀲 𑀭𑁄𑀥𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑀸𑀬 𑀦𑀺𑀯𑀢𑁆𑀢𑀺𑀬𑀸 𑀅𑀥𑀺𑀕𑀢𑀢𑁆𑀢𑀸𑀢𑀺 𑀏𑀢𑀲𑁆𑀫𑀺𑀜𑁆𑀘𑀢𑁆𑀣𑁂 𑀅𑀪𑀸𑀯𑁄 𑀏𑀢𑀲𑁆𑀫𑀺𑀁 𑀭𑁄𑀥𑀲𑁆𑀲𑀸𑀢𑀺 𑀦𑀺𑀭𑁄𑀥𑁄𑀇𑀘𑁆𑀘𑁂𑀯 𑀧𑀤𑀲𑀫𑀸𑀲𑁄. 𑀤𑀼𑀓𑁆𑀔𑀸𑀪𑀸𑀯𑁄 𑀧𑀦𑁂𑀢𑁆𑀣 𑀧𑀼𑀕𑁆𑀕𑀮𑀲𑁆𑀲, 𑀦 𑀦𑀺𑀩𑁆𑀩𑀸𑀦𑀲𑁆𑀲𑁂𑀯. 𑀅𑀦𑀼𑀧𑁆𑀧𑀸𑀤𑁄 𑀏𑀯 𑀦𑀺𑀭𑁄𑀥𑁄 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄. 𑀆𑀬𑀢𑀺𑀪𑀯𑀸𑀤𑀻𑀲𑀼 𑀅𑀧𑁆𑀧𑀯𑀢𑁆𑀢𑀺, 𑀦 𑀧𑀦 𑀪𑀗𑁆𑀕𑁄𑀢𑀺 𑀪𑀗𑁆𑀕𑀯𑀸𑀘𑀓𑀁 𑀦𑀺𑀭𑁄𑀥-𑀲𑀤𑁆𑀤𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀅𑀦𑀼𑀧𑁆𑀧𑀸𑀤𑀯𑀸𑀘𑀓𑀁 𑀕𑀡𑁆𑀳𑀸𑀢𑀺. 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀓𑀸𑀭𑀡𑁂 𑀨𑀮𑁄𑀧𑀘𑀸𑀭𑀁 𑀓𑀢𑁆𑀯𑀸 𑀦𑀺𑀭𑁄𑀥𑀧𑀘𑁆𑀘𑀬𑁄 𑀦𑀺𑀭𑁄𑀥𑁄𑀢𑀺 𑀯𑀼𑀢𑁆𑀢𑁄. 𑀧𑀝𑀺𑀧𑀤𑀸 𑀘 𑀳𑁄𑀢𑀺 𑀧𑀼𑀕𑁆𑀕𑀮𑀲𑁆𑀲 𑀤𑀼𑀓𑁆𑀔𑀦𑀺𑀭𑁄𑀥𑀧𑁆𑀧𑀢𑁆𑀢𑀺𑀬𑀸. 𑀦𑀦𑀼 𑀲𑀸 𑀏𑀯 𑀤𑀼𑀓𑁆𑀔𑀦𑀺𑀭𑁄𑀥𑀧𑁆𑀧𑀢𑁆𑀢𑀻𑀢𑀺 𑀢𑀲𑁆𑀲𑀸 𑀏𑀯 𑀲𑀸 𑀧𑀝𑀺𑀧𑀤𑀸𑀢𑀺 𑀦 𑀬𑀼𑀚𑁆𑀚𑀢𑀻𑀢𑀺? 𑀦, 𑀧𑀼𑀕𑁆𑀕𑀮𑀸𑀥𑀺𑀕𑀫𑀲𑁆𑀲 𑀬𑁂𑀳𑀺 𑀲𑁄 𑀅𑀥𑀺𑀕𑀘𑁆𑀙𑀢𑀺, 𑀢𑁂𑀲𑀁 ¶ 𑀓𑀸𑀭𑀡𑀪𑀽𑀢𑀥𑀫𑁆𑀫𑀸𑀦𑀜𑁆𑀘 𑀧𑀢𑁆𑀢𑀺𑀪𑀸𑀯𑁂𑀦 𑀧𑀝𑀺𑀧𑀤𑀸𑀪𑀸𑀯𑁂𑀦 𑀘 𑀯𑀼𑀢𑁆𑀢𑀢𑁆𑀢𑀸. 𑀲𑀘𑁆𑀙𑀺𑀓𑀺𑀭𑀺𑀬𑀸𑀲𑀘𑁆𑀙𑀺𑀓𑀭𑀡𑀥𑀫𑁆𑀫𑀸𑀦𑀁 𑀅𑀜𑁆𑀜𑀢𑁆𑀢𑀸𑀪𑀸𑀯𑁂𑀧𑀺 𑀳𑀺 𑀧𑀼𑀕𑁆𑀕𑀮𑀲𑀘𑁆𑀙𑀺𑀓𑀺𑀭𑀺𑀬𑀥𑀫𑁆𑀫𑀪𑀸𑀯𑁂𑀳𑀺 𑀦𑀸𑀦𑀢𑁆𑀢𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄 ¶ 𑀓𑀢𑁄. 𑀅𑀣 𑀯𑀸 𑀤𑀼𑀓𑁆𑀔𑀦𑀺𑀭𑁄𑀥𑀧𑁆𑀧𑀢𑁆𑀢𑀺𑀬𑀸 𑀦𑀺𑀝𑁆𑀞𑀸𑀦𑀁 𑀨𑀮𑀦𑁆𑀢𑀺 𑀢𑀲𑁆𑀲𑀸 𑀤𑀼𑀓𑁆𑀔𑀦𑀺𑀭𑁄𑀥𑀧𑁆𑀧𑀢𑁆𑀢𑀺𑀬𑀸 𑀧𑀝𑀺𑀧𑀤𑀢𑀸 𑀤𑀝𑁆𑀞𑀩𑁆𑀩𑀸.

𑀩𑀼𑀤𑁆𑀥𑀸𑀤𑀬𑁄 𑀅𑀭𑀺𑀬𑀸 𑀧𑀝𑀺𑀯𑀺𑀚𑁆𑀛𑀦𑁆𑀢𑀻𑀢𑀺 𑀏𑀢𑁆𑀣 𑀧𑀝𑀺𑀯𑀺𑀤𑁆𑀥𑀓𑀸𑀮𑁂 𑀧𑀯𑀢𑁆𑀢𑀁 𑀩𑀼𑀤𑁆𑀥𑀸𑀤𑀺𑀯𑁄𑀳𑀸𑀭𑀁 ‘‘𑀅𑀕𑀫𑀸 𑀭𑀸𑀚𑀕𑀳𑀁 𑀩𑀼𑀤𑁆𑀥𑁄’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁪𑁧𑁦) 𑀯𑀺𑀬 𑀧𑀼𑀭𑀺𑀫𑀓𑀸𑀮𑁂𑀧𑀺 𑀆𑀭𑁄𑀧𑁂𑀢𑁆𑀯𑀸 ‘‘𑀩𑀼𑀤𑁆𑀥𑀸𑀤𑀬𑁄’’𑀢𑀺 𑀯𑀼𑀢𑁆𑀢𑀁. 𑀢𑁂 𑀳𑀺 𑀩𑀼𑀤𑁆𑀥𑀸𑀤𑀬𑁄 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑀻𑀢𑀺. 𑀅𑀭𑀺𑀬𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀸𑀦𑀺 𑀲𑀘𑁆𑀘𑀸𑀦𑀺 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀘𑁂𑀢𑁆𑀣 𑀧𑀼𑀭𑀺𑀫𑀧𑀤𑁂 𑀉𑀢𑁆𑀢𑀭𑀧𑀤𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀅𑀭𑀺𑀬𑀸 𑀇𑀫𑀦𑁆𑀢𑀺 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀝𑁆𑀞𑁂𑀦 𑀏𑀓𑀢𑁆𑀢𑀁 𑀉𑀧𑀦𑁂𑀢𑁆𑀯𑀸 ‘‘𑀇𑀫’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸𑀢𑀺 𑀢𑀣𑀸𑀕𑀢𑀲𑁆𑀲 𑀅𑀭𑀺𑀬𑀢𑁆𑀢𑀸 𑀢𑀲𑁆𑀲 𑀲𑀘𑁆𑀘𑀸𑀦𑀻𑀢𑀺 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀣𑀸𑀕𑀢𑁂𑀦 𑀳𑀺 𑀲𑀬𑀁 𑀅𑀥𑀺𑀕𑀢𑀢𑁆𑀢𑀸, 𑀢𑁂𑀦𑁂𑀯 𑀧𑀓𑀸𑀲𑀺𑀢𑀢𑁆𑀢𑀸, 𑀢𑀢𑁄 𑀏𑀯 𑀘 𑀅𑀜𑁆𑀜𑁂𑀳𑀺 𑀅𑀥𑀺𑀕𑀫𑀦𑀻𑀬𑀢𑁆𑀢𑀸 𑀢𑀸𑀦𑀺 𑀢𑀲𑁆𑀲 𑀳𑁄𑀦𑁆𑀢𑀻𑀢𑀺. 𑀅𑀭𑀺𑀬𑀪𑀸𑀯𑀲𑀺𑀤𑁆𑀥𑀺𑀢𑁄𑀧𑀻𑀢𑀺 𑀏𑀢𑁆𑀣 𑀅𑀭𑀺𑀬𑀲𑀸𑀥𑀓𑀸𑀦𑀺 𑀲𑀘𑁆𑀘𑀸𑀦𑀺 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀧𑀼𑀩𑁆𑀩𑁂 𑀯𑀺𑀬 𑀉𑀢𑁆𑀢𑀭𑀧𑀤𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀅𑀭𑀺𑀬𑀸𑀦𑀺 𑀲𑀘𑁆𑀘𑀸𑀦𑀻𑀢𑀺𑀧𑀻𑀢𑀺 𑀏𑀢𑁆𑀣 𑀅𑀯𑀺𑀢𑀣𑀪𑀸𑀯𑁂𑀦 𑀅𑀭𑀡𑀻𑀬𑀢𑁆𑀢𑀸 𑀅𑀥𑀺𑀕𑀦𑁆𑀢𑀩𑁆𑀩𑀢𑁆𑀢𑀸 𑀅𑀭𑀺𑀬𑀸𑀦𑀺, 𑀅𑀭𑀺𑀬𑀯𑁄𑀳𑀸𑀭𑁄 𑀯𑀸 𑀅𑀬𑀁 𑀅𑀯𑀺𑀲𑀁𑀯𑀸𑀤𑀓𑁄 𑀅𑀯𑀺𑀢𑀣𑀭𑀽𑀧𑁄 𑀤𑀝𑁆𑀞𑀩𑁆𑀩𑁄.

𑀩𑀸𑀥𑀦𑀮𑀓𑁆𑀔𑀡𑀦𑁆𑀢𑀺 𑀏𑀢𑁆𑀣 𑀤𑀼𑀓𑁆𑀔𑀤𑀼𑀓𑁆𑀔𑀢𑀦𑁆𑀦𑀺𑀫𑀺𑀢𑁆𑀢𑀪𑀸𑀯𑁄 𑀩𑀸𑀥𑀦𑀸, 𑀉𑀤𑀬𑀩𑁆𑀩𑀬𑀧𑀻𑀴𑀺𑀢𑀢𑀸 𑀯𑀸. 𑀪𑀯𑀸𑀤𑀻𑀲𑀼 𑀚𑀸𑀢𑀺𑀆𑀤𑀺𑀯𑀲𑁂𑀦 𑀘𑀓𑁆𑀔𑀼𑀭𑁄𑀕𑀸𑀤𑀺𑀯𑀲𑁂𑀦 𑀘 𑀅𑀦𑁂𑀓𑀥𑀸 𑀤𑀼𑀓𑁆𑀔𑀲𑁆𑀲 𑀧𑀯𑀢𑁆𑀢𑀦𑀫𑁂𑀯 𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀢𑀸𑀧𑀦𑀁, 𑀢𑀤𑀲𑁆𑀲 𑀓𑀺𑀘𑁆𑀘𑀁 𑀭𑀲𑁄. 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀻𑀲𑀼 𑀲𑀁𑀲𑀸𑀭𑀫𑁄𑀓𑁆𑀔𑁂𑀲𑀼 𑀧𑀯𑀢𑁆𑀢𑀺 𑀳𑀼𑀢𑁆𑀯𑀸 𑀕𑀬𑁆𑀳𑀢𑀻𑀢𑀺 𑀧𑀯𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀧𑀪𑀯𑀢𑀺 𑀏𑀢𑀲𑁆𑀫𑀸 𑀤𑀼𑀓𑁆𑀔𑀁 𑀧𑀝𑀺𑀲𑀦𑁆𑀥𑀺𑀬𑀁 𑀦𑀺𑀩𑁆𑀩𑀢𑁆𑀢𑀢𑀺 𑀧𑀼𑀭𑀺𑀫𑀪𑀯𑁂𑀦 𑀧𑀘𑁆𑀙𑀺𑀫𑀪𑀯𑁄 𑀖𑀝𑀺𑀢𑁄 𑀲𑀁𑀬𑀼𑀢𑁆𑀢𑁄 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀧𑀪𑀯𑁄. ‘‘𑀏𑀯𑀫𑁆𑀧𑀺 𑀢𑀡𑁆𑀳𑀸𑀦𑀼𑀲𑀬𑁂 𑀅𑀦𑀽𑀳𑀢𑁂 𑀦𑀺𑀩𑁆𑀩𑀢𑁆𑀢𑀢𑀻 𑀤𑀼𑀓𑁆𑀔𑀫𑀺𑀤𑀁 𑀧𑀼𑀦𑀧𑁆𑀧𑀼𑀦’’𑀦𑁆𑀢𑀺 (𑀥. 𑀧. 𑁩𑁩𑁮) 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀸𑀤𑀦𑀁 𑀅𑀦𑀼𑀧𑀘𑁆𑀙𑁂𑀤𑀓𑀭𑀡𑀁. 𑀪𑀯𑀦𑀺𑀲𑁆𑀲𑀭𑀡𑀦𑀺𑀯𑀸𑀭𑀡𑀁 𑀧𑀮𑀺𑀩𑁄𑀥𑁄. 𑀭𑀸𑀕𑀓𑁆𑀔𑀬𑀸𑀤𑀺𑀪𑀸𑀯𑁂𑀦 𑀲𑀩𑁆𑀩𑀤𑀼𑀓𑁆𑀔𑀲𑀦𑁆𑀢𑀢𑀸 𑀲𑀦𑁆𑀢𑀺. 𑀅𑀘𑁆𑀘𑀼𑀢𑀺𑀭𑀲𑀦𑁆𑀢𑀺 𑀅𑀘𑁆𑀘𑀼𑀢𑀺𑀲𑀫𑁆𑀧𑀢𑁆𑀢𑀺𑀓𑀁. 𑀘𑀯𑀦𑀁 𑀯𑀸 𑀓𑀺𑀘𑁆𑀘𑀦𑁆𑀢𑀺 𑀢𑀤𑀪𑀸𑀯𑀁 𑀓𑀺𑀘𑁆𑀘𑀫𑀺𑀯 𑀯𑁄𑀳𑀭𑀺𑀢𑁆𑀯𑀸 𑀅𑀘𑁆𑀘𑀼𑀢𑀺𑀓𑀺𑀘𑁆𑀘𑀦𑁆𑀢𑀺 𑀅𑀢𑁆𑀣𑁄. 𑀅𑀘𑀯𑀦𑀜𑁆𑀘 𑀲𑀪𑀸𑀯𑀲𑁆𑀲𑀸𑀧𑀭𑀺𑀘𑁆𑀘𑀚𑀦𑀁 𑀅𑀯𑀺𑀓𑀸𑀭𑀢𑀸 𑀤𑀝𑁆𑀞𑀩𑁆𑀩𑀸. 𑀧𑀜𑁆𑀘𑀓𑁆𑀔𑀦𑁆𑀥𑀦𑀺𑀫𑀺𑀢𑁆𑀢𑀲𑀼𑀜𑁆𑀜𑀢𑀸𑀬 𑀅𑀯𑀺𑀕𑁆𑀕𑀳𑀁 𑀳𑀼𑀢𑁆𑀯𑀸 𑀕𑀬𑁆𑀳𑀢𑀻𑀢𑀺 𑀅𑀦𑀺𑀫𑀺𑀢𑁆𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀅𑀦𑀼𑀲𑀬𑀼𑀧𑀘𑁆𑀙𑁂𑀤𑀦𑀯𑀲𑁂𑀦 𑀲𑀁𑀲𑀸𑀭𑀘𑀸𑀭𑀓𑀢𑁄 𑀦𑀺𑀕𑁆𑀕𑀫𑀦𑀽𑀧𑀸𑀬𑀪𑀸𑀯𑁄 𑀦𑀺𑀬𑁆𑀬𑀸𑀦𑀁. 𑀦𑀺𑀫𑀺𑀢𑁆𑀢𑀢𑁄 𑀧𑀯𑀢𑁆𑀢𑀢𑁄 𑀘 𑀘𑀺𑀢𑁆𑀢𑀲𑁆𑀲 𑀯𑀼𑀝𑁆𑀞𑀸𑀦𑀁 𑀳𑀼𑀢𑁆𑀯𑀸 𑀕𑀬𑁆𑀳𑀢𑀻𑀢𑀺 𑀯𑀼𑀝𑁆𑀞𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁.

𑀅𑀲𑀼𑀯𑀡𑁆𑀡𑀸𑀤𑀺 ¶ ¶ 𑀲𑀼𑀯𑀡𑁆𑀡𑀸𑀤𑀺 𑀯𑀺𑀬 𑀤𑀺𑀲𑁆𑀲𑀫𑀸𑀦𑀁 𑀫𑀸𑀬𑀸𑀢𑀺 𑀯𑀢𑁆𑀣𑀼𑀲𑀩𑁆𑀪𑀸𑀯𑀸 𑀢𑀲𑁆𑀲𑀸 𑀯𑀺𑀧𑀭𑀻𑀢𑀢𑀸 𑀯𑀼𑀢𑁆𑀢𑀸. 𑀉𑀤𑀓𑀁 𑀯𑀺𑀬 𑀤𑀺𑀲𑁆𑀲𑀫𑀸𑀦𑀸 𑀧𑀦 𑀫𑀭𑀻𑀘𑀺 𑀉𑀧𑀕𑀢𑀸𑀦𑀁 𑀢𑀼𑀘𑁆𑀙𑀸 𑀳𑁄𑀢𑀺, 𑀯𑀢𑁆𑀣𑀼𑀫𑀢𑁆𑀢𑀫𑁆𑀧𑀺 𑀢𑀲𑁆𑀲𑀸 𑀦 𑀤𑀺𑀲𑁆𑀲𑀢𑀻𑀢𑀺 𑀯𑀺𑀲𑀁𑀯𑀸𑀤𑀺𑀓𑀸 𑀯𑀼𑀢𑁆𑀢𑀸. 𑀫𑀭𑀻𑀘𑀺𑀫𑀸𑀬𑀸𑀅𑀢𑁆𑀢𑀸𑀦𑀁 𑀯𑀺𑀧𑀓𑁆𑀔𑁄 𑀪𑀸𑀯𑁄 𑀢𑀘𑁆𑀙𑀸𑀯𑀺𑀧𑀭𑀻𑀢𑀪𑀽𑀢𑀪𑀸𑀯𑁄. 𑀅𑀭𑀺𑀬𑀜𑀸𑀡𑀲𑁆𑀲𑀸𑀢𑀺 𑀅𑀯𑀺𑀢𑀣𑀕𑀸𑀳𑀓𑀲𑁆𑀲 𑀜𑀸𑀡𑀲𑁆𑀲, 𑀢𑁂𑀦 𑀧𑀝𑀺𑀯𑁂𑀥𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺 𑀕𑀬𑁆𑀳𑀦𑁆𑀢𑀺, 𑀢𑁂𑀲𑀜𑁆𑀘 𑀕𑁄𑀘𑀭𑀪𑀸𑀯𑁄 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀢𑀸𑀆𑀭𑀫𑁆𑀫𑀡𑀪𑀸𑀯𑁄 𑀘 𑀤𑀝𑁆𑀞𑀩𑁆𑀩𑁄. 𑀅𑀕𑁆𑀕𑀺𑀮𑀓𑁆𑀔𑀡𑀁 𑀉𑀡𑁆𑀳𑀢𑁆𑀢𑀁. 𑀢𑀜𑁆𑀳𑀺 𑀓𑀢𑁆𑀣𑀘𑀺 𑀓𑀝𑁆𑀞𑀸𑀤𑀺𑀉𑀧𑀸𑀤𑀸𑀦𑀪𑁂𑀤𑁂𑀧𑀺 𑀯𑀺𑀲𑀁𑀯𑀸𑀤𑀓𑀁 𑀯𑀺𑀧𑀭𑀻𑀢𑀁 𑀅𑀪𑀽𑀢𑀁 𑀯𑀸 𑀓𑀤𑀸𑀘𑀺 𑀦 𑀳𑁄𑀢𑀺. ‘‘𑀩𑁆𑀬𑀸𑀥𑀺𑀥𑀫𑁆𑀫𑀸 𑀚𑀭𑀸𑀥𑀫𑁆𑀫𑀸, 𑀅𑀣𑁄 𑀫𑀭𑀡𑀥𑀫𑁆𑀫𑀺𑀦𑁄’’𑀢𑀺 (𑀅. 𑀦𑀺. 𑁩.𑁩𑁯; 𑁫.𑁫𑁭) 𑀏𑀢𑁆𑀣 𑀯𑀼𑀢𑁆𑀢𑀸 𑀚𑀸𑀢𑀺𑀆𑀤𑀺𑀓𑀸 𑀮𑁄𑀓𑀧𑀓𑀢𑀺. 𑀫𑀦𑀼𑀲𑁆𑀲𑀸𑀦𑀁 𑀉𑀤𑁆𑀥𑀁 𑀤𑀻𑀖𑀢𑀸, 𑀏𑀓𑀘𑁆𑀘𑀸𑀦𑀁 𑀢𑀺𑀭𑀘𑁆𑀙𑀸𑀦𑀸𑀦𑀁 𑀢𑀺𑀭𑀺𑀬𑀁 𑀤𑀻𑀖𑀢𑀸, 𑀯𑀼𑀤𑁆𑀥𑀺𑀦𑀺𑀝𑁆𑀞𑀁 𑀧𑀢𑁆𑀢𑀸𑀦𑀁 𑀧𑀼𑀦 𑀅𑀯𑀟𑁆𑀠𑀦𑀁 𑀏𑀯𑀫𑀸𑀤𑀺𑀓𑀸 𑀘𑀸𑀢𑀺 𑀯𑀤𑀦𑁆𑀢𑀺. 𑀢𑀘𑁆𑀙𑀸𑀯𑀺𑀧𑀭𑀻𑀢𑀪𑀽𑀢𑀪𑀸𑀯𑁂𑀲𑀼 𑀧𑀘𑁆𑀙𑀺𑀫𑁄 𑀢𑀣𑀢𑀸, 𑀧𑀞𑀫𑁄 𑀅𑀯𑀺𑀢𑀣𑀢𑀸, 𑀫𑀚𑁆𑀛𑀺𑀫𑁄 𑀅𑀦𑀜𑁆𑀜𑀣𑀢𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄.

𑀤𑀼𑀓𑁆𑀔𑀸 𑀅𑀜𑁆𑀜𑀁 𑀦 𑀩𑀸𑀥𑀓𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀢𑀡𑁆𑀳𑀸𑀧𑀺 𑀚𑀸𑀢𑀺 𑀯𑀺𑀬 𑀤𑀼𑀓𑁆𑀔𑀦𑀺𑀫𑀺𑀢𑁆𑀢𑀢𑀸𑀬 𑀩𑀸𑀥𑀺𑀓𑀸𑀢𑀺? 𑀦, 𑀩𑀸𑀥𑀓𑀧𑀪𑀯𑀪𑀸𑀯𑁂𑀦 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸. 𑀚𑀸𑀢𑀺𑀆𑀤𑀻𑀦𑀁 𑀯𑀺𑀬 𑀯𑀸 𑀤𑀼𑀓𑁆𑀔𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑁄 𑀤𑀼𑀓𑁆𑀔𑀤𑀼𑀓𑁆𑀔𑀢𑀸 𑀘 𑀩𑀸𑀥𑀓𑀢𑀸, 𑀦 𑀤𑀼𑀓𑁆𑀔𑀲𑁆𑀲 𑀧𑀪𑀯𑀓𑀢𑀸𑀢𑀺 𑀦𑀢𑁆𑀣𑀺 𑀢𑀡𑁆𑀳𑀸𑀬 𑀧𑀪𑀯𑀓𑀪𑀸𑀯𑁂𑀦 𑀕𑀳𑀺𑀢𑀸𑀬 𑀩𑀸𑀥𑀓𑀢𑁆𑀢𑀧𑁆𑀧𑀲𑀗𑁆𑀕𑁄. 𑀢𑁂𑀦𑀸𑀳 ‘‘𑀤𑀼𑀓𑁆𑀔𑀸 𑀅𑀜𑁆𑀜𑀁 𑀦 𑀩𑀸𑀥𑀓’’𑀦𑁆𑀢𑀺. 𑀩𑀸𑀥𑀓𑀢𑁆𑀢𑀦𑀺𑀬𑀸𑀫𑁂𑀦𑀸𑀢𑀺 𑀤𑀼𑀓𑁆𑀔𑀁 𑀩𑀸𑀥𑀓𑀫𑁂𑀯, 𑀤𑀼𑀓𑁆𑀔𑀫𑁂𑀯 𑀩𑀸𑀥𑀓𑀦𑁆𑀢𑀺 𑀏𑀯𑀁 𑀤𑁆𑀯𑀺𑀥𑀸𑀧𑀺 𑀩𑀸𑀥𑀓𑀢𑁆𑀢𑀸𑀯𑀥𑀸𑀭𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀁 𑀯𑀺𑀦𑀸 𑀦𑀸𑀜𑁆𑀜𑀢𑁄𑀢𑀺 𑀲𑀢𑀺𑀧𑀺 𑀅𑀯𑀲𑁂𑀲𑀓𑀺𑀮𑁂𑀲𑀅𑀯𑀲𑁂𑀲𑀸𑀓𑀼𑀲𑀮𑀲𑀸𑀲𑀯𑀓𑀼𑀲𑀮𑀫𑀽𑀮𑀸𑀯𑀲𑁂𑀲𑀲𑀸𑀲𑀯𑀓𑀼𑀲𑀮𑀥𑀫𑁆𑀫𑀸𑀦𑀁 𑀤𑀼𑀓𑁆𑀔𑀳𑁂𑀢𑀼𑀪𑀸𑀯𑁂 𑀦 𑀢𑀡𑁆𑀳𑀸𑀬 𑀯𑀺𑀦𑀸 𑀢𑁂𑀲𑀁 𑀤𑀼𑀓𑁆𑀔𑀳𑁂𑀢𑀼𑀪𑀸𑀯𑁄 𑀅𑀢𑁆𑀣𑀺, 𑀢𑁂𑀳𑀺 𑀧𑀦 𑀯𑀺𑀦𑀸𑀧𑀺 𑀢𑀡𑁆𑀳𑀸𑀬 𑀤𑀼𑀓𑁆𑀔𑀳𑁂𑀢𑀼𑀪𑀸𑀯𑁄 𑀅𑀢𑁆𑀣𑀺 𑀓𑀼𑀲𑀮𑁂𑀳𑀺 𑀯𑀺𑀦𑀸 𑀅𑀓𑀼𑀲𑀮𑁂𑀳𑀺, 𑀭𑀽𑀧𑀸𑀯𑀘𑀭𑀸𑀤𑀻𑀳𑀺 𑀯𑀺𑀦𑀸 𑀓𑀸𑀫𑀸𑀯𑀘𑀭𑀸𑀤𑀻𑀳𑀺 𑀘 𑀢𑀡𑁆𑀳𑀸𑀬 𑀤𑀼𑀓𑁆𑀔𑀦𑀺𑀩𑁆𑀩𑀢𑁆𑀢𑀓𑀢𑁆𑀢𑀸. 𑀢𑀘𑁆𑀙𑀦𑀺𑀬𑁆𑀬𑀸𑀦𑀪𑀸𑀯𑀢𑁆𑀢𑀸𑀢𑀺 𑀤𑁆𑀯𑀺𑀥𑀸𑀧𑀺 𑀦𑀺𑀬𑀫𑁂𑀦 𑀢𑀘𑁆𑀙𑁄 𑀦𑀺𑀬𑁆𑀬𑀸𑀦𑀪𑀸𑀯𑁄 𑀏𑀢𑀲𑁆𑀲, 𑀦 𑀫𑀺𑀘𑁆𑀙𑀸𑀫𑀕𑁆𑀕𑀲𑁆𑀲 𑀯𑀺𑀬 𑀯𑀺𑀧𑀭𑀻𑀢𑀢𑀸𑀬, 𑀮𑁄𑀓𑀺𑀬𑀫𑀕𑁆𑀕𑀲𑁆𑀲 𑀯𑀺𑀬 𑀯𑀸 𑀅𑀦𑁂𑀓𑀦𑁆𑀢𑀺𑀓𑀢𑀸𑀬 𑀅𑀢𑀘𑁆𑀙𑁄𑀢𑀺 𑀢𑀘𑁆𑀙𑀦𑀺𑀬𑁆𑀬𑀸𑀦𑀪𑀸𑀯𑁄, 𑀫𑀕𑁆𑀕𑁄. 𑀢𑀲𑁆𑀲 𑀪𑀸𑀯𑁄 𑀢𑀘𑁆𑀙𑀦𑀺𑀬𑁆𑀬𑀸𑀦𑀪𑀸𑀯𑀢𑁆𑀢𑀁, 𑀢𑀲𑁆𑀫𑀸 𑀢𑀘𑁆𑀙𑀦𑀺𑀬𑁆𑀬𑀸𑀦𑀪𑀸𑀯𑀢𑁆𑀢𑀸. 𑀲𑀩𑁆𑀩𑀢𑁆𑀣 𑀤𑁆𑀯𑀺𑀥𑀸𑀧𑀺 𑀦𑀺𑀬𑀫𑁂𑀦 𑀢𑀘𑁆𑀙𑀸𑀯𑀺𑀧𑀭𑀻𑀢𑀪𑀽𑀢𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀇𑀢𑀺 𑀢𑀘𑁆𑀙𑀸𑀯𑀺𑀧𑀮𑁆𑀮𑀸𑀲𑀸’’𑀢𑀺𑀆𑀤𑀺.

𑀲𑀘𑁆𑀘-𑀲𑀤𑁆𑀤𑀲𑁆𑀲 ¶ 𑀲𑀫𑁆𑀪𑀯𑀦𑁆𑀢𑀸𑀦𑀁 𑀅𑀢𑁆𑀣𑀸𑀦𑀁 𑀉𑀤𑁆𑀥𑀭𑀡𑀁, 𑀲𑀫𑁆𑀪𑀯𑀦𑁆𑀢𑁂 𑀯𑀸 𑀅𑀢𑁆𑀣𑁂 𑀯𑀢𑁆𑀯𑀸 𑀅𑀥𑀺𑀧𑁆𑀧𑁂𑀢𑀢𑁆𑀣𑀲𑁆𑀲 𑀉𑀤𑁆𑀥𑀭𑀡𑀁 𑀅𑀢𑁆𑀣𑀼𑀤𑁆𑀥𑀸𑀭𑁄. 𑀯𑀺𑀭𑀢𑀺𑀲𑀘𑁆𑀘𑁂𑀢𑀺 𑀫𑀼𑀲𑀸𑀯𑀸𑀤𑀯𑀺𑀭𑀢𑀺𑀬𑀁. 𑀦 𑀳𑀺 𑀅𑀜𑁆𑀜𑀯𑀺𑀭𑀢𑀻𑀲𑀼 𑀲𑀘𑁆𑀘-𑀲𑀤𑁆𑀤𑁄 𑀦𑀺𑀭𑀼𑀴𑁆𑀳𑁄𑀢𑀺. ‘‘𑀇𑀤𑀫𑁂𑀯 𑀲𑀘𑁆𑀘𑀁, 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀕𑀳𑀺𑀢𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀲𑀘𑁆𑀘𑀁. ‘‘𑀅𑀫𑁄𑀲𑀥𑀫𑁆𑀫𑀁 𑀦𑀺𑀩𑁆𑀩𑀸𑀦𑀁 ¶ , 𑀢𑀤𑀭𑀺𑀬𑀸 𑀲𑀘𑁆𑀘𑀢𑁄 𑀯𑀺𑀤𑀽’’𑀢𑀺 (𑀲𑀼. 𑀦𑀺. 𑁭𑁬𑁩) 𑀅𑀫𑁄𑀲𑀥𑀫𑁆𑀫𑀢𑁆𑀢𑀸 𑀦𑀺𑀩𑁆𑀩𑀸𑀦𑀁 𑀧𑀭𑀫𑀢𑁆𑀣𑀲𑀘𑁆𑀘𑀁 𑀯𑀼𑀢𑁆𑀢𑀁. 𑀢𑀲𑁆𑀲 𑀧𑀦 𑀢𑀁𑀲𑀫𑁆𑀧𑀸𑀧𑀓𑀲𑁆𑀲 𑀘 𑀫𑀕𑁆𑀕𑀲𑁆𑀲 𑀧𑀚𑀸𑀦𑀦𑀸 𑀧𑀝𑀺𑀯𑁂𑀥𑁄 𑀅𑀯𑀺𑀯𑀸𑀤𑀓𑀸𑀭𑀡𑀦𑁆𑀢𑀺 𑀤𑁆𑀯𑀬𑀫𑁆𑀧𑀺 ‘‘𑀏𑀓𑀜𑁆𑀳𑀺 𑀲𑀘𑁆𑀘𑀁 𑀦 𑀤𑀼𑀢𑀺𑀬𑀫𑀢𑁆𑀣𑀺, 𑀬𑀲𑁆𑀫𑀺𑀁 𑀧𑀚𑀸 𑀦𑁄 𑀯𑀺𑀯𑀤𑁂 𑀧𑀚𑀸𑀦’’𑀦𑁆𑀢𑀺 (𑀲𑀼. 𑀦𑀺. 𑁮𑁯𑁦; 𑀫𑀳𑀸𑀦𑀺. 𑁧𑁧𑁯) 𑀫𑀺𑀲𑁆𑀲𑀸 𑀕𑀸𑀣𑀸𑀬 𑀲𑀘𑁆𑀘𑀦𑁆𑀢𑀺 𑀯𑀼𑀢𑁆𑀢𑀁.

𑀦𑁂𑀢𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀦𑁆𑀢𑀺 𑀆𑀕𑀘𑁆𑀙𑁂𑀬𑁆𑀬, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻𑀢𑀺 𑀏𑀢𑁂𑀦 𑀚𑀸𑀢𑀺𑀆𑀤𑀻𑀦𑀁 𑀤𑀼𑀓𑁆𑀔𑀅𑀭𑀺𑀬𑀲𑀘𑁆𑀘𑀪𑀸𑀯𑁂 𑀅𑀯𑀺𑀧𑀭𑀻𑀢𑀢𑀁 𑀤𑀲𑁆𑀲𑁂𑀢𑀺, 𑀅𑀜𑁆𑀜𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀦𑁆𑀢𑀺 𑀆𑀕𑀘𑁆𑀙𑁂𑀬𑁆𑀬, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻𑀢𑀺 𑀇𑀫𑀺𑀦𑀸 𑀤𑀼𑀓𑁆𑀔𑀅𑀭𑀺𑀬𑀲𑀘𑁆𑀘𑀪𑀸𑀯𑀲𑁆𑀲 𑀚𑀸𑀢𑀺𑀆𑀤𑀻𑀲𑀼 𑀦𑀺𑀬𑀢𑀢𑀁. 𑀲𑀘𑁂𑀧𑀺 𑀓𑀣𑀜𑁆𑀘𑀺 𑀓𑁄𑀘𑀺 𑀏𑀯𑀁𑀘𑀺𑀢𑁆𑀢𑁄 𑀆𑀕𑀘𑁆𑀙𑁂𑀬𑁆𑀬, 𑀧𑀜𑁆𑀜𑀸𑀧𑀦𑁂 𑀧𑀦 𑀲𑀳𑀥𑀫𑁆𑀫𑁂𑀦 𑀧𑀜𑁆𑀜𑀸𑀧𑀦𑁂 𑀅𑀢𑁆𑀢𑀦𑁄 𑀯𑀸𑀤𑀲𑁆𑀲 𑀘 𑀧𑀜𑁆𑀜𑀸𑀧𑀦𑁂 𑀲𑀫𑀢𑁆𑀣𑁄 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀳𑀫𑁂𑀢𑀁…𑀧𑁂… 𑀧𑀜𑁆𑀜𑀸𑀧𑁂𑀲𑁆𑀲𑀸𑀫𑀻𑀢𑀺 𑀆𑀕𑀘𑁆𑀙𑁂𑀬𑁆𑀬, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀚𑀸𑀢𑀺𑀆𑀤𑀻𑀦𑀁 𑀅𑀦𑀜𑁆𑀜𑀣𑀢𑀸 𑀅𑀜𑁆𑀜𑀲𑁆𑀲 𑀘 𑀢𑀣𑀸𑀪𑀽𑀢𑀲𑁆𑀲 𑀅𑀪𑀸𑀯𑁄𑀬𑁂𑀯𑁂𑀢𑁆𑀣 𑀞𑀸𑀦𑀸𑀪𑀸𑀯𑁄. 𑀲𑀘𑁂𑀧𑀺 𑀓𑁄𑀘𑀺 𑀆𑀕𑀘𑁆𑀙𑁂𑀬𑁆𑀬, 𑀆𑀕𑀘𑁆𑀙𑀢𑀼, 𑀞𑀸𑀦𑀁 𑀧𑀦 𑀦𑀢𑁆𑀣𑀻𑀢𑀺 𑀅𑀬𑀫𑁂𑀢𑁆𑀣 𑀲𑀼𑀢𑁆𑀢𑀢𑁆𑀣𑁄. 𑀏𑀲 𑀦𑀬𑁄 𑀤𑀼𑀢𑀺𑀬𑀲𑀼𑀢𑁆𑀢𑁂𑀧𑀺. 𑀢𑀢𑁆𑀣 𑀧𑀦 𑀲𑀫𑁆𑀧𑀢𑁆𑀢𑀢𑀸 𑀧𑀘𑁆𑀘𑀓𑁆𑀔𑀢𑀸 𑀘 𑀧𑀞𑀫𑀢𑀸, 𑀢𑀁𑀦𑀺𑀫𑀺𑀢𑁆𑀢𑀢𑀸 𑀤𑀼𑀢𑀺𑀬𑀢𑀸, 𑀢𑀤𑀼𑀧𑀲𑀫𑀢𑀸 𑀢𑀢𑀺𑀬𑀢𑀸, 𑀢𑀁𑀲𑀫𑁆𑀧𑀸𑀧𑀓𑀢𑀸 𑀘𑀢𑀼𑀢𑁆𑀣𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀦𑀺𑀩𑁆𑀩𑀼𑀢𑀺𑀓𑀸𑀫𑁂𑀦 𑀧𑀭𑀺𑀚𑀸𑀦𑀦𑀸𑀤𑀻𑀳𑀺 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀓𑀺𑀘𑁆𑀘𑀁 𑀓𑀸𑀢𑀩𑁆𑀩𑀁 𑀦𑀢𑁆𑀣𑀺, 𑀥𑀫𑁆𑀫𑀜𑀸𑀡𑀓𑀺𑀘𑁆𑀘𑀁 𑀯𑀸 𑀇𑀢𑁄 𑀅𑀜𑁆𑀜𑀁 𑀦𑀢𑁆𑀣𑀺, 𑀧𑀭𑀺𑀜𑁆𑀜𑁂𑀬𑁆𑀬𑀸𑀤𑀻𑀦𑀺 𑀘 𑀏𑀢𑀧𑁆𑀧𑀭𑀫𑀸𑀦𑁂𑀯𑀸𑀢𑀺 𑀘𑀢𑁆𑀢𑀸𑀭𑁂𑀯 𑀯𑀼𑀢𑁆𑀢𑀸𑀦𑀺. 𑀢𑀡𑁆𑀳𑀸𑀬 𑀆𑀤𑀻𑀦𑀯𑀤𑀲𑁆𑀲𑀸𑀯𑀻𑀦𑀁 𑀯𑀲𑁂𑀦 ‘‘𑀢𑀡𑁆𑀳𑀸𑀯𑀢𑁆𑀣𑀼𑀆𑀤𑀻𑀦𑀁 𑀏𑀢𑀁𑀧𑀭𑀫𑀢𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀆𑀮𑀬𑁂 𑀧𑀜𑁆𑀘𑀓𑀸𑀫𑀕𑀼𑀡𑀲𑀗𑁆𑀔𑀸𑀢𑁂, 𑀲𑀓𑀮𑀯𑀢𑁆𑀣𑀼𑀓𑀸𑀫𑀲𑀗𑁆𑀔𑀸𑀢𑁂, 𑀪𑀯𑀢𑁆𑀢𑀬𑀲𑀗𑁆𑀔𑀸𑀢𑁂 𑀯𑀸 𑀤𑀼𑀓𑁆𑀔𑁂 𑀤𑁄𑀲𑀤𑀲𑁆𑀲𑀸𑀯𑀻𑀦𑀁 𑀯𑀲𑁂𑀦 ‘‘𑀆𑀮𑀬𑀸𑀤𑀻𑀦𑀁 𑀏𑀢𑀁𑀧𑀭𑀫𑀢𑀸𑀬𑀸’’𑀢𑀺 𑀯𑀼𑀢𑁆𑀢𑀁.

𑀲𑀳𑁂𑀢𑀼𑀓𑁂𑀦 𑀤𑀼𑀓𑁆𑀔𑁂𑀦𑀸𑀢𑀺 𑀏𑀢𑁂𑀦 𑀤𑀼𑀓𑁆𑀔𑀲𑁆𑀲 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀢𑀸𑀤𑀲𑁆𑀲𑀦𑁂𑀦 𑀅𑀢𑀺𑀲𑀁𑀯𑁂𑀕𑀯𑀢𑁆𑀣𑀼𑀢𑀁 𑀤𑀲𑁆𑀲𑁂𑀢𑀺.

𑀦 ¶ 𑀧𑀝𑀺𑀯𑁂𑀥𑀜𑀸𑀡𑀁 𑀯𑀺𑀬 𑀲𑀓𑀺𑀤𑁂𑀯 𑀩𑀼𑀚𑁆𑀛𑀢𑀺, 𑀅𑀣 𑀔𑁄 𑀅𑀦𑀼 𑀅𑀦𑀼 𑀩𑀼𑀚𑁆𑀛𑀦𑀢𑁄 𑀅𑀦𑀼𑀩𑁄𑀥𑁄, 𑀅𑀦𑀼𑀲𑁆𑀲𑀯𑀸𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀅𑀦𑀼𑀕𑀢𑁄 𑀯𑀸 𑀩𑁄𑀥𑁄 𑀅𑀦𑀼𑀩𑁄𑀥𑁄. 𑀦 𑀳𑀺 𑀲𑁄 𑀧𑀘𑁆𑀘𑀓𑁆𑀔𑀢𑁄 𑀩𑀼𑀚𑁆𑀛𑀢𑀺, 𑀅𑀦𑀼𑀲𑁆𑀲𑀯𑀸𑀤𑀺𑀯𑀲𑁂𑀦 𑀧𑀦 𑀓𑀧𑁆𑀧𑁂𑀢𑁆𑀯𑀸 𑀕𑀡𑁆𑀳𑀸𑀢𑀻𑀢𑀺. 𑀓𑀺𑀘𑁆𑀘𑀢𑁄𑀢𑀺 𑀧𑀭𑀺𑀚𑀸𑀦𑀦𑀸𑀤𑀺𑀢𑁄. 𑀢𑀁𑀓𑀺𑀘𑁆𑀘𑀓𑀭𑀡𑁂𑀦𑁂𑀯 𑀳𑀺 𑀢𑀸𑀦𑀺 𑀢𑀲𑁆𑀲 𑀧𑀸𑀓𑀝𑀸𑀦𑀺. 𑀯𑀺𑀯𑀝𑁆𑀝𑀸𑀦𑀼𑀧𑀲𑁆𑀲𑀦𑀸𑀬 𑀳𑀺 𑀲𑀗𑁆𑀔𑀸𑀭𑁂𑀳𑀺 𑀧𑀢𑀺𑀮𑀻𑀬𑀫𑀸𑀦𑀫𑀸𑀦𑀲𑀲𑁆𑀲 𑀉𑀧𑁆𑀧𑀚𑁆𑀚𑀫𑀸𑀦𑀁 𑀫𑀕𑁆𑀕𑀜𑀸𑀡𑀁 𑀯𑀺𑀲𑀗𑁆𑀔𑀸𑀭𑀁 𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 ¶ 𑀤𑀼𑀓𑁆𑀔𑀁 𑀧𑀭𑀺𑀘𑁆𑀙𑀺𑀦𑁆𑀤𑀢𑀺, 𑀤𑀼𑀓𑁆𑀔𑀕𑀢𑀜𑁆𑀘 𑀢𑀡𑁆𑀳𑀁 𑀧𑀚𑀳𑀢𑀺, 𑀦𑀺𑀭𑁄𑀥𑀜𑁆𑀘 𑀨𑀼𑀲𑀢𑀺 𑀆𑀤𑀺𑀘𑁆𑀘𑁄 𑀯𑀺𑀬 𑀧𑀪𑀸𑀬, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀻𑀳𑀺 𑀲𑀳 𑀉𑀧𑁆𑀧𑀦𑁆𑀦𑀁 𑀢𑀁 𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀦 𑀘 𑀲𑀗𑁆𑀔𑀸𑀭𑁂 𑀅𑀫𑀼𑀜𑁆𑀘𑀺𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑁂𑀦 𑀜𑀸𑀡𑁂𑀦 𑀏𑀢𑀁 𑀲𑀩𑁆𑀩𑀁 𑀲𑀓𑁆𑀓𑀸 𑀓𑀸𑀢𑀼𑀁 𑀦𑀺𑀫𑀺𑀢𑁆𑀢𑀧𑀯𑀢𑁆𑀢𑁂𑀳𑀺 𑀅𑀯𑀼𑀝𑁆𑀞𑀺𑀢𑀢𑁆𑀢𑀸, 𑀢𑀲𑁆𑀫𑀸 𑀏𑀢𑀸𑀦𑀺 𑀓𑀺𑀘𑁆𑀘𑀸𑀦𑀺 𑀓𑀭𑁄𑀦𑁆𑀢𑀁 𑀢𑀁 𑀜𑀸𑀡𑀁 𑀤𑀼𑀓𑁆𑀔𑀸𑀤𑀻𑀦𑀺 𑀯𑀺𑀪𑀸𑀯𑁂𑀢𑀺 𑀢𑀢𑁆𑀣 𑀲𑀫𑁆𑀫𑁄𑀳𑀦𑀺𑀯𑀢𑁆𑀢𑀦𑁂𑀦𑀸𑀢𑀺 ‘‘𑀘𑀢𑁆𑀢𑀸𑀭𑀺𑀧𑀺 𑀲𑀘𑁆𑀘𑀸𑀦𑀺 𑀧𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁.

𑀤𑀼𑀓𑁆𑀔𑀲𑀫𑀼𑀤𑀬𑀫𑁆𑀧𑀺 𑀲𑁄 𑀧𑀲𑁆𑀲𑀢𑀻𑀢𑀺 𑀓𑀸𑀮𑀦𑁆𑀢𑀭𑀤𑀲𑁆𑀲𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀦, ‘‘𑀬𑁄 𑀦𑀼 𑀔𑁄, 𑀆𑀯𑀼𑀲𑁄, 𑀤𑀼𑀓𑁆𑀔𑀁 𑀧𑀲𑁆𑀲𑀢𑀺, 𑀤𑀼𑀓𑁆𑀔𑀲𑀫𑀼𑀤𑀬𑀫𑁆𑀧𑀺 𑀲𑁄 𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁫.𑁧𑁧𑁦𑁦) 𑀏𑀓𑀤𑀲𑁆𑀲𑀺𑀦𑁄 𑀅𑀜𑁆𑀜𑀢𑁆𑀢𑀬𑀤𑀲𑁆𑀲𑀺𑀢𑀸𑀯𑀺𑀘𑀸𑀭𑀡𑀸𑀬 𑀢𑀲𑁆𑀲𑀸 𑀲𑀸𑀥𑀦𑀢𑁆𑀣𑀁 𑀕𑀯𑀁𑀧𑀢𑀺𑀢𑁆𑀣𑁂𑀭𑁂𑀦 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀆𑀳𑀭𑀺𑀢𑀢𑁆𑀢𑀸 𑀧𑀘𑁆𑀘𑁂𑀓𑀜𑁆𑀘 𑀲𑀘𑁆𑀘𑁂𑀲𑀼 𑀤𑀺𑀲𑁆𑀲𑀫𑀸𑀦𑁂𑀲𑀼 𑀅𑀜𑁆𑀜𑀢𑁆𑀢𑀬𑀤𑀲𑁆𑀲𑀦𑀲𑁆𑀲 𑀬𑁄𑀚𑀺𑀢𑀢𑁆𑀢𑀸. 𑀅𑀜𑁆𑀜𑀣𑀸 𑀅𑀦𑀼𑀧𑀼𑀩𑁆𑀩𑀸𑀪𑀺𑀲𑀫𑀬𑁂 𑀧𑀼𑀭𑀺𑀫𑀤𑀺𑀝𑁆𑀞𑀲𑁆𑀲 𑀧𑀘𑁆𑀙𑀸 𑀅𑀤𑀲𑁆𑀲𑀦𑀢𑁄 𑀲𑀫𑀼𑀤𑀬𑀸𑀤𑀺𑀤𑀲𑁆𑀲𑀺𑀦𑁄 𑀤𑀼𑀓𑁆𑀔𑀸𑀤𑀺𑀤𑀲𑁆𑀲𑀦𑀢𑀸 𑀦 𑀬𑁄𑀚𑁂𑀢𑀩𑁆𑀩𑀸 𑀲𑀺𑀬𑀸𑀢𑀺. 𑀲𑀼𑀤𑁆𑀥𑀲𑀗𑁆𑀔𑀸𑀭𑀧𑀼𑀜𑁆𑀚𑀫𑀢𑁆𑀢𑀤𑀲𑁆𑀲𑀦𑀢𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀧𑀭𑀺𑀬𑀼𑀝𑁆𑀞𑀸𑀦𑀁 𑀦𑀺𑀯𑀸𑀭𑁂𑀢𑀺. ‘‘𑀮𑁄𑀓𑀲𑀫𑀼𑀤𑀬𑀁 𑀔𑁄, 𑀓𑀘𑁆𑀘𑀸𑀦, 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑁄 𑀬𑀸 𑀮𑁄𑀓𑁂 𑀦𑀢𑁆𑀣𑀺𑀢𑀸, 𑀲𑀸 𑀦 𑀳𑁄𑀢𑀻’’𑀢𑀺 𑀯𑀘𑀦𑀢𑁄 𑀲𑀫𑀼𑀤𑀬𑀤𑀲𑁆𑀲𑀦𑀁 𑀳𑁂𑀢𑀼𑀨𑀮𑀧𑁆𑀧𑀩𑀦𑁆𑀥𑀸𑀯𑀺𑀘𑁆𑀙𑁂𑀤𑀤𑀲𑁆𑀲𑀦𑀯𑀲𑁂𑀦 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀧𑀭𑀺𑀬𑀼𑀝𑁆𑀞𑀸𑀦𑀁 𑀦𑀺𑀯𑀢𑁆𑀢𑁂𑀢𑀺. ‘‘𑀮𑁄𑀓𑀦𑀺𑀭𑁄𑀥𑀁 𑀔𑁄…𑀧𑁂… 𑀧𑀲𑁆𑀲𑀢𑁄 𑀬𑀸 𑀮𑁄𑀓𑁂 𑀅𑀢𑁆𑀣𑀺𑀢𑀸, 𑀲𑀸 𑀦 𑀳𑁄𑀢𑀻’’𑀢𑀺 (𑀲𑀁. 𑀦𑀺. 𑁨.𑁧𑁫) 𑀯𑀘𑀦𑀢𑁄 𑀦𑀺𑀭𑁄𑀥𑀤𑀲𑁆𑀲𑀦𑀁 𑀳𑁂𑀢𑀼𑀦𑀺𑀭𑁄𑀥𑀸 𑀨𑀮𑀦𑀺𑀭𑁄𑀥𑀤𑀲𑁆𑀲𑀦𑀯𑀲𑁂𑀦 𑀲𑀲𑁆𑀲𑀢𑀤𑀺𑀝𑁆𑀞𑀺𑀧𑀭𑀺𑀬𑀼𑀝𑁆𑀞𑀸𑀦𑀁 𑀦𑀺𑀯𑀸𑀭𑁂𑀢𑀺. 𑀅𑀢𑁆𑀢𑀓𑀸𑀭𑀲𑁆𑀲 𑀧𑀘𑁆𑀘𑀓𑁆𑀔𑀤𑀲𑁆𑀲𑀦𑀢𑁄 𑀫𑀕𑁆𑀕𑀤𑀲𑁆𑀲𑀦𑁂𑀦 ‘‘𑀦𑀢𑁆𑀣𑀺 𑀅𑀢𑁆𑀢𑀓𑀸𑀭𑁂, 𑀦𑀢𑁆𑀣𑀺 𑀧𑀭𑀓𑀸𑀭𑁂, 𑀦𑀢𑁆𑀣𑀺 𑀧𑀼𑀭𑀺𑀲𑀓𑀸𑀭𑁂’’𑀢𑀺𑀆𑀤𑀺𑀓𑀁 (𑀤𑀻. 𑀦𑀺. 𑁧.𑁧𑁬𑁮) 𑀅𑀓𑀺𑀭𑀺𑀬𑀤𑀺𑀝𑁆𑀞𑀺𑀧𑀭𑀺𑀬𑀼𑀝𑁆𑀞𑀸𑀦𑀁 𑀧𑀚𑀳𑀢𑀺. ‘‘𑀦𑀢𑁆𑀣𑀺 𑀳𑁂𑀢𑀼, 𑀦𑀢𑁆𑀣𑀺 𑀧𑀘𑁆𑀘𑀬𑁄 𑀲𑀢𑁆𑀢𑀸𑀦𑀁 𑀲𑀁𑀓𑀺𑀮𑁂𑀲𑀸𑀬, 𑀅𑀳𑁂𑀢𑀽 𑀅𑀧𑁆𑀧𑀘𑁆𑀘𑀬𑀸 𑀲𑀢𑁆𑀢𑀸 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺. 𑀦𑀢𑁆𑀣𑀺 𑀳𑁂𑀢𑀼…𑀧𑁂… 𑀯𑀺𑀲𑀼𑀤𑁆𑀥𑀺𑀬𑀸, 𑀅𑀳𑁂𑀢𑀽 𑀅𑀧𑁆𑀧𑀘𑁆𑀘𑀬𑀸 𑀲𑀢𑁆𑀢𑀸 𑀯𑀺𑀲𑀼𑀚𑁆𑀛𑀦𑁆𑀢𑀻’’𑀢𑀺𑀆𑀤𑀺𑀓𑀸 𑀅𑀳𑁂𑀢𑀼𑀓𑀤𑀺𑀝𑁆𑀞𑀺 𑀘 𑀇𑀥 𑀅𑀓𑀺𑀭𑀺𑀬𑀤𑀺𑀝𑁆𑀞𑀺𑀕𑁆𑀕𑀳𑀡𑁂𑀦 𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀲𑀸𑀧𑀺 𑀳𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀤𑀲𑁆𑀲𑀦𑁂𑀦 𑀧𑀳𑀻𑀬𑀢𑀻𑀢𑀺.

𑀤𑀼𑀓𑁆𑀔𑀜𑀸𑀡𑀁 ¶ 𑀲𑀫𑀼𑀤𑀬𑀨𑀮𑀲𑁆𑀲 𑀤𑀼𑀓𑁆𑀔𑀲𑁆𑀲 𑀅𑀥𑀼𑀯𑀸𑀤𑀺𑀪𑀸𑀯𑀁 𑀧𑀲𑁆𑀲𑀢𑀻𑀢𑀺 𑀨𑀮𑁂 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀁 𑀦𑀺𑀯𑀢𑁆𑀢𑁂𑀢𑀺. ‘‘𑀇𑀲𑁆𑀲𑀭𑁄 𑀮𑁄𑀓𑀁 𑀧𑀯𑀢𑁆𑀢𑁂𑀢𑀺 𑀦𑀺𑀯𑀢𑁆𑀢𑁂𑀢𑀺 𑀘𑀸’’𑀢𑀺 𑀇𑀲𑁆𑀲𑀭𑀓𑀸𑀭𑀡𑀺𑀦𑁄 𑀯𑀤𑀦𑁆𑀢𑀺, 𑀧𑀥𑀸𑀦𑀢𑁄 𑀆𑀯𑀺 𑀪𑀯𑀢𑀺, 𑀢𑀢𑁆𑀣𑁂𑀯 𑀘 𑀧𑀢𑀺𑀮𑀻𑀬𑀢𑀻𑀢𑀺 𑀧𑀥𑀸𑀦𑀓𑀸𑀭𑀡𑀺𑀦𑁄. ‘‘𑀓𑀸𑀮𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀺 𑀦𑀺𑀯𑀢𑁆𑀢𑀢𑀺 𑀘𑀸’’𑀢𑀺 𑀓𑀸𑀮𑀯𑀸𑀤𑀺𑀦𑁄. ‘‘𑀲𑀪𑀸𑀯𑁂𑀦𑁂𑀯 𑀲𑀫𑁆𑀪𑁄𑀢𑀺 𑀯𑀺𑀪𑁄𑀢𑀺 𑀘𑀸’’𑀢𑀺 𑀲𑀪𑀸𑀯𑀯𑀸𑀤𑀺𑀦𑁄. 𑀆𑀤𑀺-𑀲𑀤𑁆𑀤𑁂𑀦 𑀅𑀡𑀽𑀳𑀺 𑀮𑁄𑀓𑁄 𑀧𑀯𑀢𑁆𑀢𑀢𑀺, 𑀲𑀩𑁆𑀩𑀁 𑀧𑀼𑀩𑁆𑀩𑁂𑀓𑀢𑀳𑁂𑀢𑀽𑀢𑀺 𑀏𑀯𑀫𑀸𑀤𑀺 𑀅𑀓𑀸𑀭𑀡𑀧𑀭𑀺𑀕𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀭𑀸𑀫𑀼𑀤𑀓𑀸𑀴𑀸𑀭𑀸𑀤𑀻𑀦𑀁 𑀯𑀺𑀬 𑀅𑀭𑀽𑀧𑀮𑁄𑀓𑁂, 𑀦𑀺𑀕𑀡𑁆𑀞𑀸𑀤𑀻𑀦𑀁 𑀯𑀺𑀬 𑀮𑁄𑀓𑀣𑀼𑀧𑀺𑀓𑀸𑀬 𑀅𑀧𑀯𑀕𑁆𑀕𑁄 𑀫𑁄𑀓𑁆𑀔𑁄𑀢𑀺 𑀕𑀳𑀡𑀁 ¶ . 𑀆𑀤𑀺-𑀲𑀤𑁆𑀤𑁂𑀦 𑀧𑀥𑀸𑀦𑀲𑁆𑀲 𑀅𑀧𑁆𑀧𑀯𑀢𑁆𑀢𑀺, 𑀕𑀼𑀡𑀯𑀺𑀬𑀼𑀢𑁆𑀢𑀲𑁆𑀲 𑀅𑀢𑁆𑀢𑀦𑁄 𑀲𑀓𑀢𑁆𑀢𑀦𑀺 𑀅𑀯𑀝𑁆𑀞𑀸𑀦𑀁, 𑀩𑁆𑀭𑀳𑁆𑀫𑀼𑀦𑀸 𑀲𑀮𑁄𑀓𑀢𑀸, 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸𑀢𑀺 𑀏𑀯𑀫𑀸𑀤𑀺𑀕𑁆𑀕𑀳𑀡𑀜𑁆𑀘 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣 𑀕𑀼𑀡𑀯𑀺𑀬𑀼𑀢𑁆𑀢𑀲𑁆𑀲𑀸𑀢𑀺 𑀩𑀼𑀤𑁆𑀥𑀺𑀲𑀼𑀔𑀤𑀼𑀓𑁆𑀔𑀇𑀘𑁆𑀙𑀸𑀤𑁄𑀲𑀧𑀬𑀢𑁆𑀢𑀥𑀫𑁆𑀫𑀸𑀥𑀫𑁆𑀫𑀲𑀗𑁆𑀔𑀸𑀭𑁂𑀳𑀺 𑀦𑀯𑀳𑀺 𑀅𑀢𑁆𑀢𑀕𑀼𑀡𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀲𑁆𑀲𑀸𑀢𑀺 𑀓𑀡𑀸𑀤𑀪𑀓𑁆𑀔𑀯𑀸𑀤𑁄. 𑀇𑀦𑁆𑀤𑁆𑀭𑀺𑀬𑀢𑀧𑁆𑀧𑀦𑀧𑀼𑀢𑁆𑀢𑀫𑀼𑀔𑀤𑀲𑁆𑀲𑀦𑀸𑀤𑀻𑀳𑀺 𑀯𑀺𑀦𑀸 𑀅𑀧𑀯𑀕𑁆𑀕𑁄 𑀦𑀢𑁆𑀣𑀻𑀢𑀺 𑀕𑀳𑁂𑀢𑁆𑀯𑀸 𑀢𑀣𑀸𑀧𑀯𑀢𑁆𑀢𑀦𑀁 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄.

𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂𑀲𑀼 𑀤𑁆𑀯𑀸𑀤𑀲𑀲𑀼 𑀆𑀬𑀢𑀦𑁂𑀲𑀼 𑀓𑀸𑀫𑀪𑀯𑀯𑀺𑀪𑀯𑀢𑀡𑁆𑀳𑀸𑀯𑀲𑁂𑀦 𑀤𑁆𑀯𑀸𑀤𑀲 𑀢𑀺𑀓𑀸 𑀙𑀢𑁆𑀢𑀺𑀁𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺. 𑀔𑀼𑀤𑁆𑀤𑀓𑀯𑀢𑁆𑀣𑀼𑀯𑀺𑀪𑀗𑁆𑀕𑁂 𑀯𑀸 𑀆𑀕𑀢𑀦𑀬𑁂𑀦 𑀓𑀸𑀮𑀯𑀺𑀪𑀸𑀕𑀁 𑀅𑀦𑀸𑀫𑀲𑀺𑀢𑁆𑀯𑀸 𑀯𑀼𑀢𑁆𑀢𑀸𑀦𑀺. 𑀯𑀻𑀫𑀁𑀲𑀺𑀤𑁆𑀥𑀺𑀧𑀸𑀤𑀸𑀤𑀬𑁄 𑀩𑁄𑀥𑀺𑀧𑀓𑁆𑀔𑀺𑀬𑀸 𑀓𑀺𑀘𑁆𑀘𑀦𑀸𑀦𑀢𑁆𑀢𑁂𑀦 𑀯𑀼𑀢𑁆𑀢𑀸, 𑀅𑀢𑁆𑀣𑀢𑁄 𑀏𑀓𑀢𑁆𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀫𑀼𑀔𑁂𑀦 𑀢𑀢𑁆𑀣 𑀅𑀦𑁆𑀢𑁄𑀕𑀥𑀸. 𑀢𑀬𑁄 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑀸𑀤𑀬𑁄𑀢𑀺 𑀮𑁄𑀓𑀺𑀬𑀓𑁆𑀔𑀡𑁂 𑀅𑀮𑁄𑀪𑀫𑁂𑀢𑁆𑀢𑀸𑀓𑀭𑀼𑀡𑀸𑀲𑀫𑁆𑀧𑀬𑁄𑀕𑀯𑀲𑁂𑀦 𑀪𑀺𑀦𑁆𑀦𑀸 𑀫𑀕𑁆𑀕𑀓𑁆𑀔𑀡𑁂 𑀮𑁄𑀪𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀸𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀢𑀬𑁄𑀢𑀺 𑀏𑀓𑁄𑀧𑀺 𑀯𑀼𑀢𑁆𑀢𑁄. 𑀏𑀲 𑀦𑀬𑁄 𑀲𑀫𑁆𑀫𑀸𑀯𑀸𑀘𑀸𑀤𑀻𑀲𑀼. 𑀅𑀧𑁆𑀧𑀺𑀘𑁆𑀙𑀢𑀸𑀲𑀦𑁆𑀢𑀼𑀝𑁆𑀞𑀺𑀢𑀸𑀦𑀁 𑀧𑀦 𑀪𑀸𑀯𑁂 𑀲𑀫𑁆𑀫𑀸𑀆𑀚𑀻𑀯𑀲𑀫𑁆𑀪𑀯𑀢𑁄 𑀢𑁂𑀦 𑀢𑁂𑀲𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀪𑀯𑀦𑁆𑀢𑀭𑁂𑀧𑀺 𑀚𑀻𑀯𑀺𑀢𑀳𑁂𑀢𑀼𑀧𑀺 𑀅𑀭𑀺𑀬𑁂𑀳𑀺 𑀅𑀯𑀻𑀢𑀺𑀓𑁆𑀓𑀫𑀦𑀻𑀬𑀢𑁆𑀢𑀸 𑀅𑀭𑀺𑀬𑀓𑀦𑁆𑀢𑀸𑀦𑀁 𑀲𑀫𑁆𑀫𑀸𑀯𑀸𑀘𑀸𑀤𑀺𑀲𑀻𑀮𑀸𑀦𑀁 𑀕𑀳𑀡𑁂𑀦 𑀬𑁂𑀦 𑀲𑀤𑁆𑀥𑀸𑀳𑀢𑁆𑀣𑁂𑀦 𑀢𑀸𑀦𑀺 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀸𑀦𑀺, 𑀲𑁄 𑀲𑀤𑁆𑀥𑀸𑀳𑀢𑁆𑀣𑁄 𑀕𑀳𑀺𑀢𑁄𑀬𑁂𑀯 𑀳𑁄𑀢𑀻𑀢𑀺 𑀢𑀢𑁄 𑀅𑀦𑀜𑁆𑀜𑀸𑀦𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑀤𑁆𑀥𑀸𑀩𑀮𑀸𑀦𑀺 𑀢𑀢𑁆𑀣 𑀅𑀦𑁆𑀢𑁄𑀕𑀥𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀲𑀁 𑀅𑀢𑁆𑀣𑀺𑀢𑀸𑀬𑀸𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑀤𑁆𑀥𑀸𑀩𑀮𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑀸𑀦𑀁 𑀅𑀢𑁆𑀣𑀺𑀢𑀸𑀬 𑀲𑀻𑀮𑀲𑁆𑀲 𑀅𑀢𑁆𑀣𑀺𑀪𑀸𑀯𑀢𑁄 𑀢𑀺𑀯𑀺𑀥𑁂𑀦𑀧𑀺 𑀲𑀻𑀮𑁂𑀦 𑀢𑁂 𑀢𑀬𑁄𑀧𑀺 𑀕𑀳𑀺𑀢𑀸𑀢𑀺 𑀢𑀢𑁆𑀣 𑀅𑀦𑁆𑀢𑁄𑀕𑀥𑀸. 𑀘𑀺𑀢𑁆𑀢𑀲𑀫𑀸𑀥𑀻𑀢𑀺 𑀘𑀺𑀢𑁆𑀢𑀺𑀤𑁆𑀥𑀺𑀧𑀸𑀤𑀁 𑀯𑀤𑀢𑀺. ‘‘𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑀬’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁩, 𑁧𑁯𑁨) 𑀳𑀺 𑀘𑀺𑀢𑁆𑀢𑀫𑀼𑀔𑁂𑀦 𑀲𑀫𑀸𑀥𑀺 ¶ 𑀯𑀼𑀢𑁆𑀢𑁄𑀢𑀺 𑀲𑀫𑀸𑀥𑀺𑀫𑀼𑀔𑁂𑀦 𑀘𑀺𑀢𑁆𑀢𑀫𑁆𑀧𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺. 𑀘𑀺𑀢𑁆𑀢𑀺𑀤𑁆𑀥𑀺𑀧𑀸𑀤𑀪𑀸𑀯𑀦𑀸𑀬 𑀧𑀦 𑀲𑀫𑀸𑀥𑀺𑀧𑀺 𑀅𑀥𑀺𑀫𑀢𑁆𑀢𑁄 𑀳𑁄𑀢𑀻𑀢𑀺 𑀯𑀻𑀫𑀁𑀲𑀺𑀤𑁆𑀥𑀺𑀧𑀸𑀤𑀸𑀤𑀺𑀯𑀘𑀦𑀁 𑀯𑀺𑀬 𑀘𑀺𑀢𑁆𑀢𑀺𑀤𑁆𑀥𑀺𑀧𑀸𑀤𑀯𑀘𑀦𑀁 𑀅𑀯𑀢𑁆𑀯𑀸 𑀇𑀥 ‘‘𑀘𑀺𑀢𑁆𑀢𑀲𑀫𑀸𑀥𑀻’’𑀢𑀺 𑀯𑀼𑀢𑁆𑀢𑀁. ‘‘𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀺, 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑁂𑀢𑀺, 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁫𑁯; 𑀲𑀁. 𑀦𑀺. 𑁫.𑁩𑁭𑁬; 𑀅. 𑀦𑀺. 𑁩.𑁯𑁬; 𑁧𑁧.𑁧𑁨) 𑀯𑀘𑀦𑀢𑁄 𑀲𑀫𑀸𑀥𑀺𑀉𑀧𑀓𑀸𑀭𑀸 𑀧𑀻𑀢𑀺𑀧𑀲𑁆𑀲𑀤𑁆𑀥𑀺𑀬𑁄, 𑀢𑀲𑁆𑀫𑀸 𑀲𑀫𑀸𑀥𑀺𑀕𑁆𑀕𑀳𑀡𑁂𑀦 𑀕𑀳𑀺𑀢𑀸, 𑀉𑀧𑁂𑀓𑁆𑀔𑀸 𑀧𑀦 𑀲𑀫𑀸𑀥𑀺𑀉𑀧𑀓𑀸𑀭𑀓𑀢𑁄 𑀢𑀁𑀲𑀤𑀺𑀲𑀓𑀺𑀘𑁆𑀘𑀢𑁄 𑀘, 𑀢𑀲𑁆𑀫𑀸 𑀲𑀫𑁆𑀫𑀸𑀲𑀫𑀸𑀥𑀺𑀯𑀲𑁂𑀦 𑀏𑀢𑁂𑀲𑀁 𑀅𑀦𑁆𑀢𑁄𑀕𑀥𑀢𑀸 𑀤𑀝𑁆𑀞𑀩𑁆𑀩𑀸.

𑀪𑀸𑀭𑁄 𑀯𑀺𑀬 𑀯𑀺𑀖𑀸𑀢𑀓𑀢𑁆𑀢𑀸. 𑀤𑀼𑀩𑁆𑀪𑀺𑀓𑁆𑀔𑀫𑀺𑀯 𑀩𑀸𑀥𑀓𑀢𑁆𑀢𑀸. ‘‘𑀦𑀺𑀩𑁆𑀩𑀸𑀦𑀧𑀭𑀫𑀁 𑀲𑀼𑀔’’𑀦𑁆𑀢𑀺 (𑀫. 𑀦𑀺. 𑁨.𑁨𑁧𑁫, 𑁨𑁧𑁭; 𑀥. 𑀧. 𑁨𑁦𑁩, 𑁨𑁦𑁪) 𑀲𑀼𑀔𑀪𑀸𑀯𑀢𑁄 ¶ 𑀲𑀼𑀪𑀺𑀓𑁆𑀔𑀫𑀺𑀯. 𑀅𑀦𑀺𑀝𑁆𑀞𑀪𑀸𑀯𑀢𑁄 𑀲𑀸𑀲𑀗𑁆𑀓𑀲𑀧𑁆𑀧𑀝𑀺𑀪𑀬𑀢𑁄 𑀘 𑀤𑀼𑀓𑁆𑀔𑀁 𑀯𑁂𑀭𑀻𑀯𑀺𑀲𑀭𑀼𑀓𑁆𑀔𑀪𑀬𑀑𑀭𑀺𑀫𑀢𑀻𑀭𑀽𑀧𑀫𑀁.

𑀢𑀣𑀢𑁆𑀣𑁂𑀦𑀸𑀢𑀺 𑀢𑀣𑀲𑀪𑀸𑀯𑁂𑀦, 𑀧𑀭𑀺𑀜𑁆𑀜𑁂𑀬𑁆𑀬𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀅𑀭𑀺𑀬𑀲𑀘𑁆𑀘𑀤𑁆𑀯𑀬𑀁 𑀲𑀺𑀬𑀸 𑀤𑀼𑀓𑁆𑀔𑀁, 𑀦 𑀅𑀭𑀺𑀬𑀲𑀘𑁆𑀘𑀁, 𑀲𑀺𑀬𑀸 𑀅𑀭𑀺𑀬𑀲𑀘𑁆𑀘𑀁, 𑀦 𑀤𑀼𑀓𑁆𑀔𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀭𑀺𑀬𑀲𑀘𑁆𑀘-𑀲𑀤𑁆𑀤𑀧𑀭𑀸 𑀳𑀺 𑀤𑀼𑀓𑁆𑀔𑀸𑀤𑀺𑀲𑀤𑁆𑀤𑀸 𑀧𑀭𑀺𑀜𑁆𑀜𑁂𑀬𑁆𑀬𑀸𑀤𑀺𑀪𑀸𑀯𑀁 𑀯𑀤𑀦𑁆𑀢𑀺. 𑀢𑁂𑀦𑁂𑀯 𑀅𑀭𑀺𑀬𑀲𑀘𑁆𑀘-𑀲𑀤𑁆𑀤𑀸𑀦𑀧𑁂𑀓𑁆𑀔𑀁 𑀤𑀼𑀓𑁆𑀔-𑀲𑀤𑁆𑀤𑀁 𑀲𑀦𑁆𑀥𑀸𑀬 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀲𑀸𑀫𑀜𑁆𑀜𑀨𑀮𑀥𑀫𑁆𑀫𑀸𑀦𑀁 𑀆𑀤𑀺𑀧𑀤𑀲𑀗𑁆𑀕𑀳𑁄 𑀯𑀼𑀢𑁆𑀢𑁄, 𑀢𑀤𑀧𑁂𑀓𑁆𑀔𑀁 𑀲𑀦𑁆𑀥𑀸𑀬 𑀘𑀢𑀼𑀢𑁆𑀣𑀧𑀤𑀲𑀗𑁆𑀕𑀳𑁄. 𑀲𑀫𑀼𑀤𑀬𑀸𑀤𑀻𑀲𑀼 𑀅𑀯𑀲𑁂𑀲𑀓𑀺𑀮𑁂𑀲𑀸𑀤𑀬𑁄 𑀲𑀫𑀼𑀤𑀬𑁄, 𑀦 𑀅𑀭𑀺𑀬𑀲𑀘𑁆𑀘𑀁, 𑀲𑀗𑁆𑀔𑀸𑀭𑀦𑀺𑀭𑁄𑀥𑁄 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀘 𑀦𑀺𑀭𑁄𑀥𑁄, 𑀦 𑀅𑀭𑀺𑀬𑀲𑀘𑁆𑀘𑀁, 𑀅𑀭𑀺𑀬𑀫𑀕𑁆𑀕𑀢𑁄 𑀅𑀜𑁆𑀜𑀸𑀦𑀺 𑀫𑀕𑁆𑀕𑀗𑁆𑀕𑀸𑀦𑀺 𑀫𑀕𑁆𑀕𑁄, 𑀦 𑀅𑀭𑀺𑀬𑀲𑀘𑁆𑀘𑀦𑁆𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀤𑀼𑀓𑁆𑀔𑀁 𑀯𑁂𑀤𑀦𑀻𑀬𑀫𑁆𑀧𑀺 𑀲𑀦𑁆𑀢𑀁 𑀯𑁂𑀤𑀓𑀭𑀳𑀺𑀢𑀁, 𑀓𑁂𑀯𑀮𑀁 𑀧𑀦 𑀢𑀲𑁆𑀫𑀺𑀁 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀧𑀯𑀢𑁆𑀢𑀫𑀸𑀦𑁂 𑀤𑀼𑀓𑁆𑀔𑀁 𑀯𑁂𑀤𑁂𑀢𑀻𑀢𑀺 𑀯𑁄𑀳𑀸𑀭𑀫𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀇𑀢𑀭𑁂𑀲𑀼𑀧𑀺.

𑀓𑀺𑀭𑀺𑀬𑀸𑀯 𑀯𑀺𑀚𑁆𑀚𑀢𑀻𑀢𑀺 𑀲𑀫𑀼𑀤𑀬𑀫𑁂𑀯 𑀯𑀤𑀢𑀺, 𑀢𑀲𑁆𑀲 𑀯𑀸 𑀤𑀼𑀓𑁆𑀔𑀧𑀘𑁆𑀘𑀬𑀪𑀸𑀯𑀁. 𑀫𑀕𑁆𑀕𑁄 𑀅𑀢𑁆𑀣𑀻𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀫𑀕𑁆𑀕𑀫𑀢𑁆𑀣𑀻’’𑀢𑀺 𑀑𑀓𑀸𑀭𑀲𑁆𑀲 𑀅𑀪𑀸𑀯𑁄 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀕𑀫𑀓𑁄𑀢𑀺 𑀕𑀦𑁆𑀢𑀸. 𑀲𑀸𑀲𑀯𑀢𑀸 𑀅𑀲𑀼𑀪𑀢𑀸𑀢𑀺 𑀓𑀢𑁆𑀯𑀸 𑀦𑀺𑀭𑁄𑀥𑀫𑀕𑁆𑀕𑀸 𑀲𑀼𑀪𑀸 𑀏𑀯. 𑀤𑀼𑀓𑁆𑀔𑀸𑀤𑀻𑀦𑀁 𑀧𑀭𑀺𑀬𑀸𑀬𑁂𑀦 𑀲𑀫𑀼𑀤𑀬𑀸𑀤𑀺𑀪𑀸𑀯𑁄 𑀘 𑀅𑀢𑁆𑀣𑀺, 𑀦 𑀧𑀦 𑀦𑀺𑀭𑁄𑀥𑀪𑀸𑀯𑁄, 𑀦𑀺𑀭𑁄𑀥𑀲𑁆𑀲 𑀯𑀸 𑀤𑀼𑀓𑁆𑀔𑀸𑀤𑀺𑀪𑀸𑀯𑁄𑀢𑀺 𑀦 𑀅𑀜𑁆𑀜𑀫𑀜𑁆𑀜𑀲𑀫𑀗𑁆𑀕𑀺𑀢𑀸𑀢𑀺 𑀆𑀳 ‘‘𑀦𑀺𑀭𑁄𑀥𑀲𑀼𑀜𑁆𑀜𑀸𑀦𑀺 𑀯𑀸’’𑀢𑀺𑀆𑀤𑀺. 𑀲𑀫𑀼𑀤𑀬𑁂 𑀤𑀼𑀓𑁆𑀔𑀲𑁆𑀲𑀸𑀪𑀸𑀯𑀢𑁄𑀢𑀺 𑀧𑁄𑀦𑁄𑀩𑁆𑀪𑀯𑀺𑀓𑀸𑀬 𑀢𑀡𑁆𑀳𑀸𑀬 𑀧𑀼𑀦𑀩𑁆𑀪𑀯𑀲𑁆𑀲 𑀅𑀪𑀸𑀯𑀢𑁄. 𑀬𑀣𑀸 𑀯𑀸 𑀧𑀓𑀢𑀺𑀯𑀸𑀤𑀻𑀦𑀁 𑀯𑀺𑀓𑀸𑀭𑀸𑀯𑀺𑀪𑀸𑀯𑀢𑁄 𑀧𑀼𑀩𑁆𑀩𑁂 𑀧𑀝𑀺𑀧𑁆𑀧𑀮𑀻𑀦𑀸 𑀘 𑀧𑀓𑀢𑀺𑀪𑀸𑀯𑁂𑀦𑁂𑀯 𑀢𑀺𑀝𑁆𑀞𑀦𑁆𑀢𑀺, 𑀦 𑀏𑀯𑀁 ¶ 𑀲𑀫𑀼𑀤𑀬𑀲𑀫𑁆𑀧𑀬𑀼𑀢𑁆𑀢𑀫𑁆𑀧𑀺 𑀤𑀼𑀓𑁆𑀔𑀁 𑀲𑀫𑀼𑀤𑀬𑀪𑀸𑀯𑁂𑀦 𑀢𑀺𑀝𑁆𑀞𑀢𑀻𑀢𑀺 𑀆𑀳 ‘‘𑀲𑀫𑀼𑀤𑀬𑁂 𑀤𑀼𑀓𑁆𑀔𑀲𑁆𑀲𑀸𑀪𑀸𑀯𑀢𑁄’’𑀢𑀺. 𑀬𑀣𑀸 𑀅𑀯𑀺𑀪𑀢𑁆𑀢𑁂𑀳𑀺 𑀯𑀺𑀓𑀸𑀭𑁂𑀳𑀺 𑀫𑀳𑀦𑁆𑀢𑀸 𑀯𑀺𑀲𑁂𑀲𑀺𑀦𑁆𑀤𑁆𑀭𑀺𑀬𑀪𑀽𑀢𑀯𑀺𑀲𑁂𑀲𑁂𑀳𑀺 𑀧𑀓𑀢𑀺𑀪𑀸𑀯𑁂𑀦𑁂𑀯 𑀞𑀺𑀢𑁂𑀳𑀺 𑀧𑀓𑀢𑀺 𑀲𑀕𑀩𑁆𑀪𑀸 𑀧𑀓𑀢𑀺𑀯𑀸𑀤𑀻𑀦𑀁, 𑀏𑀯𑀁 𑀦 𑀨𑀮𑁂𑀦 𑀲𑀕𑀩𑁆𑀪𑁄 𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀲𑀫𑀼𑀤𑀬𑀸𑀦𑀁 𑀦𑀺𑀭𑁄𑀥𑀫𑀕𑁆𑀕𑀸𑀦𑀜𑁆𑀘 𑀅𑀲𑀫𑀯𑀸𑀬𑀸𑀢𑀺 𑀏𑀢𑀁 𑀯𑀺𑀯𑀭𑀦𑁆𑀢𑁄 𑀆𑀳 ‘‘𑀦 𑀳𑁂𑀢𑀼𑀲𑀫𑀯𑁂𑀢𑀁 𑀳𑁂𑀢𑀼𑀨𑀮’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀇𑀥 𑀢𑀦𑁆𑀢𑀽𑀲𑀼 𑀧𑀝𑁄, 𑀓𑀧𑀸𑀮𑁂𑀲𑀼 𑀖𑀝𑁄, 𑀩𑀺𑀭𑀡𑁂𑀲𑀼 𑀓𑀝𑁄, 𑀤𑁆𑀯𑀻𑀲𑀼 𑀅𑀡𑀽𑀲𑀼 𑀤𑁆𑀯𑀺𑀅𑀡𑀼𑀓𑀦𑁆𑀢𑀺𑀆𑀤𑀺𑀦𑀸 𑀇𑀥 𑀩𑀼𑀤𑁆𑀥𑀺𑀯𑁄𑀳𑀸𑀭𑀚𑀦𑀓𑁄 𑀅𑀯𑀺𑀲𑀼𑀁 𑀲𑀺𑀤𑁆𑀥𑀸𑀦𑀁 𑀲𑀫𑁆𑀩𑀦𑁆𑀥𑁄 𑀲𑀫𑀯𑀸𑀬𑁄, 𑀢𑁂𑀦 𑀲𑀫𑀯𑀸𑀬𑁂𑀦 𑀓𑀸𑀭𑀡𑁂𑀲𑀼 𑀤𑁆𑀯𑀻𑀲𑀼 𑀅𑀡𑀽𑀲𑀼 𑀤𑁆𑀯𑀺𑀅𑀡𑀼𑀓𑀁 𑀨𑀮𑀁 𑀲𑀫𑀯𑁂𑀢𑀁 𑀏𑀓𑀻𑀪𑀽𑀢𑀫𑀺𑀯 𑀲𑀫𑁆𑀩𑀦𑁆𑀥𑀁, 𑀢𑀻𑀲𑀼 𑀅𑀡𑀽𑀲𑀼 𑀢𑀺𑀅𑀡𑀼𑀓𑀦𑁆𑀢𑀺 𑀏𑀯𑀁 𑀫𑀳𑀸𑀧𑀣𑀯𑀺𑀫𑀳𑀸𑀉𑀤𑀓𑀫𑀳𑀸𑀅𑀕𑁆𑀕𑀺𑀫𑀳𑀸𑀯𑀸𑀢𑀓𑁆𑀔𑀦𑁆𑀥𑀧𑀭𑀺𑀬𑀦𑁆𑀢𑀁 𑀨𑀮𑀁 𑀅𑀢𑁆𑀢𑀦𑁄 𑀓𑀸𑀭𑀡𑁂𑀲𑀼 𑀲𑀫𑀯𑁂𑀢𑀦𑁆𑀢𑀺 𑀲𑀫𑀯𑀸𑀬𑀯𑀸𑀤𑀺𑀦𑁄 𑀯𑀤𑀦𑁆𑀢𑀺. 𑀏𑀯𑀁 𑀧𑀦 𑀯𑀤𑀦𑁆𑀢𑁂𑀳𑀺 𑀅𑀧𑀭𑀺𑀫𑀸𑀡𑁂𑀲𑀼 𑀓𑀸𑀭𑀡𑁂𑀲𑀼 𑀫𑀳𑀸𑀧𑀭𑀺𑀫𑀸𑀡𑀁 ¶ 𑀏𑀓𑀁 𑀨𑀮𑀁 𑀲𑀫𑀯𑁂𑀢𑀁 𑀅𑀢𑁆𑀢𑀦𑁄 𑀅𑀦𑁆𑀢𑁄𑀕𑀥𑁂𑀳𑀺 𑀓𑀸𑀭𑀡𑁂𑀳𑀺 𑀲𑀕𑀩𑁆𑀪𑀁 𑀅𑀲𑀼𑀜𑁆𑀜𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀏𑀯𑀫𑀺𑀥 𑀲𑀫𑀯𑀸𑀬𑀸𑀪𑀸𑀯𑀸 𑀨𑀮𑁂 𑀳𑁂𑀢𑀼 𑀦𑀢𑁆𑀣𑀻𑀢𑀺 𑀳𑁂𑀢𑀼𑀲𑀼𑀜𑁆𑀜𑀁 𑀨𑀮𑀦𑁆𑀢𑀺 𑀅𑀢𑁆𑀣𑁄.

𑀧𑀯𑀢𑁆𑀢𑀺𑀪𑀸𑀯𑀢𑁄𑀢𑀺 𑀲𑀁𑀲𑀸𑀭𑀲𑁆𑀲 𑀧𑀯𑀢𑁆𑀢𑀺𑀪𑀸𑀯𑀢𑁄. 𑀘𑀢𑀼𑀆𑀳𑀸𑀭𑀪𑁂𑀤𑀢𑁄𑀢𑀺 𑀇𑀫𑀺𑀦𑀸 𑀘𑀢𑁆𑀢𑀸𑀭𑁄 𑀆𑀳𑀸𑀭𑀪𑁂𑀤𑁂 𑀢𑁂𑀳𑀺 𑀪𑀺𑀦𑁆𑀦𑁂 𑀢𑀧𑁆𑀧𑀘𑁆𑀘𑀬𑀥𑀫𑁆𑀫𑀪𑁂𑀤𑁂 𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀭𑀽𑀧𑀸𑀪𑀺𑀦𑀦𑁆𑀤𑀦𑀸𑀤𑀺𑀪𑁂𑀤𑁄 𑀭𑀽𑀧𑀸𑀤𑀺𑀔𑀦𑁆𑀥𑀯𑀲𑁂𑀦, 𑀆𑀭𑀫𑁆𑀫𑀡𑀯𑀲𑁂𑀦 𑀯𑀸. 𑀉𑀧𑀸𑀤𑀸𑀦𑁂𑀳𑀺 𑀉𑀧𑀸𑀤𑀻𑀬𑀢𑀻𑀢𑀺 𑀉𑀧𑀸𑀤𑀺, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀜𑁆𑀘𑀓𑀁. 𑀦𑀺𑀩𑁆𑀩𑀸𑀦𑀜𑁆𑀘 𑀢𑀁𑀦𑀺𑀲𑁆𑀲𑀭𑀡𑀪𑀽𑀢𑀁 𑀢𑀲𑁆𑀲 𑀯𑀽𑀧𑀲𑀫𑁄 𑀢𑀁𑀲𑀦𑁆𑀢𑀻𑀢𑀺 𑀓𑀢𑁆𑀯𑀸 𑀢𑀲𑁆𑀲 𑀬𑀸𑀯 𑀧𑀘𑁆𑀙𑀺𑀫𑀁 𑀘𑀺𑀢𑁆𑀢𑀁, 𑀢𑀸𑀯 𑀲𑁂𑀲𑀢𑀁, 𑀢𑀢𑁄 𑀧𑀭𑀜𑁆𑀘 𑀅𑀦𑀯𑀲𑁂𑀲𑀢𑀁 𑀉𑀧𑀸𑀤𑀸𑀬 ‘‘𑀲𑀉𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀽’’𑀢𑀺 𑀤𑁆𑀯𑀺𑀥𑀸 𑀯𑁄𑀳𑀭𑀻𑀬𑀢𑀻𑀢𑀺. ‘‘𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀯𑀺𑀧𑀲𑁆𑀲𑀦𑀸, 𑀇𑀢𑀭𑁂 𑀲𑀫𑀣𑁄’’𑀢𑀺 𑀯𑀤𑀦𑁆𑀢𑀺. 𑀲𑀻𑀮𑀫𑁆𑀧𑀺 𑀳𑀺 𑀲𑀫𑀣𑀲𑁆𑀲 𑀉𑀧𑀓𑀸𑀭𑀓𑀢𑁆𑀢𑀸 𑀲𑀫𑀣𑀕𑁆𑀕𑀳𑀡𑁂𑀦 𑀕𑀬𑁆𑀳𑀢𑀻𑀢𑀺 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑁄. 𑀅𑀣 𑀯𑀸 𑀬𑀸𑀦𑀤𑁆𑀯𑀬𑀯𑀲𑁂𑀦 𑀮𑀤𑁆𑀥𑁄 𑀫𑀕𑁆𑀕𑁄 𑀲𑀫𑀣𑁄 𑀯𑀺𑀧𑀲𑁆𑀲𑀦𑀸𑀢𑀺 𑀆𑀕𑀫𑀦𑀯𑀲𑁂𑀦 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀲𑀧𑁆𑀧𑀤𑁂𑀲𑀢𑁆𑀢𑀸𑀢𑀺 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀦𑀁 𑀏𑀓𑀤𑁂𑀲𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀲𑀻𑀮𑀓𑁆𑀔𑀦𑁆𑀥𑀸𑀤𑀬𑁄 𑀳𑀺 𑀲𑀩𑁆𑀩𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀻𑀮𑀸𑀤𑀺𑀲𑀗𑁆𑀕𑀸𑀳𑀓𑀸, 𑀅𑀭𑀺𑀬𑀫𑀕𑁆𑀕𑁄 𑀮𑁄𑀓𑀼𑀢𑁆𑀢𑀭𑁄𑀬𑁂𑀯𑀸𑀢𑀺 𑀢𑀤𑁂𑀓𑀤𑁂𑀲𑁄 𑀳𑁄𑀢𑀺.

𑀑𑀦𑀢𑀲𑀳𑀸𑀬𑁄 𑀯𑀺𑀬 𑀯𑀸𑀬𑀸𑀫𑁄 𑀧𑀕𑁆𑀕𑀳𑀓𑀺𑀘𑁆𑀘𑀲𑀸𑀫𑀜𑁆𑀜𑀢𑁄. 𑀅𑀁𑀲𑀓𑀽𑀝𑀁 𑀤𑀢𑁆𑀯𑀸 𑀞𑀺𑀢𑀲𑀳𑀸𑀬𑁄 𑀯𑀺𑀬 𑀲𑀢𑀺 𑀅𑀧𑀺𑀮𑀸𑀧𑀦𑀯𑀲𑁂𑀦 𑀦𑀺𑀘𑁆𑀘𑀮𑀪𑀸𑀯𑀓𑀭𑀡𑀲𑀸𑀫𑀜𑁆𑀜𑀢𑁄. 𑀲𑀚𑀸𑀢𑀺𑀢𑁄𑀢𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸𑀤𑀺𑀪𑁂𑀤𑁂𑀲𑀼 𑀲𑀫𑀸𑀦𑀸𑀬 𑀲𑀫𑀸𑀥𑀺𑀚𑀸𑀢𑀺𑀬𑀸𑀢𑀺 ¶ 𑀅𑀢𑁆𑀣𑁄. 𑀓𑀺𑀭𑀺𑀬𑀢𑁄𑀢𑀺 𑀲𑀫𑀸𑀥𑀺𑀅𑀦𑀼𑀭𑀽𑀧𑀓𑀺𑀭𑀺𑀬𑀢𑁄. 𑀢𑀢𑁄 𑀏𑀯 𑀳𑀺 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀲𑀫𑀸𑀥𑀺𑀧𑀭𑀺𑀓𑁆𑀔𑀸𑀭𑀸’’𑀢𑀺 (𑀫. 𑀦𑀺. 𑁧.𑁪𑁬𑁨) 𑀲𑀢𑀺𑀯𑀸𑀬𑀸𑀫𑀸𑀦𑀁 𑀲𑀫𑀸𑀥𑀺𑀲𑁆𑀲 𑀦𑀺𑀫𑀺𑀢𑁆𑀢𑀧𑀭𑀺𑀓𑁆𑀔𑀸𑀭𑀪𑀸𑀯𑁄 𑀯𑀼𑀢𑁆𑀢𑁄𑀢𑀺.

𑀆𑀓𑁄𑀝𑁂𑀦𑁆𑀢𑁂𑀦 𑀯𑀺𑀬𑀸𑀢𑀺 ‘‘𑀅𑀦𑀺𑀘𑁆𑀘𑀁 𑀅𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀧𑀜𑁆𑀜𑀸𑀲𑀤𑀺𑀲𑁂𑀦 𑀓𑀺𑀘𑁆𑀘𑁂𑀦 𑀲𑀫𑀦𑁆𑀢𑀢𑁄 𑀆𑀓𑁄𑀝𑁂𑀦𑁆𑀢𑁂𑀦 𑀯𑀺𑀬 ‘‘𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦, 𑀤𑀼𑀓𑁆𑀔𑀁 𑀪𑀬𑀝𑁆𑀞𑁂𑀦𑀸’’𑀢𑀺𑀆𑀤𑀺𑀦𑀸 𑀧𑀭𑀺𑀯𑀢𑁆𑀢𑀦𑁆𑀢𑁂𑀦 𑀯𑀺𑀬 𑀘 𑀆𑀤𑀸𑀬 𑀊𑀳𑀺𑀢𑁆𑀯𑀸 𑀤𑀺𑀦𑁆𑀦𑀫𑁂𑀯 𑀧𑀜𑁆𑀜𑀸 𑀧𑀝𑀺𑀯𑀺𑀚𑁆𑀛𑀢𑀺. 𑀤𑁆𑀯𑀺𑀦𑁆𑀦𑀁 𑀲𑀫𑀸𑀦𑀓𑀸𑀮𑀢𑁆𑀢𑁂𑀧𑀺 𑀧𑀘𑁆𑀘𑀬𑀪𑀸𑀯𑁂𑀦 𑀲𑀗𑁆𑀓𑀧𑁆𑀧𑀲𑁆𑀲 𑀧𑀼𑀭𑀺𑀫𑀓𑀸𑀮𑀲𑁆𑀲 𑀯𑀺𑀬 𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀲𑀚𑀸𑀢𑀺𑀢𑁄𑀢𑀺 ‘‘𑀤𑀼𑀓𑁆𑀔𑁂 𑀜𑀸𑀡’’𑀦𑁆𑀢𑀺𑀆𑀤𑀻𑀲𑀼 𑀲𑀫𑀸𑀦𑀸𑀬 𑀧𑀜𑁆𑀜𑀸𑀚𑀸𑀢𑀺𑀬𑀸. 𑀓𑀺𑀭𑀺𑀬𑀢𑁄𑀢𑀺 𑀏𑀢𑁆𑀣 𑀧𑀜𑁆𑀜𑀸𑀲𑀤𑀺𑀲𑀓𑀺𑀘𑁆𑀘𑀁 𑀓𑀺𑀭𑀺𑀬𑀸𑀢𑀺 𑀯𑀼𑀢𑁆𑀢𑀁, 𑀧𑀼𑀩𑁆𑀩𑁂 𑀧𑀦 𑀲𑀫𑀸𑀥𑀺𑀉𑀧𑀓𑀸𑀭𑀓𑀁 𑀢𑀤𑀦𑀼𑀭𑀽𑀧𑀁 𑀓𑀺𑀘𑁆𑀘𑀦𑁆𑀢𑀺 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄. ‘‘𑀲𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀅𑀪𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺 (𑀲𑀁. 𑀦𑀺. 𑁪.𑁪𑁬) 𑀯𑀘𑀦𑀢𑁄 ¶ 𑀘𑀢𑁆𑀢𑀸𑀭𑀺𑀧𑀺 𑀅𑀪𑀺𑀫𑀼𑀔𑀁 𑀧𑀘𑁆𑀘𑀓𑁆𑀔𑀢𑁄 𑀜𑀸𑀢𑀩𑁆𑀩𑀸𑀦𑀺, 𑀅𑀪𑀺𑀯𑀺𑀲𑀺𑀝𑁆𑀞𑁂𑀦 𑀯𑀸 𑀜𑀸𑀡𑁂𑀦 𑀜𑀸𑀢𑀩𑁆𑀩𑀸𑀦𑀻𑀢𑀺 𑀅𑀪𑀺𑀜𑁆𑀜𑁂𑀬𑁆𑀬𑀸𑀦𑀺.

𑀤𑀼𑀭𑀪𑀺𑀲𑀫𑁆𑀪𑀯𑀢𑀭𑀦𑁆𑀢𑀺 𑀅𑀪𑀺𑀲𑀫𑁆𑀪𑀯𑀺𑀢𑀼𑀁 𑀲𑀸𑀥𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀭𑀁, 𑀲𑀢𑁆𑀢𑀺𑀯𑀺𑀖𑀸𑀢𑁂𑀦 𑀤𑀼𑀭𑀥𑀺𑀕𑀫𑀦𑁆𑀢𑀺 𑀅𑀢𑁆𑀣𑁄. 𑀩𑀸𑀥𑀓𑀧𑀪𑀯𑀲𑀦𑁆𑀢𑀺𑀦𑀺𑀬𑁆𑀬𑀸𑀦𑀮𑀓𑁆𑀔𑀡𑁂𑀳𑀺 𑀯𑀯𑀢𑁆𑀣𑀸𑀦𑀁 𑀲𑀮𑀓𑁆𑀔𑀡𑀯𑀯𑀢𑁆𑀣𑀸𑀦𑀁. 𑀤𑀼𑀭𑀯𑀕𑀸𑀳𑀢𑁆𑀣𑁂𑀦 𑀕𑀫𑁆𑀪𑀻𑀭𑀢𑁆𑀢𑀸𑀢𑀺 𑀑𑀴𑀸𑀭𑀺𑀓𑀸 𑀤𑀼𑀓𑁆𑀔𑀲𑀫𑀼𑀤𑀬𑀸. 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀫𑁆𑀧𑀺 𑀳𑀺 𑀤𑀼𑀓𑁆𑀔𑀁 𑀆𑀳𑀸𑀭𑀸𑀤𑀻𑀲𑀼 𑀘 𑀅𑀪𑀺𑀮𑀸𑀲𑁄 𑀧𑀸𑀓𑀝𑁄, 𑀧𑀻𑀴𑀦𑀸𑀤𑀺𑀆𑀬𑀽𑀳𑀦𑀸𑀤𑀺𑀯𑀲𑁂𑀦 𑀧𑀦 ‘‘𑀇𑀤𑀁 𑀤𑀼𑀓𑁆𑀔𑀁, 𑀇𑀤𑀫𑀲𑁆𑀲 𑀓𑀸𑀭𑀡’’𑀦𑁆𑀢𑀺 𑀬𑀸𑀣𑀸𑀯𑀢𑁄 𑀑𑀕𑀸𑀳𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀕𑀫𑁆𑀪𑀻𑀭𑀸, 𑀲𑀡𑁆𑀳𑀲𑀼𑀔𑀼𑀫𑀥𑀫𑁆𑀫𑀢𑁆𑀢𑀸 𑀦𑀺𑀭𑁄𑀥𑀫𑀕𑁆𑀕𑀸 𑀲𑀪𑀸𑀯𑀢𑁄 𑀏𑀯 𑀕𑀫𑁆𑀪𑀻𑀭𑀢𑁆𑀢𑀸 𑀤𑀼𑀭𑀯𑀕𑀸𑀳𑀸, 𑀢𑁂𑀦𑁂𑀯 𑀉𑀧𑁆𑀧𑀦𑁆𑀦𑁂 𑀫𑀕𑁆𑀕𑁂 𑀦𑀢𑁆𑀣𑀺 𑀦𑀺𑀭𑁄𑀥𑀫𑀕𑁆𑀕𑀸𑀦𑀁 𑀬𑀸𑀣𑀸𑀯𑀢𑁄 𑀅𑀦𑀯𑀕𑀸𑀳𑁄𑀢𑀺. 𑀦𑀺𑀩𑁆𑀩𑀸𑀦𑀫𑁆𑀧𑀺 𑀫𑀕𑁆𑀕𑁂𑀦 𑀅𑀥𑀺𑀕𑀦𑁆𑀢𑀩𑁆𑀩𑀢𑁆𑀢𑀸 𑀢𑀲𑁆𑀲 𑀨𑀮𑀦𑁆𑀢𑀺 𑀅𑀧𑀤𑀺𑀲𑁆𑀲𑀢𑀻𑀢𑀺 𑀆𑀳 ‘‘𑀨𑀮𑀸𑀧𑀤𑁂𑀲𑀢𑁄’’𑀢𑀺. 𑀯𑀼𑀢𑁆𑀢𑀜𑁆𑀳𑀺 ‘‘𑀤𑀼𑀓𑁆𑀔𑀦𑀺𑀭𑁄𑀥𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 (𑀯𑀺𑀪. 𑁭𑁧𑁯). 𑀫𑀕𑁆𑀕𑁄𑀧𑀺 𑀦𑀺𑀭𑁄𑀥𑀲𑁆𑀲 𑀲𑀫𑁆𑀧𑀸𑀧𑀓𑀪𑀸𑀯𑀢𑁄 𑀳𑁂𑀢𑀽𑀢𑀺 𑀅𑀧𑀤𑀺𑀲𑁆𑀲𑀢𑀻𑀢𑀺 𑀆𑀳 ‘‘𑀳𑁂𑀢𑀼𑀅𑀧𑀤𑁂𑀲𑀢𑁄’’𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 (𑀯𑀺𑀪. 𑁭𑁧𑁯). 𑀇𑀢𑀺 𑀯𑀺𑀚𑀜𑁆𑀜𑀸𑀢𑀺 𑀇𑀢𑀺-𑀲𑀤𑁆𑀤𑁂𑀦 𑀯𑀺𑀚𑀸𑀦𑀦𑀓𑁆𑀓𑀫𑀁 𑀤𑀲𑁆𑀲𑁂𑀢𑀺. 𑀏𑀯𑀁 𑀧𑀓𑀸𑀭𑁂𑀳𑀻𑀢𑀺 𑀏𑀯𑀁-𑀲𑀤𑁆𑀤𑁂𑀦 𑀯𑀺𑀚𑀸𑀦𑀦𑀓𑀸𑀭𑀡𑀪𑀽𑀢𑁂 𑀦𑀬𑁂.

𑀉𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀤𑀼𑀓𑁆𑀔𑀲𑀘𑁆𑀘𑀦𑀺𑀤𑁆𑀤𑁂𑀲𑁄

𑀚𑀸𑀢𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁯𑁦. 𑀢𑀢𑁆𑀣 ¶ …𑀧𑁂… 𑀅𑀬𑀁 𑀫𑀸𑀢𑀺𑀓𑀸𑀢𑀺 𑀦𑀺𑀤𑁆𑀤𑁂𑀲𑀯𑀸𑀭𑀆𑀤𑀺𑀫𑁆𑀳𑀺 𑀯𑀼𑀢𑁆𑀢𑁂 𑀚𑀸𑀢𑀺𑀆𑀤𑀺𑀦𑀺𑀤𑁆𑀤𑁂𑀲𑁂 𑀢𑁂𑀲𑀁 𑀚𑀸𑀢𑀺𑀆𑀤𑀻𑀦𑀁 𑀦𑀺𑀤𑁆𑀤𑁂𑀲𑀯𑀲𑁂𑀦 𑀤𑀼𑀓𑁆𑀔𑀲𑁆𑀲 𑀅𑀭𑀺𑀬𑀲𑀘𑁆𑀘𑀲𑁆𑀲 𑀓𑀣𑀦𑀢𑁆𑀣𑀸𑀬, 𑀢𑁂𑀲𑀼 𑀯𑀸 𑀚𑀸𑀢𑀺𑀆𑀤𑀻𑀲𑀼 𑀢𑁂𑀲𑀜𑁆𑀘 𑀤𑀼𑀓𑁆𑀔𑀝𑁆𑀞𑁂 𑀯𑁂𑀤𑀺𑀢𑀩𑁆𑀩𑁂 𑀚𑀸𑀢𑀺𑀆𑀤𑀻𑀦𑀁 𑀦𑀺𑀤𑁆𑀤𑁂𑀲𑀯𑀲𑁂𑀦 𑀤𑀼𑀓𑁆𑀔𑀲𑁆𑀲 𑀅𑀭𑀺𑀬𑀲𑀘𑁆𑀘𑀲𑁆𑀲 𑀓𑀣𑀦𑀢𑁆𑀣𑀸𑀬 𑀤𑀼𑀓𑁆𑀔𑀤𑀼𑀓𑁆𑀔𑀦𑁆𑀢𑀺𑀆𑀤𑀺𑀓𑀸 𑀤𑀼𑀓𑁆𑀔𑀫𑀸𑀢𑀺𑀓𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀦𑀺𑀤𑁆𑀤𑁂𑀲𑀯𑀸𑀭𑁂. ‘‘𑀚𑀸𑀢𑀺𑀧𑀺 𑀤𑀼𑀓𑁆𑀔𑀸…𑀧𑁂… 𑀲𑀁𑀔𑀺𑀢𑁆𑀢𑁂𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀸’’𑀢𑀺 𑀅𑀬𑀁 𑀤𑀼𑀓𑁆𑀔𑀲𑁆𑀲 𑀅𑀭𑀺𑀬𑀲𑀘𑁆𑀘𑀲𑁆𑀲 𑀓𑀣𑀦𑀢𑁆𑀣𑀸𑀬 𑀫𑀸𑀢𑀺𑀓𑀸𑀢𑀺 𑀬𑀣𑀸𑀤𑀲𑁆𑀲𑀺𑀢𑀲𑁆𑀲 𑀚𑀸𑀢𑀺𑀆𑀤𑀺𑀦𑀺𑀤𑁆𑀤𑁂𑀲𑀲𑁆𑀲 𑀫𑀸𑀢𑀺𑀓𑀸𑀪𑀸𑀯𑀁 ¶ 𑀤𑀻𑀧𑁂𑀢𑀺. 𑀢𑀁 𑀤𑀻𑀧𑁂𑀢𑁆𑀯𑀸 𑀧𑀼𑀦 𑀬𑀲𑁆𑀫𑀺𑀁 𑀧𑀤𑀤𑁆𑀯𑀬𑁂 𑀞𑀢𑁆𑀯𑀸 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁 𑀓𑀣𑁂𑀢𑀩𑁆𑀩𑀁, 𑀢𑀲𑁆𑀲 𑀦𑀺𑀤𑁆𑀥𑀸𑀭𑀡𑀢𑁆𑀣𑀁 𑀲𑀩𑁆𑀩𑀁 𑀤𑀼𑀓𑁆𑀔𑀁 𑀲𑀗𑁆𑀓𑀟𑁆𑀠𑁂𑀦𑁆𑀢𑁄 𑀆𑀳 ‘‘𑀇𑀤𑀜𑁆𑀳𑀺 𑀤𑀼𑀓𑁆𑀔𑀁 𑀦𑀸𑀫𑀸’’𑀢𑀺𑀆𑀤𑀺.

𑀲𑀪𑀸𑀯𑀢𑁄𑀢𑀺 𑀤𑀼𑀓𑁆𑀔𑀯𑁂𑀤𑀬𑀺𑀢𑀲𑀪𑀸𑀯𑀢𑁄. 𑀦𑀸𑀫𑀢𑁄𑀢𑀺 𑀢𑁂𑀦𑁂𑀯 𑀲𑀪𑀸𑀯𑁂𑀦 𑀮𑀤𑁆𑀥𑀦𑀸𑀫𑀢𑁄. 𑀢𑁂𑀦 𑀦 𑀅𑀜𑁆𑀜𑁂𑀦 𑀧𑀭𑀺𑀬𑀸𑀬𑁂𑀦 𑀇𑀤𑀁 𑀤𑀼𑀓𑁆𑀔𑀁 𑀦𑀸𑀫, 𑀅𑀣 𑀔𑁄 𑀤𑀼𑀓𑁆𑀔𑀢𑁆𑀢𑀸𑀬𑁂𑀯𑀸𑀢𑀺 𑀲𑀪𑀸𑀯𑁂𑀦 𑀦𑀸𑀫𑀁 𑀯𑀺𑀲𑁂𑀲𑁂𑀢𑀺. 𑀅𑀣 𑀯𑀸 𑀦𑀸𑀫𑀢𑁄𑀢𑀺 𑀉𑀤𑀬𑀩𑁆𑀩𑀬𑀯𑀦𑁆𑀢𑀢𑀸𑀬 𑀮𑀤𑁆𑀥𑀦𑀸𑀫𑀢𑁄. 𑀬𑀣𑀸 𑀅𑀜𑁆𑀜𑁂 𑀉𑀤𑀬𑀩𑁆𑀩𑀬𑀯𑀦𑁆𑀢𑁄 𑀥𑀫𑁆𑀫𑀸 𑀦 𑀲𑀪𑀸𑀯𑀢𑁄 𑀤𑀼𑀓𑁆𑀔𑀸, 𑀦 𑀏𑀯𑀁 𑀇𑀤𑀁, 𑀅𑀣 𑀔𑁄 𑀲𑀪𑀸𑀯𑀢𑁄 𑀤𑀼𑀓𑁆𑀔𑀸, 𑀪𑀽𑀢𑀫𑁂𑀯𑁂𑀤𑀁 𑀤𑀼𑀓𑁆𑀔𑀦𑁆𑀢𑀺 𑀧𑀼𑀭𑀺𑀫𑁂𑀦 𑀤𑀼𑀓𑁆𑀔-𑀲𑀤𑁆𑀤𑁂𑀦 𑀧𑀘𑁆𑀙𑀺𑀫𑀁 𑀯𑀺𑀲𑁂𑀲𑁂𑀢𑀺. 𑀯𑀺𑀧𑀭𑀺𑀡𑀸𑀫𑀯𑀦𑁆𑀢𑀢𑀸𑀬 𑀲𑀼𑀔𑀁 𑀅𑀦𑀺𑀝𑁆𑀞𑀫𑁂𑀯 𑀳𑁄𑀢𑀻𑀢𑀺 𑀤𑀼𑀓𑁆𑀔𑀁 𑀦𑀸𑀫 𑀚𑀸𑀢𑀁. 𑀢𑁂𑀦𑁂𑀯𑀸𑀳 ‘‘𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀢𑁄’’𑀢𑀺. 𑀓𑀡𑁆𑀡𑀲𑀽𑀮𑀸𑀤𑀻𑀳𑀺 𑀅𑀪𑀺𑀪𑀽𑀢𑀲𑁆𑀲 𑀦𑀺𑀢𑁆𑀣𑀼𑀦𑀦𑀸𑀤𑀻𑀳𑀺 𑀤𑀼𑀓𑁆𑀔𑀸𑀪𑀺𑀪𑀽𑀢𑀢𑀸𑀬 𑀯𑀺𑀜𑁆𑀜𑀸𑀬𑀫𑀸𑀦𑀸𑀬𑀧𑀺 𑀓𑀺𑀁 𑀢𑀯 𑀭𑀼𑀚𑁆𑀚𑀢𑀻𑀢𑀺 𑀧𑀼𑀘𑁆𑀙𑀺𑀢𑁆𑀯𑀸𑀯 𑀓𑀡𑁆𑀡𑀲𑀽𑀮𑀸𑀤𑀺𑀤𑀼𑀓𑁆𑀔𑀁 𑀚𑀸𑀦𑀺𑀢𑀩𑁆𑀩𑀁 𑀳𑁄𑀢𑀻𑀢𑀺 𑀧𑀝𑀺𑀘𑁆𑀙𑀦𑁆𑀦𑀤𑀼𑀓𑁆𑀔𑀢𑀸 𑀢𑀲𑁆𑀲 𑀯𑀼𑀢𑁆𑀢𑀸. 𑀉𑀧𑀓𑁆𑀓𑀫𑀲𑁆𑀲 𑀘 𑀧𑀸𑀓𑀝𑀪𑀸𑀯𑀢𑁄𑀢𑀺 𑀓𑀸𑀭𑀡𑀸𑀯𑀲𑁂𑀦 𑀤𑀼𑀓𑁆𑀔𑀯𑀺𑀲𑁂𑀲𑀲𑁆𑀲 𑀧𑀸𑀓𑀝𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀲𑀪𑀸𑀯𑀁 𑀫𑀼𑀜𑁆𑀘𑀺𑀢𑁆𑀯𑀸 𑀧𑀓𑀸𑀭𑀦𑁆𑀢𑀭𑁂𑀦 𑀤𑀼𑀓𑁆𑀔𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑀁 𑀧𑀭𑀺𑀬𑀸𑀬𑀤𑀼𑀓𑁆𑀔𑀁. 𑀓𑀣𑁂𑀢𑀩𑁆𑀩𑀢𑁆𑀢𑀸 𑀧𑀝𑀺𑀜𑁆𑀜𑀸𑀢𑀁 𑀬𑀣𑀸 𑀓𑀣𑁂𑀢𑀩𑁆𑀩𑀁, 𑀢𑀁𑀧𑀓𑀸𑀭𑀤𑀲𑁆𑀲𑀦𑀢𑁆𑀣𑀁 ‘‘𑀅𑀭𑀺𑀬𑀲𑀘𑁆𑀘𑀜𑁆𑀘 𑀦𑀸𑀫𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀲𑀗𑁆𑀔𑁂𑀧𑁄 𑀲𑀸𑀫𑀜𑁆𑀜𑀁, 𑀲𑀸𑀫𑀜𑁆𑀜𑀜𑁆𑀘 𑀯𑀺𑀲𑁂𑀲𑁂 𑀅𑀦𑁆𑀢𑁄𑀓𑀭𑀺𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀢𑀢𑁆𑀣 𑀉𑀪𑀬𑀣𑀸𑀧𑀺 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺. 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑁂𑀲𑁄 𑀚𑀸𑀢𑀺𑀆𑀤𑀺𑀓𑁄, 𑀯𑀺𑀲𑁂𑀲𑁄 𑀘 𑀯𑀺𑀲𑁂𑀲𑀦𑁆𑀢𑀭𑀦𑀺𑀯𑀢𑁆𑀢𑀓𑁄𑀢𑀺 𑀚𑀸𑀢𑀺𑀆𑀤𑀻𑀲𑀼 𑀚𑀭𑀸𑀤𑀻𑀦𑀁 𑀲𑀗𑁆𑀔𑀺𑀧𑀦𑀁 𑀦 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺 𑀢𑀢𑁆𑀣 𑀯𑀺𑀢𑁆𑀣𑀸𑀭𑁂𑀦𑁂𑀯 𑀓𑀣𑁂𑀢𑀩𑁆𑀩𑀁.

𑁧𑁯𑁧. ‘‘𑀅𑀧𑀭𑀲𑁆𑀲 ¶ 𑀅𑀧𑀭𑀲𑁆𑀲𑀸’’𑀢𑀺 𑀤𑀻𑀧𑀦𑀁 𑀅𑀧𑀭𑀢𑁆𑀣𑀤𑀻𑀧𑀦𑀁. 𑀲𑀸𑀫𑀺𑀅𑀢𑁆𑀣𑁂𑀧𑀺 𑀳𑀺 𑀅𑀧𑀭𑀢𑁆𑀣-𑀲𑀤𑁆𑀤𑁄 𑀲𑀺𑀚𑁆𑀛𑀢𑀻𑀢𑀺. 𑀢𑁂𑀲𑀁 𑀢𑁂𑀲𑀦𑁆𑀢𑀺 𑀯𑀸 𑀲𑀸𑀫𑀺𑀯𑀲𑁂𑀦 𑀯𑀼𑀢𑁆𑀢𑀁 𑀅𑀢𑁆𑀣𑀁 𑀪𑀼𑀫𑁆𑀫𑀯𑀲𑁂𑀦 𑀯𑀢𑁆𑀢𑀼𑀓𑀸𑀫𑀢𑀸𑀬 𑀆𑀳 ‘‘𑀅𑀧𑀭𑀢𑁆𑀣𑀤𑀻𑀧𑀦’’𑀦𑁆𑀢𑀺, 𑀅𑀧𑀭𑀲𑁆𑀫𑀺𑀁 𑀅𑀧𑀭𑀲𑁆𑀫𑀺𑀁 𑀤𑀻𑀧𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀧𑀭𑀲𑁆𑀲 𑀅𑀧𑀭𑀲𑁆𑀲 𑀯𑀸 𑀚𑀸𑀢𑀺𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 𑀤𑀻𑀧𑀦𑀁 𑀅𑀧𑀭𑀢𑁆𑀣𑀤𑀻𑀧𑀦𑀁. 𑀧𑀜𑁆𑀘𑀕𑀢𑀺𑀯𑀲𑁂𑀦 𑀏𑀓𑁂𑀓𑀸𑀬𑀧𑀺 𑀕𑀢𑀺𑀬𑀸 𑀔𑀢𑁆𑀢𑀺𑀬𑀸𑀤𑀺𑀪𑀼𑀫𑁆𑀫𑀤𑁂𑀯𑀸𑀤𑀺𑀳𑀢𑁆𑀣𑀺𑀆𑀤𑀺𑀚𑀸𑀢𑀺𑀯𑀲𑁂𑀦 𑀘𑀸𑀢𑀺 𑀕𑀢𑀺𑀚𑀸𑀢𑀺𑀯𑀲𑁂𑀦.

𑀢𑀺𑀡𑀸𑀓𑀸𑀭𑁄 𑀢𑀺𑀡𑀚𑀸𑀢𑀺, 𑀲𑁄 𑀘 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀻𑀢𑀺 ‘‘𑀧𑀜𑁆𑀜𑀢𑁆𑀢𑀺𑀬’’𑀦𑁆𑀢𑀺 𑀆𑀳. 𑀢𑀤𑀼𑀧𑀸𑀤𑀸𑀬𑀸𑀢𑀺 𑀢𑀁 𑀧𑀞𑀫𑀁 𑀯𑀺𑀜𑁆𑀜𑀸𑀡𑀁 𑀉𑀧𑀸𑀤𑀸𑀬 𑀅𑀬𑀁 𑀚𑀸𑀢𑀺, 𑀦𑀸𑀲𑁆𑀲 𑀓𑀼𑀢𑁄𑀘𑀺 𑀦𑀺𑀕𑁆𑀕𑀫𑀦𑀁 𑀉𑀧𑀸𑀤𑀸𑀬. 𑀬𑀲𑁆𑀫𑀸 𑀘 𑀏𑀯𑀁, 𑀢𑀲𑁆𑀫𑀸 𑀲𑀸𑀯𑀲𑁆𑀲 𑀚𑀸𑀢𑀺 𑀧𑀞𑀫𑀯𑀺𑀜𑁆𑀜𑀸𑀡𑀲𑀗𑁆𑀔𑀸𑀢𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀢𑀤𑀼𑀧𑀸𑀤𑀸𑀬 𑀲𑀚𑀸𑀢𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 ¶ 𑀲𑀸𑀯𑀲𑁆𑀲 𑀚𑀸𑀢𑀺 𑀧𑀞𑀫𑀯𑀺𑀜𑁆𑀜𑀸𑀡𑀲𑀗𑁆𑀔𑀸𑀢𑀸𑀢𑀺 𑀅𑀢𑁆𑀣𑁄. 𑀯𑀺𑀜𑁆𑀜𑀸𑀡𑀫𑀼𑀔𑁂𑀦 𑀘 𑀧𑀜𑁆𑀘𑀧𑀺 𑀔𑀦𑁆𑀥𑀸 𑀯𑀼𑀢𑁆𑀢𑀸 𑀳𑁄𑀦𑁆𑀢𑀻𑀢𑀺 ‘‘𑀧𑀝𑀺𑀲𑀦𑁆𑀥𑀺𑀬’’𑀦𑁆𑀢𑀺 𑀆𑀳. 𑀅𑀭𑀺𑀬𑀪𑀸𑀯𑀓𑀭𑀡𑀢𑁆𑀢𑀸 𑀅𑀭𑀺𑀬𑀲𑀻𑀮𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄 𑀯𑀼𑀘𑁆𑀘𑀢𑀺. 𑀚𑀸𑀢𑀺𑀆𑀤𑀻𑀦𑀺𑀧𑀺 𑀮𑀓𑁆𑀔𑀡𑀸𑀦𑀺 𑀥𑀫𑁆𑀫𑀸𑀦𑀁 𑀆𑀓𑀸𑀭𑀯𑀺𑀓𑀸𑀭𑀸𑀢𑀺 𑀓𑀢𑁆𑀯𑀸 𑀲𑀳𑀼𑀧𑁆𑀧𑀸𑀤𑀓𑀸 𑀲𑀳𑀯𑀺𑀓𑀸𑀭𑀓𑀸𑀢𑀺 𑀯𑀼𑀢𑁆𑀢𑀸. 𑀚𑀸𑀬𑀦𑀝𑁆𑀞𑁂𑀦𑀸𑀢𑀺𑀆𑀤𑀺 𑀆𑀬𑀢𑀦𑀯𑀲𑁂𑀦 𑀬𑁄𑀦𑀺𑀯𑀲𑁂𑀦 𑀘 𑀤𑁆𑀯𑀻𑀳𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀲𑀩𑁆𑀩𑀲𑀢𑁆𑀢𑁂 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀚𑀸𑀢𑀺𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀧𑀼𑀭𑀺𑀫𑀦𑀬𑁂 𑀧𑀦 𑀏𑀓𑁂𑀓𑁂𑀦𑁂𑀯 𑀧𑀤𑁂𑀦 𑀲𑀩𑁆𑀩𑀲𑀢𑁆𑀢𑁂 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀚𑀸𑀢𑀺 𑀤𑀲𑁆𑀲𑀺𑀢𑀸𑀢𑀺 𑀅𑀬𑀁 𑀯𑀺𑀲𑁂𑀲𑁄. 𑀓𑁂𑀘𑀺 𑀧𑀦 ‘‘𑀧𑀼𑀭𑀺𑀫𑀦𑀬𑁂 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄, 𑀧𑀘𑁆𑀙𑀺𑀫𑀦𑀬𑁂 𑀪𑀸𑀯𑀦𑀺𑀤𑁆𑀤𑁂𑀲𑁄 𑀓𑀢𑁄’’𑀢𑀺 𑀯𑀤𑀦𑁆𑀢𑀺, ‘‘𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀚𑀸𑀢𑀻’’𑀢𑀺 𑀧𑀦 𑀓𑀢𑁆𑀢𑀭𑀺 𑀲𑀸𑀫𑀺𑀦𑀺𑀤𑁆𑀤𑁂𑀲𑀲𑁆𑀲 𑀓𑀢𑀢𑁆𑀢𑀸 𑀉𑀪𑀬𑀢𑁆𑀣𑀸𑀧𑀺 𑀪𑀸𑀯𑀦𑀺𑀤𑁆𑀤𑁂𑀲𑁄𑀯 𑀬𑀼𑀢𑁆𑀢𑁄. 𑀲𑀫𑁆𑀧𑀼𑀡𑁆𑀡𑀸 𑀚𑀸𑀢𑀺 𑀲𑀜𑁆𑀚𑀸𑀢𑀺. 𑀧𑀸𑀓𑀝𑀸 𑀦𑀺𑀩𑁆𑀩𑀢𑁆𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑀺. ‘‘𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁…𑀧𑁂… 𑀅𑀪𑀺𑀦𑀺𑀩𑁆𑀩𑀢𑁆𑀢𑀻’’𑀢𑀺 𑀲𑀢𑁆𑀢𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀲𑀫𑁆𑀫𑀼𑀢𑀺𑀓𑀣𑀸.

𑀢𑀢𑁆𑀭 𑀢𑀢𑁆𑀭𑀸𑀢𑀺 𑀏𑀓𑀘𑀢𑀼𑀯𑁄𑀓𑀸𑀭𑀪𑀯𑁂𑀲𑀼 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁, 𑀲𑁂𑀲𑁂 𑀭𑀽𑀧𑀥𑀸𑀢𑀼𑀬𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀧𑀜𑁆𑀘𑀦𑁆𑀦𑀁, 𑀓𑀸𑀫𑀥𑀸𑀢𑀼𑀬𑀁 𑀯𑀺𑀓𑀮𑀸𑀯𑀺𑀓𑀮𑀺𑀦𑁆𑀤𑁆𑀭𑀺𑀬𑀸𑀦𑀁 𑀯𑀲𑁂𑀦 𑀲𑀢𑁆𑀢𑀦𑁆𑀦𑀁 𑀦𑀯𑀦𑁆𑀦𑀁 𑀤𑀲𑀦𑁆𑀦𑀁 𑀧𑀼𑀦 𑀤𑀲𑀦𑁆𑀦𑀁 𑀏𑀓𑀸𑀤𑀲𑀦𑁆𑀦𑀜𑁆𑀘 𑀆𑀬𑀢𑀦𑀸𑀦𑀁 𑀯𑀲𑁂𑀦 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀓𑀪𑀯𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀔𑀦𑁆𑀥𑀲𑀦𑁆𑀢𑀸𑀦𑀲𑁆𑀲 𑀧𑀞𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀪𑀽𑀢𑀸 𑀧𑀝𑀺𑀲𑀦𑁆𑀥𑀺𑀓𑁆𑀔𑀦𑁆𑀥𑀸𑀢𑀺 𑀆𑀳 ‘‘𑀧𑀞𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀸’’𑀢𑀺. 𑀢𑀫𑁂𑀯 𑀲𑀦𑁆𑀢𑀸𑀦𑀁 𑀦𑀺𑀬𑁆𑀬𑀸𑀢𑁂𑀦𑁆𑀢𑀁 𑀯𑀺𑀬 ‘‘𑀳𑀦𑁆𑀤 𑀕𑀡𑁆𑀳𑀣𑀸’’𑀢𑀺 𑀧𑀝𑀺𑀘𑁆𑀙𑀸𑀧𑁂𑀦𑁆𑀢𑀁 𑀯𑀺𑀬 𑀧𑀯𑀢𑁆𑀢𑀢𑀻𑀢𑀺 𑀦𑀺𑀬𑁆𑀬𑀸𑀢𑀦𑀭𑀲𑀸. 𑀲𑀦𑁆𑀢𑀢𑀺𑀬𑀸 𑀏𑀯 𑀉𑀫𑁆𑀫𑀼𑀚𑁆𑀚𑀦𑀁 𑀳𑀼𑀢𑁆𑀯𑀸 𑀕𑀬𑁆𑀳𑀢𑀻𑀢𑀺 𑀉𑀫𑁆𑀫𑀼𑀚𑁆𑀚𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀤𑀼𑀓𑁆𑀔𑀭𑀸𑀲𑀺𑀲𑁆𑀲 𑀯𑀺𑀘𑀺𑀢𑁆𑀢𑀢𑀸 𑀤𑀼𑀓𑁆𑀔𑀯𑀺𑀘𑀺𑀢𑁆𑀢𑀢𑀸, 𑀤𑀼𑀓𑁆𑀔𑀯𑀺𑀲𑁂𑀲𑀸 𑀯𑀸 𑀢𑀤𑀯𑀬𑀯𑀸, 𑀢𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀺 𑀨𑀮𑀢𑀻𑀢𑀺 𑀤𑀼𑀓𑁆𑀔𑀯𑀺𑀘𑀺𑀢𑁆𑀢𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸.

𑀧𑀭𑀺𑀬𑀸𑀬𑀦𑀺𑀧𑁆𑀧𑀭𑀺𑀬𑀸𑀬𑀤𑀼𑀓𑁆𑀔𑁂𑀲𑀼 ¶ 𑀬𑀁 𑀤𑀼𑀓𑁆𑀔𑀁 𑀚𑀸𑀢𑀺 𑀳𑁄𑀢𑀺, 𑀢𑀁 𑀤𑀼𑀓𑁆𑀔𑀪𑀸𑀯𑁄𑀬𑁂𑀯 𑀢𑀲𑁆𑀲𑀸 𑀤𑀼𑀓𑁆𑀔𑀝𑁆𑀞𑁄. 𑀬𑀤𑀺 𑀅𑀓𑁆𑀔𑀸𑀦𑁂𑀦 𑀧𑀸𑀧𑀼𑀡𑀺𑀢𑀩𑁆𑀩𑀁 𑀲𑀺𑀬𑀸, 𑀪𑀕𑀯𑀸 𑀆𑀘𑀺𑀓𑁆𑀔𑁂𑀬𑁆𑀬. 𑀪𑀕𑀯𑀢𑀸𑀧𑀺 𑁋

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀓𑀢𑀫𑁄 𑀦𑀼 𑀔𑁄 𑀫𑀳𑀦𑁆𑀢𑀢𑀭𑁄? 𑀬𑁄 𑀘𑀸𑀬𑀁 𑀫𑀬𑀸 𑀧𑀭𑀺𑀢𑁆𑀢𑁄 𑀧𑀸𑀡𑀺𑀫𑀢𑁆𑀢𑁄 𑀧𑀸𑀲𑀸𑀡𑁄 𑀕𑀳𑀺𑀢𑁄, 𑀬𑁄 𑀘 𑀳𑀺𑀫𑀯𑀸 𑀧𑀩𑁆𑀩𑀢𑀭𑀸𑀚𑀸𑀢𑀺. 𑀅𑀧𑁆𑀧𑀫…𑀧𑁂… 𑀕𑀳𑀺𑀢𑁄, 𑀳𑀺𑀫𑀯𑀦𑁆𑀢𑀁 𑀧𑀩𑁆𑀩𑀢𑀭𑀸𑀚𑀸𑀦𑀁 𑀉𑀧𑀦𑀺𑀥𑀸𑀬 𑀲𑀗𑁆𑀔𑀫𑁆𑀧𑀺 𑀦 𑀉𑀧𑁂𑀢𑀺, 𑀓𑀮𑀪𑀸𑀕𑀫𑁆𑀧𑀺 𑀦 𑀉𑀧𑁂𑀢𑀺, 𑀉𑀧𑀦𑀺𑀥𑀫𑁆𑀧𑀺 𑀦 𑀉𑀧𑁂𑀢𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀁 𑀲𑁄 𑀧𑀼𑀭𑀺𑀲𑁄 𑀢𑀻𑀳𑀺 𑀲𑀢𑁆𑀢𑀺𑀲𑀢𑁂𑀳𑀺 𑀳𑀜𑁆𑀜𑀫𑀸𑀦𑁄 ¶ 𑀢𑀢𑁄𑀦𑀺𑀤𑀸𑀦𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀢𑀁 𑀦𑁂𑀭𑀬𑀺𑀓𑀲𑁆𑀲 𑀤𑀼𑀓𑁆𑀔𑀲𑁆𑀲 𑀉𑀧𑀦𑀺𑀥𑀸𑀬 𑀲𑀗𑁆𑀔𑀫𑁆𑀧𑀺…𑀧𑁂… 𑀉𑀧𑀦𑀺𑀥𑀫𑁆𑀧𑀺 𑀦 𑀉𑀧𑁂𑀢𑀻’’𑀢𑀺 (𑀫. 𑀦𑀺. 𑁩.𑁨𑁫𑁦) 𑁋

𑀉𑀧𑀫𑀸𑀯𑀲𑁂𑀦 𑀧𑀓𑀸𑀲𑀺𑀢𑀁 𑀆𑀧𑀸𑀬𑀺𑀓𑀤𑀼𑀓𑁆𑀔𑀁. 𑀲𑀼𑀔𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀸𑀦𑀺 𑀲𑀼𑀘𑀻𑀦𑀺 𑀉𑀧𑁆𑀧𑀮𑀸𑀤𑀻𑀦𑀻𑀢𑀺 𑀓𑀢𑁆𑀯𑀸 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀺𑀦𑀺𑀯𑀸𑀭𑀡𑁂𑀦 𑀚𑀸𑀢𑀺𑀬𑀸 𑀤𑀼𑀓𑁆𑀔𑀯𑀢𑁆𑀣𑀼𑀪𑀸𑀯𑀁 𑀤𑀲𑁆𑀲𑁂𑀢𑀺 ‘‘𑀅𑀣 𑀔𑁄’’𑀢𑀺𑀆𑀤𑀺𑀦𑀸. 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑁂 𑀦𑀺𑀩𑁆𑀩𑀢𑁆𑀢𑀦𑁂𑀦 𑀕𑀩𑁆𑀪𑀧𑀭𑀺𑀳𑀭𑀡𑀽𑀧𑀓𑁆𑀓𑀫𑁂𑀦 𑀯𑀺𑀦𑀸 𑀫𑀸𑀢𑀼𑀓𑀼𑀘𑁆𑀙𑀺𑀲𑀫𑁆𑀪𑀯𑀫𑁂𑀯 𑀤𑀼𑀓𑁆𑀔𑀁 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀫𑀽𑀮𑀓𑀁 𑀅𑀜𑁆𑀜𑀸𑀦𑀧𑁂𑀓𑁆𑀔𑀢𑁆𑀢𑀸, 𑀉𑀧𑀓𑁆𑀓𑀫𑀦𑀺𑀩𑁆𑀩𑀢𑁆𑀢𑀁 𑀧𑀦 𑀧𑀭𑀺𑀳𑀭𑀡𑀫𑀽𑀮𑀓𑀁 𑀑𑀓𑁆𑀓𑀦𑁆𑀢𑀺𑀫𑀢𑁆𑀢𑀸𑀦𑀧𑁂𑀓𑁆𑀔𑀢𑁆𑀢𑀸. 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄.

𑀅𑀢𑁆𑀢𑀦𑁄 𑀅𑀪𑀺𑀫𑀼𑀔𑀁 𑀓𑀟𑁆𑀠𑀦𑀁 𑀆𑀓𑀟𑁆𑀠𑀦𑀁, 𑀧𑀭𑀺𑀢𑁄 𑀲𑀩𑁆𑀩𑀢𑁄𑀪𑀸𑀕𑁂𑀦 𑀓𑀟𑁆𑀠𑀦𑀁 𑀧𑀭𑀺𑀓𑀟𑁆𑀠𑀦𑀁. 𑀅𑀥𑁄 𑀥𑀼𑀦𑀦𑀁 𑀑𑀥𑀼𑀦𑀦𑀁, 𑀢𑀺𑀭𑀺𑀬𑀁, 𑀲𑀩𑁆𑀩𑀢𑁄 𑀯𑀸 𑀥𑀼𑀦𑀦𑀁 𑀦𑀺𑀥𑀼𑀦𑀦𑀁. 𑀢𑀘𑁆𑀙𑁂𑀢𑁆𑀯𑀸 𑀔𑀸𑀭𑀧𑀓𑁆𑀔𑀺𑀧𑀦𑀁 𑀔𑀸𑀭𑀸𑀧𑀝𑀺𑀘𑁆𑀙𑀓𑀁.

𑀲𑀓𑀮𑀲𑀭𑀻𑀭𑀦𑁆𑀳𑀸𑀧𑀦𑀁 𑀦𑁆𑀳𑀸𑀧𑀦𑀁, 𑀏𑀓𑀤𑁂𑀲𑀥𑁄𑀯𑀦𑀁 𑀥𑁄𑀯𑀦𑀁, 𑀲𑀽𑀭𑀺𑀬𑀸𑀪𑀺𑀫𑀼𑀔𑀧𑀯𑀢𑁆𑀢𑀦𑁂𑀦 𑀆𑀢𑀸𑀧𑀦𑀁, 𑀧𑀜𑁆𑀘𑀕𑁆𑀕𑀺𑀢𑀸𑀧𑁂𑀦 𑀧𑀭𑀺𑀢𑀸𑀧𑀦𑀁 𑀤𑀝𑁆𑀞𑀩𑁆𑀩𑀁. 𑀲𑀩𑁆𑀩𑁄𑀬𑁂𑀯 𑀯𑀸 𑀢𑀸𑀧𑁄 𑀤𑁆𑀯𑀺𑀥𑀸𑀧𑀺 𑀯𑀼𑀢𑁆𑀢𑁄.

𑀓𑀼𑀳𑀺𑀁 𑀦𑀼 𑀧𑀢𑀺𑀝𑁆𑀞𑀁 𑀮𑀪𑁂𑀣, 𑀚𑀸𑀢𑀺𑀬𑀸 𑀯𑀺𑀦𑀸 𑀦 𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀢𑀺𑀝𑁆𑀞𑀸𑀦𑀁 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄, 𑀚𑀸𑀢𑀺𑀬𑀸 𑀯𑀸 𑀯𑀺𑀦𑀸 𑀲𑁄 𑀲𑀢𑁆𑀢𑁄 𑀓𑀼𑀳𑀺𑀁 𑀦𑀼 𑀧𑀢𑀺𑀝𑁆𑀞𑀁, 𑀓𑀢𑁆𑀣 𑀦𑀼 𑀧𑀢𑀺𑀝𑁆𑀞𑀦𑁆𑀢𑁄 𑀢𑀁 𑀤𑀼𑀓𑁆𑀔𑀁 𑀮𑀪𑁂𑀣𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀢𑀺𑀭𑀘𑁆𑀙𑀸𑀦𑁂𑀲𑀼 𑀓𑀣𑀁 𑀤𑀼𑀓𑁆𑀔𑀁 𑀪𑀯𑁂𑀬𑁆𑀬 𑀢𑀳𑀺𑀁 𑀢𑀺𑀭𑀘𑁆𑀙𑀸𑀦𑁂𑀲𑀼 𑀚𑀸𑀢𑀺𑀁 𑀯𑀺𑀦𑀸. 𑀦 𑀘𑀲𑁆𑀲𑀸𑀢𑀺 𑀦 𑀘𑁂 𑀅𑀲𑁆𑀲. 𑀦𑀦𑀼 𑀦𑁂𑀯𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄 𑀓𑀸𑀢𑀩𑁆𑀩𑁄, 𑀦𑀦𑀼 𑀆𑀳𑀸𑀢𑀺 𑀯𑀸. 𑀬𑀤𑀢𑁄𑀢𑀺 𑀬𑀲𑁆𑀫𑀸 𑀦𑁂𑀯𑀢𑁆𑀣𑀺, 𑀢𑀲𑁆𑀫𑀸 𑀆𑀳𑀸𑀢𑀺 𑀅𑀢𑁆𑀣𑁄.

𑀚𑀭𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁯𑁨. 𑀚𑀻𑀭𑀡𑀫𑁂𑀯 ¶ 𑀚𑀻𑀭𑀡𑀢𑀸, 𑀚𑀻𑀭𑀡𑀲𑁆𑀲 𑀯𑀸 𑀆𑀓𑀸𑀭𑁄 𑀢𑀸-𑀲𑀤𑁆𑀤𑁂𑀦 𑀯𑀼𑀢𑁆𑀢𑁄.

𑀬𑀣𑀸𑀧𑀼𑀭𑁂 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁂𑀢𑀺 𑀕𑀸𑀭𑀯𑀓𑀭𑀡𑀉𑀧𑀝𑁆𑀞𑀸𑀦𑀸𑀤𑀻𑀦𑀺 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁂 𑀢𑀁𑀦𑀺𑀫𑀺𑀢𑁆𑀢𑀁 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄.

𑀲𑀢𑀸𑀤𑀻𑀦𑀦𑁆𑀢𑀺 ¶ 𑀲𑀢𑀺𑀲𑀼𑀢𑀯𑀻𑀭𑀺𑀬𑀧𑀜𑁆𑀜𑀸𑀤𑀻𑀦𑀁 𑀯𑀺𑀧𑁆𑀧𑀯𑀸𑀲𑀦𑀺𑀫𑀺𑀢𑁆𑀢𑀁 𑀅𑀢𑁆𑀢𑀦𑀸 𑀅𑀧𑀲𑀸𑀤𑁂𑀢𑀩𑁆𑀩𑁂𑀳𑀺𑀧𑀺 𑀅𑀢𑁆𑀢𑀦𑁄 𑀧𑀼𑀢𑁆𑀢𑀤𑀸𑀭𑁂𑀳𑀺 𑀅𑀧𑀲𑀸𑀤𑀦𑀻𑀬𑀢𑁄. 𑀅𑀯𑀲𑀯𑀢𑁆𑀢𑀗𑁆𑀕𑀧𑀘𑁆𑀘𑀗𑁆𑀕𑀢𑀸𑀬 𑀲𑀼𑀘𑀺𑀅𑀲𑀼𑀘𑀺𑀆𑀤𑀺𑀯𑀺𑀘𑀸𑀭𑀡𑀯𑀺𑀭𑀳𑁂𑀦 𑀘 𑀩𑀸𑀮𑀓𑀼𑀫𑀸𑀭𑀓𑀓𑀸𑀮𑁄 𑀯𑀺𑀬 𑀚𑀺𑀡𑁆𑀡𑀓𑀸𑀮𑁄 𑀳𑁄𑀢𑀻𑀢𑀺 𑀆𑀳 ‘‘𑀪𑀺𑀬𑁆𑀬𑁄 𑀩𑀸𑀮𑀢𑁆𑀢𑀧𑁆𑀧𑀢𑁆𑀢𑀺𑀬𑀸’’𑀢𑀺.

𑀫𑀭𑀡𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁯𑁩. ‘‘𑀓𑀸𑀮𑀲𑁆𑀲 𑀅𑀦𑁆𑀢𑀓𑀲𑁆𑀲 𑀓𑀺𑀭𑀺𑀬𑀸’’𑀢𑀺 𑀬𑀸 𑀮𑁄𑀓𑁂 𑀯𑀼𑀘𑁆𑀘𑀢𑀺, 𑀲𑀸 𑀘𑀼𑀢𑀺, 𑀫𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀘𑀯𑀦𑀓𑀸𑀮𑁄𑀬𑁂𑀯 𑀯𑀸 𑀅𑀦𑀢𑀺𑀓𑁆𑀓𑀫𑀦𑀻𑀬𑀢𑁆𑀢𑀸 𑀯𑀺𑀲𑁂𑀲𑁂𑀦 𑀓𑀸𑀮𑁄𑀢𑀺 𑀯𑀼𑀢𑁆𑀢𑁄, 𑀢𑀲𑁆𑀲 𑀓𑀺𑀭𑀺𑀬𑀸 𑀘𑀼𑀢𑀺𑀓𑁆𑀔𑀦𑁆𑀥𑀸𑀦𑀁 𑀪𑁂𑀤𑀧𑁆𑀧𑀢𑁆𑀢𑀺𑀬𑁂𑀯. 𑀫𑀘𑁆𑀘𑀼 𑀫𑀭𑀡𑀦𑁆𑀢𑀺 𑀏𑀢𑁆𑀣𑀸𑀧𑀺 𑀲𑀫𑀸𑀲𑀁 𑀅𑀓𑀢𑁆𑀯𑀸 𑀬𑁄 𑀫𑀘𑁆𑀘𑀼 𑀯𑀼𑀘𑁆𑀘𑀢𑀺 𑀪𑁂𑀤𑁄, 𑀬𑀜𑁆𑀘 𑀫𑀭𑀡𑀁 𑀧𑀸𑀡𑀘𑀸𑀕𑁄, 𑀇𑀤𑀁 𑀯𑀼𑀘𑁆𑀘𑀢𑀺 𑀫𑀭𑀡𑀦𑁆𑀢𑀺 𑀯𑀺𑀲𑀼𑀁 𑀲𑀫𑁆𑀩𑀦𑁆𑀥𑁄 𑀦 𑀦 𑀬𑀼𑀚𑁆𑀚𑀢𑀺.

𑀬𑀲𑁆𑀲 𑀔𑀦𑁆𑀥𑀪𑁂𑀤𑀲𑁆𑀲 𑀧𑀯𑀢𑁆𑀢𑀢𑁆𑀢𑀸 ‘‘𑀢𑀺𑀲𑁆𑀲𑁄 𑀫𑀢𑁄, 𑀨𑀼𑀲𑁆𑀲𑁄 𑀫𑀢𑁄’’𑀢𑀺 𑀯𑁄𑀳𑀸𑀭𑁄 𑀳𑁄𑀢𑀺, 𑀲𑁄 𑀔𑀦𑁆𑀥𑀧𑁆𑀧𑀩𑀦𑁆𑀥𑀲𑁆𑀲 𑀅𑀦𑀼𑀧𑀘𑁆𑀙𑀺𑀦𑁆𑀦𑀢𑀸𑀬 ‘‘𑀲𑀫𑁆𑀫𑀼𑀢𑀺𑀫𑀭𑀡’’𑀦𑁆𑀢𑀺 𑀯𑀼𑀢𑁆𑀢𑁄, 𑀧𑀩𑀦𑁆𑀥𑀲𑀫𑀼𑀘𑁆𑀙𑁂𑀤𑁄 𑀘 ‘‘𑀲𑀫𑀼𑀘𑁆𑀙𑁂𑀤𑀫𑀭𑀡’’𑀦𑁆𑀢𑀺. 𑀫𑀭𑀡𑀫𑁆𑀧𑀺 𑀤𑀼𑀓𑁆𑀔𑀦𑁆𑀢𑀺 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀤𑀼𑀓𑁆𑀔𑀲𑀘𑁆𑀘𑀓𑀣𑀸 𑀯𑀝𑁆𑀝𑀓𑀣𑀸𑀢𑀺 𑀓𑀢𑁆𑀯𑀸 ‘‘𑀲𑀫𑁆𑀫𑀼𑀢𑀺𑀫𑀭𑀡𑀁 𑀅𑀥𑀺𑀧𑁆𑀧𑁂𑀢’’𑀦𑁆𑀢𑀺 𑀆𑀳. 𑀢𑀲𑁆𑀲𑁂𑀯 𑀦𑀸𑀫𑀦𑁆𑀢𑀺 𑀢𑀩𑁆𑀪𑀸𑀯𑀢𑁄 𑀢𑀤𑁂𑀓𑀤𑁂𑀲𑀪𑀸𑀯𑀢𑁄 𑀘 𑀫𑀭𑀡-𑀲𑀤𑁆𑀤𑀩𑀳𑀼𑀢𑁆𑀢𑁂 𑀅𑀲𑀫𑁆𑀫𑁄𑀳𑀢𑁆𑀣𑀁 𑀯𑀼𑀢𑁆𑀢𑀁. 𑀘𑀼𑀢𑀺𑀮𑀓𑁆𑀔𑀡𑀦𑁆𑀢𑀺 ‘‘𑀘𑀯𑀦𑀢𑀸’’𑀢𑀺 𑀦𑀺𑀤𑀲𑁆𑀲𑀺𑀢𑀘𑀯𑀦𑀮𑀓𑁆𑀔𑀡𑀫𑁂𑀯 𑀯𑀤𑀢𑀺. 𑀲𑀫𑁆𑀧𑀢𑁆𑀢𑀺𑀪𑀯𑀔𑀦𑁆𑀥𑁂𑀳𑀺 𑀯𑀺𑀬𑁄𑀚𑁂𑀢𑀻𑀢𑀺 𑀯𑀺𑀬𑁄𑀕𑀭𑀲𑀁, 𑀯𑀺𑀬𑁄𑀕𑀓𑀺𑀭𑀺𑀬𑀸𑀪𑀽𑀢𑀢𑀸𑀬 𑀯𑀸 ‘‘𑀯𑀺𑀬𑁄𑀕𑀭𑀲’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀢𑁆𑀢𑀲𑁆𑀲 𑀧𑀼𑀭𑀺𑀫𑀪𑀯𑀢𑁄 𑀯𑀺𑀧𑁆𑀧𑀯𑀸𑀲𑁄 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀻𑀢𑀺 𑀯𑀺𑀧𑁆𑀧𑀯𑀸𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀁.

𑀫𑀭𑀡𑀦𑁆𑀢𑀺𑀓𑀸𑀢𑀺 𑀫𑀭𑀡𑀲𑁆𑀲 𑀆𑀲𑀦𑁆𑀦𑀸. 𑀬𑀤𑀺 𑀫𑀭𑀡𑀁 𑀦 𑀪𑀯𑀺𑀲𑁆𑀲𑀢𑀺, 𑀬𑀣𑀸𑀯𑀼𑀢𑁆𑀢𑀁 𑀓𑀸𑀬𑀺𑀓𑀁 𑀘𑁂𑀢𑀲𑀺𑀓𑀜𑁆𑀘 𑀤𑀼𑀓𑁆𑀔𑀁 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀆𑀳 ‘‘𑀤𑁆𑀯𑀺𑀦𑁆𑀦𑀫𑁆𑀧𑀺 𑀤𑀼𑀓𑁆𑀔𑀸𑀦𑀁 𑀯𑀢𑁆𑀣𑀼𑀪𑀸𑀯𑁂𑀦𑀸’’𑀢𑀺.

𑀧𑀸𑀧𑀓𑀫𑁆𑀫𑀸𑀤𑀺𑀦𑀺𑀫𑀺𑀢𑁆𑀢𑀦𑁆𑀢𑀺 ¶ 𑀧𑀸𑀧𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀧𑀸𑀧𑀕𑀢𑀺𑀦𑀺𑀫𑀺𑀢𑁆𑀢𑀜𑁆𑀘𑀸𑀢𑀺 𑀅𑀢𑁆𑀣𑁄, 𑀓𑀫𑁆𑀫𑀫𑁆𑀧𑀺 𑀯𑀸 𑀏𑀢𑁆𑀣 ‘‘𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁 𑀉𑀧𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀪𑀸𑀯𑁂𑀦 𑀉𑀧𑀝𑁆𑀞𑀸𑀦𑀢𑁄. 𑀢𑀤𑀼𑀧𑀝𑁆𑀞𑀸𑀦𑁂𑀧𑀺 𑀳𑀺 ‘‘𑀅𑀓𑀢𑀁 𑀯𑀢 𑀫𑁂 𑀓𑀮𑁆𑀬𑀸𑀡’’𑀦𑁆𑀢𑀺𑀆𑀤𑀺𑀦𑀸 𑀅𑀦𑀧𑁆𑀧𑀓𑀁 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀪𑀤𑁆𑀤𑀲𑁆𑀲𑀸𑀢𑀺 𑀓𑀮𑁆𑀬𑀸𑀡𑀓𑀫𑁆𑀫𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀅𑀯𑀺𑀲𑁂𑀲𑀢𑁄𑀢𑀺 ‘‘𑀲𑀩𑁆𑀩𑁂𑀲’’𑀦𑁆𑀢𑀺 𑀏𑀢𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀲𑀩𑁆𑀩𑁂𑀲𑀦𑁆𑀢𑀺 𑀘 𑀬𑁂𑀲𑀁 𑀓𑀸𑀬𑀺𑀓𑀁 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀢𑁂𑀬𑁂𑀯 𑀲𑀩𑁆𑀩𑁂 𑀕𑀳𑀺𑀢𑀸 ‘‘𑀯𑀺𑀢𑀼𑀚𑁆𑀚𑀫𑀸𑀦𑀫𑀫𑁆𑀫𑀸𑀦’’𑀦𑁆𑀢𑀺 𑀯𑀺𑀲𑁂𑀲𑀺𑀢𑀢𑁆𑀢𑀸. 𑀲𑀦𑁆𑀥𑀻𑀦𑀁 𑀩𑀦𑁆𑀥𑀦𑀸𑀦𑀺 𑀲𑀦𑁆𑀥𑀺𑀩𑀦𑁆𑀥𑀦𑀸𑀦𑀺 ¶ , 𑀢𑁂𑀲𑀁 𑀙𑁂𑀤𑀦𑁂𑀦 𑀦𑀺𑀩𑁆𑀩𑀢𑁆𑀢𑀁 𑀤𑀼𑀓𑁆𑀔𑀁 ‘‘𑀲𑀦𑁆𑀥𑀺𑀩𑀦𑁆𑀥𑀦𑀘𑁆𑀙𑁂𑀤𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀆𑀤𑀺-𑀲𑀤𑁆𑀤𑁄 𑀯𑀸 𑀓𑀸𑀭𑀡𑀢𑁆𑀣𑁄, 𑀲𑀦𑁆𑀥𑀺𑀩𑀦𑁆𑀥𑀦𑀘𑁆𑀙𑁂𑀤𑀦𑀫𑀽𑀮𑀓𑀦𑁆𑀢𑀺 𑀅𑀢𑁆𑀣𑁄.

𑀅𑀦𑀬𑀩𑁆𑀬𑀲𑀦𑀸𑀧𑀸𑀤𑀦𑀁 𑀯𑀺𑀬𑀸𑀢𑀺 𑀅𑀦𑀬𑀩𑁆𑀬𑀲𑀦𑀸𑀧𑀢𑁆𑀢𑀺 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀯𑀸𑀴𑀸𑀤𑀻𑀳𑀺 𑀓𑀢𑁂 𑀳𑀺 𑀅𑀦𑀬𑀩𑁆𑀬𑀲𑀦𑀸𑀧𑀸𑀤𑀦𑁂 𑀅𑀦𑁆𑀢𑁄𑀕𑀥𑀸 𑀅𑀦𑀬𑀩𑁆𑀬𑀲𑀦𑀸𑀧𑀢𑁆𑀢𑀺 𑀏𑀢𑁆𑀣 𑀦𑀺𑀤𑀲𑁆𑀲𑀦𑀦𑁆𑀢𑀺.

𑀲𑁄𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁯𑁪. 𑀲𑀼𑀔𑀓𑀸𑀭𑀡𑀁 𑀳𑀺𑀢𑀁, 𑀢𑀲𑁆𑀲 𑀨𑀮𑀁 𑀲𑀼𑀔𑀁. 𑀜𑀸𑀢𑀺𑀓𑁆𑀔𑀬𑁄𑀢𑀺 𑀪𑁄𑀕𑀸𑀤𑀻𑀳𑀺 𑀜𑀸𑀢𑀻𑀦𑀁 𑀧𑀭𑀺𑀳𑀸𑀦𑀺 𑀫𑀭𑀡𑀜𑁆𑀘. 𑀅𑀬𑀁 𑀧𑀦 𑀯𑀺𑀲𑁂𑀲𑁄𑀢𑀺 𑀪𑁄𑀕𑀩𑁆𑀬𑀲𑀦𑀸𑀤𑀺𑀧𑀤𑀢𑁆𑀣𑀯𑀺𑀲𑁂𑀲𑀁 𑀭𑁄𑀕𑀩𑁆𑀬𑀲𑀦𑀸𑀤𑀻𑀲𑀼 𑀲𑀫𑀸𑀲𑀯𑀺𑀲𑁂𑀲𑀜𑁆𑀘 𑀲𑀦𑁆𑀥𑀸𑀬𑀸𑀳. 𑀜𑀸𑀢𑀺𑀪𑁄𑀕𑀸 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀸 𑀢𑀩𑁆𑀩𑀺𑀦𑀸𑀲𑀸𑀯𑀸𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀢𑀁 𑀲𑀦𑁆𑀥𑀸𑀬 ‘‘𑀅𑀦𑀺𑀧𑁆𑀨𑀦𑁆𑀦𑀸𑀦𑀻’’𑀢𑀺 𑀆𑀳. 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀢𑀁𑀬𑁂𑀯 𑀳𑀺 𑀲𑀦𑁆𑀥𑀸𑀬 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁪𑁪𑁭 𑀆𑀤𑀬𑁄) 𑀘 ‘‘𑀤𑀲 𑀭𑀽𑀧𑀸𑀦𑀺 𑀅𑀦𑀺𑀧𑁆𑀨𑀦𑁆𑀦𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀭𑀽𑀧𑀓𑀡𑁆𑀟𑀯𑀡𑁆𑀡𑀦𑀸𑀬𑀜𑁆𑀳𑀺 (𑀥. 𑀲. 𑀅𑀝𑁆𑀞. 𑁯𑁭𑁫 𑀧𑀓𑀺𑀡𑁆𑀡𑀓𑀓𑀣𑀸) 𑀦𑀺 ‘‘𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺. 𑀔𑀦𑁆𑀥𑀯𑀺𑀪𑀗𑁆𑀕𑁂 𑀘 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀲𑁆𑀲 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀆𑀤𑀺𑀓𑀲𑁆𑀲 𑀦𑀺𑀧𑁆𑀨𑀦𑁆𑀦𑀢𑀸 𑀯𑀼𑀢𑁆𑀢𑀸𑀢𑀺 𑀅𑀲𑀪𑀸𑀯𑀥𑀫𑁆𑀫𑀲𑁆𑀲 𑀘 𑀦𑀺𑀧𑁆𑀨𑀦𑁆𑀦𑀢𑀸, 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀅𑀦𑀺𑀧𑁆𑀨𑀦𑁆𑀦𑀢𑀸𑀢𑀺.

𑀥𑀫𑁆𑀫-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄𑀢𑀺 𑀆𑀳 ‘‘𑀤𑀼𑀓𑁆𑀔𑀲𑁆𑀲 𑀉𑀧𑁆𑀧𑀢𑁆𑀢𑀺𑀳𑁂𑀢𑀼𑀦𑀸’’𑀢𑀺. 𑀛𑀸𑀫𑀦𑁆𑀢𑀺 𑀤𑀟𑁆𑀠𑀁. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀮𑀓𑁆𑀔𑀡𑀸𑀤𑀺𑀓𑀸 𑀤𑁄𑀫𑀦𑀲𑁆𑀲𑀯𑁂𑀤𑀦𑀸 𑀲𑁄𑀓𑁄𑀢𑀺 𑀢𑀲𑁆𑀲 𑀧𑀼𑀦 𑀮𑀓𑁆𑀔𑀡𑀸𑀤𑀬𑁄 𑀦 𑀯𑀢𑁆𑀢𑀩𑁆𑀩𑀸 𑀲𑀺𑀬𑀼𑀁, 𑀢𑀣𑀸𑀧𑀺 𑀤𑁄𑀫𑀦𑀲𑁆𑀲𑀯𑀺𑀲𑁂𑀲𑀢𑁆𑀢𑀸 𑀲𑁄𑀓𑀲𑁆𑀲 𑀘 𑀯𑀺𑀲𑀺𑀝𑁆𑀞𑀸 𑀮𑀓𑁆𑀔𑀡𑀸𑀤𑀬𑁄 𑀯𑀢𑁆𑀢𑀩𑁆𑀩𑀸𑀢𑀺 ‘‘𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺𑀫𑀸𑀳. 𑀯𑀺𑀲𑀸𑀭𑀭𑀳𑀺𑀢𑀁 𑀅𑀦𑁆𑀢𑁄 𑀏𑀯 𑀲𑀗𑁆𑀓𑀼𑀘𑀺𑀢𑀁 𑀘𑀺𑀦𑁆𑀢𑀦𑀁, 𑀲𑀼𑀓𑁆𑀔𑀦𑀁 𑀯𑀸 𑀅𑀦𑁆𑀢𑁄𑀦𑀺𑀚𑁆𑀛𑀸𑀦𑀁. 𑀧𑀭𑀺𑀦𑀺𑀚𑁆𑀛𑀸𑀬𑀦𑀁 𑀤𑀳𑀦𑀁. 𑀜𑀸𑀢𑀺𑀩𑁆𑀬𑀲𑀦𑀸𑀤𑀺𑀅𑀦𑀼𑀭𑀽𑀧𑀁 𑀲𑁄𑀘𑀦𑀁 𑀅𑀦𑀼𑀲𑁄𑀘𑀦𑀁, 𑀢𑀁 𑀢𑀁 𑀯𑀸 𑀕𑀼𑀡𑀁 𑀤𑁄𑀲𑀜𑁆𑀘 𑀅𑀦𑀼𑀕𑀦𑁆𑀢𑁆𑀯𑀸 𑀲𑁄𑀘𑀦𑀁 𑀢𑀧𑁆𑀧𑀦𑀁 𑀅𑀦𑀼𑀲𑁄𑀘𑀦𑀁.

𑀚𑀯𑀦𑀓𑁆𑀔𑀡𑁂𑀢𑀺 ¶ 𑀫𑀦𑁄𑀤𑁆𑀯𑀸𑀭𑀚𑀯𑀦𑀓𑁆𑀔𑀡𑁂. 𑀢𑀣𑀸 𑀳𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀢𑁆𑀢𑀓𑀸 𑀫𑁂’’𑀢𑀺𑀆𑀤𑀺𑀫𑀸𑀳. 𑀓𑀸𑀬𑀯𑀺𑀜𑁆𑀜𑀸𑀡𑀸𑀤𑀺𑀯𑀻𑀣𑀺𑀬𑀫𑁆𑀧𑀺 𑀧𑀦 𑀚𑀯𑀦𑀓𑁆𑀔𑀡𑁂 𑀤𑁄𑀫𑀦𑀲𑁆𑀲𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺 𑀏𑀯. 𑀢𑁂𑀦𑁂𑀯 ‘‘𑀚𑀯𑀦𑀓𑁆𑀔𑀡𑁂 𑀘𑀸’’𑀢𑀺 𑀆𑀳. 𑀅𑀜𑁆𑀜𑀣𑀸 𑀓𑀸𑀬𑀺𑀓𑀘𑁂𑀢𑀲𑀺𑀓𑀤𑀼𑀓𑁆𑀔𑀸𑀦𑀁 𑀓𑀸𑀬𑀯𑀢𑁆𑀣𑀼𑀓𑀫𑀦𑁄𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸𑀦𑀫𑁂𑀯 𑀧𑀘𑁆𑀘𑀬𑁄𑀢𑀺 𑀕𑀡𑁆𑀳𑁂𑀬𑁆𑀬 𑀢𑀢𑁆𑀣 𑀯𑀺𑀲𑁂𑀲𑁂𑀦 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀢𑁄.

𑀢𑀼𑀚𑁆𑀚𑀢𑀻𑀢𑀺 ¶ ‘‘𑀢𑀼𑀤𑀢𑀻’’𑀢𑀺 𑀯𑀢𑁆𑀢𑀩𑁆𑀩𑁂 𑀩𑁆𑀬𑀢𑁆𑀢𑀬𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀭𑀺𑀤𑁂𑀯𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁯𑁫. 𑀆𑀤𑁂𑀯𑀦𑁆𑀢𑀺 𑀏𑀢𑁂𑀦𑀸𑀢𑀺 𑀆𑀤𑁂𑀯𑁄𑀢𑀺 𑀆𑀤𑁂𑀯𑀦-𑀲𑀤𑁆𑀤𑀁 𑀓𑀢𑁆𑀯𑀸 𑀅𑀲𑁆𑀲𑀼𑀯𑀺𑀫𑁄𑀘𑀦𑀸𑀤𑀺𑀯𑀺𑀓𑀸𑀭𑀁 𑀆𑀧𑀚𑁆𑀚𑀦𑁆𑀢𑀸𑀦𑀁 𑀢𑀩𑁆𑀩𑀺𑀓𑀸𑀭𑀸𑀧𑀢𑁆𑀢𑀺𑀬𑀸 𑀲𑁄 𑀲𑀤𑁆𑀤𑁄 𑀓𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑁄𑀢𑀺. 𑀯𑀻𑀳𑀺𑀧𑀮𑀸𑀧𑀸𑀤𑀬𑁄 𑀯𑀺𑀬 𑀢𑀼𑀘𑁆𑀙𑀁 𑀯𑀘𑀦𑀁 𑀧𑀮𑀸𑀧𑁄. 𑀕𑀼𑀡𑀤𑁄𑀲𑁂 𑀓𑀺𑀢𑁆𑀢𑁂𑀢𑀺 𑀩𑁄𑀥𑁂𑀢𑀻𑀢𑀺 𑀕𑀼𑀡𑀤𑁄𑀲𑀓𑀺𑀢𑁆𑀢𑀦𑀭𑀲𑁄 𑀮𑀸𑀮𑀧𑁆𑀧-𑀲𑀤𑁆𑀤𑁄. 𑀅𑀢𑁆𑀣𑀸𑀦𑀢𑁆𑀣𑁂 𑀳𑀺𑀭𑀺𑀬𑀺𑀢𑀩𑁆𑀩𑀚𑀦𑁂 𑀘 𑀅𑀯𑀺𑀘𑀸𑀭𑁂𑀢𑁆𑀯𑀸 𑀧𑀼𑀕𑁆𑀕𑀮𑀲𑁆𑀲 𑀲𑀫𑁆𑀪𑀫𑀪𑀸𑀯𑁄 𑀳𑀼𑀢𑁆𑀯𑀸 𑀧𑀭𑀺𑀤𑁂𑀯𑀦-𑀲𑀤𑁆𑀤𑁄 𑀉𑀧𑀝𑁆𑀞𑀸𑀢𑀻𑀢𑀺 ‘‘𑀲𑀫𑁆𑀪𑀫𑀧𑀘𑁆𑀘𑀼𑀧𑀝𑁆𑀞𑀸𑀦𑁄’’𑀢𑀺 𑀯𑀼𑀢𑁆𑀢𑁄, 𑀲𑁄𑀓𑀯𑀢𑁆𑀣𑀼𑀅𑀯𑀺𑀖𑀸𑀢𑁂𑀦 𑀯𑀸 𑀲𑀫𑁆𑀪𑀫𑁄, 𑀦 𑀉𑀢𑁆𑀢𑀸𑀲𑀲𑀫𑁆𑀪𑀫𑁄, 𑀲𑁄 𑀘 𑀧𑀭𑀺𑀤𑁂𑀯𑀦-𑀲𑀤𑁆𑀤𑁂𑀦 𑀧𑀸𑀓𑀝𑁄 𑀳𑁄𑀢𑀻𑀢𑀺 𑀧𑀭𑀺𑀤𑁂𑀯𑁄 ‘‘𑀲𑀫𑁆𑀪𑀫𑀧𑀘𑁆𑀘𑀼𑀧𑀝𑁆𑀞𑀸𑀦𑁄’’𑀢𑀺 𑀯𑀼𑀢𑁆𑀢𑁄.

𑀲𑁄𑀓𑀸𑀪𑀺𑀪𑀽𑀢𑁄 𑀧𑀭𑀺𑀤𑁂𑀯𑀦𑀦𑀺𑀫𑀺𑀢𑁆𑀢𑀁 𑀫𑀼𑀝𑁆𑀞𑀺𑀧𑁄𑀣𑀦𑀸𑀤𑀻𑀦𑀺 𑀓𑀭𑁄𑀢𑀺, 𑀧𑀭𑀺𑀤𑁂𑀯𑀦𑀦𑀺𑀫𑀺𑀢𑁆𑀢𑀫𑁂𑀯 𑀘 𑀜𑀸𑀢𑀺𑀅𑀩𑁆𑀪𑀢𑁆𑀣𑀗𑁆𑀕𑀫𑀦𑀸𑀤𑀻𑀦𑀺 𑀘𑀺𑀦𑁆𑀢𑁂𑀢𑀻𑀢𑀺 𑀧𑀭𑀺𑀤𑁂𑀯𑀲𑁆𑀲 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀦𑀁 𑀯𑀢𑁆𑀣𑀼𑀪𑀸𑀯𑁄 𑀯𑀼𑀢𑁆𑀢𑁄.

𑀪𑀺𑀬𑁆𑀬𑁄𑀢𑀺 𑀬𑁂𑀦 𑀯𑀺𑀦𑀸 𑀦 𑀳𑁄𑀢𑀺, 𑀢𑀢𑁄 𑀧𑀭𑀺𑀤𑁂𑀯𑀲𑀫𑀼𑀝𑁆𑀞𑀸𑀧𑀓𑀤𑁄𑀫𑀦𑀲𑁆𑀲𑀢𑁄, 𑀧𑀼𑀩𑁆𑀩𑁂 𑀯𑀼𑀢𑁆𑀢𑀤𑀼𑀓𑁆𑀔𑀢𑁄 𑀯𑀸 𑀪𑀺𑀬𑁆𑀬𑁄, 𑀓𑀡𑁆𑀞𑁄𑀝𑁆𑀞𑀢𑀸𑀮𑀼𑀆𑀤𑀺𑀲𑁄𑀲𑀚𑀢𑁄𑀧𑀺 𑀯𑀸 𑀪𑀺𑀬𑁆𑀬𑁄𑀢𑀺 𑀅𑀜𑁆𑀜𑀜𑁆𑀘 𑀓𑀸𑀬𑀺𑀓𑀁 𑀘𑁂𑀢𑀲𑀺𑀓𑀁 𑀢𑀁𑀦𑀺𑀤𑀸𑀦𑀤𑀼𑀓𑁆𑀔𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁯𑁬-𑁭. 𑀓𑀸𑀬𑀺𑀓𑀁 𑀤𑀼𑀓𑁆𑀔𑀁 𑀓𑀸𑀬𑀺𑀓𑀲𑁆𑀲 𑀤𑀼𑀓𑁆𑀔𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄𑀢𑀺 ‘‘𑀤𑀼𑀓𑁆𑀔𑀺𑀢𑀲𑁆𑀲 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀢𑁂𑀦 𑀤𑀼𑀓𑁆𑀔𑁂𑀦 𑀅𑀪𑀺𑀪𑀽𑀢𑀢𑁆𑀢𑀸 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀢𑀼𑀁 ¶ 𑀦 𑀮𑀪𑀸𑀫𑀻𑀢𑀺 𑀩𑀮𑀯𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀤𑀼𑀓𑁆𑀔𑀲𑁆𑀲 𑀤𑁄𑀫𑀦𑀲𑁆𑀲𑀯𑀢𑁆𑀣𑀼𑀢𑀸 𑀳𑁄𑀢𑀺.

𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀓𑁆𑀔𑀡𑀁 𑀲𑀦𑁆𑀥𑀸𑀬 ‘‘𑀧𑀻𑀴𑁂𑀢𑀻’’𑀢𑀺 𑀯𑀼𑀢𑁆𑀢𑀁 𑀓𑀸𑀬𑀺𑀓𑀤𑀼𑀓𑁆𑀔𑀁, 𑀢𑀤𑀼𑀧𑀦𑀺𑀲𑁆𑀲𑀬𑀢𑁄 𑀯𑀸.

𑀆𑀯𑀝𑁆𑀝𑀦𑁆𑀢𑀻𑀢𑀺 𑀧𑀭𑀺𑀯𑀝𑁆𑀝𑀦𑁆𑀢𑀺. 𑀯𑀺𑀯𑀝𑁆𑀝𑀦𑁆𑀢𑀻𑀢𑀺 𑀧𑀩𑁆𑀪𑀸𑀭𑁂 𑀔𑀺𑀢𑁆𑀢𑀢𑁆𑀣𑀫𑁆𑀪𑁄 𑀯𑀺𑀬 𑀮𑀼𑀥𑀦𑁆𑀢𑀺. 𑀫𑀽𑀮𑀘𑁆𑀙𑀺𑀦𑁆𑀦𑀭𑀼𑀓𑁆𑀔𑁄 𑀯𑀺𑀬 𑀙𑀺𑀦𑁆𑀦𑀧𑀧𑀸𑀢𑀁 𑀧𑀧𑀢𑀦𑁆𑀢𑀺, 𑀧𑀭𑀺𑀤𑀬𑁆𑀳𑀫𑀸𑀦𑀘𑀺𑀢𑁆𑀢𑀸 𑀧𑀼𑀭𑀺𑀫𑀤𑁄𑀫𑀦𑀲𑁆𑀲𑀼𑀧𑀦𑀺𑀲𑁆𑀲𑀬𑀯𑀲𑁂𑀦 𑀘𑀺𑀦𑁆𑀢𑁂𑀦𑁆𑀢𑀺, 𑀯𑀺𑀕𑀢𑁂 𑀤𑁄𑀫𑀦𑀲𑁆𑀲𑁂 𑀢𑀣𑀸𑀘𑀺𑀦𑁆𑀢𑀦𑀁 𑀦𑀢𑁆𑀣𑀻𑀢𑀺.

𑀉𑀧𑀸𑀬𑀸𑀲𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁯𑁮. 𑀲𑀩𑁆𑀩𑀯𑀺𑀲𑀬𑀧𑁆𑀧𑀝𑀺𑀧𑀢𑁆𑀢𑀺𑀦𑀺𑀯𑀸𑀭𑀡𑀯𑀲𑁂𑀦 ¶ 𑀲𑀫𑀦𑁆𑀢𑀢𑁄 𑀲𑀻𑀤𑀦𑀁 𑀲𑀁𑀲𑀻𑀤𑀦𑀁, 𑀉𑀝𑁆𑀞𑁂𑀢𑀼𑀫𑁆𑀧𑀺 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀓𑀭𑀡𑀯𑀲𑁂𑀦 𑀅𑀢𑀺𑀩𑀮𑀯𑀁, 𑀯𑀺𑀭𑀽𑀧𑀁 𑀯𑀸 𑀲𑀻𑀤𑀦𑀁 𑀯𑀺𑀲𑀻𑀤𑀦𑀁. 𑀅𑀜𑁆𑀜𑀁 𑀯𑀺𑀲𑀬𑀁 𑀅𑀕𑀦𑁆𑀢𑁆𑀯𑀸 𑀜𑀸𑀢𑀺𑀩𑁆𑀬𑀲𑀦𑀸𑀤𑀻𑀲𑀼 𑀯𑀺𑀭𑀽𑀧𑁄 𑀆𑀲𑀗𑁆𑀕𑁄 𑀢𑀢𑁆𑀣𑁂𑀯 𑀅𑀯𑀩𑀦𑁆𑀥𑀢𑀸 𑀩𑁆𑀬𑀸𑀲𑀢𑁆𑀢𑀺. 𑀦𑀺𑀢𑁆𑀣𑀼𑀦𑀦𑀓𑀭𑀡𑀢𑁄 𑀦𑀺𑀢𑁆𑀣𑀼𑀦𑀦𑀭𑀲𑁄. 𑀯𑀺𑀲𑀻𑀤𑀦𑀁 𑀯𑀺𑀲𑀸𑀤𑁄.

𑀲𑀬𑀁 𑀦 𑀤𑀼𑀓𑁆𑀔𑁄 𑀤𑁄𑀲𑀢𑁆𑀢𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀥𑀫𑁆𑀫𑀦𑁆𑀢𑀭𑀢𑁆𑀢𑀸 𑀯𑀸. 𑀬𑁂 𑀧𑀦 𑀤𑁄𑀫𑀦𑀲𑁆𑀲𑀫𑁂𑀯 𑀉𑀧𑀸𑀬𑀸𑀲𑁄𑀢𑀺 𑀯𑀤𑁂𑀬𑁆𑀬𑀼𑀁, 𑀢𑁂 ‘‘𑀉𑀧𑀸𑀬𑀸𑀲𑁄 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀲𑀫𑁆𑀧𑀬𑀼𑀢𑁆𑀢𑁄, 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑁄’’𑀢𑀺 (𑀥𑀸𑀢𑀼. 𑁨𑁪𑁯) 𑀇𑀫𑀸𑀬 𑀧𑀸𑀴𑀺𑀬𑀸 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸. 𑀯𑀺𑀲𑀸𑀤𑀧𑁆𑀧𑀢𑁆𑀢𑀺𑀬𑀸 𑀲𑀼𑀔𑀤𑀼𑀓𑁆𑀔𑀓𑀸𑀭𑀡𑀁 𑀅𑀕𑀡𑀬𑀺𑀢𑁆𑀯𑀸 𑀤𑀼𑀓𑁆𑀔𑀝𑁆𑀞𑀸𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀸𑀦𑀁 𑀉𑀧𑀸𑀬𑀸𑀲𑁄 𑀓𑀸𑀬𑀺𑀓𑀤𑀼𑀓𑁆𑀔𑀲𑁆𑀲 𑀯𑀢𑁆𑀣𑀼 𑀳𑁄𑀢𑀺, 𑀯𑀺𑀲𑀸𑀤𑀦𑀯𑀲𑁂𑀦𑁂𑀯 𑀜𑀸𑀢𑀺𑀯𑀺𑀦𑀸𑀲𑀸𑀤𑀻𑀦𑀺 𑀘𑀺𑀦𑁆𑀢𑁂𑀦𑁆𑀢𑀸𑀦𑀁 𑀤𑁄𑀫𑀦𑀲𑁆𑀲𑀲𑁆𑀲. 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀓𑁆𑀔𑀡𑁂𑀬𑁂𑀯 𑀉𑀧𑀸𑀬𑀸𑀲𑁄 𑀤𑁄𑀫𑀦𑀲𑁆𑀲𑀲𑀫𑁆𑀧𑀬𑁄𑀕𑀢𑁄 𑀘𑀺𑀢𑁆𑀢𑀁 𑀧𑀭𑀺𑀤𑀳𑀢𑀺, 𑀅𑀯𑀺𑀧𑁆𑀨𑀸𑀭𑀺𑀓𑀢𑀸𑀓𑀭𑀡𑀯𑀲𑁂𑀦 𑀓𑀸𑀬𑀁 𑀯𑀺𑀲𑀸𑀤𑁂𑀢𑀺, 𑀢𑀤𑀼𑀪𑀬𑀓𑀭𑀡𑁂𑀦𑁂𑀯 𑀢𑀢𑁄 𑀧𑀭𑀁 𑀢𑀁𑀦𑀺𑀫𑀺𑀢𑁆𑀢𑀁 𑀓𑀸𑀬𑀺𑀓𑀁 𑀘𑁂𑀢𑀲𑀺𑀓𑀜𑁆𑀘 𑀅𑀥𑀺𑀫𑀢𑁆𑀢𑀁 𑀤𑀼𑀓𑁆𑀔𑀁 𑀚𑀦𑀬𑀢𑀻𑀢𑀺 𑀤𑀼𑀓𑁆𑀔𑁄 𑀯𑀼𑀢𑁆𑀢𑁄.

𑀅𑀧𑁆𑀧𑀺𑀬𑀲𑀫𑁆𑀧𑀬𑁄𑀕𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁯𑁯. 𑀦 𑀅𑀧𑁆𑀧𑀺𑀬𑀦𑁆𑀢𑀻𑀢𑀺 𑀦 𑀕𑀫𑀺𑀬𑀦𑁆𑀢𑀺, 𑀦 𑀧𑀯𑁂𑀲𑀻𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀦𑀢𑁆𑀣𑀦𑁆𑀢𑀺 𑀩𑁆𑀬𑀲𑀦𑀁, 𑀤𑀼𑀓𑁆𑀔𑀁 𑀯𑀸. 𑀅𑀳𑀺𑀢𑀦𑁆𑀢𑀺 𑀢𑀲𑁆𑀲 𑀳𑁂𑀢𑀼𑀁. 𑀤𑀼𑀢𑀺𑀬𑁂 𑀅𑀢𑁆𑀣𑀯𑀺𑀓𑀧𑁆𑀧𑁂 𑀅𑀢𑁆𑀣𑀁 𑀦 𑀓𑀸𑀫𑁂𑀦𑁆𑀢𑀻𑀢𑀺 ¶ 𑀅𑀦𑀢𑁆𑀣𑀓𑀸𑀫𑀸𑀢𑀺𑀆𑀤𑀺 𑀅𑀲𑀫𑀢𑁆𑀣𑀲𑀫𑀸𑀲𑁄𑀧𑀺 𑀬𑁄𑀚𑀺𑀢𑁄. ‘‘𑀅𑀲𑀽𑀭𑀺𑀬𑀧𑀲𑁆𑀲𑀸𑀦𑀺 𑀫𑀼𑀔𑀸𑀦𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀳𑀺 𑀬𑁂𑀦 𑀲𑀫𑀸𑀲𑁄, 𑀦 𑀢𑀲𑁆𑀲𑀸𑀬𑀁 𑀧𑀝𑀺𑀲𑁂𑀥𑀓𑁄 𑀅-𑀓𑀸𑀭𑁄𑀢𑀺. 𑀬𑀲𑁆𑀫𑀺𑀁 𑀓𑀺𑀲𑁆𑀫𑀺𑀜𑁆𑀘𑀺 𑀦𑀺𑀩𑁆𑀪𑀬𑁂 𑀬𑁄𑀕𑀓𑁆𑀔𑁂𑀫-𑀲𑀤𑁆𑀤𑁄 𑀦𑀺𑀭𑀼𑀴𑁆𑀳𑁄 𑀤𑀼𑀓𑁆𑀔𑀬𑁄𑀕𑀢𑁄 𑀔𑁂𑀫𑀢𑁆𑀢𑀸.

𑀲𑀗𑁆𑀕𑀢𑀺𑀆𑀤𑀻𑀲𑀼 𑀲𑀗𑁆𑀔𑀸𑀭𑀯𑀲𑁂𑀦 𑀬𑀁 𑀮𑀩𑁆𑀪𑀢𑀺, 𑀢𑀁 𑀕𑀳𑁂𑀢𑀩𑁆𑀩𑀁. 𑀦 𑀳𑀺 𑀲𑀗𑁆𑀔𑀸𑀭𑀸𑀦𑀁 𑀞𑀸𑀦𑀦𑀺𑀲𑀚𑁆𑀚𑀸𑀤𑀬𑁄 𑀪𑁄𑀚𑀦𑀸𑀤𑀺𑀓𑀺𑀘𑁆𑀘𑁂𑀲𑀼 𑀯𑀸 𑀲𑀳𑀓𑀭𑀡𑀁 𑀯𑀺𑀚𑁆𑀚𑀢𑀻𑀢𑀺 𑀧𑀘𑁆𑀙𑀺𑀫𑀤𑁆𑀯𑀬𑀁 𑀢𑀤𑀢𑁆𑀣𑀯𑀲𑁂𑀦 𑀮𑀩𑁆𑀪𑀢𑀻𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺. 𑀬𑀁 𑀮𑀩𑁆𑀪𑀢𑀻𑀢𑀺 𑀯𑀸 𑀬𑀁 𑀅𑀢𑁆𑀣𑀚𑀸𑀢𑀁 𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦 𑀬𑀣𑀸 𑀮𑀩𑁆𑀪𑀢𑀺 𑀲𑀗𑁆𑀕𑀢𑀺𑀆𑀤𑀻𑀲𑀼 𑀅𑀢𑁆𑀣𑁄, 𑀢𑀣𑀸 𑀬𑁄𑀚𑁂𑀢𑀩𑁆𑀩𑁄. 𑀧𑀼𑀕𑁆𑀕𑀮𑀲𑁆𑀲 𑀳𑀺 𑀲𑀗𑁆𑀕𑀢𑀺 𑀕𑀦𑁆𑀢𑁆𑀯𑀸 𑀲𑀗𑁆𑀔𑀸𑀭𑁂𑀳𑀺 𑀲𑀁𑀬𑁄𑀕𑁄 ¶ 𑀳𑁄𑀢𑀺, 𑀆𑀕𑀢𑁂𑀳𑀺 𑀘 𑀢𑁂𑀳𑀺, 𑀧𑀼𑀕𑁆𑀕𑀮𑀲𑁆𑀲 𑀘 𑀅𑀢𑁆𑀢𑀦𑁄 𑀞𑀸𑀦𑀸𑀤𑀻𑀲𑀼 𑀲𑀗𑁆𑀔𑀸𑀭𑁂𑀳𑀺 𑀲𑀳𑀪𑀸𑀯𑁄 𑀳𑁄𑀢𑀺, 𑀲𑀩𑁆𑀩𑀓𑀺𑀭𑀺𑀬𑀸𑀲𑀼 𑀘 𑀫𑀺𑀲𑁆𑀲𑀻𑀪𑀸𑀯𑁄𑀢𑀺. 𑀅𑀦𑀢𑁆𑀣𑀪𑀸𑀯𑁄 𑀉𑀧𑀤𑁆𑀤𑀯𑀪𑀸𑀯𑁄.

𑀅𑀦𑀺𑀝𑁆𑀞𑀸𑀦𑀁 𑀆𑀧𑀸𑀣𑀕𑀫𑀦𑀫𑀢𑁆𑀢𑀁 𑀢𑀁𑀕𑀳𑀡𑀫𑀢𑁆𑀢𑀜𑁆𑀘 𑀅𑀧𑁆𑀧𑀺𑀬𑀲𑀫𑁆𑀧𑀬𑁄𑀕𑁄, 𑀦 𑀧𑀦 𑀧𑀣𑀯𑀺𑀨𑀲𑁆𑀲𑀸𑀤𑀬𑁄 𑀯𑀺𑀬 𑀅𑀧𑁆𑀧𑀺𑀬𑀲𑀫𑁆𑀧𑀬𑁄𑀕𑁄 𑀦𑀸𑀫 𑀏𑀓𑁄 𑀥𑀫𑁆𑀫𑁄 𑀅𑀢𑁆𑀣𑀻𑀢𑀺 𑀆𑀳 ‘‘𑀲𑁄 𑀅𑀢𑁆𑀣𑀢𑁄 𑀏𑀓𑁄 𑀥𑀫𑁆𑀫𑁄 𑀦𑀸𑀫 𑀦𑀢𑁆𑀣𑀻’’𑀢𑀺. 𑀅𑀦𑀺𑀝𑁆𑀞𑀸𑀦𑀺 𑀓𑀡𑁆𑀝𑀓𑀸𑀤𑀻𑀦𑀺 𑀅𑀫𑀺𑀢𑁆𑀢𑀸 𑀘 𑀉𑀲𑀼𑀆𑀤𑀻𑀳𑀺 𑀯𑀺𑀚𑁆𑀛𑀦𑀸𑀤𑀺𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀦𑁆𑀢𑀺.

𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀤𑀼𑀓𑁆𑀔𑀁 𑀳𑁄𑀢𑀻𑀢𑀺 𑀯𑀸 𑀇𑀥 𑀇𑀫𑀲𑁆𑀫𑀺𑀁 𑀤𑀼𑀓𑁆𑀔𑀲𑀘𑁆𑀘𑀦𑀺𑀤𑁆𑀤𑁂𑀲𑁂 𑀤𑀼𑀓𑁆𑀔𑁄 𑀯𑀼𑀢𑁆𑀢𑁄𑀢𑀺 𑀯𑀸 𑀬𑁄𑀚𑁂𑀢𑀩𑁆𑀩𑀁.

𑀧𑀺𑀬𑀯𑀺𑀧𑁆𑀧𑀬𑁄𑀕𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁦𑁦. 𑀫𑀺𑀦𑀦𑁆𑀢𑀻𑀢𑀺 𑀦𑀸𑀴𑀺𑀬𑀸𑀤𑀻𑀲𑀼 𑀥𑀜𑁆𑀜𑀁 𑀯𑀺𑀬 𑀅𑀦𑁆𑀢𑁄 𑀧𑀓𑁆𑀔𑀺𑀧𑀦𑁆𑀢𑀺, 𑀦 𑀩𑀳𑀺 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀫𑀸-𑀲𑀤𑁆𑀤𑁄 𑀲𑀳𑀪𑀸𑀯𑀤𑀻𑀧𑀓𑁄. 𑀜𑀸𑀬𑀦𑁆𑀢𑀺 𑀯𑀸 𑀅𑀚𑁆𑀛𑀢𑁆𑀢𑀺𑀓𑀸𑀇𑀘𑁆𑀘𑁂𑀯. 𑀜𑀸𑀢𑀺𑀩𑁆𑀬𑀲𑀦𑀸𑀤𑀺𑀓𑁄 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀻𑀢𑀺 𑀩𑁆𑀬𑀲𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀲𑁄𑀓𑀼𑀧𑁆𑀧𑀸𑀤𑀦𑁂𑀦𑁂𑀯 𑀲𑀭𑀻𑀭𑀁 𑀲𑁄𑀲𑁂𑀦𑁆𑀢𑀺, 𑀓𑀺𑀲𑀁 𑀓𑀭𑁄𑀦𑁆𑀢𑀺, 𑀅𑀓𑀺𑀲𑀫𑁆𑀧𑀺 𑀦𑀺𑀭𑁄𑀚𑀢𑀸𑀓𑀭𑀡𑁂𑀦 𑀫𑀺𑀮𑀸𑀧𑁂𑀦𑁆𑀢𑀺, 𑀢𑀢𑁄 𑀘 𑀓𑀸𑀬𑀺𑀓𑀁 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀢𑀤𑀼𑀧𑁆𑀧𑀸𑀤𑀓𑀢𑀸 𑀯𑀼𑀢𑁆𑀢𑀸.

𑀲𑁄𑀓𑀲𑀭𑀲𑀫𑀧𑁆𑀧𑀺𑀢𑀸𑀢𑀺 𑀏𑀢𑁂𑀦 𑀘𑁂𑀢𑀲𑀺𑀓𑀤𑀼𑀓𑁆𑀔𑀁 𑀤𑀲𑁆𑀲𑁂𑀢𑀺, 𑀯𑀺𑀢𑀼𑀚𑁆𑀚𑀦𑁆𑀢𑀻𑀢𑀺 𑀏𑀢𑁂𑀦 𑀓𑀸𑀬𑀺𑀓𑀁 𑀤𑀼𑀓𑁆𑀔𑀁.

𑀇𑀘𑁆𑀙𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁦𑁧. 𑀬𑀲𑁆𑀫𑀺𑀁 ¶ 𑀓𑀸𑀮𑁂 𑀚𑀸𑀢𑀺𑀬𑀸 𑀦 𑀆𑀕𑀦𑁆𑀢𑀩𑁆𑀩𑀁, 𑀢𑀁 𑀓𑀸𑀮𑀁 𑀕𑀳𑁂𑀢𑁆𑀯𑀸 𑀆𑀳 ‘‘𑀧𑀭𑀺𑀦𑀺𑀩𑁆𑀩𑀼𑀢𑁂𑀲𑀼 𑀘 𑀯𑀺𑀚𑁆𑀚𑀫𑀸𑀦𑀁 𑀚𑀸𑀢𑀺𑀬𑀸 𑀅𑀦𑀸𑀕𑀫𑀦’’𑀦𑁆𑀢𑀺. 𑀬𑀫𑁆𑀧𑀻𑀢𑀺 𑀬𑁂𑀦𑀧𑀻𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀬𑀤𑀸𑀧𑀺 𑀧𑀦 𑀬𑀁-𑀲𑀤𑁆𑀤𑁄 ‘‘𑀇𑀘𑁆𑀙’’𑀦𑁆𑀢𑀺 𑀏𑀢𑀁 𑀅𑀧𑁂𑀓𑁆𑀔𑀢𑀺, 𑀢𑀤𑀸𑀧𑀺 𑀅𑀮𑀸𑀪𑀯𑀺𑀲𑀺𑀝𑁆𑀞𑀸 𑀇𑀘𑁆𑀙𑀸 𑀯𑀼𑀢𑁆𑀢𑀸 𑀳𑁄𑀢𑀺. 𑀬𑀤𑀸 ‘‘𑀦 𑀮𑀪𑀢𑀻’’𑀢𑀺 𑀏𑀢𑀁 𑀅𑀧𑁂𑀓𑁆𑀔𑀢𑀺, 𑀢𑀤𑀸 𑀇𑀘𑁆𑀙𑀸𑀯𑀺𑀲𑀺𑀝𑁆𑀞𑁄 𑀅𑀮𑀸𑀪𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀲𑁄 𑀧𑀦𑀢𑁆𑀣𑀢𑁄 𑀅𑀜𑁆𑀜𑁄 𑀥𑀫𑁆𑀫𑁄 𑀦𑀢𑁆𑀣𑀺, 𑀢𑀣𑀸𑀧𑀺 𑀅𑀮𑀩𑁆𑀪𑀦𑁂𑀬𑁆𑀬𑀇𑀘𑁆𑀙𑀸𑀯 𑀯𑀼𑀢𑁆𑀢𑀸 𑀳𑁄𑀢𑀺. 𑀅𑀧𑀸𑀧𑀼𑀡𑀺𑀢𑀩𑁆𑀩𑁂𑀲𑀼 𑀧𑀯𑀢𑁆𑀢𑀢𑁆𑀢𑀸 𑀏𑀯 ‘‘𑀅𑀧𑁆𑀧𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀸’’𑀢𑀺 𑀯𑀼𑀢𑁆𑀢𑀸. 𑀬𑀢𑁆𑀣 𑀳𑀺 𑀲𑀸 𑀇𑀘𑁆𑀙𑀸 𑀧𑀯𑀢𑁆𑀢𑀸, 𑀢𑀁 𑀯𑀢𑁆𑀣𑀼𑀁 𑀅𑀧𑀸𑀧𑀼𑀡𑀦𑁆𑀢𑀻 𑀳𑀼𑀢𑁆𑀯𑀸 𑀕𑀬𑁆𑀳𑀢𑀻𑀢𑀺.

𑀙𑀺𑀦𑁆𑀦𑀪𑀺𑀦𑁆𑀦𑀕𑀡𑁂𑀦𑀸𑀢𑀺 𑀦𑀺𑀮𑁆𑀮𑀚𑁆𑀚𑁂𑀦 𑀥𑀼𑀢𑁆𑀢𑀕𑀡𑁂𑀦, 𑀓𑀧𑁆𑀧𑀝𑀺𑀓𑀕𑀡𑁂𑀦 𑀯𑀸.

𑀯𑀺𑀖𑀸𑀢𑀫𑀬𑀦𑁆𑀢𑀺 ¶ 𑀘𑀺𑀢𑁆𑀢𑀯𑀺𑀖𑀸𑀢𑀫𑀬𑀁 𑀤𑁄𑀫𑀦𑀲𑁆𑀲𑀁 𑀘𑀺𑀢𑁆𑀢𑀯𑀺𑀖𑀸𑀢𑀢𑁄 𑀏𑀯 𑀉𑀧𑁆𑀧𑀦𑁆𑀦𑀁 𑀉𑀩𑁆𑀩𑀦𑁆𑀥𑀦𑀚𑀭𑀸𑀢𑀺𑀲𑀸𑀭𑀸𑀤𑀺𑀓𑀸𑀬𑀺𑀓𑀁 𑀤𑀼𑀓𑁆𑀔𑀜𑁆𑀘. 𑀇𑀘𑁆𑀙𑀺𑀢𑀸𑀮𑀸𑀪𑀦𑁆𑀢𑀺 𑀅𑀮𑀩𑁆𑀪𑀦𑁂𑀬𑁆𑀬𑀇𑀘𑁆𑀙𑀫𑁂𑀯 𑀯𑀤𑀢𑀺.

𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁦𑁨. 𑀯𑀺𑀢𑁆𑀣𑀺𑀡𑁆𑀡𑀲𑁆𑀲 𑀤𑀼𑀓𑁆𑀔𑀲𑁆𑀲 𑀏𑀢𑁆𑀢𑀓𑀦𑁆𑀢𑀺 𑀤𑀲𑁆𑀲𑀦𑀁 𑀤𑀼𑀓𑁆𑀔𑀲𑁆𑀲 𑀲𑀗𑁆𑀔𑁂𑀧𑁄, 𑀢𑀁 𑀓𑀸𑀢𑀼𑀁 𑀦 𑀲𑀓𑁆𑀓𑀸 𑀯𑀺𑀢𑁆𑀣𑀸𑀭𑀲𑁆𑀲 𑀅𑀦𑀦𑁆𑀢𑀢𑁆𑀢𑀸. 𑀤𑀼𑀓𑁆𑀔𑀯𑀺𑀢𑁆𑀣𑀸𑀭𑀕𑀢𑀁 𑀧𑀦 𑀤𑁂𑀲𑀦𑀸𑀯𑀺𑀢𑁆𑀣𑀸𑀭𑀁 𑀧𑀳𑀸𑀬 𑀬𑀢𑁆𑀣 𑀲𑀩𑁆𑀩𑁄 𑀤𑀼𑀓𑁆𑀔𑀯𑀺𑀢𑁆𑀣𑀸𑀭𑁄 𑀲𑀫𑁄𑀥𑀸𑀦𑀁 𑀕𑀘𑁆𑀙𑀢𑀺, 𑀢𑀢𑁆𑀣 𑀤𑁂𑀲𑀦𑀸𑀬 𑀯𑀯𑀢𑁆𑀣𑀸𑀦𑀁 𑀲𑀗𑁆𑀔𑁂𑀧𑁄, 𑀢𑀁 𑀓𑀸𑀢𑀼𑀁 𑀲𑀓𑁆𑀓𑀸 𑀢𑀸𑀤𑀺𑀲𑀲𑁆𑀲 𑀯𑀢𑁆𑀣𑀼𑀦𑁄 𑀲𑀩𑁆𑀪𑀸𑀯𑀸.

𑀤𑁂𑀲𑀁 𑀚𑀸𑀦𑀦𑁆𑀢𑁄 𑀫𑀕𑁆𑀕𑀓𑁆𑀔𑀸𑀬𑀺𑀓𑀧𑀼𑀭𑀺𑀲𑁄 𑀤𑁂𑀲𑀓𑁄. 𑀪𑀕𑀯𑀸𑀧𑀺 𑀤𑀼𑀓𑁆𑀔𑀲𑁆𑀲 𑀤𑁂𑀲𑀓𑁄. ‘‘𑀤𑀼𑀓𑁆𑀔𑀦𑁆𑀢𑀤𑁂𑀲𑀓𑁂𑀦𑀸’’𑀢𑀺 𑀯𑀸 𑀧𑀸𑀞𑁄, 𑀤𑀼𑀓𑁆𑀔𑀦𑁆𑀢𑀓𑁆𑀔𑀸𑀬𑀺𑀓𑁄𑀢𑀺 𑀅𑀢𑁆𑀣𑁄.

𑀧𑀸𑀯𑀓𑀸𑀤𑀬𑁄 𑀬𑀣𑀸 𑀇𑀦𑁆𑀥𑀦𑀸𑀤𑀻𑀦𑀺 𑀩𑀸𑀥𑁂𑀦𑁆𑀢𑀺, 𑀏𑀯𑀁 𑀩𑀸𑀥𑀬𑀫𑀸𑀦𑀸. 𑀫𑀸𑀭𑀡𑀦𑁆𑀢𑀺𑀓𑀤𑀼𑀓𑁆𑀔𑀸𑀪𑀺𑀖𑀸𑀢𑁂𑀦𑀸𑀢𑀺 𑀇𑀫𑀺𑀦𑀸 𑀅𑀢𑀺𑀧𑀸𑀓𑀝𑁂𑀦 𑀚𑀸𑀢𑀺𑀚𑀭𑀸𑀤𑀼𑀓𑁆𑀔𑀯𑀺𑀖𑀸𑀢𑀚𑀲𑁄𑀓𑀸𑀤𑀬𑁄 𑀤𑀲𑁆𑀲𑁂𑀢𑀺. 𑀢𑀢𑁄𑀢𑀺 𑀧𑀭𑀺𑀤𑁂𑀯𑀢𑁄 𑀉𑀤𑁆𑀥𑀁. 𑀓𑀡𑁆𑀞 𑀲𑁄𑀲𑀸𑀤𑀺 𑀲𑀦𑁆𑀥𑀺 𑀩𑀦𑁆𑀥𑀘𑁆𑀙𑁂𑀤𑀦𑀸𑀤𑀺 𑀚𑀦𑀓 𑀥𑀸𑀢𑀼𑀓𑁆𑀔𑁄𑀪 𑀲𑀫𑀸𑀬𑁄𑀕𑀢𑁄 𑀓𑀸𑀬𑀲𑁆𑀲 𑀆𑀩𑀸𑀥𑀦𑀤𑀼𑀓𑁆𑀔𑀁 𑀤𑀼𑀓𑁆𑀔𑀁. 𑀬𑁂𑀲𑀼 𑀓𑁂𑀲𑀼𑀘𑀻𑀢𑀺 𑀢𑀺𑀲𑁆𑀲𑀲𑁆𑀲 𑀯𑀸 𑀨𑀼𑀲𑁆𑀲𑀲𑁆𑀲 𑀯𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀲𑀩𑁆𑀩𑀫𑁆𑀧𑀺 𑀘𑀓𑁆𑀔𑀼𑀭𑁄𑀕𑀸𑀤𑀺𑀤𑀼𑀓𑁆𑀔𑀁 𑀲𑀩𑁆𑀩𑀲𑀢𑁆𑀢𑀕𑀢𑀁 𑀏𑀯𑀁𑀧𑀓𑀸𑀭𑀫𑁂𑀯𑀸𑀢𑀺 𑀲𑀗𑁆𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄𑀢𑀺 𑀅𑀢𑁆𑀣𑁄.

𑀤𑀼𑀓𑁆𑀔𑀲𑀘𑁆𑀘𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀫𑀼𑀤𑀬𑀲𑀘𑁆𑀘𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁦𑁩. 𑀉𑀢𑁆𑀢𑀭𑀧𑀤𑀮𑁄𑀧𑀁 ¶ 𑀓𑀢𑁆𑀯𑀸 ‘‘𑀧𑀼𑀦𑀩𑁆𑀪𑀯𑀓𑀭𑀡𑀁 𑀧𑀼𑀦𑁄𑀩𑁆𑀪𑀯𑁄’’𑀢𑀺𑀆𑀳. ‘‘𑀫𑀦𑁄𑀲𑀫𑁆𑀨𑀲𑁆𑀲𑁄’’𑀢𑀺 𑀏𑀢𑁆𑀣 𑀫𑀦𑁄 𑀯𑀺𑀬 𑀘 𑀧𑀼𑀭𑀺𑀫𑀧𑀤𑀲𑁆𑀲 𑀑𑀓𑀸𑀭𑀦𑁆𑀢𑀢𑀸 𑀤𑀝𑁆𑀞𑀩𑁆𑀩𑀸. 𑀅𑀣 𑀯𑀸 𑀲𑀻𑀮𑀝𑁆𑀞𑁂𑀦 𑀇𑀓-𑀲𑀤𑁆𑀤𑁂𑀦 𑀕𑀫𑀺𑀬𑀢𑁆𑀣𑀢𑁆𑀢𑀸 𑀓𑀺𑀭𑀺𑀬𑀸𑀯𑀸𑀘𑀓𑀲𑁆𑀲 𑀲𑀤𑁆𑀤𑀲𑁆𑀲 𑀅𑀤𑀲𑁆𑀲𑀦𑀁 𑀤𑀝𑁆𑀞𑀩𑁆𑀩𑀁 𑀬𑀣𑀸 ‘‘𑀅𑀧𑀽𑀧𑀪𑀓𑁆𑀔𑀦𑀲𑀻𑀮𑁄 𑀆𑀧𑀽𑀧𑀺𑀓𑁄’’𑀢𑀺. ‘‘𑀢𑀤𑁆𑀥𑀺𑀢𑀸’’𑀇𑀢𑀺 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑀸 𑀯𑀺𑀘𑀺𑀢𑁆𑀢𑀢𑁆𑀢𑀸 𑀯𑀸 𑀢𑀤𑁆𑀥𑀺𑀢𑀸𑀦𑀁 𑀅𑀪𑀺𑀥𑀸𑀦𑀮𑀓𑁆𑀔𑀡𑀢𑁆𑀢𑀸 ¶ 𑀯𑀸 ‘‘𑀧𑀼𑀦𑀩𑁆𑀪𑀯𑀁 𑀤𑁂𑀢𑀻’’𑀢𑀺𑀆𑀤𑀻𑀲𑀼 𑀅𑀢𑁆𑀣𑁂𑀲𑀼 𑀧𑁄𑀦𑁄𑀩𑁆𑀪𑀯𑀺𑀓𑀲𑀤𑁆𑀤𑀲𑀺𑀤𑁆𑀥𑀺 𑀤𑀝𑁆𑀞𑀩𑁆𑀩𑀸. 𑀢𑀢𑁆𑀣 𑀓𑀫𑁆𑀫𑀲𑀳𑀚𑀸𑀢𑀸 𑀧𑀼𑀦𑀩𑁆𑀪𑀯𑀁 𑀤𑁂𑀢𑀺, 𑀓𑀫𑁆𑀫𑀲𑀳𑀸𑀬𑀪𑀽𑀢𑀸 𑀢𑀤𑀲𑀳𑀚𑀸𑀢𑀸 𑀧𑀼𑀦𑀩𑁆𑀪𑀯𑀸𑀬 𑀲𑀁𑀯𑀢𑁆𑀢𑀢𑀺, 𑀤𑀼𑀯𑀺𑀥𑀸𑀧𑀺 𑀧𑀼𑀦𑀧𑁆𑀧𑀼𑀦𑀁 𑀪𑀯𑁂 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀢𑁂𑀦𑁂𑀯𑀸𑀳 ‘‘𑀧𑀼𑀦𑀩𑁆𑀪𑀯𑀲𑁆𑀲 𑀤𑀸𑀬𑀺𑀓𑀸𑀧𑀻’’𑀢𑀺𑀆𑀤𑀺. 𑀧𑁄𑀦𑁄𑀩𑁆𑀪𑀯𑀺𑀓𑀸𑀬𑁂𑀯𑀸𑀢𑀺 𑀦𑀸𑀫𑀁 𑀮𑀪𑀢𑀻𑀢𑀺 𑀧𑀼𑀦𑀩𑁆𑀪𑀯𑀁 𑀤𑀸𑀬𑀺𑀓𑀸𑀧𑀺 𑀅𑀤𑀸𑀬𑀺𑀓𑀸𑀧𑀺 𑀧𑀼𑀦𑀩𑁆𑀪𑀯𑀁 𑀤𑁂𑀢𑀺𑀘𑁆𑀘𑁂𑀯 𑀧𑁄𑀦𑁄𑀩𑁆𑀪𑀯𑀺𑀓𑀸𑀢𑀺 𑀲𑀫𑀸𑀦𑀯𑀺𑀧𑀸𑀓𑀸𑀢𑀺 𑀦𑀸𑀫𑀁 𑀮𑀪𑀢𑀺 𑀲𑀫𑀸𑀦𑀲𑀪𑀸𑀯𑀢𑁆𑀢𑀸 𑀢𑀤𑀸𑀦𑀼𑀪𑀸𑀯𑀢𑁆𑀢𑀸 𑀘. 𑀏𑀯𑀁 𑀇𑀢𑀭𑁂𑀲𑀼 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀉𑀧𑀥𑀺𑀫𑁆𑀳𑀺 𑀬𑀣𑀸𑀦𑀺𑀩𑁆𑀩𑀢𑁆𑀢𑁂 𑀅𑀢𑁆𑀢𑀪𑀸𑀯𑁂 𑀯𑀺𑀧𑀘𑁆𑀘𑀦𑀓𑀫𑁆𑀫𑀁 𑀏𑀢𑀺𑀲𑁆𑀲𑀸𑀢𑀺 𑀉𑀧𑀥𑀺𑀯𑁂𑀧𑀓𑁆𑀓𑀸. 𑀦𑀦𑁆𑀤𑀦𑀝𑁆𑀞𑁂𑀦 𑀦𑀦𑁆𑀤𑀻, 𑀭𑀜𑁆𑀚𑀦𑀝𑁆𑀞𑁂𑀦 𑀭𑀸𑀕𑁄. 𑀬𑁄 𑀘 𑀦𑀦𑁆𑀤𑀺𑀭𑀸𑀕𑁄, 𑀬𑀸 𑀘 𑀢𑀡𑁆𑀳𑀸, 𑀉𑀪𑀬𑀫𑁂𑀢𑀁 𑀏𑀓𑀢𑁆𑀣𑀁, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀦𑁆𑀢𑀺 𑀢𑀡𑁆𑀳𑀸 ‘‘𑀦𑀦𑁆𑀤𑀺𑀭𑀸𑀕𑁂𑀦 𑀲𑀤𑁆𑀥𑀺𑀁 𑀅𑀢𑁆𑀣𑀢𑁄 𑀏𑀓𑀢𑁆𑀢𑀁 𑀕𑀢𑀸’’𑀢𑀺 𑀯𑀼𑀢𑁆𑀢𑀸. 𑀭𑀸𑀕𑀲𑀫𑁆𑀩𑀦𑁆𑀥𑁂𑀦 ‘‘𑀉𑀧𑁆𑀧𑀦𑁆𑀦𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀭𑀽𑀧𑀸𑀭𑀽𑀧𑀪𑀯𑀭𑀸𑀕𑁄 𑀯𑀺𑀲𑀼𑀁 𑀯𑀓𑁆𑀔𑀢𑀻𑀢𑀺 𑀓𑀸𑀫𑀪𑀯𑁂 𑀏𑀯 𑀪𑀯𑀧𑀢𑁆𑀣𑀦𑀸𑀉𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀺𑀬𑀭𑀽𑀧𑁂 𑀧𑀞𑀫𑀼𑀧𑁆𑀧𑀢𑁆𑀢𑀺𑀯𑀲𑁂𑀦 ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀸, 𑀧𑀼𑀦𑀧𑁆𑀧𑀼𑀦𑀁 𑀧𑀯𑀢𑁆𑀢𑀺𑀯𑀲𑁂𑀦 ‘‘𑀦𑀺𑀯𑀺𑀲𑀢𑀻’’𑀢𑀺, 𑀧𑀭𑀺𑀬𑀼𑀝𑁆𑀞𑀸𑀦𑀸𑀦𑀼𑀲𑀬𑀯𑀲𑁂𑀦 𑀯𑀸 𑀉𑀧𑁆𑀧𑀢𑁆𑀢𑀺𑀦𑀺𑀯𑁂𑀲𑀸 𑀬𑁄𑀚𑁂𑀢𑀩𑁆𑀩𑀸. 𑀲𑀫𑁆𑀧𑀢𑁆𑀢𑀺𑀬𑀦𑁆𑀢𑀺 𑀫𑀦𑀼𑀲𑁆𑀲𑀲𑁄𑀪𑀕𑁆𑀕𑁂 𑀤𑁂𑀯𑀢𑁆𑀢𑁂 𑀘. 𑀅𑀢𑁆𑀢𑀦𑁄 𑀘𑀓𑁆𑀔𑀼𑀦𑁆𑀢𑀺 𑀲𑀯𑀢𑁆𑀣𑀼𑀓𑀁 𑀘𑀓𑁆𑀔𑀼𑀫𑀸𑀳, 𑀲𑀧𑀲𑀸𑀤𑀁 𑀯𑀸 𑀫𑀁𑀲𑀧𑀺𑀡𑁆𑀟𑀁. 𑀯𑀺𑀧𑁆𑀧𑀲𑀦𑁆𑀦𑀧𑀜𑁆𑀘𑀧𑀲𑀸𑀤𑀦𑁆𑀢𑀺 𑀧𑀭𑀺𑀲𑀼𑀤𑁆𑀥𑀦𑀻𑀮𑀧𑀻𑀢𑀮𑁄𑀳𑀺𑀢𑀓𑀡𑁆𑀳𑀑𑀤𑀸𑀢𑀯𑀡𑁆𑀡𑀧𑀲𑀸𑀤𑀁. 𑀭𑀚𑀢𑀧𑀦𑀸𑀴𑀺𑀓𑀁 𑀯𑀺𑀬 𑀙𑀺𑀤𑁆𑀤𑀁 𑀅𑀩𑁆𑀪𑀦𑁆𑀢𑀭𑁂 𑀑𑀤𑀸𑀢𑀢𑁆𑀢𑀸. 𑀧𑀸𑀫𑀗𑁆𑀕𑀲𑀼𑀢𑁆𑀢𑀁 𑀯𑀺𑀬 𑀮𑀫𑁆𑀩𑀓𑀡𑁆𑀡𑀩𑀤𑁆𑀥𑀁. 𑀢𑀼𑀗𑁆𑀕𑀸 𑀉𑀘𑁆𑀘𑀸 𑀤𑀻𑀖𑀸 𑀦𑀸𑀲𑀺𑀓𑀸 𑀢𑀼𑀗𑁆𑀕𑀦𑀸𑀲𑀺𑀓𑀸, 𑀏𑀯𑀁 𑀮𑀤𑁆𑀥𑀯𑁄𑀳𑀸𑀭𑀁 𑀅𑀢𑁆𑀢𑀦𑁄 𑀖𑀸𑀦𑀁. ‘‘𑀮𑀤𑁆𑀥𑀯𑁄𑀳𑀸𑀭𑀸’’𑀢𑀺 𑀯𑀸 𑀧𑀸𑀞𑁄. 𑀢𑀲𑁆𑀫𑀺𑀁 𑀲𑀢𑀺 𑀢𑀼𑀗𑁆𑀕𑀸 𑀦𑀸𑀲𑀺𑀓𑀸 𑀬𑁂𑀲𑀁, 𑀢𑁂 𑀢𑀼𑀗𑁆𑀕𑀦𑀸𑀲𑀺𑀓𑀸. 𑀏𑀯𑀁 𑀮𑀤𑁆𑀥𑀯𑁄𑀳𑀸𑀭𑀸 𑀲𑀢𑁆𑀢𑀸 𑀅𑀢𑁆𑀢𑀦𑁄 𑀖𑀸𑀦𑀦𑁆𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀚𑀺𑀯𑁆𑀳𑀁…𑀧𑁂… 𑀫𑀜𑁆𑀜𑀦𑁆𑀢𑀺 𑀯𑀡𑁆𑀡𑀸 𑀲𑀡𑁆𑀞𑀸𑀦𑀢𑁄 𑀓𑀺𑀘𑁆𑀘𑀢𑁄 𑀘. 𑀫𑀦𑀁…𑀧𑁂… 𑀉𑀴𑀸𑀭𑀁 𑀫𑀜𑁆𑀜𑀦𑁆𑀢𑀺 𑀅𑀢𑀻𑀢𑀸𑀤𑀺𑀅𑀢𑁆𑀣𑀯𑀺𑀘𑀺𑀦𑀦𑀲𑀫𑀢𑁆𑀣𑀁. 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀸𑀦𑀻𑀢𑀺 𑀅𑀚𑁆𑀛𑀢𑁆𑀢𑀜𑁆𑀘 𑀲𑀭𑀻𑀭𑀕𑀦𑁆𑀥𑀸𑀤𑀻𑀦𑀺 ¶ 𑀩𑀳𑀺𑀤𑁆𑀥𑀸 𑀘 𑀯𑀺𑀮𑁂𑀧𑀦𑀕𑀦𑁆𑀥𑀸𑀤𑀻𑀦𑀺. 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀬𑀤𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀳𑁄𑀢𑀺, 𑀢𑀤𑀸 𑀏𑀢𑁆𑀣 𑀉𑀧𑁆𑀧𑀚𑁆𑀚𑀢𑀻𑀢𑀺 𑀲𑀸𑀫𑀜𑁆𑀜𑁂𑀦 𑀕𑀳𑀺𑀢𑀸 𑀉𑀧𑁆𑀧𑀸𑀤𑀓𑀺𑀭𑀺𑀬𑀸 𑀮𑀓𑁆𑀔𑀡𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀯𑀺𑀲𑀬𑀯𑀺𑀲𑀺𑀝𑁆𑀞𑀸 𑀮𑀓𑁆𑀔𑀺𑀢𑀩𑁆𑀩𑀪𑀸𑀯𑁂𑀦. 𑀦 𑀳𑀺 𑀲𑀸𑀫𑀜𑁆𑀜𑀯𑀺𑀲𑁂𑀲𑁂𑀳𑀺 𑀦𑀸𑀦𑀢𑁆𑀢𑀯𑁄𑀳𑀸𑀭𑁄 𑀦 𑀳𑁄𑀢𑀻𑀢𑀺. 𑀉𑀧𑁆𑀧𑀚𑁆𑀚𑀫𑀸𑀦𑀸𑀢𑀺 𑀯𑀸 𑀅𑀦𑀺𑀘𑁆𑀙𑀺𑀢𑁄 𑀉𑀧𑁆𑀧𑀸𑀤𑁄 𑀳𑁂𑀢𑀼𑀪𑀸𑀯𑁂𑀦 𑀯𑀼𑀢𑁆𑀢𑁄. 𑀉𑀧𑁆𑀧𑀚𑁆𑀚𑀢𑀻𑀢𑀺 𑀦𑀺𑀘𑁆𑀙𑀺𑀢𑁄 𑀨𑀮𑀪𑀸𑀯𑁂𑀦 ‘‘𑀬𑀤𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀳𑁄𑀢𑀺, 𑀏𑀢𑁆𑀣 𑀉𑀧𑁆𑀧𑀚𑁆𑀚𑀢𑀻’’𑀢𑀺. 𑀲𑁄 𑀳𑀺 𑀢𑁂𑀦 𑀉𑀧𑀬𑁄𑀚𑀺𑀢𑁄 𑀯𑀺𑀬 𑀳𑁄𑀢𑀺.

𑀲𑀫𑀼𑀤𑀬𑀲𑀘𑁆𑀘𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀦𑀺𑀭𑁄𑀥𑀲𑀘𑁆𑀘𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁦𑁪. 𑀅𑀦𑀽𑀳𑀢𑁂𑀢𑀺 ¶ 𑀅𑀦𑀼𑀤𑁆𑀥𑀢𑁂, 𑀅𑀧𑁆𑀧𑀳𑀻𑀦𑁂𑀢𑀺 𑀅𑀢𑁆𑀣𑁄.

𑀲𑀻𑀳𑁄 𑀯𑁂𑀥𑀓𑁂 𑀧𑀝𑀺𑀧𑀚𑁆𑀚𑀢𑀺, 𑀦 𑀉𑀲𑀼𑀫𑁆𑀳𑀺, 𑀲𑀼𑀯𑀸𑀦𑁄 𑀮𑁂𑀟𑁆𑀟𑀼𑀫𑁆𑀳𑀺 𑀧𑀝𑀺𑀧𑀚𑁆𑀚𑀢𑀺, 𑀦 𑀧𑀳𑀸𑀭𑀓𑁂. 𑀔𑀬𑀕𑀫𑀦𑀯𑀲𑁂𑀦 𑀯𑀺𑀭𑀚𑁆𑀚𑀢𑀺, 𑀅𑀧𑁆𑀧𑀯𑀢𑁆𑀢𑀺𑀕𑀫𑀦𑀯𑀲𑁂𑀦 𑀦𑀺𑀭𑀼𑀚𑁆𑀛𑀢𑀺. 𑀅𑀦𑀧𑁂𑀓𑁆𑀔𑀢𑀸𑀬 𑀘𑀚𑀦𑀯𑀲𑁂𑀦 𑀳𑀸𑀦𑀺𑀯𑀲𑁂𑀦 𑀘 𑀘𑀚𑀻𑀬𑀢𑀺, 𑀧𑀼𑀦 𑀬𑀣𑀸 𑀦 𑀧𑀯𑀢𑁆𑀢𑀢𑀺, 𑀢𑀣𑀸 𑀤𑀽𑀭𑀔𑀺𑀧𑀦𑀯𑀲𑁂𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀻𑀬𑀢𑀺, 𑀩𑀦𑁆𑀥𑀦𑀪𑀽𑀢𑀸𑀬 𑀫𑁄𑀘𑀦𑀯𑀲𑁂𑀦 𑀫𑀼𑀘𑁆𑀘𑀢𑀺, 𑀅𑀲𑀁𑀓𑀺𑀮𑁂𑀲𑀯𑀲𑁂𑀦 𑀦 𑀅𑀮𑁆𑀮𑀻𑀬𑀢𑀺. 𑀆𑀬𑀽𑀳𑀦𑀁 𑀲𑀫𑀼𑀤𑀬𑁄, 𑀢𑀧𑁆𑀧𑀝𑀺𑀧𑀓𑁆𑀔𑀯𑀲𑁂𑀦 𑀅𑀦𑀸𑀬𑀽𑀳𑀦𑀁.

𑀅𑀧𑀜𑁆𑀜𑀢𑁆𑀢𑀺𑀦𑁆𑀢𑀺 𑀅𑀧𑀜𑁆𑀜𑀸𑀧𑀦𑀁, ‘‘𑀢𑀺𑀢𑁆𑀢𑀅𑀮𑀸𑀩𑀼 𑀅𑀢𑁆𑀣𑀻’’𑀢𑀺 𑀯𑁄𑀳𑀸𑀭𑀸𑀪𑀸𑀯𑀁 𑀯𑀸. 𑀢𑀺𑀢𑁆𑀢𑀅𑀮𑀸𑀩𑀼𑀯𑀮𑁆𑀮𑀺𑀬𑀸 𑀅𑀧𑁆𑀧𑀯𑀢𑁆𑀢𑀺𑀁 𑀇𑀘𑁆𑀙𑀦𑁆𑀢𑁄 𑀧𑀼𑀭𑀺𑀲𑁄 𑀯𑀺𑀬 𑀫𑀕𑁆𑀕𑁄 𑀤𑀝𑁆𑀞𑀩𑁆𑀩𑁄, 𑀢𑀲𑁆𑀲 𑀢𑀲𑁆𑀲𑀸 𑀅𑀧𑁆𑀧𑀯𑀢𑁆𑀢𑀺𑀦𑀺𑀦𑁆𑀦𑀘𑀺𑀢𑁆𑀢𑀲𑁆𑀲 𑀫𑀽𑀮𑀘𑁆𑀙𑁂𑀤𑀦𑀁 𑀯𑀺𑀬 𑀫𑀕𑁆𑀕𑀲𑁆𑀲 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀲𑁆𑀲 𑀢𑀡𑁆𑀳𑀸𑀧𑀳𑀸𑀦𑀁. 𑀢𑀤𑀸𑀧𑁆𑀧𑀯𑀢𑁆𑀢𑀺 𑀯𑀺𑀬 𑀢𑀡𑁆𑀳𑀸𑀬 𑀅𑀧𑁆𑀧𑀯𑀢𑁆𑀢𑀺𑀪𑀽𑀢𑀁 𑀦𑀺𑀩𑁆𑀩𑀸𑀦𑀁 𑀤𑀝𑁆𑀞𑀩𑁆𑀩𑀁. 𑀤𑀼𑀢𑀺𑀬𑀽𑀧𑀫𑀸𑀬 𑀤𑀓𑁆𑀔𑀺𑀡𑀤𑁆𑀯𑀸𑀭𑀁 𑀯𑀺𑀬 𑀦𑀺𑀩𑁆𑀩𑀸𑀦𑀁, 𑀘𑁄𑀭𑀖𑀸𑀢𑀓𑀸 𑀯𑀺𑀬 𑀫𑀕𑁆𑀕𑁄 𑀤𑀝𑁆𑀞𑀩𑁆𑀩𑁄, 𑀧𑀼𑀭𑀺𑀫𑀸 𑀯𑀸 𑀉𑀧𑀫𑀸 𑀫𑀕𑁆𑀕𑁂𑀦 𑀦𑀺𑀭𑀼𑀤𑁆𑀥𑀸𑀬 𑀧𑀺𑀬𑀭𑀽𑀧𑀲𑀸𑀢𑀭𑀽𑀧𑁂𑀲𑀼 𑀦𑀺𑀭𑀼𑀤𑁆𑀥𑀸𑀢𑀺 𑀯𑀢𑁆𑀢𑀩𑁆𑀩𑀢𑀸𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸, 𑀧𑀘𑁆𑀙𑀺𑀫𑀸 𑀦𑀺𑀩𑁆𑀩𑀸𑀦𑀁 𑀆𑀕𑀫𑁆𑀫 𑀦𑀺𑀭𑀼𑀤𑁆𑀥𑀸𑀬𑀧𑀺.

𑀦𑀺𑀭𑁄𑀥𑀲𑀘𑁆𑀘𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀫𑀕𑁆𑀕𑀲𑀘𑁆𑀘𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁦𑁫. 𑀅𑀜𑁆𑀜𑀫𑀕𑁆𑀕𑀧𑀝𑀺𑀓𑁆𑀔𑁂𑀧𑀦𑀢𑁆𑀣𑀦𑁆𑀢𑀺 ¶ 𑀢𑀺𑀢𑁆𑀣𑀺𑀬𑁂𑀳𑀺 𑀓𑀧𑁆𑀧𑀺𑀢𑀲𑁆𑀲 𑀫𑀕𑁆𑀕𑀲𑁆𑀲 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀪𑀸𑀯𑀁 𑀧𑀝𑀺𑀓𑁆𑀔𑁂𑀧𑁂𑀢𑀼𑀦𑁆𑀢𑀺 𑀅𑀢𑁆𑀣𑁄, 𑀅𑀜𑁆𑀜𑀲𑁆𑀲 𑀯𑀸 𑀫𑀕𑁆𑀕𑀪𑀸𑀯𑀧𑀝𑀺𑀓𑁆𑀔𑁂𑀧𑁄 𑀅𑀜𑁆𑀜𑀫𑀕𑁆𑀕𑀧𑀝𑀺𑀓𑁆𑀔𑁂𑀧𑁄. 𑀧𑀼𑀕𑁆𑀕𑀮𑀲𑁆𑀲 𑀅𑀭𑀺𑀬𑀪𑀸𑀯𑀓𑀭𑀢𑁆𑀢𑀸 𑀅𑀭𑀺𑀬𑀁 𑀓𑀭𑁄𑀢𑀻𑀢𑀺 𑀅𑀭𑀺𑀬𑁄, 𑀅𑀭𑀺𑀬𑀨𑀮𑀧𑀝𑀺𑀮𑀸𑀪𑀓𑀭𑀢𑁆𑀢𑀸 𑀅𑀭𑀺𑀬𑀁 𑀮𑀪𑀸𑀧𑁂𑀢𑀺 𑀚𑀦𑁂𑀢𑀻𑀢𑀺 𑀅𑀭𑀺𑀬𑁄. 𑀅𑀢𑁆𑀢𑀦𑁄 𑀓𑀺𑀘𑁆𑀘𑀯𑀲𑁂𑀦 𑀨𑀮𑀯𑀲𑁂𑀦 𑀘 𑀅𑀭𑀺𑀬𑀦𑀸𑀫𑀮𑀸𑀪𑁄 𑀏𑀯 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀅𑀝𑁆𑀞 𑀅𑀗𑁆𑀕𑀸𑀦𑀺 𑀅𑀲𑁆𑀲𑀸𑀢𑀺 𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑀁 𑀅𑀓𑀢𑁆𑀯𑀸 ‘‘𑀅𑀝𑁆𑀞𑀗𑁆𑀕𑀸𑀦𑀺 𑀅𑀲𑁆𑀲 𑀲𑀦𑁆𑀢𑀻𑀢𑀺 𑀅𑀝𑁆𑀞𑀗𑁆𑀕𑀺𑀓𑁄’’𑀢𑀺 𑀧𑀤𑀲𑀺𑀤𑁆𑀥𑀺 𑀤𑀝𑁆𑀞𑀩𑁆𑀩𑀸.

𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀸 ¶ 𑀯𑀸𑀘𑀸 𑀚𑀦𑀁 𑀲𑀗𑁆𑀕𑀡𑁆𑀳𑀸𑀢𑀻𑀢𑀺 𑀢𑀩𑁆𑀩𑀺𑀧𑀓𑁆𑀔𑀯𑀺𑀭𑀢𑀺𑀲𑀪𑀸𑀯𑀸 𑀲𑀫𑁆𑀫𑀸𑀯𑀸𑀘𑀸 𑀪𑁂𑀤𑀓𑀭𑀫𑀺𑀘𑁆𑀙𑀸𑀯𑀸𑀘𑀸𑀧𑀳𑀸𑀦𑁂𑀦 𑀚𑀦𑁂 𑀲𑀫𑁆𑀧𑀬𑀼𑀢𑁆𑀢𑁂 𑀘 𑀧𑀭𑀺𑀕𑁆𑀕𑀡𑁆𑀳𑀦𑀓𑀺𑀘𑁆𑀘𑀯𑀢𑀻 𑀳𑁄𑀢𑀻𑀢𑀺 ‘‘𑀧𑀭𑀺𑀕𑁆𑀕𑀳𑀮𑀓𑁆𑀔𑀡𑀸’’𑀢𑀺 𑀯𑀼𑀢𑁆𑀢𑀸. 𑀬𑀣𑀸 𑀘𑀻𑀯𑀭𑀓𑀫𑁆𑀫𑀸𑀤𑀺𑀓𑁄 𑀓𑀫𑁆𑀫𑀦𑁆𑀢𑁄 𑀏𑀓𑀁 𑀓𑀸𑀢𑀩𑁆𑀩𑀁 𑀲𑀫𑀼𑀝𑁆𑀞𑀸𑀧𑁂𑀢𑀺 𑀦𑀺𑀧𑁆𑀨𑀸𑀤𑁂𑀢𑀺, 𑀢𑀁𑀢𑀁𑀓𑀺𑀭𑀺𑀬𑀸𑀦𑀺𑀧𑁆𑀨𑀸𑀤𑀓𑁄 𑀯𑀸 𑀘𑁂𑀢𑀦𑀸𑀲𑀗𑁆𑀔𑀸𑀢𑁄 𑀓𑀫𑁆𑀫𑀦𑁆𑀢𑁄 𑀳𑀢𑁆𑀣𑀧𑀸𑀤𑀘𑀮𑀦𑀸𑀤𑀺𑀓𑀁 𑀓𑀺𑀭𑀺𑀬𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀏𑀯𑀁 𑀲𑀸𑀯𑀚𑁆𑀚𑀓𑀢𑁆𑀢𑀩𑁆𑀩𑀓𑀺𑀭𑀺𑀬𑀸𑀲𑀫𑀼𑀝𑁆𑀞𑀸𑀧𑀓𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀧𑁆𑀧𑀳𑀸𑀦𑁂𑀦 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀦𑀺𑀭𑀯𑀚𑁆𑀚𑀲𑀫𑀼𑀝𑁆𑀞𑀸𑀧𑀦𑀓𑀺𑀘𑁆𑀘𑀯𑀸 𑀳𑁄𑀢𑀺, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀘 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑁄 𑀏𑀯 𑀧𑀯𑀢𑁆𑀢𑀢𑀻𑀢𑀺 ‘‘𑀲𑀫𑀼𑀝𑁆𑀞𑀸𑀧𑀦𑀮𑀓𑁆𑀔𑀡𑁄’’𑀢𑀺 𑀯𑀼𑀢𑁆𑀢𑁄. 𑀓𑀸𑀬𑀯𑀸𑀘𑀸𑀦𑀁 𑀔𑀦𑁆𑀥𑀲𑀦𑁆𑀢𑀸𑀦𑀲𑁆𑀲 𑀘 𑀲𑀁𑀓𑀺𑀮𑁂𑀲𑀪𑀽𑀢𑀫𑀺𑀘𑁆𑀙𑀸𑀆𑀚𑀻𑀯𑀧𑁆𑀧𑀳𑀸𑀦𑁂𑀦 𑀲𑀫𑁆𑀫𑀸𑀆𑀚𑀻𑀯𑁄 ‘‘𑀯𑁄𑀤𑀸𑀧𑀦𑀮𑀓𑁆𑀔𑀡𑁄’’𑀢𑀺 𑀯𑀼𑀢𑁆𑀢𑁄.

𑀅𑀢𑁆𑀢𑀦𑁄 𑀧𑀘𑁆𑀘𑀦𑀻𑀓𑀓𑀺𑀮𑁂𑀲𑀸 𑀤𑀺𑀝𑁆𑀞𑁂𑀓𑀝𑁆𑀞𑀸 𑀅𑀯𑀺𑀚𑁆𑀚𑀸𑀤𑀬𑁄. 𑀧𑀲𑁆𑀲𑀢𑀻𑀢𑀺 𑀧𑀓𑀸𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯 𑀳𑀺 𑀅𑀗𑁆𑀕𑁂𑀦 𑀢𑀢𑁆𑀣 𑀧𑀘𑁆𑀘𑀯𑁂𑀓𑁆𑀔𑀡𑀸 𑀧𑀯𑀢𑁆𑀢𑀢𑀻𑀢𑀺. 𑀢𑀣𑁂𑀯𑀸𑀢𑀺 𑀅𑀢𑁆𑀢𑀦𑁄 𑀧𑀘𑁆𑀘𑀦𑀻𑀓𑀓𑀺𑀮𑁂𑀲𑁂𑀳𑀺 𑀲𑀤𑁆𑀥𑀺𑀦𑁆𑀢𑀺 𑀅𑀢𑁆𑀣𑁄.

𑀓𑀺𑀘𑁆𑀘𑀢𑁄𑀢𑀺 𑀧𑀼𑀩𑁆𑀩𑀪𑀸𑀕𑁂𑀳𑀺 𑀤𑀼𑀓𑁆𑀔𑀸𑀤𑀺𑀜𑀸𑀡𑁂𑀳𑀺 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀲𑁆𑀲 𑀇𑀥 𑀦𑀺𑀧𑁆𑀨𑀢𑁆𑀢𑀺𑀢𑁄, 𑀇𑀫𑀲𑁆𑀲𑁂𑀯 𑀯𑀸 𑀜𑀸𑀡𑀲𑁆𑀲 𑀤𑀼𑀓𑁆𑀔𑀸𑀤𑀺𑀧𑁆𑀧𑀓𑀸𑀲𑀦𑀓𑀺𑀘𑁆𑀘𑀢𑁄. 𑀢𑀻𑀡𑀺 𑀦𑀸𑀫𑀸𑀦𑀺 𑀮𑀪𑀢𑀺 𑀓𑀸𑀫𑀲𑀗𑁆𑀓𑀧𑁆𑀧𑀸𑀤𑀺𑀧𑁆𑀧𑀳𑀸𑀦𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀢𑁄. 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂 (𑀯𑀺𑀪. 𑁭𑁦𑁩 𑀆𑀤𑀬𑁄) ‘‘𑀯𑀺𑀭𑀢𑀺𑀘𑁂𑀢𑀦𑀸 𑀲𑀩𑁆𑀩𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀘 𑀲𑀺𑀓𑁆𑀔𑀸𑀧𑀤𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀢𑀺 𑀢𑀢𑁆𑀣 𑀧𑀥𑀸𑀦𑀸𑀦𑀁 𑀯𑀺𑀭𑀢𑀺𑀘𑁂𑀢𑀦𑀸𑀦𑀁 𑀯𑀲𑁂𑀦 ‘‘𑀯𑀺𑀭𑀢𑀺𑀬𑁄𑀧𑀺 𑀳𑁄𑀦𑁆𑀢𑀺 𑀘𑁂𑀢𑀦𑀸𑀬𑁄𑀧𑀻’’𑀢𑀺 𑀆𑀳. 𑀫𑀼𑀲𑀸𑀯𑀸𑀤𑀸𑀤𑀻𑀳𑀺 𑀯𑀺𑀭𑀫𑀡𑀓𑀸𑀮𑁂 𑀯𑀸 𑀯𑀺𑀭𑀢𑀺𑀬𑁄 𑀲𑀼𑀪𑀸𑀲𑀺𑀢𑀸𑀤𑀺𑀯𑀸𑀘𑀸𑀪𑀸𑀲𑀦𑀸𑀤𑀺𑀓𑀸𑀮𑁂 𑀘 𑀘𑁂𑀢𑀦𑀸𑀬𑁄 𑀬𑁄𑀚𑁂𑀢𑀩𑁆𑀩𑀸, 𑀫𑀕𑁆𑀕𑀓𑁆𑀔𑀡𑁂 𑀯𑀺𑀭𑀢𑀺𑀬𑁄𑀯 ¶ 𑀘𑁂𑀢𑀦𑀸𑀦𑀁 𑀅𑀫𑀕𑁆𑀕𑀗𑁆𑀕𑀢𑁆𑀢𑀸 𑀏𑀓𑀲𑁆𑀲 𑀜𑀸𑀡𑀲𑁆𑀲 𑀤𑀼𑀓𑁆𑀔𑀸𑀤𑀺𑀜𑀸𑀡𑀢𑀸 𑀯𑀺𑀬 𑀏𑀓𑀸𑀬 𑀯𑀺𑀭𑀢𑀺𑀬𑀸 𑀫𑀼𑀲𑀸𑀯𑀸𑀤𑀸𑀤𑀺𑀯𑀺𑀭𑀢𑀺𑀪𑀸𑀯𑁄 𑀯𑀺𑀬 𑀘 𑀏𑀓𑀸𑀬 𑀘𑁂𑀢𑀦𑀸𑀬 𑀲𑀫𑁆𑀫𑀸𑀯𑀸𑀘𑀸𑀤𑀺𑀓𑀺𑀘𑁆𑀘𑀢𑁆𑀢𑀬𑀲𑀸𑀥𑀦𑀲𑀪𑀸𑀯𑀸𑀪𑀸𑀯𑀸 𑀲𑀫𑁆𑀫𑀸𑀯𑀸𑀘𑀸𑀤𑀺𑀪𑀸𑀯𑀸𑀲𑀺𑀤𑁆𑀥𑀺𑀢𑁄, 𑀢𑀁𑀲𑀺𑀤𑁆𑀥𑀺𑀬𑀜𑁆𑀘 𑀅𑀗𑁆𑀕𑀢𑁆𑀢𑀬𑀢𑁆𑀢𑀸𑀲𑀺𑀤𑁆𑀥𑀺𑀢𑁄 𑀘.

𑀧𑀼𑀩𑁆𑀩𑀪𑀸𑀕𑁂𑀧𑀺 𑀫𑀕𑁆𑀕𑀓𑁆𑀔𑀡𑁂𑀧𑀺 𑀲𑀫𑁆𑀫𑀸𑀲𑀫𑀸𑀥𑀺 𑀏𑀯𑀸𑀢𑀺 𑀬𑀤𑀺𑀧𑀺 𑀲𑀫𑀸𑀥𑀺𑀉𑀧𑀓𑀸𑀭𑀓𑀸𑀦𑀁 𑀅𑀪𑀺𑀦𑀺𑀭𑁄𑀧𑀦𑀸𑀦𑀼𑀫𑀚𑁆𑀚𑀦𑀲𑀫𑁆𑀧𑀺𑀬𑀸𑀬𑀦𑀩𑁆𑀭𑀽𑀳𑀦𑀲𑀦𑁆𑀢𑀲𑀼𑀔𑀸𑀦𑀁 𑀯𑀺𑀢𑀓𑁆𑀓𑀸𑀤𑀻𑀦𑀁 𑀯𑀲𑁂𑀦 𑀘𑀢𑀽𑀳𑀺 𑀛𑀸𑀦𑁂𑀳𑀺 𑀲𑀫𑁆𑀫𑀸𑀲𑀫𑀸𑀥𑀺 𑀯𑀺𑀪𑀢𑁆𑀢𑁄, 𑀢𑀣𑀸𑀧𑀺 𑀯𑀸𑀬𑀸𑀫𑁄 𑀯𑀺𑀬 𑀅𑀦𑀼𑀧𑁆𑀧𑀦𑁆𑀦𑀸𑀓𑀼𑀲𑀮𑀸𑀦𑀼𑀧𑁆𑀧𑀸𑀤𑀦𑀸𑀤𑀺𑀘𑀢𑀼𑀯𑀸𑀬𑀸𑀫𑀓𑀺𑀘𑁆𑀘𑀁, 𑀲𑀢𑀺 𑀯𑀺𑀬 𑀘 𑀅𑀲𑀼𑀪𑀸𑀲𑀼𑀔𑀸𑀦𑀺𑀘𑁆𑀘𑀸𑀦𑀢𑁆𑀢𑁂𑀲𑀼 𑀓𑀸𑀬𑀸𑀤𑀻𑀲𑀼 𑀲𑀼𑀪𑀸𑀤𑀺𑀲𑀜𑁆𑀜𑀸𑀧𑀳𑀸𑀦𑀘𑀢𑀼𑀲𑀢𑀺𑀓𑀺𑀘𑁆𑀘𑀁, 𑀏𑀓𑁄 𑀲𑀫𑀸𑀥𑀺 𑀘𑀢𑀼𑀓𑁆𑀓𑀚𑁆𑀛𑀸𑀦𑀲𑀫𑀸𑀥𑀺𑀓𑀺𑀘𑁆𑀘𑀁 𑀦 𑀲𑀸𑀥𑁂𑀢𑀻𑀢𑀺 𑀧𑀼𑀩𑁆𑀩𑀪𑀸𑀕𑁂𑀧𑀺 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺𑀘𑀺𑀢𑁆𑀢𑁂 𑀛𑀸𑀦𑀲𑀫𑀸𑀥𑀺 ¶ 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺 𑀏𑀯 𑀫𑀕𑁆𑀕𑀓𑁆𑀔𑀡𑁂𑀧𑀺, 𑀢𑀣𑀸 𑀧𑀼𑀩𑁆𑀩𑀪𑀸𑀕𑁂𑀧𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺𑀘𑀺𑀢𑁆𑀢𑁂 𑀛𑀸𑀦𑀲𑀫𑀸𑀥𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺 𑀏𑀯 𑀫𑀕𑁆𑀕𑀓𑁆𑀔𑀡𑁂𑀧𑀻𑀢𑀺 𑀅𑀢𑁆𑀣𑁄.

𑀯𑀘𑀻𑀪𑁂𑀤𑀲𑁆𑀲 𑀉𑀧𑀓𑀸𑀭𑀓𑁄 𑀯𑀺𑀢𑀓𑁆𑀓𑁄 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀯𑀘𑀻𑀪𑁂𑀤𑀦𑀺𑀯𑀢𑁆𑀢𑀦𑀧𑀯𑀢𑁆𑀢𑀦𑀓𑀭𑀸𑀬 𑀲𑀫𑁆𑀫𑀸𑀯𑀸𑀘𑀸𑀬𑀧𑀺 𑀉𑀧𑀓𑀸𑀭𑀓𑁄 𑀏𑀯𑀸𑀢𑀺 ‘‘𑀲𑁆𑀯𑀸𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀯𑀘𑀻𑀪𑁂𑀤𑀦𑀺𑀬𑀸𑀫𑀺𑀓𑀸 𑀯𑀸𑀘𑀸 𑀓𑀸𑀬𑀺𑀓𑀓𑀺𑀭𑀺𑀬𑀸𑀦𑀺𑀬𑀸𑀫𑀓𑀲𑁆𑀲 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑁆𑀲 𑀉𑀧𑀓𑀸𑀭𑀺𑀓𑀸. 𑀇𑀤𑀁 𑀯𑀻𑀭𑀺𑀬𑀦𑁆𑀢𑀺 𑀘𑀢𑀼𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀁. 𑀕𑀢𑀺𑀬𑁄𑀢𑀺 𑀦𑀺𑀧𑁆𑀨𑀢𑁆𑀢𑀺𑀬𑁄, 𑀓𑀺𑀘𑁆𑀘𑀸𑀤𑀺𑀲𑀪𑀸𑀯𑁂 𑀯𑀸. 𑀲𑀫𑀦𑁆𑀯𑁂𑀲𑀺𑀢𑁆𑀯𑀸𑀢𑀺 𑀉𑀧𑀥𑀸𑀭𑁂𑀢𑁆𑀯𑀸.

𑀧𑀼𑀭𑀺𑀫𑀸𑀦𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀝𑁆𑀞𑀁 𑀓𑀦𑁆𑀢𑀦𑁆𑀢𑀺 𑀦𑀺𑀭𑁄𑀥𑀫𑀕𑁆𑀕𑁂𑀲𑀼 𑀦𑀺𑀦𑁆𑀦𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀦 𑀅𑀪𑀺𑀦𑀦𑁆𑀤𑀦𑀁, 𑀢𑀦𑁆𑀦𑀺𑀦𑁆𑀦𑀪𑀸𑀯𑁄𑀬𑁂𑀯 𑀘 𑀢𑀢𑁆𑀣 𑀓𑀫𑁆𑀫𑀓𑀭𑀡𑀁 𑀤𑀝𑁆𑀞𑀩𑁆𑀩𑀁.

𑀓𑀺𑀘𑁆𑀘𑀢𑁄𑀢𑀺 𑀧𑀭𑀺𑀜𑁆𑀜𑀸𑀤𑀺𑀢𑁄. 𑀆𑀭𑀫𑁆𑀫𑀡𑀧𑀝𑀺𑀯𑁂𑀥𑁄𑀢𑀺 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀝𑀺𑀯𑁂𑀥𑀫𑀸𑀳. 𑀲𑀩𑁆𑀩𑀫𑁆𑀧𑀺 𑀧𑀝𑀺𑀯𑁂𑀥𑀜𑀸𑀡𑀁 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀉𑀕𑁆𑀕𑀳𑀸𑀤𑀺𑀧𑀝𑀺𑀯𑁂𑀥𑁄 𑀘 𑀧𑀝𑀺𑀯𑁂𑀥𑁄𑀯, 𑀦 𑀘 𑀲𑁄 𑀮𑁄𑀓𑀼𑀢𑁆𑀢𑀭𑁄𑀢𑀺? 𑀦, 𑀓𑁂𑀯𑀮𑁂𑀦 𑀧𑀝𑀺𑀯𑁂𑀥-𑀲𑀤𑁆𑀤𑁂𑀦 𑀉𑀕𑁆𑀕𑀳𑀸𑀤𑀺𑀧𑀝𑀺𑀯𑁂𑀥𑀸𑀦𑀁 𑀅𑀯𑀘𑀦𑀻𑀬𑀢𑁆𑀢𑀸, 𑀧𑀝𑀺𑀯𑁂𑀥𑀦𑀺𑀫𑀺𑀢𑁆𑀢𑀢𑁆𑀢𑀸 𑀯𑀸 𑀉𑀕𑁆𑀕𑀳𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀁 𑀤𑀼𑀓𑁆𑀔𑀸𑀤𑀻𑀲𑀼 𑀧𑀼𑀩𑁆𑀩𑀪𑀸𑀕𑁂 𑀜𑀸𑀡𑀁 ‘‘𑀧𑀝𑀺𑀯𑁂𑀥𑁄’’𑀢𑀺 𑀯𑀼𑀢𑁆𑀢𑀁, 𑀦 𑀧𑀝𑀺𑀯𑁂𑀥𑀢𑁆𑀢𑀸, 𑀧𑀝𑀺𑀯𑁂𑀥𑀪𑀽𑀢𑀫𑁂𑀯 𑀧𑀦 𑀜𑀸𑀡𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀩𑁆𑀩𑀫𑁆𑀧𑀺 𑀧𑀝𑀺𑀯𑁂𑀥𑀜𑀸𑀡𑀁 𑀮𑁄𑀓𑀼𑀢𑁆𑀢𑀭’’𑀦𑁆𑀢𑀺. 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀜𑀸𑀡𑀸𑀦𑀺𑀧𑀺 𑀲𑀯𑀦𑀜𑀸𑀡𑁂 𑀏𑀯 𑀅𑀯𑀭𑁄𑀥𑀁 𑀕𑀘𑁆𑀙𑀦𑁆𑀢𑀻𑀢𑀺 ‘‘𑀲𑀯𑀦𑀥𑀸𑀭𑀡𑀲𑀫𑁆𑀫𑀲𑀦𑀜𑀸𑀡𑀁 𑀮𑁄𑀓𑀺𑀬’’𑀦𑁆𑀢𑀺 𑀢𑀺𑀯𑀺𑀥𑀫𑁂𑀯 𑀜𑀸𑀡𑀫𑀸𑀳. 𑀉𑀕𑁆𑀕𑀳𑀸𑀤𑀻𑀳𑀺 𑀲𑀘𑁆𑀘𑀧𑀭𑀺𑀕𑁆𑀕𑀡𑁆𑀳𑀦𑀁 𑀧𑀭𑀺𑀕𑁆𑀕𑀳𑁄.

𑀧𑀬𑁄𑀕𑁄𑀢𑀺 ¶ 𑀓𑀺𑀭𑀺𑀬𑀸, 𑀯𑀸𑀬𑀸𑀫𑁄 𑀯𑀸. 𑀢𑀲𑁆𑀲 𑀫𑀳𑀦𑁆𑀢𑀢𑀭𑀲𑁆𑀲 𑀇𑀘𑁆𑀙𑀺𑀢𑀩𑁆𑀩𑀢𑀁 𑀤𑀼𑀓𑁆𑀓𑀭𑀢𑀭𑀢𑀜𑁆𑀘 𑀉𑀧𑀫𑀸𑀳𑀺 𑀤𑀲𑁆𑀲𑁂𑀢𑀺 ‘‘𑀪𑀯𑀕𑁆𑀕𑀕𑀳𑀡𑀢𑁆𑀣’’𑀦𑁆𑀢𑀺𑀆𑀤𑀺𑀦𑀸.

𑀧𑀤𑀖𑀸𑀢𑀦𑁆𑀢𑀺 𑀏𑀢𑁆𑀣 𑀕𑀢𑀫𑀕𑁆𑀕𑁄 ‘‘𑀧𑀤’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑁂𑀦 𑀘𑀼𑀧𑀸𑀬𑁂𑀦 𑀓𑀸𑀭𑀡𑁂𑀦 𑀓𑀸𑀫𑀯𑀺𑀢𑀓𑁆𑀓𑁄 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀢𑀲𑁆𑀲 𑀕𑀢𑀫𑀕𑁆𑀕𑁄𑀢𑀺 𑀢𑀲𑁆𑀲 𑀖𑀸𑀢𑁄 𑀧𑀤𑀖𑀸𑀢𑁄. 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸𑀢𑀺 𑀉𑀤𑁆𑀥𑀁 𑀉𑀤𑁆𑀥𑀁 𑀲𑀦𑁆𑀢𑀺𑀯𑀺𑀲𑁂𑀲𑀬𑀼𑀢𑁆𑀢𑀁 𑀓𑀢𑁆𑀯𑀸, 𑀯𑀟𑁆𑀠𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀧𑀸𑀴𑀺𑀬𑀁 𑀯𑀺𑀪𑀢𑁆𑀢𑁂𑀲𑀽𑀢𑀺 𑀓𑀢𑀭𑀧𑀸𑀴𑀺𑀬𑀁? 𑀥𑀫𑁆𑀫𑀲𑀗𑁆𑀕𑀳𑁂 𑀢𑀸𑀯 𑀅𑀝𑁆𑀞 𑀓𑀲𑀺𑀡𑀸𑀦𑀺 𑀤𑀲 𑀅𑀲𑀼𑀪𑀸 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀸 𑀘𑀢𑁆𑀢𑀸𑀭𑀺 𑀆𑀭𑀼𑀧𑁆𑀧𑀸𑀦𑀺 𑀯𑀺𑀪𑀢𑁆𑀢𑀸𑀦𑀺, 𑀆𑀕𑀫𑁂𑀲𑀼 𑀤𑀲 𑀅𑀦𑀼𑀲𑁆𑀲𑀢𑀺𑀬𑁄 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀸 ¶ 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀦𑁆𑀢𑀺 𑀇𑀫𑀸𑀦𑀺 𑀘𑀸𑀢𑀺 𑀢𑀢𑁆𑀣 𑀢𑀢𑁆𑀣 𑀯𑀺𑀪𑀢𑁆𑀢𑀁. 𑀇𑀫𑁂𑀲𑀼 𑀢𑀻𑀲𑀽𑀢𑀺 𑀓𑀸𑀫𑀸𑀤𑀻𑀲𑀼 𑀢𑀻𑀲𑀼 𑀞𑀸𑀦𑁂𑀲𑀼.

𑀫𑀺𑀘𑁆𑀙𑀸𑀯𑀸𑀘𑀸𑀲𑀗𑁆𑀔𑀸𑀢𑀸𑀬𑀸𑀢𑀺 𑀏𑀢𑁂𑀦 𑀏𑀓𑀸𑀬 𑀘𑁂𑀢𑀦𑀸𑀬 𑀧𑀳𑀸𑀢𑀩𑁆𑀩𑀏𑀓𑀢𑁆𑀢𑀁 𑀤𑀲𑁆𑀲𑁂𑀢𑀺. 𑀇𑀥 𑀅𑀭𑀺𑀬𑀲𑀸𑀯𑀓𑁄 𑀲𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀓𑁄 𑀲𑁂𑀓𑁆𑀔𑁄. 𑀓𑀸𑀬𑀤𑁆𑀯𑀸𑀭𑀯𑀻𑀢𑀺𑀓𑁆𑀓𑀫𑀸𑀢𑀺 𑀆𑀚𑀻𑀯𑀳𑁂𑀢𑀼𑀓𑀢𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀢𑁄 𑀯𑀺𑀲𑀼𑀁 𑀯𑀺𑀲𑀼𑀁 𑀯𑀺𑀭𑀫𑀡𑀁 𑀬𑁄𑀚𑁂𑀢𑀩𑁆𑀩𑀁.

𑀅𑀬𑀁 𑀧𑀦𑀲𑁆𑀲𑀸𑀢𑀺 𑀫𑀕𑁆𑀕𑀪𑀸𑀯𑁂𑀦 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀏𑀓𑀢𑁆𑀢𑁂𑀦 𑀕𑀳𑁂𑀢𑁆𑀯𑀸 𑀅𑀲𑁆𑀲 𑀫𑀕𑁆𑀕𑀲𑁆𑀲 𑀅𑀬𑀁 𑀛𑀸𑀦𑀯𑀲𑁂𑀦 𑀲𑀩𑁆𑀩𑀲𑀤𑀺𑀲𑀲𑀩𑁆𑀩𑀸𑀲𑀤𑀺𑀲𑀏𑀓𑀘𑁆𑀘𑀲𑀤𑀺𑀲𑀢𑀸 𑀯𑀺𑀲𑁂𑀲𑁄. 𑀧𑀸𑀤𑀓𑀚𑁆𑀛𑀸𑀦𑀦𑀺𑀬𑀸𑀫𑁂𑀦 𑀳𑁄𑀢𑀻𑀢𑀺 𑀇𑀥 𑀧𑀸𑀤𑀓𑀚𑁆𑀛𑀸𑀦𑀦𑀺𑀬𑀸𑀫𑀁 𑀥𑀼𑀭𑀁 𑀓𑀢𑁆𑀯𑀸 𑀆𑀳, 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀧𑀦 𑀯𑀺𑀧𑀲𑁆𑀲𑀦𑀸𑀦𑀺𑀬𑀸𑀫𑀁 𑀢𑀢𑁆𑀣 𑀲𑀩𑁆𑀩𑀯𑀸𑀤𑀸𑀯𑀺𑀭𑁄𑀥𑀢𑁄, 𑀇𑀥 𑀧𑀦 𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀯𑀸𑀤𑀦𑀺𑀯𑀢𑁆𑀢𑀦𑀢𑁄 𑀧𑀸𑀤𑀓𑀚𑁆𑀛𑀸𑀦𑀦𑀺𑀬𑀸𑀫𑀁. 𑀯𑀺𑀧𑀲𑁆𑀲𑀦𑀸𑀦𑀺𑀬𑀸𑀫𑁄 𑀧𑀦 𑀲𑀸𑀥𑀸𑀭𑀡𑀢𑁆𑀢𑀸 𑀇𑀥𑀸𑀧𑀺 𑀦 𑀧𑀝𑀺𑀓𑁆𑀔𑀺𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀅𑀜𑁆𑀜𑁂 𑀘𑀸𑀘𑀭𑀺𑀬𑀯𑀸𑀤𑀸 𑀯𑀓𑁆𑀔𑀫𑀸𑀦𑀸 𑀯𑀺𑀪𑀚𑀺𑀢𑀩𑁆𑀩𑀸𑀢𑀺 𑀬𑀣𑀸𑀯𑀼𑀢𑁆𑀢𑀫𑁂𑀯 𑀢𑀸𑀯 𑀧𑀸𑀤𑀓𑀚𑁆𑀛𑀸𑀦𑀦𑀺𑀬𑀸𑀫𑀁 𑀯𑀺𑀪𑀚𑀦𑁆𑀢𑁄 𑀆𑀳 ‘‘𑀧𑀸𑀤𑀓𑀚𑁆𑀛𑀸𑀦𑀦𑀺𑀬𑀸𑀫𑁂𑀦 𑀢𑀸𑀯𑀸’’𑀢𑀺.

𑀆𑀭𑀼𑀧𑁆𑀧𑁂 𑀘𑀢𑀼𑀓𑁆𑀓𑀧𑀜𑁆𑀘𑀓…𑀧𑁂… 𑀯𑀼𑀢𑁆𑀢𑀁 𑀅𑀝𑁆𑀞𑀲𑀸𑀮𑀺𑀦𑀺𑀬𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀦𑀼 𑀢𑀢𑁆𑀣 ‘‘𑀆𑀭𑀼𑀧𑁆𑀧𑁂 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁, 𑀦 ‘‘𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦’’𑀦𑁆𑀢𑀺? 𑀲𑀘𑁆𑀘𑀁, 𑀬𑁂𑀲𑀼 𑀧𑀦 𑀲𑀁𑀲𑀬𑁄 𑀅𑀢𑁆𑀣𑀺, 𑀢𑁂𑀲𑀁 𑀉𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑁂𑀦, 𑀢𑁂𑀦𑀢𑁆𑀣𑀢𑁄 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀫𑁂𑀯 𑀳𑁄𑀢𑀻𑀢𑀺 𑀏𑀯𑀫𑀸𑀳𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀫𑀼𑀤𑀸𑀬𑀜𑁆𑀘 𑀅𑀧𑁂𑀓𑁆𑀔𑀺𑀢𑁆𑀯𑀸 ‘‘𑀢𑀜𑁆𑀘 𑀮𑁄𑀓𑀼𑀢𑁆𑀢𑀭𑀁, 𑀦 𑀮𑁄𑀓𑀺𑀬’’𑀦𑁆𑀢𑀺 𑀆𑀳. 𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑁂𑀯 𑀳𑀺 𑀮𑁄𑀓𑀺𑀬𑀁 𑀢𑀢𑁆𑀣 𑀉𑀧𑁆𑀧𑀚𑁆𑀚𑀢𑀺, 𑀦 𑀘𑀢𑀼𑀓𑁆𑀓𑀁 𑀧𑀜𑁆𑀘𑀓𑀜𑁆𑀘𑀸𑀢𑀺. 𑀏𑀢𑁆𑀣 ¶ 𑀓𑀣𑀦𑁆𑀢𑀺 𑀧𑀸𑀤𑀓𑀚𑁆𑀛𑀸𑀦𑀲𑁆𑀲 𑀅𑀪𑀸𑀯𑀸 𑀓𑀣𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑀁𑀛𑀸𑀦𑀺𑀓𑀸𑀯 𑀢𑀲𑁆𑀲 𑀢𑀢𑁆𑀣 𑀢𑀬𑁄 𑀫𑀕𑁆𑀕𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀢𑀚𑁆𑀛𑀸𑀦𑀺𑀓𑀁 𑀧𑀞𑀫𑀨𑀮𑀸𑀤𑀺𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀉𑀧𑀭𑀺𑀫𑀕𑁆𑀕𑀪𑀸𑀯𑀦𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀺𑀓𑀁 𑀧𑀦 𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸 𑀢𑀢𑁆𑀣𑀼𑀧𑁆𑀧𑀦𑁆𑀦𑀲𑁆𑀲 𑀅𑀭𑀽𑀧𑀚𑁆𑀛𑀸𑀦𑀁 𑀢𑀚𑁆𑀛𑀸𑀦𑀺𑀓𑀁 𑀨𑀮𑀜𑁆𑀘 𑀧𑀸𑀤𑀓𑀁 𑀓𑀢𑁆𑀯𑀸 𑀉𑀧𑀭𑀺𑀫𑀕𑁆𑀕𑀪𑀸𑀯𑀦𑀸𑀬 𑀅𑀜𑁆𑀜𑀛𑀸𑀦𑀺𑀓𑀸𑀧𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀛𑀸𑀦𑀗𑁆𑀕𑀸𑀤𑀺𑀦𑀺𑀬𑀸𑀫𑀺𑀓𑀸 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀲𑀫𑀸𑀧𑀢𑁆𑀢𑀺 𑀧𑀸𑀤𑀓𑀁, 𑀦 𑀲𑀫𑁆𑀫𑀲𑀺𑀢𑀩𑁆𑀩𑀸𑀢𑀺 𑀨𑀮𑀲𑁆𑀲𑀧𑀺 𑀧𑀸𑀤𑀓𑀢𑀸 𑀤𑀝𑁆𑀞𑀩𑁆𑀩𑀸.

𑀤𑀼𑀓𑁆𑀔𑀜𑀸𑀡𑀸𑀤𑀻𑀦𑀁 𑀭𑀽𑀧𑀸𑀤𑀺𑀙𑀴𑀸𑀭𑀫𑁆𑀫𑀡𑀢𑁆𑀢𑀸 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑀸𑀤𑀻𑀦𑀁 𑀓𑀲𑀺𑀡𑀸𑀤𑀺𑀢𑀁𑀢𑀁𑀓𑀼𑀲𑀮𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀢𑁆𑀢𑀸 ¶ 𑀲𑀫𑁆𑀫𑀸𑀯𑀸𑀘𑀸𑀤𑀻𑀦𑀁 𑀅𑀗𑁆𑀕𑀸𑀦𑀁 𑀢𑀁𑀢𑀁𑀯𑀺𑀭𑀫𑀺𑀢𑀩𑁆𑀩𑀸𑀤𑀺𑀆𑀭𑀫𑁆𑀫𑀡𑀢𑁆𑀢𑀸 ‘‘𑀬𑀣𑀸𑀦𑀼𑀭𑀽𑀧’’𑀦𑁆𑀢𑀺 𑀆𑀳. 𑀢𑀤𑀦𑀼𑀭𑀽𑀧𑁄𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀓𑀭𑀲𑀻𑀮𑀁 𑀯𑀸𑀬𑀸𑀫𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑁄𑀢𑀺 𑀲𑀻𑀮𑀸𑀦𑀼𑀭𑀽𑀧𑀢𑀸 𑀯𑀸𑀬𑀸𑀫𑀲𑁆𑀲 𑀯𑀼𑀢𑁆𑀢𑀸 𑀲𑀫𑁆𑀧𑀬𑀼𑀢𑁆𑀢𑀲𑁆𑀲𑀧𑀺, 𑀲𑀫𑁆𑀧𑀬𑀼𑀢𑁆𑀢𑀲𑁆𑀲𑁂𑀯 𑀘 𑀯𑀘𑀦𑀢𑁄 ‘‘𑀲𑀻𑀮𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀺𑀢𑀲𑁆𑀲𑀸’’𑀢𑀺 𑀅𑀯𑀢𑁆𑀯𑀸 ‘‘𑀧𑀢𑀺𑀝𑁆𑀞𑀫𑀸𑀦𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀘𑁂𑀢𑀲𑁄 𑀅𑀲𑀫𑁆𑀫𑁄𑀲𑁄𑀢𑀺 ‘‘𑀏𑀓𑀸𑀭𑀓𑁆𑀔𑁄’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑁂𑀦 𑀲𑀢𑀸𑀭𑀓𑁆𑀔𑁂𑀦 𑀘𑁂𑀢𑀲𑁄 𑀭𑀓𑁆𑀔𑀺𑀢𑀢𑀸. 𑀢𑁂𑀦𑀸𑀳 ‘‘𑀇𑀢𑀺…𑀧𑁂… 𑀲𑀼𑀯𑀺𑀳𑀺𑀢𑀘𑀺𑀢𑁆𑀢𑀸𑀭𑀓𑁆𑀔𑀲𑁆𑀲𑀸’’𑀢𑀺.

𑀆𑀲𑀯𑀓𑁆𑀔𑀬𑀜𑀸𑀡𑀲𑁆𑀲 𑀯𑀺𑀚𑁆𑀚𑀸𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀆𑀲𑀯𑀓𑁆𑀔𑀬𑀲𑀗𑁆𑀔𑀸𑀢𑁂 𑀫𑀕𑁆𑀕𑁂 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑁂 𑀧𑀜𑁆𑀜𑀸𑀓𑁆𑀔𑀦𑁆𑀥𑁄 𑀯𑀺𑀚𑁆𑀚𑀸, 𑀲𑀻𑀮𑀲𑁆𑀲 𑀘𑀢𑀼𑀦𑁆𑀦𑀜𑁆𑀘 𑀛𑀸𑀦𑀸𑀦𑀁 𑀘𑀭𑀡𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀇𑀢𑀭𑁂 𑀤𑁆𑀯𑁂 𑀔𑀦𑁆𑀥𑀸 𑀘𑀭𑀡𑀁. 𑀬𑀦𑁆𑀢𑀺 𑀏𑀢𑁂𑀦 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀦𑁆𑀢𑀻𑀢𑀺 𑀬𑀸𑀦𑀁, 𑀯𑀺𑀧𑀲𑁆𑀲𑀦𑀸𑀯 𑀬𑀸𑀦𑀁 𑀯𑀺𑀧𑀲𑁆𑀲𑀦𑀸𑀬𑀸𑀦𑀁. 𑀲𑀻𑀮𑀁 𑀲𑀫𑀸𑀥𑀺𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑁄, 𑀲𑀫𑀸𑀥𑀺 𑀯𑀺𑀧𑀲𑁆𑀲𑀦𑀸𑀬𑀸𑀢𑀺 𑀲𑀫𑀣𑀲𑁆𑀲 𑀉𑀧𑀓𑀸𑀭𑀢𑁆𑀢𑀸 𑀲𑀻𑀮𑀓𑁆𑀔𑀦𑁆𑀥𑁄 𑀘 𑀲𑀫𑀣𑀬𑀸𑀦𑁂𑀦 𑀲𑀗𑁆𑀕𑀳𑀺𑀢𑁄. 𑀯𑀺𑀧𑀲𑁆𑀲𑀦𑀸𑀬𑀸𑀦𑁂𑀦 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀯𑀺𑀪𑀸𑀯𑁂𑀦𑁆𑀢𑁄 𑀲𑀫𑀣𑀬𑀸𑀦𑁂𑀦 𑀦𑀺𑀭𑀸𑀫𑀺𑀲𑀁 𑀛𑀸𑀦𑀲𑀼𑀔𑀁 𑀅𑀧𑀭𑀺𑀘𑁆𑀘𑀚𑀦𑁆𑀢𑁄 𑀅𑀦𑁆𑀢𑀤𑁆𑀯𑀬𑀓𑀼𑀫𑁆𑀫𑀕𑁆𑀕𑀁 𑀯𑀺𑀯𑀚𑁆𑀚𑁂𑀢𑀺. 𑀧𑀜𑁆𑀜𑀸 𑀯𑀺𑀬 𑀫𑁄𑀳𑀲𑁆𑀲, 𑀲𑀻𑀮𑀲𑀫𑀸𑀥𑀬𑁄 𑀘 𑀤𑁄𑀲𑀮𑁄𑀪𑀸𑀦𑀁 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀸 𑀅𑀤𑁄𑀲𑀸𑀮𑁄𑀪𑁂𑀳𑀺 𑀲𑀸𑀥𑁂𑀢𑀩𑁆𑀩𑀢𑁆𑀢𑀸. 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀬𑁄𑀕𑀢𑁄 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁. 𑀲𑀻𑀮𑀸𑀤𑀻𑀦𑀺 𑀳𑀺 𑀲𑀸𑀲𑀦𑀲𑁆𑀲 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀦𑁆𑀢𑀺. 𑀬𑀲𑁆𑀫𑀺𑀁 𑀞𑀺𑀢𑁄 𑀫𑀕𑁆𑀕𑀝𑁆𑀞𑁄 𑀨𑀮𑀝𑁆𑀞𑁄 𑀘 𑀅𑀭𑀺𑀬𑁄 𑀳𑁄𑀢𑀺, 𑀢𑀁 𑀫𑀕𑁆𑀕𑀨𑀮𑀲𑀗𑁆𑀔𑀸𑀢𑀁 𑀔𑀦𑁆𑀥𑀢𑁆𑀢𑀬𑀲𑀗𑁆𑀕𑀳𑀺𑀢𑀁 𑀲𑀸𑀲𑀦𑀁 𑀅𑀭𑀺𑀬𑀪𑀽𑀫𑀺.

𑀫𑀕𑁆𑀕𑀲𑀘𑁆𑀘𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁨𑁦𑁬-𑁨𑁧𑁪. 𑀅𑀭𑀺𑀬𑀲𑀘𑁆𑀘-𑀲𑀤𑁆𑀤𑁄 ¶ 𑀲𑀫𑀼𑀤𑀬𑁂 𑀯𑀢𑁆𑀢𑀫𑀸𑀦𑁄 𑀧𑀭𑀺𑀜𑁆𑀜𑁂𑀬𑁆𑀬𑀪𑀸𑀯𑀭𑀳𑀺𑀢𑁂 𑀏𑀓𑀦𑁆𑀢𑀧𑀳𑀸𑀢𑀩𑁆𑀩𑁂 𑀢𑀡𑁆𑀳𑀸𑀲𑀗𑁆𑀔𑀸𑀢𑁂 𑀲𑀫𑀼𑀤𑀬𑁂 𑀧𑀯𑀢𑁆𑀢𑀢𑀺, 𑀦 𑀧𑀳𑀸𑀢𑀩𑁆𑀩𑀧𑀭𑀺𑀜𑁆𑀜𑁂𑀬𑁆𑀬𑁂𑀲𑀼 𑀅𑀯𑀲𑁂𑀲𑀓𑀺𑀮𑁂𑀲𑀸𑀯𑀲𑁂𑀲𑀸𑀓𑀼𑀲𑀮𑁂𑀲𑀼 𑀅𑀧𑁆𑀧𑀳𑀸𑀢𑀩𑁆𑀩𑁂𑀲𑀼 𑀘 𑀲𑀸𑀲𑀯𑀓𑀼𑀲𑀮𑀫𑀽𑀮𑀸𑀯𑀲𑁂𑀲𑀲𑀸𑀲𑀯𑀓𑀼𑀲𑀮𑁂𑀲𑀽𑀢𑀺 𑀲𑀧𑁆𑀧𑀤𑁂𑀲𑁄 𑀢𑀢𑁆𑀣 𑀲𑀫𑀼𑀤𑀬𑁄 𑀳𑁄𑀢𑀺, 𑀓𑁂𑀯𑀮𑀁 𑀲𑀘𑁆𑀘𑀲𑀤𑁆𑀤𑁂 𑀦𑀺𑀧𑁆𑀧𑀤𑁂𑀲𑁄𑀢𑀺 𑀆𑀳 ‘‘𑀦𑀺𑀧𑁆𑀧𑀤𑁂𑀲𑀢𑁄 𑀲𑀫𑀼𑀤𑀬𑀁 𑀤𑀲𑁆𑀲𑁂𑀢𑀼’’𑀦𑁆𑀢𑀺. 𑀤𑀼𑀓𑁆𑀔𑀦𑀺𑀭𑁄𑀥𑀸 𑀧𑀦 𑀅𑀭𑀺𑀬𑀲𑀘𑁆𑀘𑀤𑁂𑀲𑀦𑀸𑀬𑀁 𑀥𑀫𑁆𑀫𑀢𑁄 𑀦𑀺𑀧𑁆𑀧𑀤𑁂𑀲𑀸 𑀏𑀯. 𑀦 𑀳𑀺 𑀢𑀢𑁄 𑀅𑀜𑁆𑀜𑁄 𑀥𑀫𑁆𑀫𑁄 𑀅𑀢𑁆𑀣𑀺, 𑀬𑁄 𑀲𑀘𑁆𑀘𑀤𑁂𑀲𑀦𑀸𑀬𑀁 ¶ 𑀤𑀼𑀓𑁆𑀔𑀁 𑀦𑀺𑀭𑁄𑀥𑁄𑀢𑀺 𑀘 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸, 𑀫𑀕𑁆𑀕𑁄𑀧𑀺 𑀅𑀝𑁆𑀞𑀗𑁆𑀕𑀺𑀓𑀧𑀜𑁆𑀘𑀗𑁆𑀕𑀺𑀓𑀯𑀸𑀭𑁂𑀲𑀼 𑀅𑀧𑀼𑀩𑁆𑀩𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑀫𑀼𑀤𑀬𑀫𑁂𑀯 ‘‘𑀦𑀺𑀧𑁆𑀧𑀤𑁂𑀲𑀢𑁄 𑀤𑀲𑁆𑀲𑁂𑀢𑀼’’𑀦𑁆𑀢𑀺 𑀯𑀤𑀢𑀺 𑀢𑀲𑁆𑀲 𑀲𑀩𑁆𑀩𑀢𑁆𑀣 𑀢𑀻𑀲𑀼𑀧𑀺 𑀯𑀸𑀭𑁂𑀲𑀼 𑀅𑀧𑀼𑀩𑁆𑀩𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸. 𑀅𑀧𑀼𑀩𑁆𑀩𑀲𑀫𑀼𑀤𑀬𑀤𑀲𑁆𑀲𑀦𑀢𑁆𑀣𑀸𑀬𑀧𑀺 𑀳𑀺 𑀲𑀘𑁆𑀘𑀤𑁂𑀲𑀦𑀸𑀬𑀁 ‘‘𑀢𑀢𑁆𑀣 𑀓𑀢𑀫𑁄 𑀤𑀼𑀓𑁆𑀔𑀲𑀫𑀼𑀤𑀬𑁄? 𑀢𑀡𑁆𑀳𑀸’’𑀢𑀺 𑀯𑀘𑀦𑀁 𑀓𑁂𑀯𑀮𑀸𑀬 𑀢𑀡𑁆𑀳𑀸𑀬 𑀲𑀘𑁆𑀘-𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀦𑁆𑀢𑀺. 𑀤𑁂𑀲𑀦𑀸𑀯𑀲𑁂𑀦 𑀧𑀦 𑀢𑀁 𑀢𑀁 𑀲𑀫𑀼𑀤𑀬𑀁 𑀞𑀧𑁂𑀢𑁆𑀯𑀸 𑀤𑀼𑀓𑁆𑀔𑀁 𑀢𑀲𑁆𑀲 𑀢𑀲𑁆𑀲 𑀧𑀳𑀸𑀦𑀯𑀲𑁂𑀦 𑀦𑀺𑀭𑁄𑀥𑁄 𑀅𑀝𑁆𑀞𑀗𑁆𑀕𑀺𑀓𑀧𑀜𑁆𑀘𑀗𑁆𑀕𑀺𑀓𑀲𑀩𑁆𑀩𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀯𑀲𑁂𑀦 𑀫𑀕𑁆𑀕𑁄 𑀘 𑀅𑀭𑀺𑀬𑀲𑀘𑁆𑀘𑀤𑁂𑀲𑀦𑀸𑀬𑀁 𑀦 𑀯𑀼𑀢𑁆𑀢𑁄𑀢𑀺 𑀤𑀼𑀓𑁆𑀔𑀸𑀤𑀻𑀦𑀺 𑀘 𑀢𑀢𑁆𑀣 𑀲𑀧𑁆𑀧𑀤𑁂𑀲𑀸𑀦𑀺 𑀤𑀲𑁆𑀲𑀺𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀢𑀸𑀦𑀺 𑀘 𑀦𑀺𑀧𑁆𑀧𑀤𑁂𑀲𑀸𑀦𑀺 𑀤𑀲𑁆𑀲𑁂𑀢𑀼𑀁 𑀲𑀘𑁆𑀘𑀤𑁂𑀲𑀦𑀸 𑀯𑀼𑀢𑁆𑀢𑀸𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀧𑀘𑁆𑀘𑀬𑀲𑀗𑁆𑀔𑀸𑀢𑀦𑁆𑀢𑀺 𑀓𑀫𑁆𑀫𑀓𑀺𑀮𑁂𑀲𑀯𑀲𑁂𑀦 𑀚𑀸𑀢𑀺𑀆𑀤𑀺𑀤𑀼𑀓𑁆𑀔𑀲𑁆𑀲 𑀫𑀽𑀮𑀪𑀽𑀢𑀦𑁆𑀢𑀺 𑀅𑀢𑁆𑀣𑁄.

𑀦𑀺𑀭𑁄𑀥𑀲𑀘𑁆𑀘𑀁…𑀧𑁂… 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 𑀅𑀭𑀺𑀬𑀲𑀘𑁆𑀘𑀤𑁂𑀲𑀦𑀢𑁄 𑀲𑀘𑁆𑀘𑀤𑁂𑀲𑀦𑀸𑀬 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 ‘‘𑀢𑀺𑀡𑁆𑀡𑀦𑁆𑀦𑀜𑁆𑀘 𑀓𑀼𑀲𑀮𑀫𑀽𑀮𑀸𑀦𑀁 𑀅𑀯𑀲𑁂𑀲𑀸𑀦𑀜𑁆𑀘 𑀲𑀸𑀲𑀯𑀓𑀼𑀲𑀮𑀸𑀦𑀁 𑀧𑀳𑀸𑀦’’𑀦𑁆𑀢𑀺 𑀇𑀤𑀁 𑀢𑁂𑀲𑀁 𑀧𑀘𑁆𑀘𑀬𑀸𑀦𑀁 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀉𑀧𑀸𑀤𑀸𑀦𑀸𑀦𑀁 𑀧𑀳𑀸𑀦𑀯𑀲𑁂𑀦, 𑀅𑀯𑀺𑀚𑁆𑀚𑀸𑀤𑀻𑀲𑀼 𑀯𑀸 𑀧𑀳𑀻𑀦𑁂𑀲𑀼 𑀢𑁂𑀲𑀁 𑀅𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦 𑀳𑀺 𑀓𑀼𑀲𑀮𑀸 𑀧𑀳𑀸𑀢𑀩𑁆𑀩𑀸𑀢𑀺. 𑀧𑀳𑀸𑀦𑀦𑁆𑀢𑀺 𑀘 𑀫𑀕𑁆𑀕𑀓𑀺𑀘𑁆𑀘𑀯𑀲𑁂𑀦 𑀢𑀤𑀥𑀺𑀕𑀫𑀦𑀻𑀬𑀁 𑀦𑀺𑀭𑁄𑀥𑀁 𑀤𑀲𑁆𑀲𑁂𑀢𑀺, 𑀦𑀺𑀭𑁄𑀥𑀲𑁆𑀲𑁂𑀯 𑀯𑀸 𑀢𑀡𑁆𑀳𑀸𑀤𑀻𑀦𑀁 𑀅𑀧𑁆𑀧𑀯𑀢𑁆𑀢𑀺𑀪𑀸𑀯𑁄 𑀧𑀳𑀸𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀬𑀤𑀺𑀧𑀺 ‘‘𑀧𑀼𑀩𑁆𑀩𑁂𑀯 𑀔𑁄 𑀧𑀦𑀲𑁆𑀲 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀆𑀚𑀻𑀯𑁄 𑀲𑀼𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀺, 𑀏𑀯𑀫𑀲𑁆𑀲𑀸𑀬𑀁 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀻’’𑀢𑀺 (𑀫. 𑀦𑀺. 𑁩.𑁪𑁩𑁧) 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀧𑀸𑀭𑀺𑀧𑀽𑀭𑀺𑀬𑀸 𑀉𑀧𑀦𑀺𑀲𑁆𑀲𑀬𑀤𑀲𑁆𑀲𑀦𑀢𑁆𑀣𑀁 𑀇𑀤𑀁 ¶ 𑀯𑀼𑀢𑁆𑀢𑀁, 𑀢𑀣𑀸𑀧𑀺 ‘‘𑀧𑀼𑀩𑁆𑀩𑁂𑀯 𑀔𑁄 𑀧𑀦𑀸’’𑀢𑀺 𑀯𑀘𑀦𑀁 𑀓𑀸𑀬𑀓𑀫𑁆𑀫𑀸𑀤𑀺𑀲𑀼𑀤𑁆𑀥𑀺𑀬𑀸 𑀤𑀽𑀭𑀢𑀭𑀼𑀧𑀦𑀺𑀲𑁆𑀲𑀬𑀢𑀁, 𑀘𑀓𑁆𑀔𑀸𑀤𑀻𑀲𑀼 𑀅𑀲𑀸𑀭𑀚𑁆𑀚𑀦𑁆𑀢𑀲𑁆𑀲 𑀅𑀲𑀁𑀬𑀼𑀢𑁆𑀢𑀲𑁆𑀲 𑀅𑀲𑀫𑁆𑀫𑀽𑀴𑁆𑀳𑀲𑁆𑀲 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄 𑀢𑀸𑀬𑁂𑀯 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀬𑀸 𑀯𑀺𑀧𑀲𑁆𑀲𑀦𑀸𑀬 𑀆𑀬𑀢𑀺𑀁 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀅𑀧𑀘𑀬𑀁 𑀕𑀘𑁆𑀙𑀦𑁆𑀢𑁂𑀲𑀼 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀯𑀺𑀯𑀝𑁆𑀝𑀦𑀯𑀲𑁂𑀦, 𑀧𑁄𑀦𑁄𑀩𑁆𑀪𑀯𑀺𑀓𑀢𑀡𑁆𑀳𑀸𑀬 𑀧𑀳𑀻𑀬𑀫𑀸𑀦𑀸𑀬 𑀓𑀺𑀮𑁂𑀲𑀤𑀽𑀭𑀻𑀪𑀸𑀯𑁂𑀦, 𑀓𑀸𑀬𑀺𑀓𑀘𑁂𑀢𑀲𑀺𑀓𑀤𑀭𑀣𑀲𑀦𑁆𑀢𑀸𑀧𑀧𑀭𑀺𑀴𑀸𑀳𑁂𑀲𑀼 𑀧𑀳𑀻𑀬𑀫𑀸𑀦𑁂𑀲𑀼 𑀧𑀲𑁆𑀲𑀤𑁆𑀥𑀓𑀸𑀬𑀘𑀺𑀢𑁆𑀢𑀯𑀲𑁂𑀦 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀼𑀔𑁂 𑀧𑀝𑀺𑀲𑀁𑀯𑁂𑀤𑀺𑀬𑀫𑀸𑀦𑁂 ‘‘𑀬𑀸 𑀢𑀣𑀸𑀪𑀽𑀢𑀲𑁆𑀲 𑀤𑀺𑀝𑁆𑀞𑀺, 𑀲𑀸𑀲𑁆𑀲 𑀳𑁄𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁪𑁩𑁧) 𑀯𑀼𑀢𑁆𑀢𑀸𑀦𑀁 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀧𑀯𑀢𑁆𑀢𑀸𑀦𑀁 𑀧𑀜𑁆𑀘𑀦𑁆𑀦𑀁 𑀲𑀫𑁆𑀫𑀸𑀤𑀺𑀝𑁆𑀞𑀸𑀤𑀻𑀦𑀁 𑀅𑀗𑁆𑀕𑀸𑀦𑀁 𑀆𑀲𑀦𑁆𑀦𑀢𑀭𑀼𑀧𑀦𑀺𑀲𑁆𑀲𑀬𑀢𑀜𑁆𑀘 𑀤𑀲𑁆𑀲𑁂𑀢𑀻𑀢𑀺 𑀆𑀲𑀦𑁆𑀦𑀢𑀭𑀼𑀧𑀦𑀺𑀲𑁆𑀲𑀬𑀯𑀲𑁂𑀦 𑀧𑀜𑁆𑀘𑀗𑁆𑀕𑀺𑀓𑀁 𑀫𑀕𑁆𑀕𑀁 𑀲𑀼𑀔𑀁 𑀩𑀼𑀚𑁆𑀛𑀦𑁆𑀢𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 ¶ 𑀧𑀜𑁆𑀘𑀗𑁆𑀕𑀺𑀓𑀫𑀕𑁆𑀕𑀤𑁂𑀲𑀦𑀸𑀬 𑀧𑀯𑀢𑁆𑀢𑀢𑀁 𑀤𑀻𑀧𑁂𑀢𑀺. 𑀢𑁂𑀦𑀸𑀳 ‘‘𑀧𑀼𑀩𑁆𑀩𑁂𑀯 𑀔𑁄…𑀧𑁂… 𑀲𑀼𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀻𑀢𑀺 𑀯𑀘𑀦𑀢𑁄’’𑀢𑀺𑀆𑀤𑀺. 𑀏𑀯𑀫𑀺𑀤𑀁 𑀯𑀘𑀦𑀢𑁄𑀢𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀤𑁂𑀲𑀦𑀼𑀧𑀸𑀬𑀲𑁆𑀲 𑀜𑀸𑀧𑀓𑀦𑀺𑀤𑀲𑁆𑀲𑀦𑀁 𑀳𑁄𑀢𑀺, 𑀯𑀘𑀦𑀢𑁄𑀢𑀺 𑀯𑀸 𑀅𑀢𑁆𑀢𑀦𑁄 𑀯𑀘𑀦𑀸𑀦𑀼𑀭𑀽𑀧𑀁 𑀧𑀜𑁆𑀘𑀗𑁆𑀕𑀺𑀓𑁄𑀧𑀺 𑀫𑀕𑁆𑀕𑁄 𑀧𑀝𑀺𑀧𑀤𑀸 𑀏𑀯𑀸𑀢𑀺 𑀪𑀕𑀯𑀢𑀸 𑀤𑁂𑀲𑀺𑀢𑁄𑀢𑀺 𑀅𑀢𑁆𑀣𑁄. 𑀓𑀢𑁆𑀣𑀸𑀢𑀺? 𑀤𑁂𑀯𑀧𑀼𑀭𑁂, 𑀢𑀲𑁆𑀫𑀸 𑀢𑀁 𑀤𑁂𑀲𑀺𑀢𑀦𑀬𑀁 𑀤𑀲𑁆𑀲𑁂𑀢𑀼𑀁 𑀧𑀜𑁆𑀘𑀗𑁆𑀕𑀺𑀓𑀯𑀸𑀭𑁄𑀧𑀺 𑀦𑀺𑀤𑁆𑀤𑀺𑀝𑁆𑀞𑁄 𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑀺. 𑀅𑀣 𑀯𑀸 ‘‘𑀧𑀼𑀩𑁆𑀩𑁂𑀯 𑀔𑁄 𑀧𑀦𑀲𑁆𑀲𑀸’’𑀢𑀺 𑀯𑀘𑀦𑁂𑀦𑁂𑀯 𑀅𑀚𑁆𑀛𑀸𑀲𑀬𑀯𑀺𑀲𑁂𑀲𑀓𑀸𑀭𑀡𑀦𑀺𑀤𑀲𑁆𑀲𑀓𑁂𑀦 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀯𑀲𑁂𑀦 𑀧𑀜𑁆𑀘𑀗𑁆𑀕𑀺𑀓𑁄 𑀫𑀕𑁆𑀕𑁄𑀧𑀺 𑀧𑀝𑀺𑀧𑀤𑀸 𑀏𑀯𑀸𑀢𑀺 𑀤𑁂𑀲𑀺𑀢𑁄 𑀳𑁄𑀢𑀻𑀢𑀺 𑀆𑀳 ‘‘𑀧𑀼𑀩𑁆𑀩𑁂𑀯 𑀔𑁄 𑀧𑀦…𑀧𑁂… 𑀯𑀘𑀦𑀢𑁄 𑀧𑀦…𑀧𑁂… 𑀤𑁂𑀲𑀺𑀢𑁄’’𑀢𑀺, 𑀢𑀲𑁆𑀫𑀸 𑀢𑀁 𑀲𑀼𑀢𑁆𑀢𑀦𑁆𑀢𑁂 𑀤𑁂𑀲𑀺𑀢𑀦𑀬𑀁 𑀤𑀲𑁆𑀲𑁂𑀢𑀼𑀁 𑀧𑀜𑁆𑀘𑀗𑁆𑀕𑀺𑀓𑀯𑀸𑀭𑁄𑀧𑀺 𑀦𑀺𑀤𑁆𑀤𑀺𑀝𑁆𑀞𑁄 𑀪𑀕𑀯𑀢𑀸 𑀤𑁂𑀯𑀧𑀼𑀭𑁂𑀢𑀺 𑀅𑀢𑁆𑀣𑁄.

𑀛𑀸𑀦𑁂𑀳𑀺 𑀤𑁂𑀲𑀦𑀸𑀧𑀯𑁂𑀲𑁄, 𑀪𑀸𑀯𑀦𑀸𑀧𑀯𑁂𑀲𑁄 𑀯𑀸 𑀛𑀸𑀦𑀸𑀪𑀺𑀦𑀺𑀯𑁂𑀲𑁄. 𑀏𑀓𑁂𑀓𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂 𑀘𑀢𑀼𑀦𑁆𑀦𑀁 𑀘𑀢𑀼𑀦𑁆𑀦𑀁 𑀦𑀬𑀲𑀳𑀲𑁆𑀲𑀸𑀦𑀁 𑀤𑀲𑁆𑀲𑀦𑀁 𑀕𑀡𑀦𑀸𑀲𑀼𑀔𑀢𑁆𑀣𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀧𑀦 𑀧𑀸𑀴𑀺 𑀞𑀺𑀢𑀸, 𑀢𑀣𑀸 𑀏𑀓𑁂𑀓𑀺𑀲𑁆𑀲𑀸 𑀧𑀝𑀺𑀧𑀤𑀸𑀬 𑀲𑀼𑀜𑁆𑀜𑀢𑀸𑀤𑀻𑀲𑀼 𑀘 𑀧𑀜𑁆𑀘 𑀧𑀜𑁆𑀘 𑀓𑁄𑀝𑁆𑀞𑀸𑀲𑁂 𑀬𑁄𑀚𑁂𑀢𑁆𑀯𑀸 𑀧𑀸𑀴𑀺𑀕𑀫𑀦𑀁 𑀓𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀢𑀢𑁆𑀣 𑀅𑀝𑁆𑀞𑀗𑁆𑀕𑀺𑀓𑀯𑀸𑀭𑁂 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀲𑀼 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀢𑁆𑀢𑀗𑁆𑀕𑀺𑀓𑁄 𑀫𑀕𑁆𑀕𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸, 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀸𑀭𑁂 𑀘 𑀬𑀣𑀸 𑀯𑀺𑀚𑁆𑀚𑀫𑀸𑀦𑀥𑀫𑁆𑀫𑀯𑀲𑁂𑀦𑀸𑀢𑀺.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸

𑁨𑁧𑁫. 𑀏𑀯𑀁 ¶ 𑀧𑀼𑀭𑀺𑀫𑁂𑀲𑀼𑀧𑀺 𑀤𑁆𑀯𑀻𑀲𑀽𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀦𑀺𑀤𑁆𑀤𑁂𑀲𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑁄 𑀫𑀕𑁆𑀕𑁄 𑀯𑀼𑀢𑁆𑀢𑁄. 𑀢𑀲𑁆𑀲 𑀳𑀺 𑀅𑀝𑁆𑀞𑀓𑀣𑀸𑀬𑀁 (𑀯𑀺𑀪. 𑀅𑀝𑁆𑀞. 𑁨𑁦𑁫) ‘‘𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀉𑀕𑁆𑀕𑀳𑀸𑀤𑀺𑀯𑀲𑁂𑀦 𑀧𑀼𑀩𑁆𑀩𑀪𑀸𑀕𑀜𑀸𑀡𑀼𑀧𑁆𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀇𑀤𑀁 ‘𑀤𑀼𑀓𑁆𑀔𑁂 𑀜𑀸𑀡’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀧𑀝𑀺𑀯𑁂𑀥𑀓𑁆𑀔𑀡𑁂 𑀧𑀦 𑀏𑀓𑀫𑁂𑀯 𑀜𑀸𑀡𑀁 𑀳𑁄𑀢𑀻’’𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸, 𑀢𑀣𑀸 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀻𑀦𑀜𑁆𑀘 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀢𑀸 𑀤𑀲𑁆𑀲𑀺𑀢𑀸 ‘‘𑀅𑀧𑀺𑀘𑁂𑀲𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀦𑀸𑀫 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸𑀓𑁆𑀔𑀡𑀸 𑀦𑀸𑀦𑀸𑀭𑀫𑁆𑀫𑀡𑀸 𑀳𑁄𑀢𑀺, 𑀫𑀕𑁆𑀕𑀓𑁆𑀔𑀡𑁂 𑀏𑀓𑀓𑁆𑀔𑀡𑀸 𑀏𑀓𑀸𑀭𑀫𑁆𑀫𑀡𑀸’’𑀢𑀺𑀆𑀤𑀺𑀦𑀸 𑀘𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀏𑀯𑀁 𑀧𑀦 𑀆𑀕𑀫𑀦𑀯𑀲𑁂𑀦 𑀢𑀢𑁆𑀣𑀸𑀧𑀺 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀤𑀲𑁆𑀲𑀦𑀸𑀤𑀺𑀫𑀼𑀔𑁂𑀦 𑀅𑀭𑀺𑀬𑁄𑀯 ¶ 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀤𑀲𑁆𑀲𑀺𑀢𑁄. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀧𑀝𑀺𑀯𑁂𑀥𑀓𑁆𑀔𑀡𑁂 𑀧𑀦 𑀏𑀓𑀫𑁂𑀯 𑀜𑀸𑀡𑀁 𑀳𑁄𑀢𑀻’’𑀢𑀺 𑀫𑀕𑁆𑀕𑀜𑀸𑀡𑀲𑁆𑀲 𑀏𑀓𑀲𑁆𑀲𑁂𑀯 𑀤𑀼𑀓𑁆𑀔𑀜𑀸𑀡𑀸𑀤𑀺𑀢𑀸, ‘‘𑀫𑀕𑁆𑀕𑀓𑁆𑀔𑀡𑁂 𑀧𑀦…𑀧𑁂… 𑀏𑀓𑁄𑀯 𑀓𑀼𑀲𑀮𑀲𑀗𑁆𑀓𑀧𑁆𑀧𑁄 𑀉𑀧𑁆𑀧𑀚𑁆𑀚𑀢𑀺, 𑀅𑀬𑀁 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀦𑀸𑀫𑀸’’𑀢𑀺𑀆𑀤𑀺𑀦𑀸 𑀫𑀕𑁆𑀕𑀲𑀗𑁆𑀓𑀧𑁆𑀧𑀸𑀤𑀻𑀦𑀁 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀺𑀢𑀸 𑀘 𑀦𑀺𑀤𑁆𑀥𑀸𑀭𑀺𑀢𑀸, 𑀧𑀸𑀴𑀺𑀬𑀜𑁆𑀘 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀢𑀫𑁂𑀯 𑀦𑀺𑀤𑁆𑀤𑀺𑀲𑀺𑀢𑀼𑀁 ‘‘𑀤𑀼𑀓𑁆𑀔𑁂 𑀜𑀸𑀡’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂𑀧𑀺 𑀤𑁆𑀯𑀺𑀦𑁆𑀦𑀁 𑀮𑁄𑀓𑀺𑀬𑀢𑀸, 𑀤𑁆𑀯𑀺𑀦𑁆𑀦𑀁 𑀮𑁄𑀓𑀼𑀢𑁆𑀢𑀭𑀢𑀸 𑀯𑀼𑀢𑁆𑀢𑀸 ‘‘𑀏𑀯𑀁 𑀧𑀼𑀭𑀺𑀫𑁂𑀲𑀼𑀧𑀺 𑀤𑁆𑀯𑀻𑀲𑀽𑀢𑀺 𑀏𑀢𑁂𑀦𑀸𑀢𑀺.

𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀘𑁆𑀘𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀇𑀦𑁆𑀤𑁆𑀭𑀺𑀬𑀯𑀺𑀪𑀗𑁆𑀕𑁄

𑁧. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁨𑁧𑁯. 𑀘𑀓𑁆𑀔𑀼𑀤𑁆𑀯𑀸𑀭𑁂 ¶ ¶ 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀘𑀓𑁆𑀔𑀼𑀤𑁆𑀯𑀸𑀭𑀪𑀸𑀯𑁂 𑀢𑀁𑀤𑁆𑀯𑀸𑀭𑀺𑀓𑁂𑀳𑀺 𑀅𑀢𑁆𑀢𑀦𑁄 𑀇𑀦𑁆𑀤𑀪𑀸𑀯𑀁 𑀧𑀭𑀫𑀺𑀲𑁆𑀲𑀭𑀪𑀸𑀯𑀁 𑀓𑀸𑀭𑀬𑀢𑀻𑀢𑀺 𑀅𑀢𑁆𑀣𑁄. 𑀢𑀜𑁆𑀳𑀺 𑀢𑁂 𑀭𑀽𑀧𑀕𑁆𑀕𑀳𑀡𑁂 𑀅𑀢𑁆𑀢𑀸𑀦𑀁 𑀅𑀦𑀼𑀯𑀢𑁆𑀢𑁂𑀢𑀺, 𑀢𑁂 𑀘 𑀢𑀁 𑀅𑀦𑀼𑀯𑀢𑁆𑀢𑀦𑁆𑀢𑀻𑀢𑀺. 𑀏𑀲 𑀦𑀬𑁄 𑀇𑀢𑀭𑁂𑀲𑀼𑀧𑀺. 𑀬𑁂𑀦 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀯𑀸 𑀅𑀜𑁆𑀜𑀸𑀢𑀸𑀯𑀺𑀦𑁄 𑀳𑁄𑀦𑁆𑀢𑀺, 𑀲𑁄 𑀅𑀜𑁆𑀜𑀸𑀢𑀸𑀯𑀺𑀪𑀸𑀯𑁄 𑀧𑀭𑀺𑀦𑀺𑀝𑁆𑀞𑀺𑀢𑀓𑀺𑀘𑁆𑀘𑀚𑀸𑀦𑀦𑀁.

𑀓𑀢𑁆𑀣𑀘𑀺 𑀤𑁆𑀯𑁂𑀢𑀺 ‘‘𑀤𑁆𑀯𑀺𑀦𑁆𑀦𑀁 𑀔𑁄, 𑀪𑀺𑀓𑁆𑀔𑀯𑁂, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀢𑀺…𑀧𑁂… 𑀅𑀭𑀺𑀬𑀸𑀬 𑀘 𑀧𑀜𑁆𑀜𑀸𑀬 𑀅𑀭𑀺𑀬𑀸𑀬 𑀘 𑀯𑀺𑀫𑀼𑀢𑁆𑀢𑀺𑀬𑀸. 𑀬𑀸 𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀸 𑀧𑀜𑁆𑀜𑀸, 𑀢𑀤𑀲𑁆𑀲 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀬𑀸 𑀳𑀺𑀲𑁆𑀲 𑀅𑀭𑀺𑀬𑀸 𑀯𑀺𑀫𑀼𑀢𑁆𑀢𑀺, 𑀢𑀤𑀲𑁆𑀲 𑀲𑀫𑀸𑀥𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁫.𑁫𑁧𑁬) 𑀤𑁆𑀯𑁂, ‘‘𑀢𑀺𑀡𑁆𑀡𑀁 𑀔𑁄, 𑀪𑀺𑀓𑁆𑀔𑀯𑁂, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑁂𑀦 𑀪𑀺𑀓𑁆𑀔𑀼𑀦𑀸 𑀅𑀜𑁆𑀜𑀸 𑀩𑁆𑀬𑀸𑀓𑀢𑀸…𑀧𑁂… 𑀲𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲𑀸’’𑀢𑀺 (𑀲𑀁. 𑀦𑀺. 𑁫.𑁫𑁧𑁯), ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 (𑀲𑀁. 𑀦𑀺. 𑁫.𑁪𑁯𑁩), ‘‘𑀢𑀻𑀡𑀺𑀫𑀸𑀦𑀺…𑀧𑁂… 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 (𑀲𑀁. 𑀦𑀺. 𑁫.𑁪𑁯𑁨) 𑀘 𑀏𑀯𑀫𑀸𑀤𑀻𑀲𑀼 𑀢𑀻𑀡𑀺, ‘‘𑀧𑀜𑁆𑀘𑀺𑀫𑀸𑀦𑀺, 𑀩𑁆𑀭𑀸𑀳𑁆𑀫𑀡, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀦𑀸𑀦𑀸𑀯𑀺𑀲𑀬𑀸𑀦𑀺…𑀧𑁂… 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂… 𑀓𑀸𑀬𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 (𑀲𑀁. 𑀦𑀺. 𑁫.𑁫𑁧𑁨), ‘‘𑀧𑀜𑁆𑀘𑀺…𑀧𑁂… 𑀲𑀼𑀔𑀺𑀦𑁆𑀤𑁆𑀭𑀺𑀬𑀁…𑀧𑁂… 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 (𑀲𑀁. 𑀦𑀺. 𑁫.𑁫𑁦𑁧 𑀆𑀤𑀬𑁄), ‘‘𑀧𑀜𑁆𑀘𑀺…𑀧𑁂… 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁…𑀧𑁂… 𑀧𑀜𑁆𑀜𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 (𑀲𑀁. 𑀦𑀺. 𑁫.𑁪𑁮𑁬 𑀆𑀤𑀬𑁄) 𑀘 𑀏𑀯𑀫𑀸𑀤𑀻𑀲𑀼 𑀧𑀜𑁆𑀘. 𑀢𑀢𑁆𑀣 𑀲𑀼𑀢𑁆𑀢𑀦𑁆𑀢𑁂 𑀤𑀼𑀓𑀸𑀤𑀺𑀯𑀘𑀦𑀁 𑀦𑀺𑀲𑁆𑀲𑀭𑀡𑀼𑀧𑀸𑀬𑀸𑀤𑀺𑀪𑀸𑀯𑀢𑁄 𑀤𑀼𑀓𑀸𑀤𑀻𑀦𑀁. 𑀲𑀩𑁆𑀩𑀸𑀦𑀺 𑀧𑀦 ¶ 𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀪𑀺𑀜𑁆𑀜𑁂𑀬𑁆𑀬𑀸𑀦𑀺, 𑀅𑀪𑀺𑀜𑁆𑀜𑁂𑀬𑁆𑀬𑀥𑀫𑁆𑀫𑀤𑁂𑀲𑀦𑀸 𑀘 𑀅𑀪𑀺𑀥𑀫𑁆𑀫𑁄𑀢𑀺 𑀇𑀥 𑀲𑀩𑁆𑀩𑀸𑀦𑀺 𑀏𑀓𑀢𑁄 𑀯𑀼𑀢𑁆𑀢𑀸𑀦𑀺.

𑀔𑀻𑀡𑀸𑀲𑀯𑀲𑁆𑀲 𑀪𑀸𑀯𑀪𑀽𑀢𑁄 𑀳𑀼𑀢𑁆𑀯𑀸 𑀉𑀧𑁆𑀧𑀢𑁆𑀢𑀺𑀢𑁄 ‘‘𑀔𑀻𑀡𑀸𑀲𑀯𑀲𑁆𑀲𑁂𑀯 𑀉𑀧𑁆𑀧𑀚𑁆𑀚𑀦𑀢𑁄’’𑀢𑀺 𑀯𑀼𑀢𑁆𑀢𑀁.

𑀮𑀺𑀗𑁆𑀕𑁂𑀢𑀺 𑀕𑀫𑁂𑀢𑀺 𑀜𑀸𑀧𑁂𑀢𑀻𑀢𑀺 𑀮𑀺𑀗𑁆𑀕𑀁, 𑀮𑀺𑀗𑁆𑀕𑀻𑀬𑀢𑀺 𑀯𑀸 𑀏𑀢𑁂𑀦𑀸𑀢𑀺 𑀮𑀺𑀗𑁆𑀕𑀁, 𑀓𑀺𑀁 𑀮𑀺𑀗𑁆𑀕𑁂𑀢𑀺, 𑀓𑀺𑀜𑁆𑀘 𑀯𑀸 𑀮𑀺𑀗𑁆𑀕𑀻𑀬𑀢𑀻𑀢𑀺? 𑀇𑀦𑁆𑀤𑀁 𑀇𑀦𑁆𑀤𑁄 𑀯𑀸, 𑀇𑀦𑁆𑀤𑀲𑁆𑀲 𑀮𑀺𑀗𑁆𑀕𑀁 𑀇𑀦𑁆𑀤𑀮𑀺𑀗𑁆𑀕𑀁, 𑀇𑀦𑁆𑀤𑀮𑀺𑀗𑁆𑀕𑀲𑁆𑀲 𑀅𑀢𑁆𑀣𑁄 𑀢𑀁𑀲𑀪𑀸𑀯𑁄 𑀇𑀦𑁆𑀤𑀮𑀺𑀗𑁆𑀕𑀝𑁆𑀞𑁄, 𑀇𑀦𑁆𑀤𑀮𑀺𑀗𑁆𑀕𑀫𑁂𑀯 𑀯𑀸 ¶ 𑀇𑀦𑁆𑀤𑁆𑀭𑀺𑀬-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀇𑀦𑁆𑀤𑀮𑀺𑀗𑁆𑀕𑀝𑁆𑀞𑁄. 𑀲𑀚𑁆𑀚𑀺𑀢𑀁 𑀉𑀧𑁆𑀧𑀸𑀤𑀺𑀢𑀦𑁆𑀢𑀺 𑀲𑀺𑀝𑁆𑀞𑀁, 𑀇𑀦𑁆𑀤𑁂𑀦 𑀲𑀺𑀝𑁆𑀞𑀁 𑀇𑀦𑁆𑀤𑀲𑀺𑀝𑁆𑀞𑀁. 𑀚𑀼𑀝𑁆𑀞𑀁 𑀲𑁂𑀯𑀺𑀢𑀁. 𑀓𑀫𑁆𑀫𑀲𑀗𑁆𑀔𑀸𑀢𑀲𑁆𑀲 𑀇𑀦𑁆𑀤𑀲𑁆𑀲 𑀮𑀺𑀗𑁆𑀕𑀸𑀦𑀺, 𑀢𑁂𑀦 𑀘 𑀲𑀺𑀝𑁆𑀞𑀸𑀦𑀻𑀢𑀺 𑀓𑀫𑁆𑀫𑀚𑀸𑀦𑁂𑀯 𑀬𑁄𑀚𑁂𑀢𑀩𑁆𑀩𑀸𑀦𑀺, 𑀦 𑀅𑀜𑁆𑀜𑀸𑀦𑀺. 𑀢𑁂 𑀘 𑀤𑁆𑀯𑁂 𑀅𑀢𑁆𑀣𑀸 𑀓𑀫𑁆𑀫𑁂 𑀏𑀯 𑀬𑁄𑀚𑁂𑀢𑀩𑁆𑀩𑀸, 𑀇𑀢𑀭𑁂 𑀘 𑀪𑀕𑀯𑀢𑀺 𑀏𑀯𑀸𑀢𑀺 ‘‘𑀬𑀣𑀸𑀬𑁄𑀕’’𑀦𑁆𑀢𑀺 𑀆𑀳. 𑀢𑁂𑀦𑀸𑀢𑀺 𑀪𑀕𑀯𑀢𑁄 𑀓𑀫𑁆𑀫𑀲𑁆𑀲 𑀘 𑀇𑀦𑁆𑀤𑀢𑁆𑀢𑀸. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼. 𑀉𑀮𑁆𑀮𑀺𑀗𑁆𑀕𑁂𑀦𑁆𑀢𑀺 𑀧𑀓𑀸𑀲𑁂𑀦𑁆𑀢𑀺 𑀨𑀮𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀻𑀳𑀺 𑀓𑀸𑀭𑀡𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀅𑀯𑀩𑁄𑀥𑀢𑁄. ‘‘𑀲𑁄 𑀢𑀁 𑀦𑀺𑀫𑀺𑀢𑁆𑀢𑀁 𑀆𑀲𑁂𑀯𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁯.𑁩𑁫) 𑀕𑁄𑀘𑀭𑀓𑀭𑀡𑀫𑁆𑀧𑀺 𑀆𑀲𑁂𑀯𑀦𑀸𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀓𑀸𑀦𑀺𑀘𑀺 𑀕𑁄𑀘𑀭𑀸𑀲𑁂𑀯𑀦𑀸𑀬𑀸’’𑀢𑀺. 𑀢𑀢𑁆𑀣 𑀲𑀩𑁆𑀩𑁂𑀲𑀁 𑀕𑁄𑀘𑀭𑀻𑀓𑀸𑀢𑀩𑁆𑀩𑀢𑁆𑀢𑁂𑀧𑀺 ‘‘𑀓𑀸𑀦𑀺𑀘𑀻’’𑀢𑀺 𑀯𑀘𑀦𑀁 𑀅𑀯𑀺𑀧𑀲𑁆𑀲𑀺𑀢𑀩𑁆𑀩𑀸𑀦𑀁 𑀩𑀳𑀼𑀮𑀻𑀫𑀦𑀲𑀺𑀓𑀭𑀡𑁂𑀦 𑀅𑀦𑀸𑀲𑁂𑀯𑀦𑀻𑀬𑀢𑁆𑀢𑀸. 𑀧𑀘𑁆𑀘𑀯𑁂𑀓𑁆𑀔𑀡𑀸𑀫𑀢𑁆𑀢𑀫𑁂𑀯 𑀳𑀺 𑀢𑁂𑀲𑀼 𑀳𑁄𑀢𑀻𑀢𑀺. ‘‘𑀢𑀲𑁆𑀲 𑀢𑀁 𑀫𑀕𑁆𑀕𑀁 𑀆𑀲𑁂𑀯𑀢𑁄’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁧𑁭𑁦) 𑀪𑀸𑀯𑀦𑀸 ‘‘𑀆𑀲𑁂𑀯𑀦𑀸’’𑀢𑀺 𑀯𑀼𑀢𑁆𑀢𑀸𑀢𑀺 𑀪𑀸𑀯𑁂𑀢𑀩𑁆𑀩𑀸𑀦𑀺 𑀲𑀤𑁆𑀥𑀸𑀤𑀻𑀦𑀺 𑀲𑀦𑁆𑀥𑀸𑀬𑀸𑀳 ‘‘𑀓𑀸𑀦𑀺𑀘𑀺 𑀪𑀸𑀯𑀦𑀸𑀲𑁂𑀯𑀦𑀸𑀬𑀸’’𑀢𑀺. 𑀆𑀥𑀺𑀧𑀘𑁆𑀘𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀪𑀸𑀯𑁄, 𑀅𑀲𑀢𑀺 𑀘 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀪𑀸𑀯𑁂 𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀦𑀁 𑀅𑀢𑁆𑀢𑀦𑁄 𑀧𑀘𑁆𑀘𑀬𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑁂𑀳𑀺 𑀢𑀁𑀲𑀳𑀺𑀢𑀲𑀦𑁆𑀢𑀸𑀦𑁂 𑀅𑀜𑁆𑀜𑀸𑀓𑀸𑀭𑁂𑀦 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑁂𑀳𑀺 𑀮𑀺𑀗𑁆𑀕𑀸𑀤𑀻𑀳𑀺 𑀅𑀦𑀼𑀯𑀢𑁆𑀢𑀦𑀻𑀬𑀪𑀸𑀯𑁄, 𑀇𑀫𑀲𑁆𑀫𑀺𑀜𑁆𑀘𑀢𑁆𑀣𑁂 𑀇𑀦𑁆𑀤𑀦𑁆𑀢𑀺 𑀧𑀭𑀫𑀺𑀲𑁆𑀲𑀭𑀺𑀬𑀁 𑀓𑀭𑁄𑀦𑁆𑀢𑀺𑀘𑁆𑀘𑁂𑀯 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀘𑀓𑁆𑀔𑀸𑀤𑀻𑀲𑀼 𑀤𑀲𑁆𑀲𑀺𑀢𑁂𑀦 𑀦𑀬𑁂𑀦 𑀅𑀜𑁆𑀜𑁂𑀲𑀜𑁆𑀘 𑀢𑀤𑀦𑀼𑀯𑀢𑁆𑀢𑀻𑀲𑀼 𑀆𑀥𑀺𑀧𑀘𑁆𑀘𑀁 𑀬𑀣𑀸𑀭𑀳𑀁 𑀬𑁄𑀚𑁂𑀢𑀩𑁆𑀩𑀁.

𑀳𑁂𑀝𑁆𑀞𑀸𑀢𑀺 𑀅𑀝𑁆𑀞𑀲𑀸𑀮𑀺𑀦𑀺𑀬𑀁. 𑀅𑀫𑁄𑀳𑁄 𑀏𑀯, 𑀦 𑀯𑀺𑀲𑀼𑀁 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸, 𑀢𑀲𑁆𑀫𑀸 𑀅𑀫𑁄𑀳𑀲𑁆𑀲 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀧𑀤𑁂 𑀯𑀺𑀪𑀸𑀯𑀺𑀢𑀸𑀦𑀺 𑀮𑀓𑁆𑀔𑀡𑀸𑀤𑀻𑀦𑀺 𑀢𑁂𑀲𑀜𑁆𑀘 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁂𑀲𑀸𑀦𑀺 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀮𑀓𑁆𑀔𑀡𑀸𑀤𑀻𑀳𑀺 𑀲𑀭𑀽𑀧𑁂𑀦𑁂𑀯 𑀆𑀕𑀢𑀸𑀦𑀺. 𑀦𑀦𑀼 𑀘 𑀲𑀼𑀔𑀺𑀦𑁆𑀤𑁆𑀭𑀺𑀬𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀸𑀦𑀁 𑀢𑀢𑁆𑀣 𑀮𑀓𑁆𑀔𑀡𑀸𑀤𑀻𑀦𑀺 𑀦 𑀯𑀼𑀢𑁆𑀢𑀸𑀦𑀻𑀢𑀺? 𑀓𑀺𑀜𑁆𑀘𑀸𑀧𑀺 𑀦 𑀯𑀼𑀢𑁆𑀢𑀸𑀦𑀺, 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀁 𑀧𑀦 𑀯𑀼𑀢𑁆𑀢𑀮𑀓𑁆𑀔𑀡𑀸𑀤𑀺𑀯𑀲𑁂𑀦 𑀯𑀺𑀜𑁆𑀜𑁂𑀬𑁆𑀬𑀢𑁄 𑀏𑀢𑁂𑀲𑀫𑁆𑀧𑀺 𑀯𑀼𑀢𑁆𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀓𑀣𑀁? 𑀇𑀝𑁆𑀞𑀨𑁄𑀝𑁆𑀞𑀩𑁆𑀩𑀸𑀦𑀼𑀪𑀯𑀦𑀮𑀓𑁆𑀔𑀡𑀁 𑀲𑀼𑀔𑀺𑀦𑁆𑀤𑁆𑀭𑀺𑀬𑀁, 𑀇𑀝𑁆𑀞𑀸𑀓𑀸𑀭𑀲𑀫𑁆𑀪𑁄𑀕𑀭𑀲𑀁, 𑀓𑀸𑀬𑀺𑀓𑀲𑁆𑀲𑀸𑀤𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀓𑀸𑀬𑀺𑀦𑁆𑀤𑁆𑀭𑀺𑀬𑀧𑀤𑀝𑁆𑀞𑀸𑀦𑀁 ¶ . 𑀅𑀦𑀺𑀝𑁆𑀞𑀨𑁄𑀝𑁆𑀞𑀩𑁆𑀩𑀸𑀦𑀼𑀪𑀯𑀦𑀮𑀓𑁆𑀔𑀡𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁, 𑀅𑀦𑀺𑀝𑁆𑀞𑀸𑀓𑀸𑀭𑀲𑀫𑁆𑀪𑁄𑀕𑀭𑀲𑀁, 𑀓𑀸𑀬𑀺𑀓𑀸𑀩𑀸𑀥𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀓𑀸𑀬𑀺𑀦𑁆𑀤𑁆𑀭𑀺𑀬𑀧𑀤𑀝𑁆𑀞𑀸𑀦𑀦𑁆𑀢𑀺. 𑀏𑀢𑁆𑀣 𑀘 𑀇𑀝𑁆𑀞𑀸𑀦𑀺𑀝𑁆𑀞𑀸𑀓𑀸𑀭𑀸𑀦𑀫𑁂𑀯 𑀆𑀭𑀫𑁆𑀫𑀡𑀸𑀦𑀁 𑀲𑀫𑁆𑀪𑁄𑀕𑀭𑀲𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀦 𑀯𑀺𑀧𑀭𑀻𑀢𑁂𑀧𑀺 𑀇𑀝𑁆𑀞𑀸𑀓𑀸𑀭𑁂𑀦 𑀅𑀦𑀺𑀝𑁆𑀞𑀸𑀓𑀸𑀭𑁂𑀦 𑀘 𑀲𑀫𑁆𑀪𑁄𑀕𑀭𑀲𑀢𑀸𑀢𑀺.

𑀲𑀢𑁆𑀢𑀸𑀦𑀁 ¶ 𑀅𑀭𑀺𑀬𑀪𑀽𑀫𑀺𑀧𑀝𑀺𑀮𑀸𑀪𑁄 𑀪𑀕𑀯𑀢𑁄 𑀤𑁂𑀲𑀦𑀸𑀬 𑀲𑀸𑀥𑀸𑀭𑀡𑀁 𑀧𑀥𑀸𑀦𑀜𑁆𑀘 𑀧𑀬𑁄𑀚𑀦𑀦𑁆𑀢𑀺 𑀆𑀳 ‘‘𑀅𑀚𑁆𑀛𑀢𑁆𑀢𑀥𑀫𑁆𑀫𑀁 𑀧𑀭𑀺𑀜𑁆𑀜𑀸𑀬𑀸’’𑀢𑀺𑀆𑀤𑀺. 𑀅𑀝𑁆𑀞𑀓𑀣𑀸𑀬𑀁 𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀦𑀦𑁆𑀢𑀭𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀤𑁂𑀲𑀦𑀓𑁆𑀓𑀫𑁄 𑀯𑀼𑀢𑁆𑀢𑁄, 𑀲𑁄 𑀇𑀦𑁆𑀤𑁆𑀭𑀺𑀬𑀬𑀫𑀓𑀤𑁂𑀲𑀦𑀸𑀬 𑀲𑀫𑁂𑀢𑀺. 𑀇𑀥 𑀧𑀦 𑀇𑀦𑁆𑀤𑁆𑀭𑀺𑀬𑀯𑀺𑀪𑀗𑁆𑀕𑁂 𑀫𑀦𑀺𑀦𑁆𑀤𑁆𑀭𑀺𑀬𑀸𑀦𑀦𑁆𑀢𑀭𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀯𑀼𑀢𑁆𑀢𑀁, 𑀢𑀁 𑀧𑀼𑀭𑀺𑀫𑀧𑀘𑁆𑀙𑀺𑀫𑀸𑀦𑀁 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀁 𑀅𑀦𑀼𑀧𑀸𑀮𑀓𑀢𑁆𑀢𑁂𑀦 𑀢𑁂𑀲𑀁 𑀫𑀚𑁆𑀛𑁂 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀜𑁆𑀘 𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀁, 𑀲𑀩𑁆𑀩𑀁 𑀢𑀁 𑀤𑀼𑀓𑁆𑀔𑀁. 𑀬𑀸𑀯 𑀘 𑀤𑀼𑀯𑀺𑀥𑀢𑁆𑀢𑀪𑀸𑀯𑀸𑀦𑀼𑀧𑀸𑀮𑀓𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀯𑀢𑁆𑀢𑀺, 𑀢𑀸𑀯 𑀤𑀼𑀓𑁆𑀔𑀪𑀽𑀢𑀸𑀦𑀁 𑀏𑀢𑁂𑀲𑀁 𑀯𑁂𑀤𑀬𑀺𑀢𑀸𑀦𑀁 𑀅𑀦𑀺𑀯𑀢𑁆𑀢𑀻𑀢𑀺 𑀜𑀸𑀧𑀦𑀢𑁆𑀣𑀁. 𑀢𑁂𑀦 𑀘 𑀘𑀓𑁆𑀔𑀸𑀤𑀻𑀦𑀁 𑀤𑀼𑀓𑁆𑀔𑀸𑀦𑀼𑀩𑀦𑁆𑀥𑀢𑀸𑀬 𑀧𑀭𑀺𑀜𑁆𑀜𑁂𑀬𑁆𑀬𑀢𑀁 𑀜𑀸𑀧𑁂𑀢𑀺. 𑀢𑀢𑁄 𑀅𑀦𑀦𑁆𑀢𑀭𑀁 𑀪𑀸𑀯𑁂𑀢𑀩𑁆𑀩𑀢𑁆𑀢𑀸𑀢𑀺 𑀪𑀸𑀯𑀦𑀸𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀁 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀤𑀲𑁆𑀲𑀦𑀸𑀦𑀦𑁆𑀢𑀭𑀸 𑀳𑀺 𑀪𑀸𑀯𑀦𑀸𑀢𑀺.

𑀲𑀢𑀺𑀧𑀺 𑀧𑀼𑀭𑁂𑀚𑀸𑀢𑀸𑀤𑀺𑀧𑀘𑁆𑀘𑀬𑀪𑀸𑀯𑁂 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀪𑀸𑀯𑁂𑀦 𑀲𑀸𑀥𑁂𑀢𑀩𑁆𑀩𑀫𑁂𑀯 𑀓𑀺𑀘𑁆𑀘𑀁 ‘‘𑀓𑀺𑀘𑁆𑀘’’𑀦𑁆𑀢𑀺 𑀆𑀳 𑀢𑀲𑁆𑀲 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑁆𑀢𑀸 𑀇𑀦𑁆𑀤𑁆𑀭𑀺𑀬𑀓𑀣𑀸𑀬 𑀘 𑀧𑀯𑀢𑁆𑀢𑀢𑁆𑀢𑀸. 𑀧𑀼𑀩𑁆𑀩𑀗𑁆𑀕𑀫𑀪𑀸𑀯𑁂𑀦 𑀫𑀦𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑀯𑀢𑁆𑀢𑀸𑀧𑀦𑀁 𑀳𑁄𑀢𑀺, 𑀦𑀸𑀜𑁆𑀜𑁂𑀲𑀁. 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀺𑀧𑀺 𑀳𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀸𑀥𑁂𑀢𑀩𑁆𑀩𑀪𑀽𑀢𑀸𑀦𑁂𑀯 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀇𑀦𑁆𑀤𑁆𑀭𑀺𑀬𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀺 𑀘𑁂𑀢𑀲𑀺𑀓𑀢𑁆𑀢𑀸𑀢𑀺. ‘‘𑀲𑀩𑁆𑀩𑀢𑁆𑀣 𑀘 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀪𑀸𑀯𑁂𑀦 𑀲𑀸𑀥𑁂𑀢𑀩𑁆𑀩’’𑀦𑁆𑀢𑀺 𑀅𑀬𑀁 𑀅𑀥𑀺𑀓𑀸𑀭𑁄 𑀅𑀦𑀼𑀯𑀢𑁆𑀢𑀢𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀅𑀦𑀼𑀧𑁆𑀧𑀸𑀤𑀦𑁂 𑀅𑀦𑀼𑀧𑀢𑁆𑀣𑀫𑁆𑀪𑁂 𑀘 𑀢𑀧𑁆𑀧𑀘𑁆𑀘𑀬𑀸𑀦𑀁 𑀢𑀧𑁆𑀧𑀯𑀢𑁆𑀢𑀦𑁂 𑀦𑀺𑀫𑀺𑀢𑁆𑀢𑀪𑀸𑀯𑁄 𑀅𑀦𑀼𑀯𑀺𑀥𑀸𑀦𑀁. 𑀙𑀸𑀤𑁂𑀢𑁆𑀯𑀸 𑀨𑀭𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸 𑀲𑀳𑀚𑀸𑀢𑁂 𑀅𑀪𑀺𑀪𑀯𑀺𑀢𑁆𑀯𑀸 𑀲𑀬𑀫𑁂𑀯 𑀧𑀸𑀓𑀝𑀸 𑀳𑁄𑀢𑀺, 𑀲𑀳𑀚𑀸𑀢𑀸 𑀘 𑀢𑀩𑁆𑀩𑀲𑁂𑀦 𑀲𑀼𑀔𑀤𑀼𑀓𑁆𑀔𑀪𑀸𑀯𑀧𑁆𑀧𑀢𑁆𑀢𑀸 𑀯𑀺𑀬𑀸𑀢𑀺 𑀆𑀳 ‘‘𑀬𑀣𑀸𑀲𑀓𑀁 𑀑𑀴𑀸𑀭𑀺𑀓𑀸𑀓𑀸𑀭𑀸𑀦𑀼𑀧𑀸𑀧𑀦’’𑀦𑁆𑀢𑀺. 𑀅𑀲𑀦𑁆𑀢𑀲𑁆𑀲 𑀅𑀧𑀡𑀻𑀢𑀲𑁆𑀲𑀧𑀺 𑀅𑀓𑀼𑀲𑀮𑀢𑀩𑁆𑀩𑀺𑀧𑀸𑀓𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀫𑀚𑁆𑀛𑀢𑁆𑀢𑀸𑀓𑀸𑀭𑀸𑀦𑀼𑀧𑀸𑀧𑀦𑀁 𑀬𑁄𑀚𑁂𑀢𑀩𑁆𑀩𑀁, 𑀲𑀫𑀸𑀦𑀚𑀸𑀢𑀺𑀬𑀁 𑀯𑀸 𑀲𑀼𑀔𑀤𑀼𑀓𑁆𑀔𑁂𑀳𑀺 𑀲𑀦𑁆𑀢𑀧𑀡𑀻𑀢𑀸𑀓𑀸𑀭𑀸𑀦𑀼𑀧𑀸𑀧𑀦𑀜𑁆𑀘. 𑀧𑀲𑀦𑁆𑀦𑀧𑀕𑁆𑀕𑀳𑀺𑀢𑀉𑀧𑀝𑁆𑀞𑀺𑀢𑀲𑀫𑀸𑀳𑀺𑀢𑀤𑀲𑁆𑀲𑀦𑀸𑀓𑀸𑀭𑀸𑀦𑀼𑀧𑀸𑀧𑀦𑀁 𑀬𑀣𑀸𑀓𑁆𑀓𑀫𑀁 𑀲𑀤𑁆𑀥𑀸𑀤𑀻𑀦𑀁. 𑀆𑀤𑀺-𑀲𑀤𑁆𑀤𑁂𑀦 𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺 𑀕𑀳𑀺𑀢𑀸𑀦𑀺, 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀲𑁆𑀲𑁂𑀯 𑀘 𑀇𑀦𑁆𑀤𑁆𑀭𑀺𑀬𑀲𑁆𑀲 𑀓𑀺𑀘𑁆𑀘𑀁 𑀤𑀲𑁆𑀲𑀺𑀢𑀁, 𑀢𑁂𑀦𑁂𑀯 𑀨𑀮𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀢𑀁𑀢𑀁𑀲𑀁𑀬𑁄𑀚𑀦𑀸𑀦𑀁𑀬𑁂𑀯 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑀳𑀸𑀦𑀓𑀺𑀘𑁆𑀘𑀢𑀸 𑀤𑀲𑁆𑀲𑀺𑀢𑀸 𑀳𑁄𑀢𑀻𑀢𑀺. 𑀲𑀩𑁆𑀩𑀓𑀢𑀓𑀺𑀘𑁆𑀘𑀁 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀅𑀜𑁆𑀜𑀲𑁆𑀲 𑀓𑀸𑀢𑀩𑁆𑀩𑀲𑁆𑀲 𑀅𑀪𑀸𑀯𑀸 𑀅𑀫𑀢𑀸𑀪𑀺𑀫𑀼𑀔𑀫𑁂𑀯 𑀢𑀩𑁆𑀪𑀸𑀯𑀧𑀘𑁆𑀘𑀬𑁄 𑀘 𑀳𑁄𑀢𑀺, 𑀦 𑀇𑀢𑀭𑀸𑀦𑀺 𑀯𑀺𑀬 𑀓𑀺𑀘𑁆𑀘𑀦𑁆𑀢𑀭𑀧𑀲𑀼𑀢𑀜𑁆𑀘. 𑀢𑁂𑀦𑀸𑀳 ‘‘𑀅𑀫𑀢𑀸𑀪𑀺𑀫𑀼𑀔𑀪𑀸𑀯𑀧𑀘𑁆𑀘𑀬𑀢𑀸 𑀘𑀸’’𑀢𑀺.

𑁨𑁨𑁦. 𑀏𑀯𑀁 ¶ ¶ 𑀲𑀦𑁆𑀢𑁂𑀧𑀻𑀢𑀺 𑀲𑀢𑀺𑀧𑀺 𑀲𑀩𑁆𑀩𑀲𑀗𑁆𑀕𑀸𑀳𑀓𑀢𑁆𑀢𑁂 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀧𑀤𑀸𑀤𑀻𑀳𑀺 𑀲𑀗𑁆𑀕𑀳𑁂𑀢𑀩𑁆𑀩𑀸𑀦𑀺 𑀓𑀼𑀲𑀮𑀸𑀓𑀼𑀲𑀮𑀯𑀻𑀭𑀺𑀬𑀸𑀤𑀻𑀦𑀺, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀧𑀤𑀸𑀤𑀻𑀳𑀺 𑀲𑀗𑁆𑀕𑀳𑁂𑀢𑀩𑁆𑀩𑀸𑀦𑀺 𑀓𑀸𑀮𑀧𑀼𑀕𑁆𑀕𑀮𑀧𑀘𑁆𑀘𑀬𑀸𑀤𑀺𑀪𑁂𑀤𑁂𑀦 𑀪𑀺𑀦𑁆𑀦𑀸𑀦𑀺 𑀘𑀓𑁆𑀔𑀸𑀤𑀻𑀦𑀺 𑀲𑀗𑁆𑀕𑀡𑁆𑀳𑀦𑁆𑀢𑀺𑀘𑁆𑀘𑁂𑀯 𑀲𑀩𑁆𑀩𑀲𑀗𑁆𑀕𑀸𑀳𑀓𑀸𑀦𑀺, 𑀦 𑀬𑀲𑁆𑀲𑀸 𑀪𑀽𑀫𑀺𑀬𑀸 𑀬𑀸𑀦𑀺 𑀦 𑀯𑀺𑀚𑁆𑀚𑀦𑁆𑀢𑀺, 𑀢𑁂𑀲𑀁 𑀲𑀗𑁆𑀕𑀸𑀳𑀓𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀢𑁂𑀦 𑀘 𑀅𑀯𑀺𑀲𑁂𑀲𑀺𑀢𑀢𑁆𑀢𑀸 𑀲𑀩𑁆𑀩𑁂𑀲𑀁 𑀲𑀩𑁆𑀩𑀪𑀽𑀫𑀺𑀓𑀢𑁆𑀢𑀕𑀳𑀡𑀧𑁆𑀧𑀲𑀗𑁆𑀕𑁂 𑀢𑀁𑀦𑀺𑀯𑀢𑁆𑀢𑀦𑁂𑀦 𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀘𑀦𑀁 𑀅𑀯𑀺𑀚𑁆𑀚𑀫𑀸𑀦𑀲𑁆𑀲 𑀲𑀗𑁆𑀕𑀸𑀳𑀓𑀢𑁆𑀢𑀤𑀻𑀧𑀓𑀁 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸

𑁨𑁨𑁩. 𑀇𑀥 𑀅𑀦𑀸𑀪𑀝𑁆𑀞𑀦𑁆𑀢𑀺 𑀏𑀓𑀦𑁆𑀢𑀸𑀦𑀸𑀭𑀫𑁆𑀫𑀡𑀢𑁆𑀢𑁂𑀦 𑀪𑀸𑀲𑀺𑀢𑀁. ‘‘𑀭𑀽𑀧𑀫𑀺𑀲𑁆𑀲𑀓𑀢𑁆𑀢𑀸 𑀅𑀦𑀸𑀭𑀫𑁆𑀫𑀡𑁂𑀲𑀼 𑀭𑀽𑀧𑀥𑀫𑁆𑀫𑁂𑀲𑀼 𑀲𑀗𑁆𑀕𑀳𑀺𑀢’’𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀫𑀺𑀲𑁆𑀲𑀓𑀢𑁆𑀢𑀸 𑀏𑀯 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀅𑀦𑀸𑀭𑀫𑁆𑀫𑀡𑁂𑀲𑀼 𑀅𑀲𑀗𑁆𑀕𑀳𑀺𑀢𑀁. 𑀦 𑀳𑀺 𑀅𑀝𑁆𑀞𑀺𑀦𑁆𑀤𑁆𑀭𑀺𑀬𑀸 𑀅𑀦𑀸𑀭𑀫𑁆𑀫𑀡𑀸𑀢𑀺 𑀯𑀼𑀢𑁆𑀢𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀏𑀓𑀤𑁂𑀲𑀲𑁆𑀲 𑀧𑀦 𑀅𑀦𑀸𑀭𑀫𑁆𑀫𑀡𑁂𑀲𑀼 𑀭𑀽𑀧𑀥𑀫𑁆𑀫𑁂𑀲𑀼 𑀲𑀗𑁆𑀕𑀳𑀺𑀢𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁, 𑀅𑀭𑀽𑀧𑀓𑁄𑀝𑁆𑀞𑀸𑀲𑁂𑀦 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀤𑀺𑀢𑀸 𑀅𑀢𑁆𑀣𑀻𑀢𑀺 𑀲𑀺𑀬𑀸𑀧𑀓𑁆𑀔𑁂 𑀲𑀗𑁆𑀕𑀳𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀭𑀽𑀧𑀓𑁄𑀝𑁆𑀞𑀸𑀲𑁂𑀦 𑀧𑀦 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀤𑀺𑀢𑀸, 𑀭𑀽𑀧𑀓𑁄𑀝𑁆𑀞𑀸𑀲𑁂𑀦 𑀘 𑀦𑀯𑀢𑁆𑀢𑀩𑁆𑀩𑀢𑀸 𑀅𑀢𑁆𑀣𑀻𑀢𑀺 𑀫𑀺𑀲𑁆𑀲𑀓𑀲𑁆𑀲 𑀲𑀫𑀼𑀤𑀸𑀬𑀲𑁆𑀲𑁂𑀯 𑀯𑀲𑁂𑀦 𑀲𑀺𑀬𑀸𑀧𑀓𑁆𑀔𑁂 𑀲𑀗𑁆𑀕𑀳𑀺𑀢𑀁, 𑀦 𑀏𑀓𑀤𑁂𑀲𑀯𑀲𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀅𑀦𑀸𑀭𑀫𑁆𑀫𑀡𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀤𑀺𑀪𑀸𑀯𑁂𑀦 𑀦𑀯𑀢𑁆𑀢𑀩𑁆𑀩𑀁 𑀦 𑀳𑁄𑀢𑀻𑀢𑀺. ‘‘𑀭𑀽𑀧𑀜𑁆𑀘 𑀦𑀺𑀩𑁆𑀩𑀸𑀦𑀜𑁆𑀘 𑀅𑀦𑀸𑀭𑀫𑁆𑀫𑀡𑀸, 𑀲𑀢𑁆𑀢𑀺𑀦𑁆𑀤𑁆𑀭𑀺𑀬𑀸 𑀅𑀦𑀸𑀭𑀫𑁆𑀫𑀡𑀸’’𑀢𑀺𑀆𑀤𑀺𑀯𑀘𑀦𑀜𑁆𑀘 𑀅𑀯𑀺𑀚𑁆𑀚𑀫𑀸𑀦𑀸𑀭𑀫𑁆𑀫𑀡𑀸𑀦𑀸𑀭𑀫𑁆𑀫𑀡𑁂𑀲𑀼 𑀦𑀯𑀢𑁆𑀢𑀩𑁆𑀩𑁂𑀲𑀼 𑀅𑀦𑀸𑀭𑀫𑁆𑀫𑀡𑀢𑁆𑀢𑀸 𑀦𑀯𑀢𑁆𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑀺, 𑀦 𑀲𑀸𑀭𑀫𑁆𑀫𑀡𑀲𑁆𑀲𑁂𑀯 𑀦𑀯𑀢𑁆𑀢𑀩𑁆𑀩𑀢𑀁, 𑀦𑀯𑀢𑁆𑀢𑀩𑁆𑀩𑀲𑁆𑀲 𑀯𑀸 𑀲𑀸𑀭𑀫𑁆𑀫𑀡𑀢𑀁. 𑀦 𑀳𑀺 𑀦𑀯𑀢𑁆𑀢𑀩𑁆𑀩-𑀲𑀤𑁆𑀤𑁄 𑀲𑀸𑀭𑀫𑁆𑀫𑀡𑁂 𑀦𑀺𑀭𑀼𑀴𑁆𑀳𑁄. 𑀬𑀤𑀺𑀧𑀺 𑀲𑀺𑀬𑀸, ‘‘𑀢𑀺𑀲𑁆𑀲𑁄 𑀘 𑀯𑁂𑀤𑀦𑀸 𑀭𑀽𑀧𑀜𑁆𑀘 𑀦𑀺𑀩𑁆𑀩𑀸𑀦𑀜𑁆𑀘 𑀇𑀫𑁂 𑀥𑀫𑁆𑀫𑀸 𑀦𑀯𑀢𑁆𑀢𑀩𑁆𑀩𑀸 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺𑀆𑀤𑀺 𑀦 𑀯𑀼𑀘𑁆𑀘𑁂𑀬𑁆𑀬, 𑀅𑀣𑀸𑀧𑀺 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀤𑀺𑀲𑀫𑁆𑀩𑀦𑁆𑀥𑁄 𑀦𑀯𑀢𑁆𑀢𑀩𑁆𑀩-𑀲𑀤𑁆𑀤𑁄 𑀲𑀸𑀭𑀫𑁆𑀫𑀡𑁂𑀲𑁆𑀯𑁂𑀯 𑀯𑀢𑁆𑀢𑀢𑀺, ‘‘𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸’’𑀢𑀺𑀆𑀤𑀺𑀁 𑀅𑀯𑀢𑁆𑀯𑀸 ‘‘𑀫𑀦𑀸𑀬𑀢𑀦𑀁 𑀲𑀺𑀬𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁…𑀧𑁂… 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡’’𑀦𑁆𑀢𑀺𑀧𑀺, ‘‘𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁…𑀧𑁂… 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡’’𑀦𑁆𑀢𑀺𑀧𑀺, ‘‘𑀲𑀺𑀬𑀸 𑀅𑀦𑀸𑀭𑀫𑁆𑀫𑀡’’𑀦𑁆𑀢𑀺𑀧𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀦 𑀳𑀺 𑀧𑀜𑁆𑀳𑀧𑀼𑀘𑁆𑀙𑀓𑁂 𑀲𑀸𑀯𑀲𑁂𑀲𑀸 𑀤𑁂𑀲𑀦𑀸 𑀅𑀢𑁆𑀣𑀻𑀢𑀺 ¶ . ‘‘𑀅𑀝𑁆𑀞𑀺𑀦𑁆𑀤𑁆𑀭𑀺𑀬𑀸 𑀲𑀺𑀬𑀸 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸’’𑀢𑀺 𑀏𑀢𑁆𑀣 𑀘 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 ¶ 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀓𑀸𑀮𑁂 𑀅𑀭𑀽𑀧𑀲𑁆𑀲 𑀭𑀽𑀧𑀲𑁆𑀲 𑀘 𑀅𑀦𑀸𑀭𑀫𑁆𑀫𑀡𑀢𑁆𑀢𑀸 𑀦𑀯𑀢𑁆𑀢𑀩𑁆𑀩𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀦𑁆𑀤𑁆𑀭𑀺𑀬𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁨𑁨𑁫. ‘‘‘𑀓𑀺𑀁𑀯𑀸𑀤𑀻 ¶ ¶ 𑀪𑀦𑁆𑀢𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’𑀢𑀺? ‘𑀯𑀺𑀪𑀚𑁆𑀚𑀯𑀸𑀤𑀻 𑀫𑀳𑀸𑀭𑀸𑀚𑀸’’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑀢𑀢𑀺𑀬𑀲𑀗𑁆𑀕𑀻𑀢𑀺𑀓𑀣𑀸) 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀢𑁆𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀯𑀓𑀸 𑀯𑀺𑀪𑀚𑁆𑀚𑀯𑀸𑀤𑀺𑀦𑁄. 𑀢𑁂 𑀳𑀺 𑀯𑁂𑀦𑀬𑀺𑀓𑀸𑀤𑀺𑀪𑀸𑀯𑀁 𑀯𑀺𑀪𑀚𑁆𑀚 𑀯𑀤𑀦𑁆𑀢𑀺, 𑀘𑀻𑀯𑀭𑀸𑀤𑀻𑀦𑀁 𑀲𑁂𑀯𑀺𑀢𑀩𑁆𑀩𑀸𑀲𑁂𑀯𑀺𑀢𑀩𑁆𑀩𑀪𑀸𑀯𑀁 𑀯𑀸 𑀲𑀲𑁆𑀲𑀢𑀼𑀘𑁆𑀙𑁂𑀤𑀯𑀸𑀤𑁂 𑀯𑀸 𑀯𑀺𑀪𑀚𑁆𑀚 𑀯𑀤𑀦𑁆𑀢𑀺 ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺𑀆𑀤𑀻𑀦𑀁 𑀞𑀧𑀦𑀻𑀬𑀸𑀦𑀁 𑀞𑀧𑀦𑀢𑁄 𑀭𑀸𑀕𑀸𑀤𑀺𑀓𑁆𑀔𑀬𑀲𑁆𑀲 𑀲𑀲𑁆𑀲𑀢𑀲𑁆𑀲 𑀭𑀸𑀕𑀸𑀤𑀺𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀉𑀘𑁆𑀙𑁂𑀤𑀲𑁆𑀲 𑀘 𑀯𑀘𑀦𑀢𑁄, 𑀦 𑀧𑀦 𑀏𑀓𑀁𑀲𑀩𑁆𑀬𑀸𑀓𑀭𑀡𑀻𑀬𑀸𑀤𑀬𑁄 𑀢𑀬𑁄 𑀧𑀜𑁆𑀳𑁂 𑀅𑀧𑀦𑁂𑀢𑁆𑀯𑀸 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀻𑀬𑀫𑁂𑀯 𑀯𑀤𑀦𑁆𑀢𑀻𑀢𑀺. 𑀯𑀺𑀪𑀚𑁆𑀚𑀯𑀸𑀤𑀻𑀦𑀁 𑀫𑀡𑁆𑀟𑀮𑀁 𑀲𑀫𑀽𑀳𑁄 𑀯𑀺𑀪𑀚𑁆𑀚𑀯𑀸𑀤𑀺𑀫𑀡𑁆𑀟𑀮𑀁, 𑀯𑀺𑀪𑀚𑁆𑀚𑀯𑀸𑀤𑀺𑀦𑁄 𑀯𑀸 𑀪𑀕𑀯𑀢𑁄 𑀧𑀭𑀺𑀲𑀸 𑀯𑀺𑀪𑀚𑁆𑀚𑀯𑀸𑀤𑀺𑀫𑀡𑁆𑀟𑀮𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀆𑀘𑀭𑀺𑀬𑁂𑀳𑀺 𑀯𑀼𑀢𑁆𑀢𑀅𑀯𑀺𑀧𑀭𑀻𑀢𑀢𑁆𑀣𑀤𑀻𑀧𑀦𑁂𑀦 𑀢𑁂 𑀅𑀦𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑁂𑀦. ‘‘𑀅𑀯𑀺𑀚𑁆𑀚𑀸 𑀧𑀼𑀜𑁆𑀜𑀸𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺𑀆𑀤𑀺𑀁 𑀯𑀤𑀦𑁆𑀢𑁄 𑀓𑀣𑀸𑀯𑀢𑁆𑀣𑀼𑀫𑁆𑀳𑀺 𑀧𑀝𑀺𑀓𑁆𑀔𑀺𑀢𑁆𑀢𑁂 𑀧𑀼𑀕𑁆𑀕𑀮𑀯𑀸𑀤𑀸𑀤𑀺𑀓𑁂 𑀘 𑀯𑀤𑀦𑁆𑀢𑁄 𑀲𑀓𑀲𑀫𑀬𑀁 𑀯𑁄𑀓𑁆𑀓𑀫𑀢𑀺 𑀦𑀸𑀫, 𑀢𑀣𑀸 𑀅𑀯𑁄𑀓𑁆𑀓𑀫𑀦𑁆𑀢𑁂𑀦. 𑀧𑀭𑀲𑀫𑀬𑀁 𑀤𑁄𑀲𑀸𑀭𑁄𑀧𑀦𑀩𑁆𑀬𑀸𑀧𑀸𑀭𑀯𑀺𑀭𑀳𑁂𑀦 𑀅𑀦𑀸𑀬𑀽𑀳𑀦𑁆𑀢𑁂𑀦. ‘‘𑀇𑀤𑀫𑁆𑀧𑀺 𑀬𑀼𑀢𑁆𑀢𑀁 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀧𑀭𑀲𑀫𑀬𑀁 𑀅𑀲𑀫𑁆𑀧𑀺𑀡𑁆𑀟𑁂𑀦𑁆𑀢𑁂𑀦𑀸𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺.

‘‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀬𑀣𑀸 𑀢𑀤𑁂𑀯𑀺𑀤𑀁 𑀯𑀺𑀜𑁆𑀜𑀸𑀡𑀁 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀺 𑀅𑀦𑀜𑁆𑀜’’𑀦𑁆𑀢𑀺𑀆𑀤𑀺𑀁 (𑀫. 𑀦𑀺. 𑁧.𑁩𑁯𑁬) 𑀯𑀤𑀦𑁆𑀢𑁄 𑀲𑀼𑀢𑁆𑀢𑀁 𑀧𑀝𑀺𑀩𑀸𑀳𑀢𑀺 𑀦𑀸𑀫, 𑀢𑀣𑀸 𑀅𑀧𑁆𑀧𑀝𑀺𑀩𑀸𑀳𑀦𑁆𑀢𑁂𑀦. ‘‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀬𑀣𑀸 𑀬𑁂𑀫𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 ¶ 𑀪𑀕𑀯𑀢𑀸, 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸’’𑀢𑀺 (𑀫. 𑀦𑀺. 𑁧.𑁨𑁩𑁪; 𑀧𑀸𑀘𑀺. 𑁪𑁧𑁮, 𑁪𑁨𑁯), ‘‘𑀲𑀼𑀧𑀺𑀦𑀦𑁆𑀢𑁂 𑀓𑀢𑁄 𑀯𑀻𑀢𑀺𑀓𑁆𑀓𑀫𑁄 𑀆𑀧𑀢𑁆𑀢𑀺𑀓𑀭𑁄 𑀳𑁄𑀢𑀻’’𑀢𑀺 𑀘 𑀏𑀯𑀫𑀸𑀤𑀺𑀁 𑀯𑀤𑀦𑁆𑀢𑁄 𑀯𑀺𑀦𑀬𑀁 𑀧𑀝𑀺𑀮𑁄𑀫𑁂𑀢𑀺 𑀦𑀸𑀫, 𑀢𑀩𑁆𑀩𑀺𑀧𑀭𑀺𑀬𑀸𑀬𑁂𑀦 𑀢𑀁 𑀅𑀦𑀼𑀮𑁄𑀫𑁂𑀦𑁆𑀢𑁂𑀦. 𑀧𑀝𑀺𑀮𑁄𑀫𑁂𑀦𑁆𑀢𑁄 𑀳𑀺 𑀓𑀫𑁆𑀫𑀦𑁆𑀢𑀭𑀁 𑀪𑀺𑀦𑁆𑀤𑀦𑁆𑀢𑁄 𑀥𑀫𑁆𑀫𑀢𑀜𑁆𑀘 𑀯𑀺𑀮𑁄𑀫𑁂𑀢𑀺. 𑀲𑀼𑀢𑁆𑀢𑀦𑁆𑀢𑁂 𑀯𑀼𑀢𑁆𑀢𑁂 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑁂, 𑀅𑀝𑁆𑀞𑀓𑀣𑀸𑀬𑀜𑁆𑀘 𑀯𑀼𑀢𑁆𑀢𑁂 𑀲𑀼𑀢𑁆𑀢𑀲𑀼𑀢𑁆𑀢𑀸𑀦𑀼𑀮𑁄𑀫𑀆𑀘𑀭𑀺𑀬𑀯𑀸𑀤𑀅𑀢𑁆𑀢𑀦𑁄𑀫𑀢𑀺𑀫𑀳𑀸𑀧𑀤𑁂𑀲𑁂 𑀑𑀮𑁄𑀓𑁂𑀦𑁆𑀢𑁂𑀦. 𑀢𑀁𑀑𑀮𑁄𑀓𑀦𑁂𑀦 𑀳𑀺 𑀲𑀼𑀢𑁆𑀢𑁂 ¶ 𑀯𑀺𑀦𑀬𑁂 𑀘 𑀲𑀦𑁆𑀢𑀺𑀝𑁆𑀞𑀢𑀺 𑀦𑀸𑀢𑀺𑀥𑀸𑀯𑀢𑀺. 𑀥𑀫𑁆𑀫𑀦𑁆𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀧𑀸𑀴𑀺𑀁. 𑀅𑀢𑁆𑀣𑀦𑁆𑀢𑀺 𑀢𑀤𑀢𑁆𑀣𑀁. 𑀳𑁂𑀢𑀼𑀳𑁂𑀢𑀼𑀨𑀮𑀸𑀦𑀺 𑀇𑀥 𑀦𑀸𑀥𑀺𑀧𑁆𑀧𑁂𑀢𑀸𑀦𑀺. ‘‘𑀤𑀼𑀓𑁆𑀔𑀸𑀤𑀻𑀲𑀼 𑀅𑀜𑁆𑀜𑀸𑀡𑀁 𑀅𑀯𑀺𑀚𑁆𑀚𑀸’’𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀧𑀼𑀦 ‘‘𑀧𑀼𑀩𑁆𑀩𑀦𑁆𑀢𑁂 𑀅𑀜𑁆𑀜𑀸𑀡’’𑀦𑁆𑀢𑀺𑀆𑀤𑀻𑀳𑀺 𑀅𑀧𑀭𑁂𑀳𑀺𑀧𑀺 𑀧𑀭𑀺𑀬𑀸𑀬𑁂𑀳𑀺 𑀦𑀺𑀤𑁆𑀤𑀺𑀲𑀦𑁆𑀢𑁂𑀦. ‘‘𑀲𑀗𑁆𑀔𑀸𑀭𑀸 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀪𑀯𑁄𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀡𑁆𑀳𑀸 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀉𑀧𑀸𑀤𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀺𑀤𑁆𑀤𑀺𑀲𑀦𑁆𑀢𑁂𑀦𑀸𑀢𑀺 𑀯𑀤𑀦𑁆𑀢𑀺.

𑀲𑀢𑁆𑀢𑁄𑀢𑀺 𑀲𑀢𑁆𑀢𑀲𑀼𑀜𑁆𑀜𑀢𑀸𑀢𑀺 𑀯𑀤𑀦𑁆𑀢𑀺, 𑀲𑀢𑁆𑀢𑀲𑀼𑀜𑁆𑀜𑁂𑀲𑀼 𑀯𑀸 𑀲𑀗𑁆𑀔𑀸𑀭𑁂𑀲𑀼 𑀲𑀢𑁆𑀢𑀯𑁄𑀳𑀸𑀭𑁄. 𑀧𑀘𑁆𑀘𑀬𑀸𑀓𑀸𑀭𑀫𑁂𑀯 𑀘𑀸𑀢𑀺 𑀧𑀘𑁆𑀘𑀬𑀸𑀓𑀸𑀭𑁄 𑀏𑀯 𑀘, 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄.

𑀢𑀲𑁆𑀫𑀸𑀢𑀺 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑀯𑀡𑁆𑀡𑀦𑀸𑀬 𑀓𑀸𑀢𑀩𑁆𑀩𑀢𑁆𑀢𑀸 𑀤𑀼𑀓𑁆𑀓𑀭𑀢𑁆𑀢𑀸 𑀘.

𑀧𑀢𑀺𑀝𑁆𑀞𑀁 𑀦𑀸𑀥𑀺𑀕𑀘𑁆𑀙𑀸𑀫𑀻𑀢𑀺 𑀬𑀢𑁆𑀣 𑀞𑀺𑀢𑀲𑁆𑀲 𑀯𑀡𑁆𑀡𑀦𑀸 𑀲𑀼𑀓𑀭𑀸 𑀳𑁄𑀢𑀺, 𑀢𑀁 𑀦𑀬𑀁 𑀅𑀢𑁆𑀢𑀦𑁄𑀬𑁂𑀯 𑀜𑀸𑀡𑀩𑀮𑁂𑀦 𑀦𑀸𑀥𑀺𑀕𑀘𑁆𑀙𑀸𑀫𑀻𑀢𑀺 𑀅𑀢𑁆𑀣𑁄. 𑀦𑀺𑀲𑁆𑀲𑀬𑀁 𑀧𑀦 𑀆𑀘𑀺𑀓𑁆𑀔𑀦𑁆𑀢𑁄 𑀆𑀳 ‘‘𑀲𑀸𑀲𑀦𑀁 𑀧𑀦𑀺𑀤’’𑀦𑁆𑀢𑀺𑀆𑀤𑀺. 𑀇𑀥 𑀲𑀸𑀲𑀦𑀦𑁆𑀢𑀺 𑀧𑀸𑀴𑀺𑀥𑀫𑁆𑀫𑀫𑀸𑀳, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀫𑁂𑀯 𑀯𑀸. 𑀲𑁄 𑀳𑀺 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀸𑀤𑀺𑀦𑀸𑀦𑀸𑀤𑁂𑀲𑀦𑀸𑀦𑀬𑀫𑀡𑁆𑀟𑀺𑀢𑁄 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑁄 𑀅𑀚𑁆𑀚𑀸𑀧𑀺 𑀧𑀯𑀢𑁆𑀢𑀢𑀻𑀢𑀺 𑀦𑀺𑀲𑁆𑀲𑀬𑁄 𑀳𑁄𑀢𑀺. 𑀢𑀤𑀝𑁆𑀞𑀓𑀣𑀸𑀲𑀗𑁆𑀔𑀸𑀢𑁄 𑀘 𑀧𑀼𑀩𑁆𑀩𑀸𑀘𑀭𑀺𑀬𑀫𑀕𑁆𑀕𑁄𑀢𑀺.

‘‘𑀢𑀁 𑀲𑀼𑀡𑀸𑀣 𑀲𑀫𑀸𑀳𑀺𑀢𑀸’’𑀢𑀺 𑀆𑀤𑀭𑀚𑀦𑀦𑁂 𑀓𑀺𑀁 𑀧𑀬𑁄𑀚𑀦𑀦𑁆𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺. 𑀅𑀝𑁆𑀞𑀺𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑀁 𑀓𑀢𑁆𑀯𑀸, 𑀬𑀣𑀸 𑀯𑀸 𑀦 𑀦𑀲𑁆𑀲𑀢𑀺, 𑀏𑀯𑀁 𑀅𑀝𑁆𑀞𑀺𑀕𑀢𑀁 𑀯𑀺𑀬 𑀓𑀭𑁄𑀦𑁆𑀢𑁄 𑀅𑀝𑁆𑀞𑀺𑀁 𑀓𑀢𑁆𑀯𑀸. 𑀧𑀼𑀩𑁆𑀩𑀓𑀸𑀮𑀢𑁄 𑀅𑀧𑀭𑀓𑀸𑀮𑁂 𑀪𑀯𑀁 𑀧𑀼𑀩𑁆𑀩𑀸𑀧𑀭𑀺𑀬𑀁. 𑀧𑀞𑀫𑀸𑀭𑀫𑁆𑀪𑀸𑀤𑀺𑀢𑁄 𑀧𑀪𑀼𑀢𑀺 𑀔𑀡𑁂 𑀔𑀡𑁂 𑀜𑀸𑀡𑀯𑀺𑀲𑁂𑀲𑀁 𑀓𑀺𑀮𑁂𑀲𑀓𑁆𑀔𑀬𑀯𑀺𑀲𑁂𑀲𑀜𑁆𑀘 𑀮𑀪𑀢𑀻𑀢𑀺 𑀅𑀢𑁆𑀣𑁄.

𑀓𑀫𑁆𑀫𑀯𑀺𑀧𑀸𑀓𑀓𑀺𑀮𑁂𑀲𑀯𑀝𑁆𑀝𑀸𑀦𑀁 𑀫𑀽𑀮𑀓𑀸𑀭𑀡𑀢𑁆𑀢𑀸 𑀆𑀤𑀺𑀢𑁄 𑀯𑀼𑀢𑁆𑀢𑀢𑁆𑀢𑀸 𑀘 𑀅𑀯𑀺𑀚𑁆𑀚𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀫𑀽𑀮𑀁. 𑀢𑀢𑁆𑀣 𑀯𑀮𑁆𑀮𑀺𑀬𑀸 𑀫𑀽𑀮𑁂 𑀤𑀺𑀝𑁆𑀞𑁂 𑀢𑀢𑁄 𑀧𑀪𑀼𑀢𑀺 𑀯𑀮𑁆𑀮𑀺𑀬𑀸 𑀳𑀭𑀡𑀁 𑀯𑀺𑀬 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 ¶ 𑀫𑀽𑀮𑁂 𑀤𑀺𑀝𑁆𑀞𑁂 𑀢𑀢𑁄 𑀧𑀪𑀼𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀤𑁂𑀲𑀦𑀸𑀢𑀺 𑀉𑀧𑀫𑀸𑀲𑀁𑀲𑀦𑁆𑀤𑀦𑀸 𑀦 𑀓𑀸𑀢𑀩𑁆𑀩𑀸. 𑀦 𑀳𑀺 𑀪𑀕𑀯𑀢𑁄 ‘‘𑀇𑀤𑀫𑁂𑀯 𑀤𑀺𑀝𑁆𑀞𑀁, 𑀇𑀢𑀭𑀁 𑀅𑀤𑀺𑀝𑁆𑀞’’𑀦𑁆𑀢𑀺 𑀯𑀺𑀪𑀚𑀦𑀻𑀬𑀁 𑀅𑀢𑁆𑀣𑀺 𑀲𑀩𑁆𑀩𑀲𑁆𑀲 𑀤𑀺𑀝𑁆𑀞𑀢𑁆𑀢𑀸. 𑀫𑀽𑀮𑀢𑁄 𑀧𑀪𑀼𑀢𑀺 𑀧𑀦 𑀯𑀮𑁆𑀮𑀺𑀬𑀸 𑀳𑀭𑀡𑀁 𑀯𑀺𑀬 𑀫𑀽𑀮𑀢𑁄 𑀧𑀪𑀼𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀤𑁂𑀲𑀦𑀸 𑀓𑀢𑀸𑀢𑀺 𑀇𑀤𑀫𑁂𑀢𑁆𑀣 𑀲𑀸𑀫𑀜𑁆𑀜𑀫𑀥𑀺𑀧𑁆𑀧𑁂𑀢𑀁, 𑀩𑁄𑀥𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦 𑀯𑀸 𑀩𑁄𑀥𑁂𑀢𑀩𑁆𑀩𑀪𑀸𑀯𑁂𑀦 𑀫𑀽𑀮𑀸𑀤𑀺𑀤𑀲𑁆𑀲𑀦𑀲𑀸𑀫𑀜𑁆𑀜𑀜𑁆𑀘 𑀬𑁄𑀚𑁂𑀢𑀩𑁆𑀩𑀁.

𑀢𑀲𑁆𑀲𑀸𑀢𑀺 ¶ 𑁋

‘‘𑀲 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀓𑀼𑀫𑀸𑀭𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀧𑀸𑀓𑀫𑀦𑁆𑀯𑀸𑀬 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄…𑀧𑁂… 𑀭𑀚𑀦𑀻𑀬𑁂𑀳𑀺, 𑀲𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀧𑀺𑀬𑀭𑀽𑀧𑁂 𑀭𑀽𑀧𑁂 𑀲𑀸𑀭𑀚𑁆𑀚𑀢𑀺, 𑀅𑀧𑀺𑀬𑀭𑀽𑀧𑁂 𑀭𑀽𑀧𑁂 𑀩𑁆𑀬𑀸𑀧𑀚𑁆𑀚𑀢𑀺, 𑀅𑀦𑀼𑀧𑀝𑁆𑀞𑀺𑀢𑀓𑀸𑀬𑀲𑀢𑀻 𑀘 𑀯𑀺𑀳𑀭𑀢𑀺 𑀧𑀭𑀺𑀢𑁆𑀢𑀘𑁂𑀢𑀲𑁄. 𑀲𑁄 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀬𑀢𑁆𑀣𑀲𑁆𑀲 𑀢𑁂 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀲𑁄 𑀏𑀯𑀁 𑀅𑀦𑀼𑀭𑁄𑀥𑀯𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄 𑀬𑀁 𑀓𑀺𑀜𑁆𑀘𑀺 𑀯𑁂𑀤𑀦𑀁 𑀯𑁂𑀤𑁂𑀢𑀺 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸, 𑀲𑁄 𑀢𑀁 𑀯𑁂𑀤𑀦𑀁 𑀅𑀪𑀺𑀦𑀦𑁆𑀤𑀢𑀺 𑀅𑀪𑀺𑀯𑀤𑀢𑀺 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀻’’𑀢𑀺 (𑀫. 𑀦𑀺. 𑁧.𑁪𑁦𑁮) 𑁋

𑀏𑀯𑀁 𑀯𑀼𑀢𑁆𑀢𑀲𑁆𑀲. 𑀏𑀯𑀁 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼𑀧𑀺. 𑀅𑀪𑀺𑀯𑀤𑀢𑁄𑀢𑀺 ‘‘𑀅𑀳𑁄 𑀲𑀼𑀔𑀁, 𑀅𑀳𑁄 𑀲𑀼𑀔’’𑀦𑁆𑀢𑀺 𑀯𑀘𑀻𑀪𑁂𑀤𑀓𑀭𑀧𑁆𑀧𑀢𑁆𑀢𑀸𑀬 𑀩𑀮𑀯𑀢𑀡𑁆𑀳𑀸𑀬 ‘‘𑀅𑀳𑀁 𑀫𑀫𑀸’’𑀢𑀺 𑀅𑀪𑀺𑀯𑀤𑀢𑁄. 𑀢𑀢𑁄 𑀩𑀮𑀯𑀢𑀺𑀬𑀸 𑀫𑁄𑀘𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀪𑀸𑀯𑁂𑀦 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑁄. 𑀢𑀢𑁄𑀧𑀺 𑀩𑀮𑀯𑀢𑀻 𑀉𑀧𑀸𑀤𑀸𑀦𑀪𑀽𑀢𑀸 𑀢𑀡𑁆𑀳𑀸 𑀦𑀦𑁆𑀤𑀻. 𑀏𑀢𑁆𑀣 𑀘 𑀅𑀪𑀺𑀦𑀦𑁆𑀤𑀦𑀸𑀤𑀺𑀦𑀸 𑀢𑀡𑁆𑀳𑀸 𑀯𑀼𑀢𑁆𑀢𑀸, 𑀦𑀦𑁆𑀤𑀻𑀯𑀘𑀦𑁂𑀦 𑀢𑀧𑁆𑀧𑀘𑁆𑀘𑀬𑀁 𑀉𑀧𑀸𑀤𑀸𑀦𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀦𑀦𑁆𑀤𑀺𑀢𑀸𑀢𑀤𑀯𑀺𑀧𑁆𑀧𑀬𑁄𑀕𑀢𑀸𑀳𑀺 𑀢𑀡𑁆𑀳𑀸𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀪𑀸𑀯𑁂𑀳𑀺 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺𑀆𑀤𑀺𑀓𑀜𑁆𑀘 𑀢𑀢𑁆𑀣𑁂𑀯 𑀫𑀳𑀸𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑀺𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁪𑁦𑁨-𑁪𑁦𑁩) 𑀯𑀼𑀢𑁆𑀢𑀁.

𑀯𑀺𑀧𑀸𑀓𑀯𑀝𑁆𑀝𑀪𑀽𑀢𑁂 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀺𑀨𑀲𑁆𑀲𑀸𑀤𑀬𑁄 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀜𑁆𑀘 𑀑𑀚𑀁 𑀲𑀦𑁆𑀥𑀸𑀬 ‘‘𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀢𑀡𑁆𑀳𑀸𑀦𑀺𑀤𑀸𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀯𑀝𑁆𑀝𑀽𑀧𑀢𑁆𑀣𑀫𑁆𑀪𑀓𑀸 𑀧𑀦 𑀇𑀢𑀭𑁂𑀧𑀺 𑀆𑀳𑀸𑀭𑀸 𑀢𑀡𑁆𑀳𑀸𑀧𑀪𑀯𑁂 𑀢𑀲𑁆𑀫𑀺𑀁 𑀅𑀯𑀺𑀚𑁆𑀚𑀫𑀸𑀦𑁂 𑀦 𑀯𑀺𑀚𑁆𑀚𑀦𑁆𑀢𑀻𑀢𑀺 ‘‘𑀢𑀡𑁆𑀳𑀸𑀦𑀺𑀤𑀸𑀦𑀸’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀦𑁆𑀢𑀺.

𑀢𑀢𑁄 𑀢𑀢𑁄𑀢𑀺 𑀘𑀢𑀼𑀩𑁆𑀩𑀺𑀥𑀸𑀲𑀼 𑀤𑁂𑀲𑀦𑀸𑀲𑀼 𑀢𑀢𑁄 𑀢𑀢𑁄 𑀤𑁂𑀲𑀦𑀸𑀢𑁄. 𑀜𑀸𑀬𑀧𑁆𑀧𑀝𑀺𑀯𑁂𑀥𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀜𑀸𑀬𑁄𑀢𑀺 ¶ 𑀫𑀕𑁆𑀕𑁄, 𑀲𑁄𑀬𑁂𑀯 𑀯𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 ‘‘𑀅𑀭𑀺𑀬𑁄 𑀘𑀲𑁆𑀲 𑀜𑀸𑀬𑁄 𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞𑁄 𑀳𑁄𑀢𑀻’’𑀢𑀺 (𑀲𑀁. 𑀦𑀺. 𑁨.𑁪𑁧) 𑀯𑀘𑀦𑀢𑁄. 𑀲𑀬𑀫𑁂𑀯 𑀳𑀺 𑀲𑀫𑀦𑁆𑀢𑀪𑀤𑁆𑀭𑀓𑀢𑁆𑀢𑀸 𑀢𑀣𑀸 𑀢𑀣𑀸 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀢𑁆𑀢𑀸 𑀢𑀸𑀬 𑀢𑀸𑀬 𑀤𑁂𑀲𑀦𑀸𑀬 𑀅𑀢𑁆𑀢𑀦𑁄 𑀧𑀝𑀺𑀯𑁂𑀥𑀸𑀬 𑀲𑀁𑀯𑀢𑁆𑀢𑀢𑀻𑀢𑀺. 𑀲𑀫𑀦𑁆𑀢𑀪𑀤𑁆𑀭𑀓𑀢𑁆𑀢𑀁 𑀤𑁂𑀲𑀦𑀸𑀯𑀺𑀮𑀸𑀲𑀧𑁆𑀧𑀢𑁆𑀢𑀺 𑀘 𑀘𑀢𑀼𑀦𑁆𑀦𑀫𑁆𑀧𑀺 𑀤𑁂𑀲𑀦𑀸𑀦𑀁 𑀲𑀫𑀸𑀦𑀁 𑀓𑀸𑀭𑀡𑀦𑁆𑀢𑀺 𑀯𑀺𑀲𑁂𑀲𑀓𑀸𑀭𑀡𑀁 ¶ 𑀯𑀢𑁆𑀢𑀼𑀓𑀸𑀫𑁄 𑀆𑀳 ‘‘𑀯𑀺𑀲𑁂𑀲𑀢𑁄’’𑀢𑀺. 𑀅𑀲𑁆𑀲 𑀪𑀕𑀯𑀢𑁄 𑀤𑁂𑀲𑀦𑀸, 𑀅𑀲𑁆𑀲 𑀯𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀤𑁂𑀲𑀦𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀧𑀯𑀢𑁆𑀢𑀺𑀓𑀸𑀭𑀡𑀯𑀺𑀪𑀸𑀕𑁄 𑀅𑀯𑀺𑀚𑁆𑀚𑀸𑀤𑀺𑀓𑁄𑀯, 𑀓𑀸𑀭𑀡𑀦𑁆𑀢𑀺 𑀯𑀸 𑀕𑀳𑀺𑀢𑀸𑀦𑀁 𑀧𑀓𑀢𑀺𑀆𑀤𑀻𑀦𑀁 𑀅𑀯𑀺𑀚𑁆𑀚𑀸𑀤𑀻𑀦𑀜𑁆𑀘 𑀅𑀓𑀸𑀭𑀡𑀢𑀸 𑀓𑀸𑀭𑀡𑀢𑀸 𑀘. 𑀢𑀢𑁆𑀣 𑀲𑀫𑁆𑀫𑀽𑀴𑁆𑀳𑀸 𑀓𑁂𑀘𑀺 𑀅𑀓𑀸𑀭𑀡𑀁 ‘‘𑀓𑀸𑀭𑀡’’𑀦𑁆𑀢𑀺 𑀕𑀡𑁆𑀳𑀦𑁆𑀢𑀺, 𑀓𑁂𑀘𑀺 𑀦 𑀓𑀺𑀜𑁆𑀘𑀺 𑀓𑀸𑀭𑀡𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑀢𑁂𑀲𑀁 𑀬𑀣𑀸𑀲𑀓𑁂𑀳𑀺 𑀅𑀦𑀼𑀭𑀽𑀧𑁂𑀳𑀺 𑀓𑀸𑀭𑀡𑁂𑀳𑀺 𑀲𑀗𑁆𑀔𑀸𑀭𑀸𑀤𑀺𑀧𑀯𑀢𑁆𑀢𑀺𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀅𑀦𑀼𑀮𑁄𑀫𑀤𑁂𑀲𑀦𑀸 𑀧𑀯𑀢𑁆𑀢𑀸, 𑀇𑀢𑀭𑀸𑀲𑀁 𑀢𑀤𑀢𑁆𑀣𑀢𑀸𑀲𑀫𑁆𑀪𑀯𑁂𑀧𑀺 𑀦 𑀢𑀸𑀲𑀁 𑀢𑀤𑀢𑁆𑀣𑀫𑁂𑀯 𑀧𑀯𑀢𑁆𑀢𑀺 𑀅𑀢𑁆𑀣𑀦𑁆𑀢𑀭𑀲𑀩𑁆𑀪𑀸𑀯𑀢𑁄. 𑀅𑀬𑀁 𑀧𑀦 𑀢𑀤𑀢𑁆𑀣𑀸 𑀏𑀯𑀸𑀢𑀺 𑀏𑀢𑀺𑀲𑁆𑀲𑀸 𑀢𑀤𑀢𑁆𑀣𑀢𑀸 𑀯𑀼𑀢𑁆𑀢𑀸. 𑀧𑀯𑀢𑁆𑀢𑀺𑀆𑀤𑀻𑀦𑀯𑀧𑀝𑀺𑀘𑁆𑀙𑀸𑀤𑀺𑀓𑀸 𑀅𑀯𑀺𑀚𑁆𑀚𑀸 𑀆𑀤𑀺, 𑀢𑀢𑁄 𑀲𑀗𑁆𑀔𑀸𑀭𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀢𑀢𑁄 𑀯𑀺𑀜𑁆𑀜𑀸𑀡𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀺𑀬𑀸 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑀲𑀦𑁆𑀤𑀲𑁆𑀲𑀦𑀢𑁆𑀣𑀜𑁆𑀘.

𑀅𑀦𑀼𑀯𑀺𑀮𑁄𑀓𑀬𑀢𑁄 𑀬𑁄 𑀲𑀫𑁆𑀩𑁄𑀥𑀺𑀢𑁄 𑀧𑀼𑀩𑁆𑀩𑀪𑀸𑀕𑁂 𑀢𑀁𑀢𑀁𑀨𑀮𑀧𑀝𑀺𑀯𑁂𑀥𑁄 𑀧𑀯𑀢𑁆𑀢𑁄, 𑀢𑀤𑀦𑀼𑀲𑀸𑀭𑁂𑀦 𑀢𑀤𑀦𑀼𑀕𑀫𑁂𑀦 𑀚𑀭𑀸𑀫𑀭𑀡𑀸𑀤𑀺𑀓𑀲𑁆𑀲 𑀚𑀸𑀢𑀺𑀆𑀤𑀺𑀓𑀸𑀭𑀡𑀁 𑀬𑀁 𑀅𑀥𑀺𑀕𑀢𑀁, 𑀢𑀲𑁆𑀲 𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀅𑀲𑁆𑀲 𑀧𑀝𑀺𑀮𑁄𑀫𑀤𑁂𑀲𑀦𑀸 𑀧𑀯𑀢𑁆𑀢𑀸, 𑀅𑀦𑀼𑀯𑀺𑀮𑁄𑀓𑀬𑀢𑁄 𑀧𑀝𑀺𑀮𑁄𑀫𑀤𑁂𑀲𑀦𑀸 𑀧𑀯𑀢𑁆𑀢𑀸𑀢𑀺 𑀯𑀸 𑀲𑀫𑁆𑀩𑀦𑁆𑀥𑁄. 𑀤𑁂𑀲𑁂𑀦𑁆𑀢𑁄𑀧𑀺 𑀳𑀺 𑀪𑀕𑀯𑀸 𑀓𑀺𑀘𑁆𑀙𑀸𑀧𑀦𑁆𑀦𑀁 𑀮𑁄𑀓𑀁 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸 𑀧𑀼𑀩𑁆𑀩𑀪𑀸𑀕…𑀧𑁂… 𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀤𑁂𑀲𑁂𑀢𑀻𑀢𑀺. 𑀆𑀳𑀸𑀭𑀢𑀡𑁆𑀳𑀸𑀤𑀬𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀤𑁆𑀥𑀸, 𑀲𑀗𑁆𑀔𑀸𑀭𑀸𑀯𑀺𑀚𑁆𑀚𑀸 𑀅𑀢𑀻𑀢𑀤𑁆𑀥𑀸𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀬𑀸𑀯 𑀅𑀢𑀻𑀢𑀁 𑀅𑀤𑁆𑀥𑀸𑀦𑀁 𑀅𑀢𑀺𑀳𑀭𑀺𑀢𑁆𑀯𑀸’’𑀢𑀺, 𑀆𑀳𑀸𑀭𑀸 𑀯𑀸 𑀢𑀡𑁆𑀳𑀸𑀬 𑀧𑀪𑀸𑀯𑁂𑀢𑀩𑁆𑀩𑀸 𑀅𑀦𑀸𑀕𑀢𑁄 𑀅𑀤𑁆𑀥𑀸, 𑀢𑀡𑁆𑀳𑀸𑀤𑀬𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄, 𑀲𑀗𑁆𑀔𑀸𑀭𑀸𑀯𑀺𑀚𑁆𑀚𑀸 𑀅𑀢𑀻𑀢𑁄𑀢𑀺. 𑀧𑀘𑁆𑀘𑀓𑁆𑀔𑀁 𑀧𑀦 𑀨𑀮𑀁 𑀤𑀲𑁆𑀲𑁂𑀢𑁆𑀯𑀸 𑀢𑀁𑀦𑀺𑀤𑀸𑀦𑀤𑀲𑁆𑀲𑀦𑀯𑀲𑁂𑀦 𑀨𑀮𑀓𑀸𑀭𑀡𑀧𑀭𑀫𑁆𑀧𑀭𑀸𑀬 𑀤𑀲𑁆𑀲𑀦𑀁 𑀬𑀼𑀚𑁆𑀚𑀢𑀻𑀢𑀺 𑀆𑀳𑀸𑀭𑀸 𑀧𑀼𑀭𑀺𑀫𑀢𑀡𑁆𑀳𑀸𑀬 𑀉𑀧𑁆𑀧𑀸𑀤𑀺𑀢𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀅𑀤𑁆𑀥𑀸, 𑀢𑀡𑁆𑀳𑀸𑀤𑀬𑁄 𑀅𑀢𑀻𑀢𑁄, 𑀲𑀗𑁆𑀔𑀸𑀭𑀸𑀯𑀺𑀚𑁆𑀚𑀸 𑀢𑀢𑁄𑀧𑀺 𑀅𑀢𑀻𑀢𑀢𑀭𑁄 𑀲𑀁𑀲𑀸𑀭𑀲𑁆𑀲 𑀅𑀦𑀸𑀤𑀺𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑁄𑀢𑀺 𑀬𑀸𑀯 𑀅𑀢𑀻𑀢𑀁 𑀅𑀤𑁆𑀥𑀸𑀦𑀦𑁆𑀢𑀺 𑀬𑀸𑀯 𑀅𑀢𑀻𑀢𑀢𑀭𑀁 𑀅𑀤𑁆𑀥𑀸𑀦𑀦𑁆𑀢𑀺 𑀅𑀢𑁆𑀣𑁄 𑀬𑀼𑀢𑁆𑀢𑁄.

𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀆𑀳𑀸𑀭𑀓𑀸 𑀯𑀸 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑁋

‘‘𑀆𑀳𑀸𑀭𑁂𑀢𑀻𑀢𑀺 𑀅𑀳𑀁 𑀦 𑀯𑀤𑀸𑀫𑀺, 𑀆𑀳𑀸𑀭𑁂𑀢𑀻𑀢𑀺 𑀘𑀸𑀳𑀁 𑀯𑀤𑁂𑀬𑁆𑀬𑀼𑀁, 𑀢𑀢𑁆𑀭𑀲𑁆𑀲 𑀓𑀮𑁆𑀮𑁄 𑀧𑀜𑁆𑀳𑁄 ¶ ‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀆𑀳𑀸𑀭𑁂𑀢𑀻’𑀢𑀺. 𑀏𑀯𑀁 𑀘𑀸𑀳𑀁 𑀦 𑀯𑀤𑀸𑀫𑀺, 𑀏𑀯𑀁 𑀧𑀦 𑀅𑀯𑀤𑀦𑁆𑀢𑀁 𑀫𑀁 𑀬𑁄 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬 ‘𑀓𑀺𑀲𑁆𑀲 𑀦𑀼 𑀔𑁄, 𑀪𑀦𑁆𑀢𑁂, 𑀯𑀺𑀜𑁆𑀜𑀸𑀡𑀸𑀳𑀸𑀭𑁄’𑀢𑀺. 𑀏𑀲 𑀓𑀮𑁆𑀮𑁄 ¶ 𑀧𑀜𑁆𑀳𑁄, 𑀢𑀢𑁆𑀭 𑀓𑀮𑁆𑀮𑀁 𑀯𑁂𑀬𑁆𑀬𑀸𑀓𑀭𑀡𑀁, 𑀯𑀺𑀜𑁆𑀜𑀸𑀡𑀸𑀳𑀸𑀭𑁄 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸’’𑀢𑀺 (𑀲𑀁. 𑀦𑀺. 𑁨.𑁧𑁨) 𑁋

𑀯𑀘𑀦𑀢𑁄 𑀢𑀁𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸 𑀨𑀲𑁆𑀲𑀘𑁂𑀢𑀦𑀸𑀦𑀁 𑀢𑀧𑁆𑀧𑀯𑀢𑁆𑀢𑀺𑀳𑁂𑀢𑀼𑀢𑁆𑀢𑀸 𑀘 𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑁆𑀲. 𑀢𑁂𑀦 𑀳𑀺 𑀉𑀧𑀢𑁆𑀣𑀫𑁆𑀪𑀺𑀢𑀭𑀽𑀧𑀓𑀸𑀬𑀲𑁆𑀲, 𑀢𑀜𑁆𑀘 𑀇𑀘𑁆𑀙𑀦𑁆𑀢𑀲𑁆𑀲 𑀓𑀫𑁆𑀫𑀯𑀺𑀜𑁆𑀜𑀸𑀡𑀸𑀬𑀽𑀳𑀦𑀁 𑀳𑁄𑀢𑀺. 𑀪𑁄𑀚𑀦𑀜𑁆𑀳𑀺 𑀲𑀤𑁆𑀥𑀸𑀤𑀻𑀦𑀁 𑀭𑀸𑀕𑀸𑀤𑀻𑀦𑀜𑁆𑀘 𑀉𑀧𑀦𑀺𑀲𑁆𑀲𑀬𑁄𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀢𑀲𑁆𑀫𑀸 ‘‘𑀢𑁂 𑀓𑀫𑁆𑀫𑀯𑀝𑁆𑀝𑀲𑀗𑁆𑀕𑀳𑀺𑀢𑀸 𑀆𑀳𑀸𑀭𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀅𑀤𑁆𑀥𑀸’’𑀢𑀺 𑀇𑀫𑀲𑁆𑀫𑀺𑀁 𑀧𑀭𑀺𑀬𑀸𑀬𑁂 𑀧𑀼𑀭𑀺𑀫𑁄𑀬𑁂𑀯𑀢𑁆𑀣𑁄 𑀬𑀼𑀢𑁆𑀢𑁄. 𑀅𑀢𑀻𑀢𑀤𑁆𑀥𑀼𑀢𑁄 𑀧𑀪𑀼𑀢𑀺 ‘‘𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁨.𑁩) 𑀅𑀢𑀻𑀢𑁂 𑀢𑀢𑁄 𑀧𑀭𑀜𑁆𑀘 𑀳𑁂𑀢𑀼𑀨𑀮𑀧𑀝𑀺𑀧𑀸𑀝𑀺𑀁 𑀧𑀘𑁆𑀘𑀓𑁆𑀔𑀸𑀦𑀁 𑀆𑀳𑀸𑀭𑀸𑀦𑀁 𑀦𑀺𑀤𑀸𑀦𑀤𑀲𑁆𑀲𑀦𑀯𑀲𑁂𑀦 𑀆𑀭𑁄𑀳𑀺𑀢𑁆𑀯𑀸 𑀦𑀺𑀯𑀢𑁆𑀢𑀦𑁂𑀦 𑀯𑀺𑀦𑀸 𑀅𑀩𑀼𑀚𑁆𑀛𑀦𑁆𑀢𑀸𑀦𑀁 𑀢𑀁𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀲𑀸 𑀅𑀬𑀁 𑀤𑁂𑀲𑀦𑀸 𑀧𑀯𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀅𑀦𑀸𑀕𑀢𑀤𑁆𑀥𑀼𑀦𑁄 𑀲𑀦𑁆𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀅𑀦𑀸𑀕𑀢𑀤𑁆𑀥𑀼𑀦𑁄 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀦𑁆𑀢𑀸𑀦𑀁 𑀅𑀧𑀲𑁆𑀲𑀦𑁆𑀢𑀸𑀦𑀁 𑀧𑀘𑁆𑀘𑀓𑁆𑀔𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀳𑁂𑀢𑀼𑀁 𑀤𑀲𑁆𑀲𑁂𑀢𑁆𑀯𑀸 𑀳𑁂𑀢𑀼𑀨𑀮𑀧𑀭𑀫𑁆𑀧𑀭𑀸𑀬 𑀢𑀲𑁆𑀲 𑀲𑀦𑁆𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀅𑀢𑁆𑀣𑁄.

𑀫𑀽𑀮𑀓𑀸𑀭𑀡𑀲𑀤𑁆𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 ‘‘𑀦 𑀅𑀓𑀸𑀭𑀡’’𑀦𑁆𑀢𑀺 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀅𑀓𑀸𑀭𑀡𑀁 𑀬𑀤𑀺 𑀲𑀺𑀬𑀸, 𑀲𑀼𑀢𑁆𑀢𑀁 𑀧𑀝𑀺𑀩𑀸𑀳𑀺𑀢𑀁 𑀲𑀺𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀲𑀼𑀢𑁆𑀢𑀁 𑀆𑀳𑀭𑀢𑀺. 𑀯𑀝𑁆𑀝𑀓𑀣𑀸𑀬 𑀲𑀻𑀲𑀪𑀸𑀯𑁄 𑀯𑀝𑁆𑀝𑀳𑁂𑀢𑀼𑀦𑁄 𑀓𑀫𑁆𑀫𑀲𑁆𑀲𑀧𑀺 𑀳𑁂𑀢𑀼𑀪𑀸𑀯𑁄. 𑀢𑀢𑁆𑀣 𑀪𑀯𑀢𑀡𑁆𑀳𑀸𑀬𑀧𑀺 𑀳𑁂𑀢𑀼𑀪𑀽𑀢𑀸 𑀅𑀯𑀺𑀚𑁆𑀚𑀸, 𑀢𑀸𑀬 𑀧𑀝𑀺𑀘𑁆𑀙𑀸𑀤𑀺𑀢𑀸𑀤𑀻𑀦𑀯𑁂 𑀪𑀯𑁂 𑀢𑀡𑁆𑀳𑀼𑀧𑁆𑀧𑀢𑁆𑀢𑀺𑀢𑁄𑀢𑀺 𑀅𑀯𑀺𑀚𑁆𑀚𑀸 𑀯𑀺𑀲𑁂𑀲𑁂𑀦 𑀲𑀻𑀲𑀪𑀽𑀢𑀸𑀢𑀺 ‘‘𑀫𑀽𑀮𑀓𑀸𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀸. 𑀧𑀼𑀭𑀺𑀫𑀸𑀬 𑀓𑁄𑀝𑀺𑀬𑀸 𑀅𑀧𑀜𑁆𑀜𑀸𑀬𑀫𑀸𑀦𑀸𑀬 𑀉𑀧𑁆𑀧𑀸𑀤𑀯𑀺𑀭𑀳𑀢𑁄 𑀦𑀺𑀘𑁆𑀘𑀢𑀁 𑀕𑀡𑁆𑀳𑁂𑀬𑁆𑀬𑀸𑀢𑀺 𑀆𑀳 ‘‘𑀏𑀯𑀜𑁆𑀘𑁂𑀢𑀁, 𑀪𑀺𑀓𑁆𑀔𑀯𑁂, 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀺. 𑀢𑁂𑀦 𑀇𑀢𑁄 𑀧𑀼𑀩𑁆𑀩𑁂 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀢𑀸 𑀦𑀢𑁆𑀣𑀻𑀢𑀺 𑀅𑀧𑀜𑁆𑀜𑀸𑀬𑀦𑀢𑁄 𑀧𑀼𑀭𑀺𑀫𑀓𑁄𑀝𑀺𑀅𑀧𑀜𑁆𑀜𑀸𑀬𑀦𑀁 𑀯𑀼𑀢𑁆𑀢𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀳𑁂𑀢𑀼𑀓𑁆𑀓𑀫𑁂𑀦 𑀨𑀮𑁂𑀲𑀼 𑀯𑀢𑁆𑀢𑀩𑁆𑀩𑁂𑀲𑀼 ‘‘𑀲𑀼𑀕𑀢𑀺𑀤𑀼𑀕𑁆𑀕𑀢𑀺𑀕𑀸𑀫𑀺𑀦𑁄’’𑀢𑀺 𑀯𑀘𑀦𑀁 𑀲𑀤𑁆𑀤𑀮𑀓𑁆𑀔𑀡𑀸𑀯𑀺𑀭𑁄𑀥𑀦𑀢𑁆𑀣𑀁. 𑀤𑁆𑀯𑀦𑁆𑀤𑁂 𑀳𑀺 𑀧𑀽𑀚𑀺𑀢𑀲𑁆𑀲 𑀧𑀼𑀩𑁆𑀩𑀦𑀺𑀧𑀸𑀢𑁄𑀢𑀺. 𑀲𑀯𑀭𑀸 𑀓𑀺𑀭 𑀫𑀁𑀲𑀲𑁆𑀲 𑀅𑀝𑁆𑀞𑀺𑀦𑀸 𑀅𑀮𑀕𑁆𑀕𑀦𑀢𑁆𑀣𑀁 𑀧𑀼𑀦𑀧𑁆𑀧𑀼𑀦𑀁 𑀢𑀸𑀧𑁂𑀢𑁆𑀯𑀸 𑀓𑁄𑀝𑁆𑀝𑁂𑀢𑁆𑀯𑀸 𑀉𑀡𑁆𑀳𑁄𑀤𑀓𑀁 𑀧𑀸𑀬𑁂𑀢𑁆𑀯𑀸 𑀯𑀺𑀭𑀺𑀢𑁆𑀢𑀁 𑀲𑀽𑀦𑀁 𑀅𑀝𑁆𑀞𑀺𑀢𑁄 𑀫𑀼𑀢𑁆𑀢𑀫𑀁𑀲𑀁 𑀕𑀸𑀯𑀺𑀁 𑀫𑀸𑀭𑁂𑀦𑁆𑀢𑀺. 𑀢𑁂𑀦𑀸𑀳 ‘‘𑀅𑀕𑁆𑀕𑀺𑀲𑀦𑁆𑀢𑀸𑀧𑀺’’𑀘𑁆𑀘𑀸𑀤𑀺. 𑀢𑀢𑁆𑀣 𑀬𑀣𑀸 𑀯𑀚𑁆𑀛𑀸 𑀕𑀸𑀯𑀻 𑀘 𑀅𑀯𑀺𑀚𑁆𑀚𑀸𑀪𑀺𑀪𑀽𑀢𑀢𑀸𑀬 𑀬𑀣𑀸𑀯𑀼𑀢𑁆𑀢𑀁 𑀉𑀡𑁆𑀳𑁄𑀤𑀓𑀧𑀸𑀦𑀁 𑀆𑀭𑀪𑀢𑀺, 𑀏𑀯𑀁 𑀧𑀼𑀣𑀼𑀚𑁆𑀚𑀦𑁄 𑀬𑀣𑀸𑀯𑀼𑀢𑁆𑀢𑀁 𑀤𑀼𑀕𑁆𑀕𑀢𑀺𑀕𑀸𑀫𑀺𑀓𑀫𑁆𑀫𑀁. 𑀬𑀣𑀸 𑀧𑀦 𑀲𑀸 𑀉𑀡𑁆𑀳𑁄𑀤𑀓𑀧𑀸𑀦𑁂 ¶ 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 ¶ 𑀢𑀡𑁆𑀳𑀸𑀯𑀲𑁂𑀦 𑀲𑀻𑀢𑀼𑀤𑀓𑀧𑀸𑀦𑀁 𑀆𑀭𑀪𑀢𑀺, 𑀏𑀯𑀫𑀬𑀁 𑀅𑀯𑀺𑀚𑁆𑀚𑀸𑀬 𑀫𑀦𑁆𑀤𑀢𑁆𑀢𑀸 𑀤𑀼𑀕𑁆𑀕𑀢𑀺𑀕𑀸𑀫𑀺𑀓𑀫𑁆𑀫𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀢𑀡𑁆𑀳𑀸𑀯𑀲𑁂𑀦 𑀲𑀼𑀕𑀢𑀺𑀕𑀸𑀫𑀺𑀓𑀫𑁆𑀫𑀁 𑀆𑀭𑀪𑀢𑀺. 𑀤𑀼𑀓𑁆𑀔𑁂 𑀳𑀺 𑀅𑀯𑀺𑀚𑁆𑀚𑀁 𑀢𑀡𑁆𑀳𑀸 𑀅𑀦𑀼𑀯𑀢𑁆𑀢𑀢𑀺, 𑀲𑀼𑀔𑁂 𑀢𑀡𑁆𑀳𑀁 𑀅𑀯𑀺𑀚𑁆𑀚𑀸𑀢𑀺.

𑀏𑀯𑀦𑁆𑀢𑀺 𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑀢𑁆𑀢𑀸 𑀢𑀡𑁆𑀳𑀸𑀬 𑀲𑀁𑀬𑀼𑀢𑁆𑀢𑀢𑁆𑀢𑀸 𑀘. 𑀅𑀬𑀁 𑀓𑀸𑀬𑁄𑀢𑀺 𑀲𑀯𑀺𑀜𑁆𑀜𑀸𑀡𑀓𑀓𑀸𑀬𑁄 𑀔𑀦𑁆𑀥𑀧𑀜𑁆𑀘𑀓𑀁, ‘‘𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄’’𑀢𑀺 𑀯𑀘𑀦𑀢𑁄 𑀨𑀲𑁆𑀲𑀓𑀸𑀭𑀡𑀜𑁆𑀘𑁂𑀢𑀁 𑀯𑀼𑀘𑁆𑀘𑀢𑀻𑀢𑀺 𑀆𑀬𑀢𑀦𑀙𑀓𑁆𑀓𑀁 𑀯𑀸. 𑀲𑀫𑀼𑀤𑀸𑀕𑀢𑁄𑀢𑀺 𑀉𑀧𑁆𑀧𑀦𑁆𑀦𑁄. 𑀩𑀳𑀺𑀤𑁆𑀥𑀸 𑀘 𑀦𑀸𑀫𑀭𑀽𑀧𑀦𑁆𑀢𑀺 𑀩𑀳𑀺𑀤𑁆𑀥𑀸 𑀲𑀯𑀺𑀜𑁆𑀜𑀸𑀡𑀓𑀓𑀸𑀬𑁄 𑀔𑀦𑁆𑀥𑀧𑀜𑁆𑀘𑀓𑀁, 𑀲𑀴𑀸𑀬𑀢𑀦𑀸𑀦𑀺 𑀯𑀸. 𑀇𑀢𑁆𑀣𑁂𑀢𑀦𑁆𑀢𑀺 𑀇𑀢𑁆𑀣𑀁 𑀏𑀢𑀁. 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘 𑀧𑀜𑁆𑀘𑀓𑁆𑀔𑀦𑁆𑀥𑀸 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀘 𑀤𑁆𑀯𑀸𑀭𑀸𑀭𑀫𑁆𑀫𑀡𑀪𑀸𑀯𑁂𑀦 𑀯𑀯𑀢𑁆𑀣𑀺𑀢𑀸𑀦𑀺 𑀤𑁆𑀯𑀬𑀦𑀸𑀫𑀸𑀦𑀻𑀢𑀺 𑀅𑀢𑁆𑀣𑁄. ‘‘𑀤𑁆𑀯𑀬𑀁 𑀧𑀝𑀺𑀘𑁆𑀘 𑀨𑀲𑁆𑀲𑁄𑀢𑀺 𑀅𑀜𑁆𑀜𑀢𑁆𑀣 𑀘𑀓𑁆𑀔𑀼𑀭𑀽𑀧𑀸𑀤𑀻𑀦𑀺 𑀤𑁆𑀯𑀬𑀸𑀦𑀺 𑀧𑀝𑀺𑀘𑁆𑀘 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀬𑁄 𑀯𑀼𑀢𑁆𑀢𑀸, 𑀇𑀥 𑀧𑀦 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀺 𑀆𑀬𑀢𑀦𑀸𑀦𑀺. 𑀫𑀳𑀸𑀤𑁆𑀯𑀬𑀁 𑀦𑀸𑀫 𑀓𑀺𑀭𑁂𑀢’’𑀦𑁆𑀢𑀺 (𑀲𑀁. 𑀦𑀺. 𑀅𑀝𑁆𑀞. 𑁨.𑁨.𑁧𑁯) 𑀯𑀼𑀢𑁆𑀢𑀁. 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀅𑀜𑁆𑀜𑀢𑁆𑀣 ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁨.𑁪𑁩) ‘‘𑀘𑀓𑁆𑀔𑀼 𑀘𑁂𑀯 𑀭𑀽𑀧𑀸 𑀘…𑀧𑁂… 𑀫𑀦𑁄 𑀘𑁂𑀯 𑀥𑀫𑁆𑀫𑀸 𑀘𑀸’’𑀢𑀺 𑀯𑀼𑀢𑁆𑀢𑀸𑀦𑀺 𑀤𑁆𑀯𑀬𑀸𑀦𑀺 𑀧𑀝𑀺𑀘𑁆𑀘 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀬𑁄 𑀯𑀼𑀢𑁆𑀢𑀸, 𑀇𑀥 𑀧𑀦 ‘‘𑀅𑀬𑀜𑁆𑀘𑁂𑀯 𑀓𑀸𑀬𑁄’’𑀢𑀺 𑀘𑀓𑁆𑀔𑀸𑀤𑀺𑀦𑀺𑀲𑁆𑀲𑀬𑁂 𑀲𑁂𑀲𑀥𑀫𑁆𑀫𑁂 𑀘𑀓𑁆𑀔𑀸𑀤𑀺𑀦𑀺𑀲𑁆𑀲𑀺𑀢𑁂 𑀏𑀯 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀘𑀓𑁆𑀔𑀸𑀤𑀺𑀓𑀸𑀬𑀁 𑀏𑀓𑀢𑁆𑀢𑁂𑀦 ‘‘𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦’’𑀦𑁆𑀢𑀺 𑀕𑀳𑁂𑀢𑁆𑀯𑀸 ‘‘𑀩𑀳𑀺𑀤𑁆𑀥𑀸 𑀦𑀸𑀫𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑀁, 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁 𑀏𑀓𑀢𑁆𑀢𑁂𑀦𑁂𑀯 𑀩𑀸𑀳𑀺𑀭𑀸𑀬𑀢𑀦𑀦𑁆𑀢𑀺 𑀢𑀸𑀦𑀺 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀺 𑀆𑀬𑀢𑀦𑀸𑀦𑀺 𑀧𑀝𑀺𑀘𑁆𑀘 𑀨𑀲𑁆𑀲𑁄 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀫𑀳𑀸𑀤𑁆𑀯𑀬𑀁 𑀦𑀸𑀫𑁂𑀢𑀦𑁆𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘 𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺 𑀙𑀳𑀸𑀬𑀢𑀦𑁂𑀳𑀺 𑀘𑀸𑀧𑀺 𑀅𑀬𑀫𑀢𑁆𑀣𑁄 𑀤𑀻𑀧𑁂𑀢𑀩𑁆𑀩𑁄𑀯𑀸’’𑀢𑀺 (𑀲𑀁. 𑀦𑀺. 𑀅𑀝𑁆𑀞. 𑁨.𑁨.𑁧𑁯) 𑀯𑀼𑀢𑁆𑀢𑀁. ‘‘𑀅𑀬𑀁 𑀓𑀸𑀬𑁄’’𑀢𑀺 𑀳𑀺 𑀯𑀼𑀢𑁆𑀢𑀸𑀦𑀺 𑀲𑀦𑀺𑀲𑁆𑀲𑀬𑀸𑀦𑀺 𑀘𑀓𑁆𑀔𑀸𑀤𑀻𑀦𑀺 𑀅𑀢𑁆𑀢𑀦𑁄 𑀧𑀜𑁆𑀘𑀓𑁆𑀔𑀦𑁆𑀥𑀸, ‘‘𑀩𑀳𑀺𑀤𑁆𑀥𑀸 𑀦𑀸𑀫𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑀸𑀦𑀺 𑀭𑀽𑀧𑀸𑀤𑀻𑀦𑀺 𑀧𑀭𑁂𑀲𑀁. 𑀢𑀣𑀸 𑀅𑀬𑀁 𑀓𑀸𑀬𑁄 𑀅𑀢𑁆𑀢𑀦𑁄𑀯 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺, 𑀩𑀳𑀺𑀤𑁆𑀥𑀸 𑀦𑀸𑀫𑀭𑀽𑀧𑀁 𑀧𑀭𑁂𑀲𑀁 𑀩𑀸𑀳𑀺𑀭𑀸𑀦𑀻𑀢𑀺. 𑀅𑀜𑁆𑀜𑀣𑀸 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀫𑀢𑁆𑀢𑁂 𑀏𑀯 ‘‘𑀅𑀬𑀁 𑀓𑀸𑀬𑁄’’𑀢𑀺 𑀯𑀼𑀢𑁆𑀢𑁂 𑀦 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀸𑀦𑁂𑀯 𑀅𑀢𑁆𑀢𑀦𑁄 𑀧𑀜𑁆𑀘𑀓𑁆𑀔𑀦𑁆𑀥𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘 𑀧𑀜𑁆𑀘𑀓𑁆𑀔𑀦𑁆𑀥𑁂𑀳𑀺 𑀤𑀻𑀧𑀦𑀸 𑀦 𑀲𑀫𑁆𑀪𑀯𑁂𑀬𑁆𑀬𑀸𑀢𑀺. 𑀲𑀴𑁂𑀯𑀸𑀬𑀢𑀦𑀸𑀦𑀻𑀢𑀺 𑀲𑀴𑁂𑀯 𑀲𑀫𑁆𑀨𑀲𑁆𑀲𑀓𑀸𑀭𑀡𑀸𑀦𑀺, 𑀬𑁂𑀳𑀺 𑀓𑀸𑀭𑀡𑀪𑀽𑀢𑁂𑀳𑀺 𑀆𑀬𑀢𑀦𑁂𑀳𑀺 𑀉𑀧𑁆𑀧𑀦𑁆𑀦𑁂𑀦 𑀨𑀲𑁆𑀲𑁂𑀦 𑀨𑀼𑀝𑁆𑀞𑁄 𑀩𑀸𑀮𑁄 𑀲𑀼𑀔𑀤𑀼𑀓𑁆𑀔𑀁 𑀧𑀝𑀺𑀲𑀁𑀯𑁂𑀤𑁂𑀢𑀺.

𑀆𑀤𑀺-𑀲𑀤𑁆𑀤𑁂𑀦 ¶ ‘‘𑀏𑀢𑁂𑀲𑀁 𑀯𑀸 𑀅𑀜𑁆𑀜𑀢𑀭𑁂𑀦 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑀲𑁆𑀲 𑀢𑀡𑁆𑀳𑀸𑀬 ¶ 𑀲𑀁𑀬𑀼𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀲𑁆𑀫𑀺𑀜𑁆𑀳𑀺 𑀲𑀼𑀢𑁆𑀢𑁂 𑀲𑀗𑁆𑀔𑀸𑀭𑁂 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀦𑀺𑀲𑁆𑀲𑀺𑀢𑁂 𑀏𑀯 𑀓𑀢𑁆𑀯𑀸 𑀓𑀸𑀬𑀕𑁆𑀕𑀳𑀡𑁂𑀦 𑀯𑀺𑀜𑁆𑀜𑀸𑀡𑀦𑀸𑀫𑀭𑀽𑀧𑀲𑀴𑀸𑀬𑀢𑀦𑀸𑀦𑀺 𑀕𑀳𑁂𑀢𑁆𑀯𑀸 𑀏𑀢𑀲𑁆𑀫𑀺𑀜𑁆𑀘 𑀓𑀸𑀬𑁂 𑀲𑀴𑀸𑀬𑀢𑀦𑀸𑀦𑀁 𑀨𑀲𑁆𑀲𑀁 𑀢𑀁𑀦𑀺𑀲𑁆𑀲𑀺𑀢𑀫𑁂𑀯 𑀓𑀢𑁆𑀯𑀸 𑀯𑁂𑀤𑀦𑀸𑀬 𑀯𑀺𑀲𑁂𑀲𑀧𑀘𑁆𑀘𑀬𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁂𑀦 𑀪𑀕𑀯𑀢𑀸 𑀩𑀸𑀮𑀧𑀡𑁆𑀟𑀺𑀢𑀸𑀦𑀁 𑀅𑀢𑀻𑀢𑀤𑁆𑀥𑀸𑀯𑀺𑀚𑁆𑀚𑀸𑀢𑀡𑁆𑀳𑀸𑀫𑀽𑀮𑀓𑁄 𑀯𑁂𑀤𑀦𑀸𑀦𑁆𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀤𑀲𑁆𑀲𑀺𑀢𑁄. 𑀧𑀼𑀦 𑀘 𑀩𑀸𑀮𑀧𑀡𑁆𑀟𑀺𑀢𑀸𑀦𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁂𑀦 𑁋

‘‘𑀬𑀸𑀬 𑀘, 𑀪𑀺𑀓𑁆𑀔𑀯𑁂, 𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑀲𑁆𑀲 𑀩𑀸𑀮𑀲𑁆𑀲 𑀬𑀸𑀬 𑀘 𑀢𑀡𑁆𑀳𑀸𑀬 𑀲𑀁𑀬𑀼𑀢𑁆𑀢𑀲𑁆𑀲 𑀅𑀬𑀁 𑀓𑀸𑀬𑁄 𑀲𑀫𑀼𑀤𑀸𑀕𑀢𑁄, 𑀲𑀸 𑀘𑁂𑀯 𑀅𑀯𑀺𑀚𑁆𑀚𑀸 𑀩𑀸𑀮𑀲𑁆𑀲 𑀅𑀧𑁆𑀧𑀳𑀻𑀦𑀸, 𑀲𑀸 𑀘 𑀢𑀡𑁆𑀳𑀸 𑀅𑀧𑀭𑀺𑀓𑁆𑀔𑀻𑀡𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦, 𑀪𑀺𑀓𑁆𑀔𑀯𑁂, 𑀩𑀸𑀮𑁄 𑀅𑀘𑀭𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬, 𑀢𑀲𑁆𑀫𑀸 𑀩𑀸𑀮𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀓𑀸𑀬𑀽𑀧𑀕𑁄 𑀳𑁄𑀢𑀺, 𑀲𑁄 𑀓𑀸𑀬𑀽𑀧𑀕𑁄 𑀲𑀫𑀸𑀦𑁄 𑀦 𑀧𑀭𑀺𑀫𑀼𑀘𑁆𑀘𑀢𑀺 𑀚𑀸𑀢𑀺𑀬𑀸…𑀧𑁂… 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀻’’𑀢𑀺 (𑀲𑀁. 𑀦𑀺. 𑁨.𑁧𑁯) 𑁋

𑀯𑁂𑀤𑀦𑀸𑀧𑀪𑀯𑀁 𑀲𑀸𑀯𑀺𑀚𑁆𑀚𑀁 𑀢𑀡𑁆𑀳𑀁 𑀤𑀲𑁆𑀲𑁂𑀢𑁆𑀯𑀸 𑀉𑀧𑀸𑀤𑀸𑀦𑀪𑀯𑁂 𑀘 𑀢𑀁𑀦𑀺𑀲𑁆𑀲𑀺𑀢𑁂 𑀓𑀢𑁆𑀯𑀸 ‘‘𑀓𑀸𑀬𑀽𑀧𑀕𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀚𑀸𑀢𑀺𑀆𑀤𑀺𑀓𑁂 𑀤𑀲𑁆𑀲𑁂𑀦𑁆𑀢𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀳𑁂𑀢𑀼𑀲𑀫𑀼𑀝𑁆𑀞𑀸𑀦𑀢𑁄 𑀧𑀪𑀼𑀢𑀺 𑀉𑀪𑀬𑀫𑀽𑀮𑁄𑀯 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀯𑀼𑀢𑁆𑀢𑁄, 𑀢𑀩𑁆𑀩𑀺𑀧𑀭𑀺𑀬𑀸𑀬𑁂𑀦 𑀘 𑀧𑀡𑁆𑀟𑀺𑀢𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀳𑁂𑀢𑀼𑀧𑀭𑀺𑀓𑁆𑀔𑀬𑀢𑁄 𑀧𑀪𑀼𑀢𑀺 𑀉𑀪𑀬𑀫𑀽𑀮𑀓𑁄 𑀧𑀝𑀺𑀮𑁄𑀫𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺.

𑀤𑀼𑀕𑁆𑀕𑀢𑀺𑀕𑀸𑀫𑀺𑀓𑀫𑁆𑀫𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑀢𑁆𑀢𑀸 𑀅𑀯𑀺𑀚𑁆𑀚𑀸 ‘‘𑀅𑀯𑀺𑀦𑁆𑀤𑀺𑀬𑀁 𑀯𑀺𑀦𑁆𑀤𑀢𑀻’’𑀢𑀺 𑀯𑀼𑀢𑁆𑀢𑀸, 𑀢𑀣𑀸 𑀯𑀺𑀲𑁂𑀲𑀧𑀘𑁆𑀘𑀬𑁄 𑀯𑀺𑀦𑁆𑀤𑀺𑀬𑀲𑁆𑀲 𑀦 𑀳𑁄𑀢𑀻𑀢𑀺 ‘‘𑀯𑀺𑀦𑁆𑀤𑀺𑀬𑀁 𑀦 𑀯𑀺𑀦𑁆𑀤𑀢𑀻’𑀢𑀺 𑀘. 𑀅𑀢𑁆𑀢𑀦𑀺 𑀦𑀺𑀲𑁆𑀲𑀺𑀢𑀸𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀧𑀯𑀢𑁆𑀢𑀦𑀁 𑀉𑀧𑁆𑀧𑀸𑀤𑀦𑀁 𑀆𑀬𑀢𑀦𑀁. 𑀲𑀫𑁆𑀫𑁄𑀳𑀪𑀸𑀯𑁂𑀦𑁂𑀯 𑀅𑀦𑀪𑀺𑀲𑀫𑀬𑀪𑀽𑀢𑀢𑁆𑀢𑀸 𑀅𑀯𑀺𑀤𑀺𑀢𑀁 𑀅𑀜𑁆𑀜𑀸𑀢𑀁 𑀓𑀭𑁄𑀢𑀺. 𑀅𑀦𑁆𑀢𑀯𑀺𑀭𑀳𑀺𑀢𑁂 𑀚𑀯𑀸𑀧𑁂𑀢𑀻𑀢𑀺 𑀘 𑀯𑀡𑁆𑀡𑀸𑀕𑀫𑀯𑀺𑀧𑀭𑀺𑀬𑀸𑀬𑀯𑀺𑀓𑀸𑀭𑀯𑀺𑀦𑀸𑀲𑀥𑀸𑀢𑀼𑀅𑀢𑁆𑀣𑀯𑀺𑀲𑁂𑀲𑀬𑁄𑀕𑁂𑀳𑀺 𑀧𑀜𑁆𑀘𑀯𑀺𑀥𑀲𑁆𑀲 𑀦𑀺𑀭𑀼𑀢𑁆𑀢𑀺𑀮𑀓𑁆𑀔𑀡𑀲𑁆𑀲 𑀯𑀲𑁂𑀦 𑀢𑀻𑀲𑀼𑀧𑀺 𑀧𑀤𑁂𑀲𑀼 𑀅-𑀓𑀸𑀭 𑀯𑀺-𑀓𑀸𑀭 𑀚-𑀓𑀸𑀭𑁂 𑀕𑀳𑁂𑀢𑁆𑀯𑀸 𑀅𑀜𑁆𑀜𑁂𑀲𑀁 𑀯𑀡𑁆𑀡𑀸𑀦𑀁 𑀮𑁄𑀧𑀁 𑀓𑀢𑁆𑀯𑀸 𑀚-𑀓𑀸𑀭𑀲𑁆𑀲 𑀘 𑀤𑀼𑀢𑀺𑀬𑀲𑁆𑀲 𑀆𑀕𑀫𑀁 𑀓𑀢𑁆𑀯𑀸 ‘‘𑀅𑀯𑀺𑀚𑁆𑀚𑀸’’𑀢𑀺 𑀯𑀼𑀢𑁆𑀢𑀸. 𑀩𑁆𑀬𑀜𑁆𑀚𑀦𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀲𑀪𑀸𑀯𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀯𑀢𑁆𑀣𑀸𑀭𑀫𑁆𑀫𑀡𑀸𑀦𑀺 ‘‘𑀇𑀤𑀁 𑀯𑀢𑁆𑀣𑀼, 𑀇𑀤𑀫𑀸𑀭𑀫𑁆𑀫𑀡’’𑀦𑁆𑀢𑀺 𑀅𑀯𑀺𑀚𑁆𑀚𑀸𑀬 𑀜𑀸𑀢𑀼𑀁 ¶ 𑀦 𑀲𑀓𑁆𑀓𑀸𑀢𑀺 𑀅𑀯𑀺𑀚𑁆𑀚𑀸 𑀢𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸 𑀯𑀼𑀢𑁆𑀢𑀸. 𑀯𑀢𑁆𑀣𑀸𑀭𑀫𑁆𑀫𑀡𑀲𑀪𑀸𑀯𑀘𑁆𑀙𑀸𑀤𑀦𑀢𑁄 𑀏𑀯 𑀅𑀯𑀺𑀚𑁆𑀚𑀸𑀤𑀻𑀦𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀪𑀸𑀯𑀲𑁆𑀲, 𑀚𑀭𑀸𑀫𑀭𑀡𑀸𑀤𑀻𑀦𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀪𑀸𑀯𑀲𑁆𑀲 𑀘 𑀙𑀸𑀤𑀦𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀙𑀸𑀤𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀲𑀗𑁆𑀔𑀸𑀭-𑀲𑀤𑁆𑀤𑀕𑁆𑀕𑀳𑀡𑁂𑀦 ¶ 𑀆𑀕𑀢𑀸 𑀲𑀗𑁆𑀔𑀸𑀭𑀸 𑀲𑀗𑁆𑀔𑀸𑀭-𑀲𑀤𑁆𑀤𑁂𑀦 𑀆𑀕𑀢𑀲𑀗𑁆𑀔𑀸𑀭𑀸. 𑀬𑀤𑀺𑀧𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀧𑀺 𑀲𑀗𑁆𑀔𑀸𑀭-𑀲𑀤𑁆𑀤𑁂𑀦 𑀆𑀕𑀢𑀸, 𑀢𑁂 𑀧𑀦 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀧𑀥𑀸𑀦𑀸𑀢𑀺 𑀯𑀺𑀲𑀼𑀁 𑀯𑀼𑀢𑁆𑀢𑀸. 𑀢𑀲𑁆𑀫𑀸 ‘‘𑀤𑀼𑀯𑀺𑀥𑀸’’𑀢𑀺 𑀏𑀢𑁆𑀣 𑀅𑀪𑀺𑀲𑀗𑁆𑀔𑀭𑀡𑀓𑀲𑀗𑁆𑀔𑀸𑀭𑀁 𑀲𑀗𑁆𑀔𑀸𑀭-𑀲𑀤𑁆𑀤𑁂𑀦𑀸𑀕𑀢𑀁 𑀲𑀦𑁆𑀥𑀸𑀬 𑀢𑀢𑁆𑀣 𑀯𑀼𑀢𑁆𑀢𑀫𑁆𑀧𑀺 𑀯𑀚𑁆𑀚𑁂𑀢𑁆𑀯𑀸 𑀲𑀗𑁆𑀔𑀸𑀭𑀲𑀤𑁆𑀤𑁂𑀦 𑀆𑀕𑀢𑀲𑀗𑁆𑀔𑀸𑀭𑀸 𑀬𑁄𑀚𑁂𑀢𑀩𑁆𑀩𑀸. ‘‘𑀲𑀗𑁆𑀔𑀸𑀭-𑀲𑀤𑁆𑀤𑁂𑀦𑀸𑀕𑀢𑀲𑀗𑁆𑀔𑀸𑀭𑀸’’𑀢𑀺 𑀯𑀸 𑀲𑀫𑀼𑀤𑀸𑀬𑁄 𑀯𑀼𑀢𑁆𑀢𑁄, 𑀢𑀤𑁂𑀓𑀤𑁂𑀲𑁄 𑀘 𑀇𑀥 𑀯𑀡𑁆𑀡𑀺𑀢𑀩𑁆𑀩𑀪𑀸𑀯𑁂𑀦 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺, 𑀢𑀲𑁆𑀫𑀸 𑀯𑀡𑁆𑀡𑀺𑀢𑀩𑁆𑀩𑀲𑀩𑁆𑀩𑀲𑀗𑁆𑀕𑀳𑀡𑀯𑀲𑁂𑀦 𑀤𑀼𑀯𑀺𑀥𑀢𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀞𑀫𑀁 𑀦𑀺𑀭𑀼𑀚𑁆𑀛𑀢𑀺 𑀯𑀘𑀻𑀲𑀗𑁆𑀔𑀸𑀭𑁄𑀢𑀺𑀆𑀤𑀺𑀦𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀲𑀜𑁆𑀜𑀸𑀯𑁂𑀤𑀦𑀸𑀯𑀘𑀻𑀲𑀗𑁆𑀔𑀸𑀭𑀸𑀤𑀬𑁄 𑀯𑀼𑀢𑁆𑀢𑀸, 𑀦 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑁂𑀲𑀼 𑀯𑀼𑀢𑁆𑀢𑀸 𑀓𑀸𑀬𑀲𑀜𑁆𑀘𑁂𑀢𑀦𑀸𑀤𑀬𑁄.

𑀧𑀭𑀺𑀢𑀲𑁆𑀲𑀢𑀻𑀢𑀺 𑀧𑀺𑀧𑀸𑀲𑀢𑀺. 𑀪𑀯𑀢𑀻𑀢𑀺 𑀉𑀧𑀧𑀢𑁆𑀢𑀺𑀪𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀪𑀸𑀯𑀬𑀢𑀻𑀢𑀺 𑀓𑀫𑁆𑀫𑀪𑀯𑀁. 𑀘𑀼𑀢𑀺 𑀔𑀦𑁆𑀥𑀸𑀦𑀁 𑀫𑀭𑀡𑀦𑁆𑀢𑀺 ‘‘𑀫𑀭𑀦𑁆𑀢𑀺 𑀏𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀁. ‘‘𑀤𑀼𑀓𑁆𑀔𑀸 𑀯𑁂𑀤𑀦𑀸 𑀉𑀧𑁆𑀧𑀸𑀤𑀤𑀼𑀓𑁆𑀔𑀸 𑀞𑀺𑀢𑀺𑀤𑀼𑀓𑁆𑀔𑀸’’𑀢𑀺 (𑀫. 𑀦𑀺. 𑁧.𑁪𑁬𑁫) 𑀯𑀘𑀦𑀢𑁄 𑀤𑁆𑀯𑁂𑀥𑀸 𑀔𑀡𑀢𑀺. 𑀆𑀬𑀸𑀲𑁄𑀢𑀺 𑀧𑀭𑀺𑀲𑁆𑀲𑀫𑁄 𑀯𑀺𑀲𑀸𑀤𑁄. 𑀓𑁂𑀯𑀮-𑀲𑀤𑁆𑀤𑁄 𑀅𑀲𑀫𑁆𑀫𑀺𑀲𑁆𑀲𑀯𑀸𑀘𑀓𑁄 𑀳𑁄𑀢𑀺 ‘‘𑀓𑁂𑀯𑀮𑀸 𑀲𑀸𑀮𑀬𑁄’’𑀢𑀺, 𑀦𑀺𑀭𑀯𑀲𑁂𑀲𑀯𑀸𑀘𑀓𑁄 𑀘 ‘‘𑀓𑁂𑀯𑀮𑀸 𑀅𑀗𑁆𑀕𑀫𑀕𑀥𑀸’’𑀢𑀺, 𑀢𑀲𑁆𑀫𑀸 𑀤𑁆𑀯𑁂𑀥𑀸𑀧𑀺 𑀅𑀢𑁆𑀣𑀁 𑀯𑀤𑀢𑀺. 𑀢𑀢𑁆𑀣 𑀅𑀲𑀫𑁆𑀫𑀺𑀲𑁆𑀲𑀲𑁆𑀲𑀸𑀢𑀺 𑀲𑀼𑀔𑀭𑀳𑀺𑀢𑀲𑁆𑀲. 𑀦 𑀳𑀺 𑀏𑀢𑁆𑀣 𑀓𑀺𑀜𑁆𑀘𑀺 𑀉𑀧𑁆𑀧𑀸𑀤𑀯𑀬𑀭𑀳𑀺𑀢𑀁 𑀅𑀢𑁆𑀣𑀻𑀢𑀺.

𑀢𑀁𑀲𑀫𑁆𑀧𑀬𑀼𑀢𑁆𑀢𑁂, 𑀧𑀼𑀕𑁆𑀕𑀮𑀁 𑀯𑀸 𑀲𑀫𑁆𑀫𑁄𑀳𑀬𑀢𑀻𑀢𑀺 𑀲𑀫𑁆𑀫𑁄𑀳𑀦𑀭𑀲𑀸. 𑀆𑀭𑀫𑁆𑀫𑀡𑀲𑀪𑀸𑀯𑀲𑁆𑀲 𑀙𑀸𑀤𑀦𑀁 𑀳𑀼𑀢𑁆𑀯𑀸 𑀕𑀬𑁆𑀳𑀢𑀻𑀢𑀺 𑀙𑀸𑀤𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸. ‘‘𑀆𑀲𑀯𑀲𑀫𑀼𑀤𑀬𑀸 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑁄’’𑀢𑀺 (𑀫. 𑀦𑀺. 𑁧.𑁧𑁦𑁩) 𑀯𑀘𑀦𑀢𑁄 𑀆𑀲𑀯𑀧𑀤𑀝𑁆𑀞𑀸𑀦𑀸. 𑀧𑀝𑀺𑀲𑀦𑁆𑀥𑀺𑀚𑀦𑀦𑀢𑁆𑀣𑀁 𑀆𑀬𑀽𑀳𑀦𑁆𑀢𑀺 𑀩𑁆𑀬𑀸𑀧𑀸𑀭𑀁 𑀓𑀭𑁄𑀦𑁆𑀢𑀻𑀢𑀺 𑀆𑀬𑀽𑀳𑀦𑀭𑀲𑀸, 𑀭𑀸𑀲𑀺𑀓𑀭𑀡𑀁 𑀯𑀸 𑀆𑀬𑀽𑀳𑀦𑀁. 𑀦𑀸𑀫𑀭𑀽𑀧𑀲𑁆𑀲 𑀧𑀼𑀭𑁂𑀘𑀸𑀭𑀺𑀓𑀪𑀸𑀯𑁂𑀦 𑀧𑀯𑀢𑁆𑀢𑀢𑀻𑀢𑀺 𑀧𑀼𑀩𑁆𑀩𑀗𑁆𑀕𑀫𑀭𑀲𑀁. 𑀧𑀼𑀭𑀺𑀫𑀪𑀯𑁂𑀦 𑀲𑀤𑁆𑀥𑀺𑀁 𑀖𑀝𑀦𑀁 𑀳𑀼𑀢𑁆𑀯𑀸 𑀕𑀬𑁆𑀳𑀢𑀻𑀢𑀺 𑀧𑀝𑀺𑀲𑀦𑁆𑀥𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀯𑀺𑀜𑁆𑀜𑀸𑀡𑁂𑀦 𑀲𑀳 𑀲𑀫𑁆𑀧𑀬𑀼𑀚𑁆𑀚𑀢𑀻𑀢𑀺 𑀲𑀫𑁆𑀧𑀬𑁄𑀕𑀭𑀲𑀁. 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀧𑀬𑁄𑀕𑀸𑀪𑀸𑀯𑀢𑁄 𑀭𑀽𑀧𑀁 𑀯𑀺𑀓𑀺𑀭𑀢𑀻𑀢𑀺 𑀯𑀺𑀓𑀺𑀭𑀡𑀭𑀲𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀺𑀲𑀺𑀬𑀫𑀸𑀦𑀸 𑀢𑀡𑁆𑀟𑀼𑀮𑀸𑀤𑀬𑁄 𑀯𑀺𑀓𑀺𑀭𑀦𑁆𑀢𑀺 𑀘𑀼𑀡𑁆𑀡𑀻 𑀪𑀯𑀦𑁆𑀢𑀻𑀢𑀺. 𑀦𑀸𑀫𑀲𑁆𑀲 𑀓𑀤𑀸𑀘𑀺 𑀓𑀼𑀲𑀮𑀸𑀤𑀺𑀪𑀸𑀯𑁄 𑀘 𑀅𑀢𑁆𑀣𑀻𑀢𑀺 𑀢𑀢𑁄 ¶ 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀅𑀩𑁆𑀬𑀸𑀓𑀢𑀧𑀘𑁆𑀘𑀼𑀧𑀝𑁆𑀞𑀸𑀦’’𑀦𑁆𑀢𑀺 𑀆𑀳. ‘‘𑀅𑀘𑁂𑀢𑀦𑀸 𑀅𑀩𑁆𑀬𑀸𑀓𑀢𑀸’’𑀢𑀺 𑀏𑀢𑁆𑀣 𑀯𑀺𑀬 𑀅𑀦𑀸𑀭𑀫𑁆𑀫𑀡𑀢𑀸 𑀯𑀸 𑀅𑀩𑁆𑀬𑀸𑀓𑀢𑀢𑀸 𑀤𑀝𑁆𑀞𑀩𑁆𑀩𑀸. 𑀆𑀬𑀢𑀦𑀮𑀓𑁆𑀔𑀡𑀦𑁆𑀢𑀺 𑀖𑀝𑀦𑀮𑀓𑁆𑀔𑀡𑀁, 𑀆𑀬𑀸𑀦𑀁 𑀢𑀦𑀦𑀮𑀓𑁆𑀔𑀡𑀁 𑀯𑀸. 𑀤𑀲𑁆𑀲𑀦𑀸𑀤𑀻𑀦𑀁 𑀓𑀸𑀭𑀡𑀪𑀸𑀯𑁄 𑀤𑀲𑁆𑀲𑀦𑀸𑀤𑀺𑀭𑀲𑀢𑀸. 𑀅𑀓𑀼𑀲𑀮𑀯𑀺𑀧𑀸𑀓𑀼𑀧𑁂𑀓𑁆𑀔𑀸𑀬 𑀅𑀦𑀺𑀝𑁆𑀞𑀪𑀸𑀯𑀢𑁄 𑀤𑀼𑀓𑁆𑀔𑁂𑀦 𑀇𑀢𑀭𑀸𑀬 𑀘 𑀇𑀝𑁆𑀞𑀪𑀸𑀯𑀢𑁄 𑀲𑀼𑀔𑁂𑀦 𑀲𑀗𑁆𑀕𑀳𑀺𑀢𑀢𑁆𑀢𑀸 ‘‘𑀲𑀼𑀔𑀤𑀼𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸’’𑀢𑀺 𑀆𑀳. 𑀤𑀼𑀓𑁆𑀔𑀲𑀫𑀼𑀤𑀬𑀢𑁆𑀢𑀸 𑀳𑁂𑀢𑀼𑀮𑀓𑁆𑀔𑀡𑀸 𑀢𑀡𑁆𑀳𑀸. ‘‘𑀢𑀢𑁆𑀭𑀢𑀢𑁆𑀭𑀸𑀪𑀺𑀦𑀦𑁆𑀤𑀺𑀦𑀻’’𑀢𑀺 (𑀤𑀻. 𑀦𑀺. 𑁨.𑁪𑁦𑁦; 𑀫. 𑀦𑀺. 𑁧.𑁧𑁩𑁩, 𑁪𑁬𑁦; 𑀯𑀺𑀪. 𑁨𑁦𑁩) 𑀯𑀘𑀦𑀢𑁄 ¶ 𑀅𑀪𑀺𑀦𑀦𑁆𑀤𑀦𑀭𑀲𑀸. 𑀘𑀺𑀢𑁆𑀢𑀲𑁆𑀲, 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀭𑀽𑀧𑀸𑀤𑀻𑀲𑀼 𑀅𑀢𑀺𑀢𑁆𑀢𑀪𑀸𑀯𑁄 𑀳𑀼𑀢𑁆𑀯𑀸 𑀕𑀬𑁆𑀳𑀢𑀻𑀢𑀺 𑀅𑀢𑀺𑀢𑁆𑀢𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀢𑀡𑁆𑀳𑀸𑀤𑀴𑁆𑀳𑀢𑁆𑀢𑀁 𑀳𑀼𑀢𑁆𑀯𑀸 𑀓𑀸𑀫𑀼𑀧𑀸𑀤𑀸𑀦𑀁, 𑀲𑁂𑀲𑀸𑀦𑀺 𑀤𑀺𑀝𑁆𑀞𑀺 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀻𑀢𑀺 𑀢𑀡𑁆𑀳𑀸𑀤𑀴𑁆𑀳𑀢𑁆𑀢𑀤𑀺𑀝𑁆𑀞𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀓𑀫𑁆𑀫𑀼𑀧𑀧𑀢𑁆𑀢𑀺𑀪𑀯𑀯𑀲𑁂𑀦 𑀪𑀯𑀲𑁆𑀲 𑀮𑀓𑁆𑀔𑀡𑀸𑀤𑀬𑁄 𑀬𑁄𑀚𑁂𑀢𑀩𑁆𑀩𑀸.

𑀆𑀤𑀺-𑀲𑀤𑁆𑀤𑁂𑀦 𑀅𑀦𑀼𑀩𑁄𑀥𑀸𑀤𑀺𑀪𑀸𑀯𑀕𑁆𑀕𑀳𑀡𑀁. 𑀤𑀼𑀓𑁆𑀔𑀸𑀤𑀻𑀲𑀼 𑀅𑀜𑁆𑀜𑀸𑀡𑀁 𑀅𑀧𑁆𑀧𑀝𑀺𑀧𑀢𑁆𑀢𑀺, 𑀅𑀲𑀼𑀪𑀸𑀤𑀻𑀲𑀼 𑀲𑀼𑀪𑀸𑀤𑀺𑀯𑀺𑀧𑀮𑁆𑀮𑀸𑀲𑀸 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺. 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀸 𑀯𑀸 𑀅𑀧𑁆𑀧𑀝𑀺𑀧𑀢𑁆𑀢𑀺, 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀸 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺. 𑀦 𑀅𑀯𑀺𑀚𑁆𑀚𑀸𑀬 𑀏𑀯 𑀙𑀤𑁆𑀯𑀸𑀭𑀺𑀓𑀢𑀸 𑀙𑀴𑀸𑀭𑀫𑁆𑀫𑀡𑀢𑀸 𑀘, 𑀅𑀣 𑀔𑁄 𑀅𑀜𑁆𑀜𑁂𑀲𑀼𑀧𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑁂𑀲𑀼 𑀅𑀭𑀽𑀧𑀥𑀫𑁆𑀫𑀸𑀦𑀦𑁆𑀢𑀺 𑀆𑀳 ‘‘𑀲𑀩𑁆𑀩𑁂𑀲𑀼𑀧𑀻’’𑀢𑀺. 𑀦𑁄𑀪𑀬𑀕𑁄𑀘𑀭𑀦𑁆𑀢𑀺 𑀫𑀦𑀸𑀬𑀢𑀦𑀫𑀸𑀳. 𑀦 𑀳𑀺 𑀅𑀭𑀽𑀧𑀥𑀫𑁆𑀫𑀸𑀦𑀁 𑀤𑁂𑀲𑀯𑀲𑁂𑀦 𑀆𑀲𑀦𑁆𑀦𑀢𑀸 𑀤𑀽𑀭𑀢𑀸 𑀘 𑀅𑀢𑁆𑀣𑀺 𑀅𑀲𑀡𑁆𑀞𑀸𑀦𑀢𑁆𑀢𑀸, 𑀢𑀲𑁆𑀫𑀸 𑀫𑀦𑀸𑀬𑀢𑀦𑀲𑁆𑀲 𑀕𑁄𑀘𑀭𑁄 𑀦 𑀫𑀦𑀸𑀬𑀢𑀦𑀁 𑀲𑀫𑁆𑀧𑀢𑁆𑀢𑁄 𑀅𑀲𑀫𑁆𑀧𑀢𑁆𑀢𑁄 𑀯𑀸𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀲𑁄𑀓𑀸𑀤𑀻𑀦𑀁 𑀲𑀩𑁆𑀪𑀸𑀯𑀸 𑀅𑀗𑁆𑀕𑀩𑀳𑀼𑀢𑁆𑀢𑀧𑁆𑀧𑀲𑀗𑁆𑀕𑁂 ‘‘𑀤𑁆𑀯𑀸𑀤𑀲𑁂𑀯𑀸’’𑀢𑀺 𑀅𑀗𑁆𑀕𑀸𑀦𑀁 𑀯𑀯𑀢𑁆𑀣𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀦 𑀳𑀺 𑀲𑁄𑀓𑀸𑀤𑀬𑁄 𑀅𑀗𑁆𑀕𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀨𑀮𑁂𑀦 𑀧𑀦 𑀓𑀸𑀭𑀡𑀁 𑀅𑀯𑀺𑀚𑁆𑀚𑀁 𑀫𑀽𑀮𑀗𑁆𑀕𑀁 𑀤𑀲𑁆𑀲𑁂𑀢𑀼𑀁 𑀢𑁂 𑀯𑀼𑀢𑁆𑀢𑀸𑀢𑀺. 𑀚𑀭𑀸𑀫𑀭𑀡𑀩𑁆𑀪𑀸𑀳𑀢𑀲𑁆𑀲 𑀳𑀺 𑀩𑀸𑀮𑀲𑁆𑀲 𑀢𑁂 𑀲𑀫𑁆𑀪𑀯𑀦𑁆𑀢𑀻𑀢𑀺 𑀲𑁄𑀓𑀸𑀤𑀻𑀦𑀁 𑀚𑀭𑀸𑀫𑀭𑀡𑀓𑀸𑀭𑀡𑀢𑀸 𑀯𑀼𑀢𑁆𑀢𑀸. ‘‘𑀲𑀸𑀭𑀻𑀭𑀺𑀓𑀸𑀬 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀨𑀼𑀝𑁆𑀞𑁄’’𑀢𑀺 (𑀲𑀁. 𑀦𑀺. 𑁪.𑁨𑁫𑁨) 𑀘 𑀲𑀼𑀢𑁆𑀢𑁂 𑀚𑀭𑀸𑀫𑀭𑀡𑀦𑀺𑀫𑀺𑀢𑁆𑀢𑀜𑁆𑀘 𑀤𑀼𑀓𑁆𑀔𑀁 𑀲𑀗𑁆𑀕𑀳𑀺𑀢𑀦𑁆𑀢𑀺 𑀢𑀁𑀢𑀁𑀦𑀺𑀫𑀺𑀢𑁆𑀢𑀸𑀦𑀁 𑀲𑀸𑀥𑀓𑀪𑀸𑀯𑁂𑀦 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀚𑀭𑀸𑀫𑀭𑀡𑁂𑀦𑁂𑀯 𑀲𑁄𑀓𑀸𑀤𑀻𑀦𑀁 𑀏𑀓𑀲𑀗𑁆𑀔𑁂𑀧𑁄 𑀓𑀢𑁄, 𑀢𑀲𑁆𑀫𑀸 𑀢𑁂𑀲𑀁 𑀚𑀸𑀢𑀺𑀧𑀘𑁆𑀘𑀬𑀢𑀸 𑀬𑀼𑀚𑁆𑀚𑀢𑀺. 𑀚𑀭𑀸𑀫𑀭𑀡𑀧𑀘𑁆𑀘𑀬𑀪𑀸𑀯𑁂 𑀳𑀺 𑀅𑀯𑀺𑀚𑁆𑀚𑀸𑀬 𑀏𑀓𑀲𑀗𑁆𑀔𑁂𑀧𑁄 𑀓𑀸𑀢𑀩𑁆𑀩𑁄 𑀲𑀺𑀬𑀸, 𑀚𑀸𑀢𑀺𑀧𑀘𑁆𑀘𑀬𑀸 𑀧𑀦 𑀚𑀭𑀸𑀫𑀭𑀡𑀁 𑀲𑁄𑀓𑀸𑀤𑀬𑁄 𑀘 𑀲𑀫𑁆𑀪𑀯𑀦𑁆𑀢𑀻𑀢𑀺. 𑀢𑀢𑁆𑀣 𑀚𑀭𑀸𑀫𑀭𑀡𑀁 𑀏𑀓𑀦𑁆𑀢𑀺𑀓𑀁 𑀅𑀗𑁆𑀕𑀪𑀸𑀯𑁂𑀦𑁂𑀯 𑀕𑀳𑀺𑀢𑀁, 𑀲𑁄𑀓𑀸𑀤𑀬𑁄 ¶ 𑀧𑀦 𑀭𑀽𑀧𑀪𑀯𑀸𑀤𑀻𑀲𑀼 𑀅𑀪𑀸𑀯𑀢𑁄 𑀅𑀦𑁂𑀓𑀦𑁆𑀢𑀺𑀓𑀸 𑀓𑁂𑀯𑀮𑀁 𑀧𑀸𑀓𑀝𑁂𑀦 𑀨𑀮𑁂𑀦 𑀅𑀯𑀺𑀚𑁆𑀚𑀸𑀦𑀺𑀤𑀲𑁆𑀲𑀦𑀢𑁆𑀣𑀁 𑀕𑀳𑀺𑀢𑀸. 𑀢𑁂𑀦 𑀅𑀦𑀸𑀕𑀢𑁂 𑀚𑀸𑀢𑀺𑀬𑀸 𑀲𑀢𑀺 𑀢𑀢𑁄 𑀧𑀭𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀳𑁂𑀢𑀼𑀳𑁂𑀢𑀼𑀪𑀽𑀢𑀸 𑀅𑀯𑀺𑀚𑁆𑀚𑀸 𑀤𑀲𑁆𑀲𑀺𑀢𑀸𑀢𑀺 𑀪𑀯𑀘𑀓𑁆𑀓𑀲𑁆𑀲 𑀅𑀯𑀺𑀘𑁆𑀙𑁂𑀤𑁄 𑀤𑀲𑁆𑀲𑀺𑀢𑁄 𑀳𑁄𑀢𑀻𑀢𑀺. 𑀲𑀼𑀢𑁆𑀢𑀜𑁆𑀘 𑀲𑁄𑀓𑀸𑀤𑀻𑀦𑀁 𑀅𑀯𑀺𑀚𑁆𑀚𑀸 𑀓𑀸𑀭𑀡𑀦𑁆𑀢𑀺 𑀏𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀲𑀸𑀥𑀓𑀁 𑀤𑀝𑁆𑀞𑀩𑁆𑀩𑀁, 𑀦 𑀲𑁄𑀓𑀸𑀤𑀻𑀦𑀁 𑀩𑀸𑀮𑀲𑁆𑀲 𑀚𑀭𑀸𑀫𑀭𑀡𑀦𑀺𑀫𑀺𑀢𑁆𑀢𑀢𑀸𑀫𑀢𑁆𑀢𑀲𑁆𑀲. ‘‘𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄’’𑀢𑀺 (𑀲𑀁. 𑀦𑀺. 𑁪.𑁨𑁫𑁨) 𑀳𑀺 𑀯𑀘𑀦𑁂𑀦 𑀅𑀯𑀺𑀚𑁆𑀚𑀸 𑀲𑁄𑀓𑀸𑀤𑀻𑀦𑀁 𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑀺𑀢𑀸, 𑀦 𑀘 𑀚𑀭𑀸𑀫𑀭𑀡𑀦𑀺𑀫𑀺𑀢𑁆𑀢𑀫𑁂𑀯 𑀤𑀼𑀓𑁆𑀔𑀁 𑀤𑀼𑀓𑁆𑀔𑀦𑁆𑀢𑀺.

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀯𑀺𑀚𑁆𑀚𑀸𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁨𑁬. ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑁯𑁨 𑀲𑀗𑁆𑀔𑀸𑀭𑀸’’𑀢𑀺 𑀳𑀺 𑀯𑀼𑀢𑁆𑀢𑀦𑁆𑀢𑀺 𑀏𑀢𑁂𑀦 𑀅𑀯𑀺𑀚𑁆𑀚𑀸𑀬 𑀯𑀺𑀲𑁂𑀲𑀦𑀪𑀸𑀯𑁂𑀦 𑀲𑀗𑁆𑀔𑀸𑀭𑀸𑀦𑀜𑁆𑀘 𑀧𑀥𑀸𑀦𑀪𑀸𑀯𑁂𑀦 𑀯𑀼𑀢𑁆𑀢𑀢𑁆𑀢𑀸 𑀲𑀗𑁆𑀔𑀸𑀭𑀸𑀦𑀁 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀪𑀸𑀯𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺. 𑀧𑀺𑀢𑀸 𑀓𑀣𑀻𑀬𑀢𑀺 ‘‘𑀤𑀻𑀖𑁄 𑀲𑀸𑀫𑁄, 𑀫𑀺𑀢𑁆𑀢𑁄 𑀭𑀲𑁆𑀲𑁄, 𑀑𑀤𑀸𑀢𑁄 𑀤𑀢𑁆𑀢𑁄’’𑀢𑀺.

𑀭𑀲𑀺𑀢𑀩𑁆𑀩𑁄 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑁄 𑀲𑀪𑀸𑀯𑁄 𑀭𑀲𑁄, 𑀅𑀢𑁆𑀢𑀦𑁄 𑀭𑀲𑁄 𑀲𑀭𑀲𑁄, 𑀬𑀸𑀣𑀸𑀯𑁄 𑀲𑀭𑀲𑁄 𑀬𑀸𑀣𑀸𑀯𑀲𑀭𑀲𑁄, 𑀲𑁄 𑀏𑀯 𑀮𑀓𑁆𑀔𑀺𑀢𑀩𑁆𑀩𑀢𑁆𑀢𑀸 𑀮𑀓𑁆𑀔𑀡𑀦𑁆𑀢𑀺 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀁. ‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀅𑀯𑀺𑀚𑁆𑀚𑀸? 𑀤𑀼𑀓𑁆𑀔𑁂 𑀅𑀜𑁆𑀜𑀸𑀡’’𑀦𑁆𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁨.𑁨; 𑀫. 𑀦𑀺. 𑁧.𑁧𑁦𑁩) 𑀲𑀼𑀢𑁆𑀢𑁂 𑀘𑀢𑁆𑀢𑀸𑀭𑁂𑀯 𑀯𑀼𑀢𑁆𑀢𑀸𑀦𑀻𑀢𑀺 ‘‘𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑁂𑀦𑀸’’𑀢𑀺 𑀆𑀳. 𑀦𑀺𑀓𑁆𑀔𑁂𑀧𑀓𑀡𑁆𑀟𑁂 𑀧𑀦𑀸𑀢𑀺𑀆𑀤𑀺𑀦𑀸 𑀇𑀥 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀓𑀣𑀺𑀢𑀸𑀬 𑀏𑀯 𑀅𑀯𑀺𑀚𑁆𑀚𑀸𑀬 𑀦𑀺𑀓𑁆𑀔𑁂𑀧𑀓𑀡𑁆𑀟𑁂 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀓𑀺𑀘𑁆𑀘𑀚𑀸𑀢𑀺𑀢𑁄 𑀧𑀜𑁆𑀘𑀯𑀻𑀲𑀢𑀺𑀬𑀸 𑀧𑀤𑁂𑀳𑀺 𑀮𑀓𑁆𑀔𑀡𑀢𑁄 𑀘 𑀓𑀣𑀺𑀢𑀢𑁆𑀢𑀸 𑀢𑀤𑀢𑁆𑀣𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀯𑀺𑀪𑀸𑀯𑀦𑀁 𑀓𑀭𑁄𑀢𑀺. 𑀅𑀳𑀸𑀧𑁂𑀢𑁆𑀯𑀸 𑀯𑀺𑀪𑀚𑀺𑀢𑀩𑁆𑀩𑀯𑀺𑀪𑀚𑀦𑀜𑁆𑀳𑀺 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁄.

𑀚𑀸𑀬𑀢𑀺 𑀏𑀢𑁆𑀣𑀸𑀢𑀺 𑀚𑀸𑀢𑀺, 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀁. 𑀬𑀤𑀺𑀧𑀺 𑀦𑀺𑀭𑁄𑀥𑀫𑀕𑁆𑀕𑁂 𑀅𑀯𑀺𑀚𑁆𑀚𑀸 𑀆𑀭𑀫𑁆𑀫𑀡𑀁 𑀦 𑀓𑀭𑁄𑀢𑀺, 𑀢𑁂 𑀧𑀦 𑀚𑀸𑀦𑀺𑀢𑀼𑀓𑀸𑀫𑀲𑁆𑀲 𑀢𑀧𑁆𑀧𑀝𑀺𑀘𑁆𑀙𑀸𑀤𑀦𑀯𑀲𑁂𑀦 𑀅𑀦𑀺𑀭𑁄𑀥𑀫𑀕𑁆𑀕𑁂𑀲𑀼 𑀦𑀺𑀭𑁄𑀥𑀫𑀕𑁆𑀕𑀕𑁆𑀕𑀳𑀡𑀓𑀆𑀭𑀡𑀯𑀲𑁂𑀦 𑀘 𑀧𑀯𑀢𑁆𑀢𑀫𑀸𑀦𑀸 𑀢𑀢𑁆𑀣 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀼𑀘𑁆𑀘𑀢𑀻𑀢𑀺 𑀢𑁂𑀲𑀫𑁆𑀧𑀺 𑀅𑀯𑀺𑀚𑁆𑀚𑀸𑀬 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀢𑀸 𑀳𑁄𑀢𑀺, 𑀇𑀢𑀭𑁂𑀲𑀁 𑀆𑀭𑀫𑁆𑀫𑀡𑀪𑀸𑀯𑁂𑀦 ¶ 𑀘𑀸𑀢𑀺. 𑀲𑀗𑁆𑀖𑀺𑀓𑀩𑀮𑀤𑁂𑀯𑀕𑁄𑀡𑀸𑀤𑀻𑀦𑀁 𑀲𑀗𑁆𑀖𑀸𑀝𑀺𑀦𑀗𑁆𑀕𑀮𑀸𑀤𑀻𑀦𑀺 𑀯𑀺𑀬 𑀅𑀜𑁆𑀜𑀲𑁂𑀢𑀸𑀤𑀻𑀦𑀁 𑀅𑀯𑀺𑀚𑁆𑀚𑀸𑀬 𑀤𑀼𑀓𑁆𑀔𑀸𑀤𑀺𑀯𑀺𑀲𑀬𑀸𑀦𑀁 𑀅𑀦𑁆𑀥𑀢𑁆𑀢𑀓𑀭𑀸𑀦𑀁 𑀮𑁄𑀪𑀸𑀤𑀻𑀦𑀁 𑀦𑀺𑀯𑀢𑁆𑀢𑀓𑁄 𑀅𑀜𑁆𑀜𑀸𑀡𑀸𑀤𑀺𑀲𑀪𑀸𑀯𑁄 𑀮𑀓𑁆𑀔𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀢𑁆𑀣𑀢𑁆𑀣𑀦𑁆𑀢𑀺 𑀨𑀮𑀨𑀮𑀁. 𑀆𑀫𑁂𑀟𑀺𑀢𑀯𑀘𑀦𑀜𑁆𑀳𑀺 𑀲𑀩𑁆𑀩𑁂𑀲𑀁 𑀅𑀢𑁆𑀣𑀸𑀦𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀸𑀓𑀝𑀓𑀭𑀡𑀪𑀸𑀯𑀧𑁆𑀧𑀓𑀸𑀲𑀦𑀢𑁆𑀣𑀁. 𑀅𑀢𑁆𑀣𑁄 𑀏𑀯 𑀯𑀸 𑀅𑀢𑁆𑀣𑁄 𑀅𑀢𑁆𑀣𑀢𑁆𑀣𑁄𑀢𑀺 𑀅𑀢𑁆𑀣𑀲𑁆𑀲 𑀅𑀯𑀺𑀧𑀭𑀻𑀢𑀢𑀸𑀤𑀲𑁆𑀲𑀦𑀢𑁆𑀣𑀁 𑀅𑀢𑁆𑀣𑁂𑀦𑁂𑀯𑀢𑁆𑀣𑀁 𑀯𑀺𑀲𑁂𑀲𑀬𑀢𑀺. 𑀦 𑀳𑀺 𑀜𑀸𑀡𑀁 𑀅𑀦𑀢𑁆𑀣𑀁 𑀅𑀢𑁆𑀣𑁄𑀢𑀺 𑀕𑀡𑁆𑀳𑀸𑀢𑀻𑀢𑀺. 𑀏𑀯𑀁 𑀓𑀸𑀭𑀡𑀓𑀸𑀭𑀡𑀦𑁆𑀢𑀺 𑀏𑀢𑁆𑀣𑀸𑀧𑀺 𑀤𑀝𑁆𑀞𑀩𑁆𑀩𑀁. 𑀢𑀁 𑀆𑀓𑀸𑀭𑀦𑁆𑀢𑀺 𑀅𑀢𑁆𑀣𑀢𑁆𑀣𑀸𑀤𑀺𑀆𑀓𑀸𑀭𑀁. 𑀕𑀳𑁂𑀢𑁆𑀯𑀸𑀢𑀺 𑀘𑀺𑀢𑁆𑀢𑁂 𑀧𑀯𑁂𑀲𑁂𑀢𑁆𑀯𑀸, 𑀘𑀺𑀢𑁆𑀢𑁂𑀦 𑀧𑀼𑀕𑁆𑀕𑀮𑁂𑀦 𑀯𑀸 𑀕𑀳𑀺𑀢𑀁 𑀓𑀢𑁆𑀯𑀸. 𑀧𑀝𑀺𑀯𑀺𑀤𑁆𑀥𑀲𑁆𑀲 𑀧𑀼𑀦 𑀅𑀯𑁂𑀓𑁆𑀔𑀡𑀸 𑀧𑀘𑁆𑀘𑀯𑁂𑀓𑁆𑀔𑀡𑀸. 𑀤𑀼𑀘𑁆𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀺𑀢𑀸𑀤𑀺𑀮𑀓𑁆𑀔𑀡𑀲𑁆𑀲 𑀩𑀸𑀮𑀲𑁆𑀲 𑀪𑀸𑀯𑁄 𑀩𑀸𑀮𑁆𑀬𑀁. 𑀧𑀚𑀸𑀦𑀸𑀢𑀻𑀢𑀺 𑀧𑀓𑀸𑀭𑁂𑀳𑀺 𑀚𑀸𑀦𑀸𑀢𑀺. 𑀩𑀮𑀯𑀫𑁄𑀳𑀦𑀁 𑀧𑀫𑁄𑀳𑁄. 𑀲𑀫𑀦𑁆𑀢𑀢𑁄 𑀫𑁄𑀳𑀦𑀁 𑀲𑀫𑁆𑀫𑁄𑀳𑁄.

𑀤𑀼𑀓𑁆𑀔𑀸𑀭𑀫𑁆𑀫𑀡𑀢𑀸𑀢𑀺 ¶ 𑀤𑀼𑀓𑁆𑀔𑀸𑀭𑀫𑁆𑀫𑀡𑀢𑀸𑀬, 𑀬𑀸𑀬 𑀯𑀸 𑀅𑀯𑀺𑀚𑁆𑀚𑀸𑀬 𑀙𑀸𑀤𑁂𑀦𑁆𑀢𑀺𑀬𑀸 𑀤𑀼𑀓𑁆𑀔𑀸𑀭𑀫𑁆𑀫𑀡𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸, 𑀲𑀸 𑀢𑁂𑀲𑀁 𑀪𑀸𑀯𑁄𑀢𑀺 𑀤𑀼𑀓𑁆𑀔𑀸𑀭𑀫𑁆𑀫𑀡𑀢𑀸, 𑀆𑀭𑀫𑁆𑀫𑀡𑀫𑁂𑀯 𑀯𑀸 𑀆𑀭𑀫𑁆𑀫𑀡𑀢𑀸, 𑀤𑀼𑀓𑁆𑀔𑀁 𑀆𑀭𑀫𑁆𑀫𑀡𑀢𑀸 𑀏𑀢𑀺𑀲𑁆𑀲𑀸𑀢𑀺 𑀤𑀼𑀓𑁆𑀔𑀸𑀭𑀫𑁆𑀫𑀡𑀢𑀸.

𑀤𑀼𑀤𑁆𑀤𑀲𑀢𑁆𑀢𑀸 𑀕𑀫𑁆𑀪𑀻𑀭𑀸 𑀦 𑀲𑀪𑀸𑀯𑀢𑁄, 𑀢𑀲𑁆𑀫𑀸 𑀢𑀤𑀸𑀭𑀫𑁆𑀫𑀡𑀢𑀸 𑀅𑀯𑀺𑀚𑁆𑀚𑀸 𑀉𑀧𑁆𑀧𑀚𑁆𑀚𑀢𑀺, 𑀇𑀢𑀭𑁂𑀲𑀁 𑀲𑀪𑀸𑀯𑀢𑁄 𑀕𑀫𑁆𑀪𑀻𑀭𑀢𑁆𑀢𑀸 𑀢𑀤𑀸𑀭𑀫𑁆𑀫𑀡𑀢𑀸 𑀦𑀼𑀧𑁆𑀧𑀚𑁆𑀚𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀧𑀺𑀘 𑀔𑁄 𑀧𑀦𑀸𑀢𑀺 𑀫𑀕𑁆𑀕𑀲𑁆𑀲 𑀲𑀗𑁆𑀔𑀢𑀲𑀪𑀸𑀯𑀢𑁆𑀢𑀸 𑀢𑀢𑁄𑀧𑀺 𑀦𑀺𑀭𑁄𑀥𑀲𑁆𑀲 𑀕𑀫𑁆𑀪𑀻𑀭𑀢𑀭𑀢𑀁 𑀤𑀲𑁆𑀲𑁂𑀢𑀺.

𑀅𑀯𑀺𑀚𑁆𑀚𑀸𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀗𑁆𑀔𑀸𑀭𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑀧𑀼𑀦𑀸𑀢𑀻𑀢𑀺 𑀲𑁄𑀥𑁂𑀢𑀺 𑀅𑀧𑀼𑀜𑁆𑀜𑀨𑀮𑀢𑁄 𑀤𑀼𑀓𑁆𑀔𑀲𑀁𑀓𑀺𑀮𑁂𑀲𑀢𑁄 𑀘, 𑀳𑀺𑀢𑀲𑀼𑀔𑀚𑁆𑀛𑀸𑀲𑀬𑁂𑀦 𑀧𑀼𑀜𑁆𑀜𑀁 𑀓𑀭𑁄𑀢𑀻𑀢𑀺 𑀢𑀁𑀦𑀺𑀧𑁆𑀨𑀸𑀤𑀦𑁂𑀦 𑀓𑀸𑀭𑀓𑀲𑁆𑀲𑀚𑁆𑀛𑀸𑀲𑀬𑀁 𑀧𑀽𑀭𑁂𑀢𑀻𑀢𑀺 𑀧𑀼𑀜𑁆𑀜𑁄, 𑀧𑀽𑀭𑀓𑁄 𑀧𑀼𑀚𑁆𑀚𑀦𑀺𑀩𑁆𑀩𑀢𑁆𑀢𑀓𑁄 𑀘 𑀦𑀺𑀭𑀼𑀢𑁆𑀢𑀺𑀮𑀓𑁆𑀔𑀡𑁂𑀦 ‘‘𑀧𑀼𑀜𑁆𑀜𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀫𑀸𑀥𑀺𑀧𑀘𑁆𑀘𑀦𑀻𑀓𑀸𑀦𑀁 𑀅𑀢𑀺𑀤𑀽𑀭𑀢𑀸𑀬 𑀦 𑀇𑀜𑁆𑀚𑀢𑀺 𑀦 𑀘𑀮𑀢𑀻𑀢𑀺 𑀅𑀢𑁆𑀣𑁄. 𑀓𑀸𑀬𑀲𑁆𑀲𑀸𑀢𑀺 𑀤𑁆𑀯𑀸𑀭𑀲𑁆𑀲 𑀲𑀸𑀫𑀺𑀪𑀸𑀯𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄.

𑀧𑀼𑀜𑁆𑀜𑀼𑀧𑀕𑀦𑁆𑀢𑀺 ¶ 𑀪𑀯𑀲𑀫𑁆𑀧𑀢𑁆𑀢𑀼𑀧𑀕𑀁. 𑀢𑀢𑁆𑀣𑀸𑀢𑀺 𑀯𑀺𑀪𑀗𑁆𑀕𑀲𑀼𑀢𑁆𑀢𑁂 (𑀲𑀁. 𑀦𑀺. 𑁨.𑁨). 𑀢𑀜𑁆𑀳𑀺 𑀧𑀥𑀸𑀦𑀪𑀸𑀯𑁂𑀦 𑀕𑀳𑀺𑀢𑀦𑁆𑀢𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁧𑁦𑁨) 𑀧𑀦 ‘‘𑀢𑀬𑁄𑀫𑁂, 𑀆𑀯𑀼𑀲𑁄, 𑀲𑀗𑁆𑀔𑀸𑀭𑀸’’𑀢𑀺 𑀆𑀕𑀢𑀦𑁆𑀢𑀺. 𑀲𑀩𑁆𑀩𑀜𑁆𑀜𑀼𑀚𑀺𑀦𑀪𑀸𑀲𑀺𑀢𑁄 𑀧𑀦 𑀅𑀬𑀁, 𑀦 𑀧𑀘𑁆𑀘𑁂𑀓𑀚𑀺𑀦𑀪𑀸𑀲𑀺𑀢𑁄, 𑀇𑀫𑀲𑁆𑀲𑀢𑁆𑀣𑀲𑁆𑀲 𑀤𑀻𑀧𑀦𑀢𑁆𑀣𑀁 𑀏𑀢𑁂𑀲𑀁 𑀲𑀼𑀢𑁆𑀢𑀸𑀦𑀁 𑀯𑀲𑁂𑀦 𑀢𑁂 𑀕𑀳𑀺𑀢𑀸. 𑀓𑀣𑀁 𑀧𑀦𑁂𑀢𑁂𑀦 𑀕𑀳𑀡𑁂𑀦𑀸𑀬𑀫𑀢𑁆𑀣𑁄 𑀤𑀻𑀧𑀺𑀢𑁄 𑀳𑁄𑀢𑀻𑀢𑀺 𑀢𑀁𑀤𑀲𑁆𑀲𑀦𑀢𑁆𑀣𑀫𑀸𑀳 ‘‘𑀅𑀪𑀺𑀥𑀫𑁆𑀫𑁂𑀧𑀺 𑀳𑀺 𑀲𑀼𑀢𑁆𑀢𑁂𑀧𑀺 𑀏𑀓𑀲𑀤𑀺𑀲𑀸𑀯 𑀢𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀸’’𑀢𑀺. 𑀲𑀩𑁆𑀩𑀜𑁆𑀜𑀼𑀪𑀸𑀲𑀺𑀢𑁄𑀢𑀺 𑀧𑀸𑀓𑀝𑁂𑀦 𑀲𑀼𑀢𑁆𑀢𑀦𑁆𑀢𑁂𑀦 𑀲𑀤𑀺𑀲𑀢𑁆𑀢𑀸 𑀅𑀬𑀫𑁆𑀧𑀺 𑀲𑀩𑁆𑀩𑀜𑁆𑀜𑀼𑀪𑀸𑀲𑀺𑀢𑁄𑀢𑀺 𑀜𑀸𑀬𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺.

‘‘𑀢𑁂𑀭𑀲𑀸𑀧𑀻’’𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀣 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀦 𑀪𑀸𑀯𑀦𑀸𑀫𑀬𑀢𑀸 𑀧𑀸𑀓𑀝𑀸𑀢𑀺 ‘‘𑀬𑀣𑀸 𑀳𑀻’’𑀢𑀺𑀆𑀤𑀺𑀫𑀸𑀳 ¶ . 𑀧𑀣𑀯𑀻 𑀧𑀣𑀯𑀻𑀢𑀺𑀆𑀤𑀺𑀪𑀸𑀯𑀦𑀸 𑀘 𑀓𑀲𑀺𑀡𑀧𑀭𑀺𑀓𑀫𑁆𑀫𑀓𑀭𑀡𑀁 𑀫𑀡𑁆𑀟𑀮𑀓𑀭𑀡𑀜𑁆𑀘 𑀪𑀸𑀯𑀦𑀁 𑀪𑀚𑀸𑀧𑁂𑀦𑁆𑀢𑀺.

𑀤𑀸𑀦𑀯𑀲𑁂𑀦 𑀧𑀯𑀢𑁆𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀤𑀸𑀦𑀁. 𑀢𑀢𑁆𑀣 𑀩𑁆𑀬𑀸𑀧𑀸𑀭𑀪𑀽𑀢𑀸 𑀆𑀬𑀽𑀳𑀦𑀘𑁂𑀢𑀦𑀸 𑀤𑀸𑀦𑀁 𑀆𑀭𑀩𑁆𑀪 𑀤𑀸𑀦𑀁 𑀅𑀥𑀺𑀓𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀇𑀢𑀭𑁂𑀲𑀼. 𑀲𑁄𑀫𑀦𑀲𑁆𑀲𑀘𑀺𑀢𑁆𑀢𑁂𑀦𑀸𑀢𑀺 𑀅𑀦𑀼𑀫𑁄𑀤𑀦𑀸𑀧𑀯𑀢𑁆𑀢𑀺𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁 𑀤𑀝𑁆𑀞𑀩𑁆𑀩𑀁. 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦𑀧𑀺 𑀳𑀺 𑀅𑀦𑀼𑀲𑁆𑀲𑀭𑀢𑀺 𑀏𑀯𑀸𑀢𑀺.

𑀅𑀲𑀭𑀺𑀓𑁆𑀔𑀓𑀫𑁆𑀧𑀺 𑀲𑀭𑀺𑀓𑁆𑀔𑀓𑁂𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀺𑀧𑀸𑀓𑁂𑀦 𑀯𑁂𑀳𑀧𑁆𑀨𑀮𑀸𑀤𑀻𑀲𑀼 𑀯𑀺𑀦𑀸𑀧𑀺 𑀅𑀲𑀜𑁆𑀜𑁂𑀲𑀼 𑀓𑀝𑀢𑁆𑀢𑀸𑀭𑀽𑀧𑀁. 𑀭𑀽𑀧𑀫𑁂𑀯 𑀲𑀨𑀦𑁆𑀤𑀦𑀢𑁆𑀢𑀸 ‘‘𑀲𑀇𑀜𑁆𑀚𑀦’’𑀦𑁆𑀢𑀺 𑀯𑀼𑀢𑁆𑀢𑀁 𑀇𑀜𑁆𑀚𑀦𑀓𑀭𑀦𑀻𑀯𑀭𑀡𑀸𑀤𑀻𑀦𑀁 𑀅𑀯𑀺𑀓𑁆𑀔𑀫𑁆𑀪𑀦𑀢𑁄, 𑀭𑀽𑀧𑀢𑀡𑁆𑀳𑀸𑀲𑀗𑁆𑀔𑀸𑀢𑀲𑁆𑀲 𑀇𑀜𑁆𑀚𑀦𑀓𑀲𑁆𑀲 𑀓𑀸𑀭𑀡𑀢𑁆𑀢𑀸 𑀯𑀸. 𑀢𑁂𑀦𑁂𑀯 𑀭𑀽𑀧𑀸𑀭𑀫𑁆𑀫𑀡𑀁 𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀜𑁆𑀘 𑀲𑀩𑁆𑀩𑀫𑁆𑀧𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 ‘‘𑀅𑀦𑀺𑀜𑁆𑀚𑀦’’𑀦𑁆𑀢𑀺 𑀦 𑀯𑀼𑀘𑁆𑀘𑀢𑀻𑀢𑀺. 𑀫𑀳𑀸𑀢𑀼𑀮𑀸𑀬 𑀥𑀸𑀭𑀬𑀫𑀸𑀦𑁄 𑀦𑀸𑀴𑀺𑀬𑀸 𑀫𑀺𑀦𑀫𑀸𑀦𑁄 𑀘 𑀲𑀫𑀼𑀤𑀸𑀬𑀫𑁂𑀯 𑀥𑀸𑀭𑁂𑀢𑀺 𑀫𑀺𑀦𑀢𑀺 𑀘, 𑀦 𑀏𑀓𑁂𑀓𑀁 𑀕𑀼𑀜𑁆𑀚𑀁, 𑀏𑀓𑁂𑀓𑀁 𑀢𑀡𑁆𑀟𑀼𑀮𑀁 𑀯𑀸, 𑀏𑀯𑀁 𑀪𑀕𑀯𑀸𑀧𑀺 𑀅𑀧𑀭𑀺𑀫𑀸𑀡𑀸 𑀧𑀞𑀫𑀓𑀼𑀲𑀮𑀘𑁂𑀢𑀦𑀸𑀬𑁄 𑀲𑀫𑀼𑀤𑀸𑀬𑀯𑀲𑁂𑀦𑁂𑀯 𑀕𑀳𑁂𑀢𑁆𑀯𑀸 𑀏𑀓𑀚𑀸𑀢𑀺𑀓𑀢𑁆𑀢𑀸 𑀏𑀓𑀫𑁂𑀯 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀏𑀯𑀁 𑀤𑀼𑀢𑀺𑀬𑀸𑀤𑀬𑁄𑀧𑀻𑀢𑀺.

‘‘𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀸’’𑀢𑀺 𑀅𑀯𑀢𑁆𑀯𑀸 ‘‘𑀆𑀤𑀸𑀦𑀕𑁆𑀕𑀳𑀡𑀘𑁄𑀧𑀦𑀁 𑀧𑀸𑀧𑀬𑀫𑀸𑀦𑀸 𑀉𑀧𑁆𑀧𑀦𑁆𑀦𑀸’’𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀘𑀦𑀯𑀺𑀲𑁂𑀲𑀫𑀢𑁆𑀢𑀫𑁂𑀯 𑀤𑀲𑁆𑀲𑁂𑀢𑀺. 𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀺 𑀏𑀯 𑀳𑀺 𑀆𑀤𑀸𑀦𑀸𑀤𑀺𑀧𑀸𑀧𑀦𑀸𑀢𑀺. 𑀧𑀼𑀭𑀺𑀫𑁂𑀦 𑀯𑀸 𑀤𑁆𑀯𑀸𑀭𑀲𑁆𑀲 𑀉𑀧𑀮𑀓𑁆𑀔𑀡𑀪𑀸𑀯𑁄 𑀯𑀼𑀢𑁆𑀢𑁄, 𑀧𑀘𑁆𑀙𑀺𑀫𑁂𑀦 𑀘𑁂𑀢𑀦𑀸𑀬 𑀲𑀯𑀺𑀜𑁆𑀜𑀢𑁆𑀢𑀺𑀭𑀽𑀧𑀲𑀫𑀼𑀝𑁆𑀞𑀸𑀧𑀦𑀁. 𑀢𑀢𑁆𑀣 𑀆𑀓𑀟𑁆𑀠𑀺𑀢𑁆𑀯𑀸 𑀕𑀳𑀡𑀁 𑀆𑀤𑀸𑀦𑀁, 𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀕𑀳𑀡𑀁 𑀕𑀳𑀡𑀁, 𑀨𑀦𑁆𑀤𑀦𑀁 𑀘𑁄𑀧𑀦𑀁.

𑀏𑀢𑁆𑀣𑀸𑀢𑀺 ¶ 𑀓𑀸𑀬𑀯𑀘𑀻𑀲𑀗𑁆𑀔𑀸𑀭𑀕𑁆𑀕𑀳𑀡𑁂, 𑀓𑀸𑀬𑀯𑀘𑀻𑀲𑀜𑁆𑀘𑁂𑀢𑀦𑀸𑀕𑀳𑀡𑁂 𑀯𑀸. 𑀅𑀝𑁆𑀞𑀓𑀣𑀸𑀬𑀁 𑀅𑀪𑀺𑀜𑁆𑀜𑀸𑀘𑁂𑀢𑀦𑀸 𑀦 𑀕𑀳𑀺𑀢𑀸 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺. 𑀓𑀲𑁆𑀫𑀸 𑀧𑀦 𑀦 𑀳𑁄𑀢𑀺, 𑀦𑀦𑀼 𑀲𑀸𑀧𑀺 𑀓𑀼𑀲𑀮𑀸 𑀯𑀺𑀧𑀸𑀓𑀥𑀫𑁆𑀫𑀸 𑀘𑀸𑀢𑀺? 𑀲𑀘𑁆𑀘𑀁, 𑀅𑀦𑀼𑀧𑀘𑁆𑀙𑀺𑀦𑁆𑀦𑀢𑀡𑁆𑀳𑀸𑀯𑀺𑀚𑁆𑀚𑀸𑀫𑀸𑀦𑁂 𑀧𑀦 𑀲𑀦𑁆𑀢𑀸𑀦𑁂 𑀲𑀩𑁆𑀬𑀸𑀧𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀢𑀲𑁆𑀲𑀸 𑀓𑀼𑀲𑀮𑀢𑀸 𑀯𑀺𑀧𑀸𑀓𑀥𑀫𑁆𑀫𑀢𑀸 𑀘 𑀯𑀼𑀢𑁆𑀢𑀸, 𑀦 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑁂𑀦, 𑀲𑀸 𑀧𑀦 𑀯𑀺𑀧𑀸𑀓𑀁 𑀉𑀧𑁆𑀧𑀸𑀤𑀬𑀦𑁆𑀢𑀻 𑀭𑀽𑀧𑀸𑀯𑀘𑀭𑀫𑁂𑀯 𑀉𑀧𑁆𑀧𑀸𑀤𑁂𑀬𑁆𑀬. 𑀦 𑀳𑀺 𑀅𑀜𑁆𑀜𑀪𑀽𑀫𑀺𑀓𑀁 𑀓𑀫𑁆𑀫𑀁 𑀅𑀜𑁆𑀜𑀪𑀽𑀫𑀺𑀓𑀁 𑀯𑀺𑀧𑀸𑀓𑀁 𑀉𑀧𑁆𑀧𑀸𑀤𑁂𑀢𑀻𑀢𑀺. 𑀅𑀢𑁆𑀢𑀦𑀸 𑀲𑀤𑀺𑀲𑀸𑀭𑀫𑁆𑀫𑀡𑀜𑁆𑀘 𑀢𑀺𑀝𑁆𑀞𑀸𑀦𑀺𑀓𑀁 𑀢𑀁 𑀉𑀧𑁆𑀧𑀸𑀤𑁂𑀬𑁆𑀬 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁂 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀓𑀫𑁆𑀫𑀲𑀤𑀺𑀲𑀸𑀭𑀫𑁆𑀫𑀡𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸, 𑀦 𑀘 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑁄 𑀧𑀭𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑁄 𑀅𑀢𑁆𑀣𑀺, 𑀅𑀪𑀺𑀜𑁆𑀜𑀸𑀘𑁂𑀢𑀦𑀸 𑀘 𑀧𑀭𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀸𑀯 𑀳𑁄𑀢𑀺, 𑀢𑀲𑁆𑀫𑀸 𑀯𑀺𑀧𑀸𑀓𑀁 𑀦 𑀉𑀧𑁆𑀧𑀸𑀤𑁂𑀢𑀻𑀢𑀺 ¶ 𑀯𑀺𑀜𑁆𑀜𑀸𑀬𑀢𑀺. 𑀓𑀲𑀺𑀡𑁂𑀲𑀼 𑀘 𑀉𑀧𑁆𑀧𑀸𑀤𑀺𑀢𑀲𑁆𑀲 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺𑀲𑁆𑀲 𑀆𑀦𑀺𑀲𑀁𑀲𑀪𑀽𑀢𑀸 𑀅𑀪𑀺𑀜𑁆𑀜𑀸. 𑀬𑀣𑀸𑀳 ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂’’𑀢𑀺𑀆𑀤𑀺 (𑀤𑀻. 𑀦𑀺. 𑁧.𑁨𑁪𑁪-𑁨𑁪𑁫; 𑀫. 𑀦𑀺. 𑁧.𑁩𑁮𑁪-𑁩𑁮𑁬). 𑀢𑀲𑁆𑀫𑀸 𑀲𑀫𑀸𑀥𑀺𑀨𑀮𑀲𑀤𑀺𑀲𑀸 𑀲𑀸, 𑀦 𑀘 𑀨𑀮𑀁 𑀤𑁂𑀢𑀻𑀢𑀺 𑀤𑀸𑀦𑀲𑀻𑀮𑀸𑀦𑀺𑀲𑀁𑀲𑁄 𑀢𑀲𑁆𑀫𑀺𑀁 𑀪𑀯𑁂 𑀧𑀘𑁆𑀘𑀬𑀮𑀸𑀪𑁄 𑀯𑀺𑀬 𑀲𑀸𑀧𑀺 𑀯𑀺𑀧𑀸𑀓𑀁 𑀦 𑀉𑀧𑁆𑀧𑀸𑀤𑁂𑀢𑀺. 𑀬𑀣𑀸 𑀘 𑀅𑀪𑀺𑀜𑁆𑀜𑀸𑀘𑁂𑀢𑀦𑀸, 𑀏𑀯𑀁 𑀉𑀤𑁆𑀥𑀘𑁆𑀘𑀘𑁂𑀢𑀦𑀸𑀧𑀺 𑀦 𑀳𑁄𑀢𑀻𑀢𑀺 𑀇𑀤𑀁 𑀉𑀤𑁆𑀥𑀘𑁆𑀘𑀲𑀳𑀕𑀢𑁂 𑀥𑀫𑁆𑀫𑁂 𑀯𑀺𑀲𑀼𑀁 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀢𑁂𑀲𑀁 𑀯𑀺𑀧𑀸𑀓𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 (𑀯𑀺𑀪. 𑁭𑁨𑁫) 𑀯𑀼𑀢𑁆𑀢𑀢𑁆𑀢𑀸 𑀯𑀺𑀘𑀸𑀭𑁂𑀢𑀩𑁆𑀩𑀁.

𑀅𑀬𑀁 𑀧𑀦𑁂𑀢𑁆𑀣 𑀅𑀫𑀢𑀕𑁆𑀕𑀧𑀣𑀸𑀦𑀼𑀕𑀢𑁄 𑀯𑀺𑀦𑀺𑀘𑁆𑀙𑀬𑁄 𑁋 𑀤𑀲𑁆𑀲𑀦𑀪𑀸𑀯𑀦𑀸𑀦𑀁 𑀅𑀪𑀸𑀯𑁂𑀧𑀺 𑀬𑁂𑀲𑀁 𑀧𑀼𑀣𑀼𑀚𑁆𑀚𑀦𑀸𑀦𑀁 𑀲𑁂𑀓𑁆𑀔𑀸𑀦𑀜𑁆𑀘 𑀤𑀲𑁆𑀲𑀦𑀪𑀸𑀯𑀦𑀸𑀳𑀺 𑀪𑀯𑀺𑀢𑀩𑁆𑀩𑀁, 𑀢𑁂𑀲𑀁 𑀢𑀤𑀼𑀧𑁆𑀧𑀢𑁆𑀢𑀺𑀓𑀸𑀮𑁂 𑀢𑁂𑀳𑀺 𑀧𑀳𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸 𑀅𑀓𑀼𑀲𑀮𑀸 ‘‘𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸’’𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺, 𑀧𑀼𑀣𑀼𑀚𑁆𑀚𑀦𑀸𑀦𑀁 𑀧𑀦 𑀪𑀸𑀯𑀦𑀸𑀬 𑀅𑀪𑀸𑀯𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀘𑀺𑀦𑁆𑀢𑀸 𑀦𑀢𑁆𑀣𑀺. 𑀢𑁂𑀦 𑀢𑁂𑀲𑀁 𑀧𑀯𑀢𑁆𑀢𑀫𑀸𑀦𑀸 𑀢𑁂 𑀤𑀲𑁆𑀲𑀦𑁂𑀦 𑀧𑀳𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀸𑀧𑀺 ‘‘𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸’’𑀢𑀺 𑀦 𑀯𑀼𑀘𑁆𑀘𑀦𑁆𑀢𑀺. 𑀬𑀤𑀺 𑀯𑀼𑀘𑁆𑀘𑁂𑀬𑁆𑀬𑀼𑀁, 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸𑀦𑀁 𑀓𑁂𑀲𑀜𑁆𑀘𑀺 𑀓𑁂𑀘𑀺 𑀓𑀤𑀸𑀘𑀺 𑀆𑀭𑀫𑁆𑀫𑀡𑀸𑀭𑀫𑁆𑀫𑀡𑀸𑀥𑀺𑀧𑀢𑀺𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄 𑀪𑀯𑁂𑀬𑁆𑀬𑀼𑀁, 𑀦 𑀘 𑀧𑀝𑁆𑀞𑀸𑀦𑁂 ‘‘𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸𑀦𑀁 𑀓𑁂𑀲𑀜𑁆𑀘𑀺 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑀸. 𑀲𑁂𑀓𑁆𑀔𑀸𑀦𑀁 𑀧𑀦 𑀯𑀺𑀚𑁆𑀚𑀫𑀸𑀦𑀸 𑀪𑀸𑀯𑀦𑀸𑀬 𑀧𑀳𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸. 𑀢𑁂𑀦𑁂𑀯 𑀲𑁂𑀓𑁆𑀔𑀸𑀦𑀁 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸 𑀘𑀢𑁆𑀢𑀢𑁆𑀢𑀸 𑀯𑀦𑁆𑀢𑀢𑁆𑀢𑀸 𑀫𑀼𑀢𑁆𑀢𑀢𑁆𑀢𑀸 𑀧𑀳𑀻𑀦𑀢𑁆𑀢𑀸 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀉𑀓𑁆𑀔𑁂𑀝𑀺𑀢𑀢𑁆𑀢𑀸 𑀲𑀫𑀼𑀓𑁆𑀔𑁂𑀝𑀺𑀢𑀢𑁆𑀢𑀸 𑀅𑀲𑁆𑀲𑀸𑀤𑀺𑀢𑀩𑁆𑀩𑀸 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀸 ¶ 𑀘 𑀦 𑀳𑁄𑀦𑁆𑀢𑀺, 𑀧𑀳𑀻𑀦𑀢𑀸𑀬 𑀏𑀯 𑀲𑁄𑀫𑀦𑀲𑁆𑀲𑀳𑁂𑀢𑀼𑀪𑀽𑀢𑀸 𑀅𑀯𑀺𑀓𑁆𑀔𑁂𑀧𑀳𑁂𑀢𑀼𑀪𑀽𑀢𑀸 𑀘 𑀦 𑀤𑁄𑀫𑀦𑀲𑁆𑀲𑀁 𑀉𑀤𑁆𑀥𑀘𑁆𑀘𑀜𑁆𑀘 𑀉𑀧𑁆𑀧𑀸𑀤𑁂𑀦𑁆𑀢𑀻𑀢𑀺 𑀦 𑀢𑁂 𑀢𑁂𑀲𑀁 𑀆𑀭𑀫𑁆𑀫𑀡𑀸𑀭𑀫𑁆𑀫𑀡𑀸𑀥𑀺𑀧𑀢𑀺𑀪𑀸𑀯𑀁 𑀧𑀓𑀢𑀽𑀧𑀦𑀺𑀲𑁆𑀲𑀬𑀪𑀸𑀯𑀜𑁆𑀘 𑀕𑀘𑁆𑀙𑀦𑁆𑀢𑀺. 𑀦 𑀳𑀺 𑀧𑀳𑀻𑀦𑁂 𑀉𑀧𑀦𑀺𑀲𑁆𑀲𑀸𑀬 𑀅𑀭𑀺𑀬𑁄 𑀭𑀸𑀕𑀸𑀤𑀺𑀓𑀺𑀮𑁂𑀲𑁂 𑀉𑀧𑁆𑀧𑀸𑀤𑁂𑀢𑀺.

𑀯𑀼𑀢𑁆𑀢𑀜𑁆𑀘 ‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀺…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑁂𑀦…𑀧𑁂… 𑀦 𑀧𑀘𑁆𑀘𑀸𑀕𑀘𑁆𑀙𑀢𑀻’’𑀢𑀺 (𑀫𑀳𑀸𑀦𑀺. 𑁮𑁦; 𑀘𑀽𑀴𑀦𑀺. 𑀫𑁂𑀢𑁆𑀢𑀕𑀽𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁨𑁭), 𑀦 𑀘 𑀧𑀼𑀣𑀼𑀚𑁆𑀚𑀦𑀸𑀦𑀁 𑀤𑀲𑁆𑀲𑀦𑁂𑀦 𑀧𑀳𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸 𑀇𑀢𑀭𑁂𑀲𑀁 𑀦 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀦𑁆𑀢𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁 ‘‘𑀤𑀺𑀝𑁆𑀞𑀺𑀁 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺, 𑀢𑀁 𑀆𑀭𑀩𑁆𑀪 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀤𑀺𑀝𑁆𑀞𑀺 𑀯𑀺𑀘𑀺𑀓𑀺𑀘𑁆𑀙𑀸 𑀉𑀤𑁆𑀥𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺. 𑀯𑀺𑀘𑀺𑀓𑀺𑀘𑁆𑀙𑀁 𑀆𑀭𑀩𑁆𑀪 𑀯𑀺𑀘𑀺𑀓𑀺𑀘𑁆𑀙𑀸 𑀤𑀺𑀝𑁆𑀞𑀺 𑀉𑀤𑁆𑀥𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀦𑀁 𑀉𑀤𑁆𑀥𑀘𑁆𑀘𑀸𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀏𑀢𑁆𑀣 𑀳𑀺 𑀉𑀤𑁆𑀥𑀘𑁆𑀘𑀦𑁆𑀢𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀥𑀺𑀧𑀢𑀺𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 ‘‘𑀤𑀺𑀝𑁆𑀞𑀺𑀁 𑀕𑀭𑀼𑀁 ¶ 𑀓𑀢𑁆𑀯𑀸 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺, 𑀢𑀁 𑀕𑀭𑀼𑀁 𑀓𑀢𑁆𑀯𑀸 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁦𑁯) 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁, 𑀦 𑀯𑀼𑀢𑁆𑀢𑀁 ‘‘𑀉𑀤𑁆𑀥𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺. 𑀢𑀲𑁆𑀫𑀸 𑀤𑀲𑁆𑀲𑀦𑀪𑀸𑀯𑀦𑀸𑀳𑀺 𑀧𑀳𑀸𑀢𑀩𑁆𑀩𑀸𑀦𑀁 𑀅𑀢𑀻𑀢𑀸𑀤𑀺𑀪𑀸𑀯𑁂𑀦 𑀦𑀯𑀢𑁆𑀢𑀩𑁆𑀩𑀢𑁆𑀢𑁂𑀧𑀺 𑀬𑀸𑀤𑀺𑀲𑀸𑀦𑀁 𑀢𑀸𑀳𑀺 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸 𑀆𑀧𑀸𑀤𑁂𑀢𑀩𑁆𑀩𑀸, 𑀢𑁂𑀲𑀼 𑀧𑀼𑀣𑀼𑀚𑁆𑀚𑀦𑁂𑀲𑀼 𑀯𑀢𑁆𑀢𑀫𑀸𑀦𑀸 𑀤𑀲𑁆𑀲𑀦𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀢𑁂𑀦 𑀧𑀳𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸, 𑀲𑁂𑀓𑁆𑀔𑁂𑀲𑀼 𑀯𑀢𑁆𑀢𑀫𑀸𑀦𑀸 𑀪𑀸𑀯𑀦𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀢𑀸𑀬 𑀧𑀳𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸. 𑀢𑁂𑀲𑀼 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸 𑀲𑀳𑀸𑀬𑀯𑀺𑀭𑀳𑀸 𑀯𑀺𑀧𑀸𑀓𑀁 𑀦 𑀚𑀦𑀬𑀦𑁆𑀢𑀻𑀢𑀺 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀘𑁂𑀢𑀦𑀸𑀬 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑁄 𑀦 𑀯𑀼𑀢𑁆𑀢𑁄, 𑀅𑀧𑁂𑀓𑁆𑀔𑀺𑀢𑀩𑁆𑀩𑀤𑀲𑁆𑀲𑀦𑀪𑀸𑀯𑀦𑀸𑀭𑀳𑀺𑀢𑀸𑀦𑀁 𑀧𑀦 𑀧𑀼𑀣𑀼𑀚𑁆𑀚𑀦𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀲𑀓𑀪𑀡𑁆𑀟𑁂 𑀙𑀦𑁆𑀤𑀭𑀸𑀕𑀸𑀤𑀻𑀦𑀁 𑀉𑀤𑁆𑀥𑀘𑁆𑀘𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀘 𑀲𑀁𑀬𑁄𑀚𑀦𑀢𑁆𑀢𑀬𑀢𑀤𑁂𑀓𑀝𑁆𑀞𑀓𑀺𑀮𑁂𑀲𑀸𑀦𑀁 𑀅𑀦𑀼𑀧𑀘𑁆𑀙𑀺𑀦𑁆𑀦𑀢𑀸𑀬 𑀅𑀧𑀭𑀺𑀓𑁆𑀔𑀻𑀡𑀲𑀳𑀸𑀬𑀸𑀦𑀁 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀁 𑀦 𑀲𑀓𑁆𑀓𑀸 𑀧𑀝𑀺𑀓𑁆𑀔𑀺𑀧𑀺𑀢𑀼𑀦𑁆𑀢𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑁄 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑁄𑀢𑀺.

𑀬𑀤𑀺 𑀏𑀯𑀁, 𑀅𑀧𑁂𑀓𑁆𑀔𑀺𑀢𑀩𑁆𑀩𑀤𑀲𑁆𑀲𑀦𑀪𑀸𑀯𑀦𑀸𑀭𑀳𑀺𑀢𑀸𑀦𑀁 𑀅𑀓𑀼𑀲𑀮𑀸𑀦𑀁 𑀦𑁂𑀯𑀤𑀲𑁆𑀲𑀦𑁂𑀦𑀦𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀢𑀸 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺, 𑀅𑀧𑁆𑀧𑀳𑀸𑀢𑀩𑁆𑀩𑀸𑀦𑀁 ‘‘𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸’’𑀢𑀺 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁮) 𑀯𑀼𑀢𑁆𑀢𑀢𑁆𑀢𑀸, 𑀅𑀧𑁆𑀧𑀳𑀸𑀢𑀩𑁆𑀩𑀯𑀺𑀭𑀼𑀤𑁆𑀥𑀲𑀪𑀸𑀯𑀢𑁆𑀢𑀸 𑀘 𑀅𑀓𑀼𑀲𑀮𑀸𑀦𑀁. 𑀏𑀯𑀫𑁆𑀧𑀺 𑀢𑁂𑀲𑀁 𑀇𑀫𑀲𑁆𑀫𑀺𑀁 𑀢𑀺𑀓𑁂 𑀦𑀯𑀢𑁆𑀢𑀩𑁆𑀩𑀢𑀸 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁂 𑀤𑀲𑁆𑀲𑀺𑀢𑀸𑀦𑀁 𑀤𑁆𑀯𑀸𑀤𑀲𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀲𑀗𑁆𑀕𑀳𑀺𑀢𑀢𑁆𑀢𑀸. 𑀬𑀣𑀸 𑀳𑀺 𑀥𑀫𑁆𑀫𑀯𑀲𑁂𑀦 𑀲𑀗𑁆𑀔𑀢𑀥𑀫𑁆𑀫𑀸 ¶ 𑀲𑀩𑁆𑀩𑁂 𑀲𑀗𑁆𑀕𑀳𑀺𑀢𑀸𑀢𑀺 𑀉𑀧𑁆𑀧𑀦𑁆𑀦𑀢𑁆𑀢𑀺𑀓𑁂 𑀓𑀸𑀮𑀯𑀲𑁂𑀦 𑀅𑀲𑀗𑁆𑀕𑀳𑀺𑀢𑀸𑀧𑀺 𑀅𑀢𑀻𑀢𑀸 𑀦𑀯𑀢𑁆𑀢𑀩𑁆𑀩𑀸𑀢𑀺 𑀦 𑀯𑀼𑀢𑁆𑀢𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀭𑀽𑀧𑀪𑀸𑀯𑁂𑀦 𑀕𑀳𑀺𑀢𑁂𑀲𑀼 𑀦𑀯𑀢𑁆𑀢𑀩𑁆𑀩𑀲𑁆𑀲 𑀅𑀪𑀸𑀯𑀸, 𑀏𑀯𑀫𑀺𑀥𑀸𑀧𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀪𑀸𑀯𑁂𑀦 𑀕𑀳𑀺𑀢𑁂𑀲𑀼 𑀦𑀯𑀢𑁆𑀢𑀩𑁆𑀩𑀲𑁆𑀲 𑀅𑀪𑀸𑀯𑀸 𑀦𑀯𑀢𑁆𑀢𑀩𑁆𑀩𑀢𑀸 𑀦 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀢𑁆𑀣 𑀳𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀓𑁄𑀘𑀺 𑀦𑀺𑀬𑁄𑀕𑀢𑁄 𑀦𑀯𑀢𑁆𑀢𑀩𑁆𑀩𑁄 𑀅𑀢𑁆𑀣𑀺, 𑀢𑀢𑁆𑀣 𑀢𑁂𑀲𑀁 𑀘𑀢𑀼𑀢𑁆𑀣𑁄 𑀓𑁄𑀝𑁆𑀞𑀸𑀲𑁄 𑀅𑀢𑁆𑀣𑀻𑀢𑀺 𑀬𑀣𑀸𑀯𑀼𑀢𑁆𑀢𑀧𑀤𑁂𑀲𑀼 𑀯𑀺𑀬 𑀢𑀢𑁆𑀣𑀸𑀧𑀺 𑀪𑀺𑀦𑁆𑀤𑀺𑀢𑁆𑀯𑀸 𑀪𑀚𑀸𑀧𑁂𑀢𑀩𑁆𑀩𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀪𑀺𑀦𑁆𑀤𑀺𑀢𑁆𑀯𑀸 𑀪𑀚𑀸𑀧𑁂𑀢𑀺 ‘‘𑀲𑀺𑀬𑀸 𑀦𑀯𑀢𑁆𑀢𑀩𑁆𑀩𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸’’𑀢𑀺𑀆𑀤𑀺𑀦𑀸. 𑀢𑀤𑀪𑀸𑀯𑀸 𑀉𑀧𑁆𑀧𑀦𑁆𑀦𑀢𑁆𑀢𑀺𑀓𑁂 𑀇𑀥 𑀘 𑀢𑀣𑀸 𑀦 𑀯𑀼𑀢𑁆𑀢𑀸.

𑀅𑀣 𑀯𑀸 𑀬𑀣𑀸 𑀲𑀧𑁆𑀧𑀝𑀺𑀖𑁂𑀳𑀺 𑀲𑀫𑀸𑀦𑀲𑀪𑀸𑀯𑀢𑁆𑀢𑀸 𑀭𑀽𑀧𑀥𑀸𑀢𑀼𑀬𑀁 𑀢𑀬𑁄 𑀫𑀳𑀸𑀪𑀽𑀢𑀸 ‘‘𑀲𑀧𑁆𑀧𑀝𑀺𑀖𑀸’’𑀢𑀺 𑀯𑀼𑀢𑁆𑀢𑀸. 𑀬𑀣𑀸𑀳 ‘‘𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀅𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀏𑀓𑀁 𑀫𑀳𑀸𑀪𑀽𑀢𑀁 𑀧𑀝𑀺𑀘𑁆𑀘 𑀤𑁆𑀯𑁂 𑀫𑀳𑀸𑀪𑀽𑀢𑀸, 𑀤𑁆𑀯𑁂 𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀏𑀓𑀁 𑀫𑀳𑀸𑀪𑀽𑀢’’𑀦𑁆𑀢𑀺 (𑀧𑀝𑁆𑀞𑀸. 𑁨.𑁨𑁨.𑁯). 𑀏𑀯𑀁 𑀧𑀼𑀣𑀼𑀚𑁆𑀚𑀦𑀸𑀦𑀁 𑀧𑀯𑀢𑁆𑀢𑀫𑀸𑀦𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀲𑀫𑀸𑀦𑀲𑀪𑀸𑀯𑀸 ‘‘𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸’’𑀢𑀺 𑀯𑀼𑀘𑁆𑀘𑁂𑀬𑁆𑀬𑀼𑀦𑁆𑀢𑀺 𑀦𑀢𑁆𑀣𑀺 𑀦𑀯𑀢𑁆𑀢𑀩𑁆𑀩𑀢𑀸𑀧𑀲𑀗𑁆𑀕𑁄. 𑀏𑀯𑀜𑁆𑀘 𑀲𑀢𑀺 𑀧𑀼𑀣𑀼𑀚𑁆𑀚𑀦𑀸𑀦𑀁 𑀧𑀯𑀢𑁆𑀢𑀫𑀸𑀦𑀸𑀧𑀺 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸 𑀲𑀓𑀪𑀡𑁆𑀟𑁂 𑀙𑀦𑁆𑀤𑀭𑀸𑀕𑀸𑀤𑀬𑁄 ¶ 𑀧𑀭𑀪𑀡𑁆𑀟𑁂 𑀙𑀦𑁆𑀤𑀭𑀸𑀕𑀸𑀤𑀻𑀦𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄, 𑀭𑀸𑀕𑁄 𑀘 𑀭𑀸𑀕𑀤𑀺𑀝𑁆𑀞𑀻𑀦𑀁 𑀅𑀥𑀺𑀧𑀢𑀺𑀧𑀘𑁆𑀘𑀬𑁄𑀢𑀺 𑀅𑀬𑀫𑀢𑁆𑀣𑁄 𑀮𑀤𑁆𑀥𑁄 𑀳𑁄𑀢𑀺. 𑀬𑀣𑀸 𑀧𑀦 𑀅𑀨𑁄𑀝𑁆𑀞𑀩𑁆𑀩𑀢𑁆𑀢𑀸 𑀭𑀽𑀧𑀥𑀸𑀢𑀼𑀬𑀁 𑀢𑀬𑁄 𑀫𑀳𑀸𑀪𑀽𑀢𑀸 𑀦 𑀧𑀭𑀫𑀢𑁆𑀣𑀢𑁄 𑀲𑀧𑁆𑀧𑀝𑀺𑀖𑀸, 𑀏𑀯𑀁 𑀅𑀧𑁂𑀓𑁆𑀔𑀺𑀢𑀩𑁆𑀩𑀪𑀸𑀯𑀦𑀸𑀭𑀳𑀺𑀢𑀸 𑀧𑀼𑀣𑀼𑀚𑁆𑀚𑀦𑁂𑀲𑀼 𑀧𑀯𑀢𑁆𑀢𑀫𑀸𑀦𑀸 𑀲𑀓𑀪𑀡𑁆𑀟𑁂 𑀙𑀦𑁆𑀤𑀭𑀸𑀕𑀸𑀤𑀬𑁄 𑀦 𑀧𑀭𑀫𑀢𑁆𑀣𑀢𑁄 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸𑀢𑀺 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸𑀦𑀁 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀢𑀸 𑀦 𑀯𑀼𑀢𑁆𑀢𑀸, 𑀦 𑀘 ‘‘𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸𑀦𑀁 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑀸. 𑀬𑁂 𑀳𑀺 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀧𑀘𑁆𑀘𑀬𑀸 𑀓𑀺𑀮𑁂𑀲𑀸, 𑀦 𑀢𑁂 𑀤𑀲𑁆𑀲𑀦𑀢𑁄 𑀉𑀤𑁆𑀥𑀁 𑀧𑀯𑀢𑁆𑀢𑀦𑁆𑀢𑀺, 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀧𑀘𑁆𑀘𑀬𑀲𑁆𑀲𑀧𑀺 𑀧𑀦 𑀉𑀤𑁆𑀥𑀘𑁆𑀘𑀲𑀳𑀕𑀢𑀲𑁆𑀲 𑀲𑀳𑀸𑀬𑀯𑁂𑀓𑀮𑁆𑀮𑀫𑀢𑁆𑀢𑀫𑁂𑀯 𑀤𑀲𑁆𑀲𑀦𑁂𑀦 𑀓𑀢𑀁, 𑀦 𑀢𑀲𑁆𑀲 𑀓𑁄𑀘𑀺 𑀪𑀸𑀯𑁄 𑀤𑀲𑁆𑀲𑀦𑁂𑀦 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀆𑀧𑀸𑀤𑀺𑀢𑁄𑀢𑀺 𑀢𑀲𑁆𑀲 𑀏𑀓𑀦𑁆𑀢𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀢𑀸 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀢𑀲𑁆𑀲 𑀢𑀸𑀤𑀺𑀲𑀲𑁆𑀲𑁂𑀯 𑀲𑀢𑀺 𑀲𑀳𑀸𑀬𑁂 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀯𑀘𑀦𑀁, 𑀅𑀲𑀢𑀺 𑀘 𑀯𑀺𑀧𑀸𑀓𑀸𑀦𑀼𑀧𑁆𑀧𑀸𑀤𑀦𑀯𑀘𑀦𑀁 𑀦 𑀯𑀺𑀭𑀼𑀚𑁆𑀛𑀢𑀻𑀢𑀺.

𑀲𑀸𑀧𑀺 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀪𑀸𑀯𑁂 𑀬𑀤𑀺 𑀅𑀧𑀦𑁂𑀢𑀩𑁆𑀩𑀸, 𑀓𑀲𑁆𑀫𑀸 ‘‘𑀲𑀫𑀯𑀻𑀲𑀢𑀺 𑀘𑁂𑀢𑀦𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀢𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀧𑀦 ¶ 𑀲𑀩𑁆𑀩𑀸𑀧𑁂𑀢𑀸 𑀳𑁄𑀦𑁆𑀢𑀻’’𑀢𑀺. 𑀬𑀤𑀺 𑀏𑀯𑀁, 𑀅𑀪𑀺𑀜𑁆𑀜𑀸𑀘𑁂𑀢𑀦𑀸𑀬 𑀲𑀳 ‘‘𑀏𑀓𑀯𑀻𑀲𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀦, 𑀅𑀯𑀘𑀦𑀲𑁆𑀲 𑀯𑀼𑀢𑁆𑀢𑀓𑀸𑀭𑀡𑀢𑁆𑀢𑀸, 𑀢𑀁 𑀧𑀦 𑀇𑀢𑀭𑀸𑀯𑀘𑀦𑀲𑁆𑀲𑀧𑀺 𑀓𑀸𑀭𑀡𑀦𑁆𑀢𑀺 𑀲𑀫𑀸𑀦𑀘𑁂𑀢𑀦𑀸𑀯𑀘𑀦𑀓𑀸𑀭𑀡𑀯𑀘𑀦𑁂𑀦 𑀬𑀁 𑀓𑀸𑀭𑀡𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀏𑀓𑀸 𑀯𑀼𑀢𑁆𑀢𑀸, 𑀢𑁂𑀦 𑀓𑀸𑀭𑀡𑁂𑀦 𑀇𑀢𑀭𑀸𑀬𑀧𑀺 𑀯𑀢𑁆𑀢𑀩𑁆𑀩𑀢𑀁, 𑀬𑀜𑁆𑀘 𑀓𑀸𑀭𑀡𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀇𑀢𑀭𑀸 𑀦 𑀯𑀼𑀢𑁆𑀢𑀸, 𑀢𑁂𑀦 𑀓𑀸𑀭𑀡𑁂𑀦 𑀯𑀼𑀢𑁆𑀢𑀸𑀬𑀧𑀺 𑀅𑀯𑀢𑁆𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑀺. 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀏𑀯𑀸𑀢𑀺 𑀪𑁂𑀤𑀸𑀪𑀸𑀯𑀸 𑀧𑀸𑀓𑀝𑁄𑀢𑀺 𑀦 𑀢𑀲𑁆𑀲 𑀲𑀁𑀬𑁄𑀕𑁄 𑀤𑀲𑁆𑀲𑀺𑀢𑁄.

𑀲𑀼𑀔𑀲𑀜𑁆𑀜𑀸𑀬 𑀕𑀳𑁂𑀢𑁆𑀯𑀸𑀢𑀺 𑀏𑀢𑁂𑀦 𑀢𑀡𑁆𑀳𑀸𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀢𑀡𑁆𑀳𑀸𑀧𑀭𑀺𑀓𑁆𑀔𑀸𑀭𑁂𑀢𑀺 𑀢𑀡𑁆𑀳𑀸𑀬 𑀧𑀭𑀺𑀯𑀸𑀭𑁂, 𑀢𑀡𑁆𑀳𑀸𑀬 ‘‘𑀲𑀼𑀔𑀁 𑀲𑀼𑀪’’𑀦𑁆𑀢𑀺𑀆𑀤𑀺𑀦𑀸 𑀲𑀗𑁆𑀔𑀢𑁂 𑀯𑀸 𑀅𑀮𑀗𑁆𑀓𑀢𑁂𑀢𑀺 𑀅𑀢𑁆𑀣𑁄. 𑀢𑀡𑁆𑀳𑀸 𑀳𑀺 𑀤𑀼𑀓𑁆𑀔𑀲𑁆𑀲 𑀲𑀫𑀼𑀤𑀬𑁄𑀢𑀺 𑀅𑀚𑀸𑀦𑀦𑁆𑀢𑁄 ‘‘𑀅𑀳𑁄 𑀯𑀢𑀸𑀳𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀦𑀁 𑀯𑀸 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬’’𑀦𑁆𑀢𑀺 𑀲𑀗𑁆𑀔𑀸𑀭𑁂 𑀧𑀭𑀺𑀓𑁆𑀔𑀭𑁄𑀢𑀻𑀢𑀺. 𑀅𑀫𑀭𑀡𑀢𑁆𑀣𑀸𑀢𑀺 𑀕𑀳𑀺𑀢𑀸 𑀤𑀼𑀓𑁆𑀓𑀭𑀓𑀺𑀭𑀺𑀬𑀸 𑀅𑀫𑀭𑀢𑀧𑁄, 𑀤𑁂𑀯𑀪𑀸𑀯𑀢𑁆𑀣𑀁 𑀢𑀧𑁄 𑀯𑀸, 𑀤𑀼𑀓𑁆𑀔𑀢𑁆𑀢𑀸 𑀯𑀸 𑀫𑀭𑁄 𑀫𑀸𑀭𑀓𑁄 𑀢𑀧𑁄 𑀅𑀫𑀭𑀢𑀧𑁄. 𑀤𑀺𑀝𑁆𑀞𑁂 𑀅𑀤𑀺𑀝𑁆𑀞-𑀲𑀤𑁆𑀤𑁄 𑀯𑀺𑀬 𑀫𑀭𑁂𑀲𑀼 𑀅𑀫𑀭-𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄.

𑀚𑀸𑀢𑀺𑀆𑀤𑀺𑀧𑀧𑀸𑀢𑀤𑀼𑀓𑁆𑀔𑀚𑀦𑀦𑀢𑁄 𑀫𑀭𑀼𑀧𑀧𑀸𑀢𑀲𑀤𑀺𑀲𑀢𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀲𑁆𑀲 𑀯𑀼𑀢𑁆𑀢𑀸. 𑀭𑀫𑀡𑀻𑀬𑀪𑀸𑀯𑁂𑀦 ¶ 𑀘 𑀅𑀲𑁆𑀲𑀸𑀤𑀪𑀸𑀯𑁂𑀦 𑀘 𑀕𑀬𑁆𑀳𑀫𑀸𑀦𑀁 𑀧𑀼𑀜𑁆𑀜𑀨𑀮𑀁 𑀤𑀻𑀧𑀲𑀺𑀔𑀸𑀫𑀥𑀼𑀮𑀺𑀢𑁆𑀢𑀲𑀢𑁆𑀣𑀥𑀸𑀭𑀸𑀲𑀤𑀺𑀲𑀁, 𑀢𑀤𑀢𑁆𑀣𑁄 𑀘 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀢𑀁𑀦𑀺𑀧𑀸𑀢𑀮𑁂𑀳𑀦𑀲𑀤𑀺𑀲𑁄.

‘‘𑀲𑀼𑀔𑁄 𑀇𑀫𑀺𑀲𑁆𑀲𑀸 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀢𑀭𑀼𑀡𑀸𑀬 𑀫𑀼𑀤𑀼𑀓𑀸𑀬 𑀮𑁄𑀫𑀲𑀸𑀬 𑀩𑀸𑀳𑀸𑀬 𑀲𑀫𑁆𑀨𑀲𑁆𑀲𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁪𑁬𑁯) 𑀲𑀼𑀔𑀲𑀜𑁆𑀜𑀸𑀬 𑀩𑀸𑀮𑁄 𑀯𑀺𑀬 𑀕𑀽𑀣𑀓𑀻𑀴𑀦𑀁 𑀓𑀺𑀮𑁂𑀲𑀸𑀪𑀺𑀪𑀽𑀢𑀢𑀸𑀬 𑀓𑁄𑀥𑀸𑀭𑀢𑀺𑀅𑀪𑀺𑀪𑀽𑀢𑁄 𑀅𑀲𑀯𑀲𑁄 𑀫𑀭𑀺𑀢𑀼𑀓𑀸𑀫𑁄 𑀯𑀺𑀬 𑀯𑀺𑀲𑀔𑀸𑀤𑀦𑀁 𑀓𑀭𑀡𑀨𑀮𑀓𑁆𑀔𑀡𑁂𑀲𑀼 𑀚𑀺𑀕𑀼𑀘𑁆𑀙𑀦𑀻𑀬𑀁 𑀤𑀼𑀓𑁆𑀔𑀜𑁆𑀘 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀁 𑀆𑀭𑀪𑀢𑀺. 𑀮𑁄𑀪𑀲𑀳𑀕𑀢𑀲𑁆𑀲 𑀯𑀸 𑀕𑀽𑀣𑀓𑀻𑀴𑀦𑀲𑀤𑀺𑀲𑀢𑀸, 𑀤𑁄𑀲𑀲𑀳𑀕𑀢𑀲𑁆𑀲 𑀯𑀺𑀲𑀔𑀸𑀤𑀦𑀲𑀤𑀺𑀲𑀢𑀸 𑀬𑁄𑀚𑁂𑀢𑀩𑁆𑀩𑀸. 𑀓𑀸𑀫𑀕𑀼𑀡𑀲𑀫𑀺𑀤𑁆𑀥𑀺𑀬𑀸 𑀲𑀪𑀬𑀲𑁆𑀲𑀧𑀺 𑀧𑀺𑀲𑀸𑀘𑀦𑀕𑀭𑀲𑁆𑀲 𑀲𑀼𑀔𑀯𑀺𑀧𑀮𑁆𑀮𑀸𑀲𑀳𑁂𑀢𑀼𑀪𑀸𑀯𑁄 𑀯𑀺𑀬 𑀅𑀭𑀽𑀧𑀯𑀺𑀧𑀸𑀓𑀸𑀦𑀁 𑀦𑀺𑀭𑀦𑁆𑀢𑀭𑀢𑀸𑀬 𑀅𑀦𑀼𑀧𑀮𑀓𑁆𑀔𑀺𑀬𑀫𑀸𑀦𑀉𑀧𑁆𑀧𑀸𑀤𑀯𑀬𑀸𑀦𑀁, 𑀤𑀻𑀖𑀲𑀦𑁆𑀢𑀸𑀦𑀢𑀸𑀬 𑀅𑀕𑀬𑁆𑀳𑀫𑀸𑀦𑀯𑀺𑀧𑀭𑀺𑀡𑀸𑀫𑀸𑀦𑀁, 𑀲𑀗𑁆𑀔𑀸𑀭𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀪𑀽𑀢𑀸𑀦𑀫𑁆𑀧𑀺 𑀦𑀺𑀘𑁆𑀘𑀸𑀤𑀺𑀯𑀺𑀧𑀮𑁆𑀮𑀸𑀲𑀳𑁂𑀢𑀼𑀪𑀸𑀯𑁄𑀢𑀺 𑀢𑁂𑀲𑀁 𑀧𑀺𑀲𑀸𑀘𑀦𑀕𑀭𑀲𑀤𑀺𑀲𑀢𑀸, 𑀢𑀤𑀪𑀺𑀫𑀼𑀔𑀕𑀫𑀦𑀲𑀤𑀺𑀲𑀢𑀸 𑀘 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀲𑁆𑀲 𑀬𑁄𑀚𑁂𑀢𑀩𑁆𑀩𑀸.

𑀢𑀸𑀯𑀸𑀢𑀺 ¶ 𑀯𑀢𑁆𑀢𑀩𑁆𑀩𑀦𑁆𑀢𑀭𑀸𑀧𑁂𑀓𑁆𑀔𑁄 𑀦𑀺𑀧𑀸𑀢𑁄, 𑀢𑀲𑁆𑀫𑀸 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄𑀢𑀺 𑀇𑀤𑀁 𑀢𑀸𑀯 𑀲𑀺𑀤𑁆𑀥𑀁, 𑀇𑀤𑀁 𑀧𑀦 𑀅𑀧𑀭𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀧𑀦 𑀲𑀩𑁆𑀩𑀸𑀧𑁂𑀢𑀸 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀪𑀺𑀜𑁆𑀜𑀸𑀘𑁂𑀢𑀦𑀸𑀦𑀁 𑀧𑀘𑁆𑀘𑀬𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀘𑁂𑀢𑁄𑀧𑀭𑀺𑀬𑀧𑀼𑀩𑁆𑀩𑁂𑀦𑀺𑀯𑀸𑀲𑀅𑀦𑀸𑀕𑀢𑀁𑀲𑀜𑀸𑀡𑁂𑀳𑀺 𑀧𑀭𑁂𑀲𑀁 𑀅𑀢𑁆𑀢𑀦𑁄 𑀘 𑀲𑀫𑁄𑀳𑀘𑀺𑀢𑁆𑀢𑀚𑀸𑀦𑀦𑀓𑀸𑀮𑁂𑀢𑀺 𑀬𑁄𑀚𑁂𑀢𑀩𑁆𑀩𑀸.

𑀅𑀯𑀺𑀚𑁆𑀚𑀸𑀲𑀫𑁆𑀫𑀽𑀴𑁆𑀳𑀢𑁆𑀢𑀸𑀢𑀺 𑀪𑀯𑀸𑀤𑀻𑀦𑀯𑀧𑀝𑀺𑀘𑁆𑀙𑀸𑀤𑀺𑀓𑀸𑀬 𑀅𑀯𑀺𑀚𑁆𑀚𑀸𑀬 𑀲𑀫𑁆𑀫𑀽𑀴𑁆𑀳𑀢𑁆𑀢𑀸. 𑀭𑀸𑀕𑀸𑀤𑀻𑀦𑀦𑁆𑀢𑀺 𑀭𑀸𑀕𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀤𑁄𑀫𑀦𑀲𑁆𑀲𑀸𑀦𑀁 𑀅𑀯𑀺𑀚𑁆𑀚𑀸𑀲𑀫𑁆𑀧𑀬𑀼𑀢𑁆𑀢𑀭𑀸𑀕𑀸𑀤𑀺𑀅𑀲𑁆𑀲𑀸𑀤𑀦𑀓𑀸𑀮𑁂𑀲𑀼 𑀅𑀯𑀺𑀚𑁆𑀚𑀁 𑀆𑀭𑀩𑁆𑀪 𑀉𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀕𑀭𑀼𑀁 𑀓𑀢𑁆𑀯𑀸 𑀅𑀲𑁆𑀲𑀸𑀤𑀦𑀁 𑀭𑀸𑀕𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀸𑀬 𑀏𑀯 𑀅𑀯𑀺𑀚𑁆𑀚𑀸𑀬 𑀬𑁄𑀚𑁂𑀢𑀩𑁆𑀩𑀁, 𑀅𑀲𑁆𑀲𑀸𑀤𑀦𑀜𑁆𑀘 𑀭𑀸𑀕𑁄, 𑀢𑀤𑀯𑀺𑀧𑁆𑀧𑀬𑀼𑀢𑁆𑀢𑀸 𑀘 𑀤𑀺𑀝𑁆𑀞𑀻𑀢𑀺 𑀅𑀲𑁆𑀲𑀸𑀤𑀦𑀯𑀘𑀦𑁂𑀦𑁂𑀯 𑀬𑀣𑀸𑀯𑀼𑀢𑁆𑀢𑀁 𑀅𑀯𑀺𑀚𑁆𑀚𑀁 𑀕𑀭𑀼𑀁 𑀓𑀭𑁄𑀦𑁆𑀢𑀻 𑀤𑀺𑀝𑁆𑀞𑀺 𑀘 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀭𑀸𑀕𑀸𑀤𑀻𑀳𑀺 𑀘 𑀧𑀸𑀴𑀺𑀬𑀁 𑀲𑀭𑀽𑀧𑁂𑀦 𑀯𑀼𑀢𑁆𑀢𑁂𑀳𑀺 𑀢𑀁𑀲𑀫𑁆𑀧𑀬𑀼𑀢𑁆𑀢𑀲𑀗𑁆𑀔𑀸𑀭𑀲𑁆𑀲 𑀅𑀯𑀺𑀚𑁆𑀚𑀸𑀭𑀫𑁆𑀫𑀡𑀸𑀤𑀺𑀢𑀁 𑀤𑀲𑁆𑀲𑁂𑀢𑀺. 𑀅𑀦𑀯𑀺𑀚𑁆𑀚𑀸𑀭𑀫𑁆𑀫𑀡𑀲𑁆𑀲 𑀧𑀞𑀫𑀚𑀯𑀦𑀲𑁆𑀲 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀅𑀦𑀦𑁆𑀢𑀭𑀸𑀤𑀺𑀧𑀘𑁆𑀘𑀬𑀯𑀘𑀦𑁂𑀲𑀼 𑀅𑀯𑀼𑀢𑁆𑀢𑀲𑁆𑀲 𑀯𑀼𑀢𑁆𑀢𑀲𑁆𑀲 𑀘 𑀲𑀩𑁆𑀩𑀲𑁆𑀲 𑀲𑀗𑁆𑀕𑀡𑁆𑀳𑀦𑀢𑁆𑀣𑀁 ‘‘𑀬𑀁 𑀓𑀺𑀜𑁆𑀘𑀻’’𑀢𑀺 𑀆𑀳. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀲𑀫𑀢𑀺𑀓𑁆𑀓𑀫𑀪𑀯𑀧𑀢𑁆𑀣𑀦𑀸𑀯𑀲𑁂𑀦 𑀯𑀼𑀢𑁆𑀢𑀦𑀬𑁂𑀦.

𑀏𑀓𑀓𑀸𑀭𑀡𑀯𑀸𑀤𑁄 𑀆𑀧𑀚𑁆𑀚𑀢𑀻𑀢𑀺 𑀤𑁄𑀲𑀧𑁆𑀧𑀲𑀗𑁆𑀕𑁄 𑀯𑀼𑀢𑁆𑀢𑁄. 𑀅𑀦𑀺𑀝𑁆𑀞𑁄 𑀳𑀺 𑀏𑀓𑀓𑀸𑀭𑀡𑀯𑀸𑀤𑁄 𑀲𑀩𑁆𑀩𑀲𑁆𑀲 𑀲𑀩𑁆𑀩𑀓𑀸𑀮𑁂 ¶ 𑀲𑀫𑁆𑀪𑀯𑀸𑀧𑀢𑁆𑀢𑀺𑀢𑁄 𑀏𑀓𑀲𑀤𑀺𑀲𑀲𑀪𑀸𑀯𑀸𑀧𑀢𑁆𑀢𑀺𑀢𑁄 𑀘. 𑀬𑀲𑁆𑀫𑀸 𑀢𑀻𑀲𑀼 𑀧𑀓𑀸𑀭𑁂𑀲𑀼 𑀅𑀯𑀺𑀚𑁆𑀚𑀫𑀸𑀦𑁂𑀲𑀼 𑀧𑀸𑀭𑀺𑀲𑁂𑀲𑁂𑀦 𑀘𑀢𑀼𑀢𑁆𑀣𑁂 𑀏𑀯 𑀘 𑀯𑀺𑀚𑁆𑀚𑀫𑀸𑀦𑁂 𑀏𑀓𑀳𑁂𑀢𑀼𑀨𑀮𑀤𑀻𑀧𑀦𑁂 𑀅𑀢𑁆𑀣𑁄 𑀅𑀢𑁆𑀣𑀺, 𑀢𑀲𑁆𑀫𑀸 𑀦 𑀦𑀼𑀧𑀧𑀚𑁆𑀚𑀢𑀺.

𑀬𑀣𑀸𑀨𑀲𑁆𑀲𑀁 𑀯𑁂𑀤𑀦𑀸𑀯𑀯𑀢𑁆𑀣𑀸𑀦𑀢𑁄𑀢𑀺 ‘‘𑀲𑀼𑀔𑀯𑁂𑀤𑀦𑀻𑀬𑀁, 𑀪𑀺𑀓𑁆𑀔𑀯𑁂, 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀸 𑀯𑁂𑀤𑀦𑀸’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁨.𑁬𑁨), ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘…𑀧𑁂… 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁨.𑁪𑁩) 𑀘 𑀲𑀼𑀔𑀯𑁂𑀤𑀦𑀻𑀬𑀸𑀤𑀺𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀺𑀅𑀦𑀼𑀭𑀽𑀧𑁂𑀦 𑀲𑀼𑀔𑀯𑁂𑀤𑀦𑀸𑀤𑀺𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸𑀯𑁂𑀤𑀦𑀸𑀤𑀻𑀦𑀁 𑀯𑀯𑀢𑁆𑀣𑀸𑀦𑀢𑁄, 𑀲𑀫𑀸𑀦𑁂𑀲𑀼 𑀘𑀓𑁆𑀔𑀼𑀭𑀽𑀧𑀸𑀤𑀻𑀲𑀼 𑀨𑀲𑁆𑀲𑀯𑀲𑁂𑀦 𑀲𑀼𑀔𑀸𑀤𑀺𑀯𑀺𑀧𑀭𑀺𑀬𑀸𑀬𑀸𑀪𑀸𑀯𑀢𑁄, 𑀲𑀫𑀸𑀦𑁂𑀲𑀼 𑀘 𑀭𑀽𑀧𑀫𑀦𑀲𑀺𑀓𑀸𑀭𑀸𑀤𑀻𑀲𑀼 𑀘𑀓𑁆𑀔𑀸𑀤𑀺𑀲𑀗𑁆𑀖𑀝𑁆𑀝𑀦𑀯𑀲𑁂𑀦 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸𑀤𑀺𑀯𑀺𑀧𑀭𑀺𑀬𑀸𑀬𑀸𑀪𑀸𑀯𑀢𑁄, 𑀅𑀜𑁆𑀜𑀧𑀘𑁆𑀘𑀬𑀲𑀸𑀫𑀜𑁆𑀜𑁂𑀧𑀺 𑀨𑀲𑁆𑀲𑀯𑀲𑁂𑀦 𑀲𑀼𑀔𑀸𑀤𑀺𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸𑀤𑀻𑀦𑀁 𑀑𑀴𑀸𑀭𑀺𑀓𑀲𑀼𑀔𑀼𑀫𑀸𑀤𑀺𑀲𑀗𑁆𑀓𑀭𑀸𑀪𑀸𑀯𑀢𑁄 𑀘𑀸𑀢𑀺 𑀅𑀢𑁆𑀣𑁄. 𑀲𑀼𑀔𑀸𑀤𑀻𑀦𑀁 𑀬𑀣𑀸𑀯𑀼𑀢𑁆𑀢𑀲𑀫𑁆𑀨𑀲𑁆𑀲𑀲𑁆𑀲 𑀅𑀯𑀺𑀧𑀭𑀻𑀢𑁄 𑀧𑀘𑁆𑀘𑀬𑀪𑀸𑀯𑁄 ¶ 𑀏𑀯 𑀬𑀣𑀸𑀯𑁂𑀤𑀦𑀁 𑀨𑀲𑁆𑀲𑀯𑀯𑀢𑁆𑀣𑀸𑀦𑀁, 𑀓𑀸𑀭𑀡𑀨𑀮𑀯𑀺𑀲𑁂𑀲𑁂𑀦 𑀯𑀸 𑀨𑀮𑀓𑀸𑀭𑀡𑀯𑀺𑀲𑁂𑀲𑀦𑀺𑀘𑁆𑀙𑀬𑁄 𑀳𑁄𑀢𑀻𑀢𑀺 𑀉𑀪𑀬𑀢𑁆𑀣𑀸𑀧𑀺 𑀦𑀺𑀘𑁆𑀙𑀬𑁄 𑀯𑀯𑀢𑁆𑀣𑀸𑀦𑀦𑁆𑀢𑀺 𑀯𑀼𑀢𑁆𑀢𑁄. 𑀓𑀫𑁆𑀫𑀸𑀤𑀬𑁄𑀢𑀺 𑀓𑀫𑁆𑀫𑀸𑀳𑀸𑀭𑀉𑀢𑀼𑀆𑀤𑀬𑁄 𑀅𑀧𑀸𑀓𑀝𑀸 𑀲𑁂𑀫𑁆𑀳𑀧𑀝𑀺𑀓𑀸𑀭𑁂𑀦 𑀭𑁄𑀕𑀯𑀽𑀧𑀲𑀫𑀢𑁄.

‘‘𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀦𑁄 𑀢𑀡𑁆𑀳𑀸 𑀧𑀯𑀟𑁆𑀠𑀢𑀻’’𑀢𑀺 𑀯𑀘𑀦𑀢𑁄𑀢𑀺 ‘‘𑀲𑀁𑀬𑁄𑀚𑀦𑀻𑀬𑁂𑀲𑀼, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄 𑀢𑀡𑁆𑀳𑀸 𑀧𑀯𑀟𑁆𑀠𑀢𑀺, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁, 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄’’𑀢𑀺 (𑀲𑀁. 𑀦𑀺. 𑁨.𑁫𑁩-𑁫𑁪) 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 𑀢𑀡𑁆𑀳𑀸𑀬 𑀲𑀗𑁆𑀔𑀸𑀭𑀓𑀸𑀭𑀡𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀧𑀼𑀦 𑀢𑀲𑁆𑀲𑀸𑀧𑀺 𑀅𑀯𑀺𑀚𑁆𑀚𑀸 𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀆𑀲𑀯𑀲𑀫𑀼𑀤𑀬𑁄𑀢𑀺 𑀯𑀘𑀦𑀢𑁄’’𑀢𑀺 𑀆𑀳. 𑀢𑀡𑁆𑀳𑀸 𑀯𑀸 𑀘𑀢𑀼𑀭𑀼𑀧𑀸𑀤𑀸𑀦𑀪𑀽𑀢𑀸 𑀓𑀸𑀫𑀪𑀯𑀤𑀺𑀝𑁆𑀞𑀸𑀲𑀯𑀸 𑀘 𑀲𑀗𑁆𑀔𑀸𑀭𑀲𑁆𑀲 𑀓𑀸𑀭𑀡𑀦𑁆𑀢𑀺 𑀧𑀸𑀓𑀝𑀸𑀢𑀺 𑀲𑀼𑀢𑁆𑀢𑀤𑁆𑀯𑀬𑁂𑀦𑀧𑀺 𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀓𑀸𑀭𑀡𑀪𑀸𑀯𑀫𑁂𑀯 𑀤𑀲𑁆𑀲𑁂𑀢𑀺. 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀦𑁄𑀢𑀺 𑀳𑀺 𑀯𑀘𑀦𑁂𑀦 𑀆𑀤𑀻𑀦𑀯𑀧𑀝𑀺𑀘𑁆𑀙𑀸𑀤𑀦𑀓𑀺𑀘𑁆𑀘𑀸 𑀅𑀯𑀺𑀚𑁆𑀚𑀸 𑀢𑀡𑁆𑀳𑀸𑀬 𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑀺𑀢𑀸 𑀳𑁄𑀢𑀻𑀢𑀺. 𑀬𑀲𑁆𑀫𑀸 𑀅𑀯𑀺𑀤𑁆𑀯𑀸, 𑀢𑀲𑁆𑀫𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀺𑀓𑁂 𑀅𑀪𑀺𑀲𑀗𑁆𑀔𑀭𑁄𑀢𑀻𑀢𑀺 𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀓𑀸𑀭𑀡𑀪𑀸𑀯𑀲𑁆𑀲 𑀧𑀸𑀓𑀝𑀢𑁆𑀢𑀸 𑀅𑀯𑀺𑀤𑁆𑀤𑀲𑀼𑀪𑀸𑀯𑁄 𑀲𑀗𑁆𑀔𑀸𑀭𑀓𑀸𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑁄 𑀔𑀻𑀡𑀸𑀲𑀯𑀲𑁆𑀲 𑀲𑀗𑁆𑀔𑀸𑀭𑀸𑀪𑀸𑀯𑀢𑁄 𑀅𑀲𑀸𑀥𑀸𑀭𑀡𑀢𑁆𑀢𑀸 𑀘. 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀻𑀦𑀁 𑀲𑀸𑀥𑀸𑀭𑀡𑀸𑀦𑀺 𑀯𑀢𑁆𑀣𑀸𑀭𑀫𑁆𑀫𑀡𑀸𑀤𑀻𑀦𑀻𑀢𑀺 𑀧𑀼𑀜𑁆𑀜𑀪𑀯𑀸𑀤𑀺𑀆𑀤𑀻𑀦𑀯𑀧𑀝𑀺𑀘𑁆𑀙𑀸𑀤𑀺𑀓𑀸 𑀅𑀯𑀺𑀚𑁆𑀚𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀻𑀦𑀁 𑀅𑀲𑀸𑀥𑀸𑀭𑀡𑀁 𑀓𑀸𑀭𑀡𑀦𑁆𑀢𑀺 𑀯𑀸 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀞𑀸𑀦𑀯𑀺𑀭𑀼𑀤𑁆𑀥𑁄𑀢𑀺 𑀅𑀢𑁆𑀣𑀺𑀢𑀸𑀯𑀺𑀭𑀼𑀤𑁆𑀥𑁄. 𑀓𑁂𑀘𑀺 𑀧𑀦 ‘‘𑀧𑀝𑀺𑀲𑀦𑁆𑀥𑀺𑀆𑀤𑀻𑀦𑀺 𑀞𑀸𑀦𑀸𑀦𑀻’’𑀢𑀺 𑀯𑀤𑀦𑁆𑀢𑀺, 𑀏𑀯𑀁 𑀲𑀢𑀺 𑀧𑀼𑀭𑀺𑀫𑀘𑀺𑀢𑁆𑀢𑀁 𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑁆𑀲 𑀞𑀸𑀦𑀯𑀺𑀭𑀼𑀤𑁆𑀥𑁄 𑀧𑀘𑁆𑀘𑀬𑁄𑀢𑀺 𑀦 𑀇𑀤𑀁 𑀏𑀓𑀦𑁆𑀢𑀺𑀓𑀁 𑀲𑀺𑀬𑀸. 𑀪𑀯𑀗𑁆𑀕𑀫𑁆𑀧𑀺 ¶ 𑀳𑀺 𑀪𑀯𑀗𑁆𑀕𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁄, 𑀚𑀯𑀦𑀁 𑀚𑀯𑀦𑀲𑁆𑀲𑀸𑀢𑀺, 𑀦 𑀘 𑀲𑀺𑀧𑁆𑀧𑀸𑀤𑀻𑀦𑀁 𑀧𑀝𑀺𑀲𑀦𑁆𑀥𑀺𑀆𑀤𑀺𑀞𑀸𑀦𑀁 𑀅𑀢𑁆𑀣𑀻𑀢𑀺 𑀦 𑀢𑀁 𑀇𑀥 𑀅𑀥𑀺𑀧𑁆𑀧𑁂𑀢𑀁. 𑀓𑀫𑁆𑀫𑀁 𑀭𑀽𑀧𑀲𑁆𑀲 𑀦𑀫𑀦𑀭𑀼𑀧𑁆𑀧𑀦𑀯𑀺𑀭𑁄𑀥𑀸 𑀲𑀸𑀭𑀫𑁆𑀫𑀡𑀸𑀦𑀸𑀭𑀫𑁆𑀫𑀡𑀯𑀺𑀭𑁄𑀥𑀸 𑀘 𑀲𑀪𑀸𑀯𑀯𑀺𑀭𑀼𑀤𑁆𑀥𑁄 𑀧𑀘𑁆𑀘𑀬𑁄, 𑀔𑀻𑀭𑀸𑀤𑀻𑀦𑀺 𑀤𑀥𑀺𑀆𑀤𑀻𑀦𑀁 𑀫𑀥𑀼𑀭𑀫𑁆𑀩𑀺𑀮𑀭𑀲𑀸𑀤𑀺𑀲𑀪𑀸𑀯𑀯𑀺𑀭𑁄𑀥𑀸. 𑀅𑀯𑀺𑀚𑀸𑀦𑀦𑀓𑀺𑀘𑁆𑀘𑁄 𑀆𑀮𑁄𑀓𑁄 𑀯𑀺𑀚𑀸𑀦𑀦𑀓𑀺𑀘𑁆𑀘𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲, 𑀅𑀫𑀤𑀦𑀓𑀺𑀘𑁆𑀘𑀸 𑀘 𑀕𑀼𑀴𑀸𑀤𑀬𑁄 𑀫𑀤𑀦𑀓𑀺𑀘𑁆𑀘𑀲𑁆𑀲 𑀆𑀲𑀯𑀲𑁆𑀲.

𑀕𑁄𑀮𑁄𑀫𑀸𑀯𑀺𑀮𑁄𑀫𑀸𑀦𑀺 𑀤𑀩𑁆𑀩𑀸𑀬 𑀧𑀘𑁆𑀘𑀬𑁄, 𑀤𑀥𑀺𑀆𑀤𑀻𑀦𑀺 𑀪𑀽𑀢𑀺𑀡𑀓𑀲𑁆𑀲. 𑀏𑀢𑁆𑀣 𑀘 𑀅𑀯𑀻𑀢𑀺 𑀭𑀢𑁆𑀢𑀸 𑀏𑀴𑀓𑀸 𑀯𑀼𑀘𑁆𑀘𑀦𑁆𑀢𑀺. 𑀯𑀺𑀧𑀸𑀓𑀸𑀬𑁂𑀯 𑀢𑁂 𑀘 𑀦, 𑀢𑀲𑁆𑀫𑀸 𑀤𑀼𑀓𑁆𑀔𑀯𑀺𑀧𑀸𑀓𑀸𑀬𑀧𑀺 ¶ 𑀅𑀯𑀺𑀚𑁆𑀚𑀸𑀬 𑀢𑀤𑀯𑀺𑀧𑀸𑀓𑀸𑀦𑀁 𑀧𑀼𑀜𑁆𑀜𑀸𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑀢𑁆𑀢𑀁 𑀦 𑀦 𑀬𑀼𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀢𑀤𑀯𑀺𑀧𑀸𑀓𑀢𑁆𑀢𑁂𑀧𑀺 𑀲𑀸𑀯𑀚𑁆𑀚𑀢𑀸𑀬 𑀢𑀤𑀯𑀺𑀭𑀼𑀤𑁆𑀥𑀸𑀦𑀁 𑀢𑀁𑀲𑀤𑀺𑀲𑀸𑀦𑀜𑁆𑀘 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀦𑀫𑁂𑀯 𑀧𑀘𑁆𑀘𑀬𑁄, 𑀦 𑀇𑀢𑀭𑁂𑀲𑀦𑁆𑀢𑀺 𑀏𑀢𑀲𑁆𑀲 𑀧𑀲𑀗𑁆𑀕𑀲𑁆𑀲 𑀦𑀺𑀯𑀸𑀭𑀡𑀢𑁆𑀣𑀁 ‘‘𑀯𑀺𑀭𑀼𑀤𑁆𑀥𑁄 𑀘𑀸𑀯𑀺𑀭𑀼𑀤𑁆𑀥𑁄 𑀘, 𑀲𑀤𑀺𑀲𑀸𑀲𑀤𑀺𑀲𑁄 𑀢𑀣𑀸. 𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑁄 𑀲𑀺𑀤𑁆𑀥𑁄’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 ‘‘𑀇𑀢𑀺 𑀅𑀬𑀁 𑀅𑀯𑀺𑀚𑁆𑀚𑀸’’𑀢𑀺𑀆𑀤𑀺𑀫𑀸𑀳.

𑀅𑀘𑁆𑀙𑁂𑀚𑁆𑀚𑀲𑀼𑀢𑁆𑀢𑀸𑀯𑀼𑀢𑀸𑀪𑁂𑀚𑁆𑀚𑀫𑀡𑀻𑀦𑀁 𑀯𑀺𑀬 𑀧𑀼𑀩𑁆𑀩𑀸𑀧𑀭𑀺𑀬𑀯𑀯𑀢𑁆𑀣𑀸𑀦𑀁 𑀦𑀺𑀬𑀢𑀺, 𑀦𑀺𑀬𑀢𑀺𑀬𑀸, 𑀦𑀺𑀬𑀢𑀺 𑀏𑀯 𑀯𑀸 𑀲𑀗𑁆𑀕𑀢𑀺 𑀲𑀫𑀸𑀕𑀫𑁄 𑀦𑀺𑀬𑀢𑀺𑀲𑀗𑁆𑀕𑀢𑀺, 𑀢𑀸𑀬 𑀪𑀸𑀯𑁂𑀲𑀼 𑀧𑀭𑀺𑀡𑀢𑀸 𑀫𑀦𑀼𑀲𑁆𑀲𑀤𑁂𑀯𑀯𑀺𑀳𑀗𑁆𑀕𑀸𑀤𑀺𑀪𑀸𑀯𑀁 𑀧𑀢𑁆𑀢𑀸 𑀦𑀺𑀬𑀢𑀺𑀲𑀗𑁆𑀕𑀢𑀺𑀪𑀸𑀯𑀧𑀭𑀺𑀡𑀢𑀸. 𑀦𑀺𑀬𑀢𑀺𑀬𑀸 𑀲𑀗𑁆𑀕𑀢𑀺𑀬𑀸 𑀪𑀸𑀯𑁂𑀦 𑀘 𑀧𑀭𑀺𑀡𑀢𑀸 𑀦𑀸𑀦𑀧𑁆𑀧𑀓𑀸𑀭𑀢𑀁 𑀧𑀢𑁆𑀢𑀸 𑀦𑀺𑀬𑀢𑀺𑀲𑀗𑁆𑀕𑀢𑀺𑀪𑀸𑀯𑀧𑀭𑀺𑀡𑀢𑀸𑀢𑀺 𑀘 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀏𑀢𑁂𑀳𑀺 𑀘 𑀯𑀺𑀓𑀧𑁆𑀧𑀦𑁂𑀳𑀺 𑀅𑀯𑀺𑀚𑁆𑀚𑀸 𑀅𑀓𑀼𑀲𑀮𑀁 𑀘𑀺𑀢𑁆𑀢𑀁 𑀓𑀢𑁆𑀯𑀸 𑀧𑀼𑀜𑁆𑀜𑀸𑀤𑀻𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀯𑀢𑁆𑀢𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑁄 𑀏𑀯𑀁 𑀅𑀯𑀺𑀚𑁆𑀚𑀸𑀬𑀸’’𑀢𑀺𑀆𑀤𑀺.

𑀅𑀧𑀭𑀺𑀡𑀸𑀬𑀓𑁄 𑀩𑀸𑀮𑁄𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀲𑀫𑁆𑀧𑀝𑀺𑀧𑀸𑀤𑀓𑀓𑀮𑁆𑀬𑀸𑀡𑀫𑀺𑀢𑁆𑀢𑀭𑀳𑀺𑀢𑁄𑀢𑀺 𑀅𑀢𑁆𑀣𑁄. 𑀅𑀭𑀳𑀢𑁆𑀢𑀫𑀕𑁆𑀕𑀸𑀯𑀲𑀸𑀦𑀁 𑀯𑀸 𑀜𑀸𑀡𑀁 𑀲𑀫𑀯𑀺𑀲𑀫𑀁 𑀤𑀲𑁆𑀲𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀁 𑀦𑀬𑀢𑀻𑀢𑀺 𑀧𑀭𑀺𑀡𑀸𑀬𑀓𑀦𑁆𑀢𑀺 𑀯𑀼𑀢𑁆𑀢𑀁, 𑀢𑁂𑀦 𑀭𑀳𑀺𑀢𑁄 𑀅𑀧𑀭𑀺𑀡𑀸𑀬𑀓𑁄. 𑀥𑀫𑁆𑀫𑀁 𑀜𑀢𑁆𑀯𑀸𑀢𑀺 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑁂𑀦 𑀘𑀢𑀼𑀲𑀘𑁆𑀘𑀧𑁆𑀧𑀓𑀸𑀲𑀓𑀲𑀼𑀢𑁆𑀢𑀸𑀤𑀺𑀥𑀫𑁆𑀫𑀁 𑀜𑀢𑁆𑀯𑀸, 𑀫𑀕𑁆𑀕𑀜𑀸𑀡𑁂𑀦𑁂𑀯 𑀯𑀸 𑀲𑀩𑁆𑀩𑀥𑀫𑁆𑀫𑀧𑀯𑀭𑀁 𑀦𑀺𑀩𑁆𑀩𑀸𑀦𑀁 𑀜𑀢𑁆𑀯𑀸, 𑀢𑀁𑀚𑀸𑀦𑀦𑀸𑀬𑀢𑁆𑀢𑀢𑁆𑀢𑀸 𑀧𑀦 𑀲𑁂𑀲𑀲𑀘𑁆𑀘𑀸𑀪𑀺𑀲𑀫𑀬𑀲𑁆𑀲 𑀲𑀫𑀸𑀦𑀓𑀸𑀮𑀫𑁆𑀧𑀺 𑀢𑀁 𑀧𑀼𑀭𑀺𑀫𑀓𑀸𑀮𑀁 𑀯𑀺𑀬 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑀲𑀗𑁆𑀔𑀸𑀭𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀺𑀜𑁆𑀜𑀸𑀡𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁨𑁭. 𑀬𑀣𑀸𑀯𑀼𑀢𑁆𑀢𑀲𑀗𑁆𑀔𑀸𑀭𑀧𑀘𑁆𑀘𑀬𑀸 ¶ 𑀉𑀧𑁆𑀧𑀚𑁆𑀚𑀫𑀸𑀦𑀁 𑀢𑀁𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀫𑁂𑀯 𑀯𑀺𑀜𑁆𑀜𑀸𑀡𑀁 𑀪𑀯𑀺𑀢𑀼𑀁 𑀅𑀭𑀳𑀢𑀻𑀢𑀺 ‘‘𑀩𑀸𑀢𑁆𑀢𑀺𑀁𑀲 𑀮𑁄𑀓𑀺𑀬𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀸𑀦𑀺 𑀲𑀗𑁆𑀕𑀳𑀺𑀢𑀸𑀦𑀺 𑀳𑁄𑀦𑁆𑀢𑀻’’𑀢𑀺 𑀆𑀳. 𑀥𑀸𑀢𑀼𑀓𑀣𑀸𑀬𑀁 (𑀥𑀸𑀢𑀼. 𑁪𑁬𑁬) 𑀧𑀦 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑀦𑀺𑀤𑁆𑀤𑁂𑀲𑁂 𑁋

‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸 ¶ 𑀯𑀺𑀜𑁆𑀜𑀸𑀡𑁂𑀦 𑀬𑁂 𑀥𑀫𑁆𑀫𑀸…𑀧𑁂… 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁂𑀦, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸𑀬 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂 𑀥𑀫𑁆𑀫𑀸 𑀓𑀢𑀺𑀳𑀺 𑀔𑀦𑁆𑀥𑁂𑀳𑀺…𑀧𑁂… 𑀲𑀗𑁆𑀕𑀳𑀺𑀢𑀸? 𑀢𑁂 𑀥𑀫𑁆𑀫𑀸 𑀅𑀲𑀗𑁆𑀔𑀢𑀁 𑀔𑀦𑁆𑀥𑀢𑁄 𑀞𑀧𑁂𑀢𑁆𑀯𑀸 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑀸𑀤𑀲𑀳𑀸𑀬𑀢𑀦𑁂𑀳𑀺 𑀏𑀓𑀸𑀤𑀲𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀸. 𑀓𑀢𑀺𑀳𑀺 𑀅𑀲𑀗𑁆𑀕𑀳𑀺𑀢𑀸? 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸’’𑀢𑀺 𑁋

𑀯𑀘𑀦𑀢𑁄 𑀲𑀩𑁆𑀩𑀯𑀺𑀜𑁆𑀜𑀸𑀡𑀨𑀲𑁆𑀲𑀯𑁂𑀤𑀦𑀸𑀧𑀭𑀺𑀕𑁆𑀕𑀳𑁄 𑀓𑀢𑁄. 𑀬𑀤𑀺 𑀳𑀺 𑀏𑀢𑁆𑀣 𑀯𑀺𑀜𑁆𑀜𑀸𑀡𑀨𑀲𑁆𑀲𑀯𑁂𑀤𑀦𑀸 𑀲𑀧𑁆𑀧𑀤𑁂𑀲𑀸 𑀲𑀺𑀬𑀼𑀁, ‘‘𑀯𑀺𑀧𑀸𑀓𑀸 𑀥𑀫𑁆𑀫𑀸’’𑀢𑀺 𑀇𑀫𑀲𑁆𑀲 𑀯𑀺𑀬 𑀯𑀺𑀲𑁆𑀲𑀚𑁆𑀚𑀦𑀁 𑀲𑀺𑀬𑀸, 𑀢𑀲𑁆𑀫𑀸 𑀢𑀢𑁆𑀣 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀲𑁂𑀦 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀸𑀤𑀬𑁄 𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸 𑀘 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀘𑀢𑀼𑀪𑀽𑀫𑀓𑀓𑀼𑀲𑀮𑀲𑀗𑁆𑀔𑀸𑀭𑁄 𑀅𑀓𑀼𑀲𑀮𑀲𑀗𑁆𑀔𑀸𑀭𑁄 𑀘 𑀯𑀼𑀢𑁆𑀢𑁄𑀢𑀺 𑀲𑁄 𑀏𑀯 𑀥𑀸𑀢𑀼𑀓𑀣𑀸𑀬𑀁 𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀪𑀯𑁄 𑀧𑀦 𑀥𑀸𑀢𑀼𑀓𑀣𑀸𑀬𑀁 𑀓𑀫𑁆𑀫𑀼𑀧𑀧𑀢𑁆𑀢𑀺𑀪𑀯𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 𑀦 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀲𑁂𑀦 𑀕𑀳𑀺𑀢𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀢𑀢𑁆𑀣 ‘‘𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄’’𑀢𑀺 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 ‘‘𑀓𑀫𑁆𑀫𑀪𑀯𑁄’’𑀢𑀺𑀆𑀤𑀺𑀦𑀸𑀯 𑀦𑀬𑁂𑀦 𑀪𑀯𑁄 𑀉𑀤𑁆𑀥𑀝𑁄. 𑀯𑀺𑀧𑀸𑀓𑀜𑁆𑀳𑁂𑀢𑀦𑁆𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀧𑀸𑀓𑀢𑁆𑀢𑀸 𑀲𑀗𑁆𑀔𑀸𑀭𑀧𑀘𑁆𑀘𑀬𑀢𑁆𑀢𑀁 𑀲𑀸𑀥𑁂𑀢𑀺, 𑀢𑀲𑁆𑀲 𑀧𑀦 𑀲𑀸𑀥𑀦𑀢𑁆𑀣𑀁 ‘‘𑀉𑀧𑀘𑀺𑀢𑀓𑀫𑁆𑀫𑀸𑀪𑀸𑀯𑁂 𑀯𑀺𑀧𑀸𑀓𑀸𑀪𑀸𑀯𑀢𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀢𑀁 𑀯𑀺𑀯𑀭𑀦𑁆𑀢𑁄 ‘‘𑀯𑀺𑀧𑀸𑀓𑀜𑁆𑀘𑀸’’𑀢𑀺𑀆𑀤𑀺𑀫𑀸𑀳.

𑀬𑁂𑀪𑀼𑀬𑁆𑀬𑁂𑀦 𑀮𑁄𑀪𑀲𑀫𑁆𑀧𑀬𑀼𑀢𑁆𑀢𑀚𑀯𑀦𑀸𑀯𑀲𑀸𑀦𑁂𑀢𑀺 𑀚𑀯𑀦𑁂𑀦 𑀢𑀤𑀸𑀭𑀫𑁆𑀫𑀡𑀦𑀺𑀬𑀫𑁂 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀦𑀦𑁆𑀢𑀭𑀁 𑀲𑁄𑀫𑀦𑀲𑁆𑀲𑀲𑀳𑀕𑀢𑀢𑀤𑀸𑀭𑀫𑁆𑀫𑀡𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀦𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀲𑁆𑀫𑀸 𑀧𑀦 𑀢𑀺𑀳𑁂𑀢𑀼𑀓𑀚𑀯𑀦𑀸𑀯𑀲𑀸𑀦𑁂 𑀘 𑀓𑀤𑀸𑀘𑀺 𑀅𑀳𑁂𑀢𑀼𑀓𑀁 𑀢𑀤𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀢𑀲𑁆𑀫𑀸 ‘‘𑀬𑁂𑀪𑀼𑀬𑁆𑀬𑁂𑀦𑀸’’𑀢𑀺 𑀆𑀳. 𑀲𑀓𑀺𑀁 𑀯𑀸𑀢𑀺 ‘‘𑀤𑀺𑀭𑀢𑁆𑀢𑀢𑀺𑀭𑀢𑁆𑀢𑀸’’𑀤𑀻𑀲𑀼 𑀯𑀺𑀬 𑀯𑁂𑀤𑀺𑀢𑀩𑁆𑀩𑀁. 𑀤𑁆𑀯𑀺𑀓𑁆𑀔𑀢𑁆𑀢𑀼𑀫𑁂𑀯 𑀧𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑀤𑀦𑁆𑀢𑀺. ‘‘𑀤𑀺𑀭𑀢𑁆𑀢𑀢𑀺𑀭𑀢𑁆𑀢’’𑀦𑁆𑀢𑀺 𑀏𑀢𑁆𑀣 𑀧𑀦 𑀯𑀸-𑀲𑀤𑁆𑀤𑀲𑁆𑀲 𑀅𑀪𑀸𑀯𑀸 𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀫𑀢𑁆𑀢𑁂𑀦 𑀤𑀺𑀭𑀢𑁆𑀢𑀕𑁆𑀕𑀳𑀡𑀁 𑀓𑀢𑀦𑁆𑀢𑀺 𑀬𑀼𑀚𑁆𑀚𑀢𑀺, ‘‘𑀦𑀺𑀭𑀦𑁆𑀢𑀭𑀢𑀺𑀭𑀢𑁆𑀢𑀤𑀲𑁆𑀲𑀦𑀢𑁆𑀣𑀁 𑀯𑀸’’𑀢𑀺. 𑀇𑀥 𑀧𑀦 𑀯𑀸-𑀲𑀤𑁆𑀤𑁄 𑀯𑀺𑀓𑀧𑁆𑀧𑀦𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 𑀲𑀓𑀺𑀁 ¶ 𑀏𑀯 𑀘 𑀓𑀤𑀸𑀘𑀺 𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬 ‘‘𑀲𑀓𑀺𑀁 𑀯𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯 𑀳𑀺 𑀲𑀓𑀺𑀁 𑀢𑀤𑀸𑀭𑀫𑁆𑀫𑀡𑀧𑁆𑀧𑀯𑀢𑁆𑀢𑀺𑀬𑀸 𑀯𑀺𑀘𑀸𑀭𑁂𑀢𑀩𑁆𑀩𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀕𑀡𑀦𑀸𑀬𑀁 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀕𑀡𑀦𑀸𑀬𑀦𑁆𑀢𑀺 𑀯𑀺𑀧𑀸𑀓𑀓𑀣𑀸𑀬𑀁 𑀩𑀮𑀯𑀭𑀽𑀧𑀸𑀤𑀺𑀓𑁂 𑀆𑀭𑀫𑁆𑀫𑀡𑁂 𑀯𑀼𑀢𑁆𑀢𑀁 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀕𑀡𑀦𑀁 𑀲𑀦𑁆𑀥𑀸𑀬𑀸𑀳. 𑀢𑀢𑁆𑀣 𑀳𑀺 𑀤𑁆𑀯𑁂𑀯 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀢𑁆𑀢𑀺𑀯𑀸𑀭𑀸 𑀆𑀕𑀢𑀸. 𑀚𑀯𑀦𑀯𑀺𑀲𑀬𑀸𑀦𑀼𑀪𑀯𑀦𑀜𑁆𑀳𑀺 𑀢𑀤𑀸𑀭𑀫𑁆𑀫𑀡𑀁 ¶ 𑀆𑀲𑀦𑁆𑀦𑀪𑁂𑀤𑁂 𑀢𑀲𑁆𑀫𑀺𑀁 𑀯𑀺𑀲𑀬𑁂 𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀯𑀲𑀺𑀝𑁆𑀞𑀸𑀬𑀼𑀓𑁂 𑀦 𑀉𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑀼𑀭𑀽𑀧𑀸𑀬 𑀧𑀝𑀺𑀲𑀦𑁆𑀥𑀺𑀬𑀸𑀢𑀺 𑀅𑀓𑀼𑀲𑀮𑀯𑀺𑀧𑀸𑀓𑀲𑁆𑀲 𑀅𑀧𑀸𑀬𑀧𑀝𑀺𑀲𑀦𑁆𑀥𑀺, 𑀓𑀸𑀫𑀸𑀯𑀘𑀭𑀸𑀤𑀺𑀓𑀼𑀲𑀮𑀯𑀺𑀧𑀸𑀓𑀸𑀦𑀁 𑀓𑀸𑀫𑀭𑀽𑀧𑀸𑀭𑀽𑀧𑀲𑀼𑀕𑀢𑀺𑀧𑀝𑀺𑀲𑀦𑁆𑀥𑀺𑀬𑁄 𑀬𑀣𑀸𑀓𑀫𑁆𑀫𑀁 𑀅𑀦𑀼𑀭𑀽𑀧𑀸.

𑀧𑀝𑀺𑀲𑀦𑁆𑀥𑀺𑀓𑀣𑀸 𑀫𑀳𑀸𑀯𑀺𑀲𑀬𑀸𑀢𑀺 𑀓𑀢𑁆𑀯𑀸 𑀧𑀯𑀢𑁆𑀢𑀺𑀫𑁂𑀯 𑀢𑀸𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀯𑀢𑁆𑀢𑀺𑀬𑀁 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀅𑀳𑁂𑀢𑀼𑀓𑀤𑁆𑀯𑀬𑀸𑀤𑀻𑀦𑀁 𑀤𑁆𑀯𑀸𑀭𑀦𑀺𑀬𑀫𑀸𑀦𑀺𑀬𑀫𑀸𑀯𑀘𑀦𑀁 𑀪𑀯𑀗𑁆𑀕𑀪𑀽𑀢𑀸𑀦𑀁 𑀲𑀬𑀫𑁂𑀯 𑀤𑁆𑀯𑀸𑀭𑀢𑁆𑀢𑀸 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀪𑀽𑀢𑀸𑀦𑀜𑁆𑀘 𑀪𑀯𑀗𑁆𑀕𑀲𑀗𑁆𑀔𑀸𑀢𑁂𑀦 𑀅𑀜𑁆𑀜𑁂𑀦 𑀘 𑀤𑁆𑀯𑀸𑀭𑁂𑀦 𑀅𑀦𑀼𑀧𑁆𑀧𑀢𑁆𑀢𑀺𑀢𑁄 𑀦𑀺𑀬𑀢𑀁 𑀅𑀦𑀺𑀬𑀢𑀁 𑀯𑀸 𑀤𑁆𑀯𑀸𑀭𑀁 𑀏𑀢𑁂𑀲𑀦𑁆𑀢𑀺 𑀯𑀢𑁆𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸. 𑀏𑀓𑀲𑁆𑀲 𑀲𑀢𑁆𑀢𑀲𑁆𑀲 𑀧𑀯𑀢𑁆𑀢𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑁄 𑀧𑀣𑀯𑀻𑀓𑀲𑀺𑀡𑀸𑀤𑀻𑀲𑀼 𑀬𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑁄, 𑀢𑀢𑁄 𑀅𑀜𑁆𑀜𑀲𑁆𑀫𑀺𑀁 𑀢𑀲𑁆𑀲 𑀧𑀯𑀢𑁆𑀢𑀺 𑀦𑀢𑁆𑀣𑀻𑀢𑀺 𑀭𑀽𑀧𑀸𑀯𑀘𑀭𑀸𑀦𑀁 𑀦𑀺𑀬𑀢𑀸𑀭𑀫𑁆𑀫𑀡𑀢𑀸 𑀯𑀼𑀢𑁆𑀢𑀸. 𑀢𑀢𑁆𑀭𑀲𑁆𑀲𑀸𑀢𑀺 𑀧𑀯𑀢𑁆𑀢𑀺𑀬𑀁 𑀩𑀸𑀢𑁆𑀢𑀺𑀁𑀲𑀯𑀺𑀥𑀲𑁆𑀲.

𑀇𑀦𑁆𑀤𑁆𑀭𑀺𑀬𑀧𑁆𑀧𑀯𑀢𑁆𑀢𑀺𑀆𑀦𑀼𑀪𑀸𑀯𑀢𑁄 𑀏𑀯 𑀘𑀓𑁆𑀔𑀼𑀲𑁄𑀢𑀤𑁆𑀯𑀸𑀭𑀪𑁂𑀤𑁂𑀦, 𑀢𑀲𑁆𑀲 𑀘 𑀯𑀺𑀜𑁆𑀜𑀸𑀡𑀯𑀻𑀣𑀺𑀪𑁂𑀤𑀸𑀬𑀢𑁆𑀢𑀢𑁆𑀢𑀸 𑀯𑀻𑀣𑀺𑀪𑁂𑀤𑁂𑀦 𑀘 𑀪𑀯𑀺𑀢𑀩𑁆𑀩𑀁, 𑀢𑀲𑁆𑀫𑀺𑀜𑁆𑀘 𑀲𑀢𑀺 ‘‘𑀆𑀯𑀚𑁆𑀚𑀦𑀸𑀦𑀦𑁆𑀢𑀭𑀁 𑀤𑀲𑁆𑀲𑀦𑀁 𑀲𑀯𑀦𑀁 𑀯𑀸 𑀢𑀤𑀦𑀦𑁆𑀢𑀭𑀁 𑀲𑀫𑁆𑀧𑀝𑀺𑀘𑁆𑀙𑀦’’𑀦𑁆𑀢𑀺𑀆𑀤𑀺𑀦𑀸 𑀘𑀺𑀢𑁆𑀢𑀦𑀺𑀬𑀫𑁂𑀦 𑀪𑀯𑀺𑀢𑀩𑁆𑀩𑀁. 𑀢𑀣𑀸 𑀘 𑀲𑀢𑀺 𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀸𑀦𑀫𑁆𑀧𑀺 𑀪𑀸𑀯𑁄 𑀲𑀺𑀤𑁆𑀥𑁄 𑀳𑁄𑀢𑀺, 𑀦 𑀇𑀦𑁆𑀤𑁆𑀭𑀺𑀬𑀧𑁆𑀧𑀯𑀢𑁆𑀢𑀺𑀆𑀦𑀼𑀪𑀸𑀯𑁂𑀦 𑀤𑀲𑁆𑀲𑀦𑀲𑀯𑀦𑀫𑀢𑁆𑀢𑀲𑁆𑀲𑁂𑀯, 𑀦𑀸𑀧𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀏𑀯 𑀤𑀲𑁆𑀲𑀦𑀲𑀯𑀦𑀓𑀺𑀘𑁆𑀘𑀢𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑁆𑀯𑀸𑀭𑀯𑀻𑀣𑀺𑀪𑁂𑀤𑁂 𑀘𑀺𑀢𑁆𑀢𑀦𑀺𑀬𑀫𑀢𑁄 𑀘𑀸’’𑀢𑀺. 𑀧𑀞𑀫𑀓𑀼𑀲𑀮𑁂𑀦 𑀘𑁂 𑀢𑀤𑀸𑀭𑀫𑁆𑀫𑀡𑀲𑁆𑀲 𑀉𑀧𑁆𑀧𑀢𑁆𑀢𑀺 𑀳𑁄𑀢𑀺, 𑀢𑀁 𑀧𑀞𑀫𑀓𑀼𑀲𑀮𑀸𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀚𑀦𑀓𑀁 𑀅𑀦𑀼𑀩𑀦𑁆𑀥𑀢𑀺 𑀦𑀸𑀫, 𑀤𑀼𑀢𑀺𑀬𑀓𑀼𑀲𑀮𑀸𑀤𑀺𑀅𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀚𑀦𑀓𑀲𑀤𑀺𑀲𑀁 𑀅𑀦𑀼𑀩𑀦𑁆𑀥𑀢𑀺 𑀦𑀸𑀫, 𑀅𑀓𑀼𑀲𑀮𑀸𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀫𑀸𑀦𑀜𑁆𑀘 𑀓𑀸𑀫𑀸𑀯𑀘𑀭𑀢𑀸𑀬 𑀚𑀦𑀓𑀲𑀤𑀺𑀲𑀦𑁆𑀢𑀺.

𑀏𑀓𑀸𑀤𑀲 𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑀸𑀦𑀺…𑀧𑁂… 𑀢𑀤𑀸𑀭𑀫𑁆𑀫𑀡𑀁 𑀦 𑀕𑀡𑁆𑀳𑀦𑁆𑀢𑀻𑀢𑀺 𑀢𑀤𑀸𑀭𑀫𑁆𑀫𑀡𑀪𑀸𑀯𑀢𑀸𑀬 ‘‘𑀢𑀤𑀸𑀭𑀫𑁆𑀫𑀡’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀸𑀦𑀺 𑀢𑀤𑀸𑀭𑀫𑁆𑀫𑀡𑀪𑀸𑀯𑀁 𑀦 𑀕𑀡𑁆𑀳𑀦𑁆𑀢𑀺, 𑀢𑀤𑀸𑀭𑀫𑁆𑀫𑀡𑀪𑀸𑀯𑁂𑀦 𑀦𑀧𑁆𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀦𑀸𑀫𑀕𑁄𑀢𑁆𑀢𑀁 𑀆𑀭𑀩𑁆𑀪 𑀚𑀯𑀦𑁂 𑀚𑀯𑀺𑀢𑁂 𑀢𑀤𑀸𑀭𑀫𑁆𑀫𑀡𑀁 𑀢𑀲𑁆𑀲 𑀚𑀯𑀦𑀲𑁆𑀲 𑀆𑀭𑀫𑁆𑀫𑀡𑀁 𑀦 𑀕𑀡𑁆𑀳𑀦𑁆𑀢𑀺, 𑀦𑀸𑀮𑀫𑁆𑀩𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀭𑀽𑀧𑀸𑀭𑀽𑀧𑀥𑀫𑁆𑀫𑁂𑀢𑀺 𑀭𑀽𑀧𑀸𑀭𑀽𑀧𑀸𑀯𑀘𑀭𑁂 𑀥𑀫𑁆𑀫𑁂. 𑀇𑀤𑀁 𑀧𑀦 𑀯𑀢𑁆𑀯𑀸 ‘‘𑀅𑀪𑀺𑀜𑁆𑀜𑀸𑀜𑀸𑀡𑀁 ¶ 𑀆𑀭𑀩𑁆𑀪𑀸’’𑀢𑀺 𑀯𑀺𑀲𑁂𑀲𑀦𑀁 𑀧𑀭𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀢𑀸𑀬 𑀓𑀸𑀫𑀸𑀯𑀘𑀭𑀲𑀤𑀺𑀲𑁂𑀲𑀼 𑀘𑁂𑀯 𑀢𑀤𑀸𑀭𑀫𑁆𑀫𑀡𑀸𑀦𑀼𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁. 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸 𑀥𑀫𑁆𑀫𑀸 𑀫𑀕𑁆𑀕𑁄 𑀯𑀺𑀬 𑀪𑀸𑀯𑀦𑀸𑀬 𑀲𑀺𑀤𑁆𑀥𑀸 𑀫𑀳𑀸𑀩𑀮𑀸 𑀘𑀸𑀢𑀺 𑀢𑀢𑁆𑀣 𑀚𑀯𑀦𑁂𑀦 𑀧𑀯𑀢𑁆𑀢𑀫𑀸𑀦𑁂𑀦 𑀲𑀸𑀦𑀼𑀩𑀦𑁆𑀥𑀦𑁂𑀦 𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀢𑁂𑀲𑀼 𑀢𑀤𑀸𑀭𑀫𑁆𑀫𑀡𑀁 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 ¶ 𑀆𑀭𑀩𑁆𑀪𑀸𑀢𑀺 𑀏𑀢𑁂𑀦𑁂𑀯 𑀲𑀺𑀤𑁆𑀥𑁂 ‘‘𑀲𑀫𑁆𑀫𑀢𑁆𑀢𑀦𑀺𑀬𑀢𑀥𑀫𑁆𑀫𑁂𑀲𑀽’’𑀢𑀺 𑀯𑀺𑀲𑀼𑀁 𑀉𑀤𑁆𑀥𑀭𑀡𑀁 𑀲𑀫𑁆𑀫𑀢𑁆𑀢𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀥𑀫𑁆𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀝𑀺𑀧𑀓𑁆𑀔𑀸𑀢𑀺 𑀩𑀮𑀯𑀪𑀸𑀯𑁂𑀦 𑀢𑀤𑀸𑀭𑀫𑁆𑀫𑀡𑀲𑁆𑀲 𑀅𑀯𑀢𑁆𑀣𑀼𑀪𑀸𑀯𑀤𑀲𑁆𑀲𑀦𑀢𑁆𑀣𑀁.

𑀏𑀯𑀁 𑀧𑀯𑀢𑁆𑀢𑀺𑀬𑀁 𑀯𑀺𑀜𑁆𑀜𑀸𑀡𑀧𑁆𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀁 𑀧𑀦 𑀯𑀼𑀢𑁆𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀓𑁂𑀦 𑀓𑀢𑁆𑀣𑀸𑀢𑀺 𑀓𑁂𑀦 𑀘𑀺𑀢𑁆𑀢𑁂𑀦 𑀓𑀲𑁆𑀫𑀺𑀁 𑀪𑀯𑁂. 𑀏𑀓𑀽𑀦𑀯𑀻𑀲𑀢𑀺 𑀧𑀝𑀺𑀲𑀦𑁆𑀥𑀺𑀬𑁄 𑀢𑁂𑀦 𑀢𑁂𑀦 𑀘𑀺𑀢𑁆𑀢𑁂𑀦 𑀧𑀯𑀢𑁆𑀢𑀫𑀸𑀦𑀸 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀢𑀺 𑀢𑁂𑀦 𑀢𑁂𑀦 𑀘𑀺𑀢𑁆𑀢𑁂𑀦 𑀲𑀸 𑀲𑀸 𑀢𑀢𑁆𑀣 𑀢𑀢𑁆𑀣 𑀧𑀝𑀺𑀲𑀦𑁆𑀥𑀺 𑀳𑁄𑀢𑀻𑀢𑀺 𑀯𑀼𑀢𑁆𑀢𑀸. 𑀢𑀲𑁆𑀲𑀸𑀢𑀺 𑀘𑀺𑀢𑁆𑀢𑀲𑁆𑀲.

𑀆𑀕𑀦𑁆𑀢𑁆𑀯𑀸𑀢𑀺 𑀆𑀕𑀢𑀁 𑀯𑀺𑀬 𑀳𑀼𑀢𑁆𑀯𑀸. 𑀕𑁄𑀧𑀓𑀲𑀻𑀯𑀮𑀻𑀢𑀺 𑀭𑀜𑁆𑀜𑁄 𑀳𑀺𑀢𑀸𑀭𑀓𑁆𑀔𑁂 𑀕𑁄𑀧𑀓𑀓𑀼𑀮𑁂 𑀚𑀸𑀢𑁄 𑀲𑀻𑀯𑀮𑀺𑀦𑀸𑀫𑀓𑁄. 𑀓𑀫𑁆𑀫𑀸𑀤𑀺𑀅𑀦𑀼𑀲𑁆𑀲𑀭𑀡𑀩𑁆𑀬𑀸𑀧𑀸𑀭𑀭𑀳𑀺𑀢𑀢𑁆𑀢𑀸 ‘‘𑀲𑀫𑁆𑀫𑀽𑀴𑁆𑀳𑀓𑀸𑀮𑀓𑀺𑀭𑀺𑀬𑀸’’𑀢𑀺 𑀯𑀼𑀢𑁆𑀢𑀸. 𑀅𑀩𑁆𑀬𑀸𑀧𑀸𑀭𑁂𑀦𑁂𑀯 𑀳𑀺 𑀢𑀢𑁆𑀣 𑀓𑀫𑁆𑀫𑀸𑀤𑀺𑀉𑀧𑀝𑁆𑀞𑀸𑀦𑀁 𑀳𑁄𑀢𑀻𑀢𑀺. ‘‘𑀧𑀺𑀲𑀺𑀬𑀫𑀸𑀦𑀸𑀬 𑀫𑀓𑁆𑀔𑀺𑀓𑀸𑀬 𑀧𑀞𑀫𑀁 𑀓𑀸𑀬𑀤𑁆𑀯𑀸𑀭𑀸𑀯𑀚𑁆𑀚𑀦𑀁 𑀪𑀯𑀗𑁆𑀕𑀁 𑀦𑀸𑀯𑀝𑁆𑀝𑁂𑀢𑀺 𑀅𑀢𑁆𑀢𑀦𑀸 𑀘𑀺𑀦𑁆𑀢𑀺𑀬𑀫𑀸𑀦𑀲𑁆𑀲 𑀓𑀲𑁆𑀲𑀘𑀺 𑀅𑀢𑁆𑀣𑀺𑀢𑀸𑀬𑀸’’𑀢𑀺 𑀓𑁂𑀘𑀺 𑀓𑀸𑀭𑀡𑀁 𑀯𑀤𑀦𑁆𑀢𑀺, 𑀢𑀤𑁂𑀢𑀁 𑀅𑀓𑀸𑀭𑀡𑀁 𑀪𑀯𑀗𑁆𑀕𑀯𑀺𑀲𑀬𑀢𑁄 𑀅𑀜𑁆𑀜𑀲𑁆𑀲 𑀘𑀺𑀦𑁆𑀢𑀺𑀬𑀫𑀸𑀦𑀲𑁆𑀲 𑀅𑀪𑀸𑀯𑀸 𑀅𑀜𑁆𑀜𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀓𑀸𑀮𑁂 𑀘 𑀪𑀯𑀗𑁆𑀕𑀸𑀯𑀝𑁆𑀝𑀦𑀲𑁆𑀲𑁂𑀯 𑀅𑀲𑀫𑁆𑀪𑀯𑀢𑁄. 𑀇𑀤𑀁 𑀧𑀦𑁂𑀢𑁆𑀣 𑀓𑀸𑀭𑀡𑀁 𑀲𑀺𑀬𑀸 𑁋 ‘‘𑀢𑀸𑀦𑀺𑀲𑁆𑀲 𑀢𑀫𑁆𑀳𑀺 𑀲𑀫𑀬𑁂 𑀑𑀮𑀫𑁆𑀩𑀦𑁆𑀢𑀺 𑀅𑀚𑁆𑀛𑁄𑀮𑀫𑁆𑀩𑀦𑁆𑀢𑀺 𑀅𑀪𑀺𑀧𑁆𑀧𑀮𑀫𑁆𑀩𑀦𑁆𑀢𑀻’’𑀢𑀺 (𑀫. 𑀦𑀺. 𑁩.𑁨𑁪𑁮) 𑀯𑀘𑀦𑀢𑁄 𑀢𑀻𑀲𑀼 𑀚𑀯𑀦𑀯𑀸𑀭𑁂𑀲𑀼 𑀅𑀧𑁆𑀧𑀯𑀢𑁆𑀢𑁂𑀲𑁆𑀯𑁂𑀯 𑀓𑀫𑁆𑀫𑀸𑀤𑀺𑀉𑀧𑀝𑁆𑀞𑀸𑀦𑁂𑀦 𑀪𑀯𑀺𑀢𑀩𑁆𑀩𑀁. 𑀅𑀦𑁂𑀓𑀚𑀯𑀦𑀯𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀳𑀺 𑀅𑀚𑁆𑀛𑁄𑀮𑀫𑁆𑀩𑀦𑀁 𑀅𑀪𑀺𑀧𑁆𑀧𑀮𑀫𑁆𑀩𑀦𑀜𑁆𑀘 𑀳𑁄𑀢𑀻𑀢𑀺. 𑀢𑀲𑁆𑀫𑀸 𑀓𑀸𑀬𑀤𑁆𑀯𑀸𑀭𑀸𑀯𑀚𑁆𑀚𑀦𑀁 𑀅𑀦𑀸𑀯𑀝𑁆𑀝𑁂𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀫𑁂𑀯 𑀓𑀫𑁆𑀫𑀸𑀤𑀺𑀆𑀮𑀫𑁆𑀩𑀡𑀁 𑀧𑀞𑀫𑀁 𑀪𑀯𑀗𑁆𑀕𑀁 𑀆𑀯𑀝𑁆𑀝𑁂𑀢𑀺, 𑀢𑀢𑁄 𑀨𑁄𑀝𑁆𑀞𑀩𑁆𑀩𑀲𑁆𑀲 𑀩𑀮𑀯𑀢𑁆𑀢𑀸 𑀤𑀼𑀢𑀺𑀬𑀯𑀸𑀭𑁂 𑀓𑀸𑀬𑀯𑀺𑀜𑁆𑀜𑀸𑀡𑀯𑀻𑀣𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀨𑁄𑀝𑁆𑀞𑀩𑁆𑀩𑁂 𑀧𑀯𑀢𑁆𑀢𑀢𑀺, 𑀢𑀢𑁄 𑀧𑀼𑀭𑀺𑀫𑀚𑀯𑀦𑀯𑀸𑀭𑀕𑀳𑀺𑀢𑁂𑀲𑁆𑀯𑁂𑀯 𑀓𑀫𑁆𑀫𑀸𑀤𑀻𑀲𑀼 𑀓𑀫𑁂𑀦 𑀫𑀦𑁄𑀤𑁆𑀯𑀸𑀭𑀚𑀯𑀦𑀁 𑀚𑀯𑀺𑀢𑁆𑀯𑀸 𑀫𑀽𑀮𑀪𑀯𑀗𑁆𑀕𑀲𑀗𑁆𑀔𑀸𑀢𑀁 𑀆𑀕𑀦𑁆𑀢𑀼𑀓𑀪𑀯𑀗𑁆𑀕𑀲𑀗𑁆𑀔𑀸𑀢𑀁 𑀯𑀸 𑀢𑀤𑀸𑀭𑀫𑁆𑀫𑀡𑀁 𑀪𑀯𑀗𑁆𑀕𑀁 𑀑𑀢𑀭𑀢𑀺, 𑀢𑀤𑀸𑀭𑀫𑁆𑀫𑀡𑀸𑀪𑀸𑀯𑁂 𑀯𑀸 𑀪𑀯𑀗𑁆𑀕𑀫𑁂𑀯. 𑀏𑀢𑀲𑁆𑀫𑀺𑀁 𑀞𑀸𑀦𑁂 𑀓𑀸𑀮𑀁 𑀓𑀭𑁄𑀢𑀻𑀢𑀺 𑀢𑀤𑀸𑀭𑀫𑁆𑀫𑀡𑀸𑀦𑀦𑁆𑀢𑀭𑁂𑀦 𑀘𑀼𑀢𑀺𑀘𑀺𑀢𑁆𑀢𑁂𑀦, 𑀢𑀤𑀸𑀭𑀫𑁆𑀫𑀡𑀸𑀪𑀸𑀯𑁂 𑀯𑀸 𑀪𑀯𑀗𑁆𑀕𑀲𑀗𑁆𑀔𑀸𑀢𑁂𑀦𑁂𑀯 𑀘𑀼𑀢𑀺𑀘𑀺𑀢𑁆𑀢𑁂𑀦 𑀘𑀯𑀢𑀻𑀢𑀺 𑀅𑀢𑁆𑀣𑁄. 𑀪𑀯𑀗𑁆𑀕𑀫𑁂𑀯 𑀳𑀺 𑀘𑀼𑀢𑀺𑀘𑀺𑀢𑁆𑀢𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀘𑀼𑀢𑀺𑀘𑀺𑀢𑁆𑀢𑀁 𑀇𑀥 ‘‘𑀪𑀯𑀗𑁆𑀕’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀫𑀦𑁄𑀤𑁆𑀯𑀸𑀭𑀯𑀺𑀲𑀬𑁄 𑀮𑀳𑀼𑀓𑁄𑀢𑀺 𑀮𑀳𑀼𑀓𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀅𑀭𑀽𑀧𑀥𑀫𑁆𑀫𑀸𑀦𑀁…𑀧𑁂… 𑀮𑀳𑀼𑀓𑁄’’𑀢𑀺. 𑀅𑀭𑀽𑀧𑀥𑀫𑁆𑀫𑀲𑁆𑀲 ¶ 𑀳𑀺 𑀫𑀦𑁄𑀤𑁆𑀯𑀸𑀭𑀲𑁆𑀲 𑀯𑀺𑀲𑀬𑁄 𑀮𑀳𑀼𑀓𑀧𑀘𑁆𑀘𑀼𑀧𑀝𑁆𑀞𑀸𑀦𑁄𑀢𑀺. 𑀩𑀮𑀯𑀢𑀺 𑀘 𑀭𑀽𑀧𑀥𑀫𑁆𑀫𑀲𑁆𑀲 𑀓𑀸𑀬𑀤𑁆𑀯𑀸𑀭𑀲𑁆𑀲 ¶ 𑀯𑀺𑀲𑀬𑁂 𑀅𑀧𑁆𑀧𑀯𑀢𑁆𑀢𑀺𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑀯𑀺𑀲𑀬𑁂 𑀓𑀫𑁆𑀫𑀸𑀤𑀺𑀫𑁆𑀳𑀺 𑀧𑀞𑀫𑀁 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀤𑀲𑁆𑀲𑀦𑁂𑀦 𑀅𑀭𑀽𑀧𑀥𑀫𑁆𑀫𑀸𑀦𑀁 𑀯𑀺𑀲𑀬𑀲𑁆𑀲 𑀮𑀳𑀼𑀓𑀢𑀸 𑀤𑀻𑀧𑀺𑀢𑀸𑀢𑀺. 𑀭𑀽𑀧𑀸𑀦𑀁 𑀯𑀺𑀲𑀬𑀸𑀪𑀸𑀯𑁂𑀧𑀺 𑀯𑀸 ‘‘𑀅𑀭𑀽𑀧𑀥𑀫𑁆𑀫𑀸𑀦’’𑀦𑁆𑀢𑀺 𑀯𑀘𑀦𑀁 𑀬𑁂𑀲𑀁 𑀯𑀺𑀲𑀬𑁄 𑀅𑀢𑁆𑀣𑀺, 𑀢𑀁𑀤𑀲𑁆𑀲𑀦𑀢𑁆𑀣𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦 𑀮𑀳𑀼𑀓𑀫𑁆𑀫𑀸𑀤𑀻𑀲𑀼 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀢𑁄 𑀮𑀳𑀼𑀕𑀳𑀡𑀻𑀬𑀢𑀸 𑀯𑀺𑀲𑀬𑀲𑁆𑀲 𑀮𑀳𑀼𑀓𑀢𑀸.

𑀓𑀫𑁆𑀫𑀸𑀤𑀻𑀦𑀁 𑀪𑀽𑀫𑀺𑀘𑀺𑀢𑁆𑀢𑀼𑀧𑀸𑀤𑀸𑀤𑀺𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄 𑀅𑀦𑀦𑁆𑀢𑁄 𑀧𑀪𑁂𑀤𑁄𑀢𑀺 ‘‘𑀲𑀗𑁆𑀔𑁂𑀧𑀢𑁄’’𑀢𑀺 𑀆𑀳.

𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀤𑀺𑀓𑀺𑀮𑁂𑀲𑁂𑀲𑀼 𑀅𑀦𑀼𑀧𑀘𑁆𑀙𑀺𑀦𑁆𑀦𑁂𑀲𑁆𑀯𑁂𑀯 𑀓𑀫𑁆𑀫𑀸𑀤𑀺𑀦𑁄 𑀉𑀧𑀝𑁆𑀞𑀸𑀦𑀁, 𑀢𑀜𑁆𑀘𑀸𑀭𑀩𑁆𑀪 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀪𑀯𑀦𑁆𑀢𑀭𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀢𑀸 𑀳𑁄𑀢𑀻𑀢𑀺 𑀆𑀳 ‘‘𑀅𑀦𑀼𑀧𑀘𑁆𑀙𑀺𑀦𑁆𑀦𑀓𑀺𑀮𑁂𑀲𑀩𑀮𑀯𑀺𑀦𑀸𑀫𑀺𑀢’’𑀦𑁆𑀢𑀺. 𑀲𑀦𑁆𑀢𑀸𑀦𑁂 𑀳𑀺 𑀯𑀺𑀦𑀸𑀫𑀺𑀢𑁂 𑀢𑀤𑁂𑀓𑀤𑁂𑀲𑀪𑀽𑀢𑀁 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀜𑁆𑀘 𑀯𑀺𑀦𑀸𑀫𑀺𑀢𑀫𑁂𑀯 𑀳𑁄𑀢𑀺, 𑀦 𑀘 𑀏𑀓𑀤𑁂𑀲𑀯𑀺𑀦𑀸𑀫𑀺𑀢𑀪𑀸𑀯𑁂𑀦 𑀯𑀺𑀦𑀸 𑀲𑀦𑁆𑀢𑀸𑀦𑀯𑀺𑀦𑀸𑀫𑀺𑀢𑀢𑀸 𑀅𑀢𑁆𑀣𑀻𑀢𑀺. 𑀲𑀩𑁆𑀩𑀢𑁆𑀣 𑀧𑀦 ‘‘𑀤𑀼𑀕𑁆𑀕𑀢𑀺𑀧𑀝𑀺𑀲𑀦𑁆𑀥𑀺𑀦𑀺𑀦𑁆𑀦𑀸𑀬 𑀘𑀼𑀢𑀺𑀬𑀸 𑀧𑀼𑀭𑀺𑀫𑀚𑀯𑀦𑀸𑀦𑀺 𑀅𑀓𑀼𑀲𑀮𑀸𑀦𑀺, 𑀇𑀢𑀭𑀸𑀬 𑀘 𑀓𑀼𑀲𑀮𑀸𑀦𑀻’’𑀢𑀺 𑀦𑀺𑀘𑁆𑀙𑀺𑀦𑀦𑁆𑀢𑀺. ‘‘𑀦𑀺𑀫𑀺𑀢𑁆𑀢𑀲𑁆𑀲𑀸𑀤𑀕𑀥𑀺𑀢𑀁 𑀯𑀸, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀫𑀸𑀦𑀁 𑀢𑀺𑀝𑁆𑀞𑀢𑀺 𑀅𑀦𑀼𑀩𑁆𑀬𑀜𑁆𑀚𑀦𑀲𑁆𑀲𑀸𑀤𑀕𑀥𑀺𑀢𑀁 𑀯𑀸. 𑀢𑀲𑁆𑀫𑀺𑀁 𑀘𑁂 𑀲𑀫𑀬𑁂 𑀓𑀸𑀮𑀁 𑀓𑀭𑁄𑀢𑀺, 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀤𑁆𑀯𑀺𑀦𑁆𑀦𑀁 𑀕𑀢𑀻𑀦𑀁 𑀅𑀜𑁆𑀜𑀢𑀭𑀁 𑀕𑀢𑀺𑀁 𑀉𑀧𑀧𑀚𑁆𑀚𑁂𑀬𑁆𑀬 𑀦𑀺𑀭𑀬𑀁 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀯𑀸’’𑀢𑀺 (𑀲𑀁. 𑀦𑀺. 𑁪.𑁨𑁩𑁫) 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀆𑀲𑀦𑁆𑀦𑀁 𑀅𑀓𑀼𑀲𑀮𑀁 𑀤𑀼𑀕𑁆𑀕𑀢𑀺𑀬𑀁, 𑀓𑀼𑀲𑀮𑀜𑁆𑀘 𑀲𑀼𑀕𑀢𑀺𑀬𑀁 𑀧𑀝𑀺𑀲𑀦𑁆𑀥𑀺𑀬𑀸 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀻𑀢𑀺.

𑀭𑀸𑀕𑀸𑀤𑀺𑀳𑁂𑀢𑀼𑀪𑀽𑀢𑀁 𑀳𑀻𑀦𑀫𑀸𑀭𑀫𑁆𑀫𑀡𑀦𑁆𑀢𑀺 𑀅𑀓𑀼𑀲𑀮𑀯𑀺𑀧𑀸𑀓𑀲𑁆𑀲 𑀆𑀭𑀫𑁆𑀫𑀡𑀁 𑀪𑀯𑀺𑀢𑀼𑀁 𑀬𑀼𑀢𑁆𑀢𑀁 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀁 𑀆𑀳. 𑀢𑀫𑁆𑀧𑀺 𑀳𑀺 𑀲𑀗𑁆𑀓𑀧𑁆𑀧𑀯𑀲𑁂𑀦 𑀭𑀸𑀕𑀲𑁆𑀲𑀧𑀺 𑀳𑁂𑀢𑀼 𑀳𑁄𑀢𑀻𑀢𑀺. 𑀅𑀓𑀼𑀲𑀮𑀯𑀺𑀧𑀸𑀓𑀚𑀦𑀓𑀓𑀫𑁆𑀫𑀲𑀳𑀚𑀸𑀢𑀸𑀦𑀁 𑀯𑀸 𑀢𑀁𑀲𑀤𑀺𑀲𑀸𑀲𑀦𑁆𑀦𑀘𑀼𑀢𑀺𑀚𑀯𑀦𑀘𑁂𑀢𑀦𑀸𑀲𑀳𑀚𑀸𑀢𑀸𑀦𑀜𑁆𑀘 𑀭𑀸𑀕𑀸𑀤𑀻𑀦𑀁 𑀳𑁂𑀢𑀼𑀪𑀸𑀯𑁄 𑀏𑀯 𑀳𑀻𑀦𑀢𑀸. 𑀢𑀜𑁆𑀳𑀺 𑀧𑀘𑁆𑀙𑀸𑀦𑀼𑀢𑀸𑀧𑀚𑀦𑀓𑀓𑀫𑁆𑀫𑀸𑀦𑀫𑀸𑀭𑀫𑁆𑀫𑀡𑀁 𑀓𑀫𑁆𑀫𑀯𑀲𑁂𑀦 𑀅𑀦𑀺𑀝𑁆𑀞𑀁 𑀅𑀓𑀼𑀲𑀮𑀯𑀺𑀧𑀸𑀓𑀲𑁆𑀲 𑀆𑀭𑀫𑁆𑀫𑀡𑀁 𑀪𑀯𑁂𑀬𑁆𑀬, 𑀅𑀜𑁆𑀜𑀣𑀸 𑀘 𑀇𑀝𑁆𑀞𑀸𑀭𑀫𑁆𑀫𑀡𑁂 𑀧𑀯𑀢𑁆𑀢𑀲𑁆𑀲 𑀅𑀓𑀼𑀲𑀮𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁄 𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑁄 𑀦 𑀪𑀯𑁂𑀬𑁆𑀬. 𑀦 𑀳𑀺 𑀅𑀓𑀼𑀲𑀮𑀯𑀺𑀧𑀸𑀓𑁄 𑀇𑀝𑁆𑀞𑀸𑀭𑀫𑁆𑀫𑀡𑁄 𑀪𑀯𑀺𑀢𑀼𑀫𑀭𑀳𑀢𑀻𑀢𑀺. 𑀧𑀜𑁆𑀘𑀤𑁆𑀯𑀸𑀭𑁂 𑀘 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀆𑀲𑀦𑁆𑀦𑀓𑀢𑀓𑀫𑁆𑀫𑀸𑀭𑀫𑁆𑀫𑀡𑀲𑀦𑁆𑀢𑀢𑀺𑀬𑀁 𑀉𑀧𑁆𑀧𑀦𑁆𑀦𑀁 𑀢𑀁𑀲𑀤𑀺𑀲𑀜𑁆𑀘 𑀤𑀝𑁆𑀞𑀩𑁆𑀩𑀁, 𑀅𑀜𑁆𑀜𑀣𑀸 𑀢𑀤𑁂𑀯 𑀧𑀝𑀺𑀲𑀦𑁆𑀥𑀺𑀆𑀭𑀫𑁆𑀫𑀡𑀽𑀧𑀝𑁆𑀞𑀸𑀧𑀓𑀁 𑀢𑀤𑁂𑀯 𑀘 𑀧𑀝𑀺𑀲𑀦𑁆𑀥𑀺𑀚𑀦𑀓𑀁 𑀪𑀯𑁂𑀬𑁆𑀬, 𑀦 𑀘 𑀧𑀝𑀺𑀲𑀦𑁆𑀥𑀺𑀬𑀸 𑀉𑀧𑀘𑀸𑀭𑀪𑀽𑀢𑀸𑀦𑀺 𑀯𑀺𑀬 ‘‘𑀏𑀢𑀲𑁆𑀫𑀺𑀁 𑀢𑀬𑀸 ¶ 𑀧𑀯𑀢𑁆𑀢𑀺𑀢𑀩𑁆𑀩’’𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀬𑀸 𑀆𑀭𑀫𑁆𑀫𑀡𑀁 𑀅𑀦𑀼𑀧𑀸𑀤𑁂𑀦𑁆𑀢𑀸𑀦𑀺 𑀯𑀺𑀬 ¶ 𑀘 𑀧𑀯𑀢𑁆𑀢𑀸𑀦𑀺 𑀘𑀼𑀢𑀺𑀆𑀲𑀦𑁆𑀦𑀸𑀦𑀺 𑀚𑀯𑀦𑀸𑀦𑀺 𑀧𑀝𑀺𑀲𑀦𑁆𑀥𑀺𑀚𑀦𑀓𑀸𑀦𑀺 𑀪𑀯𑁂𑀬𑁆𑀬𑀼𑀁. ‘‘𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸’’𑀢𑀺 (𑀥. 𑀲. 𑁪𑁩𑁧) 𑀳𑀺 𑀯𑀼𑀢𑁆𑀢𑀁. 𑀢𑀤𑀸 𑀘 𑀢𑀁𑀲𑀫𑀸𑀦𑀯𑀻𑀣𑀺𑀬𑀁 𑀯𑀺𑀬 𑀧𑀯𑀢𑁆𑀢𑀫𑀸𑀦𑀸𑀦𑀺 𑀓𑀣𑀁 𑀓𑀢𑀽𑀧𑀘𑀺𑀢𑀸𑀦𑀺 𑀲𑀺𑀬𑀼𑀁, 𑀦 𑀘 𑀅𑀲𑁆𑀲𑀸𑀤𑀺𑀢𑀸𑀦𑀺 𑀢𑀤𑀸, 𑀦 𑀘 𑀮𑁄𑀓𑀺𑀬𑀸𑀦𑀺 𑀮𑁄𑀓𑀼𑀢𑁆𑀢𑀭𑀸𑀦𑀺 𑀯𑀺𑀬 𑀲𑀫𑀸𑀦𑀯𑀻𑀣𑀺𑀨𑀮𑀸𑀦𑀺 𑀳𑁄𑀦𑁆𑀢𑀺.

‘‘𑀧𑀼𑀩𑁆𑀩𑁂 𑀯𑀸𑀲𑁆𑀲 𑀢𑀁 𑀓𑀢𑀁 𑀳𑁄𑀢𑀺 𑀧𑀸𑀧𑀓𑀫𑁆𑀫𑀁 𑀤𑀼𑀓𑁆𑀔𑀯𑁂𑀤𑀦𑀻𑀬𑀁, 𑀧𑀘𑁆𑀙𑀸 𑀯𑀸𑀲𑁆𑀲 𑀢𑀁 𑀓𑀢𑀁 𑀳𑁄𑀢𑀺 𑀧𑀸𑀧𑀓𑀫𑁆𑀫𑀁 𑀤𑀼𑀓𑁆𑀔𑀯𑁂𑀤𑀦𑀻𑀬𑀁, 𑀫𑀭𑀡𑀓𑀸𑀮𑁂 𑀯𑀸𑀲𑁆𑀲 𑀳𑁄𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸, 𑀢𑁂𑀦 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀻’’𑀢𑀺 (𑀫. 𑀦𑀺. 𑁩.𑁩𑁦𑁩) 𑁋

𑀆𑀤𑀺𑀦𑀸 𑀲𑀼𑀢𑁆𑀢𑁂 𑀫𑀭𑀡𑀓𑀸𑀮𑁂 𑀲𑀫𑀢𑁆𑀢𑀸𑀬 𑀲𑀫𑀸𑀤𑀺𑀦𑁆𑀦𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀘 𑀲𑀳𑀚𑀸𑀢𑀘𑁂𑀢𑀦𑀸𑀬 𑀧𑀝𑀺𑀲𑀦𑁆𑀥𑀺𑀤𑀸𑀦𑀁 𑀯𑀼𑀢𑁆𑀢𑀁, 𑀦 𑀘 𑀤𑀼𑀩𑁆𑀩𑀮𑁂𑀳𑀺 𑀧𑀜𑁆𑀘𑀤𑁆𑀯𑀸𑀭𑀺𑀓𑀚𑀯𑀦𑁂𑀳𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀤𑀺𑀝𑁆𑀞𑀺 𑀯𑀸 𑀲𑀫𑀢𑁆𑀢𑀸 𑀳𑁄𑀢𑀺 𑀲𑀫𑀸𑀤𑀺𑀦𑁆𑀦𑀸. 𑀯𑀓𑁆𑀔𑀢𑀺 𑀘 𑁋

‘‘𑀲𑀩𑁆𑀩𑀫𑁆𑀧𑀺 𑀳𑁂𑀢𑀁 𑀓𑀼𑀲𑀮𑀸𑀓𑀼𑀲𑀮𑀥𑀫𑁆𑀫𑀧𑀝𑀺𑀯𑀺𑀚𑀸𑀦𑀦𑀸𑀤𑀺𑀘𑀯𑀦𑀧𑀭𑀺𑀬𑁄𑀲𑀸𑀦𑀁 𑀓𑀺𑀘𑁆𑀘𑀁 𑀫𑀦𑁄𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑁂𑀦𑁂𑀯 𑀳𑁄𑀢𑀺, 𑀦 𑀧𑀜𑁆𑀘𑀤𑁆𑀯𑀸𑀭𑀺𑀓𑁂𑀦𑀸𑀢𑀺 𑀲𑀩𑁆𑀩𑀲𑁆𑀲𑀧𑁂𑀢𑀲𑁆𑀲 𑀓𑀺𑀘𑁆𑀘𑀲𑁆𑀲 𑀓𑀭𑀡𑁂 𑀲𑀳𑀚𑀯𑀦𑀓𑀸𑀦𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀻’’𑀢𑀺 (𑀯𑀺𑀪. 𑀅𑀝𑁆𑀞. 𑁭𑁬𑁬).

𑀢𑀢𑁆𑀣 𑀳𑀺 ‘‘𑀦 𑀓𑀺𑀜𑁆𑀘𑀺 𑀥𑀫𑁆𑀫𑀁 𑀧𑀝𑀺𑀯𑀺𑀚𑀸𑀦𑀸𑀢𑀻𑀢𑀺 ‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸’𑀢𑀺 (𑀥. 𑀧. 𑁧-𑁨) 𑀏𑀯𑀁 𑀯𑀼𑀢𑁆𑀢𑀁 𑀏𑀓𑀫𑁆𑀧𑀺 𑀓𑀼𑀲𑀮𑀁 𑀯𑀸 𑀅𑀓𑀼𑀲𑀮𑀁 𑀯𑀸 𑀦 𑀧𑀝𑀺𑀯𑀺𑀚𑀸𑀦𑀸𑀢𑀻’’𑀢𑀺 (𑀯𑀺𑀪. 𑀅𑀝𑁆𑀞. 𑁭𑁬𑁬) 𑀘 𑀯𑀼𑀢𑁆𑀢𑀁. 𑀬𑁂𑀲𑀁 𑀧𑀝𑀺𑀯𑀺𑀪𑀸𑀯𑀦𑀧𑁆𑀧𑀯𑀢𑁆𑀢𑀺𑀬𑀸 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀦𑁆𑀯𑁂𑀢𑀺, 𑀢𑁂𑀲𑀁 𑀲𑀸 𑀧𑀯𑀢𑁆𑀢𑀺 𑀧𑀜𑁆𑀘𑀤𑁆𑀯𑀸𑀭𑁂 𑀧𑀝𑀺𑀓𑁆𑀔𑀺𑀢𑁆𑀢𑀸, 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀲𑀫𑀸𑀤𑀸𑀦𑀜𑁆𑀘 𑀢𑀸𑀤𑀺𑀲𑀫𑁂𑀯𑀸𑀢𑀺. 𑀢𑀤𑀸𑀭𑀫𑁆𑀫𑀡𑀸𑀦𑀦𑁆𑀢𑀭𑀁 𑀧𑀦 𑀘𑀯𑀦𑀁, 𑀢𑀤𑀦𑀦𑁆𑀢𑀭𑀸 𑀘 𑀉𑀧𑀧𑀢𑁆𑀢𑀺 𑀫𑀦𑁄𑀤𑁆𑀯𑀸𑀭𑀺𑀓𑀸 𑀏𑀯 𑀳𑁄𑀢𑀺, 𑀦 𑀲𑀳𑀚𑀯𑀦𑀓𑀯𑀻𑀣𑀺𑀘𑀺𑀢𑁆𑀢𑁂 𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀇𑀥 𑀧𑀜𑁆𑀘𑀤𑁆𑀯𑀸𑀭𑀺𑀓𑀢𑀤𑀸𑀭𑀫𑁆𑀫𑀡𑀸𑀦𑀦𑁆𑀢𑀭𑀁 𑀘𑀼𑀢𑀺, 𑀢𑀤𑀦𑀦𑁆𑀢𑀭𑀁 𑀧𑀝𑀺𑀲𑀦𑁆𑀥𑀺 𑀘 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀅𑀯𑀲𑁂𑀲𑀧𑀜𑁆𑀘𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑁂 𑀭𑀽𑀧𑀸𑀤𑀺𑀫𑁆𑀳𑀺 𑀉𑀧𑁆𑀧𑀦𑁆𑀦𑀁 𑀧𑀝𑀺𑀲𑀦𑁆𑀥𑀺𑀁 𑀲𑀦𑁆𑀥𑀸𑀬𑁂𑀯 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁 𑀉𑀧𑀧𑀢𑁆𑀢𑀺𑀘𑀺𑀢𑁆𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀲𑁆𑀲 𑀪𑀯𑀗𑁆𑀕𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺, 𑀅𑀯𑀲𑁂𑀲𑁂𑀓𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑁂 𑀘 𑀉𑀧𑁆𑀧𑀦𑁆𑀦𑀁 𑀲𑀦𑁆𑀥𑀸𑀬 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁 ¶ 𑀉𑀧𑀧𑀢𑁆𑀢𑀺𑀘𑀺𑀢𑁆𑀢𑀁 𑀅𑀢𑀻𑀢𑀸𑀭𑀫𑁆𑀫𑀡𑀲𑁆𑀲 ¶ 𑀪𑀯𑀗𑁆𑀕𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁧𑁯.𑁨𑁮) 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀼𑀤𑁆𑀥𑀸𑀬 𑀯𑀸𑀢𑀺 𑀫𑀳𑀕𑁆𑀕𑀢𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀸𑀬 𑀚𑀯𑀦𑀯𑀻𑀣𑀺𑀬𑀸 𑀢𑀤𑀸𑀭𑀫𑁆𑀫𑀡𑀭𑀳𑀺𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀲𑀸 𑀧𑀦 𑀚𑀯𑀦𑀯𑀻𑀣𑀺 𑀫𑀳𑀕𑁆𑀕𑀢𑀯𑀺𑀧𑀸𑀓𑀲𑁆𑀲 𑀉𑀧𑀘𑀸𑀭𑁄 𑀯𑀺𑀬 𑀤𑀝𑁆𑀞𑀩𑁆𑀩𑀸. 𑀓𑁂𑀘𑀺 𑀧𑀦 𑀢𑀁 𑀯𑀻𑀣𑀺𑀁 𑀫𑀳𑀕𑁆𑀕𑀢𑀸𑀯𑀲𑀸𑀦𑀁 𑀯𑀤𑀦𑁆𑀢𑀺. 𑀅𑀢𑀻𑀢𑀸𑀭𑀫𑁆𑀫𑀡𑀸 𑀏𑀓𑀸𑀤𑀲𑀯𑀺𑀥𑀸, 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸 𑀲𑀢𑁆𑀢𑀯𑀺𑀥𑀸.

𑀏𑀢𑁂𑀦𑀸𑀦𑀼𑀲𑀸𑀭𑁂𑀦 𑀆𑀭𑀼𑀧𑁆𑀧𑀘𑀼𑀢𑀺𑀬𑀸𑀧𑀺 𑀅𑀦𑀦𑁆𑀢𑀭𑀸 𑀧𑀝𑀺𑀲𑀦𑁆𑀥𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀇𑀤𑀁 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 ‘‘𑀧𑀣𑀯𑀻𑀓𑀲𑀺𑀡𑀚𑁆𑀛𑀸𑀦𑀸𑀤𑀺𑀯𑀲𑁂𑀦 𑀧𑀝𑀺𑀮𑀤𑁆𑀥𑀫𑀳𑀕𑁆𑀕𑀢𑀲𑀼𑀕𑀢𑀺𑀬𑀁 𑀞𑀺𑀢𑀲𑁆𑀲𑀸’’𑀢𑀺 𑀏𑀯𑀫𑀸𑀤𑀺𑀓𑁂 𑀏𑀯 𑀦𑀬𑁂 𑀅𑀬𑀫𑁆𑀧𑀺 𑀧𑀝𑀺𑀲𑀦𑁆𑀥𑀺 𑀅𑀯𑀭𑀼𑀤𑁆𑀥𑀸𑀢𑀺? 𑀦, 𑀢𑀢𑁆𑀣 𑀭𑀽𑀧𑀸𑀯𑀘𑀭𑀘𑀼𑀢𑀺𑀅𑀦𑀦𑁆𑀢𑀭𑀸𑀬 𑀏𑀯 𑀧𑀝𑀺𑀲𑀦𑁆𑀥𑀺𑀬𑀸 𑀯𑀼𑀢𑁆𑀢𑀢𑁆𑀢𑀸. 𑀢𑀢𑁆𑀣 𑀳𑀺 ‘‘𑀧𑀣𑀯𑀻𑀓𑀲𑀺𑀡𑀸𑀤𑀺𑀓𑀁 𑀯𑀸 𑀦𑀺𑀫𑀺𑀢𑁆𑀢𑀁 𑀫𑀳𑀕𑁆𑀕𑀢𑀘𑀺𑀢𑁆𑀢𑀁 𑀯𑀸 𑀫𑀦𑁄𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀘𑁆𑀙𑀢𑀺. 𑀘𑀓𑁆𑀔𑀼𑀲𑁄𑀢𑀸𑀦𑀁 𑀯𑀸’’𑀢𑀺𑀆𑀤𑀺𑀓𑁂𑀦 𑀭𑀽𑀧𑀸𑀯𑀘𑀭𑀘𑀼𑀢𑀺𑀬𑀸 𑀏𑀯 𑀅𑀦𑀦𑁆𑀢𑀭𑀸 𑀧𑀝𑀺𑀲𑀦𑁆𑀥𑀺 𑀯𑀼𑀢𑁆𑀢𑀸𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀅𑀣𑀸𑀧𑀺 𑀬𑀣𑀸𑀲𑀫𑁆𑀪𑀯𑀬𑁄𑀚𑀦𑀸𑀬 𑀅𑀬𑀫𑁆𑀧𑀺 𑀧𑀝𑀺𑀲𑀦𑁆𑀥𑀺 𑀢𑀢𑁆𑀣𑁂𑀯 𑀅𑀯𑀭𑀼𑀤𑁆𑀥𑀸, 𑀅𑀭𑀽𑀧𑀸𑀯𑀘𑀭𑀘𑀼𑀢𑀺𑀅𑀦𑀦𑁆𑀢𑀭𑀸 𑀧𑀦 𑀭𑀽𑀧𑀸𑀯𑀘𑀭𑀧𑀝𑀺𑀲𑀦𑁆𑀥𑀺 𑀦𑀢𑁆𑀣𑀺, 𑀅𑀭𑀽𑀧𑀸𑀯𑀘𑀭𑁂 𑀘 𑀉𑀧𑀭𑀽𑀧𑀭𑀺𑀘𑀼𑀢𑀺𑀬𑀸 𑀳𑁂𑀝𑁆𑀞𑀺𑀫𑀸 𑀳𑁂𑀝𑁆𑀞𑀺𑀫𑀸 𑀧𑀝𑀺𑀲𑀦𑁆𑀥𑀻𑀢𑀺 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀘𑀼𑀢𑀺𑀬𑀸 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸 𑀧𑀝𑀺𑀲𑀦𑁆𑀥𑀺 𑀦𑀢𑁆𑀣𑀺. 𑀢𑁂𑀦 𑀢𑀢𑁄 𑀢𑀢𑁆𑀣𑁂𑀯 𑀅𑀢𑀻𑀢𑀸𑀭𑀫𑁆𑀫𑀡𑀸 𑀓𑀸𑀫𑀸𑀯𑀘𑀭𑁂 𑀘 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀧𑀝𑀺𑀲𑀦𑁆𑀥𑀺 𑀇𑀢𑀭𑀸𑀳𑀺 𑀘 𑀬𑀣𑀸𑀲𑀫𑁆𑀪𑀯𑀁 𑀅𑀢𑀻𑀢𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸 𑀆𑀭𑀼𑀧𑁆𑀧𑀧𑀝𑀺𑀲𑀦𑁆𑀥𑀺, 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀘 𑀓𑀸𑀫𑀸𑀯𑀘𑀭𑀧𑀝𑀺𑀲𑀦𑁆𑀥𑀺 𑀬𑁄𑀚𑁂𑀢𑀩𑁆𑀩𑀸𑀢𑀺 𑀇𑀫𑀲𑁆𑀲 𑀯𑀺𑀲𑁂𑀲𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀯𑀺𑀲𑀼𑀁 𑀉𑀤𑁆𑀥𑀭𑀡𑀁 𑀓𑀢𑀁.

𑀏𑀯𑀁 𑀆𑀭𑀫𑁆𑀫𑀡𑀯𑀲𑁂𑀦 𑀏𑀓𑀯𑀺𑀥𑀸𑀬 𑀓𑀸𑀫𑀸𑀯𑀘𑀭𑀲𑀼𑀕𑀢𑀺𑀘𑀼𑀢𑀺𑀬𑀸 𑀤𑀼𑀯𑀺𑀥𑀸 𑀤𑀼𑀕𑁆𑀕𑀢𑀺𑀧𑀝𑀺𑀲𑀦𑁆𑀥𑀺, 𑀤𑀼𑀕𑁆𑀕𑀢𑀺𑀘𑀼𑀢𑀺𑀬𑀸 𑀤𑀼𑀯𑀺𑀥𑀸 𑀲𑀼𑀕𑀢𑀺𑀧𑀝𑀺𑀲𑀦𑁆𑀥𑀺, 𑀓𑀸𑀫𑀸𑀯𑀘𑀭𑀲𑀼𑀕𑀢𑀺𑀘𑀼𑀢𑀺𑀬𑀸 𑀤𑁆𑀯𑀺𑀏𑀓𑀤𑁆𑀯𑀺𑀧𑁆𑀧𑀓𑀸𑀭𑀸𑀦𑀁 𑀓𑀸𑀫𑀭𑀽𑀧𑀸𑀭𑀼𑀧𑁆𑀧𑀸𑀦𑀁 𑀯𑀲𑁂𑀦 𑀧𑀜𑁆𑀘𑀯𑀺𑀥𑀸 𑀲𑀼𑀕𑀢𑀺𑀧𑀝𑀺𑀲𑀦𑁆𑀥𑀺, 𑀭𑀽𑀧𑀸𑀯𑀘𑀭𑀘𑀼𑀢𑀺𑀬𑀸 𑀘 𑀢𑀣𑁂𑀯 𑀧𑀜𑁆𑀘𑀯𑀺𑀥𑀸, 𑀤𑀼𑀯𑀺𑀥𑀸𑀬 𑀆𑀭𑀼𑀧𑁆𑀧𑀘𑀼𑀢𑀺𑀬𑀸 𑀧𑀘𑁆𑀘𑁂𑀓𑀁 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀓𑀸𑀫𑀸𑀭𑀼𑀧𑁆𑀧𑀸𑀦𑀁 𑀯𑀲𑁂𑀦 𑀅𑀝𑁆𑀞𑀯𑀺𑀥𑀸 𑀘 𑀧𑀝𑀺𑀲𑀦𑁆𑀥𑀺 𑀤𑀲𑁆𑀲𑀺𑀢𑀸, 𑀤𑀼𑀕𑁆𑀕𑀢𑀺𑀘𑀼𑀢𑀺𑀬𑀸 𑀧𑀦 𑀏𑀓𑀯𑀺𑀥𑀸𑀬 𑀤𑀼𑀕𑁆𑀕𑀢𑀺𑀧𑀝𑀺𑀲𑀦𑁆𑀥𑀺 𑀤𑀼𑀯𑀺𑀥𑀸 𑀦 𑀤𑀲𑁆𑀲𑀺𑀢𑀸, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀤𑀼𑀕𑁆𑀕𑀢𑀺𑀬𑀁 𑀞𑀺𑀢𑀲𑁆𑀲 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀬𑀣𑀸𑀯𑀼𑀢𑁆𑀢𑀸 𑀧𑀦 𑁋

𑀤𑁆𑀯𑀺𑀤𑁆𑀯𑀺𑀧𑀜𑁆𑀘𑀧𑁆𑀧𑀓𑀸𑀭𑀸 𑀘, 𑀧𑀜𑁆𑀘𑀸𑀝𑁆𑀞𑀤𑀼𑀯𑀺𑀥𑀸𑀧𑀺 𑀘;

𑀘𑀢𑀼𑀯𑀻𑀲𑀢𑀺 𑀲𑀩𑁆𑀩𑀸𑀧𑀺, 𑀢𑀸 𑀳𑁄𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀬𑁄.

‘‘𑀓𑀸𑀫𑀸𑀯𑀘𑀭𑀲𑁆𑀲 ¶ ¶ 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁪𑁩𑁧, 𑁪𑁫𑁫, 𑁪𑁯𑁮) 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑁄 𑀤𑀲𑁆𑀲𑀺𑀢𑀧𑁆𑀧𑀓𑀸𑀭𑁄𑀢𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳.

𑀆𑀤𑀺𑀦𑀸 𑀲𑀳𑀸𑀢𑀺𑀆𑀤𑀺𑀦𑀸 𑀯𑀺𑀫𑀺𑀲𑁆𑀲𑀯𑀺𑀜𑁆𑀜𑀸𑀡𑁂𑀦 𑀲𑀳. 𑀑𑀫𑀢𑁄 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀤𑀲𑀓𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀜𑁆𑀜𑀢𑁆𑀣 𑀳𑀺 𑀅𑀦𑁂𑀓𑁂 𑀓𑀮𑀸𑀧𑀸 𑀲𑀳 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀩𑁆𑀭𑀳𑁆𑀫𑀢𑁆𑀢𑀪𑀸𑀯𑁂𑀧𑀺 𑀳𑀺 𑀅𑀦𑁂𑀓𑀕𑀸𑀯𑀼𑀢𑀧𑁆𑀧𑀫𑀸𑀡𑁂 𑀅𑀦𑁂𑀓𑁂 𑀓𑀮𑀸𑀧𑀸 𑀲𑀳𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀢𑀺𑀁𑀲𑀢𑁄 𑀅𑀥𑀺𑀓𑀸𑀦𑁂𑀯 𑀭𑀽𑀧𑀸𑀦𑀺 𑀳𑁄𑀦𑁆𑀢𑀺 𑀕𑀦𑁆𑀥𑀭𑀲𑀸𑀳𑀸𑀭𑀸𑀦𑀁 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀘𑀓𑁆𑀔𑀼𑀲𑁄𑀢𑀯𑀢𑁆𑀣𑀼𑀲𑀢𑁆𑀢𑀓𑀚𑀻𑀯𑀺𑀢𑀙𑀓𑁆𑀓𑀪𑀸𑀯𑁂𑀧𑀺 𑀢𑁂𑀲𑀁 𑀩𑀳𑀼𑀢𑁆𑀢𑀸. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀢𑀢𑁆𑀣𑀧𑀺 𑀘𑀓𑁆𑀔𑀼𑀲𑁄𑀢𑀯𑀢𑁆𑀣𑀼𑀤𑀲𑀓𑀸𑀦𑀁 𑀚𑀻𑀯𑀺𑀢𑀦𑀯𑀓𑀲𑁆𑀲 𑀘 𑀉𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸, 𑀧𑀸𑀴𑀺𑀬𑀁 𑀧𑀦 ‘‘𑀭𑀽𑀧𑀥𑀸𑀢𑀼𑀬𑀸 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀞𑀧𑁂𑀢𑁆𑀯𑀸 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀤𑁂𑀯𑀸𑀦𑀁 𑀧𑀜𑁆𑀘𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀺, 𑀧𑀜𑁆𑀘 𑀥𑀸𑀢𑀼𑀬𑁄 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀣𑀸 ‘‘𑀭𑀽𑀧𑀥𑀸𑀢𑀼𑀬𑀸 𑀙 𑀆𑀬𑀢𑀦𑀸𑀦𑀺 𑀦𑀯 𑀥𑀸𑀢𑀼𑀬𑁄’’𑀢𑀺 𑀲𑀩𑁆𑀩𑀲𑀗𑁆𑀕𑀳𑀯𑀲𑁂𑀦 𑀢𑀢𑁆𑀣 𑀯𑀺𑀚𑁆𑀚𑀫𑀸𑀦𑀸𑀬𑀢𑀦𑀥𑀸𑀢𑀼𑀬𑁄 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀓𑀣𑀸𑀯𑀢𑁆𑀣𑀼𑀫𑁆𑀳𑀺 𑀘 𑀖𑀸𑀦𑀸𑀬𑀢𑀦𑀸𑀤𑀻𑀦𑀁 𑀯𑀺𑀬 𑀕𑀦𑁆𑀥𑀸𑀬𑀢𑀦𑀸𑀤𑀻𑀦𑀜𑁆𑀘 𑀢𑀢𑁆𑀣 𑀪𑀸𑀯𑁄 𑀧𑀝𑀺𑀓𑁆𑀔𑀺𑀢𑁆𑀢𑁄 ‘‘𑀅𑀢𑁆𑀣𑀺 𑀢𑀢𑁆𑀣 𑀖𑀸𑀦𑀸𑀬𑀢𑀦𑀦𑁆𑀢𑀺? 𑀆𑀫𑀦𑁆𑀢𑀸, 𑀅𑀢𑁆𑀣𑀺 𑀢𑀢𑁆𑀣 𑀕𑀦𑁆𑀥𑀸𑀬𑀢𑀦𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂’’𑀢𑀺𑀆𑀤𑀺𑀦𑀸 (𑀓𑀣𑀸. 𑁫𑁧𑁯), 𑀦 𑀘 𑀅𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀸𑀦𑀁 𑀧𑀣𑀯𑀻𑀥𑀸𑀢𑀼𑀆𑀤𑀻𑀦𑀁 𑀯𑀺𑀬 𑀅𑀕𑀦𑁆𑀥𑀭𑀲𑀸𑀬𑀢𑀦𑀸𑀦𑀁 𑀕𑀦𑁆𑀥𑀭𑀲𑀸𑀦𑀁 𑀢𑀢𑁆𑀣 𑀪𑀸𑀯𑁄 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀨𑀼𑀲𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀧𑀣𑀯𑀻𑀆𑀤𑀺𑀲𑀪𑀸𑀯𑀲𑁆𑀲 𑀯𑀺𑀬 𑀕𑀦𑁆𑀥𑀭𑀲𑀪𑀸𑀯𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀕𑀦𑁆𑀥𑀭𑀲𑀲𑀪𑀸𑀯𑀲𑁆𑀲 𑀅𑀪𑀸𑀯𑀸.

𑀬𑀤𑀺 𑀘 𑀖𑀸𑀦𑀲𑀫𑁆𑀨𑀲𑁆𑀲𑀸𑀤𑀻𑀦𑀁 𑀓𑀸𑀭𑀡𑀪𑀸𑀯𑁄 𑀦𑀢𑁆𑀣𑀻𑀢𑀺 𑀆𑀬𑀢𑀦𑀸𑀦𑀻𑀢𑀺 𑀢𑁂𑀦 𑀯𑀼𑀘𑁆𑀘𑁂𑀬𑁆𑀬𑀼𑀁, 𑀥𑀸𑀢𑀼-𑀲𑀤𑁆𑀤𑁄 𑀧𑀦 𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀯𑀸𑀘𑀓𑁄𑀢𑀺 𑀕𑀦𑁆𑀥𑀥𑀸𑀢𑀼𑀭𑀲𑀥𑀸𑀢𑀽𑀢𑀺 𑀅𑀯𑀘𑀦𑁂 𑀦𑀢𑁆𑀣𑀺 𑀓𑀸𑀭𑀡𑀁, 𑀥𑀫𑁆𑀫𑀪𑀸𑀯𑁄 𑀘 𑀢𑁂𑀲𑀁 𑀏𑀓𑀦𑁆𑀢𑁂𑀦 𑀇𑀘𑁆𑀙𑀺𑀢𑀩𑁆𑀩𑁄 𑀲𑀪𑀸𑀯𑀥𑀸𑀭𑀡𑀸𑀤𑀺𑀮𑀓𑁆𑀔𑀡𑀢𑁄 𑀅𑀜𑁆𑀜𑀲𑁆𑀲 𑀅𑀪𑀸𑀯𑀸, 𑀥𑀫𑁆𑀫𑀸𑀦𑀜𑁆𑀘 𑀆𑀬𑀢𑀦𑀪𑀸𑀯𑁄 𑀏𑀓𑀦𑁆𑀢𑀢𑁄 𑀬𑀫𑀓𑁂 (𑀬𑀫. 𑁧. 𑀆𑀬𑀢𑀦𑀬𑀫𑀓.𑁧𑁩) 𑀯𑀼𑀢𑁆𑀢𑁄 ‘‘𑀥𑀫𑁆𑀫𑁄 𑀆𑀬𑀢𑀦𑀦𑁆𑀢𑀺? 𑀆𑀫𑀦𑁆𑀢𑀸’’𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀕𑀦𑁆𑀥𑀭𑀲𑀸𑀬𑀢𑀦𑀪𑀸𑀯𑀸𑀪𑀸𑀯𑁂𑀧𑀺 𑀓𑁄𑀘𑀺 𑀆𑀬𑀢𑀦𑀲𑀪𑀸𑀯𑁄 𑀯𑀢𑁆𑀢𑀩𑁆𑀩𑁄. 𑀬𑀤𑀺 𑀘 𑀨𑁄𑀝𑁆𑀞𑀩𑁆𑀩𑀪𑀸𑀯𑀢𑁄 𑀅𑀜𑁆𑀜𑁄 𑀧𑀣𑀯𑀻𑀥𑀸𑀢𑀼𑀆𑀤𑀺𑀪𑀸𑀯𑁄 𑀯𑀺𑀬 𑀕𑀦𑁆𑀥𑀭𑀲𑀪𑀸𑀯𑀢𑁄 𑀅𑀜𑁆𑀜𑁄 𑀢𑁂𑀲𑀁 𑀓𑁄𑀘𑀺 𑀲𑀪𑀸𑀯𑁄 𑀲𑀺𑀬𑀸, 𑀢𑁂𑀲𑀁 𑀥𑀫𑁆𑀫𑀸𑀬𑀢𑀦𑁂 𑀲𑀗𑁆𑀕𑀳𑁄. 𑀕𑀦𑁆𑀥𑀭𑀲𑀪𑀸𑀯𑁂 𑀧𑀦 𑀆𑀬𑀢𑀦𑀪𑀸𑀯𑁂 𑀘 𑀲𑀢𑀺 𑀕𑀦𑁆𑀥𑁄 𑀘 𑀲𑁄 𑀆𑀬𑀢𑀦𑀜𑁆𑀘 𑀕𑀦𑁆𑀥𑀸𑀬𑀢𑀦𑀁, 𑀭𑀲𑁄 ¶ 𑀘 𑀲𑁄 𑀆𑀬𑀢𑀦𑀜𑁆𑀘 𑀭𑀲𑀸𑀬𑀢𑀦𑀦𑁆𑀢𑀺 𑀇𑀤𑀫𑀸𑀧𑀦𑁆𑀦𑀫𑁂𑀯𑀸𑀢𑀺 𑀕𑀦𑁆𑀥𑀭𑀲𑀸𑀬𑀢𑀦𑀪𑀸𑀯𑁄 𑀘 𑀦 𑀲𑀓𑁆𑀓𑀸 𑀦𑀺𑀯𑀸𑀭𑁂𑀢𑀼𑀁, ‘‘𑀢𑀬𑁄 𑀆𑀳𑀸𑀭𑀸’’𑀢𑀺 (𑀯𑀺𑀪. 𑁯𑁯𑁩) 𑀘 𑀯𑀘𑀦𑀢𑁄 ¶ 𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑁆𑀲 𑀢𑀢𑁆𑀣 𑀅𑀪𑀸𑀯𑁄 𑀯𑀺𑀜𑁆𑀜𑀸𑀬𑀢𑀺. 𑀢𑀲𑁆𑀫𑀸 𑀬𑀣𑀸 𑀧𑀸𑀴𑀺𑀬𑀸 𑀅𑀯𑀺𑀭𑁄𑀥𑁄 𑀳𑁄𑀢𑀺, 𑀢𑀣𑀸 𑀭𑀽𑀧𑀕𑀡𑀦𑀸 𑀓𑀸𑀢𑀩𑁆𑀩𑀸. 𑀏𑀯𑀜𑁆𑀳𑀺 𑀥𑀫𑁆𑀫𑀢𑀸 𑀦 𑀯𑀺𑀮𑁄𑀫𑀺𑀢𑀸 𑀳𑁄𑀢𑀻𑀢𑀺.

𑀚𑀸𑀢𑀺𑀉𑀡𑁆𑀡𑀸𑀬𑀸𑀢𑀺 𑀕𑀩𑁆𑀪𑀁 𑀨𑀸𑀮𑁂𑀢𑁆𑀯𑀸 𑀕𑀳𑀺𑀢𑀉𑀡𑁆𑀡𑀸𑀬𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀲𑀫𑁆𑀪𑀯𑀪𑁂𑀤𑁄𑀢𑀺 𑀅𑀢𑁆𑀣𑀺𑀢𑀸𑀪𑁂𑀤𑁄. 𑀦𑀺𑀚𑁆𑀛𑀸𑀫𑀢𑀡𑁆𑀳𑀺𑀓𑀸 𑀓𑀺𑀭 𑀦𑀺𑀘𑁆𑀘𑀁 𑀤𑀼𑀓𑁆𑀔𑀸𑀢𑀼𑀭𑀢𑀸𑀬 𑀓𑀸𑀫𑀁 𑀲𑁂𑀯𑀺𑀢𑁆𑀯𑀸 𑀕𑀩𑁆𑀪𑀁 𑀦 𑀕𑀡𑁆𑀳𑀦𑁆𑀢𑀺.

𑀭𑀽𑀧𑀻𑀩𑁆𑀭𑀳𑁆𑀫𑁂𑀲𑀼 𑀢𑀸𑀯 𑀑𑀧𑀧𑀸𑀢𑀺𑀓𑀬𑁄𑀦𑀺𑀓𑁂𑀲𑀽𑀢𑀺 𑀑𑀧𑀧𑀸𑀢𑀺𑀓𑀬𑁄𑀦𑀺𑀓𑁂𑀳𑀺 𑀭𑀽𑀧𑀻𑀩𑁆𑀭𑀳𑁆𑀫𑁂 𑀦𑀺𑀤𑁆𑀥𑀸𑀭𑁂𑀢𑀺. ‘‘𑀲𑀁𑀲𑁂𑀤𑀚𑁄𑀧𑀧𑀸𑀢𑀻𑀲𑀼 𑀅𑀯𑀓𑀁𑀲𑀢𑁄 𑀢𑀺𑀁𑀲𑀸’’𑀢𑀺 𑀏𑀢𑀁 𑀯𑀺𑀯𑀭𑀦𑁆𑀢𑁄 𑀆𑀳 ‘‘𑀅𑀯𑀓𑀁𑀲𑀢𑁄 𑀧𑀦𑀸’’𑀢𑀺𑀆𑀤𑀺, 𑀢𑀁 𑀧𑀦𑁂𑀢𑀁 𑀧𑀸𑀴𑀺𑀬𑀸 𑀦 𑀲𑀫𑁂𑀢𑀺. 𑀦 𑀳𑀺 𑀧𑀸𑀴𑀺𑀬𑀁 𑀓𑀸𑀫𑀸𑀯𑀘𑀭𑀸𑀦𑀁 𑀲𑀁𑀲𑁂𑀤𑀚𑁄𑀧𑀧𑀸𑀢𑀺𑀓𑀸𑀦𑀁 𑀅𑀖𑀸𑀦𑀓𑀸𑀦𑀁 𑀉𑀧𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑁂 (𑀯𑀺𑀪. 𑁧𑁦𑁦𑁭) 𑀳𑀺 𑁋

‘‘𑀓𑀸𑀫𑀥𑀸𑀢𑀼𑀬𑀸 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀓𑀲𑁆𑀲𑀘𑀺 𑀏𑀓𑀸𑀤𑀲𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀺, 𑀓𑀲𑁆𑀲𑀘𑀺 𑀤𑀲𑀸𑀬𑀢𑀦𑀸𑀦𑀺, 𑀓𑀲𑁆𑀲𑀘𑀺 𑀅𑀧𑀭𑀸𑀦𑀺 𑀤𑀲𑀸𑀬𑀢𑀦𑀸𑀦𑀺, 𑀓𑀲𑁆𑀲𑀘𑀺 𑀦𑀯𑀸𑀬𑀢𑀦𑀸𑀦𑀺, 𑀓𑀲𑁆𑀲𑀘𑀺 𑀲𑀢𑁆𑀢𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺 𑁋

𑀯𑀼𑀢𑁆𑀢𑀁, 𑀦 𑀯𑀼𑀢𑁆𑀢𑀁 ‘‘𑀅𑀝𑁆𑀞𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺. 𑀢𑀣𑀸 ‘‘𑀤𑀲𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀅𑀖𑀸𑀦𑀓𑀉𑀧𑀧𑀢𑁆𑀢𑀺𑀬𑀸 𑀯𑀺𑀚𑁆𑀚𑀫𑀸𑀦𑀸𑀬 𑀢𑀺𑀓𑁆𑀔𑀢𑁆𑀢𑀼𑀜𑁆𑀘 ‘‘𑀦𑀯𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺, 𑀦 𑀘 𑀢𑀁 𑀯𑀼𑀢𑁆𑀢𑀁. 𑀏𑀯𑀁 𑀥𑀸𑀢𑀼𑀧𑀸𑀢𑀼𑀪𑀸𑀯𑀸𑀤𑀺𑀧𑀜𑁆𑀳𑁂𑀲𑀼 𑀬𑀫𑀓𑁂𑀧𑀺 𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀸𑀦𑀁 𑀲𑀳𑀘𑀸𑀭𑀺𑀢𑀸 𑀯𑀼𑀢𑁆𑀢𑀸𑀢𑀺.

𑀘𑀼𑀢𑀺𑀧𑀝𑀺𑀲𑀦𑁆𑀥𑀻𑀦𑀁 𑀔𑀦𑁆𑀥𑀸𑀤𑀻𑀳𑀺 𑀅𑀜𑁆𑀜𑀫𑀜𑁆𑀜𑀁 𑀲𑀫𑀸𑀦𑀢𑀸 𑀅𑀪𑁂𑀤𑁄, 𑀅𑀲𑀫𑀸𑀦𑀢𑀸 𑀪𑁂𑀤𑁄. 𑀦𑀬𑀫𑀼𑀔𑀫𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀯𑀼𑀢𑁆𑀢𑀁 𑀅𑀯𑀼𑀢𑁆𑀢𑀜𑁆𑀘 𑀲𑀩𑁆𑀩𑀁 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀆𑀳 ‘‘𑀅𑀬𑀁 𑀢𑀸𑀯 𑀅𑀭𑀽𑀧𑀪𑀽𑀫𑀻𑀲𑀼𑀬𑁂𑀯 𑀦𑀬𑁄’’𑀢𑀺. 𑀭𑀽𑀧𑀸𑀭𑀽𑀧𑀸𑀯𑀘𑀭𑀸𑀦𑀁 𑀉𑀧𑀘𑀸𑀭𑀲𑁆𑀲 𑀩𑀮𑀯𑀢𑀸𑀬 𑀢𑀢𑁄 𑀘𑀯𑀺𑀢𑁆𑀯𑀸 𑀤𑀼𑀕𑁆𑀕𑀢𑀺𑀬𑀁 𑀉𑀧𑀧𑀢𑁆𑀢𑀺 𑀦𑀢𑁆𑀣𑀻𑀢𑀺 ‘‘𑀏𑀓𑀘𑁆𑀘𑀲𑀼𑀕𑀢𑀺𑀘𑀼𑀢𑀺𑀬𑀸’’𑀢𑀺 𑀆𑀳. 𑀏𑀓𑀘𑁆𑀘𑀤𑀼𑀕𑁆𑀕𑀢𑀺𑀧𑀝𑀺𑀲𑀦𑁆𑀥𑀻𑀢𑀺 𑀏𑀢𑁆𑀣 𑀏𑀓𑀘𑁆𑀘𑀕𑁆𑀕𑀳𑀡𑀲𑁆𑀲 𑀧𑀬𑁄𑀚𑀦𑀁 𑀫𑀕𑁆𑀕𑀺𑀢𑀩𑁆𑀩𑀁. 𑀅𑀬𑀁 𑀧𑀦𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄 𑀲𑀺𑀬𑀸 𑁋 𑀦𑀸𑀦𑀢𑁆𑀢𑀓𑀸𑀬𑀦𑀸𑀦𑀢𑁆𑀢𑀲𑀜𑁆𑀜𑀻𑀲𑀼 𑀯𑀼𑀢𑁆𑀢𑀸 𑀏𑀓𑀘𑁆𑀘𑁂 𑀯𑀺𑀦𑀺𑀧𑀸𑀢𑀺𑀓𑀸 𑀢𑀺𑀳𑁂𑀢𑀼𑀓𑀸𑀤𑀺𑀧𑀝𑀺𑀲𑀦𑁆𑀥𑀺𑀓𑀸, 𑀢𑁂𑀲𑀁 𑀢𑀁 𑀧𑀝𑀺𑀲𑀦𑁆𑀥𑀺𑀁 𑀯𑀺𑀦𑀺𑀧𑀸𑀢𑀪𑀸𑀯𑁂𑀦 𑀤𑀼𑀕𑁆𑀕𑀢𑀺𑀧𑀝𑀺𑀲𑀦𑁆𑀥𑀻𑀢𑀺 𑀕𑀳𑁂𑀢𑁆𑀯𑀸 𑀲𑀩𑁆𑀩𑀲𑀼𑀕𑀢𑀺𑀘𑀼𑀢𑀺𑀬𑀸𑀯 𑀲𑀸 ¶ 𑀧𑀝𑀺𑀲𑀦𑁆𑀥𑀺 𑀳𑁄𑀢𑀺, 𑀦 𑀏𑀓𑀘𑁆𑀘𑀲𑀼𑀕𑀢𑀺𑀘𑀼𑀢𑀺𑀬𑀸 𑀏𑀯𑀸𑀢𑀺 𑀢𑀁𑀦𑀺𑀯𑀢𑁆𑀢𑀦𑀢𑁆𑀣𑀁 𑀏𑀓𑀘𑁆𑀘𑀤𑀼𑀕𑁆𑀕𑀢𑀺𑀕𑁆𑀕𑀳𑀡𑀁 𑀓𑀢𑀁. 𑀅𑀧𑀸𑀬𑀧𑀝𑀺𑀲𑀦𑁆𑀥𑀺 𑀏𑀯 𑀳𑀺 𑀏𑀓𑀘𑁆𑀘𑀲𑀼𑀕𑀢𑀺𑀘𑀼𑀢𑀺𑀬𑀸 𑀳𑁄𑀢𑀺, 𑀦 ¶ 𑀲𑀩𑁆𑀩𑀲𑀼𑀕𑀢𑀺𑀘𑀼𑀢𑀺𑀬𑀸. 𑀅𑀣 𑀯𑀸 𑀤𑀼𑀕𑁆𑀕𑀢𑀺𑀧𑀝𑀺𑀲𑀦𑁆𑀥𑀺 𑀤𑀼𑀯𑀺𑀥𑀸 𑀏𑀓𑀘𑁆𑀘𑀲𑀼𑀕𑀢𑀺𑀘𑀼𑀢𑀺𑀬𑀸 𑀅𑀦𑀦𑁆𑀢𑀭𑀸 𑀤𑀼𑀕𑁆𑀕𑀢𑀺𑀘𑀼𑀢𑀺𑀬𑀸 𑀘𑀸𑀢𑀺. 𑀢𑀢𑁆𑀣 𑀧𑀘𑁆𑀙𑀺𑀫𑀁 𑀯𑀚𑁆𑀚𑁂𑀢𑁆𑀯𑀸 𑀧𑀼𑀭𑀺𑀫𑀁 𑀏𑀯 𑀕𑀡𑁆𑀳𑀺𑀢𑀼𑀁 𑀆𑀳 ‘‘𑀏𑀓𑀘𑁆𑀘𑀤𑀼𑀕𑁆𑀕𑀢𑀺𑀧𑀝𑀺𑀲𑀦𑁆𑀥𑀻’’𑀢𑀺. 𑀅𑀳𑁂𑀢𑀼𑀓𑀘𑀼𑀢𑀺𑀬𑀸 𑀲𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀻𑀢𑀺 𑀤𑀼𑀳𑁂𑀢𑀼𑀓𑀸 𑀢𑀺𑀳𑁂𑀢𑀼𑀓𑀸 𑀘 𑀬𑁄𑀚𑁂𑀢𑀩𑁆𑀩𑀸. 𑀫𑀡𑁆𑀟𑀽𑀓𑀤𑁂𑀯𑀧𑀼𑀢𑁆𑀢𑀸𑀤𑀻𑀦𑀁 𑀯𑀺𑀬 𑀳𑀺 𑀅𑀳𑁂𑀢𑀼𑀓𑀘𑀼𑀢𑀺𑀬𑀸 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀧𑀺 𑀳𑁄𑀢𑀻𑀢𑀺.

𑀢𑀲𑁆𑀲 𑀢𑀲𑁆𑀲 𑀯𑀺𑀧𑀭𑀻𑀢𑀢𑁄 𑀘 𑀬𑀣𑀸𑀬𑁄𑀕𑀁 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 ‘‘𑀏𑀓𑀘𑁆𑀘𑀲𑀼𑀕𑀢𑀺𑀘𑀼𑀢𑀺𑀬𑀸 𑀏𑀓𑀘𑁆𑀘𑀤𑀼𑀕𑁆𑀕𑀢𑀺𑀧𑀝𑀺𑀲𑀦𑁆𑀥𑀻’’𑀢𑀺𑀆𑀤𑀻𑀲𑀼 𑀪𑁂𑀤𑀯𑀺𑀲𑁂𑀲𑁂𑀲𑀼 ‘‘𑀏𑀓𑀘𑁆𑀘𑀤𑀼𑀕𑁆𑀕𑀢𑀺𑀘𑀼𑀢𑀺𑀬𑀸 𑀏𑀓𑀘𑁆𑀘𑀲𑀼𑀕𑀢𑀺𑀧𑀝𑀺𑀲𑀦𑁆𑀥𑀻’’𑀢𑀺𑀆𑀤𑀺𑀦𑀸 𑀬𑀁 𑀬𑀁 𑀬𑀼𑀚𑁆𑀚𑀢𑀺, 𑀢𑀁 𑀢𑀁 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀬𑀼𑀚𑁆𑀚𑀫𑀸𑀦𑀫𑀢𑁆𑀢𑀸𑀧𑁂𑀓𑁆𑀔𑀦𑀯𑀲𑁂𑀦 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀯𑀸 𑀪𑀸𑀯𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀫𑀳𑀕𑁆𑀕𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸𑀬 𑀫𑀳𑀕𑁆𑀕𑀢𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸𑀢𑀺𑀆𑀤𑀻𑀲𑀼 𑀧𑀦 𑀯𑀺𑀧𑀭𑀻𑀢𑀬𑁄𑀚𑀦𑀸 𑀦 𑀓𑀸𑀢𑀩𑁆𑀩𑀸. 𑀦 𑀳𑀺 𑀫𑀳𑀕𑁆𑀕𑀢𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸𑀬 𑀘𑀼𑀢𑀺𑀬𑀸 𑀅𑀭𑀽𑀧𑀪𑀽𑀫𑀻𑀲𑀼 𑀅𑀫𑀳𑀕𑁆𑀕𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸 𑀧𑀝𑀺𑀲𑀦𑁆𑀥𑀺 𑀅𑀢𑁆𑀣𑀺. 𑀘𑀢𑀼𑀓𑁆𑀔𑀦𑁆𑀥𑀸𑀬 𑀅𑀭𑀽𑀧𑀘𑀼𑀢𑀺𑀬𑀸 𑀧𑀜𑁆𑀘𑀓𑁆𑀔𑀦𑁆𑀥𑀸 𑀓𑀸𑀫𑀸𑀯𑀘𑀭𑀧𑀝𑀺𑀲𑀦𑁆𑀥𑀻𑀢𑀺 𑀏𑀢𑀲𑁆𑀲 𑀯𑀺𑀧𑀭𑀺𑀬𑀸𑀬𑁄 𑀲𑀬𑀫𑁂𑀯 𑀬𑁄𑀚𑀺𑀢𑁄. 𑀅𑀢𑀻𑀢𑀸𑀭𑀫𑁆𑀫𑀡𑀘𑀼𑀢𑀺𑀬𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀧𑀝𑀺𑀲𑀦𑁆𑀥𑀻𑀢𑀺 𑀏𑀢𑀲𑁆𑀲 𑀘 𑀯𑀺𑀧𑀭𑀺𑀬𑀸𑀬𑁄 𑀦𑀢𑁆𑀣𑀺 𑀏𑀯𑀸𑀢𑀺. 𑀪𑁂𑀤𑀯𑀺𑀲𑁂𑀲𑁄 𑀏𑀯 𑀘 𑀏𑀯𑀁 𑀯𑀺𑀢𑁆𑀣𑀸𑀭𑁂𑀦 𑀤𑀲𑁆𑀲𑀺𑀢𑁄, 𑀅𑀪𑁂𑀤𑀯𑀺𑀲𑁂𑀲𑁄 𑀧𑀦 𑀏𑀓𑁂𑀓𑀲𑁆𑀫𑀺𑀁 𑀪𑁂𑀤𑁂 𑀢𑀢𑁆𑀣 𑀢𑀢𑁆𑀣𑁂𑀯 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀬𑁄𑀚𑀦𑀸𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑁄 ‘‘𑀧𑀜𑁆𑀘𑀓𑁆𑀔𑀦𑁆𑀥𑀸𑀬 𑀓𑀸𑀫𑀸𑀯𑀘𑀭𑀸𑀬 𑀧𑀜𑁆𑀘𑀓𑁆𑀔𑀦𑁆𑀥𑀸 𑀓𑀸𑀫𑀸𑀯𑀘𑀭𑀸…𑀧𑁂… 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸𑀬 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸’’𑀢𑀺, 𑀘𑀢𑀼𑀓𑁆𑀔𑀦𑁆𑀥𑀸𑀬 𑀧𑀦 𑀘𑀢𑀼𑀓𑁆𑀔𑀦𑁆𑀥𑀸 𑀲𑀬𑀫𑁂𑀯 𑀬𑁄𑀚𑀺𑀢𑀸. 𑀏𑀢𑁂𑀦𑁂𑀯 𑀦𑀬𑁂𑀦 𑀲𑀓𑁆𑀓𑀸 𑀜𑀸𑀢𑀼𑀦𑁆𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀸𑀤𑀻𑀲𑀼 𑀅𑀪𑁂𑀤𑀯𑀺𑀲𑁂𑀲𑁄 𑀦 𑀤𑀲𑁆𑀲𑀺𑀢𑁄𑀢𑀺. 𑀢𑀢𑁄 𑀳𑁂𑀢𑀼𑀁 𑀯𑀺𑀦𑀸𑀢𑀺 𑀢𑀢𑁆𑀣 𑀳𑁂𑀢𑀼𑀁 𑀯𑀺𑀦𑀸.

𑀅𑀗𑁆𑀕𑀧𑀘𑁆𑀘𑀗𑁆𑀕𑀲𑀦𑁆𑀥𑀻𑀦𑀁 𑀩𑀦𑁆𑀥𑀦𑀸𑀦𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀲𑀦𑁆𑀥𑀺𑀩𑀦𑁆𑀥𑀦𑀸𑀦𑀺, 𑀢𑁂𑀲𑀁 𑀙𑁂𑀤𑀓𑀸𑀦𑀁. 𑀦𑀺𑀭𑀼𑀤𑁆𑀥𑁂𑀲𑀼 𑀘𑀓𑁆𑀔𑀸𑀤𑀻𑀲𑀽𑀢𑀺 𑀅𑀢𑀺𑀫𑀦𑁆𑀤𑀪𑀸𑀯𑀽𑀧𑀕𑀫𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀜𑁆𑀘𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑀸𑀦𑀦𑁆𑀢𑀭𑀫𑁆𑀧𑀺 𑀳𑀺 𑀧𑀼𑀩𑁆𑀩𑁂 𑀘𑀼𑀢𑀺 𑀤𑀲𑁆𑀲𑀺𑀢𑀸. 𑀬𑀫𑀓𑁂 𑀘 (𑀬𑀫. 𑁧.𑀆𑀬𑀢𑀦𑀬𑀫𑀓.𑁧𑁨𑁦) 𑁋

‘‘𑀬𑀲𑁆𑀲 ¶ 𑀘𑀓𑁆𑀔𑀸𑀬𑀢𑀦𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀫𑀦𑀸𑀬𑀢𑀦𑀁 𑀦𑀺𑀭𑀼𑀚𑁆𑀛𑀢𑀻𑀢𑀺? 𑀆𑀫𑀦𑁆𑀢𑀸. 𑀬𑀲𑁆𑀲 𑀯𑀸 𑀧𑀦 𑀫𑀦𑀸𑀬𑀢𑀦𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀘𑀓𑁆𑀔𑀸𑀬𑀢𑀦𑀁 𑀦𑀺𑀭𑀼𑀚𑁆𑀛𑀢𑀻𑀢𑀺? 𑀲𑀘𑀺𑀢𑁆𑀢𑀓𑀸𑀦𑀁 𑀅𑀘𑀓𑁆𑀔𑀼𑀓𑀸𑀦𑀁 𑀘𑀯𑀦𑁆𑀢𑀸𑀦𑀁 𑀢𑁂𑀲𑀁 𑀫𑀦𑀸𑀬𑀢𑀦𑀁 𑀦𑀺𑀭𑀼𑀚𑁆𑀛𑀢𑀺, 𑀦𑁄 𑀘 𑀢𑁂𑀲𑀁 𑀘𑀓𑁆𑀔𑀸𑀬𑀢𑀦𑀁 𑀦𑀺𑀭𑀼𑀚𑁆𑀛𑀢𑀺. 𑀲𑀘𑀓𑁆𑀔𑀼𑀓𑀸𑀦𑀁 𑀘𑀯𑀦𑁆𑀢𑀸𑀦𑀁 𑀢𑁂𑀲𑀁 𑀫𑀦𑀸𑀬𑀢𑀦𑀜𑁆𑀘 𑀦𑀺𑀭𑀼𑀚𑁆𑀛𑀢𑀺, 𑀘𑀓𑁆𑀔𑀸𑀬𑀢𑀦𑀜𑁆𑀘 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑁋

𑀆𑀤𑀺𑀦𑀸 ¶ 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁 𑀘𑀼𑀢𑀺𑀘𑀺𑀢𑁆𑀢𑁂𑀦 𑀲𑀳 𑀦𑀺𑀭𑁄𑀥𑁄 𑀯𑀼𑀢𑁆𑀢𑁄𑀢𑀺. 𑀮𑀤𑁆𑀥𑁄 𑀅𑀯𑀲𑁂𑀲𑁄 𑀅𑀯𑀺𑀚𑁆𑀚𑀸𑀤𑀺𑀓𑁄 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀏𑀢𑁂𑀦𑀸𑀢𑀺 𑀮𑀤𑁆𑀥𑀸𑀯𑀲𑁂𑀲𑀧𑀘𑁆𑀘𑀬𑁄, 𑀲𑀗𑁆𑀔𑀸𑀭𑁄. 𑀅𑀯𑀺𑀚𑁆𑀚𑀸𑀧𑀝𑀺𑀘𑁆𑀙𑀸𑀤𑀺𑀢𑀸𑀤𑀻𑀦𑀯𑁂 𑀢𑀲𑁆𑀫𑀺𑀁 𑀓𑀫𑁆𑀫𑀸𑀤𑀺𑀯𑀺𑀲𑀬𑁂 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀪𑀸𑀯𑁂𑀦 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑁂 𑀢𑀡𑁆𑀳𑀸𑀬 𑀅𑀧𑁆𑀧𑀳𑀻𑀦𑀢𑁆𑀢𑀸 𑀏𑀯 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀸𑀬 𑀘 𑀲𑀦𑁆𑀢𑀢𑀺𑀬𑀸 𑀧𑀭𑀺𑀡𑀢𑀢𑁆𑀢𑀸 𑀧𑀝𑀺𑀲𑀦𑁆𑀥𑀺𑀝𑁆𑀞𑀸𑀦𑀸𑀪𑀺𑀫𑀼𑀔𑀁 𑀯𑀺𑀜𑁆𑀜𑀸𑀡𑀁 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀢𑀡𑁆𑀳𑀸 𑀦𑀸𑀫𑁂𑀢𑀻’’𑀢𑀺. 𑀲𑀳𑀚𑀸𑀢𑀲𑀗𑁆𑀔𑀸𑀭𑀸𑀢𑀺 𑀘𑀼𑀢𑀺𑀆𑀲𑀦𑁆𑀦𑀚𑀯𑀦𑀯𑀺𑀜𑁆𑀜𑀸𑀡𑀲𑀳𑀚𑀸𑀢𑀘𑁂𑀢𑀦𑀸, 𑀲𑀩𑁆𑀩𑁂𑀧𑀺 𑀯𑀸 𑀨𑀲𑁆𑀲𑀸𑀤𑀬𑁄. 𑀢𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀝𑁆𑀞𑀸𑀦𑁂 𑀓𑀫𑁆𑀫𑀸𑀤𑀺𑀯𑀺𑀲𑀬𑁂 𑀯𑀺𑀜𑁆𑀜𑀸𑀡𑀁 𑀔𑀺𑀧𑀦𑁆𑀢𑀺, 𑀔𑀺𑀧𑀦𑁆𑀢𑀸 𑀯𑀺𑀬 𑀢𑀲𑁆𑀫𑀺𑀁 𑀯𑀺𑀲𑀬𑁂 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀺𑀜𑁆𑀜𑀸𑀡𑀧𑀢𑀺𑀝𑁆𑀞𑀸𑀦𑀲𑁆𑀲 𑀳𑁂𑀢𑀼𑀪𑀸𑀯𑁂𑀦 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀢𑀦𑁆𑀢𑀺 𑀢𑀁 𑀯𑀺𑀜𑁆𑀜𑀸𑀡𑀁, 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀢𑀤𑀸𑀲𑀦𑁆𑀦𑀯𑀺𑀜𑁆𑀜𑀸𑀡𑀸𑀦𑀁 𑀲𑀦𑁆𑀢𑀢𑀺𑀯𑀲𑁂𑀦 𑀯𑀺𑀜𑁆𑀜𑀸𑀡𑀦𑁆𑀢𑀺 𑀉𑀧𑀦𑀻𑀢𑁂𑀓𑀢𑁆𑀢𑀁. 𑀢𑀡𑁆𑀳𑀸𑀬 𑀦𑀸𑀫𑀺𑀬𑀫𑀸𑀦𑀁…𑀧𑁂… 𑀧𑀯𑀢𑁆𑀢𑀢𑀻𑀢𑀺 𑀦𑀫𑀦𑀔𑀺𑀧𑀦𑀧𑀼𑀭𑀺𑀫𑀦𑀺𑀲𑁆𑀲𑀬𑀚𑀳𑀦𑀸𑀧𑀭𑀦𑀺𑀲𑁆𑀲𑀬𑀲𑁆𑀲𑀸𑀤𑀦𑀦𑀺𑀲𑁆𑀲𑀬𑀭𑀳𑀺𑀢𑀧𑀯𑀢𑁆𑀢𑀦𑀸𑀦𑀺 𑀲𑀦𑁆𑀢𑀢𑀺𑀯𑀲𑁂𑀦 𑀢𑀲𑁆𑀲𑁂𑀯𑁂𑀓𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀳𑁄𑀦𑁆𑀢𑀺, 𑀦 𑀅𑀜𑁆𑀜𑀲𑁆𑀲𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀦𑁆𑀢𑀢𑀺𑀯𑀲𑁂𑀦𑀸𑀢𑀺 𑀘 𑀯𑀤𑀦𑁆𑀢𑁄 ‘‘𑀢𑀤𑁂𑀯𑀺𑀤𑀁 𑀯𑀺𑀜𑁆𑀜𑀸𑀡𑀁 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀺 𑀅𑀦𑀜𑁆𑀜’’𑀦𑁆𑀢𑀺 (𑀫. 𑀦𑀺. 𑁧.𑁩𑁯𑁬) 𑀇𑀤𑀜𑁆𑀘 𑀫𑀺𑀘𑁆𑀙𑀸𑀕𑀸𑀳𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀲𑀢𑀺 𑀳𑀺 𑀦𑀸𑀦𑀢𑁆𑀢𑀦𑀬𑁂 𑀲𑀦𑁆𑀢𑀢𑀺𑀯𑀲𑁂𑀦 𑀏𑀓𑀢𑁆𑀢𑀦𑀬𑁄 𑀳𑁄𑀢𑀻𑀢𑀺. 𑀑𑀭𑀺𑀫𑀢𑀻𑀭𑀭𑀼𑀓𑁆𑀔𑀯𑀺𑀦𑀺𑀩𑀤𑁆𑀥𑀭𑀚𑁆𑀚𑀼 𑀯𑀺𑀬 𑀧𑀼𑀭𑀺𑀫𑀪𑀯𑀢𑁆𑀢𑀪𑀸𑀯𑀯𑀺𑀦𑀺𑀩𑀦𑁆𑀥𑀁 𑀓𑀫𑁆𑀫𑀸𑀤𑀺𑀆𑀭𑀫𑁆𑀫𑀡𑀁 𑀤𑀝𑁆𑀞𑀩𑁆𑀩𑀁, 𑀧𑀼𑀭𑀺𑀲𑁄 𑀯𑀺𑀬 𑀯𑀺𑀜𑁆𑀜𑀸𑀡𑀁, 𑀢𑀲𑁆𑀲 𑀫𑀸𑀢𑀺𑀓𑀸𑀢𑀺𑀓𑁆𑀓𑀫𑀦𑀺𑀘𑁆𑀙𑀸 𑀯𑀺𑀬 𑀢𑀡𑁆𑀳𑀸, 𑀅𑀢𑀺𑀓𑁆𑀓𑀫𑀦𑀧𑀬𑁄𑀕𑁄 𑀯𑀺𑀬 𑀔𑀺𑀧𑀦𑀓𑀲𑀗𑁆𑀔𑀸𑀭𑀸. 𑀬𑀣𑀸 𑀘 𑀲𑁄 𑀧𑀼𑀭𑀺𑀲𑁄 𑀧𑀭𑀢𑀻𑀭𑁂 𑀧𑀢𑀺𑀝𑁆𑀞𑀳𑀫𑀸𑀦𑁄 𑀧𑀭𑀢𑀻𑀭𑀭𑀼𑀓𑁆𑀔𑀯𑀺𑀦𑀺𑀩𑀤𑁆𑀥𑀁 𑀓𑀺𑀜𑁆𑀘𑀺 𑀅𑀲𑁆𑀲𑀸𑀤𑀬𑀫𑀸𑀦𑁄 𑀅𑀦𑀲𑁆𑀲𑀸𑀤𑀬𑀫𑀸𑀦𑁄 𑀯𑀸 𑀓𑁂𑀯𑀮𑀁 𑀧𑀣𑀯𑀺𑀬𑀁 𑀲𑀩𑀮𑀧𑀬𑁄𑀕𑁂𑀳𑁂𑀯 𑀧𑀢𑀺𑀝𑁆𑀞𑀸𑀢𑀺, 𑀏𑀯𑀫𑀺𑀤𑀫𑁆𑀧𑀺 𑀪𑀯𑀦𑁆𑀢𑀭𑀢𑁆𑀢𑀪𑀸𑀯𑀯𑀺𑀦𑀺𑀩𑀤𑁆𑀥𑀁 𑀳𑀤𑀬𑀯𑀢𑁆𑀣𑀼𑀦𑀺𑀲𑁆𑀲𑀬𑀁 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀅𑀲𑁆𑀲𑀸𑀤𑀬𑀫𑀸𑀦𑀁 𑀘𑀢𑀼𑀯𑁄𑀓𑀸𑀭𑀪𑀯𑁂 𑀅𑀦𑀲𑁆𑀲𑀸𑀤𑀬𑀫𑀸𑀦𑀁 𑀯𑀸 𑀓𑁂𑀯𑀮𑀁 𑀆𑀭𑀫𑁆𑀫𑀡𑀲𑀫𑁆𑀧𑀬𑀼𑀢𑁆𑀢𑀓𑀫𑁆𑀫𑁂𑀳𑁂𑀯 𑀧𑀯𑀢𑁆𑀢𑀢𑀺. 𑀢𑀢𑁆𑀣 𑀅𑀲𑁆𑀲𑀸𑀤𑀬𑀫𑀸𑀦𑀦𑁆𑀢𑀺 𑀧𑀸𑀧𑀼𑀡𑀦𑁆𑀢𑀁, 𑀧𑀝𑀺𑀮𑀪𑀫𑀸𑀦𑀦𑁆𑀢𑀺 𑀅𑀢𑁆𑀣𑁄.

𑀪𑀯𑀦𑁆𑀢𑀭𑀸𑀤𑀺𑀧𑀝𑀺𑀲𑀦𑁆𑀥𑀸𑀦𑀢𑁄𑀢𑀺 ¶ 𑀪𑀯𑀦𑁆𑀢𑀭𑀲𑁆𑀲 𑀆𑀤𑀺𑀲𑀫𑁆𑀩𑀦𑁆𑀥𑀦𑀢𑁄, 𑀪𑀯𑀦𑁆𑀢𑀭𑀸𑀤𑀬𑁄 𑀯𑀸 𑀪𑀯𑀬𑁄𑀦𑀺𑀕𑀢𑀺𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑀦𑁆𑀢𑀭𑀸, 𑀢𑁂𑀲𑀁 𑀧𑀝𑀺𑀲𑀦𑁆𑀥𑀸𑀦𑀢𑁄𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀚𑀦𑀓𑀁 𑀓𑀫𑁆𑀫𑀁. 𑀲𑀗𑁆𑀔𑀸𑀭𑀸𑀢𑀺 𑀘𑀼𑀢𑀺𑀆𑀲𑀦𑁆𑀦𑀚𑀯𑀦𑀯𑀺𑀜𑁆𑀜𑀸𑀡𑀲𑀳𑀕𑀢𑀸 𑀔𑀺𑀧𑀦𑀓𑀲𑀗𑁆𑀔𑀸𑀭𑀸.

𑀲𑀤𑁆𑀤𑀸𑀤𑀺𑀳𑁂𑀢𑀼𑀓𑀸𑀢𑀺 𑀏𑀢𑁆𑀣 𑀧𑀝𑀺𑀖𑁄𑀲𑁄 𑀲𑀤𑁆𑀤𑀳𑁂𑀢𑀼𑀓𑁄, 𑀧𑀤𑀻𑀧𑁄 𑀧𑀤𑀻𑀧𑀦𑁆𑀢𑀭𑀸𑀤𑀺𑀳𑁂𑀢𑀼𑀓𑁄, 𑀫𑀼𑀤𑁆𑀤𑀸 𑀮𑀜𑁆𑀙𑀦𑀳𑁂𑀢𑀼𑀓𑀸, 𑀙𑀸𑀬𑀸 𑀆𑀤𑀸𑀲𑀸𑀤𑀺𑀕𑀢𑀫𑀼𑀔𑀸𑀤𑀺𑀳𑁂𑀢𑀼𑀓𑀸. 𑀅𑀜𑁆𑀜𑀢𑁆𑀭 𑀅𑀕𑀦𑁆𑀢𑁆𑀯𑀸 𑀳𑁄𑀦𑁆𑀢𑀻𑀢𑀺 𑀲𑀤𑁆𑀤𑀸𑀤𑀺𑀧𑀘𑁆𑀘𑀬𑀤𑁂𑀲𑀁 ¶ 𑀅𑀕𑀦𑁆𑀢𑁆𑀯𑀸 𑀲𑀤𑁆𑀤𑀸𑀤𑀺𑀳𑁂𑀢𑀼𑀓𑀸 𑀳𑁄𑀦𑁆𑀢𑀺 𑀢𑀢𑁄 𑀧𑀼𑀩𑁆𑀩𑁂 𑀅𑀪𑀸𑀯𑀸, 𑀏𑀯𑀫𑀺𑀤𑀫𑁆𑀧𑀺 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁 𑀦 𑀳𑁂𑀢𑀼𑀤𑁂𑀲𑀁 𑀕𑀦𑁆𑀢𑁆𑀯𑀸 𑀢𑀁𑀳𑁂𑀢𑀼𑀓𑀁 𑀳𑁄𑀢𑀺 𑀢𑀢𑁄 𑀧𑀼𑀩𑁆𑀩𑁂 𑀅𑀪𑀸𑀯𑀸, 𑀢𑀲𑁆𑀫𑀸 𑀦 𑀇𑀤𑀁 𑀳𑁂𑀢𑀼𑀤𑁂𑀲𑀢𑁄 𑀧𑀼𑀭𑀺𑀫𑀪𑀯𑀢𑁄 𑀆𑀕𑀢𑀁 𑀧𑀝𑀺𑀖𑁄𑀲𑀸𑀤𑀬𑁄 𑀯𑀺𑀬 𑀲𑀤𑁆𑀤𑀸𑀤𑀺𑀤𑁂𑀲𑀢𑁄, 𑀦𑀸𑀧𑀺 𑀢𑀢𑁆𑀣 𑀳𑁂𑀢𑀼𑀦𑀸 𑀯𑀺𑀦𑀸 𑀉𑀧𑁆𑀧𑀦𑁆𑀦𑀁 𑀲𑀤𑁆𑀤𑀸𑀤𑀻𑀳𑀺 𑀯𑀺𑀦𑀸 𑀧𑀝𑀺𑀖𑁄𑀲𑀸𑀤𑀬𑁄 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀅𑀜𑁆𑀜𑀢𑁆𑀭 𑀅𑀕𑀦𑁆𑀢𑁆𑀯𑀸 𑀳𑁄𑀦𑁆𑀢𑀻𑀢𑀺 𑀧𑀼𑀩𑁆𑀩𑁂 𑀧𑀘𑁆𑀘𑀬𑀤𑁂𑀲𑁂 𑀲𑀦𑁆𑀦𑀺𑀳𑀺𑀢𑀸 𑀳𑀼𑀢𑁆𑀯𑀸 𑀢𑀢𑁄 𑀅𑀜𑁆𑀜𑀢𑁆𑀭 𑀕𑀦𑁆𑀢𑁆𑀯𑀸 𑀢𑀧𑁆𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺 𑀉𑀧𑁆𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀅𑀪𑀸𑀯𑀸, 𑀦𑀸𑀧𑀺 𑀲𑀤𑁆𑀤𑀸𑀤𑀺𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺, 𑀏𑀯𑀫𑀺𑀤𑀫𑁆𑀧𑀻𑀢𑀺 𑀯𑀼𑀢𑁆𑀢𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀏𑀲 𑀦𑀬𑁄𑀢𑀺 𑀩𑀻𑀚𑀗𑁆𑀓𑀼𑀭𑀸𑀤𑀻𑀲𑀼 𑀲𑀩𑁆𑀩𑀳𑁂𑀢𑀼𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺. 𑀇𑀥𑀸𑀧𑀺 𑀳𑀺 𑀳𑁂𑀢𑀼𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀯𑀺𑀜𑁆𑀜𑀸𑀡𑀸𑀦𑀁 𑀏𑀓𑀦𑁆𑀢𑀫𑁂𑀓𑀢𑁆𑀢𑁂 𑀲𑀢𑀺 𑀦 𑀫𑀦𑀼𑀲𑁆𑀲𑀕𑀢𑀺𑀓𑁄 𑀤𑁂𑀯𑀕𑀢𑀺𑀪𑀽𑀢𑁄 𑀲𑀺𑀬𑀸, 𑀏𑀓𑀦𑁆𑀢𑀦𑀸𑀦𑀢𑁆𑀢𑁂 𑀦 𑀓𑀫𑁆𑀫𑀯𑀢𑁄 𑀨𑀮𑀁 𑀲𑀺𑀬𑀸. 𑀢𑀢𑁄 ‘‘𑀭𑀢𑁆𑀢𑀲𑁆𑀲 𑀩𑀻𑀚𑀁, 𑀭𑀢𑁆𑀢𑀲𑁆𑀲 𑀨𑀮’’𑀦𑁆𑀢𑀺𑀆𑀤𑀺𑀓𑀲𑁆𑀲 𑀯𑀺𑀬 ‘‘𑀪𑀽𑀢𑀧𑀼𑀩𑁆𑀩𑀸𑀳𑀁, 𑀪𑀦𑁆𑀢𑁂, 𑀭𑁄𑀳𑀺𑀢𑀲𑁆𑀲𑁄 𑀦𑀸𑀫 𑀇𑀲𑀻’’𑀢𑀺𑀆𑀤𑀺𑀓𑀲𑁆𑀲 (𑀲𑀁. 𑀦𑀺. 𑁧.𑁧𑁦𑁭) 𑀯𑁄𑀳𑀸𑀭𑀲𑁆𑀲 𑀮𑁄𑀧𑁄 𑀲𑀺𑀬𑀸, 𑀢𑀲𑁆𑀫𑀸 𑀏𑀢𑁆𑀣 𑀲𑀦𑁆𑀢𑀸𑀦𑀩𑀦𑁆𑀥𑁂 𑀲𑀢𑀺 𑀳𑁂𑀢𑀼𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀦 𑀏𑀓𑀦𑁆𑀢𑀫𑁂𑀯 𑀏𑀓𑀢𑀸 𑀯𑀸 𑀦𑀸𑀦𑀢𑀸 𑀯𑀸 𑀉𑀧𑀕𑀦𑁆𑀢𑀩𑁆𑀩𑀸. 𑀏𑀢𑁆𑀣 𑀘 𑀏𑀓𑀦𑁆𑀢𑀏𑀓𑀢𑀸𑀧𑀝𑀺𑀲𑁂𑀥𑁂𑀦 ‘‘𑀲𑀬𑀁𑀓𑀢𑀁 𑀲𑀼𑀔𑀁 𑀤𑀼𑀓𑁆𑀔’’𑀦𑁆𑀢𑀺 𑀇𑀫𑀁 𑀤𑀺𑀝𑁆𑀞𑀺𑀁 𑀦𑀺𑀯𑀸𑀭𑁂𑀢𑀺, 𑀏𑀓𑀦𑁆𑀢𑀦𑀸𑀦𑀢𑀸𑀧𑀝𑀺𑀲𑁂𑀥𑁂𑀦 ‘‘𑀧𑀭𑀁𑀓𑀢𑀁 𑀲𑀼𑀔𑀁 𑀤𑀼𑀓𑁆𑀔’’𑀦𑁆𑀢𑀺, 𑀳𑁂𑀢𑀼𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀪𑀸𑀯𑀯𑀘𑀦𑁂𑀦 ‘‘𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦’’𑀦𑁆𑀢𑀺. 𑀏𑀢𑁆𑀣𑀸𑀢𑀺 𑀏𑀓𑀲𑀦𑁆𑀢𑀸𑀦𑁂.

𑀘𑀢𑀼𑀫𑀥𑀼𑀭𑀅𑀮𑀢𑁆𑀢𑀓𑀭𑀲𑀸𑀤𑀺𑀪𑀸𑀯𑀦𑀸 𑀅𑀫𑁆𑀩𑀫𑀸𑀢𑀼𑀮𑀼𑀗𑁆𑀕𑀸𑀤𑀺𑀩𑀻𑀚𑀸𑀦𑀁 𑀅𑀪𑀺𑀲𑀗𑁆𑀔𑀸𑀭𑁄. 𑀏𑀢𑁆𑀣 𑀩𑀻𑀚𑀁 𑀯𑀺𑀬 𑀓𑀫𑁆𑀫𑀯𑀸 𑀲𑀢𑁆𑀢𑁄, 𑀅𑀪𑀺𑀲𑀗𑁆𑀔𑀸𑀭𑁄 𑀯𑀺𑀬 𑀓𑀫𑁆𑀫𑀁, 𑀩𑀻𑀚𑀲𑁆𑀲 𑀅𑀗𑁆𑀓𑀼𑀭𑀸𑀤𑀺𑀧𑁆𑀧𑀩𑀦𑁆𑀥𑁄 𑀯𑀺𑀬 𑀲𑀢𑁆𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀸𑀤𑀺𑀧𑁆𑀧𑀩𑀦𑁆𑀥𑁄, 𑀢𑀢𑁆𑀣𑀼𑀧𑁆𑀧𑀦𑁆𑀦𑀲𑁆𑀲 𑀫𑀥𑀼𑀭𑀲𑁆𑀲 𑀭𑀢𑁆𑀢𑀓𑁂𑀲𑀭𑀲𑁆𑀲 𑀯𑀸 𑀨𑀮𑀲𑁆𑀲 𑀯𑀸 𑀢𑀲𑁆𑀲𑁂𑀯 𑀩𑀻𑀚𑀲𑁆𑀲, 𑀢𑀢𑁄 𑀏𑀯 𑀘 𑀅𑀪𑀺𑀲𑀗𑁆𑀔𑀸𑀭𑀢𑁄 𑀪𑀸𑀯𑁄 𑀯𑀺𑀬 𑀓𑀫𑁆𑀫𑀓𑀸𑀭𑀓𑀲𑁆𑀲𑁂𑀯 𑀲𑀢𑁆𑀢𑀲𑁆𑀲, 𑀢𑀁𑀓𑀫𑁆𑀫𑀢𑁄 𑀏𑀯 ¶ 𑀘 𑀨𑀮𑀲𑁆𑀲 𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀩𑀸𑀮𑀲𑀭𑀻𑀭𑁂 𑀓𑀢𑀁 𑀯𑀺𑀚𑁆𑀚𑀸𑀧𑀭𑀺𑀬𑀸𑀧𑀼𑀡𑀦𑀁 𑀲𑀺𑀧𑁆𑀧𑀲𑀺𑀓𑁆𑀔𑀦𑀁 𑀑𑀲𑀥𑀧𑁆𑀧𑀬𑁄𑀕𑁄 𑀘 𑀦 𑀯𑀼𑀟𑁆𑀠𑀲𑀭𑀻𑀭𑀁 𑀕𑀘𑁆𑀙𑀦𑁆𑀢𑀺. 𑀅𑀣 𑀘 𑀢𑀁𑀦𑀺𑀫𑀺𑀢𑁆𑀢𑀁 𑀯𑀺𑀚𑁆𑀚𑀸𑀧𑀸𑀝𑀯𑀁 𑀲𑀺𑀧𑁆𑀧𑀚𑀸𑀦𑀦𑀁 𑀅𑀦𑀸𑀫𑀬𑀢𑀸 𑀘 𑀯𑀼𑀟𑁆𑀠𑀲𑀭𑀻𑀭𑁂 𑀳𑁄𑀢𑀺, 𑀦 𑀘 𑀢𑀁 𑀅𑀜𑁆𑀜𑀲𑁆𑀲 𑀳𑁄𑀢𑀺 𑀢𑀁𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑁂 𑀏𑀯 𑀯𑀼𑀟𑁆𑀠𑀲𑀭𑀻𑀭𑁂 𑀉𑀧𑁆𑀧𑀚𑁆𑀚𑀦𑀢𑁄, 𑀦 𑀘 𑀬𑀣𑀸𑀧𑀬𑀼𑀢𑁆𑀢𑁂𑀦 𑀯𑀺𑀚𑁆𑀚𑀸𑀧𑀭𑀺𑀬𑀸𑀧𑀼𑀡𑀦𑀸𑀤𑀺𑀦𑀸 𑀯𑀺𑀦𑀸 𑀅𑀜𑁆𑀜𑀢𑁄 𑀳𑁄𑀢𑀺 𑀢𑀤𑀪𑀸𑀯𑁂 𑀅𑀪𑀸𑀯𑀢𑁄. 𑀏𑀯𑀫𑀺𑀥𑀸𑀧𑀺 𑀲𑀦𑁆𑀢𑀸𑀦𑁂 𑀬𑀁 𑀨𑀮𑀁, 𑀏𑀢𑀁 𑀦𑀸𑀜𑁆𑀜𑀲𑁆𑀲, 𑀦 𑀘 𑀅𑀜𑁆𑀜𑀢𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀦 𑀅𑀜𑁆𑀜𑀢𑁄𑀢𑀺 𑀏𑀢𑁂𑀦 𑀘 𑀲𑀗𑁆𑀔𑀸𑀭𑀸𑀪𑀸𑀯𑁂 𑀨𑀮𑀸𑀪𑀸𑀯𑀫𑁂𑀯 𑀤𑀲𑁆𑀲𑁂𑀢𑀺, 𑀦𑀸𑀜𑁆𑀜𑀧𑀘𑁆𑀘𑀬𑀦𑀺𑀯𑀸𑀭𑀡𑀁 𑀓𑀭𑁄𑀢𑀺.

𑀬𑀫𑁆𑀧𑀺 𑀯𑀼𑀢𑁆𑀢𑀁, 𑀢𑀢𑁆𑀣 𑀯𑀤𑀸𑀫𑀸𑀢𑀺 𑀯𑀘𑀦𑀲𑁂𑀲𑁄. 𑀢𑀢𑁆𑀣 𑀯𑀸 𑀉𑀧𑀪𑀼𑀜𑁆𑀚𑀓𑁂 𑀅𑀲𑀢𑀺 𑀲𑀺𑀤𑁆𑀥𑀸 𑀪𑀼𑀜𑁆𑀚𑀓𑀲𑀫𑁆𑀫𑀼𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀨𑀮𑀢𑀻𑀢𑀺 𑀲𑀫𑁆𑀫𑀼𑀢𑀺 𑀨𑀮𑀢𑀺𑀲𑀫𑁆𑀫𑀼𑀢𑀺.

𑀏𑀯𑀁 ¶ 𑀲𑀦𑁆𑀢𑁂𑀧𑀻𑀢𑀺 𑀅𑀲𑀗𑁆𑀓𑀦𑁆𑀢𑀺𑀧𑀸𑀢𑀼𑀪𑀸𑀯𑁂, 𑀢𑀢𑁆𑀣 𑀘 𑀬𑀣𑀸𑀯𑀼𑀢𑁆𑀢𑀤𑁄𑀲𑀧𑀭𑀺𑀳𑀭𑀡𑁂 𑀲𑀢𑀺 𑀲𑀺𑀤𑁆𑀥𑁂𑀢𑀺 𑀅𑀢𑁆𑀣𑁄. 𑀧𑀯𑀢𑁆𑀢𑀺𑀢𑁄 𑀧𑀼𑀩𑁆𑀩𑁂𑀢𑀺 𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑀢𑁄 𑀧𑀼𑀩𑁆𑀩𑁂. 𑀧𑀘𑁆𑀙𑀸 𑀘𑀸𑀢𑀺 𑀯𑀺𑀧𑀘𑁆𑀘𑀦𑀧𑀯𑀢𑁆𑀢𑀺𑀢𑁄 𑀧𑀘𑁆𑀙𑀸 𑀘. 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀓𑀢𑀢𑁆𑀢𑀸 𑀘𑁂 𑀧𑀘𑁆𑀘𑀬𑀸, 𑀯𑀺𑀧𑀓𑁆𑀓𑀯𑀺𑀧𑀸𑀓𑀸𑀦𑀫𑁆𑀧𑀺 𑀓𑀢𑀢𑁆𑀢𑀁 𑀲𑀫𑀸𑀦𑀦𑁆𑀢𑀺 𑀢𑁂𑀲𑀫𑁆𑀧𑀺 𑀨𑀮𑀸𑀯𑀳𑀢𑀸 𑀲𑀺𑀬𑀸𑀢𑀺 𑀆𑀲𑀗𑁆𑀓𑀸𑀦𑀺𑀯𑀢𑁆𑀢𑀦𑀢𑁆𑀣𑀁 𑀆𑀳 ‘‘𑀦 𑀘 𑀦𑀺𑀘𑁆𑀘𑀁 𑀨𑀮𑀸𑀯𑀳𑀸’’𑀢𑀺. 𑀦 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀯𑀸 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀯𑀸𑀢𑀺 𑀏𑀢𑁂𑀦 𑀯𑀺𑀚𑁆𑀚𑀫𑀸𑀦𑀢𑁆𑀢𑀁 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀜𑁆𑀘 𑀦𑀺𑀲𑁆𑀲𑀸𑀬 𑀯𑀼𑀢𑁆𑀢𑀤𑁄𑀲𑁂𑀯 𑀧𑀭𑀺𑀳𑀭𑀢𑀺.

𑀢𑀲𑁆𑀲𑀸 𑀧𑀸𑀝𑀺𑀪𑁄𑀕𑀓𑀺𑀭𑀺𑀬𑀸𑀬, 𑀪𑀡𑁆𑀟𑀓𑀻𑀡𑀦𑀓𑀺𑀭𑀺𑀬𑀸𑀬, 𑀇𑀡𑀕𑀳𑀡𑀸𑀤𑀺𑀓𑀺𑀭𑀺𑀬𑀸𑀬 𑀯𑀸 𑀓𑀭𑀡𑀫𑀢𑁆𑀢𑀁 𑀢𑀁𑀓𑀺𑀭𑀺𑀬𑀸𑀓𑀭𑀡𑀫𑀢𑁆𑀢𑀁. 𑀢𑀤𑁂𑀯 𑀢𑀤𑀢𑁆𑀣𑀦𑀺𑀬𑁆𑀬𑀸𑀢𑀦𑁂 𑀧𑀝𑀺𑀪𑀡𑁆𑀟𑀤𑀸𑀦𑁂 𑀇𑀡𑀤𑀸𑀦𑁂 𑀘 𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀨𑀮𑀺𑀢𑀦𑀺𑀬𑁆𑀬𑀸𑀢𑀦𑀸𑀤𑀺𑀨𑀮𑀦𑁆𑀢𑀺 𑀅𑀢𑁆𑀣𑁄.

𑀅𑀯𑀺𑀲𑁂𑀲𑁂𑀦𑀸𑀢𑀺 ‘‘𑀢𑀺𑀳𑁂𑀢𑀼𑀓𑁄 𑀢𑀺𑀳𑁂𑀢𑀼𑀓𑀲𑁆𑀲𑀸’’𑀢𑀺𑀆𑀤𑀺𑀓𑀁 𑀪𑁂𑀤𑀁 𑀅𑀓𑀢𑁆𑀯𑀸𑀯 𑀲𑀸𑀫𑀜𑁆𑀜𑀢𑁄, 𑀧𑀺𑀡𑁆𑀟𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀢𑁆𑀣 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀩𑀮𑀯𑀓𑀫𑁆𑀫𑀲𑁆𑀲 𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑁄. ‘‘𑀤𑀼𑀩𑁆𑀩𑀮𑀜𑁆𑀳𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀦 𑀳𑁄𑀢𑀻’’𑀢𑀺 𑀯𑀓𑁆𑀔𑀫𑀸𑀦𑀫𑁂𑀯𑁂𑀢𑀁 𑀧𑀝𑁆𑀞𑀸𑀦𑀯𑀡𑁆𑀡𑀦𑀸𑀬𑀦𑁆𑀢𑀺. 𑀅𑀯𑀺𑀲𑁂𑀲𑁂𑀦𑀸𑀢𑀺 𑀲𑀩𑁆𑀩𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀁 𑀲𑀳 𑀲𑀗𑁆𑀕𑀡𑁆𑀳𑀸𑀢𑀺. 𑀤𑁆𑀯𑀸𑀤𑀲𑀸𑀓𑀼𑀲𑀮𑀘𑁂𑀢𑀦𑀸𑀪𑁂𑀤𑁄𑀢𑀺 𑀏𑀢𑁆𑀣 𑀉𑀤𑁆𑀥𑀘𑁆𑀘𑀲𑀳𑀕𑀢𑀸 𑀓𑀲𑁆𑀫𑀸 𑀕𑀳𑀺𑀢𑀸𑀢𑀺 𑀯𑀺𑀘𑀸𑀭𑁂𑀢𑀩𑁆𑀩𑀫𑁂𑀢𑀁. 𑀏𑀓𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀢𑀣𑁂𑀯 𑀧𑀘𑁆𑀘𑀬𑁄 𑀧𑀝𑀺𑀲𑀦𑁆𑀥𑀺𑀬𑀁, 𑀦𑁄 𑀧𑀯𑀢𑁆𑀢𑁂𑀢𑀺 𑀏𑀓𑀲𑁆𑀲𑁂𑀯 𑀧𑀘𑁆𑀘𑀬𑀪𑀸𑀯𑀦𑀺𑀬𑀫𑁄 𑀧𑀝𑀺𑀲𑀦𑁆𑀥𑀺𑀬𑀁, 𑀦𑁄 𑀧𑀯𑀢𑁆𑀢𑁂. 𑀧𑀯𑀢𑁆𑀢𑁂 𑀳𑀺 𑀲𑀢𑁆𑀢𑀦𑁆𑀦𑀫𑁆𑀧𑀺 𑀧𑀘𑁆𑀘𑀬𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀢𑀣𑀸 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁂𑀧𑀺 𑀅𑀦𑀺𑀝𑁆𑀞𑀸 𑀭𑀽𑀧𑀸𑀤𑀬𑁄 𑀦𑀢𑁆𑀣𑀻’’𑀢𑀺 ¶ 𑀯𑀼𑀢𑁆𑀢𑀁, 𑀤𑁂𑀯𑀸𑀦𑀁 𑀧𑀦 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀧𑀸𑀢𑀼𑀪𑀸𑀯𑀓𑀸𑀮𑁂 𑀫𑀺𑀮𑀸𑀢𑀫𑀸𑀮𑀸𑀤𑀻𑀦𑀁 𑀅𑀦𑀺𑀝𑁆𑀞𑀢𑀸 𑀓𑀣𑀁 𑀦 𑀲𑀺𑀬𑀸.

𑀲𑁆𑀯𑁂𑀯 𑀤𑁆𑀯𑀻𑀲𑀼 𑀪𑀯𑁂𑀲𑀽𑀢𑀺 𑀏𑀢𑁆𑀣 𑀏𑀓𑀽𑀦𑀢𑀺𑀁𑀲𑀘𑁂𑀢𑀦𑀸𑀪𑁂𑀤𑀫𑁆𑀧𑀺 𑀘𑀺𑀢𑁆𑀢𑀲𑀗𑁆𑀔𑀸𑀭𑀁 𑀘𑀺𑀢𑁆𑀢𑀲𑀗𑁆𑀔𑀸𑀭𑀪𑀸𑀯𑁂𑀦 𑀏𑀓𑀢𑁆𑀢𑀁 𑀉𑀧𑀦𑁂𑀢𑁆𑀯𑀸 ‘‘𑀲𑁆𑀯𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑀤𑁂𑀓𑀤𑁂𑀲𑁄 𑀧𑀦 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀲𑀗𑁆𑀔𑀸𑀭𑁄𑀯 𑀢𑁂𑀭𑀲𑀦𑁆𑀦𑀁 𑀦𑀯𑀦𑁆𑀦𑀜𑁆𑀘 𑀧𑀘𑁆𑀘𑀬𑁄 𑀤𑀝𑁆𑀞𑀩𑁆𑀩𑁄. 𑀏𑀓𑀤𑁂𑀲𑀧𑀘𑁆𑀘𑀬𑀪𑀸𑀯𑁂𑀦 𑀳𑀺 𑀲𑀫𑀼𑀤𑀸𑀬𑁄 𑀯𑀼𑀢𑁆𑀢𑁄𑀢𑀺.

𑀬𑀢𑁆𑀣 𑀘 𑀯𑀺𑀢𑁆𑀣𑀸𑀭𑀧𑁆𑀧𑀓𑀸𑀲𑀦𑀁 𑀓𑀢𑀁, 𑀢𑀢𑁄 𑀪𑀯𑀢𑁄 𑀧𑀝𑁆𑀞𑀸𑀬 𑀫𑀼𑀔𑀫𑀢𑁆𑀢𑀧𑁆𑀧𑀓𑀸𑀲𑀦𑀁 𑀓𑀸𑀢𑀼𑀓𑀸𑀫𑁄 𑀆𑀳 ‘‘𑀆𑀤𑀺𑀢𑁄 𑀧𑀝𑁆𑀞𑀸𑀬𑀸’’𑀢𑀺. 𑀢𑁂𑀦 ‘‘𑀤𑁆𑀯𑀻𑀲𑀼 𑀪𑀯𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀯𑀲𑁂𑀦𑀸𑀢𑀺 𑀏𑀢𑁂𑀦 𑀏𑀓𑀢𑁆𑀢𑀓𑀸𑀬𑀏𑀓𑀢𑁆𑀢𑀲𑀜𑁆𑀜𑀻𑀲𑀸𑀫𑀜𑁆𑀜𑁂𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀪𑀽𑀫𑀺 𑀘 𑀅𑀲𑀜𑁆𑀜𑀸𑀭𑀼𑀧𑁆𑀧𑀯𑀚𑁆𑀚𑀸 𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸𑀲𑀫𑁆𑀪𑀯𑀦𑁆𑀢𑀺 𑀏𑀓𑀯𑀻𑀲𑀢𑀺𑀬𑀸 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑁂𑀲𑀼 𑀘𑀼𑀤𑁆𑀤𑀲𑀦𑁆𑀦𑀁 𑀧𑀝𑀺𑀲𑀦𑁆𑀥𑀺𑀬𑀁 𑀧𑀯𑀢𑁆𑀢𑁂 𑀘, 𑀲𑀢𑁆𑀢𑀦𑁆𑀦𑀁 𑀧𑀯𑀢𑁆𑀢𑁂 𑀏𑀯. 𑀅𑀬𑀁 𑀬𑀣𑀸𑀲𑀫𑁆𑀪𑀯𑁄.

𑀘𑀢𑀼𑀦𑁆𑀦𑀁 ¶ 𑀯𑀺𑀜𑁆𑀜𑀸𑀡𑀸𑀦𑀦𑁆𑀢𑀺 𑀪𑀯𑀸𑀤𑀬𑁄 𑀅𑀧𑁂𑀓𑁆𑀔𑀺𑀢𑁆𑀯𑀸 𑀯𑀼𑀢𑁆𑀢𑀁, 𑀘𑀢𑀽𑀲𑀼 𑀅𑀦𑁆𑀢𑁄𑀕𑀥𑀸𑀦𑀁 𑀧𑀦 𑀢𑀺𑀡𑁆𑀡𑀁 𑀯𑀺𑀜𑁆𑀜𑀸𑀡𑀸𑀦𑀁 𑀢𑀻𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼 𑀘 𑀧𑀘𑁆𑀘𑀬𑀪𑀸𑀯𑁄 𑀬𑁄𑀚𑁂𑀢𑀩𑁆𑀩𑁄, 𑀅𑀯𑀺𑀜𑁆𑀜𑀸𑀡𑀓𑁂 𑀲𑀢𑁆𑀢𑀸𑀯𑀸𑀲𑁂 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑁂 𑀅𑀯𑀺𑀚𑁆𑀚𑀫𑀸𑀦𑁂𑀧𑀺 𑀢𑀲𑁆𑀲 𑀲𑀗𑁆𑀔𑀸𑀭𑀳𑁂𑀢𑀼𑀓𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑀲𑁆𑀫𑀺𑀜𑁆𑀘 𑀫𑀼𑀔𑀫𑀢𑁆𑀢𑀧𑁆𑀧𑀓𑀸𑀲𑀦𑁂 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀻𑀦𑀁 𑀤𑀼𑀕𑁆𑀕𑀢𑀺𑀆𑀤𑀻𑀲𑀼 𑀧𑀯𑀢𑁆𑀢𑀺𑀬𑀁 𑀓𑀼𑀲𑀮𑀯𑀺𑀧𑀸𑀓𑀸𑀤𑀺𑀯𑀺𑀜𑁆𑀜𑀸𑀡𑀸𑀦𑀁 𑀧𑀘𑁆𑀘𑀬𑀪𑀸𑀯𑁄 𑀪𑀯𑁂𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀜𑁆𑀜𑀸𑀬𑀢𑀻𑀢𑀺 𑀦 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀯𑀺𑀜𑁆𑀜𑀸𑀡𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀸𑀫𑀭𑀽𑀧𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁨𑁮. 𑀲𑀼𑀢𑁆𑀢𑀦𑁆𑀢𑀸𑀪𑀺𑀥𑀫𑁆𑀫𑁂𑀲𑀼 𑀦𑀸𑀫𑀭𑀽𑀧𑀤𑁂𑀲𑀦𑀸𑀯𑀺𑀲𑁂𑀲𑁄 𑀤𑁂𑀲𑀦𑀸𑀪𑁂𑀤𑁄. 𑀢𑀬𑁄 𑀔𑀦𑁆𑀥𑀸𑀢𑀺 𑀏𑀢𑀁 𑀬𑀤𑀺𑀧𑀺 𑀧𑀸𑀴𑀺𑀬𑀁 𑀦𑀢𑁆𑀣𑀺, 𑀅𑀢𑁆𑀣𑀢𑁄 𑀧𑀦 𑀯𑀼𑀢𑁆𑀢𑀫𑁂𑀯 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀡𑁆𑀟𑀚𑀸𑀦𑀜𑁆𑀘 𑀅𑀪𑀸𑀯𑀓𑀸𑀦𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀲𑀦𑁆𑀢𑀢𑀺𑀲𑀻𑀲𑀸𑀦𑀻𑀢𑀺 𑀓𑀮𑀸𑀧𑀲𑀦𑁆𑀢𑀸𑀦𑀫𑀽𑀮𑀸𑀦𑀺. 𑀬𑀤𑀺𑀧𑀺 𑀯𑀺𑀓𑀸𑀭𑀭𑀽𑀧𑀸𑀦𑀺 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀦 𑀲𑀦𑁆𑀢𑀺, 𑀮𑀓𑁆𑀔𑀡𑀧𑀭𑀺𑀘𑁆𑀙𑁂𑀤𑀭𑀽𑀧𑀸𑀦𑀺 ¶ 𑀧𑀦 𑀲𑀦𑁆𑀢𑀻𑀢𑀺 𑀢𑀸𑀦𑀺 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀸𑀦𑀺 𑀧𑀭𑀫𑀢𑁆𑀣𑀢𑁄 𑀯𑀺𑀯𑀚𑁆𑀚𑁂𑀦𑁆𑀢𑁄 𑀆𑀳 ‘‘𑀭𑀽𑀧𑀭𑀽𑀧𑀢𑁄’’𑀢𑀺.

𑀓𑀸𑀫𑀪𑀯𑁂 𑀧𑀦 𑀬𑀲𑁆𑀫𑀸 𑀲𑁂𑀲𑀑𑀧𑀧𑀸𑀢𑀺𑀓𑀸𑀦𑀦𑁆𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀓𑀸𑀫𑀪𑀯𑁂 ‘‘𑀑𑀧𑀧𑀸𑀢𑀺𑀓𑀸’’𑀢𑀺 𑀯𑀼𑀢𑁆𑀢𑀸 𑀦 𑀲𑀦𑁆𑀢𑀺, 𑀬𑁂𑀦 𑀲𑁂𑀲𑀕𑁆𑀕𑀳𑀡𑀁 𑀲𑀸𑀢𑁆𑀣𑀓𑀁 𑀪𑀯𑁂𑀬𑁆𑀬, 𑀅𑀡𑁆𑀟𑀚𑀕𑀩𑁆𑀪𑀲𑁂𑀬𑁆𑀬𑀓𑁂𑀳𑀺 𑀧𑀦 𑀑𑀧𑀧𑀸𑀢𑀺𑀓𑀲𑀁𑀲𑁂𑀤𑀚𑀸 𑀲𑁂𑀲𑀸 𑀳𑁄𑀦𑁆𑀢𑀻𑀢𑀺 𑀲𑁂𑀲𑀕𑁆𑀕𑀳𑀡𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀤𑀺𑀓𑁂𑀳𑀺 𑀑𑀧𑀧𑀸𑀢𑀺𑀓𑁂𑀳𑀺 𑀯𑀼𑀢𑁆𑀢𑁂𑀳𑀺 𑀲𑁂𑀲𑁂 𑀲𑀦𑁆𑀥𑀸𑀬 ‘‘𑀲𑁂𑀲𑀑𑀧𑀧𑀸𑀢𑀺𑀓𑀸𑀦’’𑀦𑁆𑀢𑀺 𑀆𑀳. 𑀢𑁂 𑀧𑀦 𑀅𑀭𑀽𑀧𑀺𑀦𑁄𑀧𑀺 𑀲𑀦𑁆𑀢𑀻𑀢𑀺 ‘‘𑀓𑀸𑀫𑀪𑀯𑁂’’𑀢𑀺 𑀯𑀼𑀢𑁆𑀢𑀁, 𑀅𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀸𑀦𑀁 𑀧𑀦 𑀦𑀸𑀫𑀭𑀽𑀧𑀁 𑀬𑀣𑀸𑀲𑀫𑁆𑀪𑀯𑀁 𑀭𑀽𑀧𑀫𑀺𑀲𑁆𑀲𑀓𑀯𑀺𑀜𑁆𑀜𑀸𑀡𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦 𑀲𑀓𑁆𑀓𑀸 𑀥𑀫𑁆𑀫𑀕𑀡𑀦𑀸𑀢𑁄 𑀯𑀺𑀜𑁆𑀜𑀸𑀢𑀼𑀦𑁆𑀢𑀺 𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀯𑀓𑀁𑀲𑀢𑁄 𑀤𑁆𑀯𑁂 𑀅𑀝𑁆𑀞𑀓𑀸𑀦𑁂𑀯 𑀉𑀢𑀼𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀺 𑀳𑁄𑀦𑁆𑀢𑀻𑀢𑀺 𑀲𑀲𑀤𑁆𑀤𑀓𑀸𑀮𑀁 𑀲𑀦𑁆𑀥𑀸𑀬 ‘‘𑀉𑀓𑁆𑀓𑀁𑀲𑀢𑁄 𑀤𑁆𑀯𑀺𑀦𑁆𑀦𑀁 𑀦𑀯𑀓𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀼𑀩𑁆𑀩𑁂𑀢𑀺 𑀔𑀦𑁆𑀥𑀯𑀺𑀪𑀗𑁆𑀕𑁂𑀢𑀺 𑀯𑀤𑀦𑁆𑀢𑀺. 𑀢𑀢𑁆𑀣 𑀳𑀺 ‘‘𑀏𑀓𑁂𑀓𑀘𑀺𑀢𑁆𑀢𑀓𑁆𑀔𑀡𑁂 ¶ 𑀢𑀺𑀓𑁆𑀔𑀢𑁆𑀢𑀼𑀁 𑀉𑀧𑁆𑀧𑀚𑁆𑀚𑀫𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀥𑁂𑀯 𑀯𑀸 𑀯𑀼𑀢𑁆𑀢𑀁 𑀲𑀦𑁆𑀢𑀢𑀺𑀤𑁆𑀯𑀬𑀸𑀤𑀺𑀓𑀁 𑀲𑀢𑁆𑀢𑀓𑀧𑀭𑀺𑀬𑁄𑀲𑀸𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀧𑀼𑀩𑁆𑀩𑁂 𑀯𑀼𑀢𑁆𑀢𑀁 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀁 𑀲𑀢𑁆𑀢𑀢𑀺𑀯𑀺𑀥’’𑀦𑁆𑀢𑀺, 𑀢𑀁 𑀧𑀦𑀼𑀧𑁆𑀧𑀚𑁆𑀚𑀫𑀸𑀦𑀁 𑀏𑀓𑁂𑀓𑀘𑀺𑀢𑁆𑀢𑀓𑁆𑀔𑀡𑁂 𑀢𑀺𑀓𑁆𑀔𑀢𑁆𑀢𑀼𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀇𑀫𑀺𑀦𑀸𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁 ‘‘𑀏𑀓𑁂𑀓𑀘𑀺𑀢𑁆𑀢𑀓𑁆𑀔𑀡𑁂 𑀢𑀺𑀓𑁆𑀔𑀢𑁆𑀢𑀼𑀁 𑀉𑀧𑁆𑀧𑀚𑁆𑀚𑀫𑀸𑀦’’𑀦𑁆𑀢𑀺. 𑀘𑀢𑀼𑀤𑁆𑀤𑀺𑀲𑀸 𑀯𑀯𑀢𑁆𑀣𑀸𑀧𑀺𑀢𑀸𑀢𑀺 𑀅𑀜𑁆𑀜𑀫𑀜𑁆𑀜𑀲𑀁𑀲𑀝𑁆𑀞𑀲𑀻𑀲𑀸 𑀫𑀽𑀮𑁂𑀦 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀯𑀯𑀢𑁆𑀣𑀸𑀧𑀺𑀢𑀸 𑀅𑀜𑁆𑀜𑀫𑀜𑁆𑀜𑀁 𑀆𑀮𑀺𑀗𑁆𑀕𑁂𑀢𑁆𑀯𑀸 𑀞𑀺𑀢𑀸 𑀪𑀺𑀦𑁆𑀦𑀯𑀸𑀳𑀦𑀺𑀓𑀸 𑀯𑀺𑀬.

𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀘 𑀧𑀯𑀢𑁆𑀢𑀺𑀬𑀦𑁆𑀢𑀺 𑀭𑀽𑀧𑀸𑀚𑀦𑀓𑀓𑀫𑁆𑀫𑀚𑀁 𑀧𑀜𑁆𑀘𑀯𑀺𑀜𑁆𑀜𑀸𑀡𑀧𑁆𑀧𑀯𑀢𑁆𑀢𑀺𑀓𑀸𑀮𑀁 𑀲𑀳𑀚𑀸𑀢𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀜𑁆𑀘 𑀲𑀦𑁆𑀥𑀸𑀬𑀸𑀳. 𑀢𑀤𑀸 𑀳𑀺 𑀢𑀢𑁄 𑀦𑀸𑀫𑀫𑁂𑀯 𑀳𑁄𑀢𑀻𑀢𑀺, 𑀓𑀫𑁆𑀫𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀧𑀦 𑀲𑀤𑀸𑀧𑀺 𑀉𑀪𑀬𑀁 𑀳𑁄𑀢𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀧𑀘𑁆𑀙𑀸𑀚𑀸𑀢𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀘 𑀭𑀽𑀧𑀁 𑀉𑀧𑀢𑁆𑀣𑀤𑁆𑀥𑀁 𑀳𑁄𑀢𑀻𑀢𑀺. 𑀅𑀲𑀜𑁆𑀜𑁂𑀲𑀽𑀢𑀺𑀆𑀤𑀺 𑀓𑀫𑁆𑀫𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀘 𑀧𑀯𑀢𑁆𑀢𑀺𑀬𑀦𑁆𑀢𑀺 𑀪𑀯𑀗𑁆𑀕𑀸𑀤𑀺𑀚𑀦𑀓𑀓𑀫𑁆𑀫𑀢𑁄 𑀅𑀜𑁆𑀜𑁂𑀦 𑀭𑀽𑀧𑀼𑀧𑁆𑀧𑀢𑁆𑀢𑀺𑀓𑀸𑀮𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀓𑀸𑀮𑀁 𑀪𑀯𑀗𑁆𑀕𑀸𑀤𑀺𑀉𑀧𑁆𑀧𑀢𑁆𑀢𑀺𑀓𑀸𑀮𑀢𑁄 𑀅𑀜𑁆𑀜𑀓𑀸𑀮𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀬𑀼𑀢𑁆𑀢𑀁. 𑀪𑀯𑀗𑁆𑀕𑀸𑀤𑀺𑀉𑀧𑁆𑀧𑀢𑁆𑀢𑀺𑀓𑀸𑀮𑁂 𑀳𑀺 𑀢𑀁𑀚𑀦𑀓𑁂𑀦𑁂𑀯 𑀓𑀫𑁆𑀫𑀼𑀦𑀸 𑀉𑀧𑁆𑀧𑀚𑁆𑀚𑀫𑀸𑀦𑀁 𑀭𑀽𑀧𑀁, 𑀲𑁄 𑀘 𑀯𑀺𑀧𑀸𑀓𑁄 𑀓𑀫𑁆𑀫𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀲𑀳𑀚𑀸𑀢𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸𑀦𑀧𑁂𑀓𑁆𑀔𑀫𑁆𑀧𑀺 𑀳𑀺 𑀧𑀯𑀢𑁆𑀢𑀺𑀬𑀁 𑀓𑀫𑁆𑀫𑁂𑀦 𑀧𑀯𑀢𑁆𑀢𑀫𑀸𑀦𑀁 𑀭𑀽𑀧𑀁 𑀦𑀸𑀫𑀜𑁆𑀘 𑀦 𑀓𑀫𑁆𑀫𑀯𑀺𑀜𑁆𑀜𑀸𑀡𑀸𑀦𑀧𑁂𑀓𑁆𑀔𑀁 𑀳𑁄𑀢𑀻𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀧𑀝𑀺𑀲𑀦𑁆𑀥𑀺𑀬𑀁 𑀧𑀯𑀢𑁆𑀢𑁂 𑀘. 𑀲𑀳𑀚𑀸𑀢𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁, 𑀓𑀫𑁆𑀫𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀘 𑀦𑀸𑀫𑀭𑀽𑀧𑀜𑁆𑀘 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑀁. 𑀦𑀸𑀫𑀜𑁆𑀘 ¶ 𑀭𑀽𑀧𑀜𑁆𑀘 𑀦𑀸𑀫𑀭𑀽𑀧𑀜𑁆𑀘 𑀦𑀸𑀫𑀭𑀽𑀧𑀦𑁆𑀢𑀺 𑀏𑀢𑁆𑀣 𑀦𑀸𑀫𑀭𑀽𑀧-𑀲𑀤𑁆𑀤𑁄 𑀅𑀢𑁆𑀢𑀦𑁄 𑀏𑀓𑀤𑁂𑀲𑁂𑀦 𑀦𑀸𑀫-𑀲𑀤𑁆𑀤𑁂𑀦 𑀦𑀸𑀫-𑀲𑀤𑁆𑀤𑀲𑁆𑀲 𑀲𑀭𑀽𑀧𑁄, 𑀭𑀽𑀧-𑀲𑀤𑁆𑀤𑁂𑀦 𑀘 𑀭𑀽𑀧-𑀲𑀤𑁆𑀤𑀲𑁆𑀲, 𑀢𑀲𑁆𑀫𑀸 ‘‘𑀲𑀭𑀽𑀧𑀸𑀦𑀁 𑀏𑀓𑀲𑁂𑀲𑁄’’𑀢𑀺 𑀦𑀸𑀫𑀭𑀽𑀧-𑀲𑀤𑁆𑀤𑀲𑁆𑀲 𑀞𑀸𑀦𑀁 𑀇𑀢𑀭𑁂𑀲𑀜𑁆𑀘 𑀦𑀸𑀫𑀭𑀽𑀧-𑀲𑀤𑁆𑀤𑀸𑀦𑀁 𑀅𑀤𑀲𑁆𑀲𑀦𑀁 𑀤𑀝𑁆𑀞𑀩𑁆𑀩𑀁.

𑀯𑀺𑀧𑀸𑀓𑀢𑁄 𑀅𑀜𑁆𑀜𑀁 𑀅𑀯𑀺𑀧𑀸𑀓𑀁. 𑀬𑀢𑁄 𑀤𑁆𑀯𑀺𑀥𑀸 𑀫𑀢𑀁, 𑀢𑀢𑁄 𑀬𑀼𑀢𑁆𑀢𑀫𑁂𑀯 𑀇𑀤𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀓𑀼𑀲𑀮𑀸𑀤𑀺𑀘𑀺𑀢𑁆𑀢𑀓𑁆𑀔𑀡𑁂𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀓𑀼𑀲𑀮𑀓𑀺𑀭𑀺𑀬𑀘𑀺𑀢𑁆𑀢𑀓𑁆𑀔𑀡𑁂 𑀯𑀺𑀬 𑀯𑀺𑀧𑀸𑀓𑀘𑀺𑀢𑁆𑀢𑀓𑁆𑀔𑀡𑁂𑀧𑀺 𑀯𑀺𑀧𑀸𑀓𑀸𑀚𑀦𑀓𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀁 𑀲𑀗𑁆𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀧𑀸𑀓𑀘𑀺𑀢𑁆𑀢𑀓𑁆𑀔𑀡𑁂 𑀧𑀦 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀉𑀪𑀬𑀜𑁆𑀘 𑀉𑀧𑀮𑀩𑁆𑀪𑀢𑀻𑀢𑀺 𑀢𑀸𑀤𑀺𑀲𑀯𑀺𑀧𑀸𑀓𑀘𑀺𑀢𑁆𑀢𑀓𑁆𑀔𑀡𑀯𑀚𑁆𑀚𑀦𑀢𑁆𑀣𑀁 ‘‘𑀓𑀼𑀲𑀮𑀸𑀤𑀺𑀘𑀺𑀢𑁆𑀢𑀓𑁆𑀔𑀡𑁂’’𑀢𑀺 𑀯𑀼𑀢𑁆𑀢𑀁.

𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑁂𑀦𑀸𑀢𑀺 𑀧𑀝𑁆𑀞𑀸𑀦𑁂 𑀭𑀽𑀧𑀸𑀦𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀲𑁆𑀲 𑀅𑀯𑀼𑀢𑁆𑀢𑀢𑁆𑀢𑀸 𑀯𑀼𑀢𑁆𑀢𑀁, 𑀲𑀼𑀢𑁆𑀢𑀦𑁆𑀢𑁂 𑀧𑀦 ‘‘𑀬𑀲𑁆𑀫𑀺𑀁 𑀲𑀢𑀺 𑀬𑀁 𑀳𑁄𑀢𑀺, 𑀅𑀲𑀢𑀺 𑀘 𑀦 𑀳𑁄𑀢𑀺, 𑀲𑁄 𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀦𑀺𑀤𑀸𑀦𑀁 𑀳𑁂𑀢𑀼 𑀧𑀪𑀯𑁄’’𑀢𑀺 ¶ 𑀓𑀢𑁆𑀯𑀸 ‘‘𑀯𑀺𑀜𑁆𑀜𑀸𑀡𑀽𑀧𑀦𑀺𑀲𑀁 𑀦𑀸𑀫𑀭𑀽𑀧’’𑀦𑁆𑀢𑀺 𑀭𑀽𑀧𑀲𑁆𑀲 𑀘 𑀯𑀺𑀜𑁆𑀜𑀸𑀡𑀽𑀧𑀦𑀺𑀲𑁆𑀲𑀬𑀢𑀸 𑀯𑀼𑀢𑁆𑀢𑀸. 𑀯𑀦𑀧𑀢𑁆𑀣𑀧𑀭𑀺𑀬𑀸𑀬𑁂 𑀘 𑀯𑀦𑀲𑀡𑁆𑀟𑀕𑀸𑀫𑀦𑀺𑀕𑀫𑀦𑀕𑀭𑀚𑀦𑀧𑀤𑀧𑀼𑀕𑁆𑀕𑀮𑀽𑀧𑀦𑀺𑀲𑁆𑀲𑀬𑁄 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁄, 𑀢𑀢𑁄 𑀘 𑀘𑀻𑀯𑀭𑀸𑀤𑀻𑀦𑀁 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸𑀦𑀁 𑀓𑀲𑀺𑀭𑁂𑀦 𑀘 𑀅𑀧𑁆𑀧𑀓𑀲𑀺𑀭𑁂𑀦 𑀘 𑀲𑀫𑀼𑀤𑀸𑀕𑀫𑀦𑀁 𑀯𑀼𑀢𑁆𑀢𑀁, 𑀦 𑀘 𑀯𑀦𑀲𑀡𑁆𑀟𑀸𑀤𑀬𑁄 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀸𑀤𑀺𑀪𑀸𑀯𑀁 𑀇𑀭𑀺𑀬𑀸𑀧𑀣𑀸𑀦𑀁 𑀘𑀻𑀯𑀭𑀸𑀤𑀺𑀲𑀫𑀼𑀤𑀸𑀕𑀫𑀦𑀲𑁆𑀲 𑀘 𑀪𑀚𑀦𑁆𑀢𑀺, 𑀢𑀲𑁆𑀫𑀸 𑀯𑀺𑀦𑀸 𑀅𑀪𑀸𑀯𑁄 𑀏𑀯 𑀘 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑀢𑁄 𑀉𑀧𑀦𑀺𑀲𑁆𑀲𑀬𑀪𑀸𑀯𑁄 𑀤𑀝𑁆𑀞𑀩𑁆𑀩𑁄. 𑀦𑀸𑀫𑀲𑁆𑀲 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁 𑀓𑀫𑁆𑀫𑀸𑀭𑀫𑁆𑀫𑀡𑀧𑀝𑀺𑀲𑀦𑁆𑀥𑀺𑀆𑀤𑀺𑀓𑀸𑀮𑁂 𑀆𑀭𑀫𑁆𑀫𑀡𑀧𑀘𑁆𑀘𑀬𑁄𑀯 𑀳𑁄𑀢𑀻𑀢𑀺 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀭𑀽𑀧𑀲𑁆𑀲𑁂𑀯 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑀢𑁄 𑀏𑀓𑀥𑀸 𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑁄. 𑀲𑀲𑀁𑀲𑀬𑀲𑁆𑀲 𑀳𑀺 𑀭𑀽𑀧𑀲𑁆𑀲 𑀢𑀁𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑁂 𑀦𑀸𑀫𑀲𑁆𑀲 𑀳𑁄𑀢𑀻𑀢𑀺 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺.

𑀧𑀯𑀢𑁆𑀢𑀲𑁆𑀲 𑀧𑀸𑀓𑀝𑀢𑁆𑀢𑀸 𑀅𑀧𑀸𑀓𑀝𑀁 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀧𑀼𑀘𑁆𑀙𑀢𑀺 ‘‘𑀓𑀣𑀁 𑀧𑀦𑁂𑀢’’𑀦𑁆𑀢𑀺𑀆𑀤𑀺𑀦𑀸. 𑀲𑀼𑀢𑁆𑀢𑀢𑁄 𑀦𑀸𑀫𑀁, 𑀬𑀼𑀢𑁆𑀢𑀺𑀢𑁄 𑀭𑀽𑀧𑀁 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀳𑁄𑀢𑀻𑀢𑀺 𑀚𑀸𑀦𑀺𑀢𑀩𑁆𑀩𑀁. 𑀬𑀼𑀢𑁆𑀢𑀺𑀢𑁄 𑀲𑀸𑀥𑁂𑀢𑁆𑀯𑀸 𑀲𑀼𑀢𑁆𑀢𑁂𑀦 𑀢𑀁 𑀤𑀴𑁆𑀳𑀁 𑀓𑀭𑁄𑀦𑁆𑀢𑁄 ‘‘𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀲𑁆𑀲𑀧𑀺 𑀳𑀻’’𑀢𑀺𑀆𑀤𑀺𑀫𑀸𑀳. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑁆𑀲𑁂𑀯𑀸𑀢𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑁆𑀲 𑀯𑀺𑀬. 𑀬𑀲𑁆𑀫𑀸 𑀦𑀸𑀫𑀭𑀽𑀧𑀫𑁂𑀯 𑀧𑀯𑀢𑁆𑀢𑀫𑀸𑀦𑀁 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀢𑀤𑁂𑀯 𑀯𑀤𑀦𑁆𑀢𑁂𑀦 𑀅𑀦𑀼𑀢𑁆𑀢𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀺𑀢𑀁. 𑀲𑀼𑀜𑁆𑀜𑀢𑀸𑀧𑀓𑀸𑀲𑀦𑀜𑁆𑀳𑀺 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀸𑀫𑀭𑀽𑀧𑀫𑀢𑁆𑀢𑀢𑀸𑀯𑀘𑀦𑁂𑀦𑁂𑀯 𑀯𑀸 𑀧𑀯𑀢𑁆𑀢𑀺𑀬𑀸 𑀤𑀼𑀓𑁆𑀔𑀲𑀘𑁆𑀘𑀫𑀢𑁆𑀢𑀢𑀸 𑀯𑀼𑀢𑁆𑀢𑀸, 𑀤𑀼𑀓𑁆𑀔𑀲𑀘𑁆𑀘𑀧𑁆𑀧𑀓𑀸𑀲𑀦𑁂𑀦 𑀘 𑀢𑀲𑁆𑀲 𑀲𑀫𑀼𑀤𑀬𑁄, 𑀢𑀲𑁆𑀲 𑀘 ¶ 𑀦𑀺𑀭𑁄𑀥𑁄, 𑀦𑀺𑀭𑁄𑀥𑀕𑀸𑀫𑀻 𑀘 𑀫𑀕𑁆𑀕𑁄 𑀧𑀓𑀸𑀲𑀺𑀢𑁄 𑀏𑀯 𑀳𑁄𑀢𑀺. 𑀅𑀳𑁂𑀢𑀼𑀓𑀲𑁆𑀲 𑀤𑀼𑀓𑁆𑀔𑀲𑁆𑀲 𑀳𑁂𑀢𑀼𑀦𑀺𑀭𑁄𑀥𑀸, 𑀅𑀦𑀺𑀭𑀼𑀚𑁆𑀛𑀦𑀓𑀲𑁆𑀲 𑀘 𑀅𑀪𑀸𑀯𑀸, 𑀦𑀺𑀭𑁄𑀥𑀲𑁆𑀲 𑀘 𑀉𑀧𑀸𑀬𑁂𑀦 𑀯𑀺𑀦𑀸 𑀅𑀦𑀥𑀺𑀕𑀦𑁆𑀢𑀩𑁆𑀩𑀢𑁆𑀢𑀸𑀢𑀺 𑀘𑀢𑀼𑀲𑀘𑁆𑀘𑀧𑁆𑀧𑀓𑀸𑀲𑀦𑀁 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀁 𑀬𑁄𑀚𑁂𑀢𑀩𑁆𑀩𑀁.

𑀦𑀸𑀫𑀭𑀽𑀧𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀴𑀸𑀬𑀢𑀦𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁨𑁯. 𑀦𑀺𑀬𑀫𑀢𑁄𑀢𑀺 𑀘 𑀇𑀤𑀁 𑀘𑀢𑀼𑀦𑁆𑀦𑀁 𑀪𑀽𑀢𑀸𑀦𑀁, 𑀙𑀦𑁆𑀦𑀁 𑀯𑀢𑁆𑀣𑀽𑀦𑀁, 𑀚𑀻𑀯𑀺𑀢𑀲𑁆𑀲 𑀘 𑀬𑀣𑀸𑀲𑀫𑁆𑀪𑀯𑀁 𑀲𑀳𑀚𑀸𑀢𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀇𑀦𑁆𑀤𑁆𑀭𑀺𑀬𑀸𑀤𑀺𑀦𑀸 𑀏𑀓𑀦𑁆𑀢𑁂𑀦 𑀲𑀴𑀸𑀬𑀢𑀦𑀲𑁆𑀲 𑀧𑀯𑀢𑁆𑀢𑀫𑀸𑀦𑀲𑁆𑀲 𑀧𑀘𑁆𑀘𑀬𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀭𑀽𑀧𑀸𑀬𑀢𑀦𑀸𑀤𑀻𑀦𑀁 𑀧𑀦 𑀲𑀳𑀚𑀸𑀢𑀦𑀺𑀲𑁆𑀲𑀬𑀸𑀦𑀼𑀧𑀸𑀮𑀦𑀪𑀸𑀯𑁄 𑀦𑀢𑁆𑀣𑀻𑀢𑀺 𑀅𑀕𑁆𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀆𑀭𑀫𑁆𑀫𑀡𑀸𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀸𑀤𑀺𑀪𑀸𑀯𑁄 ¶ 𑀘 𑀢𑁂𑀲𑀁 𑀦 𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀸𑀦𑀫𑁂𑀯, 𑀦 𑀘 𑀘𑀓𑁆𑀔𑀸𑀤𑀻𑀦𑀁 𑀯𑀺𑀬 𑀏𑀓𑀧𑁆𑀧𑀓𑀸𑀭𑁂𑀦𑁂𑀯𑀸𑀢𑀺 𑀅𑀦𑀺𑀬𑀫𑀢𑁄 𑀧𑀘𑁆𑀘𑀬𑀪𑀸𑀯𑁄. 𑀦𑀺𑀬𑀫𑀢𑁄…𑀧𑁂… 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀏𑀯𑀦𑁆𑀢𑀺 𑀏𑀢𑁆𑀣 𑀏𑀯𑀁-𑀲𑀤𑁆𑀤𑁂𑀦 𑀯𑀸 𑀭𑀽𑀧𑀸𑀬𑀢𑀦𑀸𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀙𑀝𑁆𑀞𑀸𑀬𑀢𑀦𑀜𑁆𑀘 𑀲𑀴𑀸𑀬𑀢𑀦𑀜𑁆𑀘 𑀲𑀴𑀸𑀬𑀢𑀦𑀦𑁆𑀢𑀺 𑀏𑀢𑁆𑀣 𑀬𑀤𑀺𑀧𑀺 𑀙𑀝𑁆𑀞𑀸𑀬𑀢𑀦𑀲𑀴𑀸𑀬𑀢𑀦-𑀲𑀤𑁆𑀤𑀸𑀦𑀁 𑀲𑀤𑁆𑀤𑀢𑁄 𑀲𑀭𑀽𑀧𑀢𑀸 𑀦𑀢𑁆𑀣𑀺, 𑀅𑀢𑁆𑀣𑀢𑁄 𑀧𑀦 𑀲𑀴𑀸𑀬𑀢𑀦𑁂𑀓𑀤𑁂𑀲𑁄𑀯 𑀙𑀝𑁆𑀞𑀸𑀬𑀢𑀦𑀦𑁆𑀢𑀺 𑀏𑀓𑀤𑁂𑀲𑀲𑀭𑀽𑀧𑀢𑀸 𑀅𑀢𑁆𑀣𑀻𑀢𑀺 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑁄 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀣𑀢𑁄𑀧𑀺 𑀳𑀺 𑀲𑀭𑀽𑀧𑀸𑀦𑀁 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑀁 𑀇𑀘𑁆𑀙𑀦𑁆𑀢𑀺 ‘‘𑀯𑀗𑁆𑀓𑁄 𑀘 𑀓𑀼𑀝𑀺𑀮𑁄 𑀘 𑀓𑀼𑀝𑀺𑀮𑀸’’𑀢𑀺, 𑀢𑀲𑁆𑀫𑀸 𑀅𑀢𑁆𑀣𑀢𑁄 𑀏𑀓𑀤𑁂𑀲𑀲𑀭𑀽𑀧𑀸𑀦𑀜𑁆𑀘 𑀏𑀓𑀲𑁂𑀲𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺.

𑀅𑀣 𑀯𑀸 𑀙𑀝𑁆𑀞𑀸𑀬𑀢𑀦𑀜𑁆𑀘 𑀫𑀦𑀸𑀬𑀢𑀦𑀜𑁆𑀘 𑀙𑀝𑁆𑀞𑀸𑀬𑀢𑀦𑀦𑁆𑀢𑀺 𑀯𑀸, 𑀫𑀦𑀸𑀬𑀢𑀦𑀦𑁆𑀢𑀺 𑀯𑀸, 𑀙𑀝𑁆𑀞𑀸𑀬𑀢𑀦𑀜𑁆𑀘 𑀙𑀝𑁆𑀞𑀸𑀬𑀢𑀦𑀜𑁆𑀘 𑀙𑀝𑁆𑀞𑀸𑀬𑀢𑀦𑀦𑁆𑀢𑀺 𑀯𑀸, 𑀫𑀦𑀸𑀬𑀢𑀦𑀜𑁆𑀘 𑀫𑀦𑀸𑀬𑀢𑀦𑀜𑁆𑀘 𑀫𑀦𑀸𑀬𑀢𑀦𑀦𑁆𑀢𑀺 𑀯𑀸 𑀏𑀓𑀲𑁂𑀲𑀁 𑀓𑀢𑁆𑀯𑀸 𑀘𑀓𑁆𑀔𑀸𑀤𑀻𑀳𑀺 𑀲𑀳 ‘‘𑀲𑀴𑀸𑀬𑀢𑀦’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀢𑀫𑁂𑀯 𑀏𑀓𑀲𑁂𑀲𑀁 𑀦𑀸𑀫𑀫𑀢𑁆𑀢𑀧𑀘𑁆𑀘𑀬𑀲𑁆𑀲, 𑀦𑀸𑀫𑀭𑀽𑀧𑀧𑀘𑁆𑀘𑀬𑀲𑁆𑀲 𑀘 𑀫𑀦𑀸𑀬𑀢𑀦𑀲𑁆𑀲 𑀯𑀲𑁂𑀦 𑀓𑀢𑀁 𑀅𑀢𑁆𑀣𑀢𑁄 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀙𑀝𑁆𑀞𑀸𑀬𑀢𑀦𑀜𑁆𑀘 𑀲𑀴𑀸𑀬𑀢𑀦𑀜𑁆𑀘 𑀲𑀴𑀸𑀬𑀢𑀦𑀦𑁆𑀢𑀺 𑀏𑀯𑀁 𑀓𑀢𑁂𑀓𑀲𑁂𑀲𑀲𑁆𑀲𑀸’’𑀢𑀺. 𑀬𑀣𑀸𑀯𑀼𑀢𑁆𑀢𑁄𑀧𑀺 𑀳𑀺 𑀏𑀓𑀲𑁂𑀲𑁄 𑀅𑀢𑁆𑀣𑀢𑁄 𑀙𑀝𑁆𑀞𑀸𑀬𑀢𑀦𑀜𑁆𑀘 𑀲𑀴𑀸𑀬𑀢𑀦𑀜𑁆𑀘𑀸𑀢𑀺 𑀏𑀯𑀁 𑀓𑀢𑁄 𑀦𑀸𑀫 𑀳𑁄𑀢𑀻𑀢𑀺. 𑀲𑀩𑁆𑀩𑀢𑁆𑀣 𑀘 𑀏𑀓𑀲𑁂𑀲𑁂 𑀓𑀢𑁂 𑀏𑀓𑀯𑀘𑀦𑀦𑀺𑀤𑁆𑀤𑁂𑀲𑁄 ¶ 𑀓𑀢𑁂𑀓𑀲𑁂𑀲𑀸𑀦𑀁 𑀲𑀴𑀸𑀬𑀢𑀦𑀸𑀤𑀺𑀲𑀤𑁆𑀤𑀯𑀘𑀦𑀻𑀬𑀢𑀸𑀲𑀸𑀫𑀜𑁆𑀜𑀯𑀲𑁂𑀦 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀅𑀩𑁆𑀬𑀸𑀓𑀢𑀯𑀸𑀭𑁂 𑀯𑀓𑁆𑀔𑀢𑀻𑀢𑀺 𑀓𑀺𑀜𑁆𑀘𑀸𑀧𑀺 𑀅𑀓𑀼𑀲𑀮𑀯𑀸𑀭𑁂 𑀓𑀼𑀲𑀮𑀯𑀸𑀭𑁂 𑀘 ‘‘𑀦𑀸𑀫𑀧𑀘𑁆𑀘𑀬𑀸 𑀙𑀝𑁆𑀞𑀸𑀬𑀢𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀧𑀦 𑀯𑀺𑀧𑀸𑀓𑀙𑀝𑁆𑀞𑀸𑀬𑀢𑀦𑀫𑁂𑀯 𑀕𑀳𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀅𑀩𑁆𑀬𑀸𑀓𑀢𑀯𑀸𑀭𑀫𑁂𑀯 𑀲𑀸𑀥𑀓𑀪𑀸𑀯𑁂𑀦 𑀉𑀤𑀸𑀳𑀝𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀘𑁆𑀘𑀬𑀦𑀬𑁂 𑀧𑀦 ‘‘𑀙𑀝𑁆𑀞𑀸 𑀳𑁄𑀢𑀺 𑀢𑀁 𑀅𑀯𑀓𑀁𑀲𑀢𑁄’’𑀢𑀺𑀆𑀤𑀺𑀦𑀸 𑀅𑀯𑀺𑀧𑀸𑀓𑀲𑁆𑀲𑀧𑀺 𑀧𑀘𑁆𑀘𑀬𑁄 𑀉𑀤𑁆𑀥𑀝𑁄, 𑀲𑁄 𑀦𑀺𑀭𑀯𑀲𑁂𑀲𑀁 𑀯𑀢𑁆𑀢𑀼𑀓𑀸𑀫𑀢𑀸𑀬 𑀉𑀤𑁆𑀥𑀝𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀇𑀥 𑀲𑀗𑁆𑀕𑀳𑀺𑀢𑀦𑁆𑀢𑀺 𑀇𑀥 𑀏𑀓𑀲𑁂𑀲𑀦𑀬𑁂𑀦 𑀲𑀗𑁆𑀕𑀳𑀺𑀢𑀁, 𑀢𑀢𑁆𑀣 𑀅𑀩𑁆𑀬𑀸𑀓𑀢𑀯𑀸𑀭𑁂 𑀮𑁄𑀓𑀺𑀬𑀯𑀺𑀧𑀸𑀓𑀪𑀸𑀚𑀦𑀻𑀬𑁂 𑀯𑀺𑀪𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀦𑁂𑀬𑁆𑀬𑀦𑁆𑀢𑀺 𑀜𑁂𑀬𑁆𑀬𑀁. 𑀉𑀓𑁆𑀓𑀁𑀲𑀸𑀯𑀓𑀁𑀲𑁄𑀢𑀺 𑀏𑀢𑁆𑀣 𑀲𑀢𑁆𑀢𑀥𑀸 𑀧𑀘𑁆𑀘𑀬𑀪𑀸𑀯𑀢𑁄 𑀉𑀓𑁆𑀓𑀁𑀲𑁄 𑀅𑀝𑁆𑀞𑀥𑀸 𑀧𑀘𑁆𑀘𑀬𑀪𑀸𑀯𑁄, 𑀢𑀢𑁄 𑀧𑀦 𑀦𑀯𑀥𑀸 𑀢𑀢𑁄 𑀯𑀸 𑀤𑀲𑀥𑀸𑀢𑀺 𑀅𑀬𑀁 𑀉𑀓𑁆𑀓𑀁𑀲𑁄, 𑀅𑀯𑀓𑀁𑀲𑁄 𑀧𑀦 𑀤𑀲𑀥𑀸 𑀧𑀘𑁆𑀘𑀬𑀪𑀸𑀯𑀢𑁄 𑀦𑀯𑀥𑀸 𑀧𑀘𑁆𑀘𑀬𑀪𑀸𑀯𑁄, 𑀢𑀢𑁄 𑀅𑀝𑁆𑀞𑀥𑀸, 𑀢𑀢𑁄 𑀲𑀢𑁆𑀢𑀥𑀸𑀢𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄, 𑀦 𑀧𑀦 𑀲𑀢𑁆𑀢𑀥𑀸 𑀧𑀘𑁆𑀘𑀬𑀪𑀸𑀯𑀢𑁄 𑀏𑀯 𑀤𑁆𑀯𑁂𑀧𑀺 𑀉𑀓𑁆𑀓𑀁𑀲𑀸𑀯𑀓𑀁𑀲𑀸 𑀬𑁄𑀚𑁂𑀢𑀩𑁆𑀩𑀸 𑀢𑀢𑁄 𑀅𑀯𑀓𑀁𑀲𑀸𑀪𑀸𑀯𑀢𑁄𑀢𑀺.

𑀳𑀤𑀬𑀯𑀢𑁆𑀣𑀼𑀦𑁄 𑀲𑀳𑀸𑀬𑀁 𑀳𑀼𑀢𑁆𑀯𑀸𑀢𑀺 𑀏𑀢𑁂𑀦 𑀅𑀭𑀽𑀧𑁂 𑀯𑀺𑀬 𑀅𑀲𑀳𑀸𑀬𑀁 𑀦𑀸𑀫𑀁 𑀦 𑀳𑁄𑀢𑀺, 𑀳𑀤𑀬𑀯𑀢𑁆𑀣𑀼 𑀘 ¶ 𑀦𑀸𑀫𑁂𑀦 𑀲𑀳 𑀙𑀝𑁆𑀞𑀸𑀬𑀢𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀏𑀢𑁆𑀢𑀓𑀫𑁂𑀯 𑀤𑀲𑁆𑀲𑁂𑀢𑀺, 𑀦 𑀧𑀦 𑀬𑀣𑀸 𑀳𑀤𑀬𑀯𑀢𑁆𑀣𑀼 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀣𑀸 𑀦𑀸𑀫𑀫𑁆𑀧𑀻𑀢𑀺 𑀅𑀬𑀫𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄. 𑀯𑀢𑁆𑀣𑀼 𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀦𑀸𑀫𑀁, 𑀦𑀸𑀫𑀜𑁆𑀘 𑀯𑀺𑀧𑀸𑀓𑀳𑁂𑀢𑀸𑀤𑀺𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀯𑀢𑁆𑀣𑀽𑀢𑀺. 𑀧𑀯𑀢𑁆𑀢𑁂 𑀅𑀭𑀽𑀧𑀥𑀫𑁆𑀫𑀸 𑀓𑀫𑁆𑀫𑀚𑀭𑀽𑀧𑀲𑁆𑀲 𑀞𑀺𑀢𑀺𑀧𑁆𑀧𑀢𑁆𑀢𑀲𑁆𑀲𑁂𑀯 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲𑀸𑀢𑀺 𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀸 𑀘 𑀧𑀘𑁆𑀙𑀸𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀸𑀤𑀬𑁄 𑀏𑀯 𑀘𑀓𑁆𑀔𑀸𑀤𑀻𑀦𑀁 𑀬𑁄𑀚𑁂𑀢𑀩𑁆𑀩𑀸.

𑀅𑀯𑀲𑁂𑀲𑀫𑀦𑀸𑀬𑀢𑀦𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀧𑀜𑁆𑀘𑀓𑁆𑀔𑀦𑁆𑀥𑀪𑀯𑁂 𑀧𑀦𑀸’’𑀢𑀺 𑀏𑀢𑀲𑁆𑀲 𑀅𑀦𑀼𑀯𑀢𑁆𑀢𑀫𑀸𑀦𑀢𑁆𑀢𑀸 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀏𑀯 𑀧𑀯𑀢𑁆𑀢𑀫𑀸𑀦𑀁 𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀳𑀺 𑀅𑀯𑀲𑁂𑀲𑀫𑀦𑀸𑀬𑀢𑀦𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀸𑀫𑀭𑀽𑀧𑀲𑁆𑀲 𑀲𑀳𑀚𑀸𑀢𑀸𑀤𑀺𑀲𑀸𑀥𑀸𑀭𑀡𑀧𑀘𑁆𑀘𑀬𑀪𑀸𑀯𑁄 𑀲𑀫𑁆𑀧𑀬𑀼𑀢𑁆𑀢𑀸𑀤𑀺𑀅𑀲𑀸𑀥𑀸𑀭𑀡𑀧𑀘𑁆𑀘𑀬𑀪𑀸𑀯𑁄 𑀘 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑁄.

𑀲𑀴𑀸𑀬𑀢𑀦𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀨𑀲𑁆𑀲𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁩𑁦. ‘‘𑀙𑀝𑁆𑀞𑀸𑀬𑀢𑀦𑀧𑀘𑁆𑀘𑀬𑀸 ¶ 𑀨𑀲𑁆𑀲𑁄’’𑀢𑀺 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀧𑀸𑀴𑀺 𑀆𑀭𑀼𑀧𑁆𑀧𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸𑀢𑀺 ‘‘𑀙𑀝𑁆𑀞𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄𑀢𑀺 𑀧𑀸𑀴𑀺𑀅𑀦𑀼𑀲𑀸𑀭𑀢𑁄’’𑀢𑀺 𑀆𑀳. 𑀅𑀚𑁆𑀛𑀢𑁆𑀢𑀦𑁆𑀢𑀺 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀫𑁂𑀯 𑀕𑀡𑁆𑀳𑀸𑀢𑀺. 𑀢𑀜𑁆𑀳𑀺 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀁 𑀢𑀸𑀤𑀺𑀲𑀲𑁆𑀲 𑀨𑀲𑁆𑀲𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀭𑀽𑀧𑀸𑀤𑀻𑀦𑀺 𑀧𑀦 𑀩𑀳𑀺𑀤𑁆𑀥𑀸 𑀅𑀦𑀼𑀧𑀸𑀤𑀺𑀦𑁆𑀦𑀸𑀦𑀺 𑀘 𑀨𑀲𑁆𑀲𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀦𑁆𑀢𑀺, 𑀦 𑀢𑀸𑀦𑀺 𑀘𑀓𑁆𑀔𑀸𑀤𑀻𑀦𑀺 𑀯𑀺𑀬 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀓𑀫𑁆𑀫𑀓𑀺𑀮𑁂𑀲𑀦𑀺𑀫𑀺𑀢𑁆𑀢𑀧𑀯𑀢𑁆𑀢𑀺𑀪𑀸𑀯𑁂𑀦 𑀨𑀲𑁆𑀲𑀲𑁆𑀲 𑀧𑀘𑁆𑀘𑀬𑁄𑀢𑀺 𑀧𑀞𑀫𑀸𑀘𑀭𑀺𑀬𑀯𑀸𑀤𑁂 𑀦 𑀕𑀳𑀺𑀢𑀸𑀦𑀺, 𑀤𑀼𑀢𑀺𑀬𑀸𑀘𑀭𑀺𑀬𑀯𑀸𑀤𑁂 𑀧𑀦 𑀬𑀣𑀸 𑀢𑀣𑀸 𑀯𑀸 𑀧𑀘𑁆𑀘𑀬𑀪𑀸𑀯𑁂 𑀲𑀢𑀺 𑀦 𑀲𑀓𑁆𑀓𑀸 𑀯𑀚𑁆𑀚𑁂𑀢𑀼𑀦𑁆𑀢𑀺 𑀕𑀳𑀺𑀢𑀸𑀦𑀻𑀢𑀺.

𑀬𑀤𑀺 𑀲𑀩𑁆𑀩𑀸𑀬𑀢𑀦𑁂𑀳𑀺 𑀏𑀓𑁄 𑀨𑀲𑁆𑀲𑁄 𑀲𑀫𑁆𑀪𑀯𑁂𑀬𑁆𑀬, ‘‘𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄’’𑀢𑀺 𑀏𑀓𑀲𑁆𑀲 𑀯𑀘𑀦𑀁 𑀬𑀼𑀚𑁆𑀚𑁂𑀬𑁆𑀬. 𑀅𑀣𑀸𑀧𑀺 𑀏𑀓𑀫𑁆𑀳𑀸 𑀆𑀬𑀢𑀦𑀸 𑀲𑀩𑁆𑀩𑁂 𑀨𑀲𑁆𑀲𑀸 𑀲𑀫𑁆𑀪𑀯𑁂𑀬𑁆𑀬𑀼𑀁, 𑀢𑀣𑀸𑀧𑀺 𑀲𑀩𑁆𑀩𑀸𑀬𑀢𑀦𑁂𑀳𑀺 𑀲𑀩𑁆𑀩𑀨𑀲𑁆𑀲𑀲𑀫𑁆𑀪𑀯𑀢𑁄 𑀆𑀬𑀢𑀦𑀪𑁂𑀤𑁂𑀦 𑀨𑀲𑁆𑀲𑀪𑁂𑀤𑁄 𑀦𑀢𑁆𑀣𑀻𑀢𑀺 𑀢𑀤𑀪𑁂𑀤𑀯𑀲𑁂𑀦 𑀏𑀓𑀲𑁆𑀲 𑀯𑀘𑀦𑀁 𑀬𑀼𑀚𑁆𑀚𑁂𑀬𑁆𑀬, 𑀢𑀣𑀸 𑀧𑀦 𑀅𑀲𑀫𑁆𑀪𑀯𑀢𑁄 𑀦 𑀬𑀼𑀢𑁆𑀢𑀦𑁆𑀢𑀺 𑀘𑁄𑀤𑁂𑀢𑀺 ‘‘𑀦 𑀲𑀩𑁆𑀩𑀸𑀬𑀢𑀦𑁂𑀳𑀻’’𑀢𑀺𑀆𑀤𑀺𑀦𑀸. 𑀅𑀜𑁆𑀜𑀲𑁆𑀲𑀧𑀺 𑀯𑀸 𑀅𑀲𑀫𑁆𑀪𑀯𑀦𑁆𑀢𑀲𑁆𑀲 ¶ 𑀯𑀺𑀥𑀸𑀦𑀲𑁆𑀲 𑀩𑁄𑀥𑀦𑀢𑁆𑀣𑀫𑁂𑀯 ‘‘𑀦𑀸𑀧𑀺 𑀏𑀓𑀫𑁆𑀳𑀸 𑀆𑀬𑀢𑀦𑀸 𑀲𑀩𑁆𑀩𑁂 𑀨𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁, ‘‘𑀦 𑀲𑀩𑁆𑀩𑀸𑀬𑀢𑀦𑁂𑀳𑀺 𑀏𑀓𑁄 𑀨𑀲𑁆𑀲𑁄 𑀲𑀫𑁆𑀪𑁄𑀢𑀻’’𑀢𑀺 𑀇𑀤𑀫𑁂𑀯 𑀧𑀦 𑀏𑀓𑀨𑀲𑁆𑀲𑀯𑀘𑀦𑀲𑁆𑀲 𑀅𑀬𑀼𑀢𑁆𑀢𑀤𑀻𑀧𑀓𑀁 𑀓𑀸𑀭𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦𑀺𑀤𑀲𑁆𑀲𑀦𑀯𑀲𑁂𑀦 𑀯𑀸 𑀏𑀢𑀁 𑀯𑀼𑀢𑁆𑀢𑀁, 𑀦𑀸𑀧𑀺 𑀏𑀓𑀫𑁆𑀳𑀸 𑀆𑀬𑀢𑀦𑀸 𑀲𑀩𑁆𑀩𑁂 𑀨𑀲𑁆𑀲𑀸 𑀲𑀫𑁆𑀪𑁄𑀦𑁆𑀢𑀺, 𑀏𑀯𑀁 𑀦 𑀲𑀩𑁆𑀩𑀸𑀬𑀢𑀦𑁂𑀳𑀺 𑀏𑀓𑁄 𑀨𑀲𑁆𑀲𑁄 𑀲𑀫𑁆𑀪𑁄𑀢𑀺, 𑀢𑀲𑁆𑀫𑀸 𑀏𑀓𑀲𑁆𑀲 𑀯𑀘𑀦𑀁 𑀅𑀬𑀼𑀢𑁆𑀢𑀦𑁆𑀢𑀺. 𑀧𑀭𑀺𑀳𑀸𑀭𑀁 𑀧𑀦 𑀅𑀦𑁂𑀓𑀸𑀬𑀢𑀦𑁂𑀳𑀺 𑀏𑀓𑀨𑀲𑁆𑀲𑀲𑁆𑀲 𑀲𑀫𑁆𑀪𑀯𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀭𑀺𑀤𑀁 𑀯𑀺𑀲𑁆𑀲𑀚𑁆𑀚𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀏𑀓𑁄𑀧𑀺 𑀅𑀦𑁂𑀓𑀸𑀬𑀢𑀦𑀧𑁆𑀧𑀪𑀯𑁄 𑀏𑀓𑁄𑀧𑀦𑁂𑀓𑀸𑀬𑀢𑀦𑀧𑁆𑀧𑀪𑀯𑁄. 𑀙𑀥𑀸𑀧𑀘𑁆𑀘𑀬𑀢𑁆𑀢𑁂 𑀧𑀜𑁆𑀘𑀯𑀺𑀪𑀸𑀯𑀬𑁂𑀢𑀺 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀬𑁄𑀚𑀦𑀸. 𑀢𑀣𑀸 𑀘𑀸𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺 𑀭𑀽𑀧𑀸𑀤𑀻𑀦𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘 𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀁 𑀭𑀽𑀧𑀭𑀽𑀧𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀆𑀭𑀫𑁆𑀫𑀡𑀧𑀘𑁆𑀘𑀬𑀫𑀢𑁆𑀢𑁂𑀦𑀸𑀢𑀺 𑀢𑀁 𑀲𑀩𑁆𑀩𑀁 𑀅𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀜𑁆𑀜𑀜𑁆𑀘 𑀥𑀫𑁆𑀫𑀸𑀬𑀢𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀨𑀲𑁆𑀲𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑁂𑀤𑀦𑀸𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁩𑁧. ‘‘𑀲𑁂𑀲𑀸𑀦’’𑀦𑁆𑀢𑀺 ¶ 𑀏𑀢𑁆𑀣 𑀲𑀫𑁆𑀧𑀝𑀺𑀘𑁆𑀙𑀦𑀲𑁆𑀲 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀬𑁄 𑀧𑀜𑁆𑀘 𑀬𑀤𑀺𑀧𑀺 𑀅𑀦𑀦𑁆𑀢𑀭𑀸𑀤𑀻𑀳𑀺𑀧𑀺 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀦𑀦𑁆𑀢𑀭𑀸𑀤𑀻𑀦𑀁 𑀧𑀦 𑀉𑀧𑀦𑀺𑀲𑁆𑀲𑀬𑁂 𑀅𑀦𑁆𑀢𑁄𑀕𑀥𑀢𑁆𑀢𑀸 𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀸𑀦𑀜𑁆𑀘 𑀲𑀸𑀥𑀸𑀭𑀡𑀲𑁆𑀲 𑀢𑀲𑁆𑀲 𑀯𑀲𑁂𑀦 ‘‘𑀏𑀓𑀥𑀸’’𑀢𑀺 𑀯𑀼𑀢𑁆𑀢𑀁.

𑀢𑁂𑀪𑀽𑀫𑀓𑀯𑀺𑀧𑀸𑀓𑀯𑁂𑀤𑀦𑀸𑀦𑀫𑁆𑀧𑀺 𑀲𑀳𑀚𑀸𑀢𑀫𑀦𑁄𑀲𑀫𑁆𑀨𑀲𑁆𑀲𑀲𑀗𑁆𑀔𑀸𑀢𑁄 𑀲𑁄 𑀨𑀲𑁆𑀲𑁄 𑀅𑀝𑁆𑀞𑀥𑀸 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀧𑀘𑁆𑀘𑀬𑀁 𑀅𑀦𑀼𑀧𑀸𑀤𑀺𑀦𑁆𑀦𑀫𑁆𑀧𑀺 𑀓𑁂𑀘𑀺 𑀇𑀘𑁆𑀙𑀦𑁆𑀢𑀻𑀢𑀺 ‘‘𑀬𑀸 𑀧𑀦𑀸’’𑀢𑀺𑀆𑀤𑀺𑀦𑀸 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀨𑀲𑁆𑀲𑀲𑁆𑀲 𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑁄, 𑀢𑀜𑁆𑀘 𑀫𑀼𑀔𑀫𑀢𑁆𑀢𑀤𑀲𑁆𑀲𑀦𑀢𑁆𑀣𑀁 𑀤𑀝𑁆𑀞𑀩𑁆𑀩𑀁. 𑀏𑀢𑁂𑀦 𑀦𑀬𑁂𑀦 𑀲𑀩𑁆𑀩𑀲𑁆𑀲 𑀅𑀦𑀦𑁆𑀢𑀭𑀲𑁆𑀲 𑀅𑀦𑀸𑀦𑀦𑁆𑀢𑀭𑀲𑁆𑀲 𑀘 𑀨𑀲𑁆𑀲𑀲𑁆𑀲 𑀢𑀲𑁆𑀲𑀸 𑀢𑀲𑁆𑀲𑀸 𑀯𑀺𑀧𑀸𑀓𑀯𑁂𑀤𑀦𑀸𑀬 𑀉𑀧𑀦𑀺𑀲𑁆𑀲𑀬𑀢𑀸 𑀬𑁄𑀚𑁂𑀢𑀩𑁆𑀩𑀸𑀢𑀺.

𑀯𑁂𑀤𑀦𑀸𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀡𑁆𑀳𑀸𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁩𑁨. 𑀫𑀫𑀢𑁆𑀢𑁂𑀦𑀸𑀢𑀺 ¶ 𑀲𑀫𑁆𑀧𑀺𑀬𑀸𑀬𑀫𑀸𑀦𑁂𑀦, 𑀅𑀲𑁆𑀲𑀸𑀤𑀦𑀢𑀡𑁆𑀳𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀧𑀼𑀢𑁆𑀢𑁄 𑀯𑀺𑀬 𑀯𑁂𑀤𑀦𑀸 𑀤𑀝𑁆𑀞𑀩𑁆𑀩𑀸, 𑀔𑀻𑀭𑀸𑀤𑀬𑁄 𑀯𑀺𑀬 𑀯𑁂𑀤𑀦𑀸𑀬 𑀧𑀘𑁆𑀘𑀬𑀪𑀽𑀢𑀸 𑀭𑀽𑀧𑀸𑀤𑀬𑁄, 𑀔𑀻𑀭𑀸𑀤𑀺𑀤𑀸𑀬𑀺𑀓𑀸 𑀥𑀸𑀢𑀺 𑀯𑀺𑀬 𑀭𑀽𑀧𑀸𑀤𑀺𑀙𑀴𑀸𑀭𑀫𑁆𑀫𑀡𑀤𑀸𑀬𑀓𑀸 𑀘𑀺𑀢𑁆𑀢𑀓𑀸𑀭𑀸𑀤𑀬𑁄 𑀙. 𑀢𑀢𑁆𑀣 𑀯𑁂𑀚𑁆𑀚𑁄 𑀭𑀲𑀸𑀬𑀦𑁄𑀚𑀸𑀯𑀲𑁂𑀦 𑀢𑀤𑀼𑀧𑀢𑁆𑀣𑀫𑁆𑀪𑀺𑀢𑀚𑀻𑀯𑀺𑀢𑀯𑀲𑁂𑀦 𑀘 𑀥𑀫𑁆𑀫𑀸𑀭𑀫𑁆𑀫𑀡𑀲𑁆𑀲 𑀤𑀸𑀬𑀓𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲 𑀆𑀭𑀫𑁆𑀫𑀡𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀦 𑀉𑀧𑀦𑀺𑀲𑁆𑀲𑀬𑁄 𑀯𑀺𑀬 𑀉𑀧𑁆𑀧𑀸𑀤𑀓𑁄𑀢𑀺 𑀉𑀧𑁆𑀧𑀸𑀤𑀓𑀲𑁆𑀲 𑀉𑀧𑀦𑀺𑀲𑁆𑀲𑀬𑀲𑁆𑀲𑁂𑀯 𑀯𑀲𑁂𑀦 ‘‘𑀏𑀓𑀥𑀸𑀯𑀸’’𑀢𑀺 𑀯𑀼𑀢𑁆𑀢𑀁. 𑀉𑀧𑀦𑀺𑀲𑁆𑀲𑀬𑁂𑀦 𑀯𑀸 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄 𑀲𑀗𑁆𑀕𑀳𑀺𑀢𑁄, 𑀢𑁂𑀦 𑀘 𑀆𑀭𑀫𑁆𑀫𑀡𑀪𑀸𑀯𑁂𑀦 𑀢𑀁𑀲𑀪𑀸𑀯𑁄 𑀅𑀜𑁆𑀜𑁄𑀧𑀺 𑀆𑀭𑀫𑁆𑀫𑀡𑀪𑀸𑀯𑁄 𑀤𑀻𑀧𑀺𑀢𑁄 𑀳𑁄𑀢𑀻𑀢𑀺 𑀉𑀧𑀦𑀺𑀲𑁆𑀲𑀬𑀯𑀲𑁂𑀦𑁂𑀯 𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀬𑀲𑁆𑀫𑀸 𑀯𑀸𑀢𑀺𑀆𑀤𑀺𑀦𑀸 𑀦 𑀓𑁂𑀯𑀮𑀁 𑀯𑀺𑀧𑀸𑀓𑀲𑀼𑀔𑀯𑁂𑀤𑀦𑀸 𑀏𑀯, 𑀢𑀺𑀲𑁆𑀲𑁄𑀧𑀺 𑀧𑀦 𑀯𑁂𑀤𑀦𑀸 𑀯𑀺𑀧𑀸𑀓𑀸 𑀯𑀺𑀲𑁂𑀲𑁂𑀦 𑀢𑀡𑁆𑀳𑀸𑀬 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄, 𑀅𑀯𑀺𑀲𑁂𑀲𑁂𑀦 𑀇𑀢𑀭𑀸 𑀘𑀸𑀢𑀺 𑀤𑀲𑁆𑀲𑁂𑀢𑀺. 𑀉𑀧𑁂𑀓𑁆𑀔𑀸 𑀧𑀦 𑀲𑀦𑁆𑀢𑀢𑁆𑀢𑀸, 𑀲𑀼𑀔𑀫𑀺𑀘𑁆𑀘𑁂𑀯 𑀪𑀸𑀲𑀺𑀢𑀸𑀢𑀺 𑀢𑀲𑁆𑀫𑀸 𑀲𑀸𑀧𑀺 𑀪𑀺𑀬𑁆𑀬𑁄 𑀇𑀘𑁆𑀙𑀦𑀯𑀲𑁂𑀦 𑀢𑀡𑁆𑀳𑀸𑀬 𑀉𑀧𑀦𑀺𑀲𑁆𑀲𑀬𑁄𑀢𑀺 𑀅𑀥𑀺𑀧𑁆𑀧𑀸𑀬𑁄 ¶ . 𑀉𑀧𑁂𑀓𑁆𑀔𑀸 𑀧𑀦 𑀅𑀓𑀼𑀲𑀮𑀯𑀺𑀧𑀸𑀓𑀪𑀽𑀢𑀸 𑀅𑀦𑀺𑀝𑁆𑀞𑀢𑁆𑀢𑀸 𑀤𑀼𑀓𑁆𑀔𑁂 𑀅𑀯𑀭𑁄𑀥𑁂𑀢𑀩𑁆𑀩𑀸, 𑀇𑀢𑀭𑀸 𑀇𑀝𑁆𑀞𑀢𑁆𑀢𑀸 𑀲𑀼𑀔𑁂𑀢𑀺 𑀲𑀸 𑀤𑀼𑀓𑁆𑀔𑀁 𑀯𑀺𑀬 𑀲𑀼𑀔𑀁 𑀯𑀺𑀬 𑀘 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺. ‘‘𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸’’𑀢𑀺 𑀯𑀘𑀦𑁂𑀦 𑀲𑀩𑁆𑀩𑀲𑁆𑀲 𑀯𑁂𑀤𑀦𑀸𑀯𑀢𑁄 𑀧𑀘𑁆𑀘𑀬𑀲𑁆𑀲 𑀅𑀢𑁆𑀣𑀺𑀢𑀸𑀬 𑀢𑀡𑁆𑀳𑀼𑀧𑁆𑀧𑀢𑁆𑀢𑀺𑀧𑁆𑀧𑀲𑀗𑁆𑀕𑁂 𑀢𑀁𑀦𑀺𑀯𑀸𑀭𑀡𑀢𑁆𑀣𑀫𑀸𑀳 ‘‘𑀯𑁂𑀤𑀦𑀸𑀧𑀘𑁆𑀘𑀬𑀸 𑀘𑀸𑀧𑀻’’𑀢𑀺𑀆𑀤𑀺.

𑀦𑀦𑀼 ‘‘𑀅𑀦𑀼𑀲𑀬𑀲𑀳𑀸𑀬𑀸 𑀯𑁂𑀤𑀦𑀸 𑀢𑀡𑁆𑀳𑀸𑀬 𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺 𑀯𑀘𑀦𑀲𑁆𑀲 𑀅𑀪𑀸𑀯𑀸 𑀅𑀢𑀺𑀧𑁆𑀧𑀲𑀗𑁆𑀕𑀦𑀺𑀯𑀢𑁆𑀢𑀦𑀁 𑀦 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺? 𑀦, 𑀯𑀝𑁆𑀝𑀓𑀣𑀸𑀬 𑀧𑀯𑀢𑁆𑀢𑀢𑁆𑀢𑀸. 𑀯𑀝𑁆𑀝𑀲𑁆𑀲 𑀳𑀺 𑀅𑀦𑀼𑀲𑀬𑀯𑀺𑀭𑀳𑁂 𑀅𑀪𑀸𑀯𑀢𑁄 𑀅𑀦𑀼𑀲𑀬𑀲𑀳𑀺𑀢𑀸𑀬𑁂𑀯 𑀧𑀘𑁆𑀘𑀬𑁄𑀢𑀺 𑀅𑀢𑁆𑀣𑀢𑁄 𑀯𑀼𑀢𑁆𑀢𑀫𑁂𑀢𑀁 𑀳𑁄𑀢𑀻𑀢𑀺. 𑀅𑀣 𑀯𑀸 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸’’𑀢𑀺 𑀅𑀦𑀼𑀯𑀢𑁆𑀢𑀫𑀸𑀦𑀢𑁆𑀢𑀸 𑀅𑀦𑀼𑀲𑀬𑀲𑀳𑀺𑀢𑀸𑀯 𑀧𑀘𑁆𑀘𑀬𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. ‘‘𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸’’𑀢𑀺 𑀘 𑀏𑀢𑁆𑀣 𑀯𑁂𑀤𑀦𑀸𑀧𑀘𑁆𑀘𑀬𑀸 𑀏𑀯 𑀢𑀡𑁆𑀳𑀸, 𑀦 𑀯𑁂𑀤𑀦𑀸𑀬 𑀯𑀺𑀦𑀸𑀢𑀺 𑀅𑀬𑀁 𑀦𑀺𑀬𑀫𑁄 𑀯𑀺𑀜𑁆𑀜𑀸𑀬𑀢𑀺, 𑀦 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸 𑀳𑁄𑀢𑀺 𑀏𑀯𑀸𑀢𑀺, 𑀢𑀲𑁆𑀫𑀸 𑀅𑀢𑀺𑀧𑁆𑀧𑀲𑀗𑁆𑀕𑁄 𑀦𑀢𑁆𑀣𑀺 𑀏𑀯𑀸𑀢𑀺.

𑀯𑀼𑀲𑀻𑀫𑀢𑁄𑀢𑀺 𑀯𑀼𑀲𑀺𑀢𑀯𑀢𑁄, 𑀯𑀼𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀯𑀼𑀲𑁆𑀲𑀢𑀻𑀢𑀺 𑀯𑀸 ‘‘𑀯𑀼𑀲𑀻’’𑀢𑀺 𑀫𑀕𑁆𑀕𑁄 ¶ 𑀯𑀼𑀘𑁆𑀘𑀢𑀺, 𑀲𑁄 𑀏𑀢𑀲𑁆𑀲 𑀯𑀼𑀢𑁆𑀣𑁄 𑀅𑀢𑁆𑀣𑀻𑀢𑀺 𑀯𑀼𑀲𑀻𑀫𑀸. 𑀅𑀕𑁆𑀕𑀨𑀮𑀁 𑀯𑀸 𑀧𑀭𑀺𑀦𑀺𑀝𑁆𑀞𑀺𑀢𑀯𑀸𑀲𑀢𑁆𑀢𑀸 ‘‘𑀯𑀼𑀲𑀻’’𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀯𑀼𑀲𑀻𑀫𑀸.

𑀢𑀡𑁆𑀳𑀸𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀧𑀸𑀤𑀸𑀦𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁩𑁩. 𑀲𑀲𑁆𑀲𑀢𑁄 𑀅𑀢𑁆𑀢𑀸𑀢𑀺 𑀇𑀤𑀁 𑀧𑀼𑀭𑀺𑀫𑀤𑀺𑀝𑁆𑀞𑀺𑀁 𑀉𑀧𑀸𑀤𑀺𑀬𑀫𑀸𑀦𑀁 𑀉𑀢𑁆𑀢𑀭𑀤𑀺𑀝𑁆𑀞𑀺𑀁 𑀦𑀺𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀬𑀣𑀸 𑀳𑀺 𑀏𑀲𑀸 𑀤𑀺𑀝𑁆𑀞𑀺 𑀤𑀴𑁆𑀳𑀻𑀓𑀭𑀡𑀯𑀲𑁂𑀦 𑀧𑀼𑀭𑀺𑀫𑀁 𑀉𑀢𑁆𑀢𑀭𑀸 𑀉𑀧𑀸𑀤𑀺𑀬𑀢𑀺, 𑀏𑀯𑀁 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀓𑀸𑀧𑀻𑀢𑀺. 𑀅𑀢𑁆𑀢𑀕𑁆𑀕𑀳𑀡𑀁 𑀧𑀦 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀦𑁆𑀢𑀺 𑀦 𑀇𑀤𑀁 𑀤𑀺𑀝𑁆𑀞𑀼𑀧𑀸𑀤𑀸𑀦𑀤𑀲𑁆𑀲𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀮𑁄𑀓𑁄 𑀘𑀸𑀢𑀺 𑀯𑀸 𑀅𑀢𑁆𑀢𑀕𑁆𑀕𑀳𑀡𑀯𑀺𑀦𑀺𑀫𑀼𑀢𑁆𑀢𑀁 𑀕𑀳𑀡𑀁 𑀤𑀺𑀝𑁆𑀞𑀼𑀧𑀸𑀤𑀸𑀦𑀪𑀽𑀢𑀁 𑀇𑀥 𑀧𑀼𑀭𑀺𑀫𑀤𑀺𑀝𑁆𑀞𑀺𑀉𑀢𑁆𑀢𑀭𑀤𑀺𑀝𑁆𑀞𑀺𑀯𑀘𑀦𑁂𑀳𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀥𑀫𑁆𑀫𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑁂 𑀧𑀦 𑀲𑀗𑁆𑀔𑁂𑀧𑀢𑁄 𑀢𑀡𑁆𑀳𑀸𑀤𑀴𑁆𑀳𑀢𑁆𑀢𑀁, 𑀲𑀗𑁆𑀔𑁂𑀧𑀢𑁄 𑀤𑀺𑀝𑁆𑀞𑀺𑀫𑀢𑁆𑀢𑀫𑁂𑀯, 𑀯𑀺𑀢𑁆𑀣𑀸𑀭𑀢𑁄 𑀧𑀦𑀸’’𑀢𑀺 𑀏𑀯𑀁 𑀥𑀫𑁆𑀫𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀢𑁄 𑀲𑀗𑁆𑀔𑁂𑀧𑀁 𑀯𑀺𑀢𑁆𑀣𑀸𑀭𑀜𑁆𑀘 𑀦𑀺𑀤𑁆𑀥𑀸𑀭𑁂𑀢𑀻𑀢𑀺. 𑀥𑀫𑁆𑀫𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑁂𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁 𑀤𑀝𑁆𑀞𑀩𑁆𑀩𑀁.

𑀧𑀓𑀢𑀺𑀅𑀡𑀼𑀆𑀤𑀻𑀦𑀁 ¶ 𑀲𑀲𑁆𑀲𑀢𑀕𑀸𑀳𑀧𑀼𑀩𑁆𑀩𑀗𑁆𑀕𑀫𑁄, 𑀲𑀭𑀻𑀭𑀲𑁆𑀲 𑀉𑀘𑁆𑀙𑁂𑀤𑀕𑁆𑀕𑀸𑀳𑀧𑀼𑀩𑁆𑀩𑀗𑁆𑀕𑀫𑁄 𑀘 𑀢𑁂𑀲𑀁 𑀲𑀸𑀫𑀺𑀪𑀽𑀢𑁄 𑀓𑁄𑀘𑀺 𑀲𑀲𑁆𑀲𑀢𑁄 𑀉𑀘𑁆𑀙𑀺𑀚𑁆𑀚𑀫𑀸𑀦𑁄 𑀯𑀸 𑀅𑀢𑁆𑀢𑀸 𑀅𑀢𑁆𑀣𑀻𑀢𑀺 𑀅𑀢𑁆𑀢𑀕𑁆𑀕𑀸𑀳𑁄 𑀓𑀤𑀸𑀘𑀺 𑀳𑁄𑀢𑀻𑀢𑀺 ‘‘𑀬𑁂𑀪𑀼𑀬𑁆𑀬𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀬𑁂𑀪𑀼𑀬𑁆𑀬𑁂𑀦 𑀧𑀞𑀫𑀁 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀦𑁆𑀢𑀺𑀆𑀤𑀺𑀦𑀸 𑀯𑀸 𑀲𑀫𑁆𑀩𑀦𑁆𑀥𑁄.

𑀬𑀤𑀺𑀧𑀺 𑀪𑀯𑀭𑀸𑀕𑀚𑀯𑀦𑀯𑀻𑀣𑀺 𑀲𑀩𑁆𑀩𑀧𑀞𑀫𑀁 𑀧𑀯𑀢𑁆𑀢𑀢𑀺 𑀕𑀳𑀺𑀢𑀧𑁆𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀪𑀯𑀦𑀺𑀓𑀦𑁆𑀢𑀺𑀬𑀸 𑀧𑀯𑀢𑁆𑀢𑀺𑀢𑀩𑁆𑀩𑀢𑁆𑀢𑀸, 𑀲𑁄 𑀧𑀦 𑀪𑀯𑀭𑀸𑀕𑁄 𑀢𑀡𑁆𑀳𑀸𑀤𑀴𑁆𑀳𑀢𑁆𑀢𑀁 𑀦 𑀳𑁄𑀢𑀻𑀢𑀺 𑀫𑀜𑁆𑀜𑀫𑀸𑀦𑁄 𑀦 𑀓𑀸𑀫𑀼𑀧𑀸𑀤𑀸𑀦𑀲𑁆𑀲 𑀧𑀞𑀫𑀼𑀧𑁆𑀧𑀢𑁆𑀢𑀺𑀫𑀸𑀳. 𑀢𑀡𑁆𑀳𑀸 𑀓𑀸𑀫𑀼𑀧𑀸𑀤𑀸𑀦𑀦𑁆𑀢𑀺 𑀧𑀦 𑀯𑀺𑀪𑀸𑀕𑀲𑁆𑀲 𑀅𑀓𑀭𑀡𑁂 𑀲𑀩𑁆𑀩𑀸𑀧𑀺 𑀢𑀡𑁆𑀳𑀸 𑀓𑀸𑀫𑀼𑀧𑀸𑀤𑀸𑀦𑀦𑁆𑀢𑀺, 𑀓𑀭𑀡𑁂𑀧𑀺 𑀓𑀸𑀫𑀭𑀸𑀕𑀢𑁄 𑀅𑀜𑁆𑀜𑀸𑀧𑀺 𑀢𑀡𑁆𑀳𑀸 𑀤𑀴𑁆𑀳𑀪𑀸𑀯𑀁 𑀧𑀢𑁆𑀢𑀸 𑀓𑀸𑀫𑀼𑀧𑀸𑀤𑀸𑀦𑀦𑁆𑀢𑀺 𑀢𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑀯𑀚𑁆𑀛𑀢𑀸 𑀯𑀼𑀢𑁆𑀢𑀸.

𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀯𑀺𑀲𑀬𑁄. 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀆𑀮𑀬𑁄, 𑀢𑀢𑁆𑀣 𑀭𑀫𑀢𑀻𑀢𑀺 𑀆𑀮𑀬𑀭𑀸𑀫𑀸 ¶ , 𑀧𑀚𑀸. 𑀢𑁂𑀦𑁂𑀯 𑀲𑀸 𑀆𑀮𑀬𑀭𑀸𑀫𑀢𑀸 𑀘 𑀲𑀓𑀲𑀦𑁆𑀢𑀸𑀦𑁂 𑀧𑀭𑀲𑀦𑁆𑀢𑀸𑀦𑁂 𑀘 𑀧𑀸𑀓𑀝𑀸 𑀳𑁄𑀢𑀻𑀢𑀺. 𑀉𑀧𑀦𑀺𑀲𑁆𑀲𑀬𑀯𑀘𑀦𑁂𑀦 𑀆𑀭𑀫𑁆𑀫𑀡𑀸𑀦𑀦𑁆𑀢𑀭𑀧𑀓𑀢𑀽𑀧𑀦𑀺𑀲𑁆𑀲𑀬𑀸 𑀯𑀼𑀢𑁆𑀢𑀸𑀢𑀺 𑀅𑀦𑀦𑁆𑀢𑀭𑀧𑀘𑁆𑀘𑀬𑀸𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀓𑀢𑁄 𑀳𑁄𑀢𑀺.

𑀉𑀧𑀸𑀤𑀸𑀦𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀯𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁩𑁪. 𑀨𑀮𑀯𑁄𑀳𑀸𑀭𑁂𑀦 𑀓𑀫𑁆𑀫𑀪𑀯𑁄 𑀪𑀯𑁄𑀢𑀺 𑀯𑀼𑀢𑁆𑀢𑁄𑀢𑀺 𑀉𑀧𑀧𑀢𑁆𑀢𑀺𑀪𑀯𑀦𑀺𑀩𑁆𑀩𑀘𑀦𑀫𑁂𑀯 𑀤𑁆𑀯𑀬𑀲𑁆𑀲𑀧𑀺 𑀲𑀸𑀥𑀸𑀭𑀡𑀁 𑀓𑀢𑁆𑀯𑀸 𑀯𑀤𑀦𑁆𑀢𑁄 𑀆𑀳 ‘‘𑀪𑀯𑀢𑀻𑀢𑀺 𑀪𑀯𑁄’’𑀢𑀺. 𑀪𑀯𑀁 𑀕𑀘𑁆𑀙𑀢𑀻𑀢𑀺 𑀦𑀺𑀧𑁆𑀨𑀸𑀤𑀦𑀨𑀮𑀯𑀲𑁂𑀦 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀓𑀸𑀮𑁂 𑀪𑀯𑀸𑀪𑀺𑀫𑀼𑀔𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄, 𑀦𑀺𑀩𑁆𑀩𑀢𑁆𑀢𑀦𑀫𑁂𑀯 𑀯𑀸 𑀏𑀢𑁆𑀣 𑀕𑀫𑀦𑀁 𑀅𑀥𑀺𑀧𑁆𑀧𑁂𑀢𑀁.

𑀲𑀜𑁆𑀜𑀸𑀯𑀢𑀁 𑀪𑀯𑁄 𑀲𑀜𑁆𑀜𑀸𑀪𑀯𑁄𑀢𑀺 𑀏𑀢𑁆𑀣 𑀯𑀦𑁆𑀢𑀼-𑀲𑀤𑁆𑀤𑀲𑁆𑀲 𑀮𑁄𑀧𑁄 𑀤𑀝𑁆𑀞𑀩𑁆𑀩𑁄, 𑀢𑀲𑁆𑀲 𑀯𑀸 𑀅𑀢𑁆𑀣𑁂 𑀅𑀓𑀸𑀭𑀁 𑀓𑀢𑁆𑀯𑀸 ‘‘𑀲𑀜𑁆𑀜𑀪𑀯𑁄’’𑀢𑀺𑀧𑀺 𑀧𑀸𑀞𑁄. 𑀯𑁄𑀓𑀺𑀭𑀻𑀬𑀢𑀺 𑀧𑀲𑀸𑀭𑀻𑀬𑀢𑀺 𑀯𑀺𑀢𑁆𑀣𑀸𑀭𑀻𑀬𑀢𑀻𑀢𑀺 𑀯𑁄𑀓𑀸𑀭𑁄, 𑀯𑁄𑀓𑀺𑀭𑀡𑀁 𑀯𑀸 𑀯𑁄𑀓𑀸𑀭𑁄, 𑀲𑁄 𑀏𑀓𑀲𑁆𑀫𑀺𑀁 𑀧𑀯𑀢𑁆𑀢𑀢𑁆𑀢𑀸 𑀏𑀓𑁄 𑀯𑁄𑀓𑀸𑀭𑁄𑀢𑀺 𑀯𑀼𑀢𑁆𑀢𑁄, 𑀧𑀤𑁂𑀲𑀧𑀲𑀝𑀼𑀧𑁆𑀧𑀢𑁆𑀢𑀻𑀢𑀺 𑀅𑀢𑁆𑀣𑁄.

𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀸 ¶ 𑀯𑀸…𑀧𑁂… 𑀲𑀗𑁆𑀕𑀳𑀺𑀢𑀸𑀢𑀺 𑀆𑀘𑀬𑀕𑀸𑀫𑀺𑀢𑀸𑀬 𑀓𑀫𑁆𑀫𑀲𑀗𑁆𑀔𑀸𑀢𑀢𑀁 𑀤𑀲𑁆𑀲𑁂𑀢𑁆𑀯𑀸 𑀓𑀫𑁆𑀫𑀪𑀯𑁂 𑀲𑀗𑁆𑀕𑀳𑀺𑀢𑀪𑀸𑀯𑀁 𑀧𑀭𑀺𑀬𑀸𑀬𑁂𑀦 𑀯𑀤𑀢𑀺, 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀦 𑀘𑁂𑀢𑀦𑀸𑀯 𑀓𑀫𑁆𑀫𑀪𑀯𑁄. 𑀯𑀼𑀢𑁆𑀢𑀜𑁆𑀳𑀺 ‘‘𑀓𑀫𑁆𑀫𑀪𑀯𑁄 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀲𑀫𑁆𑀧𑀬𑀼𑀢𑁆𑀢𑁄, 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑁄’’𑀢𑀺 (𑀥𑀸𑀢𑀼. 𑁨𑁪𑁪). 𑀉𑀧𑀧𑀢𑁆𑀢𑀺𑀪𑀯𑁄 𑀢𑀻𑀳𑀺𑀧𑀺 𑀢𑀺𑀓𑁂𑀳𑀺 𑀯𑀼𑀢𑁆𑀢𑀸 𑀉𑀧𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀯. 𑀬𑀣𑀸𑀳 ‘‘𑀉𑀧𑀧𑀢𑁆𑀢𑀺𑀪𑀯𑁄 𑀓𑀸𑀫𑀪𑀯𑁄 𑀲𑀜𑁆𑀜𑀸𑀪𑀯𑁄 𑀧𑀜𑁆𑀘𑀯𑁄𑀓𑀸𑀭𑀪𑀯𑁄 𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺 𑀏𑀓𑀸𑀤𑀲𑀳𑀸𑀬𑀢𑀦𑁂𑀳𑀺 𑀲𑀢𑁆𑀢𑀭𑀲𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑁄’’𑀢𑀺𑀆𑀤𑀺 (𑀥𑀸𑀢𑀼. 𑁬𑁭). 𑀬𑀤𑀺 𑀳𑀺 𑀅𑀦𑀼𑀧𑀸𑀤𑀺𑀦𑁆𑀦𑀓𑀸𑀦𑀫𑁆𑀧𑀺 𑀕𑀳𑀡𑀁 𑀲𑀺𑀬𑀸, ‘‘𑀤𑁆𑀯𑀸𑀤𑀲𑀳𑀸𑀬𑀢𑀦𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀥𑀸𑀢𑀽𑀳𑀻’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺.

𑀲𑀗𑁆𑀔𑀸𑀭𑀪𑀯𑀸𑀦𑀁 𑀥𑀫𑁆𑀫𑀪𑁂𑀤𑀢𑁄 𑀦 𑀲𑀗𑁆𑀔𑀸𑀭𑀸 𑀏𑀯 𑀧𑀼𑀦 𑀯𑀼𑀢𑁆𑀢𑀸𑀢𑀺 ‘‘𑀲𑀸𑀢𑁆𑀣𑀓𑀫𑁂𑀯𑀺𑀤𑀁 𑀧𑀼𑀦𑀯𑀘𑀦’’𑀦𑁆𑀢𑀺 𑀏𑀢𑀁 𑀦 ¶ 𑀬𑀼𑀢𑁆𑀢𑀦𑁆𑀢𑀺 𑀘𑁂? 𑀦, 𑀪𑀯𑁂𑀓𑀤𑁂𑀲𑀪𑀸𑀯𑁂𑀦 𑀲𑀗𑁆𑀔𑀸𑀭𑀸𑀦𑀁 𑀪𑀯𑁄𑀢𑀺 𑀧𑀼𑀦 𑀯𑀼𑀢𑁆𑀢𑀢𑁆𑀢𑀸. 𑀧𑀭𑁂𑀦 𑀯𑀸 𑀥𑀫𑁆𑀫𑀯𑀺𑀲𑁂𑀲𑀁 𑀅𑀕𑀡𑁂𑀢𑁆𑀯𑀸 𑀧𑀼𑀦𑀯𑀘𑀦𑀁 𑀘𑁄𑀤𑀺𑀢𑀦𑁆𑀢𑀺 𑀘𑁄𑀤𑀓𑀸𑀪𑀺𑀮𑀸𑀲𑀯𑀲𑁂𑀦 ‘‘𑀲𑀸𑀢𑁆𑀣𑀓𑀫𑁂𑀯𑀺𑀤𑀁 𑀧𑀼𑀦𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑀓𑀸𑀫𑀪𑀯𑀸𑀤𑀺𑀦𑀺𑀩𑁆𑀩𑀢𑁆𑀢𑀦𑀓𑀲𑁆𑀲 𑀓𑀫𑁆𑀫𑀲𑁆𑀲 𑀓𑀸𑀫𑀪𑀯𑀸𑀤𑀺𑀪𑀸𑀯𑁄 𑀨𑀮𑀯𑁄𑀳𑀸𑀭𑁂𑀦 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄. 𑀅𑀦𑁆𑀢𑁄𑀕𑀥𑁂 𑀯𑀺𑀲𑀼𑀁 𑀅𑀕𑀡𑁂𑀢𑁆𑀯𑀸 𑀅𑀩𑁆𑀪𑀦𑁆𑀢𑀭𑀕𑀢𑁂 𑀏𑀯 𑀓𑀢𑁆𑀯𑀸 𑀓𑀸𑀫𑀪𑀯𑀸𑀤𑀺𑀓𑁂 𑀓𑀫𑁆𑀫𑀼𑀧𑀧𑀢𑁆𑀢𑀺𑀪𑀯𑀯𑀲𑁂𑀦 𑀤𑀼𑀕𑀼𑀡𑁂 𑀓𑀢𑁆𑀯𑀸 𑀆𑀳 ‘‘𑀙 𑀪𑀯𑀸’’𑀢𑀺.

𑀅𑀯𑀺𑀲𑁂𑀲𑁂𑀦𑀸𑀢𑀺 𑀉𑀧𑀸𑀤𑀸𑀦𑀪𑁂𑀤𑀁 𑀅𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀉𑀧𑀸𑀤𑀸𑀦𑀪𑁂𑀤𑀸𑀓𑀭𑀡𑁂𑀦𑁂𑀯 𑀘 𑀤𑁆𑀯𑀸𑀤𑀲𑀧𑁆𑀧𑀪𑁂𑀤𑀲𑁆𑀲 𑀲𑀗𑁆𑀕𑀳𑀯𑀲𑁂𑀦 𑀲𑀗𑁆𑀕𑀳𑀢𑁄 ‘‘𑀙 𑀪𑀯𑀸’’𑀢𑀺 𑀯𑀼𑀢𑁆𑀢𑀁.

𑀕𑁄𑀲𑀻𑀮𑁂𑀦 𑀓𑀼𑀓𑁆𑀓𑀼𑀭𑀲𑀻𑀮𑁂𑀦 𑀘 𑀲𑀫𑀢𑁆𑀢𑁂𑀦 𑀲𑀫𑀸𑀤𑀺𑀦𑁆𑀦𑁂𑀦 𑀕𑀼𑀦𑁆𑀦𑀁 𑀓𑀼𑀓𑁆𑀓𑀼𑀭𑀸𑀦𑀜𑁆𑀘 𑀲𑀳𑀩𑁆𑀬𑀢𑀸 𑀯𑀼𑀢𑁆𑀢𑀸𑀢𑀺 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀯𑀢𑁄 𑀛𑀸𑀦𑀪𑀸𑀯𑀦𑀸 𑀦 𑀇𑀚𑁆𑀛𑀢𑀻𑀢𑀺 𑀫𑀜𑁆𑀜𑀫𑀸𑀦𑀸 𑀢𑁂𑀦 𑀭𑀽𑀧𑀸𑀭𑀽𑀧𑀪𑀯𑀸 𑀦 𑀳𑁄𑀦𑁆𑀢𑀻𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀯𑀓𑁆𑀔𑀫𑀸𑀦𑁂𑀦 𑀧𑀦 𑀧𑀓𑀸𑀭𑁂𑀦 𑀧𑀘𑁆𑀘𑀬𑀪𑀸𑀯𑀢𑁄 ‘‘𑀢𑀁 𑀦 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀆𑀳. 𑀅𑀲𑀼𑀤𑁆𑀥𑀺𑀫𑀕𑁆𑀕𑁂 𑀘 𑀲𑀼𑀤𑁆𑀥𑀺𑀫𑀕𑁆𑀕𑀧𑀭𑀸𑀫𑀲𑀦𑀁 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀦𑁆𑀢𑀺 𑀲𑀼𑀤𑁆𑀥𑀺𑀫𑀕𑁆𑀕𑀧𑀭𑀸𑀫𑀲𑀦𑁂𑀦 𑀭𑀽𑀧𑀸𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀁 𑀦𑀺𑀩𑁆𑀩𑀢𑁆𑀢𑀦𑀁 𑀦 𑀬𑀼𑀚𑁆𑀚𑀢𑀻𑀢𑀺. 𑀧𑀼𑀭𑀸𑀡𑀪𑀸𑀭𑀢𑀲𑀻𑀢𑀸𑀳𑀭𑀡𑀧𑀲𑀼𑀩𑀦𑁆𑀥𑀯𑀺𑀥𑀺𑀆𑀤𑀺𑀲𑀯𑀦𑀁 𑀅𑀲𑀤𑁆𑀥𑀫𑁆𑀫𑀲𑀯𑀦𑀁. 𑀆𑀤𑀺-𑀲𑀤𑁆𑀤𑁂𑀦 𑀅𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀁 𑀧𑀼𑀩𑁆𑀩𑁂 ¶ 𑀘 𑀅𑀓𑀢𑀧𑀼𑀜𑁆𑀜𑀢𑀁 𑀅𑀢𑁆𑀢𑀫𑀺𑀘𑁆𑀙𑀸𑀧𑀡𑀺𑀥𑀺𑀢𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀤𑀦𑁆𑀢𑁄𑀕𑀥𑀸 𑀏𑀯𑀸𑀢𑀺 𑀢𑀲𑁆𑀫𑀺𑀁 𑀤𑀼𑀘𑁆𑀘𑀭𑀺𑀢𑀦𑀺𑀩𑁆𑀩𑀢𑁆𑀢𑁂 𑀲𑀼𑀘𑀭𑀺𑀢𑀦𑀺𑀩𑁆𑀩𑀢𑁆𑀢𑁂 𑀘 𑀓𑀸𑀫𑀪𑀯𑁂 𑀅𑀦𑁆𑀢𑁄𑀕𑀥𑀸 𑀏𑀯𑀸𑀢𑀺 𑀅𑀢𑁆𑀣𑁄.

𑀅𑀦𑁆𑀢𑁄𑀕𑀥𑀸𑀢𑀺 𑀘 𑀲𑀜𑁆𑀜𑀸𑀪𑀯𑀧𑀜𑁆𑀘𑀯𑁄𑀓𑀸𑀭𑀪𑀯𑀸𑀦𑀁 𑀏𑀓𑀤𑁂𑀲𑁂𑀦 𑀅𑀦𑁆𑀢𑁄𑀕𑀥𑀢𑁆𑀢𑀸 𑀯𑀼𑀢𑁆𑀢𑀁. 𑀦 𑀳𑀺 𑀢𑁂 𑀦𑀺𑀭𑀯𑀲𑁂𑀲𑀸 𑀓𑀸𑀫𑀪𑀯𑁂 𑀅𑀦𑁆𑀢𑁄𑀕𑀥𑀸𑀢𑀺. 𑀲𑀧𑁆𑀧𑀪𑁂𑀤𑀲𑁆𑀲𑀸𑀢𑀺 𑀲𑀼𑀕𑀢𑀺𑀤𑀼𑀕𑁆𑀕𑀢𑀺𑀫𑀦𑀼𑀲𑁆𑀲𑀸𑀤𑀺𑀧𑁆𑀧𑀪𑁂𑀤𑀯𑀢𑁄. 𑀓𑀫𑁂𑀦 𑀘 𑀅𑀯𑀢𑁆𑀯𑀸 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀲𑁆𑀲 𑀅𑀦𑁆𑀢𑁂 𑀪𑀯𑀧𑀘𑁆𑀘𑀬𑀪𑀸𑀯𑀯𑀘𑀦𑀁 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁 𑀯𑀺𑀬 𑀅𑀪𑀺𑀡𑁆𑀳𑀁 𑀅𑀲𑀫𑀼𑀤𑀸𑀘𑀭𑀡𑀢𑁄 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀦𑀺𑀫𑀺𑀢𑁆𑀢𑀢𑁆𑀢𑀸 𑀘.

𑀳𑁂𑀢𑀼𑀧𑀘𑁆𑀘𑀬𑀧𑁆𑀧𑀪𑁂𑀤𑁂𑀳𑀻𑀢𑀺 𑀏𑀢𑁆𑀣 𑀫𑀕𑁆𑀕𑀧𑀘𑁆𑀘𑀬𑁄 𑀘 𑀯𑀢𑁆𑀢𑀩𑁆𑀩𑁄. 𑀤𑀺𑀝𑁆𑀞𑀼𑀧𑀸𑀤𑀸𑀦𑀸𑀤𑀻𑀦𑀺 𑀳𑀺 𑀫𑀕𑁆𑀕𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺.

𑀪𑀯𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀚𑀸𑀢𑀺𑀚𑀭𑀸𑀫𑀭𑀡𑀸𑀤𑀺𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁩𑁫. 𑀉𑀧𑀧𑀢𑁆𑀢𑀺𑀪𑀯𑀼𑀧𑁆𑀧𑀢𑁆𑀢𑀺𑀬𑁂𑀯 ¶ 𑀚𑀸𑀢𑀻𑀢𑀺 𑀆𑀳 ‘‘𑀦 𑀉𑀧𑀧𑀢𑁆𑀢𑀺𑀪𑀯𑁄’’𑀢𑀺. 𑀚𑀸𑀬𑀫𑀸𑀦𑀲𑁆𑀲 𑀧𑀦 𑀚𑀸𑀢𑀺 𑀚𑀸𑀢𑀻𑀢𑀺 𑀉𑀧𑀧𑀢𑁆𑀢𑀺𑀪𑀯𑁄𑀧𑀺 𑀅𑀲𑀢𑀺 𑀅𑀪𑀸𑀯𑀸 𑀚𑀸𑀢𑀺𑀬𑀸 𑀧𑀘𑁆𑀘𑀬𑁄𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀚𑀸𑀬𑀫𑀸𑀦𑀭𑀽𑀧𑀧𑀤𑀝𑁆𑀞𑀸𑀦𑀢𑀸𑀧𑀺 𑀳𑀺 𑀭𑀽𑀧𑀚𑀸𑀢𑀺𑀬𑀸 𑀯𑀼𑀢𑁆𑀢𑀸 ‘‘𑀉𑀧𑀘𑀺𑀢𑀭𑀽𑀧𑀧𑀤𑀝𑁆𑀞𑀸𑀦𑁄 (𑀥. 𑀲. 𑀅𑀝𑁆𑀞. 𑁬𑁪𑁧) 𑀉𑀧𑀘𑀬𑁄, 𑀅𑀦𑀼𑀧𑁆𑀧𑀩𑀦𑁆𑀥𑀭𑀽𑀧𑀧𑀤𑀝𑁆𑀞𑀸𑀦𑀸 𑀲𑀦𑁆𑀢𑀢𑀻’’𑀢𑀺.

𑀔𑀦𑁆𑀥𑀸𑀦𑀁 𑀚𑀸𑀢𑀸𑀦𑀁 𑀉𑀜𑁆𑀜𑀸𑀢𑀢𑀸𑀦𑀼𑀜𑁆𑀜𑀸𑀢𑀢𑀸𑀘 𑀳𑀻𑀦𑀧𑀡𑀻𑀢𑀢𑀸. 𑀆𑀤𑀺-𑀲𑀤𑁆𑀤𑁂𑀦 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀤𑀺𑀯𑀺𑀲𑁂𑀲𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑀕𑀢𑀢𑁄 𑀅𑀜𑁆𑀜𑀲𑁆𑀲 𑀯𑀺𑀲𑁂𑀲𑀓𑀸𑀭𑀓𑀲𑁆𑀲 𑀓𑀸𑀭𑀡𑀲𑁆𑀲 𑀅𑀪𑀸𑀯𑀸 ‘‘𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑁂’’𑀢𑀺 𑀆𑀳.

𑀢𑁂𑀦 𑀢𑁂𑀦𑀸𑀢𑀺 𑀜𑀸𑀢𑀺𑀩𑁆𑀬𑀲𑀦𑀸𑀤𑀺𑀦𑀸 𑀚𑀭𑀸𑀫𑀭𑀡𑀢𑁄 𑀅𑀜𑁆𑀜𑁂𑀦 𑀤𑀼𑀓𑁆𑀔𑀥𑀫𑁆𑀫𑁂𑀦. 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸𑀢𑀺 𑀉𑀧𑀦𑀺𑀲𑁆𑀲𑀬𑀁𑀲𑁂𑀦, 𑀉𑀧𑀦𑀺𑀲𑁆𑀲𑀬𑀮𑁂𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀬𑁄 𑀳𑀺 𑀧𑀝𑁆𑀞𑀸𑀦𑁂 𑀅𑀦𑀸𑀕𑀢𑁄 𑀲𑀢𑀺 𑀪𑀸𑀯𑀸 𑀅𑀲𑀢𑀺 𑀘 𑀅𑀪𑀸𑀯𑀸 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑁂𑀦 𑀉𑀧𑀦𑀺𑀲𑁆𑀲𑀬𑁄, 𑀲𑁄 ‘‘𑀉𑀧𑀦𑀺𑀲𑁆𑀲𑀬𑀓𑁄𑀝𑀻’’𑀢𑀺 𑀯𑀼𑀘𑁆𑀘𑀢𑀺.

𑀚𑀸𑀢𑀺𑀚𑀭𑀸𑀫𑀭𑀡𑀸𑀤𑀺𑀧𑀤𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀯𑀘𑀓𑁆𑀓𑀓𑀣𑀸𑀯𑀡𑁆𑀡𑀦𑀸

𑁨𑁪𑁨. 𑀲𑀫𑀺𑀢𑀦𑁆𑀢𑀺 ¶ 𑀲𑀗𑁆𑀕𑀢𑀁, 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀦𑁆𑀢𑀺 𑀅𑀢𑁆𑀣𑁄. 𑀓𑀸𑀫𑀬𑀸𑀦𑀲𑁆𑀲𑀸𑀢𑀺 𑀓𑀸𑀫𑀬𑀫𑀸𑀦𑀲𑁆𑀲, 𑀓𑀸𑀫𑁄 𑀬𑀸𑀦𑀁 𑀏𑀢𑀲𑁆𑀲𑀸𑀢𑀺 𑀯𑀸 𑀓𑀸𑀫𑀬𑀸𑀦𑁄, 𑀢𑀲𑁆𑀲 𑀓𑀸𑀫𑀬𑀸𑀦𑀲𑁆𑀲. 𑀭𑀼𑀧𑁆𑀧𑀢𑀻𑀢𑀺 𑀲𑁄𑀓𑁂𑀦 𑀭𑀼𑀧𑁆𑀧𑀢𑀺.

𑀧𑀭𑀺𑀬𑀼𑀝𑁆𑀞𑀸𑀦𑀢𑀸𑀬 𑀢𑀺𑀝𑁆𑀞𑀦𑀲𑀻𑀮𑁄 𑀧𑀭𑀺𑀬𑀼𑀝𑁆𑀞𑀸𑀦𑀝𑁆𑀞𑀸𑀬𑀻. ‘‘𑀧𑀭𑀺𑀬𑀼𑀝𑁆𑀞𑀝𑁆𑀞𑀸𑀬𑀺𑀦𑁄’’𑀢𑀺 𑀯𑀸 𑀧𑀸𑀞𑁄, 𑀢𑀢𑁆𑀣 𑀧𑀭𑀺𑀬𑀼𑀝𑁆𑀞𑀸𑀢𑀻𑀢𑀺 𑀧𑀭𑀺𑀬𑀼𑀝𑁆𑀞𑀁, 𑀤𑀺𑀝𑁆𑀞𑀺𑀧𑀭𑀺𑀬𑀼𑀝𑁆𑀞𑀁, 𑀢𑁂𑀦 𑀢𑀺𑀝𑁆𑀞𑀢𑀻𑀢𑀺 𑀧𑀭𑀺𑀬𑀼𑀝𑁆𑀞𑀝𑁆𑀞𑀸𑀬𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀧𑀜𑁆𑀘 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀻𑀢𑀺 ‘‘𑀫𑀸𑀮𑀸 𑀫𑀺𑀮𑀸𑀬𑀦𑁆𑀢𑀺, 𑀯𑀢𑁆𑀣𑀸𑀦𑀺 𑀓𑀺𑀮𑀺𑀲𑁆𑀲𑀦𑁆𑀢𑀺, 𑀓𑀘𑁆𑀙𑁂𑀳𑀺 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺, 𑀓𑀸𑀬𑁂 𑀯𑁂𑀯𑀡𑁆𑀡𑀺𑀬𑀁 𑀑𑀓𑁆𑀓𑀫𑀢𑀺, 𑀤𑁂𑀯𑁄 𑀤𑁂𑀯𑀸𑀲𑀦𑁂 𑀦𑀸𑀪𑀺𑀭𑀫𑀢𑀻’’𑀢𑀺 (𑀇𑀢𑀺𑀯𑀼. 𑁮𑁩) 𑀯𑀼𑀢𑁆𑀢𑀸𑀦𑀺 𑀧𑀜𑁆𑀘 𑀫𑀭𑀡𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀢𑀸𑀦𑀺 𑀳𑀺 𑀤𑀺𑀲𑁆𑀯𑀸 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑁂 𑀉𑀧𑀧𑀢𑁆𑀢𑀺𑀪𑀯𑁂 𑀪𑀯𑀙𑀦𑁆𑀤𑀩𑀮𑁂𑀦 ¶ 𑀤𑁂𑀯𑀸𑀦𑀁 𑀩𑀮𑀯𑀲𑁄𑀓𑁄 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀩𑀸𑀮𑁄𑀢𑀺 𑀅𑀯𑀺𑀤𑁆𑀯𑀸. 𑀢𑁂𑀦 𑀅𑀯𑀺𑀚𑁆𑀚𑀸𑀬 𑀓𑀸𑀭𑀡𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑀺𑀯𑀺𑀥𑀦𑁆𑀢𑀺 𑀢𑀲𑁆𑀲𑀸𑀭𑀼𑀧𑁆𑀧𑀓𑀣𑀸𑀲𑀯𑀦𑀓𑀫𑁆𑀫𑀓𑀸𑀭𑀡𑀸𑀤𑀲𑁆𑀲𑀦𑀫𑀭𑀡𑀓𑀸𑀮𑀓𑀫𑁆𑀫𑁄𑀧𑀝𑁆𑀞𑀸𑀦𑀦𑀺𑀤𑀸𑀦𑀁 𑀲𑁄𑀓𑀸𑀤𑀺𑀤𑀼𑀓𑁆𑀔𑀁. 𑀆𑀲𑀯𑁂 𑀲𑀸𑀥𑁂𑀦𑁆𑀢𑀻𑀢𑀺 𑀆𑀲𑀯𑁂 𑀕𑀫𑁂𑀦𑁆𑀢𑀺 𑀩𑁄𑀥𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀲𑀢𑀻𑀢𑀺 𑀅𑀯𑀺𑀤𑀺𑀢𑀸𑀤𑀺𑀢𑀸𑀬 𑀅𑀦𑀸𑀤𑀺𑀪𑀸𑀯𑁂 𑀲𑀢𑀺. 𑀆𑀤𑀺𑀫𑀢𑁆𑀢𑀓𑀣𑀦𑀦𑁆𑀢𑀺𑀆𑀤𑀺 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀆𑀤𑀺𑀫𑀁, 𑀪𑀯𑀘𑀓𑁆𑀓𑀁. 𑀢𑀲𑁆𑀲 𑀪𑀸𑀯𑁄 𑀆𑀤𑀺𑀫𑀢𑁆𑀢𑀁, 𑀢𑀲𑁆𑀲 𑀓𑀣𑀦𑀁 𑀆𑀤𑀺𑀫𑀢𑁆𑀢𑀓𑀣𑀦𑀁. 𑀯𑀺𑀲𑁂𑀲𑀦𑀺𑀯𑀢𑁆𑀢𑀺𑀅𑀢𑁆𑀣𑁄 𑀯𑀸 𑀫𑀢𑁆𑀢-𑀲𑀤𑁆𑀤𑁄, 𑀲𑀢𑀺 𑀅𑀦𑀸𑀤𑀺𑀪𑀸𑀯𑁂 𑀅𑀯𑀺𑀚𑁆𑀚𑀸 𑀆𑀤𑀺𑀫𑁆𑀳𑀺 𑀫𑀚𑁆𑀛𑁂 𑀧𑀭𑀺𑀬𑁄𑀲𑀸𑀦𑁂 𑀘 𑀲𑀩𑁆𑀩𑀢𑁆𑀣 𑀲𑀺𑀬𑀸𑀢𑀺 𑀆𑀤𑀺𑀫𑀢𑁆𑀢𑀸𑀬 𑀅𑀯𑀺𑀚𑁆𑀚𑀸𑀬 𑀓𑀣𑀦𑀁 𑀯𑀺𑀭𑀼𑀚𑁆𑀛𑀢𑀻𑀢𑀺 𑀅𑀢𑁆𑀣𑁄. 𑀅𑀯𑀺𑀚𑁆𑀚𑀸𑀕𑁆𑀕𑀳𑀡𑁂𑀦𑀸𑀢𑀺 𑀅𑀯𑀺𑀚𑁆𑀚𑀸𑀬 𑀉𑀧𑁆𑀧𑀸𑀤𑀦𑁂𑀦 𑀓𑀣𑀦𑁂𑀦, 𑀅𑀧𑁆𑀧𑀳𑀸𑀦𑁂𑀦 𑀯𑀸, 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀲𑀦𑁆𑀦𑀺𑀳𑀺𑀢𑀪𑀸𑀯𑀓𑀭𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀸𑀤𑀻𑀦𑀻𑀢𑀺 𑀓𑀫𑁆𑀫𑀯𑀺𑀧𑀸𑀓𑀯𑀝𑁆𑀝𑀸𑀦𑀺. 𑀯𑀝𑁆𑀝𑀓𑀸𑀭𑀡𑀪𑀸𑀯𑁂𑀦 𑀧𑀥𑀸𑀦𑀢𑁆𑀢𑀸 ‘‘𑀧𑀥𑀸𑀦𑀥𑀫𑁆𑀫𑁄’’𑀢𑀺 𑀅𑀯𑀺𑀚𑁆𑀚𑀸 𑀓𑀣𑀺𑀢𑀸. 𑀯𑀤𑀢𑀻𑀢𑀺 𑀯𑀤𑁄. 𑀯𑁂𑀤𑁂𑀢𑀺, 𑀯𑁂𑀤𑀺𑀬𑀢𑀻𑀢𑀺 𑀯𑀸 𑀯𑁂𑀤𑁂𑀬𑁆𑀬𑁄, 𑀲𑀼𑀔𑀸𑀤𑀺𑀁 𑀅𑀦𑀼𑀪𑀯𑀢𑀺, 𑀲𑀩𑁆𑀩𑀯𑀺𑀲𑀬𑁂 𑀯𑀸 𑀚𑀸𑀦𑀸𑀢𑀺, ‘‘𑀲𑀼𑀔𑀺𑀢𑁄’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑀸 𑀧𑀭𑁂𑀳𑀺 𑀘 𑀚𑀸𑀦𑀸𑀢𑀺 𑀜𑀸𑀬𑀢𑀺 𑀘𑀸𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀸𑀤𑀺𑀦𑀸 𑀯𑀸 𑀅𑀢𑁆𑀢𑀦𑀸 𑀯𑀸𑀢𑀺 𑀯𑀸-𑀲𑀤𑁆𑀤𑁄 𑀘-𑀲𑀤𑁆𑀤𑀢𑁆𑀣𑁄. 𑀢𑁂𑀦𑀸𑀳 ‘‘𑀓𑀸𑀭𑀓𑀯𑁂𑀤𑀓𑀭𑀳𑀺𑀢’’𑀦𑁆𑀢𑀺 𑀘-𑀲𑀤𑁆𑀤𑀢𑁆𑀣𑀲𑀫𑀸𑀲𑀁.

𑀤𑁆𑀯𑀸𑀤𑀲𑀯𑀺𑀥𑀲𑀼𑀜𑁆𑀜𑀢𑀸𑀲𑀼𑀜𑁆𑀜𑀦𑁆𑀢𑀺 𑀅𑀯𑀺𑀚𑁆𑀚𑀸𑀤𑀻𑀦𑀁 𑀤𑁆𑀯𑀸𑀤𑀲𑀯𑀺𑀥𑀸𑀦𑀁 𑀲𑀼𑀜𑁆𑀜𑀢𑀸𑀬 𑀲𑀼𑀜𑁆𑀜𑀁, 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀯𑀸 𑀲𑀼𑀜𑁆𑀜𑀢𑀁 𑀏𑀓𑀁 𑀓𑀢𑁆𑀯𑀸 𑀤𑁆𑀯𑀸𑀤𑀲𑀗𑁆𑀕𑀢𑀸𑀬 𑀤𑁆𑀯𑀸𑀤𑀲𑀯𑀺𑀥𑀸𑀢𑀺 𑀢𑀸𑀬 𑀤𑁆𑀯𑀸𑀤𑀲𑀯𑀺𑀥𑀸𑀬 𑀲𑀼𑀜𑁆𑀜𑀢𑀸𑀬 𑀲𑀼𑀜𑁆𑀜𑀦𑁆𑀢𑀺 𑀅𑀢𑁆𑀣𑁄.

𑀧𑀼𑀩𑁆𑀩𑀦𑁆𑀢𑀸𑀳𑀭𑀡𑀢𑁄𑀢𑀺 ¶ 𑀧𑀼𑀩𑁆𑀩𑀦𑁆𑀢𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀺𑀧𑀸𑀓𑀲𑁆𑀲 𑀆𑀳𑀭𑀡𑀢𑁄 𑀧𑀭𑀺𑀘𑁆𑀙𑀺𑀦𑁆𑀦𑀯𑁂𑀤𑀦𑀸𑀯𑀲𑀸𑀦𑀁 𑀏𑀢𑀁 𑀪𑀯𑀘𑀓𑁆𑀓𑀦𑁆𑀢𑀺 𑀅𑀢𑁆𑀣𑁄. 𑀪𑀯𑀘𑀓𑁆𑀓𑁂𑀓𑀤𑁂𑀲𑁄𑀧𑀺 𑀳𑀺 𑀪𑀯𑀘𑀓𑁆𑀓𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑁂𑀤𑀦𑀸 𑀯𑀸 𑀢𑀡𑁆𑀳𑀸𑀲𑀳𑀸𑀬𑀸𑀬 𑀅𑀯𑀺𑀚𑁆𑀚𑀸𑀬 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑁂𑀤𑀦𑀸𑀢𑁄 𑀅𑀯𑀺𑀚𑁆𑀚𑀸, 𑀢𑀢𑁄 𑀲𑀗𑁆𑀔𑀸𑀭𑀸𑀢𑀺 𑀲𑀫𑁆𑀩𑀚𑁆𑀛𑀦𑀢𑁄 𑀯𑁂𑀤𑀦𑀸𑀯𑀲𑀸𑀦𑀁 𑀪𑀯𑀘𑀓𑁆𑀓𑀦𑁆𑀢𑀺 𑀬𑀼𑀢𑁆𑀢𑀫𑁂𑀢𑀁, 𑀏𑀯𑀁 𑀢𑀡𑁆𑀳𑀸𑀫𑀽𑀮𑀓𑁂 𑀘 𑀬𑁄𑀚𑁂𑀢𑀩𑁆𑀩𑀁. 𑀤𑁆𑀯𑀺𑀦𑁆𑀦𑀫𑁆𑀧𑀺 𑀳𑀺 𑀅𑀜𑁆𑀜𑀫𑀜𑁆𑀜𑀁 𑀅𑀦𑀼𑀧𑁆𑀧𑀯𑁂𑀲𑁄 𑀳𑁄𑀢𑀻𑀢𑀺. 𑀅𑀯𑀺𑀚𑁆𑀚𑀸 𑀥𑀫𑁆𑀫𑀲𑀪𑀸𑀯𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀯𑀺𑀧𑀭𑀻𑀢𑀸𑀪𑀺𑀦𑀺𑀯𑁂𑀲𑀁 𑀓𑀭𑁄𑀦𑁆𑀢𑀻 𑀤𑀺𑀝𑁆𑀞𑀺𑀘𑀭𑀺𑀢𑁂 𑀲𑀁𑀲𑀸𑀭𑁂 𑀦𑀬𑀢𑀺, 𑀢𑁂𑀲𑀁 𑀯𑀸 𑀲𑀁𑀲𑀸𑀭𑀁 𑀲𑀗𑁆𑀔𑀸𑀭𑀸𑀤𑀺𑀧𑀯𑀢𑁆𑀢𑀺𑀁 𑀦𑀬𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 ‘‘𑀲𑀁𑀲𑀸𑀭𑀦𑀸𑀬𑀺𑀓𑀸’’𑀢𑀺 𑀯𑀼𑀢𑁆𑀢𑀸. 𑀨𑀮𑀼𑀧𑁆𑀧𑀢𑁆𑀢𑀺𑀬𑀸𑀢𑀺 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄. 𑀯𑀺𑀜𑁆𑀜𑀸𑀡𑀸𑀤𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀨𑀮𑀼𑀧𑁆𑀧𑀢𑁆𑀢𑀺 𑀳𑀺 𑀇𑀥 𑀤𑀺𑀝𑁆𑀞𑀸, 𑀅𑀤𑀺𑀝𑁆𑀞𑀸𑀦𑀜𑁆𑀘 𑀧𑀼𑀭𑀺𑀫𑀪𑀯𑁂 𑀅𑀢𑁆𑀢𑀦𑁄 𑀳𑁂𑀢𑀽𑀦𑀁 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀦𑀁 𑀨𑀮𑀁 𑀅𑀚𑀦𑁂𑀢𑁆𑀯𑀸 𑀅𑀦𑀼𑀧𑀘𑁆𑀙𑀺𑀚𑁆𑀚𑀦𑀁 𑀧𑀓𑀸𑀲𑁂𑀢𑀺. 𑀅𑀣 𑀯𑀸 𑀧𑀼𑀭𑀺𑀫𑀪𑀯𑀘𑀓𑁆𑀓𑀁 𑀤𑀼𑀢𑀺𑀬𑁂𑀦 𑀲𑀫𑁆𑀩𑀦𑁆𑀥𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀦𑀸𑀲𑀗𑁆𑀔𑀸𑀢𑀲𑁆𑀲 𑀨𑀮𑀲𑁆𑀲 𑀉𑀧𑁆𑀧𑀢𑁆𑀢𑀺𑀬𑀸 𑀢𑀡𑁆𑀳𑀸𑀤𑀻𑀦𑀁 𑀳𑁂𑀢𑀽𑀦𑀁 𑀅𑀦𑀼𑀧𑀘𑁆𑀙𑁂𑀤𑀁 𑀧𑀓𑀸𑀲𑁂𑀢𑀺, 𑀢𑀲𑁆𑀫𑀸 𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀓𑀸𑀭𑀡𑀪𑀽𑀢𑀸𑀬 𑀧𑀞𑀫𑀲𑁆𑀲 𑀪𑀯𑀘𑀓𑁆𑀓𑀲𑁆𑀲 𑀳𑁂𑀢𑀽𑀦𑀁 𑀅𑀦𑀼𑀧𑀘𑁆𑀙𑁂𑀤𑀧𑁆𑀧𑀓𑀸𑀲𑀦𑀢𑁄𑀢𑀺 𑀅𑀢𑁆𑀣𑁄. 𑀲𑀗𑁆𑀔𑀸𑀭𑀸𑀤𑀻𑀦𑀫𑁂𑀯 𑀯𑀸 𑀨𑀮𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 ¶ 𑀅𑀯𑀺𑀚𑁆𑀚𑀸𑀤𑀻𑀦𑀁 𑀳𑁂𑀢𑀽𑀦𑀁 𑀨𑀮𑀁 𑀅𑀚𑀦𑁂𑀢𑁆𑀯𑀸 𑀅𑀦𑀼𑀧𑀘𑁆𑀙𑁂𑀤𑀫𑁂𑀯, 𑀯𑀺𑀜𑁆𑀜𑀸𑀡𑀸𑀤𑀺𑀳𑁂𑀢𑀽𑀦𑀁 𑀯𑀸 𑀲𑀗𑁆𑀔𑀸𑀭𑀸𑀤𑀻𑀦𑀁 𑀅𑀦𑀼𑀩𑀦𑁆𑀥𑀦𑀫𑁂𑀯 𑀧𑀓𑀸𑀲𑁂𑀢𑀺 𑀧𑀞𑀫𑀁 𑀪𑀯𑀘𑀓𑁆𑀓𑀁, 𑀦 𑀤𑀼𑀢𑀺𑀬𑀁 𑀯𑀺𑀬 𑀧𑀭𑀺𑀬𑁄𑀲𑀸𑀦𑀫𑁆𑀧𑀻𑀢𑀺 ‘‘𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀳𑁂𑀢𑀽𑀦𑀁 𑀅𑀦𑀼𑀧𑀘𑁆𑀙𑁂𑀤𑀧𑁆𑀧𑀓𑀸𑀲𑀦𑀢𑁄’’𑀢𑀺 𑀯𑀼𑀢𑁆𑀢𑀁. ‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺 𑀏𑀢𑁆𑀣 𑀅𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀓𑀮𑀮𑀭𑀽𑀧𑀁 𑀯𑀢𑁆𑀯𑀸 𑀢𑀢𑁄 𑀉𑀤𑁆𑀥𑀁 ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦’’𑀦𑁆𑀢𑀺 𑀲𑀴𑀸𑀬𑀢𑀦𑀧𑁆𑀧𑀯𑀢𑁆𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀅𑀦𑀼𑀧𑀼𑀩𑁆𑀩𑀧𑀯𑀢𑁆𑀢𑀺𑀤𑀻𑀧𑀦𑀢𑁄’’𑀢𑀺. ‘‘𑀪𑀯𑀧𑀘𑁆𑀘𑀬𑀸 𑀚𑀸𑀢𑀻’’𑀢𑀺 𑀏𑀢𑁆𑀣 𑀦 𑀆𑀬𑀢𑀦𑀸𑀦𑀁 𑀓𑀫𑁂𑀦 𑀉𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀲𑀳𑀼𑀧𑁆𑀧𑀢𑁆𑀢𑀺𑀤𑀻𑀧𑀦𑀢𑁄’’𑀢𑀺.

𑀳𑁂𑀢𑀼𑀆𑀤𑀺𑀧𑀼𑀩𑁆𑀩𑀓𑀸 𑀢𑀬𑁄 𑀲𑀦𑁆𑀥𑀻 𑀏𑀢𑀲𑁆𑀲𑀸𑀢𑀺 𑀳𑁂𑀢𑀼𑀨𑀮𑀳𑁂𑀢𑀼𑀧𑀼𑀩𑁆𑀩𑀓𑀢𑀺𑀲𑀦𑁆𑀥𑀺, 𑀪𑀯𑀘𑀓𑁆𑀓𑀁. 𑀳𑁂𑀢𑀼𑀨𑀮𑀳𑁂𑀢𑀼𑀨𑀮𑀯𑀲𑁂𑀦 𑀘𑀢𑀼𑀧𑁆𑀧𑀪𑁂𑀤𑁄 𑀅𑀗𑁆𑀕𑀸𑀦𑀁 𑀲𑀗𑁆𑀕𑀳𑁄 𑀏𑀢𑀲𑁆𑀲𑀸𑀢𑀺 𑀘𑀢𑀼𑀪𑁂𑀤𑀲𑀗𑁆𑀕𑀳𑀁. 𑀲𑀭𑀽𑀧𑀢𑁄 𑀅𑀯𑀼𑀢𑁆𑀢𑀸𑀧𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀗𑁆𑀕𑀳𑁂 𑀆𑀓𑀺𑀭𑀻𑀬𑀦𑁆𑀢𑀺 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀤𑀺𑀕𑁆𑀕𑀳𑀡𑁂𑀳𑀺 𑀧𑀓𑀸𑀲𑀻𑀬𑀦𑁆𑀢𑀻𑀢𑀺 𑀆𑀓𑀸𑀭𑀸, 𑀅𑀢𑀻𑀢𑀳𑁂𑀢𑀼𑀆𑀤𑀻𑀦𑀁 𑀯𑀸 𑀧𑀓𑀸𑀭𑀸 𑀆𑀓𑀸𑀭𑀸. 𑀓𑀺𑀮𑁂𑀲𑀓𑀫𑁆𑀫𑀯𑀺𑀧𑀸𑀓𑀸 𑀯𑀺𑀧𑀸𑀓𑀓𑀺𑀮𑁂𑀲𑀓𑀫𑁆𑀫𑁂𑀳𑀺 𑀲𑀫𑁆𑀩𑀦𑁆𑀥𑀸 𑀳𑀼𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀯𑀢𑁆𑀢𑀦𑁆𑀢𑀻𑀢𑀺 𑀢𑁂𑀲𑀼 𑀯𑀝𑁆𑀝𑀦𑀸𑀫𑀁 𑀆𑀭𑁄𑀧𑁂𑀢𑁆𑀯𑀸 ‘‘𑀢𑀺𑀯𑀝𑁆𑀝’’𑀦𑁆𑀢𑀺 𑀯𑀼𑀢𑁆𑀢𑀁, 𑀯𑀝𑁆𑀝𑁂𑀓𑀤𑁂𑀲𑀢𑁆𑀢𑀸 𑀯𑀸 ‘‘𑀯𑀝𑁆𑀝𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺.

𑀲𑀦𑁆𑀥𑀻𑀦𑀁 𑀆𑀤𑀺𑀧𑀭𑀺𑀬𑁄𑀲𑀸𑀦𑀯𑀯𑀢𑁆𑀣𑀺𑀢𑀸𑀢𑀺 𑀲𑀦𑁆𑀥𑀻𑀦𑀁 𑀧𑀼𑀩𑁆𑀩𑀸𑀧𑀭𑀯𑀯𑀢𑁆𑀣𑀺𑀢𑀸𑀢𑀺 𑀅𑀢𑁆𑀣𑁄.

‘‘𑀬𑀸 ¶ 𑀓𑀸𑀘𑀺 𑀯𑀸 𑀧𑀦 𑀘𑁂𑀢𑀦𑀸 𑀪𑀯𑁄, 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀸 𑀆𑀬𑀽𑀳𑀦𑀲𑀗𑁆𑀔𑀸𑀭𑀸’’𑀢𑀺 𑀇𑀤𑀁 𑀇𑀫𑀺𑀲𑁆𑀲𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀪𑀸𑀚𑀦𑀻𑀬𑁂 𑀯𑀼𑀢𑁆𑀢𑀸𑀬 𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀴𑀺𑀬𑀸 (𑀧𑀝𑀺. 𑀫. 𑁧.𑁪𑁭) 𑀯𑀲𑁂𑀦 𑀯𑀼𑀢𑁆𑀢𑀁. 𑀏𑀢𑁆𑀣 𑀳𑀺 ‘‘𑀘𑁂𑀢𑀦𑀸 𑀪𑀯𑁄’’𑀢𑀺 𑀆𑀕𑀢𑀸𑀢𑀺. 𑀪𑀯𑀦𑀺𑀤𑁆𑀤𑁂𑀲𑁂 𑀧𑀦 ‘‘𑀲𑀸𑀢𑁆𑀣𑀢𑁄’’𑀢𑀺 𑀏𑀢𑁆𑀣 ‘‘𑀘𑁂𑀢𑀦𑀸𑀯 𑀲𑀗𑁆𑀔𑀸𑀭𑀸, 𑀪𑀯𑁄 𑀧𑀦 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀸𑀧𑀻’’𑀢𑀺 𑀯𑀺𑀪𑀗𑁆𑀕𑀧𑀸𑀴𑀺𑀬𑀸 𑀯𑀲𑁂𑀦 𑀤𑀲𑁆𑀲𑀺𑀢𑀁. ‘‘𑀢𑀢𑁆𑀣 𑀓𑀢𑀫𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄? 𑀓𑀼𑀲𑀮𑀸 𑀘𑁂𑀢𑀦𑀸 𑀓𑀸𑀫𑀸𑀯𑀘𑀭𑀸’’𑀢𑀺𑀆𑀤𑀺𑀦𑀸 𑀳𑀺 𑀲𑀗𑁆𑀔𑀸𑀭𑀸𑀦𑀁 𑀘𑁂𑀢𑀦𑀸𑀪𑀸𑀯𑁄 𑀯𑀺𑀪𑀗𑁆𑀕𑀧𑀸𑀴𑀺𑀬𑀁 (𑀯𑀺𑀪. 𑁨𑁨𑁬) 𑀯𑀼𑀢𑁆𑀢𑁄𑀢𑀺. 𑀢𑀢𑁆𑀣 𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀴𑀺𑀬𑀁 ‘‘𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀸 𑀯𑀺𑀧𑀸𑀓𑀥𑀫𑁆𑀫𑀢𑁆𑀢𑀸 𑀲𑀯𑀺𑀧𑀸𑀓𑁂𑀦 𑀆𑀬𑀽𑀳𑀦𑀲𑀗𑁆𑀔𑀸𑀢𑁂𑀦 𑀲𑀗𑁆𑀔𑀢𑀸𑀪𑀺𑀲𑀗𑁆𑀔𑀭𑀡𑀓𑀺𑀘𑁆𑀘𑁂𑀦 𑀲𑀗𑁆𑀔𑀸𑀭𑀸’’𑀢𑀺 𑀯𑀼𑀢𑁆𑀢𑀸. 𑀯𑀺𑀪𑀗𑁆𑀕𑀧𑀸𑀴𑀺𑀬𑀁 (𑀯𑀺𑀪. 𑁨𑁩𑁪) ‘‘𑀲𑀩𑁆𑀩𑀫𑁆𑀧𑀺 𑀪𑀯𑀕𑀸𑀫𑀺𑀓𑀫𑁆𑀫𑀁 𑀓𑀫𑁆𑀫𑀪𑀯𑁄’’𑀢𑀺 𑀪𑀯𑀲𑁆𑀲 𑀧𑀘𑁆𑀘𑀬𑀪𑀸𑀯𑁂𑀦 𑀪𑀯𑀕𑀸𑀫𑀺𑀪𑀸𑀯𑀢𑁄 𑀓𑀫𑁆𑀫𑀲𑀁𑀲𑀝𑁆𑀞𑀲𑀳𑀸𑀬𑀢𑀸𑀬 𑀓𑀫𑁆𑀫𑀪𑀸𑀯𑀢𑁄 𑀘 𑀉𑀧𑀧𑀢𑁆𑀢𑀺𑀪𑀯𑀁 𑀪𑀸𑀯𑁂𑀦𑁆𑀢𑀻𑀢𑀺 𑀪𑀯𑁄𑀢𑀺 𑀯𑀼𑀢𑁆𑀢𑀸, 𑀉𑀧𑀧𑀢𑁆𑀢𑀺𑀪𑀯𑀪𑀸𑀯𑀦𑀓𑀺𑀘𑁆𑀘𑀁 𑀧𑀦 𑀘𑁂𑀢𑀦𑀸𑀬 𑀲𑀸𑀢𑀺𑀲𑀬𑀦𑁆𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀴𑀺𑀬𑀁 𑀘𑁂𑀢𑀦𑀸 ‘‘𑀪𑀯𑁄’’𑀢𑀺 𑀯𑀼𑀢𑁆𑀢𑀸, 𑀪𑀯𑀸𑀪𑀺𑀲𑀗𑁆𑀔𑀭𑀡𑀓𑀺𑀘𑁆𑀘𑀁 𑀘𑁂𑀢𑀦𑀸𑀬 𑀲𑀸𑀢𑀺𑀲𑀬𑀦𑁆𑀢𑀺 𑀯𑀺𑀪𑀗𑁆𑀕𑀧𑀸𑀴𑀺𑀬𑀁 ‘‘𑀓𑀼𑀲𑀮𑀸 𑀘𑁂𑀢𑀦𑀸’’𑀢𑀺𑀆𑀤𑀺𑀦𑀸 𑀘𑁂𑀢𑀦𑀸 ‘‘𑀲𑀗𑁆𑀔𑀸𑀭𑀸’’𑀢𑀺 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀢𑁂𑀦 𑀢𑁂𑀦 𑀧𑀭𑀺𑀬𑀸𑀬𑁂𑀦 𑀉𑀪𑀬𑀁 𑀉𑀪𑀬𑀢𑁆𑀣 𑀯𑀢𑁆𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀦𑀢𑁆𑀣𑁂𑀢𑁆𑀣 𑀯𑀺𑀭𑁄𑀥𑁄 ¶ . 𑀕𑀳𑀡𑀦𑁆𑀢𑀺 𑀓𑀸𑀫𑀼𑀧𑀸𑀤𑀸𑀦𑀁 𑀓𑀺𑀘𑁆𑀘𑁂𑀦𑀸𑀳. 𑀧𑀭𑀸𑀫𑀲𑀦𑀦𑁆𑀢𑀺 𑀇𑀢𑀭𑀸𑀦𑀺. 𑀆𑀬𑀽𑀳𑀦𑀸𑀯𑀲𑀸𑀦𑁂𑀢𑀺 𑀢𑀻𑀲𑀼𑀧𑀺 𑀅𑀢𑁆𑀣𑀯𑀺𑀓𑀧𑁆𑀧𑁂𑀲𑀼 𑀯𑀼𑀢𑁆𑀢𑀲𑁆𑀲 𑀆𑀬𑀽𑀳𑀦𑀲𑁆𑀲 𑀅𑀯𑀲𑀸𑀦𑁂.

𑀤𑁆𑀯𑀻𑀲𑀼 𑀅𑀢𑁆𑀣𑀯𑀺𑀓𑀧𑁆𑀧𑁂𑀲𑀼 𑀯𑀼𑀢𑁆𑀢𑁂 𑀆𑀬𑀽𑀳𑀦𑀲𑀗𑁆𑀔𑀸𑀭𑁂 ‘‘𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑀸’’𑀢𑀺 𑀆𑀳, 𑀢𑀢𑀺𑀬𑁂 𑀯𑀼𑀢𑁆𑀢𑁂 ‘‘𑀢𑀁𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺. 𑀤𑀳𑀭𑀲𑁆𑀲 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀪𑀯𑀗𑁆𑀕𑀩𑀳𑀼𑀮𑀸 𑀬𑁂𑀪𑀼𑀬𑁆𑀬𑁂𑀦 𑀪𑀯𑀦𑁆𑀢𑀭𑀚𑀦𑀓𑀓𑀫𑁆𑀫𑀸𑀬𑀽𑀳𑀦𑀲𑀫𑀢𑁆𑀣𑀸 𑀦 𑀳𑁄𑀢𑀻𑀢𑀺 ‘‘𑀇𑀥 𑀧𑀭𑀺𑀧𑀓𑁆𑀓𑀢𑁆𑀢𑀸 𑀆𑀬𑀢𑀦𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀫𑁆𑀫𑀓𑀭𑀡𑀓𑀸𑀮𑁂 𑀲𑀫𑁆𑀫𑁄𑀳𑁄𑀢𑀺 𑀏𑀢𑁂𑀦 𑀓𑀫𑁆𑀫𑀲𑁆𑀲 𑀧𑀘𑁆𑀘𑀬𑀪𑀽𑀢𑀁 𑀲𑀫𑁆𑀫𑁄𑀳𑀁 𑀤𑀲𑁆𑀲𑁂𑀢𑀺, 𑀦 𑀓𑀫𑁆𑀫𑀲𑀫𑁆𑀧𑀬𑀼𑀢𑁆𑀢𑀫𑁂𑀯.

𑀓𑀫𑁆𑀫𑀸𑀦𑁂𑀯 𑀯𑀺𑀧𑀸𑀓𑀁 𑀲𑀫𑁆𑀪𑀭𑀦𑁆𑀢𑀺 𑀯𑀟𑁆𑀠𑁂𑀦𑁆𑀢𑀻𑀢𑀺 𑀓𑀫𑁆𑀫𑀲𑀫𑁆𑀪𑀸𑀭𑀸, 𑀓𑀫𑁆𑀫𑀁 𑀯𑀸 𑀲𑀗𑁆𑀔𑀸𑀭𑀪𑀯𑀸, 𑀢𑀤𑀼𑀧𑀓𑀸𑀭𑀓𑀸𑀦𑀺 𑀅𑀯𑀺𑀚𑁆𑀚𑀸𑀢𑀡𑁆𑀳𑀼𑀧𑀸𑀤𑀸𑀦𑀸𑀦𑀺 𑀓𑀫𑁆𑀫𑀲𑀫𑁆𑀪𑀸𑀭𑀸, 𑀧𑀝𑀺𑀲𑀦𑁆𑀥𑀺𑀤𑀸𑀬𑀓𑁄 𑀯𑀸 𑀪𑀯𑁄 𑀓𑀫𑁆𑀫𑀁, 𑀢𑀤𑀼𑀧𑀓𑀸𑀭𑀓𑀸 𑀬𑀣𑀸𑀯𑀼𑀢𑁆𑀢𑀆𑀬𑀽𑀳𑀦𑀲𑀗𑁆𑀔𑀸𑀭𑀸 𑀅𑀯𑀺𑀚𑁆𑀚𑀸𑀤𑀬𑁄 𑀘 𑀓𑀫𑁆𑀫𑀲𑀫𑁆𑀪𑀸𑀭𑀸𑀢𑀺 𑀓𑀫𑁆𑀫𑀜𑁆𑀘 𑀓𑀫𑁆𑀫𑀲𑀫𑁆𑀪𑀸𑀭𑀸 𑀘 𑀓𑀫𑁆𑀫𑀲𑀫𑁆𑀪𑀸𑀭𑀸𑀢𑀺 𑀏𑀓𑀲𑁂𑀲𑀁 𑀓𑀢𑁆𑀯𑀸 ‘‘𑀓𑀫𑁆𑀫𑀲𑀫𑁆𑀪𑀸𑀭𑀸’’𑀢𑀺 𑀆𑀳. 𑀤𑀲 𑀥𑀫𑁆𑀫𑀸 𑀓𑀫𑁆𑀫𑀦𑁆𑀢𑀺 𑀅𑀯𑀺𑀚𑁆𑀚𑀸𑀤𑀬𑁄𑀧𑀺 𑀓𑀫𑁆𑀫𑀲𑀳𑀸𑀬𑀢𑀸𑀬 𑀓𑀫𑁆𑀫𑀲𑀭𑀺𑀓𑁆𑀔𑀓𑀸 𑀢𑀤𑀼𑀧𑀓𑀸𑀭𑀓𑀸 𑀘𑀸𑀢𑀺 ‘‘𑀓𑀫𑁆𑀫’’𑀦𑁆𑀢𑀺 𑀯𑀼𑀢𑁆𑀢𑀸.

𑀲𑀗𑁆𑀔𑀺𑀧𑁆𑀧𑀦𑁆𑀢𑀺 ¶ 𑀏𑀢𑁆𑀣 𑀅𑀯𑀺𑀚𑁆𑀚𑀸𑀤𑀬𑁄 𑀯𑀺𑀜𑁆𑀜𑀸𑀡𑀸𑀤𑀬𑁄 𑀘𑀸𑀢𑀺 𑀲𑀗𑁆𑀔𑁂𑀧𑁄, 𑀓𑀫𑁆𑀫𑀁 𑀯𑀺𑀧𑀸𑀓𑁄 𑀘. 𑀓𑀫𑁆𑀫𑀁 𑀯𑀺𑀧𑀸𑀓𑁄𑀢𑀺 𑀏𑀯𑀁 𑀲𑀗𑁆𑀔𑀺𑀧𑀻𑀬𑀢𑀻𑀢𑀺 𑀯𑀸 𑀲𑀗𑁆𑀔𑁂𑀧𑁄, 𑀅𑀯𑀺𑀚𑁆𑀚𑀸𑀤𑀬𑁄 𑀯𑀺𑀜𑁆𑀜𑀸𑀡𑀸𑀤𑀬𑁄 𑀘. 𑀲𑀗𑁆𑀔𑁂𑀧𑀪𑀸𑀯𑀲𑀸𑀫𑀜𑁆𑀜𑁂𑀦 𑀧𑀦 𑀏𑀓𑀯𑀘𑀦𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀗𑁆𑀔𑁂𑀧𑀲𑀤𑁆𑀤𑁄 𑀯𑀸 𑀪𑀸𑀕𑀸𑀥𑀺𑀯𑀘𑀦𑀦𑁆𑀢𑀺 𑀓𑀫𑁆𑀫𑀪𑀸𑀕𑁄 𑀓𑀫𑁆𑀫𑀲𑀗𑁆𑀔𑁂𑀧𑁄.

𑀏𑀯𑀁 𑀲𑀫𑀼𑀧𑁆𑀧𑀦𑁆𑀦𑀦𑁆𑀢𑀺 𑀓𑀫𑁆𑀫𑀢𑁄 𑀯𑀺𑀧𑀸𑀓𑁄. 𑀢𑀢𑁆𑀣𑀸𑀧𑀺 𑀅𑀯𑀺𑀚𑁆𑀚𑀸𑀢𑁄 𑀲𑀗𑁆𑀔𑀸𑀭𑀸𑀢𑀺 𑀏𑀯𑀁 𑀲𑀫𑀼𑀧𑁆𑀧𑀦𑁆𑀦𑀁, 𑀢𑀺𑀲𑀦𑁆𑀥𑀺𑀆𑀤𑀺𑀯𑀲𑁂𑀦 𑀯𑀸 𑀲𑀫𑀼𑀧𑁆𑀧𑀦𑁆𑀦𑀁 𑀇𑀤𑀁 𑀪𑀯𑀘𑀓𑁆𑀓𑀦𑁆𑀢𑀺 𑀅𑀢𑁆𑀣𑁄. 𑀇𑀢𑁆𑀢𑀭𑀦𑁆𑀢𑀺 𑀕𑀫𑀦𑀥𑀫𑁆𑀫𑀁, 𑀯𑀺𑀦𑀲𑁆𑀲𑀥𑀫𑁆𑀫𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦 𑀉𑀧𑁆𑀧𑀸𑀤𑀯𑀬𑀯𑀦𑁆𑀢𑀢𑀸𑀤𑀻𑀧𑀓𑁂𑀦 𑀅𑀦𑀺𑀘𑁆𑀘-𑀲𑀤𑁆𑀤𑁂𑀦 𑀯𑀺𑀓𑀸𑀭𑀸𑀧𑀢𑁆𑀢𑀺𑀤𑀻𑀧𑀓𑁂𑀦 𑀘𑀮-𑀲𑀤𑁆𑀤𑁂𑀦 𑀘 𑀅𑀤𑀻𑀧𑀺𑀢𑀁 𑀓𑀸𑀮𑀦𑁆𑀢𑀭𑀝𑁆𑀞𑀸𑀬𑀺𑀢𑀸𑀧𑀝𑀺𑀓𑁆𑀔𑁂𑀧𑀁 𑀤𑀻𑀧𑁂𑀢𑀺, 𑀅𑀥𑀼𑀯𑀦𑁆𑀢𑀺 𑀏𑀢𑁂𑀦 𑀣𑀺𑀭𑀪𑀸𑀯𑀧𑀝𑀺𑀓𑁆𑀔𑁂𑀧𑀁 𑀦𑀺𑀲𑁆𑀲𑀸𑀭𑀢𑀁. 𑀳𑁂𑀢𑀽 𑀏𑀯 𑀲𑀫𑁆𑀪𑀸𑀭𑀸 𑀳𑁂𑀢𑀼𑀲𑀫𑁆𑀪𑀸𑀭𑀸. ‘‘𑀞𑀸𑀦𑀲𑁄 𑀳𑁂𑀢𑀼𑀲𑁄’’𑀢𑀺 𑀏𑀢𑁆𑀣 𑀏𑀯𑀁 𑀯𑀼𑀢𑁆𑀢𑀁 𑀯𑀸 𑀞𑀸𑀦𑀁, 𑀅𑀜𑁆𑀜𑀫𑁆𑀧𑀺 𑀢𑀲𑁆𑀲 𑀢𑀲𑁆𑀲 𑀲𑀸𑀥𑀸𑀭𑀡𑀁 𑀓𑀸𑀭𑀡𑀁 𑀲𑀫𑁆𑀪𑀸𑀭𑁄, 𑀅𑀲𑀸𑀥𑀸𑀭𑀡𑀁 𑀳𑁂𑀢𑀼. 𑀏𑀯𑀦𑁆𑀢𑀺 𑀏𑀯𑀁 𑀳𑁂𑀢𑀼𑀢𑁄 𑀥𑀫𑁆𑀫𑀫𑀢𑁆𑀢𑀲𑀫𑁆𑀪𑀯𑁂 𑀳𑁂𑀢𑀼𑀦𑀺𑀭𑁄𑀥𑀸 𑀘 𑀯𑀝𑁆𑀝𑀼𑀧𑀘𑁆𑀙𑁂𑀤𑁂 𑀥𑀫𑁆𑀫𑁂 𑀘 𑀢𑀁𑀦𑀺𑀭𑁄𑀥𑀸𑀬 𑀤𑁂𑀲𑀺𑀢𑁂 𑀲𑀢𑀻𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀘𑀭𑀺𑀬𑀁 𑀇𑀥 𑀩𑁆𑀭𑀳𑁆𑀫𑀘𑀭𑀺𑀬𑀺𑀥. 𑀲𑀢𑁆𑀢𑁂 𑀘𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀏𑀯𑀁 𑀩𑁆𑀭𑀳𑁆𑀫𑀘𑀭𑀺𑀬𑀜𑁆𑀘 𑀯𑀺𑀚𑁆𑀚𑀢𑀺, 𑀲𑀲𑁆𑀲𑀢𑀼𑀘𑁆𑀙𑁂𑀤𑀸 𑀘 𑀦 𑀳𑁄𑀦𑁆𑀢𑀻𑀢𑀺 𑀲𑀫𑀼𑀘𑁆𑀘𑀬𑀢𑁆𑀣𑁄. 𑀏𑀯𑀜𑁆𑀳𑀺 ¶ 𑀳𑁂𑀢𑀼𑀆𑀬𑀢𑁆𑀢𑁂 𑀥𑀫𑁆𑀫𑀫𑀢𑁆𑀢𑀲𑀫𑁆𑀪𑀯𑁂 𑀲𑀢𑁆𑀢𑁄 𑀦𑀼𑀧𑀮𑀩𑁆𑀪𑀢𑀺, 𑀢𑀲𑁆𑀫𑀺𑀜𑁆𑀘 𑀉𑀧𑀮𑀩𑁆𑀪𑀦𑁆𑀢𑁂 𑀲𑀲𑁆𑀲𑀢𑁄 𑀉𑀘𑁆𑀙𑁂𑀤𑁄 𑀯𑀸 𑀲𑀺𑀬𑀸, 𑀦𑀼𑀧𑀮𑀩𑁆𑀪𑀦𑁆𑀢𑁂 𑀢𑀲𑁆𑀫𑀺𑀁 𑀦𑁂𑀯𑀼𑀘𑁆𑀙𑁂𑀤𑁄 𑀦 𑀲𑀲𑁆𑀲𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑀘𑁆𑀘𑀧𑁆𑀧𑀪𑀯𑀢𑁄𑀢𑀺 𑀲𑀘𑁆𑀘𑀢𑁄, 𑀲𑀘𑁆𑀘𑀸𑀦𑀁 𑀯𑀸 𑀧𑀪𑀯𑀢𑁄. 𑀓𑀼𑀲𑀮𑀸𑀓𑀼𑀲𑀮𑀁 𑀓𑀫𑁆𑀫𑀦𑁆𑀢𑀺 𑀯𑀝𑁆𑀝𑀓𑀣𑀸𑀬 𑀯𑀢𑁆𑀢𑀫𑀸𑀦𑀢𑁆𑀢𑀸 𑀲𑀸𑀲𑀯𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀅𑀯𑀺𑀲𑁂𑀲𑁂𑀦𑀸𑀢𑀺 𑀘𑁂𑀢𑀦𑀸 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀓𑀸𑀢𑀺 𑀯𑀺𑀲𑁂𑀲𑀁 𑀅𑀓𑀢𑁆𑀯𑀸 𑀲𑀩𑁆𑀩𑀫𑁆𑀧𑀺 𑀢𑀁 𑀓𑀼𑀲𑀮𑀸𑀓𑀼𑀲𑀮𑀁 𑀓𑀫𑁆𑀫𑀁 ‘‘𑀲𑀫𑀼𑀤𑀬𑀲𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. ‘‘𑀢𑀡𑁆𑀳𑀸 𑀘…𑀧𑁂… 𑀅𑀯𑀲𑁂𑀲𑀸 𑀘 𑀲𑀸𑀲𑀯𑀸 𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺 𑀳𑀺 𑀘𑁂𑀢𑀦𑀸𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀯𑀺𑀲𑁂𑀲𑀁 𑀅𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺, 𑀅𑀭𑀺𑀬𑀲𑀘𑁆𑀘𑀯𑀺𑀲𑁂𑀲𑀁 𑀯𑀸 𑀅𑀓𑀢𑁆𑀯𑀸 𑀲𑀫𑀼𑀤𑀬𑀲𑀘𑁆𑀘𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀯𑀢𑁆𑀣𑀽𑀲𑀽𑀢𑀺 𑀆𑀭𑀫𑁆𑀫𑀡𑁂𑀲𑀼, 𑀘𑀓𑁆𑀔𑀸𑀤𑀻𑀲𑀼 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑀩𑁆𑀩𑁂𑀲𑀼 𑀯𑀢𑁆𑀣𑀽𑀲𑀼. 𑀲𑁄𑀓𑀸𑀤𑀻𑀦𑀁 𑀅𑀥𑀺𑀝𑁆𑀞𑀸𑀦𑀢𑁆𑀢𑀸𑀢𑀺 𑀢𑁂𑀲𑀁 𑀓𑀸𑀭𑀡𑀢𑁆𑀢𑀸, 𑀢𑁂𑀳𑀺 𑀲𑀺𑀤𑁆𑀥𑀸𑀬 𑀅𑀯𑀺𑀚𑁆𑀚𑀸𑀬 𑀲𑀳𑀺𑀢𑁂𑀳𑀺 𑀲𑀗𑁆𑀔𑀸𑀭𑁂𑀳𑀺 𑀧𑀘𑁆𑀘𑀬𑁄 𑀘 𑀳𑁄𑀢𑀺 𑀪𑀯𑀦𑁆𑀢𑀭𑀧𑀸𑀢𑀼𑀪𑀸𑀯𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀘𑀼𑀢𑀺𑀘𑀺𑀢𑁆𑀢𑀁 𑀯𑀸 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 ‘‘𑀧𑀘𑁆𑀘𑀬𑁄 𑀘 𑀳𑁄𑀢𑀺 𑀪𑀯𑀦𑁆𑀢𑀭𑀧𑀸𑀢𑀼𑀪𑀸𑀯𑀸𑀬𑀸’’𑀢𑀺 𑀯𑀼𑀢𑁆𑀢𑀁 ¶ . 𑀢𑀁 𑀧𑀦 𑀘𑀼𑀢𑀺𑀘𑀺𑀢𑁆𑀢𑀁 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀭𑀳𑀺𑀢𑀁 𑀪𑀯𑀦𑁆𑀢𑀭𑀲𑁆𑀲 𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺 𑀢𑀲𑁆𑀲 𑀲𑀳𑀸𑀬𑀤𑀲𑁆𑀲𑀦𑀢𑁆𑀣𑀫𑀸𑀳 ‘‘𑀲𑁄𑀓𑀸𑀤𑀻𑀦𑀁 𑀅𑀥𑀺𑀝𑁆𑀞𑀸𑀦𑀢𑁆𑀢𑀸’’𑀢𑀺. 𑀤𑁆𑀯𑀺𑀥𑀸𑀢𑀺 𑀅𑀢𑁆𑀢𑀦𑁄𑀬𑁂𑀯 𑀲𑀭𑀲𑁂𑀦 𑀥𑀫𑁆𑀫𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑁂𑀦 𑀘𑀸𑀢𑀺 𑀤𑁆𑀯𑀺𑀥𑀸.

𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺 𑀏𑀢𑁂𑀦 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑀸𑀤𑀲𑁆𑀲𑀦𑁂𑀦 ‘‘𑀓𑁄 𑀦𑀼 𑀔𑁄 𑀅𑀪𑀺𑀲𑀗𑁆𑀔𑀭𑁄𑀢𑀻𑀢𑀺 𑀏𑀲 𑀦𑁄 𑀓𑀮𑁆𑀮𑁄 𑀧𑀜𑁆𑀳𑁄’’𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀢𑀁 𑀓𑀸𑀭𑀓𑀤𑀲𑁆𑀲𑀦𑀦𑀺𑀯𑀸𑀭𑀡𑀦𑁆𑀢𑀺. 𑀏𑀯𑀫𑀸𑀤𑀺𑀤𑀲𑁆𑀲𑀦𑀦𑀺𑀯𑀸𑀭𑀡𑀦𑁆𑀢𑀺 𑀏𑀢𑁂𑀦 ‘‘𑀲𑁄𑀘𑀢𑀺 𑀧𑀭𑀺𑀤𑁂𑀯𑀢𑀺 𑀤𑀼𑀓𑁆𑀔𑀺𑀢𑁄’’𑀢𑀺𑀆𑀤𑀺𑀤𑀲𑁆𑀲𑀦𑀦𑀺𑀯𑀸𑀭𑀡𑀫𑀸𑀳. 𑀲𑁄𑀓𑀸𑀤𑀬𑁄𑀧𑀺 𑀳𑀺 𑀧𑀘𑁆𑀘𑀬𑀸𑀬𑀢𑁆𑀢𑀸 𑀅𑀯𑀲𑀯𑀢𑁆𑀢𑀺𑀦𑁄𑀢𑀺 ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁 𑀲𑁄𑀓…𑀧𑁂… 𑀲𑀫𑁆𑀪𑀯𑀦𑁆𑀢𑀻’’𑀢𑀺 𑀏𑀢𑁂𑀦 𑀯𑀼𑀢𑁆𑀢𑀦𑁆𑀢𑀺.

𑀕𑀡𑁆𑀟𑀪𑁂𑀤𑀧𑀻𑀴𑀓𑀸 𑀯𑀺𑀬𑀸𑀢𑀺 𑀕𑀡𑁆𑀟𑀪𑁂𑀤𑀦𑀢𑁆𑀣𑀁 𑀧𑀘𑁆𑀘𑀫𑀸𑀦𑁂 𑀕𑀡𑁆𑀟𑁂 𑀢𑀲𑁆𑀲𑀧𑀺 𑀉𑀧𑀭𑀺 𑀚𑀸𑀬𑀫𑀸𑀦𑀔𑀼𑀤𑁆𑀤𑀓𑀧𑀻𑀴𑀓𑀸 𑀯𑀺𑀬, 𑀕𑀡𑁆𑀟𑀲𑁆𑀲 𑀯𑀸 𑀅𑀦𑁂𑀓𑀥𑀸𑀪𑁂𑀤𑁂 𑀧𑀻𑀴𑀓𑀸 𑀯𑀺𑀬. 𑀕𑀡𑁆𑀟𑀯𑀺𑀓𑀸𑀭𑀸 𑀲𑀽𑀦𑀢𑀸𑀲𑀭𑀸𑀕𑀧𑀼𑀩𑁆𑀩𑀕𑀳𑀡𑀸𑀤𑀬𑁄.

𑀧𑀝𑀮𑀸𑀪𑀺𑀪𑀽𑀢𑀘𑀓𑁆𑀔𑀼𑀓𑁄 𑀭𑀽𑀧𑀸𑀦𑀺 𑀦 𑀧𑀲𑁆𑀲𑀢𑀺, 𑀓𑀺𑀜𑁆𑀘𑀺𑀧𑀺 𑀧𑀲𑁆𑀲𑀦𑁆𑀢𑁄 𑀘 𑀯𑀺𑀧𑀭𑀻𑀢𑀁 𑀧𑀲𑁆𑀲𑀢𑀺, 𑀏𑀯𑀁 𑀅𑀯𑀺𑀚𑁆𑀚𑀸𑀪𑀺𑀪𑀽𑀢𑁄 𑀤𑀼𑀓𑁆𑀔𑀸𑀤𑀻𑀦𑀺 𑀦 𑀧𑀝𑀺𑀧𑀚𑁆𑀚𑀢𑀺 𑀦 𑀧𑀲𑁆𑀲𑀢𑀺, 𑀫𑀺𑀘𑁆𑀙𑀸 𑀯𑀸 𑀧𑀝𑀺𑀧𑀚𑁆𑀚𑀢𑀻𑀢𑀺 𑀧𑀝𑀮𑀁 𑀯𑀺𑀬 𑀅𑀯𑀺𑀚𑁆𑀚𑀸 ¶ , 𑀓𑀺𑀫𑀺𑀦𑀸 𑀯𑀺𑀬 𑀅𑀢𑁆𑀢𑀦𑀸 𑀓𑀢𑀢𑁆𑀢𑀸 𑀯𑀝𑁆𑀝𑀲𑁆𑀲 𑀅𑀢𑁆𑀢𑀦𑁄𑀬𑁂𑀯 𑀧𑀭𑀺𑀩𑁆𑀪𑀫𑀦𑀓𑀸𑀭𑀡𑀢𑁆𑀢𑀸 𑀘 𑀓𑁄𑀲𑀧𑁆𑀧𑀤𑁂𑀲𑀸 𑀯𑀺𑀬 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀧𑀭𑀺𑀕𑁆𑀕𑀳𑀁 𑀯𑀺𑀦𑀸 𑀧𑀢𑀺𑀝𑁆𑀞𑀁 𑀅𑀮𑀪𑀫𑀸𑀦𑀁 𑀯𑀺𑀜𑁆𑀜𑀸𑀡𑀁 𑀧𑀭𑀺𑀡𑀸𑀬𑀓𑀧𑀭𑀺𑀕𑁆𑀕𑀳𑀁 𑀯𑀺𑀦𑀸 𑀧𑀢𑀺𑀝𑁆𑀞𑀁 𑀅𑀮𑀪𑀫𑀸𑀦𑁄 𑀭𑀸𑀚𑀓𑀼𑀫𑀸𑀭𑁄 𑀯𑀺𑀬𑀸𑀢𑀺 𑀧𑀭𑀺𑀕𑁆𑀕𑀳𑁂𑀦 𑀯𑀺𑀦𑀸 𑀧𑀢𑀺𑀝𑁆𑀞𑀸𑀮𑀸𑀪𑁄 𑀏𑀢𑁆𑀣 𑀲𑀸𑀫𑀜𑁆𑀜𑀁. 𑀉𑀧𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀦𑁆𑀢𑀺 𑀓𑀫𑁆𑀫𑀸𑀤𑀺𑀆𑀭𑀫𑁆𑀫𑀡𑀫𑀸𑀳. 𑀧𑀭𑀺𑀓𑀧𑁆𑀧𑀦𑀢𑁄𑀢𑀺 𑀆𑀭𑀫𑁆𑀫𑀡𑀓𑀭𑀡𑀢𑁄, 𑀲𑀫𑁆𑀧𑀬𑀼𑀢𑁆𑀢𑁂𑀦 𑀯𑀸 𑀯𑀺𑀢𑀓𑁆𑀓𑁂𑀦 𑀯𑀺𑀢𑀓𑁆𑀓𑀦𑀢𑁄. 𑀤𑁂𑀯𑀫𑀦𑀼𑀲𑁆𑀲𑀫𑀺𑀕𑀯𑀺𑀳𑀗𑁆𑀕𑀸𑀤𑀺𑀯𑀺𑀯𑀺𑀥𑀧𑁆𑀧𑀓𑀸𑀭𑀢𑀸𑀬 𑀫𑀸𑀬𑀸 𑀯𑀺𑀬 𑀦𑀸𑀫𑀭𑀽𑀧𑀁, 𑀧𑀢𑀺𑀝𑁆𑀞𑀸𑀯𑀺𑀲𑁂𑀲𑁂𑀦 𑀯𑀼𑀟𑁆𑀠𑀺𑀯𑀺𑀲𑁂𑀲𑀸𑀧𑀢𑁆𑀢𑀺𑀢𑁄 𑀯𑀦𑀧𑁆𑀧𑀕𑀼𑀫𑁆𑀩𑁄 𑀯𑀺𑀬 𑀲𑀴𑀸𑀬𑀢𑀦𑀁. 𑀆𑀬𑀢𑀦𑀸𑀦𑀁 𑀯𑀺𑀲𑀬𑀺𑀯𑀺𑀲𑀬𑀪𑀽𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀸𑀪𑀺𑀫𑀼𑀔𑀪𑀸𑀯𑀢𑁄 𑀆𑀬𑀢𑀦𑀖𑀝𑁆𑀝𑀦𑀢𑁄. 𑀏𑀢𑁆𑀣 𑀘 𑀲𑀗𑁆𑀔𑀸𑀭𑀸𑀤𑀻𑀦𑀁 𑀓𑁄𑀲𑀧𑁆𑀧𑀤𑁂𑀲𑀧𑀭𑀺𑀡𑀸𑀬𑀓𑀸𑀤𑀻𑀳𑀺 𑀤𑁆𑀯𑀻𑀳𑀺 𑀤𑁆𑀯𑀻𑀳𑀺 𑀲𑀤𑀺𑀲𑀢𑀸𑀬 𑀤𑁆𑀯𑁂 𑀤𑁆𑀯𑁂 𑀉𑀧𑀫𑀸 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀕𑀫𑁆𑀪𑀻𑀭𑁄 𑀏𑀯 𑀳𑀼𑀢𑁆𑀯𑀸 𑀑𑀪𑀸𑀲𑀢𑀺 𑀧𑀓𑀸𑀲𑀢𑀺 𑀤𑀺𑀲𑁆𑀲𑀢𑀻𑀢𑀺 𑀕𑀫𑁆𑀪𑀻𑀭𑀸𑀯𑀪𑀸𑀲𑁄. 𑀚𑀸𑀢𑀺𑀧𑀘𑁆𑀘𑀬𑀲𑀫𑁆𑀪𑀽𑀢𑀲𑀫𑀼𑀤𑀸𑀕𑀢𑀝𑁆𑀞𑁄𑀢𑀺 𑀚𑀸𑀢𑀺𑀧𑀘𑁆𑀘𑀬𑀸 𑀲𑀫𑁆𑀪𑀽𑀢𑀁 𑀳𑀼𑀢𑁆𑀯𑀸 𑀲𑀳𑀺𑀢𑀲𑁆𑀲 𑀅𑀢𑁆𑀢𑀦𑁄 𑀧𑀘𑁆𑀘𑀬𑀸𑀦𑀼𑀭𑀽𑀧𑀲𑁆𑀲 𑀉𑀤𑁆𑀥𑀁 𑀉𑀤𑁆𑀥𑀁 𑀆𑀕𑀢𑀪𑀸𑀯𑁄, 𑀅𑀦𑀼𑀧𑁆𑀧𑀩𑀦𑁆𑀥𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑀫𑁆𑀪𑀽𑀢𑀝𑁆𑀞𑁄 𑀘 𑀲𑀫𑀼𑀤𑀸𑀕𑀢𑀝𑁆𑀞𑁄 𑀘 𑀲𑀫𑁆𑀪𑀽𑀢𑀲𑀫𑀼𑀤𑀸𑀕𑀢𑀝𑁆𑀞𑁄. ‘‘𑀦 𑀚𑀸𑀢𑀺𑀢𑁄 𑀚𑀭𑀸𑀫𑀭𑀡𑀁 𑀦 𑀳𑁄𑀢𑀺, 𑀦 𑀘 𑀚𑀸𑀢𑀺𑀁 𑀯𑀺𑀦𑀸 ¶ 𑀅𑀜𑁆𑀜𑀢𑁄 𑀳𑁄𑀢𑀻’’𑀢𑀺 𑀳𑀺 𑀚𑀸𑀢𑀺𑀧𑀘𑁆𑀘𑀬𑀲𑀫𑁆𑀪𑀽𑀢𑀝𑁆𑀞𑁄 𑀯𑀼𑀢𑁆𑀢𑁄. 𑀇𑀢𑁆𑀣𑀜𑁆𑀘 𑀚𑀸𑀢𑀺𑀢𑁄 𑀲𑀫𑀼𑀤𑀸𑀕𑀘𑁆𑀙𑀢𑀻𑀢𑀺 𑀧𑀘𑁆𑀘𑀬𑀲𑀫𑀼𑀤𑀸𑀕𑀢𑀝𑁆𑀞𑁄, 𑀬𑀸 𑀬𑀸 𑀚𑀸𑀢𑀺 𑀬𑀣𑀸 𑀬𑀣𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀤𑀦𑀼𑀭𑀽𑀧𑀧𑀸𑀢𑀼𑀪𑀸𑀯𑁄𑀢𑀺 𑀅𑀢𑁆𑀣𑁄.

𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄𑀢𑀺 𑀇𑀥 𑀧𑀦 𑀧𑀘𑁆𑀘𑀬𑀼𑀧𑁆𑀧𑀸𑀤𑀸 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀼𑀧𑁆𑀧𑀸𑀤𑀲𑀗𑁆𑀔𑀸𑀢𑀁 𑀅𑀦𑀼𑀮𑁄𑀫𑀁, 𑀦𑀺𑀭𑁄𑀥𑀸 𑀦𑀺𑀭𑁄𑀥𑀲𑀗𑁆𑀔𑀸𑀢𑀁 𑀧𑀝𑀺𑀮𑁄𑀫𑀜𑁆𑀘𑀸𑀳. 𑀆𑀤𑀺𑀢𑁄 𑀧𑀦 𑀅𑀦𑁆𑀢𑀕𑀫𑀦𑀁 𑀅𑀦𑀼𑀮𑁄𑀫𑀁, 𑀅𑀦𑁆𑀢𑀢𑁄 𑀘 𑀆𑀤𑀺𑀕𑀫𑀦𑀁 𑀧𑀝𑀺𑀮𑁄𑀫𑀫𑀸𑀳𑀸𑀢𑀺. ‘‘𑀇𑀫𑁂 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀓𑀺𑀁𑀦𑀺𑀤𑀸𑀦𑀸’’𑀢𑀺𑀆𑀤𑀺𑀓𑀸𑀬 (𑀲𑀁. 𑀦𑀺. 𑁨.𑁧𑁧) 𑀯𑁂𑀫𑀚𑁆𑀛𑀢𑁄 𑀧𑀝𑁆𑀞𑀸𑀬 𑀧𑀝𑀺𑀮𑁄𑀫𑀤𑁂𑀲𑀦𑀸𑀬, ‘‘𑀘𑀓𑁆𑀔𑀼𑀁 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’’𑀢𑀺𑀆𑀤𑀺𑀓𑀸𑀬 (𑀲𑀁. 𑀦𑀺. 𑁨.𑁪𑁩-𑁪𑁪; 𑁨.𑁪.𑁬𑁦) 𑀅𑀦𑀼𑀮𑁄𑀫𑀤𑁂𑀲𑀦𑀸𑀬 𑀘 𑀤𑁆𑀯𑀺𑀲𑀦𑁆𑀥𑀺𑀢𑀺𑀲𑀗𑁆𑀔𑁂𑀧𑀁, ‘‘𑀲𑀁𑀬𑁄𑀚𑀦𑀻𑀬𑁂𑀲𑀼, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄 𑀢𑀡𑁆𑀳𑀸 𑀧𑀯𑀟𑁆𑀠𑀢𑀺, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁨.𑁫𑁩-𑁫𑁪) 𑀏𑀓𑀲𑀦𑁆𑀥𑀺𑀤𑁆𑀯𑀺𑀲𑀗𑁆𑀔𑁂𑀧𑀁.

𑀅𑀯𑀺𑀚𑁆𑀚𑀸𑀤𑀻𑀦𑀁 𑀲𑀪𑀸𑀯𑁄 𑀧𑀝𑀺𑀯𑀺𑀚𑁆𑀛𑀻𑀬𑀢𑀻𑀢𑀺 𑀧𑀝𑀺𑀯𑁂𑀥𑁄. 𑀯𑀼𑀢𑁆𑀢𑀜𑁆𑀳𑀺 ‘‘𑀢𑁂𑀲𑀁 𑀢𑁂𑀲𑀁 𑀯𑀸 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀥𑀫𑁆𑀫𑀸𑀦𑀁 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑁄 𑀲𑀮𑀓𑁆𑀔𑀡𑀲𑀗𑁆𑀔𑀸𑀢𑁄 𑀅𑀯𑀺𑀧𑀭𑀻𑀢𑀲𑀪𑀸𑀯𑁄 𑀧𑀝𑀺𑀯𑁂𑀥𑁄’’𑀢𑀺 (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸). 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁂𑀓𑀤𑁂𑀲𑁄 𑀲𑀭𑀸𑀕𑁄, 𑀅𑀜𑁆𑀜𑁄 𑀯𑀺𑀭𑀸𑀕𑁄, 𑀭𑀸𑀕𑀲𑁆𑀲 𑀯𑀸 𑀅𑀧𑀝𑀺𑀧𑀓𑁆𑀔𑀪𑀸𑀯𑀢𑁄 ¶ 𑀭𑀸𑀕𑀧𑁆𑀧𑀯𑀟𑁆𑀠𑀓𑁄 𑀲𑀩𑁆𑀩𑁄𑀧𑀺 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀲𑀭𑀸𑀕𑁄, 𑀇𑀢𑀭𑁄 𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀯𑀺𑀭𑀸𑀕𑁄. ‘‘𑀤𑀻𑀖𑀭𑀢𑁆𑀢𑀜𑁆𑀳𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀚𑁆𑀛𑁄𑀲𑀺𑀢𑀁 𑀫𑀫𑀸𑀬𑀺𑀢𑀁 𑀧𑀭𑀸𑀫𑀝𑁆𑀞𑀁 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺 (𑀲𑀁. 𑀦𑀺. 𑁨.𑁬𑁨) 𑀅𑀢𑁆𑀢𑀧𑀭𑀸𑀫𑀸𑀲𑀲𑁆𑀲 𑀯𑀺𑀜𑁆𑀜𑀸𑀡𑀁 𑀯𑀺𑀲𑀺𑀝𑁆𑀞𑀁 𑀯𑀢𑁆𑀣𑀼 𑀯𑀼𑀢𑁆𑀢𑀦𑁆𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀲𑀼𑀜𑁆𑀜𑀢𑀝𑁆𑀞𑁄 𑀕𑀫𑁆𑀪𑀻𑀭𑁄, 𑀅𑀢𑁆𑀢𑀸 𑀯𑀺𑀚𑀸𑀦𑀸𑀢𑀺 𑀲𑀁𑀲𑀭𑀢𑀻𑀢𑀺 𑀲𑀩𑁆𑀬𑀸𑀧𑀸𑀭𑀢𑀸𑀲𑀗𑁆𑀓𑀦𑁆𑀢𑀺𑀅𑀪𑀺𑀦𑀺𑀯𑁂𑀲𑀩𑀮𑀯𑀢𑀸𑀬 𑀅𑀩𑁆𑀬𑀸𑀧𑀸𑀭𑀝𑁆𑀞𑀅𑀲𑀗𑁆𑀓𑀦𑁆𑀢𑀺𑀧𑀝𑀺𑀲𑀦𑁆𑀥𑀺𑀧𑀸𑀢𑀼𑀪𑀸𑀯𑀝𑁆𑀞𑀸 𑀘 𑀕𑀫𑁆𑀪𑀻𑀭𑀸, 𑀦𑀸𑀫𑀲𑁆𑀲 𑀭𑀽𑀧𑁂𑀦, 𑀭𑀽𑀧𑀲𑁆𑀲 𑀘 𑀦𑀸𑀫𑁂𑀦 𑀅𑀲𑀫𑁆𑀧𑀬𑁄𑀕𑀢𑁄 𑀯𑀺𑀦𑀺𑀩𑁆𑀪𑁄𑀕𑁄, 𑀦𑀸𑀫𑀲𑁆𑀲 𑀦𑀸𑀫𑁂𑀦 𑀅𑀯𑀺𑀦𑀺𑀩𑁆𑀪𑁄𑀕𑁄 𑀬𑁄𑀚𑁂𑀢𑀩𑁆𑀩𑁄. 𑀏𑀓𑀼𑀧𑁆𑀧𑀸𑀤𑁂𑀓𑀦𑀺𑀭𑁄𑀥𑁂𑀳𑀺 𑀅𑀯𑀺𑀦𑀺𑀩𑁆𑀪𑁄𑀕𑁂 𑀅𑀥𑀺𑀧𑁆𑀧𑁂𑀢𑁂 𑀭𑀽𑀧𑀲𑁆𑀲 𑀘 𑀭𑀽𑀧𑁂𑀦 𑀮𑀩𑁆𑀪𑀢𑀺. 𑀅𑀣 𑀯𑀸 𑀏𑀓𑀘𑀢𑀼𑀯𑁄𑀓𑀸𑀭𑀪𑀯𑁂𑀲𑀼 𑀦𑀸𑀫𑀭𑀽𑀧𑀸𑀦𑀁 𑀅𑀲𑀳𑀯𑀢𑁆𑀢𑀦𑀢𑁄 𑀅𑀜𑁆𑀜𑀫𑀜𑁆𑀜𑀯𑀺𑀦𑀺𑀩𑁆𑀪𑁄𑀕𑁄, 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀲𑀳𑀯𑀢𑁆𑀢𑀦𑀢𑁄 𑀅𑀯𑀺𑀦𑀺𑀩𑁆𑀪𑁄𑀕𑁄 𑀘 𑀯𑁂𑀤𑀺𑀢𑀩𑁆𑀩𑁄.

𑀅𑀥𑀺𑀧𑀢𑀺𑀬𑀝𑁆𑀞𑁄 ¶ 𑀦𑀸𑀫 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀪𑀸𑀯𑁄. ‘‘𑀮𑁄𑀓𑁄𑀧𑁂𑀲𑁄 𑀤𑁆𑀯𑀸𑀭𑀸𑀧𑁂𑀲𑀸 𑀔𑁂𑀢𑁆𑀢𑀫𑁆𑀧𑁂𑀢’’𑀦𑁆𑀢𑀺 (𑀥. 𑀲. 𑁫𑁯𑁮-𑁫𑁯𑁯) 𑀯𑀼𑀢𑁆𑀢𑀸 𑀮𑁄𑀓𑀸𑀤𑀺𑀅𑀢𑁆𑀣𑀸 𑀘𑀓𑁆𑀔𑀸𑀤𑀻𑀲𑀼 𑀧𑀜𑁆𑀘𑀲𑀼 𑀬𑁄𑀚𑁂𑀢𑀩𑁆𑀩𑀸. 𑀫𑀦𑀸𑀬𑀢𑀦𑀲𑁆𑀲𑀧𑀺 𑀮𑀼𑀚𑁆𑀚𑀦𑀢𑁄 𑀫𑀦𑁄𑀲𑀫𑁆𑀨𑀲𑁆𑀲𑀸𑀤𑀻𑀦𑀁 𑀤𑁆𑀯𑀸𑀭𑀔𑁂𑀢𑁆𑀢𑀪𑀸𑀯𑀢𑁄 𑀘 𑀏𑀢𑁂 𑀅𑀢𑁆𑀣𑀸 𑀲𑀫𑁆𑀪𑀯𑀦𑁆𑀢𑁂𑀯. 𑀆𑀧𑀸𑀣𑀕𑀢𑀸𑀦𑀁 𑀭𑀽𑀧𑀸𑀤𑀻𑀦𑀁 𑀧𑀓𑀸𑀲𑀦𑀬𑁄𑀕𑁆𑀬𑀢𑀸𑀮𑀓𑁆𑀔𑀡𑀁 𑀑𑀪𑀸𑀲𑀦𑀁 𑀘𑀓𑁆𑀔𑀸𑀤𑀻𑀦𑀁 𑀯𑀺𑀲𑀬𑀺𑀪𑀸𑀯𑁄, 𑀫𑀦𑀸𑀬𑀢𑀦𑀲𑁆𑀲 𑀯𑀺𑀚𑀸𑀦𑀦𑀁. 𑀲𑀗𑁆𑀖𑀝𑁆𑀝𑀦𑀝𑁆𑀞𑁄 𑀯𑀺𑀲𑁂𑀲𑁂𑀦 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁, 𑀇𑀢𑀭𑁂 𑀙𑀦𑁆𑀦𑀫𑁆𑀧𑀺 𑀬𑁄𑀚𑁂𑀢𑀩𑁆𑀩𑀸. 𑀨𑀼𑀲𑀦𑀜𑁆𑀘 𑀨𑀲𑁆𑀲𑀲𑁆𑀲 𑀲𑀪𑀸𑀯𑁄, 𑀲𑀗𑁆𑀖𑀝𑁆𑀝𑀦𑀁 𑀭𑀲𑁄, 𑀇𑀢𑀭𑁂 𑀉𑀧𑀝𑁆𑀞𑀸𑀦𑀸𑀓𑀸𑀭𑀸. 𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀝𑁆𑀞𑁄 𑀭𑀲𑀯𑀲𑁂𑀦 𑀯𑀼𑀢𑁆𑀢𑁄, 𑀯𑁂𑀤𑀬𑀺𑀢𑀝𑁆𑀞𑁄 𑀮𑀓𑁆𑀔𑀡𑀯𑀲𑁂𑀦. 𑀅𑀢𑁆𑀢𑀸 𑀯𑁂𑀤𑀬𑀢𑀻𑀢𑀺 𑀅𑀪𑀺𑀦𑀺𑀯𑁂𑀲𑀲𑁆𑀲 𑀩𑀮𑀯𑀢𑀸𑀬 𑀦𑀺𑀚𑁆𑀚𑀻𑀯𑀝𑁆𑀞𑁄 𑀯𑁂𑀤𑀦𑀸𑀬 𑀕𑀫𑁆𑀪𑀻𑀭𑁄. 𑀦𑀺𑀚𑁆𑀚𑀻𑀯𑀸𑀬 𑀯𑁂𑀤𑀦𑀸𑀬 𑀯𑁂𑀤𑀬𑀺𑀢𑀁 𑀦𑀺𑀚𑁆𑀚𑀻𑀯𑀯𑁂𑀤𑀬𑀺𑀢𑀁, 𑀦𑀺𑀚𑁆𑀚𑀻𑀯𑀯𑁂𑀤𑀬𑀺𑀢𑀫𑁂𑀯 𑀅𑀢𑁆𑀣𑁄 𑀦𑀺𑀚𑁆𑀚𑀻𑀯𑀯𑁂𑀤𑀬𑀺𑀢𑀝𑁆𑀞𑁄.

𑀆𑀤𑀸𑀦𑀝𑁆𑀞𑁄 𑀘𑀢𑀼𑀦𑁆𑀦𑀫𑁆𑀧𑀺 𑀉𑀧𑀸𑀤𑀸𑀦𑀸𑀦𑀁 𑀲𑀫𑀸𑀦𑁄, 𑀕𑀳𑀡𑀝𑁆𑀞𑁄 𑀓𑀸𑀫𑀼𑀧𑀸𑀤𑀸𑀦𑀲𑁆𑀲, 𑀇𑀢𑀭𑁂𑀲𑀁 𑀢𑀺𑀡𑁆𑀡𑀁 𑀅𑀪𑀺𑀦𑀺𑀯𑁂𑀲𑀸𑀤𑀺𑀅𑀢𑁆𑀣𑁄. ‘‘𑀤𑀺𑀝𑁆𑀞𑀺𑀓𑀦𑁆𑀢𑀸𑀭𑁄’’𑀢𑀺 𑀳𑀺 𑀯𑀘𑀦𑀢𑁄 𑀤𑀺𑀝𑁆𑀞𑀻𑀦𑀁 𑀤𑀼𑀭𑀢𑀺𑀓𑁆𑀓𑀫𑀦𑀝𑁆𑀞𑁄𑀧𑀻𑀢𑀺. 𑀤𑀴𑁆𑀳𑀕𑀳𑀡𑀢𑁆𑀢𑀸 𑀯𑀸 𑀘𑀢𑀼𑀦𑁆𑀦𑀫𑁆𑀧𑀺 𑀤𑀼𑀭𑀢𑀺𑀓𑁆𑀓𑀫𑀦𑀝𑁆𑀞𑁄 𑀬𑁄𑀚𑁂𑀢𑀩𑁆𑀩𑁄. 𑀬𑁄𑀦𑀺𑀕𑀢𑀺𑀞𑀺𑀢𑀺𑀦𑀺𑀯𑀸𑀲𑁂𑀲𑀼𑀔𑀺𑀧𑀦𑀦𑁆𑀢𑀺 𑀲𑀫𑀸𑀲𑁂 𑀪𑀼𑀫𑁆𑀫𑀯𑀘𑀦𑀲𑁆𑀲 𑀅𑀮𑁄𑀧𑁄 𑀤𑀝𑁆𑀞𑀩𑁆𑀩𑁄, 𑀢𑀲𑁆𑀫𑀸 𑀢𑁂𑀦 𑀆𑀬𑀽𑀳𑀦𑀸𑀪𑀺𑀲𑀗𑁆𑀔𑀭𑀡𑀧𑀤𑀸𑀦𑀁 𑀲𑀫𑀸𑀲𑁄 𑀳𑁄𑀢𑀺. 𑀚𑀭𑀸𑀫𑀭𑀡𑀗𑁆𑀕𑀁 𑀫𑀭𑀡𑀧𑁆𑀧𑀥𑀸𑀦𑀦𑁆𑀢𑀺 𑀫𑀭𑀡𑀝𑁆𑀞𑀸 𑀏𑀯 𑀔𑀬𑀸𑀤𑀬𑁄 𑀕𑀫𑁆𑀪𑀻𑀭𑀸 𑀤𑀲𑁆𑀲𑀺𑀢𑀸. 𑀦𑀯𑀦𑀯𑀸𑀦𑀜𑁆𑀳𑀺 𑀧𑀭𑀺𑀓𑁆𑀔𑀬𑁂𑀦 𑀔𑀡𑁆𑀟𑀺𑀘𑁆𑀘𑀸𑀤𑀺𑀧𑀭𑀺𑀧𑀓𑁆𑀓𑀧𑁆𑀧𑀯𑀢𑁆𑀢𑀺 𑀚𑀭𑀸𑀢𑀺, 𑀔𑀬𑀝𑁆𑀞𑁄 𑀯𑀸 𑀚𑀭𑀸𑀬 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀦𑀯𑀪𑀸𑀯𑀸𑀧𑀕𑀫𑁄 𑀳𑀺 𑀔𑀬𑁄𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑁄𑀢𑀺. 𑀯𑀺𑀧𑀭𑀺𑀡𑀸𑀫𑀝𑁆𑀞𑁄 𑀤𑁆𑀯𑀺𑀦𑁆𑀦𑀫𑁆𑀧𑀺. 𑀲𑀦𑁆𑀢𑀢𑀺𑀯𑀲𑁂𑀦 𑀯𑀸 𑀚𑀭𑀸𑀬 𑀔𑀬𑀯𑀬𑀪𑀸𑀯𑁄, 𑀲𑀫𑁆𑀫𑀼𑀢𑀺𑀔𑀡𑀺𑀓𑀯𑀲𑁂𑀦 𑀫𑀭𑀡𑀲𑁆𑀲 𑀪𑁂𑀤𑀯𑀺𑀧𑀭𑀺𑀡𑀸𑀫𑀢𑀸 𑀬𑁄𑀚𑁂𑀢𑀩𑁆𑀩𑀸.

𑀅𑀢𑁆𑀣𑀦𑀬𑀸𑀢𑀺 ¶ 𑀅𑀢𑁆𑀣𑀸𑀦𑀁 𑀦𑀬𑀸. 𑀅𑀯𑀺𑀚𑁆𑀚𑀸𑀤𑀺𑀅𑀢𑁆𑀣𑁂𑀳𑀺 𑀏𑀓𑀢𑁆𑀢𑀸𑀤𑀻 𑀲𑁂𑀦 𑀪𑀸𑀯𑁂𑀦 𑀦𑀻𑀬𑀦𑁆𑀢𑀺 𑀕𑀫𑁆𑀫𑁂𑀦𑁆𑀢𑀻𑀢𑀺 𑀏𑀓𑀢𑁆𑀢𑀸𑀤𑀬𑁄 𑀢𑁂𑀲𑀁 𑀦𑀬𑀸𑀢𑀺 𑀯𑀼𑀢𑁆𑀢𑀸. 𑀦𑀻𑀬𑀦𑁆𑀢𑀻𑀢𑀺 𑀳𑀺 𑀦𑀬𑀸𑀢𑀺. 𑀅𑀢𑁆𑀣𑀸 𑀏𑀯 𑀯𑀸 𑀏𑀓𑀢𑁆𑀢𑀸𑀤𑀺𑀪𑀸𑀯𑁂𑀦 𑀦𑀻𑀬𑀫𑀸𑀦𑀸 𑀜𑀸𑀬𑀫𑀸𑀦𑀸 ‘‘𑀅𑀢𑁆𑀣𑀦𑀬𑀸’’𑀢𑀺 𑀯𑀼𑀢𑁆𑀢𑀸. 𑀦𑀻𑀬𑀦𑁆𑀢𑀺 𑀏𑀢𑁂𑀳𑀻𑀢𑀺 𑀯𑀸 𑀦𑀬𑀸, 𑀏𑀓𑀢𑁆𑀢𑀸𑀤𑀻𑀳𑀺 𑀘 𑀅𑀢𑁆𑀣𑀸 ‘‘𑀏𑀓’’𑀦𑁆𑀢𑀺𑀆𑀤𑀺𑀦𑀸 𑀦𑀻𑀬𑀦𑁆𑀢𑀺, 𑀢𑀲𑁆𑀫𑀸 𑀏𑀓𑀢𑁆𑀢𑀸𑀤𑀬𑁄 𑀅𑀢𑁆𑀣𑀸𑀦𑀁 𑀦𑀬𑀸𑀢𑀺 𑀅𑀢𑁆𑀣𑀦𑀬𑀸. 𑀲𑀦𑁆𑀢𑀸𑀦𑀸𑀦𑀼𑀧𑀘𑁆𑀙𑁂𑀤𑁂𑀦 𑀩𑀻𑀚𑀁 𑀭𑀼𑀓𑁆𑀔𑀪𑀸𑀯𑀁 𑀧𑀢𑁆𑀢𑀁 𑀭𑀼𑀓𑁆𑀔𑀪𑀸𑀯𑁂𑀦 𑀧𑀯𑀢𑁆𑀢𑀦𑁆𑀢𑀺 𑀏𑀓𑀢𑁆𑀢𑁂𑀦 𑀯𑀼𑀘𑁆𑀘𑀢𑀻𑀢𑀺 𑀲𑀦𑁆𑀢𑀸𑀦𑀸𑀦𑀼𑀧𑀘𑁆𑀙𑁂𑀤𑁄 𑀏𑀓𑀢𑁆𑀢𑀁, 𑀏𑀯𑀫𑀺𑀥𑀸𑀧𑀺 𑀅𑀯𑀺𑀚𑁆𑀚𑀸𑀤𑀻𑀦𑀁 𑀲𑀦𑁆𑀢𑀸𑀦𑀸𑀦𑀼𑀧𑀘𑁆𑀙𑁂𑀤𑁄 𑀏𑀓𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀪𑀺𑀦𑁆𑀦𑀲𑀦𑁆𑀢𑀸𑀦𑀲𑁆𑀲𑁂𑀯𑀸𑀢𑀺 ¶ 𑀲𑀫𑁆𑀩𑀦𑁆𑀥𑀭𑀳𑀺𑀢𑀲𑁆𑀲 𑀦𑀸𑀦𑀢𑁆𑀢𑀲𑁆𑀲 𑀕𑀳𑀡𑀢𑁄 𑀲𑀢𑁆𑀢𑀦𑁆𑀢𑀭𑁄 𑀉𑀘𑁆𑀙𑀺𑀦𑁆𑀦𑁄 𑀲𑀢𑁆𑀢𑀦𑁆𑀢𑀭𑁄 𑀉𑀧𑁆𑀧𑀦𑁆𑀦𑁄𑀢𑀺 𑀕𑀡𑁆𑀳𑀦𑁆𑀢𑁄 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀫𑀼𑀧𑀸𑀤𑀺𑀬𑀢𑀺.

𑀬𑀢𑁄 𑀓𑀼𑀢𑁄𑀘𑀻𑀢𑀺 𑀬𑀤𑀺 𑀅𑀜𑁆𑀜𑀲𑁆𑀫𑀸 𑀅𑀜𑁆𑀜𑀲𑁆𑀲𑀼𑀧𑁆𑀧𑀢𑁆𑀢𑀺 𑀲𑀺𑀬𑀸, 𑀯𑀸𑀮𑀺𑀓𑀢𑁄 𑀢𑁂𑀮𑀲𑁆𑀲, 𑀉𑀘𑁆𑀙𑀼𑀢𑁄 𑀔𑀻𑀭𑀲𑁆𑀲 𑀓𑀲𑁆𑀫𑀸 𑀉𑀧𑁆𑀧𑀢𑁆𑀢𑀺 𑀦 𑀲𑀺𑀬𑀸, 𑀢𑀲𑁆𑀫𑀸 𑀦 𑀓𑁄𑀘𑀺 𑀓𑀲𑁆𑀲𑀘𑀺 𑀳𑁂𑀢𑀼 𑀅𑀢𑁆𑀣𑀻𑀢𑀺 𑀅𑀳𑁂𑀢𑀼𑀓𑀤𑀺𑀝𑁆𑀞𑀺𑀁, 𑀅𑀯𑀺𑀚𑁆𑀚𑀫𑀸𑀦𑁂𑀧𑀺 𑀳𑁂𑀢𑀼𑀫𑁆𑀳𑀺 𑀦𑀺𑀬𑀢𑀢𑀸𑀬 𑀢𑀺𑀮𑀕𑀸𑀯𑀻𑀲𑀼𑀓𑁆𑀓𑀲𑁄𑀡𑀺𑀢𑀸𑀤𑀻𑀳𑀺 𑀢𑁂𑀮𑀔𑀻𑀭𑀲𑀭𑀻𑀭𑀸𑀤𑀻𑀦𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀦𑀺𑀬𑀢𑀺𑀯𑀸𑀤𑀜𑁆𑀘 𑀉𑀧𑀸𑀤𑀺𑀬𑀢𑀻𑀢𑀺 𑀯𑀺𑀜𑁆𑀜𑀸𑀢𑀩𑁆𑀩𑀁 𑀬𑀣𑀸𑀭𑀳𑀁.

𑀓𑀲𑁆𑀫𑀸? 𑀬𑀲𑁆𑀫𑀸 𑀇𑀤𑀜𑁆𑀳𑀺 𑀪𑀯𑀘𑀓𑁆𑀓𑀁 𑀅𑀧𑀤𑀸𑀮𑁂𑀢𑁆𑀯𑀸 𑀲𑀁𑀲𑀸𑀭𑀪𑀬𑀫𑀢𑀻𑀢𑁄 𑀦 𑀓𑁄𑀘𑀺 𑀲𑀼𑀧𑀺𑀦𑀦𑁆𑀢𑀭𑁂𑀧𑀺 𑀅𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀤𑀼𑀭𑀪𑀺𑀬𑀸𑀦𑀦𑁆𑀢𑀺 𑀤𑀼𑀭𑀢𑀺𑀓𑁆𑀓𑀫𑀁. 𑀅𑀲𑀦𑀺𑀯𑀺𑀘𑀓𑁆𑀓𑀫𑀺𑀯𑀸𑀢𑀺 𑀅𑀲𑀦𑀺𑀫𑀡𑁆𑀟𑀮𑀫𑀺𑀯. 𑀢𑀜𑁆𑀳𑀺 𑀦𑀺𑀫𑁆𑀫𑀣𑀦𑀫𑁂𑀯, 𑀦𑀸𑀦𑀺𑀫𑁆𑀫𑀣𑀦𑀁 𑀧𑀯𑀢𑁆𑀢𑀫𑀸𑀦𑀁 𑀅𑀢𑁆𑀣𑀺, 𑀏𑀯𑀁 𑀪𑀯𑀘𑀓𑁆𑀓𑀫𑁆𑀧𑀺 𑀏𑀓𑀦𑁆𑀢𑀁 𑀤𑀼𑀓𑁆𑀔𑀼𑀧𑁆𑀧𑀸𑀤𑀦𑀢𑁄 ‘‘𑀦𑀺𑀘𑁆𑀘𑀦𑀺𑀫𑁆𑀫𑀣𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑀜𑀸𑀡𑀸𑀲𑀺𑀦𑀸 𑀅𑀧𑀤𑀸𑀮𑁂𑀢𑁆𑀯𑀸 𑀲𑀁𑀲𑀸𑀭𑀪𑀬𑀁 𑀅𑀢𑀻𑀢𑁄 𑀦𑀢𑁆𑀣𑀻𑀢𑀺 𑀏𑀢𑀲𑁆𑀲 𑀲𑀸𑀥𑀓𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀼𑀢𑁆𑀢𑀫𑁆𑀧𑀺 𑀘𑁂𑀢’’𑀦𑁆𑀢𑀺𑀆𑀤𑀺. 𑀢𑀦𑁆𑀢𑀽𑀦𑀁 𑀆𑀓𑀼𑀮𑀓𑀁 𑀢𑀦𑁆𑀢𑀸𑀓𑀼𑀮𑀓𑀁, 𑀢𑀦𑁆𑀢𑀸𑀓𑀼𑀮𑀓𑀫𑀺𑀯 𑀚𑀸𑀢𑀸 𑀢𑀦𑁆𑀢𑀸𑀓𑀼𑀮𑀓𑀚𑀸𑀢𑀸, 𑀓𑀺𑀮𑁂𑀲𑀓𑀫𑁆𑀫𑀯𑀺𑀧𑀸𑀓𑁂𑀳𑀺 𑀅𑀢𑀻𑀯 𑀚𑀝𑀺𑀢𑀸𑀢𑀺 𑀅𑀢𑁆𑀣𑁄. 𑀕𑀼𑀡𑀸𑀬 𑀲𑀓𑀼𑀡𑀺𑀬𑀸 𑀦𑀻𑀟𑀁 𑀕𑀼𑀡𑀸𑀕𑀼𑀡𑁆𑀟𑀺𑀓𑀁. 𑀯𑀟𑁆𑀠𑀺𑀅𑀪𑀸𑀯𑀢𑁄 𑀅𑀧𑀸𑀬𑀁 𑀤𑀼𑀓𑁆𑀔𑀕𑀢𑀺𑀪𑀸𑀯𑀢𑁄 𑀤𑀼𑀕𑁆𑀕𑀢𑀺𑀁 𑀲𑀼𑀔𑀲𑀫𑀼𑀲𑁆𑀲𑀬𑀢𑁄 𑀯𑀺𑀦𑀺𑀧𑀸𑀢𑀢𑁆𑀢𑀸 𑀯𑀺𑀦𑀺𑀧𑀸𑀢𑀜𑁆𑀘 𑀘𑀢𑀼𑀩𑁆𑀩𑀺𑀥𑀁 𑀅𑀧𑀸𑀬𑀁, ‘‘𑀔𑀦𑁆𑀥𑀸𑀦𑀜𑁆𑀘 𑀧𑀝𑀺𑀧𑀸𑀝𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀲𑀁𑀲𑀸𑀭𑀜𑁆𑀘 𑀦𑀸𑀢𑀺𑀯𑀢𑁆𑀢𑀢𑀺. 𑀲𑀁𑀲𑀸𑀭𑁄 𑀏𑀯 𑀯𑀸 𑀲𑀩𑁆𑀩𑁄 𑀇𑀥 𑀯𑀟𑁆𑀠𑀺𑀅𑀧𑀕𑀫𑀸𑀤𑀻𑀳𑀺 𑀅𑀢𑁆𑀣𑁂𑀳𑀺 𑀅𑀧𑀸𑀬𑀸𑀤𑀺𑀦𑀸𑀫𑀓𑁄 𑀯𑀼𑀢𑁆𑀢𑁄 𑀓𑁂𑀯𑀮𑀁 𑀤𑀼𑀓𑁆𑀔𑀓𑁆𑀔𑀦𑁆𑀥𑀪𑀸𑀯𑀢𑁄.

𑀪𑀯𑀘𑀓𑁆𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁨𑁪𑁩. 𑀧𑀣𑀯𑀻𑀆𑀓𑀸𑀲𑀸 ¶ 𑀯𑀺𑀬 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀫𑀳𑀸𑀧𑀢𑁆𑀣𑀝𑀯𑀺𑀢𑁆𑀣𑀸𑀭𑀺𑀢𑀸𑀦𑀁 𑀅𑀢𑁆𑀣𑀸𑀦𑀁 𑀧𑀭𑀺𑀓𑀧𑁆𑀧𑀯𑀲𑁂𑀦 𑀓𑀣𑀺𑀢𑁄. 𑀢𑀜𑁆𑀳𑀺 𑀅𑀧𑀢𑁆𑀣𑀝𑀁 𑀅𑀯𑀺𑀢𑁆𑀣𑀢𑀜𑁆𑀘 𑀧𑀣𑀯𑀺𑀁 𑀆𑀓𑀸𑀲𑀜𑁆𑀘 𑀧𑀢𑁆𑀣𑀭𑀦𑁆𑀢𑁄 𑀯𑀺𑀢𑁆𑀣𑀸𑀭𑀬𑀦𑁆𑀢𑁄 𑀯𑀺𑀬 𑀘 𑀏𑀓𑁂𑀓𑀘𑀺𑀢𑁆𑀢𑀸𑀯𑀭𑀼𑀤𑁆𑀥𑀁 𑀅𑀓𑀢𑁆𑀯𑀸 ¶ 𑀲𑀩𑁆𑀩𑀲𑀢𑁆𑀢𑀲𑀩𑁆𑀩𑀘𑀺𑀢𑁆𑀢𑀲𑀸𑀥𑀸𑀭𑀡𑀯𑀲𑁂𑀦 𑀧𑀢𑁆𑀣𑀝𑀯𑀺𑀢𑁆𑀣𑀢𑀁 𑀓𑀢𑁆𑀯𑀸 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂𑀦 𑀪𑀕𑀯𑀸 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀦𑀸𑀦𑀸𑀘𑀺𑀢𑁆𑀢𑀯𑀲𑁂𑀦𑀸𑀢𑀺 𑀅𑀲𑀳𑀚𑀸𑀢𑀸𑀦𑀁 𑀲𑀳𑀚𑀸𑀢𑀸𑀦𑀜𑁆𑀘 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀦𑀸𑀦𑀸𑀘𑀺𑀢𑁆𑀢𑀕𑀢𑀸𑀦𑀁 𑀤𑀲𑁆𑀲𑀺𑀢𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦𑀯 𑀫𑀽𑀮𑀧𑀤𑀸𑀦𑀺 𑀏𑀢𑁂𑀲𑀦𑁆𑀢𑀺 𑀦𑀯𑀫𑀽𑀮𑀧𑀤𑀸, 𑀦𑀬𑀸. ‘‘𑀏𑀓𑁂𑀓𑁂𑀦 𑀦𑀬𑁂𑀦 𑀘𑀢𑀼𑀦𑁆𑀦𑀁 𑀘𑀢𑀼𑀦𑁆𑀦𑀁 𑀯𑀸𑀭𑀸𑀦𑀁 𑀲𑀗𑁆𑀕𑀳𑀺𑀢𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁, 𑀏𑀢𑁆𑀣 ‘‘𑀏𑀓𑁂𑀓𑁂𑀦 𑀘𑀢𑀼𑀓𑁆𑀓𑁂𑀦𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀦𑀬𑀘𑀢𑀼𑀓𑁆𑀓𑀯𑀸𑀭𑀸 𑀳𑀺 𑀏𑀢𑁆𑀣 𑀯𑀯𑀢𑁆𑀣𑀺𑀢𑀸 𑀤𑀲𑁆𑀲𑀺𑀢𑀸𑀦𑀁 𑀘𑀢𑀼𑀓𑁆𑀓𑀸𑀦𑀁 𑀦𑀬𑀪𑀸𑀯𑀸𑀢𑀺.

𑁧. 𑀧𑀘𑁆𑀘𑀬𑀘𑀢𑀼𑀓𑁆𑀓𑀯𑀡𑁆𑀡𑀦𑀸

𑀅𑀯𑀺𑀚𑁆𑀚𑀁 𑀅𑀗𑁆𑀕𑀁 𑀅𑀕𑁆𑀕𑀳𑁂𑀢𑁆𑀯𑀸 𑀢𑀢𑁄 𑀧𑀭𑀁 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑁄’’𑀢𑀺𑀆𑀤𑀻𑀦𑀺 𑀧𑀘𑁆𑀘𑀬𑀲𑀳𑀺𑀢𑀸𑀦𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀺 𑀅𑀗𑁆𑀕𑀪𑀸𑀯𑁂𑀦 𑀯𑀼𑀢𑁆𑀢𑀸𑀦𑀻𑀢𑀺 𑀆𑀳 ‘‘𑀦, 𑀢𑀲𑁆𑀲 𑀅𑀦𑀗𑁆𑀕𑀢𑁆𑀢𑀸’’𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁂 (𑀯𑀺𑀪. 𑁨𑁨𑁬) ‘‘𑀢𑀢𑁆𑀣 𑀓𑀢𑀫𑀸 𑀅𑀯𑀺𑀚𑁆𑀚𑀸’’𑀢𑀺 𑀅𑀯𑀺𑀚𑁆𑀚𑀁 𑀯𑀺𑀲𑀼𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 ‘‘𑀢𑀢𑁆𑀣 𑀓𑀢𑀫𑁄 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑁄’’𑀢𑀺𑀆𑀤𑀺𑀦𑀸 𑀢𑀁𑀢𑀁𑀧𑀘𑁆𑀘𑀬𑀯𑀦𑁆𑀢𑁄 𑀲𑀗𑁆𑀔𑀸𑀭𑀸𑀤𑀬𑁄 𑀯𑀺𑀲𑁆𑀲𑀚𑁆𑀚𑀺𑀢𑀸𑀢𑀺. 𑀢𑀻𑀲𑀼 𑀧𑀓𑀸𑀭𑁂𑀲𑀼 𑀧𑀞𑀫𑀧𑀞𑀫𑀯𑀸𑀭𑁄 𑀤𑀼𑀢𑀺𑀬𑀯𑀸𑀭𑀸𑀤𑀻𑀲𑀼 𑀧𑀯𑀺𑀲𑀦𑁆𑀢𑁄 𑀧𑀘𑁆𑀘𑀬𑀯𑀺𑀲𑁂𑀲𑀸𑀤𑀺𑀲𑀩𑁆𑀩𑀦𑀸𑀦𑀢𑁆𑀢𑀲𑀸𑀥𑀸𑀭𑀡𑀢𑁆𑀢𑀸 𑀢𑁂 𑀯𑀸𑀭𑀯𑀺𑀲𑁂𑀲𑁂 𑀕𑀡𑁆𑀳𑀸𑀢𑀻𑀢𑀺 ‘‘𑀲𑀩𑁆𑀩𑀲𑀗𑁆𑀕𑀸𑀳𑀓𑁄’’𑀢𑀺 𑀯𑀼𑀢𑁆𑀢𑁄. 𑀧𑀞𑀫𑀯𑀸𑀭𑁄 𑀏𑀯 𑀳𑀺 𑀦 𑀓𑁂𑀯𑀮𑀁 𑀙𑀝𑁆𑀞𑀸𑀬𑀢𑀦𑀫𑁂𑀯, 𑀅𑀣 𑀔𑁄 𑀦𑀸𑀫𑀜𑁆𑀘 𑀨𑀲𑁆𑀲𑀲𑁆𑀲 𑀧𑀘𑁆𑀘𑀬𑁄, 𑀦𑀸𑀫𑀁 𑀯𑀸 𑀦 𑀓𑁂𑀯𑀮𑀁 𑀙𑀝𑁆𑀞𑀸𑀬𑀢𑀦𑀲𑁆𑀲𑁂𑀯, 𑀅𑀣 𑀔𑁄 𑀨𑀲𑁆𑀲𑀲𑁆𑀲𑀸𑀧𑀻𑀢𑀺 𑀧𑀘𑁆𑀘𑀬𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁, 𑀬𑁂𑀦 𑀅𑀢𑁆𑀣𑀯𑀺𑀲𑁂𑀲𑁂𑀦 𑀫𑀳𑀸𑀦𑀺𑀤𑀸𑀦𑀲𑀼𑀢𑁆𑀢𑀤𑁂𑀲𑀦𑀸 𑀧𑀯𑀢𑁆𑀢𑀸, 𑀢𑀁𑀤𑀲𑁆𑀲𑀦𑀢𑁆𑀣𑀜𑁆𑀘 𑀙𑀝𑁆𑀞𑀸𑀬𑀢𑀦𑀗𑁆𑀕𑀁 𑀧𑀭𑀺𑀳𑀸𑀧𑁂𑀢𑁆𑀯𑀸 𑀯𑀼𑀢𑁆𑀢𑁄𑀢𑀺 𑀢𑀲𑁆𑀲 𑀤𑀼𑀢𑀺𑀬𑀯𑀸𑀭𑁂 𑀘 𑀧𑀯𑁂𑀲𑁄 𑀯𑀼𑀢𑁆𑀢𑁄, 𑀦 𑀲𑀩𑁆𑀩𑀗𑁆𑀕𑀲𑀫𑁄𑀭𑁄𑀥𑀢𑁄.

𑀬𑀢𑁆𑀣𑀸𑀢𑀺 𑀯𑀸𑀭𑀘𑀢𑀼𑀓𑁆𑀓𑁂 𑀏𑀓𑁂𑀓𑀯𑀸𑀭𑁂 𑀘. 𑀅𑀜𑁆𑀜𑀣𑀸𑀢𑀺 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀢𑁄 𑀅𑀜𑁆𑀜𑀣𑀸 𑀲𑀗𑁆𑀔𑀸𑀭𑁄𑀢𑀺 𑀯𑀼𑀢𑁆𑀢𑀁. 𑀅𑀯𑀼𑀢𑁆𑀢𑀦𑁆𑀢𑀺 ‘‘𑀭𑀽𑀧𑀁 𑀲𑀴𑀸𑀬𑀢𑀦’’𑀦𑁆𑀢𑀺, 𑀢𑁂𑀲𑀼𑀧𑀺 𑀘 𑀯𑀸𑀭𑁂𑀲𑀼 𑀘𑀢𑀽𑀲𑀼𑀧𑀺 𑀲𑁄𑀓𑀸𑀤𑀬𑁄 𑀅𑀯𑀼𑀢𑁆𑀢𑀸 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂𑀲𑀼 𑀯𑀼𑀢𑁆𑀢𑀸. 𑀢𑀢𑁆𑀣 𑀘 𑀯𑀼𑀢𑁆𑀢𑀫𑁂𑀯 𑀇𑀥 ‘‘𑀙𑀝𑁆𑀞𑀸𑀬𑀢𑀦’’𑀦𑁆𑀢𑀺 𑀅𑀜𑁆𑀜𑀣𑀸 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀩𑁆𑀩𑀝𑁆𑀞𑀸𑀦𑀲𑀸𑀥𑀸𑀭𑀡𑀢𑁄𑀢𑀺 ¶ 𑀯𑀼𑀢𑁆𑀢𑀦𑀬𑁂𑀦 𑀲𑀩𑁆𑀩𑀯𑀸𑀭𑀲𑀸𑀥𑀸𑀭𑀡𑀢𑁄, 𑀲𑀩𑁆𑀩𑀯𑀺𑀜𑁆𑀜𑀸𑀡𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀯𑀲𑀸𑀥𑀸𑀭𑀡𑀢𑁄 𑀯𑀸. 𑀯𑀺𑀦𑀸 𑀅𑀪𑀸𑀯𑁂𑀦 𑀯𑀺𑀜𑁆𑀜𑀸𑀡𑀲𑁆𑀲 𑀔𑀦𑁆𑀥𑀢𑁆𑀢𑀬𑀫𑁆𑀧𑀺 𑀲𑀫𑀸𑀦𑀁 𑀨𑀮𑀁 𑀧𑀘𑁆𑀘𑀬𑁄 𑀘𑀸𑀢𑀺 𑀆𑀳 ‘‘𑀅𑀯𑀺𑀲𑁂𑀲𑁂𑀦𑀸’’𑀢𑀺. ‘‘𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄’’𑀢𑀺 (𑀫. 𑀦𑀺. 𑁧.𑁨𑁦𑁪; 𑀲𑀁. 𑀦𑀺. 𑁨.𑁪𑁩) 𑀯𑀘𑀦𑀢𑁄 𑀧𑀦 𑀯𑀺𑀜𑁆𑀜𑀸𑀡𑀁 𑀨𑀲𑁆𑀲𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑁄𑀢𑀺 𑀢𑀲𑁆𑀲 𑀨𑀲𑁆𑀲𑁄 𑀯𑀺𑀲𑀺𑀝𑁆𑀞𑀁 𑀨𑀮𑀁, 𑀲𑀢𑀺𑀧𑀺 𑀧𑀘𑁆𑀘𑀬𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀆𑀳𑀸𑀭𑀧𑀘𑁆𑀘𑀬𑀪𑀸𑀯𑁂 𑀫𑀦𑁄𑀲𑀜𑁆𑀘𑁂𑀢𑀦𑀸𑀬 𑀯𑀺𑀜𑁆𑀜𑀸𑀡𑀸𑀳𑀭𑀡𑀁 𑀯𑀺𑀲𑀺𑀝𑁆𑀞𑀁 𑀓𑀺𑀘𑁆𑀘𑀦𑁆𑀢𑀺 𑀲𑀗𑁆𑀔𑀸𑀭𑁄 𑀘𑀲𑁆𑀲 𑀯𑀺𑀲𑀺𑀝𑁆𑀞𑁄 𑀧𑀘𑁆𑀘𑀬𑁄. 𑀅𑀘𑀺𑀢𑁆𑀢𑀓𑁆𑀔𑀡𑀫𑀢𑁆𑀢𑀸𑀦𑀻𑀢𑀺 ¶ 𑀘𑀺𑀢𑁆𑀢𑀓𑁆𑀔𑀡𑀧𑁆𑀧𑀫𑀸𑀡𑀭𑀳𑀺𑀢𑀸𑀦𑀺. 𑀢𑀲𑁆𑀲𑀢𑁆𑀣𑁄𑀢𑀺 𑀢𑀲𑁆𑀲 𑀯𑀼𑀢𑁆𑀢𑀲𑁆𑀲 𑀅𑀯𑀺𑀚𑁆𑀚𑀸𑀤𑀺𑀓𑀲𑁆𑀲 𑀅𑀢𑁆𑀣𑁄 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀳𑁂𑀢𑀼𑀓𑀸𑀤𑀻𑀦𑀻𑀢𑀺 𑀏𑀢𑁆𑀣 𑀬𑀲𑁆𑀫𑀺𑀁 𑀘𑀢𑀼𑀓𑁆𑀓𑁂 𑀳𑁂𑀢𑀼𑀓-𑀲𑀤𑁆𑀤𑁄 𑀯𑀼𑀢𑁆𑀢𑁄, 𑀢𑀁 𑀳𑁂𑀢𑀼𑀓-𑀲𑀤𑁆𑀤𑀲𑀳𑀘𑀭𑀺𑀢𑀢𑁆𑀢𑀸 ‘‘𑀳𑁂𑀢𑀼𑀓’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀳𑁂𑀢𑀼-𑀲𑀤𑁆𑀤𑁄 𑀕𑀢𑀺𑀲𑀽𑀘𑀓𑁄 𑀅𑀯𑀺𑀕𑀢𑀢𑀸 𑀘 𑀯𑀺𑀕𑀢𑀢𑀸𑀦𑀺𑀯𑀸𑀭𑀡𑀯𑀲𑁂𑀦 𑀕𑀢𑀺 𑀏𑀯 𑀳𑁄𑀢𑀻𑀢𑀺 𑀳𑁂𑀢𑀼𑀓𑀘𑀢𑀼𑀓𑁆𑀓𑀁 𑀅𑀯𑀺𑀕𑀢𑀧𑀘𑁆𑀘𑀬𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁.

𑀢𑀺𑀥𑀸 𑀘𑀢𑀼𑀥𑀸 𑀧𑀜𑁆𑀘𑀥𑀸 𑀯𑀸𑀢𑀺 𑀯𑀸-𑀲𑀤𑁆𑀤𑁄 ‘‘𑀙𑀥𑀸 𑀯𑀸’’𑀢𑀺𑀧𑀺 𑀯𑀺𑀓𑀧𑁆𑀧𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀲𑀫𑀸𑀥𑀺 𑀳𑀺 𑀲𑀸𑀥𑀸𑀭𑀡𑁂𑀳𑀺 𑀢𑀻𑀳𑀺 𑀛𑀸𑀦𑀺𑀦𑁆𑀤𑁆𑀭𑀺𑀬𑀫𑀕𑁆𑀕𑀧𑀘𑁆𑀘𑀬𑁂𑀳𑀺 𑀘 𑀧𑀘𑁆𑀘𑀬𑁄𑀢𑀺. 𑀉𑀧𑀸𑀤𑀸𑀦𑀁 𑀪𑀯𑀲𑁆𑀲 𑀫𑀕𑁆𑀕𑀧𑀘𑁆𑀘𑀬𑁂𑀦 𑀘𑀸𑀢𑀺 𑀲𑀢𑁆𑀢𑀥𑀸𑀢𑀺 𑀓𑀸𑀫𑀼𑀧𑀸𑀤𑀸𑀦𑀯𑀚𑁆𑀚𑀸𑀦𑀁 𑀯𑀲𑁂𑀦 𑀯𑀤𑀢𑀺. 𑀓𑀸𑀫𑀼𑀧𑀸𑀤𑀸𑀦𑀁 𑀧𑀦 𑀬𑀣𑀸 𑀪𑀯𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀲𑁄 𑀧𑀓𑀸𑀭𑁄 𑀢𑀡𑁆𑀳𑀸𑀬𑀁 𑀯𑀼𑀢𑁆𑀢𑁄 𑀏𑀯𑀸𑀢𑀺 𑀦 𑀯𑀼𑀢𑁆𑀢𑁄.

𑀇𑀫𑀲𑁆𑀫𑀺𑀁 𑀘𑀢𑀼𑀓𑁆𑀓𑁂 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀯𑀘𑀦𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀢𑁆𑀣𑁄 𑀳𑀺 𑀦 𑀓𑀢𑁆𑀣𑀘𑀺 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀬𑀣𑀸𑀲𑀓𑁂𑀳𑀺 𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀯𑀲𑁂𑀦𑁂𑀯 𑀧𑀦 𑀇𑀫𑀲𑁆𑀲 𑀘𑀢𑀼𑀓𑁆𑀓𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀲𑁄𑀬𑁂𑀯𑁂𑀢𑁆𑀣 𑀳𑁄𑀢𑀻𑀢𑀺 𑀯𑀤𑀦𑁆𑀢𑀺. 𑀧𑀞𑀫𑀯𑀸𑀭𑁄𑀢𑀺 𑀧𑀞𑀫𑀘𑀢𑀼𑀓𑁆𑀓𑁄𑀢𑀺 𑀏𑀯𑀁 𑀯𑀢𑁆𑀢𑀩𑁆𑀩𑀁. 𑀪𑀯𑀸𑀤𑀻𑀦𑀁 𑀢𑀣𑀸 𑀅𑀪𑀸𑀯𑀦𑁆𑀢𑀺 𑀬𑀤𑀺 𑀲𑀳𑀚𑀸𑀢𑀧𑀘𑁆𑀘𑀬𑀯𑀲𑁂𑀦𑁂𑀯 𑀧𑀞𑀫𑀘𑀢𑀼𑀓𑁆𑀓𑁄 𑀯𑀼𑀢𑁆𑀢𑁄, 𑀪𑀯𑁄 𑀚𑀸𑀢𑀺𑀬𑀸, 𑀚𑀸𑀢𑀺 𑀘 𑀫𑀭𑀡𑀲𑁆𑀲 𑀲𑀳𑀚𑀸𑀢𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺 𑀬𑀣𑀸 𑀅𑀯𑀺𑀕𑀢𑀘𑀢𑀼𑀓𑁆𑀓𑀸𑀤𑀻𑀲𑀼 ‘‘𑀪𑀯𑀧𑀘𑁆𑀘𑀬𑀸 𑀚𑀸𑀢𑀺 𑀪𑀯𑀳𑁂𑀢𑀼𑀓𑀸’’𑀢𑀺𑀆𑀤𑀺 𑀦 𑀯𑀼𑀢𑁆𑀢𑀁 𑀪𑀯𑀸𑀤𑀻𑀦𑀁 𑀅𑀯𑀺𑀕𑀢𑀸𑀤𑀺𑀧𑀘𑁆𑀘𑀬𑀢𑀸𑀬 𑀅𑀪𑀸𑀯𑀢𑁄, 𑀏𑀯𑀫𑀺𑀥𑀸𑀧𑀺 ‘‘𑀪𑀯𑀧𑀘𑁆𑀘𑀬𑀸 𑀚𑀸𑀢𑀻’’𑀢𑀺𑀆𑀤𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀧𑀘𑁆𑀘𑀬𑀯𑀘𑀦𑀫𑁂𑀯 𑀳𑀺 𑀢𑁂𑀲𑀁 𑀲𑀳𑀚𑀸𑀢𑀲𑀽𑀘𑀓𑀁 𑀆𑀧𑀦𑁆𑀦𑀁 𑀅𑀯𑀺𑀕𑀢𑀘𑀢𑀼𑀓𑁆𑀓𑀸𑀤𑀻𑀲𑀼 𑀯𑀺𑀬 𑀇𑀥 𑀧𑀘𑁆𑀘𑀬𑀯𑀺𑀲𑁂𑀲𑀲𑀽𑀘𑀓𑀲𑁆𑀲 𑀯𑀘𑀦𑀦𑁆𑀢𑀭𑀲𑁆𑀲 𑀅𑀪𑀸𑀯𑀸, 𑀦 𑀘 𑀢𑀁 𑀦 𑀯𑀼𑀢𑁆𑀢𑀁, 𑀦 𑀘 𑀪𑀯𑀸𑀤𑀬𑁄 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀦 𑀲𑀳𑀚𑀸𑀢𑀧𑀘𑁆𑀘𑀬𑀯𑀲𑁂𑀦𑁂𑀯𑀸𑀬𑀁 𑀘𑀢𑀼𑀓𑁆𑀓𑁄 𑀯𑀼𑀢𑁆𑀢𑁄. 𑀲𑁂𑀲𑀧𑀘𑁆𑀘𑀬𑀸𑀦𑀜𑁆𑀘 𑀲𑀫𑁆𑀪𑀯𑀦𑁆𑀢𑀺 𑀇𑀤𑀁 ‘‘𑀪𑀯𑀸𑀤𑀻𑀦’’𑀦𑁆𑀢𑀺 𑀏𑀢𑁂𑀦 ¶ 𑀲𑀳 𑀅𑀬𑁄𑀚𑁂𑀢𑁆𑀯𑀸 𑀲𑀸𑀫𑀜𑁆𑀜𑁂𑀦 𑀅𑀯𑀺𑀚𑁆𑀚𑀸𑀤𑀻𑀦𑀁 𑀲𑀳𑀚𑀸𑀢𑁂𑀦 𑀲𑀳 𑀲𑁂𑀲𑀧𑀘𑁆𑀘𑀬𑀪𑀸𑀯𑀸𑀦𑀜𑁆𑀘 𑀲𑀫𑁆𑀪𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀧𑀘𑁆𑀘𑀬𑀯𑀺𑀲𑁂𑀲𑀲𑀽𑀘𑀓𑀲𑁆𑀲 𑀯𑀘𑀦𑀦𑁆𑀢𑀭𑀲𑁆𑀲 𑀅𑀪𑀸𑀯𑀸 𑀲𑀳𑀚𑀸𑀢𑀢𑁄 𑀅𑀜𑁆𑀜𑁂 𑀧𑀘𑁆𑀘𑀬𑀪𑀸𑀯𑀸 𑀅𑀯𑀺𑀚𑁆𑀚𑀸𑀤𑀻𑀦𑀁 𑀦 𑀲𑀫𑁆𑀪𑀯𑀦𑁆𑀢𑀻𑀢𑀺 𑀲𑀳𑀚𑀸𑀢𑀧𑀘𑁆𑀘𑀬𑀯𑀲𑁂𑀦𑁂𑀯𑀸𑀬𑀁 𑀘𑀢𑀼𑀓𑁆𑀓𑁄 ¶ 𑀆𑀭𑀤𑁆𑀥𑁄𑀢𑀺 𑀯𑀼𑀘𑁆𑀘𑁂𑀬𑁆𑀬, 𑀦 𑀘 𑀢𑁂 𑀦 𑀲𑀫𑁆𑀪𑀯𑀦𑁆𑀢𑀺, 𑀢𑀲𑁆𑀫𑀸 𑀦𑀸𑀬𑀁 𑀢𑀣𑀸 𑀆𑀭𑀤𑁆𑀥𑁄𑀢𑀺.

‘‘𑀫𑀳𑀸𑀦𑀺𑀤𑀸𑀦𑀲𑀼𑀢𑁆𑀢𑀦𑁆𑀢𑁂 𑀏𑀓𑀸𑀤𑀲𑀗𑁆𑀕𑀺𑀓𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀯𑀼𑀢𑁆𑀢𑁄’’𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀣 𑀧𑀦 ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁, 𑀦𑀸𑀫𑀧𑀘𑁆𑀘𑀬𑀸 𑀨𑀲𑁆𑀲𑁄’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁯𑁭) 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀆𑀕𑀢𑁂 𑀦𑀸𑀫𑀭𑀽𑀧𑁂 𑀏𑀓𑀥𑀸 𑀕𑀳𑀺𑀢𑁂 𑀦𑀯𑀗𑁆𑀕𑀺𑀓𑁄, 𑀤𑁆𑀯𑀺𑀥𑀸 𑀕𑀳𑀺𑀢𑁂 𑀤𑀲𑀗𑁆𑀕𑀺𑀓𑁄 𑀯𑀼𑀢𑁆𑀢𑁄, 𑀅𑀜𑁆𑀜𑀢𑁆𑀣 𑀧𑀦 𑀯𑀼𑀢𑁆𑀢𑁂𑀲𑀼 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑁂𑀲𑀼 𑀅𑀤𑁆𑀥𑀢𑁆𑀢𑀬𑀤𑀲𑁆𑀲𑀦𑀢𑁆𑀣𑀁 𑀬𑁄𑀚𑀺𑀬𑀫𑀸𑀦𑁂𑀲𑀼 𑀏𑀓𑀸𑀤𑀲𑀗𑁆𑀕𑀺𑀓𑁄 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀫𑀳𑀸𑀦𑀺𑀤𑀸𑀦𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬 𑀧𑀭𑀺𑀕𑁆𑀕𑀳𑀢𑁆𑀣𑀦𑁆𑀢𑀺 𑀢𑀢𑁆𑀣 𑀳𑀺 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀯𑀺𑀬 𑀭𑀽𑀧𑁂 𑀙𑀝𑁆𑀞𑀸𑀬𑀢𑀦𑀜𑁆𑀘 𑀦𑀸𑀫𑁂 𑀅𑀦𑁆𑀢𑁄𑀕𑀥𑀁 𑀓𑀢𑁆𑀯𑀸 𑀨𑀲𑁆𑀲𑀲𑁆𑀲 𑀦𑀺𑀭𑀯𑀲𑁂𑀲𑀭𑀽𑀧𑀧𑀘𑁆𑀘𑀬𑀁 𑀯𑀺𑀬 𑀦𑀺𑀭𑀯𑀲𑁂𑀲𑀦𑀸𑀫𑀧𑀘𑁆𑀘𑀬𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀨𑀲𑁆𑀲𑁄’’𑀢𑀺 𑀯𑀼𑀢𑁆𑀢𑀁, 𑀏𑀯𑀫𑀺𑀥𑀸𑀧𑀺 𑀢𑀢𑁆𑀣 𑀤𑀲𑁆𑀲𑀺𑀢𑀯𑀺𑀲𑁂𑀲𑀤𑀲𑁆𑀲𑀦𑁂𑀦 𑀢𑀁𑀤𑁂𑀲𑀦𑀸𑀧𑀭𑀺𑀕𑁆𑀕𑀳𑀢𑁆𑀣𑀁 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑁂 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂 𑀙𑀝𑁆𑀞𑀸𑀬𑀢𑀦𑀁 𑀦𑀸𑀫𑀦𑁆𑀢𑁄𑀕𑀥𑀁 𑀓𑀢𑁆𑀯𑀸 ‘‘𑀦𑀸𑀫𑀧𑀘𑁆𑀘𑀬𑀸 𑀨𑀲𑁆𑀲𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀭𑀽𑀧𑀧𑁆𑀧𑀯𑀢𑁆𑀢𑀺𑀤𑁂𑀲𑀁 𑀲𑀦𑁆𑀥𑀸𑀬 𑀤𑁂𑀲𑀺𑀢𑀢𑁆𑀢𑀸 ‘‘𑀇𑀫𑀲𑁆𑀲𑀸’’𑀢𑀺 𑀯𑀘𑀦𑀲𑁂𑀲𑁄, 𑀦 𑀧𑀼𑀭𑀺𑀫𑀸𑀦𑀦𑁆𑀢𑀺, 𑀢𑁂𑀦𑁂𑀯 ‘‘𑀅𑀬𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳.

𑀬𑁄𑀦𑀺𑀯𑀲𑁂𑀦 𑀑𑀧𑀧𑀸𑀢𑀺𑀓𑀸𑀦𑀦𑁆𑀢𑀺 𑀘𑁂𑀢𑁆𑀣 𑀲𑀁𑀲𑁂𑀤𑀚𑀬𑁄𑀦𑀺𑀓𑀸𑀧𑀺 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀪𑀸𑀯𑁂𑀦 𑀑𑀧𑀧𑀸𑀢𑀺𑀓𑀲𑀗𑁆𑀕𑀳𑀁 𑀓𑀢𑁆𑀯𑀸 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀧𑀥𑀸𑀦𑀸𑀬 𑀯𑀸 𑀬𑁄𑀦𑀺𑀬𑀸 𑀲𑀩𑁆𑀩𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀬𑁄𑀦𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀑𑀧𑀧𑀸𑀢𑀺𑀓𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀗𑁆𑀕𑀳𑀦𑀺𑀤𑀲𑁆𑀲𑀦𑀯𑀲𑁂𑀦𑁂𑀯 𑀳𑀺 𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑁂𑀧𑀺 (𑀯𑀺𑀪. 𑁧𑁦𑁦𑁯) ‘‘𑀑𑀧𑀧𑀸𑀢𑀺𑀓𑀸𑀦𑀁 𑀧𑁂𑀢𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀑𑀧𑀧𑀸𑀢𑀺𑀓𑀕𑁆𑀕𑀳𑀡𑀫𑁂𑀯 𑀓𑀢𑀁, 𑀦 𑀲𑀁𑀲𑁂𑀤𑀚𑀕𑁆𑀕𑀳𑀡𑀦𑁆𑀢𑀺. 𑀏𑀓𑀘𑀺𑀢𑁆𑀢𑀓𑁆𑀔𑀡𑁂 𑀙𑀳𑀸𑀬𑀢𑀦𑁂𑀳𑀺 𑀨𑀲𑁆𑀲𑀲𑁆𑀲 𑀧𑀯𑀢𑁆𑀢𑀺 𑀦𑀢𑁆𑀣𑀺, 𑀦 𑀘𑁂𑀓𑀲𑁆𑀲 𑀅𑀓𑀼𑀲𑀮𑀨𑀲𑁆𑀲𑀲𑁆𑀲 𑀙𑀝𑁆𑀞𑀸𑀬𑀢𑀦𑀯𑀚𑁆𑀚𑀁 𑀆𑀬𑀢𑀦𑀁 𑀲𑀫𑀸𑀦𑀓𑁆𑀔𑀡𑁂 𑀧𑀯𑀢𑁆𑀢𑀫𑀸𑀦𑀁 𑀧𑀘𑁆𑀘𑀬𑀪𑀽𑀢𑀁 𑀅𑀢𑁆𑀣𑀺, 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀘𑁂𑀢𑁆𑀣 𑀧𑀯𑀢𑁆𑀢𑀓𑁄 𑀦 𑀳𑁄𑀢𑀻𑀢𑀺 𑀦 𑀕𑀬𑁆𑀳𑀢𑀺, 𑀢𑀲𑁆𑀫𑀸 ‘‘𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀬𑀲𑁆𑀫𑀸 𑀧𑀦𑁂𑀲𑁄’’𑀢𑀺𑀆𑀤𑀺𑀫𑀸𑀳.

𑀧𑀼𑀭𑀺𑀫𑀬𑁄𑀦𑀺𑀤𑁆𑀯𑀬𑁂 𑀲𑀫𑁆𑀪𑀯𑀦𑁆𑀢𑀫𑁆𑀧𑀺 𑀓𑁂𑀲𑀜𑁆𑀘𑀺 𑀲𑀴𑀸𑀬𑀢𑀦𑀁 𑀓𑀮𑀮𑀸𑀤𑀺𑀓𑀸𑀮𑁂 𑀦 𑀲𑀫𑁆𑀪𑀯𑀢𑀻𑀢𑀺 ‘‘𑀲𑀤𑀸 𑀅𑀲𑀫𑁆𑀪𑀯𑀢𑁄’’𑀢𑀺 ¶ 𑀆𑀳. 𑀧𑀘𑁆𑀙𑀺𑀫𑀬𑁄𑀦𑀺𑀤𑁆𑀯𑀬𑁂 𑀧𑀦 𑀬𑁂𑀲𑀁 ¶ 𑀲𑀫𑁆𑀪𑀯𑀢𑀺, 𑀢𑁂𑀲𑀁 𑀲𑀤𑀸 𑀲𑀫𑁆𑀪𑀯𑀢𑀻𑀢𑀺. 𑀇𑀢𑁄𑀢𑀺 𑀇𑀫𑀲𑁆𑀫𑀸 𑀘𑀢𑀼𑀓𑁆𑀓𑀢𑁄, 𑀦𑀬𑀢𑁄 𑀯𑀸, 𑀬𑁄 𑀯𑀺𑀲𑁂𑀲𑁄.

𑀧𑀘𑁆𑀘𑀬𑀘𑀢𑀼𑀓𑁆𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀳𑁂𑀢𑀼𑀘𑀢𑀼𑀓𑁆𑀓𑀯𑀡𑁆𑀡𑀦𑀸

𑁨𑁪𑁪. 𑀚𑀸𑀢𑀺𑀓𑁆𑀔𑀡𑀫𑀢𑁆𑀢𑁂 𑀏𑀯 𑀅𑀪𑀸𑀯𑀢𑁄𑀢𑀺 𑀢𑀢𑁄 𑀉𑀤𑁆𑀥𑀁 𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀅𑀯𑀺𑀕𑀢𑀧𑀘𑁆𑀘𑀬𑀦𑀺𑀬𑀫𑀸𑀪𑀸𑀯𑀢𑁄 𑀪𑀯𑁂 𑀉𑀧𑀸𑀤𑀸𑀦𑀳𑁂𑀢𑀼𑀓𑀕𑁆𑀕𑀳𑀡𑀁 𑀦 𑀓𑀢𑀁, 𑀅𑀪𑀸𑀯𑀢𑁄 𑀅𑀯𑀺𑀕𑀢𑀧𑀘𑁆𑀘𑀬𑀲𑁆𑀲 𑀚𑀸𑀢𑀺𑀆𑀤𑀻𑀲𑀼 𑀪𑀯𑀳𑁂𑀢𑀼𑀓𑀸𑀤𑀺𑀕𑁆𑀕𑀳𑀡𑀁 𑀦 𑀓𑀢𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀬𑀣𑀸 𑀧𑀦 𑀬𑀸𑀯 𑀯𑀢𑁆𑀣𑀼, 𑀢𑀸𑀯 𑀅𑀦𑀼𑀧𑀮𑀩𑁆𑀪𑀫𑀸𑀦𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀯𑀢𑁆𑀣𑀼 𑀅𑀯𑀺𑀕𑀢𑀧𑀘𑁆𑀘𑀬𑁄 𑀳𑁄𑀢𑀺 𑀯𑀺𑀜𑁆𑀜𑀸𑀡𑀢𑁄 𑀉𑀤𑁆𑀥𑀁 𑀧𑀯𑀢𑁆𑀢𑀦𑀓𑀫𑁆𑀧𑀺, 𑀏𑀯𑀁 𑀉𑀧𑀸𑀤𑀸𑀦𑀁 𑀪𑀯𑀲𑀗𑁆𑀕𑀳𑀺𑀢𑀸𑀦𑀁 𑀚𑀸𑀢𑀺𑀆𑀤𑀻𑀦𑀁, 𑀪𑀯𑁄 𑀘 𑀚𑀸𑀢𑀺𑀬𑀸 𑀅𑀯𑀺𑀕𑀢𑀧𑀘𑁆𑀘𑀬𑁄 𑀲𑀺𑀬𑀸. 𑀅𑀣 𑀦 𑀲𑀺𑀬𑀸, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂 𑀚𑀸𑀢𑀺𑀆𑀤𑀻𑀦𑀁 𑀲𑀗𑁆𑀕𑀳𑀺𑀢𑀢𑁆𑀢𑀸 𑀯𑀺𑀜𑁆𑀜𑀸𑀡𑀁 𑀦𑀸𑀫𑀲𑁆𑀲, 𑀦𑀸𑀫𑀜𑁆𑀘 𑀅𑀢𑀓𑁆𑀔𑀡𑀺𑀓𑀲𑀫𑁆𑀪𑀯𑀸 𑀙𑀝𑁆𑀞𑀸𑀬𑀢𑀦𑀲𑁆𑀲 𑀅𑀯𑀺𑀕𑀢𑀧𑀘𑁆𑀘𑀬𑁄 𑀦 𑀲𑀺𑀬𑀸𑀢𑀺 𑀇𑀥 𑀯𑀺𑀬 𑀢𑀢𑁆𑀣𑀸𑀧𑀺 𑀳𑁂𑀢𑀼𑀓𑀕𑁆𑀕𑀳𑀡𑀁 𑀦 𑀓𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀲𑁆𑀫𑀸 𑀬𑀸𑀯 𑀉𑀧𑀸𑀤𑀸𑀦𑀁, 𑀢𑀸𑀯 𑀚𑀸𑀢𑀺𑀆𑀤𑀻𑀦𑀁 𑀅𑀦𑀼𑀧𑀮𑀩𑁆𑀪𑁄, 𑀚𑀸𑀢𑀺𑀓𑁆𑀔𑀡𑀫𑀢𑁆𑀢𑁂 𑀏𑀯 𑀪𑀯𑀲𑁆𑀲 𑀅𑀪𑀸𑀯𑁄 𑀘 𑀓𑀸𑀭𑀡𑀦𑁆𑀢𑀺 𑀦 𑀲𑀓𑁆𑀓𑀸 𑀓𑀸𑀢𑀼𑀁. 𑀲𑀗𑁆𑀔𑀢𑀮𑀓𑁆𑀔𑀡𑀸𑀦𑀁 𑀧𑀦 𑀚𑀸𑀢𑀺𑀆𑀤𑀻𑀦𑀁 𑀅𑀲𑀪𑀸𑀯𑀥𑀫𑁆𑀫𑀸𑀦𑀁 𑀪𑀯𑁂𑀦 𑀲𑀗𑁆𑀕𑀳𑀺𑀢𑀢𑁆𑀢𑀸 𑀅𑀲𑀪𑀸𑀯𑀥𑀫𑁆𑀫𑀲𑁆𑀲 𑀘 𑀧𑀭𑀫𑀢𑁆𑀣𑀢𑁄 𑀪𑀯𑀦𑁆𑀢𑀭𑀲𑁆𑀲 𑀅𑀪𑀸𑀯𑀢𑁄 𑀳𑁂𑀢𑀼𑀆𑀤𑀺𑀧𑀘𑁆𑀘𑀬𑀸 𑀦 𑀲𑀦𑁆𑀢𑀻𑀢𑀺 𑀪𑀯𑀲𑁆𑀲 𑀉𑀧𑀸𑀤𑀸𑀦𑀁 𑀦 𑀦𑀺𑀬𑀫𑁂𑀦 𑀅𑀯𑀺𑀕𑀢𑀧𑀘𑁆𑀘𑀬𑁄, 𑀪𑀯𑁄 𑀧𑀦 𑀚𑀸𑀢𑀺𑀬𑀸, 𑀚𑀸𑀢𑀺 𑀚𑀭𑀸𑀫𑀭𑀡𑀲𑁆𑀲 𑀦𑁂𑀯 𑀅𑀯𑀺𑀕𑀢𑀧𑀘𑁆𑀘𑀬𑁄𑀢𑀺 𑀅𑀯𑀺𑀕𑀢𑀧𑀘𑁆𑀘𑀬𑀦𑀺𑀬𑀫𑀸𑀪𑀸𑀯𑀢𑁄 𑀅𑀪𑀸𑀯𑀢𑁄 𑀘 𑀅𑀯𑀺𑀕𑀢𑀧𑀘𑁆𑀘𑀬𑀲𑁆𑀲 𑀪𑀯𑀸𑀤𑀻𑀲𑀼 𑀳𑁂𑀢𑀼𑀓𑀕𑁆𑀕𑀳𑀡𑀁 𑀦 𑀓𑀢𑀦𑁆𑀢𑀺 𑀬𑀼𑀢𑁆𑀢𑀁.

𑀦𑀦𑀼 𑀏𑀯𑀁 ‘‘𑀦𑀸𑀫𑀁 𑀯𑀺𑀜𑁆𑀜𑀸𑀡𑀳𑁂𑀢𑀼𑀓𑀁 𑀙𑀝𑁆𑀞𑀸𑀬𑀢𑀦𑀁 𑀦𑀸𑀫𑀳𑁂𑀢𑀼𑀓’’𑀦𑁆𑀢𑀺 𑀯𑀘𑀦𑀁 𑀦 𑀯𑀢𑁆𑀢𑀩𑁆𑀩𑀁. 𑀦 𑀳𑀺 𑀦𑀸𑀫𑀲𑀗𑁆𑀕𑀳𑀺𑀢𑀸𑀦𑀁 𑀚𑀸𑀢𑀺𑀆𑀤𑀻𑀦𑀁 𑀅𑀯𑀺𑀕𑀢𑀧𑀘𑁆𑀘𑀬𑁄 𑀅𑀜𑁆𑀜𑀲𑁆𑀲 𑀅𑀯𑀺𑀕𑀢𑀧𑀘𑁆𑀘𑀬𑀪𑀸𑀯𑁄 𑀘 𑀅𑀢𑁆𑀣𑀺 𑀅𑀲𑀪𑀸𑀯𑀥𑀫𑁆𑀫𑀢𑁆𑀢𑀸𑀢𑀺? 𑀦, 𑀢𑁂𑀲𑀁 𑀦𑀸𑀫𑁂𑀦 𑀅𑀲𑀗𑁆𑀕𑀳𑀺𑀢𑀢𑁆𑀢𑀸. 𑀦𑀫𑀦𑀓𑀺𑀘𑁆𑀘𑀧𑀭𑀺𑀘𑁆𑀙𑀺𑀦𑁆𑀦𑀜𑁆𑀳𑀺 𑀦𑀸𑀫𑀁, 𑀢𑀜𑁆𑀘 𑀓𑀺𑀘𑁆𑀘𑀁 𑀲𑀪𑀸𑀯𑀥𑀫𑁆𑀫𑀸𑀦𑀫𑁂𑀯 𑀳𑁄𑀢𑀻𑀢𑀺 𑀲𑀪𑀸𑀯𑀥𑀫𑁆𑀫𑀪𑀽𑀢𑀸 𑀏𑀯 𑀢𑀬𑁄 𑀔𑀦𑁆𑀥𑀸 ‘‘𑀦𑀸𑀫’’𑀦𑁆𑀢𑀺 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀢𑀢𑁆𑀣 𑀳𑁂𑀢𑀼𑀓𑀕𑁆𑀕𑀳𑀡𑀁 𑀬𑀼𑀢𑁆𑀢𑀁, 𑀇𑀥 𑀧𑀦 𑀪𑀯𑀢𑀻𑀢𑀺 𑀪𑀯𑁄, 𑀦 𑀘 𑀚𑀸𑀢𑀺𑀆𑀤𑀻𑀦𑀺 𑀦 𑀪𑀯𑀦𑁆𑀢𑀺 ‘‘𑀪𑀯𑀧𑀘𑁆𑀘𑀬𑀸 ¶ 𑀚𑀸𑀢𑀺 𑀲𑀫𑁆𑀪𑀯𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁 𑀲𑀫𑁆𑀪𑀯𑀢𑀻’’𑀢𑀺 𑀬𑁄𑀚𑀦𑀢𑁄 ¶ , 𑀢𑀲𑁆𑀫𑀸 𑀲𑀗𑁆𑀔𑀭𑀡𑀢𑁄 𑀲𑀗𑁆𑀔𑀸𑀭𑁂 𑀯𑀺𑀬 𑀪𑀯𑀦𑀢𑁄 𑀪𑀯𑁂 𑀚𑀸𑀢𑀺𑀆𑀤𑀻𑀦𑀺 𑀲𑀗𑁆𑀕𑀳𑀺𑀢𑀸𑀦𑀻𑀢𑀺 𑀦𑀺𑀬𑀫𑀸𑀪𑀸𑀯𑀸𑀪𑀸𑀯𑁂𑀳𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀳𑁂𑀢𑀼𑀓𑀕𑁆𑀕𑀳𑀡𑀁 𑀦 𑀓𑀢𑀦𑁆𑀢𑀺.

𑀓𑁂𑀘𑀺 𑀧𑀦𑀸𑀢𑀺𑀆𑀤𑀺𑀦𑀸 𑀭𑁂𑀯𑀢𑀢𑁆𑀣𑁂𑀭𑀫𑀢𑀁 𑀯𑀤𑀢𑀺. 𑀅𑀭𑀽𑀧𑀓𑁆𑀔𑀦𑁆𑀥𑀸 𑀳𑀺 𑀇𑀥 𑀪𑀯𑁄𑀢𑀺 𑀆𑀕𑀢𑀸. 𑀯𑀼𑀢𑁆𑀢𑀜𑁆𑀳𑀺 ‘‘𑀢𑀢𑁆𑀣 𑀓𑀢𑀫𑁄 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄, 𑀞𑀧𑁂𑀢𑁆𑀯𑀸 𑀉𑀧𑀸𑀤𑀸𑀦𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺 (𑀯𑀺𑀪. 𑁨𑁪𑁯).

‘‘𑀯𑀢𑁆𑀢𑀩𑁆𑀩𑀧𑀤𑁂𑀲𑀸𑀪𑀸𑀯𑀢𑁄’’𑀢𑀺 𑀯𑀼𑀢𑁆𑀢𑀁, 𑀲𑀢𑀺𑀧𑀺 𑀧𑀦 𑀧𑀤𑁂𑀲𑁂 𑀉𑀧𑀸𑀤𑀸𑀦𑀁 𑀯𑀺𑀬 𑀲𑀪𑀸𑀯𑀸𑀦𑀺 𑀚𑀸𑀢𑀺𑀆𑀤𑀻𑀦𑀺 𑀦 𑀳𑁄𑀦𑁆𑀢𑀻𑀢𑀺 𑀞𑀧𑁂𑀢𑀩𑁆𑀩𑀲𑁆𑀲 𑀪𑀸𑀯𑀦𑁆𑀢𑀭𑀲𑁆𑀲 𑀅𑀪𑀸𑀯𑀢𑁄 𑀏𑀯 𑀞𑀧𑀦𑀁 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀬𑀼𑀢𑁆𑀢𑀁. 𑀚𑀸𑀬𑀫𑀸𑀦𑀸𑀦𑀁 𑀧𑀦 𑀚𑀸𑀢𑀺, 𑀚𑀸𑀢𑀸𑀦𑀜𑁆𑀘 𑀚𑀭𑀸𑀫𑀭𑀡𑀦𑁆𑀢𑀺 ‘‘𑀪𑀯𑀧𑀘𑁆𑀘𑀬𑀸 𑀚𑀸𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺 (𑀯𑀺𑀪. 𑁨𑁨𑁫) 𑀯𑀼𑀢𑁆𑀢𑀁. 𑀬𑀣𑀸 𑀧𑀦 ‘‘𑀦𑀸𑀫𑀧𑀘𑁆𑀘𑀬𑀸 𑀨𑀲𑁆𑀲𑁄𑀢𑀺 𑀢𑀢𑁆𑀣 𑀓𑀢𑀫𑀁 𑀦𑀸𑀫𑀁? 𑀞𑀧𑁂𑀢𑁆𑀯𑀸 𑀨𑀲𑁆𑀲𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄. 𑀇𑀤𑀁 𑀯𑀼𑀘𑁆𑀘𑀢𑀺 𑀦𑀸𑀫’’𑀦𑁆𑀢𑀺 (𑀯𑀺𑀪. 𑁨𑁫𑁯), ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀦𑁆𑀢𑀺 𑀅𑀢𑁆𑀣𑀺 𑀦𑀸𑀫𑀁 𑀅𑀢𑁆𑀣𑀺 𑀭𑀽𑀧𑀁. 𑀢𑀢𑁆𑀣 𑀓𑀢𑀫𑀁 𑀦𑀸𑀫𑀁? 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄. 𑀇𑀤𑀁 𑀯𑀼𑀘𑁆𑀘𑀢𑀺 𑀦𑀸𑀫𑀁. 𑀢𑀢𑁆𑀣 𑀓𑀢𑀫𑀁 𑀭𑀽𑀧𑀁? 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀬𑀜𑁆𑀘 𑀭𑀽𑀧𑀁 𑀦𑀺𑀲𑁆𑀲𑀸𑀬 𑀫𑀦𑁄𑀥𑀸𑀢𑀼 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀯𑀢𑁆𑀢𑀢𑀺, 𑀇𑀤𑀁 𑀯𑀼𑀘𑁆𑀘𑀢𑀺 𑀭𑀽𑀧’’𑀦𑁆𑀢𑀺 (𑀯𑀺𑀪. 𑁨𑁬𑁧) 𑀘 𑀬𑀁 𑀦𑀸𑀫𑀭𑀽𑀧𑀜𑁆𑀘 𑀨𑀲𑁆𑀲𑀲𑁆𑀲 𑀲𑀴𑀸𑀬𑀢𑀦𑀲𑁆𑀲 𑀧𑀘𑁆𑀘𑀬𑁄, 𑀢𑀲𑁆𑀲 𑀯𑀢𑁆𑀢𑀩𑁆𑀩𑀧𑀤𑁂𑀲𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀏𑀯𑀁 𑀬𑁄 𑀪𑀯𑁄 𑀚𑀸𑀢𑀺𑀬𑀸 𑀧𑀘𑁆𑀘𑀬𑁄, 𑀢𑀲𑁆𑀲𑀧𑀺 𑀞𑀧𑁂𑀢𑀩𑁆𑀩𑀕𑀳𑁂𑀢𑀩𑁆𑀩𑀯𑀺𑀲𑁂𑀲𑁂 𑀲𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀩𑁆𑀩𑀧𑀤𑁂𑀲𑁄 𑀦𑀢𑁆𑀣𑀻𑀢𑀺 𑀯𑀢𑁆𑀢𑀼𑀦𑁆𑀢𑀺.

𑀳𑁂𑀢𑀼𑀘𑀢𑀼𑀓𑁆𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀜𑁆𑀜𑀫𑀜𑁆𑀜𑀘𑀢𑀼𑀓𑁆𑀓𑀯𑀡𑁆𑀡𑀦𑀸

𑁨𑁪𑁬. 𑀦𑀺𑀧𑁆𑀧𑀤𑁂𑀲𑀢𑁆𑀢𑀸 𑀪𑀯𑁂𑀦 𑀉𑀧𑀸𑀤𑀸𑀦𑀁 𑀲𑀗𑁆𑀕𑀳𑀺𑀢𑀦𑁆𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀉𑀧𑀸𑀤𑀸𑀦𑀲𑁆𑀲 𑀯𑀺𑀲𑀼𑀁 𑀞𑀺𑀢𑀲𑁆𑀲 𑀅𑀪𑀸𑀯𑀸 ‘‘𑀪𑀯𑀧𑀘𑁆𑀘𑀬𑀸𑀧𑀺 𑀉𑀧𑀸𑀤𑀸𑀦’’𑀦𑁆𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀫𑀸 𑀧𑀦 𑀪𑀯𑁄 ¶ 𑀦𑀺𑀧𑁆𑀧𑀤𑁂𑀲𑁄’’𑀢𑀺𑀆𑀤𑀺𑀫𑀸𑀳. 𑀏𑀯𑀁 𑀲𑀢𑀺 ‘‘𑀦𑀸𑀫𑀧𑀘𑁆𑀘𑀬𑀸𑀧𑀺 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦𑀸𑀫𑀁 𑀧𑀦 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀽𑀢𑀁 𑀧𑀘𑁆𑀘𑀬𑀪𑀽𑀢𑀜𑁆𑀘 𑀲𑀧𑁆𑀧𑀤𑁂𑀲𑀫𑁂𑀯 𑀕𑀳𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸 𑀧𑀦 ‘‘𑀦𑀸𑀫𑀧𑀘𑁆𑀘𑀬𑀸 𑀙𑀝𑁆𑀞𑀸𑀬𑀢𑀦𑀁, 𑀦𑀸𑀫𑀧𑀘𑁆𑀘𑀬𑀸 𑀨𑀲𑁆𑀲𑁄’’𑀢𑀺𑀆𑀤𑀻𑀲𑀼 (𑀯𑀺𑀪. 𑁧𑁫𑁦-𑁧𑁫𑁪) 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀞𑀧𑁂𑀢𑁆𑀯𑀸 𑀦𑀸𑀫𑀁 ¶ 𑀕𑀳𑀺𑀢𑀁, 𑀏𑀯𑀁 ‘‘𑀪𑀯𑀧𑀘𑁆𑀘𑀬𑀸𑀧𑀺 𑀉𑀧𑀸𑀤𑀸𑀦’’𑀦𑁆𑀢𑀺 𑀇𑀥𑀸𑀧𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀞𑀧𑁂𑀢𑁆𑀯𑀸 𑀪𑀯𑀲𑁆𑀲 𑀕𑀳𑀡𑀁 𑀦 𑀦 𑀲𑀓𑁆𑀓𑀸 𑀓𑀸𑀢𑀼𑀁, 𑀢𑀲𑁆𑀫𑀸 𑀉𑀧𑀸𑀤𑀸𑀦𑀲𑁆𑀲 𑀅𑀯𑀺𑀕𑀢𑀧𑀘𑁆𑀘𑀬𑀦𑀺𑀬𑀫𑀸𑀪𑀸𑀯𑁄 𑀯𑀺𑀬 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀦𑀺𑀬𑀫𑀸𑀪𑀸𑀯𑁄 𑀪𑀯𑁂 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑀻𑀢𑀺 ‘‘𑀪𑀯𑀧𑀘𑁆𑀘𑀬𑀸𑀧𑀺 𑀉𑀧𑀸𑀤𑀸𑀦’’𑀦𑁆𑀢𑀺 𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄𑀢𑀺 𑀘𑁂𑀢𑁆𑀣 𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀧𑀘𑁆𑀘𑀬𑁄 𑀅𑀥𑀺𑀧𑁆𑀧𑁂𑀢𑁄 𑀲𑀺𑀬𑀸. ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸𑀧𑀺 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁, 𑀦 𑀘 𑀯𑀢𑁆𑀣𑀼 𑀅𑀓𑀼𑀲𑀮𑀯𑀺𑀜𑁆𑀜𑀸𑀡𑀲𑁆𑀲 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄 𑀳𑁄𑀢𑀺, 𑀧𑀼𑀭𑁂𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑁄 𑀧𑀦 𑀳𑁄𑀢𑀻𑀢𑀺. 𑀢𑀣𑀸 ‘‘𑀙𑀝𑁆𑀞𑀸𑀬𑀢𑀦𑀧𑀘𑁆𑀘𑀬𑀸𑀧𑀺 𑀦𑀸𑀫𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑀁, 𑀦 𑀘 𑀙𑀝𑁆𑀞𑀸𑀬𑀢𑀦𑀁 𑀘𑀓𑁆𑀔𑀸𑀬𑀢𑀦𑀼𑀧𑀘𑀬𑀸𑀤𑀻𑀦𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀘 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄 𑀳𑁄𑀢𑀺, 𑀧𑀘𑁆𑀙𑀸𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑁄 𑀧𑀦 𑀳𑁄𑀢𑀻𑀢𑀺.

𑀅𑀜𑁆𑀜𑀫𑀜𑁆𑀜𑀘𑀢𑀼𑀓𑁆𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀗𑁆𑀔𑀸𑀭𑀸𑀤𑀺𑀫𑀽𑀮𑀓𑀦𑀬𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁨𑁪𑁭. ‘‘𑀅𑀧𑀼𑀩𑁆𑀩𑀲𑁆𑀲 𑀅𑀜𑁆𑀜𑀲𑁆𑀲 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀲𑁆𑀲 𑀯𑀢𑁆𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄 𑀪𑀯𑀫𑀽𑀮𑀓𑀦𑀬𑁄 𑀦 𑀯𑀼𑀢𑁆𑀢𑁄’’𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀲𑀢𑀺 ‘‘𑀙𑀝𑁆𑀞𑀸𑀬𑀢𑀦𑀧𑀘𑁆𑀘𑀬𑀸 𑀅𑀯𑀺𑀚𑁆𑀚𑀸’’𑀢𑀺𑀆𑀤𑀺𑀓𑀸 𑀙𑀝𑁆𑀞𑀸𑀬𑀢𑀦𑀸𑀤𑀺𑀫𑀽𑀮𑀓𑀸 𑀘 𑀦 𑀯𑀢𑁆𑀢𑀩𑁆𑀩𑀸 𑀲𑀺𑀬𑀼𑀁. ‘‘𑀦𑀸𑀫𑀧𑀘𑁆𑀘𑀬𑀸 𑀅𑀯𑀺𑀚𑁆𑀚𑀸’’𑀢𑀺 𑀏𑀢𑁆𑀣 𑀳𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀩𑁆𑀩𑁂 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀦𑀸𑀫𑀦𑁆𑀢𑀺 𑀯𑀼𑀢𑁆𑀢𑀸𑀢𑀺. 𑀢𑀢𑁆𑀣𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑀲𑀺𑀬𑀸 𑁋 𑀦𑀸𑀫𑀯𑀺𑀲𑁂𑀲𑀸𑀦𑀁 𑀙𑀝𑁆𑀞𑀸𑀬𑀢𑀦𑀸𑀤𑀻𑀦𑀁 𑀅𑀯𑀺𑀚𑁆𑀚𑀸𑀬 𑀧𑀘𑁆𑀘𑀬𑀪𑀸𑀯𑁄 𑀯𑀢𑁆𑀢𑀩𑁆𑀩𑁄𑀢𑀺 𑀙𑀝𑁆𑀞𑀸𑀬𑀢𑀦𑀸𑀤𑀺𑀫𑀽𑀮𑀓𑀸 𑀯𑀼𑀢𑁆𑀢𑀸. 𑀬𑀤𑁂𑀯 𑀧𑀦 𑀦𑀸𑀫𑀁 𑀅𑀯𑀺𑀚𑁆𑀚𑀸𑀬 𑀧𑀘𑁆𑀘𑀬𑁄, 𑀢𑀤𑁂𑀯 𑀪𑀯𑀧𑀘𑁆𑀘𑀬𑀸 𑀅𑀯𑀺𑀚𑁆𑀚𑀸𑀢𑀺 𑀏𑀢𑁆𑀣𑀸𑀧𑀺 𑀯𑀼𑀘𑁆𑀘𑁂𑀬𑁆𑀬, 𑀦 𑀯𑀢𑁆𑀢𑀩𑁆𑀩𑀯𑀺𑀲𑁂𑀲𑁄 𑀓𑁄𑀘𑀺, 𑀢𑀲𑁆𑀫𑀸 𑀅𑀧𑀼𑀩𑁆𑀩𑀸𑀪𑀸𑀯𑀢𑁄 𑀦 𑀯𑀼𑀢𑁆𑀢𑁄𑀢𑀺. 𑀪𑀯𑀕𑁆𑀕𑀳𑀡𑁂𑀦 𑀘 𑀇𑀥 𑀅𑀯𑀺𑀚𑁆𑀚𑀸𑀬 𑀧𑀘𑁆𑀘𑀬𑀪𑀽𑀢𑀸 𑀲𑀪𑀸𑀯𑀥𑀫𑁆𑀫𑀸 𑀕𑀡𑁆𑀳𑁂𑀬𑁆𑀬𑀁𑀉, 𑀦 𑀚𑀸𑀢𑀺𑀆𑀤𑀻𑀦𑀻𑀢𑀺 𑀅𑀧𑀼𑀩𑁆𑀩𑀸𑀪𑀸𑀯𑀢𑁄 𑀦 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀅𑀯𑀺𑀚𑁆𑀚𑀸𑀢𑀺𑀧𑀺 ¶ 𑀯𑀼𑀢𑁆𑀢𑀁 𑀲𑀺𑀬𑀸’’𑀢𑀺 𑀯𑀼𑀢𑁆𑀢𑀁, 𑀬𑀣𑀸 𑀧𑀦 ‘‘𑀦𑀸𑀫𑀧𑀘𑁆𑀘𑀬𑀸 𑀨𑀲𑁆𑀲𑁄’’𑀢𑀺 𑀯𑀼𑀢𑁆𑀢𑁂 ‘‘𑀨𑀲𑁆𑀲𑀧𑀘𑁆𑀘𑀬𑀸 𑀨𑀲𑁆𑀲𑁄’’𑀢𑀺 𑀯𑀼𑀢𑁆𑀢𑀁 𑀦 𑀳𑁄𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀞𑀧𑁂𑀢𑁆𑀯𑀸 𑀧𑀘𑁆𑀘𑀬𑀲𑁆𑀲 𑀕𑀳𑀡𑀢𑁄, 𑀏𑀯𑀫𑀺𑀥𑀸𑀧𑀺 𑀦 𑀲𑀺𑀬𑀸, 𑀢𑀲𑁆𑀫𑀸 𑀪𑀯𑀦𑀯𑀲𑁂𑀦 𑀲𑀪𑀸𑀯𑀥𑀫𑁆𑀫𑀸𑀲𑀪𑀸𑀯𑀥𑀫𑁆𑀫𑁂𑀲𑀼 𑀲𑀸𑀫𑀜𑁆𑀜𑁂𑀦 𑀧𑀯𑀢𑁆𑀢𑁄 𑀪𑀯-𑀲𑀤𑁆𑀤𑁄𑀢𑀺 𑀦 𑀲𑁄 𑀅𑀯𑀺𑀚𑁆𑀚𑀸𑀬 𑀧𑀘𑁆𑀘𑀬𑁄𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀢𑁂𑀦 𑀪𑀯𑀫𑀽𑀮𑀓𑀦𑀬𑁄 𑀦 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

‘‘𑀉𑀧𑀸𑀤𑀸𑀦𑀧𑀘𑁆𑀘𑀬𑀸 ¶ 𑀪𑀯𑁄’’𑀢𑀺 𑀏𑀢𑁆𑀣 𑀯𑀺𑀬 𑀪𑀯𑁂𑀓𑀤𑁂𑀲𑁂 𑀯𑀺𑀲𑀼𑀁 𑀧𑀼𑀩𑁆𑀩𑁂 𑀅𑀕𑁆𑀕𑀳𑀺𑀢𑁂 𑀪𑀯-𑀲𑀤𑁆𑀤𑁄 𑀧𑀘𑁆𑀘𑀬𑀲𑁄𑀥𑀦𑀢𑁆𑀣𑀁 𑀆𑀤𑀺𑀢𑁄 𑀯𑀼𑀘𑁆𑀘𑀫𑀸𑀦𑁄 𑀦𑀺𑀭𑀯𑀲𑁂𑀲𑀩𑁄𑀥𑀓𑁄 𑀳𑁄𑀢𑀺, 𑀦 𑀦𑀸𑀫-𑀲𑀤𑁆𑀤𑁄. 𑀏𑀯𑀁𑀲𑀪𑀸𑀯𑀸 𑀳𑀺 𑀏𑀢𑀸 𑀦𑀺𑀭𑀼𑀢𑁆𑀢𑀺𑀬𑁄𑀢𑀺 𑀇𑀫𑀺𑀦𑀸𑀯𑀸 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀅𑀯𑀺𑀚𑁆𑀚𑀸𑀢𑀺𑀧𑀺 𑀯𑀼𑀢𑁆𑀢𑀁 𑀲𑀺𑀬𑀸’’𑀢𑀺 𑀆𑀳𑀸𑀢𑀺 𑀤𑀝𑁆𑀞𑀩𑁆𑀩𑀁, 𑀇𑀫𑀺𑀦𑀸𑀯 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀪𑀯𑀲𑁆𑀲 𑀦𑀺𑀧𑁆𑀧𑀤𑁂𑀲𑀢𑁆𑀢𑀸 𑀪𑀯𑀧𑀘𑁆𑀘𑀬𑀸𑀧𑀺 𑀉𑀧𑀸𑀤𑀸𑀦𑀦𑁆𑀢𑀺 𑀦 𑀯𑀼𑀢𑁆𑀢’’𑀦𑁆𑀢𑀺 𑀅𑀬𑀫𑀢𑁆𑀣𑁄 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀯𑀸𑀭𑁂 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀢𑀢𑁆𑀣 𑀧𑀘𑁆𑀙𑀺𑀦𑁆𑀦𑀢𑁆𑀢𑀸𑀢𑀺 𑀏𑀢𑁂𑀦 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀁 𑀅𑀯𑀺𑀚𑁆𑀚𑀸𑀬 𑀧𑀘𑁆𑀘𑀬𑀪𑀸𑀯𑁄 𑀅𑀦𑀼𑀜𑁆𑀜𑀸𑀢𑁄 𑀯𑀺𑀬 𑀳𑁄𑀢𑀺. 𑀚𑀸𑀬𑀫𑀸𑀦𑀸𑀦𑀁 𑀧𑀦 𑀚𑀸𑀢𑀺, 𑀦 𑀚𑀸𑀢𑀺𑀬𑀸 𑀚𑀸𑀬𑀫𑀸𑀦𑀸, 𑀚𑀻𑀬𑀫𑀸𑀦𑀫𑀻𑀬𑀫𑀸𑀦𑀜𑁆𑀘 𑀚𑀭𑀸𑀫𑀭𑀡𑀁, 𑀦 𑀚𑀭𑀸𑀫𑀭𑀡𑀲𑁆𑀲 𑀚𑀻𑀬𑀫𑀸𑀦𑀫𑀻𑀬𑀫𑀸𑀦𑀸𑀢𑀺 𑀚𑀸𑀢𑀺𑀆𑀤𑀻𑀦𑀺 𑀏𑀓𑀘𑀺𑀢𑁆𑀢𑀓𑁆𑀔𑀡𑁂 𑀦 𑀅𑀯𑀺𑀚𑁆𑀚𑀸𑀬 𑀧𑀘𑁆𑀘𑀬𑁄 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀅𑀲𑀫𑁆𑀪𑀯𑀢𑁄 𑀏𑀯 𑀢𑀫𑁆𑀫𑀽𑀮𑀓𑀸 𑀦𑀬𑀸 𑀦 𑀕𑀳𑀺𑀢𑀸, 𑀧𑀘𑁆𑀙𑁂𑀤𑁄𑀧𑀺 𑀧𑀦 𑀅𑀢𑁆𑀣𑀻𑀢𑀺 ‘‘𑀢𑀢𑁆𑀣 𑀧𑀘𑁆𑀙𑀺𑀦𑁆𑀦𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳.

𑀫𑀸𑀢𑀺𑀓𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀓𑀼𑀲𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁪𑁮-𑁨𑁪𑁯. 𑀉𑀧𑀸𑀤𑀸𑀦𑀲𑁆𑀲 𑀉𑀧𑀸𑀤𑀸𑀦𑀧𑀘𑁆𑀘𑀬𑀢𑁆𑀢𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀦𑀦𑀼 𑀦𑀸𑀬𑀁 𑀤𑁄𑀲𑁄. 𑀓𑀸𑀫𑀼𑀧𑀸𑀤𑀸𑀦𑀜𑁆𑀳𑀺 𑀤𑀺𑀝𑁆𑀞𑀼𑀧𑀸𑀤𑀸𑀦𑀲𑁆𑀲, 𑀢𑀜𑁆𑀘 𑀇𑀢𑀭𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺? 𑀲𑀘𑁆𑀘𑀁, 𑀓𑀸𑀫𑀼𑀧𑀸𑀤𑀸𑀦𑀲𑁆𑀲 𑀧𑀦 𑀢𑀡𑁆𑀳𑀸𑀕𑀳𑀡𑁂𑀦 𑀕𑀳𑀺𑀢𑀢𑁆𑀢𑀸 𑀦𑀸𑀫𑁂 𑀯𑀺𑀬 𑀯𑀺𑀲𑁂𑀲𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀸 𑀘 𑀉𑀧𑀸𑀤𑀸𑀦𑀕𑁆𑀕𑀳𑀡𑁂𑀦 𑀢𑀡𑁆𑀳𑀸𑀧𑀘𑁆𑀘𑀬𑀸 𑀪𑀯𑀲𑁆𑀲 𑀘 𑀧𑀘𑁆𑀘𑀬𑀪𑀽𑀢𑀸 𑀤𑀺𑀝𑁆𑀞𑀺 𑀏𑀯 𑀕𑀳𑀺𑀢𑀸𑀢𑀺 𑀅𑀬𑀁 𑀤𑁄𑀲𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀬𑀲𑁆𑀫𑀸 𑀘 𑀉𑀧𑀸𑀤𑀸𑀦𑀝𑁆𑀞𑀸𑀦𑁂 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀧𑀘𑁆𑀘𑀬𑁄 𑀘 𑀏𑀓𑀫𑁂𑀯, 𑀢𑀲𑁆𑀫𑀸 ‘‘𑀦𑀸𑀫𑀧𑀘𑁆𑀘𑀬𑀸 𑀨𑀲𑁆𑀲𑁄, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦’’𑀦𑁆𑀢𑀺 𑀏𑀢𑁂𑀲𑀁 𑀦𑀺𑀤𑁆𑀤𑁂𑀲𑁂𑀲𑀼 𑀯𑀺𑀬 ‘‘𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄’’𑀢𑀺 𑀏𑀢𑀲𑁆𑀲 𑀦𑀺𑀤𑁆𑀤𑁂𑀲𑁂 𑀧𑀘𑁆𑀘𑀬𑁄 𑀯𑀺𑀲𑀼𑀁 ¶ 𑀦 𑀯𑀺𑀪𑀢𑁆𑀢𑁄. 𑀲𑀢𑀺𑀧𑀺 𑀯𑀸 𑀪𑀯𑀲𑁆𑀲 𑀧𑀘𑁆𑀘𑀬𑀪𑀸𑀯𑁂𑀦 𑀓𑀸𑀫𑀼𑀧𑀸𑀤𑀸𑀦𑀲𑁆𑀲𑀧𑀺 𑀕𑀳𑀡𑁂 ‘‘𑀞𑀧𑁂𑀢𑁆𑀯𑀸 𑀉𑀧𑀸𑀤𑀸𑀦’’𑀦𑁆𑀢𑀺 𑀅𑀯𑀼𑀘𑁆𑀘𑀫𑀸𑀦𑁂 𑀓𑀸𑀫𑀼𑀧𑀸𑀤𑀸𑀦𑀁 𑀓𑀸𑀫𑀼𑀧𑀸𑀤𑀸𑀦𑀲𑁆𑀲, 𑀤𑀺𑀝𑁆𑀞𑀺 𑀘 𑀤𑀺𑀝𑁆𑀞𑀺𑀬𑀸 𑀧𑀘𑁆𑀘𑀬𑁄𑀢𑀺 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑀸𑀦𑀺𑀯𑀸𑀭𑀡𑀢𑁆𑀣𑀁 ‘‘𑀞𑀧𑁂𑀢𑁆𑀯𑀸 𑀉𑀧𑀸𑀤𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁨𑁫𑁨. 𑀘𑀓𑁆𑀔𑀸𑀬𑀢𑀦𑀸𑀤𑀺𑀉𑀧𑀢𑁆𑀣𑀫𑁆𑀪𑀓𑀲𑁆𑀲 ¶ 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀚𑀦𑀓𑀁 𑀯𑀺𑀜𑁆𑀜𑀸𑀡𑀁 𑀘𑀓𑁆𑀔𑀸𑀬𑀢𑀦𑀼𑀧𑀘𑀬𑀸𑀤𑀻𑀦𑀁 𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑀁 𑀢𑀤𑀚𑀦𑀓𑀫𑁆𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀬𑀲𑁆𑀲 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀸𑀲𑀫𑁆𑀧𑀺 𑀳𑀻𑀢𑀺 𑀉𑀢𑀼𑀆𑀳𑀸𑀭𑀚𑀲𑀦𑁆𑀢𑀢𑀻𑀦𑀫𑁆𑀧𑀺 𑀳𑀺 𑀉𑀧𑀢𑁆𑀣𑀫𑁆𑀪𑀓𑀲𑀫𑀼𑀝𑁆𑀞𑀸𑀧𑀦𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀯𑀲𑁂𑀦 𑀯𑀺𑀜𑁆𑀜𑀸𑀡𑀁 𑀧𑀘𑁆𑀘𑀬𑁄 𑀳𑁄𑀢𑀺 𑀏𑀯𑀸𑀢𑀺 𑀅𑀢𑁆𑀣𑁄.

𑁨𑁫𑁪. 𑀬𑀣𑀸𑀦𑀼𑀭𑀽𑀧𑀦𑁆𑀢𑀺 𑀫𑀳𑀸𑀪𑀽𑀢𑀲𑀗𑁆𑀔𑀸𑀢𑀁 𑀧𑀜𑁆𑀘𑀦𑁆𑀦𑀁 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑁄, 𑀯𑀢𑁆𑀣𑀼𑀲𑀗𑁆𑀔𑀸𑀢𑀁 𑀙𑀝𑁆𑀞𑀲𑁆𑀲 𑀧𑀼𑀭𑁂𑀚𑀸𑀢𑀸𑀤𑀺𑀧𑀘𑁆𑀘𑀬𑁄, 𑀦𑀸𑀫𑀁 𑀧𑀜𑁆𑀘𑀦𑁆𑀦𑀁 𑀧𑀘𑁆𑀙𑀸𑀚𑀸𑀢𑀸𑀤𑀺𑀧𑀘𑁆𑀘𑀬𑁄, 𑀙𑀝𑁆𑀞𑀲𑁆𑀲 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑁄𑀢𑀺 𑀏𑀲𑀸 𑀬𑀣𑀸𑀦𑀼𑀭𑀽𑀧𑀢𑀸.

𑁨𑁬𑁪. 𑀬𑀲𑁆𑀲𑀸𑀢𑀺 𑀬𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀦𑀸𑀫𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀪𑀸𑀯𑁄 𑀳𑁄𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁.

𑁨𑁭𑁨. ‘‘𑀨𑀲𑁆𑀲𑀧𑀘𑁆𑀘𑀬𑀸𑀧𑀺 𑀦𑀸𑀫’’𑀦𑁆𑀢𑀺 𑀨𑀲𑁆𑀲𑀧𑀘𑁆𑀘𑀬𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑀲𑁆𑀲𑁂𑀯 𑀦𑀸𑀫𑀲𑁆𑀲 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀦 𑀧𑀯𑀢𑁆𑀢𑀺 𑀤𑀲𑁆𑀲𑀺𑀢𑀸𑀢𑀺 ‘‘𑀞𑀧𑁂𑀢𑁆𑀯𑀸 𑀨𑀲𑁆𑀲’’𑀦𑁆𑀢𑀺 𑀧𑀼𑀦 𑀯𑀘𑀦𑁂 𑀓𑁄𑀘𑀺 𑀅𑀢𑁆𑀣𑁄 𑀅𑀢𑁆𑀣𑀻𑀢𑀺 𑀦 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀣𑀸𑀧𑀻’’𑀢𑀺𑀆𑀤𑀺𑀫𑀸𑀳.

𑁨𑁮𑁦. 𑀬𑀲𑁆𑀫𑀸 𑀅𑀥𑀺𑀫𑁄𑀓𑁆𑀔𑁄𑀧𑀺 𑀦𑀢𑁆𑀣𑀺, 𑀢𑀲𑁆𑀫𑀸 𑀉𑀧𑀸𑀤𑀸𑀦𑀝𑁆𑀞𑀸𑀦𑀁 𑀧𑀭𑀺𑀳𑀻𑀦𑀫𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀩𑀮𑀯𑀓𑀺𑀮𑁂𑀲𑁂𑀦 𑀧𑀦 𑀧𑀤𑀧𑀽𑀭𑀡𑀲𑁆𑀲 𑀓𑀸𑀭𑀡𑀁 𑀢𑀡𑁆𑀳𑀸𑀬 𑀅𑀪𑀸𑀯𑁄 𑀤𑁄𑀫𑀦𑀲𑁆𑀲𑀲𑀳𑀕𑀢𑁂𑀲𑀼 𑀯𑀼𑀢𑁆𑀢𑁄 𑀏𑀯𑀸𑀢𑀺 𑀢𑀲𑁆𑀲 𑀢𑁂𑀦 𑀲𑀫𑁆𑀩𑀦𑁆𑀥𑁄 𑀬𑁄𑀚𑁂𑀢𑀩𑁆𑀩𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀢𑀢𑀺𑀬𑀘𑀺𑀢𑁆𑀢𑀸𑀤𑀻𑀲𑀼 ‘‘𑀢𑀡𑁆𑀳𑀸𑀧𑀘𑁆𑀘𑀬𑀸 𑀅𑀥𑀺𑀫𑁄𑀓𑁆𑀔𑁄’’𑀢𑀺𑀆𑀤𑀺𑀫𑁆𑀳𑀺 𑀯𑀺𑀲𑁆𑀲𑀚𑁆𑀚𑀦𑀫𑁂𑀯 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑁆𑀯𑀸 𑀧𑀸𑀴𑀺 𑀲𑀁𑀔𑀺𑀢𑁆𑀢𑀸. 𑀳𑁂𑀝𑁆𑀞𑀸𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑀸𑀤𑀻𑀲𑀼.

𑀅𑀓𑀼𑀲𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀼𑀲𑀮𑀸𑀩𑁆𑀬𑀸𑀓𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁯𑁨. 𑀧𑀲𑀸𑀤𑁄𑀢𑀺 ¶ 𑀲𑀤𑁆𑀥𑀸.

𑁩𑁦𑁬. ‘‘𑀅𑀮𑁄𑀪𑁄 𑀦𑀺𑀤𑀸𑀦𑀁 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬𑀸’’𑀢𑀺𑀆𑀤𑀺𑀯𑀘𑀦𑀢𑁄 (𑀅. 𑀦𑀺. 𑁩.𑁩𑁪) 𑀲𑀩𑁆𑀬𑀸𑀧𑀸𑀭𑀸𑀦𑀺 𑀓𑀼𑀲𑀮𑀫𑀽𑀮𑀸𑀦𑀺 𑀲𑀗𑁆𑀔𑀸𑀭𑀸𑀦𑀁 𑀦𑀺𑀤𑀸𑀦𑀸𑀦𑀺 𑀳𑁄𑀦𑁆𑀢𑀺, 𑀦 𑀓𑀫𑁆𑀫𑀯𑁂𑀕𑀓𑁆𑀔𑀺𑀢𑁆𑀢𑁂𑀲𑀼 ¶ 𑀯𑀺𑀧𑀸𑀓𑁂𑀲𑀼 𑀅𑀮𑁄𑀪𑀸𑀤𑀺𑀲𑀳𑀕𑀢𑀓𑀫𑁆𑀫𑀧𑀝𑀺𑀩𑀺𑀫𑁆𑀩𑀪𑀽𑀢𑀸 𑀯𑀺𑀬 𑀧𑀯𑀢𑁆𑀢𑀫𑀸𑀦𑀸 𑀅𑀮𑁄𑀪𑀸𑀤𑀬𑁄𑀢𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀲𑀼 𑀯𑀺𑀬 𑀦𑀺𑀤𑀸𑀦𑀭𑀳𑀺𑀢𑀢𑀸 𑀲𑁄𑀢𑀧𑀢𑀺𑀢𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀓𑀺𑀭𑀺𑀬𑀥𑀫𑁆𑀫𑀸 𑀓𑀺𑀭𑀺𑀬𑀫𑀢𑁆𑀢𑀢𑁆𑀢𑀸 𑀓𑀫𑁆𑀫𑀦𑀺𑀤𑀸𑀦𑀭𑀳𑀺𑀢𑀸𑀇𑀘𑁆𑀘𑁂𑀯 𑀧𑀭𑀺𑀳𑀻𑀦𑀸𑀯𑀺𑀚𑁆𑀚𑀸𑀝𑁆𑀞𑀸𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀢𑀢𑀺𑀬𑀘𑀢𑀼𑀢𑁆𑀣𑀯𑀸𑀭𑀸 𑀅𑀲𑀫𑁆𑀪𑀯𑀢𑁄 𑀏𑀯𑀸𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀓𑀺𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀘𑀓𑁆𑀔𑀸𑀬𑀢𑀦𑀼𑀧𑀘𑀬𑀸𑀤𑀻𑀦𑀁 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀻𑀢𑀺? 𑀳𑁄𑀦𑁆𑀢𑀺, 𑀢𑀤𑀼𑀧𑀢𑁆𑀣𑀫𑁆𑀪𑀓𑀲𑁆𑀲 𑀧𑀦 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑁆𑀲 𑀅𑀲𑀫𑀼𑀝𑁆𑀞𑀸𑀧𑀦𑀁 𑀲𑀦𑁆𑀥𑀸𑀬 ‘‘𑀅𑀲𑀫𑁆𑀪𑀯𑀢𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀳𑀚𑀸𑀢𑀧𑀘𑁆𑀙𑀸𑀚𑀸𑀢𑀯𑀺𑀜𑁆𑀜𑀸𑀡𑀲𑁆𑀲 𑀧𑀦 𑀯𑀲𑁂𑀦 𑀢𑀤𑀸𑀧𑀺 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁, 𑀧𑀘𑁆𑀙𑀸𑀚𑀸𑀢𑀲𑀳𑀚𑀸𑀢𑀦𑀸𑀫𑀲𑁆𑀲 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀪𑀽𑀢𑀘𑀓𑁆𑀔𑀸𑀤𑀺𑀭𑀽𑀧𑀲𑁆𑀲 𑀘 𑀯𑀲𑁂𑀦 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀜𑁆𑀘 𑀮𑀩𑁆𑀪𑀢𑀻𑀢𑀺 𑀢𑀢𑀺𑀬𑀘𑀢𑀼𑀢𑁆𑀣𑀯𑀸𑀭𑀸 𑀦 𑀦 𑀲𑀫𑁆𑀪𑀯𑀦𑁆𑀢𑀻𑀢𑀺.

𑀓𑀼𑀲𑀮𑀸𑀩𑁆𑀬𑀸𑀓𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀯𑀺𑀚𑁆𑀚𑀸𑀫𑀽𑀮𑀓𑀓𑀼𑀲𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩𑁩𑁪. 𑀲𑀫𑁆𑀫𑁄𑀳𑀯𑀲𑁂𑀦𑀸𑀢𑀺 𑀓𑀼𑀲𑀮𑀨𑀮𑁂 𑀅𑀦𑀺𑀘𑁆𑀘𑀸𑀤𑀺𑀢𑀸𑀬 𑀲𑀪𑀬𑁂 𑀲𑀸𑀤𑀼𑀭𑀲𑀯𑀺𑀲𑀭𑀼𑀓𑁆𑀔𑀩𑀻𑀚𑀲𑀤𑀺𑀲𑁂 𑀢𑀁𑀦𑀺𑀩𑁆𑀩𑀢𑁆𑀢𑀓𑀓𑀼𑀲𑀮𑁂 𑀘 𑀅𑀦𑀸𑀤𑀻𑀦𑀯𑀤𑀲𑁆𑀲𑀺𑀢𑀸𑀯𑀲𑁂𑀦. 𑀲𑀫𑀢𑀺𑀓𑁆𑀓𑀫𑀢𑁆𑀣𑀁 𑀪𑀸𑀯𑀦𑀸 𑀲𑀫𑀢𑀺𑀓𑁆𑀓𑀫𑀪𑀸𑀯𑀦𑀸, 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀲𑀫𑀢𑀺𑀓𑁆𑀓𑀫𑀪𑀽𑀢𑀸 𑀯𑀸 𑀪𑀸𑀯𑀦𑀸 𑀲𑀫𑀢𑀺𑀓𑁆𑀓𑀫𑀪𑀸𑀯𑀦𑀸.

𑀢𑀣𑀸 𑀇𑀥 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀅𑀯𑀺𑀚𑁆𑀚𑀸𑀬 𑀏𑀯 𑀲𑀗𑁆𑀔𑀸𑀭𑀸𑀦𑀁 𑀅𑀯𑀺𑀕𑀢𑀸𑀤𑀺𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀧𑀦 𑀲𑀗𑁆𑀔𑀸𑀭𑀸𑀤𑀬𑁄 𑀅𑀯𑀺𑀕𑀢𑀸𑀤𑀺𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑁄, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 ¶ 𑀯𑀺𑀜𑁆𑀜𑀸𑀡𑀁 𑀲𑀗𑁆𑀔𑀸𑀭𑀳𑁂𑀢𑀼𑀓𑀦𑁆𑀢𑀺𑀆𑀤𑀺𑀦𑀸 𑀬𑁄𑀚𑀦𑀸 𑀦 𑀦 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺 𑀅𑀯𑀺𑀕𑀢𑀘𑀢𑀼𑀓𑁆𑀓𑀸𑀤𑀻𑀦𑀺𑀧𑀺 𑀦 𑀇𑀥 𑀮𑀩𑁆𑀪𑀦𑁆𑀢𑀺. 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁 𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀦𑀸𑀫𑀦𑁆𑀢𑀺𑀆𑀤𑀺𑀦𑀸 𑀳𑀺 𑀬𑀣𑀸𑀮𑀸𑀪𑀬𑁄𑀚𑀦𑀸𑀬 𑀦𑀬𑁄 𑀤𑀲𑁆𑀲𑀺𑀢𑁄𑀢𑀺.

𑀅𑀯𑀺𑀚𑁆𑀚𑀸𑀫𑀽𑀮𑀓𑀓𑀼𑀲𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀼𑀲𑀮𑀫𑀽𑀮𑀓𑀯𑀺𑀧𑀸𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩𑁪𑁩. ‘‘𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁂 ¶ 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁, 𑀓𑀺𑀁 𑀓𑀼𑀲𑀮𑀫𑀽𑀮𑀁 𑀅𑀓𑀼𑀲𑀮𑀫𑀽𑀮𑀜𑁆𑀘 𑀓𑀫𑁆𑀫𑀧𑀘𑁆𑀘𑀬𑁄 𑀳𑁄𑀢𑀻𑀢𑀺? 𑀦 𑀳𑁄𑀢𑀺, 𑀓𑀫𑁆𑀫𑀧𑀘𑁆𑀘𑀬𑀪𑀽𑀢𑀸𑀬 𑀧𑀦 𑀘𑁂𑀢𑀦𑀸𑀬 𑀲𑀁𑀲𑀝𑁆𑀞𑀁 𑀓𑀫𑁆𑀫𑀁 𑀯𑀺𑀬 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑁂𑀦 𑀏𑀓𑀻𑀪𑀸𑀯𑀫𑀺𑀯 𑀕𑀢𑀢𑁆𑀢𑀸𑀢𑀺 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀣𑀸 𑀓𑀼𑀲𑀮𑀸𑀓𑀼𑀲𑀮𑀫𑀽𑀮𑁂𑀳𑀺 𑀯𑀺𑀦𑀸 𑀓𑀫𑁆𑀫𑀁 𑀯𑀺𑀧𑀸𑀓𑀁 𑀦 𑀚𑀦𑁂𑀢𑀻𑀢𑀺 𑀢𑀸𑀦𑀺 𑀯𑀺𑀧𑀸𑀓𑀲𑁆𑀲 𑀧𑀭𑀺𑀬𑀸𑀬𑁂𑀦 𑀉𑀧𑀦𑀺𑀲𑁆𑀲𑀬𑁄𑀢𑀺 𑀯𑀼𑀢𑁆𑀢𑀸𑀦𑀺, 𑀏𑀯𑀁 𑀓𑀫𑁆𑀫𑁂𑀦 𑀏𑀓𑀻𑀪𑀽𑀢𑀸𑀦𑀺 𑀲𑀁𑀲𑀝𑁆𑀞𑀸𑀦𑀺 𑀳𑀼𑀢𑁆𑀯𑀸 𑀓𑀫𑁆𑀫𑀚𑀸𑀦𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀧𑀭𑀺𑀬𑀸𑀬𑁂𑀦 𑀢𑁂𑀲𑀁 𑀓𑀫𑁆𑀫𑀧𑀘𑁆𑀘𑀬𑀢𑀸 𑀯𑀼𑀢𑁆𑀢𑀸. 𑀏𑀲𑀸𑀢𑀺 𑀏𑀲 𑀓𑀼𑀲𑀮𑀫𑀽𑀮𑀧𑀘𑁆𑀘𑀬𑁄 𑀅𑀓𑀼𑀲𑀮𑀫𑀽𑀮𑀧𑀘𑁆𑀘𑀬𑁄 𑀘𑀸𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀸𑀦𑀁 𑀯𑀺𑀬 𑀓𑀺𑀭𑀺𑀬𑀸𑀦𑀁 𑀉𑀧𑁆𑀧𑀸𑀤𑀓𑀸𑀦𑀺 𑀅𑀯𑀺𑀚𑁆𑀚𑀸𑀓𑀼𑀲𑀮𑀸𑀓𑀼𑀲𑀮𑀫𑀽𑀮𑀸𑀦𑀺 𑀘 𑀦 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀉𑀧𑀦𑀺𑀲𑁆𑀲𑀬𑀢𑀁 𑀦 𑀮𑀪𑀦𑁆𑀢𑀻’’𑀢𑀺. 𑀫𑀦𑀲𑀺𑀓𑀸𑀭𑁄𑀧𑀺 𑀚𑀯𑀦𑀯𑀻𑀣𑀺𑀧𑀝𑀺𑀧𑀸𑀤𑀓𑀫𑀢𑁆𑀢𑀢𑁆𑀢𑀸 𑀓𑀼𑀲𑀮𑀸𑀓𑀼𑀲𑀮𑀸𑀦𑀺 𑀯𑀺𑀬 𑀅𑀯𑀺𑀚𑁆𑀚𑀁 𑀉𑀧𑀦𑀺𑀲𑁆𑀲𑀬𑀁 𑀦 𑀓𑀭𑁄𑀢𑀺, 𑀅𑀯𑀺𑀚𑁆𑀚𑀽𑀧𑀦𑀺𑀲𑁆𑀲𑀬𑀸𑀦𑀁 𑀧𑀦 𑀧𑀯𑀢𑁆𑀢𑀺𑀅𑀢𑁆𑀣𑀁 𑀪𑀯𑀗𑁆𑀕𑀸𑀯𑀝𑁆𑀝𑀦𑀫𑀢𑁆𑀢𑀁 𑀳𑁄𑀢𑀺, 𑀧𑀳𑀻𑀦𑀸𑀯𑀺𑀚𑁆𑀚𑀸𑀦𑀜𑁆𑀘 𑀓𑀺𑀭𑀺𑀬𑀸𑀦𑀁 𑀅𑀯𑀺𑀚𑁆𑀚𑀸 𑀦𑁂𑀯𑀼𑀧𑁆𑀧𑀸𑀤𑀺𑀓𑀸, 𑀆𑀭𑀫𑁆𑀫𑀡𑀫𑀢𑁆𑀢𑀫𑁂𑀯 𑀧𑀦 𑀳𑁄𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲 𑀥𑀫𑁆𑀫𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁨𑁩), ‘‘𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁄 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁩.𑁧𑁦𑁩) 𑀘 𑀏𑀯𑀫𑀸𑀤𑀻𑀲𑀼 𑀓𑀺𑀭𑀺𑀬𑀸𑀦𑀁 𑀅𑀓𑀼𑀲𑀮𑀸 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑁂𑀦 𑀦 𑀉𑀤𑁆𑀥𑀝𑀸𑀢𑀺. 𑀅𑀧𑀺𑀘 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀏𑀢𑀲𑁆𑀲 𑀯𑀲𑁂𑀦 𑀅𑀯𑀺𑀚𑁆𑀚𑀸𑀫𑀽𑀮𑀓𑁄 𑀓𑀼𑀲𑀮𑀦𑀬𑁄 𑀯𑀼𑀢𑁆𑀢𑁄, ‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀏𑀢𑀲𑁆𑀲 𑀯𑀲𑁂𑀦 𑀓𑀼𑀲𑀮𑀸𑀓𑀼𑀲𑀮𑀫𑀽𑀮𑀓𑁄 ¶ 𑀯𑀺𑀧𑀸𑀓𑀦𑀬𑁄, 𑀓𑀺𑀭𑀺𑀬𑀸𑀦𑀁 𑀧𑀦 𑀦𑁂𑀯 𑀲𑀗𑁆𑀔𑀸𑀭𑀕𑁆𑀕𑀳𑀡𑁂𑀦, 𑀦 𑀘 𑀯𑀺𑀜𑁆𑀜𑀸𑀡𑀕𑁆𑀕𑀳𑀡𑁂𑀦 𑀕𑀳𑀡𑀁 𑀕𑀘𑁆𑀙𑀢𑀻𑀢𑀺 𑀢𑀁𑀫𑀽𑀮𑀓𑁄 𑀓𑀺𑀭𑀺𑀬𑀸𑀦𑀬𑁄 𑀦 𑀮𑀩𑁆𑀪𑀢𑀻𑀢𑀺 𑀦 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀅𑀦𑁂𑀓𑀪𑁂𑀤𑀢𑁄𑀢𑀺 𑀅𑀯𑀺𑀚𑁆𑀚𑀸𑀤𑀻𑀦𑀁 𑀫𑀽𑀮𑀧𑀤𑀸𑀦𑀁 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸𑀦𑀁 𑀓𑀺𑀭𑀺𑀬𑀦𑁆𑀢𑁂 𑀧𑀞𑀫𑀦𑀬𑁂 𑀲𑀳𑀚𑀸𑀢𑀸𑀤𑀺𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸 𑀢𑁂𑀲𑀁 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀦𑀯𑀸𑀤𑀺𑀫𑀽𑀮𑀧𑀤𑀸𑀦𑀁 𑀦𑀬𑀸𑀦𑀁 𑀯𑀲𑁂𑀦, 𑀅𑀦𑁂𑀓𑀧𑁆𑀧𑀓𑀸𑀭𑀢𑁄 𑀘𑀢𑀼𑀦𑁆𑀦𑀁 𑀘𑀢𑀼𑀓𑁆𑀓𑀸𑀦𑀁 𑀯𑀲𑁂𑀦𑀸𑀢𑀺 𑀯𑀸 𑀅𑀥𑀺𑀧𑁆𑀧𑀸𑀬𑁄. 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀧𑀦 𑀯𑀺𑀧𑀸𑀓𑁂 𑀘𑀸𑀢𑀺 𑀏𑀢𑁆𑀣 𑀓𑀼𑀲𑀮𑀸𑀓𑀼𑀲𑀮𑁂𑀲𑀼 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀯𑀺𑀧𑀸𑀓𑁂 𑀘𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀧𑀼𑀭𑀺𑀫𑀧𑀘𑁆𑀙𑀺𑀫𑁂𑀲𑀼 𑀳𑀺 𑀦𑀬𑁂𑀲𑀼 𑀬𑀣𑀸 𑀧𑀘𑁆𑀘𑀬𑀸𑀓𑀸𑀭𑁄 𑀯𑀼𑀢𑁆𑀢𑁄, 𑀢𑀁𑀤𑀲𑁆𑀲𑀦𑀢𑁆𑀣𑀁 ¶ ‘‘𑀅𑀦𑁂𑀓𑀪𑁂𑀤𑀢𑁄 𑀏𑀓𑀥𑀸𑀯𑀸’’𑀢𑀺 𑀯𑀼𑀢𑁆𑀢𑀁, 𑀦 𑀘 𑀧𑀘𑁆𑀙𑀺𑀫𑀦𑀬𑁂 𑀓𑀼𑀲𑀮𑁂 𑀅𑀦𑁂𑀓𑀪𑁂𑀤𑀢𑁄 𑀧𑀘𑁆𑀘𑀬𑀸𑀓𑀸𑀭𑁄 𑀯𑀼𑀢𑁆𑀢𑁄, 𑀅𑀣 𑀔𑁄 ‘‘𑀏𑀓𑀥𑀸𑀯𑀸’’𑀢𑀺. 𑀏𑀓𑀥𑀸𑀯𑀸𑀢𑀺 𑀘 𑀫𑀽𑀮𑀧𑀤𑁂𑀓𑀧𑀘𑁆𑀘𑀬𑀢𑀸𑀯𑀲𑁂𑀦, 𑀏𑀓𑀲𑁆𑀲𑁂𑀯 𑀯𑀸 𑀦𑀬𑀲𑁆𑀲 𑀯𑀲𑁂𑀦 𑀏𑀓𑀧𑁆𑀧𑀓𑀸𑀭𑁂𑀦𑀸𑀢𑀺 𑀅𑀢𑁆𑀣𑁄, 𑀧𑀞𑀫𑀘𑀢𑀼𑀓𑁆𑀓𑀲𑁆𑀲𑁂𑀯 𑀯𑀲𑁂𑀦𑀸𑀢𑀺 𑀯𑀸 𑀅𑀥𑀺𑀧𑁆𑀧𑀸𑀬𑁄. 𑀥𑀫𑁆𑀫𑀧𑀘𑁆𑀘𑀬𑀪𑁂𑀤𑁂𑀢𑀺 𑀅𑀯𑀺𑀚𑁆𑀚𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀪𑀸𑀯𑀪𑁂𑀤𑁂 𑀚𑀭𑀸𑀫𑀭𑀡𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀚𑀸𑀢𑀺𑀆𑀤𑀺𑀧𑀘𑁆𑀘𑀬𑀪𑁂𑀤𑁂, 𑀢𑀁𑀢𑀁𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀫𑀬𑀧𑀭𑀺𑀘𑁆𑀙𑀺𑀦𑁆𑀦𑀸𑀦𑀁 𑀯𑀸 𑀨𑀲𑁆𑀲𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀏𑀓𑀓𑁆𑀔𑀡𑀺𑀓𑀸𑀯𑀺𑀚𑁆𑀚𑀸𑀤𑀺𑀧𑀘𑁆𑀘𑀬𑀪𑁂𑀤𑁂. 𑀧𑀭𑀺𑀬𑀢𑁆𑀢𑀺𑀆𑀤𑀻𑀦𑀁 𑀓𑀫𑁄 𑀧𑀭𑀺𑀬𑀢𑁆𑀢𑀺…𑀧𑁂… 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄. 𑀧𑀘𑁆𑀘𑀬𑀸𑀓𑀸𑀭𑁂 𑀳𑀺 𑀧𑀸𑀴𑀺𑀧𑀭𑀺𑀬𑀸𑀧𑀼𑀡𑀦𑀢𑀤𑀢𑁆𑀣𑀲𑀯𑀦𑀧𑀸𑀴𑀺𑀅𑀢𑁆𑀣𑀘𑀺𑀦𑁆𑀢𑀦𑀸𑀦𑀺 ‘‘𑀚𑀭𑀸𑀫𑀭𑀡𑀁 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁…𑀧𑁂… 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺𑀆𑀤𑀺𑀦𑀸 𑀪𑀸𑀯𑀦𑀸𑀧𑀝𑀺𑀧𑀢𑁆𑀢𑀺 𑀘 𑀓𑀫𑁂𑀦 𑀓𑀸𑀢𑀩𑁆𑀩𑀸𑀢𑀺 𑀓𑀫-𑀕𑁆𑀕𑀳𑀡𑀁 𑀓𑀭𑁄𑀢𑀺. 𑀢𑀢𑁄𑀢𑀺 𑀜𑀸𑀡𑀧𑁆𑀧𑀪𑁂𑀤𑀚𑀦𑀓𑀢𑁄 𑀓𑀫𑀢𑁄. 𑀅𑀜𑁆𑀜𑀁 𑀓𑀭𑀡𑀻𑀬𑀢𑀭𑀁 𑀦𑀢𑁆𑀣𑀺. 𑀢𑀤𑀸𑀬𑀢𑁆𑀢𑀸 𑀳𑀺 𑀤𑀼𑀓𑁆𑀔𑀦𑁆𑀢𑀓𑀺𑀭𑀺𑀬𑀸𑀢𑀺.

𑀓𑀼𑀲𑀮𑀫𑀽𑀮𑀓𑀯𑀺𑀧𑀸𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀢𑀺𑀧𑀝𑁆𑀞𑀸𑀦𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁩𑁫𑁫. 𑀢𑀬𑁄 ¶ ¶ 𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀲𑀢𑀺𑀧𑀝𑁆𑀞𑀸𑀦-𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑀁 𑀓𑀭𑁄𑀢𑀺, 𑀦 𑀇𑀥 𑀧𑀸𑀴𑀺𑀬𑀁 𑀯𑀼𑀢𑁆𑀢𑀲𑁆𑀲 𑀲𑀢𑀺𑀧𑀝𑁆𑀞𑀸𑀦-𑀲𑀤𑁆𑀤𑀲𑁆𑀲 𑀅𑀢𑁆𑀣𑀤𑀲𑁆𑀲𑀦𑀁. 𑀆𑀤𑀻𑀲𑀼 𑀳𑀺 𑀲𑀢𑀺𑀕𑁄𑀘𑀭𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀨𑀲𑁆𑀲𑀲𑀫𑀼𑀤𑀬𑀸 𑀯𑁂𑀤𑀦𑀸𑀦𑀁 𑀲𑀫𑀼𑀤𑀬𑁄, 𑀦𑀸𑀫𑀭𑀽𑀧𑀲𑀫𑀼𑀤𑀬𑀸 𑀘𑀺𑀢𑁆𑀢𑀲𑁆𑀲 𑀲𑀫𑀼𑀤𑀬𑁄, 𑀫𑀦𑀲𑀺𑀓𑀸𑀭𑀲𑀫𑀼𑀤𑀬𑀸 𑀥𑀫𑁆𑀫𑀸𑀦𑀁 𑀲𑀫𑀼𑀤𑀬𑁄’’𑀢𑀺 (𑀲𑀁. 𑀦𑀺. 𑁫.𑁪𑁦𑁮) 𑀲𑀢𑀺𑀧𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀸𑀦𑀁 𑀲𑀢𑀺𑀕𑁄𑀘𑀭𑀸𑀦𑀁 𑀤𑀻𑀧𑀓𑁂 𑀲𑀼𑀢𑁆𑀢𑀧𑁆𑀧𑀤𑁂𑀲𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀯𑀁 𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀴𑀺𑀬𑀫𑁆𑀧𑀺 𑀅𑀯𑀲𑁂𑀲𑀧𑀸𑀴𑀺𑀧𑁆𑀧𑀤𑁂𑀲𑀤𑀲𑁆𑀲𑀦𑀢𑁆𑀣𑁄 𑀆𑀤𑀺-𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄. 𑀤𑀸𑀦𑀸𑀤𑀻𑀦𑀺𑀧𑀺 𑀓𑀭𑁄𑀦𑁆𑀢𑀲𑁆𑀲 𑀭𑀽𑀧𑀸𑀤𑀻𑀦𑀺 𑀓𑀲𑀺𑀡𑀸𑀤𑀻𑀦𑀺 𑀘 𑀲𑀢𑀺𑀬𑀸 𑀞𑀸𑀦𑀁 𑀳𑁄𑀢𑀻𑀢𑀺 𑀢𑀁𑀦𑀺𑀯𑀸𑀭𑀡𑀢𑁆𑀣𑀫𑀸𑀳 ‘‘𑀧𑀥𑀸𑀦𑀁 𑀞𑀸𑀦’’𑀦𑁆𑀢𑀺. 𑀧-𑀲𑀤𑁆𑀤𑁄 𑀳𑀺 𑀧𑀥𑀸𑀦𑀢𑁆𑀣𑀤𑀻𑀧𑀓𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀭𑀺𑀬𑁄𑀢𑀺 𑀅𑀭𑀺𑀬𑀁 𑀲𑁂𑀝𑁆𑀞𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀫𑀸𑀳. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀲𑀴𑀸𑀬𑀢𑀦𑀯𑀺𑀪𑀗𑁆𑀕𑀲𑀼𑀢𑁆𑀢𑁂𑀢𑀺 𑀅𑀢𑁆𑀣𑁄. 𑀲𑀼𑀢𑁆𑀢𑁂𑀓𑀤𑁂𑀲𑁂𑀦 𑀳𑀺 𑀲𑀼𑀢𑁆𑀢𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀳𑀺 𑁋

‘‘𑀢𑀬𑁄 𑀲𑀢𑀺𑀧𑀝𑁆𑀞𑀸𑀦𑀸 𑀬𑀤𑀭𑀺𑀬𑁄…𑀧𑁂… 𑀅𑀭𑀳𑀢𑀻𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀇𑀥, 𑀪𑀺𑀓𑁆𑀔𑀯𑁂, 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀅𑀦𑀼𑀓𑀫𑁆𑀧𑀓𑁄 𑀳𑀺𑀢𑁂𑀲𑀻 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬 ‘𑀇𑀤𑀁 𑀯𑁄 𑀳𑀺𑀢𑀸𑀬 𑀇𑀤𑀁 𑀯𑁄 𑀲𑀼𑀔𑀸𑀬𑀸’𑀢𑀺. 𑀢𑀲𑁆𑀲 𑀲𑀸𑀯𑀓𑀸 𑀦 𑀲𑀼𑀲𑁆𑀲𑀽𑀲𑀦𑁆𑀢𑀺, 𑀦 𑀲𑁄𑀢𑀁 𑀑𑀤𑀳𑀦𑁆𑀢𑀺, 𑀦 𑀅𑀜𑁆𑀜𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀸𑀧𑁂𑀦𑁆𑀢𑀺, 𑀯𑁄𑀓𑁆𑀓𑀫𑁆𑀫 𑀘 𑀲𑀢𑁆𑀣𑀼𑀲𑀸𑀲𑀦𑀸 𑀯𑀢𑁆𑀢𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀦 𑀘𑁂𑀯 𑀅𑀦𑀢𑁆𑀢𑀫𑀦𑁄 𑀳𑁄𑀢𑀺, 𑀦 𑀘 𑀅𑀦𑀢𑁆𑀢𑀫𑀦𑀢𑀁 ¶ 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀅𑀦𑀯𑀲𑁆𑀲𑀼𑀢𑁄 𑀘 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀇𑀤𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑀁 𑀲𑀢𑀺𑀧𑀝𑁆𑀞𑀸𑀦𑀁. 𑀬𑀤𑀭𑀺𑀬𑁄…𑀧𑁂… 𑀅𑀭𑀳𑀢𑀺.

‘‘𑀧𑀼𑀦 𑀘𑀧𑀭𑀁 𑀪𑀺𑀓𑁆𑀔𑀯𑁂 𑀲𑀢𑁆𑀣𑀸…𑀧𑁂… 𑀇𑀤𑀁 𑀯𑁄 𑀲𑀼𑀔𑀸𑀬𑀸𑀢𑀺. 𑀢𑀲𑁆𑀲 𑀏𑀓𑀘𑁆𑀘𑁂 𑀲𑀸𑀯𑀓𑀸 𑀦 𑀲𑀼𑀲𑁆𑀲𑀽𑀲𑀦𑁆𑀢𑀺…𑀧𑁂… 𑀯𑀢𑁆𑀢𑀦𑁆𑀢𑀺. 𑀏𑀓𑀘𑁆𑀘𑁂 𑀲𑀸𑀯𑀓𑀸 𑀲𑀼𑀲𑁆𑀲𑀽𑀲𑀦𑁆𑀢𑀺 ¶ …𑀧𑁂… 𑀦 𑀘 𑀯𑁄𑀓𑁆𑀓𑀫𑁆𑀫 𑀲𑀢𑁆𑀣𑀼𑀲𑀸𑀲𑀦𑀸 𑀯𑀢𑁆𑀢𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀦 𑀘𑁂𑀯 𑀅𑀢𑁆𑀢𑀫𑀦𑁄 𑀳𑁄𑀢𑀺, 𑀦 𑀘 𑀅𑀢𑁆𑀢𑀫𑀦𑀢𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀦 𑀘𑁂𑀯 𑀅𑀦𑀢𑁆𑀢𑀫𑀦𑁄 𑀳𑁄𑀢𑀺, 𑀦 𑀘 𑀅𑀦𑀢𑁆𑀢𑀫𑀦𑀢𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀅𑀢𑁆𑀢𑀫𑀦𑀢𑀜𑁆𑀘 𑀅𑀦𑀢𑁆𑀢𑀫𑀦𑀢𑀜𑁆𑀘 𑀢𑀤𑀼𑀪𑀬𑀁 𑀅𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀇𑀤𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑀁…𑀧𑁂….

‘‘𑀧𑀼𑀦 𑀘𑀧𑀭𑀁…𑀧𑁂… 𑀲𑀼𑀔𑀸𑀬𑀸𑀢𑀺. 𑀢𑀲𑁆𑀲 𑀲𑀸𑀯𑀓𑀸 𑀲𑀼𑀲𑁆𑀲𑀽𑀲𑀦𑁆𑀢𑀺…𑀧𑁂… 𑀯𑀢𑁆𑀢𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀅𑀢𑁆𑀢𑀫𑀦𑁄 𑀘𑁂𑀯 𑀳𑁄𑀢𑀺, 𑀅𑀢𑁆𑀢𑀫𑀦𑀢𑀜𑁆𑀘 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀅𑀦𑀯𑀲𑁆𑀲𑀼𑀢𑁄 𑀘 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀇𑀤𑀁, 𑀪𑀺𑀓𑁆𑀔𑀯𑁂, 𑀢𑀢𑀺𑀬’’𑀦𑁆𑀢𑀺 (𑀫. 𑀦𑀺. 𑁩.𑁩𑁧𑁧) 𑁋

𑀏𑀯𑀁 𑀧𑀝𑀺𑀖𑀸𑀦𑀼𑀦𑀬𑁂𑀳𑀺 𑀅𑀦𑀯𑀲𑁆𑀲𑀼𑀢𑀢𑀸, 𑀦𑀺𑀘𑁆𑀘𑀁 𑀉𑀧𑀝𑁆𑀞𑀺𑀢𑀲𑀢𑀺𑀢𑀸, 𑀢𑀤𑀼𑀪𑀬𑀯𑀻𑀢𑀺𑀯𑀢𑁆𑀢𑀢𑀸 𑀲𑀢𑀺𑀧𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀸. 𑀩𑀼𑀤𑁆𑀥𑀸𑀦𑀫𑁂𑀯 𑀓𑀺𑀭 𑀦𑀺𑀘𑁆𑀘𑀁 𑀉𑀧𑀝𑁆𑀞𑀺𑀢𑀲𑀢𑀺𑀢𑀸 𑀳𑁄𑀢𑀺, 𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀤𑀻𑀦𑀦𑁆𑀢𑀺.

𑀧-𑀲𑀤𑁆𑀤𑁄 𑀆𑀭𑀫𑁆𑀪𑀁 𑀚𑁄𑀢𑁂𑀢𑀺, 𑀆𑀭𑀫𑁆𑀪𑁄 𑀘 𑀧𑀯𑀢𑁆𑀢𑀻𑀢𑀺 𑀓𑀢𑁆𑀯𑀸 𑀆𑀳 ‘‘𑀧𑀯𑀢𑁆𑀢𑀬𑀺𑀢𑀩𑁆𑀩𑀢𑁄𑀢𑀺 𑀅𑀢𑁆𑀣𑁄’’𑀢𑀺. 𑀲𑀢𑀺𑀬𑀸 𑀓𑀭𑀡𑀪𑀽𑀢𑀸𑀬 𑀧𑀝𑁆𑀞𑀸𑀦𑀁 𑀧𑀝𑁆𑀞𑀸𑀧𑁂𑀢𑀩𑁆𑀩𑀁 𑀲𑀢𑀺𑀧𑀝𑁆𑀞𑀸𑀦𑀁. 𑀅𑀦-𑀲𑀤𑁆𑀤𑀜𑁆𑀳𑀺 𑀩𑀳𑀼𑀮𑀁-𑀯𑀘𑀦𑁂𑀦 𑀓𑀫𑁆𑀫𑀢𑁆𑀣𑀁 𑀇𑀘𑁆𑀙𑀦𑁆𑀢𑀺 𑀲𑀤𑁆𑀤𑀯𑀺𑀤𑀽, 𑀢𑀣𑁂𑀯 𑀓𑀢𑁆𑀢𑀼𑀅𑀢𑁆𑀣𑀫𑁆𑀧𑀺 𑀇𑀘𑁆𑀙𑀦𑁆𑀢𑀻𑀢𑀺 𑀧𑀼𑀦 𑀢𑀢𑀺𑀬𑀦𑀬𑁂 ‘‘𑀧𑀢𑀺𑀝𑁆𑀞𑀸𑀢𑀻𑀢𑀺 𑀧𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧-𑀲𑀤𑁆𑀤𑁄 𑀪𑀼𑀲𑀢𑁆𑀣𑀁 𑀧𑀓𑁆𑀔𑀦𑁆𑀤𑀦𑀁 𑀤𑀻𑀧𑁂𑀢𑀻𑀢𑀺 ‘‘𑀑𑀓𑁆𑀓𑀦𑁆𑀢𑀺𑀢𑁆𑀯𑀸 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄’’𑀢𑀺 𑀆𑀳. 𑀧𑀼𑀦 𑀪𑀸𑀯𑀢𑁆𑀣𑁂 𑀲𑀢𑀺-𑀲𑀤𑁆𑀤𑀁 𑀧𑀝𑁆𑀞𑀸𑀦-𑀲𑀤𑁆𑀤𑀜𑁆𑀘 𑀯𑀡𑁆𑀡𑁂𑀦𑁆𑀢𑁄 ‘‘𑀅𑀣 𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑁂𑀦 𑀧𑀼𑀭𑀺𑀫𑀢𑁆𑀣𑁂 𑀲𑀢𑀺-𑀲𑀤𑁆𑀤𑁄 𑀧𑀝𑁆𑀞𑀸𑀦-𑀲𑀤𑁆𑀤𑁄 𑀘 𑀓𑀢𑁆𑀢𑀼𑀅𑀢𑁆𑀣𑁄𑀢𑀺 𑀯𑀺𑀜𑁆𑀜𑀸𑀬𑀢𑀺.

𑀯𑀺𑀲𑁂𑀲𑁂𑀦 𑀓𑀸𑀬𑁄 𑀘 𑀯𑁂𑀤𑀦𑀸 𑀘 𑀅𑀲𑁆𑀲𑀸𑀤𑀲𑁆𑀲 𑀓𑀸𑀭𑀡𑀦𑁆𑀢𑀺 𑀢𑀧𑁆𑀧𑀳𑀸𑀦𑀢𑁆𑀣𑀁 𑀢𑁂𑀲𑀁 𑀢𑀡𑁆𑀳𑀸𑀯𑀢𑁆𑀣𑀽𑀦𑀁 𑀑𑀴𑀸𑀭𑀺𑀓𑀲𑀼𑀔𑀼𑀫𑀸𑀦𑀁 𑀅𑀲𑀼𑀪𑀤𑀼𑀓𑁆𑀔𑀢𑀸𑀤𑀲𑁆𑀲𑀦𑀸𑀦𑀺 𑀫𑀦𑁆𑀤𑀢𑀺𑀓𑁆𑀔𑀧𑀜𑁆𑀜𑁂𑀳𑀺 𑀢𑀡𑁆𑀳𑀸𑀘𑀭𑀺𑀢𑁂𑀳𑀺 𑀲𑀼𑀓𑀭𑀸𑀦𑀻𑀢𑀺 𑀢𑀸𑀦𑀺 𑀢𑁂𑀲𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄𑀢𑀺 𑀯𑀼𑀢𑁆𑀢𑀸𑀦𑀺, 𑀏𑀯𑀁 𑀤𑀺𑀝𑁆𑀞𑀺𑀬𑀸 𑀯𑀺𑀲𑁂𑀲𑀓𑀸𑀭𑀡𑁂𑀲𑀼 𑀘𑀺𑀢𑁆𑀢𑀥𑀫𑁆𑀫𑁂𑀲𑀼 𑀅𑀦𑀺𑀘𑁆𑀘𑀸𑀦𑀢𑁆𑀢𑀢𑀸𑀤𑀲𑁆𑀲𑀦𑀸𑀦𑀺 𑀦𑀸𑀢𑀺𑀧𑀪𑁂𑀤𑀸𑀢𑀺𑀧𑀪𑁂𑀤𑀕𑀢𑁂𑀲𑀼 𑀢𑁂𑀲𑀼 𑀢𑀧𑁆𑀧𑀳𑀸𑀦𑀢𑁆𑀣𑀁 𑀫𑀦𑁆𑀤𑀢𑀺𑀓𑁆𑀔𑀸𑀦𑀁 𑀤𑀺𑀝𑁆𑀞𑀺𑀘𑀭𑀺𑀢𑀸𑀦𑀁 𑀲𑀼𑀓𑀭𑀸𑀦𑀻𑀢𑀺 ¶ 𑀢𑁂𑀲𑀁 𑀢𑀸𑀦𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄𑀢𑀺. 𑀢𑀺𑀓𑁆𑀔𑁄 𑀲𑀫𑀣𑀬𑀸𑀦𑀺𑀓𑁄 𑀑𑀴𑀸𑀭𑀺𑀓𑀸𑀭𑀫𑁆𑀫𑀡𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀢𑀢𑁆𑀣 𑀅𑀝𑁆𑀞𑀢𑁆𑀯𑀸 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀯𑁂𑀤𑀦𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀆𑀳 ‘‘𑀑𑀴𑀸𑀭𑀺𑀓𑀸𑀭𑀫𑁆𑀫𑀡𑁂 𑀅𑀲𑀡𑁆𑀞𑀳𑀦𑀢𑁄’’𑀢𑀺. 𑀯𑀺𑀧𑀲𑁆𑀲𑀦𑀸𑀬𑀸𑀦𑀺𑀓𑀲𑁆𑀲 ¶ 𑀲𑀼𑀔𑀼𑀫𑁂 𑀘𑀺𑀢𑁆𑀢𑁂 𑀥𑀫𑁆𑀫𑁂𑀲𑀼 𑀘 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑀢𑀤𑀦𑀼𑀧𑀲𑁆𑀲𑀦𑀸𑀦𑀁 𑀢𑀁𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀢𑀸 𑀯𑀼𑀢𑁆𑀢𑀸.

𑀢𑁂𑀲𑀁 𑀢𑀢𑁆𑀣𑀸𑀢𑀺 𑀏𑀢𑁆𑀣 𑀢𑀢𑁆𑀣-𑀲𑀤𑁆𑀤𑀲𑁆𑀲 𑀧𑀳𑀸𑀦𑀢𑁆𑀣𑀦𑁆𑀢𑀺 𑀏𑀢𑁂𑀦 𑀬𑁄𑀚𑀦𑀸. 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀲𑀯𑀺𑀲𑁂𑀲𑀸 𑀓𑀸𑀬𑁂 𑀮𑀩𑁆𑀪𑀦𑁆𑀢𑀻𑀢𑀺 𑀯𑀺𑀲𑁂𑀲𑁂𑀦 𑀓𑀸𑀬𑁄 𑀓𑀸𑀫𑁄𑀖𑀲𑁆𑀲 𑀯𑀢𑁆𑀣𑀼, 𑀪𑀯𑁂 𑀲𑀼𑀔𑀕𑁆𑀕𑀳𑀡𑀯𑀲𑁂𑀦 𑀪𑀯𑀲𑁆𑀲𑀸𑀤𑁄 𑀳𑁄𑀢𑀻𑀢𑀺 𑀪𑀯𑁄𑀖𑀲𑁆𑀲 𑀯𑁂𑀤𑀦𑀸, 𑀲𑀦𑁆𑀢𑀢𑀺𑀖𑀦𑀕𑁆𑀕𑀳𑀡𑀯𑀲𑁂𑀦 𑀘𑀺𑀢𑁆𑀢𑁂 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑁄 𑀳𑁄𑀢𑀻𑀢𑀺 𑀤𑀺𑀝𑁆𑀞𑁄𑀖𑀲𑁆𑀲 𑀘𑀺𑀢𑁆𑀢𑀁, 𑀥𑀫𑁆𑀫𑀯𑀺𑀦𑀺𑀩𑁆𑀪𑁄𑀕𑀲𑁆𑀲 𑀥𑀫𑁆𑀫𑀸𑀦𑀁 𑀥𑀫𑁆𑀫𑀫𑀢𑁆𑀢𑀢𑀸𑀬 𑀘 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀢𑁆𑀢𑀸 𑀲𑀫𑁆𑀫𑁄𑀳𑁄 𑀳𑁄𑀢𑀻𑀢𑀺 𑀅𑀯𑀺𑀚𑁆𑀚𑁄𑀖𑀲𑁆𑀲 𑀥𑀫𑁆𑀫𑀸, 𑀢𑀲𑁆𑀫𑀸 𑀢𑁂𑀲𑀼 𑀢𑁂𑀲𑀁 𑀧𑀳𑀸𑀦𑀢𑁆𑀣𑀁 𑀘𑀢𑁆𑀢𑀸𑀭𑁄𑀯 𑀯𑀼𑀢𑁆𑀢𑀸, 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀧𑀝𑀺𑀖𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺 𑀤𑀼𑀓𑁆𑀔𑀤𑀼𑀓𑁆𑀔𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀲𑀗𑁆𑀔𑀸𑀭𑀤𑀼𑀓𑁆𑀔𑀪𑀽𑀢𑀸 𑀯𑁂𑀤𑀦𑀸 𑀯𑀺𑀲𑁂𑀲𑁂𑀦 𑀩𑁆𑀬𑀸𑀧𑀸𑀤𑀓𑀸𑀬𑀕𑀦𑁆𑀣𑀲𑁆𑀲 𑀯𑀢𑁆𑀣𑀼, 𑀘𑀺𑀢𑁆𑀢𑁂 𑀦𑀺𑀘𑁆𑀘𑀕𑁆𑀕𑀳𑀡𑀯𑀲𑁂𑀦 𑀲𑀲𑁆𑀲𑀢𑀲𑁆𑀲 𑀅𑀢𑁆𑀢𑀦𑁄 𑀲𑀻𑀮𑁂𑀦 𑀲𑀼𑀤𑁆𑀥𑀻𑀢𑀺𑀆𑀤𑀺𑀧𑀭𑀸𑀫𑀲𑀦𑀁 𑀳𑁄𑀢𑀻𑀢𑀺 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀲𑁆𑀲 𑀘𑀺𑀢𑁆𑀢𑀁, 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁂𑀦 𑀪𑀽𑀢𑀁 𑀪𑀽𑀢𑀢𑁄 𑀅𑀧𑀲𑁆𑀲𑀦𑁆𑀢𑀲𑁆𑀲 𑀪𑀯𑀯𑀺𑀪𑀯𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑁄 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄 𑀳𑁄𑀢𑀻𑀢𑀺 𑀢𑀲𑁆𑀲 𑀥𑀫𑁆𑀫𑀸…𑀧𑁂… 𑀲𑀼𑀔𑀯𑁂𑀤𑀦𑀸𑀲𑁆𑀲𑀸𑀤𑀯𑀲𑁂𑀦 𑀧𑀭𑀮𑁄𑀓𑀦𑀺𑀭𑀧𑁂𑀓𑁆𑀔𑁄 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀧𑀭𑀸𑀫𑀸𑀲𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀤𑀺𑀝𑁆𑀞𑀼𑀧𑀸𑀤𑀸𑀦𑀲𑁆𑀲 𑀯𑁂𑀤𑀦𑀸. 𑀲𑀦𑁆𑀢𑀢𑀺𑀖𑀦𑀕𑁆𑀕𑀳𑀡𑀯𑀲𑁂𑀦 𑀲𑀭𑀸𑀕𑀸𑀤𑀺𑀘𑀺𑀢𑁆𑀢𑁂 𑀲𑀫𑁆𑀫𑁄𑀳𑁄 𑀳𑁄𑀢𑀻𑀢𑀺 𑀫𑁄𑀳𑀸𑀕𑀢𑀺𑀬𑀸 𑀘𑀺𑀢𑁆𑀢𑀁, 𑀥𑀫𑁆𑀫𑀲𑀪𑀸𑀯𑀸𑀦𑀯𑀩𑁄𑀥𑁂𑀦 𑀪𑀬𑀁 𑀳𑁄𑀢𑀻𑀢𑀺 𑀪𑀬𑀸𑀕𑀢𑀺𑀬𑀸 𑀥𑀫𑁆𑀫𑀸…𑀧𑁂… 𑀅𑀯𑀼𑀢𑁆𑀢𑀸𑀦𑀁 𑀯𑀼𑀢𑁆𑀢𑀦𑀬𑁂𑀦 𑀯𑀢𑁆𑀣𑀼𑀪𑀸𑀯𑁄 𑀬𑁄𑀚𑁂𑀢𑀩𑁆𑀩𑁄.

‘‘𑀆𑀳𑀸𑀭𑀲𑀫𑀼𑀤𑀬𑀸 𑀓𑀸𑀬𑀲𑀫𑀼𑀤𑀬𑁄, 𑀨𑀲𑁆𑀲𑀲𑀫𑀼𑀤𑀬𑀸 𑀯𑁂𑀤𑀦𑀸𑀲𑀫𑀼𑀤𑀬𑁄 (𑀲𑀁. 𑀦𑀺. 𑁫.𑁪𑁦𑁮), 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺 (𑀫. 𑀦𑀺. 𑁩.𑁧𑁨𑁬; 𑀲𑀁. 𑀦𑀺. 𑁨.𑁧; 𑀉𑀤𑀸. 𑁧) 𑀯𑀘𑀦𑀢𑁄 𑀓𑀸𑀬𑀸𑀤𑀻𑀦𑀁 𑀲𑀫𑀼𑀤𑀬𑀪𑀽𑀢𑀸 𑀓𑀩𑀴𑀻𑀓𑀸𑀭𑀸𑀳𑀸𑀭𑀨𑀲𑁆𑀲𑀫𑀦𑁄𑀲𑀜𑁆𑀘𑁂𑀢𑀦𑀸𑀯𑀺𑀜𑁆𑀜𑀸𑀡𑀸𑀳𑀸𑀭𑀸 𑀓𑀸𑀬𑀸𑀤𑀺𑀧𑀭𑀺𑀚𑀸𑀦𑀦𑁂𑀦 𑀧𑀭𑀺𑀜𑁆𑀜𑀸𑀢𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀘𑀢𑀼𑀩𑁆𑀩𑀺𑀥𑀸𑀳𑀸𑀭𑀧𑀭𑀺𑀜𑁆𑀜𑀢𑁆𑀣’’𑀦𑁆𑀢𑀺. 𑀧𑀓𑀭𑀡𑀦𑀬𑁄𑀢𑀺 𑀢𑀫𑁆𑀩𑀧𑀡𑁆𑀡𑀺𑀪𑀸𑀲𑀸𑀬 𑀯𑀡𑁆𑀡𑀦𑀸𑀦𑀬𑁄. 𑀦𑁂𑀢𑁆𑀢𑀺𑀧𑁂𑀝𑀓𑀧𑁆𑀧𑀓𑀭𑀡𑁂 𑀥𑀫𑁆𑀫𑀓𑀣𑀺𑀓𑀸𑀦𑀁 𑀬𑁄𑀚𑀦𑀸𑀦𑀬𑁄𑀢𑀺𑀧𑀺 𑀯𑀤𑀦𑁆𑀢𑀺.

𑀲𑀭𑀡𑀯𑀲𑁂𑀦𑀸𑀢𑀺 𑀓𑀸𑀬𑀸𑀤𑀻𑀦𑀁 𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀜𑁆𑀘 𑀥𑀸𑀭𑀡𑀢𑀸𑀯𑀲𑁂𑀦. 𑀲𑀭𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀏𑀢𑀸𑀬𑀸𑀢𑀺 𑀲𑀢𑀻𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀏𑀓𑀢𑁆𑀢𑁂 𑀦𑀺𑀩𑁆𑀩𑀸𑀦𑁂 𑀲𑀫𑀸𑀕𑀫𑁄 𑀏𑀓𑀢𑁆𑀢𑀲𑀫𑁄𑀲𑀭𑀡𑀁. 𑀏𑀢𑀤𑁂𑀯 𑀳𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀏𑀓𑀦𑀺𑀩𑁆𑀩𑀸𑀦𑀧𑁆𑀧𑀯𑁂𑀲𑀳𑁂𑀢𑀼𑀪𑀽𑀢𑁄 𑀯𑀸 𑀲𑀫𑀸𑀦𑀢𑀸𑀬 𑀏𑀓𑁄 𑀲𑀢𑀺𑀧𑀝𑁆𑀞𑀸𑀦𑀲𑀪𑀸𑀯𑁄 ¶ ¶ 𑀏𑀓𑀢𑁆𑀢𑀁, 𑀢𑀢𑁆𑀣 𑀲𑀫𑁄𑀲𑀭𑀡𑀁 𑀢𑀁𑀲𑀪𑀸𑀕𑀢𑀸 𑀏𑀓𑀢𑁆𑀢𑀲𑀫𑁄𑀲𑀭𑀡𑀁. 𑀏𑀓𑀦𑀺𑀩𑁆𑀩𑀸𑀦𑀧𑁆𑀧𑀯𑁂𑀲𑀳𑁂𑀢𑀼𑀪𑀸𑀯𑀁 𑀧𑀦 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀲𑀭𑀡𑁂𑀓𑀢𑁆𑀢𑀲𑀫𑁄𑀲𑀭𑀡𑀸𑀦𑀺 𑀲𑀳 𑀲𑀢𑀺𑀧𑀝𑁆𑀞𑀸𑀦𑁂𑀓𑀪𑀸𑀯𑀲𑁆𑀲 𑀓𑀸𑀭𑀡𑀢𑁆𑀢𑁂𑀦 𑀯𑀼𑀢𑁆𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀺, 𑀧𑀼𑀭𑀺𑀫𑀲𑁆𑀫𑀺𑀁 𑀯𑀺𑀲𑀼𑀁. 𑀲𑀭𑀡𑀯𑀲𑁂𑀦𑀸𑀢𑀺 𑀯𑀸 𑀕𑀫𑀦𑀯𑀲𑁂𑀦𑀸𑀢𑀺 𑀅𑀢𑁆𑀣𑁂 𑀲𑀢𑀺 𑀢𑀤𑁂𑀯 𑀕𑀫𑀦𑀁 𑀲𑀫𑁄𑀲𑀭𑀡𑀦𑁆𑀢𑀺 𑀲𑀫𑁄𑀲𑀭𑀡𑁂 𑀯𑀸 𑀲𑀢𑀺-𑀲𑀤𑁆𑀤𑀢𑁆𑀣𑀯𑀲𑁂𑀦 𑀅𑀯𑀼𑀘𑁆𑀘𑀫𑀸𑀦𑁂 𑀥𑀸𑀭𑀡𑀢𑀸𑀯 𑀲𑀢𑀻𑀢𑀺 𑀲𑀢𑀺-𑀲𑀤𑁆𑀤𑀢𑁆𑀣𑀦𑁆𑀢𑀭𑀸𑀪𑀸𑀯𑀸 𑀧𑀼𑀭𑀺𑀫𑀁 𑀲𑀢𑀺𑀪𑀸𑀯𑀲𑁆𑀲 𑀓𑀸𑀭𑀡𑀁, 𑀧𑀘𑁆𑀙𑀺𑀫𑀁 𑀏𑀓𑀪𑀸𑀯𑀲𑁆𑀲𑀸𑀢𑀺 𑀦𑀺𑀩𑁆𑀩𑀸𑀦𑀲𑀫𑁄𑀲𑀭𑀡𑁂𑀧𑀺 𑀲𑀳𑀺𑀢𑀸𑀦𑁂𑀯 𑀢𑀸𑀦𑀺 𑀲𑀢𑀺𑀧𑀝𑁆𑀞𑀸𑀦𑁂𑀓𑀪𑀸𑀯𑀲𑁆𑀲 𑀓𑀸𑀭𑀡𑀸𑀦𑀺.

𑀘𑀼𑀤𑁆𑀤𑀲𑀯𑀺𑀥𑁂𑀦𑀸𑀢𑀺 𑀇𑀤𑀁 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑁂 (𑀤𑀻. 𑀦𑀺. 𑁨.𑁩𑁭𑁨 𑀆𑀤𑀬𑁄; 𑀫. 𑀦𑀺. 𑁧.𑁧𑁦𑁫 𑀆𑀤𑀬𑁄) 𑀯𑀼𑀢𑁆𑀢𑀸𑀦𑀁 𑀆𑀦𑀸𑀧𑀸𑀦𑀧𑀩𑁆𑀩𑀸𑀤𑀻𑀦𑀁 𑀯𑀲𑁂𑀦. 𑀢𑀣𑀸 𑀧𑀜𑁆𑀘𑀯𑀺𑀥𑁂𑀦 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀦𑁆𑀢𑀺 𑀏𑀢𑁆𑀣𑀸𑀧𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣 𑀘 𑀉𑀝𑁆𑀞𑀸𑀦𑀓𑀪𑀡𑁆𑀟𑀲𑀤𑀺𑀲𑀢𑀸 𑀢𑀁𑀢𑀁𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀦𑀼𑀪𑀸𑀯𑀲𑁆𑀲 𑀤𑀝𑁆𑀞𑀩𑁆𑀩𑀸. 𑀪𑀺𑀓𑁆𑀔𑀼𑀕𑁄𑀘𑀭𑀸 𑀳𑀺 𑀏𑀢𑁂. 𑀯𑀼𑀢𑁆𑀢𑀜𑁆𑀳𑀺 ‘‘𑀕𑁄𑀘𑀭𑁂, 𑀪𑀺𑀓𑁆𑀔𑀯𑁂, 𑀘𑀭𑀣 𑀲𑀓𑁂 𑀧𑁂𑀢𑁆𑀢𑀺𑀓𑁂 𑀯𑀺𑀲𑀬𑁂’’𑀢𑀺𑀆𑀤𑀺 (𑀲𑀁. 𑀦𑀺. 𑁫.𑁩𑁭𑁨; 𑀤𑀻. 𑀦𑀺. 𑁩.𑁮𑁦).

𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀧𑀝𑀺𑀧𑀢𑁆𑀢𑀺𑀬𑀸 𑀪𑀺𑀓𑁆𑀔𑀼 𑀳𑁄𑀢𑀻𑀢𑀺 𑀪𑀺𑀓𑁆𑀔𑀼𑀁 ‘‘𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀻’’𑀢𑀺𑀆𑀤𑀺𑀦𑀸 𑀤𑀲𑁆𑀲𑁂𑀢𑀺 𑀪𑀺𑀓𑁆𑀔𑀼𑀫𑁆𑀳𑀺 𑀢𑀁𑀦𑀺𑀬𑀫𑀢𑁄. 𑀢𑁂𑀦𑀸𑀳 ‘‘𑀧𑀝𑀺𑀧𑀢𑁆𑀢𑀺𑀬𑀸 𑀯𑀸 𑀪𑀺𑀓𑁆𑀔𑀼𑀪𑀸𑀯𑀤𑀲𑁆𑀲𑀦𑀢𑁄’’𑀢𑀺.

𑀲𑀫𑀁 𑀘𑀭𑁂𑀬𑁆𑀬𑀸𑀢𑀺 𑀓𑀸𑀬𑀸𑀤𑀺𑀯𑀺𑀲𑀫𑀘𑀭𑀺𑀬𑀁 𑀧𑀳𑀸𑀬 𑀓𑀸𑀬𑀸𑀤𑀻𑀳𑀺 𑀲𑀫𑀁 𑀘𑀭𑁂𑀬𑁆𑀬. 𑀭𑀸𑀕𑀸𑀤𑀺𑀯𑀽𑀧𑀲𑀫𑁂𑀦 𑀲𑀦𑁆𑀢𑁄, 𑀇𑀦𑁆𑀤𑁆𑀭𑀺𑀬𑀤𑀫𑀦𑁂𑀦 𑀤𑀦𑁆𑀢𑁄, 𑀘𑀢𑀼𑀫𑀕𑁆𑀕𑀦𑀺𑀬𑀫𑁂𑀦 𑀦𑀺𑀬𑀢𑁄, 𑀲𑁂𑀝𑁆𑀞𑀘𑀸𑀭𑀺𑀢𑀸𑀬 𑀩𑁆𑀭𑀳𑁆𑀫𑀘𑀸𑀭𑀻. 𑀓𑀸𑀬𑀤𑀡𑁆𑀟𑀸𑀤𑀺𑀑𑀭𑁄𑀧𑀦𑁂𑀦 𑀦𑀺𑀥𑀸𑀬 𑀤𑀡𑁆𑀟𑀁. 𑀲𑁄 𑀏𑀯𑀭𑀽𑀧𑁄 𑀩𑀸𑀳𑀺𑀢𑀧𑀸𑀧𑀲𑀫𑀺𑀢𑀧𑀸𑀧𑀪𑀺𑀦𑁆𑀦𑀓𑀺𑀮𑁂𑀲𑀢𑀸𑀳𑀺 𑀩𑁆𑀭𑀸𑀳𑁆𑀫𑀡𑀸𑀤𑀺𑀲𑀫𑀜𑁆𑀜𑁄 𑀯𑁂𑀤𑀺𑀢𑀩𑁆𑀩𑁄.

𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀉𑀤𑁆𑀤𑁂𑀲𑀯𑀡𑁆𑀡𑀦𑀸

𑀅𑀲𑀫𑁆𑀫𑀺𑀲𑁆𑀲𑀢𑁄𑀢𑀺 𑀯𑁂𑀤𑀦𑀸𑀤𑀬𑁄𑀧𑀺 𑀏𑀢𑁆𑀣 𑀲𑀺𑀢𑀸, 𑀏𑀢𑁆𑀣 𑀧𑀝𑀺𑀩𑀤𑁆𑀥𑀸𑀢𑀺 𑀓𑀸𑀬𑁂 𑀯𑁂𑀤𑀦𑀸𑀤𑀺𑀅𑀦𑀼𑀧𑀲𑁆𑀲𑀦𑀸𑀧𑀲𑀗𑁆𑀕𑁂𑀧𑀺 𑀆𑀧𑀦𑁆𑀦𑁂 𑀢𑀤𑀫𑀺𑀲𑁆𑀲𑀢𑁄𑀢𑀺 𑀅𑀢𑁆𑀣𑁄. 𑀅𑀯𑀬𑀯𑀻𑀕𑀸𑀳𑀲𑀫𑀜𑁆𑀜𑀸𑀢𑀺𑀥𑀸𑀯𑀦𑀲𑀸𑀭𑀸𑀤𑀸𑀦𑀸𑀪𑀺𑀦𑀺𑀯𑁂𑀲𑀦𑀺𑀲𑁂𑀥𑀦𑀢𑁆𑀣𑀁 𑀓𑀸𑀬𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑁂𑀳𑀺, 𑀢𑀸𑀦𑀺 𑀘 𑀓𑁂𑀲𑀸𑀤𑀻𑀳𑀺, 𑀓𑁂𑀲𑀸𑀤𑀺𑀓𑁂 𑀘 𑀪𑀽𑀢𑀼𑀧𑀸𑀤𑀸𑀬𑀭𑀽𑀧𑁂𑀳𑀺 ¶ 𑀯𑀺𑀦𑀺𑀩𑁆𑀪𑀼𑀚𑁆𑀚𑀦𑁆𑀢𑁄 ¶ ‘‘𑀢𑀣𑀸 𑀦 𑀓𑀸𑀬𑁂’’𑀢𑀺𑀆𑀤𑀺𑀫𑀸𑀳. 𑀧𑀸𑀲𑀸𑀤𑀸𑀤𑀺𑀦𑀕𑀭𑀸𑀯𑀬𑀯𑀲𑀫𑀽𑀳𑁂 𑀅𑀯𑀬𑀯𑀻𑀯𑀸𑀤𑀺𑀦𑁄𑀧𑀺 𑀅𑀯𑀬𑀯𑀻𑀕𑀸𑀳𑀁 𑀦 𑀓𑀭𑁄𑀦𑁆𑀢𑀺. 𑀦𑀕𑀭𑀁 𑀦𑀸𑀫 𑀓𑁄𑀘𑀺 𑀅𑀢𑁆𑀣𑁄 𑀅𑀢𑁆𑀣𑀻𑀢𑀺 𑀧𑀦 𑀓𑁂𑀲𑀜𑁆𑀘𑀺 𑀲𑀫𑀜𑁆𑀜𑀸𑀢𑀺𑀥𑀸𑀯𑀦𑀁 𑀲𑀺𑀬𑀸𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀲𑀫𑀜𑁆𑀜𑀸𑀢𑀺𑀥𑀸𑀯𑀦𑁂 𑀦𑀕𑀭𑀦𑀺𑀤𑀲𑁆𑀲𑀦𑀁 𑀯𑀼𑀢𑁆𑀢𑀁.

𑀬𑀁 𑀧𑀲𑁆𑀲𑀢𑀺 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸, 𑀦𑀦𑀼 𑀘𑀓𑁆𑀔𑀼𑀦𑀸 𑀇𑀢𑁆𑀣𑀺𑀧𑀼𑀭𑀺𑀲𑀤𑀲𑁆𑀲𑀦𑀁 𑀦𑀢𑁆𑀣𑀻𑀢𑀺? 𑀲𑀘𑁆𑀘𑀁 𑀦𑀢𑁆𑀣𑀺, ‘‘𑀇𑀢𑁆𑀣𑀺𑀁 𑀧𑀲𑁆𑀲𑀸𑀫𑀺, 𑀧𑀼𑀭𑀺𑀲𑀁 𑀧𑀲𑁆𑀲𑀸𑀫𑀻’’𑀢𑀺 𑀧𑀦 𑀧𑀯𑀢𑁆𑀢𑀲𑀜𑁆𑀜𑀸𑀬 𑀯𑀲𑁂𑀦 ‘‘𑀬𑀁 𑀧𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀫𑀺𑀘𑁆𑀙𑀸𑀤𑀲𑁆𑀲𑀦𑁂 𑀯𑀸 𑀤𑀺𑀝𑁆𑀞𑀺𑀬𑀸 𑀬𑀁 𑀧𑀲𑁆𑀲𑀢𑀺, 𑀦 𑀢𑀁 𑀤𑀺𑀝𑁆𑀞𑀁, 𑀢𑀁 𑀭𑀽𑀧𑀸𑀬𑀢𑀦𑀁 𑀦 𑀳𑁄𑀢𑀺, 𑀭𑀽𑀧𑀸𑀬𑀢𑀦𑀁 𑀯𑀸 𑀢𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀢𑀁 𑀓𑁂𑀲𑀸𑀤𑀺𑀪𑀽𑀢𑀼𑀧𑀸𑀤𑀸𑀬𑀲𑀫𑀽𑀳𑀲𑀗𑁆𑀔𑀸𑀢𑀁 𑀤𑀺𑀝𑁆𑀞𑀁 𑀦 𑀳𑁄𑀢𑀺, 𑀤𑀺𑀝𑁆𑀞𑀁 𑀯𑀸 𑀬𑀣𑀸𑀯𑀼𑀢𑁆𑀢𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀬𑀁 𑀤𑀺𑀝𑁆𑀞𑀁 𑀢𑀁 𑀦 𑀧𑀲𑁆𑀲𑀢𑀻𑀢𑀺 𑀬𑀁 𑀭𑀽𑀧𑀸𑀬𑀢𑀦𑀁, 𑀓𑁂𑀲𑀸𑀤𑀺𑀪𑀽𑀢𑀼𑀧𑀸𑀤𑀸𑀬𑀲𑀫𑀽𑀳𑀲𑀗𑁆𑀔𑀸𑀢𑀁 𑀯𑀸 𑀤𑀺𑀝𑁆𑀞𑀁, 𑀢𑀁 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀪𑀽𑀢𑀢𑁄 𑀦 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑀦 𑀅𑀜𑁆𑀜𑀥𑀫𑁆𑀫𑀸𑀦𑀼𑀧𑀲𑁆𑀲𑀻𑀢𑀺 𑀦 𑀅𑀜𑁆𑀜𑀲𑀪𑀸𑀯𑀸𑀦𑀼𑀧𑀲𑁆𑀲𑀻, 𑀅𑀲𑀼𑀪𑀸𑀤𑀺𑀢𑁄 𑀅𑀜𑁆𑀜𑀸𑀓𑀸𑀭𑀸𑀦𑀼𑀧𑀲𑁆𑀲𑀻 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀣𑀯𑀻𑀓𑀸𑀬𑀦𑁆𑀢𑀺 𑀓𑁂𑀲𑀸𑀤𑀺𑀧𑀣𑀯𑀺𑀁 𑀥𑀫𑁆𑀫𑀲𑀫𑀽𑀳𑀢𑁆𑀢𑀸 𑀓𑀸𑀬𑁄𑀢𑀺 𑀯𑀤𑀢𑀺, 𑀮𑀓𑁆𑀔𑀡𑀧𑀣𑀯𑀺𑀫𑁂𑀯 𑀯𑀸 𑀅𑀦𑁂𑀓𑀧𑁆𑀧𑀪𑁂𑀤𑀲𑀓𑀮𑀲𑀭𑀻𑀭𑀕𑀢𑀁 𑀧𑀼𑀩𑁆𑀩𑀸𑀧𑀭𑀺𑀬𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀁 𑀲𑀫𑀽𑀳𑀯𑀲𑁂𑀦 𑀕𑀳𑁂𑀢𑁆𑀯𑀸 𑀓𑀸𑀬𑁄𑀢𑀺 𑀯𑀤𑀢𑀺, 𑀏𑀯𑀁 𑀅𑀜𑁆𑀜𑀢𑁆𑀣𑀸𑀧𑀺.

𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀢𑀺 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀥𑀫𑁆𑀫𑀸𑀦𑀁 𑀖𑀝𑀺𑀢𑀸𑀭𑀫𑁆𑀫𑀡𑀁 𑀏𑀓𑀢𑁄 𑀆𑀭𑀫𑁆𑀫𑀡𑀪𑀸𑀯𑁄 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀥𑀫𑁆𑀫𑀸 𑀯𑀸 𑀖𑀝𑀺𑀢𑀸𑀭𑀫𑁆𑀫𑀡𑀁 𑀇𑀤𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀢𑀻𑀲𑀼 𑀪𑀯𑁂𑀲𑀼 𑀓𑀺𑀮𑁂𑀲𑀸𑀦𑀦𑁆𑀢𑀺 𑀪𑀯𑀢𑁆𑀢𑀬𑀯𑀺𑀲𑀬𑀸𑀦𑀁 𑀓𑀺𑀮𑁂𑀲𑀸𑀦𑀦𑁆𑀢𑀺 𑀅𑀢𑁆𑀣𑁄.

𑀲𑀩𑁆𑀩𑀢𑁆𑀣𑀺𑀓𑀦𑁆𑀢𑀺 𑀲𑀩𑁆𑀩𑀢𑁆𑀣 𑀪𑀯𑀁. 𑀲𑀩𑁆𑀩𑀲𑁆𑀫𑀺𑀁 𑀮𑀻𑀦𑁂 𑀉𑀤𑁆𑀥𑀝𑁂 𑀘 𑀘𑀺𑀢𑁆𑀢𑁂 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸, 𑀲𑀩𑁆𑀩𑁂 𑀯𑀸 𑀮𑀻𑀦𑁂 𑀉𑀤𑁆𑀥𑀝𑁂 𑀘 𑀪𑀸𑀯𑁂𑀢𑀩𑁆𑀩𑀸 𑀩𑁄𑀚𑁆𑀛𑀗𑁆𑀕𑀸 𑀅𑀢𑁆𑀣𑀺𑀓𑀸 𑀏𑀢𑀸𑀬𑀸𑀢𑀺 𑀲𑀩𑁆𑀩𑀢𑁆𑀣𑀺𑀓𑀸. 𑀅𑀦𑁆𑀢𑁄𑀲𑀗𑁆𑀔𑁂𑀧𑁄𑀢𑀺 𑀅𑀦𑁆𑀢𑁄𑀑𑀮𑀻𑀬𑀦𑀸 𑀓𑁄𑀲𑀚𑁆𑀚𑀦𑁆𑀢𑀺 𑀅𑀢𑁆𑀣𑁄.

𑀅𑀯𑀺𑀲𑁂𑀲𑁂𑀦 𑀤𑁆𑀯𑀻𑀳𑀺𑀧𑀺 𑀦𑀻𑀯𑀭𑀡𑀧𑁆𑀧𑀳𑀸𑀦𑀁 𑀯𑀼𑀢𑁆𑀢𑀦𑁆𑀢𑀺 𑀓𑀢𑁆𑀯𑀸 𑀧𑀼𑀦 𑀏𑀓𑁂𑀓𑁂𑀦 𑀯𑀼𑀢𑁆𑀢𑀧𑁆𑀧𑀳𑀸𑀦𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀲𑁂𑀲𑁂𑀦𑀸’’𑀢𑀺 𑀆𑀳, ‘‘𑀯𑀺𑀦𑁂𑀬𑁆𑀬 𑀦𑀻𑀯𑀭𑀡𑀸𑀦𑀻’’𑀢𑀺 𑀅𑀯𑀢𑁆𑀯𑀸 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀯𑀺𑀦𑀬𑀲𑁆𑀲 𑀯𑀸 𑀧𑀬𑁄𑀚𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀲𑁂𑀲𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀪𑀸𑀯𑀦𑀸𑀬 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀸𑀦𑀁 𑀅𑀦𑀼𑀭𑁄𑀥𑀯𑀺𑀭𑁄𑀥𑀸𑀤𑀻𑀦𑀁 ¶ 𑀧𑀳𑀸𑀦𑀤𑀲𑁆𑀲𑀦𑀜𑁆𑀳𑀺 𑀏𑀢𑀲𑁆𑀲 𑀧𑀬𑁄𑀚𑀦𑀦𑁆𑀢𑀺. 𑀓𑀸𑀬𑀪𑀸𑀯𑀦𑀸𑀬𑀸𑀢𑀺 ¶ 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀪𑀸𑀯𑀦𑀸 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀦𑀸𑀢𑀺 𑀅𑀦𑀼𑀭𑁄𑀥𑀸𑀤𑀺𑀧𑁆𑀧𑀳𑀸𑀦𑀯𑀘𑀦𑁂𑀦.

𑀲𑀩𑁆𑀩𑀢𑁆𑀣𑀺𑀓𑀓𑀫𑁆𑀫𑀝𑁆𑀞𑀸𑀦𑀁 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺 𑀫𑁂𑀢𑁆𑀢𑀸 𑀫𑀭𑀡𑀲𑁆𑀲𑀢𑀺 𑀅𑀲𑀼𑀪𑀪𑀸𑀯𑀦𑀸 𑀘. 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀏𑀢𑁂𑀦 𑀬𑁄𑀕𑀺𑀦𑀸 𑀧𑀭𑀺𑀳𑀭𑀺𑀬𑀫𑀸𑀦𑀁 𑀢𑀁 𑀲𑀩𑁆𑀩𑀢𑁆𑀣𑀺𑀓𑀓𑀫𑁆𑀫𑀝𑁆𑀞𑀸𑀦𑀁 𑀯𑀼𑀢𑁆𑀢𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑀩𑀮𑁂𑀦 𑀅𑀯𑀺𑀘𑁆𑀙𑀺𑀦𑁆𑀦𑀲𑁆𑀲 𑀢𑀲𑁆𑀲 𑀧𑀭𑀺𑀳𑀭𑀺𑀢𑀩𑁆𑀩𑀢𑁆𑀢𑀸, 𑀲𑀢𑀺𑀬𑀸 𑀯𑀸 𑀲𑀫𑀣𑁄 𑀯𑀼𑀢𑁆𑀢𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑀲𑀗𑁆𑀕𑀳𑀺𑀢𑀢𑁆𑀢𑀸.

𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀉𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀤𑀺𑀉𑀤𑁆𑀤𑁂𑀲𑀯𑀡𑁆𑀡𑀦𑀸

𑀓𑁂𑀯𑀮𑀁 𑀧𑀦𑀺𑀥𑀸𑀢𑀺𑀆𑀤𑀺𑀦𑀸 𑀇𑀥 𑀏𑀢𑁆𑀢𑀓𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁 𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑀺. 𑀅𑀤𑁆𑀤𑀫𑀤𑀓𑁆𑀔𑀻𑀢𑀺 𑀤𑁆𑀯𑁂𑀧𑀺 𑀏𑀓𑀢𑁆𑀣𑀸. 𑀲𑀫𑁆𑀫𑀤𑁆𑀤𑀲𑁄𑀢𑀺 𑀲𑀫𑁆𑀫𑀸 𑀧𑀲𑁆𑀲𑀓𑁄.

𑀲𑀼𑀔𑀤𑀼𑀓𑁆𑀔𑀢𑁄𑀧𑀺 𑀘𑀸𑀢𑀺 𑀲𑀼𑀔𑀸𑀤𑀻𑀦𑀁 𑀞𑀺𑀢𑀺𑀯𑀺𑀧𑀭𑀺𑀡𑀸𑀫𑀜𑀸𑀡𑀲𑀼𑀔𑀢𑀸𑀬, 𑀯𑀺𑀧𑀭𑀺𑀡𑀸𑀫𑀝𑁆𑀞𑀺𑀢𑀺𑀅𑀜𑁆𑀜𑀸𑀡𑀤𑀼𑀓𑁆𑀔𑀢𑀸𑀬 𑀘 𑀯𑀼𑀢𑁆𑀢𑀢𑁆𑀢𑀸 𑀢𑀺𑀲𑁆𑀲𑁄𑀧𑀺 𑀘 𑀲𑀼𑀔𑀢𑁄 𑀢𑀺𑀲𑁆𑀲𑁄𑀧𑀺 𑀘 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄.

𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀙𑀦𑁆𑀤𑀸𑀤𑀺𑀅𑀥𑀺𑀧𑀢𑀺𑀜𑀸𑀡𑀸𑀤𑀺𑀲𑀳𑀚𑀸𑀢𑀓𑀸𑀫𑀸𑀯𑀘𑀭𑀸𑀤𑀺𑀪𑀽𑀫𑀺𑀦𑀸𑀦𑀢𑁆𑀢𑀪𑁂𑀤𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀢𑀩𑁆𑀩𑀺𑀧𑀸𑀓𑀓𑀺𑀭𑀺𑀬𑀸𑀦𑀸𑀦𑀢𑁆𑀢𑀪𑁂𑀤𑀲𑁆𑀲 𑀘 𑀆𑀤𑀺-𑀲𑀤𑁆𑀤𑁂𑀦 𑀲𑀲𑀗𑁆𑀔𑀸𑀭𑀺𑀓𑀸𑀲𑀗𑁆𑀔𑀸𑀭𑀺𑀓𑀲𑀯𑀢𑁆𑀣𑀼𑀓𑀸𑀯𑀢𑁆𑀣𑀼𑀓𑀸𑀤𑀺𑀦𑀸𑀦𑀢𑁆𑀢𑀪𑁂𑀤𑀸𑀦𑀜𑁆𑀘 𑀯𑀲𑁂𑀦𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀲𑀼𑀜𑁆𑀜𑀢𑀸𑀥𑀫𑁆𑀫𑀲𑁆𑀲𑀸𑀢𑀺 ‘‘𑀥𑀫𑁆𑀫𑀸 𑀳𑁄𑀦𑁆𑀢𑀺, 𑀔𑀦𑁆𑀥𑀸 𑀳𑁄𑀦𑁆𑀢𑀻’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁨𑁧) 𑀲𑀼𑀜𑁆𑀜𑀢𑀸𑀯𑀸𑀭𑁂 𑀆𑀕𑀢𑀲𑀼𑀜𑁆𑀜𑀢𑀸𑀲𑀪𑀸𑀯𑀲𑁆𑀲 𑀯𑀲𑁂𑀦. 𑀓𑀸𑀫𑀜𑁆𑀘𑁂𑀢𑁆𑀣𑀸𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑁂 𑀧𑀳𑀻𑀦𑀢𑁆𑀢𑀸 𑀧𑀼𑀦 𑀧𑀳𑀸𑀦𑀁 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀘𑁄𑀤𑀦𑀁 𑀤𑀲𑁆𑀲𑁂𑀢𑀺, 𑀫𑀕𑁆𑀕𑀘𑀺𑀢𑁆𑀢𑀓𑁆𑀔𑀡𑁂 𑀯𑀸 𑀏𑀓𑀢𑁆𑀣 𑀧𑀳𑀻𑀦𑀁 𑀲𑀩𑁆𑀩𑀢𑁆𑀣 𑀧𑀳𑀻𑀦𑀁 𑀳𑁄𑀢𑀻𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺. 𑀢𑀢𑁆𑀣 𑀧𑀼𑀭𑀺𑀫𑀘𑁄𑀤𑀦𑀸𑀬 𑀦𑀸𑀦𑀸𑀧𑀼𑀕𑁆𑀕𑀮𑀧𑀭𑀺𑀳𑀸𑀭𑁄, 𑀧𑀘𑁆𑀙𑀺𑀫𑀸𑀬 𑀦𑀸𑀦𑀸𑀘𑀺𑀢𑁆𑀢𑀓𑁆𑀔𑀡𑀺𑀓𑀧𑀭𑀺𑀳𑀸𑀭𑁄. 𑀮𑁄𑀓𑀺𑀬𑀪𑀸𑀯𑀦𑀸𑀬 𑀳𑀺 𑀓𑀸𑀬𑁂 𑀧𑀳𑀻𑀦𑀁 𑀦 𑀯𑁂𑀤𑀦𑀸𑀤𑀻𑀲𑀼 𑀯𑀺𑀓𑁆𑀔𑀫𑁆𑀪𑀺𑀢𑀁 𑀳𑁄𑀢𑀺. 𑀬𑀤𑀺𑀧𑀺 𑀦 𑀧𑀯𑀢𑁆𑀢𑁂𑀬𑁆𑀬, 𑀦 𑀧𑀝𑀺𑀧𑀓𑁆𑀔𑀪𑀸𑀯𑀦𑀸𑀬 ¶ 𑀢𑀢𑁆𑀣 𑀲𑀸 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀲𑁆𑀲 𑀅𑀧𑁆𑀧𑀯𑀢𑁆𑀢𑀺 𑀳𑁄𑀢𑀻𑀢𑀺 𑀧𑀼𑀦 𑀢𑀧𑁆𑀧𑀳𑀸𑀦𑀁 𑀯𑀢𑁆𑀢𑀩𑁆𑀩𑀫𑁂𑀯𑀸𑀢𑀺. 𑀉𑀪𑀬𑀢𑁆𑀣 𑀯𑀸 𑀉𑀪𑀬𑀁 𑀲𑀫𑁆𑀪𑀯𑀢𑁄 𑀬𑁄𑀚𑁂𑀢𑀩𑁆𑀩𑀁. 𑀏𑀓𑀢𑁆𑀣 𑀧𑀳𑀻𑀦𑀁 ¶ 𑀲𑁂𑀲𑁂𑀲𑀼𑀧𑀺 𑀧𑀳𑀻𑀦𑀁 𑀳𑁄𑀢𑀻𑀢𑀺 𑀫𑀕𑁆𑀕𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀁, 𑀮𑁄𑀓𑀺𑀬𑀪𑀸𑀯𑀦𑀸𑀬 𑀯𑀸 𑀲𑀩𑁆𑀩𑀢𑁆𑀣 𑀅𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀧𑀜𑁆𑀘𑀧𑀺 𑀔𑀦𑁆𑀥𑀸 𑀮𑁄𑀓𑁄’’𑀢𑀺 𑀳𑀺 𑀘𑀢𑀽𑀲𑀼𑀧𑀺 𑀯𑀼𑀢𑁆𑀢𑀦𑁆𑀢𑀺.

𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀤𑀺𑀉𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩𑁫𑁬. 𑀲𑀩𑁆𑀩𑀧𑁆𑀧𑀓𑀸𑀭𑀯𑀘𑀦𑁂𑀦 𑀉𑀤𑁆𑀤𑁂𑀲𑁂 𑀤𑀲𑁆𑀲𑀺𑀢𑀸 𑀅𑀚𑁆𑀛𑀢𑁆𑀢𑀸𑀤𑀺𑀅𑀦𑀼𑀧𑀲𑁆𑀲𑀦𑀸 𑀧𑀓𑀸𑀭𑀸 𑀘 𑀕𑀳𑀺𑀢𑀸. 𑀢𑀢𑁆𑀣 𑀅𑀦𑁆𑀢𑁄𑀕𑀥𑀸 𑀘𑀼𑀤𑁆𑀤𑀲 𑀧𑀓𑀸𑀭𑀸, 𑀓𑀸𑀬𑀕𑀢𑀸𑀲𑀢𑀺𑀲𑀼𑀢𑁆𑀢𑁂 𑀯𑀼𑀢𑁆𑀢𑀸 𑀓𑁂𑀲𑀸𑀤𑀺𑀯𑀡𑁆𑀡𑀓𑀲𑀺𑀡𑀸𑀭𑀫𑁆𑀫𑀡𑀘𑀢𑀼𑀓𑁆𑀓𑀚𑁆𑀛𑀸𑀦𑀧𑁆𑀧𑀓𑀸𑀭𑀸, 𑀮𑁄𑀓𑀺𑀬𑀸𑀤𑀺𑀧𑁆𑀧𑀓𑀸𑀭𑀸 𑀘𑀸𑀢𑀺 𑀢𑁂𑀧𑀺 𑀕𑀳𑀺𑀢𑀸 𑀏𑀯. 𑀦𑀺𑀤𑁆𑀤𑁂𑀲𑁂 𑀳𑀺 𑀏𑀓𑀧𑁆𑀧𑀓𑀸𑀭𑀦𑀺𑀤𑁆𑀤𑁂𑀲𑁂𑀦 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀓𑀢𑀦𑁆𑀢𑀺, 𑀲𑀩𑁆𑀩𑀧𑁆𑀧𑀓𑀸𑀭𑀕𑁆𑀕𑀳𑀡𑀜𑁆𑀘 𑀩𑀸𑀳𑀺𑀭𑁂𑀲𑀼𑀧𑀺 𑀏𑀓𑀤𑁂𑀲𑀲𑀫𑁆𑀪𑀯𑀢𑁄 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀺𑀭𑀺𑀬𑀁 𑀢𑀘𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀏𑀢𑁆𑀣 𑀦𑀦𑀼 𑀓𑁂𑀲𑀮𑁄𑀫𑀦𑀔𑀸𑀦𑀁 𑀅𑀢𑀘𑀧𑀭𑀺𑀘𑁆𑀙𑀺𑀦𑁆𑀦𑀢𑀸 𑀢𑀘𑀲𑁆𑀲 𑀘 𑀅𑀢𑁆𑀣𑀻𑀢𑀺? 𑀬𑀤𑀺𑀧𑀺 𑀅𑀢𑁆𑀣𑀺, 𑀢𑀘𑀧𑀭𑀺𑀘𑁆𑀙𑀺𑀦𑁆𑀦𑀩𑀳𑀼𑀮𑀢𑀸𑀬 𑀧𑀦 𑀢𑀘𑀧𑀭𑀺𑀘𑁆𑀙𑀺𑀦𑁆𑀦𑀢𑀸 𑀦 𑀦 𑀳𑁄𑀢𑀺 𑀓𑀸𑀬𑀲𑁆𑀲𑀸𑀢𑀺 𑀏𑀯𑀁 𑀯𑀼𑀢𑁆𑀢𑀁. 𑀢𑀘𑁄 𑀧𑀭𑀺𑀬𑀦𑁆𑀢𑁄 𑀅𑀲𑁆𑀲𑀸𑀢𑀺 𑀢𑀘𑀧𑀭𑀺𑀬𑀦𑁆𑀢𑁄𑀢𑀺 𑀯𑀼𑀢𑁆𑀢𑁄𑀢𑀺 𑀏𑀢𑁂𑀦 𑀧𑀦 𑀯𑀘𑀦𑁂𑀦 𑀓𑀸𑀬𑁂𑀓𑀤𑁂𑀲𑀪𑀽𑀢𑁄 𑀢𑀘𑁄 𑀕𑀳𑀺𑀢𑁄 𑀏𑀯. 𑀢𑀧𑁆𑀧𑀝𑀺𑀩𑀤𑁆𑀥𑀸 𑀘 𑀓𑁂𑀲𑀸𑀤𑀬𑁄 𑀢𑀤𑀦𑀼𑀧𑀯𑀺𑀝𑁆𑀞𑀫𑀽𑀮𑀸 𑀢𑀘𑀧𑀭𑀺𑀬𑀦𑁆𑀢𑀸𑀯 𑀳𑁄𑀦𑁆𑀢𑀻𑀢𑀺 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀲𑀫𑀽𑀳𑁄 𑀲𑀩𑁆𑀩𑁄𑀧𑀺 𑀓𑀸𑀬𑁄 𑀢𑀘𑀧𑀭𑀺𑀬𑀦𑁆𑀢𑁄𑀢𑀺 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

‘‘𑀧𑀽𑀭𑀁 𑀦𑀸𑀦𑀧𑁆𑀧𑀓𑀸𑀭𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁, 𑀓𑁂 𑀧𑀦 𑀢𑁂 𑀧𑀓𑀸𑀭𑀸? 𑀬𑁂𑀳𑀺 𑀦𑀸𑀦𑀧𑁆𑀧𑀓𑀸𑀭𑀁 𑀅𑀲𑀼𑀘𑀺 𑀯𑀼𑀢𑁆𑀢𑀦𑁆𑀢𑀺 𑀓𑁂𑀲𑀸 𑀮𑁄𑀫𑀸𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀦𑁆𑀢𑁄 𑀆𑀳 ‘‘𑀏𑀢𑁂 𑀓𑁂𑀲𑀸𑀤𑀬𑁄 𑀆𑀓𑀸𑀭𑀸’’𑀢𑀺. 𑀆𑀓𑀸𑀭𑀸 𑀧𑀓𑀸𑀭𑀸𑀢𑀺 𑀳𑀺 𑀏𑀓𑁄 𑀅𑀢𑁆𑀣𑁄.

𑀦𑀺𑀲𑀺𑀦𑁆𑀦𑀲𑁆𑀲 ¶ 𑀬𑀸𑀯 𑀅𑀧𑀭𑀺𑀧𑁆𑀨𑀦𑁆𑀤𑀦𑀺𑀲𑀚𑁆𑀚𑀸𑀫𑀽𑀮𑀓𑀁 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀬𑀸𑀯𑀢𑀸 𑀉𑀝𑁆𑀞𑀸𑀢𑀺 𑀯𑀸, 𑀢𑀸𑀯 𑀏𑀓𑁄 𑀦𑀺𑀲𑀚𑁆𑀚𑀯𑀸𑀭𑁄. 𑀬𑁂𑀦 𑀯𑀺𑀥𑀺𑀦𑀸 𑀉𑀕𑁆𑀕𑀳𑁂 𑀓𑀼𑀲𑀮𑁄 𑀳𑁄𑀢𑀺, 𑀲𑁄 𑀲𑀢𑁆𑀢𑀯𑀺𑀥𑁄 𑀯𑀺𑀥𑀺 ‘‘𑀉𑀕𑁆𑀕𑀳𑀓𑁄𑀲𑀮𑁆𑀮’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀁𑀦𑀺𑀩𑁆𑀩𑀢𑁆𑀢𑀁 𑀯𑀸 𑀜𑀸𑀡𑀁.

𑀧𑀣𑀯𑀻𑀥𑀸𑀢𑀼𑀩𑀳𑀼𑀮𑀪𑀸𑀯𑀢𑁄 𑀫𑀢𑁆𑀣𑀮𑀼𑀗𑁆𑀕𑀲𑁆𑀲 𑀓𑀭𑀻𑀲𑀸𑀯𑀲𑀸𑀦𑁂 𑀢𑀦𑁆𑀢𑀺𑀆𑀭𑁄𑀧𑀦𑀫𑀸𑀳. 𑀏𑀢𑁆𑀣 𑀧𑀦 𑀫𑀁𑀲𑀁…𑀧𑁂… 𑀯𑀓𑁆𑀓𑀁…𑀧𑁂… 𑀓𑁂𑀲𑀸𑀢𑀺 𑀏𑀯𑀁 𑀯𑀓𑁆𑀓𑀧𑀜𑁆𑀘𑀓𑀸𑀤𑀻𑀲𑀼 ¶ 𑀅𑀦𑀼𑀮𑁄𑀫𑀲𑀚𑁆𑀛𑀸𑀬𑀁 𑀯𑀢𑁆𑀯𑀸 𑀧𑀝𑀺𑀮𑁄𑀫𑀲𑀚𑁆𑀛𑀸𑀬𑁄 𑀧𑀼𑀭𑀺𑀫𑁂𑀳𑀺 𑀲𑀫𑁆𑀩𑀦𑁆𑀥𑁄 𑀯𑀼𑀢𑁆𑀢𑁄. 𑀲𑁆𑀯𑀸𑀬𑀁 𑀬𑁂 𑀧𑀭𑀢𑁄 𑀯𑀺𑀲𑀼𑀁 𑀢𑀺𑀧𑀜𑁆𑀘𑀸𑀳𑀁, 𑀧𑀼𑀭𑀺𑀫𑁂𑀳𑀺 𑀏𑀓𑀢𑁄 𑀢𑀺𑀧𑀜𑁆𑀘𑀸𑀳𑀦𑁆𑀢𑀺 𑀙𑀧𑀜𑁆𑀘𑀸𑀳𑀁 𑀲𑀚𑁆𑀛𑀸𑀬𑀸 𑀯𑀓𑁆𑀔𑀫𑀸𑀦𑀸, 𑀢𑁂𑀲𑀼 𑀆𑀤𑀺𑀅𑀦𑁆𑀢𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀲𑀚𑁆𑀛𑀸𑀬𑁂𑀧𑀺 𑀳𑀺 𑀧𑀝𑀺𑀮𑁄𑀫𑀲𑀚𑁆𑀛𑀸𑀬𑁄 𑀅𑀦𑁆𑀢𑀺𑀫𑁄𑀢𑀺. 𑀲𑀚𑁆𑀛𑀸𑀬𑀧𑁆𑀧𑀓𑀸𑀭𑀦𑁆𑀢𑀭𑀁 𑀯𑀸 𑀏𑀢𑀫𑁆𑀧𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀳𑀢𑁆𑀣𑀲𑀗𑁆𑀔𑀮𑀺𑀓𑀸 𑀅𑀗𑁆𑀕𑀼𑀮𑀺𑀧𑀦𑁆𑀢𑀺. 𑀮𑀓𑁆𑀔𑀡𑀧𑀝𑀺𑀯𑁂𑀥𑀲𑁆𑀲𑀸𑀢𑀺 𑀅𑀲𑀼𑀪𑀮𑀓𑁆𑀔𑀡𑀧𑀝𑀺𑀯𑁂𑀥𑀲𑁆𑀲, 𑀥𑀸𑀢𑀼𑀮𑀓𑁆𑀔𑀡𑀧𑀝𑀺𑀯𑁂𑀥𑀲𑁆𑀲 𑀯𑀸.

𑀅𑀢𑁆𑀢𑀦𑁄 𑀪𑀸𑀕𑁄 𑀲𑀪𑀸𑀕𑁄, 𑀲𑀪𑀸𑀕𑁂𑀦 𑀧𑀭𑀺𑀘𑁆𑀙𑁂𑀤𑁄 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄, 𑀳𑁂𑀝𑁆𑀞𑀼𑀧𑀭𑀺𑀢𑀺𑀭𑀺𑀬𑀦𑁆𑀢𑁂𑀳𑀺 𑀲𑀓𑀓𑁄𑀝𑁆𑀞𑀸𑀲𑀺𑀓𑀓𑁂𑀲𑀦𑁆𑀢𑀭𑀸𑀤𑀻𑀳𑀺 𑀘 𑀧𑀭𑀺𑀘𑁆𑀙𑁂𑀤𑁄𑀢𑀺 𑀅𑀢𑁆𑀣𑁄.

𑀥𑀸𑀢𑀼𑀯𑀺𑀪𑀗𑁆𑀕𑁄 (𑀫. 𑀦𑀺. 𑁩.𑁩𑁪𑁨 𑀆𑀤𑀬𑁄) 𑀧𑀼𑀓𑁆𑀓𑀼𑀲𑀸𑀢𑀺𑀲𑀼𑀢𑁆𑀢𑀁. 𑀲𑀸𑀥𑀸𑀭𑀡𑀯𑀲𑁂𑀦𑀸𑀢𑀺 𑀏𑀢𑁆𑀢𑀓𑁂𑀦𑁂𑀯 𑀲𑀺𑀤𑁆𑀥𑁂 𑀲𑀩𑁆𑀩-𑀕𑁆𑀕𑀳𑀡𑀁 𑀯𑀡𑁆𑀡𑀓𑀲𑀺𑀡𑀯𑀲𑁂𑀦 𑀘𑀢𑀼𑀓𑁆𑀓𑀚𑁆𑀛𑀸𑀦𑀺𑀓𑀲𑀫𑀣𑀲𑀸𑀥𑀸𑀭𑀡𑀢𑁆𑀢𑀲𑁆𑀲 𑀘 𑀤𑀲𑁆𑀲𑀦𑀢𑁆𑀣𑀁.

𑀑𑀓𑁆𑀓𑀫𑀦𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀯𑀚𑁆𑀚𑁂𑀢𑀩𑁆𑀩𑁂 𑀫𑀕𑁆𑀕𑁂𑀢𑀺 𑀅𑀢𑁆𑀣𑁄. 𑀩𑀳𑀺𑀤𑁆𑀥𑀸 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑁂𑀢𑀺 𑀏𑀢𑁆𑀣 𑀓𑀸𑀬𑀸𑀦𑀼𑀧𑀲𑁆𑀲𑀦𑀁 𑀳𑀺𑀢𑁆𑀯𑀸 𑀲𑀼𑀪𑀸𑀤𑀺𑀯𑀲𑁂𑀦 𑀕𑀬𑁆𑀳𑀫𑀸𑀦𑀸 𑀓𑁂𑀲𑀸𑀤𑀬𑁄𑀧𑀺 𑀩𑀳𑀺𑀤𑁆𑀥𑀸 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑀸𑀦𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀉𑀓𑁆𑀓𑀼𑀝𑁆𑀞𑀼𑀓𑁆𑀓𑀝𑁆𑀞𑀺𑀝𑁆𑀞𑀸𑀦𑁂𑀬𑁂𑀯 𑀉𑀝𑁆𑀞𑀳𑀺𑀢𑁆𑀯𑀸𑀢𑀺 𑀧𑀼𑀩𑁆𑀩𑁂 𑀯𑀺𑀬 𑀏𑀓𑀢𑁆𑀣 𑀓𑀢𑀸𑀬 𑀉𑀓𑁆𑀓𑀼𑀝𑁆𑀞𑀺𑀬𑀸 𑀓𑀫𑁂𑀦 𑀲𑀩𑁆𑀩𑀢𑀸𑀮𑁂𑀲𑀼 𑀧𑀢𑀺𑀢𑁆𑀯𑀸 𑀉𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀬𑀦𑁆𑀢𑀢𑀸𑀮𑀁 𑀆𑀤𑀺𑀢𑀸𑀮𑀜𑁆𑀘 𑀅𑀕𑀦𑁆𑀢𑁆𑀯𑀸 𑀢𑀢𑁄 𑀢𑀢𑁄 𑀢𑀢𑁆𑀣 𑀢𑀢𑁆𑀣𑁂𑀯 𑀓𑀢𑀸𑀬 𑀉𑀓𑁆𑀓𑀼𑀝𑁆𑀞𑀺𑀬𑀸 𑀉𑀝𑁆𑀞𑀳𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀅𑀥𑀺𑀘𑀺𑀢𑁆𑀢𑀦𑁆𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀁. 𑀅𑀦𑀼𑀬𑀼𑀢𑁆𑀢𑁂𑀦𑀸𑀢𑀺 𑀬𑀼𑀢𑁆𑀢𑀧𑀬𑀼𑀢𑁆𑀢𑁂𑀦, 𑀪𑀸𑀯𑁂𑀦𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁 𑀉𑀧𑀮𑀓𑁆𑀔𑀡𑀸𑀓𑀸𑀭𑁄 𑀲𑀫𑀸𑀥𑀺𑀬𑁂𑀯. 𑀫𑀦𑀲𑀺 𑀓𑀸𑀢𑀩𑁆𑀩𑀦𑁆𑀢𑀺 𑀘𑀺𑀢𑁆𑀢𑁂 𑀓𑀸𑀢𑀩𑁆𑀩𑀁, 𑀉𑀧𑁆𑀧𑀸𑀤𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀲𑀫𑀸𑀥𑀺𑀓𑀸𑀭𑀡𑀁 𑀯𑀸 𑀆𑀭𑀫𑁆𑀫𑀡𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁 𑀆𑀯𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀞𑀸𑀦𑀁 𑀅𑀢𑁆𑀣𑀻𑀢𑀺 𑀯𑀘𑀦𑀲𑁂𑀲𑁄, 𑀢𑀁 𑀘𑀺𑀢𑁆𑀢𑀁 𑀓𑁄𑀲𑀚𑁆𑀚𑀸𑀬 𑀲𑀁𑀯𑀢𑁆𑀢𑁂𑀬𑁆𑀬, 𑀏𑀢𑀲𑁆𑀲 𑀲𑀁𑀯𑀢𑁆𑀢𑀦𑀲𑁆𑀲 𑀓𑀸𑀭𑀡𑀁 𑀅𑀢𑁆𑀣𑀻𑀢𑀺 ¶ 𑀅𑀢𑁆𑀣𑁄. 𑀢𑀁 𑀯𑀸 𑀫𑀦𑀲𑀺𑀓𑀭𑀡𑀁 𑀘𑀺𑀢𑁆𑀢𑀁 𑀓𑁄𑀲𑀚𑁆𑀚𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀸𑀢𑀺 𑀏𑀢𑀲𑁆𑀲 𑀞𑀸𑀦𑀁 𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀦 𑀘 𑀧𑀪𑀗𑁆𑀕𑀽𑀢𑀺 𑀓𑀫𑁆𑀫𑀦𑀺𑀬𑀪𑀸𑀯𑀽𑀧𑀕𑀫𑀦𑁂𑀦 𑀘 𑀧𑀪𑀺𑀚𑁆𑀚𑀦𑀲𑀪𑀸𑀯𑀦𑁆𑀢𑀺 𑀅𑀢𑁆𑀣𑁄.

𑀆𑀮𑀺𑀫𑁆𑀧𑁂𑀢𑀻𑀢𑀺 𑀆𑀤𑀻𑀧𑁂𑀢𑀺 𑀚𑀸𑀮𑁂𑀢𑀺. 𑀢𑀜𑁆𑀘𑀸𑀢𑀺 𑀢𑀁 𑀧𑀺𑀴𑀦𑁆𑀥𑀦𑀯𑀺𑀓𑀢𑀺𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀧𑀬𑁄𑀚𑀦𑀁. 𑀅𑀲𑁆𑀲𑀸𑀢𑀺 𑀲𑀼𑀯𑀡𑁆𑀡𑀓𑀸𑀭𑀲𑁆𑀲 𑀅𑀦𑀼𑀪𑁄𑀢𑀺 𑀲𑀫𑁆𑀪𑁄𑀢𑀺 𑀲𑀸𑀥𑁂𑀢𑀺 ¶ . 𑀅𑀲𑁆𑀲 𑀯𑀸 𑀲𑀼𑀯𑀡𑁆𑀡𑀲𑁆𑀲 𑀢𑀁 𑀅𑀢𑁆𑀣𑀁 𑀲𑀼𑀯𑀡𑁆𑀡𑀓𑀸𑀭𑁄 𑀅𑀦𑀼𑀪𑁄𑀢𑀺 𑀧𑀸𑀧𑀼𑀡𑀸𑀢𑀺.

𑀅𑀪𑀺𑀜𑁆𑀜𑀸𑀬 𑀇𑀤𑁆𑀥𑀺𑀯𑀺𑀥𑀸𑀤𑀺𑀜𑀸𑀡𑁂𑀦 𑀲𑀘𑁆𑀙𑀺𑀓𑀭𑀡𑀻𑀬𑀲𑁆𑀲 𑀇𑀤𑁆𑀥𑀺𑀯𑀺𑀥𑀧𑀘𑁆𑀘𑀦𑀼𑀪𑀯𑀦𑀸𑀤𑀺𑀓𑀲𑁆𑀲 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀭𑀡𑀻𑀬𑀲𑁆𑀲. 𑀧𑀘𑁆𑀘𑀓𑁆𑀔𑀁 𑀬𑀲𑁆𑀲 𑀅𑀢𑁆𑀣𑀺, 𑀲𑁄 𑀲𑀓𑁆𑀔𑀺, 𑀲𑀓𑁆𑀔𑀺𑀦𑁄 𑀪𑀩𑁆𑀩𑀢𑀸 𑀲𑀓𑁆𑀔𑀺𑀪𑀩𑁆𑀩𑀢𑀸, 𑀲𑀓𑁆𑀔𑀺𑀪𑀯𑀦𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀓𑁆𑀔𑀺 𑀘 𑀲𑁄 𑀪𑀩𑁆𑀩𑁄 𑀘𑀸𑀢𑀺 𑀯𑀸 𑀲𑀓𑁆𑀔𑀺𑀪𑀩𑁆𑀩𑁄. 𑀅𑀬𑀜𑁆𑀳𑀺 𑀇𑀤𑁆𑀥𑀺𑀯𑀺𑀥𑀸𑀤𑀻𑀦𑀁 𑀪𑀩𑁆𑀩𑁄, 𑀢𑀢𑁆𑀣 𑀘 𑀲𑀓𑁆𑀔𑀻𑀢𑀺 𑀲𑀓𑁆𑀔𑀺𑀪𑀩𑁆𑀩𑁄, 𑀢𑀲𑁆𑀲 𑀪𑀸𑀯𑁄 𑀲𑀓𑁆𑀔𑀺𑀪𑀩𑁆𑀩𑀢𑀸, 𑀢𑀁 𑀧𑀸𑀧𑀼𑀡𑀸𑀢𑀺. 𑀆𑀬𑀢𑀦𑁂𑀢𑀺 𑀧𑀼𑀩𑁆𑀩𑀳𑁂𑀢𑀸𑀤𑀺𑀓𑁂 𑀓𑀸𑀭𑀡𑁂 𑀲𑀢𑀺.

𑀲𑀻𑀢𑀺𑀪𑀸𑀯𑀦𑁆𑀢𑀺 𑀦𑀺𑀩𑁆𑀩𑀸𑀦𑀁, 𑀓𑀺𑀮𑁂𑀲𑀤𑀭𑀣𑀯𑀽𑀧𑀲𑀫𑀁 𑀯𑀸. 𑀲𑀫𑁆𑀧𑀳𑀁𑀲𑁂𑀢𑀻𑀢𑀺 𑀲𑀫𑀧𑀯𑀢𑁆𑀢𑀁 𑀘𑀺𑀢𑁆𑀢𑀁 𑀢𑀣𑀸𑀧𑀯𑀢𑁆𑀢𑀺𑀬𑀸 𑀧𑀜𑁆𑀜𑀸𑀬 𑀢𑁄𑀲𑁂𑀢𑀺 𑀉𑀢𑁆𑀢𑁂𑀚𑁂𑀢𑀺. 𑀬𑀤𑀸 𑀯𑀸 𑀦𑀺𑀭𑀲𑁆𑀲𑀸𑀤𑀁 𑀘𑀺𑀢𑁆𑀢𑀁 𑀪𑀸𑀯𑀦𑀸𑀬 𑀦 𑀧𑀓𑁆𑀔𑀦𑁆𑀤𑀢𑀺, 𑀢𑀤𑀸 𑀚𑀸𑀢𑀺𑀆𑀤𑀻𑀦𑀺 𑀲𑀁𑀯𑁂𑀕𑀯𑀢𑁆𑀣𑀽𑀦𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑀺 𑀲𑀫𑀼𑀢𑁆𑀢𑁂𑀚𑁂𑀢𑀺.

𑀢𑀺𑀭𑀺𑀬𑀁 𑀅𑀜𑁆𑀜𑀫𑀜𑁆𑀜𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸, 𑀓𑀣𑀁? 𑀤𑁆𑀯𑁂 𑀓𑁂𑀲𑀸 𑀏𑀓𑀢𑁄 𑀦𑀢𑁆𑀣𑀻𑀢𑀺. 𑀆𑀲𑀬𑁄𑀢𑀺 𑀦𑀺𑀲𑁆𑀲𑀬𑁄, 𑀧𑀘𑁆𑀘𑀬𑁄𑀢𑀺 𑀅𑀢𑁆𑀣𑁄.

𑀦𑀔𑀸 𑀢𑀺𑀭𑀺𑀬𑀁 𑀅𑀜𑁆𑀜𑀫𑀜𑁆𑀜𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸𑀢𑀺 𑀯𑀺𑀲𑀼𑀁 𑀯𑀯𑀢𑁆𑀣𑀺𑀢𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀫𑁂𑀯 𑀳𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀤𑁆𑀯𑁂 𑀦𑀔𑀸 𑀏𑀓𑀢𑁄 𑀦𑀢𑁆𑀣𑀻’’𑀢𑀺 𑀆𑀳𑀸𑀢𑀺.

𑀲𑀼𑀔𑀼𑀫𑀫𑁆𑀧𑀻𑀢𑀺 𑀬𑀣𑀸𑀯𑀼𑀢𑁆𑀢𑀑𑀴𑀸𑀭𑀺𑀓𑀘𑀫𑁆𑀫𑀢𑁄 𑀲𑀼𑀔𑀼𑀫𑀁 𑀅𑀦𑁆𑀢𑁄𑀫𑀼𑀔𑀘𑀫𑁆𑀫𑀸𑀤𑀺. 𑀓𑁄𑀝𑁆𑀞𑀸𑀲𑁂𑀲𑀼 𑀯𑀸 𑀢𑀘𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀬𑀁 𑀤𑀼𑀭𑀼𑀧𑀮𑀓𑁆𑀔𑀡𑀻𑀬𑀁, 𑀢𑀁 ‘‘𑀲𑀼𑀔𑀼𑀫’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀯𑀼𑀢𑁆𑀢𑀦𑀬𑁂𑀦 𑀢𑀘𑀁 𑀯𑀺𑀯𑀭𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀲𑁆𑀲 𑀧𑀸𑀓𑀝𑀁 𑀳𑁄𑀢𑀻𑀢𑀺.

𑀢𑀸𑀮𑀕𑀼𑀴𑀧𑀝𑀮𑀁 ¶ 𑀦𑀸𑀫 𑀧𑀓𑁆𑀓𑀢𑀸𑀮𑀨𑀮𑀮𑀲𑀺𑀓𑀁 𑀢𑀸𑀮𑀧𑀝𑁆𑀝𑀺𑀓𑀸𑀬 𑀮𑀺𑀫𑁆𑀧𑀺𑀢𑁆𑀯𑀸 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀉𑀤𑁆𑀥𑀭𑀺𑀢𑁆𑀯𑀸 𑀕𑀳𑀺𑀢𑀧𑀝𑀮𑀁.

𑀏𑀯𑀁 𑀢𑀺𑀫𑀢𑁆𑀢𑀸𑀦𑀻𑀢𑀺 𑀏𑀯𑀁-𑀫𑀢𑁆𑀢-𑀲𑀤𑁆𑀤𑁂𑀳𑀺 𑀕𑁄𑀧𑁆𑀨𑀓𑀝𑁆𑀞𑀺𑀓𑀸𑀤𑀻𑀦𑀺 𑀅𑀯𑀼𑀢𑁆𑀢𑀸𑀦𑀺𑀧𑀺 𑀤𑀲𑁆𑀲𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀻𑀴𑀸𑀕𑁄𑀴𑀓𑀸𑀦𑀺 𑀲𑀼𑀢𑁆𑀢𑁂𑀦 𑀩𑀦𑁆𑀥𑀺𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀖𑀝𑁆𑀝𑁂𑀢𑁆𑀯𑀸 𑀓𑀻𑀴𑀦𑀕𑁄𑀴𑀓𑀸𑀦𑀺.

𑀢𑀢𑁆𑀣 𑀚𑀗𑁆𑀖𑀝𑁆𑀞𑀺𑀓𑀲𑁆𑀲 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑀦𑁆𑀢𑀺 𑀚𑀡𑁆𑀡𑀼𑀓𑀝𑁆𑀞𑀺𑀫𑁆𑀳𑀺 𑀧𑀯𑀺𑀲𑀺𑀢𑁆𑀯𑀸 𑀞𑀺𑀢𑀝𑁆𑀞𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦 𑀅𑀝𑁆𑀞𑀺𑀦𑀸 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑀁 𑀬𑀁 𑀓𑀝𑀺𑀝𑁆𑀞𑀺𑀦𑁄, 𑀢𑀁 𑀅𑀕𑁆𑀕𑀙𑀺𑀦𑁆𑀦𑀫𑀳𑀸𑀧𑀼𑀦𑁆𑀦𑀸𑀕𑀨𑀮𑀲𑀤𑀺𑀲𑀁. 𑀲𑀻𑀲𑀓𑀧𑀝𑁆𑀝𑀯𑁂𑀞𑀓𑀁 𑀯𑁂𑀞𑁂𑀢𑁆𑀯𑀸 𑀞𑀧𑀺𑀢𑀲𑀻𑀲𑀫𑀬𑀁 𑀧𑀝𑁆𑀝𑀓𑀁. 𑀲𑀼𑀢𑁆𑀢𑀓𑀦𑁆𑀢𑀦𑀲𑀮𑀸𑀓𑀸𑀯𑀺𑀤𑁆𑀥𑀸 ¶ 𑀕𑁄𑀴𑀓𑀸 𑀯𑀝𑁆𑀝𑀦𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀯𑀝𑁆𑀝𑀦𑀸𑀦𑀁 𑀆𑀯𑀮𑀺 𑀯𑀝𑁆𑀝𑀦𑀸𑀯𑀮𑀺. 𑀅𑀯𑀮𑁂𑀔𑀦𑀲𑀢𑁆𑀣𑀓𑀁 𑀉𑀘𑁆𑀙𑀼𑀢𑀘𑀸𑀯𑀮𑁂𑀔𑀦𑀲𑀢𑁆𑀣𑀓𑀁.

𑀯𑀓𑁆𑀓𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀯𑀓𑁆𑀓𑀧𑀭𑀺𑀬𑀦𑁆𑀢𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁.

𑀲𑀓𑁆𑀔𑀭𑀲𑀼𑀥𑀸𑀯𑀡𑁆𑀡𑀦𑁆𑀢𑀺 𑀫𑀭𑀼𑀫𑁆𑀧𑁂𑀳𑀺 𑀓𑀢𑀲𑀼𑀥𑀸𑀯𑀡𑁆𑀡𑀁. ‘‘𑀲𑁂𑀢𑀲𑀓𑁆𑀔𑀭𑀲𑀼𑀥𑀸𑀯𑀡𑁆𑀡’’𑀦𑁆𑀢𑀺 𑀘 𑀧𑀸𑀞𑀁 𑀯𑀤𑀦𑁆𑀢𑀺, 𑀲𑁂𑀢𑀲𑀓𑁆𑀔𑀭𑀸𑀯𑀡𑁆𑀡𑀁 𑀲𑀼𑀥𑀸𑀯𑀡𑁆𑀡𑀜𑁆𑀘𑀸𑀢𑀺 𑀅𑀢𑁆𑀣𑁄.

𑀬𑀢𑁆𑀣 𑀅𑀦𑁆𑀦𑀧𑀸𑀦𑀁 𑀦𑀺𑀧𑀢𑀺𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀯𑀺𑀲𑀫𑀘𑁆𑀙𑀺𑀦𑁆𑀦𑀓𑀮𑀸𑀧𑁄 𑀯𑀺𑀲𑀫𑀁 𑀉𑀤𑀓𑀁 𑀧𑀕𑁆𑀖𑀭𑀢𑀺, 𑀏𑀯𑀫𑁂𑀯 𑀲𑀭𑀻𑀭𑀁 𑀓𑁂𑀲𑀓𑀽𑀧𑀸𑀤𑀺𑀯𑀺𑀯𑀭𑁂𑀳𑀺 𑀉𑀧𑀭𑀺 𑀳𑁂𑀝𑁆𑀞𑀸 𑀢𑀺𑀭𑀺𑀬𑀜𑁆𑀘 𑀯𑀺𑀲𑀫𑀁 𑀧𑀕𑁆𑀖𑀭𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀯𑀺𑀲𑀫𑀘𑁆𑀙𑀺𑀦𑁆𑀦-𑀕𑁆𑀕𑀳𑀡𑀁 𑀓𑀭𑁄𑀢𑀺.

𑀅𑀢𑀺𑀓𑀝𑀼𑀓𑀅𑀘𑁆𑀘𑀼𑀡𑁆𑀳𑀸𑀤𑀺𑀓𑁄 𑀯𑀺𑀲𑀪𑀸𑀕𑀸𑀳𑀸𑀭𑁄 𑀉𑀡𑁆𑀳𑀓𑀸𑀮𑁂 𑀧𑀯𑀢𑁆𑀢𑀫𑀸𑀦𑀸𑀦𑀁 𑀥𑀸𑀢𑀽𑀦𑀁 𑀯𑀺𑀲𑀪𑀸𑀕𑀢𑁆𑀢𑀸.

𑀏𑀓𑀢𑁆𑀢𑀸𑀭𑀫𑁆𑀫𑀡𑀩𑀮𑁂𑀦𑁂𑀯 𑀯𑀸𑀢𑀺 𑀯𑀺𑀓𑁆𑀔𑀫𑁆𑀪𑀺𑀢𑀦𑀻𑀯𑀭𑀡𑁂𑀦 𑀲𑀼𑀲𑀫𑀸𑀳𑀺𑀢𑀘𑀺𑀢𑁆𑀢𑁂𑀦 𑀉𑀧𑀝𑁆𑀞𑀺𑀢𑀲𑁆𑀲 𑀦𑀸𑀦𑀸𑀭𑀫𑁆𑀫𑀡𑀯𑀺𑀧𑁆𑀨𑀦𑁆𑀤𑀦𑀯𑀺𑀭𑀳𑁂𑀦 𑀏𑀓𑀲𑀪𑀸𑀯𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀯𑀲𑁂𑀦. 𑀢𑀜𑁆𑀳𑀺 𑀏𑀓𑀢𑁆𑀢𑀸𑀭𑀫𑁆𑀫𑀡𑀁 𑀉𑀧𑀝𑁆𑀞𑀳𑀫𑀸𑀦𑀫𑁂𑀯 𑀅𑀢𑁆𑀢𑀦𑀺 𑀅𑀪𑀺𑀭𑀢𑀺𑀁, 𑀲𑀸𑀢𑀺𑀲𑀬𑀁 𑀨𑀭𑀡𑀧𑀻𑀢𑀺𑀁, 𑀇𑀝𑁆𑀞𑀸𑀓𑀸𑀭𑀸𑀦𑀼𑀪𑀯𑀦𑀜𑁆𑀘 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀢𑀺. 𑀦 𑀳𑀺 𑀅𑀪𑀺𑀭𑀢𑀺𑀲𑁄𑀫𑀦𑀲𑁆𑀲𑁂𑀳𑀺 𑀯𑀺𑀦𑀸 𑀅𑀦𑀢𑀺𑀓𑁆𑀓𑀦𑁆𑀢𑀧𑀻𑀢𑀺𑀲𑀼𑀔𑀲𑁆𑀲 𑀏𑀓𑀢𑁆𑀢𑀼𑀧𑀝𑁆𑀞𑀸𑀦𑀁 𑀅𑀢𑁆𑀣𑀻𑀢𑀺.

𑀅𑀯𑀺𑀲𑁂𑀲𑀢𑁄 ¶ 𑀧𑀦 𑀲𑀸𑀥𑀸𑀭𑀡𑀯𑀲𑁂𑀦𑀸𑀢𑀺 𑀧𑀝𑀺𑀓𑀽𑀮𑀥𑀸𑀢𑀼𑀯𑀡𑁆𑀡𑀯𑀺𑀲𑁂𑀲𑀁 𑀅𑀓𑀢𑁆𑀯𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀸𑀥𑀸𑀭𑀡𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀺𑀯𑀺𑀥𑁂𑀦𑀸𑀢𑀺 𑀅𑀦𑀼𑀮𑁄𑀫𑀸𑀤𑀺𑀦𑀸 𑀯𑀓𑁆𑀔𑀫𑀸𑀦𑁂𑀦. 𑀙 𑀫𑀸𑀲𑁂𑀢𑀺 𑀅𑀤𑁆𑀥𑀫𑀸𑀲𑁂 𑀊𑀦𑁂𑀧𑀺 𑀫𑀸𑀲𑀧𑀭𑀺𑀘𑁆𑀙𑁂𑀤𑁂𑀦 𑀧𑀭𑀺𑀘𑁆𑀙𑀺𑀚𑁆𑀚𑀫𑀸𑀦𑁂 𑀲𑀚𑁆𑀛𑀸𑀬𑁂 𑀙 𑀫𑀸𑀲𑀸 𑀧𑀭𑀺𑀘𑁆𑀙𑁂𑀤𑀓𑀸 𑀳𑁄𑀦𑁆𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀭𑀺𑀘𑁆𑀙𑀺𑀚𑁆𑀚𑀫𑀸𑀦𑀲𑁆𑀲 𑀫𑀸𑀲𑀦𑁆𑀢𑀭𑀕𑀫𑀦𑀦𑀺𑀯𑀸𑀭𑀡𑀜𑁆𑀳𑀺 𑀙𑀫𑀸𑀲𑀕𑁆𑀕𑀳𑀡𑀁, 𑀦 𑀲𑀓𑀮𑀙𑀫𑀸𑀲𑁂 𑀧𑀭𑀺𑀯𑀢𑁆𑀢𑀤𑀲𑁆𑀲𑀦𑀢𑁆𑀣𑀁. 𑀆𑀘𑀭𑀺𑀬𑀸𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸.

𑀮𑀓𑁆𑀔𑀡𑀦𑁆𑀢𑀺 𑀥𑀸𑀢𑀼𑀧𑀝𑀺𑀓𑀽𑀮𑀮𑀓𑁆𑀔𑀡𑀁. 𑀚𑀦𑀁 𑀦 𑀅𑀭𑀳𑀦𑁆𑀢𑀻𑀢𑀺 𑀅𑀚𑀜𑁆𑀜𑀸, 𑀚𑀦𑁂 𑀧𑀯𑁂𑀲𑁂𑀢𑀼𑀁 𑀅𑀬𑀼𑀢𑁆𑀢𑀸 𑀚𑀺𑀕𑀼𑀘𑁆𑀙𑀦𑀻𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀧𑀝𑀺𑀧𑀸𑀝𑀺𑀬𑀸 𑀅𑀝𑁆𑀞𑀻𑀦𑀻𑀢𑀺 𑀧𑀝𑀺𑀧𑀸𑀝𑀺𑀬𑀸 𑀅𑀝𑁆𑀞𑀻𑀦𑀺 𑀓𑁄𑀝𑀺𑀬𑀸 𑀞𑀺𑀢𑀸𑀦𑀺. 𑀦 𑀏𑀢𑁆𑀣 𑀓𑁄𑀘𑀺 𑀅𑀢𑁆𑀢𑀸 𑀦𑀸𑀫 𑀅𑀢𑁆𑀣𑀺, 𑀅𑀝𑁆𑀞𑀻𑀦𑀺 𑀏𑀯 𑀅𑀝𑁆𑀞𑀺𑀧𑀼𑀜𑁆𑀚𑀫𑀢𑁆𑀢𑁄 𑀏𑀯𑀸𑀬𑀁 𑀲𑀗𑁆𑀖𑀸𑀝𑁄𑀢𑀺 𑀤𑀲𑁆𑀲𑁂𑀢𑀺 ¶ . 𑀅𑀦𑁂𑀓𑀲𑀦𑁆𑀥𑀺𑀬𑀫𑀺𑀢𑁄𑀢𑀺 𑀅𑀦𑁂𑀓𑁂𑀳𑀺 𑀲𑀦𑁆𑀥𑀻𑀳𑀺 𑀬𑀫𑀺𑀢𑁄 𑀲𑀫𑁆𑀩𑀤𑁆𑀥𑁄 𑀲𑁄 𑀅𑀝𑁆𑀞𑀺𑀧𑀼𑀜𑁆𑀚𑁄𑀢𑀺 𑀤𑀲𑁆𑀲𑁂𑀢𑀺. 𑀦 𑀓𑁂𑀳𑀺𑀘𑀻𑀢𑀺 𑀬𑀫𑁂𑀦𑁆𑀢𑀁 𑀅𑀢𑁆𑀢𑀸𑀦𑀁 𑀧𑀝𑀺𑀲𑁂𑀥𑁂𑀢𑀺. 𑀘𑁄𑀤𑀺𑀢𑁄 𑀚𑀭𑀸𑀬 𑀫𑀭𑀡𑀸𑀪𑀺𑀫𑀼𑀔𑀕𑀫𑀦𑁂𑀦 𑀘𑁄𑀤𑀺𑀢𑁄.

𑀫𑀳𑀸𑀪𑀽𑀢𑀁 𑀉𑀧𑀸𑀤𑀸𑀭𑀽𑀧𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁 ‘‘𑀦𑀻𑀮𑀁 𑀧𑀻𑀢𑀁 𑀲𑀼𑀕𑀦𑁆𑀥𑀁 𑀤𑀼𑀕𑁆𑀕𑀦𑁆𑀥’’𑀦𑁆𑀢𑀺𑀆𑀤𑀺𑀦𑀸. 𑀉𑀧𑀸𑀤𑀸𑀭𑀽𑀧𑀁 𑀫𑀳𑀸𑀪𑀽𑀢𑁂𑀦 𑀢𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀢𑀲𑁆𑀲 𑀢𑀢𑁄 𑀩𑀳𑀺 𑀅𑀪𑀸𑀯𑀸. 𑀙𑀸𑀬𑀸𑀢𑀧𑀸𑀦𑀁 𑀆𑀢𑀧𑀧𑀘𑁆𑀘𑀬𑀙𑀸𑀬𑀼𑀧𑁆𑀧𑀸𑀤𑀓𑀪𑀸𑀯𑁄 𑀅𑀜𑁆𑀜𑀫𑀜𑁆𑀜𑀧𑀭𑀺𑀘𑁆𑀙𑁂𑀤𑀓𑀢𑀸. 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀢𑀤𑀦𑁆𑀢𑁄𑀕𑀥𑀸𑀦𑀁 𑀘𑀓𑁆𑀔𑀸𑀤𑀺𑀆𑀬𑀢𑀦𑀤𑁆𑀯𑀸𑀭𑀸𑀦𑀁 𑀯𑀲𑁂𑀦 𑀢𑀁𑀢𑀁𑀤𑁆𑀯𑀸𑀭𑀺𑀓𑀸 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸 𑀧𑀸𑀓𑀝𑀸 𑀳𑁄𑀦𑁆𑀢𑀺, 𑀆𑀬𑀢𑀦𑀸𑀦𑀺 𑀘 𑀤𑁆𑀯𑀸𑀭𑀸𑀦𑀺 𑀘 𑀆𑀬𑀢𑀦𑀤𑁆𑀯𑀸𑀭𑀸𑀦𑀻𑀢𑀺 𑀯𑀸 𑀅𑀢𑁆𑀣𑁄. 𑀢𑁂𑀦 𑀭𑀽𑀧𑀸𑀬𑀢𑀦𑀸𑀤𑀻𑀦𑀜𑁆𑀘 𑀯𑀲𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑀧𑁆𑀧𑀘𑁆𑀘𑀬𑀸𑀢𑀺 𑀲𑀧𑁆𑀧𑀘𑁆𑀘𑀬𑀪𑀸𑀯𑀸, 𑀧𑀘𑁆𑀘𑀬𑀸𑀬𑀢𑁆𑀢𑀁 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀫𑀸𑀦𑁄 𑀯𑀸 𑀲𑀤𑀺𑀲𑁄 𑀬𑀼𑀢𑁆𑀢𑁄 𑀧𑀘𑁆𑀘𑀬𑁄 𑀲𑀧𑁆𑀧𑀘𑁆𑀘𑀬𑁄, 𑀢𑀲𑁆𑀫𑀸 𑀲𑀧𑁆𑀧𑀘𑁆𑀘𑀬𑀸.

𑀏𑀢𑁆𑀢𑀓𑁄𑀢𑀺 𑀬𑀣𑀸𑀯𑀼𑀢𑁆𑀢𑁂𑀦 𑀆𑀓𑀸𑀭𑁂𑀦 𑀧𑀕𑀼𑀡𑁄 𑀓𑁄𑀝𑁆𑀞𑀸𑀲𑁄. 𑀉𑀕𑁆𑀕𑀳𑁄𑀯 𑀉𑀕𑁆𑀕𑀳𑀲𑀦𑁆𑀥𑀺. 𑀯𑀡𑁆𑀡𑀸𑀤𑀺𑀫𑀼𑀔𑁂𑀦 𑀳𑀺 𑀉𑀧𑀝𑁆𑀞𑀸𑀦𑀁 𑀏𑀢𑁆𑀣 𑀲𑀦𑁆𑀥𑀻𑀬𑀢𑀺 𑀲𑀫𑁆𑀩𑀚𑁆𑀛𑀢𑀻𑀢𑀺 ‘‘𑀲𑀦𑁆𑀥𑀻’’𑀢𑀺 𑀯𑀼𑀘𑁆𑀘𑀢𑀺.

𑀉𑀧𑀝𑁆𑀞𑀸𑀢𑀻𑀢𑀺 𑀯𑀡𑁆𑀡𑀸𑀤𑀺𑀯𑀲𑁂𑀦 𑀉𑀧𑀝𑁆𑀞𑀸𑀢𑀻𑀢𑀺 𑀅𑀢𑁆𑀣𑁄. 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀢𑀺 𑀦𑀸𑀢𑀺𑀤𑀽𑀭𑀦𑀸𑀘𑁆𑀘𑀸𑀲𑀦𑁆𑀦𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑀦𑁆𑀢𑀺 𑀏𑀓𑀗𑁆𑀕𑀁, 𑀤𑀺𑀯𑀸 𑀅𑀩𑁆𑀩𑁄𑀓𑀺𑀡𑁆𑀡𑀁 𑀭𑀢𑁆𑀢𑀺𑀁 𑀅𑀧𑁆𑀧𑀲𑀤𑁆𑀤𑀁 𑀅𑀧𑁆𑀧𑀦𑀺𑀕𑁆𑀖𑁄𑀲𑀦𑁆𑀢𑀺 𑀏𑀓𑀁, 𑀅𑀧𑁆𑀧𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀦𑁆𑀢𑀺 ¶ 𑀏𑀓𑀁, 𑀢𑀲𑁆𑀫𑀺𑀁 𑀔𑁄 𑀧𑀦 𑀲𑁂𑀦𑀸𑀲𑀦𑁂 𑀯𑀺𑀳𑀭𑀦𑁆𑀢𑀲𑁆𑀲 𑀅𑀧𑁆𑀧𑀓𑀲𑀺𑀭𑁂𑀦 𑀉𑀧𑁆𑀧𑀚𑁆𑀚𑀢𑀺 𑀘𑀻𑀯𑀭…𑀧𑁂… 𑀧𑀭𑀺𑀓𑁆𑀔𑀸𑀭𑁄𑀢𑀺 𑀏𑀓𑀁, 𑀢𑀲𑁆𑀫𑀺𑀁 𑀧𑀦 𑀲𑁂𑀦𑀸𑀲𑀦𑁂 𑀣𑁂𑀭𑀸 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀸𑀢𑀺 𑀏𑀓𑀁 (𑀅. 𑀦𑀺. 𑁧𑁦.𑁧𑁧). 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀦𑀸𑀢𑀺 𑀅𑀧𑁆𑀧𑀸𑀩𑀸𑀥𑀸𑀲𑀸𑀞𑁂𑀬𑁆𑀬𑀲𑀤𑁆𑀥𑀸𑀧𑀜𑁆𑀜𑀸𑀯𑀻𑀭𑀺𑀬𑁂𑀳𑀺 𑀧𑀥𑀸𑀦𑀺𑀬𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦.

𑀉𑀝𑁆𑀞𑀸𑀦𑀓𑀤𑀸𑀬𑀦𑁆𑀢𑀺 𑀢𑁂𑀳𑀺 𑀔𑁂𑀢𑁆𑀢𑁂𑀳𑀺 𑀉𑀝𑁆𑀞𑀸𑀦𑀓𑀁, 𑀢𑁂𑀳𑀺 𑀤𑀸𑀢𑀩𑁆𑀩𑀥𑀜𑁆𑀜𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀅𑀝𑁆𑀞𑀓𑀼𑀫𑁆𑀪𑀤𑀸𑀬𑀓𑀔𑁂𑀢𑁆𑀢𑀁 𑀯𑀺𑀬 𑀫𑀼𑀔𑀥𑁄𑀯𑀦𑀓𑀺𑀘𑁆𑀘𑀁, 𑀲𑁄𑀴𑀲𑀓𑀼𑀫𑁆𑀪𑀤𑀸𑀬𑀓𑀁 𑀯𑀺𑀬 𑀔𑀸𑀤𑀦𑀪𑀼𑀜𑁆𑀚𑀦𑀓𑀺𑀘𑁆𑀘𑀁 𑀤𑀝𑁆𑀞𑀩𑁆𑀩𑀁 𑀮𑀳𑀼𑀓𑀕𑀭𑀼𑀓𑀪𑀸𑀯𑀢𑁄. 𑀢𑀢𑁄 𑀧𑀦 𑀬𑀁 𑀤𑀼𑀓𑁆𑀔𑀁 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀁 𑀅𑀜𑁆𑀜𑀜𑁆𑀘 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀫𑀦𑀲𑀺𑀓𑀸𑀭𑁂𑀦 𑀘 𑀦𑀺𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀏𑀢𑁆𑀣𑁂𑀯 𑀓𑀫𑁆𑀫𑀁 𑀓𑀸𑀢𑀩𑁆𑀩’’𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸𑀢𑀺 𑀏𑀓𑀤𑀺𑀯𑀲𑀁 𑀢𑀺𑀁𑀲 𑀯𑀸𑀭𑁂 𑀫𑀦𑀲𑀺𑀓𑀸𑀭𑀝𑁆𑀞𑀧𑀦𑁂𑀦.

𑀲𑀳𑀲𑁆𑀲𑀼𑀤𑁆𑀥𑀸𑀭𑀁 ¶ 𑀲𑀸𑀥𑁂𑀢𑁆𑀯𑀸𑀢𑀺 𑀲𑀳𑀲𑁆𑀲𑀯𑀟𑁆𑀠𑀺𑀢𑀁 𑀇𑀡𑀁 𑀬𑁄𑀚𑁂𑀢𑁆𑀯𑀸. 𑀉𑀤𑁆𑀥𑀭𑀺𑀢𑀩𑁆𑀩𑁄𑀢𑀺 𑀉𑀤𑁆𑀥𑀸𑀭𑁄𑀢𑀺 𑀳𑀺 𑀯𑀟𑁆𑀠𑀺 𑀯𑀼𑀘𑁆𑀘𑀢𑀻𑀢𑀺. 𑀲𑀼𑀤𑁆𑀥𑀘𑀺𑀢𑁆𑀢𑁂𑀦𑀸𑀢𑀺 𑀯𑀺𑀓𑁆𑀔𑁂𑀧𑀸𑀤𑀺𑀓𑀺𑀮𑁂𑀲𑀯𑀺𑀭𑀳𑀺𑀢𑀘𑀺𑀢𑁆𑀢𑁂𑀦. 𑀓𑁂𑀲𑀸𑀤𑀻𑀲𑀼 𑀢𑀘𑁂 𑀭𑀚𑁆𑀚𑀦𑁆𑀢𑀸 𑀲𑀼𑀘𑁆𑀙𑀯𑀺𑀘𑀫𑁆𑀫𑀁 𑀢𑀘𑁄𑀢𑀺 𑀕𑀳𑁂𑀢𑁆𑀯𑀸 ‘‘𑀲𑀼𑀯𑀡𑁆𑀡𑀸𑀤𑀺𑀯𑀡𑁆𑀡𑁄 𑀫𑁂 𑀢𑀘𑁄’’𑀢𑀺𑀆𑀤𑀺𑀦𑀸 𑀭𑀚𑁆𑀚𑀦𑁆𑀢𑀺.

𑀢𑁂𑀲𑀼 𑀤𑁆𑀯𑁂 𑀏𑀓𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀫𑀸𑀦𑀸 𑀦𑀸𑀫 𑀦 𑀳𑁄𑀦𑁆𑀢𑀻𑀢𑀺 𑀬𑀣𑀸 𑀢𑀣𑀸 𑀯𑀸 𑀧𑀮𑀸𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀭𑀸𑀕𑀸𑀤𑀺𑀯𑀢𑁆𑀣𑀼𑀪𑀸𑀯𑁂𑀦 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀸𑀦𑀁 𑀘𑁄𑀭𑀲𑀤𑀺𑀲𑀢𑀸 𑀅𑀦𑀢𑁆𑀣𑀸𑀯𑀳𑀢𑀸 𑀤𑀝𑁆𑀞𑀩𑁆𑀩𑀸.

𑀓𑀫𑁆𑀫𑀫𑁂𑀯 𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲 𑀞𑀸𑀦𑀦𑁆𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀪𑀸𑀯𑀦𑀸 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 ‘‘𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀅𑀧𑁆𑀧𑀦𑀁 𑀧𑀸𑀧𑀼𑀡𑀸𑀢𑀻’’𑀢𑀺. 𑀓𑀫𑁆𑀫𑀲𑁆𑀲 𑀯𑀸 𑀪𑀸𑀯𑀦𑀸𑀬 𑀞𑀸𑀦𑀁 𑀆𑀭𑀫𑁆𑀫𑀡𑀁 𑀅𑀧𑁆𑀧𑀦𑀸𑀭𑀫𑁆𑀫𑀡𑀪𑀸𑀯𑀽𑀧𑀕𑀫𑀦𑁂𑀦 𑀅𑀧𑁆𑀧𑀦𑀁 𑀧𑀸𑀧𑀼𑀡𑀸𑀢𑀻𑀢𑀺 𑀯𑀼𑀢𑁆𑀢𑀁.

𑀫𑀸𑀦𑀚𑀸𑀢𑀺𑀓𑁄𑀢𑀺 𑀏𑀢𑁂𑀦 𑀮𑀗𑁆𑀖𑀦𑀲𑀫𑀢𑁆𑀣𑀢𑀸𑀬𑁄𑀕𑁂𑀦 𑀉𑀧𑀲𑀫𑀭𑀳𑀺𑀢𑀢𑀁 𑀤𑀲𑁆𑀲𑁂𑀢𑀺. 𑀘𑀺𑀢𑁆𑀢𑀫𑁆𑀧𑀺 𑀳𑀺 𑀢𑀣𑀸 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀯𑀟𑁆𑀠𑀺𑀢𑀁 𑀉𑀧𑀲𑀫𑀭𑀳𑀺𑀢𑀦𑁆𑀢𑀺 𑀤𑀲𑁆𑀲𑁂𑀢𑀩𑁆𑀩𑀦𑁆𑀢𑀺.

𑀳𑀢𑁆𑀣𑁂 𑀕𑀳𑀺𑀢𑀧𑀜𑁆𑀳𑀯𑀢𑁆𑀣𑀼 𑀧𑀸𑀓𑀢𑀺𑀓𑀫𑁂𑀯𑀸𑀢𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀢𑀁 𑀲𑀦𑁆𑀥𑀸𑀬𑀸𑀳. 𑀢𑀢𑁆𑀣 𑀳𑀺 𑀯𑀼𑀢𑁆𑀢𑀁 𑁋

‘‘𑀫𑀸𑀮𑀓𑀢𑁆𑀣𑁂𑀭𑁄 𑀓𑀺𑀭 𑀤𑀻𑀖𑀪𑀸𑀡𑀓𑀅𑀪𑀬𑀢𑁆𑀣𑁂𑀭𑀁 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 ‘𑀆𑀯𑀼𑀲𑁄 𑀅𑀪𑀬, 𑀇𑀫𑀁 𑀢𑀸𑀯 ¶ 𑀧𑀜𑁆𑀳𑀁 𑀉𑀕𑁆𑀕𑀡𑁆𑀳𑀸𑀳𑀻’𑀢𑀺 𑀯𑀢𑁆𑀯𑀸 𑀆𑀳 ‘𑀫𑀸𑀮𑀓𑀢𑁆𑀣𑁂𑀭𑁄 𑀤𑁆𑀯𑀢𑁆𑀢𑀺𑀁𑀲𑀓𑁄𑀝𑁆𑀞𑀸𑀲𑁂𑀲𑀼 𑀤𑁆𑀯𑀢𑁆𑀢𑀺𑀁𑀲𑀧𑀞𑀫𑀚𑁆𑀛𑀸𑀦𑀮𑀸𑀪𑀻, 𑀲𑀘𑁂 𑀭𑀢𑁆𑀢𑀺𑀁 𑀏𑀓𑀁, 𑀤𑀺𑀯𑀸 𑀏𑀓𑀁 𑀲𑀫𑀸𑀧𑀚𑁆𑀚𑀢𑀺, 𑀅𑀢𑀺𑀭𑁂𑀓𑀟𑁆𑀠𑀫𑀸𑀲𑁂𑀦 𑀧𑀼𑀦 𑀲𑀫𑁆𑀧𑀚𑁆𑀚𑀢𑀺. 𑀲𑀘𑁂 𑀧𑀦 𑀤𑁂𑀯𑀲𑀺𑀓𑀁 𑀏𑀓𑀫𑁂𑀯 𑀲𑀫𑀸𑀧𑀚𑁆𑀚𑀢𑀺, 𑀅𑀢𑀺𑀭𑁂𑀓𑀫𑀸𑀲𑁂𑀦 𑀧𑀼𑀦 𑀲𑀫𑁆𑀧𑀚𑁆𑀚𑀢𑀻’’’𑀢𑀺.

𑀇𑀤𑀁 𑀧𑀦 𑀏𑀓𑀁 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀏𑀓𑀁 𑀧𑀸𑀝𑀺𑀬𑁂𑀓𑁆𑀓𑀁 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀤𑁆𑀯𑀢𑁆𑀢𑀺𑀁𑀲𑀸𑀢𑀺 𑀏𑀢𑀲𑁆𑀲 𑀲𑀸𑀥𑀦𑀢𑁆𑀣𑀁 𑀦𑀺𑀤𑀲𑁆𑀲𑀦𑀯𑀲𑁂𑀦 𑀆𑀦𑀻𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀦𑀼𑀧𑀸𑀤𑀺𑀦𑁆𑀦𑀓𑀧𑀓𑁆𑀔𑁂 𑀞𑀺𑀢𑀸𑀦𑀻𑀢𑀺 𑀏𑀢𑁂𑀦 𑀘𑁂𑀢𑀺𑀬𑀧𑀩𑁆𑀩𑀢𑀯𑀸𑀲𑀻 𑀫𑀳𑀸𑀢𑀺𑀲𑁆𑀲𑀢𑁆𑀣𑁂𑀭𑁄 𑀯𑀺𑀬, 𑀲𑀗𑁆𑀖𑀭𑀓𑁆𑀔𑀺𑀢𑀢𑁆𑀣𑁂𑀭𑀼𑀧𑀝𑁆𑀞𑀸𑀓𑀲𑀸𑀫𑀡𑁂𑀭𑁄 𑀯𑀺𑀬 𑀘 𑀅𑀦𑀼𑀧𑀸𑀤𑀺𑀦𑁆𑀦𑀓𑀧𑀓𑁆𑀔𑁂 𑀞𑀧𑁂𑀢𑁆𑀯𑀸 𑀕𑀳𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀲𑁆𑀲 𑀤𑀲𑀯𑀺𑀥𑀸𑀲𑀼𑀪𑀯𑀲𑁂𑀦 𑀚𑀻𑀯𑀫𑀸𑀦𑀓𑀲𑀭𑀻𑀭𑁂𑀧𑀺 𑀉𑀧𑀝𑁆𑀞𑀺𑀢𑁂 𑀉𑀧𑀘𑀸𑀭𑀧𑁆𑀧𑀢𑁆𑀢𑀺 𑀤𑀲𑁆𑀲𑀺𑀢𑀸 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀅𑀢𑁆𑀣𑀺𑀲𑁆𑀲 𑀓𑀸𑀬𑁂’’𑀢𑀺 𑀧𑀦 𑀲𑀢𑁆𑀢𑀯𑀲𑁂𑀦 𑀓𑁂𑀲𑀸𑀤𑀻𑀲𑀼 𑀕𑀬𑁆𑀳𑀫𑀸𑀦𑁂𑀲𑀼 𑀬𑀣𑀸 ‘‘𑀇𑀫𑀲𑁆𑀫𑀺𑀁 ¶ 𑀓𑀸𑀬𑁂’’𑀢𑀺 𑀲𑀢𑁆𑀢-𑀕𑁆𑀕𑀳𑀡𑀭𑀳𑀺𑀢𑁂 𑀅𑀳𑀁𑀓𑀸𑀭𑀯𑀢𑁆𑀣𑀼𑀫𑁆𑀳𑀺 𑀯𑀺𑀤𑁆𑀥𑀲𑁆𑀢𑀸𑀳𑀁𑀓𑀸𑀭𑁂 𑀲𑀤𑀸 𑀲𑀦𑁆𑀦𑀺𑀳𑀺𑀢𑁂 𑀧𑀸𑀓𑀝𑁂 𑀘 𑀅𑀢𑁆𑀢𑀦𑁄 𑀓𑀸𑀬𑁂 𑀉𑀧𑀝𑁆𑀞𑀸𑀦𑀁 𑀳𑁄𑀢𑀺, 𑀦 𑀢𑀣𑀸 𑀢𑀢𑁆𑀣𑀸𑀢𑀺 𑀅𑀧𑁆𑀧𑀦𑀁 𑀅𑀧𑁆𑀧𑀢𑁆𑀢𑀸 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸𑀯 𑀢𑀢𑁆𑀣 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀅𑀲𑀼𑀪𑀸𑀦𑀼𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀸 𑀧𑀦 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸’’𑀢𑀺.

𑁩𑁫𑁭. 𑀆𑀤𑀺𑀫𑁆𑀳𑀺 𑀲𑁂𑀯𑀦𑀸 𑀆𑀲𑁂𑀯𑀦𑀸, 𑀯𑀟𑁆𑀠𑀦𑀁 𑀪𑀸𑀯𑀦𑀸, 𑀧𑀼𑀦𑀧𑁆𑀧𑀼𑀦𑀁 𑀓𑀭𑀡𑀁 𑀩𑀳𑀼𑀮𑀻𑀓𑀫𑁆𑀫𑀦𑁆𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄.

𑁩𑁬𑁨. 𑀯𑀢𑁆𑀣𑀼𑀧𑀭𑀺𑀜𑁆𑀜𑀸𑀬𑀸𑀢𑀺 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸𑀦𑀁 𑀯𑀢𑁆𑀣𑀼𑀪𑀽𑀢𑀲𑁆𑀲 𑀓𑀸𑀬𑀲𑁆𑀲 𑀧𑀭𑀺𑀚𑀸𑀦𑀦𑁂𑀦. 𑀅𑀧𑁆𑀧𑀺𑀢𑀸𑀢𑀺 𑀕𑀫𑀺𑀢𑀸, 𑀲𑀸 𑀘 𑀯𑀺𑀦𑀸𑀲𑀺𑀢𑀢𑀸𑀢𑀺 𑀆𑀳 ‘‘𑀯𑀺𑀦𑀸𑀲𑀺𑀢𑀸’’𑀢𑀺. 𑀅𑀧𑁆𑀧𑀯𑀢𑁆𑀢𑀺𑀬𑀁 𑀞𑀧𑀺𑀢𑀸𑀢𑀺𑀧𑀺 𑀅𑀧𑁆𑀧𑀺𑀢𑀸𑀢𑀺 𑀅𑀬𑀫𑀢𑁆𑀣𑁄 𑀦𑀺𑀭𑀼𑀢𑁆𑀢𑀺𑀲𑀺𑀤𑁆𑀥𑀺𑀬𑀸 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀯𑀺𑀕𑀢𑀦𑁆𑀢𑀸 𑀓𑀢𑀸𑀢𑀺 𑀇𑀤𑀸𑀦𑀺 𑀓𑀸𑀢𑀩𑁆𑀩𑁄 𑀅𑀦𑁆𑀢𑁄 𑀏𑀢𑁂𑀲𑀁 𑀦𑀢𑁆𑀣𑀻𑀢𑀺 𑀯𑀺𑀕𑀢𑀦𑁆𑀢𑀸, 𑀏𑀯𑀁𑀪𑀽𑀢𑀸 𑀓𑀢𑀸𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀫𑁂𑀯 𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲 𑀞𑀸𑀦𑀁 𑀓𑀫𑁆𑀫𑀝𑁆𑀞𑀸𑀦𑀁, 𑀓𑀫𑁆𑀫𑁂 𑀯𑀸 𑀞𑀸𑀦𑀁 𑀪𑀸𑀯𑀦𑀸𑀭𑀫𑁆𑀪𑁄 𑀓𑀫𑁆𑀫𑀝𑁆𑀞𑀸𑀦𑀁, 𑀢𑀜𑁆𑀘 𑀅𑀦𑀼𑀧𑀲𑁆𑀲𑀦𑀸𑀢𑀺 𑀆𑀳 ‘‘𑀅𑀦𑀼𑀧𑀲𑁆𑀲𑀦𑀸𑀬 𑀓𑀫𑁆𑀫𑀝𑁆𑀞𑀸𑀦’’𑀦𑁆𑀢𑀺, 𑀅𑀦𑀼𑀧𑀲𑁆𑀲𑀦𑀸𑀬 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩𑁬𑁩. 𑀲𑀫𑁆𑀧𑀚𑀸𑀦𑀲𑁆𑀲 ¶ 𑀯𑁂𑀤𑀺𑀬𑀦𑀁 𑀲𑀫𑁆𑀧𑀚𑀸𑀦𑀯𑁂𑀤𑀺𑀬𑀦𑀁. 𑀯𑀢𑁆𑀣𑀼𑀦𑁆𑀢𑀺 𑀲𑀼𑀔𑀸𑀤𑀻𑀦𑀁 𑀆𑀭𑀫𑁆𑀫𑀡𑀫𑀸𑀳, 𑀢𑁂𑀦 𑀯𑀢𑁆𑀣𑀼 𑀆𑀭𑀫𑁆𑀫𑀡𑀁 𑀏𑀢𑀺𑀲𑁆𑀲𑀸𑀢𑀺 𑀯𑀢𑁆𑀣𑀼𑀆𑀭𑀫𑁆𑀫𑀡𑀸𑀢𑀺 𑀲𑀫𑀸𑀲𑁄 𑀤𑀝𑁆𑀞𑀩𑁆𑀩𑁄. 𑀯𑁄𑀳𑀸𑀭𑀫𑀢𑁆𑀢𑀁 𑀳𑁄𑀢𑀻𑀢𑀺 𑀏𑀢𑁂𑀦 ‘‘𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’’𑀢𑀺 𑀇𑀤𑀁 𑀯𑁄𑀳𑀸𑀭𑀫𑀢𑁆𑀢𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀯𑀻𑀭𑀺𑀬𑀲𑀫𑀸𑀥𑀺𑀁 𑀬𑁄𑀚𑁂𑀢𑁆𑀯𑀸𑀢𑀺 𑀅𑀥𑀺𑀯𑀸𑀲𑀦𑀯𑀻𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑀸𑀬 𑀢𑀲𑁆𑀲 𑀲𑀫𑀢𑀸𑀬 𑀉𑀪𑀬𑀁 𑀲𑀳 𑀬𑁄𑀚𑁂𑀢𑁆𑀯𑀸. 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀻𑀢𑀺 𑀮𑁄𑀓𑀼𑀢𑁆𑀢𑀭𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀲𑀳. 𑀮𑁄𑀓𑀺𑀬𑀸𑀦𑀫𑁆𑀧𑀺 𑀯𑀸 𑀲𑀢𑀺 𑀉𑀧𑁆𑀧𑀢𑁆𑀢𑀺𑀓𑀸𑀮𑁂 𑀢𑀢𑁆𑀣 𑀲𑀫𑀢𑁆𑀣𑀢𑀁 𑀲𑀦𑁆𑀥𑀸𑀬 ‘‘𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀫𑀲𑀻𑀲𑀻𑀢𑀺 𑀯𑀸𑀭𑀲𑀫𑀲𑀻𑀲𑀻 𑀳𑀼𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀯𑀸𑀭𑀲𑁆𑀲 𑀅𑀦𑀦𑁆𑀢𑀭𑀯𑀸𑀭𑁂 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 ¶ 𑀅𑀢𑁆𑀣𑁄. 𑀲𑀗𑁆𑀔𑁂𑀧𑀫𑀦𑀲𑀺𑀓𑀸𑀭𑀯𑀲𑁂𑀦 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑁂, 𑀯𑀺𑀢𑁆𑀣𑀸𑀭𑀫𑀦𑀲𑀺𑀓𑀸𑀭𑀯𑀲𑁂𑀦 𑀭𑀸𑀳𑀼𑀮𑁄𑀯𑀸𑀤𑀥𑀸𑀢𑀼𑀯𑀺𑀪𑀗𑁆𑀕𑀸𑀤𑀻𑀲𑀼.

𑀨𑀲𑁆𑀲𑀧𑀜𑁆𑀘𑀫𑀓𑁂𑀬𑁂𑀯𑀸𑀢𑀺 𑀏𑀯-𑀲𑀤𑁆𑀤𑁂𑀦 𑀯𑀼𑀢𑁆𑀢𑁂𑀲𑀼 𑀢𑀻𑀲𑀼𑀧𑀺 𑀫𑀼𑀔𑁂𑀲𑀼 𑀧𑀭𑀺𑀕𑁆𑀕𑀳𑀲𑁆𑀲 𑀲𑀫𑀸𑀦𑀢𑀁 𑀤𑀲𑁆𑀲𑁂𑀢𑀺. 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀦𑀺𑀭𑀯𑀲𑁂𑀲𑀭𑀽𑀧𑀧𑀭𑀺𑀕𑁆𑀕𑀳𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 ‘‘𑀯𑀢𑁆𑀣𑀼 𑀦𑀸𑀫 𑀓𑀭𑀚𑀓𑀸𑀬𑁄’’𑀢𑀺 𑀆𑀳, 𑀦 𑀘𑀓𑁆𑀔𑀸𑀤𑀻𑀦𑀺 𑀙𑀯𑀢𑁆𑀣𑀽𑀦𑀻𑀢𑀺. 𑀓𑀭𑀚𑀓𑀸𑀬𑀲𑁆𑀲 𑀧𑀦 𑀯𑀢𑁆𑀣𑀼𑀪𑀸𑀯𑀲𑀸𑀥𑀦𑀢𑁆𑀣𑀁 ‘‘𑀇𑀤𑀜𑁆𑀘 𑀧𑀦 𑀫𑁂 𑀯𑀺𑀜𑁆𑀜𑀸𑀡𑀁 𑀏𑀢𑁆𑀣 𑀲𑀺𑀢𑀁, 𑀏𑀢𑁆𑀣 𑀧𑀝𑀺𑀩𑀤𑁆𑀥’’𑀦𑁆𑀢𑀺 (𑀤𑀻. 𑀦𑀺. 𑁧.𑁨𑁩𑁫; 𑀫. 𑀦𑀺. 𑁨.𑁨𑁫𑁨) 𑀲𑀼𑀢𑁆𑀢𑀁 𑀆𑀪𑀢𑀁.

𑀨𑀲𑁆𑀲𑀯𑀺𑀜𑁆𑀜𑀸𑀡𑀸𑀦𑀁 𑀧𑀸𑀓𑀝𑀢𑀸 𑀓𑁂𑀲𑀜𑁆𑀘𑀺 𑀳𑁄𑀢𑀻𑀢𑀺 𑀬𑁂𑀲𑀁 𑀦 𑀳𑁄𑀢𑀺, 𑀢𑁂 𑀲𑀦𑁆𑀥𑀸𑀬𑀸𑀳 ‘‘𑀨𑀲𑁆𑀲𑀯𑀲𑁂𑀦 𑀯𑀸 𑀳𑀺…𑀧𑁂… 𑀦 𑀧𑀸𑀓𑀝𑀁 𑀳𑁄𑀢𑀻’’𑀢𑀺. 𑀢𑁂𑀲𑀁 𑀧𑀦 𑀅𑀜𑁆𑀜𑁂𑀲𑀜𑁆𑀘 𑀲𑀩𑁆𑀩𑁂𑀲𑀁 𑀯𑁂𑀦𑁂𑀬𑁆𑀬𑀸𑀦𑀁 𑀯𑁂𑀤𑀦𑀸 𑀧𑀸𑀓𑀝𑀸𑀢𑀺 𑀆𑀳 ‘‘𑀯𑁂𑀤𑀦𑀸𑀯𑀲𑁂𑀦 𑀧𑀦 𑀧𑀸𑀓𑀝𑀁 𑀳𑁄𑀢𑀻’’𑀢𑀺. 𑀲𑀢𑀥𑁄𑀢𑀲𑀧𑁆𑀧𑀺 𑀦𑀸𑀫 𑀲𑀢𑀯𑀸𑀭𑀁 𑀯𑀺𑀮𑀸𑀧𑁂𑀢𑁆𑀯𑀸 𑀯𑀺𑀮𑀸𑀧𑁂𑀢𑁆𑀯𑀸 𑀉𑀤𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀉𑀤𑁆𑀥𑀭𑀺𑀢𑁆𑀯𑀸 𑀕𑀳𑀺𑀢𑀲𑀧𑁆𑀧𑀺.

𑀯𑀺𑀦𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀘𑀢𑀼𑀓𑁆𑀔𑀦𑁆𑀥𑀲𑀫𑀼𑀤𑀸𑀬𑀢𑁄 𑀯𑀺𑀲𑀼𑀁 𑀉𑀤𑁆𑀥𑀭𑀺𑀢𑁆𑀯𑀸. 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑀸𑀤𑀻𑀲𑀼 𑀓𑀢𑁆𑀣𑀘𑀺 𑀧𑀞𑀫𑀁 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀯𑀢𑁆𑀯𑀸 𑀧𑀘𑁆𑀙𑀸 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀯𑁂𑀤𑀦𑀸𑀯𑀲𑁂𑀦 𑀯𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀤𑀲𑁆𑀲𑀺𑀢𑀁. 𑀓𑀢𑁆𑀣𑀘𑀺 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀏𑀯 𑀯𑁂𑀤𑀦𑀸𑀯𑀲𑁂𑀦 𑀅𑀭𑀽𑀧𑀭𑀸𑀲𑀺𑀢𑁄, 𑀜𑀸𑀢𑀧𑀭𑀺𑀜𑁆𑀜𑀸𑀬 𑀧𑀭𑀺𑀜𑁆𑀜𑀸𑀢𑀢𑁄 𑀯𑀸 𑀭𑀽𑀧𑀸𑀭𑀽𑀧𑀭𑀸𑀲𑀺𑀢𑁄 𑀯𑀸 𑀯𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀤𑀲𑁆𑀲𑀺𑀢𑀁. 𑀢𑀢𑁆𑀣𑀸𑀧𑀺 𑀬𑁂𑀲𑀼 𑀧𑀞𑀫𑀁 𑀜𑀸𑀢𑀧𑀭𑀺𑀜𑁆𑀜𑀸 𑀯𑀼𑀢𑁆𑀢𑀸, 𑀢𑁂𑀲𑀼 𑀢𑀤𑀦𑁆𑀢𑁄𑀕𑀥𑀁 ¶ . 𑀬𑁂𑀲𑀼 𑀦 𑀯𑀼𑀢𑁆𑀢𑀸, 𑀢𑁂𑀲𑀼 𑀘 𑀯𑁂𑀤𑀦𑀸𑀬 𑀆𑀭𑀫𑁆𑀫𑀡𑀫𑀢𑁆𑀢𑀁 𑀲𑀁𑀔𑀺𑀢𑁆𑀢𑀁 𑀧𑀸𑀴𑀺𑀅𑀦𑀸𑀭𑀼𑀴𑁆𑀳𑀁 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀧𑀞𑀫𑀁 𑀓𑀣𑀺𑀢𑀢𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

‘‘𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸𑀦𑀁 𑀥𑀫𑁆𑀫𑀸𑀦𑀁 𑀇𑀝𑁆𑀞𑀸𑀦𑀁 𑀓𑀦𑁆𑀢𑀸𑀦’’𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁩𑁦𑁬) 𑀦𑀬𑁂𑀦 𑀯𑀼𑀢𑁆𑀢𑀁 𑀙𑀕𑁂𑀳𑀲𑁆𑀲𑀺𑀢𑀲𑁄𑀫𑀦𑀲𑁆𑀲𑀁 𑀧𑀜𑁆𑀘𑀓𑀸𑀫𑀕𑀼𑀡𑁂𑀲𑀼 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀦𑁄 𑀏𑀯 𑀳𑁄𑀢𑀻𑀢𑀺 𑀆𑀳 ‘‘𑀧𑀜𑁆𑀘𑀓𑀸𑀫𑀕𑀼𑀡𑀸𑀫𑀺𑀲𑀦𑀺𑀲𑁆𑀲𑀺𑀢𑀸 𑀙 𑀕𑁂𑀳𑀲𑁆𑀲𑀺𑀢𑀲𑁄𑀫𑀦𑀲𑁆𑀲𑀯𑁂𑀤𑀦𑀸’’𑀢𑀺.

𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩𑁬𑁫. 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀸𑀦𑀁 ¶ 𑀥𑀫𑁆𑀫𑀸𑀦𑀁 𑀓𑁂𑀳𑀺𑀘𑀺 𑀓𑀺𑀮𑁂𑀲𑁂𑀳𑀺 𑀯𑀺𑀧𑁆𑀧𑀬𑁄𑀕𑁂𑀧𑀺 𑀲𑀢𑀺 𑀬𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸, 𑀢𑁂𑀳𑀺 𑀲𑀁𑀓𑀺𑀮𑁂𑀲𑀪𑀸𑀯𑁂𑀦 𑀲𑀤𑀺𑀲𑁂𑀳𑀺 𑀲𑀁𑀓𑀺𑀮𑀺𑀝𑁆𑀞𑀢𑁆𑀢𑀸 𑀇𑀢𑀭𑁂𑀳𑀺𑀧𑀺 𑀦 𑀯𑀺𑀲𑀼𑀤𑁆𑀥𑀢𑀸 𑀳𑁄𑀢𑀻𑀢𑀺 𑀆𑀳 ‘‘𑀦 𑀧𑀘𑁆𑀙𑀺𑀫𑀧𑀤𑀁 𑀪𑀚𑀦𑁆𑀢𑀻’’𑀢𑀺. 𑀤𑀼𑀯𑀺𑀥𑀦𑁆𑀢𑀺 𑀯𑀺𑀲𑀼𑀁 𑀯𑀘𑀦𑀁 𑀲𑀭𑀸𑀕𑀲𑀤𑁄𑀲𑁂𑀳𑀺 𑀯𑀺𑀲𑀺𑀝𑁆𑀞𑀕𑁆𑀕𑀳𑀡𑀢𑁆𑀣𑀁. 𑀅𑀯𑀺𑀧𑀲𑁆𑀲𑀦𑀼𑀧𑀕𑀢𑁆𑀢𑀸 ‘‘𑀇𑀥 𑀑𑀓𑀸𑀲𑁄𑀯 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁.

𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀦𑀺𑀤𑁆𑀤𑁂𑀲𑁄

𑀓. 𑀦𑀻𑀯𑀭𑀡𑀧𑀩𑁆𑀩𑀯𑀡𑁆𑀡𑀦𑀸

𑁩𑁬𑁭. 𑀓𑀡𑁆𑀳𑀲𑀼𑀓𑁆𑀓𑀸𑀦𑀁 𑀬𑀼𑀕𑀦𑀤𑁆𑀥𑀢𑀸 𑀦𑀢𑁆𑀣𑀻𑀢𑀺 𑀧𑀚𑀸𑀦𑀦𑀓𑀸𑀮𑁂 𑀅𑀪𑀸𑀯𑀸 ‘‘𑀅𑀪𑀺𑀡𑁆𑀳𑀲𑀫𑀼𑀤𑀸𑀘𑀸𑀭𑀯𑀲𑁂𑀦𑀸’’𑀢𑀺 𑀆𑀳.

𑀲𑀼𑀪𑀫𑁆𑀧𑀻𑀢𑀺 ¶ 𑀓𑀸𑀫𑀘𑁆𑀙𑀦𑁆𑀤𑁄𑀧𑀺. 𑀲𑁄 𑀳𑀺 𑀅𑀢𑁆𑀢𑀦𑁄 𑀕𑀳𑀡𑀸𑀓𑀸𑀭𑁂𑀦 ‘‘𑀲𑀼𑀪’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑁂𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀫𑀸𑀦𑀓𑀲𑁆𑀲 𑀅𑀜𑁆𑀜𑀲𑁆𑀲 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀦𑀺𑀫𑀺𑀢𑁆𑀢𑀢𑁆𑀢𑀸 ‘‘𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀘𑀸𑀢𑀺. 𑀆𑀓𑀗𑁆𑀔𑀺𑀢𑀲𑁆𑀲 𑀳𑀺𑀢𑀲𑀼𑀔𑀲𑁆𑀲 𑀅𑀦𑀼𑀧𑀸𑀬𑀪𑀽𑀢𑁄 𑀫𑀦𑀲𑀺𑀓𑀸𑀭𑁄 𑀅𑀦𑀼𑀧𑀸𑀬𑀫𑀦𑀲𑀺𑀓𑀸𑀭𑁄. 𑀢𑀢𑁆𑀣𑀸𑀢𑀺 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂 𑀆𑀭𑀫𑁆𑀫𑀡𑀪𑀽𑀢𑁂 𑀘 𑀤𑀼𑀯𑀺𑀥𑁂𑀧𑀺 𑀲𑀼𑀪𑀦𑀺𑀫𑀺𑀢𑁆𑀢𑁂.

𑀅𑀲𑀼𑀪𑀫𑁆𑀧𑀻𑀢𑀺 𑀅𑀲𑀼𑀪𑀚𑁆𑀛𑀸𑀦𑀫𑁆𑀧𑀺. 𑀢𑀁 𑀧𑀦 𑀤𑀲𑀲𑀼 𑀅𑀲𑀼𑀪𑁂𑀲𑀼 𑀓𑁂𑀲𑀸𑀤𑀻𑀲𑀼 𑀘 𑀧𑀯𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀓𑁂𑀲𑀸𑀤𑀻𑀲𑀼 𑀳𑀺 𑀲𑀜𑁆𑀜𑀸 𑀅𑀲𑀼𑀪𑀲𑀜𑁆𑀜𑀸𑀢𑀺 𑀕𑀺𑀭𑀺𑀫𑀸𑀦𑀦𑁆𑀤𑀲𑀼𑀢𑁆𑀢𑁂 𑀯𑀼𑀢𑁆𑀢𑀸𑀢𑀺. 𑀏𑀢𑁆𑀣 𑀘𑀢𑀼𑀩𑁆𑀩𑀺𑀥𑀲𑁆𑀲𑀧𑀺 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑁆𑀲 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑁆𑀲 𑀘 𑀤𑀲𑁆𑀲𑀦𑀁 𑀦𑀺𑀭𑀯𑀲𑁂𑀲𑀤𑀲𑁆𑀲𑀦𑀢𑁆𑀣𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀲𑀼 𑀧𑀦 𑀅𑀲𑀼𑀪𑁂 𑀲𑀼𑀪𑀦𑁆𑀢𑀺 𑀅𑀲𑀼𑀪𑀦𑁆𑀢𑀺 𑀘 𑀫𑀦𑀲𑀺𑀓𑀸𑀭𑁄 𑀇𑀥𑀸𑀥𑀺𑀧𑁆𑀧𑁂𑀢𑁄, 𑀢𑀤𑀦𑀼𑀓𑀼𑀮𑀢𑁆𑀢𑀸 𑀯𑀸 𑀇𑀢𑀭𑁂𑀧𑀻𑀢𑀺.

𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀦𑁄 𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀯𑀸𑀪𑀸𑀯𑀸 𑀑𑀢𑀸𑀭𑀁 𑀅𑀮𑀪𑀫𑀸𑀦𑁄 𑀓𑀸𑀫𑀭𑀸𑀕𑁄 𑀧𑀳𑀻𑀬𑀢𑀻𑀢𑀺 𑀯𑀤𑀦𑁆𑀢𑀺. 𑀪𑁄𑀚𑀦𑀦𑀺𑀲𑁆𑀲𑀺𑀢𑀁 𑀧𑀦 𑀆𑀳𑀸𑀭𑁂𑀧𑀝𑀺𑀓𑀽𑀮𑀲𑀜𑁆𑀜𑀁, 𑀢𑀩𑁆𑀩𑀺𑀧𑀭𑀺𑀡𑀸𑀫𑀲𑁆𑀲 𑀢𑀤𑀸𑀥𑀸𑀭𑀲𑁆𑀲 𑀢𑀲𑁆𑀲 𑀘 𑀉𑀧𑀦𑀺𑀲𑁆𑀲𑀬𑀪𑀽𑀢𑀲𑁆𑀲 𑀅𑀲𑀼𑀪𑀢𑀸𑀤𑀺𑀤𑀲𑁆𑀲𑀦𑀁, 𑀓𑀸𑀬𑀲𑁆𑀲 𑀘 𑀆𑀳𑀸𑀭𑀝𑁆𑀞𑀺𑀢𑀺𑀓𑀢𑀸𑀤𑀺𑀤𑀲𑁆𑀲𑀦𑀁 𑀲𑁄 ¶ 𑀉𑀧𑁆𑀧𑀸𑀤𑁂𑀢𑀻𑀢𑀺 𑀢𑀲𑁆𑀲 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀬𑀢𑁂𑀯, 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂𑀦 𑀲𑀩𑁆𑀩𑁄𑀧𑀺 𑀮𑁄𑀪𑁄 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀦𑁆𑀢𑀺 𑀆𑀳 ‘‘𑀅𑀭𑀳𑀢𑁆𑀢𑀫𑀕𑁆𑀕𑁂𑀦𑀸’’𑀢𑀺.

𑀑𑀤𑀺𑀲𑁆𑀲𑀓𑀸𑀦𑁄𑀤𑀺𑀲𑁆𑀲𑀓𑀤𑀺𑀲𑀸𑀨𑀭𑀡𑀸𑀦𑀦𑁆𑀢𑀺 𑀅𑀢𑁆𑀢𑀕𑀭𑀼𑀅𑀢𑀺𑀧𑁆𑀧𑀺𑀬𑀲𑀳𑀸𑀬𑀫𑀚𑁆𑀛𑀢𑁆𑀢𑀯𑀲𑁂𑀦 𑀑𑀤𑀺𑀲𑁆𑀲𑀓𑀢𑀸, 𑀲𑀻𑀫𑀸𑀪𑁂𑀤𑁂 𑀓𑀢𑁂 𑀅𑀦𑁄𑀤𑀺𑀲𑁆𑀲𑀓𑀢𑀸, 𑀏𑀓𑀤𑀺𑀲𑀸𑀨𑀭𑀡𑀯𑀲𑁂𑀦 𑀤𑀺𑀲𑀸𑀨𑀭𑀡𑀢𑀸 𑀫𑁂𑀢𑁆𑀢𑀸𑀬 𑀉𑀕𑁆𑀕𑀳𑀡𑁂 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀳𑀸𑀭𑀭𑀘𑁆𑀙𑀸𑀕𑀸𑀫𑀸𑀤𑀺𑀯𑀲𑁂𑀦 𑀯𑀸 𑀑𑀤𑀺𑀲𑁆𑀲𑀓𑀤𑀺𑀲𑀸𑀨𑀭𑀡𑀁, 𑀯𑀺𑀳𑀸𑀭𑀸𑀤𑀺𑀉𑀤𑁆𑀤𑁂𑀲𑀭𑀳𑀺𑀢𑀁 𑀧𑀼𑀭𑀢𑁆𑀣𑀺𑀫𑀸𑀤𑀺𑀤𑀺𑀲𑀸𑀯𑀲𑁂𑀦 𑀅𑀦𑁄𑀤𑀺𑀲𑁆𑀲𑀓𑀤𑀺𑀲𑀸𑀨𑀭𑀡𑀦𑁆𑀢𑀺 𑀏𑀯𑀁 𑀯𑀸 𑀤𑁆𑀯𑀺𑀥𑀸 𑀉𑀕𑁆𑀕𑀳𑀁 𑀲𑀦𑁆𑀥𑀸𑀬 ‘‘𑀑𑀤𑀺𑀲𑁆𑀲𑀓𑀸𑀦𑁄𑀤𑀺𑀲𑁆𑀲𑀓𑀤𑀺𑀲𑀸𑀨𑀭𑀡𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀕𑁆𑀕𑀳𑁄 𑀘 𑀬𑀸𑀯 𑀉𑀧𑀘𑀸𑀭𑀸 𑀤𑀝𑁆𑀞𑀩𑁆𑀩𑁄, 𑀉𑀕𑁆𑀕𑀳𑀺𑀢𑀸𑀬 𑀆𑀲𑁂𑀯𑀦𑀸 𑀪𑀸𑀯𑀦𑀸. 𑀢𑀢𑁆𑀣 ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀧𑀸𑀡𑀸 𑀪𑀽𑀢𑀸 𑀧𑀼𑀕𑁆𑀕𑀮𑀸 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑀸’’𑀢𑀺 𑀏𑀢𑁂𑀲𑀁 𑀯𑀲𑁂𑀦 𑀧𑀜𑁆𑀘𑀯𑀺𑀥𑀸, 𑀏𑀓𑁂𑀓𑀲𑁆𑀫𑀺𑀁 ‘‘𑀅𑀯𑁂𑀭𑀸 𑀳𑁄𑀦𑁆𑀢𑀼, 𑀅𑀩𑁆𑀬𑀸𑀧𑀚𑁆𑀚𑀸, 𑀅𑀦𑀻𑀖𑀸, 𑀲𑀼𑀔𑀻 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀦𑁆𑀢𑀽’’𑀢𑀺 𑀘𑀢𑀼𑀥𑀸 𑀧𑀯𑀢𑁆𑀢𑀺𑀢𑁄 𑀯𑀻𑀲𑀢𑀺𑀯𑀺𑀥𑀸 𑀯𑀸 𑀅𑀦𑁄𑀥𑀺𑀲𑁄𑀨𑀭𑀡𑀸 𑀫𑁂𑀢𑁆𑀢𑀸, ‘‘𑀲𑀩𑁆𑀩𑀸 𑀇𑀢𑁆𑀣𑀺𑀬𑁄 𑀧𑀼𑀭𑀺𑀲𑀸 𑀅𑀭𑀺𑀬𑀸 𑀅𑀦𑀭𑀺𑀬𑀸 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀯𑀺𑀦𑀺𑀧𑀸𑀢𑀺𑀓𑀸’’𑀢𑀺 𑀲𑀢𑁆𑀢𑁄𑀥𑀺𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀸 𑀲𑀢𑁆𑀢𑀯𑀺𑀥𑀸, 𑀅𑀝𑁆𑀞𑀯𑀻𑀲𑀢𑀺𑀯𑀺𑀥𑀸 𑀯𑀸 𑀑𑀥𑀺𑀲𑁄𑀨𑀭𑀡𑀸 𑀫𑁂𑀢𑁆𑀢𑀸, 𑀤𑀲𑀳𑀺 𑀤𑀺𑀲𑀸𑀳𑀺 𑀤𑀺𑀲𑁄𑀥𑀺𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀸 𑀤𑀲𑀯𑀺𑀥𑀸 𑀘 𑀤𑀺𑀲𑀸𑀨𑀭𑀡𑀸 𑀫𑁂𑀢𑁆𑀢𑀸, 𑀏𑀓𑁂𑀓𑀸𑀬 𑀯𑀸 𑀤𑀺𑀲𑀸𑀬 𑀲𑀢𑁆𑀢𑀸𑀤𑀺𑀇𑀢𑁆𑀣𑀺𑀆𑀤𑀺𑀅𑀯𑁂𑀭𑀸𑀤𑀺𑀬𑁄𑀕𑁂𑀦 𑀅𑀲𑀻𑀢𑀸𑀥𑀺𑀓𑀘𑀢𑀼𑀲𑀢𑀧𑁆𑀧𑀪𑁂𑀤𑀸 𑀅𑀦𑁄𑀥𑀺𑀲𑁄𑀑𑀥𑀺𑀲𑁄𑀨𑀭𑀡𑀸 𑀯𑁂𑀤𑀺𑀢𑀩𑁆𑀩𑀸.

𑀓𑀸𑀬𑀯𑀺𑀦𑀸𑀫𑀦𑀸𑀢𑀺 ¶ 𑀓𑀸𑀬𑀲𑁆𑀲 𑀯𑀺𑀯𑀺𑀥𑁂𑀦 𑀆𑀓𑀸𑀭𑁂𑀦 𑀦𑀸𑀫𑀦𑀸.

𑀅𑀢𑀺𑀪𑁄𑀚𑀦𑁂 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄𑀢𑀺 𑀅𑀢𑀺𑀪𑁄𑀚𑀦𑁂 𑀣𑀺𑀦𑀫𑀺𑀤𑁆𑀥𑀲𑁆𑀲 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄, ‘‘𑀏𑀢𑁆𑀢𑀓𑁂 𑀪𑀼𑀢𑁆𑀢𑁂 𑀣𑀺𑀦𑀫𑀺𑀤𑁆𑀥𑀲𑁆𑀲 𑀓𑀸𑀭𑀡𑀁 𑀳𑁄𑀢𑀺, 𑀏𑀢𑁆𑀢𑀓𑁂 𑀦 𑀳𑁄𑀢𑀻’’𑀢𑀺 𑀣𑀺𑀦𑀫𑀺𑀤𑁆𑀥𑀲𑁆𑀲 𑀓𑀸𑀭𑀡𑀸𑀓𑀸𑀭𑀡𑀕𑁆𑀕𑀸𑀳𑁄𑀢𑀺 𑀅𑀢𑁆𑀣𑁄. 𑀥𑀼𑀢𑀗𑁆𑀕𑀸𑀦𑀁 𑀯𑀻𑀭𑀺𑀬𑀦𑀺𑀲𑁆𑀲𑀺𑀢𑀢𑁆𑀢𑀸 𑀆𑀳 ‘‘𑀥𑀼𑀢𑀗𑁆𑀕𑀦𑀺𑀲𑁆𑀲𑀺𑀢𑀲𑀧𑁆𑀧𑀸𑀬𑀓𑀣𑀸𑀬𑀧𑀻’’𑀢𑀺.

𑀓𑀼𑀓𑁆𑀓𑀼𑀘𑁆𑀘𑀫𑁆𑀧𑀺 𑀓𑀢𑀸𑀓𑀢𑀸𑀦𑀼𑀲𑁄𑀘𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀉𑀤𑁆𑀥𑀘𑁆𑀘𑁂𑀦 𑀲𑀫𑀸𑀦𑀮𑀓𑁆𑀔𑀡𑀁 𑀅𑀯𑀽𑀧𑀲𑀫𑀲𑀪𑀸𑀯𑀫𑁂𑀯𑀸𑀢𑀺 𑀘𑁂𑀢𑀲𑁄 𑀅𑀯𑀽𑀧𑀲𑀫𑁄 ‘‘𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀫𑁂𑀯𑀸’’𑀢𑀺 𑀯𑀼𑀢𑁆𑀢𑁄.

𑀩𑀳𑀼𑀲𑁆𑀲𑀼𑀢𑀲𑁆𑀲 𑀕𑀦𑁆𑀣𑀢𑁄 𑀘 𑀅𑀢𑁆𑀣𑀢𑁄 𑀘 𑀅𑀢𑁆𑀣𑀸𑀤𑀻𑀦𑀺 𑀯𑀺𑀘𑀺𑀦𑀦𑁆𑀢𑀲𑁆𑀲 𑀘𑁂𑀢𑀲𑁄 𑀯𑀺𑀓𑁆𑀔𑁂𑀧𑁄 𑀦 𑀳𑁄𑀢𑀺 𑀬𑀣𑀸𑀯𑀺𑀥𑀺𑀧𑀝𑀺𑀧𑀢𑁆𑀢𑀺𑀬𑀸 𑀬𑀣𑀸𑀦𑀼𑀭𑀽𑀧𑀧𑀢𑀺𑀓𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀓𑀢𑀸𑀓𑀢𑀸𑀦𑀼𑀲𑁄𑀘𑀦𑀜𑁆𑀘𑀸𑀢𑀺 ‘‘𑀩𑀸𑀳𑀼𑀲𑀘𑁆𑀘𑁂𑀦𑀧𑀺 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀻𑀬𑀢𑀻’’𑀢𑀺 𑀆𑀳. 𑀯𑀼𑀟𑁆𑀠𑀲𑁂𑀯𑀺𑀢𑀸 𑀘 𑀯𑀼𑀟𑁆𑀠𑀲𑀻𑀮𑀺𑀢𑀁 𑀆𑀯𑀳𑀢𑀻𑀢𑀺 𑀘𑁂𑀢𑁄𑀯𑀽𑀧𑀲𑀫𑀓𑀭𑀢𑁆𑀢𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀧𑁆𑀧𑀳𑀸𑀦𑀓𑀸𑀭𑀺𑀢𑀸 ¶ 𑀯𑀼𑀢𑁆𑀢𑀸. 𑀯𑀼𑀟𑁆𑀠𑀢𑀁 𑀧𑀦 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀯𑀺𑀦𑀬𑀥𑀭𑀸 𑀓𑀼𑀓𑁆𑀓𑀼𑀘𑁆𑀘𑀯𑀺𑀦𑁄𑀤𑀓𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑀸 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 𑀞𑀸𑀦𑀻𑀬𑀸, 𑀯𑀺𑀘𑀺𑀓𑀺𑀘𑁆𑀙𑀸𑀬 𑀞𑀸𑀦𑀻𑀬𑀸 𑀯𑀺𑀘𑀺𑀓𑀺𑀘𑁆𑀙𑀸𑀞𑀸𑀦𑀻𑀬𑀸. 𑀞𑀸𑀢𑀩𑁆𑀩𑀸𑀢𑀺 𑀯𑀸 𑀞𑀸𑀦𑀻𑀬𑀸, 𑀯𑀺𑀘𑀺𑀓𑀺𑀘𑁆𑀙𑀸 𑀞𑀸𑀦𑀻𑀬𑀸 𑀏𑀢𑁂𑀲𑀽𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀞𑀸𑀦𑀻𑀬𑀸.

𑀓𑀸𑀫𑀁 𑀩𑀳𑀼𑀲𑁆𑀲𑀼𑀢𑀢𑀸𑀧𑀭𑀺𑀧𑀼𑀘𑁆𑀙𑀓𑀢𑀸𑀳𑀺 𑀅𑀝𑁆𑀞𑀯𑀢𑁆𑀣𑀼𑀓𑀸𑀧𑀺 𑀯𑀺𑀘𑀺𑀓𑀺𑀘𑁆𑀙𑀸 𑀧𑀳𑀻𑀬𑀢𑀺, 𑀢𑀣𑀸𑀧𑀺 𑀭𑀢𑀦𑀢𑁆𑀢𑀬𑀯𑀺𑀘𑀺𑀓𑀺𑀘𑁆𑀙𑀸𑀫𑀽𑀮𑀺𑀓𑀸 𑀲𑁂𑀲𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀓𑀢𑁆𑀯𑀸 𑀆𑀳 ‘‘𑀢𑀻𑀡𑀺 𑀭𑀢𑀦𑀸𑀦𑀺 𑀆𑀭𑀩𑁆𑀪𑀸’’𑀢𑀺. 𑀯𑀺𑀦𑀬𑁂 𑀧𑀓𑀢𑀜𑁆𑀜𑀼𑀢𑀸 ‘‘𑀲𑀺𑀓𑁆𑀔𑀸𑀬 𑀓𑀗𑁆𑀔𑀢𑀻’’𑀢𑀺 (𑀥. 𑀲. 𑁧𑁦𑁦𑁮; 𑀯𑀺𑀪. 𑁯𑁧𑁫) 𑀯𑀼𑀢𑁆𑀢𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀳𑀸𑀦𑀁 𑀓𑀭𑁄𑀢𑀻𑀢𑀺 𑀆𑀳 ‘‘𑀯𑀺𑀦𑀬𑁂 𑀘𑀺𑀡𑁆𑀡𑀯𑀲𑀻𑀪𑀸𑀯𑀲𑁆𑀲𑀧𑀻’’𑀢𑀺. 𑀑𑀓𑀧𑁆𑀧𑀦𑀺𑀬𑀲𑀤𑁆𑀥𑀸𑀲𑀗𑁆𑀔𑀸𑀢𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑀲𑁆𑀲𑀸𑀢𑀺 𑀅𑀦𑀼𑀧𑀯𑀺𑀲𑀦𑀲𑀤𑁆𑀥𑀸𑀲𑀗𑁆𑀔𑀸𑀢𑀅𑀥𑀺𑀫𑁄𑀓𑁆𑀔𑁂𑀦 𑀅𑀥𑀺𑀫𑀼𑀘𑁆𑀘𑀦𑀩𑀳𑀼𑀮𑀲𑁆𑀲. 𑀅𑀥𑀺𑀫𑀼𑀘𑁆𑀘𑀦𑀜𑁆𑀘 𑀅𑀥𑀺𑀫𑁄𑀓𑁆𑀔𑀼𑀧𑁆𑀧𑀸𑀤𑀦𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀤𑁆𑀥𑀸𑀬 𑀯𑀸 𑀦𑀺𑀦𑁆𑀦𑀢𑀸 𑀅𑀥𑀺𑀫𑀼𑀢𑁆𑀢𑀺.

𑀦𑀻𑀯𑀭𑀡𑀧𑀩𑁆𑀩𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀔. 𑀩𑁄𑀚𑁆𑀛𑀗𑁆𑀕𑀧𑀩𑁆𑀩𑀯𑀡𑁆𑀡𑀦𑀸

𑀔𑀦𑁆𑀥𑀸𑀤𑀺𑀧𑀸𑀴𑀺𑀬𑀸 ¶ 𑀅𑀢𑁆𑀣𑁄 𑀔𑀦𑁆𑀥𑀸𑀤𑀻𑀦𑀁 𑀅𑀢𑁆𑀣𑁄𑀢𑀺 𑀓𑀢𑁆𑀯𑀸 𑀆𑀳 ‘‘𑀔𑀦𑁆𑀥…𑀧𑁂… 𑀯𑀺𑀧𑀲𑁆𑀲𑀦𑀸𑀦𑀁 𑀅𑀢𑁆𑀣𑀲𑀦𑁆𑀦𑀺𑀲𑁆𑀲𑀺𑀢𑀧𑀭𑀺𑀧𑀼𑀘𑁆𑀙𑀸𑀩𑀳𑀼𑀮𑀢𑀸’’𑀢𑀺. 𑀢𑁂𑀦 𑀧𑀸𑀴𑀺𑀫𑀼𑀢𑁆𑀢𑀓𑀧𑀼𑀘𑁆𑀙𑀸 𑀦 𑀢𑀣𑀸 𑀧𑀜𑁆𑀜𑀸𑀲𑀁𑀯𑀢𑁆𑀢𑀦𑀺𑀓𑀸, 𑀬𑀣𑀸 𑀅𑀢𑁆𑀣𑀧𑀝𑀺𑀧𑀼𑀘𑁆𑀙𑀸𑀢𑀺 𑀤𑀲𑁆𑀲𑁂𑀢𑀺.

𑀫𑀦𑁆𑀤𑀢𑁆𑀢𑀸 𑀅𑀕𑁆𑀕𑀺𑀚𑀸𑀮𑀸𑀤𑀻𑀲𑀼 𑀆𑀧𑁄𑀥𑀸𑀢𑀼𑀆𑀤𑀻𑀦𑀁 𑀯𑀺𑀬 𑀯𑀻𑀭𑀺𑀬𑀸𑀤𑀻𑀦𑀁 𑀲𑀓𑀺𑀘𑁆𑀘𑁂 𑀅𑀲𑀫𑀢𑁆𑀣𑀢𑀸 𑀯𑀼𑀢𑁆𑀢𑀸.

𑀧𑀢𑁆𑀢𑀁 𑀦𑀻𑀳𑀭𑀦𑁆𑀢𑁄𑀯 𑀢𑀁 𑀲𑀼𑀢𑁆𑀯𑀸𑀢𑀺 𑀏𑀢𑁆𑀣 𑀧𑀜𑁆𑀘𑀸𑀪𑀺𑀜𑁆𑀜𑀢𑁆𑀢𑀸 𑀤𑀺𑀩𑁆𑀩𑀲𑁄𑀢𑁂𑀦 𑀅𑀲𑁆𑀲𑁄𑀲𑀻𑀢𑀺 𑀯𑀤𑀦𑁆𑀢𑀺.

𑀧𑀲𑀸𑀤𑀲𑀺𑀦𑁂𑀳𑀸𑀪𑀸𑀯𑁂𑀦𑀸𑀢𑀺 𑀧𑀲𑀸𑀤𑀲𑀗𑁆𑀔𑀸𑀢𑀲𑁆𑀲 𑀲𑀺𑀦𑁂𑀳𑀲𑁆𑀲 𑀅𑀪𑀸𑀯𑁂𑀦. 𑀕𑀤𑁆𑀭𑀪𑀧𑀺𑀝𑁆𑀞𑁂 𑀮𑀽𑀔𑀭𑀚𑁄 𑀮𑀽𑀔𑀢𑀭𑁄 𑀳𑀼𑀢𑁆𑀯𑀸 𑀤𑀺𑀲𑁆𑀲𑀢𑀻𑀢𑀺 𑀅𑀢𑀺𑀮𑀽𑀔𑀢𑀸𑀬 𑀢𑀁𑀲𑀤𑀺𑀲𑁂.

𑀲𑀁𑀯𑁂𑀚𑀦𑀧𑀲𑀸𑀤𑀦𑁂𑀳𑀺 𑀢𑁂𑀚𑀦𑀁 𑀢𑁄𑀲𑀦𑀜𑁆𑀘 𑀲𑀫𑁆𑀧𑀳𑀁𑀲𑀦𑀸𑀢𑀺.

𑀩𑁄𑀚𑁆𑀛𑀗𑁆𑀕𑀧𑀩𑁆𑀩𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼𑀤𑁆𑀥𑀯𑀺𑀧𑀲𑁆𑀲𑀦𑀸𑀯𑀲𑁂𑀦 ¶ 𑀧𑀞𑀫𑀲𑁆𑀲 𑀇𑀢𑀭𑁂𑀲𑀜𑁆𑀘 𑀓𑀣𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀲𑀢𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀦𑀸𑀫𑀸𑀢𑀺 𑀆𑀕𑀫𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀏𑀯𑀁 𑀢𑀸𑀯 𑀤𑁂𑀲𑀦𑀸 𑀧𑀼𑀕𑁆𑀕𑀮𑁂 𑀢𑀺𑀝𑁆𑀞𑀢𑀻𑀢𑀺 𑀓𑀸𑀬𑀸𑀦𑀼𑀧𑀲𑁆𑀲𑀻𑀆𑀤𑀻𑀦𑀁 𑀆𑀕𑀫𑀦𑀯𑀲𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀸 𑀲𑀢𑀺𑀧𑀝𑁆𑀞𑀸𑀦𑀤𑁂𑀲𑀦𑀸 𑀧𑀼𑀕𑁆𑀕𑀮𑁂 𑀢𑀺𑀝𑁆𑀞𑀢𑀻𑀢𑀺 𑀅𑀢𑁆𑀣𑁄. 𑀦 𑀳𑀺 𑀲𑀓𑁆𑀓𑀸 𑀏𑀓𑀲𑁆𑀲 𑀅𑀦𑁂𑀓𑀲𑀫𑀗𑁆𑀕𑀺𑀢𑀸 𑀯𑀢𑁆𑀢𑀼𑀁 𑀏𑀓𑀓𑁆𑀔𑀡𑁂 𑀅𑀦𑁂𑀓𑀲𑀢𑀺𑀲𑀫𑁆𑀪𑀯𑀸𑀯𑀩𑁄𑀥𑀧𑀲𑀗𑁆𑀕𑀸, 𑀧𑀼𑀕𑁆𑀕𑀮𑀁 𑀧𑀦 𑀆𑀫𑀲𑀺𑀢𑁆𑀯𑀸 𑀲𑀓𑀺𑀘𑁆𑀘𑀧𑀭𑀺𑀘𑁆𑀙𑀺𑀦𑁆𑀦𑁂 𑀥𑀫𑁆𑀫𑁂 𑀯𑀼𑀘𑁆𑀘𑀫𑀸𑀦𑁂 𑀓𑀺𑀘𑁆𑀘𑀪𑁂𑀤𑁂𑀦 𑀏𑀓𑀺𑀲𑁆𑀲𑀸𑀧𑀺 𑀲𑀢𑀺𑀬𑀸 𑀅𑀦𑁂𑀓𑀦𑀸𑀫𑀢𑀸 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀸𑀬𑁂 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀬𑀣𑀸 𑀳𑀺 𑀧𑀼𑀕𑁆𑀕𑀮𑀓𑀺𑀘𑁆𑀘𑀁 𑀥𑀫𑁆𑀫𑀸 𑀏𑀯𑀸𑀢𑀺 𑀥𑀫𑁆𑀫𑀪𑁂𑀤𑁂𑀦 𑀓𑀸𑀬𑀸𑀦𑀼𑀧𑀲𑁆𑀲𑀻𑀆𑀤𑀺𑀧𑀼𑀕𑁆𑀕𑀮𑀪𑁂𑀤𑁄𑀯 𑀳𑁄𑀢𑀺, 𑀦 𑀏𑀯𑀁 𑀥𑀫𑁆𑀫𑀲𑁆𑀲 𑀥𑀫𑁆𑀫𑁄 𑀓𑀺𑀘𑁆𑀘𑀦𑁆𑀢𑀺 𑀦 𑀥𑀫𑁆𑀫𑀪𑁂𑀤𑁂𑀦 𑀢𑀲𑁆𑀲 𑀪𑁂𑀤𑁄, 𑀢𑀲𑁆𑀫𑀸 𑀏𑀓𑀸𑀯 𑀲𑀢𑀺 𑀘𑀢𑀼𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑀪𑀽𑀢𑀸 𑀫𑀕𑁆𑀕𑁂 𑀲𑀫𑀺𑀤𑁆𑀥𑀸 𑀅𑀦𑀢𑁆𑀣𑀦𑁆𑀢𑀭𑁂𑀦 𑀢𑀧𑁆𑀧𑀳𑀸𑀦𑀓𑀺𑀘𑁆𑀘𑀪𑁂𑀤𑁂𑀦 𑀘𑀢𑁆𑀢𑀸𑀭𑀺 𑀦𑀸𑀫𑀸𑀦𑀺 𑀮𑀪𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁩𑁭𑁪. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 ¶ ‘‘𑀓𑀣𑀜𑁆𑀘 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺? 𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂…𑀧𑁂… 𑀤𑀦𑁆𑀥𑀸𑀪𑀺𑀜𑁆𑀜𑀁 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀢𑀻’’𑀢𑀺𑀆𑀤𑀺𑀦𑀸 𑀆𑀕𑀫𑀦𑀯𑀲𑁂𑀦 𑀯𑀺𑀲𑁂𑀲𑀺𑀢𑀸𑀦𑀺 𑀲𑀢𑀺𑀧𑀝𑁆𑀞𑀸𑀦𑀸𑀦𑀺 𑀧𑀼𑀕𑁆𑀕𑀮𑁂 𑀞𑀧𑁂𑀢𑁆𑀯𑀸 𑀤𑁂𑀲𑁂𑀢𑁆𑀯𑀸 𑀧𑀼𑀦 ‘‘𑀢𑀢𑁆𑀣 𑀓𑀢𑀫𑀁 𑀲𑀢𑀺𑀧𑀝𑁆𑀞𑀸𑀦𑀁? 𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂…𑀧𑁂… 𑀤𑀦𑁆𑀥𑀸𑀪𑀺𑀜𑁆𑀜𑀁…𑀧𑁂… 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀢𑀻’’𑀢𑀺𑀆𑀤𑀺𑀦𑀸 𑀧𑀼𑀕𑁆𑀕𑀮𑀁 𑀅𑀦𑀸𑀫𑀲𑀺𑀢𑁆𑀯𑀸 𑀆𑀕𑀫𑀯𑀺𑀲𑁂𑀲𑀦𑀜𑁆𑀘 𑀅𑀓𑀢𑁆𑀯𑀸 𑀘𑀢𑀼𑀓𑀺𑀘𑁆𑀘𑀲𑀸𑀥𑀓𑁂𑀓𑀲𑀢𑀺𑀯𑀲𑁂𑀦 𑀲𑀼𑀤𑁆𑀥𑀺𑀓𑀲𑀢𑀺𑀧𑀝𑁆𑀞𑀸𑀦𑀦𑀬𑁄 𑀯𑀼𑀢𑁆𑀢𑁄𑀢𑀺 𑀅𑀬𑀫𑁂𑀢𑁆𑀣 𑀦𑀬𑀤𑁆𑀯𑀬𑁂 𑀯𑀺𑀲𑁂𑀲𑁄.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀢𑀺𑀧𑀝𑁆𑀞𑀸𑀦𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀲𑀫𑁆𑀫𑀧𑁆𑀧𑀥𑀸𑀦𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁩𑁯𑁦. 𑀓𑀸𑀭𑀡𑀧𑁆𑀧𑀥𑀸𑀦𑀸𑀢𑀺 ¶ ¶ ‘‘𑀅𑀦𑀼𑀧𑁆𑀧𑀦𑁆𑀦𑀧𑀸𑀧𑀓𑀸𑀦𑀼𑀧𑁆𑀧𑀸𑀤𑀸𑀤𑀺𑀅𑀢𑁆𑀣𑀸’’𑀢𑀺 𑀕𑀳𑀺𑀢𑀸 𑀢𑀣𑁂𑀯 𑀢𑁂 𑀳𑁄𑀦𑁆𑀢𑀻𑀢𑀺 𑀢𑀁 𑀅𑀢𑁆𑀣𑀁 𑀲𑀸𑀥𑁂𑀦𑁆𑀢𑀺𑀬𑁂𑀯𑀸𑀢𑀺 𑀏𑀢𑀲𑁆𑀲 𑀅𑀢𑁆𑀣𑀲𑁆𑀲 𑀤𑀻𑀧𑀓𑁄 𑀲𑀫𑁆𑀫𑀸-𑀲𑀤𑁆𑀤𑁄𑀢𑀺 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀲𑁆𑀲 𑀅𑀦𑀼𑀧𑁆𑀧𑀦𑁆𑀦𑀧𑀸𑀧𑀓𑀸𑀦𑀼𑀧𑁆𑀧𑀸𑀤𑀸𑀤𑀺𑀦𑁄 𑀓𑀸𑀭𑀡𑀪𑀽𑀢𑀸, 𑀧𑀥𑀸𑀦𑀓𑀸𑀭𑀡𑀪𑀽𑀢𑀸𑀢𑀺 𑀅𑀢𑁆𑀣𑁄. 𑀲𑀫𑁆𑀫𑀸𑀲𑀤𑁆𑀤𑀲𑁆𑀲 𑀉𑀧𑀸𑀬𑀬𑁄𑀦𑀺𑀲𑁄𑀅𑀢𑁆𑀣𑀤𑀻𑀧𑀓𑀢𑀁 𑀲𑀦𑁆𑀥𑀸𑀬 ‘‘𑀉𑀧𑀸𑀬𑀧𑁆𑀧𑀥𑀸𑀦𑀸 𑀬𑁄𑀦𑀺𑀲𑁄𑀧𑀥𑀸𑀦𑀸’’𑀢𑀺 𑀯𑀼𑀢𑁆𑀢𑀁. 𑀧𑀝𑀺𑀧𑀦𑁆𑀦𑀓𑁄𑀢𑀺 𑀪𑀸𑀯𑀦𑀫𑀦𑀼𑀬𑀼𑀢𑁆𑀢𑁄. 𑀪𑀼𑀲𑀁 𑀬𑁄𑀕𑁄 𑀧𑀬𑁄𑀕𑁄, 𑀧𑀬𑁄𑀕𑁄𑀯 𑀧𑀭𑀓𑁆𑀓𑀫𑁄 𑀧𑀬𑁄𑀕𑀧𑀭𑀓𑁆𑀓𑀫𑁄. 𑀏𑀢𑀸𑀦𑀻𑀢𑀺 ‘‘𑀯𑀸𑀬𑀫𑀢𑀻’’𑀢𑀺𑀆𑀤𑀻𑀦𑀺 ‘‘𑀆𑀲𑁂𑀯𑀫𑀸𑀦𑁄 𑀯𑀸𑀬𑀫𑀢𑀻’’𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀅𑀦𑀼𑀧𑁆𑀧𑀦𑁆𑀦𑀸𑀢𑀺 𑀅𑀯𑀢𑁆𑀢𑀩𑁆𑀩𑀢𑀁 𑀆𑀧𑀦𑁆𑀦𑀸𑀦𑀦𑁆𑀢𑀺 𑀪𑀽𑀫𑀺𑀮𑀤𑁆𑀥𑀸𑀭𑀫𑁆𑀫𑀡𑀸𑀥𑀺𑀕𑁆𑀕𑀳𑀺𑀢𑀸𑀯𑀺𑀓𑁆𑀔𑀫𑁆𑀪𑀺𑀢𑀸𑀲𑀫𑀼𑀕𑁆𑀖𑀸𑀢𑀺𑀢𑀼𑀧𑁆𑀧𑀦𑁆𑀦𑀸𑀦𑀁.

𑁩𑁯𑁧. 𑀥𑀫𑁆𑀫𑀘𑁆𑀙𑀦𑁆𑀤𑁄𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀻𑀭𑀺𑀬𑀘𑁆𑀙𑀦𑁆𑀤𑀸 𑀯𑀺𑀬 𑀦 𑀅𑀜𑁆𑀜𑁄 𑀥𑀫𑁆𑀫𑁄, 𑀅𑀣 𑀔𑁄 𑀙𑀦𑁆𑀤𑀦𑀺𑀬𑀲𑀪𑀸𑀯𑁄 𑀏𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀪𑀸𑀯𑀘𑁆𑀙𑀦𑁆𑀤𑁄’’𑀢𑀺. 𑀢𑀢𑁆𑀣 ‘‘𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁧𑁦𑁩) 𑀢𑀡𑁆𑀳𑀸 𑀙𑀦𑁆𑀤𑁄𑀢𑀺 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑁄, ‘‘𑀲𑀩𑁆𑀩𑁂𑀯 𑀦𑀼 𑀔𑁄, 𑀫𑀸𑀭𑀺𑀲, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀓𑀦𑁆𑀢𑀯𑀸𑀤𑀸 𑀏𑀓𑀦𑁆𑀢𑀲𑀻𑀮𑀸 𑀏𑀓𑀦𑁆𑀢𑀙𑀦𑁆𑀤𑀸 𑀏𑀓𑀦𑁆𑀢𑀅𑀚𑁆𑀛𑁄𑀲𑀸𑀦𑀸’’𑀢𑀺 (𑀤𑀻. 𑀦𑀺. 𑁨.𑁩𑁬𑁬) 𑀏𑀢𑁆𑀣 𑀤𑀺𑀝𑁆𑀞𑀺, 𑀧𑀫𑀸𑀤𑀦𑀺𑀤𑁆𑀤𑁂𑀲𑁂 ‘‘𑀦𑀺𑀓𑁆𑀔𑀺𑀢𑁆𑀢𑀙𑀦𑁆𑀤𑀢𑀸 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀢𑀸’’𑀢𑀺 𑀯𑀻𑀭𑀺𑀬𑀦𑁆𑀢𑀺 𑀯𑀡𑁆𑀡𑁂𑀢𑀺.

𑁩𑁯𑁪. 𑀯𑀸𑀬𑀫𑀢𑀺 ¶ 𑀯𑀻𑀭𑀺𑀬𑀁 𑀆𑀭𑀪𑀢𑀻𑀢𑀺 𑀧𑀤𑀤𑁆𑀯𑀬𑀲𑁆𑀲𑀧𑀺 𑀦𑀺𑀤𑁆𑀤𑁂𑀲𑁄 𑀯𑀻𑀭𑀺𑀬𑀦𑀺𑀤𑁆𑀤𑁂𑀲𑁄𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀯𑀻𑀭𑀺𑀬𑀦𑀺𑀤𑁆𑀤𑁂𑀲𑁂’’𑀢𑀺.

𑁪𑁦𑁬. 𑀲𑀩𑁆𑀩𑀧𑀼𑀩𑁆𑀩𑀪𑀸𑀕𑁂𑀢𑀺 𑀲𑀩𑁆𑀩𑀫𑀕𑁆𑀕𑀸𑀦𑀁 𑀧𑀼𑀩𑁆𑀩𑀪𑀸𑀕𑁂. 𑀧𑀼𑀭𑀺𑀫𑀲𑁆𑀫𑀺𑀦𑁆𑀢𑀺 ‘‘𑀅𑀦𑀼𑀧𑁆𑀧𑀦𑁆𑀦𑀸 𑀫𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼’’𑀦𑁆𑀢𑀺 𑀏𑀢𑁆𑀣𑀸𑀧𑀺 ‘‘𑀲𑀫𑀣𑀯𑀺𑀧𑀲𑁆𑀲𑀦𑀸𑀯 𑀕𑀳𑁂𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁, 𑀢𑀁 𑀧𑀦 𑀫𑀕𑁆𑀕𑀸𑀦𑀼𑀧𑁆𑀧𑀦𑁆𑀦𑀢𑀸𑀬 𑀪𑀸𑀯𑀢𑁄 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑁂 𑀘 𑀢𑀲𑁆𑀫𑀺𑀁 𑀯𑀝𑁆𑀝𑀸𑀦𑀢𑁆𑀣𑀲𑀁𑀯𑀢𑁆𑀢𑀦𑀢𑁄 𑀦 𑀬𑀼𑀢𑁆𑀢𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀢𑀺.

𑀫𑀳𑀦𑁆𑀢𑀁 ¶ 𑀕𑀸𑀭𑀯𑀁 𑀳𑁄𑀢𑀺, 𑀢𑀲𑁆𑀫𑀸 ‘‘𑀲𑀗𑁆𑀖𑀕𑀸𑀭𑀯𑁂𑀦 𑀬𑀣𑀸𑀭𑀼𑀘𑀺 𑀯𑀺𑀦𑁆𑀤𑀺𑀢𑀼𑀁 𑀦 𑀲𑀓𑁆𑀓𑀸’’𑀢𑀺 𑀲𑀗𑁆𑀖𑁂𑀦 𑀲𑀳 𑀦 𑀦𑀺𑀓𑁆𑀔𑀫𑀺. 𑀅𑀢𑀺𑀫𑀦𑁆𑀤𑀸𑀦𑀺 𑀦𑁄𑀢𑀺 𑀦𑀦𑀼 𑀅𑀢𑀺𑀫𑀦𑁆𑀤𑀸𑀦𑀻𑀢𑀺 𑀅𑀢𑁆𑀣𑁄. 𑀲𑀦𑁆𑀢𑀲𑀫𑀸𑀧𑀢𑁆𑀢𑀺𑀢𑁄 𑀅𑀜𑁆𑀜𑀁 𑀲𑀦𑁆𑀣𑀫𑁆𑀪𑀦𑀓𑀸𑀭𑀡𑀁 𑀩𑀮𑀯𑀁 𑀦𑀢𑁆𑀣𑀻𑀢𑀺 ‘‘𑀢𑀢𑁄 𑀧𑀭𑀺𑀳𑀻𑀦𑀸 𑀲𑀦𑁆𑀣𑀫𑁆𑀪𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻’’𑀢𑀺 𑀆𑀳. 𑀦 𑀳𑀺 𑀫𑀳𑀸𑀭𑀚𑁆𑀚𑀼𑀫𑁆𑀳𑀺 𑀙𑀺𑀦𑁆𑀦𑁂 𑀲𑀼𑀢𑁆𑀢𑀢𑀦𑁆𑀢𑀽 𑀲𑀦𑁆𑀥𑀸𑀭𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀻𑀢𑀺. 𑀲𑀫𑀣𑁂 𑀯𑀢𑁆𑀣𑀼𑀁 𑀤𑀲𑁆𑀲𑁂𑀢𑁆𑀯𑀸 𑀢𑁂𑀦 𑀲𑀫𑀸𑀦𑀕𑀢𑀺𑀓𑀸 𑀯𑀺𑀧𑀲𑁆𑀲𑀦𑀸 𑀘𑀸𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀏𑀯𑀁 𑀉𑀧𑁆𑀧𑀦𑁆𑀦𑀸 𑀲𑀫𑀣𑀯𑀺𑀧𑀲𑁆𑀲𑀦𑀸…𑀧𑁂… 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺.

𑀢𑀢𑁆𑀣 𑀅�